Iragarkia

65. ALDIZKARIA - 2025eko apirilaren 1a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

38C/2025 EBAZPENA, otsailaren 15ekoa, Ekonomia Sozialeko eta Laneko zuzendari nagusiak emana, zeinaren bidez erabakitzen baita Prezero España SA enpresaren eta Tafallako bide garbiketa publikoaren zerbitzuari atxikitako langileen arteko hitzarmen kolektiboa erregistratzea, gordailutzea eta Nafarroako Aldizkari Ofizialean argitaratzea.

Ikusi da Prezero España SA enpresaren eta Tafallako bide garbiketa publikoaren zerbitzuari atxikitako langileen arteko hitzarmen kolektiboa (kode zenbakia: 31008121012001), erregistro honetan sartu dena 2024ko azaroaren 06an eta 2024ko abenduaren 02an sinatu zutena enpresaren eta sindikatuen ordezkariek.

Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta hitzarmen kolektiboak, lan-akordio kolektiboak eta berdintasun-planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin bat etorriz.

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuak ematen dizkidanak, honako hau,

EBAZTEN DUT:

Lehenengoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Prezero España SA enpresaren eta Tafallako bide garbiketa publikoaren zerbitzuari atxikitako langileen arteko hitzarmen kolektiboa (kode zenbakia: 31008121012001).

Bigarrena.–Nafarroako Aldizkari Ofizialean argitaratzeko agintzea, orok jakin dezan.

Iruñean, 2025eko otsailaren 15en.–Ekonomia Sozialeko eta Laneko zuzendari nagusia, Iñaki Mendióroz Casallo.

PREZERO ESPAÑA SA ENPRESAREN ETA TAFALLAKO BIDE GARBIKETA PUBLIKOAREN ZERBITZUARI ATXIKITAKO LANGILEEN ARTEKO HITZARMEN KOLEKTIBOA

I. KAPITULUA.–ARAU OROKORRAK

Hitzarmena adostu duten aldeak zehaztea

Hitzarmen hau ordezkaritza sindikalak, langileen delegatuak (CCOO) eta Prezero España SA enpresako zuzendaritzak sinatu dute.

Alderdiek indarrean dagoen legeriak eskatutako ordezkagarritasuna dute eta elkarri aitortzen diote hori. Beraz, badute zilegitasun osoa hitzarmen kolektibo hau izenpetzeko.

1. artikulua. Aplikazio-eremua.

Hitzarmen kolektibo honen helburua da Prezero España SA enpresaren eta Tafallako Udalak kontrataturiko bide garbiketa publikoaren zerbitzuari atxikitako Prezero España SAko langileen arteko lan harremanak arautzea.

2. artikulua. Indarraldia eta luzapena.

Hitzarmen honek hiru urteko indarraldia izanen du: 2023, 2024 eta 2025.

Hitzarmen hau sinatzen den egunean jarriko da indarrean, indarrean jartzeko beste data bat adierazten duten artikuluen kasuan izan ezik. Edonola ere, itundutako ondorio ekonomikoek 2023ko urtarrilaren 1etik hasita izanen dute indarra, hitzarmena Nafarroako Aldizkari Ofizialean noiz argitaratzen den kontuan hartu gabe.

Hitzarmena bere indarraldia bukatzen denean geldituko da zuzenean salaturik. Hitzarmen honetako arauak baldintza beretan luzatuko dira, besterik izenpetzen ez den artean.

3. artikulua. Hitzarmenaren batasuna.

Itundutako baldintzek multzo organiko eta zatiezina osatzen dute eta aplikazio praktikoaren ondorioetarako denak batean eta osorik hartuko dira, betiere langile bakoitza bere kategorian aipatuz. Hitzarmen hau guztiz baliogabe geldituko litzateke eta inolako eraginik gabe, erakunde eskudunek klausularen bat aplikaezina dela deklaratu edo hitzarmena aurkaratuko balute.

Hitzarmena onetsi eta izenpetu da prestazioak eta kontraprestazioak beren osotasunean hartuta, bai eta bere artikuluetan ezarritako baldintza guztiak kontuan hartuta ere.

4. artikulua. Irenstea eta konpentsazioa.

Itundutako baldintzak osorik konpentsatzen ahal dira lehendik ezarritako baldintzekin, ondokoek aginduta: legeak, jurisprudentziak, administrazioarekiko auzi arloak, era guztietako hitzarmen kolektiboek, banakako kontratuek, tokiko, eskualdeko, autonomia erkidegoetako usadio eta ohiturek edo bestelako aginduek.

Geroan ordainsari guztietan edo batzuetan aldaketak sortuko dituzten xedapenek eraginkortasun praktikoa izanen dute baldin eta, osorik hartuz eta hitzarmenaren aurretik izandako loturekin batuz, honen mailatik goitikoak badira; horrela ez bada irentsitzat joko dira.

5. artikulua. Berme pertsonalak.

Kobrantzaren ikuspegitik eta osotasunean hartuta, urteko konputuan hitzarmen kolektibo honetan finkatutakoak baino hobeak diren egoera pertsonalak "ad personam" berme gisa errespetatuko dira.

6. artikulua. Interpretaziorako eta jarraipenerako batzorde paritarioa.

Alderdi negoziatzaileek batzorde misto paritarioa eratzea erabaki dute, hitzarmenaren aplikazioan interpretazio, arbitraje, adiskidetze eta zaintzarako organoa izanen dena.

Edozein alderdik eskaturik bilduko da nahitaez, hamar laneguneko epean. Bileran planteatzen diren auziak hamar laneguneko epean ebatziko dira.

Osaera: batzorde mistoa hitzarmen kolektibo hau sinatu duten enpresaren ordezkariek eta langileen ordezkariek osatuko dute, erdi eta erdi. Botazioetan balio bera izanen dute alderdiek, bileran zenbat diren ere.

Batzorde misto paritarioaren akordioek balioa izateko, ordezkaritza bakoitzaren botoen % 51ren babesa izan beharko dute gutxienez.

Berariazko eginkizunak:

1.–Hitzarmen kolektibo honen klausula guztien aplikazioa interpretatzea, indarra duten legeekin bat.

2.–Itundutakoa betetzen den zaintzea.

3.–Hitzarmena, bere indarraldian, egokitu edo aldatzeko eginkizunak garatzea, indarra duten legeetan ezarritakoari jarraikiz.

4.–Langileen Estatutuaren 41.6 eta 82.3 artikuluetan ezarritakoarekin bat, hitzarmen kolektibo batean arautu diren gaietan lan baldintza kolektiboen funtsezko aldaketak egin behar badira eta aldez aurreko kontsulten aldia bukatu ondoren akordiorik ez badago, batzorde misto paritarioak aztertuko du auzia gai horren gainean akordio bat lortzeko asmoz, batzorde mistoaren bileretarako aipatu den prozedura arrunta erabilita.

Hitzarmen kolektibo honetan eta Langileen Estatutuan ezarritako aurreikuspenen araberako akordiorik lortzen ez bada, alderdiek gatazkak konpontzeko mekanismoetara joko dute, hots, gatazken konponbide autonomoaren gaineko indarreko akordioetan (auzibidetik kanpoko sistema) arautzen diren adiskidetze, bitartekotza eta arbitrajerako organoetara joko dute.

