45. ALDIZKARIA - 2025eko martxoaren 6a

1. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Oposizioak eta lehiaketak. Lan publikoaren eskaintza

489/2025 EBAZPENA, otsailaren 17koa, Funtzio Publikoko zuzendari nagusiak emana, hezkuntza laguntzako espezialistaren lanpostuan, prestakuntzarako zerbitzu berezietan, aritzeko izangaien bi zerrenda hautaproben bidez osatzeko deialdia onesten duena.

Nafarroako Foru Komunitateko Administrazioaren eta haren erakunde autonomoen zerbitzuko langileen arloko neurriak onartzen dituen irailaren 16ko 10/2020 Foru Lege Dekretuaren 2. artikuluak, Nafarroako 2021erako Aurrekontu Orokorrei buruzko abenduaren 29ko 20/2020 Foru Legearen seigarren xedapen gehigarriak aldatuak, hezkuntza laguntzako espezialista lanpostua sortzen du, C mailakoa/taldekoa, eta, lanpostu horretara iristeko, Gizarteratzeko goi mailako teknikariaren berariazko titulazioa izatea eskatzen du, edo, bestela, Batxilergoko titulua edo baliokidea, hezkuntza premia bereziak dituzten ikasleen arretarako ziurtagiri profesionalarekin.

Artikulu horren 4. apartatuaren arabera, aurreko paragrafoan adierazitakoa gorabehera, bost urteko aldi iragankorra ezartzen da, aipatutako foru lege dekretuak indarra hartzen duenetik aurrera, aipatutako berariazko titulua eskatzeko, hezkuntza laguntzako espezialista lanpostuak aldi baterako betetzen direnean. Aldi horretan, C mailako/taldeko lanpostuak betetzeko eskatzen den titulu orokorra duten izangaiek betetzen ahalko dituzte lanpostu horiek aldi baterako.

Bestalde, arau horren beraren hirugarren xedapen iragankorraren 3. apartatuak ezartzen duenez, Hezkuntza Departamentuko zaintzaile lanpostua betetzeko 10/2020 Foru Lege Dekretua indarrean sartzean indarrean dauden aldi baterako kontrataziorako izangaien zerrendek, bai eta lehen aipatutako 2. artikuluan aurreikusitako aldi iragankorrean titulazio orokorra eskatzen dutenek ere, indarrean jarraituko dute aipatutako aldi iragankorra bukatu arte.

Azkenik, 2025erako Nafarroako Aurrekontu Orokorrei buruzko Foru Legearen 32. artikuluak, "hezkuntza laguntzako espezialistak aldi baterako hornitzeari" buruzkoak, ezartzen du irailaren 16ko 10/2020 Foru Lege Dekretuak, Nafarroako Foru Komunitateko Administrazioaren eta haren erakunde autonomoen zerbitzuko langileen arloko neurriak onartzen dituenak, 2.4. artikuluan aipatzen duen aldi baterako epea 2026ko abenduaren 31ra arte igarotakoan, hezkuntza laguntzako espezialistaren lanpostua aldi baterako betetzeko aukera izanen dutela C mailako/taldeko lanpostuak lortzeko eskatzen den titulazio orokorra duten izangaiek. Nolanahi ere, lehentasuna izanen dute Gizarteratzeko goi mailako teknikariaren titulua duten izangaiek edo, bestela, Batxilergoko titulua edo baliokidea eta hezkuntza premia bereziak dituzten ikasleen arretarako ziurtagiri profesionala dituztenek.

Ikusirik Nafarroako Foru Komunitateko Administrazioan dauden langile beharrak, eta kontuan izanik irailaren 16ko 10/2020 Foru Lege Dekretuan aurreikusitako aldi baterako epea eta arau horren hirugarren xedapen iragankorrak aipatzen dituen hezkuntza laguntzako espezialistak aldi baterako kontratatzeko zerrenden indarraldia 2025eko irailaren 22an bukatzen dela, bidezko da deialdi bat egitea, hautaproben bidez, hezkuntza laguntzako espezialisten lanpostuan prestakuntzarako zerbitzu berezietan aritzeko izangaien bi zerrenda eratzeko, Nafarroako Foru Komunitateko Administrazioaren eta haren erakunde autonomoetan sortzen diren beharrak betetzeko. Zerrenda horietako lehena osatuko dute hezkuntza laguntzako espezialistaren lanpostuan sartzeko eskatzen den titulazio espezifikoa egiaztatzen duten izangaiek, eta bigarrena, berriz, C mailako/taldeko lanpostuetara sartzeko eskatzen den titulazio orokorra egiaztatzen dutenek. Horrela, aipatutako aldi iragankorra bukatu ondoren, Nafarroako 2025erako Aurrekontu Orokorrei buruzko Foru Legean ezarritako lehentasuna bermatuko zaie Gizarteratzeko goi mailako teknikariaren titulazioa duten izangaiei edo, bestela, Batxilergoko titulua edo baliokidea eta hezkuntza premia bereziak dituzten ikasleen arretarako ziurtagiri profesionala dituztela egiaztatzen dutenei, bai prestakuntzarako zerbitzu berezietan aritzeko zerrendan, bai aldi baterako kontratazioetarako zerrendan.

