Iragarkia

48. ALDIZKARIA - 2025eko martxoaren 11

1. NAFARROAKO FORU KOMUNITATEA

1.7. BESTELAKOAK

9/2025 EBAZPENA, otsailaren 14koa, Energia, Enpresa I+G+b eta Ekintzailetzako zuzendari nagusiak emana, zeinaren bidez industria segurtasunaren arloko lanbide gaikuntza eta txartel profesionalak lortzeko proben 2025eko ezohiko deialdia onesten baita: dorre-garabiko operadorearen txartela.

Maiatzaren 7ko 560/2010 Errege Dekretuak eta martxoaren 5eko 249/2010 Errege Dekretuak industria segurtasunaren arloko erregelamenduzko zenbait arau eta energiaren eta meategien gaineko zenbait xedapen aldatu zituzten, arau-xedapen horiek egokitzeko, batetik, azaroaren 23ko 17/2009 Legera (zerbitzu jardueretan libreki sartu eta horietan aritzeari buruzkoa), eta bestetik, abenduaren 22ko 25/2009 Legera (zenbait lege aldatzen dituena zerbitzu jardueretan libreki sartu eta horietan aritzeari buruzko Legera egokitzeko asmoz).

Apirilaren 21eko 298/2021 Errege Dekretuak industria segurtasunaren arloko Espainiako araudia eguneratzen du, eta dauden erregelamenduak harmonizatzen ditu enpresa instalatzaileen lan eta giza bitartekoei dagokienez. Era berean, jarduera betetzeko irizpideak bateratzen ditu, eta arautzen du zer egoeratan den beharrezkoa autonomia erkidegoko organo eskudunaren aurrean azterketa bat gainditzea, profesionalak instalatzaile, konpontzaile edo operadore gisa aritu ahal daitezen eta/edo dagokion txartel profesionala lor dezaten.

Bestalde, industria segurtasunaren arloko profesionalak Nafarroako Foru Komunitatean egiaztatzeko prozedura arautzen duen ekainaren 30eko 291/2011 Foru Aginduaren bosgarren artikuluan ezarrita dago azterketak egiteko eta gaikuntza lortzeko prozedura.

Energia, Enpresa I+G+b eta Ekintzailetzako zuzendari nagusiaren abenduaren 19ko 171/2024 ebazpenaren bidez, industria segurtasunaren arloko lanbide gaikuntza eta txartel profesionalak lortzeko proben 2025eko deialdia onetsi zen.

Ebazpen honetan, galdaren operadore industrialaren azterketan (2025eko otsailean) eta eraikinetako instalazio termikoen instalatzailearen eta dorre-garabiko operadorearen, produktu petrolifero likidoen konpontzailearen edo instalatzailearen, gas instalatzailearen eta galdaren operadore industrialaren azterketan (2025eko irailean) izena emateko lehen epea aurreikusten da.

Industria Antolamenduaren, Azpiegitura Energetikoen eta Meatzeen Zerbitzuak beharrezkotzat jo du dorre-garabiko operadorearen txartela lortzeko gaitasun azterketak egiteko beste proba bat deitzea. Horrenbestez, ezohiko deialdia onartzea proposatzen da, 2025eko apirilean ezarrita izena emateko epea.

Adierazitakoarekin bat, eta Nafarroako Foru Komunitateko Administrazioari eta foru sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, honako hau

EBAZTEN DUT:

1. 2025. urterako dorre-garabiko operadorearen txartel profesionala eta lanbide gaitasuna lortzeko proben ezohiko deialdia onartzea: dorre-garabiko operadorearen txartela.

2. Deialdi hori arautuko duten oinarriak eta betebeharrak, ebazpen honen eranskinetan ageri direnak, onestea.

3. Ebazpen honen aurka gora jotzeko errekurtsoa jartzen ahal da, Industriako eta Enpresen Trantsizio Ekologiko eta Digitalerako kontseilariari zuzendua, Nafarroako Aldizkari Ofizialean argitaratu eta biharamunetik hilabeteko epean.

4. Ebazpen hau eta eranskinak Nafarroako Aldizkari Ofizialean argitaratzea.

Iruñean, 2025eko otsailaren 14an.–Energia, Enpresa I+G+B eta Ekintzailetzako zuzendari nagusia, Garbiñe Basterra Oloriz.

I. ERANSKINA.–OINARRIAK

Lehena.–Xedea.

Ebazpen honen xedea proben deialdia egitea da dorre-garabiko operadorearen txartela lortzeko gaitasun azterketak egiteko.

Bigarrena.–Izena ematea.

