Iragarkia

8. ALDIZKARIA - 2025eko urtarrilaren 14a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

379E/2024 EBAZPENA, azaroaren 11koa, Energia, Enpresa I+G+b eta Ekintzailetzako zuzendari nagusiak emana, zeinaren bidez onesten baita "Irabazi-asmorik gabeko entitateentzako trantsizio energetikorako laguntzak" deialdia. DDBN identifikazioa: 796341.

2023 Horizontea-Nafarroako Energia Planaren (NEP2030) helburuetako bat da energiaren kontsumo efizientea sustatzea, energiaren amaierako kontsumoan energia berriztagarrien ekarpena handitzea eta erregaien erabilera murriztea.

Horregatik, deialdi honen xedea da deskribatu diren helburuak lortzen laguntzea, hiru neurri mota hauen bidez hain zuzen: eraikinen barneko argien instalazioak berritzea energia efizientzia handiagoa lortzearren, energia berriztagarrien instalazioetan inbertsioak egitea, eta energia berriztagarrien eta energia efizientziaren proiektuak idaztea.

Adierazitakoarekin bat, eta erabiliz Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak.

EBAZTEN DUT:

1. Irabazi-asmorik gabeko entitateei trantsizio energetikorako laguntzak emateko 2025eko deialdia onestea.

2. Dirulaguntza arautuko duten oinarriak onestea. Ebazpen honen eranskinetan jasotzen dira.

3. Deialdi honen konpromisoei erantzuteko, aurrekontuko kreditu hauek baimentzen dira:

Halaber, gehienez ere 30.000 euroko kopuru gehigarria finkatzen da, zeinak ez baitu beste deialdi bat beharko dirulaguntzetan erabiltzeko. Gehigarri hori Dirulaguntzei buruzko azaroaren 9ko 11/2005 Foru Legearen 31.3 artikuluak ezartzen duenaren arabera arautuko da. Kopuru gehigarri hori eraginkortasunez erabili ahal izateko, kreditu gehigarria baimendu beharko da, artikulu horretan xedatutako inguruabarren bat gertatzearen ondorioz.

4. Ebazpen hau eta eranskinak Nafarroako Aldizkari Ofizialean argitaratzea.

5. Ebazpen honek ez du administrazio bidea amaitzen, eta haren aurka gora jotzeko errekurtsoa jar dezakete interesdunek, Industriako eta Enpresen Trantsizio Ekologiko eta Digitalerako kontseilariari zuzendua, argitaratu eta biharamunetik hilabeteko epean, bertan espediente kodea adierazita (erreferentzia gisa idazpuruan ageri da: espediente kodea).

Iruñean, 2024ko azaroaren 11n.–Energia, Enpresa I+G+b eta Ekintzailetzako zuzendari nagusia, Garbiñe Basterra Oloriz.

I. ERANSKINA.–OINARRI ARAUTZAILEAK

1. oinarria.–Xedea.

Honako helburu hauek ditu Europako Parlamentuaren eta Kontseiluaren 2018ko maiatzaren 30eko 2018/844 (EB) Zuzentarauak (haren bidez aldatu ziren eraikinen efizientzia energetikoari buruzko 2010/31/EB Zuzentaraua eta efizientzia energetikoari buruzko 2012/27/EB Zuzentaraua):

–Berotegi-efektuko gasen isurketa %40 murriztea 1990eko isurketa-mailen aldean.

–Kontsumitutako energia berriztagarriaren proportzioa handitzea.

–Batasunak dituen helburuen araberako energia aurrezpena lortzea.

Deialdi honen xedea da dirulaguntzak ematea aipatu zuzentarauan jasotako helburuak bete daitezen, zeinak bat baitatoz 2030 Horizontea-Nafarroako Energia Planarekin, irabazi-asmorik gabeko entitateen eguneroko jardunean. Horretarako, dirulaguntzak jaso ditzaketen neurri hauek zehaztu dira (haien ezaugarriak deialdiaren II. eranskinean ageri dira):

2. oinarria.–Onuradunak.

1. Lehenago deskribatutako helburuarekin lotura duten inbertsioak egiten dituzten Nafarroako irabazi-asmorik gabeko entitateak izan daitezke laguntza hauen onuradunak.

Ondorio horietarako, irabazi-asmorik gabeko entitate izanen dira Estatuko Elkarteen Erregistroaren Erregelamendua onesten duen urriaren 23ko 949/2015 Errege Dekretuari jarraikiz erregistratutakoak, betiere, irabazi-asmorik gabeak izanik.

Irabazi-asmorik gabeko entitate dira, orobat, Nafarroako Kooperatiben Erregistroak, Nafarroako Kooperatibei buruzko abenduaren 11ko 14/2006 Foru Legearen 78. artikuluarekin bat etorriz, ekimen sozialeko kooperatiba gisa kalifikatzen dituen kooperatibak, baldin eta beharrezko baldintzak betetzen badituzte.

Oinarri arautzaile hauetan jasotzen diren dirulaguntzen onuradun izan daitezke enplegu zentro berezietako entitate titularrak, berezko nortasun juridikoa badute eta Nafarroako Foru Komunitateko Enplegu Zentro Berezien Erregistro Liburuan halako gisara inskribaturik baldin badaude, Enplegu Zentro Berezien Erregelamendua onesten duen abenduaren 4ko 2273/1985 Errege Dekretuaren 7. artikuluarekin bat, irabazi-asmorik gabekoak badira, eta Nafarroan kalifikazioa jaso ondoren gutxienez bi urteko jarduna badute.

2. Eskatzaileek baldintza hauek bete behar dituzte:

a) Legez eratutako irabazi-asmorik gabeko entitateak izatea, eta, eskaerak aurkezteko epea bukatzen den egunean hala inskribatuta egotea aplikagarria zaien araudian eskatzen den erregistroan.

b) Egoitza fiskala Nafarroan izatea.

c) Haren jarduera ekonomikoak ez dezala kalte nabarmenik eragin Europako Parlamentuaren eta Kontseiluaren 2020ko ekainaren 18ko 2020/852 (EB) Erregelamenduaren 17. artikuluan adierazitako ingurumen-helburuetan. Erregelamendu hori inbertsio jasangarriak errazteko esparrua ezartzeari buruzkoa da eta Taxonomiari buruzko 2019/2088 (EB) Erregelamendua aldatzen du.

d) Inolako administrazio zehapen irmorik edo kondena epai irmorik betetzen ez egotea sexu edo genero diskriminaziotzat hartutako lan praktikak egiteagatik edo onartzeagatik, eta, kasua bada, ez egotea arrazoi horiek direla-eta ezarritako epai edo zehapen bat betetzeko zain.

e) Dirulaguntzei buruzko azaroaren 9ko 11/2005 Foru Legearen 13.2 eta 13.3 artikuluetan onuradun izateko ezarritako debeku-kasuetan ez egotea.

