Iragarkia

249. ALDIZKARIA - 2025eko abenduaren 16a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

169C/2025 EBAZPENA, azaroaren 19koa, Ekonomia Sozialeko eta Laneko zuzendari nagusiak emana, zeinaren bidez erabakitzen baita Reparagrua SL enpresaren hitzarmen kolektiboa erregistratzea, gordailutzea eta Nafarroako Aldizkari Ofizialean argitaratzea.

Ikusi da Reparagrua SL enpresak aurkeztutako hitzarmen kolektiboa (kode zenbakia: 31102502012025), erregistro honetan sartu baitzen 2025eko urriaren 2an, 2025eko ekainaren 13an enpresaren eta sindikatuen ordezkaritzek sinatu ondoren.

Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta hitzarmen kolektiboak, lan akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin bat etorriz.

Nafarroako Foru Komunitateko Administrazioari eta foru sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuak ematen dizkidanak erabiliz, honako hau

EBAZTEN DUT:

Lehenbizikoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Reparagrua SL enpresak aurkeztutako hitzarmen kolektiboa (kode-zenbakia: 31102502012025).

Bigarrena.–Nafarroako Aldizkari Ofizialean argitara dadila xedatzea, orok jakin dezan.

Iruñean, 2025eko azaroaren 19an.–Ekonomia Sozialeko eta Laneko zuzendari nagusia, Iñaki Mendióroz Casallo.

REPARAGRÚA, SL

ALTSASU - 2025eko ekainaren 20a

1.–LANGILEEN EREMUA ETA LURRALDE EREMUA

Hitzarmen kolektibo honek REPARAGRÚA SLko plantilla osoari eraginen dio.

2.–IRAUNALDIA

Hitzarmen honek LAU URTEKO indarraldia izanen du eta 2025eko urtarrilaren 1etik 2028ko abenduaren 31ra arte izanen da indarrean.

Aurreraeragina: mugagabea.

Hitzarmenaren salaketa 2028ko urriaren 1etik aurrera.

3. artikulua.–EREMU FUNTZIONALA

Bere esparru funtzionala igogailuen makineria elektrikoa muntatzea, martxan jartzea, konpontzea eta mantentzea da.

4.–LANALDIA

Lanorduak: lanaldi zatitua.

Lanorduen kopurua, gehienez ere, honako hau izanen da urtero, 2025, 2026, 2027 eta 2028an:

2025. urtean, benetako lanorduak 1.670 izanen dira.

2026. urtean, benetako lanorduak 1.663 izanen dira.

2027. urtean, benetako lanorduak 1.656 izanen dira.

2028. urterako benetako lanorduak SERVICIOS TÉCNICOS OLABERRÍA, SL enpresaren hitzarmenak ezarritakoak izanen dira.

Egutegia.

Lan-egutegi bakoitzean, probintzia bakoitzeko zaindarien jaiegunak errespetatuko dira; Aldizkari Ofizialean argitaratu ondoren, lan-eremu bakoitzeko egutegiak eginen dira hurrengo urterako.

Urte bakoitzerako lan-egutegia lanegun bakoitzeko 7,5 orduko eta 8 orduko lanaldiekin eginen da.

Urtean egindako gehiegizko orduak norberaren aukerako egunekin konpentsatuko dira. Egun horiek langileen eta enpresako zuzendaritzaren artean adostuko dira, enpresen zerbitzua ez kaltetze aldera.

2026-2027-2028 urteetarako, 7,5 orduko lanaldiak gehienez hilabete batekoak izanen dira.

Erretenak.

Lantoki bakoitzerako ezarritako lan-egutegia edozein dela ere, egutegiko zubietan behar den zerbitzua emateko betebeharra ezartzen da. Urte hasieran bete beharreko lanpostuak zehaztuko dira.

Erreten-orduak jaiegunetako ordu gisa ordainduko dira. Gainera, ordua 1,2 ordu gisa hartzeko aukera emanen da, aldez aurretik jakinarazita eta arduradunaren baimenarekin. Hileko edo hurrengo hilabeteko soberakinetik hartutako orduak deskontatuko dira.

