Iragarkia

43. ALDIZKARIA - 2025eko martxoaren 4a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

25C/2025 EBAZPENA, urtarrilaren 30ekoa, Ekonomia Sozialeko eta Laneko zuzendari nagusiak emana; honen bidez erabaki da Berriozarko Udaleko langile lan-kontratudunen Hitzarmen Kolektiboa erregistratu, gordailutu eta Nafarroako Aldizkari Ofizialean argitaratzea.

Ikusi da Berriozarko Udalak langile lan-kontratudunentzat aurkeztutako hitzarmen kolektiboa (kode zenbakia: 31000742011993), zeina erregistro honetan sartu baita 2025eko urtarrilaren 16an, eta 2025eko urtarrilaren 9an sinatu baitzuten enpresaren ordezkariek eta langileen legezko ordezkarien gehiengoak.

Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta hitzarmen kolektiboak, lan-akordio kolektiboak eta berdintasun-planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin bat etorriz.

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuak ematen dizkidan eskudantziak erabiliz,

EBAZTEN DUT:

Lehenengoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Berriozarko Udalak langile lan-kontratudunentzat aurkeztutako hitzarmen kolektiboa (kode-zenbakia: 31000742011993).

Bigarrena.–Nafarroako Aldizkari Ofizialean argitara dadila xedatzea, orok jakin dezan.

Iruñean, 2025eko urtarrilaren 30ean.–Ekonomia Sozialeko eta Laneko zuzendari nagusia, Iñaki Mendióroz Casallo.

CONVENIO SOBRE CONDICIONES DE EMPLEO DEL PERSONAL LABORAL AL SERVICIO DEL AYUNTAMIENTO DE BERRIOZAR PARA LOS AÑOS 2025-2028

BERRIOZARKO UDALEKO LANGILE LAN-KONTRATUDUNEN ENPLEGU-BALDINTZEI BURUZKO 2025-2028 URTEETARAKO HITZARMENA

1. artikulua. Aplikazio-eremua.

1. Hitzarmen honen xedea da Berriozarko Udalaren eta erakunde horretan lan-kontratu finkoa edo aldi baterakoa duten langileen artean lan-baldintzak arautzea. 2025eko urtarrilaren 1etik 2028ko abenduaren 31ra bitartean egonen da hitzarmen hau indarrean. Hitzarmen honetatik kanpo gelditzen dira enplegu sozial babestuko, oinarrizko errentako edo interes orokor nahiz sozialeko obretako programetan kontratatzen diren langileak, horiek dagozkien hitzarmenen bidez eraenduko baitira, hitzarmen honek berariaz ezarri eta erabakitzen dituenetan izan ezik.

2. Akordio honek jasotzen ez duen guztian, Langileen Estatutuak, hura garatzeko legezko xedapenek eta toki-entitateei aplikatu beharreko gainerako arauek aginduko dute, bai eta Nafarroako Gobernuak bere langileekin sinatutako akordioak ere.

Aurrekoa gorabehera, akordio honetan jasotako alderdi partzial eta zehatzak berariaz negoziatzen ahalko dira alde batek hala eskatzen duenean eta udalez gaindiko arauak aplikatu behar diren guztietan, aldaketek hobekuntzarik badakarte langileentzat edo zerbitzuarentzat.

Hitzarmen honetan xedatutakoaren interpretazioaz edo aplikazioaz edozein gatazka kolektibo planteatu aurretik (hala aurretiazko erreklamazioa eginez edozein administraziori edo laneko agintaritza eskudunari, nola eskumena duten organo jurisdikzionaletan), auzia Langileen Batzordearen esku jarriko da.

3. Ordainsari osagarri guztiak Langileen Batzordearen eta Berriozarko Udalaren artean negoziatuko dira.

4. Aipatutako egunerako akordio berririk lortzen ez bada, akordio honen alderdi guztiak automatikoki luzatuko dira harik eta beste bat sinatu arte. Hitzarmenaren indarraldia bukatu aurreko 30 egun naturaleko epean salatu beharko da.

2. artikulua. Langileak hautatzea.

Lanpostuen balorazioei eta antzeko gaiei buruz Udalak enpresa publiko edo pribatuekin egiten dituen kontu guztietan, kontsulta eginen zaie langileen ordezkari sindikalei. Balorazio horien emaitzen ondorioz plantillan aldaketarik egin nahi izanez gero, ordezkari sindikalekin negoziatu beharko da.

–Lan-kontratudun finkoak hautatzea.

Langile lan-kontratudun finkoak hautatzeko, Administrazio Publikoetan sartzeko erregelamendua onesten duen ekainaren 5eko 113/1985 Foru Dekretuko III. tituluan xedatutakoa beteko da. Lan publikoaren eskaintzaren aurretik, bidezkoak diren lekualdatze-lehiaketak eginen dira. Udalak Nafarroako Administrazio Publikoetan sartzea arautzen duen araudian ezarritako lanpostu finkoen ehunekoa gordeko du %33 edo gehiagoko desgaitasuna duten langileentzat, hautapen-probak gainditzen badituzte, eta, betiere, behar den unean daukaten desgaitasun-maila frogatzen badute eta desgaitasun hori beren lan eta eginkizunekin bateragarria bada.

–Aldi baterako lan-kontratudunak hautatzea.

Aldi baterako langileak hautatzerakoan, abuztuaren 30eko 251/1993 Legegintzako Foru Dekretuaren IV. tituluko II. kapituluan ezarritakoari jarraituko zaio, eta haren xedapen osagarriak ere beteko dira, bereziki Administrazio Publikoetan sartzeko Erregelamendua onesten duen ekainaren 5eko 113/1985 Foru Dekretuaren IV. tituluan xedatutakoa.

Aldi baterako lan-kontratua, lehenik, antzeko lanpostu batean sartzeko hautaprobak gainditu bai baina lanposturik lortu ez dutenei eskainiko zaie. Lortutako puntuen hurrenkerari jarraituz kontratatuko dira langile horiek. Aukera hori agorturik, izangaien zerrendak osatzeko deialdiak onetsiko dira. Sindikatuen ordezkariek parte hartuta osatuko dira zerrenda horiek.

Beharrezkoa denean soilik eginen dira kontratuak zuzenean Nafarroako Enplegu Zerbitzutik.

Behin-behinekoak plantillako langileen %8 izanen dira gehienez ere, eta bajak, oporrak, lanpostu esperimentalen abiarazte-aldiak edo trantsizioko lanpostuak betetzeko baizik ez dira erabiliko, langile finkoek haien lekua hartu arte. Urtero lan publikoaren eskaintza eginen da lanpostu hutsak betetzeko. Horiek Langileen Batzordean negoziatuko dira eta ordena kronologikoaren arabera eginen dira deialdiak, beharraren, hautapen-metatzeen eta abarren arabera, urtean zehar.

Administrazio-kontratuak eta haien gaineko arauak 2. artikuluarekin bat ezarritako Langileen Batzordeari kontsultatuko zaizkio.

Langile finkoak nahiz alde baterakoak hautatzeko epaimahaiak.

Langileak hautatzen dituzten epaimahaietako kideek jaso beharreko ordainsariei dagokienez, Nafarroako Gobernuak bere langileentzat onetsitako lansarien taula aplikatuko da.

Berriozarko Udalak berak langileak hautatzeko hasitako prozesuetan, epaimahaiko kide diren udal-langileek ez dute ordainsaririk jasoko epaimahaiko kide gisa dituzten eginkizunak lan-ordutegiaren barruan betetzen badituzte, eta, lan-ordutegitik kanpo betez gero, orduen konpentsazioa emanen zaie lege-testu honen 6. artikuluan ezarritakoarekin bat.

Berriozarko Udalak berak langileak hautatzeko hasitako prozesu batean, epaimahaiko kideek ez dute ordainsaririk jasoko beste Administrazio Publiko baten zerbitzuan aritzen badira, betiere lan hori lan-ordutegiaren barruan betetzen badute, salbu eta arauzko txostenen bidez justifikatzen badute bere jatorrizko administrazioak ez duela bere gain hartuko epaimahaiko-lanetan emandako denbora ordaintzea, kasu horretan 1.1 atalean aipatzen diren tarifak aplikatuko baitira.

3. artikulua. Lanaldia.

Lanaldia, oro har, 1.592 ordukoa izanen da urtean, egiaz lanean emandakoak, edo bestela Nafarroako Gobernuak bere funtzionarioentzat finkatzen duena. Enplegatuek eskubidea dute plantilla organikoan lanaldia luzatzeagatik ezarritako osagarriak kobratzeko.

Urteko lanaldiaren banaketa Alkatetzaren esku egonen da, Langile Batzordeak proposatuta eta langileen delegatuekin negoziatu ondotik, Udalak bere antolaketa egiteko ahalmena eta zerbitzuaren beharrak, behar bezala justifikatuak, galarazi gabe.

Zerbitzuko beharrak direla-eta lanaldi berezia duten langileen kasuan, edonola ere, beren lan-egutegi espezifikoak eraenduko du. Langile horiek orokorrean ezarrita dagoen urteko lanordu-kopurua bete beharko dute.

Ogitartekoa jateko 30 minutu hartuko dira zehatz-mehatz. Zerbitzu bakoitzeko arduradunak begiratuko du atal honetan ezarritakoa bete dadin. Lanaldi murriztua duten langileek ere ogitartekoa jateko denbora hartuko dute, dagokien proportzioan.

Zerbitzu guztiek presentzia kontrolatzeko sistemak izanen dituzte.

Lanaldia zerbitzuaren beharretara egokituko da eta noiznahi aldatzen ahalko dute administrazio-organo eskudunek, ordezkari sindikalei horren berri eman eta kontsultatu ondotik. Zerbitzuren batek larunbatetan lan egitea eskatzen badu ezinbestean, eta eskaera hori arrazoitua bada, eman litezkeen ordu-konpentsazioak aztertuko dira, ordezkari sindikalekin itunduko den baremoaren arabera.

Lanpostu guztietan ahalik eta zerbitzurik onena eman behar zaie zerbitzu publikoak ordaintzen dituzten herritarrei, eta zerbitzu hori egiten duten langileek ahalik eta baldintza eta eskubiderik onenak izan behar dituzte.

Zenbait zerbitzutan gerta liteke lanaldi bereziak egin behar izatea (hiru txanda, lanaldi zatitua...). Horri dagokionez, Nafarroako Gobernuarekiko hitzarmenean ezarritakoari edo ezartzen denari jarraituko zaio.

Zerbitzu anitzetako langileek Neguko Bidezaintza Plana bete beharko dute, hitzarmen honen VI. eranskinean zehazten den moduan.

Berriozarko Udalak ez badu negoziatzen bere irakasleen lanaldia, Nafarroako Gobernuak bere irakasleentzat ezarritako berbera izanen da, kasuan kasuko irakaskuntzan.

Hitzarmen honen VII. eranskinean jaso da langileen lan-ordutegia malgutzeko neurrien testua. Testu bat eginen da telelana ezartzeko plana jasotzeko, ordezkari sindikikalekin negoziatu ondotik.

4. artikulua. Jaieguneko lanaldia.

Berriozarko festak: jaiegun izanen dira festen hasierako eguna (abuztuko azken asteazkena, 14:00etatik aurrera) eta hurrengo bi egunak.

Festetako jardueretarako eta mantentze-lanetarako behar diren oinarrizko zerbitzuetan (udaltzaingoa, garbiketa, mantentze-lanak, jaietako zerbitzuak, etab.), ondorio ekonomikoetarako soilik izanen dira jaiegunak festetako lehenbiziko eguna (abuztuko azken asteazkena, 14:00etatik aurrera) eta hurrengo bi egunak.

Gaueko txanda egiten dutenek gaueko lanarengatik dagokien osagarria ere jasoko dute. Gaueko txanda horiek urteko gainerako igande eta jaiegunekin batera kontatuko dira.

San Esteban eguna ere, abenduaren 26a, herriko festa izanen da.

5. artikulua. Egutegia.

1. Udal-alor guztietako egutegiak Udalaren eta langileen ordezkarien artean adostuko dira, gai horretaz Udalaren organo eskudunak dituen eskudantziak galarazi gabe.

2. Ezartzen diren ordutegietan eta lan-txandetan aldaketarik egiteko, eta gauza bera atsedenaldi, opor eta egutegiko aldaketa onetsietan, langileen ordezkariekin negoziatu beharko da.

3. Txanda-aldaketak egiteko, 48 ordu lehenago adieraziko zaie dagokien langileei, zerbitzuko arduradunak behar bezala justifikatutako larrialdietan izan ezik, eta betiere, ahal bada, gutxienez 12 orduko tarte bat egonen da txanden artean.

4. Langileek elkarri aldatzen ahal dizkiote zerbitzuak eta txandak, aldez aurretik justifikatuta eta zerbitzuko arduradunak espresuki baimenduta.

5. Egutegi-gorabeherak izanez gero, horien ondoriozko egunak urte naturalaren barnean hartu beharko dira nahitaez.

6. Aurreko klausuletan ezarritakoa zerbitzuaren beharren mende egonen da.

6. artikulua. Aparteko orduak.

1. Inork ere ez du aparteko 45 ordu baino gehiago egiten ahal urtean. Aparteko orduen ordainean, betiere, orduak hartuko dira. Aparteko orduak egin diren hilabete berean edo hurrengoan hartuko dira ordainezko orduak. Nolanahi ere, seihileko naturala bukatu baino lehen hartuko dira.

2. Aparteko orduak salbuespenezko kasuetan soilik eginen dira. Zerbitzuko arduradunak baimendu beharko ditu, eta egiten dituzten langileek gero zerbitzuko arduradunari justifikatu beharko dizkiote.

3. Aparteko orduak honela ordainduko dira: atseden-ordu bat eta berrogeita bost minutu lanegunetan egindako aparteko ordu bakoitzeko, eta atsedeneko bi ordu, igandeetan edo jaiegunetan egindako ordu bakoitzeko.

4. Hiru hilean behin, Udalaren langile guztiek egindako aparteko orduen orria igorriko zaie ordezkari sindikalei.

Zerbitzu batean metatutako aparteko orduak gehiegi direla egiaztatzen bada, plantilla handitzeari buruzko azterketa bat eginen da.

5. Aparteko orduak eta ohiko lanaldia elkarren segidakoak ez badira, aparteko orduak honela ordainduko dira:

• 30 minutu edo gutxiago, lanegunean: ordu bat.
• 30 minutu baino gehiago, lanegunetan: 1,45 ordu.
• 30 minutu baino gehiago, jaiegunetan: halako bi.
• 30 minutu baino gutxiago, jaiegunetan: 2 ordu.

Lanegunetan behin eta berriz, udaleko arduradunak eskatuta, ohikoa baino lan-denbora gehiago egin behar izaten duten langileei, lanaldiaren luzapeneko osagarria esleituko zaie. Lan-egutegian ezarrita ez dauden egunetan lan egitea, aldiz, ez da lanaldiaren luzapentzat hartuko.

