45. ALDIZKARIA - 2026ko martxoaren 3a

2. NAFARROAKO TOKI ADMINISTRAZIOA

2.2. XEDAPEN ETA IRAGARKIAK, HERRIEN ARABERA ANTOLATUAK

BARBARIN

Aldaketa, honako honetan: ordenantza, arautzen dituena Coworking Barbarin lan kolaboratiborako eta ekintzailetzarako espazioaren erabilera eta funtzionamendua. Behin betiko onespena

Barbaringo Udalak, 2025eko irailaren 25ean egin osoko bilkuran, aho batez erabaki zuen hasiera batez onestea aldaketa bat ordenantza honetan: ordenantza, arautzen dituena Coworking Barbarin lan kolaboratiborako eta ekintzailetzarako espazioaren erabilera eta funtzionamendua.

Espedientea jendaurrean egon zen 30 egunez, 2025eko 246. Nafarroako Aldizkari Ofizialean argitaratu ondoren, abenduaren 11n, bai eta Barbaringo Udalaren iragarki-taulan ere, eta epe horretan inork ez zuen alegaziorik aurkeztu.

Beraz, behin betiko onesten da Coworking Barbarin lan kolaboratiborako eta ekintzailetzarako espazioaren erabilera eta funtzionamendua arautzen dituen ordenantzaren aldaketa, jarraikiz uztailaren 2ko 6/1990 Foru Legearen 325.1.c) artikuluari (Nafarroako Toki Administrazioari buruzko Foru Legea).

Eta argitaratu egiten da.

Barbarinen, 2026ko otsailaren 4an.–Alkatea, María Carmen Puerta Extremera.

ORDENANTZA, ARAUTZEN DITUENA COWORKING BARBARIN LAN KOLABORATIBORAKO ETA EKINTZAILETZARAKO ESPAZIOAREN ERABILERA ETA FUNTZIONAMENDUA

ZIOEN AZALPENA

Barbaringo Udalak, jabetuta zein garrantzitsua den bultzatzea tokiko jarduera ekonomikoa eta bertako biztanleen garapen pertsonal eta profesionala, ordenantza hau onesten du, zeinak helburu baitu arautzea Coworking Barbarin lan kolaboratiborako eta ekintzailetzarako espazioaren erabilera, funtzionamendua eta kudeaketa. Espazio hori tresna estrategiko bat da, eta sustatzen du biztanleak bertan finkatzea, gazteen enplegua, berrikuntza, profesionalen arteko elkarlana eta landa ingurunean enpresa proiektu berriak bultzatzea. Espazio hori arautzearen helburua da hauek bermatzea: aukera berdintasuna, bizikidetza, kudeaketa efizientzia eta zerbitzu publiko hori ahal bezain ongi aprobetxatzea.

I. KAPITULUA.–XEDAPEN OROKORRAK

1. artikulua. Xedea eta aplikazio-eremua.

Ordenantza honen xedea da arautzea Coworking Barbarin lan kolaboratiborako eta ekintzailetzarako espazioaren (Kale Nagusia 11, Barbarin) erabilera, funtzionamendua eta sarbide-baldintzak, bai eta erabiltzaileen eskubideak eta betebeharrak ere.

2. artikulua. Izaera juridikoa.

Coworking espazioa administrazio erabilerarako eta tokiko zerbitzu publikorako Udalaren jabari publikoko ondasuna da, bat etorriz Nafarroako toki araubideari eta toki entitateen ondareari buruzko araudian xedatuarekin.

3. artikulua. Helburua.

Coworking espazioaren helburua da jarduera ekonomikoa, profesionalen arteko elkarlana, ekintzailetza eta berrikuntza sustatzea Barbarinen, eta enpresa, hezkuntza eta gizarte proiektuak egitea erraztea, komunitatearen ongizatean eta kohesioan laguntzeko.

II. KAPITULUA.–ONURADUNAK ETA ZERBITZUAK

4. artikulua. Onuradunak.

Coworking espazioaren onuradun izaten ahalko dira Barbarinen erroldatutakoak, ekintzaileak, autonomoak, profesionalak, mikroenpresak edo telelangileak. Lehentasuna emanen zaie udalerriko bizilagunei. Libre badago, beste udalerri batzuetakoek erabiltzen ahalko dute.

