1. NAFARROAKO FORU KOMUNITATEA
1.7. BESTELAKOAK
450E/2025 EBAZPENA, abenduaren 4koa, Ekonomia Zirkularraren eta Berrikuntzaren Zerbitzuko zuzendariak emana, zeinaren bidez onartzen baita Alloko udal mugartean tisu papera fabrikatzen eta eraldatzen duen instalazio baten ingurumen baimen integratuan eskatutako aldaketa, ezarritako funtzionamendu baldintzei dagokiena. Horren ondorioz, instalazioak eta hango jarduerak ebazpen honen eranskinean ezarritako baldintzak bete beharko dituzte. Instalazioaren titularra Essity Operations Allo SL da.
Instalazio horrek ingurumen baimen integratua du, Ingurumeneko, Lurraldearen Antolamenduko eta Etxebizitzako kontseilariaren abenduaren 23ko 607/2005 Foru Aginduaren bidez emana, gero Ingurumenaren eta Uraren zuzendari nagusiaren irailaren 2ko 404E/2014 Ebazpenaren bidez eguneratua, eta Ekonomia Zirkularraren eta Berrikuntzaren Zerbitzuko zuzendariaren apirilaren 23ko 139E/2024 Ebazpenaren bidez aldatua.
2025eko abuztuaren 21ean eta irailaren 3an, titularrak eskatu zuen ingurumen baimen integratuan ezarritako baldintzak aldatzeko, zehazki, ingurumen baimen integratuaren III. eranskinean, sortzen diren hondakinen zerrendan, hondakin mota gehiago sar daitezela, zerbitzu orokorrei (zehazki, mantentze-lanetako jarduerei) eta ekoizpen prozesuari lotuak.
Ekonomia Zirkularraren eta Berrikuntzaren Zerbitzuak aztertu du aurkeztutako eskaera, eta balorazio hau egin du:
EHZ KODEA | DESKRIBAPENA | BALORAZIOA |
15 02 03 | Xurgatzaileak, iragazteko materialak, garbitzeko trapuak eta babesteko arropak, 15 02 02 kodean zehaztutakoez bestelakoak: Orearen ura xukatzeko erabiltzen diren oihal eta feltroen hondakinak | Onartzen da instalazioan sortzen diren hondakinen zerrendan sartzea. |
16 02 14-23 | Informatika- eta telekomunikazio-ekipoak. LD monitoreak eta pantailak. Profesionala |
16 02 14 - 32 | Argiztapen ekipoak. LED lanparak. Profesionala |
16 02 14 - 42 | Gailu handiak. 50 cm baino gehiagoko kanpoko neurria dutenak. Gainerakoak. Profesionala |
16 02 14 - 52 | Gailu txikiak. 50 cm baino gehiagoko kanpoko neurririk ez dutenak. Gainerakoak. Profesionala |
16 02 14-62 | Osagai arriskutsurik ez duten informatika- eta telekomunikazio-gailu txikiak. Profesionala |
16 02 11*-11* | Etxetresna elektriko handiak, tenperatura trukea egiten dutenak CFC, HCFC, HC edo NH3 bidez. Profesionala |
16 02 11*-12* | Etxetresna elektriko handiak. Aire girotua. Profesionala |
16 02 13*-21* | Informatika- eta telekomunikazio-ekipoak. CRT monitoreak eta pantailak. Profesionala |
16 02 13*-22* | Informatika- eta telekomunikazio-ekipoak. Monitoreak eta pantailak, ez CRT ez LRD Profesionala: LCD pantailak |
16 02 13*-41* | Gailu handiak. 50 cm baino gehiagoko kanpoko neurria dutenak. Osagai arriskutsuak dituztenak. Profesionala |
16 02 13*-51* | Gailu txikiak. 50 cm baino gehiagoko kanpoko neurririk ez dutenak. Osagai arriskutsuak dituztenak eta pilak daramatzatenak. Profesionala |
16 02 13*-61* | Osagai arriskutsuak dituzten informatika- eta telekomunikazio-gailu txikiak. Profesionala |
16 02 11*-13* | Zirkuituetan edo kondentsadoreetan olioa duten gailuak Profesionalak | Ez da onartzen sortutako hondakinen zerrendan kode horrekin sartzea, ez dagoelako sartua 27/2021 Errege Dekretuan. Transkripzio akatsa jotzen da, eta 16 02 13*-13* kodea onartzen. |
Onartutako aldaketek ez dute eragozten instalazioaren funtzionamendu egokia ingurumenari dagokionez, eta bat datoz ingurumen baimen integratuan ezarritako gehieneko isurketa-balioekin eta gainerako eskakizunekin, bai eta teknika erabilgarri onenen aplikazioarekin ere.