Apirilaren 14ko 96/1997 Foru Dekretuan ezarritakoaren arabera, aldi baterako kontrataziora jo aurretik, Nafarroako Foru Komunitateko Administrazioak eta haren erakunde autonomoek bertako langile finkoei eskainiko dizkiete bete nahi dituzten lanpostuak, eta, horretarako, behar diren hautaprobetarako deia eginen dute, lanpostu horietan prestakuntza jaso nahi duten izangaien zerrendak egiteko.

Deialdia honako arau hauen babesean onetsi da: Nafarroako 2025erako Aurrekontu Orokorrei buruzko Foru Legearen 32. artikulua; apirilaren 14ko 96/1997 Foru Dekretua, Nafarroako Administrazio Publikoen Zerbitzuko Langileen Estatutuaren 24.2 artikulua zati batean garatuz, Nafarroako Foru Komunitateko Administrazioaren zerbitzura dauden langileei prestakuntza eta lanbide hobekuntza ematen diena; eta Lehendakaritza, Justizia eta Barneko kontseilariaren abenduaren 30eko 199/2004 Foru Agindua, prestakuntzarako zerbitzu berezietako lanpostuetan aritzeko izangaien zerrendak osatu eta kudeatzeko prozedura ezarri zuena.

Horrenbestez, eta otsailaren 21eko 30/2005 Foru Dekretuaren bidez esleiturik ditudan eskudantziak erabiliz,

EBAZTEN DUT:

1. Hezkuntza laguntzako espezialistaren lanpostuan, prestakuntzarako zerbitzu berezietan, aritzeko izangaien bi zerrenda hautaproben bitartez osatzeko deialdia onestea, Nafarroako Foru Komunitateko Administrazioan eta haren erakunde autonomoetan sortzen diren beharrei erantzuteko, Osasun Departamentuaren menpeko erakundeetan salbu.

2 Ebazpen hau eta eranskina Nafarroako Aldizkari Ofizialean argitara daitezela agintzea.

3. Ebazpen honen eta eranskinaren berri ematea Egiturako, Plantillako eta Langileen Aldi Baterako Kontratazioetako Zerbitzuari, Jendearentzako Argibideen eta Erregistro Orokorraren Bulegoari, Hezkuntza Departamentuko Langileriaren eta Azpiegituren Zuzendaritza Nagusiari, eta epaimahaiko kideei, behar diren ondorioak izan ditzan.

Iruñean, 2025eko otsailaren 17an.–Funtzio Publikoko zuzendari nagusia, Rashid Mohamed Vázquez.

I. ERANSKINA.–DEIALDIA, HEZKUNTZA LAGUNTZAKO ESPEZIALISTAREN LANPOSTUAN PRESTAKUNTZARAKO ZERBITZU BEREZIETAN ARITZEKO IZANGAIEN BI ZERRENDA OSATZEKO

Hona hemen deialdiaren:

OINARRIAK

Lehenbizikoa.

Deialdia egiten da hezkuntza laguntzako espezialistaren lanpostuan, prestakuntzarako zerbitzu berezietan, aritzeko izangaien bi zerrenda hautaproben bidez osatzeko. Zerrenda hori Nafarroako Foru Komunitateko Administrazioan eta haren erakunde autonomoetan sortzen diren beharrak aldi baterako betetzeko erabiliko da, Osasun Departamentuaren menpeko erakundeetan izan ezik.

Lehenengo zerrenda Gizarteratzeko goi mailako teknikariaren titulazioa duten langileek osatuko dute, edo, bestela, Batxilergoko titulua edo baliokidea eta hezkuntza premia bereziak dituzten ikasleen arretarako ziurtagiri profesionala dituztenek, eta, bigarrena, C mailako/taldeko lanpostuetara sartzeko eskatzen den titulazio orokorra dutela egiaztatzen dutenek.

Nolanahi ere, hezkuntza laguntzako espezialistaren lanpostua aldi baterako betetzeko lehentasuna izanen dute Gizarteratzeko goi mailako teknikariaren titulazioa duten izangaiek, edo, bestela, Batxilergoko titulua edo baliokidea eta hezkuntza premia bereziak dituzten ikasleen arretarako ziurtagiri profesionala dituzten izangaiek, bai prestakuntzarako zerbitzu berezietako zerrendakoek, bai aldi baterako kontratazioetarako zerrendakoek.

Bigarrena.–Parte-hartzaileen betebeharrak.

2.1. Deialdi honetan parte hartu nahi duten izangaiek betebehar hauek bete beharko dituzte eskabideak aurkezteko epea bukatzen denean:

A. Baldintza orokorrak:

a) Nafarroako Foru Komunitateko Administrazioaren eta haren erakunde autonomoen zerbitzuko langile finkoa izatea, D mailakoa edo taldekoa, eta eskubidez dagokion gehieneko prestakuntzaldia agorturik ez izatea.

b) Bere lanpostuan gutxienez hiru urteko zerbitzualdia benetan egin izana.

c) Ez egotea borondatezko edo nahitaezko eszedentzian.

d) Hezkuntza laguntzako espezialista gisa zerbitzu berezietan prestakuntza jasotzeko zerrenda batean ez egotea.

e) Sexu Delitugileen eta Gizakien Salerosketaren Erregistro Zentralaren ziurtagiri negatiboa edukitzea, Haurrak eta nerabeak indarkeriaren aurrean osorik babesteari buruzko ekainaren 4ko 8/2021 Lege Organikoaren 57. artikuluaren arabera.

f) Behar den gaitasun fisiko eta psikikoa izatea bete behar diren eginkizunetan aritzeko.