5.–Hitzarmen kolektiboaren eraginkortasun praktikoa hobetzen duten beste jarduera guztiak, testuan horrela ezarria badago.

Batzorde horretan akordiorik lortzen ez bada, alderdietako edozeinek gatazkak konpontzeko mekanismoetara jotzen ahalko du, auzibidekoetara nahiz auzibidetik kanpokoetara.

7. artikulua. Arau subsidiarioak.

Hitzarmen kolektibo honetan xedatu ez den orotan Langileen Estatutuan xedatutakoari jarraituko zaio, bai eta Garbiketa Publikoaren, Kaleen Garbiketaren, Ureztaketaren, Hondakinen Bilketa, Tratamendu eta Ezabaketaren eta Estolderiaren Garbiketa eta Kontserbazioaren Sektorerako Hitzarmen Orokorrean eta gainerako legezko xedapenetan xedatutakoari ere.

8. artikulua. Lanaren antolaketa.

Lanaren antolaketa praktikoa enpresako zuzendaritzari dagokio, ez beste inori. Hori dela eta, enpresak zerbitzuaren jardun onerako metodo eta prozedura egokienak ezartzeko ahalmena du, baina hala ere, langileek ez dute horregatik beren lanbide prestakuntzan kalterik jasanen, ez eta beren zeregina utzaraziko liekeen eginbeharrik izanen ere.

Enpresa batzordeari entzunaldia emanen zaio, Langileen Estatutuaren 64. artikuluari eta harekin bat heldu diren arauei jarraikiz.

9. artikulua. Titulartasuna aldatzea.

Hitzarmen honi loturiko kontrataren titulartasun aldaketak berekin dakar esleipen-hartzaile berriaren aldetiko subrogazioa, garbiketa publikoa, kale garbiketa, ureztaketa, hondakinen bilketa, tratamendua eta ezabaketa eta estolderiaren kontserbazioa biltzen dituen sektorerako II. hitzarmen orokorraren "Langileriaren subrogazioa" izenburuko XI. kapituluan espresuki adierazi bezala.

II. KAPITULUA.–LAN BALDINTZAK

10. artikulua. Lanaldia.

Hitzarmen kolektibo hau indarrean dagoen artean, abenduan egutegia eginen da, langileek hurrengo urteko oporrak noiz hartuko dituzten jakinarazitakoan. Egutegi hori iragarki taulan azalduko da eta langile bakoitzari emanen zaio. Egutegia halako moldez banatuko da non lanaldi osoko langile guztiek bost larunbatetik batean atseden hartuko duten. Lanaldia honela banatuko da:

Lanaldia 6 ordu eta 20 minutukoa izanen da astelehenetik ostiralera, eta 6 ordu eta 30 minutukoa larunbatetan.

30 minutuko atsedenaldia izanen da ogitarterako, ondorio guztietarako lan egindakotzat hartuko dena.

Hitzarmen honen indarraldian aurreko hitzarmenean ezarritako baimeneko sei egunak mantenduko dira lanaldi osoko langileentzat, eta astelehenetik ostiralera bitarte hartuko dira. Halako baimena langile batek bakarrik hartzen ahalko du aldiko, eta ez zaie zubiei eta beste jaiegun batzuei lotzen ahalko.

Hitzarmen honen indarraldian, urteko lanaldia 1.597 ordu eta 10 minutukoa izanen da.

Hitzarmenak indarra duen denboran 20 minutu gutxiago izanen ditu lanaldiak Gabon Gauean (abenduaren 24an).

Lanaldia nola banatu enpresak erabakiko du, agindutako zerbitzu publikoa hobeki emate aldera.

Urte naturala bukatu baino lehen behar diren doikuntzak eginen dira egutegian langile guztien urteko lanaldia itundutakoa izan dadin: 1.597 ordu eta 10 minutu.

11. artikulua. Oporrak.

Urteko oporraldi ordaindua 33 lanegunekoa izanen da enpresan zerbitzuan urtebete daramaten langile guztientzat, eta horren zati proportzionalekoa denbora gutxiago dutenen kasuan. Larunbatak lanegun oso gisa kontatuko dira.

"Oporrak" izeneko I. eranskineko lansarien taularen arabera ordainduko dira oporraldiak, gehi kasu bakoitzari dagokion antzinatasuna.

Langilea ospitaleratzen badute oporraldia eten eginen da, harik eta medikuaren alta hartzen duen arte.

Urteko oporraldia apiriletik urrira bitartean hartuko da. Horretarako, urtero langileen oporren proposamena eginen da eta enpresari jakinaraziko zaio abenduaren 15a baino lehen, plantilla osoak txandaka erabil ditzan oporrak.

Oporren egutegiak enpresaren eta enpresa batzordearen artean prestatuko dituzte eta oporraldia baino bi hilabete lehenago jarriko dira ikusgai.

12. artikulua. Ordutegiak.

Lantokiko ordutegiak enpresak finkatuko ditu, zerbitzu beharrak kontuan hartuta, zerbitzua esleitu duen entitateak xedatutakoari erantzunez.

Lan txanda bakoitzaren ordutegiak urtero urtarrilean jarriko dira ikusgai lantokian.

Abenduan, ahal izanez gero, jaiegunen egutegi ofiziala argitaratu ondotik, enpresak eta enpresa batzordeak batera prestatuko dute hurrengo urteko lan egutegia eta ondoren ikusgai jarriko lantoki guztietan.

13. artikulua. Baimenak.

Enpresak, hitzarmen honek indarrean dirauen artean, ordaindu gabeko baimenak emanen dizkie hala eskatzen duten langileei, urtean 20 egun bitarte, baina 7 lanegun lehenago gutxienez eskatuta eta 15 lanegun lehenago "zubien" kasuan, baldin eta ez badute egun bererako pertsona batek baino gehiagok eskatzen. Gehieneko langile kopurura iristen ez badira, "zubiak" hartzeko eskabidea 4 lanegun lehenago egin daiteke.

Eskaera gehiegi izateagatik zozketa egin beharra izanez gero, hirurtekoari dagozkion egunetarako erabiltzen den prozesu berari segituko zaio.

14. artikulua. Lizentzia ordainduak.