Puntu horrek indarraldi mugagabea izanen du, eta enpresa-hitzarmena indarrean ez badago ere aplikatuko da.

24 orduko guardiak.

Bi aldeek uste dute guardia-zerbitzua ohiz kanpoko gertakaria dela, eta langileak askoz ere eskuragarritasun handiagoa izan behar duela. Hori horrela, plantillako langileek guardiak behar direnean egiteko konpromisoa hartzen dute. Horretarako, guardiako langileak telefono operatiboa izan behar du estaldura-eremuetan, edozein unetan deitu ahal izateko.

Era berean, enpresak ohiko zerbitzu gisa ez eskaintzeko konpromisoa hartu du.

Guardia-sistemaren prozedura (txandakatzea, bikoteak, etab.) langileen eta eremu bakoitzeko arduradunaren artean adostuko da.

Ahal den neurrian, guardiak bikoteka eginen dira.

Telefono bat emanen zaie, eta bezeroak telefono horretara deituko du guardiako gorabehera bat duenean eta guardiako ordutegian erabilgarri egon behar du.

Guardian dagoen bikote/pertsona bakoitzak bezero enpresa bakar bati emanen dio arreta guardia bakoitzean.

Langile bakoitzeko guardia-asteen gehieneko muga urtean 9 astekoa izanen da.

Atal hauen arabera arautuko dira:

Txandaketa: Guardiak gehienez astebete iraunen du jarraian. Egutegi bat ezarriko da teknikariei banatzeko. Guardian egindako edozein aldaketa gutxienez hilabete lehenago jakinarazi beharko zaio langileari, justifikatutako salbuespenetan izan ezik. Bezeroak aurreikusitako guardian aldaketaren bat egiten badu, 2 aste lehenago jakinarazi beharko zaio langileari. Langile batek, familia-arrazoiak direla eta, ezin baditu guardiak denbora-tarte jakin batean egin, behar besteko aurrerapenaz jakinaraziko dio arduradunari, gainerako langileekin zerbitzua antolatzeko.

Fitxaketak: Hasierako markaketatik azken markaketara arte kontatuko du denborak, biak lantokiko instalazioetan. Erantzuteko denbora gehienez 2 ordukoa izanen da probintzia barruan eta 3 ordukoa Reparagruaren gainerako probintzietan.

Atsedenaldia: Lanaldien arteko atsedena zortzi ordukoa izanen da gutxienez.

Langile batek 02:00etatik 03:59ra bitarte akabatzen badu lana, zortzi orduko atsedenaldiaren ondoren hasiko da lanean, eta 18:00etan akabatuko du lanaldia (ordubete bazkaltzeko). Lanaldia osatu arte geratzen den denbora barkatuko da.

Langile batek 04:00etatik aitzina akabatzen badu lana, zortzi orduko atsedenaldiaren ondoren hasiko da lanean, eta 18:00etan akabatuko du lanaldia (ordubete bazkaltzeko). Lanaldia osatu arte geratzen den denbora barkatuko da.

Guardia 05:00etatik aurrera hasten bada, ez da atseden-erregimena aplikatuko; lanaldia 05:00etan hasiko da, eta lanaldi osoa jarraian eginen da. 05:00etatik 06:00etara arteko ordua gauekotzat hartuko da, eta hala ordainduko da.

Urtero, definitutako prozedurak nola funtzionatzen duen eta langileen erantzuna aztertuko da.

Guardietako eskuragarritasun-orduen ordainsaria: Guardiako eskuragarritasunaren asteko ordainsaria honako hau izanen da:

Zerbitzua aste osoan ez egitea aurreikusita badago, egindako zati proportzionala ordainduko da.

Guardiako astean estatuko edo tokiko jaiegunen bat badago (igandeak kanpo), asteko prezioa baino %30 gehiago ordainduko da.

Zenbateko horiek Nafarroako urteko KPIarekin eguneratuko dira.

