248. ALDIZKARIA - 2025eko abenduaren 15a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

47E/2025 EBAZPENA, azaroaren 21ekoa, Merkataritza eta Kontsumoko zuzendari nagusiak emana, zeinaren bidez onesten baita artisautza enpresen elkarteentzako dirulaguntzen deialdia, Nafarroako artisautza sektorea sustatze aldera. Dirulaguntzen Datu Base Nazionalaren identifikazioa: 870342.

250/2023 Foru Dekretuaren bidez, Industriako eta Enpresen Trantsizio Ekologiko eta Digitalerako Departamentuaren egitura organikoa ezartzen da, eta 42. artikuluan zehazten da Merkataritza eta Kontsumo Zuzendaritza Nagusiari dagokiola artisautza antolatzea eta sustatzea.

Foru dekretu horren 44.m) artikuluaren arabera, Merkataritza Antolatu eta Sustatzeko Zerbitzuari dagokio merkataritzaren eta artisautzaren arloko laguntza eta dirulaguntza publikoen deialdiak eta horiek nola eman planifikatu, kudeatu eta gainbegiratzea.

Bestalde, Hurbileko Txikizkako Merkataritza Bultzatzeko Planak (2022-2025) –gaur egun ebaluatze eta emaitzen aztertze fasean da– eta Nafarroako Turismoaren Plan Estrategikoak (2018-2025) Nafarroan artisautza sustatzeko neurriak jasotzen dituzte, zehazki, jarduera turistikoa eta landa-merkataritza sustatzea, horrela lurraldean oinarritutako artisautzaren garapena zeharka babesten baita, bereziki eremu turistikoetan.

Horregatik guztiagatik, Merkataritza eta Kontsumo Zuzendaritza Nagusiak egokitzat jotzen du artisautza sektoreko enpresen elkarteak babesten segitzea, eta Nafarroako artisautza enpresen Erregistroan inskribatutako enpresek artisautza-produktuen banaketa komertziala sustatzeko, artisautzaren sorkuntza, ekoizpena eta banaketa sustatzen duten ekitaldi ekonomikoen antolaketa sustatuz.

Deialdi honetan araututako dirulaguntzak norgehiagokako araubideari jarraikiz emanen dira, eta, hortaz, ezarritako baremoaren aplikazioak zehaztuko du dirulaguntzak emateko hurrenkera.

Horiek horrela, eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluaren bidez emandako eskumenak erabiliz,

EBAZTEN DUT:

1. Artisautza enpresen elkarteei dirulaguntzak emateko 2026ko deialdia onestea, Nafarroako artisautza sektorea sustatzeko.

2. Deialdiaren oinarri arautzaileak onestea. Ebazpen honen eranskinean jaso dira.

3. 40.000 euroko gastua baimentzea deialdi honen ondoriozko konpromisoak betetzeko. Nafarroako 2026ko Aurrekontu Orokorretako partida honen kargura finantzatuko da: 830001-83100-4819-432104 partida, "Artisautzarako dirulaguntzak. Azokak eta ekitaldiak" izenekoa, baldin eta horretarako kreditu nahikoa eta egokia badago.

4. Ebazpen hau eta eranskina Nafarroako Aldizkari Ofizialean argitaratzea, behar diren ondorioak izan ditzaten.

5. Ebazpen honen aurka gora jotzeko errekurtsoa jartzen ahal da, Industriako eta Enpresen Trantsizio Ekologiko eta Digitalerako kontseilariari zuzendua, argitaratu eta biharamunetik hilabeteko epean.

Iruñean, 2025eko azaroaren 21ean.–Merkataritza eta Kontsumoko zuzendari nagusia, Pablo Ezcurra Fernández.

ERANSKINA

ARTISAUTZA ENPRESEN ELKARTEEI DIRULAGUNTZAK EMATEKO 2026KO DEIALDIA, NAFARROAKO ARTISAUTZA SEKTOREA SUSTATZE ALDERA. OINARRI ARAUTZAILEAK

1. oinarria. Xedea.

Artisautza enpresen elkarteei dirulaguntzak emateko araubidea arautzea da oinarri arautzaile hauen xedea, elkarte horiek artisautza azokak, erakusketak eta sariketak antolatzeko egiten dituzten jarduketei dagokienez.

Deialdiaren helburu nagusia artisautza enpresen elkarteei laguntzea da, Nafarroako Artisautzako Lanbideen Zerrendan sartutako artisautza lanbideren batean egindako produktuak sustatzeko eta merkaturatzeko jarduerak hobetze aldera (zerrenda hori Garapen Ekonomikorako kontseilariaren abenduaren 1eko 89E/2017 Foru Aginduaren bidez onetsi zen).

2. oinarria. Aurrekontuko zuzkidura.

40.000 euroko kreditua baimendu da deialdi honen ondoriozko konpromisoei aurre egiteko.

3. oinarria. Jarduketa diruz lagungarriak egiteko epea.

Jarduketa diruz lagungarriak 2025eko azaroaren 13tik 2026ko azaroaren 13ra bitarte egin behar dira, bi egun horiek barne.

