Iragarkia

28. ALDIZKARIA - 2025eko otsailaren 11

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

205C/2024 EBAZPENA, abenduaren 20koa, Ekonomia Sozialeko eta Laneko zuzendari nagusiak emana, zeinaren bidez erabakitzen baita Graftech Iberica SL enpresaren hitzarmen kolektiboa erregistratzea, gordailutzea eta Nafarroako Aldizkari Ofizialean argitaratzea.

Ikusi da Graftech Iberica SL enpresak aurkeztutako hitzarmen kolektiboa (kode zenbakia: 31007532012008), erregistro honetan sartu baitzen 2024ko azaroaren 26an, 2024ko azaroaren 21ean enpresaren eta sindikatuen ordezkaritzek sinatu ondoren.

Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, lan-akordio kolektiboak eta berdintasun-planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin bat etorriz.

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuak ematen dizkidanak, honako hau,

EBAZTEN DUT:

Lehenengoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Graftech Iberica SL enpresak aurkeztutako hitzarmen kolektiboa (kode zenbakia: 31007532012008).

Bigarrena.–Nafarroako Aldizkari Ofizialean argitara dadila xedatzea, orok jakin dezan.

Hirugarrena.–Ebazpen hau eskatzaileari jakinaraztea, eta ohartaraztea ebazpenak ez diola bukaera ematen administrazio bideari, eta, haren aurka, gora jotzeko errekurtsoa aurkezten ahal diola Eskubide Sozialetako, Ekonomia Sozialeko eta Enpleguko kontseilariari, hilabeteko epean, ebazpena jakinarazi eta hurrengo egunetik aurrera.

Iruñean, 2024ko abenduaren 20an.–Ekonomia Sozialeko eta Laneko zuzendari nagusia, Iñaki Mendióroz Casallo.

GRAFTECH IBÉRICA SL ENPRESAREN LAN HITZARMEN KOLEKTIBOA

Ororbian, 2024ko azaroaren 21ean, GRAFTECH IBÉRICA SL enpresaren hitzarmen kolektiboko negoziazio batzordea bildu zen. Pertsona hauek osatzen dute batzordea:

ENPRESA BATZORDEAREN ALDETIK: David Aguado Martínez jauna, Miguel María Burguete Abrego jauna, Sergio García Lerín jauna, José Carlos Munárriz Larrea jauna, Idoia Narvaez Guergué andrea, Antonio Nogal García jauna, José Antonio Pezonaga Jáuregui jauna, Jaime José Suárez Pérez jauna eta Juan Carlos Torrado Almeida jauna.

ENPRESAKO ZUZENDARITZAREN ALDETIK: Miguel Celaya García jauna eta Fernando Layo Rivacoba jauna.

Ekitaldiari hasiera eman ondotik, negoziazio batzordeko kide guztiek onetsi dute GRAFTECH IBÉRICA SL enpresaren hitzarmen kolektiboaren testua, 48 artikulu, 2 azken xedapen eta eranskin 1 dituena, honako hauek hain zuzen:

I. TITULUA.–XEDAPEN OROKORRAK

1. artikulua. Xedea.

Lan hitzarmen kolektibo honek GRAFTECH IBÉRICA SL enpresaren eta bere langile eta lurralde eremuetan sarturik dauden langileen arteko lan harremanak arautzen ditu.

2. artikulua. Iraunaldia, salaketa eta indarraldia.

Lan hitzarmen kolektibo hau sinatzen denean jarriko da indarrean eta 2025eko abenduaren 31ra arte izanen du indarra. Dena dela, soldatarekin loturiko alderdiek 2024ko urtarrilaren 1etik aurrera izanen dute indarra.

Hitzarmenaren indarraldia bukatutakoan, beste hitzarmenik ezean, hitzarmen honen eduki guztiek indarrean jarraituko dute.

Langileen Estatutuaren 86.2 artikuluan aurreikusitako ondorioetarako, hitzarmen kolektibo hau salatutzat emanen da hasieran itundutako indarraldia bukatutakoan.

Zuzendaritzak uko egiten dio Langileen Estatutuaren 82.3 apartatua aplikatzeari, hitzarmen honetan itundutako baldintza ekonomikoei eta lanaldiari dagokienez.

3. artikulua. Langile eta lurralde eremua.

GRAFTECH IBÉRICA SL enpresan zerbitzuak ematen dituzten langile guztiak ukitzen ditu hitzarmen kolektibo honek. Hitzarmen honek Zuzendaritza Batzordeko kideak eta departamentuetako arduradunak (MD-3) ere ukituko ditu, salbu ordainsariei dagokienez; horiek banaka itunduko dira enpresarekin.

II. TITULUA.–LANBIDE SAILKAPENA

4. artikulua. Lanbide-taldeak.

Eginkizunen arabera, langileak lanbide-talde hauetan sailkatuko dira:

–1. lanbide-taldea.

Irizpide orokorrak: talde honetako langileek zuzeneko erantzukizuna dute enpresaren arlo funtzional baten edo batzuen kudeaketan, edo zailtasun eta kualifikazio handieneko zeregin teknikoak egiten dituzte. Erabakiak hartzen dituzte edo haietan partaide dira, baita helburu zehatzak finkatzen ere. Autonomia, ekimen eta erantzukizun handiz betetzen dituzte beren eginkizunak.

Prestakuntza.–Unibertsitateko titulazioa (gradua) edo pareko ezagutza, enpresak onartua, eta/edo esperientzia sendoa bere sektore profesionalean.

Oro har, Gizarte Segurantzako kotizazio oinarrien baremoetako 1. zenbakian sailkatzen dira.

GRAFTECH IBÉRICA SL enpresan zuzendari nagusiari eta Zuzendaritza Batzordeari dagokie.

–2. lanbide-taldea.

Irizpide orokorrak.–Langile hauek autonomia, ekimen eta erantzukizun handiz, zeregin tekniko zailak egiten dituzte, helburu orokor zehaztuak dituztela, edo eduki intelektual edo giza harreman handiko zereginetan dihardute. Orobat, lankide talde batek arlo funtzional berean betetzen dituen eginkizunak integratu, koordinatu eta gainbegiratzeko zuzeneko ardura duten langileak ere sartzen dira.

Prestakuntza.–Unibertsitateko titulazioa (gradua) edo pareko ezagutza, enpresak onartua, gehi esperientzia zabala bere sektore profesionalean. Batzuetan, gertatzen ahal da goi mailako unibertsitateko titulua (gradua) edukitzea eta talde honetan sailkatutako lanpostuekin parekatzea: "sarrerako goi mailako tituludunak".

GRAFTECH IBÉRICA SL enpresan departamentuetako buruei (MD-3) eta zerbitzuetako buruei (MD-4) dagokie.

–3. lanbide-taldea.

Irizpide orokorrak.–Agintzeko erantzukizunarekin edo gabe, langile hauek tarteko jarduera intelektuala eta giza harremanak eskatzen dituzten zereginak burutzen dituzte, zailtasun tekniko ertaineko jarraibide zehatzen esparruan, eta prozesuaren barruan autonomia izanik. Antolaketa maila txikiago batean lankide talde batek egiten dituen zeregin homogeneoak integratu, koordinatu eta gainbegiratzeko eginkizunak betetzen dituzte.

Prestakuntza.–Erdi mailako titulazioa, bigarren mailako teknikari espezialista eta/edo esperientzia zabala lanpostuan.

Oro har, Gizarte Segurantzako kotizazio oinarrien baremoetako 2. eta 3. zenbakietan sailkatzen dira kategoria horiek eta, tarteka, 1. zenbakian, SARRERAKO goi mailako tituludunak ordezteko.

GRAFTECH IBERICA SL enpresan, tailerreko maisuei eta arduradunei (MD-5) eta teknikariei (T) dagokie.

–4. lanbide-taldea.

Irizpide orokorrak.–Langile hauek lan autonomoak egiten dituzte, ekimena izatea eta arrazoibidea erabiltzea eskatu ohi dituzten lanak izanik, eta haien gaineko erantzukizuna hartzen dute, beste norbaitek gainbegiratuta.

Prestakuntza.–Batxilergoa, DBH edo baliokidea, edo teknikari espezialista. (Graduko moduluak), gehi lantokiko prestakuntza eta lanbidean lortutako ezagutza.

Oro har, Gizarte Segurantzako kotizazio oinarrien baremoetako 4. eta 8. zenbakietan sailkatzen dira kategoria horiek.

GRAFTECH IBÉRICA SL enpresan, 1. mailako administrari ofizialei eta taldeburuei dagokie.

–5. lanbide-taldea.

Irizpide orokorrak.–Enpresa bakoitzaren eskeman, goragoko kualifikazioa duten profesionalen menpe edo haien aginduz egiten diren zereginak, gehienetan gainbegiratze handiarekin, baina lanbidearen nolabaiteko ezagutza izanik, eta egokitzealdi bat izanik.

Prestakuntza.–Lanbidean lortutako ezagutza, edo eskolakoa, baina titulaziorik gabe, edo teknikari laguntzailearen tituluarekin (goi mailako Lanbide Heziketa) gehi lantokiko berariazko prestakuntza edo lanbidean lortutako ezagutza.

Oro har, Gizarte Segurantzako kotizazio oinarrien baremoetako 5. eta 8. zenbakietan sailkatzen dira kategoria horiek.

GRAFTECH IBÉRICA, SL enpresan, 2. mailako administrari ofizialei, eta ekoizpeneko eta mantentze-lanetako A eta B mailetako langileei dagokie.

–6. lanbide-taldea.

Irizpide orokorrak.–Menpekotasun maila handiarekin egiten diren zereginak, argi ezarririk daudenak, jarraibide zehatzekin. Lan hauetan ahalegin fisikoa bereziki beharrezkoa izaten ahal da, eta prestakuntza urria edo ezagutza oso oinarrizkoa; noiz edo noiz, egokitzealdi labur bat behar izaten da.

Prestakuntza.–Derrigorrezko oinarrizko mailak, eta, batzuetan, bulegoko zereginetan hasteko prestakuntza. Derrigorrezko Bigarren Hezkuntza (DBH) edo teknikari laguntzailea (goi mailako LH), eta lanbidean lortutako ezagutza.

Oro har, Gizarte Segurantzako kotizazio oinarrien baremoetako 6. eta 7. zenbakietan sailkatzen dira kategoria horiek.

GRAFTECH IBÉRICA SL enpresan, ekoizpeneko eta mantentze-lanetako C mailako langileei dagokie.

–7. lanbide-taldea.