1. Izena eman nahi dutenek inskripzio eskabide bat aurkeztu beharko dute ezarritako epean, ebazpen honen II. eranskineko ereduaren araberakoa.

Honela ematen ahalko da izena:

–Aurrez aurre: Nafarroako Gobernuko erregistro bulegoetan, edo Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.4 artikuluan ezarritako lekuetan. Eskubide hori erabiliz, espedientea posta bidez igortzen bada, gutun-azal irekian aurkeztuko da, postetxeko funtzionarioak data eta zigilua jar ditzan gutuna ziurtatu baino lehen.

–Telematikoki: www.nafarroa.eus web-orritik (bilatzailea: "industria segurtasuneko 2025eko azterketak").

Azterketa egiteko inskripzio bakoitzeko, dagokion tasa ordaindu beharko da azterketa eskubideengatik; tasa ordaindu izanaren frogagiria aurkeztu beharko da inskripzio eskabidearekin batera. Ordaindu ezean, izangaia baztertuko da.

Tasa ordaindu izanaren frogagiria aurkezteak ez du inola ere aldatuko inskripzio eskabidea behar den epean eta moduan aurkeztu beharra.

Tasa itzultzea, interesdunak eskaturik, bidezko izanen da, bakar-bakarrik, bitan ordaindu bada.

2. Izena emateko epea irekiko da 2025eko apirilaren 1etik 15era, biak barne. Epe horretan, eskaria eta ordainagiria aurkeztu beharko dira.

Hirugarrena.–Izangaien onarpena eta erreklamazioak.

Eskabideak aurkezteko epea bukatuta, eta 10 egun balioduneko gutxieneko epean, www.nafarroa.eus webgunean (bilatzailea: "industria segurtasuneko 2025eko azterketak") izangai onartu eta baztertuen behin-behineko zerrenda argitaratuko da.

Bazterturik gelditu direnek bost egun balioduneko epea izanen dute, behin-behineko zerrendak argitaratzen direnetik, erreklamazioak aurkezteko eta, akatsik egin badute, horiek zuzentzeko.

Erreklamazioak ebatzi ondoren, onartutakoen eta baztertutakoen behin betiko zerrenda argitaratuko da, azterketak egiteko datarekin, ordutegiarekin eta lekuarekin batera. Azterketak maiatzean eta azaroan egitea aurreikusten da.

Izangaiak onartuen behin betiko zerrendetan egoteak ez dakar inola ere Administrazioak aitortzea deialdiaren oinarrietan eta kasuan kasuko erregelamenduetan eskatzen diren baldintzak betetzen dituztela.

Laugarrena.–Kalifikazio epaimahaia.

Kalifikazio epaimahaia honako kide hauek osatuko dute:

–Epaimahaiko burua: Javier Amezaga Ruiz jauna, Enpresen Erregistroaren eta Industria Segurtasunaren Ataleko burua.

Ordezkoa: Laura Larraya Irigoyen andrea, Industria Antolamenduaren, Azpiegitura Energetikoen eta Meatzeen Zerbitzuko zuzendaria.

–Epaimahaikidea: Yolanda Tofiño Alba andrea, Enpresen Bulegoko burua.

Ordezkoa: Nerea Mateo Moriones andrea, Enpresen Erregistroaren eta Industria Segurtasunaren Ataleko administraria.

–Idazkaria: Ana Sainz Jiménez andrea, Industriaren, Energiaren eta Meatzeen Araubide Juridikoaren Ataleko burua.

Ordezkoa: Isabel Akerreta Larraz andrea, Laguntza Juridikoaren Ataleko burua.

Epaimahaiko buruak deialdia egin ondoren, epaimahaia eratuko da baldin eta kideen gehiengo soila bertaratzen bada, titularrak nahiz ordezkoak izan. Bilkura horretan, epaimahaiak behar diren erabakiak hartuko ditu probak behar bezala gara daitezen.

Bosgarrena.–Proben garapena eta edukia.

1. Azterketa teorikoa:

Azterketetan inskribatu direnek Nortasun Agiri Nazionala, pasaportea edo legez onartua den beste edozein dokumentu, identitatea behar adina frogatzen duena, eraman beharko dute probak egiterakoan.

Azterketak test moduko 40 galdera izanen ditu, ebazpen honen III. eranskinean ezarritako edukiei buruzkoak. Galderetako bakoitzak hiru erantzun alternatibo izanen ditu, eta erantzun zuzenak puntu batekin baloratuko dira, eta okerrak, erantzun gabeak edo erantzun bat baino gehiago dauzkatenak, berriz, ez dira puntuatuko, ez positiboki ez negatiboki.