Ondorio horietarako, egin direla ulertuko da arestian adierazitako epean fakturatu, ordaindu eta amaitu badira.

4. oinarria. Entitate onuradunak eta entitate onuradun izatea egiaztatzeko modua.

1. Dirulaguntza eskatzeko unean baldintza orokor hauek betetzen dituzten Nafarroako artisautza enpresen elkarteak izan daitezke onuradun:

1.1. Dirulaguntzei buruzko azaroaren 9ko 11/2005 Foru Legearen 13. artikuluak entitate onuradun izateko ezarritako debeku-egoeretako batean ere ez egotea. Eskabide-orrian ageri den erantzukizunpeko adierazpenaren bidez frogatzen ahal da hori.

Dirulaguntza eskatzeak berekin dakar baimena ematea organo emaileak zuzenean eskura ditzan ziurtagiri telematikoak, frogatzen dutenak entitate eskatzaileak egunean dituela tributu-betebeharrak eta Gizarte Segurantzarekikoak. Interesdunak horri uko egiten badio berariaz eskaeran, berak aurkeztu beharko ditu betebehar horietan egunean dagoela frogatzen duten ziurtagiriak.

1.2. Inolako administrazio zehapen irmorik edo kondena epai irmorik betetzen ez egotea sexu edo genero diskriminaziotzat hartutako lan praktikak egiteagatik edo onartzeagatik, eta, kasua bada, ez egotea arrazoi horiek direla-eta ezarritako epai edo zehapen bat betetzeko zain.

2. Gainera, baldintza espezifiko hau bete beharko dute dirulaguntza eskatzeko unean:

Ordezkaritza izan behar dute Nafarroako Artisautza Aholku Kontseiluan, bat etorriz, batetik, Industria eta Teknologia, Merkataritza, Turismo eta Laneko kontseilariak urriaren 17an emandako 109/2002 Foru Aginduarekin, zeinaren bidez Artisautzaren Aholku Kontseiluko kideak izendatu baitziren, eta, bestetik, Nafarroako artisautza sektorea antolatu eta garatzeari buruzko ekainaren 17ko 188/1988 Foru Dekretuarekin.

Beharkizun hori betetzen dela Nafarroako Artisautza Aholku Kontseiluko idazkariak egiaztatuko du, deialdiaren organo kudeatzaileak hala eskatuta.

5. oinarria. Jarduketa diruz lagungarriak eta gastu diruz lagungarriak.

1. Diruz lagungarritzat jotzen da honako baldintza hauek betetzen dituzten artisautza azoken antolaketa:

–Nafarroako toki erakunderen batean egitea.

–Gutxienez 10 enpresa erakusketarik parte hartzea.

–Parte hartzen duten enpresek baldintza hauek bete beharko dituzte:

  • Artisautza erregistro ofizial batean aitorturik eta izena emanda egotea, eta kasuan kasuko egiaztagiria indarrean edukitzea.
  • Egunean izatea Gizarte Segurantzarekiko betebeharrak.
  • Alta hartuta egotea Langile Autonomoen Araubide Berezian edo Gizarte Segurantzako Araubide Orokorrean; elkarte antolatzaileak eska litzakeen hileko ordainagiriak aurkeztu beharko dira, kasuan-kasuan.

–Nafarroako Artisautza Enpresen Erregistroan izena emanda dauden enpresei gorde beharko zaie azokan erabilgarri dauden tokien %40 gutxienez. Salbuespen gisa, entitate antolatzaileak ehuneko txikiagoa onartzen ahalko du, behar bezala justifikatzen badu.

–Dibertsitatea eta aniztasuna sustatu beharko dira parte hartzen duten artisautza lanbideen artean.

–Honako hauek izanen dira parte hartuko duten artisautza lanbideak: ondasun artistikoak eta elikagaiez besteko kontsumo ondasunak sortu, ekoitzi, eraldatu, konpondu eta zaharberritzeko artisautza jarduera bat egiten duten enpresek gauzatzen dituztenak.

–Azokak bi egun iraun beharko du gutxienez. Goiz eta arratsalde hartuko da egun oso gisa, eta goiz edo arratsalde egun erdi gisa.

–Elkarte antolatzaileak azokari buruzko informazioa zabaldu eta bidali beharko die Nafarroako Artisautza Enpresen Erregistroan inskribatuta dauden enpresa guztiei. Baldintza hori egiaztatu egin beharko da diruz lagundutako jarduerak egin direla justifikatzeko unean.

–Elkarte antolatzaileak inkesta bat eman beharko die azokan parte hartzen duten enpresei, haien balorazioaren berri edukitzeko.

–Elkarte antolatzaileak jarduketa egitean indarrean dauden segurtasuneko araudi, protokolo eta osasun neurri guztiak bete beharko ditu.

–Azokan parte hartuko duten enpresak aukeratzeko, objektibotasuna eta gardentasuna izanen dira irizpide, eta hori horrela, produktuen kalitatea, erakustokiaren itxura, eskarmentua, lan-ibilbidea eta antzeko beste alderdi batzuk baloratu ahal izanen dira.

