Iragarkia

70. ALDIZKARIA - 2025eko apirilaren 8a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

48C/2025 EBAZPENA, martxoaren 14koa, Ekonomia Sozialeko eta Laneko zuzendari nagusiak emana, zeinaren bidez erabakitzen baita Irati Hiri Hondakin Solidoen Mankomunitatearen hitzarmen kolektiboa erregistratzea, gordailutzea eta Nafarroako Aldizkari Ofizialean argitaratzea.

Aztertu da Irati Hiri Hondakin Solidoen Mankomunitateak aurkeztutako hitzarmen kolektiboa (kode zenbakia: 31102442012025), erregistro honetan sartu dena 2025eko otsailaren 7an, eta 2024ko abenduaren 4an sinatu zutena enpresaren ordezkariek eta gehiengo sindikalak.

Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, lan akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin bat etorriz.

Nafarroako Foru Komunitateko Administrazioari eta foru sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuak ematen dizkidanak, honako hau,

EBAZTEN DUT:

Lehenengoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Irati Hiri Hondakin Solidoen Mankomunitateak aurkeztutako hitzarmen kolektiboa (kode zenbakia: 31102442012025).

Bigarrena.–Nafarroako Aldizkari Ofizialean argitaratzeko agintzea, orok jakin dezan.

Iruñean, 2025ko martxoaren 14an.–Ekonomia Sozialeko eta Laneko zuzendari nagusia, Iñaki Mendióroz Casallo.

TEXTO DEL CONVENIO LABORAL DE LA MANCOMUNIDAD RESIDUOS SÓLIDOS URBANOS IRATI CON SUS TRABAJADORES Y TRABAJADORAS

IRATI HIRI HONDAKIN SOLIDOEN MANKOMUNITATEAK BERE LANGILEEKIN DUEN LAN HITZARMENAREN TESTUA

HITZAURREA

I. KAPITULUA.–ARAU OROKORRAK

1. artikulua. Aplikazio esparrua.

2. artikulua. Indarraldia.

3. artikulua. Iraupena.

4. artikulua. Hitzarmena interpretatu eta aplikatzea.

5. artikulua. Batzorde misto paritarioaren osaera.

6. artikulua. Aplikazio osagarria.

7. artikulua. Enplegu publikoa sustatzea, sarrera eta kontratazioa.

II. KAPITULUA.–LAN BALDINTZAK

8. artikulua. Lanaldia.

9. artikulua. Lan egutegia.

10. artikulua. Lanaren antolaketa.

11. artikulua. Arduraduna.

12. artikulua. Oporrak, lizentziak eta baimenak.

13. artikulua. Lanaldiaren murrizketa.

14. artikulua. Norberaren aukerako egunak.

15. artikulua. Lana nork bere borondatez uztea.

III. KAPITULUA.–BALDINTZA EKONOMIKOAK

16. artikulua. Ordainsariak.

17. artikulua. Antzinatasuna.

18. artikulua. Familia laguntzak.

19. artikulua. Aparteko orduak.

20. artikulua. Jaiegunak.

21. artikulua. Eguberri eta Urtezahar.

22. artikulua. Igandeko irteerak.

23. artikulua. Hileko ordainsariak.

24. artikulua. Dietak.

IV. KAPITULUA.–ONURA SOZIALAK

25. artikulua. Erretiroa.

26. artikulua. Behin-behineko langileak eta ordezte kontratuak.

27. artikulua. Lanerako ezintasun iragankorra.

28. artikulua. Langunea eta joan-etorriak.

29. artikulua. Osasun azterketa.

30. artikulua. Aseguruak.

31. artikulua. Eszedentziak.

32. artikulua. Laneko arropak.

33. artikulua. Gidabaimena berritzea eta kentzea.

34. artikulua. Prestakuntza planak.

VI. KAPITULUA.–ONURA SOZIALAK

35. artikulua. Informazioa eta partaidetza.

36. artikulua. Eskubide sindikalak.

37. artikulua. Laneko arriskuen prebentzioko ordezkariak.

38. artikulua. Laneko jazarpenari eta gatazkak ebazteari buruz.

39. artikulua. Lan osasuna.

VI. KAPITULUA.–DIZIPLINA ARAUBIDEA

40. artikulua. Faltak.

41. artikulua. Zehapenak.

42. artikulua. Falten preskripzioa.

43. artikulua. Diziplina neurriak.

IRATI HIRI HONDAKIN SOLIDOEN MANKOMUNITATEAK BERE LANGILEEKIN DUEN LAN HITZARMENAREN TESTUA

HITZAURREA

Irati Hiri Hondakin Solidoen Mankomunitatearen –aurrerantzean, HHSM– xede bat da hondakinen bilketa eta tratamenduaren zerbitzu publikoa eraginkortasunez eta efizientziaz ematea, zuzeneko erabiltzaileen eta gizarte osoaren beharrak eta espektatibak asez. Helburu nagusi hori lortzeko ezinbestean instituzioek eta zuzendaritzak ez ezik langileek eta haien ordezkariek ere parte hartu behar dute erantzukizunetan eta eginkizun horretan.

Kudeaketa esparru horretan funtsezkoa da erakundearen interes taldeen beharrak eta espektatibak kontuan hartzea, erakundea garatzeko eta hobetzeko motorra baitira. Aipatu dugun bezala, lehentasuna dute Irati HHSMren eremuko eragileek eta gizarteak, baina mankomunitateko langileak ere erakundeko interes talde nagusietako bat dira.

Hortik ondorioztatzen da erantzun behar zaiela, modu osotu, orekatu eta koherentean, dauden edo interes guztiei edo bizi dugun ingurune sozial, politiko eta ekonomikoan gerta daitezkeen aldaketen ariora sortzen diren interesei, entitate honek bere erabiltzaileekin eta gizartearekin duen eginkizun nagusia kontuan hartuta.

Alde horretatik, erakunde honen garapenari eta langileriari buruzko orientazio nagusiak adierazteko lerro estrategiko hauek ditugu:

–Gure erakundean, pertsonak garrantzitsuak dira. Horregatik, langileen integrazioa eta gogobetetzea bultzatuko ditugu, haien beharrak eta espektatibak era sistematikoan ezagutu ondoren eta informazio hori erabiliz langileen kudeaketarako politikak, sistemak eta tresnak berrikusi eta hobetzeko, langileen ordezkariekin batera.

–Saiatuko gara langileek hobekuntzak proposa ditzaten, eta eskumenetan oinarritutako prestakuntza bultzatuko dugu.

–Langile guztien segurtasuna eta laneko osasuna bermatuko ditugu, arriskuak modu planifikatuan ezabatuz eta murriztuz.

Lerro estrategiko hauen garapen praktikorako, ezinbestekoa da erakundea osatzen duten guztien erantzukizuna, partaidetza eta konpromisoa. Garapen hori orientazio multzo batean gauzatzen da, zeinen bidez zehaztu nahi baita erakundearen eginkizun, ikuspegi, balore eta lerro estrategikoekin bat heldu den lan harremanen eredua.

1. Lan harremanei buruzko kontsiderazio etikoa.

2. Zuzendaritzaren eta langileen arteko konfiantza, proiektu bateratu baten gainean partekaturiko erantzukizunean oinarritua, informazio fluxuen gardentasuna, eta elkarrizketa desadostasunak konpontzeko funtsezko tresna gisa.