Irizpide orokorrak.–Hemen sartzen dira zereginak jarraibide zehatzen arabera egiten dituzten langileak, betiere jarraibideak argi ezarririk daudela, menpekotasun maila handiarekin, bereziki ahalegin fisikoa eta/edo arreta eskatzen dutenak, eta berariazko prestakuntzarik behar ez dutenak, ezta egokitzealdirik ere.

Prestakuntza.–Derrigorrezko Bigarren Hezkuntza (DBH) edo eskola ziurtagiria edo baliokidea.

Gizarte Segurantzako kotizazio oinarrien baremoetako 6., 10., 11., eta 12. zenbakietan sailkatzen dira kategoria horiek.

GRAFTECH IBÉRICA SL enpresan, ekoizpeneko eta mantentze-lanetako D mailako langileei dagokie.

7. lanbide-taldean dauden langileak automatikoki dagokion goragoko lanbide taldera igaroko dira behin 18 hilabetez 7. lanbide-taldean egon ondoren. Aldi hori nahikotzat jotzen da lanbidean gaitzeko, lanpostuan lortutako ezagutzaren eta entrenamenduaren bidez.

Soldata tauletako E maila kontratatu berriei aplikatuko zaie, 4,5 hilabeteko kontratua edo laburragoa dutenei, eta maiatzaren 15etik irailaren 30era bitarte soilik. Lanpostuaren kategoria lortzeko behar diren 18 hilabeteetarako kontatuko dira 4,5 hilabete horiek. Maila hori aurretik adierazi den aldian soilik aplikatzen ahal da.

III. TITULUA.–LANEAN HASTEA, LANA UZTEA ETA PROBALDIA

5. artikulua. Kontratazio araubidea.

Praktikaldiko kontratua duten langileek sarrerako soldataren %75 kobratuko dute, gutxienez. Lana ABLEen bidez edo bekadunek egiten badute, Enpresa Batzordeari emanen zaio horren berri, langileak enpresan hasi baino lehen, langileen eginkizunak eta aurreikuspenen arabera enpresan arituko diren denbora adierazita.

Behin-behineko kontratua duten langileei, soldata aldakorra jasotzeko baldintzak betez gero, %0,5 igoko zaie soldata, 36. artikuluan agertzen den taula oinarri harturik, betiere taulako soldata kalkulatzeko ehunekoa %0tik gorakoa bada.

Enpresako Zuzendaritzaren eskumena izanen da zehaztea zer langile behar diren, ezartzea behar horrekin –indarreko legeriarekin bat– bateragarria den kontratu araubidea, eta azpikontratazioak ez ezik, aldi baterako laneko enpresetako langileak lagatzeko kontratuak ere erabiltzeko erabakia hartzea.

Aldi baterako laneko enpresetako langileak lagatzeko kontratuen kasuan, langileari GRAFTECH IBÉRICA SL enpresako E mailako soldata ordainduko zaio lehenbiziko 5 hilabeteetan.

Zuzendaritzak Enpresa Batzordeari adieraziko dizkio 3., 4., 5., 6. eta 7. taldeetarako egitekoak diren kontratazioak.

–Aldi baterako kontratatuak egiteko irizpideak:

Hauek dira aldi baterako kontratazioak egiteko lehentasunezko irizpideak:

1. Lanpostura egokitutako prestakuntza.

2. GRAFTECH IBÉRICA SLn jarraitzea.

3. Enpresaren berdintasun planaren aplikazioa.

Aldi baterako kontratuei dagokienez, aplikatzekoak diren xedapen orokorretan xedatutakoari eginen zaio men, baita Nafarroako Industria Siderometalurgikorako hitzarmenean xedatutakoari ere. Hitzarmen hori ordezko arau izanen da "kontratazioei" dagokienez, gaur egun 50 C) artikuluan arauturik baitaude.

Ekoizpen normaltzat hartzen da 55.000 tona grafito ekoiztea, eta, hala, ekoizpen hori gainditzen duten fabrikazio programetarako iraupen mugatuko kontratu bidez kontratatzen ahalko dira langileak.

–Lan kontratazio finkoak egiteko irizpideak:

Zuzendaritzak kontratu finkodun 133 langile izateko konpromisoa hartu du. Hori helburu, 2024ko eta 2025eko urtarriletan, zifra horretara iristeko behar diren ekoizpeneko eta mantentze-lanetako langileen kontratu finkoak eginen dira, betiere aurreko urteko ekoizpena 55.000 TMtik gorakoa izan bada.

Hauek dira kontratazioak egiteko lehentasunezko irizpideak:

1. Zuzendaritzak ezartzen ditu produkzio beharrak, departamentu bakoitzaren lehentasunak ezarrita.

2. Departamentu horietan esperientzia duten langileek izanen dute lehentasuna, enpresan emandako denboraren arabera.

3. Enpresaren berdintasun planaren aplikazioa.

Koordinatzaile lanetan ari direnak ez dira kopuru horren barruan sartzen. Hitzarmen hau sinatzen den egunean 5 lagun ari dira lan horietan.

6. artikulua. Probaldia.

Langileak enpresan lanean hastean proba gisa ari direla ulertuko da, eta probaldiek iraunaldi hauek izanen dituzte:

–Hilabete bat 5., 6. eta 7. lanbide-taldeetako langileen kasuan.

–Sei hilabete 1., 2., 3. eta 4. lanbide taldeetako langileen kasuan.

Probaldirako ez da zenbatuko aldi baterako ezintasunean emandako denbora.

Probaldiak irauten duen bitartean, alderdietako edozeinek deuseztatzen ahal du kontratua, inolako kalte-ordainik jasotzeko eskubiderik gabe, salbu Langileen Estatutuaren 21.4 artikuluan araututako kasuetan.

7. artikulua. Lana nork bere borondatez uztea.

Beren borondatez enpresatik alde egin nahi duten langileak behartuak daude enpresari aldez aurretik abisatzera, gutxienez ere hamabost egun lehenago 4., 5., 6. eta 7. lanbide taldeetako langileen kasuan, hilabete lehenago 3. lanbide taldeko langileen kasuan, eta bi hilabete lehenago 1. eta 2. lanbide taldeetako langileen kasuan.

Aipatutako epeetan aurreabisua egiten ez bada, Enpresak eskubidea izanen du langilearen likidaziotik eguneko soldata deskontatzeko, aurreabisua atzeratzen den egun bakoitzeko.

Sindikatuetan afiliatuta dauden langileek aukera dute kitapena hartzean eta hura sinatu aurretik beren sindikatuekin kontsultatzeko.

IV. TITULUA.–LAN OSASUNA

8. artikulua. Laneko segurtasuna eta osasuna.

Une bakoitzean indarra duen legeriak agintzen duenari jarraituko zaio eta, bereziki, Laneko Arriskuen Prebentzioari buruzko azaroaren 8ko 31/1995 Legean eta hura garatzen duten xedapenetan ezarritakoari.

9. artikulua. Laneko arropa eta babes jantziak.

Langile guztiei laneko arropak emanen zaizkie, eta norberaren eta arroparen garbiketakoak ere bai, baita segurtasuneko oinetakoak edo babeserako bestelako edozein ekipamendu ere, egin beharreko zereginen arabera.

Jantzi eta norbera babesteko ekipamendu horiek guztiak zentzuz erabili beharko dira, eta hondatzen diren heinean berritu. Enpresak jantzi eta ekipamendu erabiliak itzultzea eskatzen ahal du berriak eman baino lehen.

V. TITULUA.–LANALDIA, OPORRAK, LIZENTZIAK ETA ESZEDENTZIAK

10. artikulua. Lanaldia eta lan araubidea.

Enpresako Zuzendaritzak eta Enpresa Batzordeak erabaki dute ezen lanaldia, oporrak, lizentziak eta eszedentziak, ondoren zehazten direnak, alderdiek itundu bezala arautuko direla hitzarmena indarrean den bitartean. Beraz, Zuzendaritzak uko egiten dio Langileen Estatutuaren 41.1, a), b) eta c) artikuluak aplikatzeari.

Urteko lanaldia honako hau izanen da:

–2024. urtean: 1.688 benetako lan ordu.

–2025. urtean: 1.688 benetako lan ordu.

Orain arte bezala, lan araubidea goizekoa, arratsaldekoa, gauekoa eta erdikoa izaten ahal da, eta, edonoren txanda aldatzeko, 48 ordu lehenago eman beharko da abisua, salbu aldez aurretik programaturik badago.

Lanegunak:

3 txandatan eta/edo asteburuetan aritzeko egutegia duten ekoizpeneko eta mantentze-lanetako langileen lanegunak:

Eguneko 8 orduko lanaldia ezarri da.

–Enplegatuen erdiko txanda.

Bulegoetako txandako langileentzat ordutegi malgua ezarri da: sartzeko, 08:00etatik 09:30era arte, eta ateratzeko, 16:10etik aurrera.

Nahi duten langileek egunero 30 minutuko konpentsazio gehigarria sortzen ahal dute eguneko lanaldian, gehienekoa astean 2 ordu izanik. Langile horiek 07:30etik aurrera sartzen ahalko dira, edo beren lanaldi arrunta arratsaldeetan luzatu, astelehenetik ostiralera. Hartara, asteko azken lanegunean 14:10etik aurrera ateratzen ahal dira.

Zuzendaritzak malgutasun hori mugatzen ahalko du, pertsona batzuk eta/edo denbora-tarte batzuk bazter utzita. Gutxieneko zerbitzuak ere ezartzen ahalko ditu.

–Ekoizpeneko eta mantentze-lanetako langileen erdiko txanda.

Ordutegi malgu hau ezarri da: sartzeko, 08:00etatik 09:30era arte, eta ateratzeko, 16:30etik 17:45era arte.

Zuzendaritzak malgutasun hori mugatzen ahalko du, pertsona batzuk eta/edo denbora-tarte batzuk bazter utzita. Gutxieneko zerbitzuak ere ezartzen ahalko ditu.

11. artikulua. Atsedenaldiak.

Txandaka ari diren langileen eguneko lanaldian (8 ordukoa da), 20 minutuko atsedenaldia ezarri da, eta benetako lantzat hartuko da.

Erdiko txandako langileak, lanaldi jarraitukoak:

a) Enplegatuak: 30 minutuko atsedenaldia bazkaltzeko; horietatik 20 minutu benetako lantzat hartuko dira.

b) Ekoizpeneko eta mantentze-lanetako langileak: 35 minutuko atsedenaldia bazkaltzeko; horietatik 20 minutu benetako lantzat hartuko dira.

Lanaldiko atsedenaldiak ahalik eta zorrotzen betetzen direla kontrolatzeko:

–Ekoizpeneko eta mantentze-lanetako langileen atsedenaldiaren aurretik eta ondoren tarte batzuk ezartzen dira, bost minutukoak, langileak garbitu ahal izateko.