Lan egindako guardia-orduen ordainsaria: Era berean, langileek urte hasieran erabaki ahal izanen dute guardietan lan egindako orduak ordu bakoitzeko 1,20 ordu eta 1,5 ordu konpentsatuko diren, asteburuan egin badira.

Gutxienez 3 ordu konpentsatuko dira bertaratzeagatik.

5.–OPORRAK

Indarraldiko lau urteetarako, egutegiko 30 egun hartuko dira arauzko opor gisa.

Honela hartuko dira: 15 eguneko etenik gabeko aldia eta beste 15 egunak, banandu ahal izanen diren bi alditan. Bezeroei zerbitzurik onena eskaintzeko, enpresako langileek eta zuzendaritzak oporrak zehaztuko dituzte.

Langileen Estatutuaren 38.3 artikuluan jasotzen diren kasuetako batean, langileak erregelamenduko opor egunak dagokion urtean hartzerik ez badu, aipatutako artikuluan aurreikusten diren epeetan hartuko dira.

Kasu horretan, oporrak hartzeko eguna edo egunak bi aldeek –enpresak eta langileak– adostuta hartuko dira.

6.–BENETAKO SOLDATAK

2025. urterako, soldata errealek %10eko igoera izanen dute.

2026. urterako, soldata errealek %10eko igoera izanen dute.

Igoerak finkagarriak izanen dira, eta ehunekotan banatuko dira %100ean.

2027. urtean, benetako soldatak SERVICIOS TÉCNICOS OLABERRÍA, S.L. enpresaren soldatekin parekatuko dira.

Zenbateko berriak 2025eko urtarrilaren 1era arteko atzeraeraginezko ondorioekin jarriko dira indarrean.

7.–E.PS.V. GEROA

2026an, enpresak GEROAri atxikitzeko eskatuko du, Euskal Autonomia Erkidegoan sektoreko hitzarmen probintzialik ez duten enpresentzako prozedura espezifikoari jarraituz. Prozedura horrekin batera, Enpresa Hitzarmenean edo Itunean ezarritako Akordioa aurkeztu beharko du, eta Erakundearen Estatutuekiko adostasuna adierazi beharko du. Nolanahi ere, enpresa berriak sartzeko, nahitaez, Erakundearen Gobernu Batzordearen erabakia beharko da, eta Batzar Orokorreko kideei urteko bileraren berri emanen zaie.

8.–LAN-ISTRIPUEN ASEGURU KOLEKTIBOA

Enpresak istripu-poliza kolektiboa izanen du aseguru-etxe batekin.

Hitzarmen honen indarraldian aseguratutako kapitalak 2022-2026Nafarroako industria siderometalurgikoen hitzarmen probintzialean adierazitakoak izanen dira:

–Lan-istripuaren ondoriozko heriotza: 28.750 euro.

–Lan istripuaren ondoriozko baliaezintasun iraunkor erabatekoa: 51.750 euro.

2027. urtetik aurrera, lan-istripuen aseguruaren baldintzek SERVICIOS TÉCNICOS OLABERRÍA, SL enpresaren estaldurak izanen dituzte.

9.–DIETAK, KILOMETRAJEAK ETA BESTE BATZUK

A) Dietak eta kilometrajea:

Langileek, enpresak aginduta, bidaiak edo lekualdaketak egin behar badituzte enpresa kokaturik dagoen herritik kanpora, eta horrek otorduak etxean egitea galarazten badie*, 2025ean zenbateko hauek ere jasoko dituzte soldataz gainera:

–Dietak:

• Bazkaria: 28,04 euro.
• Afaria: 17,00euro.

(*) Mantentze-lanetako eta muntaketako teknikarien kasuan, lana dela-eta bidaiak edo joan-etorriak egin behar badituzte, eta horiek enpresa dagoen herritik 10 km baino gutxiagora badaude, bazkari-gastuak ordainduko zaizkie, tiketa aurkeztuta, eta ez da, berez, "dieta" izanen. Eta gehienez 19 euro, justifikatuta. Zenbateko hori urtero igoko da, Nafarroako KPIaren arabera.

