Iragarkia

28. ALDIZKARIA - 2025eko otsailaren 11

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

173C/2024 EBAZPENA, urriaren 24koa, Ekonomia Sozialeko eta Laneko zuzendari nagusiak emana, zeinaren bidez adosten duena Piher Sensors And Controls SA enpresaren Tuterako lantokiko hitzarmen kolektiboa erregistratzea, gordailutzea eta Nafarroako Aldizkari Ofizialean argitaratzea.

Ikusita Piher Sensors And Controls SA enpresak Tuterako lantokirako aurkeztutako hitzarmen kolektiboa (kode zenbakia: 31005072011987), erregistro honetan 2024ko urriaren 21ean sartu zena, 2024ko urriaren 11n enpresaren eta sindikatuen ordezkaritzek sinatu ondoren.

Bat etorrita Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, laneko akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin.

Erabilita Nafarroako Foru Komunitateko Administrazioari eta foru sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak, Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuarekin lotuta.

EBAZTEN DUT:

Lehena.– Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Piher Sensors And Controls SA enpresak Tuterako lantokirako aurkeztutako hitzarmen kolektiboa (kode zenbakia: 31005072011987).

Bigarrena.– Nafarroako Aldizkari Ofizialean argitara dadila xedatzea, orok jakin dezaten.

Hirugarrena.– Ebazpen hau eskatzaileari jakinaraztea, eta ohartaraztea ebazpenak ez diola bukaera ematen administrazio bideari, eta, haren aurka, gora jotzeko errekurtsoa aurkezten ahal diola Eskubide Sozialetako, Ekonomia Sozialeko eta Enpleguko kontseilariari, hilabeteko epean, ebazpena jakinarazi eta hurrengo egunetik aurrera.

Iruñean, 2024ko urriaren 24an.– Ekonomia Sozialeko eta Laneko zuzendari nagusia, Iñaki Mendióroz Casallo.

ERANSKINAK

1. eranskina. Soldatak.

2. eranskina. 2024., 2025. eta 2026. urteetako soldata gordinaren banaketa.

3. eranskina. Antzinatasuna.

4. eranskina. Bestelakoak.

5. eranskina. Aparteko orduak eta 1+1 orduak.

6. eranskina. Kontratazioa sustatzea eta lehiakortasunari eustea.

I. KAPITULUA.–EREMUAK ETA INDARRALDIA

1. artikulua. Eremua.

Hitzarmen kolektibo hau, egoera bakoitzari dagokion neurrian eta irismenarekin, Piher Sensors & Controls SA kide bakarreko sozietatearen besteren konturako langile guztiei aplikatuko zaie (sozietatearen egoitza soziala: Udal industrialdea, Zeharkako bidea 2, 22. zenbakia, Tutera, Nafarroa), "taldez kanpokoak" izenez ezagutzen den langileen kolektiboko kideei izan ezik. Kolektibo horri hitzarmen honetako artikulu hauek bakarrik aplikatuko zaizkio: 11., 13., 20., 23., 33., 36., 37., 39., 40. eta 41. artikuluak.

2. artikulua. Indarraldia.

2.1. Hitzarmen honek hiru urteko indarraldia izanen du, Lan Agintaritzak noiznahi erregistraturik ere, eta ondorioak 2024ko urtarrilaren 1era arte eramanen dira atzera.

2.2. Lege ondorio guztietarako, hitzarmen hau 2026ko irailaren 30ean jotzen dute alderdiek salatutzat.

2.3. Hitzarmen hau salaturik, luzatutzat joko da hurrengoa onetsi arte. Langileren batek hitzarmen honetan ezarritakoak baino baldintza hobeak baldin badauzka, oro har eta urte osoko kopurua aintzat harturik, errespetatu eginen zaizkio.

3. artikulua. Ez aplikatzea.

Hitzarmen kolektibo hau loteslea da bere aplikazio eremuan sartzen diren enpresaburu eta langile guztientzat, indarrean iraunen duen epe guztian zehar.

Enpresak ez dio inola ere hitzarmen hau ez aplikatzeko aukerari heltzen ahalko Langileen Estatutuak 82.3 artikuluan jasotzen duen prozedura baliatuz; epea bukatu baino lehen hitzarmena berriro negoziatzen ahalegindu beharko du beste hitzarmen bat lotzeko edo berau berrikusteko, Langileen Estatutuaren 86.1 artikuluak xedatzen duen moduan.

II. KAPITULUA.–ANTOLAKETA

4. artikulua. Lanaren antolaketa.

4.1. Lanaren antolaketari eta langileen mugikortasunari dagokienez, hitzarmen honen 30. artikuluan ezarritakoari jarraituko zaio eta, hala egin ezean, Langileen Estatutuan ezarritakoari, betiere eskubide ekonomiko eta profesionalak alde batera utzi gabe.

4.2. Txanda aldaketa batek erdiko txandari eragiten badio, eta txandakako langile batek baino ordu gehiago edo gutxiago lan eginez gero, soberako ordu horiek edo falta diren ordu horiek Berreskuratutako Orduen saldoan sartuko dira.

4.3. Hilabeterako aurreikusitako programazioaren berri emanen zaio enpresa batzordeari, baita programazio hori gauzatzeko aurreikusi den langileen mugikortasunaren berri ere. Hala ere, programazioan ezustekoren bat dagoenean eta horrek langileak mugitzea ekartzen duenean, garaiz jakinaraziko da.

III. KAPITULUA.–LAN DENBORA

5. artikulua. Urteko lanaldia.

2024. urterako, urteko lanaldia benetan lan egindako 1.716 ordukoa izanen da, eta 2025. eta 2026. urteetarako, 1.712 ordukoa.

6. artikulua. Lan egutegi orokorra.

6.1. Urtero finkatuko dira lan ordutegiak eta egutegiak, enpresako zuzendaritza eta enpresa batzordea ados jarrita, egunean 8 orduko lanalditan, guztira, 40 ordu astean. Ados jartzen ez badira, bitartekotza edo arbitrajea aplikatuko da, aurreko urtekoak luzatuz adostasun batera iritsi arte.

6.2. Arau orokor gisa, laneko lau txanda ezarri dira: bat lanaldi zatitukoa, goiz eta arratsaldez, eta beste hirurak goiz, arratsalde eta gaueko txanda jarraitukoak, betiere ekoizpen jardueren beharren arabera.

6.3. PIHER S&C enpresaren egutegi orokorraren arabera, lantegia aktibo egonen da 218 egunez gutxienez, momentu oro enpresak definitutako gutxieneko ekoizpen zerbitzuak errespetatuta.

6.4. Zilegi izanen da egutegi orokorreko oporraldia lan denbora gisa hartuko duen egutegi bat prestatzea; horrelakoetan, egutegi horren eraginpean dauden langileek urtean zehar har dezakete oporraldia, enpresak eta langileak adostuta.

6.5. Fabrikazio beharrengatik PIHER S&C enpresaren egutegi orokorrean jaieguntzat jotako egunetan lan egin behar bada, 8 asteko gutxieneko aldi batez, egutegi bat adostuko da zuzendaritzaren eta enpresa batzordearen artean; adostutako egutegian hilean asteburu bat gutxienez jai izanen dela agertuko da, eta, orobat, legearen arabera ezarrita dauden atsedenaldiak jasoko dira lanaldien artean. Egutegi hori ezarriko den ataleko langileei aplikatuko zaie, txandaka, eta gutxienez ere 10 egun natural lehenago jakinaraziko zaie.

6.6. Egutegi bat bukatutakoan negoziatuko da hurrengoa, eta hark arautuko ditu opor egunak eta lantegia irekitzeko eta ixteko egunak eta ordutegiak.

6.7. Oro har, urteko egutegian aurreikusiko dira, alde batetik, Tuterako jaietan, uztailean, lantegia itxita egonen den egunak, eta bestetik, egutegia doitzeko xedapen askeko beste 3 egun gutxienez.

6.8. Norberak hartzeko egunak bukatzen badira, eskatzen ahalko dira ordaindu gabeko lizentziak: bost egun gehienez urteko eta langile bakoitzeko. Salbuespeneko egoerak azter daitezke.

7. artikulua. Oporrak.

7.1. Oporrak 22 lanegunekoak izanen dira, eta lan egoera bereziko aldiekin batera izaten ahal dira, enpresako zuzendaritzak, enpresa batzordearekin ados jarrita, komenigarria dela uste badu. Adostasunik ez bada, Nafarroako Lan Auzitegiak erabakiko du.

7.2. Lantegia ixten ez bada, eta lan egin behar bada egutegi orokorrean oporraldi gisa ezarritako aldian, oporrak banatzeko egunak langile ukituei jakinaraziko zaizkie, haiekin ados jarri ondoren, gutxienez ere bi hilabete lehenago, eta diruz konpentsatuko dira oporraldien aldaketaren plusarekin (90 euro lan egindako egun bakoitzeko).

Aurreabisua bi hilabetetik beherako aurrerapenarekin emanen balitz, langile ukituaren konpentsazio ekonomikoa oporraldi aldaketaren plusaren parekoa izanen da (4. eranskina), langilearekin ados jarri ondoren.

Langileak aukeratuko du zer egunetan hartuko dituen oporrak, eta enpresak onartu eginen du, baldin ez badio kalterik ekartzen eta ez badu arriskuan jartzen bezeroari egin beharreko entrega.

Baldin akordio bat lortzen bada oporrak aldatzeko eta azkenik ez bada gauzatzen enpresaren erabakiz, ordain ekonomikoa izanen da, oporraldien aldaketaren plusaren parekoa (90 euro lan egin ez den egun bakoitzeko).

7.3. Edozein arrazoirengatik enpresan urte naturala osatzen ez duen langileak, urtean egindako denboraren araberako egunak izanen ditu. Azken kitatzea egiteko, kontuan hartuko da zer alde dagoen sortutakoaren eta kobratutakoaren artean, positiboa izan ala negatiboa izan.