Osagarri horrek ez du aparteko ordurik sortuko lanaldiaren ondo-ondoko aldian, bai ordea langilearen ohiko lanaldiaren segidakoak ez diren aldietan.

Zerbitzu anitzeko arloa II. eranskinean ezarritakoaren arabera arautuko da.

7. artikulua. Oporrak.

Urteko oporraldia eta hartzeko modua Nafarroako Gobernuak erregelamenduz ezarritakoak izanen dira (Nafarroako Administrazio Publikoetako funtzionarioen opor, lizentzia eta baimenen Erregelamendua onesten duen otsailaren 9ko 11/2009 Foru Dekretua aldatzen duen urtarrilaren 23ko 5/2013 Foru Dekretua), baina zerbitzu bakoitzean langileek proposaturik egokitzen ahal da, betiere urtean hartzeko araua betez. Alkateak baimena ematen ahalko du aurreko urteko opor-egun batzuk urtarrilaren lehen hamabostaldian hartzeko.

Zerbitzu bakoitzeko arduradunek beren ardurapeko langileen oporren plana aurkeztuko diote Alkatetzari, urteko maiatzaren 15a baino lehen, eta hark ekainaren 15erako horri buruzko ebazpena emanen du, Langile Batzordeak proposatuta eta zerbitzuen arduradunekin negoziatu ondotik. Oporrik gelditzen bada hartzeko, bigarren plan bat aurkeztuko da urriaren 31 baino lehen.

Zerbitzu beharrengatik oporrak ezin izan badira urtean zehar hartu, hurrengo urteko urtarrileko lehenbiziko hamabostaldian hartzen ahalko dira. Oporraldia aldarazteak langileari galera ekonomikoa eragiten badio (bidaia-txartelak, egonaldien erreserbak, etab. ezin berreskuratzea), Udalak kalte-ordaina emanen du, langileak agiri bidez galera frogatuz gero.

Opor-egunak ezin konpentsatuko dira diru truk, ez osorik ez hein batean, salbu eta langileak enpresa utzi, erretiratu edo eszedentzia hartuz gero, edo opor guztiak hartu ez direnean, edo zerbitzuaren beharrengatik denbora librearekin ordaindu ezin direnean.

Zerbitzuko arduradunari oporrak hartzeko eskaera aurkezten zaionetik bost egun natural igaro eta interesdunari ukapenaren jakinarazpena egiten ez bazaio, baimena emandakotzat joko da. Ebazpena, dena den, arrazoitua izanen da.

Langileek arauzko oporretan jasoko duten ordainsaria urteko gainerako egunetan jasotzen dituzten arauzko ordainsarien batez bestekoa izanen da.

Ikastetxeetan, futbol zelaian eta Haur Eskolan lan egiten dutenek, langileen batzordearekin kontsulta egin ondotik, opor ordainduak ikastetxean lanik egiten ez den garaian hartuko dituzte, non ez den zerbitzu beharrengatik besterik erabakitzen.

8. artikulua. Lizentziak eta baimenak.

Nafarroako Gobernuak bere langileentzat ezarritako berak izanen dira.

Urtean zehar, lan-kontratudunek eskubidea izanen dute beren kontuetarako hiru egun bitarte hartzeko. Baimen-egun horiek ordainduak izanen dira.

Lizentzia eta baimen ordainduak eskatzeko eta emateko funtsezko arrazoiak beharko dira, eta ezin dira beste mota bateko lizentzia, baimen edo oporrekin metatu, indarra duen foru legeriak besterik ezartzen ez badu, behintzat. Gertaera eragilea gertatzen den unetik hasita hartuko da lizentzia.

Kontsultak, tratamenduak eta miaketa medikoak egitera eta erditzea prestatzeko klasetara joateko, bai eta ezkontideari edo bizikideari, langilearen kargura dauden gurasoei eta seme-alabei laguntzeko ere, beharrezkoa den denbora hartuko da behar bezala justifikatuta. Baimen horren denbora ez da errekuperatzekoa izanen.

Baimenak eta lizentziak ukatuz gero, arrazoiak emanen dira.

Norberaren aferetarako ordaindu gabeko lizentziak, Nafarroako Administrazio Publikoetako funtzionarioen opor, lizentzia eta baimenen Erregelamendua onesten duen otsailaren 9ko 11/2009 Foru Dekretuaren 14. artikuluan aipatzen diren horiek, gehienez ere hiru hilabetekoak izanen dira bi urte naturalean; horrelakoetan, Berriozarko Udala ahaleginduko da baimen eta lizentziekin aurreztutako dirua langileen kontratazioan berrinbertitzen, baimena edo lizentzia jaso duten langileak ez egoteak sortu dituen edo sor ditzakeen beharrei aurre egiteko.

9. artikulua. Lanbide-hobekuntza eta -prestakuntza.

1. Langileei prestakuntzarako erraztasunak emateko, Administrazioak konpromisoa hartzen du neurri hauek hartzeko, baldin eta zerbitzuaren kudeaketak eta lanaren antolaketak horretarako bide ematen badute. Lanbide-prestakuntzako eta -hobekuntzako ikastaroetara joateko (hala Nafarroako Administrazio Publikoaren Institutuak nola beste erakunde nahiz entitate batzuek antolatuak) baimen ordainduak emanen dira, gehienez ere berrogeita hamabost (55) ordu inguru urtean, honako irizpide hauei jarraikiz:

Ikastaroen edukiak zerikusi zuzena izatea Administrazioan lan egiten duenaren lanpostuarekin edo lanbide-karrerarekin. Halaber, ikastaroetara joateak ez du aldi baterako kontratu bidezko ordezkoa jarri beharra ekarriko.

Ikastaroak egiteko eragozpenak izatea, lanaldiaren orduetan direlako edo txandaka lan egiteak klaseetara joatea oztopatzen duelako.

2. Konpentsazioa ez da aparteko orduena bezalakoa izanen, salbu eta prestakuntza-ikastaroa Administrazioaren aginduz eta ohiko lanorduetatik kanpo egiten denean.

3. Kasu guztietan, zerbitzuetako arduradunek Alkatetzari jakinaraziko diote ikastaro bakoitzak zer-nolako lotura duen lanpostuarekin eta, hala bada, baimena emateko arrazoi berezia zein izan den.

4. Langileak Administrazioaren aginduz joaten direnean ikastaroa egitera, ordu horiek lanordu gisa kontatuko zaizkie, lanaldiaren urteko konputuaren ondorioetarako, eta zerbitzua dela-eta egindako gastuengatik erregelamenduz ezarritako kalte-ordainak kobratzeko eskubidea izanen dute (kilometrajea, dietak...).

5. Bermatuko da langile guztiak prestakuntzarako orduez baliatzen ahal direla, edozein lan-txandatan aritzen direla ere.

6. Nahi izanez gero baimena ematen ahal zaie langileei lanaldiaren barnean egiten diren ikastaroetara, lanpostuarekin lotura zuzenik ez baina Udalaren eginkizunekin lotura zuzena dutenetara, joateko. Halakoetan Udalak matrikularen eta testuen zati bat ordainduko du.

7. Berriozarko Udalak urtero 12.000 euro bideratuko ditu lanpostuekin lotura duten prestakuntza-gastuetarako edo udalaren zuzendaritzarentzat eta langile eskatzailearentzat interesa duten jardueretarako; gastu horietan matrikula, joan-etorriak, ostatu-gastuak eta materialak sartzen dira. Soberakina gelditzen bada, hurrengo ekitaldi ekonomikoko partidari gehituko zaio. Soberakin hori ekitaldi batetik hurrengora bakarrik metatuko da.

Organo eskudunak aldez aurretik eta berariaz emandako baimena behar da ikastaro horietara joateko. Funts horren gehieneko zenbatekoa, urtean eta pertsona bakoitzeko, langilearen oinarrizko soldataren %3 izanen da, non ez den zenbateko handiagoa ezartzen baimena emateko erabakian, arrazoiak emanda. Diru-kopuru horiek ordaintzeko, gastuaren frogagiria aurkeztu beharko da.

8. Udalaren zerbitzuko langile finkoak 24.2 artikuluan araututako zerbitzu berezietan deklaratzen ahal dira prestakuntzarako eta hobekuntzarako jarduerak egitea agintzen zaienean, apirilaren 14ko 96/1997 Foru Dekretuan eta hura garatzen duten xedapenetan aurreikusitako prozeduraren, baldintzen eta betebeharren arabera, eta betiere helburua baldin bada, jarduneko lanpostuan aritzeko langileari eskatu zaion tituluaz gainera, eskuratu duen maila altuagoko beste ikasketa titulu bati dagozkion lanetan aritzea.

9. Urtero, laneko segurtasunaren eta higienearen arloan trebatzeko ikastaroen programa bat onetsiko da.

10. Prestakuntza-ikastaroren batera joateko eskaera bati ezezkoa ematen bazaio, arrazoiak eman behar dira beti.

11. Konpentsazioa zerbitzuko arduradunarekin adostuko da.

12. Ikastaroetarako joan-etorriak, lanorduetan nahiz lanorduetatik kanpora, «in itinere» motako joan-etorriak dira.

10. artikulua. Hizkuntza-politika.

–Langileek euskalduntze-ikastaroetan parte hartzea.

Administrazio elebiduna lortu eta zerbitzua euskaraz ematen ahal dela bermatzeko, Udalak erraztasunak emanen dizkie euskaldundu nahi duten langile guztiei.

Udal honen helburua denez Berriozarko biztanle guztiei bermatzea arreta eta zerbitzuak Nafarroako hizkuntza berekietako edozeinetan jasotzen ahal dituztela, bitartekoak jarriko dira nahi duten langileek beren lanpostuari dagokion hizkuntz eskakizuna eskura dezaten. Horretarako, indarra duen araudian ezarritakoari jarraituko zaio.

1. Udalak zehaztuko du zein lanpostutarako izanen den euskara bete beharreko eta ziurtatu beharreko eskakizun espezifikoa. Era berean, langileen hizkuntza-gaitasuna orientatuko du, hau da, lanpostuaren destinoarengatik edo ezaugarriengatik behar handiagoa duten sustapen ekintzei lehentasuna emanen die.

2. Euskara-ikastaroetara doazen langileentzako ordu-konpentsazioa Nafarroako Gobernuak indarreko legeen arabera ezarritakoa izanen da.

3. Udaleko lanpostu guztien hizkuntza-eskakizunen azterketa egitea sustatuko da, eta ordezkari sindikalei eta langileei haren emaitzen berri emanen zaie.

–Musika Eskolako langileak.

Euskara Zerbitzuak adieraziko du astean zenbat ordu konpentsatu behar diren (eskola orduen %50). Konpentsatu beharreko ordu horiek interesdunaren lanordu-kopuru osoari batuko zaizkio, ikasleen matrikularen arabera, eta kontuan izanik hiru ordutegi-moten arteko banaketa proportzionala (%66 eskola orduak, %14 eskolarik gabeko orduak, eta %20 ordu ez-presentzialak).

Ordu-konpentsazioa kalkulatzeko, kontuan hartuko da euskaltegian zenbat ordu egiten diren, lanaldiaren iraupena gorabehera. Musika Eskolaz gainera beste entitate batzuetan ere irakasten duten langileei, hala ere, Berriozarko zentrora joan behar duten egunetako orduak soilik konpentsatuko zaizkie, eta gainerakoak beste entitate kontratatzaileen esku utziko dira.

4. Euskarazko ikastaroak egiteko ordu- eta diru-konpentsazioak (195/93 FD, 1993ko 84. Nafarroako Aldizkari Ofiziala):

–Ordu-konpentsazioa:

• Ikastaro estentsiboak: ordu bat lanorduen kontura eta bestea langilearen kontura.
• Ikastaro trinkoak: lanorduen kontura, erabat.
• Udako ikastaroak: egunen herena langilearen kontura eta beste bi herenak lanorduen kontura.

–Konpentsazio ekonomikoa: matrikula-gastuak administrazioaren kontura.

–195/1993 Foru Dekretuaren ondorengo araudia, Nafarroako Gobernuak garatua:

• Aldi baterako kontratatutako langileak euskalduntze planetan sartzen ahal dira haien ordezkoak jarri beharrik ez bada.
• Birziklapen-proposamen bat aintzat hartzeko (urritik ekainera arteko ordezkapena), langileak funtzionario behar du izan, edo, bestela, birziklapena justifikatzen duen jarraitutasuna bermatua eduki behar du, beste mota bateko lan-kontratuaren bidez. Birziklatze-plan bat hasi ahal izateko, gutxienez hirugarren maila eskatzen da (3. urratsa).
• Gainerako ikastaroekin parekatuta, ikastaro teknikoetan denbora guztia lanaren konturakoa izanen da.

5. Lanpostuaren ezaugarriak direla-eta konpentsazio berezia duten taldeak:

–Udaltzaingoa (txandaka eta jaiegunak aldatuz diharduten langileak):

• Klase estentsiboak:
  • Udaltzainak lan egin beharreko orduetan suertatzen bada klaseetako ordutegia, lanaldia murriztuko zaio klaseetara normal joan ahal izateko.
  • Klaseko ordutegia ez badator bat udaltzainak lan egin beharreko ordutegiarekin, ez zaio lanaldia murriztuko (gauak, jaiegunak edo arratsaldeak goizez estudiatzen badu, eta goizak arratsaldez estudiatzen badu).
  • Urtean bi aldiz (otsailean eta ekainean) kalkulatuko da udaltzainak zenbat ordu egin dituen euskaltegian guztira (euskaltegiko asistentzia partearen arabera) eta zenbat ordu konpentsatu behar zaizkion (%50). Euskaltegira joan den egunak sailkatu eginen dira egindako txanda-motaren arabera, eta langilearen aldeko edo kontrako ordu-balantzea eginen da. Langilearen aldeko ordu balantzea bada, ordu horiek baimen bereziko egunetan metatuko dira. Baimen hori zerbitzuaren behar orokorrak kontuan izanik hartuko da.

6. Artikulu honetan xedatutakoa baldintza hauekin aplikatuko da:

–Txandaka lan egiten duten langileen prestakuntzak ez du aparteko orduen izaera izanen.

–Ikasketak egiteko lizentzia duten langileek ez dute lizentzia bertan behera uzten ahalko, eta hitz emanen dute zuzendaritzak, euskara-teknikariarekin koordinatuta, proposatzen dituen ikastaro guztiak eginen dituztela.

–Prestakuntza hori ahal delarik udal-euskaltegietan eginen da, edo Nafarroako Gobernuak dauzkanetan.

11. artikulua. Osasun-gastuak.