3. Partaidetza, komunikazio eta informazio bide antolatu eta sistematikoak izatea eta bultzatzea langile guztientzat, garapen pertsonal eta profesionalerako aukerak emate aldera.

4. Prestakuntza eta ezagupen partekatua azpimarratzea.

5. Barneko eta kanpoko ekitatea kontraprestazio ekonomiko eta sozial orotan, gure eremu geografikoan, sektorialean eta kudeaketa ereduan ditugun praktika hoberenak kontuan hartuz.

6. Laneko elkarbizitza arautzen duten arauak errespetatzea, soluzio pertsonalizatuak eskatzen dituzten egoerentzako behar den malgutasuna izanik.

Dokumentu honetan biltzen diren edukiak zertarako eta hitzaurrean adierazitako planteamenduekin bat datozen eta errazten dituzten lan harremanen eredua garatzeko direla ulertuz, IRATI HHSMk eta langileek hitzarmen hau adosten dute.

I. KAPITULUA.–ARAU OROKORRAK

1. artikulua. Aplikazio esparrua.

Hitzarmen honek IRATI HHSMren eta, alde batetik, a) udal eskumeneko hondakinak biltzeko eta tratatzeko zerbitzuko lan kontratudun langileen arteko lan harremanak arautzen ditu, eta, bestetik, IRATI HHSMren eta b) mankomunitateko administrazio langilearen artekoak.

2. artikulua. Indarraldia.

Hitzarmen honek hiru urteko indarraldia du: 2025., 2026 eta 2027. urteak.

Sinatzen den egunetik hartuko du indarra. Dena dela, ondorioak 2025eko urtarrilaren 1era eramanen dira, eta bere edukiak hurrengo hitzarmena sinatu arte izanen du indarra.

3. artikulua. Iraupena.

Iraupena 3 urtekoa izanen da, alegia, 2027ko abenduaren 31n bukatuko da, eta mugaegunaren azken hiru hilabeteetan automatikoki salatuko da.

4. artikulua. Hitzarmena interpretatu eta aplikatzea.

Bi alderdiek hitzartzen dute hitzarmen honen interpretazioari edo aplikazioari buruz sor daitekeen edozein zalantza edo desadostasun batzorde paritarioaren txostenaren bidez ebaztea, organo eskudunen aurrean erreklamazioa jarri aurretik.

Era berean, ezartzen da langileek batzorde misto paritarioan parte hartuko dutela beren ordezkari sindikalaren bitartez.

Batzordeak aztertuko ditu hitzarmen hau interpretatu edo aplikatzean sor daitezkeen zalantzak edo desadostasunak, administrazioan edo administrazioarekiko auzien salan erreklamazioa aurkeztu aurretik eta gatazka kolektibora jo baino lehen.

5. artikulua. Batzorde misto paritarioaren osaera.

a. Batzorde misto paritarioa mankomunitateko ordezkari batek eta langileen ordezkariak osatuko dute.

b. Batzordeak funtzio hauek izanen ditu:

–Hitzarmenaren klausula guztien aplikazioa interpretatzea.

–Itundutakoa betetzen den zaintzea.

–Hitzarmen honek indarra hartu ondoren ematen diren legezko xedapen berriak aztertu eta baloratzea, hitzarmenaren edukian eraginik izan badezakete.

–Hitzarmenaren eraginkortasun praktikoa hobetzen duten beste jarduera guztiak, testuan ezarrita badaude.

–Batzorde paritarioa alderdietako edozeinek eskatuta bilduko da, ados jarrita non, zein egunetan eta zer ordutan eginen den, edonola ere eskaera egin eta hamar eguneko epean.

6. artikulua. Aplikazio osagarria.

Hitzarmen honetan aurreikusita ez dagoen orotan, Nafarroako Foru Komunitateko Foru Administrazioko eta haren erakunde autonomoetako lan kontratudunen hitzarmen kolektiboan eta Langileen Estatutuan xedatutakora joko da aurretik.

7. artikulua. Enplegu publikoa sustatzea, sarrera eta kontratazioa.

Iratiko Hondakinen Mankomunitateak, enplegu publikoa sustatzeko asmoz, ez ditu kanpora aterako hitzarmen honen indarraldian mankomunitateko langileek gaur egun egiten dituzten lanak.

Etorkizunean sortzen diren beharrizan berriak ere mankomunitateko langileek beteko dituzte, baldin eta behar diren baliabide materialak eta langileak badaude eta segurtasuna bermatzen bada.

II. KAPITULUA.–LAN BALDINTZAK

8. artikulua. Lanaldia.

1. Hitzarmen kolektibo honen aplikazio-eremuaren eraginpeko langileen lanaldia urtean 1.592 ordukoa izanen da.

i. Gidarien lanaldia 06:00etatik aurrera hasi, eta 7 ordu eta 20 minutukoa izanen da. Zerbitzuko ezinbesteko arrazoiak direla-eta (esaterako, matxurak, kamioirik eza, gertaera bereziak…) aldatzen ahal da, langileen ordezkariari entzun ondoren; dena den, ohiko ordutegira ahalik eta lasterren itzuli beharko da. Aurrekoaz gain, lanaldia aldatzen ahal da, baldin eta beste ordutegi batean lan egiteko prest dauden langileak, zerbitzuren bat egiteko behar adina, badaude.

ii. Astean zehar ahalik eta ordutegi erregularrena izateko helburuarekin, garbiguneko langilearen lanaldia 08:00etatik aurrera hasiko da goizez soilik lan egiten den egunetan, eta 7 ordu eta 20 minutukoa izanen da. 08:00etatik 15:00etara nahitaez eginen du lan. Gainerako 20 minutuak, malgutasunez, enplegatuak aukeratuko du noiz egin: 07:40tik 08:00etara edo 15:00etatik 15:20ra. Zerbitzua arratsaldez eman behar den egunetan, garbiguneko langilearen lanaldia 12:00etatik aurrera hasiko da, eta 7 ordu eta 20 minutukoa izanen da. 12:00etatik 19:00etara nahitaez eginen du lan. Gainerako 20 minutuak, malgutasunez, enplegatuak aukeratuko du noiz egin: 11:40tik 12:00etara edo 19:00etatik 19:20ra.

iii. Lanaldi horiek guztiak zerbitzuko ezinbesteko arrazoiengatik (adibidez, matxurak, ibilgailurik eza, gertaera bereziak…) aldatzen ahal dira, langileen ordezkariari entzun ondoren; dena den, ohiko ordutegira ahalik eta lasterren itzuli beharko da. Aurrekoaz gain, lanaldia aldatzen ahal da, baldin eta beste ordutegi batean lan egiteko prest dauden langileak, zerbitzuren bat egiteko behar adina, badaude. Ildo horretan, zerbitzuaren beharrak direla-eta, lanaldi bat gaituko da hilabete bakoitzeko lehen larunbatean, 09:00etatik aurrera, eta 4 ordukoa izanen da; lan egindako ordu horiek konpentsazioen artikuluan xedatutakoaren arabera konpentsatuko dira.

iv. Konpostajeko langilearen lanaldia 08:00etatik aurrera hasi, eta 7 ordu eta 20 minutukoa izanen da. 08:00etatik 15:00etara nahitaez eginen da lan, eta gainerako 20 minutuak, malgutasunez, enplegatuak aukeratuko du noiz egin: 07:40tik 8:00etara edo 15:00etatik 15:20ra. Zerbitzuko ezinbesteko arrazoiak direla-eta (esaterako, matxurak, kamioirik eza, gertaera bereziak…) aldatzen ahal dira, langileen ordezkariari entzun ondoren; dena den, ohiko ordutegira ahalik eta lasterren itzuli beharko da. Aurrekoaz gain, lanaldia aldatzen ahal da, baldin eta beste ordutegi batean lan egiteko prest dauden langileak, zerbitzuren bat egiteko behar adina, badaude.

v. Administrazioko lanaldia 08:00etatik 15:00etara izanen da,eta gainerako 20 minutuak, malgutasunez, enplegatuak aukeratuko du noiz egin: 07:40tik 8:00etara edo 15:00etatik 15:20ra. Ezinbesteko kasuetan, lanaldia aldatzen ahal da.