7.4. Oporraldian zehar aldi baterako ezintasuna gertatuko balitz, oporrak alta medikoa jaso eta jarraian hartuko dira.

8. artikulua. Ordu poltsa.

Eskaera txikiko boladetan antolaketari heltzeko, adosten da enpresak urtean 64 orduko poltsa izanen duela. Ordu poltsa horrek edo lanaldiaren banaketa irregularrak baldintza hauek bete beharko ditu:

8.1. Aplikatzeko, enpresak enpresa batzordeari emanen dio horren berri produkzio batzordearen bitartez, neurria zergatik aplikatzen den azaltzen duten datuak emanez. Zuzendaritzak eta enpresa batzordeak elkarrekin jakinaraziko diete langileei hartutako neurria, eta azalduko dizkiete hori justifikatzen duten arrazoiak. Betiere, egutegiaren aldaketak ukitutako langileei abisu emanen zaie gutxienez ere 7 egun natural lehenago.

8.2. Ordu poltsaren aplikazioak ez du eraginik izanen hilabeteko nominan. Enplegatu bakoitzaren ordu saldoaren parte izanen dira orduak.

8.3. Jardunaldi osoetan berreskuratuko da ordu poltsa, goizeko, arratsaldeko eta/edo gaueko txandetan, antolaketa beharren arabera.

8.4. Lanaldiaren banaketa irregular hau aplikatuta lan egindako ordu bakoitza, berreskuratutako ordu gisa igaroko da langilearen ordu poltsara. Larunbatez lan eginez gero, diru konpentsazio bat ere jasoko du gainera langileak, zehazki, lan egindako orduen %50 hitzarmeneko orduaren ordainsariaz biderkatuta gehi gau lanaren saria, halakorik badagokio. Banaketa irregularra aplikatu eta hurrengo hilabetean sortuko da konpentsazio hori.

8.5. Urte guztian egin daiteke, salbu udako oporraldietan.

8.6. Ezin dira erabili libreki hartzeko egunak / aukerako egunak lanaldiaren banaketa irregularra aplikatzen denean.

8.7. Orduen poltsa aplikatzeko, beharrezkoa izanen da gutxienez fabrikazio jarduerekin zuzenean lotutako plantillaren %15i eragitea.

8.8. Hitzarmena bukatzean poltsa aplikatzearen ondoriozko saldo ordurik balego, 2026ko azaroan eta/edo abenduan berreskuratzeko denborarik izan ez delako, hurrengo 9 hilabeteetan berreskuratzen ahalko dira orduok. Behin epe hori igarota, kontagailua berrabiarazi eginen da.

9. artikulua. Aparteko orduak.

Enpresako zuzendaritzak jakinaraziko ditu aparteko orduak behar dituzten ekoizpen edo mantentze beharrak, eta aurreko hilabetean zehar egindako aparteko orduen zerrenda nominalaren berri emanen dio enpresa batzordeari, hilabete bakoitzaren hasieran, alderdi hauek kontuan hartuta:

9.1. Ordainduak: 5. eranskinean ageri den ordainsaria izanen dute.

9.2. 1+1 ordaindua eta berreskuratua: Aukera izanen da aparteko ordu bakoitzeko ordu bateko atseden denbora emateko gehi diru konpentsazio bat (5. eranskina).

9.3. 2x1 berreskuratuak: Orduak atseden denborarekin konpentsatzen ahalko dira: aparteko ordu bakoitzeko 2 orduko atsedenaldia. Kasu horretan, ordu libre berreskuratutzat joko dira. Urtean 40 orduko muga izanen dute.

10. artikulua. Laugarren txanda.

10.1. Laugarren txanda ezarri aurretik, enpresak egutegia jakinaraziko dio enpresa batzordeari, txanda horren ezarpena justifikatzen duten datuekin batera, 10 egun naturaleko aurreabisuarekin.

10.2. Laugarren txanda aplikatu ahal izateko, 8 asteko plangintza egin beharko da gutxienez, eta urte osoan zehar egiten ahalko da, udako oporretan izan ezik.

10.3. Txanda hori antolatzeko giza baliabide nahikoa izan beharko ditu enpresak.

10.4. Baldin laugarren txandako egutegi batean inplikatutako norbaitek justifikatzen badu ezin duela asteburu batean etorri, enpresa saiatuko da, ahal den neurrian, aldaketa errazten.

10.5. Jaiegun batean lan egin bada, hilabetea bukatutakoan ordainduko da jaieguneko konpentsazioa.

10.6. Gutxienez hilabetean asteburu bat izanen da jai.

11. artikulua. Lizentzia ordainduak.

–Kasu guztietarako oharrak:

11.1. Ezkondutakoen eskubide berberak izanen dituzte ezkondu gabeko bikote egonkorrek, dagokion erakunde ofizialak behar bezala egiaztatuta baldin badaude.

11.2. Langilea gaueko txandan ari bada, aurreko lanaldian hartzen ahalko du lizentzia.

11.3. Indarra duen legerian ezarritako lizentziak aplikatuko dira hitzarmen honek jasotzen ez dituen kasuetan.

12. artikulua. Lizentzia ordainduak pagatzea.

11. artikuluan aipatzen diren ordaindutako lizentziak hitzarmeneko ordainsaria nomina kontzeptuarekin ordainduko dira.

13. artikulua. Eszedentziak.

13.1. Nahitaezko eszedentzia:

Nahitaezko eszedentzia emanen da –lanpostua gorde eta antzinatasuna kontatuz–, lanera joatea galarazten duen kargu publiko baterako izendatua edo hautatua izateagatik. Halaber, nahitaezko eszedentzia emanen zaie ordezkaritza handieneko sindikatuen probintziako, autonomia erkidegoko edo estatuko hautetsiei.

Kargu publikoa edo sindikatuko eginkizunak utzi eta hurrengo hilabetean eskatu beharko da lanera itzultzea.

13.2. Borondatezko eszedentzia:

Enpresan gutxienez urtebeteko antzinatasuna duen langileak eskubidea du borondatezko eszedentzia hartzeko, lau hilabeterako gutxienez eta bost urterako gehienez. Langile bat eskubide horretaz berriro baliatu ahal izateko, aurreko eszedentzia bukatu eta lau urte igaro beharko dira.

Enpresara itzultzeko eskaera idatziz eginen da, borondatezko eszedentzia bukatu baino gutxienez hilabete lehenago. Lehenbiziko urtean, langileak lanpostua gordetzeko eskubidea izanen du, edo lanbide talde bereko edo pareko kategoriako lanpostua gordetzekoa. Lehen urte hori igarota, eszedentzian dagoen langileak ez du beste eskubiderik, enpresan hutsik dagoen eta bere kategoriakoa edo antzekoa den lanpostu batera itzultzen ahal izateko lehentasuna izatea baizik.

Borondatezko eszedentzia eskatu nahi duten langileak behartuak daude enpresari jakinaraztera, aurreabisurako epe hauek betez, dagokien lanbide taldearen arabera:

–1. lanbide taldea: 2 hilabete.

–2. lanbide taldea: 2 hilabete.

–3. lanbide taldea: hilabete.

–4. lanbide taldea: 15 egun.

–5. lanbide taldea: 15 egun.

–6. lanbide taldea: 15 egun.

Abisua aipatu epean egin bada, enpresak epe hori bukatzean kitatu beharko ditu orduantxe kalkula daitezkeen kontzeptu finkoak. Gainerako kontzeptuak ordainketa egin ohi den egunean pagatuko dira. Eszedentzia emateko baldintzak betetzen badira, enpresak idatziz jakinaraziko dio langileari. Betetzen ez badira, enpresak idatziz jakinaraziko dio ukatzen dela eta horren arrazoia.

Enpresak ez badu betetzen likidatzeko obligazioa, langileak eskubidea izanen du egun bateko soldata jasotzeko likidazioaren ordainketan atzeratutako egun bakoitzeko, eta gehienez ere, aurreabisua emateko epeari dagokiona. Langileak abisua garaiz ematen ez badu, ez da halako obligaziorik ez eskubiderik sortuko.

Aipatutako epeetan aurreabisua egiten ez bada, Enpresak eskubidea izanen du langilearen likidaziotik eguneko soldata deskontatzeko, aurreabisua atzeratzen den egun bakoitzeko.

13.3. Familia arrazoiengatik hartutako eszedentziak:

Langileek ahaideak zaintzeko eszedentzia hartzeko eskubideari dagokionez, Langileen Estatutuari buruzko Legearen testu bateginaren 46. artikuluko 3. zenbakian xedatutakoari jarraituko zaio. Langileek gehienez hiru urteko eszedentzia hartzeko eskubidea izanen dute norberaren edo adoptatutako seme edo alaba bakoitza zaintzeko, nahiz eta behin betiko harrerako moduan edo adopzio aurreko egoeran hartu, aldi baterako izan ala ez, umearen jaiotegunetik edo epaileen edo administrazioaren ebazpenaren egunetik zenbatzen hasita.

Bi urtera arteko eszedentzia izateko eskubidea izanen dute, halaber, adinagatik edo istripu, eritasun edo desgaitasun baten ondorioz bere kasa bizitzeko gauza ez den eta lan ordaindurik egiten ez duen ahaideren bat –odol bereko edo ezkontza bidezko bigarren gradura artekoa– zaindu behar duten langileek.

Apartatu honetan jasotzen den eszedentzia, zatika hartzen ahal da, eta langileen banakako eskubidea da.

Hala ere, pertsona bera zaintzeko eskubidea enpresa bateko bi langilek edo gehiagok izaten badute, enpresaburuak mugatzen ahalko du eskubidea aldi berean baliatzea, enpresaren funtzionamenduarekin lotutako bidezko arrazoirik baldin badago.