3. Dirulaguntza eskatzeak berekin dakar baimena ematea organo emaileak zuzenean eskuratu ditzan behar diren ziurtagiri telematikoak, frogatzen dutenak eskatzaileak egunean dituela tributu betebeharrak eta Gizarte Segurantzarekikoak. Interesdunak horri uko egiten badio berariaz eskaeran, berak aurkeztu beharko ditu betebehar horietan egunean dagoela frogatzen duten ziurtagiriak.

4. Deialdi honetatik kanpo geratzen dira honako hauek berariaz:

a) Toki-erakundeak eta haien erakunde autonomoak eta enpresa entitate publikoak.

b) Fundazio eta sozietate publikoak, haien partaidetza nagusia toki-erakundeen esku badago.

c) Sindikatuak eta entitate korporatibo profesionalak.

d) Nafarroako Gobernuaren 2025eko Aurrekontu Orokorretan deialdi honen xede diren jarduketak egiteko partida izenduna duten entitateak.

5. Oinarri honetan eskatutako baldintzak betetzen direla egiaztatzeko, laguntza eskaeran jasotako erantzukizunpeko adierazpena aurkeztu beharko da, eta baldintzak betetzen jarraitu beharko da laguntza ordaindu arte.

3. oinarria.–Jarduketa diruz lagungarriak, gastu diruz lagungarriak, lanak gauzatzeko epea eta dirulaguntzaren zenbatekoa.

1. II. eranskinean zehaztutako neurrietan aipatzen diren jarduketak izanen dira dirulaguntzen xede, Nafarroan eginak badira, betiere.

Gastu hauek ez dira diruz lagungarriak izanen:

a) Inbertsioaren edo jarduketaren ondoriozko gastu finantzarioak.

b) BEZa, baldin onuradunak berreskuratzen edo konpentsatzen ahal badu. Halakoetan, eskaeran adierazi beharko da.

2. Gastu diruz lagungarriren bat 30.000 eurotik gorakoa bada (BEZa kanpo, eta obrak gauzatzeko kostuen kasuan), edo 12.000 eurotik gorakoa (ekipo-ondasunak erosteko edo aholkularitza- nahiz laguntza-enpresek zerbitzuak ematen dituzten kasuetan), onuradunak frogatu beharko du hornitzailea efizientzia eta ekonomia irizpideei jarraituz hautatu duela, gutxienez hiru eskaintza aurkeztuz eta hautatutakoa aukeratzeko arrazoiak emanez, laguntzen fitxan eskuragarri dagoen "Hornitzailearen aukeraketaren justifikazioa" formularioan.

Onuradunak ez dira beharturik egonen hiru eskaintzak aurkeztera, baldin eta, dirulaguntzaren xedeko gastuen ezaugarri bereziengatik, merkatuan behar adina erakunde hornitzaile edo zerbitzu-emaile ez badaude edo gastua dirulaguntza eskatu baino lehen egin bada. Edonola ere, alderdi horiek aipatu inprimakian frogatu beharko dira.

3. Inbertsioak egiteko epea 2025eko urtarrilaren 1etik 2025eko urriaren 31ra bitartekoa izanen da.

4. II. eranskinean neurri bakoitzerako zehaztutakoa izanen da dirulaguntzaren zenbatekoa.

Dirulaguntza kasu honetan handitu liteke:

Aintzat hartuko da eskatzaileek emakumeen eta gizonen berdintasunarekin duten konpromisoa. Hala, entitateei %5eko laguntza gehigarria emanen zaie, baldin eta frogatzen badute 2025ean hartu edo bete dutela genero berdintasuna sustatzeko IV. eranskinean aipatzen diren neurrietako bat. 50 langile edo gehiago dituzten entitateei ez zaizkie baloratuko berdintasun-planak, Emakumeen eta Gizonen Berdintasun Eragingarrirako martxoaren 22ko 3/2007 Lege Organikoaren arabera nahitaezkoak direlako.

Aurreko urteetako deialdietan laguntza gehigarri hori jaso zuten entitateei ez zaie berriz emanen.

4. oinarria.–Eskaerak aurkezteko epea eta modua.

1. Eskaerak aurkezteko epea hilabetekoa izanen da. Deialdi hau Nafarroako Aldizkari Ofizialean argitaratu eta biharamunean hasiko da, eta muga-egunaren hilabetean argitalpen egunaren zenbaki bera duen egunean bukatuko.

2. Eskaerak telematikoki aurkeztuko dira nahitaez, horretarako Nafarroako Gobernuak Interneten duen Atariaren (www.nafarroa.eus) tramiteen katalogoko fitxa erabiliz (hemendik aurrera, laguntzen fitxa).

3. Entitateek eskaera bat aurkeztu beharko dute jarduketa bakoitzeko.

4. Laguntzak eskatzeko aurkeztu beharreko dokumentazioa agiri bereizietan aurkeztuko da, izenarekin identifikatua, eta II. eranskinean neurri bakoitzerako zehaztutakoa izanen da.

5. Eskaera legezko ordezkari baten bidez aurkezten bada, ordezkaritza ahala egiaztatzen duen agiria aurkeztuko beharko da.

6. Eskaerak eta aurkeztutako dokumentazioak Administrazio Publikoen Administrazio Prozedura Erkideari buruzko Legearen 66. artikuluko betebeharrak betetzen ez baditu, organo eskudunak entitate eskatzaileari eskatuko dio okerra zuzen dezala hamar egun balioduneko epean, eta adieraziko dio zuzendu ezean eskaera bertan behera uzten duela ulertuko dela.

II. eranskinean eskatzen den dokumentazioa aurkezten ez bada, ezin izanen da inola ere zuzendu.

5. oinarria.–Laguntzak emateko prozedura.

