1. NAFARROAKO FORU KOMUNITATEA
1.7. BESTELAKOAK
1319E/2024 EBAZPENA, abenduaren 16koa, Ingurumeneko zuzendari nagusiak emana, zeinaren bidez ingurumen txosten estrategikoa ematen baita Doneztebeko Udal Plan Orokorraren aldaketa egituratzaile puntual bati buruz, Arau Subsidiarioen 48. artikuluari eragiten diona (balio ertaina duen nekazaritza eta abeltzaintza lurzorua). Aldaketaren sustatzailea Ezkurra-Sarratea Hermanos SL da.
Aldaketa-proposamenaren xedea da arautzea zer eraikuntza-erabilera baimendu daitezkeen Doneztebeko indarreko Udal Plan Orokorraren 48. artikuluan jasota eta araututa dagoen nekazaritza-balio ertaineko azpikategoriako lurzoruetan, eta, beraz, soilik eragiten die aipatutako Udal Plan Orokorrean azpikategoria horren barruan kategorizatutako lurzoruei.
Helburua da hirigintza-plangintzan ezarritako egungo hirigintza-determinazioak aldatzea (aipatutako Udal Plan Orokorreko hirigintza-araudiaren 48. artikulua) nekazaritza-balio ertaineko azpikategoriarako, ostatu turistikoak hartzen dituzten eraikinak eta instalazioak eraikuntza-erabilera baimengarri gisa sartzeko, bai eta erabilera horiek eta horien osagarriak direnak ere (aisialdikoak, kirolekoak eta ostalaritzakoak).
Beraz, aldaketaren ondorioz honako eraikuntza mota hauek onartuko dira lurzoru urbanizaezinaren azpikategoria honetan baimendu daitezkeen eraikuntza-jarduera gisa: ostatu hartzeko eraikuntzak eta horien osagarri diren eraikuntzak, betiere erabilera turistikoak eta horiei lotutakoak hartzen badituzte, hala nola aisialdikoak, kirolekoak eta ostalaritzakoak.
Biodibertsitatearen Zerbitzuak adierazi du ingurumen ebaluazio estrategiko sinplifikatuaren prozedura egoki egin dela eta proposatu du ingurumen ebaluazio estrategiko sinplifikatuaren txostena ematea, aldekoa, ingurumen ukipen nabarmenik sortzen ez dela iritzita.
Adierazitakoarekin bat, eta honako hauek ematen dizkidaten eskudantziak erabiliz: Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikulua, Nafarroako Foru Komunitateko Administrazioaren departamentuen egitura ezartzen duen Nafarroako Foru Komunitateko Lehendakariaren abuztuaren 17ko 10/2023 Foru Dekretua, eta Landa Garapeneko eta Ingurumeneko Departamentuaren oinarrizko egitura ezartzen duen abuztuaren 30eko 74/2023 Foru Dekretua,
EBAZTEN DUT:
1. Ingurumen txosten estrategikoa ematea, aldekoa, Doneztebeko Udal Plan Orokorraren aldaketa egituratzaile puntual bati buruz, Arau Subsidiarioen 48. artikuluari eragiten diona (balio ertaina duen nekazaritza eta abeltzaintza lurzorua), ingurumen ukipenik eragiten ez dela iritzita. Aldaketaren sustatzailea Ezkurra-Sarratea Hermanos SL da.
2. Ebazpen hau Nafarroako Aldizkari Ofizialean argitaratzea.
3. Ebazpen hau Hirigintza Atalari jakinaraztea, behar diren ondorioak izan ditzan.
Iruñean, 2024ko abenduaren 16an.–Ingurumeneko zuzendari nagusia, Ana Bretaña de la Torre.
Iragarkiaren kodea: F2418635
