1. NAFARROAKO FORU KOMUNITATEA
1.7. BESTELAKOAK
2666/2025 EBAZPENA, abenduaren 9koa, Nafarroako Unibertsitate Publikoko errektoreak emana. Haren bidez agintzen da argitaratzeko "Erabakia, Nafarroako Unibertsitate Publikoko graduko eta unibertsitate masterreko titulu ofizialak eta ikasketa-planak ezartzeko eta iraungitzeko prozeduren arauak aldatzen dituena".
2003ko maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan eskumenak erabiliz, Gobernu Kontseiluak 2025eko abenduaren 9an hartutako erabakia argitaratzeko agintzen dut. Erabaki horren bidez, Nafarroako Unibertsitate Publikoko graduko eta unibertsitate masterreko titulu ofizialak eta ikasketa-planak ezartzeko eta iraungitzeko prozeduren arauak aldatzen dira.
"ERABAKIA, NAFARROAKO UNIBERTSITATE PUBLIKOKO GRADUKO ETA UNIBERTSITATE MASTERREKO TITULU OFIZIALAK ETA IKASKETA-PLANAK EZARTZEKO ETA IRAUNGITZEKO PROZEDUREN ARAUAK ALDATZEN DITUENA.
Gobernu Kontseiluaren 2022ko ekainaren 7ko erabaki baten bidez, Nafarroako Unibertsitate Publikoak graduko eta unibertsitate masterreko titulu ofizialak eta ikasketa-planak ezartzeko eta iraungitzeko prozeduren arauak onetsi zituen. Lege eta dekretu hauetan ezarritakoa garatzearren hartu zen erabaki hori: alde batetik, Unibertsitateei buruzko 6/2001 Lege Organikoa, 2001eko abenduaren 21ekoa, une horretan indarrean zegoena, eta, bestetik, 822/2021 Errege Dekretua, 2021eko irailaren 28koa, Unibertsitateko ikasketen antolamendua eta haien kalitatea bermatzeko prozedura ezartzen dituena.
Erabakiak, halaber, hiru helburu nagusi zituen: Nafarroako Unibertsitate Publikoan tituluak ezartzeko eta iraungitzeko prozesuak egokitzeko jarraibideak ezartzea; ikasketa-plan bat iraungitzeko prozesua arautzea, plan hori hasia duten ikasleen eta hura ematen duten irakasleen eskubideak bermatuz; eta, hala badagokio, ikasleen espediente akademikoak iraungitzen den ikasketa-planetik hura ordezten duen ikasketa-planera egokitzeko prozedurak ezartzea.
Hain zuzen ere, IV. kapituluan arautzen da ikasketa batzuk iraungitzeko prozesuan sartzen direnean nola egokitu behar diren ikasketa-planak, eta 21. artikuluak argi eta garbi deskribatzen du zertan datzan egokitzapen prozesu hori.
Horren ondoren etorritako jardunbide administratiboak agerian utzi du beharrezkoa dela prozedura horren erregulazioa zabaltzea, prozedura bera zabaltzearren, ez soilik ikasketa-planen iraungitzea dela-eta egokitzapena egin behar den kasuetara, baizik eta baita ikasleek titulu bikoitzak edo nazioarteko programak bertan behera uzten dituzten edo haietatik kanporatuak diren kasuetara ere.
Era berean, beharrezkoa da egokitzapenaren oinarrizko arauen erregulazioa zabaltzea. Egungo erregulazioan jatorrizko espedientean gaindituak dauden irakasgaiak egokitzeko prozesua baino ez da deskribatzen. Hala ere, ikasketa-plan bat egokitzeak ez die bakarrik jatorrizko espedientean gaindituak dauden irakasgaiei eragiten, baizik eta baita gainditu ez direnei ere. Modu horretan, espediente berriak jaso beharko du jatorrizko espedienteko gainditu gabeko irakasgai bakoitza zenbat aldiz matrikulatu den eta zenbat deialdi kontsumitu dituen ikasleak.