–Azokan parte hartzen duten enpresek aitortuta dauden artisau-lanbideari dagozkion produktuekin bakarrik joaten ahalko dira. Salbuespen gisa, eta elkarte antolatzaileak erabakita, erakusketaren zati bat, betiere osagarri gisa eta bigarren mailako izaerarekin, osatuta egon daiteke enpresa horiek aitortuta dauden artisau-lanbiderako espezifikoak eta beharrezkoak diren materialez edo lehengaiez egindako beste produktu batzuekin.

2. Gastu diruz lagungarriak.

Diruz lagungarriak dira ezinbesteko kanpo gastuak, zuzeneko lotura dutenak artisautza azokak antolatzeko behar diren ekintzekin.

Halakotzat hartuko dira antolaketari, muntaketari, komunikazioari edo publizitateari dagozkien gastuak, eta, zehazki, honako hauek:

–Azokaren antolaketari, koordinazioari eta informazioaren berri emateari lotutako gastuak, parte hartzen duten enpresak hautatzekoak eta azoka garatzeko administrazio publikoekin zein entitate pribatuekin egin beharreko jarduketa guztien kontratazio-lanek eragindako gastuak. Gastu mota honen kontura onartuko da, gehienez ere, aurkeztu eta gauzatutako azken gastuaren %20, gainerako kontzeptu diruz lagungarrien gainetik, eta ez da goranzko desbideratzerik onartuko hasieran aurkeztuko aurrekontuaren eta azkenean gauzatutakoaren artean gastu mota honetan.

–Komunikazio, hedapen eta publizitate gastuak, sustapen materialen diseinua barne.

–Azokaren dinamizazioa, parte hartzeko lantegiak, erakustaldiak, musika animazioa eta abar.

–Beharrezko instalazioak alokatzea, eta horiek muntatu eta desmuntatzea.

–Bide publikoa okupatzeagatik ordaindu beharreko tasak, edo bakarrik azoka egiteko beharrezko diren beste batzuk.

–Elektrizitate kontsumoa.

–Azokak hartzen duen eremuaren garbiketa-lanak.

–Segurtasuna instalazioetan.

–Erakustoki, saltoki edo standetan erabilitako olana, eguzki-oihal, binilo edo antzekoak inprimatu eta errotulatzeko gastuak; zehazki, diseinuari, ekoizpenari eta inprimatze prozesuei edo antzekoei dagozkien gastuak onartuko dira, bai eta lan horiek egiteko euskarria edo materiala erostekoak ere.

–Instalazioak zaintzeko eta mantentzeko lanak.

–Azoketarako beharrezkoak eta esklusiboak diren aseguruak kontratatzea.

–Balio erantsiaren gaineko zerga, entitate onuradunak berreskuratu edo konpentsatu ezin duenean soilik.

3. Diruz lagungarriak ez diren gastuak.

Honako gastu hauek ez dira diruz lagungarriak:

Entitate antolatzaileko langile berekiei dagozkien gastuak eta entitate eskatzailearen ohiko funtzionamenduak eragindakoak (fotokopiak, posta, telefonoa, bulegoko materiala eta abar).

–Sariak eta zozketak.

–Otorduak, aperitiboak edo antzekoak.

–Boluntarioekin lotutako gastuak.

–Ekitaldi instituzionalekin lotutako gastuak.

–Ekitaldira gonbidatutako pertsonen gastuak, salbu ekitaldiaren jarduera, lantegi edo erakustaldi baterako gonbidatzen badira.

–Opariak.

–Entitate antolatzaileari lotutako enpresen edo pertsonen bidez egindako gastuak, 8. oinarrian ezarritakoaren arabera berariaz onargarriak direnak salbu.

–Higiezinen edo lokalen amortizatze eta mantentze lanen gastuak.

–Gestoria-gastuak edo beste edozein motatakoak, azoka egiteko espezifikoak eta beharrezkoak ez direnak.

4. Gastu diruz lagungarriaren zenbatekoa 12.000 eurotik gorakoa bada (aholkularitzako edo laguntzako enpresek ekipamendu ondasunen hornidura edo zerbitzu emate bat egiten duten kasuetan), eskatzaileak frogatu beharko du hornitzailea efizientzia eta ekonomia irizpideei jarraituz aukeratu dela. Horretarako, gutxienez hiru eskaintza aurkeztu, eta aukeratutako eskaintzaren hautaketa justifikatu beharko du eskaera-orriko "Hornitzailea aukeratzeko justifikazioa" atalean.

Eskatzaileak ez dira beharturik egonen hiru eskaintzak aurkeztera, baldin eta gastu diruz lagungarrien ezaugarri bereziengatik merkatuan behar adina hornitzaile edo zerbitzu-emaile ez badaude edo dirulaguntza eskatu baino lehen egin bada gastua. Nolanahi ere, alderdi horiek eskaera-orrian dagokion atalean justifikatu beharko dituzte.

Eskaintza merkeena hautatzen ez bada, eta, laguntza kudeatzen duen organoaren ustez, justifikazioa nahikoa ez bada, eskaintza merkeenaren zenbatekoa baizik ez da diruz lagunduko.

6. oinarria. Dirulaguntzaren zenbatekoa.