–Lanpostutik lehenago ateraz gero, edo ezarritako atsedenaldiaren ondoren lanpostura berandu itzuliz gero, langileari deskontua aplikatuko zaio, ez bakarrik aurreratu edo atzeratu den denborari dagokiona, baita garbiketarako tartea ere, bai atsedenaldiaren aurrekoa bai ondokoa.

–Grafitazio departamentuko kargatzaileek lanaldia bukatzeko ohiko ordua baino hamar minutu lehenago uzten ahal dute lana, baldin eta beren laneko zereginak egiten badituzte nabearen barnean, horrela denbora gehigarri hori erabil dezaten norberaren garbiketarako.

–Grafitazioko kontrol gelako operadoreak bost minutu lehenago ateratzen ahalko dira lanetik, teilakapena dela eta.

–Mantentze-lanetako departamentukoek, zikinkeria handiko lanak egiten baldin badituzte, lanaldia bukatzeko ohiko ordua baino bost minutu lehenago uzten ahal dute lana.

Enpresak atal eta langile talde bakoitzaren atsedenaldirako ordutegi zehatzak zehaztuko ditu. Atsedenaldi horiek, hala komeni denean, aldatzen ahalko dira antolaketaren edo ekoizpenaren arabera.

Lanaldien arteko eta asteko atsedenaldiei dagokienez, enpresak prestatutako ordutegi eta egutegietan xedatu bezala eginen da. Horiek, betiere, indarrean diren xedapenetan ezarritako gutxieneko iraupenak errespetatu beharko dituzte.

Baldin eta departamentuko, tailerreko edo zerbitzuko arduradunaren arabera beharrezkoa bada, ekoizpen kontuengatik, lanaldiko atsedenaldirako aurreikusitako denboran prozesuari segida ematea edo hasitako lana ez uztea, ukitutako langileei horren berri emanen die, eta horiek lanean jarraituko dute, eta erreleboa ematen dieten taldeko kideak laneratu bezain laster izanen dute atsedenaldia.

Erdiko txandan diharduten langileak dituzten departamentuetan (mantentze-lanak, biltegia, txandako ordezko langileak...), sarrera malgua izaten ahal da departamentuko buruek (MD3) deritzotenean posible dela departamentuaren antolaketa eta langileen kontziliazioa uztartzea, bi aldeek adostuta.

12. artikulua. Lan egutegia.

Enpresak urtero, azaroaren 1a baino lehen, lan egutegia eginen du, Enpresa Batzordeari kontsulta egin eta haren txostena jaso ondoren.

Departamentuetako egutegiak abenduaren 15a baino lehen jakinaraziko dira. Departamentuetako geldialdiak ere apirilaren 15a baino lehen jakinaraziko dira.

Lan egutegia iragarki-tauletan jarriko da, ongi ikusten den leku batean. Bertan finkatuko dira urteko txanden sistema, ordutegiak eta lanegunak.

Lan egutegian 12 hilabeteak agertuko dira, eta departamentu bakoitzeko txanda aldaketaren data adieraziko da (adibidez: gaueko txandara pasatzea, asteburuko txanda gehitzea...). Txanda aldaketak beti agertuko dira egutegian, bai gehitzen direnean, bai kentzen direnean.

Txandakako lan araubidean, ezartzen da zenbait postu nahitaez bete beharrekoak direla; langileak ez du postua uzten ahalko harik eta beste norbaitek ordezten duen arte. Honako hauek dira:

–Eraketa atalean: operadorea eta eskorga-gidaria.

–Erreketa/PI atalean: labezaina, labezain laguntzailea eta PPko operadorea.

–Grafitazio atalean: kontrol-gelako operadorea eta grafitazioko garabi-gidaria (3. nabea).

Lanpostu horiek gutxieneko zerbitzuak dira, prozesuan diren eragiketak bukatu arte, edozein egoeratan, baita greban ere, eta hala aitortzen dute berariaz alderdi sinatzaileek.

Gainera, mantentze-lanetako gutxieneko zerbitzuak hauek dira: elektrikari 1 eta mekanikari 1 goizeko eta arratsaldeko txandetan, elektrikari 1 gaueko alertetarako eta asteburuetako gaueko zaintaldearen zerbitzurako.

Horrez gain, ekoizpen arrazoiengatik, Zuzendaritzak adierazten ahalko du lanpostu batzuk nahitaez bete beharrekoak direla, prozesua ezin dela eten eta hasitako lana ezin dela bertan behera utzi lanaldiaren barneko atsedenaldia hartzeko ezarritako orduan. Langileek lanean jarraituko dute, eta erreleboa ematen dieten taldeko kideak laneratu bezain laster izanen dute atsedenaldia.

Lan egutegia kasu hauetan bakarrik aldatzen ahalko da:

–Pertsona edo gauzei kalte egiteko arriskua dagoenean.

–Fabrikako departamentu batean edo gehiagotan txanden araubidea aldatu beharra dagoenean beste departamentu batzuetako lana ez geldiarazteko.

–Departamentu, tailer edo zerbitzuaren funtzionamendurako gutxieneko baldintzak betetzen ez direnean.

Pertsona bakoitzak bere eginkizunei dagokien lan egutegia jasoko du, eta bertan lan zikloa agertuko da.

Txanda sisteman aldaketaren bat egiten denean, ondorioak departamentu, tailer edo zerbitzuko pertsona guztien artean banatuko dira, salbu hori argi eta garbi ezinezkoa bada. Arau horretatik salbuetsiko dira txandako ordezko langile gisa diharduten pertsonak eta alderdien arteko adostasunez zehaztutako taldeetarako berariaz ezartzen diren beste kasu batzuk.

Guztirako ekoizpen grafitatuaren jaitsiera dela-eta, langileren bati, bere departamentuko egutegian zehaztutakoarekin alderatuta, urteko 5 egun baino gehiago aldatzen bazaizkio, urteko lanaldian egun 1 murrizteko eskubidea izanen du. Egun hori hartzeko, baimena eskatu beharko da, eta departamentuko buruak (MD3) onetsi beharko du.

Beren lan egutegiaren arabera larunbat, igande eta jaiegunetan lan egin behar duten pertsonek, txanda edozein dela ere, dagokien plusa jasoko dute. Jaieguntzat hartuko dira abenduaren 24a eta 31, gaueko txandan. Gainera, abenduaren 24ko edo 31ko gauean lan eginez gero, lanaldian egun 1 murriztuko zaie. Egun hori hartzeko, baimena eskatu beharko da, eta departamentuko buruak (MD3) onetsi beharko du.

Soberako egunak.

Urte bukaeran lan egin behar ez diren egunak dira, urteko lanorduak astelehenetik ostiralera arteko lanegun guztien artean banatuz gero egunean egin behar litzatekeen lanaldia baino lanaldi luzeagoa egiteagatik.

Langile bakoitzari dagozkion soberako egunak urtean zehar benetan lan egindako egunen arabera zehaztuko dira.

Departamentuz departamentuko egutegiak prestatuko dira GRAFTECH IBÉRICA SLko langileek norberaren aferetarako 2 egun, gutxienez, izan ditzaten. Egun horiek hartzeko, baimena eskatu beharko da, eta departamentuko buruak (MD3) onetsi beharko du.

Soberako egunak aplikatzeko honako irizpide hauek ezarri dira, behar diren ekoizpen egunak edo ekoizpen ahalmena murriztu ez daitezen:

–Interesdunak bere nagusiarekin adostuko ditu egunak, ez baditu behin betiko ezarriak bere lan egutegian. Langile bakoitzari dagozkion egunen bi herenak, gutxienez, lehenbiziko seihilekoan likidatuko dira, eta gainerakoak azken hiruhilekoan.

–Soberako egunak noiz hartu aukeratzeko lehentasun-ordena oporrak aukeratzeko ordenaren alderantzizkoa izanen da, salbu ukitutako talde osoak besterik adosten badu berariaz.

Sanferminetako ordutegi berezia.

Sanferminetako lanegunetan, enplegatuen lan ordutegia, erdiko txandan, 09:30etik 16:00ak arte izanen da.

13. artikulua. Batzarrak.

Gehienez ere sei batzar baimenduko dira urtean, Enpresa Batzordeak legezko eran deitutako batzarretarako, hau da, hamabi ordu urtean.

Batzar bakoitzaren iraupena, gehienez ere, bi ordukoa izanen da hilean. Zuzendaritzak batzar gehiago baimentzen ahal ditu hitzarmenaren negoziazioan eta salbuespenezko beste kasu batzuetan, langileei informazioa eman beharra baldin badago.

Zuzendaritzak ezarriko du zer ordutan eginen den batzarra, ekoizpenari kalterik txikiena egiteko.

Betiere Enpresa Batzordea izanen da batzarreko burua. Batzordeko kideek batzarra behar bezala egitearen erantzukizuna izanen dute, eta enpresatik kanpoko inor bertan ez egotearena. Batzarrak egiten direnean fabrikako arauak beteko dira; tabakoa erretzea eta alkohola hartzea debekaturik daude. Gai-zerrendan sartu diren gaiak bakarrik aztertzen ahalko dira batzarrean.

Deialdia, deitzaileek proposatzen duten gai-zerrendarekin batera, batzarra egin baino gutxienez berrogeita zortzi ordu lehenago helaraziko zaio enpresako Zuzendaritzari. Batzarra, ahal dela, hilaren hirugarren astean eginen da.

14. artikulua. Oporrak.

Urtero enpresako Zuzendaritzak oporren txandak finkatuko ditu, eta gutxienez bi hilabete aurretik jakinaraziko ditu. Oporrak, lehentasunez, ekainaren 15etik irailaren 15era bitarte hartuko dira, langileak bere nagusiarekin adosten dituen egunetan. Oporrak zatitzen ahalko dira, baina gutxienez segidako 11 lanegun hartu beharko dira jarraian.

Oporrak urtea bukatu baino lehen hartu behar dira. Oporren ordez ez da diruzko ordainik jasotzen ahalko, salbu eta lan kontratua suntsiarazten denean.

Urteko oporrak 30 egun naturalekoak izanen dira, 22 lanaldi osoren baliokideak.

Oporrak I. eranskineko soldata-taularen arabera ordainduko dira. Beren lanpostuagatik plusak jasotzen dituzten ekoizpeneko eta mantentze-lanetako langileei honako plus hauen batez bestekoa emanen zaie oporraldian: nekagarritasun plusa; gaueko lanaren plusa; larunbat, igande eta jaiegunetakoa; lanaldiaren jarraitutasunarena eta zaintaldearena. Horretarako, oporren aurreko hiru hilabete naturaletako batez bestekoak kalkulatuko dira, hiru hilabete horietan langilea lanera agertu den egunak bakarrik kontuan hartuta.