Beste subjektu eragile batek beste eszedentzia aldi bat izateko eskubidea sortzen duenean, hura hastearekin bukatuko da ordura artekoa, halakorik izanez gero.

Langileak artikulu honetan ezarritakoaren arabera eszedentzian pasatzen duen denbora antzinatasunerako kontatuko zaio, eta bitartean eskubidea izanen du lanbide prestakuntzako ikastaroetara joateko, enpresaburuak deituta, batez ere lanera itzuli behar duenean. Lehenengo urtean, langileak lanpostua gordetzeko eskubidea izanen du. Epe hori bukatuta, gordeko zaion lanpostua lanbide talde berekoa edo balio bereko kategoria batekoa izanen da.

Aurrekoa hala izanik ere, langilea ofizialki aitortutako familia ugari bateko kidea baldin bada, lanpostua 15 hilabetez gordeko zaio, gehienez ere, kategoria orokorreko familia ugaria denean, eta 18 hilabetez, gehienez, kategoria berezikoa denean.

13.4. Guraso baimena:

Langileen Estatutuko 48 bis artikuluak xedatutakoa hartuko da kontuan, eta hura garatzen duen araudian xedatutakoa ere. Alderdiek adostu dutenez, baimen hau baliatu nahi duen langileak gutxienez ere 2 aste lehenago jakinarazi beharko dio hori enpresari.

Atal/departamentu bereko zenbait langilek baimen hau aldi berean baliatu nahi badute, edo baimen hori/horiek atal/departamentu bereko beste langile batzuen oporrekin elkartzen bada/badira aldi berean, eta horrek lanaren garapena arriskuan jartzen badu, oporrek izanen dute lehentasuna, eta, ondoren, aurrerapen handienarekin egin zen guraso baimenaren eskaerak (bat datozenen artean).

14. artikulua. Guardia lokalizatuak.

14.1. Guardia lokalizatuetan, langilea, enpresako zuzendaritzarekin ados jarri ondoren, prest dago lantegira joan behar izateko, esleitu zaizkion lanez arduratzeko.

14.2. Ordutegia 12 ordukoa izanen da, atalaren beharren arabera adostuko da eta ekonomikoki konpentsatuko da.

Guardia lokalizatuen kasuetan ordaindu beharrekoa: bakoitzaren lansari mailako aparteko hiru orduren kostua guardiako 12 orduko, edo guardiako denborari proportzioz dagokiona.

14.3. Ez da guardiarik eginen gaueko ordutegian (22:00-06:00).

IV. KAPITULUA.– ORDAINSARIAK

15. artikulua. Soldatak.

Hona hemen 2024-2026 aldirako soldata igoerak:

–2024. urtea: %4ko areagotzea + % 3,1 (2023ko KPIa), guztira %7,1.

–2025. urtea: %5eko areagotzea + 2024ko KPIa.

–2026. urtea: %5eko areagotzea + 2025eko KPIa.

2025. edo 2026. urtean KPIa negatiboa balitz, 0ren parekotzat joko da eta soldatak adostutako diferentzial finkoarekin (% 5) areagotuko dira bakarrik.

"Berrikusteko moduko" gisa adierazi diren kontzeptu ekonomikoak ezarritako datan berrikusten ahalko dira, soldatei buruzko artikulu honetan adostutakoen pareko igoerak aplikatuz.

16. artikulua. Soldata gordinaren urteko zenbateko osoaren banaketa.

16.1. Urteko ordainsari gordinen banaketaren portzentajeak berberak izanen dira soldata talde guztientzat, taula hauen arabera:

–Hitzarmeneko ordainsaria: %84.

–Aparteko ordainsariak: %16.

Lansari taldeen zenbateko gordinak hitzarmen honen 2. eranskinean ageri dira.

16.2. Nomina hilabete bakoitzeko lehenengo egun baliodunean ordainduko zaie hitzarmen honen eraginpean dauden langile guztiei, bankuko transferentziaren bidez.

16.3. Hilabete bukaeran gertatutako aldi baterako ezintasun bajen doikuntzak hurrengo hilabeteko nominan eginen dira.

16.4. Kontzeptu aldagarri guztiak hilabetea bukatuta kobratuko dira.

16.5. Nominaren ordainagiria langile bakoitzaren eskura jarriko da, enpresaren komunikazio atari digitalean.

17. artikulua. Bermatutako gutxienekoa.

17.1. Hitzarmen kolektibo honetan finkatutako ordainsariak itundu dira oinarritzat harturik hitzarmen honen 5. artikuluan adostutako lanaldi osoa eta urteko lanaldia.

17.2. Era berean, hitzarmen honetan itundutako kopuruak gordinak dira, hau da, ez dago deskontatuta ordaindu beharreko kontzeptu bakar bat ere, hala nola Gizarte Segurantzako kotizazioa eta Pertsona Fisikoen Errentaren gaineko Zergaren (PFEZ) atxikipena.

17.3. Enpresak soldata kategoria edo maila guztiei bermatzen dizkie, gutxienez, Nafarroako Foru Komunitateko Industria Siderometalurgikoaren Hitzarmen Kolektiboko gutxieneko soldata bermatuak, urteko konputuan, urtero eguneratu eta gero, baita hitzarmen honetako soldata tauletan itundutako soldata guztiak ere.

18. artikulua. Hitzarmeneko ordainsaria.

18.1. Kontzeptu horrek urteko soldata gordinaren %84 hartzen du.

18.2. Urteko soldata gordinaren %84 guztiz berdinak diren 12 hileko soldatatan banatuta ateratzen den zenbatekoa da. Soldata maila bakoitzeko ordainsaria 2. eranskineko 8. zutabean ageri da, eurotan adierazia; hileko soldata beti da berdina, kontuan hartu gabe hilabeteak zenbat lanegun, jaiegun, zubi edo opor dituen. Beraz, ez da jaiegunen aparteko ordainketarik izanen.

18.3. Gizarte Segurantzako alta egunen arabera kobratuko da.

18.4. Lanaldi partzialeko kontratua duten pertsonek urteko lanaldiaren arabera kobratuko dute.

19. artikulua. Urruntasun plusa.

19.1. Hitzarmen honen eraginpean dauden eta gaur egun Tuteratik kanpo bizi diren langileei urruntasun plusa ordainduko zaie; hots, 4.2 eranskinean ageri den zenbatekoa, lan egindako egun bakoitzeko eta hilabetea bukatuta.

19.2. Joan-etorriko bidaia bakar bat ordainduko da egunean, eta kontzeptu horretarako ordainduko den gehieneko kantitatea 35 kilometrora bizitzearen pareko zenbatekoa izanen da.

Lantokira lanera joaten den egunetan bakarrik ordainduko da.

19.3. Bizitzera beste herri batera joaten den edozein langilek herri horri dagokion urruntasun plusa jasoko du, lekualdaketaren egunetik hasita eta aldez aurretik helbide berriaren egiaztagiri ofiziala aurkeztuta.

19.4. Kontzeptu ekonomiko hau ez da berrikusiko hitzarmena indarrean egon bitartean. Adostutako zenbateko finko hauek ordainduko dira:

–2024: 0.055 euro/km.

–2025: 0.060 euro/km.

–2026: 0.065 euro/km.

20. artikulua. Antzinatasun plusa.

20.1. Antzinatasun plusa hirurtekoa betetzen den egunean sorraraziko da eta ondoko urteetako egun berean. Plus hori hilero ordainduko da, urtarriletik abendura bitarte, eta banatzeko modua, berriz, kontzeptu horri urtean guztira dagokiona hamabiz zatituta ateratzen dena izanen da.

20.2. Antzinatasun plus hori zehazteko, kontuan hartuko dira enpresan etenik gabe lan egindako urteak, hirunaka zenbatuak. Urte horiek etenik gabeak izan direla esanen da kontratuen artean gure egutegi orokorreko 20 lanegun baino gehiago izan ez direnean. Antzinatasun plusa ezin da izan 10 hirurtekotik gorakoa. Aurrekoa galarazi gabe eta salbuespenez, 2012-2016 hitzarmenaren indarraldia bukatutakoan 10 hirurteko baino gehiago dituzten langileek finkatuko dute, indibidualki, sortu duten zenbatekorik handiena.

20.3. Ondorio horietarako ez dira zenbatuko bi hilabetetik gorako soldata gabeko lizentzia aldiak, borondatezko eszedentzia aldiak eta antzeko beste egoerak.

20.4. Hauek izanen dira urtero ordaindu beharreko zenbatekoak: (3. eranskina).

–2024: aurreko hitzarmeneko zenbatekoak mantendu dira.

–2025: 20 euro/hirurtekoa.

–2026: (ekonomikoki berrikusteko modukoa urte horretatik aurrera) 20 euro/hirurtekoa + %5 + 2025eko KPIa.

21. artikulua. Lanekoa ez den egun batean lan egiteagatik ematen den plusa.

21.1. Enpresako egutegi orokorrean lanekoa ez den egun batean lan egiten dutenek (egutegi berezi bat aplikatzearen ondorioz) hitzarmen honen 4. eranskinean ageri den plusa izanen dute lanekoak ez diren egunetan lan egin duten egun bakoitzeko.

Ordainketa honela eginen da: (4.3. eranskina).

–2024: 90 euro eguneko.

–2025: (ekonomikoki berrikusteko modukoa urte horretatik aurrera): 90 euro/eguna + % 5 + 2024ko KPIa.

–2026: 2025eko kantitatea + %5 + 2025eko KPIa.

21.2. Baldin adostutako egutegiaren arabera aldaketaren bat badago oporraldian, hitzarmen honen 4. eranskinean ageri den konpentsazioa izanen da, hilabetea bukatuta ordainduko baita, abuztuan edo irailean. Kasu horretan, konpentsazio bat emanen da lanekoak ez diren egunetan lan egindako egun bakoitzeko, larunbata, igandea edo estatuko, autonomia erkidegoko edo herriko festa eguna izaten denean.