Dirulaguntzaren zenbatekoa kalkulatzeko, gastu diruz lagungarrien zenbatekoari %75 aplikatuko zaio.

Dirulaguntzaren muga 30.000 eurokoa da artisautza azoka bakoitzeko.

7. oinarria. Eskaerak aurkezteko epea eta modua.

1. Eskaerak aurkezteko epea.

Eskaerak 2026ko martxoan aurkeztuko dira.

2. Eskaerak aurkezteko modua.

Eskaerak nahitaez telematika bidez aurkeztuko dira, Nafarroako Gobernuaren Interneteko atariaren zerbitzuen katalogoko fitxa erabiliz: https://www.navarra.es/eu/tramiteak/on/-/line/dirulaguntzak-artisau-enpresen-elkarteentzat-nafarroan-artisau-sektorea-sustatzeko?pageBackId=7568297, aurrerantzean, laguntzaren fitxa.

3. Eskaerak laguntzaren fitxan ageri den inprimakia erabiliz eginen dira, eta Merkataritza eta Kontsumo Zuzendaritza Nagusiari zuzenduko zaizkio.

4. Entitate eskatzaile bakoitzak eskaera bat bakarra aurkeztuko du, dirulaguntza eskatzen den azoka guztien multzorako.

5. Eskabide telematikoari (laguntzaren fitxan ageri diren ereduen araberakoa betiere) erantsi behar zaion dokumentazioa agiri bereizietan eskaneatua aurkeztu behar da, eta behar bezala identifikatua. Hauxe da:

5.1. Entitate eskatzailearen gaineko dokumentazioa.

a) Adierazpen bat, frogatzeko betetzen direla 4. oinarrian eskatutako betebehar orokorrak.

b) Erantzukizunpeko adierazpen bat, jasotako beste dirulaguntza batzuei eta "de minimis" laguntzei buruzkoa (15. oinarrian aipatzen dira).

Eskaera-orriak bi erantzukizunpeko adierazpen horiek ditu.

5.2. Eskatutako dirulaguntzaren xede den azoka bakoitzari buruzko dokumentazioa:

a) Memoria xehatua, honako atal hauei buruzko informazioa jasoko duena:

–Azokaren datak, iraupena, ordutegia, kokapena eta izena.

–Jardueren programa eta dinamizazio jarduketen deskribapena.

–Komunikazio eta sustapen plana.

–Azokan parte hartzeko oinarriak.

–Informazio xehatua, baremoaren 1., 2. eta 3. balorazio irizpideak aplikatu ahal izateko.

b) Aurrekontu xehatua, diru-sarrerak eta gastuak zehatz-mehatz deskribatuta.

Aurreikusitako gastuak: aurrekontuak edo proforma fakturak aurkeztu beharko dira, egin beharreko jarduketenak; ez dira inoiz onartuko eskatzailearen uste edo balorazioetan oinarritzen diren gastu zenbatespenak.

Aurreikusitako diru-sarrerak: azokaren diru-sarreren eta finantzaketaren aurreikuspena aurkeztu beharko da.

c) Hala badagokio, toki erakundearen ziurtagiria, baremoko 4. irizpidea aplikatzeko behar dena.

6. Baremoko balorazio irizpideak aplikatzeko dokumentazioa.

Bederatzigarren oinarrian ezarritako balorazio irizpideak aplikatzen direla justifikatzeko egiaztagiriak zehaztuta daude oinarri horretan, eta nahitaez aurkeztu beharko dira dirulaguntza eskaerarekin batera; egiaztagiri horiek eskaerak aurkezteko epetik kanpo aurkezten badira ez dira baloratuko.

7. Eskaerak betebehar horiek betetzen ez baditu edo osorik ez badago, eskatzaileari eskatuko zaio 10 egun balioduneko epean zuzentzeko, eta ohartaraziko zaio ezen, hala egin ezean, eskaera bertan behera uzten duela ulertuko dela eta espedientea artxibatzeko ebazpena emanen dela.

8. oinarria. Azpikontratazioa eta lotura duten enpresekiko harremana.

1. Dirulaguntzaren xedeko gastuaren zenbatekoaren erdia, gehienez, azpikontratatuta egin daiteke. Ondorio horietarako, ulertuko da azpikontratazioa egiten dela entitate onuradun batek beste batzuekin ituntzen duenean diruz lagundutako jarduketa osoa edo haren zati bat gauzatzea, nahiz eta berak egiten ahal dituen jarduerak izan, horretarako baliabideak dituelako.

Ezin izanen dira inola ere azpikontratatu diruz lagundutako jardueraren kostua garestitzen duten jarduerak, haren edukiari baliorik eransten ez badiote.

2. Ez da inola ere onartuko entitate onuradunak itunak egitea diruz lagundutako jardueren exekuzioa uzteko, osorik edo partez, berarekin lotura duten pertsonen edo entitateen esku, salbu eta inguruabar hauek gertatzen badira:

–Kontratazioa merkatuko baldintza normaletan egitea. Hori justifikatzeko, beste bi eskaintza aurkeztu beharko dira.

–Aurretik, dirulaguntza ematen duen organoaren baimena lortzea. Horretarako, laguntza eskaeran inguruabar hori adierazi beharko da.

