Iragarkia

72. ALDIZKARIA - 2025eko apirilaren 10a

1. NAFARROAKO FORU KOMUNITATEA

1.7. BESTELAKOAK

44/2025 EBAZPENA, martxoaren 14koa, Industria Antolamenduaren, Azpiegitura Energetikoen eta Meatzeen Zerbitzuko zuzendariak emana, zeinaren bidez aurretiazko administrazio-baimena eta eraikitzeko administrazio-baimena ematen baitira Erriberriko udal-mugartean dagoen 66 kV-eko "SS La Pedrera" ebakitze-azpiestazioa aldatzeko proiekturako, eta proiektuaren onura publikoa zehazki deklaratzen baita.

2024ko azaroaren 11n, Servicios Auxiliares de Telecomunicación SAk, i-DE Redes Eléctricas Inteligentes SAU ordezkatuz, aurretiazko administrazio-baimena eta eraikitzeko administrazio-baimena eskatu zituen Erriberriko udal-mugartean (Nafarroa) dagoen 66 kV-eko "SS La Pedrera" ebakitze-azpiestazioa aldatzeko proiekturako, bai eta proiektuaren onura publikoa zehazki deklaratzea ere.

Proiektuaren xedea honako jarduketa hauetan datza:

–IBERDROLAren eta Energías Fotovoltaicas de Navarra SLren arteko mugako hesia eraistea.

–66 kV-eko lineako bi posizioen bezero ohiaren isolamendu-ebakigailua desmuntatzea, egitura desmuntatu gabe.

–Isolatzaileak instalatzea, desmuntatu beharreko ebakigailuen egitura metalikoaren gainean kablea bermatzeko.

–Instalazioa hobetzeko beste erreforma batzuk.

Bat etorrita Sektore Elektrikoari buruzko abenduaren 26ko 24/2013 Legearen 53. eta 55. artikuluetan eta abenduaren 1eko 1955/2000 Errege Dekretuaren 125. eta 144. artikuluetan ezarritakoarekin (errege dekretu horren bidez, energia elektrikoa garraiatu, banatu, merkaturatu eta hornidura egiteko jarduerak eta instalazioak baimentzeko prozedurak arautzen dira), 30 egun baliodunez jendaurrean jarri ziren proiektua eta ukitutako ondasun eta eskubideen zerrenda. Horretarako, iragarkia paratu zen 2025eko 5. Nafarroako Aldizkari Ofizialean, urtarrilaren 9koan, eta 2025eko urtarrilaren 10eko Diario de Navarra egunkarian; orobat, dokumentazioa Nafarroako Gobernu Irekiaren webgunean argitaratu zen.

Ez da alegaziorik jaso horren inguruan.

Aldi berean, abenduaren 1eko 1955/2000 Errege Dekretuaren 127., 131. eta 146. artikuluetan xedatutakoa aplikatuz, Industria Antolamenduaren, Azpiegitura Energetikoen eta Meatzeen Zerbitzuak kontsulta egin zion Erriberriko Udalari, eta ez da txostenik jaso.

Aurkeztutako dokumentazioa ikusita, eta Sektore Elektrikoari buruzko abenduaren 26ko 24/2013 Legean eta abenduaren 1eko 1955/2000 Errege Dekretuan xedatutakoari jarraikiz, Industria Antolamenduaren, Azpiegitura Energetikoen eta Meatzeen Zerbitzuko Azpiegitura Energetikoen Atalak ondorioztatzen du prozedura behar bezala gauzatu dela, eta proposatzen du i-DE, Redes Eléctricas Inteligentes SAUri aurretiazko administrazio-baimena eta eraikitzeko administrazio-baimena ematea Erriberriko udal-mugartean dagoen 66 kV-eko "SS La Pedrera" ebakitze-azpiestazioa aldatzeko proiekturako, eta proiektuaren bai onura publikoa zehazki deklaratzea ere. Ebazpen honetako eranskinean ageri da ukitutako ondasun eta eskubideen zerrenda, eta horietara soilik mugatu beharko da proiektua.