Hitzarmen honen eraginpeko langile guztiek lizentzia hauek izan ditzakete, justifikatu ondoren:

a) Ezkontzagatik edo izatezko bikotea erregistratzeagatik: hogei egun natural.

b) Ezkontidea edo bikotekidea, edo beraren edo ezkontidearen/bikotekidearen gurasoa, aitaginarreba edo amaginarreba, semea edo alaba, suhia edo erraina, senidea, aitona edo amona edo biloba ospitaleratzeagatik edo ebakuntza kirurgikoa egiteagatik: bost lanegun, denak batera edo banaka; enpresari aurretik esan beharko zaio nola eta noiz hartuko diren, eta arrazoia azaldu beharko zaio. Adingabea ospitaleratzen bada, hango aldiak beste iraunen du lizentziak.

c) Langilearen edo beraren ezkontidearen/bikotekidearen aitona, amona edo biloba hiltzeagatik: bi egun natural; heriotza Nafarroatik kanpo gertatzen bada, hiru egun natural izanen dira.

d) Langilearen edo haren emaztearen nahiz bikotekidearen aita, ama, seme-alaba eta anai-arreben ezkontza: egun natural bat.

e) Ezkontidea/bikotekidea hiltzeagatik: 6 egun natural.

f) Langilearen edo beraren ezkontidearen/bikotekidearen gurasoa, aitaginarreba edo amaginarreba, suhia edo erraina edo senidea hiltzeagatik: lau egun natural, heriotza Nafarroan gertatzen bada; heriotza Nafarroatik kanpo gertatzen bada, bost egun natural izanen dira.

g) Langilearen osaba edo izeba propioa hiltzeagatik: egun natural bat; heriotza Nafarroatik kanpo gertatuz gero, bi egun natural izanen dira.

h) Gidatzeko B, C eta E motako baimena berritzeko, probak egiteko behar duten gutxieneko denborarako baimena emanen zaie enpresako lanerako beharrezkoa duten langile guztiei.

i) Ohiko bizilekua aldatzeagatik: egun natural bat.

Artikulu honetan bildu ez den orotan, Langileen Estatutuan xedatutakoari jarraituko zaio.

Lizentziak kategoria bakoitzaren soldata errealaren arabera ordainduko dira.

III. KAPITULUA.–BALDINTZA EKONOMIKOAK

15. artikulua. Ordainsarietako kontzeptuak.

Langile bakoitzaren ordainsaria honela osatuko da: hitzarmen kolektiboaren oinarrizko soldata gehi lansarien tauletan jarduera, maila eta kategoria bakoitzerako ezartzen diren osagarriak, ondorengo artikuluetan adierazten direnekin lotuta. Kontzeptu horien zenbatekoak artikulu hauetan eta lansarien taulen eranskinean ageri dira, eta esleitutako balioa ulertu behar da kontzeptu bakoitzaren gaineko itun gisa, hitzarmen kolektibo honen negoziazio ekonomiko oso eta bateratuaren barnean.

16. artikulua. Oinarrizko soldata.

Hitzarmen kolektibo honen eraginpeko langileen oinarrizko soldata maila eta kategoria bakoitzarentzat 1. eranskinean ezarritakoa da. Egun natural bakoitzeko sorraraziko da, oporraldia salbuetsita.

17. artikulua. Antzinatasuna.

Antzinatasunaren osagarriak bi hirurtekoren balioa izanen du, kategoria bakoitzeko oinarrizko soldataren ehuneko 7koak, eta ondoren bosturtekoak izanen dira, kategoria bakoitzeko oinarrizko soldataren ehuneko 10ekoak. Horietako bakoitza kontatzen hasiko da aurrekoa betetzen denetik aurrera.

18. artikulua. Neke, arrisku eta toxikotasunaren plusa.

Hitzarmen kolektibo honen eraginpeko langileek I. eranskineko tauletan ageri den diru kopurua kobratuko dute, lanpostuen ezaugarrien arabera, zeinak plus honen bidez konpentsatzen baitira.

Plus hori funtzionala da eta benetan lan egindako egun bakoitzeko sorraraziko da, baina ez da kontatuko igandeak kalkulatzeko ez eta aparteko eskersarietan ere, horrela itundu baita berariaz.

Benetan lan eginiko egun bakoitzari dagokion diru-kopurua, tauletan ageri dena, ez da finkatuko, diru-kopuru hori lanpostuekin eta hitzarmen kolektiboaren baldintza ekonomikoak orokorrak eta bakarrak izatearekin loturik baitago.

19. artikulua. Gaueko lanaren plusa.

22:00etatik 06:00ak bitarte lan egiten duten langileek osagarri bat kobratuko dute, I. eranskinean ageri dena, gauez eta ordutegi horren barnean benetan lan egindako egun bakoitzeko.

Plus hori funtzionala da, ez da finkagarria izanen, beraz ez da kobratuko ordutegi edo txanda aldaketarik izanez gero. Benetan lan egindako egun bakoitzeko espresuki itundutako diru kopurua, tauletan ageri dena, ez da finkagarria izanen, diru kopuru hori lanpostuen ordutegiarekin eta hitzarmen kolektiboaren baldintza ekonomikoak orokorrak eta bakarrak izatearekin loturik baitago.

Osagarri hori aipatu aldian lan egindako denboraren proportzioan kobratuko da.

Izaera funtzionala eta ez finkagarria duelako, gaueko txandako langileek ordu aldaketak egin beharra dutenean, iraupen laburragatik noizbehinkakoak kalifikatzen ahal direnak, enpresa saiatuko da ordu aldaketok beren borondatez eskatu duten enplegatuek egin ditzaten, eta egun horietako gaueko lanaren plusa ordainduko zaie.

20. artikulua. Hitzarmenaren plusa.

Hitzarmen honen eraginpeko langileek osagarri honengatik plus bana kobratuko dute, eranskineko tauletan kategoria bakoitzerako ezarritakoa.

Plus hori benetan lan egindako egun bakoitzeko sortuko da, baina ez da kontatuko igandeak kalkulatzeko ez eta aparteko eskersarietan ere, horrela itundu baita berariaz.

21. artikulua. Jaiegunetako lana.

Hitzarmen hau izenpetzen denetik aurrera zerbitzua honela eginen da, ahal dela:

a) Horretarako kontrataturiko langileak.

b) Langile boluntarioak.

c) Behar diren lanpostuak betetzen ez badira, enpresaren eta batzordearen artean gainerako langileez itundutako koadrantera joko da.

Jaiegun izanen dira indarra duen legerian orokorrean adostutako festak, lan egutegiaren arabera, bai eta herriko festa, autonomikoa eta San Martin Porresen eguna ere, jardueraren zaindaria baita.

Lanaldi osorako kontrataturiko plantillako langileek jai izanen dute abenduaren 25ean eta urtarrilaren 1ean.

Lanaldi osorako kontrataturiko langileek abenduaren 25aren eta urtarrilaren 1aren ondorengo lanegunean lan egiten badute, jaieguneko plusa jasoko dute oinarrizko soldatari, antzinatasunari (baldin bada) eta kasuan kasuko plusei gehituta, denak egun bakar bati buruzkoak.

Egun horietan lanean aritzegatiko ordainsaria honako hau izanen da:

1.–Jaiegunetako lana artikulu honen a) puntuan ezarritako langileek (lanaldi partzialeko lan kontratudunek) egiten dutenean, ordainsaria honako hau izanen da:

Kategoriaren urteko ordainsari gordina x jaiegunetan lan egindako orduak urteko orduak.

Egun horietan jarduteko kontrataturiko langileak izanen direnez, hori izanen da beren lanaldi arrunta, eta ez dute konpentsazioko atsedenaldirik izanen.