1. Laguntza hauek norgehiagokako prozeduraren bidez emanen dira. Hartara, organo kudeatzaileak (Trantsizio Energetikoaren Zerbitzuko Energia Planaren eta Europako Proiektuen Atala) aurkezten diren eskaerak konparatuko ditu II. eranskinean neurri bakoitzerako ezarritako balorazio irizpideei jarraituz, haien artean lehentasuna ezartzeko. Dena dela, neurri bakoitzerako baimendutako gastuak bide ematen badu eskaera guztiei erantzuteko, ez da beharrezkoa izanen lehentasun-hurrenkera hori ezartzea.

Laguntzen zenbatekoa kalkulatzeko, balorazio altuena lortzen duten eskaerei aplikatuko zaie II. eranskinean neurri bakoitzerako ezarritako laguntzaren intentsitatea, harik eta neurri bakoitzerako erabilgarri dagoen aurrekontu-kreditua agortu arte:

2. Neurri baterako aurkezten diren eskaera guztiei erantzun ondoren kreditu erabilgarririk geldituz gero, beste neurri batzuetako eskaerei erantzuteko erabiliko da. Halakoetan, lehentasun-hurrenkera honi jarraikiko zaio: 1. neurria, 2. neurria eta 3. neurria, hurrenez hurren, eta neurri bakoitzean ezarritako lehentasun-hurrenkera.

Oraindik neurriren batean saldo erabilgarririk geldituz gero, laguntzaren gehieneko zenbatekoak mugatutako oinarri horretako eskaerei erantzunen zaie, oinarrietan adierazitako laguntzaren ehunekoa osatu arte; eta horien atzetik, egoera berean dauden beste neurrietako eskaerei. Kasu horretan, lehentasun hurrenkera honi jarraikiko zaio: 1. neurria, 2. neurria eta 3. neurria, hurrenez hurren, eta neurri bakoitzean ezarritako lehentasun hurrenkerari jarraikiz.

3. Energia Planaren eta Europako Proiektuen Atalak eskaerak baloratuko ditu II. eranskinean neurri bakoitzerako ezarritako irizpideen arabera, eta ebazpen proposamena igorriko dio organo eskudunari, bertan adierazita entitate onuradunek betetzen dituztela dirulaguntza lortzeko betebehar guztiak.

Energia, Enpresa I+G+b eta Ekintzailetzako zuzendari nagusia izanen da dirulaguntza emateari buruz ebazteko organo eskuduna. Ebazpena gehienez ere bi hilabeteko epean eman eta jakinaraziko da, eskaerak aurkezteko epea bukatzen denetik hasita.

Ebazpena arrazoitua izanen da, eta bertan jasoko dira, gutxienez ere, dirulaguntza jasoko duten eskatzaileen zerrenda eta, hala badagokio, ezetsi diren eskaerak, eta, horien artean, aurrekontuko mugagatik ezetsitakoak.

Ezarritako gehieneko epea bukatzen bada berariazko ebazpenik eman eta jakinarazi gabe, eskaerak administrazio isiltasunez ezetsitzat jotzen ahalko dira. Hala ere, organo eskuduna behartua dago laguntzak onartu edo ukatzeko berariazko ebazpena eman eta jakinaraztera, oinarri hauetan xedatutakoari jarraikiz.

4. Baldin eta dirulaguntza eman ondotik eta justifikatzeko epea bukatu baino lehen neurriren batean kreditua askatzen bada, honako hauei laguntza osagarria ematen ahalko zaie:

a) Aurrekontuan behar adina kreditu ez egoteagatik zegokien dirulaguntza guztia (%100) jasotzera iristen ez diren neurri bereko eskaerak. Eta horien atzetik, egoera berean dauden beste neurrietako jarduketetarako eskaerak. Kasu horretan, lehentasun-hurrenkera honi jarraikiko zaio: 1. neurria, 2. neurria eta 3. neurria.

b) Hori egin ondoren oraindik ere kreditu erabilgarririk baldin badago, kreditu faltagatik ezetsi diren eskaerei helduko zaie, kreditua askatu den neurritik hasita, eta gero, egoera berean dauden beste neurrietako eskaerei helduko zaie, a) letran ezarritako hurrenkerari jarraikiz.

c) Oraindik saldo erabilgarririk badago, laguntzaren gehieneko zenbatekoak mugatutako eskaerei erantzunen zaie, oinarrietan adierazitako laguntzaren ehunekoa osatu arte, a) letran ezarritako hurrenkerari jarraituz.

5. Baldin eta justifikatzeko epea bukatu ondotik neurriren batean kreditua askatzen bada, eta aurrekontu krediturik ez zegoelako neurri horretan ezetsi den eskaerarik ez badago, laguntza osagarria ematen ahalko zaie laguntza mugatu zaien onuradunei aurreko apartatuaren a eta c irizpideen arabera.

6. oinarria.–Justifikazioa eta dirulaguntzen ordainketa.

1. Onuradunek egindako inbertsioak justifikatu beharko dituzte, 2025eko urriaren 31n beranduenez. Horretarako, dokumentazio hau aurkeztu beharko dute 8.1 oinarrian adierazitako moduan:

a) Egindako jarduketen fakturak, onuradunaren izenean. Fakturak errazago berrikusteko, haien zerrenda bat aurkeztu beharko da, laguntzen fitxan eskura dagoen ereduaren araberakoa.

b) Fakturen ordainagiriak, onuradunaren izenean.

c) Onuradunak dirulaguntza jaso nahi duen banku-kontuaren eguneraketa. Izapide hori "Kontuen eta ordainketen kontsulta" izapidearen bitartez egiten ahalko du, edo laguntzen fitxan eskuragarri dagoen Transferentzia bidez ordaintzeko eskaeraren inprimakia aurkeztuta.

d) II. eranskinean neurri bakoitzerako zehazten den dokumentazioa.

Justifikazioa egiten bada ezarritako epea bukatu ondoren, baina, betiere, hurrengo 10 egun balioduneko epearen barnean, kobratu beharreko dirulaguntza %5 murriztuko da. Denbora gehiago igaro bada, deklaratuko da galdu dela laguntza kobratzeko eskubidea.

