63. ALDIZKARIA - 2025eko martxoaren 28a

3. ESTATUKO ADMINISTRAZIOA

GOBERNUAREN ORDEZKARITZA

Ebazpena, Energia Politika eta Meatzeetarako Zuzendaritza Nagusiak emana, zeinaren bidez Renantis España 2 SLri (Falck Renewables Power 2 SL zena) aldaketen aurretiazko administrazio-baimena eta eraikitzeko administrazio-baimena ematen baitzaizkio 50,10 MW-eko potentzia instalatuko "Campos de Zuloaga" instalazio fotovoltaikoaren eta haren ebakuazio-azpiegituren proiekturako, Zizur Zendeako, Oltza Zendeako eta Orkoiengo udal-mugarteetan, Nafarroako probintzian

Renantis España 2 SLk (Falck Renewables Power 2 SL zena), sustatzaileak, 2021eko uztailaren 16an, aurretiazko administrazio-baimena eskatu zuen "Campos de Zuloaga" instalazio fotovoltaikorako (122,62 MW-ekoa, modulu fotovoltaikoetan eta 72,177 MW-ekoa, inbertsoreetan) eta haren ebakuazio-azpiegituretarako, Zizurko, Oltza Zendeako eta Orkoiengo udal mugarteetan, Nafarroako probintzian.

Energia Politikako eta Meatzeetako Zuzendaritza Nagusiaren 2023ko azaroaren 10eko Ebazpenaren bidez, aurretiazko administrazio-baimena eman zitzaion Falck Renewables Power 2 SLri 72,177 MW-eko potentzia instalatuko "Campos de Zuloaga" eguzki-instalazio fotovoltaikorako eta haren ebakuazio-azpiegituretarako, Zizurko, Oltza Zendeako eta Orkoiengo udal-mugarteetan, Nafarroako probintzian (aurrerantzean, aurretiazko administrazio-baimenaren ebazpena); 2023ko 280. Estatuko Aldizkari Ofizialean argitaratu zen, azaroaren 23koan.

Aurretiazko administrazio-baimenaren ebazpen horretan xedatutakoaren arabera, exekuzio proiektua definitzeko, aldaketa batzuk egin behar ziren, horrek eragotzi gabe Trantsizio Ekologikorako eta Erronka Demografikorako Ministerioko Ingurumen Kalitatearen eta Ebaluazioaren Zuzendaritza Nagusiak 2023ko abuztuaren 11n emandako Ebazpenean proiektuari ezarritako baldintza guztiak betetzea (ebazpen horren bidez, proiektuaren aldeko ingurumen-inpaktuaren adierazpena egiten da; 2023ko 203. Estatuko Aldizkari Ofizialean argitaratu zen, abuztuaren 25ekoan). Aipatutako aldaketa horietako batzuk hauek dira:

–Aurretiazko administrazio-baimenerako aurkeztutako jatorrizko proiektutik 30 lurzati kentzea, guztira, Zizur Zendeako eta Oltza Zendeako udal mugarteetan; horrela, ingurumen-inpaktuaren adierazpenean (IIA) ezarritako baldintzak betetzen dira (IIAren 1.2.3.2 eta 1.2.6.1 baldintzak).

–Instalazioaren hesitik Arga ibaira eta abelbidera bitarteko tartea handitzea, 50 metrokoa izan dadin, ingurumen-inpaktuaren adierazpenean ezarri bezala (IIAren 1.2.3.2, 1.2.4.3, 1.2.6.1, 1.2.6.2 eta 1.2.7.4 baldintzak).

–Sarbide nagusia bide berri batetik egitea, Paternaingo industrialdetik; bertatik, proiektuko uharte guztietarako sarbidea dago, hegoaldeko uharterako izan ezik, bertara egun dagoen T8 abelbidetik baitago sarbidea (IIAren 1.2.4.3 baldintza).

–Instalazioaren ebakuazio-linearen tipologia eta trazadura aldatzea, ingurumen-inpaktuaren adierazpenean jasota dagoen bezala. 5,5 km-ko luzerako aireko linea izatetik, erabat lurpekoa izatera pasatuko da, beste trazadura batekin eta 9,75 km-ko luzerarekin (IIAaren 1.1.2 eta 1.2.6.1 baldintzak).

–33/220 kV-eko "Campos de Zuloaga" TAE azpiestazio jasotzailearen kokapena aldatzea (IIAren 1.2.6.1 eta 1.2.6.3 baldintzak).

Horrez gainera, sustatzaileak honako hauek proposatzen ditu:

–Proiektuaren ebakuazio-lineako "Promotores Orcoyen" azpiestazioa kentzea, gainerako sustatzaileak lotunetik atera direlako, eta, horrekin, 220 kV-eko ebakuazio-linearen azken puntua aldatzea, zeina zuzenean konektatzen baita REEren 220 kV-eko Orkoien azpiestazioarekin.

–Modulu fotovoltaikoen modeloa eta kopurua aldatzea: JKM570M-7RL4-TV modeloko 122.928 modulu ziren, 570 Wp-koak, eta JKM630N-78HL4-BDV modeloko 84.604 modulu izanen dira, 630 Wp-koak); beraz, potentzia gorena 70,07 MW-etik 53,30 MW-era jaitsiko da.

–Inbertsore-sistema aldatzea: Single edo Twin potentziako estazioaren konfigurazioa zuten inbertsore zentralen sistema batetik (irteerako 3.437 kVA-ko potentziako 21 inbertsore, SUNGROW SG3125HV-MV-30 modelokoak) pasako da transformazio-zentroak dituen string inbertsoreen eredu batera (Huawei 2000-330KTL-H1 modeloko 167 inbertsore, irteerako 330 kVA-ko potentziakoak); horrekin, instalatutako potentzia 72,177 MW-etik 50,10 MW-era jaisten da.

Hori horrela, eta aintzat hartuta proiektuaren aurretiazko administrazio-baimenaren ebazpenean berariaz jasotakoa, beharrezkoa da proposatutako aldaketa batzuen aurretiazko administrazio-baimena eskuratzea, baldin eta ez badira betetzen abenduaren 1eko 1955/2000 Errege Dekretuaren 115.2 artikuluko kasuak (errege dekretu horren bidez arautzen dira energia elektrikoa garraiatu, banatu, merkaturatu eta hornitzeko jarduerak eta instalazioak baimentzeko prozedura).

Renantis España 2 SLk 2024ko martxoaren 27an eskatu zuen deskribatutako aldaketetarako aurretiazko administrazio-baimena eta eraikitzeko administrazio-baimena. Horretarako, dagokion exekuzio proiektua aurkeztu zuen, bai eta Sektore Elektrikoari buruzko abenduaren 26ko 24/2013 Legearen 53.1 artikuluaren arabera aplikatzekoa den araudia betetzen duela egiaztatzen duen erantzukizunpeko adierazpena ere, 50,10 MW-eko potentzia instalatuko "Campos de Zuloaga" instalazio fotovoltaikorako eta haren ebakuazio-azpiegiturarako, Zizur Zendeako, Oltza Zendeako eta Orkoiengo udal-mugarteetan, Nafarroako probintzian.

Espedienteari hasiera eman zitzaion Gobernuaren Nafarroako Ordezkaritzako Industria eta Energia Arlo Funtzionalean, eta tramitatu da bat etorriz abenduaren 1eko 1955/2000 Errege Dekretuaren 127. eta 131. artikuluetan ezarritakoarekin; kasuan kasuko txostenak eskatu zitzaizkien administrazioei, erakundeei eta zerbitzu publikoko edo interes orokorreko zerbitzuetako enpresei, instalazioak haien kargurako ondasunak eta eskubideak ukitzen dituen zatian.

Garraioen eta Mugikortasun Jasangarriaren Ministerioko Errepideen Zuzendaritza Nagusiak, Ebroko Konfederazio Hidrografikoak eta Zizur Zendeako eta Orkoiengo udalen erantzunak jaso dira, eta horietatik ez da proiektuaren kontrako jarrerarik ondorioztatzen. Sustatzaileari igorri zaizkio erantzun horiek, eta ados dagoela jakinarazi du.

Nafarroako Gobernuko Barne Zuzendaritza Nagusiko Larrialdietako, Prebentzioko eta Babes Zibileko Zerbitzuaren erantzuna jaso da. Bertan, baldintza teknikoak ezartzen dira, eta Baso-suteen Arriskuagatiko Autobabes Plan bat egiteko beharra dagoela adierazten da. Sustatzaileari igorri zaio erantzun hori, eta ados dagoela jakinarazi du.

Trenbide Azpiegituren Administratzailearen (ADIF) erantzuna jaso da. Bertan adierazten denez, proiektua "Iruñerriko trenbide-sarearen informazio azterketaren" eraginpean egon liteke (2023ko 77. Estatuko Aldizkari Ofizialean argitaratu zen, martxoaren 31koan), eta, beraz, sustatzaileak Garraioen, Mugikortasunaren eta Hiri Agendaren Ministeriora jo beharko du. Sustatzaileari helarazi zaio, eta hark erantzun du proiektatutako linearen ondoriozko edozein ukipen oso txikia izanen litzatekeela, eta exekuzioa bateragarria dela ezarpenaren ingurunearekin; azterketaren ingurunean obrak egiteko baldintzak jartzea eskatu du. Erakundeari jakinarazi zaio sustatzailearen erantzuna, eta hark ez duenez beste erantzunik eman, ados dagoela ulertzen da, abenduaren 1eko 1955/2000 Errege Dekretuaren 127.4 eta 131.4 artikuluen arabera.

