Iragarkia

70. ALDIZKARIA - 2025eko apirilaren 8a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

50C/2025 EBAZPENA, martxoaren 14koa, Ekonomia Sozialeko eta Laneko zuzendari nagusiak emana, zeinaren bidez erabakitzen baita Truck And Whell Norte SL enpresaren hitzarmen kolektiboa erregistratzea, gordailutzea eta Nafarroako Aldizkari Ofizialean argitaratzea.

Aztertu da Truck And Whell Norte SL enpresak aurkeztutako hitzarmen kolektiboa (kode zenbakia: 31101502012018), erregistro honetan 2025eko otsailaren 21ean sartu baitzen, enpresaren eta sindikatuen ordezkariek 2024ko abenduaren 20an sinatu ondoren.

Bat etorrita Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, laneko akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin.

Nafarroako Foru Komunitateko Administrazioari eta foru sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuarekin lotuta, honako hau,

EBAZTEN DUT:

Lehenengoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Truck And Whell Norte SL enpresak aurkeztutako hitzarmen kolektiboa (kode zenbakia: 31101502012018).

Bigarrena.–Nafarroako Aldizkari Ofizialean argitara dadila xedatzea, orok jakin dezaten.

Iruñean, 2025eko martxoaren 14an.–Ekonomia Sozialeko eta Laneko zuzendari nagusia, Iñaki Mendióroz Casallo.

TRUCK AND WHELL NORTE SL ENPRESAREN HITZARMEN KOLEKTIBOA

I. KAPITULUA.–XEDAPEN OROKORRAK

1. artikulua. Xedea, eta eremu funtzionala eta lurraldekoa.

Hitzarmen hau enpresako zuzendaritzak eta langileen legezko ordezkaritzak (langileen delegatua) adostu dute, lan baldintzak arautzeko Truck And Wheel Norte SL enpresaren eremu pertsonalean sartutako langileentzat, zeinak enpresak Nafarroan duen Arazuri-Orkoien poligonoko B kaleko 5.8 lurzatiko lantokian aritzen baitira.

2. artikulua. Eremu pertsonala.

Hitzarmen honek enpresan zerbitzuak ematen dituzten langile guztiengan izanen du eragina, hitzarmenetik kanpoko langileak salbu.

3. artikulua. Denbora eremua.

Hitzarmen hau, ondorio guztietarako, 2025eko urtarrilaren 1etik 2028ko abenduaren 31ra arte egonen da indarrean.

Hitzarmen hau isilbidez luzatutzat joko da, urtetik urtera, ez badu alderdietako batek hitzarmena nahiz haren edozein luzapen salatzen, iraungitzeko eguna baino hilabete lehenago, gutxienez ere. Salaketa hori aldi berean jakinaraziko zaio beste alderdiari, eta ez du ondoriorik izanen hitzarmenaren indarraldia nahiz haren urteroko luzapenak bukatu arte.

4. artikulua. Konpentsazioa eta xurgapena.

Hitzarmenean ezarritako ordainsariek ordu artekoak konpentsatu eta xurgatuko dituzte, hark indarra hartzen duen unean, edozein izanik ere haien izaera eta jatorria.

Orobat, errespetatu eginen dira banaka edo taldeka itundutako eskubideak.

Edonola ere, hitzarmen honen ondoriozko hobekuntzak legezko xedapenen bidez ezartzen ahal direnekin xurgatu eta konpentsatuko dira, eta, uneoro, langilearentzat mesedegarriena den araua aplikatuko da.

Konpainian 2014ko irailaren 30a baino lehenagoko antzinatasuna duten langileen kasuan, gaur egun jasotzen duten plus xurgagarriari plus pertsonal deituko zaio, eta ez da xurgatzen edo konpentsatzen ahalko, banakako akordiorik ezean, salbu eta 2024ko urtarrilean osagarri horren gainean egindako igoerak; horiek xurgatzen eta konpentsatzen ahalko dira.

5. artikulua. Batzorde misto paritarioa.

Bi alderdi negoziatzaileek batzorde misto bat eratzea erabaki dute, hitzarmenaren aplikazioan interpretazio, arbitraje, adiskidetze eta zaintzarako organoa izan dadin.

Batzorde mistoa enpresaren ordezkaritzak eta langileen ordezkaritzak osatuko dute.

Batzorde horrek aholkularien noizbehinkako edo etengabeko zerbitzuak erabiltzen ahalko ditu, bere eskumeneko gai guztietan. Alderdi bakoitzak nahi dituen aholkulariak aukeratuko ditu.

Batzordeak, besteak beste, gai hauetaz jardunen du:

–Hitzarmen kolektiboa interpretatzea.

–Itundutakoa betetzen den zaintzea.

