1. NAFARROAKO FORU KOMUNITATEA
1.7. BESTELAKOAK
61E/2025 EBAZPENA, azaroaren 24koa, Nekazaritza Zerbitzuko zuzendariak emana, Nekazaritza eta Abeltzaintzako zuzendari nagusiak eskuordetuta, zeinaren bidez Javier Gómez Suescun jauna prestakuntza-entitate izendatzen baita, produktu fitosanitarioak manipulatzeko berritze-ikastaroak (oinarrizko maila eta maila kualifikatua) emateko.
Javier Gómez Suescun jaunak (IFZa: ***4706**) prestakuntza-entitate izateko homologazioa eskatu du, produktu fitosanitarioak manipulatzeko berritze-ikastaroak (oinarrizko maila eta maila kualifikatua) emateko. Ikastaro horiek jasota daude irailaren 14ko 1311/2012 Errege Dekretuan, produktu fitosanitarioen erabilera jasangarria lortzeko jarduketa-esparrua ezartzen duen horretan.
Ikastaro horrek betetzen du Nafarroan honako hauen bidez araututakoa: 75/2006 Foru Agindua, martxoaren 6koa, Nekazaritza, Abeltzaintza eta Ingurumeneko kontseilariak emana, Nafarroako Foru Komunitatean fitosanitarioak erabiltzeko gaitasun-txartela emateko prozedura arautzen duena, eta 76/2013 Ebazpena, otsailaren 1ekoa, Nekazaritza eta Abeltzaintzako zuzendari nagusiak emana, adostasuna ematen duena fitosanitarioak aplikatzeko gaitasuna ematen duen prestakuntza Fitosanitarioen erabilera jasangarriari buruzko 128/2009 Zuzentaraura egokitzeko.
Aipatu entitateak aurkeztu dituen agiriak aztertuta, zuzendu beharreko zenbait akats daudela egiaztatu da.
2025eko azaroaren 11n, enpresari agiriak zuzentzeko errekerimendua jakinarazi zitzaion, eta ohartarazi ezen, eskatutako agiriak epe barruan aurkeztu ezean, eskaeran atzera egiten duela ulertuko dela, Herri-administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 71.1 artikuluarekin bat.
Eskatzaileak erregistroaren bidez aurkeztu ditu errekeritutako agiriak (erregistroko sarrera-zenbakiak: 2025/1531379 eta 2025/1558867), eta egiaztatu da agiriak zuzenak direla eta ezarritako beharkizunak betetzen dituztela.
Azaroaren 15eko 255/2023 Foru Dekretuaren bidez, Landa Garapeneko eta Ingurumeneko Departamentuaren egitura organikoa ezarri zen. Foru dekretu horretan ezartzen dira nekazaritzako ekoizpen-bideak kontrolatzeko eskudantziak elikagaien segurtasunaren eta landareen osasuna kontrolatzearen esparruan, eta, Nekazaritza Zerbitzuan, Landareen Ekoizpen eta Osasun Atalak ditu eskudantzia horiek, eta indarra duten xedapenek esleitzen dizkioten beste batzuk, baita atal horri bere jardueraren eremuan agintzen zaizkionak ere.
Ikusirik Landareen Ekoizpen eta Osasun Atalak emandako txostena, eta honako hauek ematen dizkidaten eskumenak erabiliz: 11/2019 Foru Legea, martxoaren 11koa, Nafarroako Foru Komunitateko Administrazioari eta foru-sektore publiko instituzionalari buruzkoa (32. artikulua), 255/2023 Foru Dekretua, azaroaren 15ekoa, Landa Garapeneko eta Ingurumeneko Departamentuaren egitura organikoa onesten duena, eta 247E/2023 Ebazpena, abenduaren 27koa, zeinaren bidez Nekazaritza eta Abeltzaintzako zuzendari nagusiak zenbait eskumen administratibo eskuordetzan ematen baitizkio Nekazaritza Zerbitzuko zuzendariari.
EBAZTEN DUT:
1. Javier Gómez Suescun jauna (IFZa: ***4706**) prestakuntza-entitate baimendu izendatzea, produktu fitosanitarioak manipulatzeko berritze-ikastaroak (oinarrizko maila eta maila kualifikatua) emateko, sistema presentzialaren bidez. Honako baldintza hauek bete beharko ditu:
–Ikastaroaren edizio guztietan, errespetatu eginen dira aurkezturiko agirietan jasotako programa, eskola-orduak, irakasleak, edukia eta kontrolak.
–Gutxienez ere, hamabost egun lehenago eman beharko zaio ikastaroaren edizio bakoitzaren berri Landa Garapeneko eta Ingurumeneko Departamentuari, eta zer irakaslek diharduten adierazi, baita landa-praktikak non, zer egun eta ordutan eta zer baliabiderekin eginen diren eta azken azterketa non, noiz eta zein ordutan eginen den ere.
–Ikastaroa amaitu eta hilabeteko epean, beranduenez, departamentu honi txosten bat aurkeztu beharko zaio emandako ikastaroaren emaitzak jakinarazteko.
–Ikastaroa behar den aprobetxamenduz bukatzen duen ikasle bakoitzari egoera hori egiaztatzen duen ziurtagiria eman beharko zaio.
–Ikasleen jarduerari jarraipena egiten dion erregistro informatikoa, ebaluatzeko baliatzen diren ariketen gaineko dokumentazioa eta ikastaroan sortzen den beste edozein dokumentazio gorde egin beharko dira, eta Landa Garapeneko eta Ingurumeneko Departamentuaren eskura egonen dira, ikastaroa egin eta urtebetez, gutxienez ere.
–Dokumentazioa eta ikastaroan erabiltzen den gainerako material lagungarria, baita prestakuntza bera ere, eguneratuta eduki beharko dira edizio bakoitzean, eta, behar izanez gero, zuzendu, Landa Garapeneko eta Ingurumeneko Departamentuak ematen dituen jarraibideen arabera.
–Eskaeran aurkeztutako informazioan edozein aldaketa eginez gero, Landa Garapeneko eta Ingurumeneko Departamentuari jakinarazi beharko zaio, ikastaroaren hurrengo edizioa egin baino hamabost egun lehenago, beranduenez.
2. Ebazpen hau interesdunari jakinaraztea, behar diren ondorioak izan ditzan, eta Nafarroako Aldizkari Ofizialean argitaratzea.
3. Ebazpen honen aurka gora jotzeko errekurtsoa jar daiteke, Nafarroako Gobernuko Landa Garapeneko eta Ingurumeneko kontseilariari zuzendua, jakinarazi eta biharamunetik hilabeteko epean.
Iruñean, 2025eko azaroaren 24an.–Nekazaritza Zerbitzuko zuzendaria, Rubén Palacios Goñi.
Iragarkiaren kodea: F2515391