Adierazitakoarekin bat, Energia, Enpresa I+G+b eta Ekintzailetzako zuzendari nagusiak otsailaren 1ean emandako 10/2024 Ebazpenaren bidez (2024ko 35. Nafarroako Aldizkari Ofiziala, otsailaren 16koa) eskuordetuak ditudan eskumenak erabiliz,

EBAZTEN DUT:

1. i-DE, Redes Eléctricas Inteligentes SAUri aurretiazko administrazio-baimena eta eraikitzeko administrazio-baimena ematea Erriberriko udal-mugartean (Nafarroa) dagoen 66 kV-eko "SS La Pedrera" ebakitze-azpiestazioa aldatzeko proiekturako, onetsi baita instalazioa egiteko aurkeztutako proiektua, 2024ko azaroaren 6koa eta David Gavín Asso industria ingeniariak izenpetua, eta hogeita hamasei hilabeteko epea ematea lanak egiteko.

2. Aurretiazko administrazio-baimena eta eraikitzeko administrazio-baimena emanda ere, instalazioaren eskatzaileak lortu beharko ditu instalazioa gauzatzeko beharrezkoak diren emakida, lizentzia eta baimen guztiak, publikoak nahiz pribatuak, aplikatzekoak diren beste xedapen batzuekin bat.

3. Instalazioak aurkeztutako proiektuaren arabera egin beharko dira, eta arau hauetan xedatutakoa bete beharko dute: otsailaren 15eko 223/2008 Errege Dekretua, goi-tentsioko linea elektrikoen baldintza teknikoei eta segurtasun-bermeei buruzko erregelamendua onartzen duena; abuztuaren 29ko 1432/2008 Errege Dekretua, goi-tentsioko linea elektrikoetan hegazti-fauna talken eta elektrokuzioen aurka babesteko neurriak ezartzen dituena, eta maiatzaren 9ko 337/2014 Errege Dekretua, goi-tentsioko instalazio elektrikoen baldintza teknikoei eta segurtasun-bermeei buruzko erregelamendua onartzen duena.

4. Behin proiektua gauzatuta, eskatzaileak instalazioa ustiatzeko baimena eskatu beharko du. Horretarako, zerbitzua abian jartzeko aktaren eskaera aurkeztuko du. Eskaera horrekin batera aurkeztu beharko du obra-bukaerako ziurtagiria, teknikari fakultatibo eskudun batek izenpetua, hala xedatuta baitago abenduaren 1eko 1955/2000 Errege Dekretuaren 132. artikuluan.

5. Instalazio horren onura publikoa zehazki deklaratzea, Sektore Elektrikoari buruzko abenduaren 26ko 24/2013 Legearen 54., 55. eta 56. artikuluetan, eta abenduaren 1eko 1955/2000 Errege Dekretuaren 148. eta 149. artikuluetan ezarritakoarekin bat; hori horrela, i-DE, Redes Eléctricas Inteligentes SAU entitatea onuraduna izanen da desjabetze espedientean. Ebazpen honen eranskinean azaltzen da ukitutako ondasun eta eskubideen zerrenda, zeinak ez du aldaketarik izan 2025eko 5. Nafarroako Aldizkari Ofizialean, urtarrilaren 9koan, jendaurrean jarritakoaren aldean.

6. Ebazpen hau Industria Antolamenduaren, Azpiegitura Energetikoen eta Meatzeen Zerbitzura igortzea, behar diren ondorioak izan ditzan.

7. Ebazpen hau Nafarroako Aldizkari Ofizialean argitaratzea, orok jakin dezan.

8. Ebazpen hau jakinaraztea i-DE Redes Eléctricas Inteligentes SAUri eta ukitutako ondasun eta eskubideen titularrei, eta ohartaraztea ezen ebazpen honek ez duela administrazio bidea amaitzen eta honen aurka gora jotzeko errekurtsoa jartzen ahal dela, Industriako eta Enpresen Trantsizio Ekologiko eta Digitalerako kontseilariari zuzendua, hilabeteko epean, ebazpen hau jakinarazi eta biharamunetik hasita. Errekurtsoan espediente zenbakia adierazi beharko da.

9. Ebazpen hau Erriberriko Udalari jakinaraztea, eta aditzera ematea honen kontra administrazioarekiko auzi-errekurtsoa jartzen ahal dela, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, ezertan galarazi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2025eko martxoaren 14an.–Industria Antolamenduaren, Azpiegitura Energetikoen eta Meatzeen Zerbitzuko zuzendaria, Laura Larraya Irigoyen.

ERANSKINA.–ERRIBERRIKO UDAL-MUGARTEAN DAGOEN "SS LA PEDRERA" 66 KV-EKO EBAKITZE-AZPIESTAZIOA ALDATZEKO PROIEKTUAK UKITUTAKO ONDASUN ETA ESKUBIDEEN ZERRENDA

Iragarkiaren kodea: F2504123