Enagás Transporte SAUren erantzuna jaso da. Bertan, ados dagoela adierazten du, baldintza tekniko orokor eta berezi batzuk betetzen badira, betiere. Sustatzaileari helarazi zaio, eta hark adierazi du ados dagoela baldintzekin, eta dokumentazio teknikoa aurkeztu du proiektuan beharrezkoak diren aldaketak jasotzeko; zehazki, honako agiri hauek aurkeztu ditu: Batetik, "62 MW-eko "Campos de Zuloaga" eguzki-instalazio fotovoltaikoa eraikitzeko administrazio-baimena. Zizur Zendea, Nafarroa, Espainia", 2024ko abuztukoa eta 2024ko irailaren 6an bisatua, deskribatzen duena 2 zenbakiko potentzia-estazioaren (edo Skid MT) kokapen berria, gasbidearen ardatzetik instalazioaren erdi-tentsioko elementu elektrikoetara 50 metroko zortasuna errespetatzeko; bestetik, honakoak eraikitzeko administrazio-baimena: 220/33 kV-eko "Campos de Zuloaga" azpiestazio jasotzailea eta 220 kV-eko lurpeko linea, 220/33 kV-eko "Campos de Zuloaga TAE" azpiestazio jasotzailea eta "Zuloaga TAE-Orkoien azpiestazioa 220 kV-eko GTLLa" ebakuazio-linea. Zizur, Oltza Zendea eta Orkoien, Nafarroa, Espainia", 2024ko abuztukoa eta 2024ko irailaren 6an bisatua. Erakundeari helarazi zaio, eta hark ez duenez beste erantzunik eman, ados dagoela ulertzen da, abenduaren 1eko 1955/2000 Errege Dekretuaren 127.4 eta 131.4 artikuluen arabera.

Red Eléctrica de España SAUren (REE) erantzuna jaso da. Adierazi du ez dagoela ados proiektuarekin, 1955/2000 Errege Dekretuan eskatutako distantziak ez dituelako gordetzen Itxaso - Castejón - Muru-Artederreta 400 kV-eko etorkizuneko linearekiko, zeina REEren jabetzakoa baita eta administrazio-izapidetze fasean baitago. Zenbait baldintza ezartzen ditu linea horren T-50 euskarriaren inguruko lurpeko kanalizazioari dagokionez, eta ebakuazio-azpiegitura komunak eguneratzeko beste eskaera bat bidaltzeko eskatu du, konexio-eskaeraren prozesuan jasotako informazioa eta eraikitzeko administrazio-baimenerako eskatu dena ez datozelako bat zenbait puntutan. Sustatzaileari helarazi zaio, eta hark adierazi du proiektuaren konfigurazio teknikoa aldatzearen aurka dagoela. Argudiatu du proiektua izapidetze-prozesuan dagoela REEk sustatutako linea baino lehenagotik, eta erakundeari adierazi dio prest dagoela konponbide bateratua adosteko. Sustatzailearen erantzunaren berri eman zaio erakundeari. Erakundeak berriz erantzun du, berresteko aldaketaren aurka dagoela, eta nabarmendu du bere jabetzako 400 kV-eko Itxaso - Castejón - Muru-Artederreta linearen proiektua estrategikoa eta onuragarria dela. Erantzun hori sustatzaileari helarazi zaio, eta hark beste hau aurkeztu du: "Aldaketa-gehigarria, 62 MW-eko "Campos de Zuloaga" eguzki-instalazioaren proiektua eraikitzeko administrazio-baimenerako. Zizur Zendea, Nafarroa, Espainia". Gehigarria 2025eko urtarrilekoa da eta 2025eko otsailaren 4an bisatuta dago, eta bertan proiektuaren konfigurazio berria jasotzen da, REEk adierazitako baldintzak betetzeko aldaketak eginda. Gehigarri hori erakundeari helarazi zaio, eta hark aldeko txosten baldintzatua eman eta eskatu du sustatzaileak aldatutako trazadura bidal dezala.

Nafarroako Gobernuko Kultura Zuzendaritza Nagusiko Ondare Arkitektonikoaren Atalaren eta Erregistroaren, Ondasun Higigarrien eta Arkeologiaren Atalaren erantzunak jaso dira, zeinetan proiektuaren aurkako txostena egiten baitute lurpeko ebakuazio-lineak Aratzuriko hiri-eremuan eta Aratzuriko gazteluaren babes-ingurune mugatuan egiten duen trazadurari dagokionez. Bi erantzunak helarazi zaizkio sustatzaileari, eta hark alegazio bakoitzari erantzun dio, adieraziz proiektua guztiz bateragarria dela. Sustatzailearen erantzun horren ondoren, 2024ko urriaren 14an, Nafarroako Gobernuko Kultura, Kirol eta Turismo Departamentuko Erregistroaren, Ondasun Higigarrien eta Arkeologiaren Atalak egindako txosten arkeologiko bat jaso zuen, zeinean ondare arkeologikoaren gaineko ukipenen azterketan identifikatutako ukipenak zehazten baitira, eta baldintza espezifikoak ezartzen aztarnategi arkeologikoen gune sentikorrak proiektutik kanpo uzteko, bai eta eremu bateragarrietan jarraipen arkeologikoak egin beharrari eta neurri zuzentzaileak ezartzeari dagokienez. Sustatzaileak, txosten arkeologikoaren ondorioak kontuan hartuta, proiektua aldatzeko gehigarri bat egin du: "Aldaketa-gehigarria, 62 MW-eko "Campos de Zuloaga" eguzki-instalazioaren proiektua eraikitzeko administrazio-baimenerako. Zizur Zendea, Nafarroa, Espainia". Gehigarria 2024ko azaroaren 27koa da eta egun horretan bisatuta dago. Erregistroaren, Ondasun Higigarrien eta Arkeologiaren Atalari helarazi zaizkio bai sustatzailearen erantzuna, bai aipatutako gehigarria, eta erakunde horrek bigarren erantzun bat eman du, adostasuna adierazten duena zenbait baldintza bete beharra ezarrita. Era berean, Ondare Arkitektonikoaren Atalari helarazi zitzaizkion sustatzailearen erantzuna eta gehigarria, eta Vianako Printzea Erakundea-Kulturako zuzendari nagusiak 382/2024 Ebazpena eman zuen 2024ko abenduaren 30ean, "Campos de Zuloaga" espedientea baimentzen duena, zenbait baldintza ezarrita. Erakundearen bigarren erantzunaren eta aipatutako ebazpenaren berri eman zaio sustatzaileari, eta hark adostasuna adierazi du.

Nafarroako Gobernuko Ingurumen Zuzendaritza Nagusiaren erantzuna jaso da, eta proiektuaren aurkako txostena egiten du, ingurumen-inpaktuaren adierazpenaren zenbait baldintza ez betetzeagatik, eta adierazten du konpentsazio-neurriak gauzatzeko memoria xehatua ez dela aurkeztu zuzendaritzak baloratzeko. Sustatzaileari helarazi zaio, eta hark erantzun die erakundeak planteatutako alegazio guztiei, eta eskatutako konpentsazio-neurrien memoria aurkeztu du. Sustatzailearen erantzuna helarazi zaio erakundeari, eta hark zenbait baldintza ezarri ditu eta berriz adierazi du ingurumen-inpaktuaren adierazpenaren 1.2.6.3 atala ez dela betetzen; horren arabera, 33/220 kV-eko "Campos de Zuloaga" TAE azpiestazioaren kokapena aldatu beharko da beherago dagoen eta ikuseremu txikiagoa hartzen duen toki batera, lurzatiaren hegoalderantz, eremu zelaiagoan kokatzeko. Erakundearen bigarren erantzunaren berri eman zaio sustatzaileari, eta hark adierazi du ados dagoela baldintzekin, eta gehigarri berriak aurkeztu ditu aipatutako ingurumen-inpaktuaren adierazpenaren atala betetzen dela jasotzeko, zehazki, honako hauek: "Aldaketa-gehigarria, 62 MW-eko "Campos de Zuloaga" eguzki-instalazioaren proiektua eraikitzeko administrazio-baimenerako. Zizur Zendea, Nafarroa, Espainia", eta "Proiektuaren aldaketa-gehigarria, Garraioen eta Mugikortasun Jasangarriaren Ministerioaren eta Nafarroako Gobernuaren Ingurumen Zuzendaritza Nagusiaren txostenei erantzuteko. 220/33 kV-eko "Campos de Zuloaga" TAE azpiestazio jasotzailea eta "Zuloaga TAE-Orkoien azpiestazioa 220 kV-eko GTLLa" ebakuazio-­linea. Zizur, Oltza Zendea eta Orkoien, Nafarroa, Espainia". Bi gehigarriak 2025eko urtarrilekoak dira eta 2025eko otsailaren 4an bisaturik daude. Azken dokumentazio hori erakundeari helarazi zaio, eta aldeko txostena egin du.

Garraioen eta Mugikortasun Jasangarriaren Ministerioko Trenbide Sektorearen Zuzendaritza Nagusiaren erantzuna jaso da. Horren arabera, ezin du aldeko txostenik eman balizko ukipenak desagertu arte, eta proiektuaren dokumentazio teknikoa bidaltzeko eskatzen du, txostenean adierazitako oharrak gehituta, balioztatzeko. Sustatzaileari erantzuna helarazi zaio, eta hark honako hau aurkeztu du: "Proiektuaren aldaketa-gehigarria, Garraioen eta Mugikortasun Jasangarriaren Ministerioaren txostenari erantzuteko. 220/33 kV-eko "Campos de Zuloaga TAE" azpiestazio jasotzailea eta "Zuloaga TAE-Orkoien azpiestazioa 220 kV-eko GTLLa" ebakuazio-linea". Gehigarriak 2024ko azaroko data du. Sustatzailearen erantzuna helarazi zaio erakundeari eta, bigarren erantzunean, erakundeak adierazi du ezin duela horri buruzko aldeko txostenik eman, harik eta dokumentazio teknikoan jasota egon arte zabalera estandarreko bide bikoitzerako plataforma ere, Iruñerriko trenbide-sarearen informazio-azterketan ageri dena, eta sustatzailearen proiektuak horretan izan dezakeen ukipena desagertu arte. Erakundearen bigarren erantzunaren berri eman zaio sustatzaileari, eta hark gehigarri berriak aurkeztu ditu, erakundearen baldintzak betetzen direla jasotzeko; zehazki, honakoak dira: "Proiektuaren aldaketa-gehigarria, 62 MW-eko "Campos de Zuloaga" eguzki-instalazioa eraikitzeko administrazio-baimenerako. Zizur Zendea, Nafarroa, Espainia" eta "Proiektuaren aldaketa-gehigarria, Garraioen eta Mugikortasun Jasangarriaren Ministerioaren txostenei erantzuteko. 220/33 kV-eko "Campos de Zuloaga TAE" azpiestazio jasotzailea eta "Zuloaga TAE-Orkoien azpiestazioa 220 kV-eko GTLLa" ebakuazio-­linea. Zizur, Oltza Zendea eta Orkoien, Nafarroa, Espainia. Gehigarriak 2025eko urtarrilekoak dira eta otsailaren 4an bisatuta daude. Azken dokumentazio hori erakundeari helarazi zaio, eta hark aldeko txostena egin du, proiektuaren dokumentazio teknikoan gehigarriaren edukia sartzeko baldintzarekin.