–Kilometrajeak ibilgailu propioan: 0,40 euro/km.

2026. urterako, dieten eta kilometrajearen prezioak %10 igoko dira, betiere SERVICIOS TÉCNICOS OLABERRÍA, S.L. enpresan aplikatu beharreko prezioak gainditzen ez badira.

2027. urterako, dieten eta kilometrajearen prezioak SERVICIOS TÉCNICOS OLABERRÍA, SL enpresan aplikatu beharreko prezioekin parekatuko dira.

B) Irteera plusa:

Langileek, enpresak aginduta, bidaiak edo lekualdaketak egin behar badituzte enpresa kokaturik dagoen herritik kanpora, eta horrek gaua etxean ematea galarazten badie, plus hau jasoko dute.

Plusa etxetik kanpo emandako gau bakoitzeko jasoko da.

2025. urtean, zenbatekoa honako hau izanen da:

–Irteerak Espainian: 30 euro, gau bakoitzeko.

–Irteerak atzerrian: 54,88 euro, gau bakoitzeko.

–Irteerak arrisku handieneko herrialdeetan (muntatzaileak bakarrik): 81,81 euro, gau bakoitzeko.

2026. urterako, zenbateko horiek %10 igoko dira.

Jaiegunetan eta igandeetan gaua kanpoan emanez gero bidaiaren ondorioz baina lanik egin gabe, irteera plus hori bera ordainduko da, langilea lanean balego bezala.

Atzerriko irteeretarako, eta indarrean dagoen zerga-araudiak ahalbidetzen duen kasuetan (lan horiengatik atzerriko bezero bati faktura bat egin behar zaio), enpresak prozedura bat prestatuko du, langileak jarraitu beharko duena, atzerrian egindako lanak PFEZtik salbuetsita daudela justifikatzeko, eta hala aplikatzen bazaio.

C) Muntatze lanak atzerrian:

–Bi muntatzailek bidaiatuko dute nolabaiteko esku-hartzea behar denean, hala nola garabi muntaketa oso bat eta orgaren, burualdearen eta abarraren aldaketa. Pertsona bakar batek bidaiatu ahal izanen du muntaketa ikuskapenak direnean, edo garrantzi txikiagoko piezak edo ordezko piezak aldatu behar direnean (mikroetengailuak, adibidez).

–Pertsona bakar batek bidaiatzen ahalko du bulegoko lanak direnean (komertzialak, administrariak, teknikariak, etab.).

–Enpresa arduratuko da behar diren aseguruak eta bisak izapidetzeaz.

–Langileak ez dira behartuta egonen gomendatuta ez dauden herrialdeetara (arriskutsuak) joatera; herrialde horietako lanetara joaten diren muntatzaileen irteera-plusa 81,81 eurokoa izanen da gau bakoitzeko, B) atalean adierazten dugun bezala.

–Bidaia-ordu guztiak lan egindakotzat hartuko dira.

Zenbateko berriak hitzarmen hau sinatu eta hurrengo hilabetetik aurrera aplikatuko dira.

2027. urterako, irteeren plusen prezioak SERVICIOS TÉCNICOS OLABERRÍA, SL enpresan aplikatu beharreko prezioekin parekatuko dira.

10.–ALDI BATERAKO EZINTASUNA

Kontingentzia arruntengatik gertatzen diren aldi baterako ezintasunen kasuetan, aldi horiek honela ordainduko eta osatuko dira:

–Lehen hilabetean, aurreko hilabeteko benetako soldataren* %80.

–Bigarren hilabetean, aurreko hilabeteko benetako soldataren* %90.

–Hirugarren hiletik aurrera (hori barne), baja hasi aurreko hileko benetako soldataren* %100.