–Hitzarmenaren testua haren indarraldian ezar daitezkeen zuzenbideko lege xedapenei egokitzea.

–Hitzarmen kolektibo honen bidez esleitzen zaizkionak.

–Hitzarmen kolektibo honetako baldintzak noiz ez aplikatu.

Osatzen duten alderdietako batek hala eskatuta bilduko da batzorde mistoa, eta horren berri emanen dio beste aldeari. Bilera, gehienez ere, eskaera egiten denetik hamar egunen buruan eginen da.

Batzorde mistoak aztertzen dituen gaiak, gehienez ere, bilera egiten denetik hamabost laneguneko epean ebatziko dira.

Batzorde misto paritarioak hartutako erabakiak hitzarmen kolektiboko xedapenetako baten aurkakoak badira edo haietan funtsezko eragina badute, batzarrean bildutako langileek gehiengo soilez onetsi beharko dituzte balioa izateko, eta Langileen Estatutuaren 90. artikuluan ezarritako legezkotasun kontrola iragan beharko dute.

Batzorde misto paritarioaren funtzioak eta jarduerak ez dira inoiz ere oztopo izanen jurisdikziora libreki jotzeko, legean aurreikusitako moduan.

II. KAPITULUA.–LAN DENBORA

6. artikulua. Lanaldia.

Hitzarmen honen indarraldirako itundutako lanaldia 1.736 ordukoa izanen da urtean.

Hitzarmen kolektibo hau indarrean dagoen bitartean lanaldiaren iraupena legez aldatzen bada, norberaren gauzetarako egunak gehituz ezarritako lanaldi murrizketak legezko bidetik gertatzen den lanaldi murrizketaren konturakotzat hartuko dira, eta, beraz, norberaren gauzetarako egunak lanaldi murrizketa horrek konpentsatu eta xurgatuko ditu legezko bidetik.

Astelehenetik ostiralera bitartekoa izan daiteke lanaldia. Lanaldiari hasiera emateko langileak bere lanpostuan egon beharko du.

7. artikulua. Urteko oporrak.

Hitzarmen kolektibo honen eraginpeko langileek hogeita hiru laneguneko opor ordainduak izanen dituzte.

8. artikulua. Aldi baterako ezintasunagatiko prestazio osagarriak.

Gizarte Segurantzaren Lege Orokorraren 128. artikuluan zehaztutako aldi baterako ezintasun kasuetan, enpresak prestazio osagarri bat ordainduko du, Gizarte Segurantzari dagokionari gehituta, bajan dagoen langilearen oinarrizko soldata gordinaren ehuneko ehun osa dezan, bajaren lehen egunetik eta gehienez 545 egun arte. Aipatu muga gaindituz gero, ez dira ordainduko langileak izaten ahal dituen plusak.

Lan istripuak eragindako ABEaren kasuan, enpresak aurreko hileko kontingentzia profesionalen oinarriaren %100eraino osatuko du, betiere aurreko urteko absentismo ratioa %15etik beherakoa izan bada. Absentismo ratio hori mutualitatearen txostenetatik ateratzen dena izanen da.

9. artikulua. Konpentsazioa, txanda aldaketengatik.

Txanda berria hasi baino 48 lanordu lehenago jakinarazten diren txanda aldaketak 16 eurorekin konpentsatuko dira 2025erako, 16,48 eurorekin 2026rako, 16,97 eurorekin 2027rako eta 17,48 eurorekin 2028rako.

10. artikulua. Lanaldiaren banaketa irregularra eta aparteko orduak.

Erreferentziazko asteko lanaldia 40 ordukoa izanen da, baina lanaldi arruntak ordu gehiago edo gutxiago izaten ahal ditu, astelehenetik ostiralera modu irregularrean banatuta.

Urteko, gehienez, 173 ordu banatzen ahalko dira modu irregularrean; hau da, urteko benetako lanorduen (1.736 ordu urtean) %10. Banaketa horiek 5 laneguneko aurreabisuarekin jakinaraziko dira, lanegunen arteko legezko atsedenak errespetatuz.

Modu irregularrean banatutako orduen berrikuspena hiru hilean behin eginen da. Langileak zegokiona baino lanordu gutxiago bete baditu, hurrengo hiruhilekoaren lehen hilabetean berreskuratu beharko ditu. Langileak ordu gehiago egin baditu, ordutegia hurrengo hiruhilekoaren lehen hilabetean erregularizatuko da, enpresaren eta langilearen artean adostuta. Horretarako, langilearen interesa eta enpresaren antolakuntza eta ekoizpen beharrak izanen dira kontuan. Ekoizpen arrazoiak direla-eta enpresak ezin baditu jaiegunekin konpentsatu, ordaindu eginen dira hilabete bukaeran, honela: ordu bakoitzeko, ordu bat.