2.–Zerbitzuaren beharrengatik jaiegunetako lana artikulu honen b) edo c) puntuetan ezarritako langileek (lanaldi osorako kontrataturiko plantillako langileek) egiten dutenean, benetan lan egindako lanaldi bakoitzagatik I. eranskineko lansarien tauletan Jaiegunetako eta konpentsazio atsedenaldirik gabeko ordainsaria izenburupean ezarritako kopurua jasoko dute.

Jaiegunez lan egiten denean, langilearekin egun horretarako itundutako prezioa osatzeko, lansarien taulan ezarritako zenbatekoari oinarrizko soldata eta dagozkion plusak gehituko zaizkio, denak egun bakar bati buruzkoak. Zerbitzua ematen ez den jaiegunetan oinarrizko soldata, antzinatasuna (baldin bada) eta aipatu plusak ordainduko dira.

• 2023. urtean = 132,15 euro/jaieguneko.
• 2024ko urtarrilaren 1etik 2025eko abenduaren 31ra arte = 146,03 euro/jaieguneko.

22. artikulua. Igandeetan lan egitea.

Hitzarmen hau izenpetzen denetik aurrera zerbitzua honela eginen da, ahal dela:

a) Horretarako kontrataturiko langileak.

b) Astelehenetik larunbatera aritzen diren langile boluntarioak.

c) Behar diren lanpostuak betetzen ez badira, astelehenetik larunbatera bitartean aritzen diren gainerako langileen koadrantera, enpresaren eta batzordearen artean itundura, joko da.

Egun horietan lanean aritzegatiko ordainsaria honako hau izanen da:

1.–Igandeetako lana artikulu honen a) puntuan ezarritako langileek (lanaldi partzialeko lan kontratudunek) egiten dutenean, ordainsaria honako hau izanen da:

Kategoriaren urteko ordainsari gordina x jaiegunetan lan egindako orduak urteko orduak.

Egun horietan jarduteko kontrataturiko langileak izanen direnez, hori izanen da beren lanaldi arrunta, eta ez dute konpentsazioko atsedenaldirik izanen.

2.–Zerbitzuaren beharrak direla-eta igandeetako lana artikulu honen b) edo c) puntuetan ezarritako langileek (lanaldi osorako kontrataturiko plantillako langileak) egiten dutenerako, enpresaren eta langileen ordezkarien artean adosturiko koadroak finkatuko dira eta ondoko moduetako batean ordainduko da, langileak hautatuta:

1. Egiazki lan egindako lanaldi bakoitzean "Igandeetako ordainsaria, 1" izeneko plus bat kobratuko da eta konpentsazio atsedenaldirako larunbata bat hartuko da, arau orokor gisa zerbitzua egin den egunaren hurrengo larunbata. Lanaldi osorako kontrataturiko langileetako bat baino gehiago aritzen bada igande berean, enpresaren eta langileen ordezkarien artean adosturiko egutegi bat ezarriko da konpentsazio atsedenaldia zerbitzuaren beharrekin bat hartu ahal izateko.

–Igandeetako ordainsaria, 1:

• 2023. urtean = 88,87 euro/jaieguneko.
• 2024ko urtarrilaren 1etik 2025eko abenduaren 31ra arte = 98,20 euro/jaieguneko.

2. Benetan lan egindako lanaldi bakoitzean "Igandeetako ordainsaria, 2" izeneko plus bat kobratuko da eta konpentsazio atsedenaldirako larunbata ez den beste bi lanegun hartuko dira igandez benetan lan egindako lanaldi bakoitzagatik, eta enpresaren eta langileen ordezkarien artean adosturiko egutegi bat ezarriko da konpentsazio atsedenaldia zerbitzuaren beharrekin bat hartu ahal izateko.

–Igandeetako ordainsaria, 2:

• 2023. urtean = 68,02 euro/igandeko.
• 2024ko urtarrilaren 1etik 2025eko abenduaren 31ra arte = 75,16 euro/igandeko eta atseden egun bat (astelehenetik larunbatera bitartean hartu beharrekoa).

Igandez lan egiten denean, langilearekin egun horretarako itundutako prezioa osatzeko, artikulu honetan ezarritako zenbatekoari oinarrizko soldata eta dagokion antzinatasuna gehituko zaizkio.

Larunbatetan, plantillako langile batek bakarrik hartzen ahalko du atseden eguna. 1 eta 2 igandeetako atseden egunak pilatuko dira.

Zerbitzua igandean emateko, txandak jarriko dira zerbitzuko langile guztientzat.

23. artikulua. Gidatzeagatiko pizgarriak.

Hitzarmen kolektibo hau sinatu eta hurrengo hilabetetik aurrera, zerbitzuaren beharrengatik eta enpresak berariaz aginduta, peoiek edo peoi espezialistek makinak edo ibilgailuak gidatzea eskatzen duten lanak egin behar badituzte, enpresak honako hau ordainduko du:

a) Peoiaren edo peoi espezialistaren kategoria izanik, lanaldi osoan espaloiak garbitzeko makinak, atoidun ibilgailuak edo, oro har, B gidabaimenarekin gida daitezkeen makina bereziak gidatzen dituen eta espezializazioa duen langileak 6,13 euro jasoko ditu aurretik deskribatutako makineriarekin benetan lan egindako egun bakoitzeko.

b) Peoiaren edo peoi espezialistaren kategoria izanik, lanaldi osoan ibilgailuak, motokarroak, kutxa edo APPLIED motako xurgagailu mekanikoa, furgonetak, piaggioa, goupil edo antzekoak gidatzen dituen langileak, ibilgailuek espezializaziorik behar ez badute eta B gidabaimenarekin gida badaitezke, 3,07 euro jasoko ditu aurretik deskribatutako makineriarekin benetan lan egindako egun bakoitzeko.

c) Bigarren mailako mekanikari-ofizialak 3,66 euro kobratuko ditu benetan lan egindako egun bakoitzeko.

Plus horiek benetan lan egindako egun bakoitzeko sorraraziko dira, baina ez dira kontatuko igandeak eta jaiegunak kalkulatzeko ez eta aparteko eskersarietan ere, horrela itundu baita berariaz.

2023tik 2025era bitarteko urteetarako, gidatzeagatiko pizgarri horren zenbatekoa mantenduko da.

24. artikulua. Tafallako festetako lanaldiak.

Hitzarmen honen indarraldiak dirauen artean enpresako ohiko langileen lan baldintzak eta atsedenaldiak negoziatuko dira. Lanaldi osoko langileen kasuan, egun horietako lana ordaintzeko, hitzarmen honetako 21. eta 22. artikuluetan ezarritakoa hartuko da erreferentziatzat, betiere langileen aukeran utzita.

Beste herri batzuetako festetako lanaldiak:

Hitzarmen kolektibo hau sinatu eta hurrengo hilabetetik aurrera, lanaldi osoko langileek, beste herri batzuetako festetan lan egin behar denean, Tafallako ohiko lantokitik herri horietara joateko denbora benetan lan egindako denboratzat joko da eta, gainera, dieta erdiari dagokion zenbatekoa ordainduko da, joan-etorri horrek etxetik kanpo lo egitea ez badakar behintzat.