(*) (Benetako soldata kontzeptu hauek biltzen dituena dela ulertzen da: hileko soldata eta antzinatasuna)

Horri dagokionez, jarraian izandako baja aldiak lotu eginen dira arrazoi beragatik berriz gertatzen badira (hala dela adierazi beharko da gizarte segurantzak emandako baja agirian) eta aurreko altatik hiru hilabete baino gutxiago iragan badira.

Laneko istripuek edo eritasun profesionalak eragindako aldi baterako ezintasun kasuetan, aurreko hiru hilabeteetako egiazko soldataren batez bestekoa ordainduko da osorik, dietak, kilometroak eta irteera plusa edo pizgarriak kenduta.

Gaixotasun arruntak eta lanetik kanpoko istripuak eragindako aldi baterako ezintasunaren kontingentziaren ordainketa kudeatzea, alten eta bajen kontrola enpresak kontratatuta duen istripuen mutualitateak eginen du: gaur egun MC Mutualek.

Osagarri horiek ez dira aplikatuko langileak enpresako plantillan baja hartzen duenean (kontratuaren azkentzea, kaleratzea, ABE agortzea...).

Osagarri berriak hitzarmen hau sinatu eta hurrengo hilean hasiko dira aplikatzen.

11.–LAN OSASUNA

Langile guztiei laneko jantzi berriak emanen zaizkie, lanpostu bakoitzaren arriskuak ebaluatzeko eskakizunen arabera, eta betiere indarreko araudia betez.

12.–APARTEKO ORDUAK

Egindako aparteko orduak hertsiki araututa daude Nafarroako Industria Siderometalurgikoen 2022-2026 aldiko hitzarmen probintzialean edo haren ordezkoan, enpresarena indarrean egonda.

Aparteko orduak ordaintzeko zenbatekoa:

–Aparteko orduak, arruntak: 26,90 euro.

–Larunbatetako aparteko orduak: 29,16 euro.

–Jaiegunetako aparteko orduak: 31,42 euro.

Aparteko orduen zenbatekoak benetako soldaten neurri berean eguneratuko dira, betiere SERVICIOS TÉCNICOS OLABERRÍA, SL enpresan aplikatu beharreko prezioak gainditzen ez badituzte.

2027. urterako, aparteko orduen prezioak SERVICIOS TÉCNICOS OLABERRÍA, SL enpresan aplikatu beharreko prezioekin parekatuko dira.

Langileak aparteko orduen %50 hartzeko aukera izanen du, 1,2 ordu ordu bakoitzeko, hain zuzen ere. Modalitate hori aukeratzen badu, urte osoan iraunen du, eta urtarrilaren 15a baino lehen jakinarazi beharko dio enpresari.

Zenbateko berriak 2025eko urtarrilaren 1era arteko atzeraeraginezko ondorioekin jarriko dira indarrean.

13.–GIZARTE GAIAK

–Enpresako langileen artean euskararen erabilera sustatzeko xedeaz, enpresak hartuko ditu bere gain prestakuntza ikastaroek ekarritako kostuak. Ikastaro horiek lanalditik kanpo jasoko dira.

Enpresak bi hizkuntzatan argitaratuko ditu testu guztiak.

–Kontratazio berriak:

• Laneratzea: espezialistaren soldata eta lanbide-kategoria %85ean.
• 6 hilabetera: espezialistaren soldata eta lanbide-kategoria %100ean.
• Urtera: soldata eta 3. Ofiziala lanbide-kategoria, enpresako soldata-taulen arabera.

–Laneko arropa: Enpresak bere gain hartuko du lan-jantziak garbitzeko kudeaketa eta kostua.

–Enpresak errespetatu eginen dulangileek GH taldeko enpresa desberdinetan metatzen duten antzinatasuna.

–Eszedentziak: Gai honetan, Langileen Estatutuaren 46. artikuluan xedatutakoa beteko da, eta, arau osagarri gisa, Nafarroako Industria Siderometalurgikoaren 2022-2026 aldiko Hitzarmen Probintzial indardunean xedatutakoa.