22. artikulua. Aparteko eskersariak.

22.1. Haien zenbatekoak urteko soldata gordinaren %16 zati bi eginda ateratzen dira.

22.2. Soldata maila bakoitzean ordainduko diren zenbatekoak 2. eranskinean azaltzen dira.

22.3. Eskersari hauek uztailaren 15etik 20ra bitarte eta abenduaren 17tik 22ra bitarte ordainduko dira. Udako aparteko paga urte bakoitzeko urtarrilaren 1etik ekainaren 30era sortuko da. Eguberrietako aparteko paga urte bakoitzeko uztailaren 1etik abenduaren 31ra sortuko da.

22.4. Eskersari horien zenbatekoaren likidazioa, enpresan urtea osatu ez duten langileen kasuan, lanean egindako egunen araberakoa izanen da.

23. artikulua. Ikasketetarako laguntza.

23.1. Ikasketa arautuetarako laguntza emanen zaie jarraian adierazitako adinetako seme-alabak dituzten langileei, kasu hauetan:

23.1.1. Hitzarmen honen indarraldiko ikasturte bakoitzaren hasieran 3 eta 24 urte artean bete dituzten edo beteko dituzten ondorengoei hilean 40 euro ordainduko zaizkie (aipatu ikasturte hasieratik), irailetik ekainera.

23.1.2. Ikasketa arautuetarako izanen da baliozkoa soilik.

23.2. Ikasketa matrikularen egiaztagiria aurkeztu beharko da, eta ez zaie ikasketetarako laguntzarik emanen prestakuntza ez arautuei.

23.3. Zenbateko hori hilez hile ordainduko da, prestakuntza arautu horrek aurrez ezarritako hilabeteetan. 16 urteetatik aurrera, ikasturte hasiera bakoitzean aurkeztu beharko da matrikularen egiaztagiria, kasu bakoitzaren inguruabar zehatzak aztertzeko.

23.4. Kontzeptu ekonomiko hau ez da berrikusiko hitzarmen honen indarraldian zehar. Hilabetean 40 euroko zenbateko finkoa ordainduko da, seme-alaba bakoitzeko, 2024ko urtarrilaren 1etik aurrera.

24. artikulua. Ordainsaria, eritasun edo istripu kasuan.

24.1. Eritasun arruntaren edo lanekoa ez den istripuaren ondoriozko aldi baterako ezintasuna izanez gero, honako hau ordainduko zaie lantegiko langileei:

24.1.1. Oinarri arautzailearen %80, aldi baterako ezintasunaren lehen egunetik hasita, bajako partea urtean lehenengoa denean.

24.1.2. Oinarri arautzailearen %80, aldi baterako ezintasunaren hirugarren egunetik hasita, bajako partea urtean bigarrena denean.

24.1.3. Oinarri arautzailearen %80, aldi baterako ezintasunaren laugarren egunetik hasita, bajako partea hirugarrena edo hurrengoren bat denean.

24.1.4. Legez ezarritako gutxieneko aldian kotizatu ez izanagatik edo beste arrazoiren batengatik langileek ez badute Gizarte Segurantzako prestazioak jasotzeko eskubiderik aldi baterako ezintasuna edo eritasuneko baja dutenean, enpresak beren kotizazioko lansariaren %80 ordainduko die bajako lehen hamabost egunetan, 15. egunetik 20. egunera bitartean %20, eta gero %5; portzentaje horiek aldi baterako ezintasunaren lehen egunetik ordainduko dira bajako partea urtean lehena denean, hirugarren egunetik hasita bajako partea urtean bigarrena denean eta laugarren egunetik hasita hirugarrenean eta hurrengoetan.

24.2. Aldi baterako ezintasunaren arrazoia lan istripua izan bada, enpresak osatuko du, oinarri arautzailearen %100era iritsi arte, aldi baterako ezintasunak iraun bitartean.

Prestazio osagarri horiek ordainduko dira langileak enpresarekin lan harremanak dituen bitartean; beraz, lan harremana bukatzearekin batera bukatuko da prestazio osagarriak kobratzeko eskubidea ere, langilea lan istripuaren edo eritasunaren ondoriozko aldi baterako ezintasun egoeran bada ere.

24.3. Artikulu honetako 1. eta 2. lerroaldeek berekin dituzten hobekuntzak eten ahal ditu enpresak abusua izan dela frogatzen bada.

25. artikulua. Dietak, bidaiak eta irteerak.

25.1. Lanaren ondorioz egin beharreko bidaiak gastuak ordainduta eginen dira, eta lanaldian luzatutako orduak berreskuratu eginen dira.

25.2. Bidaia horietarako garraiobidea enpresak jarriko du.

26.3. Enpresak gau bakoitzeko 80 euroko konpentsazioa ordainduko du lantegitik kanpoko irteeretan gaua norberaren etxetik kanpo eman behar denean lanaren beharrak direla eta, izan Espainiako lurretan edo atzerrian.

Enpresak bidaia-aseguru bat dauka, edozein gorabehera eta bidaia estaltzeko modukoa.

26.4. Ordainketa honela eginen da: (4.5. eranskina).

–2024: 80 euro eguneko.

–2025: (ekonomikoki berrikusteko modukoa urte horretatik aurrera) 80 euro/eguna + %5 + 2024ko KPIa.

–2026: 2025eko kantitatea + %5 + 2025eko KPIa.

26. artikulua. Beste plus batzuk.

26.1. Laneko hitzarmen kolektiboaren plus berezia.

Kontzeptu ekonomiko hau ezin da finko bihurtu. Zenbateko aldakorra dauka, banakako izaera dauka eta mantendu eginen da oporretan, lizentzietan, bajetan, ezintasun aldietan eta abar.

26.2. Ordezko arduradunaren plusa (4.6 eranskina).

Kontzeptu ekonomiko hau ezin da finko bihurtu. Zenbatekoa: 5,25 euro/8 orduko jardunaldia.

Lanpostua bete bitartean jasoko dute horretarako prestakuntza duten pertsonek.

26.3. Arduradunen gainjartze plusa (4.7 eranskina).

Kontzeptu ekonomiko hau ezin da finko bihurtu, 2026ko urtarrilaren 1ean berrikusteko modukoa da eta zenbatekoa hau izanen du: 15 euro/8 orduko jardunaldia, 2024an eta 2025ean. Aurrez aurreko gainjartzeak gutxienez 30 minutu irauten duen kasuetan ordainduko da.

26.4. Liderraren plusa (4.8 eranskina).

Kontzeptu ekonomiko hau ezin da finko bihurtu. Hilabetean 75 euroko zenbatekoa dauka eta mantendu eginen da oporretan, lizentzietan, bajetan, ezintasun aldietan eta abar.

26.5. Liderren gainjartze plusa (4.9 eranskina).

Kontzeptu ekonomiko hau ezin da finko bihurtu, 2026ko urtarrilaren 1ean berrikusteko modukoa da eta zenbatekoa hau izanen du: 7,5 euro/8 orduko jardunaldia, 2024an eta 2025ean. Lider postuei eskainiko zaie, eta aurrez aurreko gainjartzeak gutxienez 15 minutu irauten duen kasuetan ordainduko da, enpresak liderrentzat definitutako eginkizunak gauzatzean betiere.

26.6. Balioaniztasun plusa.

Automatikoki ordainduko zaie 2025etik aurrera ziurtapen berria jaso duten lanpostuei, kanpo utzita azken 3 urteetan egin ez direnak eta 116. lanpostua (eskuzko lanak).

300 euro ordainduko dira ziurtapen berria jaso duen lanpostu bakoitzeko, ohiko moduan egiten dena kontuan hartu gabe.

Ordainketa puntuala eta bakarra izanen da eta ez da finko bihurtzen ahalko. Hilabetea bukatuta ordainduko da, Giza Baliabideetako Departamentuak langilea esleituta duen lanpostua ez den beste batean ari dela jakin bezain laster.

26.7. Gaueko lanaren plusa (4.1 eranskina).

Gaueko lanaren plusa 4. eranskinean ageri den zenbatekoan ordainduko da, hitzarmenaren eraginpeko langileen soldata maila guztietan, 22:00etatik 06:00etara bitartean lan egindako orduengatik.

Enpresak ez du plusa ordaintzeko obligaziorik izanen langileak, arrazoi pertsonalak direla eta, txanda bere borondatez eskatu badu.

Ordainketa honela eginen da:

–2024: 3,25 euro orduko.

–2025: (ekonomikoki berrikusteko modukoa urte horretatik aurrera) 3,25 euro/ordua + %5 + 2024ko KPIa.

–2026: 2025eko kantitatea + %5 + 2025eko KPIa.

26.8. Txandakako lanaren plusa.

Produkzio beharrengatik astean goiz, arratsalde eta gauez txandaka lan egiten denean, baita txanda bera hiru astez jarraian errepikatzen denean ere, baldintza horietan ari diren langileek 16 ordu gutxiago egin beharko dituzte urtean, edo dagokien proportzioa murriztuko zaie, asteko bigarren txandakatze ziklotik aurrera. Ez da aplikatuko txandak lau aste edo gehiagotan multzokatzen direnean.

Urtea bukatutakoan eginen da txandakako lanaren ordu konpentsazioa, behin kalkulatuta aipatutako hiru aldiak, eta sartuko da berreskuratutako orduen saldoan.

V. KAPITULUA.–LANBIDE SAILKAPENA

27. artikulua. Lanbide taldeak.

PIHER Sensors & Controls SA hitzarmenaren mendeko langileak sei lanbide taldetan sailkatu dira. Prestazioaren edukia eta konplexutasuna, lanbide gaitasunak, tituluak, ezagutza, autonomia, agintea eta beste hartu dira kontuan, eta hainbat zeregin, eginkizun eta lanbide espezialitate sartzen ahal dira talde bakoitzean.