Aurreko lerroaldean ezarritako baldintzek ez dute ondoriorik izanen egun horiengatiko ordainsaria jaieguneko edo igandeko plusa denean, lan horien apartekotasuna kontzeptu horietan sartuta egoteagatik.

25. artikulua. Aparteko eskersariak.

Udako, Eguberriko eta mozkinengatiko aparteko eskersariak lanbide kategoria bakoitzarentzat lansarien tauletan espresuki itundutakoaren arabera ordainduko dira. Zenbateko horiei antzinatasunarena erantsi behar zaie.

Eskersari horiek sei hilean behin sorraraziko dira, lan egindako denboraren proportzioan, eta salbuespen bakartzat joko dira Langileen Estatutuaren 37.3 artikuluan ezarritako lanera ez agertzeak, ez ordea, justifikatu gabeko lanera ez agertzeak eta ordaindu gabeko baimenak. Ez dira zigortuko aldi baterako ezintasun batengatik lanera ez agertzeak.

Udako eskersariak ekainaren 30a baino lehen ordainduko dira eta Eguberrietakoak abenduaren 20a baino lehen.

Urtero sorraraziko da mozkinetan parte izatearen eskersaria, eta urte bakoitzari dagokiona hurrengo martxoko lehenengo egun baliodunean ordainduko da.

Eguberrietako eta udako ordainsarietan oinarrizko soldatari antzinatasunaren hogeita hamar eguneko zenbatekoa erantsiko zaio. Mozkinen pagan, oinarrizko soldatari antzinatasunaren hamabost egun erantsiko zaizkio.

26. artikulua. San Martin Porres eguneko paga.

Enpresak hitzarmen honen eraginpeko peoi, peoi espezialista, gidari, makinista eta peoi koipeztatzaile guztiei eranskineko tauletan ageri den zenbatekoa ordainduko die.

Azaroaren lehenengo egun baliodunean ordainduko da.

Urtero sorraraziko da eta ez da murrizketarik eginen aldi baterako ezintasunagatik, ezta lanera ez agertze justifikatuengatik ere.

27. artikulua. Garraiorako soldataz kanpoko osagarria.

Garraioa eta distantzia direla-eta, sortutako gastuak konpentsatzeko, soldataz kanpoko plusa ezarri da benetan lan egindako egun bakoitzeko. Horren zenbatekoa ere eranskineko tauletan ageri da.

28. artikulua. Dietak.

Joan-etorriak etxetik kanpo lo egitea eta bazkaltzea eta afaltzea ekartzen badu, honako dieta oso hau kobratuko da:

• 2023 - 2025: 62,71 euro.

Joan-etorriak etxetik kanpo lo egitea ekartzen ez badu, bazkaltzeko edo afaltzeko dieta erdia honako hau izanen da:

• 2023 - 2025: 24,11 euro.

29. artikulua. Aparteko orduak.

Hitzarmen kolektibo honen eraginpeko jarduera herritarrentzat behar-beharrezko zerbitzu publikoa izanik, urte osoko egun guztietan nahitaez egin eta bukatu beharrekoa, sinatzaileek espresuki aitortzen dute "egiturazkoak" direla ustekabeko lanera ez agertzeen edo txanda aldaketen ondorioz egin beharreko aparteko orduak, eta orobat, produkzio beharren, ustekabeko lanen, mantentze lanen eta lanaren izaeraren ondoriozko egiturazko ordu horiek. Hori guztia indarrean dagoen legeriaren arabera.

Aparteko orduen zenbatekoa tauletan ageri da, eta itun berariazkoa osatzen dute, horien ordainketa kalkulatzeko beste edozein formula baztertuz.

Aparteko orduak egin nahi dituzten langile boluntarioen zerrenda prestatuko da.

30. artikulua. Ordaintzeko modua eta ordainsarien ordainketa.

Hartzekoak, horiek sorrarazi eta hurrengo hileko lehen bost egun naturalen barnean ordainduko ditu enpresak, hurrengo hileko 15ean egiaz erregularizatzea galarazi gabe.

Enpresak aukeratuko du ordaintzeko modua, bankuko taloiaren edo transferentziaren bidez, eta ez da eskubiderik izanen hura kobratzeko denbora librea hartzeko edo horri dagokiona kobratzeko.

Hitzarmen hau izenpetzen denetik aurrera enpresak 592,83 euroko aurrerakinak ordainduko dizkie hilero hala eskatzen duten langile guztiei.

IV. KAPITULUA.–ONURA SOZIALAK

31. artikulua. Ospitaleratzea eta ABE (aldi baterako ezintasuna).

Ospitaleratzerik izanez gero, ospitalean sartzen denetik harik eta ospitalean alta hartzen duen arte, langileak ospitalizazioaren aurretik kobratzen zituen soldata kontzeptuen % 100 kobratuko du.

Ospitaleratzearekin batera ebakuntzarik egin behar bazaio, langileak baja hartu aurretik kobratzen zituen ordainsarien % 100 kobratuko du ospitalean dirauen bitartean eta gehienez ere ospitalizazioaren ondoko 30 egunetan, aldi baterako ezintasun egoeran segitzen badu, betiere.

32. artikulua. Gidabaimena kentzea.

Gidariaren erruz izan gabe, zerbitzuko ibilbidearen beharrengatik edo akats mekaniko batengatik, langileari gidabaimena kentzen badiote, enpresak lansaria eta lanpostua errespetatuko dizkio, nahiz eta bitarte horretan enpresak bere egoeraren araberako beste lanposturen batean egokituko duen langilea.

Gidabaimena kendu bazaio ibilgailu partikularra gidatzean, eta ausarkeriazko zuhurtziagabetasunik edo asmo txarrik izan ez bada behintzat, enpresak beste lanpostu batean egokitzeko konpromisoa hartzen du, lanpostu berriko ordainsariekin.

Enpresak aseguru bat hartuko du gidabaimena kentzen den kasuetarako, aseguru horren eguneko kostuaren herena segurtatzeko, langileak hala eskatzen badu.

33. artikulua. Istripu aseguruaren poliza.

Enpresak aseguru poliza bat kontratatuko du langileei ondoko kalte-ordainak bermatzeko, hitzarmen hau izenpetzen den egunetik hasita indarraldia bukatu bitarte:

a) Lan istripu edo lanbide eritasun baten ondorioz heriotza edo erabateko ezintasun iraunkorra gertatzen bada: 38.000,00 euro.

b) Ezintasun iraunkor osoa bere lanposturako, lan istripuaren edo eritasun profesionalaren ondoriozkoa: 27.000,00 euro.

c) Lan hitzarmen honek indarra duen artean, berezko heriotzagatik: 7.000,00 euro.

Hitzarmena izenpetzen denetik 15 egun igarotakoan aplikatuko dira artikulu honetan ezarritako zenbatekoak.

34. artikulua. Osagarria, laneko istripuaren edo eritasunaren kasuan.