1. Atal honetan aipatzen diren osasun gastuak dira Gizarte Segurantzak edo Nafarroako Toki funtzionarioen Montepioak beren gain hartzen ez dituztenak.

2. Artikulu honetan xedatutakoa nominako eta plantillako funtzionarioei aplikatuko zaie, bai eta langile administrazio-kontratudunei ere udalean sei hilabetetik gora eman baldin badituzte lanean, betiere aurkezten duten gastua udalean lanean egon diren hilabeteetan egina bada. Udalean lanean hilabete gutxienez egin duten langileentzat, ordaindu beharreko zenbatekoa lan egindako denboraren hainbanatuko da, betiere aurkezten duen gastua udalean lanean eman duen denboran egina baldin bada.

3. Udalak, akordio honen indarraldirako, 18.000 euroko partida gaituko du gehienez, apartatu honen aplikazioak eragiten dituen osasun-arloko gastuei aurre egiteko.

Soberakina gelditzen bada, hurrengo ekitaldi ekonomikoko partidari gehituko zaio. Soberakin hori ekitaldi batetik hurrengora bakarrik metatuko da.

4. Laguntzak emateko, lehentasun-hurrenkera hau ezarri da:

–Langileak.

–Seme-alabak, 18 urte bitarte.

5. Gastua 18.000 euroko aurrekontuko partida baino handiagoa baldin bada, langile bakoitzari ordaindu beharreko zenbatekoa proportzio horretan murriztuko da, gastua aurrekontuarekin bat etorri arte.

6. Muga hau ezartzen da maila desberdinetako langile bakoitzeko gastuetarako:

Onartzen ahal diren gastuak.

–Ortopedia.

• Atal honen barnean itzuliko da, aurreko taulan ezarritakoarekin bat etorriz, Osasunbidea-Nafarroako Osasun Zerbitzuaren katalogoan dauden plantilla eta produktu ortoprotesikoen %75, dagokion fakultatiboak aginduz gero (17/1998 Foru Dekretua). Betiere, Gizarte Segurantzak estaltzen ez badu.
• Ehuneko berean ordainduko da, halaber, audifonoen kostua.

–Optika.

• Graduatutako betaurreko pare bat ordainduko da, gehienez, onuradun eta urte natural bakoitzeko. Betiere, horietako bakoitzean muga hauek izanen dira: 241 euro kristalen balioan eta 27 armazoian.
• Lentilla graduatuen zenbatekoa, edozein tankeratakoak direla ere, maila bakoitzerako ezarritako ehunekoaren arabera itzuliko da; 241 euro, gehienez ere, onuradun eta urte natural bakoitzeko.

–Odontologia.

• Odontologiako gastu guztietatik, kontsultak eta kirurgia barne, aldez aurretik ezarritako ehunekoa itzuliko da.

–Errehabilitazioa.

• Errehabilitazioko tratamenduak ordaintzeko, sendagileak agindutakoa izan beharko du eta espezializatutako osasun-langileek emana. Betiere Gizarte Segurantzak tratamendua bere gain hartzen ez duenean edo itxaron beharreko denbora oso luzea dela justifikatzen denean.
• Xedatutako ehunekoei jarraikiz itzuliko da.
• Plantillarentzako deskontu bat xedatutako da Berrikilaneko fisioterapeutarekin.

–Podologia.

• Podologiako tratamenduetatik, maila bakoitzari dagozkion ehunekoen arabera.
• Langile funtzionarioak eta administrazio-kontratudunak Berriozarren erroldatutako pertsonekin parekatuko dira Iruñalde udal-lokaleko podologia-zerbitzua erabiltzearen ondorioetarako.

–Psikologia klinikoa.

• Psikologia klinikoko kontsultak edo saioak maila bakoitzerako ezarritako ehunekoen arabera itzuliko dira.

12. artikulua. Objektu pertsonalak.

Berriozarko Udalak langileen lanerako behar diren objektu pertsonalak konpontzeko gastu guztiak ordainduko ditu, erabiliaren erabiliz eta Udaleko lan-eremuan hondatu badira, istripuen mutualitateak ordaintzen dituenak salbuetsita.

Euren eginkizunen ondorioz mendeku, liskar edo bestelako arrazoi batzuengatik ibilgailuetan kalte materialak izanez gero, kalte horiek Udalak ordainduko ditu osorik, adierazitako arrazoiengatik gertatu direla frogatzen bada.

13. artikulua. Gidabaimena.

Berriozarko Udalak gidabaimena berritzeko gastuak ordainduko dizkie bere langileei, lanpostua lortzeko baldintza gisa gidabaimena eskatu bazaie. Halaber, diru hori kobratzeko eskubidea izanen dute beren borondatez gidabaimena erabiltzea onartu dutenek eta, orobat, lanpostua lortu ondotik gidabaimena eskatu zaien langileek. Ordainketak berrikuntza-tasa hartuko du, ez ordea gestoria- eta zehapen-errekargua edo beste kontzeptu batzuk.

14. artikulua. Ordainsariak.

1. Nafarroako Administrazio Publikoetako langileentzako aurrekontu orokorrei buruzko legeetan zehaztuko dira maila edo taldeen oinarrizko ordainsariak 2025erako.

2. Antzinatasun saria eta familia-laguntzarako ordainsari osagarria jasotzeko eskubidea izanen dute Udaleko lan-kontratudun guztiek, hala finkoek nola Berriozarko Udalean urtebete baino gehiago aritu diren aldi baterakoek.

3. Udalak eskatuta eta aldeak ados jarrita, dagokien baino maila goragoko eginkizunetan diharduten lan-kontratudunek lehen egunetik kobratuko dituzte aldi baterako betetzen ari diren lanpostuari dagozkion ordainsariekin parekatzeko behar diren zenbatekoak.

4. Bajan dauden udal-langileek soldataren %100 jasoko dute aldi baterako ezintasuneko egoerak dirauen bitartean.

15. artikulua. Plantilla organikoa.

Udalak konpromisoa hartzen du ezintasun osoa aitortzen zaien langileak daukaten hondar-gaitasunarekin bateragarri den lanpostu batean kokatzeko, edo lanaldi partziala emateko, ezintasunik gabe kobratuko luketen adinako ordainsaria izan dezaten, ahal baldin bada.

16. artikulua. Eskubide sindikalak.

1. Nafarroako Gobernuak bere funtzionarioei aitortzen dizkien berberak izanen dira, udal honen zerbitzuko funtzionarioek dituztenekin parekatuta.

2. Ordezkari sindikalek hilean hogei orduko kreditua izanen dute. Kreditu hori hiru hilean behin kontatuko da.

3. Ordezkari sindikalek, nahi badute, zilegi dute ordu sindikalak elkarri lagatzea. Baimena emateko, orduak lagatzen dituen ordezkariak agiri bat sinatuko du, eta atzera egiteko aukera izanen du, edozein unetan.

4. Ordezkari sindikalek honako irizpide hauei jarraituz erabil ditzakete ordu sindikalak:

–Inoiz ere ez da gaindituko ezarritako muga, hogei ordu hilean, alegia.

–Konpentsazioa sindikatuetako ordezkarien artean eginen da, eta langileen delegatuak behar bezala frogatu eta justifikatuko du betiere.

5. Udalak eta ordezkari sindikalek urtero adostuko dituzte Haur Eskolako delegatu sindikalen ordezpenak, uneoro bermatuz hautatutako ordezkarien eskubide sindikalak eta zerbitzuaren beharrak.

17. artikulua. Prebentzioko delegatuak.

Laneko Arriskuen Prebentzioari buruzko azaroaren 8ko 31/1995 Legearen 35.4 artikuluak xedatutakoaren arabera, ordezkari sindikalek hautatuko dituzte langileen ordezkariak, horretarako ados eta prest dauden langileen artean.

18. artikulua. Babesa eta segurtasuna.

1. Istripuetarako aseguru-poliza bat kontratatuko da, bai zerbitzuan bai "in itinere" edo bidean gerta litezkeen istripuak estaliko dituena. Langileen ibilgailuek trafiko-istripuetan izan ditzaketen kalteak ere estaliko ditu, langileek lanean beren ibilgailua erabiltzeko baimena duten kasuetan.

2. Bizi-aseguruko poliza bat ere kontratatuko da, heriotza eta lanbiderako ezintasun iraunkor osoa estaliko dituena.

3. Erantzukizun zibileko aseguru bat kontratatuko da Udalaren zerbitzuko langileek beren eginkizunetan sortzen dituzten kalteetarako.

4. Poliza guztietan kontuan hartuko da Nafarroako Foru Komunitatearen benetako KPIak izan dezakeen desbideratzea (lau urtean behin berrikusiko da).

19. artikulua. Laguntza juridikoa.

1. Udalak laguntza juridikoa emanen die langile guztiei, Udalak esleituriko zerbitzuak egitearen ondorioz auzitara eramanak direnean. Udalaren langileen kontra erasorik edo atentaturik gertatuz gero, Udala akusazio partikular gisa aurkeztuko da epaitegietan.

2. Udalak bere gain hartuko du edonolako prozesu judizialetan sartuta dauden langileen laguntza juridikoa, auzia langilea bere eginkizunetan aritzeagatik sortu bada.

3. Defendatzaileen eta, nahitaezkoa izanez gero, prokuradoreen kontratazioa eta izendapena Udalaren kontu izanen dira.

20. artikulua. Osasun-azterketa.

1. Berriozarko Udalak, urtero, Laneko Arriskuen Prebentzioari buruzko azaroaren 8ko 31/1995 Legearen arabera nahitaezkoak diren osasun azterketak eginen ditu. Erabakitzen duen kanpoko prebentzio-zerbitzuarekin batera zehaztuko du zer langile-talderi eginen zaizkion, zer proba eginen diren eta zenbatean behin eginen diren.

2. Lan-istripuetarako estaldura Gizarte Segurantzarekin kontratatuko da, ez mutuekin.

21. artikulua. Udal-instalazioak erabiltzea.

1. Udalak antolatu edo bere laguntza nahiz babesa ematen duen ikastaro eta jardueretan, Udalarentzat lan egiten duten langileek eta 18 urte arteko haien ondorengoek erroldan dauden pertsonei aplikatzen zaizkien baldintza eta tarifa berak izanen dituzte.

2. Udaleko langileen seme-alabak Haur Hezkuntzako zentroan (0-3 urtekoak) sartzen ahal dira, erroldan daudenek dituzten baldintza eta tarifa berberekin, erroldatuen beharrak bete ondotik eta lehentasuna izanik Berriozarren bizi ez direnekin alderatuta.

22. artikulua. Ekipamendua eta jantziak.

1. Ondoko talde hauetako udal-langileek beren lana egiteko beharrezkoak dituzten jantziak izateko eskubidea dute, ondorengo tauletan ezarri bezala, eta bertan finkatzen da, orobat, zein diren jantziak eta oinetakoak berritzeko epeak.

Udaltzaingoko langileek eskubidea izanen dute lan egiteko behar dituzten jantziak jasotzeko. Haiei ez zaizkie aplikatuko jantziak aldatzeko epeak, behar dituztenean berrituko baitira.

2. Udako jantziak apirilean emanen dira, eta negukoak urrian, urtero.

3. Lanean hondatzen diren jantzi guztiak lehen aipatu diren epeak kontuan hartu gabe aldatuko dira.

Hondatutako jantziak zerbitzuko arduradunari eman beharko zaizkio.

Jantziak zaindu edo gordetzeko orduan izandako arduragabekeriagatik hondatzen direnak ez dira aldatuko.

4. Bi alderdiak ados egonda, jantzi eta material batzuen kalitatea hobetzea negoziatzen ahalko da, eta, horrela, gutxiagotan berrituko dira. Akordio hori idatziz jasoko da.

5. Urtero partida bat aurreikusi beharko da udaltzainen jantzietarako.

6. Aldeak ados jarrita, proposatzen da garbitzaileek, lorategietako langileek eta obretakoek "Berriozarko Udalaren zerbitzua" bereizgarria eramatea jantzietan.

7. Jantzi horiek guztiak norbera babesteko ekipamenduak (NBE) izanen dira Berriozarko enplegatu eta kontratudunentzat. Zerbitzu bakoitzeko arduradunak banatuko du materiala.

Haur Eskola.

Haur Eskolako hezitzaileetako bakoitzak 150 euro jasoko ditu urtean jantzietarako. Urtarrilean izanen da, ordainketa bakar baten bidez.

23. artikulua. Aurrerakin itzulgarriak, arruntak eta bereziak.

1. Udaleko langileek eskubidea dute, soldata ordaintzeko eguna iritsi baino lehen, aurrerakin arruntak nahiz bereziak jasotzeko.

–Aurrerakin arrunta: hilabeteko soldataraino bitarteko aurrerakinak dira, hurrengo hiru hilabeteetako nominekin zati berdinetan itzuli beharrekoak.

–Aurrerakin berezia: 20.000 euroko funtsa sortuko da 2025-2028 aldirako. Funts horretatik 4.008 euro gordeko dira larrialdietarako. Gehienez ere 4.008 euro eskatzen ahalko dira. Eskaera egiten denean funts erabilgarria zenbatekoa den ikusita emanen dira aurrerakinak.

2. Kasu hauetan eskatzen ahal da:

–Ezbeharrak etxebizitzetan edo ibilgailuetan: sutea, lapurretak, istripuak, uholdeak eta abar.

–Familiako gorabehera larriak, hala nola dibortzioa, banantzea, drogak, eta abar.

–Ustekabeko aldaketak etxebizitzan, edo norberaren ibilgailua konpondu beharra istripu edo matxura baten ondorioz.

–Lehenbiziko etxebizitza erosi beharra.

–Pertsona eskudunen iritziz antzeko garrantzia duten bestelako arrazoiak.

3. Ez da aurrerakinik emanen azken aurrerakinaren likidazioa egina ez badago. Gutxienez urtebete beharko da aurrerakin bat kitatu eta beste bat eskatu bitarte.

4. Dena dela, 10 urtean behin bakarrik emanen da aurrerakina eskaeraren arrazoia ohiko etxebizitza erostea bada edo hura erosteko banku-kredituen amortizazioa.

Aurreko bi puntuetan salbuespena eginen da, banantzearen ondorioz eskatzen bada aurrerakina.

5. Aurrerakin horiek adjudikatzean, lehentasun-irizpide hauei jarraituko zaie:

–Arau orokor gisa, Udalaren Erregistro Orokorreko sarrerako ordenak aginduko du.