Enpresako plantillan urte osoa egin ez duten langileek oporren zati proportzionala hartzeko eskubidea izanen dute.

15. artikulua. Lizentzia ordainduak eta ordaindu gabeak.

Lizentzia eta baimen ordaindu hauek ezartzen dira:

1. Langilea ezkontzeagatik edo izatezko bikote gisa erregistratzeagatik, egutegiko 18 egun, ezkontza / erregistroa gertatu eta lehen lanegunetik zenbatzen hasita. Lizentzia hori oporrei batzen ahalko zaie, batera baldin badira. Lizentzia hau ez da bi arrazoiak baliatuz pilatzen ahalko.

2. Ezkontidearen, izatezko bikotekidearen edo seme/alabaren heriotzagatik, 8 egun natural, heriotza gertatu eta lehen lanegunetik zenbatzen hasita.

Non eta lizentzia ez den hartzen gertaera eragilearen egun beretik hasita, lizentzia kontatzen hasiko da gertaera eragilea gertatu eta hurrengo lanegunean. Heriotza langilearen oporraldi baten barruan gertatzen bada eta jadanik hasita badu, oporrak zortzi egun naturalez etenen dira, lizentziari dagokion denbora, hain zuzen, eta lizentzia bukatutakoan oporraldiari ekinen dio berriz, eskatutako opor egunak agortu arte.

3. 5 lanegun, istripu nahiz gaixotasun larriagatik, ospitalizazioagatik nahiz etxean atseden hartzea eskatzen duen ospitalizaziorik gabeko ebakuntza kirurgikoa jasan behar badu langilearen ezkontideak, izatezko bikotekideak edo odol nahiz ezkontza bidezko ahaidetasuneko bigarren mailara arteko ahaide batek, baita izatezko bikotekidearen odol bidezko ahaidetasuneko ahaideak ere, edo langilearekin etxe berean bizi den eta zaintza behar duen beste edozein pertsonak. Era berean, gertaera eragileak irauten duen bitartean egunak solte ere hartzen ahalko dira.

4. Gurasoen eta anai-arreben heriotzagatik: 5 egun natural, heriotza gertatu eta lehenbiziko lanegunetik aitzina zenbatzen hasita.

Non eta lizentzia ez den hartzen gertaera eragilearen egun beretik hasita, lizentzia kontatzen hasiko da gertaera eragilea gertatu eta hurrengo lanegunean.

5. 2 egun gainerako ahaideen heriotzagatik, heriotza gertatu eta lehenbiziko lanegunetik aitzina zenbatzen hasita.

Non eta lizentzia ez den hartzen gertaera eragilearen egun beretik hasita, lizentzia kontatzen hasiko da gertaera eragilea gertatu eta hurrengo lanegunean. Arrazoi horrengatik langileak bidaia egin behar badu, epea 2 egunez luzatuko da.

6. Ahaide hauen heriotzagatik egun natural 1: osaba-izebak (ezkontide edo bikotekidearenak ere bai), ezkontza bidezko osaba-izebak, lehengusu propioak eta ilobak.

7. Anai-arreben, gurasoen, seme-alaben, osaba-izeben, lehengusu propioen, iloba propioen eta koinatu-koinaten ezkontza: egun natural 1. Gaueko txandan lan egiten duten langileen kasuan, lan-txanda gertaera eragilearen aurreko egunean hasi bada, ulertuko da lan-txanda osoari dagokiola lizentzia.

8. Nahitaezko eginkizun publiko bat betetzeko, behar-beharrezkoa den denbora.

9. Eginkizun sindikaletan edo langileen ordezkaritza-lanetan aritzeko, lege edo hitzarmen bidez ezarri bezala.

10. Ohiko bizilekuz aldatzeko: egun 1.

11. Familiako medikuaren edo espezialistaren kontsultara joateko eta ebakuntza kirurgiko anbulatorioa egiteko, behar adina denbora, behar bezala justifikaturik.

12. Behar-beharrezkoa den denbora, ezkontideari edo lehen mailako ahaideei lagun egiteko prozedura kirurgikoetara, emankortasun tratamenduetara edo tratamendu onkologikoetara joateko, betiere lagunduta joatea eskatuz gero.

13. Gidabaimena ateratzeko azterketa egiteko edo berritzeko behar-beharrezkoa den denbora, lanpostuaren eginkizunak direla-eta beharrezkoa denean.

14. 12 urtetik beherako seme-alabei kontsulta medikoetara lagun egiteko 3 eskaera urtero, 9 ordu guztira (egiaztagiria aurkeztu beharko da).

15. Urtean 4 egun (orduka hartzen ahalko dira) izanen ditu langileak ezinbesteak eraginik lanera joan gabe gelditzeko, baldin eta ahaideekin edo bizikideekin zerikusia duten premiazko familia-arrazoiengatik sortzen bada halabehar hori edo berehala bertaratzea eskatzen duen gaixotasun edo istripuren bat gertatzen bada (absentziaren arrazoia egiaztatu beharko da).

16. Behar-beharrezkoa den denbora, jaioaurreko azterketa medikoak egiteko eta erditzea prestatzeko tekniketan trebatzeko, lanorduetan egin behar badira.

Ordaindu gabeko lizentzia eta baimen hauek ezartzen dira:

17. Gaueko txandako langileen kasuan, ordaindu gabeko 4 orduko lizentzia espezialista baten kontsulta medikora joateko edo nahitaezko eginbehar publiko eta pertsonal bat egiteko eguerdiko 12ak baino lehen.

18. Norberaren aferetarako borondatezko lizentzia ordaindu gabeak: Enpresan urtebete daramaten langile finkoek ordaindu gabeko borondatezko eszedentzia eskatzen ahalko dute, gutxienez hilabeterako eta gehienez hiru hilabeterako. Langile berak eskubide hori berriro baliatzen ahalko du, baldin eta aurreko ordaindu gabeko lizentzia bukatu eta urtebete igaro bada.

Langile batek baino gehiagok eskatuz gero lizentzia hori aldi berean eta horrek departamentuaren funtzionamenduari eragiten badio, zilegi izanen da enpresak eszedentzia ukatzea, arrazoiak emanda.

Lizentzia horren ondorioetarako, eszedentziak irauten duen bitartean oinarrizko soldata hainbanatu eginen da, aldi horretan kotizazioari eutsi ahal izateko.

Eskatu nahi den lizentzia hasi baino hilabete bat lehenago egin beharko da eskaera. Baimena bukatzen denean, langilea berehala itzuliko da bere lanpostura hitzartutako egunean.

1. epigrafetik 5.era bitartekoetan, biak barne, aipatutako lizentziak egun naturaletarako izanen dira, non eta ez den propio besterik ezartzen epigrafean berean, eta lehenbiziko lanegunetik aurrera, gertaera eragiletik aitzina zenbatzen hasita; horren frogagiria nahitaez aurkeztu beharko da, ondoren aurkezten bada ere.

Gainerako lizentziak egun naturaletarako izanen dira eta gertaera eragiletik aurrera; nahitaezkoa izanen da aldez aurretik jakinaraztea eta egiaztatzea. Aurretiaz egiaztatzea ezinezkoa izanez gero, ondoren aurkeztu beharko da frogagiria.

Klausula honetako 2., 3., 4., 5., 6. eta 7. puntuetan ezkontidea aipatzen den guztietan, balio berekoa izanen da langilearekin bikotekide egonkor gisa bizi den pertsona, betiere bizilekua duten herriko udalaren ziurtagiriaren bidez frogatzen badute.

Artikulu honetako 2. zenbakian araututako lizentziaren kasuan izan ezik, lizentzia gertaera eragiletik lehenbiziko lanegunean zenbatzen hasiko dela adierazten den kasuetan, erreferentzia hori ulertu behar da gertaera eragilea jaiegunean edo asteko atseden-egunean gertatzen den kasuetarako, baina ez da izanen halakorik balizko gertaera eragilea gertatzen bada langilea oporretan, bajan, beste lizentzia batean, ordaindutako baimenean edo antzeko beste egoeraren batean den bitartean, kasu horretan ez baitago lizentzia hartzeko eskubiderik.

Lanegun aipatzen denean, langile bakoitzaren berariazko egutegia hartuko da aintzat.

Lizentzia horiei –salbuespen izanik 5. apartatutik 10.era bitartekoetan eta 8. epigrafetik 18.era bitartekoetan, biak barne, xedatutakoak–, beste 2 egun natural gehituko zaizkie, baldin eta lizentzia eskatzeko egoera lantokitik 200 km-ra baino gehiagora gertatzen bada.

16. artikulua. Lan-bizitza eta familia bateragarri egitea.

–Jaiotza eta adingabearen zaintza, 45.1 d) eta 48. artikuluak.

6/2019 Errege Lege Dekretuaren (6/2019 Errege Lege Dekretua, martxoaren 1ekoa, Enplegu eta lanaren arloan emakumeen eta gizonen arteko tratu- eta aukera-berdintasuna bermatzeko presako neurriena) 45.1 d) eta 48. artikuluetan xedatutakoari jarraituko zaio.

–Bularreko haurra zaintzea, garai aurreko erditzea, seme-alabak zaintzeko eszedentzia eta lanaldi murriztapenak. Langileen Estatutuaren 37. artikulua.

Arlo horiei dagokienez, Langileen Estatutuaren 37. artikuluari jarraituko zaio (4. apartatutik 7.era bitarte).

–Bularreko haurra zaintzea:

Langileen Estatutuaren 37,4. artikuluan xedatutakoari jarraituko zaio.

Langileek aukera hauetakoren bat baliatzeko eskubidea izanen dute bularreko haurra zaintzeko, haurrak 9 hilabete betetzen dituen arte:

• Lanera ordu batez ez agertzea; ordu hori bitan banatzen ahal da.
• Ordu-erdiko murriztapena lanaldian.
• Lanaldi osoetan metatzea: (14 lanegun).

Bularreko haurra zaintzeko orduak metatzea aukeratuz gero, langileak departamentuarekin adostu beharko du ordu horiek noiz hartu.

Enpresari hamabost egun lehenago jakinarazi beharko dio langileak, bularreko haurra zaintzeko baimena noiz hasi eta bukatuko den zehaztuta.

–Lanaldiaren murriztapena:

Langileen Estatutuaren 37. artikuluan xedatutakoari jarraituko zaio.