Laneko istripu baten ondorioz aldi baterako ezintasuna izaten bada, enpresak Gizarte Segurantzaren prestazioa osatuko du likidatutako hileko benetako soldataren % 100 egin arte. Aldi baterako ezintasuna eritasunaren ondoriozkoa bada, enpresak Gizarte Segurantzaren prestazioa osatuko du likidatutako hileko benetako soldataren % 90 bitarte, eta 1. egunetik 16.era, eta 17. egunetik aurrera, % 100.

Aldi baterako ezintasunagatik lanera ez agertutako urteko ordu kopurua % 3 edo hortik beherakoa bada, eritasunagatiko (arrunta zein lanekoa) kontzeptua % 100era arte gehituko da bajan den lehenbiziko egunetik, murriztapen hori egin dela egiaztatu eta gero. Hurrengo urteko lehen hiruhilekoan ordainduko da.

Gizarte Segurantzak hitzarmen kolektibo hau sinatzen denean kontzeptu horrengatik ezarriak dituen prestazioak hobetuko balitu, osagarri horrek bermatzen dituen zenbatekoen arabera irentsi eta konpentsatuko lirateke.

35. artikulua. Medikuarenera joateko baimenak.

Langileak lan orduetan Gizarte Segurantzako medikuarengana joan behar badu, ez zaio soldata murriztuko, baldin eta kontsultara joan dela egiaztatzen badu.

Era berean, urtean bi egun edo horren baliokidea ordutan izanen ditu mediku partikularrera joateko edo ezkontideari/bikotekideari nahiz seme-alabei laguntzeko, aurrez arrazoituta.

Salbuespenez, enpresak aldez aurretik aztertu ondoren, baimena luzatzen ahal da.

36. artikulua. Sustapenak eta igoerak.

Lanpostu finko edo behin-behinekoetan lanpostu hutsak izanez gero 1. mailako gidari ofizialaren edo makinistaren kategorian, barne igoeraren bidez beteko dira plantillako langileen artean, eta langile berriak kontratatuko dira baldin eta eskatzaileak gai ez badira lanpostu horiek betetzeko.

Sustapena prozesu honen arabera eginen da:

1.–Enpresak jendaurrean paratuko du tokian tokiko lanpostu hutsen zerrenda, eta epe bat jarriko da eskabideak aurkezteko.

2.–Eskatzen den gaitasuna edo titulazioa egiaztatu ondoren, izangaien behin betiko zerrenda paratuko da jendaurrean. Enpresak gidari bat eta ibilgailu bat jarriko ditu, lan orduetatik kanpo, gehienez ere 15 egunez eta egunean 4 orduz.

3.–Azterketa teorikoa eta praktikoa eginen da. Enpresak eta batzordeak izendatuko dituzte aztertzaileak.

4.–Probak eginik, langile bakoitzari "gai" edo "ez gai" kalifikazioa emanen zaio eta, lehenbiziko kasuan, baita haren prestakuntzaren neurriko puntuazioa ere.

Azterketaren xede diren lanpostu hutsak puntuazio hoberena lortu duten langileek beteko dituzte eta, berdinketarik izanez gero, enpresan denbora gehien daramanak lortuko du lanpostua.

Lehen mailako gidari ofizialaren edo makinistaren kategoria ez da irmo bihurtuko harik eta lanpostua finkoa izan arte; hala ere, kategoria horretan diharduten denboran ordainsarien diferentzia kobratuko dute. Lanpostua aldi baterakoa denean, langilea lehen zuen lanpostura itzuliko da eta lanpostu horretako ordainsariak kobratuko ditu orduan.

37. artikulua. Eszedentziak.

Enpresan urtebeteko antzinatasuna duen langile orok eskubidea du eszedentzia hartzeko, gehienez bost urtekoa eta gutxienez hiru hilabetekoa.

Borondatezko beste eszedentzia bat hartu ahal izateko, langileak beste urtebetez bederen lan egin beharko du enpresan.

Eskatzen den eszedentzia ez bada bost urte baino gehiagorako edo enpresan lan egindako denboratik goitikoa, enpresak langilea lehengo lanpostuan jarriko du, betiere langileak bere itzulera 15 egun lehenago jakinarazten badu enpresan.

38. artikulua. Laneko arropa.

Langileek laneko arropa nahitaez erabili beharko dute eta enpresak banatuko du:

–Udako arropa:

• 2 galtza pare.
• 3 atorra edo polo, mahuka motzekoak.
• Txiruka bota pare bat.
• 2 txano edo bisera.

–Neguko arropa:

• Panazko hiru galtza pare.
• Mahuka luzeko 4 atorra.
• Jantzi polar bat, kremaileraduna.
• Segurtasuneko larruzko bota pare bat, kalitatezkoa.

Bi urtean behin, neguko arropekin batera anorak bat emanen zaie hitzarmen honen eraginpeko langile guztiei.

Hiru urtean behin, neguko arroparekin batera, uretako jantzia eta uretako botak emanen dira, kale garbigailuak eta ura botatzen duten espaloi garbigailuak gidatzen dituzten langileen kasuan izan ezik, uretako jantzia urtero emanen baitzaie.

Behar bezalako eskularru egokiak eta nahikoak emanen dira hondaturikoak ordezkatzeko.

Arroparen bat edo oinetakoren bat lanean ibiltzeagatik hondatzen denean, enpresak ordezkoa emanen du ahalik eta lasterren, hondaturiko arropa edo oinetakoa itzuli ondoren.

Enpresak, nahi duenean, aurreko urtean emandako arropak itzultzeko eska dezake arropa multzo berria ematen duenean.

39. artikulua. Aurrerakin itzulgarriak.

Enpresak lan hitzarmen honek indarra duen artean 6.300,00 euro jarriko ditu urtean langileei aurrerakin itzulgarriak emateko. Diru hori plantillako langileen artean banatzeaz enpresa batzordea arduratuko da, batzordeak berak ezarritako jarraibideen arabera. Ildo horretatik erabaki da langile batek ez duela 2.100,00 euro baino gehiago eskuratzen ahalko.

Langileek ez dute zilegi beste aurrerakin itzulgarri bat eskatzea, harik eta aurrekoa likidatu arte. Langileak enpresa uzten badu, enpresak amortizatzeko dagoen diru kopurua zati proportzionalen likidaziotik deskontatzen ahalko du.

Aurrerakin itzulgarria eskatzeko, langileak urtebeteko antzinatasuna izan behar du gutxienez enpresan.

Urtebeteko epean amortizatuko da.

40. artikulua. Betaurrekoen haustura.

Hitzarmen kolektibo honek indarra duen artean edozein eginbeharretan ustekabean eta inolako eta inoren errurik izan gabe, hitzarmen kolektibo honen eraginpeko langileren bati bere betaurreko graduatuak hausten bazaizkio, enpresak, afera egiaztatuta, 132,98 euroko laguntza emanen dio, arrazoi horregatik.

41. artikulua. Familia laguntzak.

2023 - 2025 aldiko urteetarako hileko 164,48 euroko laguntza soziala ezarri da, hitzarmen honen eraginpeko langileentzat, seme edo alaba gutxitu fisiko edo psikikorik badute, haien tutore eta bizikide badira, eta Gizarte Segurantzak kontzeptu horregatik ematen dituen prestazioen onuradun badira.