2. Ogitartekorako atsedenaldia, lanaldi osoaren kasuan, 30 minutukoa izanen da lanaldiaren barruan, eta benetako lantzat hartuko da. Lanaldi murriztuaren kasuan, atsedenaldia murrizketaren ondorengo lanaldiarekiko proportzionala izanen da.

9. artikulua. Lan egutegia.

Azaroan, hurrengo urteko lan egutegia prestatuko da mankomunitatearen eta langileen ordezkariaren artean. Adostasunik ez badago, mankomunitateak erabakiko du.

10. artikulua. Lanaren antolaketa.

Langileen ordezkariak parte hartzeko eskubidea izanen du lan baldintzak ezartzeko prozeduretan hartuko diren erabakietan.

Lanpostuen balorazioa eginen da, eta, bertan, udal eskumeneko hondakinak biltzearekin eta kudeatzearekin lotutako lanpostu guztien funtzioak mugatuko dira. Balorazioan zehaztutako erantzukizunak eta betebeharrak ez betetzea hitzarmen honen diziplina araubidean sartuko da.

11. artikulua. Arduraduna.

Mankomunitateko edozein langilek proposatzen ahalko du bere burua arduradun lanak egiteko hautagai gisa.

Boluntario bat edo gehiago egonez gero, barne sustapeneko prozesu baten bidez hautatuko da arduraduna.

Lanpostu hori betetzeko boluntariorik ez badago, Mankomunitateak erabakiko du nork bete behar dituen lan horiek.

Arduradunak osagarri pertsonal bat jasoko du, jarraian zerrendatzen diren lanak egiteagatik eta lan horiek direla-eta erantzukizuna izateagatik.

Hauek izanen dira arduradunaren funtzioak:

–Teknikariarekin langileen beharrak koordinatzea, bilketa plangintzaren arabera.

–Bilketako langileen oporren, ordu konpentsazioen, norberaren gauzetarako baimenen eta bestelako absentzien eskaerak jasotzea.

–Oporretarako, konpentsazioetarako, norberaren gauzetarako eta absentzietarako beste baimen batzuk planifikatzea eta langileekin koordinatzea/adostea. Plangintza egiterakoan, baimenak hartzeko aldiak multzokatzen saiatu beharko da, kontratazio duinak eta ahalik eta luzeenak egite aldera.

–Lan programan oinarrituta, lana behar bezala egiteko behar diren langileak kontratatzea proposatzea, behar besteko aurrerapenarekin.

–Langile berrien sarrera antolatzea, lan-sistemara egokitzeko. Horretarako, behar den prestakuntza emanen du, lantaldeak modu orekatuan egituratuko ditu eta lantaldeak eta laneko arropak emanen ditu.

–Administrazioari jakinaraztea absentzien arloko eskaerak, baimenak eta plangintza, bai eta langileen kudeaketari eragiten dioten gai guztiak ere.

–Material txikien, horniduren eta ordezko piezen inbentarioa eta stocka eguneratuta edukitzea.

–Material txikiak, hornidurak eta ordezko piezak zuzenean erostea eta/edo eskatzea.

–Zerbitzuko ibilgailuen eta instalazioen mantentze lanen prebentzio plangintza egitea.

12. artikulua. Oporrak, lizentziak eta baimenak.

Nafarroako Foru Komunitateko Administrazioaren eta haren erakunde autonomoen hitzarmenean ezarritakoak izanen dira, eta ez dira inoiz izanen Langileen Estatutuan ezarritakoak baino laburragoak.

Protokolo bat ezarriko da langileek opor eskaerak bideratzeko. Era berean, zerbitzua antolatzea ezarragoa izan dadin, langileek oporrak maiatzaren 31 baino lehen izan beharko dituzte udan, eta irailaren 30a baino lehen neguan.

Langile batek baino gehiagok oporrak aldi berean eskatuko balitu eta haien artean adostasunik ez balego, zozketa eginen litzateke, non eta mankomunitateak ezin dien eskaerei erantzun, estali beharreko langileak daudelako. Arestian azaldutakoa gertatzen bada, oporren egutegia maiatzaren 31rako aurkeztu ez duten langileek ez dute lehentasunik izanen aurkeztu dutenen aldean.

Oporraldi batean aldi baterako ezintasuna gertatuz gero, eta horren ondorioz langileak oporrak dagozkion urte naturalean hartzerik ez badu, ezintasuna bukatu ondoren hartu ahalko ditu, ezintasuna sortu duen kontingentzia eta igarotako denbora edozein direla ere.

Oporrak hartzeko azken eguna hurrengo urteko urtarrilaren 31 izanen da.

13. artikulua. Lanaldiaren murrizketa.

Kasuak Nafarroako Foru Komunitateko Administrazioaren eta haren erakunde autonomoen hitzarmenean ezarritakoak izanen dira, eta ez dira inoiz izanen Langileen Estatutuan ezarritakoak baino laburragoak.

14. artikulua. Norberaren aukerako egunak.

Langile bakoitzak, larrialdi handiko kasuetan izan ezik, 22 orduko poltsa izanen du. Bi langilek ezin dituzte ordu berak hartu, salbu eskaerei erantzuteko behar adina langile badaude. Bestela, zozketa bat eginen da.

Langileak eskatutako norberaren aukerako egunetan lanerako ezintasun iragankorreko egoeran badago, egun horiek eten eginen dira.

Ordu horiek hartzeko eskubidea izanen dute enpresan urtebete lan egin duten langileek. Urte erdia egin dutenek, berriz, 12 ordu hartzeko eskubidea izanen dute. Urte erdia baino gutxiago emanez gero lanean, urte erdia daramatenentzat ezarritakoen proportzioan zenbatuko dira orduak.

15. artikulua. Lana nork bere borondatez uztea.

Lana borondatez uzteko asmoa idatziz jakinarazi behar zaio Irati HHSMri, gutxienez 15 egun aurretik. Ez bada betetzen aldez aurretik abisu emateko epe hori, mankomunitateak zilegi izanen du haren likidaziotik egun bateko soldata kentzeko, aurreabisua emateko atzeratu den egun bakoitzeko. Eskatzaileak frogatzen duenean, modu fede emailean, lana borondatez utzi beharraren arrazoia dela lan eskaintza urgente bat onartzea, aurreikusi gabea, ez da kontuan hartuko abisu emateko ezarritako gutxieneko epe hori.

III. KAPITULUA.–BALDINTZA EKONOMIKOAK

16. artikulua. Ordainsariak.