–Azokarako aurreikusitako gastu osoaren %20 ez gainditzea.

–Ez da onartuko kostuak garestitzea industria mozkina aplikatzeagatik edo beste arrazoi batzuengatik.

–Apartatu honetan xedatutakoaren ondorioetarako, "lotutako enpresa" izanen dira Dirulaguntzei buruzko Lege Orokorraren Erregelamenduaren 68.2 artikuluan ezarritako loturaren bat dutenak (erregelamendua uztailaren 21eko 887/2006 Errege Dekretuaren bidez onetsi zen).

Azokako dinamizazio edo erakustaldi jarduketen gastuak salbuesten ahalko dira, baldin eta aldez aurretik horren berri ematen bazaio organo kudeatzaileari eta haren oniritzia jasotzen bada.

9. oinarria. Dirulaguntzak emateko irizpideak.

1. Laguntza hauek norgehiagokako prozeduraren bidez emanen dira. Hartara, aurkeztutako eskaerak konparatuko dira, haien artean lehentasun hurrenkera ezartzeko, oinarri honetan ezarritako balorazio irizpideekin bat.

Laguntzen zenbatekoa kalkulatzeko, balorazio handiena eskuratzen duten eskaerei 6. oinarrian ezarritako laguntza-intentsitatea aplikatuko zaie, aurrekontuan erabilgarri dagoen kreditua agortu arte.

Aurrekontuan behar adina diru ez egoteagatik kontuan hartzen ez diren eskaerak ezetsitzat joko dira.

2. Kreditua ez bada iristen dagokien laguntza osoa emateko, 10 egun balioduneko epea emanen zaie eskatzaileei, jaso beharreko dirulaguntzaren zenbateko txikiagoarekin ados daudela adieraz dezaten eta eskabidea birformulatu ahal izan dezaten, Dirulaguntzei buruzko Foru Legearen 20 bis artikuluan aurreikusitakoaren arabera.

Proposatutako dirulaguntzarekin ados daudela adierazten duten onuradunek dirulaguntza osagarri bat jasotzen ahalko dute, baldin eta aurrekontu-baliabide gehiago sortzen badira azkenean ordaintzen diren dirulaguntza guztien zenbatekoa txikiagoa izateagatik hasieran onartutakoena baino, edo onuradunen batek uko egiteagatik dirulaguntzari. Dirulaguntza horiek noiz ematen diren kontuan hartuta, epe berriak finkatzen ahalko dira diruz lagundutako jarduketa egiteko eta hura justifikatzeko.

Berariaz uko eginez gero, hurrengo eskatzailearengana joko da, lehentasun hurrenkerari jarraikiz.

3. Honako baremo hau aplikatuko da dirulaguntza emateko lehentasun hurrenkera horretan.

a) Balorazio irizpideak.

1. irizpidea: zenbat enpresa erakusketarik parte hartzen duten

Puntuak

20 baino gehiago

12

16 eta 20 artean

8

11 eta 15 artean

4

2. irizpidea: azokaren iraupena

Puntuak

3 egun baino gehiago

12

3 egun

8

2 egun eta erdi

4

3. irizpidea: azoka dinamizatzeko proposamenerako aurrekontua

Puntuak

Azokaren aurrekontu osoaren %10 baino gehiago

6

Azokaren aurrekontu osoaren %5 eta %10 artean

3

Azokaren aurrekontu osoaren %5 baino gutxiago

0

4. irizpidea: toki erakundeen lankidetza azoka egiteko

Puntuak

Azokaren aurrekontuaren %10etik gorako ekarpen ekonomikoa egiteko konpromisoa

5

Azokaren aurrekontuaren %5etik %10era arteko ekarpen ekonomikoa egiteko konpromisoa

3

Ez dago ekarpen ekonomikorik egiteko konpromisorik, baina bai beste alderdi batzuetan lankidetzan aritzeko konpromisoa

1

b) Balorazio irizpideak aplikatzeko aurkeztu behar diren agiriak.

Azokaren memoriaren dokumentuak 1., 2. eta 3. irizpideak aplikatzeko beharrezkoa den informazioa jaso beharko du, eta 4. irizpidea egiaztatzeko, toki erakundeko organo eskudunak emandako ziurtagiri bat aurkeztuko da, honako hauek zehaztu eta egiaztatuko dituena: azokan zertan parte hartuko duen, azokarekin duen konpromiso maila, toki erakundeak azokaren garapena bultzatzeko eginen dituen jarduketak eta azokara bideratuko duen zenbateko ekonomikoa.

c) Puntu berdinketa izanez gero, irizpide hauek aplikatuko dira bata bestearen atzetik:

–Azoka eginen den eguna, lehenengo egiten direnei lehentasuna emanez.

–Entitate eskatzaileari lotutako enpresen kopurua, lehentasuna emanez halako enpresa gehien dituenari, betiere deialdia Nafarroako Aldizkari Ofizialean argitaratzen den egunean Nafarroako Artisautza Enpresen Erregistroan behar bezala izena emanda badaude. Horretarako, beharrezkoa izanez gero, lotutako enpresen kopuruari buruzko erantzukizunpeko adierazpena eskatuko da, eta enpresa horien guztien zerrenda.

d) Baimendutako kreditua aski bada ezarritako baldintzak betetzen dituzten eskaera guztiei erantzuteko, ez da beharrezkoa izanen eskaeren artean lehentasuna ezartzea.