Langileak lanbide taldetan sailkatuko dira, eta haien barrenean eginen da mugikortasun funtzionala.

Taldeak zenbaki ordinal baten bidez bereiziko dira, eta hainbat soldata mailatan banatuko dira ondorio ekonomikoetarako.

27.1. 1. lanbide taldea.

–Irizpide orokorrak: talde honetako langileek zuzeneko erantzukizuna dute enpresaren arlo funtzional baten edo gehiagoren kudeaketan, edo egiten dituzte zailtasun eta kualifikazio handieneko lan teknikoak. Erabakiak hartzen dituzte, edo parte hartzen dituzte haiek prestatzen, bai eta helburu zehatzak finkatzen ere. Autonomia, ekimen eta erantzukizun handiz burutzen dituzte beren eginkizunak.

–Prestakuntza: goi mailako unibertsitate titulua edo pareko ezagutza, enpresak onartuak, berariazko ikasketekin eta/edo lanbide esperientzia sendoarekin osatuta.

27.2. 2. lanbide taldea.

–Irizpide orokorrak: autonomia, ekimen eta erantzukizun handiz, lan tekniko zailak egiten dituzten langileak dira, helburu orokor zehaztuak dituztela, edo eduki intelektual edo giza harreman handiko zereginetan dihardute. Orobat, eginkizunak integratu, koordinatu eta gainbegiratzeko zuzeneko ardura duten langileak, hain zuzen ere kolaboratzaile talde batek arlo funtzional berean betetzen dituen eginkizunak.

–Prestakuntza: goi edo erdi mailako unibertsitate titulazioa edo pareko ezagutza, enpresak onartuak, gehi esperientzia zabala bere sektore profesionalean.

27.3. 3. lanbide taldea.

–Irizpide orokorrak: agintzeko erantzukizunarekin edo gabe, tarteko jarduera intelektuala eta giza harremanak eskatzen dituzten zereginak burutzen dituzten langileak dira, zailtasun tekniko ertaineko jarraibide zehatzen esparruan, prozesuan autonomia izanik. Betetzen dituzten eginkizunek eskatzen dute zeregin homogeneoak integratzea, koordinatzea eta gainbegiratzea, zehazki, kolaboratzaile talde batek antolaketa maila txikiagoan betetako eginkizunak.

–Prestakuntza: goi edo erdi mailako unibertsitate titulua edo pareko ezagutza, enpresak onartuak, edo lantokiko prestakuntza edo lanbidean arituta lortutako ezagutza.

27.4. 4. lanbide taldea.

–Irizpide orokorrak: lan autonomoak egiten dituzten langileak dira, ekimena izatera eta arrazoitzera beharturik, baita erantzukizunez jokatzera ere, beste norbaitek gainbegiratuta.

–Prestakuntza: erdi mailako unibertsitate titulua, goi mailako heziketa zikloa, batxilergoa edo pareko ezagutza, enpresak onartuak, edo/eta lantokiko prestakuntza edo lanbidean arituta lortutako ezagutza.

27.5. 5. lanbide taldea.

–Irizpide orokorrak: enpresaren eskeman, kualifikazio gehiagoko profesionalen mende edo haien aginduz egiten diren lanak, gainbegiratze handiarekin eskuarki eta egokitze aldi ertain baten ondotik.

–Prestakuntza: goi mailako heziketa zikloaren balio bereko titulua edo pareko ezagutza, enpresak onartua, edo/eta lantokiko prestakuntza edo lanbidean arituta lortutako ezagutza.

27.6. 6. lanbide taldea

–Irizpide orokorrak: mendekotasun maila handiarekin gauzatzen diren zereginak dira, argi ezarririk daudenak, jarraibide zehatzekin. Lanak prestakuntza urria edo ezagutza oso oinarrizkoa eskatzen ahal du; noiz edo noiz, egokitzeko denbora labur bat behar izaten da.

–Prestakuntza: erdi mailaren balio bereko prestakuntza, baita lanbidean arituta lortutako ezagutza ere.

28. artikulua. Zuzeneko eskulanaren soldata mailak. Aplikazioa eta balorazioa.

6. lanbide taldeko lanpostu guztiak daude identifikaturik zenbakizko kode batekin eta izen batekin. Horietako bakoitza organikoki eta funtzionalki zehaztu da dagokion jarduera normal garatzeko, lanpostu guztiak adostutako baremoaren eta ratioaren arabera baloratuko dira eta bakoitza bere soldata mailan sartuko da (9. eranskinean ageri dira).

Beren zerbitzuak 6. lanbide taldean ematen dituzten langileek (zuzeneko eskulana), gauzatzen duten lanpostuari dagokion soldata mailarako aurreikusitako ordainsariak jasoko dituzte, horretarako aurrez ebaluatu eta egiaztatuko direlarik; 6. lanbide taldean sartzen diren langile berrien kasuan, ordea, hitzarmen honetako 6. eranskinean ezarritakoa aplikatuko zaie hitzarmen hau sinatzen denetik: "Kontratazioa sustatzeko eta lehiakortasunari eusteko akordioa".

Piher Sensors & Controls enpresako Kalitate Departamentuak zuzeneko eskulaneko langile bakoitzaren ebaluazioa eta ziurtapena egiten du hiru urtez behin, lanpostu bakoitzeko eduki funtzionala osatzen duten lan operatiboetan eta kalitate, segurtasun, ingurumen, kudeaketa sistema eta korporazio lanetan oinarrituta.

Langile bakoitzak bere lanpostuaren eginkizunen edukia ezagutuko du, baita horretan esku hartzen duten kontzeptuak eta horren balorazioa ere. Lanpostuaren eginkizunak, balorazioa eta soldata taldea berrikusteko eskatzen ahalko dio langile bakoitzak Balorazio Batzordeari.

Balorazioa.

28.1. Koefizienteak: Lanpostuaren deskribapeneko kontzeptuak 0 puntutik 10 puntura bitarte baloratuko dira lanpostu bakoitzean. Lanpostuaren kontzeptu bakoitzean lortutako puntuazioaren emaitza bere koefizienteaz biderkatuko da. Kontzeptu hauek baloratuko dira lanpostu bakoitzaren barnean:

28.1.1. Oinarrizko prestakuntza: Erabateko ahalmena duen pertsona batek lanpostuko zereginak ongi betetzeko beharrezkoak dituen ezagutza teorikoak dira, lanpostu horretan arituko den pertsonak zer maila akademiko edo kultural duen alde batera utzita. Kontzeptu horren koefizientea "1"' da.

28.1.2. Ikastaldia: Lanpostuen deskribapen guztietan datu hau eman behar da: erabateko ahalmena duen pertsona batek, eskatzen den oinarrizko prestakuntza duenak, lanpostua ezagutzeko eta kantitate eta kalitate nahikoa eskainiz eta segurtasun neurriak betez lan egiteko zenbat denbora behar duen normalean. Kontzeptu horren koefizientea "1,5" da.

28.1.3. Erabakiak hartzea: Langileek, beren lanpostuko zereginetan arazoak sortzen direnean, horiek konpontzeko ahaleginean duten askatasuna. Kontzeptu honetan, orobat, baloratzen da gainbegiratzearen eta lan motaren maila: alegia, sinplea den edo konplexua, ohikoa edo noizbehinkakoa. Kontzeptu horren koefizientea "1,25" da.

28.1.4. Akatsak eta horien ondorioak: Langileek beren lanean egiten dituzten akatsek eta/edo izaten dituzten hutsegiteek enpresarentzat dirutan edo izen onean zer ondorio izaten ahal dituzten kontuan hartu eta baloratzea. Kontzeptu horren koefizientea "1,25" da.

28.1.5. Ahalegin fisikoa: baloratzen da lanpostuko eginkizun normalek eskatzen duten ahalegin fisikoaren garrantzia eta jarraitutasuna, kontuan hartuz ahaleginak lanaldian zenbat denbora hartzen duen eta zer intentsitate duen. Lanpostu batzuetako ahalegin fisikoa bereziki nabarmendu behar da, batez ere eskulana eskatzen dutenetan, eta kontuan hartzekoak dira gorputzaren jarrera, lanpostuan zenbat denbora egiten den, biraketa mekanikoak, ergonomia, monotonia eta lanak behin eta berriz egitea eta abar. Kontzeptu horren koefizientea "1,25" da.

28.1.6. Buruko ahalegina: Beharrezkoa den atentzioa jartzea eta beharrezkoa den informazioa erabiltzea egiten den lana eraginkorra izan dadin kalitateari zein kantitateari dagokionez. Intentsitatea eta iraupena faktore erabakigarriak dira kontzeptu honen baloraziorako. Koefizientea "1,25" da.

28.1.7. Lan baldintzak: Lantokia zer egoera edo baldintzak egiten duten nekagarri eta/edo desatsegin baloratzen da. Eragina duten faktoreak: zaratak, bibrazioak, tenperatura, kanpoaldean egotea, hezetasuna, hautsa eta koipe edo gasak, kea, usainak… Kontuan hartu behar dira: halakorik egotea, kantitate erlatiboa eta esposizioaren jarraitasuna. Kontzeptu horren koefizientea "1,50" da.

28.1.8. Zeregin osagarriak: Lanpostuaren balorazio orokorrean kontuan hartzen dira bilatzen den kalitate eta kantitatea zorrotz lortzeko beharrezkoak diren zeregin osagarriak. Esate baterako, honako hauek aipatzen ahal dira: tresneria aldatzea, kontrol eta egiaztapenerako ohikoak ez diren aparatuak erabiltzea, mantentze lanak, talde lana, eta abar. Kontzeptu horren koefizientea "1" da.