Erabakia hartu aurretik, Nafarroako Unibertsitate Publikoko Ikasketa Batzordeak aztertu du arau hau, 2025eko azaroaren 27an egindako bileran.
Honako hau da Gobernu Kontseiluak, Irakaskuntzako errektoreordeak proposaturik, bere kideek aldez aurretik eztabaida eginda, 2025eko abenduaren 9an egindako bileran, hartu duen
ERABAKIA
Lehenbizikoa.–Aldatzea Nafarroako Unibertsitate Publikoko graduko eta unibertsitate masterreko titulu ofizialak eta ikasketa-planak ezartzeko eta iraungitzeko prozeduren arauak, erabaki honen eranskinean azaltzen den moduan.
Bigarrena.–Erabaki hau helaraztea Irakaskuntzako errektoreordeari, Ikasleen Gaietarako, Unibertsitateko Bizitzako eta Konpromiso Sozialeko errektoreordeari, ikastegi eta sailetako zuzendariei eta Irakaskuntza Zerbitzuko zuzendariari. Erabaki hau Unibertsitatearen iragarki ohol elektronikoan argitaratzea.
Hirugarrena.–Agindua ematea erabaki hau Nafarroako Aldizkari Ofizialean argitaratzeko.
Laugarrena.–Nafarroako Aldizkari Ofizialean argitaratu eta biharamunean hartuko du indarra erabaki honek.
Bosgarrena.–Unibertsitate Sistemari buruzko 2/2023 Lege Organikoaren 38.4 artikuluak eta Unibertsitatearen Estatutuen 144.1 artikuluak ezarritakoaren arabera, erabaki honek administrazio bidea agortzen du. Erabaki honen aurka, interesdunek aukerako berraztertzeko errekurtsoa jartzen ahalko dute, Gobernu Kontseiluaren aurrean, hilabeteko epean, edo administrazioarekiko auzi-errekurtsoa Nafarroako Justizia Auzitegi Nagusiko administrazioarekiko auzien epaitegietan, zuzenean, bi hilabeteko epean. Bi errekurtsoetarako epeak erabaki hau Nafarroako Aldizkari Ofizialean argitaratu eta biharamunetik aurrera kontatuko dira.
Iruñean, 2025eko abenduaren 9an.–Errektorea, Ramón Gonzalo García.
I. ERANSKINA.–NAFARROAKO UNIBERTSITATE PUBLIKOKO GRADUKO ETA UNIBERTSITATE MASTERREKO TITULU OFIZIALAK ETA IKASKETA-PLANAK EZARTZEKO ETA IRAUNGITZEKO PROZEDUREN ARAUAK ALDATZEN DITUEN ERABAKIAREN PROPOSAMENA
1. Honela dioen tokian:
IV. kapitulua. "Iraungitze bidean diren ikasketa-planetako ikasleen espedienteak egokitzea".
Honela esan behar du:
IV. kapitulua. "Espedienteen egokitzapena: iraungitze bidean diren ikasketa-planetako ikasleen espedienteak eta programa espezifikoetako ikasketak bertan behera utzi edo haietatik kanporatuak izan diren ikasleen espedienteak".
2. 18. artikuluari ("Aplikazio eremua") bigarren paragrafo bat gehitzea, honela dioena hitzez hitz:
"Titulazio bikoitzak edo nazioarteko programak bertan behera uzten dituzten edo haietatik kanporatuak diren ikasleen espedienteetan ere aplikatuko dira".
3. 20. artikuluari ("Egokitzapenaren oinarrizko arauak") 7. apartatua gehitzea.
"Baldin eta jatorrizko espedientea iraungitze bidean badago, edo ikaslea jatorrizko ikasketak bertan behera utzi baditu edo haietatik kanporatua izan bada, beharrezkoa izanen da espediente horretan gainditu ez diren eta 1. apartatuan aipatzen den egokitzapen taulan agertzen diren ikasgaiei buruz informazio hau adieraztea: irakasgai bakoitza zenbat aldiz matrikulatu den eta zenbat deialdi kontsumitu dituen ikasleak".
Iragarkiaren kodea: F2516109