Nafarroako Foru Komunitateko Administrazioaren eta haren erakunde autonomoen hitzarmenean ezarritakoak izanen dira, Irati HHSMren plantilla organikoari erreferentzia eginez.

17. artikulua. Antzinatasuna.

Antzinatasuna Nafarroako Foru Komunitateko Administrazioaren hitzarmenean ezarritakoa izanen da lan kontratudunentzat, eta Nafarroako administrazio publikoen zerbitzuko langileen estatutuan xedatutakoa, funtzionarioentzat.

Beste administrazio batzuetan sortutako antzinatasuna ere aitortuko da, hau da, antzinatasuna administrazio bakoitzean sartu zenetik egindako zerbitzuen arabera zenbatuko da.

Antzinatasuna hirurtekoen bidez aitortuko da, eta langileek antzinatasun osagarri pertsonala jasoko dute administrazio bakoitzean lanean emandako denboragatik. Osagarri hori, jarduneko zerbitzuan emandako hirurteko bakoitzerako, jarraian adierazten den zenbatekoa izanen da:

–A taldea: 63,09 euro.

–B taldea: 52,04 euro.

–C taldea: 42,60 euro.

–D taldea: 36,28 euro.

–E taldea: 31,56 euro.

Antzinatasun osagarria sorraraziko da benetako zerbitzuan hiru urte edo hiru urteren multiploa bete eta hurrengo hileko lehenengo egunetik aurrera, eta gainerako ordainsarien portzentaje berean eguneratuko da.

18. artikulua. Familia laguntzak.

Nafarroako Foru Komunitateko Administrazioaren eta haren erakunde autonomoen hitzarmenean ezarritakoak izanen dira.

19. artikulua. Aparteko orduak.

Hitzarmen honen eraginpeko jarduera herritarrentzat behar-beharrezko zerbitzu publikoa izanik, urte osoko ia egun guztietan nahitaez egin eta bukatu beharrekoa, sinatzaileek espresuki aitortzen dute "egiturazkoak" direla txanda aldaketen ondorioz egin beharreko aparteko orduak, eta orobat, produkzio beharren, ustekabeko lanen, mantentze lanen eta lanaren izaeraren ondoriozko egiturazko ordu horiek.

Zerbitzu horiek modu egokian eratuak eta egituratuak egon beharko dute, eguneko lanaldia sobera luzatzea eragozteko, halatan non egiturazko aparteko orduak ezinbesteko kasuetan baino ez daitezen egin.

Aparteko orduen zenbatekoa Nafarroako Gobernuak unean-unean indarrean dituen ordainsarien tauletan ezarritakoa izanen da.

Aparteko orduak konpentsatzeko, atseden denbora emanen da proportzio honetan: 1 ordu eta 3/4 lanegunean egindako aparteko ordu bakoitzeko. (Adibidez: lanegun batean kamioia arratsaldez tailerrera eramatea, etab.).

20. artikulua. Jaiegunak.

Zerbitzuaren beharrak kontuan izanda, lanaldia astelehenetik ostiralera bitartekoa izanen da.

Jaiegunetan jai egitea lehenetsiko da. Hala ere, zerbitzuagatik hala behar bada, jaiegunetan lan eginen da, mankomunitateak onespena eman ondoren. Jaiegunean lan egindako orduak (Nafarroako Gobernuak bere langileentzat argitaratutako lanegunen eta jaiegunen egutegiaren arabera) atseden denborarekin konpentsatuko dira: 2 ordu lan egindako ordu bakoitzeko.

Egun bererako konpentsazio eskaera bat baino gehiago badago eta horrek bilketan zailtasunak eragiten baditu, zozketa bat eginen da lanaldi konpentsazioa eskatzen dutenen artean.

Zerbitzua antolatzea eta langileak ordezkatzea errazagoa izan dadin, konpentsazioa sortu den urtearen hurrengo urteko urtarrilaren 31 baino lehen hartu beharko da konpentsazio hori. Dena den, langileak hala eskatzen badu, jaiegunetan lan egindako orduak ordaintzen ahalko dira: 2 ordu lan egindako ordu bakoitzeko. Gutxienez 3 ordu ordainduko dira, Nafarroako Gobernuaren taula orokorretan ezarritakoaren arabera. Araubide hori honako hau izanen da:

Jaiegunetako gaueko orduak jaiegunak ez diren egunetan bezala konpentsatu edo ordainduko dira.

21. artikulua. Eguberri eta Urtezahar.

Plantillako langileek jai izanen dute abenduaren 25ean eta urtarrilaren 1ean.

Egun horiek ostiralean badira, larunbatean bilketa egin beharko litzateke, eta, beraz, kasu horretan abenduaren 26a eta urtarrilaren 2a jaieguntzat hartuko dira.

22. artikulua. Igandeko irteerak.

Jaiegunetan lan egindako orduak atseden denborarekin konpentsatuko dira (2 ordu lan egindako ordu bakoitzeko), edo dirutan (2 ordu lan egindako ordu bakoitzeko). Gutxienez 3 ordu ordainduko dira, hitzarmen honen 19. artikuluak dioen bezala. Langileak aukeratuko du konpentsatzeko era bat edo bestea.

23. artikulua. Hileko ordainsariak.

Urteko ordainsaria hileko 14 pagatan ordainduko da.

24. artikulua. Dietak.

Nafarroako Foru Komunitateko Administrazioko lan kontratudunen hitzarmenean ezarritakoak izanen dira.

IV. KAPITULUA.–ONURA SOZIALAK

25. artikulua. Erretiroa.

Lan legeriak ezarritakoa izanen da.

26. artikulua. Behin-behineko langileak eta ordezte kontratuak.

Baldintza horietan dauden langile guztiek kontratu mugagabea duten langileen soldata bera izanen dute.

Plantillan langile finkoak sartzeko, oposizio-lehiaketaren bidez eginen da.

27. artikulua. Lanerako ezintasun iragankorra.

Laneko kontingentzien estaldura Gizarte Segurantzarekin hitzartuko da, eta ez enpresa pribatu batekin (mutualitateak).

Laneko istripuak, lan gaixotasunak, ospitalizazioak, ezintasun osoaren aurreko aldiak eta antzeko egoerek eragindako lanerako ezintasun iragankorra denean, mankomunitateak Gizarte Segurantzaren prestazioa osatuko du likidatutako hileko benetako soldataren %100 egin arte.

Lanerako ezintasun iragankorra gaixotasun arruntagatik gertatzen bada, mankomunitateak Gizarte Segurantzaren prestazioa osatuko du likidatutako hileko egiazko soldataren %100 egin arte.

28. artikulua. Langunea eta joan-etorriak.

IRATI HHSMren eragin eremura mugatuko dira zereginak eta joan-etorriak, baita udal eskumeneko hondakinak biltzeko eta kudeatzeko zerbitzua emateko harekin lankidetza hitzarmenak sinatu dituzten edo sina ditzaketen udal eta toki erakundeen eragin eremura ere, IRATI HHSMren estatutuetan ezarritakoaren arabera.

29. artikulua. Osasun azterketa.