28.1.9. Talde lana: baloratzen da beste lankide batekin, lantaldean, koordinatuta ezinbestean lan egiteko beharra: Kontzeptu horren koefizientea "1" da.

28.2. Mailak: Baloratu ondoren eta lortutako puntuazioaren arabera, soldata maila hauek aplikatuko dira:

29. artikulua. Zeharkako eskulanaren soldata mailak.

29.1. Hurrengo baremoan lortutako puntuazioaren arabera definituko da 6. lanbide taldeaz bestelako edozein talderi dagokion sailkapena, soldata maila baten barrenean eta hitzarmen hau aplikagarri izanik.

Puntuazioa ezartzeko parte hartzen duten kontzeptuak:

–Erantzukizuna: Horretan sartzen da bai esleitutako lanak duen erantzukizun maila bai lana egitean erakusten den interesa. Aintzat hartzen dira ahalegin handiagoa eskatzen duten egoeren aurrean erantzuteko gaitasuna eta erabiltzen diren datuen konfidentzialtasunarekiko zuhurtzia ere.

–Edukiera: Lanak modu autonomoan eta aldi berean talde batean ongi integratuta egiteko gaitasuna, eta ordura arteko ekimenak, soluzioak, metodoak eta abar hobetzeko ekarpenak egitea.

–Jarduna edo gauzatzea: Esleitutako lanak egunero-egunero nola egiten dituen, lan horien bolumenari eta kalitateari begiratuta.

–Prestakuntza: Bere lanaren inguruan dituen ezagupen teorikoak, eta horiek zabaltzeko interesik baduen.

–Balioaniztasuna: Ezagupen praktiko eta teoriko desberdinak eskatzen dituzten lanak egiteko zer-nolako gaitasuna erakusten duen.

29.2. Prozedura:

29.2.1. PIHER S&C enpresako zuzendaritzak soldata talde eta mailak berrikusiko dituzten pertsonak izendatuko ditu, eta horien zeregina izanen da aztertu eta kalifikazio berria egin behar den ala ez zehaztea.

29.2.2. Kalifikatu behar diren langileen arduradunek zuzenean parte hartuko dute puntuazioan.

29.2.3. Kontzeptu bakoitza 0 puntutik 10 puntura bitarte baloratuko da, eta zuzenketa faktore hauez biderkatuko:

–A-ko puntuak x 4 (erantzukizuna).

–B-ko puntuak x 2,5 (gaitasuna).

–C-ko puntuak x 1,5 (praktika eta gauzatzea).

–D-ko puntuak x 1 (prestakuntza).

–E-ko puntuak x 1 (polibalentzia).

29.2.4. Lortutako puntuazioaren eta dagokion soldata mailako atxikipenaren emaitza interesdunari jakinaraziko zaio, eta puntuazioarekin ados ez badago, bere nagusiei azalpenak eskatzen ahalko dizkie, izan diren arrazoien gainean.

29.2.5. Ematen zaizkion azalpenekin ados ez badago, langileak bere kasua berrikusteko eskatzen ahal dio balorazio batzordeari (lanpostuaren arduradunak eta zuzendaritza taldea).

29.2.6. Pertsona batek ez badu bere soldata mailari dagokion puntuazioa lortzen, ordura artekoa izaten segituko du.

29.2.7. Bi urtean behin, soldata mailak aztertu eta berrikusi eginen dira, beharrezkoa izanez gero.

29.2.8. Balorazio berriak 2024 bukaeran eginen dira eta, soldata maila aldatuko balitz, horren ondorio ekonomikoak 2025eko urtarrilaren 1etik aurrera hasiko dira.

29.3. 1.-5. lanbide taldeetako lanpostuetan aritzeko hitzarmen hau sinatu ondoren enpresan lehen aldiz sartzen diren langileak (zeharkako eskulana), 14. soldata mailari atxikiko zaizkio, hitzarmen honetako 6. eranskinean ezarritako baldintzetan.

30. artikulua. Mugikortasuna.

Enpresaren ekoizpen beharrei erantzute aldera, lanpostuen esleipen berrirako mugimenduak egin daitezke. Mugikortasun hori baldintza hauetan eginen da:

30.1. Produkzioko edo antolakuntzako beharren ondoriozkoa izanen da, eta kontuan hartuko dira lanpostura egokitzeko eta ikasteko aldiak.

30.2. Enpresa batzordeari aldez aurretik emanen zaio aurrez ikusitako programazioaren berri eta horren ondorioz langileak mugitu behar diren jakinaraziko zaio. Batzordeak horri buruzko beste proposamen batzuk egiten ahal ditu.

30.3. Ahal baldin bada eginen dira aldaketak, betiere legediak ezarritako mugekin eta kontuan hartuta pertsona bakoitzaren baldintzak, eta postuz aldatutako pertsona berriz itzuliko da berari dagokionera, behin aldaketa eragin duen arrazoia bukatutakoan.

30.4. Indartu beharreko lanbide taldeetako lanpostuetara beren borondatez joan nahi duten langileen eskaerak aztertuko dira. Boluntariorik egonen ez balitz, lanpostuko antzinatasun ordenaren arabera eginen da, txikienetik handienera.

30.5. Lanpostuz mugitutako langileak bere soldata mailari eutsiko dio, baina, esleitutako lanpostuak soldata maila handiagoa baldin badu, orduan maila handiago hori ordainduko zaio hasieratik, bai eta lanpostu horretan dirauen bitartean ere.

Alderdi hori 2025eko urtarrilaren 1etik aurrera aplikatuko da, eta maila handiagoko eginkizunak egin bitartean bakarrik.

30.6. Lanpostu berrian hiru hilabete jarraian eman ondoren eta ziurtagiria eskuratu eta gero, langilearen atxikipena finkatutzat joko da.

30.7. Osasun arazoak dituzten pertsonei ahalik eta lanik egokiena ematen saiatuko da zuzendaritza, prebentzio zerbitzuaren aholkua aditu ondoren.

30.8. Edozein modutan ere, onartutako kategoriaren edo zuzendaritzarekin adostu edo itundutakoaren arabera finkatuta dituzten eskubide guztiak bermatzen zaizkie langileei (balorazio sistema berriaren eta 6. lanbide-taldearen soldata sailkapenaren aplikazio praktikotik gorakoak diren eskubideak).

30.9. Ez da mugarik izanen edozein lanpostu lortzeko, langile batzuek izan ditzaketen berariazko tituluak direla-eta; betiere, beharrezko ezagutza eta baldintzak bete beharko dira, lana ongi egiteko, behar diren kalitate irizpide eta estandarrekin bat.

30.10. Lanpostuaren baldintzak aldatzen direnean eginkizunak eransteagatik edo kentzeagatik, edo metodoa asko aldatzeagatik, edo lanpostu berriak gehitzen direnean, balorazio bat eginen da 3 hilabeteko epean, eta kontuan hartuko dira balorazio horren emaitzak aldaketak izan zirenetik.

30.11. Azpikontratazioak eragindako langileek (beren lanpostuari dagozkion lanak azpikontratatzearen ondorioz beste lanpostu batzuetan kokatutako langileek) lehentasuna izanen dute beren aurreko lanpostuetara itzultzeko, hala nahi izanez gero, lanak berriz ere enpresara itzultzen direnean, baldin haien balorazio ona egin bada.

30.12. Langileak bere lanbide-taldeari ez dagozkion eginkizunak egin ditzan, goragokoak edo beheragokoak, arrazoi teknikoak edo antolamenduzkoak egon beharko dira. Langileak ezinbestekoa den denboran baino ez ditu beteko eginkizun horiek. Enpresaburuak langileen ordezkariei jakinarazi beharko dizkie mugikortasun funtzionalerako erabakia eta arrazoiak.

Langileari bere lanbide taldekoak baino goragoko eginkizunak egokitzen badizkiote, sei hilabete baino gehiagoz urtebetean, edo zortzi hilabete baino gehiagoz bi urtean, langileak igoera eskatzen ahalko du, baldin eta horretarako eragozpenik ez badago hitzarmen kolektiboan, edo, bestela, berak betetako eginkizunei dagokien lanpostu hutsa berak betetzea eskatu, enpresan halako igoeretarako aplikatzen diren arauak beteta. Gainera, dagokion soldata aldea erreklamatzeko eskubidea izanen du. Ekintza horiek metagarriak izanen dira. Enpresak uko egiten badio, enpresa batzordeak edo, hori ezean, langileen delegatuek txostena egin ondoren, langileak zilegi du lan arloko jurisdikzioan erreklamatzea. Negoziazio kolektiboaren bidez, artikulu honetan adierazitako aldiez bestelakoak xedatzen ahalko dira, lanpostu hutsak betetzeko erreklamazioak egiteko.

30.13. Langileak eskubidea izanen du betetzen duen eginkizunari dagokion ordainsaria jasotzeko, non ez zaion eskatzen maila beheragoko lanak egitea; halakoetan jatorrizko ordainsaria mantenduko du.

Mugikortasun funtzionalaren ondorioz, ohiko betebeharrak ez direnak egitean agertutako trebetasunik eza eta egokitasunik eza ez dira kaleratzeko arrazoi izaten ahal.

31. artikulua. Barne igoera.

Hutsik dauden lanpostu guztiak, taldez kanpoko kolektiboaren lanpostuak izan ezik, barne igoerarako aterako dira, lanpostua lortu nahi duten hautagai guztiak ebaluatuko dituen proba edo elkarrizketa baten bitartez. Lanpostuak puntuazio ordenaren arabera esleituko dira.

Balorazio hori egiteko, batzordearekin adostuko da erabiliko den ebaluazio metodoa. Era berean, beharrezkoa balitz, gaitasunak kalifikatzeko batzorde bat eratuko da, kide hauekin: enpresako giza eskubideetako arduraduna, bete nahi den lanpostuko espezialitateko teknikari bat eta enpresa batzordeko ordezkari bat.