10. oinarria. Dirulaguntza ematea.

1. Laguntzak kudeatzen dituen organoak, hots, Merkataritza Antolatu eta Sustatzeko Zerbitzuak, aurreko oinarrian ezarritako balorazio irizpideei jarraituz ebaluatuko ditu eskaerak, eta organo eskudunari ebazpen proposamena igorriko dio, non adieraziko baita entitate onuradunek dirulaguntza lortzeko betebehar guztiak betetzen dituztela.

2. Dirulaguntzak emateari buruz ebazteko eskumena duen organoa Merkataritza eta Kontsumoko zuzendari nagusia da.

Ebazpena arrazoitua izanen da, eta honako hauek jaso beharko ditu, gutxienez:

a) Dirulaguntza jasoko duten eskatzaileen zerrenda eta laguntzaren zenbatekoa, lortutako puntuazioaren arabera ordenatuta.

b) Ezetsi beharreko eskaeren zerrenda. Haien artean, aurrekontuko baliabideen mugengatik baztertu direnak ere jasoko dira.

Ebazpena gehienez ere bi hilabeteko epean eman eta jakinaraziko da, eskaerak aurkezteko epea bukatzen denetik hasita.

Ezarritako gehieneko epea bukatzen bada berariazko ebazpenik eman eta jakinarazi gabe, eskaerak administrazio isiltasunez ezetsitzat jotzen ahalko dira. Hala ere, organo eskuduna behartua dago laguntzak onartu edo ukatzeko berariazko ebazpena eman eta jakinaraztera, oinarri hauetan xedatutakoari jarraikiz.

Eskatutako dirulaguntzak emateko edo ukatzeko ebazpenen aurka, esanbidezkoak edo isilbidezkoak izan, enpresa eskatzaileek zilegi izanen dute gora jotzeko errekurtsoa jartzea, Industriako eta Enpresen Trantsizio Ekologiko eta Digitalerako kontseilariari zuzendua, administrazio prozedura erkideari buruzko legerian xedatutakoari jarraikiz.

11. oinarria. Diruz lagundutako jarduketak justifikatzea.

1. Justifikazioa aurkezteko epea.

Edozein unetan aurkeztuko da egindako jarduketen justifikazioa, dirulaguntza ematen duen ebazpena jakinarazi ondoren, eta, beranduenez, 2026ko azaroaren 13an, egun hori barne.

Laguntza justifikatzeko dokumentazioa osoa ez bada edo akastuna bada, onuradunari eskatuko zaio zuzen dezala 10 egun balioduneko epean, Administrazio Publikoen Administrazio Prozedura Erkideari buruzko urriaren 1eko 39/2015 Legearen 68. artikuluan ezarritakoarekin bat.

2. Justifikazioa aurkezteko modua.

Justifikazioa telematikoki aurkeztuko da, laguntzaren fitxan eskuragarri dagoen berariazko inprimakia erabiliz. Fitxa horretan, Nafarroako Foru Komunitateko Administrazioaren dirulaguntzak justifikatzeko erregistrorako esteka bat egonen da, eta Merkataritza eta Kontsumo Zuzendaritza Nagusira bideratuko da.

3. Egindako jarduketak justifikatzeko agiriak eskaneatuta aurkeztu beharko dira, dokumentu bereizietan eta behar bezala identifikatuta.

a) Artisautza azoken kasuan:

–Amaierako memoria, deskribatu beharko dituena egindako jarduketak eta hasierako proiektuaren aldean izandako desbideratzeak; halaber, elkarte antolatzaileak egindako amaierako balorazio bat jaso beharko du.

–Erabilitako hautapen prozesuaren memoria: artisautza enpresa eta artisau eskatzaileen zerrenda, horietatik onartu eta baztertutakoak, eta azken hautapen horren motibazioa.

–Azokaren informazioa zabaldu izanaren froga, agiri bidezkoa, Nafarroako Artisautza Erregistroan inskribatutako enpresa guztiei parte hartzeko gonbidapenarekin.

–Parte hartu duten enpresen balorazio-inkestak.

b) Fakturen zerrenda, laguntzaren fitxan ezarritako ereduaren araberakoa, Excel formatuan.

c) Diruz lagundutako jarduera guztiei dagozkien fakturen kopia; fakturak fakturazio betebeharrak arautzen dituen erregelamenduaren araberakoak izanen dira, eta, betiere, dirulaguntzaren entitate onuradunaren izenean jaulki beharko dira.

d) Diruz lagundutako jarduketak ordaindu izana justifikatzeko banku agiriak. Eskudirutan egindako ordainketak edo hartze-agiriak ez dira onartuko. Onuradunak banku transferentzia bidez, erreziboen zordunketa bidez edo entitatearen kreditu edo zordunketa txartela erabiliz eginen ditu ordainketak. Horrela, ordainketen egiaztagiritzat hartuko dira ordainketak finantza entitate baten bidez egin eta entitatearen kontuan kargatu direla adierazten dutenak.