5. artikulua. Zerbitzu eta azpiegiturak.

Coworking espazioak lanpostuak, bilera gela, komunak eta armairuak ditu. Udalak honako hauek bermatzen ditu: ur-hornidura, argia, berokuntza, Interneterako sarbidera, eta instalazioak garbitu, mantendu eta kontserbatzeko lanak.

III. KAPITULUA.–ERABILTZEKO BALDINTZAK, ESKUBIDEAK ETA BETEBEHARRAK

6. artikulua. Ordutegia eta segurtasuna.

Coworking espazioa astelehenetik ostiralera egonen da irekita, 08:00etatik 15:00etara, eta jaiegunak errespetatuko dira. Alkatearen ebazpen bidez edo Tokiko Gobernu Batzarraren akordio bidez erabakiko da espazioaren ordutegia aldatzea edo espazioa aldi baterako ixtea. Espazioa ordutegi horretatik kanpo erabiltzeko, berariazko baimena beharko da. Sarbidea giltza edo txartel pertsonal eta besterenezinen bidez kontrolatuko da, eta sarrerak eta irteerak erregistratuta geratuko dira.

7. artikulua. Erabiltzaileen eskubideak.

a) Esleitutako postua eta espazio komunak erabiltzean, bizikidetza eta segurtasun arauak betetzea.

b) Udalak antolatutako prestakuntza jardueretan parte hartzea.

c) "Coworking Barbarin" bereizgarria erabiltzea komunikazio profesionaletan, aldez aurretik baimenduta.

8. artikulua. Erabiltzaileen betebeharrak.

a) Instalazioak errespetatzea eta espazioa garbi eta ordenatuta edukitzea.

b) Espazioa behar ez bezala erabiltzearen ondoriozko kalteen ardura hartzea.

c) Ezarritako betebehar ekonomikoak betetzea.

d) Laneko arriskuen prebentzioari eta irisgarritasunari buruzko araudia betetzea.

e) Uko egitea idatziz komunikatzea, gutxienez bi aste lehenago.

9. artikulua. Erabiltzeko eskubidea galtzea.

Erabiltzeko eskubidea galtzen ahalko da ezarritako betebeharrak ez betetzeagatik, ez ordaintzeagatik edo bizikidetzaren aurkako jokabidea izateagatik. Alkatearen ebazpen arrazoitu bidez ezeztatuko da erabiltzeko eskubidea.

IV. KAPITULUA.–ESKATZEKO ETA ESLEITZEKO PROZEDURA

10. artikulua. Eskabideak.

Udalak deialdi publiko bidez eskatzeko aldiak ezarriko ditu. Interesdunek eskabide normalizatua eta ezartzen den dokumentazioa aurkeztu beharko dituzte, zein profil duten, edo profil profesionala edo enpresa profila.

11. artikulua. Erabileraren kontzesioa.

Coworking espazioaren aldi baterako erabileraren kontzesioa alkatearen ebazpen bidez formalizatuko da, jabari publikoko administrazio baimen gisa. Erabilera pertsonala eta besterenezina da, eta, hori betetzen ez bada, baliogabetzen ahalko da.

V. KAPITULUA.–ARAUBIDE EKONOMIKOA ETA ZEHAPEN ARAUBIDEA

12. artikulua. Tasak eta fidantza.

Erabiltzaileek dagokion deialdian onartutako tarifak ordainduko dituzte coworking espazioak eta zerbitzuak erabiltzeagatik. Giltza eskuratzeko, 50 euroko fidantza jarri beharko da. Erabiltzeari uztean itzuliko da, instalazioak egoera onean badaude.

13. artikulua. Zehapen araubidea.

Ordenantza honetan xedatutakoa ez betetzeak ekartzen ahalko du erabiltzeko eskubidea galtzea eta dagozkion administrazio zehapenak ezartzea, bat etorriz Toki Araubidearen Oinarriak arautzen dituen 7/1985 Legearekin eta Nafarroako toki entitateen ondareari buruzko foru araudiarekin.

AZKEN XEDAPENA

Honako ordenantza honek indarra hartuko du Nafarroako Aldizkari Ofizialean argitaratu ondotik, eta indarrean egonen da berariaz aldatu edo ezeztatu arte.

Iragarkiaren kodea: L2601683