B. Titulazio baldintzak:

a) Lehenengo zerrenda lehentasunezkoa izanen da, eta bertan parte hartu nahi dutenek Gizarteratzeko goi mailako teknikariaren titulua dutela egiaztatu beharko dute, edo, bestela, Batxilergoko titulua edo baliokidea eta hezkuntza premiak dituzten ikasleei arreta emateko ziurtagiri profesionala dituztela, edota titulua eskuratzeko eskubideak ordaindu izanaren frogagiria edo, bestela, eskabideak aurkezteko epea bukatu baino lehen titulua lortzeko moduan egon izanaren gaineko ziurtagiria.

b) Bigarren zerrenda subsidiarioan parte hartzeko, parte-hartzaileek Batxilergoko titulua edo titulu baliokide aitortua dutela egiaztatu beharko dute, edota titulua eskuratzeko eskubideak ordaindu izanaren frogagiria edo, bestela, eskabideak aurkezteko epea bukatu baino lehen titulua lortzeko moduan egon izanaren gaineko ziurtagiria.

Titulazio horiek ezin dira izan langile finkoari jarduneko zerbitzuan aritzeko balio diotenak.

Titulazioak atzerrian lortuak badira, baliozkoturik edo homologaturik daudela frogatzen duten frogagiriak eduki beharko dira.

2.2. Aurreko apartatuan jasotako baldintza guztiak eskabideak aurkezteko epea bukatzen den egunean bete beharko dira, baita hautapen prozedura osoan, izendapenaren unean eta prestakuntzak iraun bitartean ere.

2.3. Deialdi honetan ezin dute parte hartu Hezkuntza Departamentuko irakasleek, Osasun Departamentuko erakunde autonomoei atxikitako langileek, Nafarroan Justizia Administrazioan ari diren langileek, ez eta Nafarroako Administrazio Publikoetako Langileen Estatutuaren aplikazio eremutik kanpo dauden langileek ere.

Hirugarrena.–Eskabideak eta agiriak.

3.1. Eskabideak aurkezteko epea.

Deialdian parte hartzeko eskabideak hamar egun balioduneko epean aurkeztu beharko dira, deialdia Nafarroako Aldizkari Ofizialean argitaratu eta biharamunetik hasita. Eskabideak aurkezteko epea luzaezina da.

3.2. Eskabidea aurkeztea eta formalizatzea.

Hautapen prozesu honetan parte hartu nahi dutenek telematikoki aurkeztu beharko dute eskabidea, Internet bitartez, https://www.navarra.es/eu/enplegu-publikoa helbidean, "Enplegu publikoko deialdiak" atalean, deialdi honen fitxan sartuz.

Eskabidean, interesdunek adierazi behar dute baldintza guztiak betetzen dituztela eskabideak aurkezteko epea bukatzen den egunean.

3.3. Parte hartzeko eskabidearekin batera aurkeztu beharreko dokumentazioa:

a) Nafarroako Foru Komunitateko Administrazioak, hautapen prozesua kudeatzen duen organoaren bidez, espedientea izapidetzeko eta ebazteko behar diren datuak kontsultatuko ditu (nortasuna, adina eta titulazioa). Datuetara sartuko da, hain zuzen, Datuak Egiaztatu eta Kontsultatzeko Estatuko Administrazio Orokorraren Zerbitzuen (SVCD) bidez edo sistema baliokideen bidez, salbu eta izangaiak uko egiten badio modu arrazoituan. Kasu horretan, nortasun agiri nazionalaren kopia aurkeztu beharko du, eskaneaturik.

b) Gizarteratzeko goi mailako teknikariaren tituluaren kopia eskaneatua, Batxilergoko titulua edo baliokidea gehi hezkuntza premia bereziak dituzten ikasleei arreta emateko lanbide ziurtagiria, edo, bestela, titulua emateko eskubideak ordaindu izana egiaztatzen duen ziurtagiria, lehentasunezko zerrendan sartzeko; edota Batxilergoko titulua edo baliokidea, edo titulua emateko eskubideak ordaindu izana egiaztatzen duen ziurtagiria, zerrenda subsidiarioan sartzeko. Agiriaren aurreko eta atzeko aldeak agertuko dira kopia horietan, eta artxibo bakar batean aurkeztuko da. Titulua atzerrian eskuratu bada, eskaneatutako kopia ez ezik, titulua homologatuta dagoela egiaztatzen duen agiriaren kopia ere aurkeztu beharko da.

c) Euskarazko plazak ere aukeratzen badira, B2 maila edo baliokidetzat onartutako beste edozein maila gainditu izanaren ziurtagiria aurkeztu beharko dute.

d) %33ko desgaitasuna edo handiagoa izanik parte hartzen dutenek horren berri eman beharko dute eskabidean; gainera, organo eskudunak emandako dokumentazioa erantsi beharko dute, eskaneaturik, hori frogatzeko.