Egoera hori minusbaliotasun kalifikazioaren bidez frogatu beharko da.

42. artikulua. Erretiro saria.

Langile bat bere borondatez erretiratzen denean ondoren adierazten diren adinetan, erretiro laguntza gisa enpresak diru kopuru hauek emanen dizkio, enpresan emandako zerbitzu urte bakoitzeko.

• 2023 - 2025:
  • Erretiroa 62 eta 63 urte bitartean eskatzen bada:
    • 403,19 euro.
    • 329,53 euro.
    • 271,76 euro.
    • 226,48 euro.
    • 198,12 euro.
  • Erretiroa 63 eta 64 urte bitartean eskatzen bada:
  • Erretiroa 64 eta 65 urte bitartean eskatzen bada:
  • Erretiroa 65 eta 66 urte bitartean eskatzen bada:
  • Erretiroa 66 eta 67 urte bitartean eskatzen bada:

43. artikulua. Erroldak.

Enpresak langileen bi errolda prestatuko ditu urtero:

a) Orokorra: ordena alfabetikoz, deiturak, enpresan sartu zireneko data eta kategoriak.

b) Berezia: langileek lantokian duten antzinatasunaren araberakoa.

44. artikulua. Osasun azterketak.

Hitzarmen honen barnean dauden langile guztiek aldizkako azterketa medikoak egiteko eskubidea izanen dute enpresaren kontu, urtero eta urte naturalaren barnean eginen direla.

Aipatu azterketak berariazkoak izanen dira lanpostu bakoitzerako; enpresako zerbitzu medikoen aholkularitzari jarraikiz Segurtasun eta Osasun Batzordearen barnean lanpostu bakoitzerako hautatutako proba medikoak eginen dira, ezarririko aldizkakotasuna eta baldintzak errespetatuta. Azterketak Mutuaren aretoetan edo hark itundutako laguntza zentroetan eginen dira. Langileek azterketa egiteko behar duten denbora izanen dute lanorduetan.

45. artikulua. Segurtasun eta Osasun Batzordea.

Segurtasun eta Osasun Batzordea osatzean eta haren eskumenak eta ahalmenak zehaztean, Laneko Arriskuen Prebentzioari buruzko azaroaren 8ko 31/1995 Legeak xedatutakoari jarraituko zaio (1995eko 269. Estatuko Aldizkari Ofiziala, azaroaren 10ekoa).

Segurtasun eta Osasun Batzordeak hilean egun bateko baimena izanen du enpresarekin biltzeko. Bilera egiten ez bada ere, baimena berdin-berdin hartuko da.

46. artikulua. Ekintza sindikala; eskubide eta berme sindikalak.

Sindikatuek eskubide osoa izanen dute iragarki ohola erabiltzeko, intereseko gaietarako (lanekoak eta sindikalak). Eskubidea izanen dute, halaber, propaganda banatzeko eta kuotak biltzeko, baina eskubide horiek erabiltzean enpresaren lana edo ohiko martxa oztopatu gabe.

Eskubide sindikalak erabiltzeko, langileek ondoren adierazten diren bermeak dituzte eta baliogabe joko dira helburutzat bereizkeria sindikala duten egintzak edo itun guztiak; zehazki, honako hauek:

a) Langile bat hartzeko edo ez hartzeko, kontuan izatea sindikatu batera afiliatua dagoen ala ez.

b) Enpresaburuak berak sindikatu bat eratzea edo sindikatu baten aldeko jarrera izatea, edozein motatako laguntzen bidez.

c) Langile bat kaleratzea, zehatzea, diskriminatzea edo nola edo hala kalte egitea sindikatu batean afiliatua egoteagatik edo bere ekintza sindikalarengatik, betiere sindikatu hori indarra duen legeriaren araberakoa bada.

Enpresa batzordea langileen ordezkaritza organoa da. Honako berme hauek izanen ditu:

a) Delegatu bakoitzak 34 ordu sindikaleko kreditua izanen du hilean, hitzarmen hau indarrean dagoen bitartean. Ordu horiek benetako soldataren arabera ordainduko dira.

Ordu horiek kide baten esku jartzen ahal dira, baina ekintza sindikalerako erabiltzen diren orduak ez dira inola ere Enpresa Batzordeari dagozkion ordu guztiak baino gehiago izanen.

b) Hileko ordu kopuruan ez dira kontatuko enpresaren ekimenez deitutakoak.

c) Lanaren antolaketa arloan edo hobekuntza teknikoetan egoki juzgatzen diren neurriak proposatzea enpresari.

d) Langileengan zuzeneko eragina izanen duten neurrien gaineko informazioa jasotzea, eta bereziki gai hauei buruzkoak:

–Enplegu-erregulazioko espedienteak.

–Langileak lekuz aldatzea.

–Lan sistema berriak ezartzea.

–Lanaren antolaketan eragina duten erabaki guztiak.

e) Indarra duten laneko arauak beteko direla ziurtatzea eta enpresa arau-hausteez ohartaraztea eta, hala badagokio, behar diren erreklamazioak jartzea arauok bete daitezen.

f) Enpresak baimena emanen du, batzordeak 48 ordu lehenago jakinarazi ondotik, batzar ordainduak egiteko. Gehienez ere 3 ordu izanen dituzte urtean.

47. artikulua. Diziplina neurriak.

Hartzen diren diziplina neurrien berri emanen zaio Enpresa Batzordeko idazkariari, edo hark eskuordetzen duen pertsonari, egoki iruditzen zaizkion alegazioak egin ditzan haiek jaso eta 5 eguneko epean.

48. artikulua. Barne araubidea.

a) Egindako zerbitzuen kopia bana emanen zaie hitzarmenari atxikitako gidariei.

b) Langile kontratudun berriak gaueko edo arratsaldeko txandan hasiko dira lanean, baldin eta txanda horietan inork interesik badu eguneko txandara pasatzeko (horretan lanpostu hutsik bada).

49. artikulua. Plantilla.

Joera izanen da kontratudunen lanpostuetarako obra edo zerbitzuko lan kontratu finkoak egitea.

Enpresak hitzeman du ezen, aldi bateko kontratu bidez enpresari loturik hemezortzi hilabetez jarraian eta etenik gabe ematen duten langileei zerbitzu jakin baterako kontratua eginen zaiela eta kontratu horrek adjudikatutako kontratak beste iraunen duela.

50. artikulua. Arlo funtzionalak.

Sektoreko hitzarmen orokorraren 22. artikuluan xedatutakoari jarraikiz, honako arlo funtzional hauek definitzen dira B eta D taldeetan (erdi mailako agintariak eta langileak):

Zerrendatzen diren eginbehar profesionalak informaziorako baino ez dira; era berean, langile orok du bere buruzagiek agintzen dizkioten lan eta operazioak egiteko betebeharra, bere arlo funtzional edo gaitasun profesionalaren eginbehar orokorraren barruan.