Salbuespen gisa, enpresako langile finko guztiei aitortuko zaie gutxienez eta gehienez urtebete iraunen duen eszedentzia bat; behin eszedentzia denbora bukatutakoan beren lanpostura edo antzeko batera automatikoki itzultzeko eskubidea izanen dute.

–Antzinatasuna: Antzinatasunaren balioa Nafarroako metalaren 2022-2026 aldiko hitzarmeneko soldata-taulen arabera eguneratuko da, enpresa-hitzarmen honek egiazko soldatei aplikatzen dien ehuneko berean.

14.–LANBIDE KATEGORIAK

Enpresak langile guztien ebaluazioa eginen du 2 urtean behin, eta ebaluazio horren ondoriozko kategoria-aldaketak enpresako lanpostuak baloratzeko sistemaren irizpideari jarraituz eginen dira.

15.–LIZENTZIAK

Nafarroako Industria Siderometalurgikoen 2022-2026 aldirako Hitzarmen Kolektibo Probintzialaren 37. eta 38. artikuluek ezartzen dutenaren arabera arautuko dira.

16.–BATZARRAK

Enpresak baimena emanen du batzar ordainduak egiteko lanorduen barnean zein kanpoan, gehienez 8 batzar eta 4 ordu urtean. Ordu horiek itunak irauten duen bitartean metatu ahal izanen dira.

Batzarrerako deialdia gutxienez 48 ordu lehenago jakinaraziko zaio Enpresako Zuzendaritzari, eta bertan agertuko dira batzarraren data eta gai-zerrenda.

17.–MALGUTASUNA

Enpresak konpromisoa hartzen du, ordu gehiago edo gutxiago behar direnean: borondatezko langileekin. Behar hori ez bada horrela betetzen, eta orduan bakarrik, erabiliko du enpresak lege prozedura.

Halere, lanaldiaren banaketa irregularrean erabilitako orduak urte natural bateko epean hartu edo berreskuratzen ahalko dira, erabiltzen direnetik hasita kontatuta.

18.–MUGIKORTASUNA

Behar izanez gero, Nafarroako Industria Siderometalurgikoaren 2022-2026 aldiko Hitzarmenaren IV. kapituluan edo Langileen Estatutuan ezarritakoa aplikatuko da.

19.–AZKEN XEDAPENA

–Hitzarmen honen interpretazioak edo aplikazioak eragindako gatazkak Nafarroako lan gatazkak konpontzeko Auzitegiaren esku utziko dira.

–Enpresa-hitzarmen honetan xedatu ez den guztirako, Nafarroako Industria Siderometalurgikoen Hitzarmen Kolektiboan xedatutakoa aplikatuko da, edo, enpresa-hitzarmen hau indarrean egonik, hura ordeztu dezakeena, goragoko mailako arauen bidez araututa daudenak izan ezik. Hitzarmen horretan ezarritako baldintzak ez dira inola ere izanen 2023-2026 urteetarako Gipuzkoako industria siderometalurgikoen probintziako hitzarmen kolektiboan ezarritakoak baino txikiagoak.

20.–BATZORDE PAREKIDEA

Batzorde parekide bat eratuko da, hitzarmenaren sinatzaileek osatua; gehienez ere 6 kide izanen ditu, 3 langileen aldetik eta 3 enpresaren aldetik.

Batzordeak eskumen hauek izanen ditu:

–Hitzarmen kolektibo honetako arauak interpretatzea.

–Hitzarmen honetako konpromisoak garatzea.

Batzordearen bi aldeetako edozeinek biltzeko eskatuta, gehienez ere 15 eguneko epean bilduko da.

Dituen eskumenen ondorioz, edozein alderen hirutik batek eskatuz gero bilduko da batzorde paritarioa.

Batzorde parekidean dagoen sindikatuen ordezkaritzak bi aholkulariren laguntza izaten ahal du gehienez, bai eta enpresa-ordezkaritzak ere. Aholkulariak hitza izanen dute, baina botorik ez.

Batzorde parekidearen akordioek balioa izateko, ordezkaritza bakoitzaren botoen %51ren babesa izan beharko dute.