1. Mankomunitateak osasun egoera zaintzeko azterketak bermatuko dizkie langileei, aldian behin, lanak dituen arriskuen arabera. Mankomunitateko enplegatuek eskubidea izanen dute beren lanpostuari eta beren osasun egoerari buruz egiten diren azterlan guztien informazioa jasotzeko, egiten zaizkien azterketak, diagnostikoak eta tratamenduak barne. Orobat, emaitza horiek idatziz jasotzeko eskubidea ere izanen dute, eta beti errespetatu beharko da pertsona bakoitzaren intimitaterako eta duintasunerako eskubidea, eta osasun egoerarekin lotutako informazio guztia isilpekoa izanen da.

2. Azterketa medikoak:

a. Lanean onartu aurretik egin beharreko osasun azterketa alde batera utzi gabe, prebentzio zerbitzuak lanpostu bakoitzerako ezarritako berariazko eta borondatezko aldizkako osasun azterketak eginen zaizkie langileei. Langileren batek dagokion osasun azterketa egin nahi ez badu, berariaz sinatu beharko du azterketa horri uko egiten diola.

b. Hala osasun zaintza nola osasun azterketak pertsona bakoitzak bere lanpostuan dituen arriskuen arabera eginen dira nagusiki, eta kontuan hartuko ditu haren berezitasunak, halako eran non probek bat etorri beharko baitute xedearekin: jatorria lanean duten kalteak garaiz hautematea eta bereziki sentiberak diren pertsonak babestea.

c. Osasun azterketak nahitaezkoak izanen dira aldi baterako ezintasuna dela-eta 6 hilabetetik gora bajan daramatzaten pertsonentzat, edo bajak aldian-aldian hartu dituztenentzat, halakoak egiteko deituak izanez gero, kontingentzia arrunteko arazoek lanpostuari eragiten ahal dioten baloratzeko xedez.

d. Langileen artean osasuna sustatze aldera, borondatezko azterketa orokorrak eginen dira berariazko azterketak egiten direnean.

30. artikulua. Aseguruak.

Istripu aseguruaren poliza. Mankomunitateak bere langileen alde aseguru poliza bat kontratatuko du langileei kalte ordain hauek bermatzeko:

–Laneko istripuaren ondoriozko heriotza: 40.000 euro.

–Laneko istripuaren edo gaixotasun profesionalaren ondoriozko erabateko ezintasun iraunkorra: 40.000 euro.

–Gaixotasun profesionalaren ondoriozko heriotza: 40.000 euro.

–Ezintasun iraunkor osoa bere lanposturako, laneko istripuaren edo gaixotasun profesionalaren ondoriozkoa: 40.000 euro.

–Berezko heriotza: 6.000 euro.

Aseguru horietarako aurrekontu partida Nafarroako KPI errealaren igoeraren arabera eguneratuko da.

Mankomunitateak konpromisoa hartzen du aldi baterako kontratatzen diren langileak istripu aseguruaren polizan sartzeko.

31. artikulua. Eszedentziak.

Eszedentziak unean uneko indarreko araudian xedatutakoaren arabera emanen dira.

32. artikulua. Laneko arropak.

Laneko arropak nahitaez erabili beharko dira, eta enpresak emanen ditu. Apurtuz gero, berriro emanen dira, beharrezkoa den guztietan, eta ez dira nahitaez urtean behin berrituko.

Norbera babesteko ekipamenduak prebentzio zerbitzuak ezarritako ditu. Laneko gainerako arropak bezala, nahitaez erabili beharko dira, eta enpresak emanen ditu.

Hona hemen laneko jantzien zerrenda:

–2 galtza luze.

–Mahuka motzeko 2 atorra.

–Mahuka luzeko 2 atorra.

–Txaleko bat.

–Mahuka luzeko polar bat edo jertse bat.

–Barruko arropa termikoa.

–Txano edo buru beroki bat.

–Parka motako neguko jaka bat.

–Uretako jantzi malgu bat.

–Udarako oinetako egokiak.

–Goretex materialezko botak.

–Laneko galtzerdiak.

–Lan arriskuen prebentziorako betaurrekoak, eguzkitik, hautsetik eta abarretatik babesteko, Pegaso lan gamakoak.

–Materialezko eskularruak, beharrezkoak diren guztietan.

–Uretako bota batzuk.

–Aurpegi babes bat kamioi bakoitzean, kamioiak garbitzeko.

–Lanpostu bakoitzerako berariazko laneko arropa osagarria, mankomunitateko prebentzio zerbitzuak ezarritakoa.

Arestian aipatutako jantziek mankomunitatearen anagrama izanen dute.

Jantzi guztiek material islatzailea izanen dute.

Medikuaren aginduz langileek lanean jantzi edo oinetako ortopedikoak erabili behar badituzte, mankomunitateak material hori guztia ordainduko du.

33. artikulua. Gidabaimena berritzea eta kentzea.

B eta C1 gidabaimena berritzeak (iraungitzeagatik) eragindako gastuak Irati HHSMk ordainduko ditu, kontratuan gidabaimena izatea eskatzen ez zaionari izan ezik.

Gidariari egotz dakiokeen arrazoiren batengatik baimena kentzen badiote, Irati HHSMk ez ditu bere gain hartuko dagozkion berritze gastuak.

Mankomunitateko ibilgailuetako gidariek ibilgailuetako edozeinetan gertatzen den anomalia oro aztertu eta jakinarazi beharko dute, halakorik badago, ibilgailuarekin lan egin aurretik, baldin eta segurtasunerako arriskua badakar edo trafikoko agenteen aldetik falta administratiboa jasotzea eragin badezake. Ibilgailuen dokumentazioaren baliozkotasuna ere kontrolatu beharko dute.

Gidariak behartuta daude une oro zirkulazio kodean indarrean dauden arauak errespetatzera.

Gidariarekin zerikusirik ez duen arrazoiren batengatik gidabaimena kentzen badiote, ibilbidearen premien edo akats mekanikoaren ondorioz, eta ausarkeriazko zuhurtziagabekeriarik edo asmo txarrik ez bada, mankomunitateak errespetatu eginen ditu lanpostuaren ordainsari ekonomikoak, gidabaimena kenduta duen bitartean. Dena den, denbora horretan mankomunitateak beste lanpostu batera egokitu du. Kasu horietan, mankomunitateak isuna eta puntuen galerak sor ditzakeen gastuak ordainduko dizkie haien ohiko lanean aritzen diren gidariei.

Adibideak:

–Zirkulazioa oztopatzeagatiko administrazio zehapenak akats mekanikoak edo bilketa beharrak direla-eta, edo zerbitzua eman bitartean ibilgailua hondatu ahal izan delako (zerbitzua eman bitartean argiak iraungitzea, atzerako ispiluek urritasunak izatea, etab.).

–Kale batera norabide debekatutik sartu behar izatea bilketa beharrengatik edo egin beharreko lanengatik, zirkulazioa oztopatzea akats mekanikoengatik edo bilketa-beharrengatik, etab.

Gidariaren erantzukizun pertsonalari egotz dakiokeen edozein penalizazio edo indarrean dauden zirkulazio arauak ez betetzea gidariak berak hartuko du bere gain.

34. artikulua. Prestakuntza planak.

1. Enpresak sustaturiko ikastaroak: enpresak matrikulako gastuak eta, hala behar izatera, baita joan-etorrietako gastuak ere ordainduko ditu.