Azterketa gainditzeko 32 puntu lortu behar dira gutxienez.

Proba hori egiteko, ordubete izanen da.

Proba egiteko ez da inolako kalkulagailurik erabiltzen ahalko, ez eta telefono mugikorrik edo bestelako materialik ere, soil-soilik punta lodiko bolaluma urdina edo beltza.

Azterketatik bazterturik geldituko dira adierazten diren egun, ordu eta tokietan agertzen ez diren izangaiak, arrazoia edozein dela ere, edo identitatea behar bezala frogatzen ez dutenak.

Azterketak epaimahaiak ezartzen dituen moduan eta tokian eginen dira, eta www.nafarroa.eus webgunean (bilatzailea: "industria segurtasuneko 2025eko azterketak") iragarriko da.

Seigarrena.–Gainditu duten izangaien zerrenda eta erreklamazioak.

Ariketen kalifikazioa bukatuta, gai eta ez-gai direnen eta aurkeztu ez direnen behin-behineko emaitzak argitaratuko dira www.nafarroa.eus webgunean (bilatzailea: "industria segurtasuneko 2025eko azterketak").

Behin-behineko emaitzak argitaratu ondoren, 5 egun balioduneko epea emanen da erreklamazioak aurkezteko. Erreklamazioak ebatzi ondoren, Energia, Enpresa I+G+b eta Ekintzailetzako zuzendari nagusiaren ebazpena eman eta argitaratuko da behin betiko zerrenda onesteko. Ebazpen horren aurka gora jotzeko errekurtsoa jartzen ahalko da, Industriako eta Enpresen Trantsizio Ekologiko eta Digitalerako kontseilariari zuzendua, argitaratu eta biharamunetik hilabeteko epean.

II. ERANSKINA.–ESKABIDEA, INDUSTRIA SEGURTASUNAREN ARLOKO PROFESIONALAREN TXARTELA EDO GAIKUNTZA LORTZEKO AZTERKETAN ONARTUA IZATEKO

Sinatzaileak ESKATZEN du onar dezatela eskabide honetan adierazitako prozesuan, eta ADIERAZTEN du, erantzukizuna berea izanik, bertan agertzen diren datu guztiak egiazkoak direla eta deialdiaren oinarrian eskatutako betebehar guztiak betetzen dituela proba egiteko unean.

Iruñean, 2025eko apirilaren .................. (e)(a)n

Eskatzailearen sinadura

Oharra: dorre-garabiko eta instalazio termikoetako probak gainditzen dituztenek txartela egiteko eskatu beharko dute; horretarako, frogatu beharko dute dagokion araudian ezarritako baldintzak betetzen dituztela.

Zuk emandako datu pertsonalak fitxategi automatizatu batean sartuko dira; fitxategi horren helburua da industria-segurtasunaren arloko gaikuntzak artxibatu eta kudeatzea. Zure datuak kontsulta publikoen emaitzetan ager daitezke.

Eskaera honekin batera emandako datuen tratamendua Datu Pertsonalak Babesteari eta Eskubide Digitalak Bermatzeari buruzko abenduaren 5eko 3/2018 Lege Organikoan eta aplika litezkeen gainerako arauetan xedatutakoari lotuko zaio. Datuak ikusi eta haiek zuzendu eta ezerezteko eskubideak Trantsizio Energetikoaren eta S4 Proiektu Estrategikoen Zuzendaritza Nagusian erabiliko dira, aipatutako legeriari jarraikiz. Datu pertsonalen babesari buruzko informazio osagarria, Europako Parlamentuaren eta Kontseiluaren 2016/679 Erregelamenduaren (EB) 13. artikuluarekin bat etorriz.

III. ERANSKINA.–GAI ZERRENDA

Azterketa: dorre-garabiko operadorea.

Beharrezkoak diren gutxieneko ezagutzak adierazita daude ekainaren 27ko 836/2003 Errege Dekretuaren VI. eranskineko 4.1 puntuan. Errege dekretu horren bidez Jasotzeko gailuen eta haien mantentze-lanetarako Erregelamenduaren jarraibide tekniko osagarri berri bat onesten da, "IEM-JGM-2", obretarako eta bestelako aplikazioetarako dorre-garabiei buruzkoa.

OHARRA: gai guztiak ebazpen hau Nafarroako Aldizkari Ofizialean argitaratzen den egunean indarra duen legeriaren arabera eskatuko dira.

Iragarkiaren kodea: F2502537