%33ko desgaitasuna edo handiagoa duten izangaiek, hura frogatzeko, agiri hauetako bat aurkeztu behar dute:

–IMSERSOk edo autonomia erkidegoan eskumena duen organo eskudunak emandako ziurtagiria.

–Gizarte Segurantzako Institutu Nazionalaren ebazpena, prestazio bat jasotzeko eskubidea onartzen diona hauetakoren bat edukitzeagatik: ezintasun iraunkor osoa, ezintasun iraunkor absolutua edo baliaezintasun handia.

Desgaitasuna izateagatik eta hala behar izateagatik proba egiteko denboretan eta bitartekoetan egokitzapenen bat eskatzen duten izangaiek hala adierazi beharko dute eskabidean, eta, horretarako prestatutako tokian, adierazi beharko dute zer egokitzapen behar duten edo denbora eta/edo bitartekoak nola doitu behar diren. Horretarako, izangaiak egokitzat jotzen duen dokumentazioa aurkezten ahal du, eskabidea aurkeztean. Pertsona horiek Pertsonen Autonomiarako eta Garapenerako Nafarroako Agentziara bideratuko dira, proba egiteko denbora eta baliabide aldetik behar dituzten egokitzapenak zehazteko.

Izangaiek aurkezten duten dokumentazioak ez du zertan izan jatorrizkoa edo kopia konpultsatua; hortaz, dokumentu horien fotokopia arruntak aurkezten ahalko dira, baina aurkeztutako datuak edo agiriak ez-zuzenak edo faltsuak badira, behar diren erantzukizun penal, zibil edo administratiboak eskatuko dira. Hala ere, Administrazioak noiznahi eskatzen ahalko dizkie izangaiei aurkeztutako dokumentazioaren jatorrizkoak edo fotokopia konpultsatuak.

Desadostasunik sortzen bada ofizioz egiaztatutako datuen eta interesdunak deklaratzen dituenen artean, edo haien gaineko alderdiren bat argitu behar bada, behar den errekerimendua eginen da, Administrazio Publikoen Administrazio Prozedura Erkideari buruzko urriaren 1eko 39/2015 Legearen 68.1 artikuluan ezarritakoaren arabera.

3.4. Sexu Delitugileen eta Gizakien Salerosketaren Erregistro Zentralaren ziurtagiri negatiboa, Haurrak eta Nerabeak Indarkeriatik Osorik Babesteari buruzko ekainaren 4ko 8/2021 Lege Organikoaren 57. artikuluaren arabera, izendapena egiten den unean egiaztatu beharko da, deialdi honen zortzigarren oinarrian ezarritakoaren arabera.

Laugarrena.–Izangaiak onartzea.

4.1. Behin-behineko zerrendak.

Eskabideak aurkezteko epea bukaturik, Funtzio Publikoko Zuzendaritzak ebazpen bat emanen du izangai onartu eta baztertuen behin-behineko zerrendak onesteko, eta Nafarroako Gobernuaren web orrian (www.nafarroa.eus) argitara dadila aginduko du, deialdiaren fitxan, zehazki. Horretarako, zerrenda hauek argitaratuko dira:

–Lehentasunezko zerrenda osatzeko onartutako eta baztertutako pertsonen behin-behineko zerrenda. Zerrenda horretan, hezkuntza laguntzako espezialistaren lanposturako berariazko titulazioa eskatzen da, gaztelaniaz eta, hala badagokio, euskaraz.

–Zerrenda subsidiarioa osatzeko onartutako eta baztertutako pertsonen behin-behineko zerrenda. Zerrenda horretan, C mailara/taldera sartzeko titulazio orokorra eskatzen da, gaztelaniaz eta, hala badagokio, euskaraz.

Baztertutako izangaiek, bai eta parte hartzeko eskabidearekin batera aurkeztu zuten titulazioa behar bezala kontuan hartu ez dela uste dutenek ere, erreklamazioak aurkezten ahalko dituzte eta, hala badagokio, akatsak zuzendu, behin-behineko zerrendak argitaratu eta ondoko hamar egun baliodunetan. Erreklamazioak telematikoki aurkeztu beharko dira, Internet bidez, Nafarroako Gobernuaren web orrian (www.nafarroa.eus), deialdiaren fitxan, hain zuzen.

Izangai bazterturik ez bada, onartuen behin betiko zerrendak zuzenean onetsiko dira.

4.2. Behin betiko zerrendak.

Erreklamazioak edo zuzenketak egiteko epea igaro ondotik, eta horiek ebatzi ondoren, Funtzio Publikoko Zuzendaritza Nagusiaren ebazpen bidez, onartutakoen eta baztertutakoen behin betiko zerrendak onartuko dira: horretarako, zerrenda hauek argitaratuko dira:

–Lehentasunezko zerrenda osatzeko onartutako eta baztertutako pertsonen behin betiko zerrenda. Zerrenda horretan, hezkuntza laguntzako espezialistaren lanposturako berariazko titulazioa eskatzen da, gaztelaniaz eta, hala badagokio, euskaraz.