B taldea:

–Bigarren mailako arduraduna edo langilezaina: arduradun nagusiaren, azpi-arduradunaren, arduradunaren edo barruti nahiz zonako ikuskatzailearen aginduetara, bere kargura dauka brigadako arduradunen eta gainerako langileen agintea, horien lanak zuzentzen, zaintzen eta agintzen baititu. Bere kargura dauden jardueretako ogibideen gaineko ezagutzak eta aginte dohain nahikoak edukiko ditu aurreikusitako errendimenduak eta diziplina mantentzeko.

Bere goragoko hurrengo buruaren ordezkoa izaten ahalko da, haren etengabeko aginduak behar ez dituzten zerbitzuetan.

D taldea:

–Gidaria edo makinista: gutxienez C motako gidabaimena eta CAP baimena izatea, hitzarmena sinatzean gidariaren edo makinistaren kategoriarekin plantillan dauden eta CAP baimenik ez duten langileentzat izan ezik. Behar diren ezagutzak ditu era guztietako konponketak egiteko, tailerreko elementurik behar ez denean. Haren ardura izanen da, bereziki, berak gidatzen duen makinak edo ibilgailuak parketik ateratzen denean behar bezala funtziona dezala.

Kamioiak (zisterna kamioia), makina bereziak (kale garbigailuak eta ura botatzen duten espaloi garbigailuak) edo atoian eramandako edo eraman gabeko ibilgailuak, zerbitzuak berezko dituenak, gidatu eta maneiatzeko ardura dauka. Esleitzen zaion makinaren edo ibilgailuaren mantentze lanez eta zainketa egokiaz arduratuko da eta makinaren jarraipen teknikoak eta funtzionamendukoak beteko ditu.

–Peoi espezialista: hitzarmenaren eremuan esleitzen zaizkion lanak eginen ditu, bakarrik edo taldean.

Prestatze lanak, bukatze lanak eta lanak egiteko beharrezkoak diren beste guztiak sartzen dira zeregin horien artean. Esleitzen ahal zaizkion tresnak zaindu eta erabiliko ditu, barne direla makina bereziak (kale garbigailuak eta ura botatzen duten espaloi garbigailuak, ibilgailu atoidunak edo antzekoak) eta ibilgailuak, guztiak ere B gidabaimena izanik. Ematen diren tresnak eta ibilgailuak egoera eta funtzionamendu onean mantentzeko lanak ere eginen ditu. Esleitzen zaion makinaren edo ibilgailuaren mantentze lanez eta zainketa egokiaz arduratuko da eta makinaren jarraipen teknikoak eta funtzionamendukoak beteko ditu. Lanak betetzeko egin beharrekoak eginen ditu, bai eta beste arlo funtzional batzuei dagozkien maila teknikoak behar ez dituzten bestelako zereginak ere.

–Peoia.

Hitzarmenaren eremuan esleitzen zaizkion lanak eginen ditu, bakarrik edo taldean.

Prestatze lanak, bukatze lanak eta lanak egiteko beharrezkoak diren beste guztiak sartzen dira zeregin horien artean. Esleitzen ahal zaizkion tresnak zaindu eta maneiatuko ditu, barne direla hosto haizagailuak eta antzeko makinak. Halaber, B gidabaimena behar duten ibilgailuak (furgonetak, piaggio, goupil edo antzekoak) maneiatzen ahalko ditu. Ematen diren tresnak egora eta funtzionamendu onean egoteko lanak ere eginen ditu. Lanak betetzeko egin beharrekoak eginen ditu, bai eta beste arlo funtzional batzuei dagozkien maila teknikoak behar ez dituzten bestelako zereginak ere.

Espezializazio profesional edo teknikorik behar ez duten eginbeharrak burutuko ditu. Lantokietako edozein zerbitzu edo lekutan egin dezakete lan.

Kobratuko beharreko soldatak I. eranskinean dagokion kategoriarako ezarritakoak izanen dira.

Hitzarmen hau sinatu eta hurrengo hilabetetik aurrera, hitzarmena sinatzean peoien arlo funtzionalean sailkatuta dauden langile finkoak peoi espezialistaren arlo funtzionalekoak izatera pasako dira.

51. artikulua. Txanda aldaketak.

Zerbitzu beharrengatik goizeko txandako langile bat arratsaldeko edo gaueko txandara pasatu beharra izanez gero, lanpostuan eta txandan denbora gehien daramana lehenetsiko da.

Boluntariorik ez izatera, lanpostuan eta txandan denbora gutxien daramanari egokituko zaio txanda aldatzea.

Goizeko txandara itzultzeko, lehentasuna izanen dute txanda aldatzera derrigortuek, eta azkenik aldatutakoa lehenengoa izanen da hurrengo txanda aldaketarako, eta horrela hurrenez hurren.

52. artikulua. Erretiro partziala eta errelebo kontratua.

Legezko baldintzak betetzen dituen langileak erretiroa hartzeko eskubidea erabil dezake unean-unean indarra duen legediak aurreikusten dituen modalitateen bidez. Harekin bat, enpresak kasuan kasuko tramiteak eginen ditu hura bete ahal izateko.

Langilearen erretiroaren ondorioz enpresak beste langile bat kontratatu behar badu hark behin betiko erretiroa hartu arte, enpresak hautatuko du ordezko langilea kontratatzeko modalitatea.

V. KAPITULUA.–XEDAPEN GEHIGARRIAK

LEHENBIZIKO KLAUSULA GEHIGARRIA

• 2023. urtea: 2022ko soldata-taulak aldatuko dira % 3,5eko igoera aplikatuta.
• 2024. urtea: 2023ko soldata-taulak aldatuko dira % 3,5eko igoera aplikatuta.
  • 2024. urteko soldaten berrikuspena.
    • 2024ko benetako KPIa % 3,5etik gorakoa bada, behin betiko soldata-taulak eginen dira, eta horretarako 2023ko soldata-taulei 2024ko benetako KPIa aplikatuko zaie, eta EINek 2024ko benetako KPIa argitaratu ondoko bi hiletan ordainduko dira itundutako igoeraren (% 3,5) eta 2024ko benetako KPIaren arteko diferentziagatik 2024ko urtarrilaren 1etik 2024ko abenduaren 31ra arte sortutako atzerakinak.
• 2025. urtea: 2024ko soldata-taulak aldatuko dira % 3,5Eko igoera aplikatuta.
  • 2025. urteko soldaten berrikuspena.
    • 2025eko benetako KPIa % 3,5etik gorakoa bada, behin betiko soldata-taulak eginen dira, eta horretarako 2024ko soldata-taulei 2025eko benetako KPIa aplikatuko zaie, eta EINek 2025eko benetako KPIa argitaratu ondoko bi hiletan ordainduko dira itundutako igoeraren (% 3,5) eta 2025eko benetako KPIaren arteko diferentziagatik 2025eko urtarrilaren 1etik 2025eko abenduaren 31ra arte sortutako atzerakinak.

TAFALLAKO PREZERO ESPAÑA SAKO SOLDATEN TAULA - 2023. URTEA

TAFALLAKO PREZERO ESPAÑA SAKO SOLDATEN TAULA - 2024. URTEA

(Lehenbiziko klausula gehigarria)

Iragarkiaren kodea: F2502494