–Eskaera batzuk egun berean eginez gero eta eskatutako dirua dagoena baino gehiago bada, lehentasuna emanen zaio aurrerakinak beste lankideek baino gutxiagotan jaso dituenari, eta, horretan ere berdintasunik gertatuz gero, soldata baxuena duenari emanen zaio, eta oraindik ere parean egotea gertatuz gero ordena hau ezarriko da:

• Ezkontza.
• Seme edo alaba baten jaiotza.
• Ohiko etxebizitza erostea edo hura eskuratzeko banku-kredituak amortizatzea.
• Dibortzioa edo banantzea.
• Enplegatuak edo lehen mailako ondorengoek ikastetxe ofizialetan ikasteko dituzten matrikulazio-gastuak.
• Lehentasuna izanen dute soldata maila txikiena duten langileek, goragoko mailakoen aurretik.
• Beste arrazoi batzuk.

Ekitaldi batean erantzun gabe gelditzen diren eskaerek hurrengoan lehentasuna izanen dute.

6. Langile interesdunak eskaera idatzia egin beharko du, eta gastu edo inbertsioak egiaztatzen dituen dokumentazioa gehitu. Horretarako, bi hilabeteko epea izanen du gertaera eragilearen egunetik aitzina. Gertatu baino bi hilabete lehenago egiten ahal da eskaera.

7. Itzulketa: aurrerakin bereziak gehienez 24 kuota berdinetan itzuliko dira. Aldez aurretik kitatzen ahal da, enplegatuak hala nahi badu.

8. Aurrerakina itzultzeko, onuradunak hilean jaso behar duen soldatatik kenduko da kuotaren zenbatekoa. Onuradunak eszedentzia edo soldatarik gabeko baimena eskatzen badu edo udalean egiten dituen zerbitzuak uztea edo etetea ekartzen duen beste edozein egoera gertatzen bada, oraindik itzuli gabe duena itzuli egin beharko du. Azken kasu horretan, behartua dago etenaldiko kuotei dagokiena hilabetero itzultzera, zein den ere horretarako arrazoia.

9. Aurrerakina zer gastu edo inbertsiotarako den behar adina egiaztatzen ez bada, berehala kenduko da eta oso-osorik itzuli beharko da, dagozkion interesekin batera.

10. Aurrerakin berezia jaso duenak ez du soldata aurrerakinik eskatzen ahalko hura amortizatu bitarteko hilabeteetan.

24. artikulua. Lanpostuen mugigarritasuna.

1. Lanpostuak betetzeko edozein deialdi baino lehen, egungo langileen barne-mugigarritasunerako aukera guztiak agortuko dira, lekualdatze-lehiaketen edo deialdi murriztuen bidez, langileen mugigarritasunerako prozedurari buruzko abenduaren 29ko 388/1997 Foru Dekretuan ezarritakoarekin bat.

2. Langileek gora egiteko, lekualdatze-lehiaketak edo deialdi murriztuak eginen dira. Horiek eraentzeko baldintzak eta baremoak ordezkari sindikalekin negoziatuko dira.

3. Egintzak eginen dira plantillaren egonkortasuna lortze aldera eta, behar denean, mugigarritasun horizontala lortze aldera, Udalaren giza baliabideak birkokatuz eta/edo egokituz, ahalik zerbitzu onena emateko.

Udalak, ahal bada eta aplikatzekoak diren legeen arabera, ezintasun iraunkor osoa aitortua duten langile finkoak birkokatuko ditu daukaten hondar-gaitasunarekin bateragarri diren lanaldi partzialeko lanpostuetan. Lanaldi horri dagokion ordainsariaren eta ezintasunagatik jasotakoaren baturak aurreko lanpostuko soldataren %100 eginen du. Ezintasuna lan-istripu baten ondorioz gertatu bada, Udalak nahitaez bete beharko du hori, betiere plantilla organikoan langilearen ezintasunarekin bateragarria den lanposturik badago.

Langile finkoen lanpostuetan osasun-arrazoiengatiko aldaketak egiten ahalko dira, betiere mediku baten txostena tarteko, eta indarra duten arauen arabera. Horretarako, plantilla organikoan lanpostu egoki bat izan beharko da. Adostasunik ez bada, Nafarroako Lan Osasunaren Institutuari edo antzeko organo espezializatu bati txostena eskatuko zaio.

55 urte betetzean, lan nekagarri, toxiko edo arriskutsuak egiten dituzten funtzionarioak beren gaitasunentzat egokiagoak diren beste lan batzuk egiten hasiko dira, beren zerbitzuaren barnean, posible izanez gero eta aplikatu beharreko arauei jarraikiz. Lan horiek bigarren jarduerako lantzat jotzen dira.

Lanpostu hutsak deialdi irekian atera aurretik, udal-langile finko guztiei eskainiko zaizkie, ahal izanez gero. Horrela, lehenik eta behin lekualdatze lehiaketak eginen dira. Ondotik, hutsik gelditutako lanpostuak Funtzio Publikoaren Estatutuaren 15. artikuluan ezarritakoa kontuan hartuta beteko dira.

25. artikulua. Bizi, istripu eta erantzukizun zibileko aseguruak.

Udalak kontratu hauek sinatuko ditu:

–Istripu-aseguruko poliza bat, egunaren 24 orduetarako, 50.000 euroko estaldura izanen duena istripuagatiko heriotzarako eta 120.000 eurokoa baliaezintasun oso edo partzialerako, baremoaren arabera.

–Bizi-aseguruko poliza bat, egunaren 24 orduetarako, 36.000 eurokoa, heriotza eta lanerako erabateko ezintasun iraunkorra edo osoa hartuko dituena.

–Erantzukizun zibileko poliza bat langile guztientzat, lanaren ondorioz sor daitezkeen erantzukizunak estaliko dituena.

Bi urtean behin eguneratuko dira.

Polizaren baldintzen eta estalduraren kopia gaurkotua emanen zaie ordezkari sindikalei.

26. artikulua. Enplegu publikoaren defentsa. Zerbitzu publiko hoberako.

Zerbitzu publiko hobea, herritarrengandik hurbilagoa, eraginkorragoa eta gizartearentzat errentagarriagoa emateko helburuarekin, enplegu publikoa defendatu nahi dugu.

Horregatik, udal langileek egiten ahal dituzten lanak ez zaizkie adjudikatuko enpresa pribatu edo publikoei. Udaleko langileak diogunean ulertu behar da Udalak une bakoitzean dituen langileez edo zerbitzuak egiteko behar lituzkeen langileez ari garela. Beraz, baliteke lanpostuak sortu eta lan publikoaren eskaintza egin behar izatea.

Lan edo zerbitzuren bat enpresei esleitu beharra badago, akordio honetatik legez aplika daitezkeen baldintza guztiak jaso eta aplikatzeko eskatuko zaie. Halakoetan aldi baterako kontratatzen diren langileak subrogatu egin beharko dira, Langileen Estatutuaren 44. artikuluarekin bat.

Udalak ez du inolako lan kontrataziorik egiten ahalko ABLEak erabiliz.

Kanpoko kontratazioetan, lizitatzaileek kontratatutako langileen lan-baldintzak baloratuko dira klausula sozialak ezarriz.

27. artikulua. Lanaldi murrizketa.

Nafarroako administrazio publikoetako langile funtzionarioen lanaldiaren murrizketa arautzen duen apirilaren 4ko 27/2011 Foru Dekretua aplikatuko da.

Lege testu horren 4. artikuluan aurreikusitako kasuei dagokienez, hau da, lanaldi murriztua (herena edo gehiago murriztea) ematea zerbitzuaren beharren menpe noiz egonen den. Hauek dira kasuak:

"a) Funtzionarioak berrogeita hamabost urte edo gehiago baditu.

b) Funtzionarioak lanerako aldi baterako ezintasunik edo ezintasun iraunkorrik sor ez dezakeen eritasuna badu, lan arriskuen prebentziorako unitate organikoak hari buruz emandako txostenaren arabera.

c) Funtzionarioak, legezko zaintza dela medio, zuzenean bere kargu badu hamabi eta hamasei urte (biak barne) bitarteko haurren bat.

d) Funtzionarioaren interes partikularrengatik."

Lege-testu horren 5. artikuluan aurreikusten diren kasuei dagokienez, zeinetan lanaldi-murrizketa ematea zerbitzuaren beharrak estaltzeko haiek ordeztea beharrezkoa ez izatearen mende baitago, salbuespen gisa jasotzen da lanaldiaren 1/8aren, 1/6aren edo 1/4aren lanaldi-murrizketa emateko aukera, baldin eta plantillako beste langile baten lanaldia areagotuz ordeztu badaiteke. Horretarako, beharrezkoa izanen da dagokion atal edo zerbitzuko arduradunaren eta giza baliabideetako ataleko arduradunaren berariazko baimena.

Murrizketa txikiagoa bada, zerbitzu-arduradunarekin negoziatzen ahalko da.

Berriozarko Udalak konpromisoa hartzen du lanaldi murriztua onartzeko ahal den guztia egiteko, salbu eta zerbitzuaren beharrengatik erabat ezinezkoa denean, behar bezala justifikatuta.

28. artikulua. Zerbitzu bereziak, eszedentziak eta etenaldiak.

Nafarroako Administrazio Publikoen zerbitzuko Langileen Estatutuaren Testu Bateginak agintzen duenaren arabera jokatuko da. Puntu hauetan izan ezik:

–Langileren batek hautapen probak gainditu ondotik Administrazio bereko beste lanpostu bat eskuratzen duenean, deialdi publiko batean txanda irekian nahiz murriztuan, lanpostu berrirako ezarritako probaldia gainditzen ez badu, lehen zeukan lanpostura itzuli beharko du.

–Behar izanez gero Gizarte Segurantzako Institutu Nazionalarekin hitzarmena eginen da eszedentzia berezietan kotizazioa osatu ahal izateko.

29. artikulua. Ordainsariak lanaldi murriztuan.

Aplikatzekoa den indarreko legeriari jarraituko zaio.

30. artikulua. Ordainsariak aldi baterako kontratuetan.

Udalak, edozein modalitatetan, aldi baterako kontratatutako pertsonek indarreko legeen araberako ordainsariak jasoko dituzte.

31. artikulua. Erretiroak.

Langileek erretiro aurreratua hartzen ahalko dute, erretiro aurreratua zilegi eta legezkoa denean, bai eta lanaldi partziala eta errelebo-kontratua ere. Udalak hori bere langileei aplikatzeko behar diren urratsak eginen ditu.

32. artikulua. Laneko segurtasuna eta osasuna.

Laneko arriskuak galarazteko araudia eraginkortasunez aplikatzen dela bultzatuko da, arreta honako alderdi hauetan jarriz bereziki:

a) Arriskuen ebaluazioa:

Arriskuen hasierako ebaluazioa eginen da, lanpostuz lanpostu, onetsitako prozeduren eta finkatutako lehentasun-hurrenkeraren arabera.

Arriskuak ebaluatu eta emaitzak ikusirik, prebentzio-jardueraren plangintza eginen da, neurri zuzentzaileak, prestakuntzakoak eta jarraipen edo kontrolekoak hartuz, detektatzen diren arrisku-egoeren aurrean, administrazio bakoitzeko arduradunek beren gain hartu beharreko planaren edo programaren barnean.

Prebentzio-jardueren plangintza behar bezala egite aldera, Administrazioak behar diren giza baliabideak eta baliabide materialak jarriko ditu eta diru-baliabide egokiak esleituko ditu.

b) Laneko arriskuen prebentziorako lan-prozedurak.

Laneko arriskuen prebentzioaren arloan, lan-prozedurak ezarri eta eguneratuko dira, arreta honako hauetan jarriz bereziki:

–Kontratak eta azpikontratak. Ondasunak eskuratu edo erostea. Osasunaren zaintza.

–Laneko istripuak eta lanbide-eritasunak.

–Larrialdietarako neurriak eta planak.

–Prestakuntza eta informazioa.

c) Langileen osasuna zaintzea eta kontrolatzea.

Langileei aldian-aldian mediku-azterketa eginen zaie, lanpostu bakoitzean izaten ahal diren arriskuen arabera.

Zein maiztasunez eginen den eta, hala behar denean, nahitaezkoa noiz den, aldez aurretik erabakiko da Segurtasun eta Osasun Batzorde bakoitzean.

d) Beren lanpostuan jarduteko ezintasuna duten langileen birkokapena.

Udalak, ahal baldin bada, daukaten hondar-gaitasunarekin bateragarria den lanpostu batean birkokatuko ditu ezintasun iraunkor osoa aitortua duten langile finkoak. Nolanahi ere, eginahala eginen da eragindako pertsonari aukera emateko kobratzen ari zen ordainsariak osatzeko nahikoa den lanaldi partziala egiteko.

Ezintasuna lan-istripu edo laneko eritasun baten ondorioz etorri baldin bada, Udala hori egitera behartuta egonen da.

Langile finkoen lanpostuetan osasun-arrazoiengatiko aldaketak egiten ahalko dira, betiere mediku baten txostena tarteko. Horretarako, plantilla organikoan lanpostu egoki bat izan beharko da, indarra duten arauen araberakoa.

e) Larrialdietarako planak edo neurriak.

Udaleko lantoki guztietan larrialdietarako planak edo neurriak idatzi eta betearaziko dira, eta behar den tokietan simulakroak eginen dira aldian-aldian.

f) Langileentzako prestakuntza eta informazioa.

Langileentzako prestakuntza eta informazioa bultzatuko dira, prestakuntza teoriko eta praktikoa jaso dezaten, nahikoa eta egokia, beren lanpostuan atzemandako arrisku-faktoreak kontrolatzeko hartu beharreko babes- eta prebentzio-neurriei buruz.

Prestakuntza NAPIren edo bestelako erakundeen bidez emanen da, hala administrazioan lehenbizikoz sartzean, nola aldian-aldian, ekipamendu berriak erosi edo teknologia berriak ezartzeagatik lan-baldintzak aldatzen badira, eta lanpostuarekin zerikusia duten alderdi guztiak ukituko dira.

Sexu-jazarpenaren eta mobbing-aren kontrako prebentzio eta ekintza protokolo bat ezartzea (IV. eranskina).

33. artikulua. Funtzionario bihurtzea nahi izanez gero.

Nafarroako Gobernuak beste prozesu bat abiarazten duenean Nafarroako toki-entitateetako lan-kontratudun finkoak funtzionario bihurtzeko, Berriozarko Udalak aukera horretaz baliatzeko bideak emanen dizkie bere lan-kontratudunei, nahi izanez gero funtzionario bihurtzeko epea irekiz.

34. artikulua. Udaleko ordezkari sindikalentzako informazioa.

Udalak informazio hauek eman behar dizkie udaleko ordezkari sindikalei:

–Prestakuntzarako eskaerak, irizpideak eta emandako baimenen zerrenda.

–Osasun-poltsarako eskaerak, irizpideak eta emandako baimenen zerrenda.

–Urtean egindako aparteko orduen zerrenda, zerbitzuz zerbitzu eta langile bakoitzeko.

–Aurrerakinetarako eskaeren zerrenda.

–Aseguru guztien polizak eta estaldurak.