Kasu honetan, Ingurumenean Eragina duten Jarduerak arautzen dituen abenduaren 16ko 17/2020 Foru Legea garatzeko Erregelamenduaren 35. artikuluan ezarritako inguruabarrak gertatzen direla uste da, eta, ondorioz, bidezkoa da ingurumen baimen integratuan ezarritako baldintzak ofizioz aldatzea, artikulu horretan ezarritako administrazio prozedurarekin bat etorriz, eta ez da egokitzat jotzen aldaketa-espediente hau jendaurrean jartzea.
Ebazpen proposamena hamabost egunez egon da instalazioaren titularrari entzunaldia emateko izapidean, eta hark ez du proposamenaren aurkako alegaziorik aurkeztu.
Adierazitakoarekin bat, eta Landa Garapeneko eta Ingurumeneko Departamentuaren egitura organikoa ezartzen duen azaroaren 15eko 255/2023 Foru Dekretuak ematen dizkidan eskudantziak erabiliz,
EBAZTEN DUT:
Lehendabizikoa.–Onartzea Alloko udal mugartean tisu papera fabrikatzen eta eraldatzen duen instalazio baten ingurumen baimen integratuan eskatutako aldaketa, ezarritako funtzionamendu baldintzei dagokiena. Horren ondorioz, instalazioak eta hango jarduerak ebazpen honen eranskinean ezarritako baldintzak bete beharko dituzte. Instalazioaren titularra Essity Operations Allo SL da.
Bigarrena.–Ebazpen honetan jasotako baldintzak betetzen ez badira, Kutsaduraren Prebentzio eta Kontrol Integratuaren Legearen testu bateginaren IV. tituluan jasotako ingurumen diziplinako neurriak hartuko dira (testu bategin hori abenduaren 16ko 1/2016 Legegintzako Errege Dekretuaren bidez onetsi zen), eta, subsidiarioki, Ingurumenean Eragina duten Jarduerak arautzen dituen abenduaren 16ko 17/2020 Foru Legearen III. tituluan ezarritako zehapen araubidean jasotakoak, ezertan galarazi gabe legeria sektorialean ezarritakoa, aurrerantzean ere aplikatu beharko baita.
Hirugarrena.–Ebazpen hau Nafarroako Aldizkari Ofizialean argitaratzea.
Laugarrena.–Ebazpen honek ez du administrazio bidea amaitzen, eta interesdunek, administrazio publikoek izan ezik, gora jotzeko errekurtsoa jartzen ahalko dute haren kontra, Landa Garapeneko eta Ingurumeneko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jartzen ahalko dute, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Ebazpen hau jakinarazi eta biharamunetik aurrera kontatuko dira epeak.
Bosgarrena.–Ebazpen hau igortzea Essity Operations Allo SLri eta Alloko Udalari, behar diren ondorioak izan ditzan.
Iruñean, 2025eko abenduaren 4an.–Ekonomia Zirkularraren eta Berrikuntzaren Zerbitzuko zuzendaria, Francisco Javier Larrañeta Nido.
Oharra: Ebazpen honetan aipatzen diren eranskinak interesdunen eskura egonen dira, Ingurumen Zuzendaritza Nagusiaren bulegoetan (González Tablas kalea 9, behea, Iruña; Ekonomia Zirkularraren eta Berrikuntzaren Zerbitzua) eta Nafarroako Gobernuaren webgune honetan: https://extra.navarra.es/InformacionPublicaPRTR/CentroPublicaciones.html#/CentroPublicaciones.
Iragarkiaren kodea: F2516057