–Zerrenda subsidiarioa osatzeko onartutako eta baztertutako pertsonen behin betiko zerrenda. Zerrenda horretan, C mailara/taldera sartzeko titulazio orokorra eskatzen den gaztelaniaz eta, hala badagokio, euskaraz.

Zerrenda horiek Nafarroako Gobernuaren web orrian (www.nafarroa.eus) argitaratuko dira, deialdiaren fitxan, deialdian aurreikusitako hautaproba egiteko data, ordua eta tokiarekin batera.

Aurkeztutako eskabidea, emandako epean, zuzendu ez duten edo behar bezala zuzendu ez duten izangaiek eskabideetan atzera egin dutela ulertuko da.

Onartuen zerrendan agertzea ez da aski deialdi honetan eskatutako baldintzak betetzen direla aitortzeko. Izangaiek aurkeztu behar duten dokumentazioa edo Administrazioak bere eskuetan daukana aztertuta, baldintzaren bat betetzen ez dela ohartuz gero, interesdunek deialdi hauetan parte hartzeagatik dituzten eskubide guztiak galduko dituzte.

4.3. Izangai onartu eta baztertuen zerrendak argitaratzearekin ulertuko da interesdunei egin beharreko jakinarazpena egin dela, Administrazio Publikoen Administrazio Prozedura Erkideari buruzko urriaren 1eko 39/2015 Legearen 45. artikuluan ezarritakoarekin bat.

Bosgarrena.–Kalifikazio epaimahaia.

5.1. Hezkuntza Departamentuari atxikitako pertsona hauek osatuko dute kalifikazio epaimahaia:

Lehendakaria: Aranzazu Asensio Igoa andrea, Inklusio Ataleko aholkularia.

Ordezko lehendakaria: Gabriel Cámara López, Inklusio Ataleko burua.

Epaimahaikidea: Egiarte Goikoetxea Cía andrea, Bigarren Hezkuntzako irakaslea Nafarroako Hezkuntza Berdintasunerako Baliabideen Zentroan (CREENA).

Ordezko epaimahaikidea: Ana Inés Garro Ozcoidi andrea, Bigarren Hezkuntzako irakaslea Nafarroako Hezkuntza Berdintasunerako Baliabideen Zentroan (CREENA).

Epaimahaikidea: Esther Navallas Echarte andrea, Bigarren Hezkuntzako irakaslea Nafarroako Hezkuntza Berdintasunerako Baliabideen Zentroan (CREENA).

Ordezko epaimahaikidea: Natalia Ganuza Larumbe andrea, irakaslea Nafarroako Hezkuntza Ekitaterako Baliabide Zentroan (CREENA).

Epaimahaikidea: Langileen Batzordeak izendatua.

Ordezko epaimahaikidea: Langileen Batzordeak izendatu beharrekoa.

Idazkaria: Nerea Ochandorena Baztán andrea, irakaslea Nafarroako Hezkuntza Ekitaterako Baliabide Zentroan (CREENA).

Ordezko idazkaria: Marta Redondas Delgado andrea, Bigarren Hezkuntzako irakaslea Nafarroako Hezkuntza Berdintasunerako Baliabideen Zentroan (CREENA).

5.2. Sektore Publikoaren Araubide Juridikoari buruzko urriaren 1eko 40/2015 Legean abstentziorako aipatzen diren arrazoietako bat gertatzen denean, epaimahaiko kideek ez dute epaimahaian parte hartzen ahalko, eta Funtzio Publikoko Zuzendaritza Nagusiari inguruabar hori jakinarazi beharko diote.

Halaber, zilegi da epaimahaia osatzen duten kideak errekusatzea, inguruabar horietako bat gertatzen denean.

5.3. Hautaproba egiten hasi aurretik eratuko da epaimahaia.

Epaimahaia ez da eratzen ahalko eta ez du jarduten ahalko ere, gutxienez kideen gehiengo osoa ez badago bertan. Halaber, epaimahaiaren eraketak eta jardunak balio izateko, epaimahaiburuak eta idazkariak edo haien ordezkoek bertan egon beharko dute.

5.4. Epaimahaiak gehiengoz ebatziko ditu deialdiaren oinarrien interpretazioari eta aplikazioari buruz sortzen diren auzi guztiak.

5.5. Epaimahaiak aholkulari espezialistak hartzen ahalko ditu probarako, eta horiek beren espezialitate teknikoetan baizik ez dira ariko, eta haietan bakarrik emanen diete laguntza epaimahaiko kideei.

Seigarrena.–Proba.

6.1. Hautapen prozesua proba baten bidez eginen da. Proba horretan, test motako 50 galdera erantzun beharko dira idatziz, gai zerrendako gaiei buruzkoak. Galdera bakoitza erantzuteko, lau aukera eskainiko dira, baina bakarra izanen da zuzena. Erantzun oker bakoitzak penalizazioa ekarriko du, hain zuzen ere erantzun zuzenaren balioaren laurdena.