Langileak idatziz eskatu beharko dio departamentuko buruari, lanaldi murriztua hasi baino 15 egun lehenago gutxienez.

Lanaldiaren murriztapena dela eta, eskaeran azaldu beharko da noiz nahiago duen aplikatzea murriztapena (lanaldiaren hasieran edo bukaeran) eta noiz hasiko den, honako hau kontuan hartuta:

a. Lanaldi murriztua hilaren 01ean hasiko da beti, eta hilabete osoak bete beharko dira.

b. Eskatzen den lanaldiari dagokionez:

• Murrizketa 2 ordutik beherakoa bada, ogitartekoa edo bazkaria jateko eskubidea izanen du.
• Murrizketa 2 ordukoa edo handiagoa bada, Langileen Estatutuan xedatutakoari jarraituko zaio (ogitartekorik gabe).

c. Lanaldia murrizten duten langileek ogitartekoa edo bazkaria jateko eskubidea izanen dute, betiere laneko txandaren arabera, eta 15 minutuko atsedenaldia izanen dute, benetako lantzat hartuta.

d. Eskubide horren erabilera errazteko, lanaldi murriztua etenik gabekoa izanen da.

e. Lanaldiaren murriztapenak soldataren, dagozkion plusen eta kotizazioen murrizketa ekarriko du, proportzio berean.

f. Langileak PENTSIO PLANera egiten duen ekarpena ere proportzionalki murriztuko da.

Langile bakoitzaren baldintza pertsonalak aztertzeko konpromisoa hartzen da.

Lanaldia murriztu duen pertsonak utzitako lana egiteko beste pertsona bat kontratatzen bada, bien kostuen batura ez da izanen lanaldia murriztu aurreko kostua baino handiagoa.

Ordaindu gabeko 30 baimen egun hartzen ahalko dira, gehienez ere, interesdunak hala eskatuz gero, bere nagusiarekin ados jarri ondoren. Eskaera 15 egun lehenago egin beharko da.

–Lanaldiaren banaketa eta iraupena egokitzea.

Langileen Estatutuaren 34,8. artikuluan xedatutakoari jarraituko zaio.

12 urtez azpiko seme-alabak dituzten langileek lanaldiaren banaketa eta iraupena egokitzeko eskaera egiteko eskubidea dute, lan-bizitza eta familia bateragarri egiteko eskubidea baliatze aldera.

Eskubide hori izanen dute, halaber, hamabi urtez gorako seme edo alabaren bat, ezkontidea edo bikotekidea, langilearen odol bidezko ahaidetasuneko 2. mailara arteko ahaideak edo menpekotasuna duten beste pertsona batzuk zaindu beharrean dauden langileak, betiere etxe berean bizi badira eta, adina, istripua edo gaixotasuna dela-eta ahaidea ezin bada bere kabuz moldatu; eskaeraren oinarri diren inguruabarrak egiaztatu egin beharko ditu.

Eskubide hori baliatzen duten langileek idatziz aurkeztu behar dute eskaera, arrazoia egiaztatuta, eta lanaldia banatzeko eskaera ere zehaztuko dute.

Enpresak 15 eguneko epea izanen du eskaerari emandako erantzuna jakinarazteko.

Oro har, egokitzapenak gehienez urte 1erako izanen dira eta, langileak aurretiaz eskatuz gero, ekainean eginen da luzapena.

–Guraso baimena.

Langileen Estatutuaren 48.bis artikuluan xedatutakoari jarraituko zaio.

Langileek ordaindu gabeko guraso baimena hartzeko eskubidea izanen dute seme-alabak zaintzeko nahiz harreran urtebetetik gora hartutako adingabea zaintzeko, adingabeak zortzi urte bete arte.

Baimen horrek gehienez 8 asteko iraupena izanen du, jarraituak edo etenak, eta lanaldi osokoa edo lanaldi partzialekoa izaten ahalko da, erregelamendu bidez ezarritakoaren arabera.

Langilearen ardura izanen da baimen hori baliatzeko aldiak zein egunetan hasi eta bukatuko diren zehaztea. Enpresari 10 egun lehenago jakinarazi beharko zaio, ezinbesteko kasuetan izan ezik, betiere langilearen egoera eta enpresaren antolamenduzko premiak kontuan hartuta.

17. artikulua. Eszedentziak.

A) Nahitaezko eszedentzia: nahitaezko eszedentzia –lanpostua gorde eta antzinatasuna kontatzeko eskubidea ematen duena– emanen da, lanera joatea galarazten duen kargu publikoren baterako izendatu edo hautatua izateagatik.

Halaber, nahitaezko eszedentzia emanen zaie ordezkaritza handieneko sindikatuen probintziako, autonomia erkidegoko edo estatuko hautetsiei.

Kargu publikoa edo sindikatuko eginkizunak utzi eta hurrengo hilabetean eskatu beharko da lanera itzultzea.

B) Borondatezko eszedentzia: Enpresan urtebete daramaten langileek borondatezko eszedentzia eskatzen ahal dute, gutxienez lau hilabeterako eta gehienez bost urterako. Aurretik eszedentzian egondako langileak eszedentzia berriz hartzeko, lau urte igaro beharko dira aurreko eszendentzialdia bukatu zenetik.

Lanpostua lehenbiziko urtean gordeko zaio eszedentzian den langileari. Eszedentzialdia urtebetetik gorakoa bada, enpresan bete gabe dauden edo sortzen diren bere kategoriako edo antzeko kategoriako lanpostuetan sartu ahal izateko lehentasunezko eskubidea baino ez du izanen langileak.

Langileek ahaideak zaintzeko eszedentzia hartzeko eskubideari dagokionez, Langileen Estatutuaren testu bateginaren 46. artikuluko 3. zenbakian xedatutakoari jarraituko zaio.

Enpresara itzultzeko eskaera idatziz eginen da, borondatezko eszedentzialdia bukatu baino gutxienez hilabete lehenago.

C) Honako eszedentzia mota honetarako baldintzak aztertzeko aukera ezarri da: 1-3 urte bitarteko eszedentzia, bi alderdiek adostua, antzeko kategoriako lanpostu bat gordetzeko eskubidearekin, are plantilla berregituratuko balitz ere.

VI. TITULUA.–PRINTZIPIO OROKORRAK

18. artikulua. Lanaren antolaketa.

A) Lana antolatzea, hitzarmen kolektibo honetan eta indarra duen legerian ezarritakoarekin bat, enpresako Zuzendaritzari dagokio, eta hark zeregin hori beteko du bere ahalmenak arauzko moduan erabiliz enpresako arlo guztietan, kasu bakoitzean egoki iruditzen zaizkion ordezkaritza eta kontrol sistemen bidez.

Lana antolatuz eta arrazionalizatuz produktibitate maila egokia lortu nahi da, enpresak dituen baliabide teknikoen, materialen eta giza baliabideen erabilera ezin hobean oinarritua, alderdi guztien arteko lankidetza aktibo eta arduratsua dela bide, errentagarritasun eta lehiakortasun mailarik onenak lortzeko.

Langileen ordezkariak, berriz, goian aipatutako ahalmenak indarreko legeriari jarraituz erabil daitezen arduratuko dira.

B) Azalpen gisa, eta ez modu mugatzailean, lanaren antolaketa, enpresaren ahalmenaren adierazpena den aldetik, honako arlo hauetan gauzatuko da, besteak beste:

1. Langileak ohiko errendimenduak lortu ahal izateko beharrezkoak diren elementu materialak zein diren zehaztea.

2. Fabrikazio prozesuan eskatzen ahal diren kalitate mailak ezartzea, baita galeraren eta alferrik galtzearen indize onargarriak ere.

3. Langilearen produkzio ahalmena zentzuz eta osorik baliatzeko behar diren makinen edo zereginen kopurua finkatzea.

4. Makina, instalazio eta erremintak zaintzea.

5. Langileak zereginen arabera banatzea, ekoizpen beharren eta langile bakoitzak duen gaitasunaren arabera.

19. artikulua. Mugigarritasun funtzionala.

1. Enpresa barruan, mugigarritasun funtzionalaren muga bakarrak hauek izanen dira: lan egiteko behar diren titulazio akademikoak edo lanbide titulazioak eta langile bakoitzaren lanbide taldea.

Hori dela eta, hitzarmen honen I. eranskinean zerrendatutako taldeetako bakoitzak biltzen dituen kategoria edo mailak lanbide talde berekotzat joko dira.

2. Norberaren lanbide taldetik edo kategoria baliokideetatik kanpoko zereginak egiteko mugigarritasun funtzionala zilegi izanen da bidezko arrazoi teknikoak edo antolamendukoak daudenean, eta ezinbesteko denboraz betiere. Langileari beheragoko kategoriako eginkizunak ematen bazaizkio, ekoizpen jardueraren behar larri edo ustekabekoengatik eginen da soilik, eta enpresak egoeraren berri eman beharko die langileen ordezkariei.

3. Langilearen duintasunari kalte egin gabe eta haren prestakuntzaren eta sustapen pertsonalaren kontra joan gabe gauzatu behar da mugigarritasun funtzionala; eta benetan egindako eginkizunei dagokien ordainsaria jasotzeko eskubidea izanen du langileak, eginkizun apalagoak agintzen zaizkionean izan ezik, kasu horretan jatorrizko ordainsariari eutsiko baitio. Mugigarritasun funtzionalaren ondorioz langilea ohiz kanpoko eginkizunetan ari denean, ez dira kaleratze objektiboaren arrazoi gisa erabiltzen ahalko ustekabean agertutako gaitasunik eza edo moldatzeko ezintasuna.

4. Mugigarritasun funtzionala gauzatzen denean, lanpostuari lotutako soldata osagarriak lanpostu berriari dagozkion kasuetan soilik ordainduko dira.

20. artikulua. Osotasunari lotzea.

Hitzarmen honetan itundutako baldintzek osotasun organiko eta zatiezina eratzen dute, eta aplikazio praktikoari begira, orokorki hartuko dira kontuan.

Hori horrela, hitzarmen honetan biltzen diren xedapenek osotasun bat osatzen dute, edozein modutan ere lehendik daudenekin konpentsatzekoa. Horren ondorioz, hitzarmen hau aplikatzen denean indarrik gabe geldituko dira enpresan orain arte indarra izan duten akordio, itun edo ohiturazko praktikak, ordainsariei, arauei, laguntzari nahiz beste edozeri buruzkoak, banakakoak nahiz taldekoak, baldin eta horien gaiak ez badaude hitzarmenean araututa, eta kontuan hartu gabe nola sortu ziren. Salbuespena izanen da "GRAFTECH IBÉRICA SLko Aurreikuspen Planari buruzko Erregelamenduan" ezarritakoa.