Batzorde kalifikatzaile horrek zeregin hauek izanen ditu:

–Lanpostuetarako izangaiek egin beharreko proba mota hautatzea, zehaztu gabe aztertu beharreko gai zehatzak, baina zehaztuta proba horien metodoa eta gaiak.

–Batzorde kalifikatzailearen zeregina da gaitasun probetara joatea, behar bezala egiten diren begiratzea eta horien ondorengo kalifikazioa egitea.

–Probak kalifikatutakoan, lanposturako emaitza onenak (puntuazio handienetik txikienera) lortu dituztenek beteko dituzte lanpostu hutsak. Proba horiek urtebeterako izanen dute indarra.

–Bete nahi den lanpostuak gaitasun espezifikoak eskatzen baditu eta gaitasun horiek ezin badira proba arruntekin neurtu kanpoko aholkularitza behar delako (esaterako: datu konfidentzialak erabiltzea, teknikaren baten ezagutza espezifikoak, ikasteko moldagarritasuna, hizkuntzak ikasteko erraztasuna eta abar), aholkularitza hori emanen da eta horren emaitzak batzorde kalifikatzaileari jakinaraziko zaizkio, kontuan hartuta beti emaitza horien konfidentzialtasuna.

32. artikulua. Prestakuntza.

32.1. Hobaria duten prestakuntzak enpresa batzordeari jakinaraziko zaizkio, egindako prestakuntza bakoitzeko Langileen Laneko Ordezkaritzaren sinaduraren bitartez.

32.2. Nahitaez egin beharreko prestakuntza ikastaroak lanorduetan izanen dira. Ikastaroak langilearen txandatik kanpoko orduetan izanez gero, borondatezkoa izanen da parte hartzea. Langileak parte hartzea erabakitzen badu, dagokion soldata mailako ordu arruntaren prezioarekin emanen zaio ordaina.

32.3. Urtebetetik gorako kontratuak dituzten langileek, baldin eta enpresan egiten ari diren edo aurreikuspenen arabera eginen dituzten lanen inguruko titulu ofizialak lortzera bideratutako ikasketak egiten ari badira, urteko matrikula kostuen %50 adinako laguntza izanen dute. Laguntza hori emateko, beharrezkoa izanen da enpresak ebaluazioa egitea eta onartzea egokia eta inportantea dela prestakuntza hori.

32.4. Ikasketa ofizialak (Batxilergoa, Lanbide Heziketako zikloak edo Unibertsitateko ikasketak) egiten ari direnek lehentasuna izanen dute lantegiko txanda eta ordutegiak aukeratzeko, baldin eta lanpostu hutsik badago edo posible bada. Azterketak egitera joateko baimenak ere izanen dituzte.

VI. KAPITULUA.–KLAUSULA GEHIGARRIAK

33. artikulua. Gizarte Erantzukizun Korporatiboko Funtsa.

Enpresak gizarte erantzukizun korporatiboko funts ekonomiko bat jarriko du eskura. Funts hori batzordeak kudeatuko du, eta zuzendaritza batzordearekin batera adostutako araudia izanen du.

Funtsa askotariko jardueretarako erabiliko da: ingurumen jarduerak, kirolak, ateak zabaltzeko jardunaldiak, lehiaketak, ateraldiak, liburutegia eta gure enpresako langile guztien arteko integrazioa eta adiskidetasuna sustatzen duten bestelako jarduerak. 10.000 euroko partida izanen du urtero, baina ez da urte batetik bestera pilatzen ahalko erabili gabeko gerakinik egotekotan.

2025ean 12.000 eurora areagotuko da gutxienez.

Zenbatekoa langile bakoitzeko 60 euroren parekoa da, eta ez da inola ere gainditzen ahalko adostutako gutxieneko muga.

Langileen zenbaketa Gabonetako loteak eskatzeko momentuan eginen da eta, beharrezkoa balitz, dagokion areagotzea aplikatuko da.

34. artikulua. Bizi eta istripu asegurua.

–Istripu aseguruaren polizak:

• Estaldurak:
  • Istripu baten ondoriozko heriotza: 20.700 euro.
  • Baliaezintasun iraunkorra, baremoaren arabera, gehienez: 35.513,11 euro.
  • Lanerako erabateko ezintasuna: 37.122 euro.

–Bizi poliza (poliza zenbakia: 4876620000)

• Estaldurak:
  • – Heriotza: 14.628,57 euro.
  • –Baliaezintasun iraunkor eta absolutua: 14.628,57 euro.

35. artikulua. Praktika eta ezagutza plana.

Alderdi sinatzaileek lanaren mundua eta bertako aukerak modu praktikoan eta zuzenean ezagutzea nahi dute, baita ikasitakoaren araberako lan praktikak egitea ere.

Horretarako, Zuzendaritzak erraztasunak emanen ditu praktikak egiteko, erakunde laguntzaileen esparrukoak badira (Enpresen eta Unibertsitateen arteko Fundazioak, Lanbide Eskolak, Merkataritza Ganberak eta abar), tutoreak izendatzen badituzte eta eskolako asegurua edo antzekoa badute. Zuzendaritzari egokia iruditzen bazaio praktikaldiko kontratuak hitzartzea, indarra duen legerian ezarritakoari jarraikiz eginen du.

36. artikulua. Lan osasuna eta ingurumena.

Zuzendaritzak adierazi du laneko segurtasun eta higienearen arloan indarra duten estatuko eta Europar Batasuneko araudiak zorrotz beteko dituela.

Enpresako zuzendaritzak eta sindikatuetako ordezkariek konpromisoa hartzen dute laneko segurtasun eta osasunaren kudeaketa sistema, enpresak prestatua, osorik aplikatu eta garatzeko.

Enpresa batzordeak bere kideetako hiru ordezkari izendatuko ditu, eta pertsona horiek enpresako lan osasun eta segurtasun batzordean eta ingurumen kudeaketako batzordean parte hartuko dute.

37. artikulua. Laneko arropak.

Hitzarmen kolektibo honen eraginpeko langileei laneko jantzien sorta bana emanen die enpresak urtero, urteko lehen sei hilabeteetan zehar.

Lanaren ezaugarri bereziengatik, aparteko inguruabar puntualak direla-eta gehiegi hondatuz gero, jantzi sorta gehiago behar badira, atal bakoitzeko arduradunen bidez eskatuko dira.

Norberaren erruz hondatzen badira, jantziak langilearen nominatik deskontatuko dira.

Jantzi mota eta dagokion kantitatea laneko arroparen jarraibidean definitu dira.

38. artikulua. Azpikontratazioak eta aldi baterako laneko enpresak.

Enpresak urtero emanen dio batzordeari azpikontratatutako enpresen eta langile kopuruaren berri.

Lanak kanpora ateratzearen edo azpikontratatzearen ondorioz beste lanpostu batzuetara aldatutako langileek lehentasuna izanen dute beren hasierako lanpostuetara itzultzeko, baldin PIHER enpresak berriz ere bere gain hartzen badu azpikontratatutako jarduera.

Enpresako zuzendaritzak uste badu beharrezkoa dela Aldi Baterako Laneko Enpresen (ABLE) zerbitzuak erabiltzea enpresaren behar puntualetarako –lan pilaketa kasuan, aldi baterako lanerako ezintasun dutenak ordezteko, oporretan...–, ohiko laguntzaile diren izaera sozialeko enpresek beharrok beren gain hartu ezin dituztelako, ABLEen Estatuko Hitzarmen Kolektiboa sinatu duten enpresekin eginen da.

Kontratazioaren aurretik, zuzendaritzak erabilera horren arrazoiak emanen dizkio enpresa batzordeari bilera batean.

Aurretiaz azpikontratatuta egon den edo ABLE batetik zetorren pertsona bat PIHER enpresako langile izatera igarotzen bada, lanpostu berean, denbora hori barneko lan denbora eraginkor moduan zenbatuko da, antzinatasun ondorioetarako, probaldi eta ikaskuntza epeetarako, ziurtagirietarako eta abar.

39. artikulua. Erretiro partzialak eta errelebo kontratuak.

Gai hori Langileen Estatutuaren 12.6 artikuluan xedatutakoaren bidez arautuko da.

40. artikulua. Emakumeen eta gizonen berdintasuna.

Hitzarmen hau sinatu duten alderdiek konpromisoa hartu dute lantokian aukera berdintasunaren printzipioa bultzatzeko eta lan giroan genero diskriminaziorik izan ez dadin begiratzeko.

Tratu eta aukera berdintasuna lortze aldera, bi alderdiek helburu garrantzitsutzat jotzen dituzte honako hauek:

–Tratu eta aukera berdintasuna lanean, zuzeneko eta zeharkako diskriminazioa baztertuz.

–Soldatetan sexuarengatiko bereizkeriarik ez izatea.

–Aukera eta tratu berdintasuna laneratzean.

–Lanean sexu jazarpenik ez izatea, ezta sexuaren ziozko jazarpenik ere.

–Lanbide prestakuntzarako eta mailaz igotzeko berdintasuna.

Zuzendaritzak eta enpresa batzordeak berdintasun batzordean adostutako berdintasun plan bat dugu, eta hiru urtez behin eguneratzen da.

41. artikulua. Jazarpena prebenitzea.

Oharturik pertsonaren funtsezko eskubideak eta, bereziki, duintasuna babestu behar direla lan eremuan, jazarpen arloko printzipioen deklarazioari jarraituz (2006ko maiatzaren 25ean onetsia), baita enpresako zuzendaritzak 2010eko maiatzaren 10ean jazarpen arloan egindako printzipio deklarazioari ere, hitzarmen kolektibo hau sinatzen duten alderdiek lan eremuan jazarpena erakusten duten portaera eta antolaketa faktore guztiak prebenitu eta kendu beharra onartzen dute, eta bi alderdiek berdintasun batzordearen jazarpen arloan esku hartzeko protokoloa aplikatzea erabaki dute.