Aparteko orduak nahitaezkoak izanen dira teknikarekin, antolaketarekin edota ekoizpenarekin lotutako premiak baldin badaude. Ordu bakoitzeko, ordu bat konpentsatuko da, dirutan edo atseden orduak emanez, enpresaren eta langilearen artean adostuta. Horretarako, langilearen interesa eta enpresaren antolakuntza eta ekoizpen beharrak izanen dira kontuan. Urtean, gehienez, 80 aparteko ordu beteko dira, baldin eta salbuespenezko baldintzak ez badaude. Halakoetan ere ordu bakoitzeko ordu bat konpentsatuko da, dirutan edo atseden orduak emanez. Atsedenarekin konpentsatzen denean, ratioa 1,5 atseden ordukoa izanen da lan egindako ordu bakoitzeko.

Igandetan eta estatuko, eskualdeko eta udalerriko jaiegunetan betetako aparteko orduak dirutan konpentsatuko dira beti (ordu bakoitzeko ordu bat), hitzarmenaren 12. artikuluan jasotako taulen arabera, eta ez atseden orduen bitartez.

III. KAPITULUA.–LANBIDE SAILKAPENA.

11. artikulua. Lanbide taldeak, lanpostuak eta funtzioak.

I. taldea.

–Ataleko buruak.

–Proiektuko buruak.

–Biltegiko burua.

– Saltzaile komertziala.

II. taldea.

–Lizentziadunak eta ingeniariak.

–Administrariak.

–Biltegiko arduraduna.

III. taldea.

–Administrari laguntzailea.

–Langileak.

• Langilea.
• Langile finkatua.
• Langile espezialista.

Langilea: enpresan lanean hasten ari den langilea da, sektore bereko beste enpresetako logistika departamentuetako antzeko lanpostutan esperientziarik izan edo ez.

Langile finkatua: gutxienez bi urtez langile soil gisa biltegiko zerbitzu konplexuagoak arrakastaz egin dituen langilea da. Zenbatzeko, kontuan hartuko dira bai enpresa kontratuaren denbora, bai ABLEen bidezko kontratua.

• Bere arduradun zuzenak ebaluatu beharko du, eta biltegiko funtzioak maila aurreratuko trebetasunarekin egin beharko ditu.
• Maila aurreratuko ezagutza lortu beharko du erreminta ofimatikoen erabileran.

Urtebetea kontatzeko, ABE aldiak baztertuko dira.

ABE, eszedentzia edo beste edozein arrazoi dela-eta urtebetez baino gehiago prestazioa emateari uzten zaionean, zerotik hasiko da berriro urtebetea kontatzen.

Langile espezialista: gutxienez bi urtetan langile finkatu gisa biltegiko zerbitzu konplexuagoak arrakastaz egin dituen langilea da. Horrez gain, honako baldintza hauek bete behar ditu:

• Bere arduradun zuzenak ebaluatu beharko du, eta biltegiko funtzioak goi mailako trebetasunarekin egin beharko ditu.
• Goi mailako ezagutza lortu beharko du erreminta ofimatikoen erabileran.
• Mantentze lanetako makina guztiak trebetasunez erabili beharko ditu, eta eskorga operadoreen txartela eskura izan beharko du.

Bi urte horiek kontatzeko, ABE aldiak baztertuko dira.

ABE, eszedentzia edo beste edozein arrazoi dela-eta urtebetez baino gehiago prestazioa emateari uzten zaionean, zerotik hasiko da berriro urtebetea kontatzen.

IV. KAPITULUA.–ALDERDI EKONOMIKOAK

12. artikulua. 2024-2028 urteko ordainsariak.

2025eko urtarrilaren 1etik 2028ko abenduaren 31ra bitarteko ondorioekin.

Oinarrizko soldaten taula (antzinatasuna eta aparteko ordainsariak barne):

Salgaien garraiorako hitzarmen probintzialak antzinatasun osagarri bat ezartzen badu, kontuan hartu beharko da taula hauetan kontzeptu hori sartuta dagoela eta aparteko ordainsariak ere sartuta daudela. Azken batean, taula horiek urteko soldaten batura dira (antzinatasuna eta aparteko ordainsariak barne).

2024 eta 2025eko estatuko KPIen batura %6tik gorakoa bada 2026ko soldata igoera aplikatu aurretik, soldata taulak diferentziarekin berrikusiko dira, atzerapenik ordaindu gabe.

2026 eta 2027ko estatuko KPIen batura %6tik gorakoa bada, 2028ko soldata taulak diferentziarekin berrikusiko dira, atzerapenik ordaindu gabe.