2. Onuradunen batek laguntzari uko egiteagatik edo kreditu gehiago izateagatik ematen diren laguntza berrietan, onuradunek egindako inbertsioak justifikatzeko muga-eguna 2025eko azaroaren 10a izanen da. Horretarako, dokumentazioa aurkeztu beharko dute aurreko atalean adierazi den bezala (6. oinarria, 1. puntua).

3. Laguntzak kudeatzen dituen organoak aztertuko ditu onuradunek aurkeztutako frogagiriak, eta dirulaguntza 60.000 eurotik gorakoa bada, egindako inbertsioaren egiaztapen materiala eginen du aurretik. Ondoren, laguntza ordaintzeko ebazpenaren proposamen arrazoitua igorriko dio organo eskudunari, bertan adierazita onuradunek dirulaguntza kobratzeko eskubidea sortzen duten baldintzak betetzen dituztela.

4. Trantsizio Energetikoaren Zerbitzuko Zuzendaritzak dirulaguntza ordaintzeko ebazpena emanen du frogagiriak aurkezten direnetik bi hilabeteko epean.

7. oinarria.–Onuradunen betebeharrak eta horiek ez betetzearen ondorioak.

1. Dirulaguntza jasotzen duten entitateek honako betebehar hauek izanen dituzte:

a) Dirulaguntza eman dela jakinarazten denetik hasita hilabeteko epean, telematikaz aurkeztea dirulaguntzen onuradunen gardentasun betebeharrari buruzko adierazpena, laguntzen fitxen bidez. Adierazpen hori beti aurkeztu behar da, gardentasun betebeharra izan (Gardentasunari, Informazio Publikoa Eskuratzeari eta Gobernu Onari buruzko maiatzaren 17ko 5/2018 Foru Legearen 3.c) artikuluko baldintzak betetzeagatik) edo ez izan (kasu horretan, inguruabar hori jasoko da adierazpenean).

3.c) artikuluko baldintzak betetzen dituztenek ez badute betetzen foru lege horren 12.4 artikuluak eskatzen duen informazioa aurkezteko betebeharra, laguntza kobratzeko eskubidea galduko dute.

b) Ebazpen honen 3. eta 6. oinarrietan ezarritako moduan eta epeetan egin eta justifikatu beharko dituzte dirulaguntzaren xedeko jarduketak.

c) Inbertsioaren jabetza mantentzea 2 urtez gutxienez, laguntza ordaintzeko ebazpenaren egunetik hasita.

d) Emandako laguntzei uko eginez gero, horren berri ematea organo kudeatzaileari.

e) Jarduketak entitate onuradunen jabetzako eraikinetan edo alokatutakoetan egiten ahalko dira. Alokatutako eraikinak izanez gero, entitate onuradunek justifikatu beharko dute gutxienez 5 urtez erabiliko dituztela.

f) II. eranskinean neurri bakoitzerako ezarritako betebehar berariazkoak.

g) Dirulaguntzei buruzko Foru Legearen 9. artikuluan ezarritako betebehar orokorrak.

2. Oinarri arautzaile hauetan edo Dirulaguntzei buruzko Foru Legean ezarritako betebeharren bat bete ezean, onartutako dirulaguntza kobratzeko eskubidea galduko da, edo, hala badagokio, diru hori itzuli beharko da, foru lege horren 35. artikuluan xedatutakoarekin bat. Hala ere, enpresa-deslokalizazioa gertatuz gero, 18/2020 Foru Legearen 7. artikuluan ezarritako baldintzen arabera itzuliko da dirulaguntza.

Halaber, aurreko betebeharretako bat hein batean betetzen ez bada, ordaindu beharreko dirulaguntzaren zenbatekoa doitzen ahalko da proportzionaltasun printzipioari jarraikiz, edo, zein den kasua, dagokion zenbatekoa itzuli beharko da. Zehazki, ordaindu beharreko laguntza %5 murriztuko da, baldin eta diruz lagundutako jarduketaren justifikazioa deialdiko 3. oinarrian ezarritako epealdiaren ondoko 10 egun baliodunetan egiten bada.

3. Trantsizio Energetikoaren Zerbitzuak zilegi izanen du beharrezkotzat jotzen dituen ikuskapen jarduketak egitea, egiaztatzeko benetan gauzatu direla dirulaguntzak jaso dituzten kontzeptuak, bai eta funtsak zertarako eman diren, horretarako erabili direla egiaztatzeko ere.

8. oinarria.–Baliabide elektronikoen bidezko harremanak.

1. Eskaerak eta aurkeztu beharreko dokumentu guztiak telematika bidez aurkeztuko dira nahitaez, Nafarroako Gobernuaren Interneteko Atarian (www.nafarroa.eus) dagoen laguntzen fitxa erabiliz.

2. Administrazio egintzen jakinarazpena eta laguntza hauek emateko prozeduraren barruan egiten diren jarduketa guztien komunikazioak telematika bidez eginen dira, entitateen gaitutako helbide elektroniko bakarraren bidez (GEHb).

9. oinarria.–Dirulaguntzaren bateraezintasuna administrazio honen beste laguntza batzuekin.

Deialdi honetako dirulaguntzak bateraezinak dira Nafarroako Foru Komunitateko Administrazioak gastu diruz lagungarri beretarako ematen dituen beste dirulaguntza batzuekin.

Dirulaguntza bateragarriak direnean, eman dituztelako beste entitate publiko edo pribatu batzuek edo partikularrek, dirulaguntza baten edo guztien zenbatekoak ezin du inola ere gainditu onuradunak egin beharreko jardueraren kostua.

10. oinarria.–Emandako dirulaguntzen publizitatea.

Trantsizio Energetikoaren Zerbitzuak jendaurrean jarriko ditu emandako dirulaguntzak Ogasuneko eta Funtzio Publikoko Ministerioaren Dirulaguntzen Datu Base Nazionalaren bitartez (http://www.pap.minhafp.gob.es/bdnstrans/GE/eu/index), honako hauek adierazita: deialdia, laguntza zein aurrekontu-kredituri egotzi zaion, onuradunak eta emandako diru kopurua.

Deialdi honen emaitzak Nafarroako Gobernuak Interneten duen Atariko laguntzen fitxan ere argitaratuko dira (www.nafarroa.eus).