Oltza Zendeako Udalaren erantzuna jaso da. Proiektuaren aurka dagoela adierazi du, hirigintza aldetik bateraezina delako udal plan orokorrarekin; horrez gain, ingurumen arloko zenbait gogoeta ere egin ditu. Sustatzaileari helarazi zaio erantzun hori, eta hark erakundearen alegazio guztiei erantzuten die; proiektua ezarriko den ingurunearekin bateragarria dela bermatzeko beharrezkotzat jotzen diren prebentzio-neurriak abian jartzeko prest dagoela adierazi du. Sustatzailearen erantzunaren berri eman zaio erakundeari, eta hark bigarren erantzuna eman du. Bertan, adierazi du ez dagoela ados sustatzaileak "Campos de Zuloaga" instalazio fotovoltaikoaren aurretiazko administrazio-baimena eta eraikitzeko administrazio-baimena aldatzearen aurkako udal-txostenari emandako erantzunarekin, eta berriro adierazi du aipatutako eguzki-parkearen eta ebakuazio-azpiegituraren aurka dagoela, hirigintza aldetik bateraezina delako.

Oltza Zendeako Udalak egindako txostenari dagokionez, egiaztatu da ezen, abenduaren 26ko 24/2013 Legearen 53.6 artikuluaren eta abenduaren 1eko 1955/2000 Errege Dekretuaren 120.2 artikuluaren arabera, Energia Politikako eta Meatzeetako Zuzendaritza Nagusiari edo, hala badagokio, Ministro Kontseiluari dagokiola baimentzea energia elektrikoa ekoizteko instalazioak, 50 MW elektrikotik gorako potentzia elektrikoa badute edo autonomia erkidego baten lurraldea gainditzen badute; horrek ez du eragozten aplikagarriak diren beste xedapen batzuen arabera beharrezkoak diren emakidak eta baimenak eskuratu beharra, eta, bereziki, lurralde-antolamenduaren eta ingurumenaren arlokoak.

Egiaztatu da, halaber, ezen, Ingurumen-ebaluazioari buruzko abenduaren 9ko 21/2013 Legearen 41.2 artikuluaren arabera, ingurumen-inpaktuaren ebaluazio-prozedura amaitu ondoren, proiektuari ezarritako baldintzak eta prebentzio-, konpentsazio- eta zuzenketa-neurriak, sustatzaileak nahitaez bete beharrekoak eta zuzendaritza nagusi honek edo, hala badagokio, Ministro Kontseiluak kontuan hartu beharrekoak, honako hauek izanen direla, Trantsizio Ekologikorako eta Erronka Demografikorako Ministerioaren Ingurumen Kalitatearen eta Ebaluazioaren Zuzendaritza Nagusiaren 2023ko abuztuaren 11ko Ebazpenaren arabera: "ingurumen-inpaktuaren azterketan jasotako eta jendaurreko informazioaren ondoren onartutako prebentzio- eta zuzenketa-neurri guztiak, edo informazio osagarrian jasotakoak, ebazpen honetan ezarritakoaren aurkakoak ez diren heinean, bai eta ingurumen-inpaktuaren adierazpen honetan zehaztutako neurri gehigarriak ere".

Galdera egin zaie Nafarroako Gobernuko Herri lanen eta Azpiegituren Zuzendaritza Nagusiari, Nafarroako Gobernuko Lurralde Antolamenduko Zuzendaritza Nagusiari, Nafarroako Gobernuko Energia, Enpresa I+G+b eta Ekintzailetza Zuzendaritza Nagusiari, I-DE Redes Eléctricas Inteligentes SAUri, Espainiako Ornitologia Sozietateari (SEO Birdlife), Nafarroako Ekologistak Martxan elkarteari (Landazuria), Salvemos el Perdón 4.0 Plataformari, Sustraia Erakuntza Fundazioari eta Zangozaldeko Ekologistak Martxan elkarteari, eta ez da haien erantzunik jaso, beraz, ulertzen da ados daudela, abenduaren 1eko 1955/2000 Errege Dekretuaren 127.2 eta 131.1 artikuluetan xedatutakoaren arabera.

Orobat, eskaera jendaurrean jarri da, abenduaren 1eko 1955/2000 Errege Dekretuaren 125. artikuluan eta aurreikusitakoarekin bat, 2024ko ekainaren 17an Estatuko Aldizkari Ofizialean eta 2024ko uztailaren 2an Nafarroako Aldizkari Ofizialean argitaratu baitzen. Zenbait alegazio jaso dira, eta sustatzaileak erantzun egin ditu.

Nabarmendu behar da Electra Valdizarbe Distribución SLUk (aurrerantzean, Electra) aurkeztutako alegazioa. Alegazio horretan azaltzen duenez, proiektuak ukitutako linea elektriko batzuk bere jabetzakoak dira, eta, beraz, ukitutako erakundeen zerrendan sartu behar zen. Halaber, jendaurrean jarritako dokumentazioa ez dela nahikoa ez zuzena dio. Sustatzaileak, Electraren alegazioari erantzunez, proiektuen aldaketak aurkeztu ditu, ukitutako erakundeen artean Electra sartuta, eta identifikatutako haren jabetzako lineen titulartasuna zuzenduta. Zehazki, hauek dira dokumentuak: Batetik, "62 MW-eko "Campos de Zuloaga" eguzki-instalazioa eraikitzeko administrazio-baimena. Zizur Zendea, Nafarroa, Espainia". 2024ko abuztukoa da eta 2024ko irailaren 6an bisatuta dago, eta, bestetik, "220/33 kV-eko "Campos de Zuloaga" azpiestazio jasotzailea eta 220 kV-eko lurpeko linea eraikitzeko administrazio-baimenerako proiektua, 220/33 kV-eko "Campos de Zuloaga TAE" azpiestazio jasotzailea eta "Zuloaga TAE-Orkoien azpiestazioa 220 kV-eko GTLLa" ebakuazio-linea. Zizur, Oltza Zendea eta Orkoien, Nafarroa, Espainia". 2024ko abuztukoa da, eta 2024ko irailaren 6an bisatuta dago. Erakundeari jakinarazi zaio sustatzailearen erantzuna, eta haren erantzunik jaso ez denez, ados dagoela ulertzen da, abenduaren 1eko 1955/2000 Errege Dekretuaren 127.4 eta 131.4 artikuluen arabera.

Gobernuaren Nafarroako Ordezkaritzako Industria eta Energia Arloak txostena eman du 2025eko urtarrilaren 10ean.

Kontuan izanik ezen, abenduaren 9ko 21/2013 Legearen 42. artikuluak ezartzen duenez, organo substantiboak behar bezala kontuan hartu beharko duela egindako ingurumen-inpaktuaren ebaluazioa.

Ingurumen-inpaktuaren ebaluazioaren prozedura egin da instalazioaren proiektuaz eta hari lotutako ebakuazio-azpiegituraz, baita ingurumen-inpaktuaren azterketaz (IIAZ) ere, eta ingurumen-inpaktuaren adierazpena (IIAD) aldekoa izan da, zeina jaso baita Trantsizio Ekologikorako eta Erronka Demografikorako Ministerioaren Ingurumen Kalitatearen eta Ebaluazioaren Zuzendaritza Nagusiaren 2023ko abuztuaren 11ko Ebazpenean. Ebazpen horretan ingurumen arloko baldintzak ezartzen dira, egindako ingurumen-ebaluazioaren ondoriozko prebentzio-, zuzenketa- eta konpentsazio-neurriak barne. Ebazpena 2023ko 203. Estatuko Aldizkari Ofizialean argitaratu zen, abuztuaren 25ekoan.

IIADan ezarritakoaren arabera, proiektuari aplikatuko zaizkio ezarritako ingurumen arloko baldintzak, bai eta ingurumen-ebaluazioaren ondoriozko prebentzio-, zuzenketa- eta konpentsazio-neurriak eta, hala badagokio, IIAZan jasotako jarraipen-neurriak, jendaurreko informazioaren eta kontsulten ondotik onartutakoak, eta informazio gehigarrian proposatutakoak ere, baldin eta IIADan xedatutakoaren aurkakoak ez badira.

Proiektuari aurretiazko administrazio-baimena ematen dion ebazpenean xedatutakoari jarraikiz, IIADan proiektuari ezarritako baldintza guztiak bete behar badira ere, hura baita nahitaezko txosten erabakigarria, ezartzen duena, abenduaren 9ko 21/2013 Legearen 41. artikuluarekin bat, zer baldintzatan garatzen ahal den proiektua, bai gauzatzean bai ustiatzean, exekuzio proiektua definitzeko kontuan hartuko dira, bereziki eta besteak beste, IIADan xedatutako baldintza eta neurri hauek, betetzen direla egiaztatzen duen dokumentazioa aurkeztuta:

–Egindako ingurumen-ebaluazioa ikusita, "Campos de Zuloaga" eguzki-instalazio fotovoltaikoaren behin betiko konfigurazioa izan beharko da sustatzaileak 2022ko azaroaren 17an igorritako gehigarri osagarrian onartutakoa, Nafarroako Gobernuko Ingurumen Zuzendaritza Nagusiak 2023ko martxoaren 29ko txostenean adierazitako aldaketak aintzat hartzen dituena; aldaketa horiek ebazpen honen baldintzetan zehaztuta daude, bereziki 1.2.3.2, 1.2.6.1, 1.2.6.2 eta 1.2.6.3 ataletan, eta 1.1.1 baldintzan jasotzen den bezala.

