1. NAFARROAKO FORU KOMUNITATEA
1.7. BESTELAKOAK
694/2024 EBAZPENA, abenduaren 13koa, Toki Administrazioaren eta Despopulazioaren zuzendari nagusiak emana, Olaizko Kontzejuak eta Olaibarko Udalak aurkeztutako alegazioak baiesten dituena eta kontzejua ofizioz iraungitzeko espedientea artxibatzen duena.
Nafarroako Toki Administrazioari buruzko uztailaren 2ko 6/1990 Foru Legearen 44.1 artikuluak ezartzen du zein kasutan azkenduko diren kontzeju-entitateak, eta, zehazki, c) letran xedatzen du kontzejuak iraungitzen direla "kontzejuetarako bi hauteskunde prozesutan jarraian hautagai-zerrendarik aurkeztu ez denean, horren zenbaketarako hauteskunde partzialak egin izana kontuan hartu gabe".
Ildo horretan, 44. artikulu horren 2. apartatuaren arabera, ukitutako Kontzejuari eta Udalari entzunaldia eman eta Lurralde Mugaketako Batzordeak txostena egin ondoren, Nafarroako Gobernuari dagokio kontzejuak iraungitzea erabakitzea; kasu horretan, dagokion foru dekretua Nafarroako Aldizkari Ofizialean argitaratu beharko da, eta Estatuko administraziora igorri, toki erakundeen inskripzioaren ondorioetarako.
Ikusita irailaren 23ko 235/2019 Foru Dekretuaren bidez araututako hauteskunde-prozesuak (foru dekretu horrek hauteskunde partzialetarako deialdia egin zuen martxoaren 27ko 35/2019 Foru Dekretuaren bidez deitutako hauteskundeetan hautagai-zerrendarik aurkeztu ez zen kontzejuetan) eta irailaren 27ko 204/2023 Foru Dekretuaren bidez araututakoak (foru dekretu horrek hauteskunde partzialetarako deialdia egin zuen martxoaren 29ko 34/2023 Foru Dekretuaren bidez deitutako hauteskundeetan hautagai-zerrendarik aurkeztu ez zen kontzejuetan), Olaizko Kontzejua azkentzeko espedienteari ofizioz hasiera eman behar zitzaion, Nafarroako Toki Administrazioari buruzko uztailaren 2ko 6/1990 Foru Legearen 44.1c) artikuluan ezarritako azkentze-kasua baitzen.
Toki Administrazioaren eta Despopulazioaren zuzendari nagusiaren martxoaren 14ko 146/2024 Ebazpenaren bidez, Olaizko Kontzejua ofizioz azkentzeko espedientea hasi zen, kontzeju horri eta ukitutako udalari entzunaldia eman ondoren, eta jendaurrean jarri zen, iragarkia 2024ko 78. Nafarroako Aldizkari Ofizialean argitaratuta, apirilaren 18koan, baita udaletxeko ediktuen taulan ere.
Hala ere, 2024ko maiatzaren 15ean eta 10ean, Olaizko Kontzejuak eta Olaibarko Udalak, hurrenez hurren, alegazio-idazki bana aurkeztu zuten Nafarroako Erregistro Elektroniko Orokorrean kontzejua azkentzeko ofizioz hasitako espedientearen aurka. Idazkietan, alegatu zuten nahi zutela Olaitz kontzejua izaten jarraitzea, 2024ko apirilaren 2ko erabakian jasotakoarekin bat, hori bera baita herritarren sentipena, eta haien nortasun juridikoa eta eskumenen erabilera errespetatzea, eta adierazi zuten ezen, 2023ko kontzeju hauteskundeetara hautagaitzarik aurkeztu ez arren, urte bereko abuztuaren 29an kontzejuko burutza berria hautatu zutela, jarraikiz Nafarroako kontzejuetako hauteskunde-prozesua arautzen duen martxoaren 16ko 12/1991 Foru Legean xedatutakoari, eta Nafarroako Gobernuak ez diela jakinarazi jarduketa hori desegokia denik.
Halaber, alegatu zuten egin berria dela Nafarroako Toki Administrazioari buruzko uztailaren 2ko 6/1990 Foru Legearen aldaketa, eta departamentuak ez diela horretaz jakinarazi eta/edo ohartarazi. Eta, kontuan izanda Olaitzek beti izan duela buru bat historikoki eta kontzejuaren betebeharrak bete dituztela, adierazi zuten hala izaten jarraitu nahi zutela eta hurrengo hauteskundeetan hautagaiak aurkezteko konpromisoa hartzen zutela, ez baitute iritsi nahi itzulgaitza izanen litzatekeen egoera batera, kontzejua berriz eratu nahi izanez gero.
Alegazio horiek aztertu ondoren, adierazi behar da ezen Nafarroako Toki Administrazioaren Erreformarako otsailaren 4ko 4/2019 Foru Legearen bidez zenbait aldaketa egin zirela artikuluetan, eta horietako bat aipatutako 44.1 c) artikulukoa izan zela, eta, beraz, Nafarroan lehen aldiz aplikatu beharreko lege-berrikuntza garrantzitsua izan zela; gainera, tarte laburra izan zen erreforma berri hori argitaratu zenetik Kontzejuetako hauteskundeetarako deia egiten zuen martxoaren 29ko 34/2023 Foru Dekretuaren argitaratu arte. Beraz, egia da denbora labur horretan kontzejuek zaila izan zutela jakitea berehala aplikatu behar zela, eta, batez ere, horrek zer ondorio zuen.
Gainera, kontuan izan behar da toki erakundea izaten jarraitzeko borondatea duela erakunde horrek, bai eta haren ordezkari izateko prest dauden hautagaiek ere, eta bitarteko material eta formalak daudela toki erakundea izaten jarraitzeko; hala egin ezean, ondorioak itzulezinak izan litezke, ezinezkoa bailitzateke –edo beste oztopo bat gehituko litzateke, behintzat– etorkizunean kontzejua berriz sortzeko.
Hala ere, entitateko burua gaur egun jardunean dagoenez, berriz hautatu behar da "buru kudeatzaile" bat auzo batzarrean, eta adierazi behar da ezen, orduan hautagairik aurkezten ez bada, 6/1990 Foru Legearen 44.1 c) artikuluari jarraituz jardunen dela, eta berriz hasiko dela kontzejua ofizioz azkentzeko prozedura.
Horiek horrela, Lurralde Kohesiorako Departamentuaren egitura organikoa ezartzen duen azaroaren 15eko 249/2023 Foru Dekretuaren 8 c) artikuluak aitortzen dizkidan eskudantziak erabiliz,
EBAZTEN DUT:
1. Olaizko Kontzejuak eta Olaibarko Udalak aurkeztutako alegazioak baiestea, eta kontzejua ofizioz iraungitzeko espedientea artxibatzea.
2. Ebazpen hau Nafarroako Aldizkari Ofizialean argitara dadila agintzea, behar diren ondorioak izan ditzan.
3. Ebazpen hau Olaibarko Udalari eta Olaizko Kontzejuari jakinaraztea, eta dagokien iragarki-taulan argitaratzeko eskatzea.
Iruñean, 2024ko abenduaren 13an.–Toki Administrazioaren eta Despopulazioaren zuzendari nagusia, Jesús M.ª Rodríguez Gómez.
Iragarkiaren kodea: F2418353