Erabakiak ebazteko edo hartzeko epea:

Batzorde parekidearen baitan sortzen diren desadostasunak konpontzeko, Nafarroako Foru Komunitateko lan gatazkak konpontzeko epaitegiz kanpoko prozedurei buruzko lanbidearteko Akordioan araututako bitartekaritza prozeduretara joko da (Nafarroako Aldizkari Ofiziala, 15. zk., 2014ko urtarrilaren 23koa), 15 egun naturaleko epean.

21.–HITZARMENEAN ITUNDUTAKO BALDINTZAK EZ APLIKATZEA HITZARMENA EZ BETETZEA

Enpresak ez du hitzarmen hau aplikatu gabe utzi LEren 82.3 artikuluan eta LEren 41.1 artikuluko a) eta d) apartatuetan aipatutako prozeduraren bitartez. Horren ordez, berriro negoziatzen saiatu beharko du, hitzarmena iraungi baino lehen beste hitzarmen bat lortzeko, edo indarrean dagoena berrikusteko, LEren 86.1 artikuluak aurreikusitakoari jarraikiz.

Enpresak 82.3 artikulua eta/edo Langileen Estatutuaren 41.1 artikuluko a) eta d) apartatuak ez aplikatzea planteatzen badu, prozedura honi jarraituko zaio:

1.–Enpresaren Zuzendaritzak kontsultaldi bat irekiko du langileen legezko ordezkariekin, 15 egunekoa; bertan enpresaren erabakia zerk ekarri duen aztertuko da, bai eta eragin horiek galarazteko edo murrizteko aukerarik dagoen eta zer neurri hartu behar den ere ukitutako langileen ondorioak apaltzeko.

Kontsultaldia indarrean den bitartean, alderdiek fede onez negoziatu beharko dute, akordio bat lortzea helburu. Akordio horretarako, beharrezkoa izanen da batzordeko langileen ordezkari gehienen adostasuna. Enpresaren eta langileen ordezkaritzaren artean ezarritako kontsulta aldian garatzen diren negoziazioetan akordiorik izanez gero, idatzi egin beharko da.

2.–Kontsulta aldia akiturik adostasunik ez bada, zeinahi aldek jar dezake desadostasuna hitzarmenaren Batzorde Paritarioaren menpe, eta horrek, gehienez ere, zazpi eguneko epea izanen du erabakitzeko, desadostasuna batzordeari planteatzen zaionetik.

3.–Batzorde parekidean ere adostasunik ez badago, edo desadostasuna organo horretara eraman ez bada, aldeetako edozeinek jo dezake lan gatazkak konpontzeko epaitegiz kanpoko prozedurei buruzko lanbidearteko Akordioetan araututako bitartekaritza prozedurara desadostasuna konpontzeko, eta beste aldea beharturik egonen da bitartekaritza prozedura horretan parte izatera, baina alde bakoitzak askatasuna izanen du horretarako izendatutako bitartekariak emandako proposamena onartzeko edo ez.

Ekonomia, teknika, antolaketa edo produkzio arloko arrazoiak direla eta, enpresak hitzarmen kolektibo hau aldi batez ez aplikatzea nahi badu, langileen ordezkariekin akordiorik lortzen ez bada eta aplikatzekoak diren lanbidearteko akordioetako gatazkak konpontzeko prozedurek desadostasuna ebazten ez badute, bi aldeen arteko akordioa beharko da (enpresaren ordezkaritza eta langileen ordezkaritzaren gehiengoa) aplikazio ezaren gaineko desadostasuna Hitzarmen Kolektiboetarako Aholku Batzorde Nazionalaren edo ORPREICCEren menpe jartzeko.

Hiru aletan sinatu da, Altsasun, 2025eko ekainaren 20an.

Enpresaren izenean:

Jose Antonio Guerra Altuna.

Ainara Iguiñiz Aracama.

LLO REPARAGRÚA, SL:

Urko Gartzia Aleman.

Asier Hernández Luaces.

Iragarkiaren kodea: F2515227