Epaimahaiak finkatuko du probaren gehieneko iraupena, hura hasi baino lehen.

Proba egiteko, ez da inolako testurik edo dokumentaziorik erabiltzen ahalko, ezta hiztegirik, kalkulagailurik, gailu elektronikorik edo bestelako materialik ere, mutur lodiko boligrafo urdina edo beltza izan ezik.

Probak 50 puntuko kalifikazioa izanen du gehienez, eta bazterturik geldituko dira gehieneko puntuazio horren %30 gutxienez lortzen ez duten izangaiak.

6.2. Probarako dei bakarra eginen da. Izangaiek nortasun agiri nazionala, pasaportea, gidabaimena edo epaimahaiak askiesten duen beste nortasun agiri bat eraman beharko dute probara. Nor diren frogatzen ez dutenak edo agertzen ez direnak baztertuta geldituko dira.

6.3. Proba egiteko, bidezkoak diren denbora eta baliabide egokitzapenak eginen dira desgaitasun aitorturen bat dutenentzat, eskabidean hala eskatu badute.

Zazpigarrena.–Emaitzak.

7.1. Proba kalifikatzen bukatu ondotik, izangaiek lortutako puntuazioak argitaratuko ditu epaimahaiak Nafarroako Gobernuaren web orrian (www.nafarroa.eus), deialdiaren fitxan, eta bost egun balioduneko epea emanen du emaitzei buruzko alegazioak telematikoki aurkezteko.

7.2. Alegazioak aurkezteko epea igaro eta alegazioak ebatzi ondoren, epaimahaiak Nafarroako Gobernuaren web orrian (www.nafarroa.eus), deialdiaren fitxan, argitaratuko ditu probaren behin betiko emaitzak, hautaketa prozesua gainditu duten pertsonen zerrenda barne, guztira lortutako puntuazioaren arabera.

7.3. Izangaiak puntuetan berdindurik geldituz gero, epaimahaiak konponduko du egoera, deialdian parte hartzeko eskabideak aurkezteko epea bukatzen den egunean izangaiek aitorturik daukaten antzinatasunaren arabera. Berdinketak jarraituz gero, epaimahaiak eginen duen berariazko zozketa bakar baten bidez ebatziko da. Berdindutako izangai guztien artean, bat ausaz hautatuko da. Berdinketa guztiak hurrenkera alfabetikoari jarraikiz deseginen dira, abiapuntu harturik zozketa horretan hautatzen den izangaiaren abizenak eta izena. Horren emaitzak Nafarroako Gobernuaren web orrian (www.nafarroa.eus) argitaratuko dira, deialdiaren fitxan.

7.4. Oinarri honetan ezarritako jarduketak bukaturik, epaimahaiak Funtzio Publikoko Zuzendaritza Nagusira igorriko ditu proba gainditu duten izangaien zerrendak, onets ditzan. Zerrendekin batera, hautapen prozesuaren espediente osoa bidaliko du.

Zortzigarrena.–Hezkuntza laguntzako espezialistaren lanpostuan aritzeko izangaien zerrendak eta deia.

8.1. Hautapen prozesuaren espediente osoa jaso ondoren, Funtzio Publikoko Zuzendaritza Nagusiaren ebazpen bidez onetsiko dira izangaien hurrengo zerrenda hauek, eta Nafarroako Gobernuaren web orrian (www.nafarroa.eus) emanen dira argitara, deialdiaren fitxan:

a) Hezkuntza laguntzako espezialistaren lanpostuan prestakuntzarako zerbitzu berezietan aritzeko izangaien zerrenda, Gizarteratzeko goi mailako teknikariaren titulazioa edo, bestela, Batxilergoko titulua edo baliokidea eta hezkuntza premia bereziak dituzten ikasleei arreta emateko ziurtagiri profesionala egiaztatu dituzten izangaiena, gaztelaniaz eta, hala badagokio, euskaraz.

b) Hezkuntza laguntzako espezialistaren lanpostuan prestakuntzarako zerbitzu berezietan aritzeko izangaien zerrenda, C mailako/taldeko lanpostuetara sartzeko eskatzen den titulazio orokorra egiaztatu duten izangaiena, gaztelaniaz eta, hala badagokio, euskaraz.

Zerrenda horiek argitaratzen direnean, dagokion jakinarazpena egindakotzat joko da, Administrazio Publikoen Administrazio Prozedura Erkidearen urriaren 1eko 39/2015 Legearen 45. artikuluan aurreikusitako ondorioetarako.

8.2. Aurreko apartatuan aipatzen diren zerrendak 2025eko irailaren 23an sartuko dira indarrean, Nafarroako Foru Komunitateko Administrazioaren eta haren erakunde autonomoen zerbitzuko langileen arloko neurriak onartzen dituen irailaren 16ko 10/2020 Foru Lege Dekretuaren 2. artikuluan ezarritako aldi iragankorra bukatu ondoren.