42. artikulua. Nafarroako Lan Auzitegia.

Sinatzaileek erabaki dute hitzarmen honen interpretazio eta aplikazioko gatazken konponbidea, interpretazio batzordea bildu ondotik, Nafarroako Lan Gatazkak Konpontzeko Auzitegiaren esku jartzea. Halaxe jokatuko da hitzarmenaren aplikazio eremuko enpresaburuak eta langileak ukitzen dituen beste edozein gatazkatan.

Era berean, sinatzaileek hitzematen dute borondatez eta espresuki ahaleginduko direla Nafarroako Lan Gatazkak Konpontzeko Auzitegiaren adiskidetze eta bitartekotza prozeduren mende jartzeko hitzarmen honen aplikazio eremuaren barruan sortutako langileen eta PIHER S&C enpresako zuzendaritzaren arteko gatazka indibidualak, betiere, noski, Nafarroako Lan Gatazkak Konpontzeko Auzitegiaren eskumenekoak diren gaiekin lotuta badaude.

43. artikulua. Interpretazio batzordea.

43.1. Lan Agintaritzari aitortutako eskumenak albo batera utzita, batzorde paritario bat osatu da hitzarmen hau interpretatu eta aplikatzeko. Batzorde horren egitekoak izanen dira: hitzarmen honetako artikulu guztiak interpretatzea, hitzarmen honetako arauak interpretatzea eskatzen duten gatazka kolektiboen aurkezpenean nahitaezko adiskidetzea gauzatzea eta itundutakoa aplikatzen dela egiaztatzea. Hauek izanen dira batzordekideak:

–Zuzendaritzaren aldetik:

• Jesús Martínez (zuzendari nagusia).
• Enrique Catalán (finantza zuzendaria).
• Carla Alonso (giza baliabideen zuzendaria).

–Enpresa batzordearen aldetik:

• Sergio Gil Zueco.
• Ignacio Calvo Enciso.
• Juan Luis Madurga Calvo.
• Javier Cerezo Cacho.

43.2. Batzorde parekidea bilduko da aldez aurretik edozein batzordekidek dei eginda, jakinarazpen frogagarri baten bidez (gutun ziurtatua, burofaxa edo beste bitarteko frogagarri bat), gutxienez bileraren eguna baino zazpi egun lehenago. Idazki bat erantsiko zaio jakinarazpenari, argi eta gabi planteatzeko interpretatu behar den auzia.

43.3. Batzorde parekideak enpresaren egoitza sozialeko instalazioetan eginen ditu bilerak. Akordioak batzordekideen botoen gehiengo soilaren bitartez adostuko dira, jorratutako gaiak eztabaidatu eta gero. Erabakiak hartzeko epea ez da 1 urtetik gorakoa izaten ahalko.

43.4. Batzorde parekideak eskumena izanen du modu eraginkorrean konpontzeko lan baldintzak ez aplikatzeko sor daitezkeen desadostasunak (Langileen Estatutuaren 82.3 artikulua); hala, aipatutako artikuluari jarraikiz, estatu edo autonomia mailako lanbide arteko akordioetan ezarritako prozedurak egokituko ditu.

43.5. Akordioak egin, eztabaidatu eta adosteko prozedura artikulu honetako 1. atalean ezarritakoaren arabera arautuko da.

44. artikulua. Xedapen osagarria.

Hitzarmen honek aurreikusten ez duen hartan, indarra izanen dute Nafarroako Industria Siderometalurgikoaren gaur egungo hitzarmen kolektiboak eta nahitaez bete beharreko legeek, erregelamenduek eta gainerako xedapenek.

1. ERANSKINA.–SOLDATAK

–2025. urtea: %5eko areagotzea + 2024ko KPIa.

–2026. urtea: %5eko areagotzea + 2025eko KPIa.

Ikus 15. artikulua.

2. ERANSKINA.–URTEKO SOLDATA GORDINAREN BANAKETA 2024. URTEAN

Ikus 16., 18. eta 22. artikuluak.

3. ERANSKINA.–ANTZINATASUNA

Ikus 20. artikulua.

2026: (ekonomikoki berrikusteko modukoa urte horretatik aurrera) 20 euro/hirurtekoa + %5 + 2025eko KPIa.

4. ERANSKINA.–BESTE BATZUK

Ikus 7., 19., 21., 25. eta 26. artikuluak.

5. ERANSKINA.–APARTEKO ORDUAK ETA 1+1 ORDUAK

Ikus 9. artikulua.

6. ERANSKINA.–KONTRATAZIOA SUSTATZEKO ETA LEHIAKORTASUNARI EUSTEKO AKORDIOA

Hitzarmen hau sinatzen duten alderdiak, jakitun dira, alde batetik, une hauetan lehentasunezko helburuak direla enplegu egonkorra eta kalitatezkoa sortzea eta enpresaren lehiakortasunari eustea, eta, bestetik, denbora behar dela guztiz ezagutzeko enpresaren funtzionamendua, behar bezala eta zuzen betetzeko lanpostu bakoitza, gure bezeroek eskatzen dituzten goi mailako kalitate estandarren barnean (ezinbestekoa da produkzioko, kalitateko, segurtasuneko eta ingurumeneko zereginak eta jarraibideak ongi ezagutzea, behar korporatiboak ezagutzea eta beste). Horregatik, hitzarmen hau sinatzen duten alderdiek neurriak adostu dituzte langile berriak kontratatzeko eta lehiakortasunari eusteko.

Zuzeneko eskulaneko lanpostuak.

Zerbitzuak zuzeneko eskulanean ematen hasitako langile berriak ebaluatu eginen dira, eta ziurtagiria emanen zaie, 29. artikuluan ezarritakoari jarraikiz.

Bien bitartean, ezagutzak, gaitasunak, kultura eta prozesu kolektiboak eta lana behar den kalitatez eta autonomiaz gauzatzeko gainerako baliabideak ikasi bitartean, langile berriak egonen dira 13. soldata mailan, 6 hilabetez.

6 hilabete horiek igaro ondoren, lanpostuari dagokion soldata mailan sartuko dira langile berriok.

Enpresan zerbitzua ematen hasi eta, aurreko paragrafoetan araututakoari jarraikiz, 13. soldata mailan sartu diren langileek lehentasuna izanen dute erdiesteko 6. lanbide taldean (zuzeneko eskulana) sortzen ahal den edozein lanpostu huts, lan kontratu mugagabea sinatuta, baldin aurretik jada sinatu ez badute; nolanahi ere, 6 hilabeteko gehieneko denbora bete arte segituko dute 13. soldata mailari atxikita.

Aurreko paragrafoetan aurrez ikusitako 6 hilabeteko aldiak zenbatzeko, kontuan hartuko dira langileak gauzatutako lanaldi guztiak, azken kontratazioa bukatu zenetik 6 hilabetetik gora igaro direnean izan ezik; kasu horretan, berriz hasiko da zenbaketa.

Hitzarmen hau indarrean hasitakoan, enpresan zerbitzua ematen duten aldi baterako langileei kontratazioa sustatzeko eta lehiakortasunari eusteko akordioa aplikatuko zaie, egun dituzten soldata baldintzak mantenduz.

Nolanahi ere, lanpostu hutsak betetzeko lehentasunezko eskubideak langileak eskuratutako gaitasun, titulazio eta prestakuntzekin bat egiten duten lanpostuei egiten die erreferentzia.

4. eta 5. lanbide taldeetako zeharkako eskulaneko lanpostuak.

4. eta 5. lanbide taldeetan zerbitzua ematen hasi diren eta hitzarmen kolektibo hau aplikatzekoa zaien langile berriak beren arduradunak ebaluatuko eta gaituko ditu, Giza Baliabideetako Departamentuarekin koordinatuta.

Bien bitartean, ezagutzak, gaitasunak, kultura eta prozesu kolektiboak eta lana behar den kalitatez eta autonomiaz gauzatzeko gainerako baliabideak ikasi bitartean, langile berriak egonen dira 14. soldata mailan, 6 hilabetez. 6 hilabete horiek igaro ondoren, 8. soldata mailan sartuko dira langile berriok.

Enpresan zerbitzua ematen hasi eta, aurreko paragrafoetan araututakoari jarraikiz, 14. soldata mailan sartu diren langileek lehentasuna izanen dute 4. eta 5. lanbide taldeetan (zeharkako eskulana) sortzen ahal den edozein lanpostu huts betetzeko, lan kontratu mugagabea sinatuta, aurrez dagoeneko hala egin ez badute, eta 14. soldata mailari atxikita jarraitzeari kalterik egin gabe aldeko ebaluazioa jaso eta 6 hilabeteko gehieneko denbora bete arte.

Aurreko paragrafoetan aurrez ikusitako 6 hilabeteko aldiak zenbatzeko, kontuan hartuko dira langileak gauzatutako lanaldi guztiak, azken kontratazioa bukatu zenetik 6 hilabetetik gora igaro direnean izan ezik; kasu horretan, berriz hasiko da zenbaketa.

Hitzarmen hau indarrean hasitakoan, enpresan zerbitzua ematen duten aldi baterako langileei kontratazioa sustatzeko eta lehiakortasunari eusteko akordioa aplikatuko zaie, egun dituzten soldata baldintzak mantenduz.

Nolanahi ere, lanpostu hutsak betetzeko lehentasunezko eskubideak langileak eskuratutako gaitasun, titulazio eta prestakuntzekin bat egiten duten lanbide taldeari eta lanpostuari egiten die erreferentzia.

Eta hala jasota gera dadin, akordio hau bi aletan sinatu dute, 2024ko urriaren 11n eta orrialde guztietan, pertsona hauek:

Iragarkiaren kodea: F2415573