–Langileak kontratatzeko xedearekin edozein prozeduraren bitartez egin diren kontratuen zerrenda.

I. ERANSKINA.–MUSIKA-ESKOLAKO IRAKASLEAK.

1. Berriozarko Udalak, lan hitzarmena sinatzearekin batera, lanaldi osoa eta finkoa aitortuko die Musika Eskolako irakasleei, udalarekin lan-kontratu finkoa eduki eta bi egoera hauetako batean badaude:

–Lanaldi osoan aritzea ikasketetako bigarren kurtsotik hasita.

–Ikasketetako hirugarren kurtsotik lanaldi osoaren %90ean bederen aritzea.

Nolanahi ere den, lortutako lanaldia kurtso bakoitzean izandako matrikula-kopuruaren ondorio zuzena izanen da, irakasle bakoitzak ematen dituen gaien barnean, eta hori, berez, lanaldia luzatzeko arrazoi izanen da.

Zuzeneko irakaskuntza-orduen murrizketa hau ezartzen da:

• 2025-2026 ikasturte akademikoa: lanaldi osoa 23 zuzeneko irakaskuntza ordutan.
• 2026-2027 ikasturte akademikoa: lanaldi osoa zuzeneko irakaskuntzako 22 ordutan.

Norberaren kontuetarako egunak zuzeneko irakaskuntza bukatu ondotik edo hasi aurretik hartzen ahal dira, eta opor egunekin elkartzen ahal dira.

2. Kasu horietan, Administrazioaren eta langilearen artean sinatzen den kontratuak, lanaldi osoa biltzen duenak, ezarriko du zer lan betetzen zituen ordura arte interesdunak; besteak beste, bere espezialitatea eta beste batzuk irakastea, hala nola musika hizkuntza eta abar, xede anitzeko kontratu batean.

II. ERANSKINA.–ZERBITZU ANITZEKO ATALA

Aparteko orduei dagokienez, hitzarmenaren 6. artikuluan xedatutakoak eraenduko du zerbitzu anitzeko atala, salbuespen hauekin:

1. Lanegun-izaerako jaiegunak edo zerbitzuaren beharren ondoriozkoak:

Lan-egutegian jasota dauden lanegun-izaerako jaiegunetako (Berriozarreko festak) aparteko lanaldiak konpentsatzeko, ordu-konpentsazioa edo ordainsari ekonomikoa erabiliko dira, langileak hautatzen duena. Ordainsari ekonomikoa aukeratzen badu, hauek hartuko dira kontuan:

Orduko prezioak urtero eguneratuko dira, Nafarroako Gobernuaren ordainsari-tauletan jasotako igoeraren arabera.

Urteko egutegian xedatuko dira zerbitzuko arduradunak baimendu beharreko lanegun-izaerako jaiegunak, eta egiten dituzten langileek gero zerbitzuko arduradunari justifikatu beharko dizkiote.

Aparteko orduak ohiz kanpoko kasu eta jarduketetan bakarrik eginen dira, eta langile bakoitzak inola ere ez ditu aparteko 45 ordu baino gehiago egiten ahalko urtean.Zerbitzu batean metatutako aparteko orduak gehiegi direla egiaztatzen bada, plantilla handitzeari buruzko azterketa bat eginen da.

Larrialdi-egoeretan egindako aparteko orduak honela zenbatuko dira:

• 30 minutu edo gutxiago, lanegunean: ordu bat.
• 30 minutu baino gehiago, lanegunetan: 2 ordu.
• 30 minutu baino gehiago, jaiegunetan: 2,5 ordu.
• 30 minutu baino gutxiago, jaiegunetan: 2 ordu.

III. ERANSKINA.–LANA ETA BERDINTASUNA

Udaleko berdintasun-batzordea Udalean lan egiten duten gizon eta emakumeen lan-kontuez arduratuko da. Behin batzordea sortuta, Udaleko berdintasun-egoeraren berri emanen digun diagnostikoa egin beharko da. Diagnostiko horrek bereizkeriazko egoerak antzematen lagunduko digu, eta halakoak ezabatzeko ekintzak antolatzen ahalko ditugu. Halaber, udalean abian jarriko ditugun ekintzak lehenesten ahalko ditugu.

Batzordeak eginkizun hauek izanen ditu, besteak beste:

–Berdintasun-printzipioa sustatu eta bultzatzea alderdi eta egoera guztietan, eta sexuarengatiko bereizkeria-mota guztiak ezabatzea.

–Lana eta familiako bizitza uztartzeko neurriak prestatzea, pertsonen beharretara eta lanpostu bakoitzaren berezitasunetara egokituta.

–Langileak hautatu, kontratatu eta mailaz igotzeko prozedurak berrikusi eta zehaztea, bereizkeriarik gabekoak izan daitezen. Administrazioan sartzeko hautapen-prozedura gardena izan dadila bermatzea, lan-eskaintzak idazteko eta zabaltzeko moduan bereizkeriarik egin gabe.

–Ekintza positiboak garatzea, bereziki kontratazioan, prestakuntzan, igoeran eta, oro har, lan-baldintzetan.

–Aitatasun-baimena hartu ahal izateko neurriak.

Gaur egun bi asteko lizentzia ematen da. Eskubide horiek norberarenak eta denontzat berdinak direla aldarrikatu beharra dago. Eskubide hori erabiltzeko egoeran dauden guraso bakarren, bananduen edo dibortziatuen kasuan, aitatasun-baimenaren iraupena luzatzea.

–Oporraldiak hautatzeko lehentasuna.

Oporraldiak hautatzeko lehentasuna, norbait beren kargura duten langileentzat, hura zaindu ahal izateko. Guraso bakarrak, bananduak edo dibortziatuak.

–Berdintasunari buruzko prestakuntza.

Udalak berdintasunezko prestakuntza sustatuko du plantillako langile guztientzat.

–Kontratazioa.

Udaleko plantillaren diagnostikoa eginen da eta ekintza positiboak eratuko dira bi sexuetako langileak egon daitezen ardurako lanpostuetan eta orain arte gizonezkoek bakarrik bete izan dituzten lanpostuetan.

Aldagelak emakumezkoentzat eta gizonezkoentzat egokituko dira.

Emakumezkoen aldi baterako enplegua ez dadila izan gizonezkoena baino ohikoagoa.

–Prestakuntza eta sustapena.

Aldi baterako lizentzia edo baimena hartuta norbait zaintzen aritu diren langileek, mailaz igotzeko aukera gutxiago izan ez dezaten, lehentasuna izanen dute udal-langileentzat egiten diren prestakuntza-ikastaroetara joateko.

IV. ERANSKINA.–SEXU-JAZARPENAREN KONTRAKO PREBENTZIOA ETA PROZEDURA/PROTOKOLOA

Laneko sexu-jazarpena, Europako Batzordeak 1991ko azaroaren 27an emandako 92/131 Gomendioan dagoen definizioaren arabera, laneko harremanetan emakumezkoen eta gizonezkoen duintasunari kalte egiten dion jokabide edo portaera sexuala da. Sexu-jazarpenak nahi ez den jokabide fisiko, hitzezko edo hitzez bestekoa ekar dezake berekin, eta haren ezaugarri nagusia da biktimak edo portaeraren xede den pertsonak ez duela halakorik jasan nahi.

Udalak hitz ematen du deklarazio bat eginen duela sexu-jazarpenik ez dela onartuko adierazteko.

Udalak hitz ematen du prestakuntza eskainiko duela sexu-jazarpena identifikatzeko, salatzeko eta hari aurrea hartzeko.

Sexu-jazarpenezko egoerei aurre egiteko prozedura/protokoloa prestatuko da. Aurretik langileen batzorde bat eratuko da, protokolo hori prestatzeko irizpide zehatzak ezar ditzan.

Udalaren diziplina-arauetan sexu-jazarpenezko portaerak eta dagozkien zehapenak jasoko dira.

Udalak hitz ematen du goian aipatutako protokoloaren berri zabalduko duela.

V. ERANSKINA.–NEGUKO BIDEZAINTZA PLANA

Plan honen xedea da elurteen eta izozteen eragina ahalik eta gehien gutxitzea Berriozarko Udalaren jabari publikoko eremuan, bai eta herriko bizilagunentzat eta ibilgailuetan dituzten ondorioak ere, udalerrian barnako zirkulazioa eta bertatik atera eta sartzeko mugimenduak errazteko asmoz.

Tenperaturak jaitsi behar duela eta elur-arriskua dagoela aurreikusten denean, Obra Zerbitzuak gatza izanen du gorderik, behar denean erabiltzeko, eta larrialdi bati aurre egiteko tresnak eta ibilgailuak gertu.

Plana abiaraztea beharrezkoa bada, elurteak edo izozteak gertatzeagatik, gauez izan, arratsaldez izan nahiz lanaldiaren barnean izan, Hirigintza Batzordeko buruak (edo, hura ez badago, alkateak) baloratuko du egoera eta erabakiko du Larrialdi Plana abian jartzea edo ez; hartzen duen erabakia Udaltzaingoko buruari eta Obra eta Zerbitzuen Alorreko buruari jakinaraziko die.

Plana abian jarrita, Obra Zerbitzuko Burutzak Lorategien eta Garbiketaren arduradunekin hitz eginen du, beren langileak antola ditzaten.

Kaleetako eta errepideko egoerak hala eskatzen badu, lanaldia goizeko 6:00etan hasiko da, arduradun batekin eta langile batekin. Geroago, goizeko 7:00etan, obra, lorategi- eta garbiketa-zerbitzuetako gainerako langileak honako hauetatik elurra edo izotza kentzen eta garbitzen arituko dira bereziki: oinezkoendako pasabideak, udal eraikinetako edo zerbitzu publikoetako sarbideak, autobus-geltokiak, etab.; arduradunek agindutako lan guztiak ere beteko dituzte. Ordutegiak aldatzen ahalko dira denboralearen ezaugarrien arabera.

Lehentasun-ordena.

1.–Berriozarko etorbidea eta Mendialdea ikastetxeko sarbidea garbitzea, autobusak igaro daitezen, arreta berezia emanez trenbidearen gaineko zubiari eta alde zaharreko sarbideari (kaleak berriki urbanizatu direnez, ez da komeni gatza botatzea, salbu eta arazo gehien sortzen diren tokietan; adibidez, garbitokitik Matxinen larrainera bitarte).

2.–Osasun-etxearen sarbideak garbitzea.

3.–Adinekoentzako zentroaren sarbideak garbitzea.

4.–Urtxintxa haur-eskolarako sarbideak garbitzea, zeina Errota kalean baitago.

5.–Instituturako sarbidea irekitzea eta korridore bat egitea, institutura errazago sartzeko.

6.–Ikastetxeko autobus geltokiak garbitzea (Etxaburua kalean eta Berriozarko etorbidean).

7.–Hiriko autobusen geltokiak garbitzea (markesinen inguruak garbitzea).

8.–Berriozarko oinezkoentzako pasabideak garbitzea.

9.–Herriko kaleetako zirkulazioa ahalbidetzea.

Gatza banatzea bizilagunei eta saltokiei.

Denen laguntza sustatzeko xedez, Udalak gatz-zakuak utziko ditu herriko zortzi tokitan, palet batzuetan, bizilagunek erabil dezaten gatz hori. Toki hauetan egonen dira:

–Etxebakar eremua, Ardantzeta eta Eunsasi kaleen arteko bidegurutzea.

–Konstituzio plaza.

–Berriozarko etorbidea, Lantzeluzeko parkearen aurrean.

–Zortziko eta Lantzeluze kaleen artean.

–Etxaburua kalea, Nafarroako Emaileen plazaren parean.

–Etxaburua kalea, udaletxearen parean.

–Probintzietako errege-altxonbidearen kalea eta Eunsasi elkartzen diren tokia.

–Parte zaharra, memoria historikoaren ibilbideari buruzko informazioa ematen duen kartelaren ondoan.

Udalak, sare sozialen edo eskura dituen bestelako baliabide batzuen bidez, herritarrei jakinaraziko die non dauden gatz-zakuak eta zein diren herritarren betebeharrak espaloiak garbitzeari dagokionez; bide-garbiketari eta hondakin solidoei buruzko udal-ordenantzan jasotzen dira betebehar horiek.

Makineria-Erreminta.

Toyota, hortzarekin, pilatutako elur-kantitatea dela-eta beharrezkoa denean baizik ez da erabiliko, batetik, makina eta kalea azkarregi ez hondatzeko, eta bestetik, elurra ez trinkotzeko, izotza sortzen baita toki ospeletan edo hotza handia denean.

Arreta berezia beharko da abiadura moteltzeko kautxuzko oztopoak dauden tokietan, oinezkoentzako zebra-bideen ondoan. Toki horietan, ibilgailuaren gidariak hortza jaso beharko du, zoruan kalterik ez egiteko.

Zerbitzu anitzeko atalak dituen gainerako ibilgailuak helburu hauetarako erabiliko dituzte langileek: garbitzea dagokien eremuetara joateko eta toki horietatik elurra garbitzeko behar diren gatza eta tresnak eramateko.

Laneko ekipoak.

Obra Zerbitzuko Burutzak Berriozarko plano bat eginen du, eremutan banatua (lanerako dauden langileen arabera, eremu-kopurua bat edo bestea izanen da). Eremu bakoitzera gutxienez 2 langile joanen dira ibilgailu batekin, zeinean elurra kentzeko behar diren tresnak eta kaleetan botatzeko gatza eramanen baitituzte.

Egoera kontrolpean dagoela jo arte arituko dira lanean.

Laneko arriskuen prebentzioa.

Langile guztiek arreta handiz jokatuko dute beren segurtasunari dagokionez, inolako kalterik ez sortzeko, ez pertsonengan ez gauzetan, kontuan hartuta izotza edo elurra dagoelarik maizago gertatzen direla auto-istripuak eta erorikoak. Beraz, nahitaezkoa izanen da ikusgarritasun handiko ekipamenduak erabiltzea.

Lan egindako orduen konpentsazioa.

Neguko Bidezaintza Planeko zerbitzuetako langileek, elurte edo izozteak direla-eta bete beharreko jarduketetan, ezarritako lanalditik kanpo egiten dituzten lanorduak aparteko ordutzat hartuko dira, eta konpentsazio hau izanen dute:

Goizeko 6:00etatik 7:00etara, ordu bakoitzeko 2,5 orduko konpentsazioa izanen da.

Arratsaldez emandako orduak Berriozarko Udalaren Lan-hitzarmen Kolektiboan ezarritakoari jarraikiz konpentsatuko dira.

Larunbatean lan egindako ordu bakoitzeko 2,5 orduko konpentsazioa izanen da. Oro har, igandeetan ez da horrelako lanik egin beharko.

Abenduaren 26an goizeko 9:00etatik 14:00ak arte lan eginen da, eta konpentsazioa bi lanegunekoa izanen da.