8.3. 2025erako Nafarroako Aurrekontu Orokorrei buruzko Foru Legearen 32. artikuluan ezarritakoa betez, eta hezkuntza laguntzako espezialistaren lanpostua aldi baterako betetzeko lehentasuna bermatzearren Gizarteratzeko goi mailako teknikari titulua duten edo, bestela, Batxilergokoa edo baliokidea eta hezkuntza premia bereziak dituzten ikasleei arreta emateko lanbide ziurtagiria egiaztatu dituzten pertsonei, oinarri hauen 8.1. a) apartatuan aipatzen den zerrendak lehentasuna izanen du lanpostu hori aldi baterako kontratatzeko izangaien edozein zerrendaren aurretik, bai eta oinarri hauen 8.1.b) apartatuan aipatzen den prestakuntzarako zerbitzu berezien zerrendaren aurretik ere. Bestalde, oinarri hauetako 8.1.b) apartatuan aipatzen den prestakuntzarako zerbitzu berezien zerrendak lehentasuna izanen du, soil-soilik, B mailan/taldean sartzeko eskatutako titulazio orokorra egiaztatu duten izangaiek lanpostu horren aldi baterako kontratazioetarako osatutako zerrenden gainetik.

8.4. Izangaiak prestakuntzan aritzeko deia eta, hala badagokio, prestakuntzarako zerbitzu berezietako egoeraren deklarazioa honako hauetan ezarritakoaren arabera eginen dira: apirilaren 14ko 96/1997 Foru Dekretua; Lehendakaritza, Justizia eta Barneko kontseilariaren abenduaren 30eko 199/2004 Foru Agindua, lanpostuetan prestakuntzarako zerbitzu berezietan aritzeko izangaien zerrendak osatu eta kudeatzeko prozedura ezarri zuena; eta aplikatzekoak diren gainerako arauak.

8.5. Lanpostu batean prestakuntzarako zerbitzu berezietan aritzea eskaintzen zaien pertsonek, izendapenera jo aurretik, Sexu Delitugileen eta Gizakien Salerosketaren Erregistro Zentralaren ziurtagiri negatiboa aurkeztu beharko dute, Haurrak eta Nerabeak Indarkeriatik Osorik Babesteari buruzko ekainaren 4ko 8/2021 Lege Organikoaren 57. artikuluaren arabera, edo baimena eman beharko diote Administrazioari hori egiaztatzeko.

Era berean, hala badagokie, deialdi honen bidez bete nahi den lanpostuaren betebehar espezifikoak betetzen dituztela egiaztatu beharko dute izangaiek.

8.6. Eskatutako baldintzak betetzen ez dituzten izangaiak hautapen prozesutik baztertu eginen dira, Funtzio Publikoko Zuzendaritza Nagusiaren ebazpen baten bidez, eta deialdi honetan parte hartzeagatik izaten ahal dituzten eskubide guztiak galduko dituzte.

Bederatzigarrena.–Gehieneko denbora prestakuntzarako zerbitzu berezietan.

4 urteko bigarren prestakuntzaldian sartzen diren izangaiak ezin dira 10 urte baino gehiago egon prestakuntzarako zerbitzu berezietan, epe horretan lanpostu batean baino gehiagotan aritzen badira ere.

Prestakuntzarako zerbitzu berezietan 6 urte bitarte egoteko eskubidea duten izangaiek ez dute gehieneko epe hori gainditzen ahalko, epe horretan lanpostu batean baino gehiagotan aritzen badira ere.

Hamargarrena.–Errekurtsoak.

Kalifikazio epaimahaiak ematen dituen egintzen eta ebazpenen kontra gora jotzeko errekurtsoa aurkezten ahalko da, Funtzio Publikoko Zuzendaritza Nagusiari zuzendua, hilabeteko epean, errekurritu nahi den egintza argitaratu edo jakinarazi eta hurrengo egunetik hasita.

Deialdiaren, haren oinarrien eta haiek aplikatzeko egintzen kontra, kalifikazio epaimahaiak hartutakoen kontra izan ezik, zilegi izanen da gora jotzeko errekurtsoa jartzea, Barneko, Funtzio Publikoko eta Justiziako kontseilariari zuzendua, hilabeteko epean, errekurritu nahi den egintza argitaratu edo jakinarazi eta biharamunetik hasita.

Hori guztia bat etorriz Nafarroako Foru Komunitateko Administrazioari eta foru sektore publiko instituzionalari buruzko martxoaren 11ko 11/2019 Foru Legearen 126. artikuluan xedatutakoarekin, eta Administrazio Publikoen Administrazio Prozedura Erkideari buruzko urriaren 1eko 39/2015 Legearen 121. eta 122. artikuluei jarraikiz.

II. ERANSKINA.–GAI ZERRENDA

1. gaia.–Aniztasunarekiko arreta, Nafarroako Foru Komunitateko unibertsitatez kanpoko ikastetxeetan hezkuntza inklusioa arautzen duen Hezkuntzako kontseilariaren abuztuaren 21eko 69/2023 Foru Aginduaren esparruan. Hezkuntza premia bereziak Hezkuntzari buruzko maiatzaren 3ko 2/2006 Lege Organikoa aldatzen duen abenduaren 29ko 3/2020 Lege Organikoaren esparruan.