–Era berean, proiektuaren energiaren ebakuazioa lurpeko linea baten bidez egin beharko da, sustatzaileak 2022ko azaroaren 17ko dokumentazio osagarrian azaldutako 1. alternatibaren arabera, eta ebazpen honetan eta Nafarroako Gobernuko Ingurumen Zuzendaritza Nagusiaren 2023ko martxoaren 29ko txostenean ezarritako baldintzak errespetatu beharko dira, 1.1.2 baldintzan jasotzen den bezala.

–Komenigarritzat jotzen da proiektua Arga ibaiaren ertzetatik urruntzea, eragin eremu libre bat uzteko miru gorriaren aleek gehien erabiltzen dituzten eremuen inguruan. Horrenbestez, sustatzaileak 2022ko uztailaren 11ko txostenean proposatutako lurzatiak baztertu beharko dira, zuzendaritza nagusiak adierazitakoarekin bat etorriz: Arga ibaiaren labarretatik hurbil dauden guneak (edo "Iberoko eta Erieteko ibaiertzak"), Zizurko (Eriete) 13. poligonoko 2. lurzatian daudenak, eta, iparraldean, sarbideetan eta Aizgañako begiratokiaren eremuan, Iberoko ibaiertzean, Arakil-Argaren bokalearen aurrean, 1.2.3.2 baldintzan jasotzen den bezala.

–Miru gorriaren ale irrati-markatuen jarraipena egiteko sustatzaileak proposatu duen proiektuak metodologia zehaztu beharko du, hori eginen duten profesionalak identifikatu beharko ditu, eta kronograma eta aurrekontu xehatua sartu beharko ditu. Nafarroako Gobernuko Ingurumen Zuzendaritza Nagusiko Biodibertsitate Zerbitzuarekin koordinatuta idatziko da, 1.2.3.3 baldintzan jasotzen den bezala.

–Faunaren pausalekuak, isurbideak eta babeslekuak eraiki aurretik, proiektu bat egin behar da (zer faunarentzat diseinatu diren, zenbat eta non kokatu behar diren eta ezartzeko kronograma zehaztu behar dira, gutxienez), bai eta aurrekontu xehatu bat ere (horiek eraikitzea eta eguzki-instalazio fotovoltaikoaren balio-bizitza osoko mantentze-lanak barne hartu beharko ditu). Nafarroako Gobernuko Ingurumen Zuzendaritza Nagusiko Biodibertsitate Zerbitzuak gainbegiratu eta baimendu beharko du proiektua, 1.2.3.4 baldintzan jasotzen den bezala.

–Inguruko hesia zutoinen bidez bakarrik tinkatuko da lurrean beheko aldetik, faunari azpitik igarotzeko aukera uzteko, eta, horretarako, azpitik tarte bat utzi beharko du, lurretik 15-20 cm-ra altxatuta. Hesia diseinatuko da faunarentzako iragazkortasuna hobetzeko, eta elementu zorrotzak edo ebakitzaileak saihestuko ditu. Hesia seinalez markatzeko neurriak hartuko dira, hegaztiek ikus ditzaten, landare naturalez egindako pantailak eratuz, edo plakak jarriz, metalikoak hobe, 15x30 edo 20x20 cm-koak, zuriak, bi metroko tarte horizontalak utziz eta bi ilaretan jarrita altuera ezberdinetan itxituran eta txandakatuan, 1.2.3.5 baldintzan jasotzen den bezala.

–Lurzoruaren eraldaketa minimizatuko da. Azterketa geotekniko zehatza egin ondotik, modulu edo jarraitzaile fotovoltaikoen euskarrien egitura lurrean zuzenean tinkatuko da, ahal den guztietan, pilote edo hormigoizko zapataren erabilera ahalik eta txikiena izan dadin. Moduluak lur eremuaren topografia naturalaren arabera egokitu beharko dira, lanak egin bitartean ukipena guztiz ezinbestekoa den esparruan soilik egiteko moduan, eta lur mugimendu ahalik eta txikienak egiteko moduan. Plakak ezartzeko eremuan egin beharreko sasi garbitzeak eta lur berdintzeak moduluen edo jarraitzaileen zutoinek osatzen dituzten lerroei bakarrik eraginen diete, egoki erabili eta ezartzeko behar-beharrezkoa denean, 1.2.4.1 baldintzan jasotzen den bezala.

–Lurraren topografia albait gehien errespetatuko da, landarediaren, lurzoruaren eta paisaiaren gaineko eraginak saihestuz profil naturalak birmoldatzeagatik. Zelaitze lanek ez dute ekarriko 2 m-tik gorako altuerako lur erauzketarik edo betelanik (salbuespen gisa 3 m). Ezpondarik sortzen bada, etzanak izanen dira, 2H:1V baino gutxiagoko maldarekin, haien goialdeak biribilduak izanen dira, eta lubetetako ezponden gainean gutxienez lur begetalezko 30 cm-ko geruza jarriko da. Halaber, % 10etik gorako malda duten azalerei eragitea saihestuko da, eta eremu hezeei, ibilguei eta ur drainatze naturalei ahalik eta gutxien eraginen zaie, 1.2.4.2 baldintzan jasotzen den bezala.

–Nafarroako Gobernuko Ingurumen Zuzendaritza Nagusiak eskatzen duenaren arabera, Zizurko 13. poligonoko 3E azpilurzatirako sarbidea jatorrizko alternatibatik eginen da, hegoaldetik, Zizurko 6. poligonoko 168B azpilurzatian dagoen lur bide bat aprobetxatuz. Nolanahi ere, sarbideak 20 metroko gutxieneko zabalera errespetatu beharko du "8. zeharbidea" abelbidearen ardatzaren alde bakoitzean, 1.2.4.3 baldintzan jasotzen den bezala.

–Kableen zangek eta jarraitzaileen eta moduluen arteko barne bideak ez dira zolatzen ahalko, ezta legarrez edo zaborrez estaltzen ahalko ere. Zolatu beharreko bide nagusiak ingurunearen tonalitate bereko zaborrekin zolatuko dira, 1.2.4.4 baldintzan jasotzen den bezala.

–Ibai ibilguen gurutzaketetarako irtenbide teknikoak, batez ere Arga eta Idiazabal ibaienak, Ebroko Konfederazio Hidrografikoarekin eta Nafarroako Gobernuko biodibertsitatearen eta ingurumenaren arloko organo eskudunekin koordinatuta egin beharko dira, eta horien aldeko txostena izan beharko dute eraikuntza baimendu aurretik. Jabari publiko hidraulikoko (JPH) gurutzaketek eta obrek arroko erakundearen nahitaezko baimena lortu beharko dute obrak hasi aurretik, 1.2.5.1 baldintzan jasotzen den bezala.

–Paisaiaren gaineko eraginak eta inpaktu bisuala minimizatzeko, proiektua Nafarroako Gobernuko Ingurumen Zuzendaritza Nagusiak 2023ko martxoaren 29ko txostenean adierazitakoaren arabera eginen da, 1.2.6.1 baldintzan jasotzen den bezala.

–Hesiaren atzeraemangunea gutxienez 50 m-koa izanen da, edo 80 m-koa, euskarri-jarraitzailearen egituraren eta moduluen altuera 5 metrotik gorakoa bada, erreferentzia gisa Arga ibaiaren ezkerreko ertzeko labarren goiko ertza hartuta, 1.2.6.2 baldintzan jasotzen den bezala.

–Instalazioaren azpiestazioa (33 kV/220 kV-eko "Campos de Zuloaga TAE") eremu baxuago eta ikuseremu txikiagoko batean birkokatu beharko da, lurzatiaren hegoalderantz, haren kokapena Paternaingo industrialdera hurbilduz, toki zelaienean jartzeko eta lur berdinketa eta sarbideak lur mugimenduen bolumen ahalik eta txikienarekin egiteko, 1.2.6.3 baldintzan jasotzen den bezala.

–Nafarroako Gobernuko Ingurumen Eraginaren Atalak baliozkotu beharko du ingurumen aldetik leheneratzeko eta paisaian integratzeko proiektu tekniko xehatua, aurrekontuan jasotakoa, proposatutako konpentsazio neurriak barne: "8. zeharbidea" ereitea eta Iberoko erreten-erreka leheneratzea, 1.2.6.4 baldintzan jasotzen den bezala.

–Proiektuaren behin betiko konfigurazioaren paisaia eraginaren azterketa idatzi behar da, 64/2006 Foru Aginduan adierazitakoaren arabera. Azterlan horrek ingurunearen argazki simulazio bat izanen du, eta behatzaileak maiz joaten diren lekuetatik dagoen ikusgarritasuna aztertuko du. Azterlan horrek Nafarroako Gobernuko Ingurumen, Lurraldearen Antolamendu eta Etxebizitza Departamentuaren oniritzia izan beharko du, 1.2.6.5 baldintzan jasotzen den bezala.

–Proiektua baimendu aurretik, azterketa arkeologiko bat egin beharko da, ondare arkeologikoan izaten ahal diren eraginak zehazteko. Azterlanak Nafarroako Gobernuko Vianako Printzea Erakundea-Kultura Zuzendaritza Nagusiko Erregistroaren, Ondasun Higigarrien eta Arkeologiaren Atalaren baimena beharko du, 1.2.7.1 baldintzan jasotzen den bezala.

–Abelbideei dagokienez, proiektua baimendu aurretik, instalazio fotovoltaikora sartzeko pisten zuinketaren xehetasun plano bat aurkeztu beharko da, Nafarroako Gobernuko Ingurumen Zuzendaritza Nagusiaren txostenetan adierazitako eskakizunak betetzen direla egiaztatzeko. Horien artean, eta abelbideen korridore ekologikoaren funtzioak mantentze aldera, hesia atzeraeman beharko da, eta, gutxienez, 50 m-ko zabalerako lotura korridore bat utzi beharko da "8. zeharbidearen" ibilbidean zehar, 1.2.7.4 baldintzan jasotzen den bezala.