Kondizio horietan, zerbitzura sartzeko unetik aplikatuko da ordainketa, premia gorabehera.

VI. ERANSKINA.–BATZORDE PARITARIOA

Langileen Estatutuari buruzko Legearen testu bategina onesten duen martxoaren 24ko 1/1995 Legegintzako Errege Dekretuaren 85.3 artikuluko c) eta e) ataletan xedatua bete beharrez, lege-testu beraren 82.3 artikuluak aipatzen dituen lan-baldintzak ez aplikatzean sor daitezkeen desadostasunak egoki konpontzeko prozedurak ezartzen dira. Halaber, alderdi negoziatzaileen ordezkarien Batzorde Paritarioa izendatzen da, legean ezarritako gaien eta esleitzen zaizkion beste guztien gainean aritzeko, baita batzorde horrek jarduteko prozedurak eta epeak finkatzeko ere, bertan sortzen diren desadostasunak gatazkak konpontzeko sistema ez-judizialen mendean uztea barne, zein 83. artikuluan Estatuko edo autonomiako esparruetarako aurreikusitako lanbide arteko akordioen bidez ezarri baitziren.

Hitzarmenaren Interpretazio eta Jarraipenerako Batzorde Paritarioak honako jarraibideak, prozedurak eta epeak kontuan harturik jokatuko du.

Batzorde Paritarioaren funtzioak hauek izanen dira: akordioa interpretatzea, bitartekaritza eta arbitrajea, kontziliazioa eta beteko dela zaintzea. Halaber, bere eginkizuna izan daiteke, hitzarmenak irauten duen bitartean, hitzarmena egokitu edo aldatzea.

Orokorrean, Batzorde Paritarioa sei hilean behin bilduko da, eta edozein alderdi sinatzailek eskatzen duenean. Eskaera egin eta gehienez ere astebeteko epean eginen da bilera. Eskaera idatziz eginen da, aztertu beharreko gaia edo gaiak zehaztuta.

Oro har, bi alderdiak ados daude hitzarmena aplikatzerakoan, ez aplikatzerakoan, kanpo gelditzerakoan edo interpretatzerakoan sor litezkeen arazo, desadostasun eta gatazka guztiak Batzorde Paritarioaren mende jartzeko, gorabehera horiek Nafarroako Lan Auzitegiaren edo lan-arloko jurisdikzio eskudunaren esku jarri aurretik. Desadostasunak gehienez ere zazpi eguneko epean ebatzi beharko dira, Batzorde Paritarioan aurkezten direnetik.

Batzorde Paritarioaren erabakiek hitzarmen kolektiboaren testuaren balio bera izanen dute, Langileen Estatutuaren 91.4 artikuluan xedatutakoarekin bat, eta berehala argitaratuko dira zentroko iragarki-taulan.

Langileen Estatutuaren 82.3 artikuluan ezarritako inguruabarrak agertzen direnean, eta Batzorde Paritarioan akordioa lortzerik izan ez bada, alderdi sinatzaileek erabaki dute horrelakoetan gatazka Nafarroako Lan Auzitegiaren esku jarriko dutela, Foru Komunitatean indarra duen lanbide arteko akordioan ezarritako baldintzak eta epeak betez. Bitartekotza aginduzkoa izanen da organo judizialean demanda jartzeko, eta arbitrajea borondatezkoa izanen da beti.

VII. ERANSKINA.–LAN-ORDUTEGIAREN MALGUTASUNARI BURUZKO JARRAIBIDEAK

Alkatetzaren ebazpenaren bidez ezarriko da, urtero (edo behar denean), udal-langileek egunero izanen duten lan-ordutegia, zerbitzuaren beharren arabera.

Berriozarko Udalaren zerbitzuko funtzionarioen eta administrazio-kontratudunen lan-baldintzei buruzko akordioaren testuan eta langile lan-kontratudunen lan-baldintzei buruzko hitzarmenaren testuan, ezartzen da testu bat prestatuko dela, bertan jasotzeko langileen lan-ordutegia malgutzeko neurriak ezartzeko plan bat, bai eta telelana aplikatzeko aukera ere, ordezkari sindikalekin negoziatu ondotik.

Akordioaren/Hitzarmenaren atal hori garatzeko, lan-ordutegia pixkanaka malgutzeko neurriak ezartzeko jarraibideak negoziatu dira Langileen Batzordean, eta Langileen Batzordea ados agertu da neurri horiekin.

Horregatik guztiagatik, zerbitzu publikoari kalte egin gabe enplegatu publikoen lan-bizitza eta familiakoa bateragarri egiteko, bidezkoa da udal honen zerbitzuko langileen lan-ordutegia malgutzeko jarraibideak onestea. Jarraibide horiek pixkanaka ezarriko dira zerbitzuetan, baldin eta zerbitzu-beharrak betetzen badira.

1. Ordutegi-malgutasuna aplikatzeko jarraibideak:

a) Astelehenetik ostiralera, eguneroko lanaldia, orokorki, 7 ordu eta 20 minutukoa izanen da (edo, halakorik ezean, aplikatzekoa den araudian xedatzen dena).

Laneko ordutegiaren zati finkoa, langile guztiak lanpostuan nahitaez egotea eskatzen duena, honako hau izanen da zerbitzu hauetarako: herritarrentzako arreta-bulegoa, hirigintza-arloa, kontu-hartzailetza arloa, langile teknikoak eta Idazkaritza: 9:00-14:30, astelehenetik ostiralera.

Aipatutako arlo horietako bakoitzean pertsona bat egonen da, nahitaez, 8:00etan, egunero, astelehenetik ostiralera.

Eguneko lanaldia osatzeko falta den denbora (minutuak) 7:00etatik 9:00etara eta 14:30etik 18:00etara eginen da, enplegatuak aukeratzen duenean eta malgutasunez.

Aipatutako lanaldi malgu hori urte osorako modu orokorrean finkatu den lanaldiaren banaketaren ondorioz eguneko lanaldiak jasaten ahal dituen aldaketen mende egonen da.

b) Ordutegia malgutzeko neurri zehatz gisa honako hau ezartzen da: beren ardurapean adineko pertsonak, hamabi urtetik beherako seme-alabak (edo adin hori betetzen duten Lehen Hezkuntzako ikasturtea bukatu arte), desgaitasunen bat duten pertsonak edo eritasun larria duten bigarren gradurainoko ahaideak (odolekoak edo ezkontzakoak) dituzten enplegatuek lanpostura sartzeko ordutegia ordu erdi bat atzeratzeko eskatzen ahalko dute, hau da, 09:30era arte.

Eskari hori onartu eginen du alkatetzak baldin eta zerbitzuen funtzionamendu egokia bermatuta badago, eta enplegatuak behar bezala egiaztatzen badu neurri horrek argi eta garbi laguntzen diola bere familiako bizitza eta bizitza pertsonala bateragarriago izaten.

c) Langile bakoitzak modu jarraituan gehienez 10 orduko saldo positibo edo negatiboa izaten ahalko du eguneko lanaldiaren aldean. Saldo hori egunero eguneratuko da lanorduen kontrolerako sisteman.

10 ordutik gorako saldo positiboa baldin badu, soberako denbora hori ez da deusetarako kontatuko sisteman, eta horren truke ez da inolako konpentsaziorik emanen.

10 ordutik gorako saldo negatiboa izanez gero, dagozkion ordainsariak deskontatuko dira zuzenean nominatik.

d) Langileek gehienez hogei minutu iraunen duen atsedenaldi bat izanen dute lanaldiaren barnean. Atsedenaldi horrek ez dio eraginen zerbitzu emateari, eta orokorrean, 10:00etatik 13:00etara hartzen ahalko da. Nolanahi ere, zerbitzu bakoitzeko arduraduna saiatuko da zerbitzua atsedenaldian ere estalirik egon dadin, eta atsedenaldia ez dadin egin lanik handiena dagoen orduetan.

Atsedenaldia ezarritako denbora hori baino luzeagoa bada, soberakina aurreko atalean ezarritako saldo negatiboari egotziko zaio.

e) Justifikatuta egon beharko dute lanera ez joate eta puntualtasun- eta iraunkortasun-falta guztiek, aurreko paragrafoan aipatutako etenaldiek izan ezik, eta alor bakoitzeko buruak berariaz baimendu beharko ditu aldez aurretik.

f) Lanaldia lan-egutegiaren doikuntzengatik murriztu behar den kasuetan, murrizketa ahal dela lanaldiaren azken zatian aplikatuko da.

g) Puntualtasun arauak nahitaez lanpostuan egon behar deneko lanaldiaren hasieran eta bukaeran aplikatuko dira, eta ez da laxotasunik onartuko.

Laneratzea kontrolatzeko, presentzien kontrolerako sistema automatiko bat erabiliko da, eta enplegatu guztiek lantokira sartzean eta bertatik ateratzean fitxatu beharko dute nahitaez. Lanaldi bakoitzaren hasieran eta bukaeran fitxatu beharko da, baita lanaldiaren barruan lanetik ateratzen den eta sartzen den bakoitzean ere.

Lanaldia betetzeari buruzko kontrola unitate bakoitzeko arduradunek eginen dute. Horretarako, beste hainbat baliabideren artean, presentzien kontrolerako sistematik ateratako zerrendak erabiliko dituzte, Idazkaritzak aldian-aldian bidaliko baitizkie zerrenda horiek.

h) Lanaldiaren zati finkoa betetzen ez bada, eta, orobat, 10 orduko saldo negatiboan soberakina badago, lan egin ez den denborari dagozkion ordainsariak automatikoki deskontatuko dira nominatik. Eragiketa hori hilero eginen da, Idazkaritzak bidaltzen duen informazioa oinarri hartuta.

Deskontu hori Nafarroako Administrazio Publikoen Zerbitzuko Langileen Estatutuaren Testu Bateginaren 68. artikuluan eta ekainaren 12ko 117/1985 Foru Dekretuaren bidez onetsitako Diziplina Araubideari buruzko Erregelamenduaren 15. artikuluan xedatutakoari jarraikiz eginen da. Aldez aurretik, giza baliabideak kudeatzeko ardura duen pertsonak interesdunari horren berri emanen dio.

2. Zerbitzu bakoitzean ordutegi malgua pixkanaka ezartzeko prozedura eta irizpideak.

Alkatetzak emanen du ordutegi malgua zerbitzu bakoitzean ezartzeko baimena, ebazpen bidez.

Unitate guztietan herritarrei arreta emateko zerbitzua bermatu beharko da, ezarrita dagoen ordutegiaren barnean, baita gainerako zerbitzuen funtzionamendu egokia ere. Horretarako, zerbitzu bakoitzak ahalmena izanen du orokorrean ezarrita dagoen ordutegi malgua aplikatzeko mugak jartzeko unitate edo lanpostu jakin batzuetarako, behar bezala arrazoiturik.

Ematen dituzten zerbitzuen ezaugarriengatik unitate batean edo enplegatu talderen batean bidezkoa ez bada, ordutegi malgua ez da aplikatuko. Hori ezarriko da, arrazoiturik, kasuan kasuko unitate edo zerbitzuan ordutegi malgua baimentzen duen ebazpenean.

3. Lanaldi malgua pixkanaka ezartzeari buruzko jarraibideen aplikazioaren jarraipena.

Alkatetzak aldian-aldian jarraibide hauen gaineko kontrolak eginen ditu, giza baliabideen arloaren bidez. Beharrezkoa bada, bete daitezela eskatuko du, eta, behin eta berriz betetzeari uzten bazaio, baimena ezeztatzen ahalko du.

VIII. ERANSKINA.–LANTOKIAN JASATEN DIREN KANPOKO ERASOEI AURRE EGITEKO PROTOKOLOA

Prozedura honen xedea da langileei jakinaraztea zer egin behar den administrazioaren erabiltzaile baten erasoaren xede direnean lanean ari direlarik, beharrezkoak diren zuzenketa-neurriak hartzeko berriz ere gerta ez dadin.

Berriozarko Udalaren langile batek, lantokian nahiz lantokitik kanpo, bere lana betetzearen ondorioz honako jokabide bat jasaten duenean aplikatuko da:

–Larderiazko jokabideak.

–Indarkeria fisikoa edo ahozkoa.

–Bandalismoa: langile baten gauzak, zentroko altzariak edo instalazioak hondatu edo suntsitzen direnean.

Hasierako egoera.

Jendeari arreta ematen zaionean, bereziki aldez aurretik jokabide desegokiak izan dituzten erabiltzaileei arreta ematean edo haserre dagoen edo zaila den erabiltzaile bati arreta ematean, langileak honakoak hartuko ditu kontuan:

1. Lasai egon eta egoera bideratzen saiatu: EZ erantzun ahozko eraso edo probokazioei. Helburua da egoera bideratzea elkarren adostasuna bilatuz.

2. Segurtasun-tartea: segurtasuneko tarte egoki bat uzten saiatu eta, ahal bada, oztopo fisikoa jarri tartean (mahaia, erakusmahaia, etab.).

3. Irteerako atetik hurbil jarri, alde egitea beharrezkoa izanez gero. Irteerako aterako bidean oztoporik ez jarri, arazorik gabe alde egiteko.

4. Indarkeria-egoera arintzeko, laguntza eskatu edo jende gehiagori deitu, lekuko izan daitezen, beharrezkoa bada.

5. Lanari utzi egoera kontrolpean ez dagoen bitartean edo langilea behar besteko segurtasunez lanari berriz ekiteko moduan ez dagoen bitartean.

6. Berehala eman abisua (nagusiari) zerbitzuaren edo txandaren arduradunari, komunikaziorako bide egokiena erabiliz (walkie-a, telefonoa, alarma). Arduradunak, identifikatu ondotik, agindu argi eta zehatzak eman behar dizkie inplikatutakoei.

Zer egin erasoa gertatzean.

Arestian azaldutakoa eginda ere erabiltzailearen jarrerak oldarkorra izaten jarraitzen badu eta langileari eraso egiten badio, hauxe izanen da bete beharreko protokoloa:

1. Indarkeria-egoera gertatzen denean Udaltzaingoari deitu, ahal bada. Erasotzaileak alde egin ondotik ere poliziak datuak bildu ditzake, eta erasotzailea identifikatu, ezaguna ez bada.

2. Zerbitzuaren arduradunari abisua eman ez bazaio, berehala jakinaraziko zaio gertatu dena.

3. Eraso fisikoa baldin badago, langilea, erasoaren larriaren arabera, Mutua Navarrara edo ospitalera eramanen dute laguntzarako agiriarekin, lesioen agiria izateko.

4. Langilearen arduradunak adieraziko dio langileari polizia-etxean salaketa aurkeztu dezakeela erabiltzaile erasotzailearen aurka. Salaketa aurkezteko, Berriozarko Udaltzaingoaren bulegoetara joan beharko du lesio-agiria ematera, balego, eta erasotzaileaz dakien guztia esatera.