Etorkizunean ezartzen ahal diren xedapenei dagokienez, aldaketa ekonomikorik edo lan denboraren aldaketarik badakarte, eragina izanen dute baldin eta, osotara kontuan harturik, langilearentzat hitzarmen honetan ezarritakoak baino hobeak badira urteko zenbaketan.

VII. TITULUA.–BALDINTZA EKONOMIKOAK

21. artikulua. Ordainsariei buruzko printzipio orokorrak.

Hitzarmen kolektibo honetako lansari-kontzeptu guztiak ordainsari gordinak dira eta haien gainean eginen dira langilearen Gizarte Segurantzako kuotari dagozkion kenkariak, Pertsona Fisikoen Errentaren gaineko Zergarenak eta legez eskatzen den beste edozein.

Zuzendaritzak uko egiten dio Langileen Estatutuaren 41.1.d) artikuluan xedatutakoa aplikatzeari, betiere uztailaren 6ko 3/2012 Legearen 12. artikuluak egun eman dion idazketaren arabera. Horrenbestez, hitzarmena indarrean den bitartean, GRAFTECH IBÉRICA SL enpresako langileen baldintza ekonomikoak ez dira aldatzen ahalko.

22. artikulua. Hitzarmen kolektibora bildutako enplegatuen ordainsariak.

2023ko abenduaren 31n esleituak zituzten oinarrizko soldata eta aparteko bi eskersariak (uztailekoa eta Eguberrietakoa) kobratuko dituzte, gehi %3,1eko igoera eta, orobat, hitzarmenean kolektibo horri berariaz aplikatzekotzat jotzen diren osagarriak, hau da, 36. artikuluan arautzen den soldata aldakorra eta 27.-37. eta 39. artikuluetan ezarritako kontzeptuak.

Enplegatu baten gutxieneko soldata gordina 30.746,14 euro izanen da urtean (12 paga eta aparteko 2 paga), salbuespen izanik praktiketako kontratua duten langileentzat xedatutakoa.

23. artikulua. Ekoizpeneko eta mantentze-lanetako langileen ordainsariak.

Ekoizpeneko eta mantentze-lanetako langileen taldeetan (A mailatik E mailara bitarte) sailkatutako langileek hitzarmen kolektibo honetan ezarrita dauden ordainsariak jasoko dituzte.

24. artikulua. A mailatik E mailara bitarte sailkatutako ekoizpeneko eta mantentze-lanetako langileei aplikatu beharreko soldataren egitura.

Hurrengoak dira:

–Oinarrizko soldata.

–Aparteko eskersariak.

–Konpentsazioko plus aldakorrak (nekagarritasuna, gaueko lana, igande eta jaiegunetako lana, larunbatetako lana, lanaldiaren jarraitutasuna, mantentze-lanetako taldeko burua, zaintaldea eta alerta). Horiek ordain daitezen, 29. artikulutik 34.era bitartekoetan, biak barne, ezarritako baldintzak betez egin behar da lana. Lana noiz egiten den, lanaren baldintzak eta langilearen beste betebehar batzuk aintzat hartuz ordaintzen dira, eta ez daude sartuta oinarrizko soldatan ez bestelako kontzeptuetan.

–Aparteko orduak.

–Soldata aldakorra.

–2. fideltasun plusa.

–Banakako beste kontzeptu batzuk, "ad personam" berme gisa.

25. artikulua. Oinarrizko soldata.

Horren zenbatekoa, 2024rako, I. eranskineko soldata tauletan finkatuta dago, eta langile bakoitzaren mailaren araberakoa da. Maila horiek letren arabera izendatuta daude eta, hitzarmen hau indarrean dagoen bitartean, ordainketa mailak Atik Era bitartean sailkatuta izanen dira. Ordainketa egunen araberakoa izanen da, hileko egun naturalen araberakoa, eta likidazioa hilero eta hamabi ordainsaritan eginen da.

26. artikulua. Aparteko eskersariak.

Aparteko bi eskersari ordainduko dira, bat uztailean eta bestea abenduan, bakoitza 30 eguneko oinarrizko soldata adinakoa. Haien zenbatekoa hainbanatu eginen da, kontuan hartuta kasuan kasuko seihilekoan langileak enpresan alta emanda zenbat denbora egin duen. Bi eskersarien zenbatekoak I. eranskinean ezarri dira.

27. artikulua. 2. fideltasun plusa.

2024ko urtarrilaren 1etik aitzina, langile bakoitzari beretzat kalkulatutako zenbateko bat emanen zaio. Hori kalkulatzeko, 2018/03/20 eguneko dokumentuan ezarritako datatik kontatzen hasita enpresan egindako hirurteko bakoitza bider 284,99 eginen da.

Urtean behin ordainduko zaie langileei, 2018/03/20 eguneko dokumentuan ezarritako hilean.

Fideltasun plusa jasotzen ez duten langile guztiek izanen dute 2. fideltasun plusa jasotzeko eskubidea. Halaber, hitzarmena sinatu eta gero enpresara sartuko diren langile finkoek ere izanen dute hori jasotzeko eskubidea, baldintza berberetan.

28. artikulua. Nekagarritasun plusa.

GRAFTECH IBÉRICA SLn honako lan hauek daude nekagarritzat sailkatuak, eta haiei bakarrik dagokie nekagarritasun plusa:

–Orokorra:

• Iragazki kimikoa duen maskara jantzita egin behar diren lanak.
• Eskafandra jantzita egin behar diren lanak.
• Arnasketa ekipo autonomoak erabiliz egin behar diren lanak.
• Transformadoreetako upelen eta tobera itxien barnean egin behar diren lanak.
• Hauts xurgagailuen barnean egin behar diren lanak.
• Milivoltak neurtzeko lanak diodoen kabinetan, piztuta dauden artezgailuetan.

–Eraketa:

• Zinta edo hozkailuetako buxadurak nahastura beroekin kentzeko lanak.
• Hozkailuetako buxadurak hotzean kentzeko lanak.
• Bahegailuen multzo eragilean egin beharreko lanak. (hautsa).
• Departamentua lanean ari denean nahasgailu eta hozkailuen barnean egin behar diren lanak.
• Brea erabiltzeko ekipoetan (jasogailua, tornua, errota, baskula...) egiten diren lanak, brea ez ukitzeko babesa erabili behar denean.

–Erreketa/PI:

• Brea-tankeetako irabiagailuak konpontzea.
• Brea garraiatzeko instalazioetako lanak, brea ez ukitzeko babesa erabili behar denean.
• P prozesuan erauzi eta murgiltzeko makinan egiten diren lanak.
• Autoklabeetako huts ponpetan egiten diren lanak.
• Erreketa labean birzirkulazio zonak aldatzea, labea piztuta dagoela.

–Grafitazioa:

• Grafitazio nabeen barneko lan guztiak, langileak muturreko tenperaturak jasan, koke metalurgikoa ukitu edota sufre dioxidoaren (S02) usaina jasan behar badu.
• Garabi-gidariek hustuketak beroan egiten dituztenean jasoko dute plus hau.
• Kontrol-gelako ekoizpeneko langileek ordu bat jasoko dute nabean lanak egiten dituztenean.

Plus hau lan egindako egun bakoitzeko ordainduko da. Lan nekagarriak ordubete baino gehiago iraun baina lanaldi erditik gora hartzen ez badu, plusaren erdia ordainduko da. Plus honen zenbatekoa 1,35 euro izanen da orduko.

29. artikulua. Gaueko lanaren plusa.

Gaueko txandan (22:30etik 06:30era) lan egiten duten langileek 50,83 euro kobratuko dituzte lan egindako gau bakoitzeko.

30. artikulua. Igande eta jaiegunetako plusa.

Igandeetan eta Estatuko, autonomia erkidegoko edo tokiko jaiegunetan lan egiten duten ekoizpeneko eta mantentze-lanetako langileek 131,90 euro kobratuko dituzte lan egindako igande edo jaiegun bakoitzeko. Abenduaren 24a eta 31 jaieguntzat hartuko dira, gaueko txandan.

Igandeetan eta Estatuko, autonomia erkidegoko edo tokiko jaiegunetan lan egiten duten enplegatuek 167,10 euro kobratuko dituzte lan egindako igande edo jaiegun bakoitzeko.

31. artikulua. Larunbatetako plusa.

Larunbatetan lan egiten duten ekoizpeneko eta mantentze-lanetako langileek 83,55 euro kobratuko dituzte lan egindako larunbat bakoitzeko.

Larunbatetan lan egiten duten enplegatuek 140,86 euro kobratuko dituzte lan egindako larunbat bakoitzeko.

32. artikulua. Lanaldi jarraituagatiko plusa.

Beren lanpostua ezin utzi eta ogitartekorako denboran alde egiterik ez duten langileek 12,77 euro kobratuko dituzte hori gertatzen zaien egun bakoitzeko.

33. artikulua. Zaintaldearen eta alertaren plusa.

Beren lanorduetatik eta lanegunetatik kanpo, Zuzendaritzak hala erabakita, aurkitzeko moduan eta enpresak deituz gero lantokira joateko prest egon behar duten langileek plus hau kobratuko dute. Lansari kontzeptu hau kobratzen duten langileak beharturik egonen dira enpresara joatera, eta ez bakarrik pertsona-bilagailuaren edo sakelako telefonoaren bidez aurkitzeko moduan egotera. Enpresara joaten diren bakoitzean 74,79 euroko konpentsazioa jasoko dute joan-etorrian ustez eman behar duten denboragatik. Gainera, 0,14 euro ordainduko zaie etxetik lantokira eta lantokitik etxera egindako kilometro bakoitzeko. Diru kopuru hori nominan ordainduko da "BESTE SARI BATZUK" epigrafearen pean.

Zerbitzu hauetarako txandei eta beste inguruabar batzuei dagokienez, mantentze-lanetako buruak urtero ematen dituen arauei jarraituko zaie.

Zaintaldearen plusa: Larunbat, igande eta jaiegunetako arratsaldeko eta gaueko txandetan zerbitzu hau egiten duten langile guztiek 78,44 euro jasoko dituzte eguneko.

Alerta plusa: Zaintaldearen zerbitzuan sartzen ez diren egunetan gaueko txandan zerbitzu hau egiten duten langileek 176,18 euro jasoko dituzte asteko.

34. artikulua. Taldeburuaren eta agintariaren plusa.

Beste pertsona batzuk gainbegiratzeko zereginak egiten dituzten langile izendatu guztiek plus bat jasoko dute, 320,34 euro hilabeteko.