11. oinarria.–"De minimis" laguntzak.

Deialdi honetako dirulaguntzak "de minimis" laguntzak dira, Europako Batzordeak 2023ko abenduaren 13an emandako 2023/2831 Erregelamenduan xedatutakoaren arabera. Erregelamendu horren xedea da Europar Batasunaren Funtzionamenduari buruzko Tratatuaren 107. eta 108. artikuluak "de minimis" laguntzei aplikatzeko modua xedatzea (2023ko abenduaren 15eko L EBAO).

Erregelamendu horrekin bat, enpresa bakar bati hiru urteko zerga-ekitaldiko edozein alditan emandako "de minimis" laguntza guztien batura ezin da 300.000 eurotik gorakoa izan. Horren ondorioetarako, aipatu erregelamenduaren 2.2 artikuluan ezarrita dago enpresa bakarraren definizioa.

Horretarako, interesdunek kasuan kasuko zerga ekitaldian eta aurreko bi zerga ekitaldietan hartutako bestelako "de minimis" laguntzak aitortu beharko dituzte eskabidean.

12. oinarria.–Oinarri arautzaileen aurkako errekurtsoa.

Interesdunek gora jotzeko errekurtsoa jartzen ahal dute oinarri arautzaile hauen aurka, Industriako eta Enpresen Trantsizio Ekologiko eta Digitalerako kontseilariari zuzendua, hilabeteko epean, argitaratu eta biharamunetik.

I. ERANSKINA.–NEURRI DIRUZ LAGUNGARRIAK

1. NEURRIA.–EGUNGO ARGIZTAPEN INSTALAZIOAK BERRITZEA

1. Jarduketa diruz lagungarriak.

Neurri honen barruan jarduketa hauek sartzen dira, energia efizientzia handiagoa lortzearren:

Eskatzailearen jabetzakoak diren edo alokairuan dituen argien instalazioak berritzeak (alokairuen kasuan, indarrean dagoen kontratua izan behar du, eskaera egiten den egunetik hasita gutxienez 5 urteko iraunaldia duena) honako hauek bilduko ditu: ekipoak, linea eta instalazio elektrikoak berritzea, obra zibila, auditoretza, proiektua eta obra zuzendaritza.

Proiektuari lotutako inbertsio oso bat egonen da, eta bertan sartuko dira instalazioak erabat egokitzeko behar diren inbertsio guztiak. Eskaeran, dirulaguntza jaso dezakeen inbertsioa adieraziko da, hau da, 4. atalean adierazitako ratio energetiko ekonomikoaren balorazioa kalkulatzeko erabilitako zenbatekoa, eta jaso beharreko laguntzaren ehunekoa horri aplikatuko zaio.

Dirulaguntza hauen xede diren instalazioek honako baldintza hauek bete beharko dituzte:

Lehena. Auditoretza bat egina izatea 2015eko urtarrilaren 1etik aurrera, baldintza hauek betetzen dituena:

a) Gutxieneko edukia:

–Dagoen instalazioaren diagnostikoa.

–Dagoen instalaziorako proposatutako alternatibak, gutxienez hiru jarduketa azterturik teknikoki eta ekonomikoki.

b) Kaleetako argiteriaren gaineko jarduketen kasuan, aurretiko auditoretza-lana Energia Dibertsifikatu eta Aurrezteko Erakundeak ezarritako protokoloari jarraikiz egina egon beharko da.

Bigarrena. Kaleetako argiteriaren kasuan, luminaria berriek honako ezaugarri hauek bete beharko dituzte:

a) Instalatutako goiko fluxu hemisferikoa <%1 izatea luminaria funtzionaletan, eta girotzeko luminarietan edo luminaria klasikoetan, berriz, instalatutako goiko fluxu hemisferikoa <%3 izatea.

b) Kolore tenperatura ≤ 3000 K.

c) Led motako lanparak izanen dira.

d) Erregulazio sistema izan beharko dute.

Hirugarrena. Abuztuaren 2ko 842/2002 Errege Dekretuaren bidez onetsitako Behe Tentsioko Erregelamendu Elektroteknikoan ezarritakoa betetzea, bai eta Eraikingintzaren Kode Teknikoaren HE3 atalean ("Argi instalazioen energia-efizientzia") eta indarra duten gainerako legeetan ezarritakoa ere.

Laugarrena. Proiektu tekniko batean edo memoria tekniko batean aurreikusita egotea, dagokionaren arabera, eta obra zuzendaritza baten xede izatea. Zenbateko diruz lagungarria (biak batuta) ezin da izan inbertsioaren zenbateko osoaren %10etik gorakoa.

2. Laguntzaren zenbatekoa.

Organo kudeatzaileak diruz lagungarritzat jotzen duen gastuaren %60 izanen da laguntzaren zenbatekoa. 1. neurri honetako jarduketen kasuan, onuradun bakoitzak 10.000 euro jaso ditzake gehienez.

3. Laguntza eskatzeko dokumentazioa.

Laguntza hau eskatzeko, honako dokumentazio hau aurkeztu behar da, 4. oinarrian esandako epean eta moduan:

a) Auditoretza, 1. ataleko 1. puntuan eskatutakoa betetzen duena.

b) Jarduketaren aurreproiektua, non gutxienez alderdi hauek zehaztuko baitira nahitaez:

–Auditoretzan deskribatutako proposamenetatik hautatu den aukera.

–Aldatu beharreko luminarien kopurua, mota eta potentzia.

–Luminaria berrien kopurua, mota eta potentzia.

–Energia aurrezpenaren justifikazioa, III. eranskinean deskribatutako metodologiari jarraikiz.

–Jarduketen aurrekontu xehatua, unitateko prezioa kontzeptuka banakatuta.

c) Energia elektrikoaren horniduraren (edo horniduren) azken faktura, alegia, jarduketaren xedeko argi-instalazioarena. Faktura hau eskatzen da, kontratatutako potentzia berriarekin, energiaren horniduran aurreztutakoa egiaztatzeko.

d) Entitate eskatzaileak iturri berriztagarrietatik sortutako elektrizitatearen hornidura kontratu bat badu gutxienez, jatorri-bermearekin, kontratu hori edo hari lotutako faktura bat aurkeztuz justifikatu beharko du.

e) Entitate eskatzaileak 3. oinarrian adierazitako genero-berdintasuna sustatzeko neurriak hartzeagatik laguntza gehigarria jaso nahi badu, hartutako neurrien frogagiriak.