–Gainera, itxitura perimetralaren diseinuak libre eta funtzional utzi beharko du "Erreniega-Larraia" lurralde korridorearen eta "8. zeharbidearen" arteko lotura, Zizurko udalerriko 6. poligonoko 166. lurzatian eta 168B azpilurzatian eta 13. poligonoko 3D azpilurzatian dauden zuhaitzak eta landare naturala berreskuratuz, 1.2.7.6 baldintzan jasotzen den bezala.

–"8. zeharbidea" ereiteko jarduketari aldeko txostena egin beharko dio Baso Plangintzarako eta Ingurumen Hezkuntzarako Atalak; nolanahi ere, Nafarroako Abelbideei buruzko abenduaren 15eko 19/1997 Foru Legean ezarritakoa beteko da, baita ukitutako abelbideak deklaratu zituzten foru dekretuetan edo gobernu erabakietan ezarritakoa ere, 1.2.7.11 baldintzan jasotzen den bezala.

–Ibero errekaren uholde arriskuaren xehetasun azterketa bat egin beharko da, lotutako balizko arriskuak ezartzeko, eta Ebroko Konfederazio Hidrografikoak baliozkotu beharko du. Gainera, ziurtatu behar da parke fotovoltaikoak ez duela lehentasunezko fluxu eremurik hartuko, ez eta urak hartzen ahal dituen eremuak oztopatuko ere, 1.2.8.2 baldintzan jasotzen den bezala.

–Ingurumena Zaintzeko Programa osatu beharko da ingurumen-inpaktuaren adierazpenaren baldintzetan ezarritako alderdi gehigarriekin eta, zehazki, 1.2.9 baldintzan adierazitakoarekin.

IIAZan eta IIADan ezarritako baldintza eta neurri bakoitza zehaztu eta aurrekontuan sartu behar zituen sustatzaileak, proiektuan nahiz haren gehigarri batean, xehakatuta, halako eran non aipatutako IIADan zehaztutako neurri bakoitza identifikatzen ahalko baita onetsi aurretik.

Proiektuaren aldaketen aurretiazko administrazio-baimena eta hura eraikitzeko administrazio-baimena lortzeko, sustatzaileak, 2023ko martxoaren 27an, 2024ko irailaren 9an eta 2025eko otsailaren 5ean sustatzaileak ingurumen-inpaktuaren adierazpenean eta aurretiazko administrazio-baimenaren ebazpenean ezarritako baldintzak betetzen dituela egiaztatzen duten agiriak aurkeztu ditu, baita erantzukizunpeko adierazpena ere, abenduaren 26ko 24/2013 Legearen 53.4 artikuluan xedatutakoa betez.

Abenduaren 26ko 24/2013 Legearen 21.5 artikuluaren arabera, ekoizpen-instalazioak ebakuazio-azpiegiturak izanen ditu, horien artean garraio- edo banaketa-sarearekiko konexioa eta, hala badagokio, energia elektrikoaren eraldaketa.

Ingurumen-inpaktuaren adierazpenean eta sustatzaileak tramitazioan onartutako baldintzen arabera, ebakuazio-azpiegiturak honako jarduketa hauek aurreikusten ditu:

–33 kV-eko lurpeko 3 lineak, instalazioaren transformazio-zentroetatik datozenak, 33/220 kV-eko "Campos de Zuloaga" TAE azpiestazio jasotzaileraino (Zizur Zendea, Nafarroako probintzia).

–33/220 kV-eko "Campos de Zuloaga" TAE azpiestazio jasotzailea, Zizur Zendean, Nafarroako probintzian.

–220 kV-eko lurpeko ebakuazio-linea elektrikoa, 33/220 kV-eko "Campos de Zuloaga" TAE azpiestazio jasotzailetik abiatu eta Zizur Zendean, Oltza Zendean eta Orkoiengo udal-mugarteetan barna igarotzen dena, Nafarroako probintzian, Red Eléctrica España SAUren 220 kV-eko Orkoien azpiestazioraino. Hortik 500 metrora baino gutxiagora dagoen neurri fiskaleko esparruan ditu sarrera-irteerak.

–Red Eléctrica España SAUren 220 kV-eko Orkoien azpiestaziotik 488 metrora dagoen neurketa-esparrua.

Ebakuazio-azpiegituraren gainerakoa, garraio-sarearekin konektatu artekoa, dagoeneko zerbitzuan den 220 kV-eko Orkoien azpiestazioa da, Red Eléctrica de España SAUren jabetzakoa.

Abenduaren 26ko 24/2013 Legearen 53.1 artikuluaren arabera, eraikitzeko administrazio-baimenak aukera ematen dio titularrari instalazioa eraikitzeko, eskatutako baldintza teknikoak betez gero.

Sustatzaileak, 2025eko otsailaren 5ean, erantzukizunpeko adierazpena sinatu zuen, aplikatu beharreko araudia betetzen duela egiaztatzen duena.

Sektore Elektrikoari buruzko abenduaren 26ko 24/2013 Legeak enpresa ekimen askea aitortzen du energia elektrikoaren hornidurarako jardueretan aritzeko. Hala ere, abenduaren 26ko 24/2013 Legearen 53.4 artikuluaren arabera, sustatzaileak egiaztatu du proiektua egiteko gaitasun legal, tekniko eta ekonomiko-finantzarioa duela. Horretarako, Merkatuen eta Lehiaren Batzorde Nazionalak zegokion txostena egin eta 2023ko abenduaren 15eko bilkuran onetsi zuen, abenduaren 1eko 1955/2000 Errege Dekretuaren 127.6 artikuluan xedatutakoa kontuan hartuta.

Administrazio Publikoen Administrazio Prozedura Erkideari buruzko urriaren 1eko 39/2015 Legearen 82. artikuluan ezarritakoarekin bat, zuzendaritza nagusi honen ebazpen proposamenari buruzko entzunaldia eman zaio sustatzaileari; sustatzaileak bere adostasuna adierazi du eta zenbait ohar egin ditu ebazpen honetan kontuan hartu direnak. Era berean, sustatzaileak, entzunaldiaren tramite horretan egindako errekerimenduari erantzunez:

–Red Eléctrica de España SAUk (erref.: PET000000533), Nafarroako Gobernuko Ingurumen Zuzendaritza Nagusiak (erref.: 0003-0102-2025-000428) eta Trenbide Sektoreko Zuzendaritza Nagusiak (erreg. REGAGE25e00011698940), jakinarazitako txostenen edukiarekin ados dagoela adierazten du, eta konpromisoa hartzen du sektoreko lege indardunetan xedatutakoa betetzeko, bai eta, hala badagokio, txosten horietan ezarritako baldintza guztiak ere.

–Berariaz uko egiten dio jendaurrean jarritako proiektuetan egindako aldaketek ukitutako ondasun eta zerbitzuak onura publikokoak direla deklaratzeari. Aldaketa horiek ebazpen honetako gehigarrietan jasota daude.

Aintzat hartuz Administrazioaren jarduera zuzendu behar duten printzipioak, prozesuaren azkartasuna eta ekonomia, alegia, bidezkoa da egintza bakar baten bidez ebaztea eskatzailearen eskaera, proiektuari aurretiazko administrazio-baimena eta eraikitzeko administrazio-baimena emateari buruzkoa.

Baimen horiek ematen badira ere, lurraldearen antolamenduari eta ingurumenari dagozkien eta beharrezkoak diren emakidak eta baimenak beharko dira, bai eta aplikatzekoak diren xedapenek eragindako beste guztiak ere. Halaber, obra egiteko beharrezkoak diren gainerako baimen guztiak eskuratu beharko dira, abenduaren 26ko 24/2013 Legearen 53.6 artikuluan eta abenduaren 1eko 1955/2000 Errege Dekretuaren 120.2 artikuluan ezarritakoari jarraikiz.

Ebazpen honetan lehenago aipatu denez, Oltza Zendeako Udalak proiektuaren aurkako jarrerari eusten dio.

Abenduaren 1eko 1955/2000 Errege Dekretuaren 131.6 artikuluan ezartzen denez, instalazioaren eskatzailearen eta administrazio edo erakunderen baten artean desadostasuna baldin badago baldintza teknikoei dagokienez, eta desadostasunari eusten bazaio, Energia Politikako eta Meatzeetako Zuzendaritza Nagusiak bi aukera izanen ditu: baldintza teknikoak jasotzen dituen ebazpena ematea, edo, horiekin ados ez badago, ebazpen-proposamena igortzea, Ministroen Kontseiluari helarazteko.

Hala ere, prozedura hau ebaztean ezin dira aintzat hartu Oltza Zendeako Udalak egindako alegazioak, horien xedea gainditzen baitu Energia elektrikoaren garraio-, banaketa-, merkaturatze- eta hornidura-jarduerak eta instalazioen baimen-prozedurak arautzen dituen abenduaren 1eko 1955/2000 Errege Dekretuaren 131. artikuluan xedatutakoa.

Horri dagokionez, Trantsizio Ekologikorako eta Erronka Demografikorako Ministerioko Estatuko Abokatutzak, uztailaren 9ko 1251/2024 irizpenean, honako hau ondorioztatzen du: "1955/2000 Errege Dekretuaren 131.6 artikuluaren irismenaren interpretazioak, gaur egun indarrean dagoen Sektore Elektrikoari buruzko 24/2013 Legearen 53.1.b) artikuluaren edukia kontuan hartuta, zehazten du ezen eraikitzeko administrazio-baimenen gaineko ebazpenak Ministro Kontseiluari igortzea dakarten desadostasunak izanen direla, soilik, desadostasun tekniko hutsak, baimenaren xede diren instalazioek administrazio horien jabetzako ondasunei edo eskubideei eragiten dietenean sortzen direnak".