e) Diruz lagundutako ikastaro bakoitzarekin lotura duen sustapeneko, publizitateko eta komunikazioko material guztiaren ale bat, irrati iragarkiak, liburuxkak, bestelako iragarkiak, webguneetan txertatuta dagoen informaziorako loturak, eta antzekoak.

f) Jarduketek dirulaguntza jaso dutela jakinarazteko publizitate betebeharrak bete izanaren froga grafikoa.

g) Jarduketa bakoitzerako lortutako diru-sarreren eta dirulaguntzen aitorpena. Zehazki, azokan parte hartu duten enpresek ordaindutako inskripzio kuoten bidez, toki erakundeen dirulaguntzen bidez eta bestelako diru-sarrera edo babesletzaren bidez lortutako diru-sarrerak zehaztuko dira.

12. oinarria. Aurrerakinen aurreikuspena.

1. Azoka bakoitzerako emandako dirulaguntzaren %75eko aurrerakina ematen ahalko da, baldin eta entitate eskatzaileak justifikatzen badu funtsak behar dituela dirulaguntzaren xedeak betetzeko, bat etorriz Dirulaguntzei buruzko azaroaren 9ko 11/2005 Foru Legearen 33.2) artikuluan ezarritakoarekin.

2. Horretarako, entitateak aurrerakina ordaintzeko eskaera bat aurkeztuko du, azoka bakoitza egiten hasteko eguna baino hiru hilabete lehenago gehienez.

Ondorio horietarako, entitate eskatzaileak honako hauek aurkeztuko ditu: entitatearen diruzaintzako egoerak; finantza entitateen dokumentuak, egiaztatzen dutenak finantzaketa beharra edo diruzaintzaren likideziarik eza; edo antzeko beste edozein txosten edo dokumentazio.

3. Aurrerakina hilabeteko epean ordainduko da, aurrerakina ordaintzeko eskaera aurkezten denetik zenbatzen hasita; entitate onuradunak egindako jarduketen justifikazioa aurkeztu ondoren erregularizatuko da, eta, hala badagokio, laguntza emateko ebazpenarekin batera ordaintzen ahalko da.

13. oinarria. Dirulaguntzaren ordainketa.

1. Egindako jarduketen frogagiriak aurkeztu eta aztertu ondoren, Merkataritza Antolatu eta Sustatzeko Zerbitzuak jarduketa horiei dagokien ordainketa egiteko ebazpenaren proposamena igorriko du Merkataritza eta Kontsumo Zuzendaritza Nagusira, eta txosten bat gehituko du, frogatzen duena entitate onuradunak betetzen dituela dirulaguntza kobratzeko eskubidea ematen duten betebehar guztiak.

2. Laguntza ordaintzeko ebazpena 2026ko abenduaren 31 baino lehenago emanen da.

3. Onuradunak oinarri hauetan araututako dirulaguntza aurrerakina jaso badu, honela erregularizatuko da:

–Horretarako behar den zenbatekoa ez badu justifikatzen, dagokionaren gainetik ordaindu zaion dirulaguntzaren zatia itzultzeko eskatuko zaio.

–Horretarako behar den zenbatekoa justifikatzen bada, ebazpen bat emanen da aurkeztu eta onartu den justifikazioari dagokion gainerako zenbatekoa ordaintzeko.

14. oinarria. Onuradunen betebeharrak eta horiek ez betetzearen ondorioak.

1. Dirulaguntzaren onuradunek betebehar hauek izanen dituzte:

a) Dirulaguntza eman zaiela jakinarazi eta hilabeteko epean, telematikoki aurkeztea dirulaguntzen onuradunen gardentasun betebeharrari buruzko aitorpena, Gardentasunari, Informazio Publikoa Eskuratzeari eta Gobernu Onari buruzko maiatzaren 17ko 5/2018 Foru Legean arautua, laguntzen fitxan eskura dagoen eredua erabiliz.

Adierazpen hori beti aurkeztu behar da, gardentasun betebeharra izan (Gardentasunari, Informazio Publikoa Eskuratzeari eta Gobernu Onari buruzko maiatzaren 17ko 5/2018 Foru Legearen 3.c) artikuluko baldintzak betetzeagatik) edo ez izan (kasu horretan, inguruabar hori jasoko da adierazpenean).