4. Eskaerak baloratzeko irizpideak.

Hauek dira laguntza hauek emateko eskaerak baloratzeko irizpideak:

1. Ratio energetiko-ekonomikoaren balorazioa: 80 puntura bitarte.

Hona ratio energetiko-ekonomikoa zer den: proposatutako berritzearekin lortutako aurrezpen teorikoaren (kWh/urte) eta aurkeztutako inbertsio lagungarriaren (eurotan, BEZa barne) arteko zatidura.

80 puntu emanen dira baldin eta ratio energetiko-ekonomikoa 1,5etik gorakoa bada, eta 0 puntu baldin eta ratioa zero bada. Gainerako kasuetan, bi balio horien arteko erregresio lineala kontuan hartuz aterako da puntuazioa.

2. Erronka demografikoa. Jarduera 5.000 biztanle arteko udalerrietan egiten bada, edo hirikoak ez diren 20.000 biztanle arteko udalerrietan, biztanle-entitate berezi guztiak 5.000 biztanlez beherakoak dituztenak: 10 puntu.

3. Ingurumen jasangarritasuna: jatorri-bermea duten iturri berriztagarriko elektrizitatearen edo "elektrizitate berdearen" hornidura kontratu bat izatea laguntzak eskatzen den egunean: 10 puntu.

Puntuazioetan berdinketarik izanez gero, erabakiko da kontuan hartuz irizpideetako bakoitzean lortutako puntuazioa, irizpideak azaldu diren hurrenkera berari jarraituz, hain zuzen. Berdinketak bere horretan jarraitzen badu, laguntzaren eskaera zer egun eta ordutan egin zen izanen da irizpidea.

5. Inbertsioak justifikatzeko dokumentazio espezifikoa.

Onuradunek, deialdiaren 6. oinarrian deskribatutakoaz gainera, aurkeztu beharko dute honako berariazko dokumentazio hau, egindako inbertsioak justifikatzeko:

a) Obra-proiektua eta obra-zuzendaritza, 1. ataleko 2. puntuan aipatutako erregelamenduetan eta indarrean dagoen legedian eskatutakoa zehaztuta (Behe Tentsioko Erregelamendu Elektroteknikoa, Eraikingintzaren Kode Teknikoaren HE3 atala).

Proiektu horretan, egindako eraberritze-lanen argazkiak ere erantsiko dira, baita erabilitako materialaren fitxa teknikoak ere.

b) Berritutako instalazioaren behe-tentsioko erregistro-zenbakia. Erregistroa aldatzea nahitaezkoa bada, horren frogagiria. Bestela, enpresa instalatzailearen edo teknikari eskudunaren erantzukizunpeko adierazpena, frogatzen duena ez dagoela erregistroa aldatu beharrik.

6. Betebehar berariazkoak.

Neurri horren onuradunek, 7. oinarrian zehaztutakoaz gain, argiteria-instalazioaren hornidura kontratu berriaren kopia bat aurkeztu beharko dute ordaintzeko ebazpena jakinarazi eta hiru hilabeteko epean, jarduketaren memorian deskribatutako potentzia kontratatuarekin bat datorrena. Kontratatutako potentzia ezin bada aldatu, horretarako arrazoiak justifikatzen dituen dokumentu bat aurkeztuko da.

2. NEURRIA.–ENERGIA BERRIZTAGARRIEN INSTALAZIOETAKO INBERTSIOAK

1. Jarduketa diruz lagungarriak.

Diruz lagunduko dira berokuntzarako eta elektrizitatea sortzeko iturri berriztagarrietatik datorren energia erabiltzen duten instalazioetan egindako jarduketak.

Energia elektrikoa sortzeko instalazioek dirulaguntza jaso dezakete baldin eta indarreko araudiaren arabera autokontsumora bideratzen badira, eta metaketarako sistemak izaten ahalko dituzte; halaber, saretik isolatutako autokontsumoko instalazioek ere jaso dezakete.

Bero-ponpak erabiltzen dituzten instalazioetarako jarduketetan, Europako Batzordearen 2013ko martxoaren 1eko Erabakiaren arabera energia berriztagarritzat jotzen direnak baizik ez dira diruz lagungarritzat joko. Erabaki horren bidez, jarraibideak ezartzen dira Batasuneko estatuek hainbat teknologiatako bero-ponpetatik datorren energia berriztagarria kalkulatzeko.

Iturri berriztagarrietatik datorren energiatzat joko da iturri ez-fosiletatik datorren energia; hau da, energia eolikoa, eguzki energia (termikoa eta fotovoltaikoa), energia geotermikoa, energia hidraulikoa, biomasatik eta biogasetik datorrena, Europako Parlamentuaren eta Kontseiluaren 2018ko abenduaren 11ko 2018/2001 Zuzentarauan definitzen diren moduan.

Gastu hauek izanen dira diruz lagungarriak:

a) Diseinatzeko, proiektua idazteko eta obra zuzentzeko gastuak.

b) Obren eta instalazioen exekuzio kostuak, hari lotutako obra zibila eta instalazio lagungarriak ere barne.

c) Ondasun, ekipo eta material berrietan egindako inbertsioa.

d) Klimatizazio sareetako inbertsioetan, biomasa edo eguzki energia termikoa erabiltzen duten eraikinetako kanpoko sareak baizik ez dira izanen diruz lagungarriak.

e) Autokontsumo elektrikoko instalazioetarako jarduketen kasuan, diruz lagungarriak izanen dira sortze instalazioa banaketa sarearekin konektatzeko beharrezkoak diren lanekin lotutako gastuak.

Autokontsumo elektrikoko instalazioen kasuan, ez dira diruz lagungarriak izanen zerbitzuan dagoen sarearen banaketa sareko instalazioak indartzeko, egokitzeko edo eraberritzeko lanak, instalazio berriak sartzeko beharrezkoak direnak.