Estatuko Abokatutzaren aipatu irizpenean berariaz jasotzen da honako hau:

"Ildo horretan, funtsezkoa da Sektore Elektrikoaren Legearen 53.1.b) artikuluaren edukia; izan ere, eraikitzeko administrazio-baimena (EAB) arautzean dio ezen, ebazpena emateko (baimena emateko, ulertu behar da), aztertu beharko direla zerbitzu publikoak edo interes ekonomiko orokorrekoak ematen dituzten administrazio publikoen, erakundeen edo enpresen baldintza teknikoak baino ez direnak, baina instalazioak ukitzen dituen haien jabetzako ondasun eta eskubideei dagokienez bakarrik [...].

[...] kontzeptu horri buruzko zalantza guztiak argitzen ditu, beste administrazio batzuen baldintza teknikoen azterketa mugatzen baitu, instalazioak ukitzen dituen haien jabetzako ondasun eta eskubideei "bakarrik" dagokiela dioenean. Arau-testu horietan (legea eta erregelamendua) erabilitako terminologia desberdina izatea ez da arraroa; izan ere, lehen esan dugunez, gogoratu behar da indarrean dagoen Sektore Elektrikoari buruzko Legea 2013koa dela, eta erregelamendua, berriz, askoz lehenago onetsi zela, 2000. urtean. Horrenbestez, Sektore Elektrikoari buruzko Legearen 53.1.b) artikuluaren eta 1955/2000 Errege Dekretuaren 131.6 artikuluaren baterako interpretazioak ondorio honetara garamatza: soilik hartzen ahalko dira kontuan baldintza teknikoak, instalazioak ukitzen dituen administrazio publikoen ondasunei eta eskubideei eragiten dietenak".

Ingurumen edo hirigintza arloko alegazioei dagokienez, irizpen horrek honako hau adierazten du:

"Ingurumen-araudia betetzeari buruzko alegazioei dagokienez, eta, bereziki, ingurumen-inpaktuaren adierazpena (IIAD) zalantzan jartzera bideratutakoei dagokienez, Sektore Elektrikoari buruzko Legearen 53. artikuluko baimen-prozeduraren barruan eman baitira, argitu behar da IIAD txosten bat baino ez dela, eta dagokion tramitazioa bete ondoren ematen dela (Ingurumen Ebaluazioari buruzko 21/2013 Legearen 33.1 artikulua), eta baimen-prozedura zabalago batean txertatzen dela, hainbesteraino non IIADaren kontra ezin baita modu autonomoan errekurritu, legegileak berariaz hala aginduta –21/2013 Legea, 41.4 art., 3–. Beraz, horrekin ados ez dagoen administrazioak IIADaren kontra errekurritzen ahalko du, elektrizitatea ekoizteko instalazioaren baimena aurkaratuz. 1955/2000 Errege Dekretuaren 131.6 artikuluaren araberako desadostasun gisa hartuta IIAD hori zalantzan jar daitekeela pentsatzeak ekarriko luke horretarako ezarritako prozedura aldatzea, hau da, gora jotzeko modu desegoki bat sortuko litzateke baimena onetsi aurretik ere, eta IIAD modu autonomoan aurkaratzeko aukera emanen luke, baimena onetsi aurretik edukia berrikusteko aukera emanen lukeelako, beharbada eskumena ez duen organo baten aldetik [...]

[...] Estatuko Administrazio Orokorraren, haren organismo publikoen eta udalen arteko gatazkak ebazteko legez ezarritako bidea, oro har, Lurzoruaren eta Hiri Birgaitzearen Legearen testu bategina onesten duen urriaren 30eko 7/2015 Legegintzako Errege-dekretuaren 10. xedapen gehigarrian ezarritakoa da (horrek ere Ministro Kontseiluari igortzea dakar, baina ez 1955/2000 Errege Dekretuaren 131.6 artikulua aplikatuta)".

Aurrekoa kontuan hartuta, eta kontuan hartuta aldi berean ez dagoela oposizio teknikorik eta proiektuak ez duela haren jabetzako ondasun edo eskubideen gaineko ukipenik, lehen aipatutako abenduaren 1eko 1955/2000 Errege Dekretuaren 131.6 artikuluan ezarritakoarekin bat, bidezkoa da Energia Politikako eta Meatzeetako Zuzendaritza Nagusiak ebazpena ematea.

Azaldutakoaren ondorioz, Energia Politikako eta Meatzeetako Zuzendaritza Nagusi honek

EBAZTEN DU:

Lehena.–Renantis España 2 SLri (Falck Renewables Power 2 SL zena) aldaketetarako aurretiazko administrazio-baimena ematea 50,10 MW-eko potentzia instalatuko "Campos de Zuloaga" instalazio fotovoltaikoaren eta haren ebakuazio-azpiegituren proiekturako, Zizur Zendeako, Oltza Zendeako eta Orkoiengo udal-mugarteetan, Nafarroako probintzian, ebazpen honetan jasotzen diren baldintzetan.

Bigarrena.–Renantis España 2 SLri (Falck Renewables Power 2 SL zena) eraikitzeko administrazio-baimena ematea 50,10 MW-eko potentzia instalatuko "Campos de Zuloaga" instalazio fotovoltaikorako eta haren ebakuazio-azpiegituretarako, Zizur Zendeako, Oltza Zendeako eta Orkoiengo udal-mugarteetan, Nafarroako probintzian, honako agiri tekniko hauetan zehaztutako ezaugarriekin: alde batetik, "62 MW-eko "Campos de Zuloaga" eguzki-instalazio fotovoltaikoa eraikitzeko administrazio-baimena. Zizur Zendea, Nafarroa, Espainia", 2024ko urtarrilekoa da eta 2024ko martxoaren 22an bisatua, eta "220/33 kV-eko "Campos de Zuloaga" azpiestazio jasotzailea eta 220 kV-eko lurpeko linea eraikitzeko administrazio-baimenerako proiektua, 220/33 kV-eko "Campos de Zuloaga TAE" azpiestazio jasotzailea eta "Zuloaga TAE-Orkoien azpiestazioa 220 kV-eko GTLLa" ebakuazio-linea. Zizur, Oltza Zendea eta Orkoien, Nafarroa, Espainia". 2024ko martxoaren 24koa da, eta 2024ko martxoaren 25ean bisatuta dago; beste alde batetik, proiektu hauen aldaketak: "62 MW-eko "Campos de Zuloaga" eguzki-instalazio fotovoltaikoa eraikitzeko administrazio-baimena. Zizur Zendea, Nafarroa, Espainia" eta "220/33 kV-eko "Campos de Zuloaga" azpiestazio jasotzailea eta 220 kV-eko lurpeko linea eraikitzeko administrazio-baimenerako proiektua, 220/33 kV-eko "Campos de Zuloaga TAE" azpiestazio jasotzailea eta "Zuloaga TAE-Orkoien azpiestazioa 220 kV-eko GTLLa" ebakuazio-linea. Zizur, Oltza Zendea eta Orkoien, Nafarroa, Espainia", 2024ko abuztukoak eta 2024ko irailaren 6an bisatuak, eta proiektuen aldaketa-­gehigarriak: "Proiektuaren aldaketa-gehigarria, Garraioen eta Mugikortasun Jasangarriaren Ministerioaren txostenari erantzuteko. 220/33 kV-eko "Campos de Zuloaga TAE" azpiestazio jasotzailea eta "Zuloaga TAE-Orkoien azpiestazioa 220 kV-eko GTLLa" ebakuazio-linea", 2024ko azarokoa, eta "Proiektuaren aldaketa-gehigarria, 62 MW-eko "Campos de Zuloaga" eguzki-instalazioaren proiektua eraikitzeko administrazio-baimenerako. Zizur Zendea, Nafarroa, Espainia", 2024ko azaroaren 27koa; azkenik, gehigarri berri hauek: "Proiektuaren aldaketa-gehigarria, 62 MW-eko "Campos de Zuloaga" eguzki-instalazioaren proiektua eraikitzeko administrazio-baimenerako. Zizur Zendea, Nafarroa, Espainia", eta "Proiektuaren aldaketa-gehigarria, Garraioen eta Mugikortasun Jasangarriaren Ministerioaren txostenei erantzuteko. 220/33 kV-eko "Campos de Zuloaga TAE" azpiestazio jasotzailea eta "Zuloaga TAE-Orkoien azpiestazioa 220 kV-eko GTLLa" ebakuazio-linea". Bi gehigarri horiek 2025eko urtarrilekoak dira eta 2025eko otsailaren 4an bisatuta daude. Ebazpen honetan jasotako berezitasunak bete beharko dira.

Proiektuaren xedea da instalazio fotovoltaiko bat eraikitzea, energia elektrikoa sortzeko eta energia hori sarera eramateko.

Hona hemen eguzki-instalazio fotovoltaikoaren ezaugarri nagusiak:

–Teknologia mota: Eguzki-energia fotovoltaikoa.

–Instalatutako potentzia, ekainaren 6ko 413/2014 Errege Dekretuaren 3. artikuluaren arabera: 50,10 MW.

–Moduluen neurria eta mota: aurpegi biko 79.144 modulu, JINKO fabrikatzailearenak, JKM640N-78HL4-BDV modelokoak edo antzekoak, 640 Wp-ko potentziakoak.

–Moduluen potentzia gailurra: 50,65 MW.

–Inbertsoreen neurria eta mota: 167 inbertsore, Huawei Solar fabrikatzailearenak, SUN2000-330KTL-H1 modelokoak, 300 kW-eko potentzia unitarioa dutenak.

–Inbertsoreen potentzia, guztira: 50,10 MW.

–Sarbiderako ahalmena, Red Eléctrica de España SAUk emandako sarbide eta konexio baimenetan ezarritakoaren arabera: 62 MW.

–Euskarri-mota: I-H ardatz bateko eguzki-jarraitzailea, Soltec 2Vx26 motakoa edo antzekoa.

–Transformazio-zentroak: guztira, 7; horietako batek 3.300 kVA-ko potentzia du (Jupiter 3000K-H1 modeloa), bik 6.000 kVA-ko potentzia (Jupiter 6000K-H1 modeloa) eta lauk (Jupiter 9000K-H1 modelokoak) 8.400 kVA-ko, 8.700 kVA-ko eta 9.000 kVA-ko potentzia dute.

–Ukitutako udal-mugartea: Zizur Zendea, Nafarroako probintzian.