Aparteko ordainsariak hileko hamabi ordainsarietan hainbanatuta ordainduko dira.

Plusen taulak

–2025.

–2026.

–2027.

–2028.

Orga kontrapisudunak eta erretraktilak erabiltzeagatiko plusa (2025etik 2028ra, biak barne): 10 euro hilean x 14 hilabete (transpaleta elektrikoetarako ez).

13. artikulua. Baimen ordainduak.

1.–Hamasei egun natural ezkontzeagatik edo izatezko bikotea erregistratzeagatik.

2.–7 egun emanen dira ezkontidearen edo izatezko bikotekidearen heriotzagatik. Guraso, seme edo alaba bat hiltzen bada, 4 egun probintzian bertan gertatzen bada, eta 6 egun kanpoan gertatuz gero. Anaia/neba, arreba/ahizpa, koinatu, koinata, aitona, amona edo biloba bat hiltzen bada, 2 egun probintzian bertan gertatzen bada, eta 4 egun kanpoan gertatuz gero.

3.–Bost egun, istripu edo gaixotasun larria baldin badu, ospitaleratu behar badu edo etxean atseden hartzea eskatzen duen ospitaleratzerik gabeko ebakuntza kirurgikoa baldin badu ezkontideak, izatezko bikotekideak edo odol edo ezkontza bidezko bigarren mailarainoko ahaide batek (izatezko bikotekidearen odol bidezko ahaideak barne) edo langilearekin etxe berean bizi den eta haren zaintza behar duen beste edozein pertsonak.

Kasu berean, baina ezkontidearen, gurasoen eta seme-alaben kasuan bakarrik, lizentzia beste lau egun luzatzen ahalko da, baina ordainsaririk gabe.

4.–Guraso, seme, alaba, anaia/neba edo arreba/ahizpa bat edo horien pareko ezkontza ahaide bat ezkonduz gero, 2 egun probintzian gertatzen bada, eta 3 egun kanpoan bada (ezkontza egunak baimenaren erdikoa izan behar du).

5.–Ohiko bizilekuz aldatzeko, 2 egun.

6.–Artikulu honetan zerrendatutako lizentzi ordainduez gain, Langileen Estatutuaren 37. artikuluko 3. puntuko d), e) eta f) letretan jasotakoak aplikatuko dira.

14. artikulua. Norberaren aukerako egunak langileentzat.

Norberaren aukerako egunak urte naturalean lan egindako hilabete kopuruaren proportzioan sortuko dira. Ondorio horietarako, ez dira gorantz biribilduko, eta egun osoa sortzen denean bakarrik sortuko da egun bat gehiago.

2024. eta 2025. urteetarako, norberaren aukerako 4 egun ezartzen dira. Egun horiek ez dira berreskuratu beharko, baina urte bakoitzeko abenduaren 31n galduko dira, hartu ez badira.

2024. eta 2025. urteetan, horietako bi langileak nahi duenean eskatzen ahalko ditu, eta beste biak enpresak erabakiko du noiz hartu.

2026tik 2028ra bitartean, norberaren aukerako 5 egun ezartzen dira. Horietako hiru langileak nahi duenean eskatzen ahalko ditu, eta beste biak enpresak erabakiko du noiz hartu.

Enpresako zuzendaritzak baimena eman ezean, ez dira abenduan hartzen ahalko.

Langileak eskatzen dituen bi egun horiek onartu beharko ditu enpresak, salbu eta hori ezinezkoa bada. Lehen eskaera onartzea ezinezkoa bada, bigarrena onartuko da nahitaez, baldin eta eragiketa behar bezala egiteari eragiten ez badio.

Urte naturala bukaturik enpresak ez badu idatziz adierazi zein diren norberaren aukerako egunak, hartu gabeko atseden gisa ordaindu beharko dira, nominako kontzeptu finkoak baturik, hurrengo urteko urtarrileko nominan.

V. KAPITULUA.–DIZIPLINA ARAUBIDEA

15. artikulua. Diziplina araubide aplikagarria.

Salgaien errepide garraioko II. akordio orokorrean erregulatutako diziplina araubideari jarraituko zaio.

VI. KAPITULUA.–BESTELAKO XEDAPENAK

Hitzarmen honetan hitzartutako baldintzak ez aplikatzeko prozedura.

Langileen Estatutuaren 82.3 artikuluan xedatzen denari jarraituko zaio.

–Zuzenbide osagarria.

Hitzarmen kolektibo honetan aurreikusten ez denerako, Nafarroako salgaien errepide garraioaren sektoreko hitzarmenean, Salgaien Errepide Garraioaren II. Akordio Orokorrean eta Langileen Estatutuan xedatutakoa beteko da.

Iragarkiaren kodea: F2504132