Enpresak sustaturiko ikastaroetara edo prestakuntza jardunaldietara nahitaez joan beharko dute langileek. Enpresa saiatuko da ikastarook lanorduetan eman daitezen. Aurrekoa ukatu gabe, antolakuntza beharrak direla-eta, ikastarook lanordutik kanpora ere egiten ahal dira, ordezkari sindikalari jakinarazi ondotik. Horrelakoetan, langileek denbora osoaren %30 jarriko dute, gehienez, eta enpresak konpentsazioa emanen die denbora gehiago eman badute. Konpentsazioa baimen ordaindua izanen da, ordu bat orduko.

Denbora zenbatzeko, prestakuntzan benetan emandako denbora bakarrik hartuko da kontuan, joan-etorri edo egonaldi gehigarriak barne, baldin eta mankomunitateak prestakuntza ematera behartzen badu.

2. Langileek sustatutako ikastaroak hondakinen zerbitzuarekin eta ingurumenarekin lotuta egonen dira. Mankomunitateak ikastaro horietara joateko baimena ematen ahal du, zerbitzua ematea eragotzi gabe.

Matrikula gastuak eta liburuak mankomunitatearen kontura izanen dira.

3. Estatuko araudi berriaren aplikazioak kamioi gidariei eragiten badie eta horiek GPA titulua lortu edo berritu behar badute (5 urtean behin) bide publikoan ibilgailuekin gidatu ahal izateko, enpresak beharrezkoak diren gastuak (matrikula, liburuak eta joan-etorriak) ordainduko dizkio langileari dirulaguntza gisa.

4. Euskara eta hizkuntza-politika.

a. Langileek euskalduntze ikastaroetan parte hartzea. Administrazio elebiduna lortu eta zerbitzua euskaraz ematen ahal dela bermatzeko, mankomunitateak erraztasunak emanen dizkie euskaldundu nahi duten langile guztiei, euskara sustatzean aitzindaria izanik, behar adina partida eta bitarteko eskainiz.

Ikastaro horiek hilabete lehenago eskatu beharko dira, mankomunitateak langileak ikastarora joatea eta horiek ordezkatzea berma dezan.

b. Mankomunitate honen helburua denez biztanle guztiei bermatzea arreta eta zerbitzuak Nafarroako hizkuntza propioetako edozeinetan jasotzen ahal dituztela, bitartekoak jarriko dira nahi duten langileek beren lanpostuari dagokion hizkuntza eskakizuna eskuratu dezaten.

c. Mankomunitateak zehaztuko du, sindikatuekin negoziatu ondoren, zein lanpostutarako izanen den euskara bete beharreko eta ziurtatu beharreko eskakizun espezifikoa, eta zein lanpostutarako izanen den merezimendu. Era berean, langileen hizkuntza trebakuntza orientatuko du, sustapen ekintzei lehentasuna emate aldera haien destinoagatik edo lanpostuaren ezaugarriengatik behar handiagoa dagoela antzematen denean.

d. Euskara ikastaroetara doazen langileentzako ordu konpentsazioa Nafarroako Gobernuak une bakoitzean indarrean dauden legeen arabera ezarritakoa izanen da.

VI. KAPITULUA.–ONURA SOZIALAK

35. artikulua. Informazioa eta partaidetza.

Mankomunitateak langileen ordezkariari informazioa emanen dio batzar nagusian jorratuko diren gaiei buruz, betiere zerbitzuarekin lotura badute, komenigarritzat jotzen badu bilerara joan dadin eta legeak ezarritako baldintzetan parte hartu dezan, edo gai horien inguruan bidezkotzat jotzen duena batzarreko lehendakariari edo kideei jakinarazteko.

Eta, bereziki:

1. Langileen ordezkariak eskubidea izanen du lantokian langileekin biltzeko, inolako mugarik gabe.

2. Iragarki taula langileen ordezkariaren eskura jarriko da.

3. Mankomunitateak ez du ahalmenik komunikatu bat ken dadila agintzeko edo jar dadila eragozteko. Langileek adierazpen askatasuna gauzatzean eskubideren bat urratzen badute, organo judizialek erabakiko dute horri buruz.

4. Langileen ordezkariak ez du diskriminaziorik jasanen bere sustapen ekonomiko edo profesionalean. Bestetik, ez dute beste lanpostu edo talde batean jarriko bere ordezkaritzan egindako lanaren errepresalia gisa.

5. Ordezkari sindikalaren eskumenak:

a. Informazioaren aldetik:

i. Kontratazio arloan:

1. Idatziz egin behar diren kontratu guztien oinarrizko kopia jasoko du, horiek egin eta 10 eguneko epean. Epe beretan lan harremanaren luzapen edo bukaerari buruzko informazioa jasoko du.

2. Oinarrizko kopian langilearen datu guztiak agertuko dira, salbu bere intimitatea erakusten dutenak (NAN, egoera zibila, helbidea...).

3. Langileek kitatze agiria sinatu behar dutenean, eta hala eskatzen badute, langileen ordezkaria bertan egoten ahalko da, bai eta sinatu ere egon izanaren froga gisa.

ii. Aparteko orduen arloan:

1. langile bakoitzaren benetako lanaldiaren eguneko erregistroa (ordu arruntak, aparteko orduak, ordu konpentsatuak, etab.) biltzen duen hileko txostena jasotzea. Horretarako, fitxatzeko edo erregistratzeko protokolo bat ezarriko da.

2. Langile batek bere lanbide talde edo kategoria baliokidetik beherako beste talde edo kategoria bati dagozkion zereginak egin beharraren gaineko informazioa jasotzea.

b. Erabaki jakin batzuk hartu baino lehen entzuna eta kontsultatua izateko eskumenak.

i. Enpresak erabakia hartu baino lehen, langileen ordezkariak gaia ezagutu, kontsulta jaso eta, hala badagokio, txostena eman beharko du kasu hauetan:

ii. Enpresaren lanbide prestakuntzako planak.

iii. Lanaldia laburtzea.

iv. Urteko lan egutegia prestatzea (sartzeko eta ateratzeko orduak, atsedenaldiak, jaiegunak, zubiak, etab.).

v. Oporrak hartzea edo oporren txandak.

vi. Plantillaren berregituratzeak eta enpresan izaten diren uzte erabatekoak edo partzialak (behin betikoak edo aldi batekoak).

vii. Plantilla eta lan eskaintza publikoak negoziatzea.

viii. Instalazioen lekualdaketa osoa edo partziala.

ix. Lanaren antolaketako eta kontroleko sistemak ezarri edo berrikustea.

x. Enpresak beste batekin bat egitea, beste batek xurgatzea edo haren status juridikoa aldatzea, enpleguen kopuruan eragina badu.

xi. Langileek haien lanbide sailkapenari buruz egiten dituzten erreklamazioak.

xii. Lan baldintzak funtsez aldatzen direnean.

c. Negoziazioaren arloko eskumenak:

i. Erabaki jakin batzuk hartu baino lehen, mankomunitateak langileen ordezkariekin negoziatu beharko du, salbu hitzarmenean ezarrita badaude. Gai horiek hauek dira:

1. Soldata agiriaren eredua.

2. Enpresatik goragoko esparruko hitzarmenean ezarritako soldata araubidea ez aplikatzea, hitzarmenean ezarritakoa ez aplikatzeko klausulak ez badira.