Mantentze-lanetako departamentuko agintariek, haien lan egutegian laneguna ez den egun batean fabrikara joan behar badute planifikatuta ez zegoen larrialdi edo matxura batengatik, ordaina kobratuko dute, fabrikan egoten diren denboraren arabera:

–4 ordu edo gutxiago: 200,51 euro.

–4 ordutik gora: 267,37 euro eta konpentsazio egun bat.

35. artikulua. Aparteko orduak.

Aparteko orduak ahalik eta gutxienetan eta salbuespenetan egitekoak direnez, ordu horiek besterik ezin den kasuetarako uztea adostu dute bi alderdiek.

Honela sailkatu dira:

–EZINBESTEKO APARTEKO ORDUAK.

–EGITURAZKO APARTEKO ORDUAK.

–APARTEKO ORDUAK.

EZINBESTEKO APARTEKO ORDUAK. Ezbeharrei aurrea hartzeko edo haiek konpontzeko beharrezkoak direnak, bai eta antzeko kasuetan ere, baldin eta aparteko ordu horiek ez egiteak enpresari edo hirugarrenei kalte nabarmen eta larriak badakarzkie. Gauza bera lehengaiak galtzeko arriskua dagoenean. Nahitaezkoak izanen dira eta ez dira kontuan hartuko baimendutako orduen gehieneko kopurua kalkulatzeko.

EGITURAZKO APARTEKO ORDUAK. Honako hauek dira: eskaerei edo ekoizpen handiko uneei aurre egiteko beharrezkoak direnak, horiek ez egiteak jarduerari kalte larria badakarkio; ustekabeko absentziak, martxan jartzeko edo/eta geldiarazteko behar direnak, edo txanda-aldaketetarako eta antzeko kasuetarako. Langilearentzat betiere borondatezkoak izanen dira.

OHIKO APARTEKO ORDUAK. Enpresak ekoizpena handitzeko erabiltzen dituen orduak dira, aurreko kasuetan sailkatzen ez direnak. Langilearentzat betiere borondatezkoak izanen dira.

Langileek ez dute, inolaz ere, indarreko legeriak baimentzen dituenak baino aparteko ordu gehiago egiten ahalko.

Aparteko orduak atsedenaldiarekin konpentsatzen ahalko dira.

Lan egindako aparteko ordu bakoitzeko konpentsazio ekonomikoa, 2024an, hitzarmen honen I. eranskinean soldata maila bakoitzerako adierazitakoa izanen da.

Ezinbestean egin beharreko aparteko orduen kasuan, konpentsazio ekonomikoa 3 euroan handituko da ordu bakoitzeko.

39. artikuluko osagarri pertsonala duten langileei aparteko orduaren kalkuluan osagarri pertsonal hori sartuko zaie.

36.a artikulua Ekoizpeneko eta mantentze-lanetako langileen soldata aldakorra.

Soldata aldakor bat ezarri da sorrarazpena dagokion ekitaldiko urte naturalean gutxienez 182 egunez enpresan alta emanik iraun duten langile guztientzat, salbu hitzarmenetik kanpo dauden langileentzat; soldata finkoaren (oinarrizko soldata gehi aparteko eskersariak) %1era bitartekoa izan daiteke. Zenbatekoa hitzarmenaren indarraldiko urte bakoitzerako finkatuko da, eta hurrengo urteko otsailean ordainduko; kalkulatzeko oinarritzat, berriz, eskubidea sortzen den urteko behin betiko soldatak hartuko dira.

Portzentaje bat ordainduko da kontzeptu honetan, Grafitazioan lortutako urteko ekoizpenaren arabera:

36.b artikulua Enplegatuen soldata aldakorra.

Soldata aldakorra ekitaldiko urte naturalean gutxienez 182 egunez enpresan alta emanik iraun duten langile guztientzat.

37. artikulua. Departamentuko plus orokorra (arduradunak).

Hilabetero ordainduko zaie ekoizpeneko arduradunei, beren dedikazioarengatik eta txandakako sisteman aritzeagatik.

396,30 euro gordin izanen dira hilabetean (12 hilabetez) grafitazioko arduradunentzat. Arduradun hauek ez dute larunbat, igande eta jaieguneko plusik kobratuko.

57,29 euro gordin izanen dira hilabetean (12 hilabetez) ekoizpeneko gainerako arduradunentzat.

38. artikulua. Soldaten igoerak eta berrikuspena.

2024. urtean: I. eranskinean, indarrean dauden taulak ageri dira, Atik Era bitarteko maila guztietarako hitzartutako soldata igoera guztiak aplikatuta. Orobat, soldata kontzeptu bakoitzak aurten duen balio eguneratua ageri da.

2025. urtean: 2024/12/31n indarra duten soldatak Espainiako 2024ko KPIa gehi %0,75 igoko dira.

39. artikulua. Banakako beste kontzeptu batzuk, "ad personam" berme gisa.

Aurreko hitzarmenean itundu bezala mantentzen dira soldata kontzeptu hauek: fideltasun plusa, urruntasun plusa, presentzia plusa, laneratze plusa eta A, B eta C mailen bihurketarengatiko osagarri pertsonala.

VIII. TITULUA.–HOBEKUNTZA SOZIALAK

40. artikulua. Aldi baterako ezintasuna.

a) Aldi baterako ezintasuna eritasunaren ondorioz:

Eritasunaren ondorioz langilea bajan dagoen bitartean enpresak egiazko lansariaren %100eraino osatuko dio.

Eriak bere etxean medikuari bisita edo ikuskapena egiten utzi beharko dio. Langileak azterketa horiei uko eginez gero, egoera horietan enpresaren kargu izaten diren eskubide ekonomikoak etetea ekarriko du.

Baja parteak: Langileak dagokion departamentuan jakinarazi beharko du, ezinbestean, telefonoz edo mezu elektroniko bidez, eritasunagatik bajan dagoela.

Alta parteak: Ezein langile ez da bere lanpostuan egoten ahalko enpresak ez badu langilearen altaren jakinarazpenik jaso aurretiaz. Langileak dagokion departamentuan jakinarazi beharko du, ezinbestean, telefonoz edo mezu elektroniko bidez, zein egunetan hartu duen alta.

b) Aldi baterako ezintasuna lan istripuaren edo lanbide eritasunaren ondorioz:

enpresak langileari %100eraino osatuko dio tauletako egiazko lansaria, gehienez 18 hilabete igaro arte. Langileak nahitaez onartu behar ditu aurreko atalean ezarritako kontrol sistema berak.

41. artikulua. Prestakuntza.

Enpresako Zuzendaritzak eta langileen ordezkariek uste dute langileen prestakuntza garrantzi handikoa dela, eta GRAFTECH IBÉRICA SLk horren alde egin nahi du. Horretarako, enpresako Zuzendaritzak konpromisoa hartu du urtero behar adinako inbertsioa egiteko enpresako langileek beren lanpostuetan eraginkortasunez aritzeko behar duten ezagutza bereganatu dezaten.

Enpresa Batzordeak enpresaren prestakuntzaren planaren berri izanen du urtero, Langileen Estatutuaren 64. artikuluan informazio eta kontsulta eskubideei buruz ezartzen denari jarraikiz.

42. artikulua. Jantokia (kafetegia).

Jantoki zerbitzua (kafetegia) izanen da, hitzarmen honek indarra hartu aurretik bezala.

IX. TITULUA.–DIZIPLINA ARAUBIDEA, FALTAK ETA ZEHAPENAK

43. artikulua. Tipikotasuna.

Zuzendaritzak langileak zehatzen ahalko ditu laneko arauak ez betetzeagatik. Falta eta zehapenak Metalaren Industriako Lan Jokabidearen Kodeari buruzko Akordioari jarraituz mailakatuko dira (akordio hori Lan Zuzendaritza Nagusiaren 2001eko apirilaren 6ko ebazpenaren bidez onetsi zen, eta 2001.05.02an argitaratu zen Estatuko Aldizkari Ofizialean).

44. artikulua. Falten mailaketa.

Langileak eginiko faltak honela sailkatuko dira, haien garrantzia eta helburua kontuan hartuta: arinak, astunak edo oso astunak.

a) Falta arinak.

Honako hauek dira falta arinak:

a) Puntualtasun falta lanera sartzean edo lanetik irtetean, hiru aldiz gehienez hilabete batean, bidezko arrazoirik izan gabe.

b) Bidezko arrazoirik izan gabe lanera ez agertzea, hilabetean egun batez.

c) Lanera joanen ez dela ez jakinaraztea, aurretiaz edo, bidezkoa denean, hurrengo hogeita lau orduen barrenean, hori egiteko ezintasuna egiaztatzen denean izan ezik.

d) Zerbitzutik edo lanpostutik denbora laburrerako alde egitea funtsezko arrazoirik gabe, baldin eta horren ondorioz pertsonei edo gauzei kalte handi samarra egiten bazaie.

e) Norberaren ardurapean dauden ekipoak eta laneko materiala zaindu edo mantentzeko narriadura arinak.

f) Enpresaren bezeroak edo hornitzaileak adeitasunez eta arretaz ez hartzea.

g) Bizilekuz edo helbidez aldatu izanaren berri ez ematea enpresari, baldin horrek lankideei edo enpresari kalterik edo arazorik ekartzen badie.

h) Langilearen familiaren edo norberaren datuetan izandako aldaketak, Gizarte Segurantzan edo Zerga Administrazioan ondorioak izan ditzaketenak, ez jakinaraztea behar den garaian.

i) Beren eginkizunetan arauz ari diren nagusiek emandako aginduei jaramonik ez egitea, horrek pertsonei edo gauzei kalte edo arriskurik ekartzen ez badie.

j) Ohiko lanaldiaren barnean egiten diren prestakuntza ikastaro teoriko edo praktikoetara ez joatea, bidezko arrazoirik izan gabe.

k) Lankide, bezero edo hornitzaileekin eztabaida izatea lanaldi barrenean.

l) Noizean behin mozkortuta edo drogak hartuta egotea lanean.

b) Falta astunak.