Baimendutako ebakuazio-azpiegiturak honela daude osatuta:

–33 kV-eko lurpeko 3 lineak instalazioaren transformazio-zentroetatik atera eta 33/220 kV-eko "Campos de Zuloaga" TAE azpiestazio jasotzaileraino iristen dira (Zizur Zendea, Nafarroako probintzia). Hona hemen ezaugarri nagusiak:

  • Eroaleen sekzio nominala: 300 - 630 mm².
  • Eroale mota: RHZ1-OL 18/33 kV 1xZZ mm² edo antzekoa (ZZ = 300 mm² edo 630 mm², tartearen arabera).
  • Isolamendua: Sare-polietilenoa (XLPE).
  • Zirkuitu-kopurua: hiru simplex.
  • Ukitutako udal-mugartea: Zizur Zendea, Nafarroako probintzian.

–33/220 kV-eko "Campos de Zuloaga" TAE azpiestazio jasotzaileak (Zizur Zendea, Nafarroako probintzia) 70 MVA-ko transformadore 1 dauka. Hona hemen ezaugarri nagusiak:

  • 220 kV-eko parkea:
    • Instalazioa: aire zabalekoa.
    • Konfigurazioa: AIS mota.
    • Lineako kokagune bat eta transformadoreko kokagune bat dauzka.
  • 33 kV-eko parkea:
    • Instalazioa: kanpokoa eta barrukoa.
    • Konfigurazioa: barra bakuna.
    • Isolamendua: sufre hexafluoruroa (SF6).
    • Lineako 4 kokagune (erreserbako 1).

–220 kV-eko lurpeko ebakuazio-linea elektrikoa 33/220 kV-eko "Campos de Zuloaga" TAE azpiestazio jasotzailetik abiatu eta Zizur Zendean, Oltza Zendean eta Orkoiengo udal-mugarteetan barna igarotzen da, Nafarroako probintzian, Red Eléctrica España SAUren 220 kV-eko Orkoien azpiestazioraino. Hortik 500 metrora baino gutxiagora dagoen neurri fiskaleko esparruan ditu sarrera-irteerak. Hauexek dira linea horren ezaugarri nagusiak:

  • Sistema: korronte alterno trifasikoa.
  • Frekuentzia: 50 Hz.
  • Tentsioa: 220 kV.
  • Luzera: 9.867 m.
  • Eroale mota: RHZ1-RA + 2OL (AS) 127/220kV 1x630mm²Al + T375 Al.
  • Isolamendua: XLPE sare-polietilenoa.
  • Zirkuitu-kopurua: simplex zirkuitu bakun bat.
  • Ukitutako udal-mugarteak: Zizur Zendea, Oltza Zendea eta Orkoien.

–Neurketa esparrua Orkoiengo udal mugartean dago, Nafarroako probintzian, Red Eléctrica España SAUren jabetzako 220 kV-eko Orkoien azpiestaziotik 488 metrora. Bertara iristen da 220 kV-eko lurpeko linea, 33/220 kV-eko "Campos de Zuloaga" azpiestaziotik heldu dena, eta bertatik ateratzen da berriz, azpiestazio horrek transformatzen duen energia neurtzeko datuak bildu ondoren, garraio sarearekin konektatzeko punturaino joateko. 220 kV-eko neurketa kokaguneak elementu hauek ditu:

  • Linea babesteko hiruna (3) autobalbula-tximistorratza duten bi (2) multzo.
  • Linea-tentsiorako hiru (3) transformadoreko multzoa.
  • Hiru (3) intentsitate-transformadoreko multzo bat.
  • Zerbitzu osagarrietako transformadore bat (1).

Ebakuazio-azpiegituraren gainerakoa, garraio-sarearekin lotu artekoa, ebazpen honen irismenetik kanpo gelditzen da. Dagoeneko zerbitzuan den 220 kV-eko CONSO azpiestazioa da, Red Eléctrica de España SAUren jabetzakoa.

Sustatzaileak izapidetzean onartutako baldintzak bete beharko ditu, bai eta Ingurumen Kalitatearen eta Ebaluazioaren Zuzendaritza Nagusiaren ingurumen-inpaktuaren adierazpenean ezarritako baldintzak ere.

Era berean, bete beharko ditu Sistemaren Operadoreak ezartzen dituen arau teknikoak eta jarduteko prozedurak.

Baimen hau emateak ez du ezertan ukatzen aplikatu beharreko beste xedapen batzuen arabera beharrezkoak diren bestelako emakida eta baimenak lortzea, eta, bereziki, lurraldearen antolamenduari eta ingurumenari dagozkionak. Halaber, obra egiteko beharrezkoak diren gainerako baimen guztiak eskuratu beharko dira, abenduaren 26ko 24/2013 Legearen 53.6 artikuluan eta abenduaren 1eko 1955/2000 Errege Dekretuaren 120.2 artikuluan ezarritakoari jarraikiz.

Proiektuari aldaketak aurkezteko, abenduaren 1eko 1955/2000 Errege Dekretuaren 115. artikuluan ezarritakoa aplikatuko da.

Administrazio Publikoen Administrazio Prozedura Erkideari buruzko urriaren 1eko 39/2015 Legearen 121. eta 122. artikuluetan eta Sektore Publikoaren Araubide Juridikoari buruzko urriaren 1eko 40/2015 Legearen 62.2.i) artikuluan xedatutakoarekin bat, ebazpen honek ez du administrazio bidea amaitzen, eta haren kontra gora jotzeko errekurtsoa aurkezten ahalko da, Energiaren Estatuko idazkariari zuzendua, ebazpena jakinarazi edo argitaratu eta biharamunetik hasita hilabeteko epean (haietatik gertatzen azkena kontuan hartuta).

Epe hori iraganik errekurtsoa jarri gabe, ebazpena irmoa izanen da ondorio guztietarako. Epeak hilabeteka zenbatzeko, urriaren 1eko 39/2015 Legearen 30. artikuluan xedatutakoa bete beharko da.

2025eko martxoaren 5ean.–Zuzendari nagusia, Manuel García Hernández.

ERANSKINA

Eraikitzeko administrazio-baimena ematen da, abenduaren 1eko 1955/2000 Errege Dekretuan xedatutakoarekin bat eta baldintza berezi hauekin:

1.–Lanak egin beharko dira aurkeztu den proiektuarekin eta aplikatzekoak zaizkion erregelamenduzko xedapenekin bat, eskatu eta baimentzen diren aldaketak eginda, beharrezkoak badira.

2.–Abenduaren 1eko 1955/2000 Errege Dekretuaren 131.10 artikuluarekin bat, ustiapeneko baimena emateko epea izanen da ekainaren 23ko 23/2020 Errege Lege-dekretuaren 1. artikuluan ustiapeneko baimena lortzeko ezarritako epea proiektu honi aplikatzeak dakarrena. Errege lege-dekretu horren bidez ekonomia berpizteko energia arloko eta beste arlo batzuetako neurriak onesten dira.

Eraikitzeko administrazio-baimena lortu eta gehienez ere 3 hilabeteko epean, sustatzaileak epea luzatzeko eskatzen ahalko du, ekainaren 23ko 23/2020 Errege Lege-dekretuaren 1.1.b) Bosgarrena artikuluan jasotako xedea betetzeko, honako hauek adierazita, gutxienez: (i) instalazioak ustiapeneko administrazio-baimena lortuko duen urte naturalaren seihilekoa eta (ii) adierazitako seihilekoa hasi baino lehen honako hauek lortzeko ezintasuna espresuki onartzeko konpromisoa: behin-behineko edo behin betiko ustiapeneko administrazio-baimena eta energia elektrikoa ekoizteko instalazioen administrazio-erregistroko aurretiazko edo behin betiko inskripzioa.

Ukrainako eta Ekialde Hurbileko gatazken ondorio ekonomiko eta sozialei aurre egiteko eta lehortearen ondorioak arintzeko neurriak hartzen dituen abenduaren 27ko 8/2023 Errege Lege-dekretuaren 28. artikuluari jarraikiz, ustiapeneko administrazio-baimena izateko epea, guztira, ez da inoiz 8 urtetik gorakoa izanen.

3.–Instalazio horren titularrak lanen amaieraren berri eman beharko dio probintziako organo eskudunari, ustiapeneko baimena behin betiko onartu eta luzatzeko, abenduaren 1eko 1955/2000 Errege Dekretuaren 132. artikuluarekin bat.

4.–Sustatzaileak bete beharko ditu IIADan ezarritako baldintza guztiak, Trantsizio Ekologikorako eta Erronka Demografikorako Ministerioko Ingurumen Kalitatearen eta Ebaluazioaren Zuzendaritza Nagusiaren 2023ko apirilaren 20ko Ebazpen baten bidez emanikoan, nahitaezko txosten erabakigarria den aldetik eta, abenduaren 9ko 21/2013 Legearen 41. artikuluaren arabera, proiektua gauzatzeko eta ustiatzeko baldintzak ezartzen baititu, bereziki obretan:

–Instalazioaren amaierako konfigurazioak eta perimetro-hesiak lehendik dauden bideen erabilera publikoa errespetatu beharko dute. Bereziki, Paternain eta Eriete lotzen dituen bidean ez da inoiz pasabidea moztuko, ez aldi baterako ez betiko, aldez aurretik horretarako baimenik eman gabe organo eskudunak, besteak beste, Zizurko Udalak (IIAren 1.2.1.2 baldintza).

–Sastrakak kentzeko eta lurrak mugitzeko lanak hasi aurretik, prospekzio bat eginen da obra-fasean, berezko landaredia identifikatzeko eta balizatzeko. Lurzoruaren geruzak modu estentsiboan eta masiboan kentzea saihestuko da, eta behar-beharrezkoak eta justifikatuak diren kasuetara mugatuko dira (zangak irekitzea, zimenduak jartzea, azalera txikietan nibelazioak egitea, etab.). Kendu beharreko landare-lurra behar bezala kontserbatuko da, ondoren leheneratze-lanetan erabiltzeko (IIAren 1.2.2 baldintza).