2. gaia.–Hezkuntza laguntzako espezialista eskola barruan, eta Nafarroako Foru Komunitatean dituen eginkizunak, irailaren 4ko 455/2013 Ebazpenaren esparruan. Heziketa prozesuan duen parte hartzea. Irakasleekin, orientazio zerbitzuekin eta zuzendaritza taldeekin dituen harremanak. Ikasleen inklusioa errazten duen elementu gisa duten egitekoa. Familiaren eta eskolaren arteko harremana. Desgaitasuna duten pertsonen eskubideak, azaroaren 29ko 1/2013 Errege Dekretuaren babespean.

3. gaia.–Adimen desgaitasuna duten ikasleak. Adimen desgaitasuna duten ikasleen oinarrizko ezaugarriak. Garapen kognitiboa, hizkuntzaren garapena eta garapen motorra. Ikasle horien eskolatzeak dakartzan beharrak. Hezkuntza laguntzako espezialista autonomia, elikadura eta higiene ohiturak ezartzeari, gizarte gaitasunei eta gizarte egokitzapenari dagokienez.

4. gaia.–Desgaitasun motorra duten ikasleak. Desgaitasun motorra duten ikasleen oinarrizko ezaugarriak. Jarrerazko arazoak, arantza bifidoa. Ikasle horiek eskolatzeak dakartzan beharrak. Hezkuntza laguntzako espezialista autonomia, elikadura eta higiene ohiturak ezartzeari eta mugitzeko desgaitasuna duten ikasleen inklusioari dagokienez.

5. gaia.–Ikusteko desgaitasuna duten ikasleak. Ikusteko desgaitasuna duten ikasleen oinarrizko ezaugarriak. Ikasle horiek eskolatzeak dakartzan beharrak. Norberaren gorputzaz ohartzea, orientazio espaziala, joan-etorriak, objektuak kokatzea eta beste pertsona batzuekiko interakzioa. Hezkuntza laguntzako espezialista autonomia, elikadura eta higiene ohiturak ezartzeari dagokionez, eta ikusteko desgaitasuna duten ikasleen orientazioari, mugikortasunari eta inklusioari dagokienez.

6. gaia.–Entzumenaren desgaitasuna duten ikasleak. Entzuteko desgaitasuna duten ikasleen oinarrizko ezaugarriak. Ikasle horiek eskolatzeak dakartzan beharrak, entzuteko desgaitasuna duten ikasleekin komunikatzeko laguntza teknikoak. Hezkuntza laguntzako espezialista autonomia ohiturak ezartzeari eta autozaintzari dagokienez.

7. gaia.–Autismoaren espektroko nahasmendua duten ikasleak. Autismoaren espektroko nahasmendua duten ikasleen oinarrizko ezaugarriak. Eskolatzeak dakartzan beharrak.

Sistema alternatiboak eta komunikazioa areagotzekoak erabiltzea. Hezkuntza laguntzako espezialista autonomia, elikadura eta higiene ohiturak ezartzeari dagokionez.

8. gaia.–Portaerazko nahasmendua duten ikasleak. Oinarrizko ezaugarriak. Hezkuntza laguntzako espezialistaren egitekoa ikasgelan inklusioa lortze aldera. Portaerazko nahasmenduei lotu ohi zaizkien testuinguru faktoreak.

9. gaia.–Hezkuntza laguntzako espezialistaren egitekoa jolas garaian eta astialdiko jardueretan. Jolasa ikaslearen garapenerako eta ikaskuntzarako tresna gisa. Helburuak, teknikak eta onurak. Jolas egokitua. Aplikazioak heziketan. Jolasaren garrantzia garapenean eta ikaskuntzan.

10. gaia.–Elikadura eta higiene ohituren garrantzia. Hezkuntza laguntzako espezialista elikadura ohiturak lortzeko bide gisa. Elikaduran laguntzen duten tresnak erabiltzeko teknikak. Berariazko arreta eskola jantoki batean. Ikasleek irensteko dituzten zailtasunak. Esfinterren kontrola. Higieneko, norbera zaintzeko eta janzteko trebetasunak. Norberaren garbitasuna. Eguneroko bizitza antolatzeko trebetasunak. Mendekotasuna duten pertsonei arreta egitea, azaroaren 19ko 1/2013 Errege Dekretuaren babespean.

11. gaia.–Sorospeneko eta lehen laguntzako printzipio orokorrak. Lehen laguntzako teknikak. Hezkuntza laguntzako espezialistaren lana istripuak prebenitzeari dagokionez. Hezkuntzako eta osasuneko profesionalekiko koordinazioa.

12. gaia.–Laneko arriskuen prebentzioa hezkuntza laguntzako espezialisten eginkizunetan. Berariazko arrisku ergonomikoak: gihar-hezurretako nahasmenduak. Larrialdi eta ebakuazio planei buruzko oinarrizko ezagutzak.

Oharra: gai guztiak ebazpen hau Nafarroako Aldizkari Ofizialean argitaratzen den egunean indarra duen legeriaren arabera eskatuko dira.

Iragarkiaren kodea: F2502509