Ez dira diruz lagungarriak izanen Eraikingintzaren Kode Teknikoaren arabera nahitaezkoak diren energia berriztagarriko instalazioak (elektrikoak edo termikoak), salbuespen hauekin:

a) Elektrizitatea sortzeko instalazio bat bada, parte bat besterik ez da diruz lagunduko: aipatu araudian eskatutakotik gora instalatutako potentziari dagokion zati proportzionala.

b) Eraikingintzaren Kode Teknikoari jarraikiz proiektu batean nahitaezkoa bada energia berriztagarrien instalazio bat egitea etxeko ur beroa sortzeko, diruz lagungarria izanen da berokuntzaren eta/edo hoztearen lagungarri gisa ere diseinatutako instalazioetan egindako inbertsioa bakarrik. Kasu horretan instalazioaren kostuaren ehuneko 70 baizik ez da diruz lagungarria izanen, ulertzen baita gainerako ehuneko 30 dela aipatu araua betetzeko behar den inbertsioa.

2. Laguntzaren zenbatekoa.

Laguntzaren zenbatekoa organo kudeatzaileak diruz lagungarritzat jotzen duen gastuaren %30 izanen da, eta 2. neurri honetan gehieneko laguntza 10.000 eurokoa izanen da onuradun bakoitzeko.

3. Laguntza eskatzeko dokumentazioa.

Laguntza hau eskatzeko, honako dokumentazio hau aurkeztu behar da, 5. oinarrian esandako epean eta moduan:

1. Jarduketaren aurreproiektua, aurreikusita dagoen jarduketa xehe azaltzen duena:

–Egungo egoera eta lortu nahi den egoera.

–Energia sortzeko elementuen eta sistemen deskribapena eta fitxa teknikoa.

–Biltegiratzeko elementuen eta sistemen deskribapena eta fitxa teknikoa, halakorik bada.

–Kontroleko sistemen eta metodologiaren deskribapena.

–Prozesuaren kronograma.

–Inbertsioen aurrekontua, kontzeptuz kontzeptu zehaztuta.

2. Entitate eskatzaileak iturri berriztagarrietatik sortutako elektrizitatearen hornidura kontratu bat badu gutxienez, jatorri-bermearekin, kontratu hori edo hari lotutako faktura bat aurkeztuz justifikatu beharko du.

3. Entitate eskatzaileak 3. oinarrian adierazitako genero-berdintasuna sustatzeko neurriak hartzeagatik laguntza gehigarria jaso nahi badu, hartutako neurrien frogagiriak.

4. Eskaerak baloratzeko irizpideak.

Hauek dira laguntza hauek emateko eskaerak baloratzeko irizpideak:

1. Inplementatutako teknologia:

–Biomasako instalazio termikoak, biogasa: 50 puntu.

–Elektrizitatea sortzeko instalazioak, biltegiratzearekin: 40 puntu.

–Elektrizitatea sortzeko instalazioak, biltegiratzerik gabe: 30 puntu.

–Elektrizitatea sortzeko dauden instalazioetarako biltegiratze sistemak: 30 puntu.

–Aerotermia-, geotermia- edo hidrotermia-instalazioak edo eguzki-instalazio termikoak: 20 puntu.

2. Energia berriztagarrien ezarpen maila:

–Dirulaguntzaren xedeko instalazioa energia berriztagarriekin entitateak jartzen duen lehenbizikoa bada: 30 puntu.

–Entitateak energia berriztagarrien instalazio bat, bi edo hiru baldin baditu: 15 puntu.

–Entitateak energia berriztagarrien 3 instalazio baino gehiago baldin baditu: 0 puntu.

3. Erronka demografikoa. Jarduera 5.000 biztanle arteko udalerrietan egiten bada, edo hirikoak ez diren 20.000 biztanle arteko udalerrietan, biztanle-entitate berezi guztiak 5.000 biztanlez beherakoak dituztenak: 10 puntu.

4. Ingurumen jasangarritasuna: jatorri-bermea duten iturri berriztagarriko elektrizitatearen edo "elektrizitate berdearen" hornidura kontratu bat izatea laguntzak eskatzen den egunean: 10 puntu.

Puntuazioetan berdinketarik izanez gero, erabakiko da kontuan hartuz irizpideetako bakoitzean lortutako puntuazioa, irizpideak azaldu diren hurrenkera berari jarraituz, hain zuzen. Berdinketak bere horretan jarraitzen badu, laguntzaren eskaera zer egun eta ordutan egin zen izanen da irizpidea.

5. Inbertsioak justifikatzeko dokumentazio berariazkoa.

Onuradunek, 7. oinarrian deskribatutakoaz gainera, honako berariazko dokumentazio hau aurkeztu beharko dute egindako inbertsioak justifikatzeko:

1. Memoria edo proiektua –kasua zein den–, egindako jarduketa deskribatzen duena, instalazioaren eta haren elementuen argazkiak eta dagozkien fitxa teknikoak erantsita.

2. Behe tentsioko instalazio elektrikoen erregistro zenbakia edo eraikinetako instalazio termikoena, kasua zein den.

3. NEURRIA.–ENERGIA BERRIZTAGARRIEN INSTALAZIOETAKO ETA ENERGIA EFIZIENTZIAKO PROIEKTUAK IDAZTEA

1. Jarduketa diruz lagungarriak.

1. Neurri honen barrenean, jarduketa hauek sartzen dira:

Energia berriztagarrien instalazioetako eta energia efizientziako proiektuak idaztea (deialdi honen 1. neurrian diruz lagundu daitezkeen proiektuak kenduta).

2. Laguntzaren zenbatekoa.

Laguntzaren zenbatekoa izanen da organo kudeatzaileak diruz lagungarritzat jotzen duen gastuaren %80.

Laguntzaren gehieneko zenbatekoa onuradun bakoitzeko: 5.000 euro.

3. Laguntza eskatzeko dokumentazioa.

Laguntza hau eskatzeko, honako dokumentazio hau aurkeztu behar da, 4. oinarrian esandako epean eta moduan:

1. Laguntzaren xede den proiektuaren deskripzio-memoria.

2. Entitate eskatzaileak iturri berriztagarrietatik sortutako elektrizitatearen hornidura kontratu bat badu gutxienez, jatorri-bermearekin, kontratu hori edo hari lotutako faktura bat aurkeztuz justifikatu beharko du.

3. Entitate eskatzaileak 3. oinarrian adierazitako genero-berdintasuna sustatzeko neurriak hartzeagatik laguntza gehigarria jaso nahi badu, hartutako neurrien frogagiriak.