–Leheneratze-planak Nafarroako Gobernuko Ingurumen Zuzendaritza Nagusiaren baimena eta oniritzia izan beharko ditu. Planean proiektu tekniko bat egonen da, berezko landaredia hobetzeko konpentsazio-neurriak jasoko dituena, sustatzaileak proposatuak, bai eta zuzendaritza nagusi horrek 2021eko abenduaren 9ko eta 2023ko martxoaren 29ko txostenetan adierazitako alderdiak ere; horien artean nabarmentzekoak dira eguzki-parkearen ustiapen-aldian epe labur eta ertainean ezarri beharreko neurriak (lurren tratamendua, hidroereintzak, ereintzak, landaketak bideetan, perimetroetan edo hondar-eremuetan...), batetik, eta, bestetik, instalazioa eraitsi ondoren epe luzera egin beharrekoak (laboreak berreskuratzea eta instalazioak kentzea), eta, azkenik, ebazpen honetako 1.2.6.4 eta 1.2.7.11 baldintzetan 8. zeharbideari eta Ibero errekari dagokienez adierazitakoa (IIAren 1.2.2.4 baldintza).

–Obrak hasi aurretik, langile espezializatuek faunaren prospekzio bat eginen dute, azterketa-eremuan egon daitezkeen habiak identifikatzeko, bereziki miru gorriarenak. Habiak egiteko babesleku edo substratu gisa erabil daitezkeen espezieen ugaltze-aldian, ez da sastrakak kentzeko hasierako lanik eginen. Miru gorriaren hazkuntza-aldia martxoaren 1etik ekainaren 30era bitartekoa izanen da. Aldi horretan, eraikuntza- eta eraispen-faseetan, ez da eragiketarik eginen berezko landaredia duten eremuen ingurunean; hala ere, kronograma horren azken diseinua biodibertsitatearen arloko eskumena duen organoarekin koordinatu beharko da, eta organo horrek baimentzen ahalko du geldialdi biologiko hori aldatzea, berak hala iritzita. Debekatuta dago edozein motatako obrak gauez egitea. Obrak egiten ari direla detektatzen bada miru gorriaren edo beste edozein espezie mehatxaturen habia aktiboak daudela, berehala jakinaraziko zaio egoera Nafarroako Gobernuko Ingurumen Zuzendaritza Nagusiari. Detektatutako habiekiko babes-distantzia zuzendaritza nagusi horrekin koordinatuta ezarriko da, bai eta jarduketak gelditu edo murrizteko aldia ere (IIAren 1.2.3.1 baldintza).

–Ibai ibilguen gurutzaketetarako irtenbide teknikoak, batez ere Arga eta Idiazabal ibaienak, Ebroko Konfederazio Hidrografikoarekin eta Nafarroako Gobernuko biodibertsitatearen eta ingurumenaren arloko organo eskudunekin koordinatuta egin beharko dira, eta horien aldeko txostena izan beharko dute eraikuntza baimendu aurretik. Jabari publiko hidraulikoko (JPH) gurutzaketek eta obrek arroko erakundearen nahitaezko baimena lortu beharko dute obrak hasi aurretik (IIAren 1.2.5.1 baldintza).

–Ibilguak lurpetik gurutzatzeko behar diren obrak ur gutxiko garaian egin beharko dira, eraikuntza-metodologia egokia erabiliz ibilguak desbideratzea eta edozein dimentsio espazialetan aldatzea saihesteko. Ebroko Konfederazio Hidrografikoaren baimenak besterik xedatzen ez badu, gurutzaketak zulaketa horizontal gidatuaren edo antzeko metodologia baten bidez eginen dira. Zulaketa horren muturrak eta beharrezkoak diren lan-eremuak jabari publiko hidraulikotik kanpo kokatuko dira, ibai-ohantzeari eta ibaiertzeko landarediaren habitatei ahalik eta gutxien eraginez (IIAren 1.2.5.2 baldintza).

–Lurrera edo ur-ibilguetara olioak, erregaiak, lubrifikatzaileak edo antzeko beste substantzia batzuk isuriko ez direla ziurtatzeko neurri egokiak hartu beharko dira. Hori alde batera utzi gabe, jarduera-protokolo espezifiko bat eginen da horrelako gorabeherak gerta daitezkeela aurreikusteko. Protokolo hori obra-kontratista guztiei jakinaraziko zaie, isurketa gertatzen bada beharrezkoak diren euste- eta konpontze-neurriak ezar ditzan (IIAren 1.2.5.5 baldintza).

–Jabari publiko hidraulikoko elementuren batean isurketarik gertatuz gero, aldez aurretik Ebroko Konfederazio Hidrografikoaren isurketa-baimena izan beharko da. Hondakin-ur sanitarioei dagokienez, biltegi estanko bat egonen da, kanpoko irteerarik gabekoa, hondakin-urak biltegiratzeko, ondoren kudeatzaile baimendu batek trata ditzan (IIAren 1.2.5.6 baldintza).

–Azaleko urak edo lurpekoak hartu behar badira, aldez aurretik Ebroko Konfederazio Hidrografikoaren administrazio-baimena edo -emakida lortu beharko da. Panelak garbitzeko eta mantentzeko, ura baino ez da erabiliko, beste produktu kimikorik gabe (IIAren 1.2.5.7 baldintza).

–Uztailaren 20ko 1/2001 Legegintzako Errege-dekretuaren bidez onartutako Uren Legearen testu bateginak eta Jabari Publiko Hidraulikoaren Erregelamenduak jabari publiko hidraulikoan obrak edo instalazioak egiteko baldintza gisa ezartzen dute aldez aurretik administrazio-emakida edo -baimena lortu behar dela, interesdunak arroko erakundeari eskatuta. Beraz, obrak hasi aurretik, sustatzaileak Ebroko Konfederazio Hidrografikoaren baimena lortu beharko du. Zehazki, obrak egin bitartean eta/edo instalazioen bizitza baliagarrian zehar sortzen den eta jabari publiko hidraulikoari eragin diezaiokeen aurreikusi gabeko jarduketa oro Ebroko Konfederazio Hidrografikoari jakinaraziko zaio ahalik eta lasterren, hartu beharreko neurriak zehazteko (IIAren 1.2.5.10 baldintza).

–Nafarroako Gobernuko Ingurumen Eraginaren Atalak baliozkotu beharko du ingurumena leheneratzeko eta paisaian integratzeko proiektu tekniko xehatua, aurrekontuan jasotakoa, proposatutako konpentsazio neurriak barne: "8. zeharbidea" ereitea eta Iberoko erreten-erreka leheneratzea. Inguruko landaredi serieko espezie autoktonoak erabiliko dira landareztatzeko. Zurezko eta basogintzako landareen haziak ingurukoak izanen dira, Ekoizpeneko Baso Materiala Identifikatzeko eta Erabiltzeko Eskualdeetako arauen arabera. Obrak amaitu eta 6 hilabete igaro baino lehen amaitu beharko dira landareztatze lanak. Landaketak landaketa garaiaren, klima baldintzen eta abarren mende daudenez, obrak amaitu eta hurrengo landaketa garaian eginen dira. Landaketen jarraipena egin beharko da, eta bideragarriak direla ziurtatu, eguzki-instalazioaren bizitza baliagarri guztian (IIAren 1.2.6.4 baldintza).

–Obrak hasi aurretik, jarraipen arkeologikorako plan bat prestatuko da. Obraren kontrol arkeologikoan ondare arkeologikoko ondasunak detektatzen badira eta obrak ondasun horiek alda baditzake, lur-mugimenduak geldiaraziko dira eta ebidentzia arkeologikoa dokumentatuko da metodologia egokiaren bidez (indusketa arkeologikoa). Horretarako, beharrezkoa izanen da dagokion jarduketa-proposamena aurkeztea, Nafarroako Gobernuko Vianako Printzea Erakundea-Kultura Zuzendaritza Nagusiak baimena eman diezaion, zeinak, era berean, aipatutako jarraipen plana baimendu beharko baitu (IIAren 1.2.7.3 baldintza).

–Obrak gauzatzeko fasean, ukitutako altxonbideetan (8. zeharbidea) ez da pasabidea mozten ahalko; bestela, abereentzako iraganbide alternatiboa prestatu beharko da (IIAren 1.2.7.5 baldintza).

5.–Ingurumenaren Kalitatearen eta Ebaluazioaren Zuzendaritza Nagusiaren ingurumen-inpaktuaren adierazpenak, halaber, baldintza espezifiko batzuk ezartzen ditu, ustiapen baimena lortu aurretik bete beharrekoak, eta baldintza horiek betetzen direla jakinarazi beharko zaio probintziako organo eskudunari, eskatzaileak zehaztutako eta aurrekontuan sartutako neurriak proiektu batean edo haren eranskin batean aurkeztu ondoren.

6.–Eraikitzeko administrazio-baimenak ez du inola ere instalazioaren titularra salbuesten instalazioek behar dituzten gainerako baimen osagarriak lortzetik; besteak beste, lortu beharko ditu industria segurtasunaren arloko legeriak, sistema laguntzaileei dagokienez, horiek instalatu edo abian jarri aurretik, eskatzen dituen baimenak, autonomia-erkidegoen eskumenekoak, edo, bestela, kontrolerako beste formalitate guztiak bete beharko ditu.

7.–Administrazioak ondoriorik gabe utziko du ebazpen hau baldin eta ikusten bada, denboraren joanean, ebazpenean ezartzen diren eskubideen titularrak ez dituela betetzen bertan ezarritako baldintzak. Halakoetan, Administrazioak, interesdunari entzunaldia eman eta behar den espedientea bideratu ondoren, kasuko baimena errebokatzea erabakiko du, horrek dakartzan ondorio administratibo eta zibil guztiekin, indarra duten lege xedapenekin eta abenduaren 26ko 24/2013 Legearen 53.10 artikuluan ezarritakoarekin bat.

8.–Instalazioaren titularrak kontuan hartuko ditu, hura egiteko, erakundeek ezarri dituzten baldintzak, zeinak jakinarazi zaizkion eta berak berariaz onartu dituen.

Iragarkiaren kodea: E2503714