3. Langileak lanbide kategoriaren edo lanbide taldearen arabera sailkatzeko sistemak.

4. Urteko lanaldiaren banaketa irregularra eta eguneko lan denboraren banaketa.

5. Plantilla nabarmenki gutxitu ondoren, langileen ordezkariak egokitzea.

d. Halaber, langileen ordezkariek eskumena izanen dute honako hauek egiteko:

i. Enpresako edo beheragoko esparru bateko hitzarmena negoziatzeko.

ii. Lan harremanak eteteko eta bukatzeko espedienteetan onespena emateko.

iii. Lan baldintza kolektiboen funtsezko aldaketak hitzartzeko, hitzarmen kolektiboan hitzartutako gai hauetan: ordutegia, txandak, lan egiteko sistemak.

e. Laneko segurtasun eta osasun arloko eskumenak:

i. Lehenago deskribatu diren eskumenez gain, langileek, haien ordezkarien bidez, eskubidea dute enpresan laneko arriskuen prebentzioari lotutako gaietan parte hartzeko. Horretarako, ordezkarien artean PREBENTZIOKO ORDEZKARIAK aukeratuko dira.

f. Absentismoa.

i. Hiruhilekoan behin, gutxienez, absentismoaren indizea eta haren arrazoiei buruzko estatistikak ezagutzeko eskubidea dute, baita ondorioak ere istripu edo gaixotasun profesionalak badira. Orobat, laneko giroari buruzko azterketak, aldizkakoak edo bereziak izan, eta erabiltzen diren prebentzio mekanismoak ezagutzeko eskubidea dute.

ii. Segurtasun eta higiene baldintzak zaindu eta kontrolatuko dituzte.

iii. Jarduerak etetea erabakitzen ahal dute istripu bat gertatzeko arrisku handia dagoenean.

36. artikulua. Eskubide sindikalak.

Mankomunitateko langileen ordezkariak sindikatuko lanerako behar duen denbora izanen du, baina hilean hogei ordu gehienez.

Ordu sindikalak hiru hilean behin metatzen ahalko dira, baldin eta premiengatik metatu egin behar badira eta mankomunitateko lehendakariak onesten badu.

Langileen ordezkariak eta mankomunitateak batzarretarako dei egin diezaiekete beren ordezkaritza esparruko langileei. Langileek bilerak egiteko 12 ordu izanen dituzte hiru hilean.

Batzarra lanaldian egiten bada, arau hauek bete beharko dira:

a. Batzarrak lanaldiaren hasieran edo bukaeran egin beharko dira. Salbuespenez, batzarrak lanaldiaren beste tarte batean egiten ahal dira, horrela kalte gutxiago egiten bazaio zerbitzuen ohiko funtzionamenduari.

b. Mankomunitateko lehendakariak eman beharko du batzarrak egiteko baimena.

c. Baimena emanen da aipatu diren baldintzak betetzen badira. Salbuespenezko kasuetan izan ezik, batzarra egiteko baimena gutxienez ere berrogeita zortzi ordu lehenago eskatu beharko da. Kontrako ebazpenik ematen ez bada baimena emantzat joko da; batzarra egin baino hogeita lau ordu lehenago gutxienez jakinarazi beharko da ebazpena.

d. Batzarra mankomunitatearena den egoitza batean eginen bada, arestian ezarri bezala egin beharko da eskaera.

37. artikulua. Laneko arriskuen prebentzioko ordezkariak.

Laneko arriskuei aurrea hartzeko gaietan berariazko funtzioak dituzten ordezkariak dira prebentzioko ordezkariak.

Langileen ordezkariek izendatuko dituzte beren artetik hautatuta, eta Lan arriskuen Prebentzioari buruzko Legearen 35. artikuluan ezarritakoaren arabera erabakiko da zenbat izanen diren.

Prestakuntzarako eta dagozkien zereginetarako behar duten denbora izanen dute.

38. artikulua. Laneko jazarpenari eta gatazkak ebazteari buruz.

Mankomunitateak konpromisoa hartzen du zehapen espedientea irekitzeko eta, kasua bada, dagokion zehapena jartzeko edozein langile jazartzen duten langile edo zuzendaritzako kideei, baita indarrean dagoen araudiaren arabera beharrezkoak diren protokoloak ezartzeko ere.

Mankomunitateak eta langileek konpromisoa hartzen dute laneko jazarpenari eta gatazkak ebazteari buruz beharrezkoak diren protokoloak egiteko eta aplikatzeko.

39. artikulua. Lan osasuna.

Batzorde paritarioa (prebentzioko ordezkariak eta mankomunitatearen ordezkari batek osatua) lan batzorde gisa arituko da, laneko arriskuen ebaluazio sistema eta hartu beharreko neurriak aztertzeko, sektore honen berariazko arriskuak atzeman ondoren.

Langileei eta prebentzioko ordezkariei lanorduetan emanen zaizkien prestakuntza ikastaroak, arriskuen prebentzioko eta lan osasuneko arloan, batzorde horrek zehaztuko ditu. Lanorduetan ematea ezinezkoa bada, prestakuntzari buruzko artikuluaren 1. apartatuan ezarritakoari jarraituko zaio.

Arriskuak atzeman eta ebaluatu ondoren, arriskuen ebaluazioaren ondoriozko prebentzioko neurriak ezarriko dira.

Administraziorako lan egiten duten enpresek prebentzioko plana prestaturik eduki beharko dute.

Lanpostuetako ergonomiek hobekuntza orokorra izanen dute.

VI. KAPITULUA.–DIZIPLINA ARAUBIDEA

40. artikulua. Faltak.

Langileei laneko betebeharrak ez betetzeagatik zehapena jarriko zaie, bakar-bakarrik, laneko ez betetze hori diziplina faltatzat hartzen denean. Hori zehazteko, falten eta zehapenen graduazioa eta prozedura hau hartuko dira kontuan.

Diziplina faltak arinak, astunak eta oso astunak izan izaten ahal dira.