4. Eskaerak baloratzeko irizpideak.

1. Energia berriztagarrien ezarpen maila:

a) Entitateak ez badu energia berriztagarrien instalaziorik: 60 puntu.

b) Entitateak energia berriztagarrien instalazio bat, bi edo hiru baldin baditu: 30 puntu.

c) Entitateak energia berriztagarrien 3 instalazio baino gehiago baldin baditu: 0 puntu.

2. Erronka demografikoa. Jarduera 5.000 biztanle arteko udalerrietan egiten bada, edo hirikoak ez diren 20.000 biztanle arteko udalerrietan, biztanle-entitate berezi guztiak 5.000 biztanlez beherakoak dituztenak: 20 puntu.

3. Ingurumen jasangarritasuna: jatorri-bermea duten iturri berriztagarriko elektrizitatearen edo "elektrizitate berdearen" hornidura kontratu bat izatea laguntzak eskatzen den egunean: 20 puntu.

Eskatzaileei emandako puntuazioetan berdinketa gertatuz gero, irizpideetako bakoitzean lortutako puntuazioa kontuan hartuz erabakiko da, irizpideak azaldu diren hurrenkera berari jarraituz, hain zuzen. Hala eginda ere berdinketak bere horretan jarraituz gero, laguntzaren eskaera zer egunetan eta zer ordutan aurkeztu den, horrexen arabera ordenatuko dira.

5. Inbertsioak justifikatzeko dokumentazio berariazkoa.

Onuradunek, 6. oinarrian deskribatutakoaz gainera, honako berariazko dokumentazio hau aurkeztu beharko dute egindako inbertsioak justifikatzeko:

–Laguntza eskaeraren xede den proiektuaren kopia.

III. ERANSKINA–URTEKO ENERGIA AURREZPENA KALKULATZEA

Urteko energia aurrezpena (kWh) = [A] - [B].

Non:

[A]: Egungo luminarien urteko kontsumoa (kWh) = [1] * [2] + [1] * [3] * [4].

[B]: Luminarien urteko kontsumoa berritu ondoren (kWh) = [5] * [6] + [5] * [7] * [8].

[1]: Egungo luminaria guztien potentzia, osotara (kW).

[2]: Egun, potentzia osoan funtzionatzen duten ordu kopurua urtean (orduak).

[3]: Egun, potentzia arautuan funtzionatzen duten ordu kopurua urtean (orduak).

[4]: Egungo luminarien potentziaren erregulazio koefizientea (potentzia osoarekiko portzentajea).

[5]: Luminaria guztien potentzia, osotara, berritu ondoren.

[6]: Potentzia osoan funtzionatzen luminaria guztiek egiten duten ordu kopurua, berritu ondoren.

[7]: Potentzia erregulatuan funtzionatzen luminaria guztiek egiten duten ordu kopurua, berritu ondoren.

[8]: Luminarien potentziaren erregulazio koefizientea (potentzia osoarekiko portzentajea), berritu ondoren.

Kontuan hartu behar da egungo funtzionamendu orduen kopuruak urtean (potentzia osoa [2] + potentzia erregulatua [3]) bat etorri behar duela urteko funtzionamendu orduen kopuruarekin, berritu ondoren (potentzia osoa [6] + potentzia erregulatua [7]).

IV. ERANSKINA.–EMAKUMEEN ETA GIZONEN BERDINTASUNA SUSTATZEKO NEURRIAK

1. Emakumeen eta gizonen berdintasun-plan bat izatea, urriaren 13ko 901/2020 Errege Dekretuaren arabera erregistratua, horretara nahitaez beharturik ez badago.

2. Azken bi urteetan berdintasunerako prestakuntza ekintzak diseinatu eta egin izana etengabeko prestakuntzako planean. Azpi-irizpide hori egiaztatuko da prestakuntza programak aurkeztuz, prestatzaileen zerrenda eta haien gaikuntza ere adierazita.

3. Langileei informazioa, sentsibilizazioa edo prestakuntza eman izana laneko sexu-jazarpena eta sexuan oinarritutako jazarpena prebenitzeko eta horiei aurre egiteko protokolo edo neurri espezifikoei buruz, langileen ordezkariekin negoziatuta eta ezarrita. Azpi-irizpide hori egiaztatzeko, protokoloak/neurriak eta informazioaren/sentsibilizazioaren/prestakuntzaren programazioa aurkeztuko dira, prestatzaileen zerrenda eta haien gaikuntza ere adierazita.

4. Azken hiru urteetan lege-esparrua gainditzen duten kontziliazio-neurriak aplikatu izana. Hori egiaztatzeko, neurriak zehazten dituen ziurtagiria aurkeztu beharko da, enpresak eta langileen ordezkariek sinatua.

5. Entitatearen gobernantza-organoetan emakumeen eta gizonen presentzia orekatua dela egiaztatzea.

6. Entitatearen webgunean, liburuxketan eta komunikazio-kanpainetan hizkuntza idatzi eta bisual ez-sexista erabiltzen dela egiaztatzea, erabilitako euskarriak aurkeztuz.

7. Berdintasunarekiko konpromiso argi eta agerikoa frogatzea (aipatzen dena balio edo printzipio gidarien artean, webgunean, liburuxketan, publizitate kanpainetan eta abarretan).

8. Energia-komunitateen kasuan, egiaztatzea pobrezia energetikoaren aurkako neurriak hartu direla; besteak beste, kontsumitzaile kalteberak energia-komunitatean sartu direla egiaztatzea.

9. Energia-komunitateen kasuan, egiaztatzea gizonen eta emakumeen partaidetza paritarioa dela energia-komunitatearen talde eragilean eta/edo komunitate horren zuzendaritza- eta ordezkaritza-organoetan, baldin eta dagoeneko eratuta badago.

10. Indarrean dagoen aitorpen edo bereizgarri bat lortu izana tratu- eta aukera-berdintasuneko politikak aplikatzeagatik (adibidez, Berdintasun Ministerioaren "Berdintasuna Enpresan" bereizgarria, Adiskidetze Zigilua, eta abar), berdintasun-plan bat izatera behartuta egonez gero, plan hori REGCON erregistroan erregistratu bada.

Iragarkiaren kodea: F2417492