5. Arduradunak Laneko Arriskuen Prebentzio Zerbitzuari jakinaraziko dio gertatutakoa. Jakinarazpen hori langilearen historian jasoko da gertaera gisa, lesiorik ez badago, eta lan istripu gisa, lesioak baldin badaude.

6. Prebentzio Zerbitzuak gertaera ikertuko du eta berriz ez gertatzeko behar diren prebentzio-neurriak ezarriko ditu. Neurri horiek zenbait arlotakoak izanen dira (gaitasun sozialetarako prestakuntza, antolakuntza-neurriak, zaintzakoak). Ondorioak idatziz jakinaraziko zaizkie bai arduradunari bai langile inplikatuari.

7. Langileak, uneoro, honakoak izanen ditu eskura:

–Behar duen osasun-laguntza.

–Arreta psikologikoa, barne hartuta ondorioei aurre egiteko arreta eta euskarri emozional profesionala.

–Beharrezkoa duen laguntza juridikoa eta legala, langileak salaketa aurkezten badu.

Erabiltzaileak salatzen badu langilea, barneko txosten informatiboa irekiko da langilearen erantzukizuna argitzeko, eta, errugabea dela erabakiz gero, defentsa emanen zaio epaiketarako.

8. Prebentzio Zerbitzuak kasuaren jarraipena eginen du jakiteko proposatutako neurriak hartu diren eta eraginkorrak izan diren.

ERASOEN ERREGISTRO-ORRIA

Langileak bete beharrekoa:

 Izen-deiturak:

 Adina:

 Sexua: H  Ar.

 Lan-egoera: Finkoa  Aldi baterakoa 

 Zerbitzua:

 Lanpostua:

 Telefonoa:

 Erasoaren data:

 Erasoaren ordua:

 Lekukorik izan al zen? Ez  Bai  (baiezkoa bada, izen-deiturak idatzi):

 Zure lanpostua batetik bestera joatekoa bada, adierazi non zeunden:

 Zehaztu zertan ari zinen erasoa jasan zenuenean:

 Jasandako eraso-mota (bat edo batzuk):  Irainak  Mehatxuak  Gorputzeko lesioak

Beste batzuk:

 Osasun-zentro batera joan zara?  Bai  Ez

 Lan istripuak eragindako aldi baterako ezintasuna tramitatu da?  Bai  Ez

 Kontatu gertatutakoa kronologikoki: aurrekariak (aurreko uneak), indarkeriazko gertaera (erasotzailearen jokabidea), bukaera (langilearen eta ingurukoen erreakzioak).

(Langilearen sinadura)

Zerbitzuaren arduradunak bete beharrekoa:

 Izen-deiturak:

 Erasoaren data:

 Erasoaren ordua:

 Erasoa jakinarazi diote ........an (data jarri) eta langileari laguntza juridikoa eskaini dio:  Bai  Ez

 Bidali erregistro-orri hau gerentziara, prebentzio-zerbitzura eta prebentzioko delegatuei.

(Zerbitzuaren arduradunaren sinadura)

Prebentzioko delegatuak bete beharrekoa:

 Laguntza juridikoa eskatu du:  Bai  Ez

 Laguntza juridikoa eman da:  Bai  Ez

 Proposatutako neurriak:

 Gauzatutako neurriak:

(Prebentzioko delegatuaren sinadura)

IX. ERANSKINA.–LANEKO JAZARPENERAKO PROTOKOLOA

1. Justifikazioa.

2. Printzipioen adierazpena:

3. Protokoloaren xedea.

4. Aplikazio-eremua.

5. Laneko jazarpenaren definizioa.

6. Jarduteko prozedura.

1. Lehen fasea.

1.1. Prozedurari hasiera ematea.

1.2. Ikerketa eta hasierako balorazioa.

1.3. Hasierako balorazioaren txostenetik eratorritako proposamenak lantzea.

2. Bigarren fasea.

2.1. Aholku Batzordearen eraketa.

2.2. Ikerketa.

2.3. Batzordearen ondorioen txostena egitea.

3. Salaketa funsgabe edo faltsuak.

4. Informazioa.

5. Jarraipena eta kontrola.

6. Irizpideak eta prozeduraren bermeak.

Eranskinak

1.–Justifikazioa.

Protokolo honen bidez, Berriozarko Udalaren eta hango langile publikoak ordezkatzen dituzten sindikatuen konpromiso hau gauzatzen da: martxan jartzea langileen arrisku psikosozialak detektatuko dituzten neurriak, bai eta lan-jazarpeneko kexak dauden kasuetarako jarduketa-protokolo bat ere, dagozkion ekintzak egin ahal izateko eta laneko arriskuen prebentzioari buruzko legedia errazago aplikatzeko.

2.–Printzipioen deklarazioa.

I.–Langile orok du tratu duina, errespetuzkoa eta adeitsua jasotzeko eskubidea, eta ez da onargarria sexuaren, arrazaren, kondizio politiko, sindikal, ideologiko, sozial, fisiko eta laboralaren eta bestelako edozein egoeraren ondoriozko inolako diskriminazio-motarik.

II.–Eskubidea dute, halaber, haien integritate fisikoa eta morala babestua izateko laneko eginkizunetan ari direnean. Horretarako, administrazio honek konpromisoa hartzen du lan-ingurune osasungarri bat bermatzeko, zeinean oreka psikologikorako kaltegarriak izan daitezkeen eta estresa edo jazarpena eragiten dituzten jarrerak jazarriko baitira.

III.–Onartzea erakunde horietan egiten den lan-jazarpena arrisku psikosozialtzat joko dela eta, ondorioz, jarrera horiek eteteko beharrezko diren neurri zuzentzaileak hartuko direla. Halaber, biktimak babesteko neurriak hartuko dira.

IV.–Berriozarko Udalak bere langileen eskura jartzen du laneko jazarpenaren eta pertsonen oreka fisikoari, psikikoari eta sozialari kalte egin diezaioketen jarrera txarren gaineko kexak kudeatzeko protokolo hau. Protokolo hau aplikatzeak ez ditu oztopatuko pertsona jazarriak egin ditzakeen ekintza zibil edo penalak.

V.–Langile guztiek jasoko dute protokolo honen edukiari buruzko informazio pertsonalizatua, webgunean argitaratuko baita. Inprimaki bat ere argitaratuko da, zeina zerbitzu eta lantoki guztietan zabalduko baita.

VI.–Hauek dira protokolo honen printzipio gidariak: konfidentzialtasuna ziurtatzea eta inpartzialtasuna, justizia eta adiskidetzea bermatzea ukitutako guztientzat.

VII.–Udalak bere langile guztiei bermatzen die gai horien inguruko kexak planteatzeko eskubidea, intimidaziorik, tratu bidegabe, diskriminatzaile edo kontrakorik jasateko eta errepresaliak jasotzeko beldurrik gabe.

VIII.–Ordezkari sindikalek kexen kopuruari eta ebazpenari buruzko informazioa jasotzeko eta prozesuan parte hartzeko duten eskubidea onartzen da.

3.–Protokoloaren xedea.

Protokolo honen xedea da laneko jazarpena edo estres-egoerak eragin ditzaketen eta, hortaz, saihestu behar diren jarreren kode bat definitzea.

Jarduketa-protokolo adostu bat ezartzea, kexak jatorrian konpon daitezen, efikaziaz eta bizkor, ez dadin gatazkarik sortu eta, modu horretan, pertsonei eragindako kalteak minimizatzeko.

Berriozarko Udalean laneko jazarpena izan daitezkeen jarrerak gertatuz gero jarraitu beharreko jarduketa-protokolo bat ezartzea.

4.–Aplikazio-eremua.

Protokolo hau Berriozarko Udaleko langile guztiei aplikatuko zaie, bereizi gabe harekiko duten lotura juridikoa (funtzionarioak, langile lan-kontratudunak, langile finkoak, aldi baterako langileak, praktiketan dauden pertsonak, etab.) eta lotura horren iraupen-aldia.

5.–Laneko jazarpenaren definizioa.

"Laneko jazarpena" adierazpena erabiltzen denean, "laneko jazarpen morala edo psikologikoa" –ingelesez, mobbing"– esan nahi da, zehazki. Jazarpen-mota horri eginen zaio erreferentzia esklusiboki protokolo honetan, baina ez da ahazten fenomeno hori kontzeptu-esparru zabalago batean sar daitekeela; adibidez, "laneko indarkeria psikologikoa", zeinean barne hartuko baititugu lan-eremuko zenbait jarrera mespretxagarri eta onartezin.

"Jazarpen psikiko edo moraltzat" jotzen da pertsona bati edo gehiagori behin eta berriz eta denbora luzean zuzendutako indarkeria psikologiko biziko jokabideetarako esposizioa; botere-posizio batetik egiten zaie (ez du zertan botere hierarkikoa izan, baizik eta psikologiari dagokiona), biktimaren lan-bizitza asaldatuko duen giro oldarkorra eta umiliagarria sortzeko. Indarkeria hori laneko harremanen barruan gertatzen da, baina ez du laneko antolaketarekin zerikusirik; pertsonaren duintasunaren aurka doa eta arrisku esanguratsua dakar osasunarentzat.

Laneko jazarpenean barne hartzen dira diskriminatzailea, iraingarria, umiliagarria eta indarkeriazkoa dela jo daitekeen ekintza oro.

–Baztertutako kontzeptuak.

a) Laneko jazarpenaren kontzeptutik kanpo geratuko dira une jakin batean gertatzen diren pertsonarteko gatazkak, giza harremanen esparruan jazo daitezkeenak eta lanaren antolaketari eta garapenari eragiten diotenak, baina ez dutenak helburutzat gatazkan nahasitako alderdiak pertsonalki edo profesionalki suntsitzea.

Kasu horietan, bi langileren interesak bateraezinak direla dirudienean, langile-kudeaketako organoek lider-funtzioa hartu beharko dute, eta gatazka latenteak eta agerikoak konpontzeko beharrezko diren eginbideak eginen dituzte.

b) Laneko indarkeria-ekintzak, biktimaren aurrean botere-posizio batetik jarduten dutenen aldetik, ez direnak behin eta berriz eta denboran zehar gertatzen. "Laneko tratu txar psikologikoak" izan daitezke, baina kasu horretan behar den errepikatzerik eta iraupenik gabe, bai benetan noizbehinkakoak direlako, bai goizetiko fase batean salatzen direlako. Indarkeriazko jokabideak direnez, prebenitu eta/edo eragotzi egin behar dira lehenbailehen eta, hala badagokio, zigortu; baina ez laneko jazarpen gisa, ez baitituzte betetzen haren funtsezko ezaugarriak. Kontuan izan behar da egoera horiek, ez badira bizkor zuzentzen, kronifikatu egin daitezkeela, benetako jazarpen-egoera izatera iritsi arte.

c) Halaber, ez dira jazarpen-jokabidetzat hartuko, itxuraz definizioan sar badaitezke ere, jokabidearen ezaugarriak kontuan hartuta indarkeriazko jokabide ez direnak (adibidez, lana ongi ez egiteagatik egindako ohartarazpen "oinarridunak", ez dutenean izen ona galarazten modu desegokian) eta aurkeztutako frogak ez direnean sendoak, faltsuak izan gabe. Jazarpen-jokabide "tipikoen" zerrenda bat jasotzen da II. eranskinean, fenomenoa argitze aldera.

6.–Jarduteko prozedura.

1. Lehen fasea.

1.1. Prozedurari hasiera ematea.

Prozedura hasteko, "salaketa" idazki bat aurkeztu behar du ustez jazarpena pairatu duen pertsonak, haren legezko ordezkariak, pertsona horrek bere zerbitzuak ematen dituen eremuko langileen ordezkariek edo jazarpenaren berri duten administrazio unitateko titularrek.

Salatzailea ez denean interesduna bera, Langileria Zerbitzuak kasua egiaztatu beharko du, eta, egiaztatu ondotik, protokolo honetan aurreikusitako jarduketak hasiko ditu.

Salaketarako inprimaki-eredu bat jasotzen da III. eranskinean.

Salaketaren idazkia edo komunikazioa Udalbatzako buruari bidali behar zaio, Langileen buru baita. Buruak Langileria Zerbitzura bidaliko du idazkia, salaketa jaso eta izapidetzeko unitate arduraduna den aldetik. Langileria Zerbitzuak, datu objektiboak aztertu eta kasuari buruz behar den informazioa jaso ondotik (ukitutako alderdiak, zuzeneko arduradunak, prebentzio-delegatuak...), honako aukera hauek izanen ditu:

a) Salaketa hori izapidetzeko ez onartzea, eskatutako kondizioak ez dituelako betetzen edo agerikoa denean planteatzen dena ez dela protokolo honen eremukoa.

b) Kasuaren izapideak hastea, protokolo honetan aurreikusitakoarekin bat etorriz.

Prozesuan nahasitako pertsonen babesa bermatzeko, eta haiei entzun aurretik, Langileria Zerbitzuak proposa dezake, arrazoituta, pertsona horiek lanpostutik mugitzea, kalte handiagoak saihesteko.

1.2. Ikerketa eta hasierako balorazioa.

Langileria Zerbitzuak egokitzat jotzen badu izapidetzen hastea, lehenik eta behin txostena eskatuko dio lan-arriskuak prebenitzeko zerbitzuari, eta kasuaren lehen balorazioa egiteko beharrezko den hasierako informazioa bilduko du.

Prebentzio-zerbitzuak arrisku psikosozialen inguruko aurretiko egoeraren berri eman beharko dio nahasitako unitateari, bai eta kasurako interesgarriak izaten ahal diren aurrekari eta adierazle posibleen berri ere, informazio konfidentzialak izan ditzakeen mugen barruan betiere.

Informazioa jasotzeko prozesuan, zeina ahalik eta bizkorren, konfidentzialtasunez, sekretupean eta tartean dauden pertsona guztien parte-hartzearekin egin beharko baita, beharrezkoa izan daiteke ukitutako pertsonak (salatzailea eta salatua) elkarrizketatzea, eta, beharbada, baita lekuko eta bestelako intereseko langile batzuk ere, halakorik balego. Edonola ere, salaketaren inguruko ikerketa ukitutako alderdietako bakoitzaren (erreklamatzailea eta ustezko jazarlea) eskubideekiko errespetu eta sentsibilitate handienarekin egin behar da.

Elkarrizketa horietan, bai salatzailearekin bai salatuarekin, prebentzio-delegatu bat edota hautatzen duten beste laguntzaileren bat egoten ahalko da, berariaz eskatzen badute.

Aurretiko ikerketa bukatzean, Langileria Zerbitzuak, unitate izapidegilea den aldetik, hasierako balorazio txosten bat eginen du, hartatik eratorritako ondorio eta proposamenekin, eta Udalbatzako buruari helaraziko dio, gauzatutako jarduerekin batera.