Hauek dira falta astunak:

a) Puntualtasun falta lanera sartzean edo lanetik irtetean, hiru aldiz baino gehiagotan hilabetean, bidezko arrazoirik izan gabe.

b) Bidezko arrazoirik izan gabe lanera ez agertzea bi egunetik lau egunera, hilabete baten barnean. Aski izanen da lanera behin bakarrik huts egitea, horren ondorioz lankide baten txanda nahaspilatzen bada edo enpresari kalte handi samarra sortzen bazaio.

c) Zerga kontuan edo Gizarte Segurantzan eragina izan dezaketen datuak maltzurkeriaz faltsutzea edo ez aipatzea.

d) Lanorduetan jolasean edo denbora pasa ibiltzea, behin eta berriz eta laneko martxa kaltetuz.

e) Langilearen ardura dutenen aginduei jaramonik ez egitea, horrek pertsonengan edo gauzetan ondorio larria baldin badakar.

f) Norberaren garbitasun eta txukuntasun eza, lankideengan arrazoizko kexua sorrarazten duenean eta enpresak aurrez ohartarazi badio, betiere.

g) Beste langile baten lekua hartu eta laneko sarrerako edo irteerako erregistroak eta kontrolak aldatzea.

h) Zabarkeriaz edo utzikeriaz aritzea lanean, zerbitzuaren kaltetan, baina, horren ondorioz, pertsonengan edo gauzetan kalte larririk sortu gabe.

i) Enpresaren baimenik gabe, lan partikularrak egitea lanorduetan, bai eta enpresako tresnak, erremintak, makinak edo ibilgailuak norberarentzat edo beste batentzat erabiltzea ere, are lanordutik kanpo egiten denean ere.

j) Hiruhileko baten barruan eta zehapena jasota, falta arinen bat errepikatzea (puntualtasun falta aparte utzita), falta berbera ez izan arren.

k) Mozkortuta egotea edo ohikoak ez diren drogak kontsumitzea, horrek lanean eragin negatiboa badu edo langileen laneko segurtasunaren eta osasunaren babes mailan kalte edo arrisku bat eragiten badu.

l) Segurtasun arauak ez betetzea.

c) Falta oso astunak.

Falta oso astunak honako hauek dira:

a) Puntualtasun falta lanera sartzean edo lanetik irtetean, hamar aldiz baino gehiagotan hilabete batean, edo hogei aldiz baino gehiagotan urtebetean.

b) Lanera hiru egun jarraian huts egitea, edo bost egun tartekatutan hilabete batean.

c) Agindutako kudeaketan iruzurra, leialtasun eza edo konfiantza abusua egitea eta beste lankideei, enpresari edo edozein pertsonari ebastea edo lapurtzea enpresaren lokaletan edo, lanean ari dela, beste edozein lekutan. Enpresan behar ez bezala erabiltzea langileen esku dauden lan tresnak: telefonoa, ordenagailua eta Internet.

d) Eritasuna edo istripua simulatzea. Adierazitako edozein arrazoi dela-eta langilea bajan egonik, bere kontura zein besteren kontura edozein lanetan aritzea lan arloko arau haustetzat hartuko da. Halaber, falta oso astuntzat joko da istripuaren edo eritasunaren ondoriozko baja luzatzeko egiten den trikimailu oro.

e) Zerbitzua edo lanpostua bertan behera uztea bidezko arrazoirik gabe denbora gutxirako bada ere, baldin eta horrela enpresari edo lankideei kalte handi samarra egiten bazaie, segurtasuna arriskuan jartzen bada edo istripuren bat eragiten bada.

f) Enpresako sekretuak, nahitaez isilpean gorde beharrekoak, haustea edo bortxatzea.

g) Enpresari lehia desleiala egitea zenbait jardueraren bidez.

h) Ohiko edo itundutako errendimendua luzaroan eta nahita gutxitzea.

i) Hitzezko eta egitezko tratu txarrak ematea edo errespetu falta agertzea goragokoei edo haien familiakoei, baita lankideei eta enpresaren hornitzaile eta bezeroei ere.

j) Falta astun bat egin ondoren, bi hilabeteren barnean gehiago egitea, beste mota batekoak izan arren, zehapena jaso badute.

k) Laneko edozein gaitan goragokoen esanak edo aginduak ez betetzea, horrek enpresari edo lankideei kalte nabarmena eragiten badie, salbu eta zuzendari, arduradun edo erdi mailako kargudunek agintekeriaz jarduten dutenean, legezko manuak nabarmen eta nahita urratuz eta langilearen kaltetan.

l) Honako egoera hau hartzen da sexu jazarpentzat: sexu kutsuko edozein jokabide hitzezko, ez hitzezko edo fisiko, pertsona baten duintasunari erasotzeko asmoz egiten dena edo ondorio hori dakarrena haren gogoaren kontra, eta, batez ere, inguru beldur eragile, etsaitasunezko, iraingarri, umiliagarri edo laidogarria sortzen duena. Sexu jazarpena jasan duen pertsonari bere lanpostuan jarraitzea segurtatuko zaio. Jokabide edo portaera hori hierarkia egoeraz baliatuz gauzatzen bada, inguruabar astungarria izanen da.

m) Jazarpen morala (mobbing), hau da, abusuzko jokabidea edo bortizkeria psikologikoa luzez erabiltzea beste pertsona baten aurka lantokian, errepikatutako portaeren, egintzen, aginduen edo hitzen bidez adierazten dena, pertsona horren izena belzteko, pertsona gutxietsi edo isolatzeko edo haren gaitasuna, lanbidean hobekuntza izatea nahiz lanpostuko iraunkortasuna deuseztatzeko, haren duintasunean edo osotasun fisikoan gero eta kalte handiagoa eta etengabea sortuz, zuzenean nahiz zeharka. Astungarria da jazarleak jazarriaren gaineko aginte hierarkiko bat izatea enpresaren egituran.

n) Arrazan edo etnian, sexuan, erlijioan edo sinesteetan, desgaitasun batean, adinean edo orientazio sexualean oinarrituriko jazarpena. Jazarpentzat jotzen da halako portaeraren helburua edo ondorioa bada inoren duintasunaren aurka egitea eta inguru beldur eragile, etsaitasunezko, iraingarri, umiliagarri, laidogarria edo baztergarria sortzea.

o) Agintekeria: Nagusi batek agintekeriaz jokatu duela ulertuko da egintza arbitrarioren bat gauzatzen badu, legezko manuak nabarmen eta nahita urratuz eta menpekoari kalte nabarmena eginez. Behin arau-haustea egiaztaturik, enpresako zuzendaritzak zehapena ezartzeko neurririk hartzen ez badu, langile kaltetuak langileen ordezkariei jakinaraziko die, eta haiek egokitzat jotzen dituzten ekintzak gauzatzen ahalko dituzte.

p) Segurtasun neurriak ez betetzea, horrek kalte larria ekartzen badu pertsonentzat edo gauzentzat.

45. artikulua. Zehapenak.

Ondoren azaltzen dira aipatutako faltengatik langileei ezartzen ahal zaizkien gehieneko zehapenak:

a) Falta arinengatik:

Idatzizko kargu-hartzea.

b) Falta astunengatik:

Idatzizko kargu-hartzea.

Lana eta soldata kentzea bi egunetik hogei egunera bitarte.

c) Falta oso astunengatik:

Idatzizko kargu-hartzea.

Lana eta soldata kentzea hogeita bat egunetik hirurogei egunera bitarte.

Kaleratzea.

46. artikulua. Preskripzioa.

Faltek epe hauetan preskribatuko dute, mailaren arabera:

–Falta arinak: hamar egun.

–Falta astunak: hogei egun.

–Falta oso astunak: hirurogei egun.

Aipatu falten preskripzio epea enpresak gertaeren berri izaten duenean hasiko da kontatzen eta, betiere, gertatu eta handik sei hilabeteren buruan.

X. TITULUA.–ESKUBIDE SINDIKALAK

47. artikulua. Ordu sindikalak.

Enpresa Batzordeko kideetako bakoitzak ordu-kreditu bat izanen du bere eginkizunak betetzeko. Langileen Estatutuaren 68. artikuluan xedatutakoa aplikatuta dagokion ordu kopurua izanen du bakoitzak. Kreditu hori erabili ahal izateko, aski da gutxienez 24 ordu lehenago jakinaraztea zuzeneko nagusiari noiz hartu nahi diren ordu horiek, eta gero nahitaez justifikatuko da.

Salbuespenez, Zuzendaritzak baimena ematen ahalko du 20 ordu horiek Enpresa Batzordeko kideen artean metatzeko hilero. Baimen hori idatziz emanen da beti.

48. artikulua. Batzordearentzako informazioa.

Enpresako Zuzendaritzak, Langileen Estatutuaren 64. artikuluaren arabera, hiru hilean behin informazioa emanen dio Enpresa Batzordeari enpresaren bilakaera ekonomiko eta produktiboari buruz, baita kontratazioei buruz eta legez aurreikusten diren gainerako gaiei buruz ere.

XI. TITULUA.–AZKEN XEDAPENAK

Azken xedapenetako lehena.–Arau subsidiarioak.

Hitzarmen honetan aurreikusirik ez dagoen guztian, Langileen Estatutuan eta hura garatzeko xedapenetan ezarritakoari jarraituko zaio. Arau subsidiario gisa, Nafarroako Metaleko Hitzarmen Probintzialaren 50. artikulua ere aplikatuko da, praktiketako, behin-behineko eta erreleboko kontratuak arautzen dituena.

Halaber, Nafarroako Metaleko Hitzarmenaren 62. artikuluan xedatutakoari jarraituko zaio emakumezkoen enpleguaren sustapenari dagozkion gaietan.

Azken xedapenetako bigarrena.–Interpretaziorako Batzorde Mistoa.

Hitzarmen hau interpretatu eta aplikatzerakoan sortzen ahal diren desadostasunak ebazteko, Interpretazio Batzorde Mistoa sortu da, paritarioa izanen dena. Interpretazioari eta aplikazioari buruzko gatazkak lehendabizi haren esku jarriko dira, beste edozein prozeduraren aurretik, dela Lan Gatazkak Konpontzeko Epaimahaian, dela lan arloko epaitegietan, justizia epaitegietan...

Batzorde horrek sei kide izanen ditu. Zuzendaritzak hiru izendatuko ditu eta beste hirurak Enpresa Batzordeak.

Behar bezala jarduteko, alderdietako edozeinek egiten ahal dio deia beste alderdiari, idatziz arrazoituta, eta deialdiaren xede diren gaiak zehaztuta. Deialdia eginik, bilera 5 egun baino lehen eginen da. Hitzarmenerako bilerak egiten diren lekuan eginen dira bilera horiek ere. Batzordeak adostasun edo desadostasun erabakia hartu beharko du 7 eguneko epean.

Sinatzen duten alderdiek adosten dute ez dutela aurretik eta nahitaez joko Lan Gatazkak Konpontzeko ezein Auzitegitara. Batzorde mistoak erabakia eman ondoren, alderdi bakoitzak askatasuna izanen du eskumeneko organora jotzeko, zuzenean edo ez.

TaSOLDATAK, SOLDATA-OSAGARRIAK ETA APARTEKO ORDUAK 2024. URTERAKO

Iragarkiaren kodea: F2418814