• Falta arinak honako hauek dira:
  • Lanera berandu iristea, gehienez ere hamabi aldiz, hilabete berean, justifikatutako arrazoirik gabe.
  • Lanera behin ez joatea, hilabeteko epean, justifikatutako arrazoirik gabe.
  • Lanaldia behin ez betetzea, hilabeteko epean, justifikatutako arrazoirik gabe.
  • Agintariekin, nagusiekin, kideekin, menpekoekin eta administratuekin tratu zuzena ez izatea.
  • Zerbitzuetako lokalen, instalazioen, materialaren eta agirien zainketan arduragabea izatea.
  • Eginbeharretan berandu iristea edo zabarkeriaz edo utzikeriaz jokatzea, baldin eta zerbitzuaren funtzionamendu egokia galarazten ez badute eta administrazioari edo herritarrei kaltea ekartzen ez badiote.
• Falta astunak honako hauek dira:
  • Lanera berandu iristea, hamabi aldiz baino gehiagotan hilabete berean, justifikatutako arrazoirik gabe.
  • Lanera ez joatea, gehienez ere bost aldiz, hilabeteko epean, justifikatutako arrazoirik gabe.
  • Lanaldia ez betetzea, gehienez ere bost aldiz, hilabeteko epean, justifikatutako arrazoirik gabe.
  • Agintariekiko, nagusiekiko, lankideekiko, menpekoekiko eta administratuekiko errespetu falta.
  • Zerbitzuetako lokalen, instalazioen, materialaren eta agirien zainketan kalte larriak sortzea.
  • Zerbitzuaren berezko arloetan nagusiek idatziz emandako aginduak ez betetzea.
  • Langileen Estatutuaren 58.2 artikuluan xedatutakoari jarraituta ezarrita dauden kasuetan bizitzeko betekizuna ez betetzea.
  • Legeek abstenitzeko ezarritako arrazoiren bat gertatzen denean, prozedura administratiboren batean parte hartzea.
  • Lanean ari direla iskanbilak sortzea edo horietan parte hartzea.
  • Sekretu profesionala ez betetzea.
  • Falta arinak errepikatzea eta berrerortzea.
  • Oro har, eginbeharrak ez betetzea, horrek zerbitzuaren funtzionamendu egokia galarazten badu edo administrazio edo herritarrei kaltea eragiten badie.
  • Sexu jazarpena.
• Falta oso astunak honako hauek dira:
  • Lanera ez joatea, bost aldiz baino gehiagotan, hilabeteko epean, justifikatutako arrazoirik gabe.
  • Lanaldia ez betetzea, bost aldiz baino gehiagotan, hilabeteko epean, justifikatutako arrazoirik gabe.
  • Zerbitzutik alde egitea. Hori da hilabetetik gorako aldiko egun guztietan lanera ez agertzea, arrazoi justifikaturik gabe.
  • Insubordinazio nabarmena, indibiduala nahiz kolektiboa.
  • Legez kanpoko grebetan parte hartzea.
  • Bateraezintasunen gaineko araubidearen ez betetzea.
  • Funtzio publikoetan ari dela, Nafarroako Foru Araubideari zor zaion begirunea ez izatea eta Konstituzioari eta legeei ez men egitea.
  • Errendimendurik eza nabarmena izatea, behin eta berriz eta arrazoirik gabe.
  • Langilea bere funtzio publikoak betetzen ari denean burututako egintzengatik doluzko delitu izaten ahal diren jokabideak izatea.
  • Falta larriak errepikatzea eta berrerortzea.
  • Oro har, eginbeharrak ez betetzea, zerbitzuen funtzionamendu egokia nabarmen eragotziz gero edo administrazioari edo herritarrei kalte larriak eraginez.

–Berariaz aurreikusi ez denaren gainean Langileen Estatutuari buruzko Legearen Testu Bategineko 54. artikuluan ezarritakoari jarraituko zaio; tipifikazio horren barnean sartzen dira aurreko apartatuan aipatu araudian zehaztutako hutsegiteak.

–Langileen ordezkariak langileen lan betebeharren ez betetzeen berri emateko ardura izanen du, eta mankomunitateko idazkaritzari jakinaraziko dizkio. Hark bideratuko du prozedura, mankomunitateko lehendakariaren oniritziarekin.

–Falta errepikatzen da baldin eta, falta bat egitean, funtzionarioak lehendik diziplina zehapen bat badu falta larriago batengatik, edo bi zehapen, larritasun bereko edo txikiagoko bi faltarengatik.

–Faltan berrerortzen da baldin eta, falta bat egitean, funtzionarioak lehendik diziplinazko zehapenen bat badu mota bereko beste falta batengatik edo gehiagorengatik.

–Funtzionarioaren espedientetik diziplinazko zehapenen oharrak kenduz gero, ez da errepikatze edo berrerortzerik izanen langileak beste falta bat egiten duenean.

–Erantzukizuna falten egileek izateaz gain, erantzukizuna izanen dute horiek onartzen dituzten nagusiek eta estaltzen dituzten funtzionarioek nahiz horiek egitera bultzatzen dituztenek ere.

41. artikulua. Zehapenak.

–Zehapenak baldintza hauen arabera mailakatu eta ezarriko dira:

• Faltaren nolakotasuna.
• Arduradunek zein mailatan parte hartu duten.
• Zerbitzuari egin zaion kaltea.
• Administrazioari nahiz herritarrei egindako kalteak.
• Falta errepikatzea edo berrerortzea.

–Falta arinek zehapen hauek jasotzen ahal dituzte:

• Ohartarazpena.
• Egun batetik lau egunera bitarte enpleguz eta soldataz gabetzea.

–Falta astunek zehapen hauek jasotzen ahal dituzte:

• Bost egunetik hogeita hamar egunera bitarte enpleguz eta soldataz gabetzea.
• Ezinbesteko lekualdaketa, egoitza aldaketarekin edo gabe.
• Funtzioen etenaldia, urtebetez gehienez.

–Falta oso astunek zehapen hauek jasotzen ahal dituzte:

• Funtzioen etenaldia, urtebetetik bost urtera bitartekoa.
• Zerbitzutik kentzea.

–Arestian xedatutakoa galarazi gabe, berandu iristeak eta lanera ez joateak nahiz lanaldia ez betetzeak dagozkien ordainsariak galtzea ekarriko dute, legez ezarritako arauekin bat etorrita.

–Funtzionario bati diziplina zehapena ezartzen zaionean oharra idatziko da haren espedientean. Zein falta egin duen adieraziko da.

–Oharrak kendu eginen dira, interesdunak eskatuz gero, zehapena betetzen denetik honako epe hauek igarotakoan:

• Falta arinen oharrak, sei hilabeteren buruan.
• Falta astunen oharrak, bi urteren buruan.
• Falta oso astunen oharrak, sei urteren buruan.
• Errepikatze edo berrerortze kasuetan, ohar berriak kentzeko epeek adierazitakoek halako bi iraunen dute.

–Ez da oharra kenduko baldin eta aurreko apartatuan esandako epeen barnean funtzionarioari diziplinazko beste zehapen bat ezartzen bazaio.

–Zerbitzutik behin betiko kentzeko zehapenen oharrak ez dira kenduko.

–Falta arinak egiteagatik funtzionarioaren nagusiak ezarriko ditu zehapenak; horretarako, sumario espediente bat abiaraziko da eta bermatuko du interesduna entzunen dela aldez aurretik.

–Falta astunak edo oso astunak egiteagatik dagozkion administrazio agintariek ezarriko dituzte zehapenak; horretarako, diziplinazko espedientea abiaraziko da aurretik eta nahitaez entzun beharko zaio funtzionario arduradunari. Funtzionarioak abokatu baten laguntza izaten ahal du.

–Falta arinengatik ezartzen diren zehapenak hilabeteren buruan preskribatuko dira, falta astunengatik ezartzen direnak urtebeteren buruan eta falta oso astunengatik ezartzen direnak hiru urteren buruan.

42. artikulua. Falten preskripzioa.

Falta arinak hilabeteren buruan preskribatuko dira, astunak urtebeteren buruan, eta oso astunak hiru urteren buruan, administrazioak faltaren berri izaten duen egunetik aitzina, eta, nolanahi ere, falta egin eta sei hilabeteren buruan.

Preskripzioa eten eginen da prozedurari hasiera ematea erabakitzen den unean, eta, horretarako, hartzen den erabakiak behar bezala erregistratua behar du izan. Espedientearen tramitazioa hilabete baino gehiago eteten bada langileari egotzi ezin zaion kausa bategatik, preskripzio epea ez dela eten ulertuko da.

43. artikulua. Diziplina neurriak.

Hartu beharreko diziplina neurrien berri emanen zaio langileen ordezkariari, egoki iruditzen zaizkion alegazioak egin ditzan haiek jaso eta 4 eguneko epean.

Iragarkiaren kodea: F2504130