Txostena hamabost egun naturaleko gehieneko epean egin beharko da, salaketa Langileria Zerbitzuan sartzen denetik zenbatzen hasita.

Edozein kasutan, salaketa ahalik eta lasterren izapidetzeko eta ebazteko ahalegina egin beharko da.

1.3. Hasierako balorazioaren txostenetik eratorritako proposamenak lantzea.

Hasierako balorazio txostena ikusita, Udalbatzako buruak horren arabera jokatuko du, aukera hauetakoren bat hautatuta:

a) Salaketa artxibatzea, kasu hauetakoren baten ondorioz:

–Salatzaileak atzera egitea. (salbu eta ofizioz egokia bada ikertzen jarraitzea).

–Objekturik eza edo aztarna urriak.

–Aurretiko jarduketak direla-eta salaketaren edukia ebatzitzat jo ahal izatea.

b) Kasuaren azterketatik laneko jazarpenaz bestelako beste faltaren bat ondorioztatzen bada, araudian tipifikatua, dagokion diziplinazko espedientea hasteko proposatuko da.

c) Txosten horretatik ondorioztatzen bada pertsonarteko laneko gatazka bat edo arrisku psikosozialeko beste egoeraren bat dela (adibidez, tratu txar psikologikoa, baina ez laneko jazarpena), hauetako neurriren bat aplikatuko da, hala badagokio:

c.I) Gatazka-egoera bada: pertsonarteko gatazkak konpontzeko mekanismoak aktibatzea, halakorik badago, edo "bitartekari" batek jardun dezan proposatzea,

c.II) Arrisku psikosozialen eremuan sartutako "beste kasu batzuk" badira: hasierako balorazioaren txostenean aholkatzen diren neurri zuzentzaileak aplikatzea, hala badagokio.

d) Laneko jazarpenaren zantzu argiak: aipatutako txostenetik argi eta garbi ondorioztatzen bada laneko jazarpena dagoela, buruak diziplina espediente bat abiarazteko agintzen ahalko du jazarpeneko falta oso larria egiteagatik eta, hala badagokio, egoera zuzentzeko neurriak aplikatuko ditu.

e) Laneko jazarpenaren presuntzioa/zantzuak, hasierako txostenean oinarrituta: hasierako balorazio txostenak kontuan hartu beharko du salaketaren izaera, eta barne hartuko ditu egindako elkarrizketak eta bildutako informazio guztia. Txosten hori ikusita modu arrazoituan susmatzen bada langile publikoaren aurkako laneko jazarpenaren zantzuak daudela, baina oraindik ez badago balorazio zehatza egiteko moduan, jarduten duen administrazio organoak hasierako txosten hori eta eskura dagoen informazio guztia helaraziko dio berariaz eratutako "jazarpen egoeretarako Aholku Batzorde" bati, protokolo honetan ezarritako prozedurari jarraikiz.

2. Bigarren fasea.

2.1. Aholku Batzordea eratzea.–Udalbatzako buruak jazarpen presuntzioa dagoela adierazten duen hasierako txostena onartzen badu, Aholku Batzordea eratu beharko da bost egun balioduneko epean, I. eranskinean ezarritako baldintzetan.

Batzordea eratzeko ebazpenean, batzordeko kideak izendatzeaz gain, haietako bat izapidegile izendatuko da.

Abstentzioari eta errekusazioari buruzko arauak aplikatuko zaizkie batzordeko kideei.

2.2. Ikerketa.–Aholku Batzordeak, bildu eta hasierako balorazio txostena ikusi ondotik, ikerketa bukatutzat ematen ahal du ez badu ikusten laneko jazarpenaren zantzurik.

Aholku Batzordeak prozedurarekin jarraitzea erabakitzen badu, batzorde horretako izapidegileak dagozkion jarduketak eginen ditu izan daitekeen informazio osagarria jasotzeko eta laneko jazarpen-egoerari buruzko zantzu nahikoa ikusten den ala ez zehazteko.

Ikerketa bukatzean, izapidegileak txosten bat eginen du eta Aholku Batzordeari aurkeztuko dio. Informazioa jasotzeko eta dagokion txostena egiteko epea ez da hamabost egun naturaletik gorakoa izanen.

Udaleko alor, zerbitzu edo unitate guztiek Aholku Batzordeari lagundu beharko diote ikerketa prozesu osoan.

2.3. Aholku Batzordearen ondorioen txostena prestatzea.–Aholku Batzordearen ikerketa bukatu ondotik, prozesuaren izapidegileak ondorioen txostena bidaliko dio Udalbatzako buruari.

Buruak, txostena ikusita, hamabost egun naturaleko epean, neurri hauek hartzen ahalko ditu:

a) Jazarpenik ez dagoela deklaratzea eta espedientea artxibatzea. Hala ere, egoera hobetzeko neurriak aplikatzea agintzen ahalko da.

b) Diziplinazko espediente bat hasteko agintzea jazarpen-falta oso astun baten ondorioz, eta, hala badagokio, egoera zuzentzeko neurriak aplikatzea.

c) Uste bada enplegatu publikoek legeetan aintzatetsitako pertsonaren eskubideen kontra egindako delituak direla egitate horiek, aplikatu beharreko prozedura-legeei jarraikiz jokatu beharko da.

e) Jazarpena ez den beste faltaren bat hautematen bada, gertatutako egoera geldiarazteko ekintza zuzentzaileak proposatuko dira eta, hala badagokio, dagokion espedientea abiaraztea sustatuko da.

3. Salaketa funsgabe edo faltsuak.

Baldin eta hasierako balorazio txostenetik edo Aholku Batzordeak egindako txostenetik ondorioztatzen bada salaketa fede txarrez egin dela, edo emandako datuak edo lekukotzak faltsuak direla, buruak dagokion diziplina espedientea abiarazteko agintzen ahalko die arduradunei.

4. Informazioa.

Hartutako erabakien faseetako bakoitzean egiten diren jarduketen berri emanen zaie ukitutako alderdiei. Halaber, dagokion Segurtasun eta Osasuneko Batzordeari ere jakinaraziko zaizkie, betiere pertsonen intimitatea babestuz.

Salbuespen gisa, eta ez dagoenean behar adina arrazoituta jazarpen-salaketaren bat izapidetzeko ez onartzea, segurtasun eta osasuneko batzordeak adosten ahalko du unitate izapidetzailearekin hartutako erabakiak berraztertzeko.

5. Jarraipena eta kontrola.

Proposatutako neurri zuzentzaileak egikaritu eta bete diren ikusteko jarraipena eginen du Langileria Zerbitzuak, eta arreta berezia jarri beharko dio, biktimen afektazioa izan daitekeen kasuetan, haiei ematen zaien laguntzari eta, hala badagokio, errehabilitazioari.

Ukitutako pertsona lantokira itzultzen denean bajan izan ondotik, hala gertatu bada, lan-baldintzak berraztertuko dira, eta arreta berezia jarriko zaie lan-ingurunean izan daitezkeen etsaitasun-egoerei.

6. Jarduketan bete beharreko irizpideak eta prozeduraren bermeak.

Protokolo honen testuinguruan, honako irizpide hauek hartu beharko dira kontuan:

–Enplegatu publiko guztiek dute betebeharra ezagutzen dituzten balizko laneko jazarpe-kasuen berri emateko beren nagusi hierarkikoei.

–Laneko jazarpeneko egitate bat jasan duen pertsonak erakundearen aurrean salatzen ahalko du eta erantzuna jasotzeko eskubidea izanen du, bere salaketa jasota baldin badago.

–Arduradun publiko ororen betebeharra da bere eskumeneko eremuan ustezko laneko jazarpeneko kasuei buruz jasotzen dituen kexei arreta emateko eta, hala badagokio, izapidetzeko.

–Protokolo hau aplikatzeak ez du inola ere oztopatu behar ukitutako pertsonek legean aurreikusitako ekintza administratibo edo judizialak gauzatzea, protokoloarekin batera edo haren ondotik.

Udalak kontratatutako enpresa publikoei eta kanpoko enpresei laneko jazarpena dagoenerako jarduketa-protokolo honen berri emanen zaie.

Enplegatu publikoen eta kanpoko enpresa bateko langileen artean gertatzen denean jazarpen-egoera bat, koordinazio-mekanismoak aplikatuko dira. Beraz, kasuaren berri emanen diote elkarri, hura nola kudeatuko den adosteko.

Prozedurak bete beharreko bermeak.

Pertsonak errespetatzea eta babestea.–Ukitutako pertsonen intimitatea eta duintasuna babesteko beharrezko den diskrezioarekin jokatu behar da. Jarduketak eta eginbideak zuhurtzia handienarekin eta ukitutako guztiei zor zaien errespetuarekin egin behar dira, zeinek inola ere ez baitute aurkako traturik jasotzen ahalko ukituak izateagatik. Tartean dauden pertsonek prebentzioko ordezkariren edo aholkulariren baten laguntza jasotzen ahalko dute prozeduran zehar une oro, hala eskatzen badute.

Konfidentzialtasuna.–Prozeduran parte hartzen duten pertsonek konfidentzialtasun zorrotza eta erreserba mantentzeko betebeharra dute, eta ez dute aurkeztutako edo ikertze-prozesuko salaketen edukiari buruzko informaziorik eman eta zabaldu behar.

Diligentzia.–Salatutako jokabideari buruzko ikerketa eta ebazpena berandutze bidegaberik gabe egin behar dira, prozedura ahalik eta denbora laburrenean egin dadin, beharrezko bermeak errespetatuz, betiere.

Kontraesana.–Prozedurak entzute inpartziala eta bidezko tratua bermatu behar dizkie ukitutako pertsona guztiei. Esku-hartzaile guztiek fede ona eta salatutako gertaerak argitzea bilatu behar dituzte.

Biktimak lehengoratzea.–Jazarpenak kalte egin badie biktimaren lan-baldintzei, jatorriko lan-egoerara ahalik eta gehien gerturatzen diren kondizioetara lehengoratu beharko da, biktima ados dagoela, antolamendu-aukeren arabera.

Biktimen osasuna babestea: ukitutako langileen osasuna babesteko eskubidea bermatzeko egokitzat jotzen dituen neurriak hartu beharko ditu erakundeak.

Errepresalien debekua: berariaz debekatu behar dira salaketa bat egiten duten, lekuko gisa aritzen diren eta jazarpenari buruzko ikerketa batean parte hartzen duten pertsonen kontrako errepresaliak, fede onean jokatu badute.

XI.I ERANSKINA.–AHOLKU BATZORDEA

1.–Batzordeko kideak.

Langileen ataleko ordezkari bat.

Prebentzio-delegatu bat.

Berdintasun-ataleko teknikari bat: psikologoa eta/edo abokatua.

Udalbatzako buruak izendatuko ditu Aholku Batzordeko kideak (Prebentzioko ordezkaria Langileen Batzordeak proposatuko du).

Izendatzen direnean, hura osatzen dutenen eta prozeduran inplikatutakoen artean distantzia pertsonala, afektiboa eta organikoa dagoela bermatuko da.

2.–Funtzionamendu-araubidea.

Hauek arautuko dute:

–Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/92 Legeko xedapenak, kide anitzeko organoen funtzionamenduari buruzkoak.

–Laneko jazarpenaren inguruan aplikatu beharreko Espainiako eta Nafarroako lege- eta hitzarmen-araudia.

–Laneko jazarpenaren inguruan aplikatu beharreko Europar Batasuneko zuzentarauak.

–Protokolo honetan jasotako xedapenak.

–Batzordeak erabakitzen dituen funtzionamendu arauak.

3.–Ondorioen/gomendioen txostena.

Ondorioen eta gomendioen txostenak, gutxienez, informazio hau jaso beharko du:

–Aholku Batzordearen osaera.

–Kasuaren aurrekariak, salaketa eta haren inguruabarrak.

–Aurretiko jarduketak: balorazioa eta kasuaren hasierako txostena.

–Jarduketak (lekukotzak, frogak, gertakari nagusien laburpena).

–Ondorioak.

–Proposatutako neurriak:

XI.II ERANSKINA.–LANEKO JAZARPENA DIREN ETA EZ DIREN JOKABIDEEN ERREFERENTZIAZKO ZERRENDA

a) Laneko jazarpentzat jotzen diren jokabideak:

–Langilea modu jarraituan uztea okupazio efektiborik gabe edo inkomunikatuta, hori justifikatzeko arrazoirik ez dagoenean.

–Esleitutako baliabideekin bete ezin diren aginduak ematea.

–Alferreko zereginetan edo ekoizpen-baliorik ez dutenetan okupatzea.

–Enpresaren aurkako kexak, salaketak edo demandak planteatu dituzten edo kexagileei lagundu dieten langileekiko errepresalia-ekintzak.

–Langile bat behin eta berriz iraintzea edo gutxiestea.

–Beste pertsona batzuen aurrean behin eta berriz errieta egitea.

–Haren lanari eta bizitza pribatuari buruzko gezurrezko zurrumurruak zabaltzea.

b) Laneko jazarpena ez diren jokabideak (hala ere, beste arau-hauste batzuk izaten ahal dira).

–Laneko baldintzen funtsezko aldaketak arrazoirik ez dagoenean, horretarako legez ezarritako prozedurari jarraitu gabe.

–Lanaldia areagotzeko edo lan jakin batzuk egiteko presionatzea.

–Zenbait langilerekin, bereizi gabe, modu despotikoan jokatzea.

–Greba, protesta eta abarretan sortutako gatazkak.

–Elkarren artean koordinatu ez diren zenbait subjektuk irain puntualak eta jarraituak egitea.

–Lana ongi ez egiteagatik kargu hartzea, langilearen izen onari kalterik eragin gabe.

–Gatazka pertsonalak eta sindikalak.

XI.III ERANSKINA.–JAZARPEN MORALA/LANEKOA SALATZEKO EREDUA

Eskatzailea:

• Eragindako pertsona:
• Giza Baliabideak:
• Ukitutako eremua.
• Sindikatu-ordezkaritza:
• Beste pertsona batzuk:

Ukitutako pertsonaren datuak:

• Izen-deiturak:
• NANa:
• Sexua:
• Adina:
• Harremanetarako telefonoa eta helbide elektronikoa:

Ukitutako pertsonaren datu profesionalak:

• Lan-esparrua:
• Lanpostua:
• Lan-harremana: funtzionarioa, lanekoa, finkoa, aldi baterakoa.
• Taldea:
• Maila:
• Antzinatasuna lanean:

Egitateen deskribapena:

Dokumentazio osagarria.

• Lekukoak daude.

Eskaera.

• Eskatzen dut laneko jazarpenerako protokoloa hastea.
• Data eta interesdunaren sinadura.

Berriozar, 202....(e)ko ....................

Iragarkiaren kodea: F2501471