Dirulaguntzaren aurrerakin bat ematea eskatzen bada, adierazpen hori aurrerakinaren eskaerarekin batera aurkeztuko da eta, ez bada aurkezten, ezin izanen da eskatutako aurrerakina ordaindu.

b) Diruz lagundutako jarduketak oinarri hauetan ezarritako epeetan egin, fakturatu, ordaindu eta justifikatzea.

c) Laguntzaren xedeko ekintza ezin izanez gero gauzatu, jakinarazi beharko da dirulaguntzari uko egiten zaiola ez-gauzatzea ziurra den unean; hala badagokio, dirulaguntzaren aurrerakina borondatez itzuliko da, Dirulaguntzei buruzko azaroaren 9ko 11/2005 Foru Legearen 35. artikuluan ezarritakoari jarraikiz, dagozkien berandutze interesekin batera.

d) Dirulaguntzaren xede izan den gastuaren %75 baino gutxiago gauzatzea aurreikusten bada, entitate onuradunak inguruabar horren berri eman beharko du jardueren justifikazioa aurkeztu aurretik.

e) Diruz lagundutako ekintzetan egin gogo diren funtsezko aldaketen berri ematea Merkataritza Antolatu eta Sustatzeko Zerbitzuari, haiek gauzatu baino lehen. Zerbitzu horrek baimendu beharko du edozein aldaketa garrantzitsu, eta eskatzen zaizkion aldaketak baimenduko ditu baldin eta behar bezala justifikatuta badaude eta bermatzen bada betetzen direla bai dirulaguntzaren xedea, bai diruz laguntzen diren ekintzen helburuak.

f) Publizitate egokia egitea dirulaguntza honen xede diren jardueren finantzaketaren izaera publikoaren gainean, eta, horretarako, dirulaguntzaren xede den ekintzari buruzko euskarri eta publizitate guztietan (irrati-iragarkiak, sare sozialak, liburuxkak, kartelak, errotuluak, biniloak, etab.) adierazi beharko da ekintza hori Nafarroako Gobernuak diruz laguntzen duela. Betebehar hori honela konplituko da:

–Lehentasunez, Nafarroako artisautza sustatzeko logoa txertatuko da. Hura erabiltzeko, eskaera egin behar da Nafarroako Gobernuaren tramiteen katalogoan, esteka honetan:

https://www.navarra.es/eu/tramiteak/on/-/line/solicitud-del-logo-promocional-de-artesania-navarra

–Logo hori erabili ezin den euskarrietan, aipamen hau eginen da: "Nafarroako Gobernuak diruz lagundutako jarduketa".

f) Ez da erabiliko emakumeak diskriminatzen dituen irudirik eta mezurik jarduketetan, publizitate euskarrietan, webguneetan, online marketinean eta diruz lagundutako jarduerak zabaltzeko materialetan; emakumeen eta gizonen berdintasuna eta rolen pluraltasuna sustatuko da, eta hizkera inklusiboa erabiliko da. Halaber, ez da hizkera sexistarik erabiliko diruz lagundutako jardueraren gainean prestatzen den dokumentazio guztian.

2. Oinarri arautzaile hauetan edo Dirulaguntzei buruzko Foru Legean ezarritako betebeharren bat bete ezean, onartutako dirulaguntza jasotzeko eskubidea galtzen ahalko da, edo, hala badagokio, diru hori itzuli beharko da, foru lege horren 35. artikuluan xedatutakoarekin bat.

Halaber, aurreko betebeharretako bat hein batean betetzen ez bada, ordaindu beharreko dirulaguntzaren zenbatekoa doitzen ahalko da proportzionaltasun printzipioari jarraikiz, edo, zein den kasua, dagokion zenbatekoa itzuli beharko da.

Zehazki:

a) Gardentasun betebeharra duten onuradunek eskatutako informazioa aurkezteko betebeharrari dagokionez:

–Informazio hori ezarritako epetik kanpo aurkezten bada, baina 2026ko azaroaren 13ra arte, egun hori barne, ordaindu beharreko dirulaguntza %5 murriztuko da.

–Onuradunak informazioa emateko betebehar hori betetzen ez badu, ez zaio onartutako dirulaguntza ordainduko, eta dirulaguntza kobratzeko eskubidea galdu duela deklaratuko da.

b) Egindako jarduketen justifikazioa aurkezten bada 2026ko azaroaren 13tik aurrera (egun hori barne):

–2026ko azaroaren 20a baino lehen justifikatzen bada (egun hori barne), ordaindu beharreko guztizko dirulaguntza %5 gutxituko da.

–2026ko azaroaren 20tik aurrera aurkezten bada, galduko da jarduketa horietarako eman zen dirulaguntza kobratzeko eskubidea.

c) Dirulaguntza jaso duten jarduketak aurreikusitako prezioan baino merkeago gauzatzen badira, eta oinarri honen 1.d) atalean ezarritako komunikazioa egin ezean, dirulaguntza honela gutxituko da:

–Diruz lagundutako jarduketaren %50 eta %75 artekoa gauzatzen bada, ordaindu beharreko azken dirulaguntzaren ordainketa %50 murriztuko da, eta, hala badagokio, aurrerakin gisa ordaindutako dirulaguntzaren soberakina itzuli beharko da.

–Gauzatzea diruz lagundutako jarduketaren %50 baino txikiagoa bada, dirulaguntza kobratzeko eskubidea galdutzat emanen da, eta, hala badagokio, ordaindutako dirulaguntzaren aurrerakina itzuli beharko da.

–Zenbateraino gauzatu den zehazteko, diruz lagundutako gastuaren zenbatekoa eta justifikatutako gastu onartuen zenbatekoa (epe barnean egindakoak, fakturatuak eta ordainduak) alderatuko dira.

d) Dirulaguntzaren xedeko jarduketetan ez badira betetzen publizitate betebeharrak, publizitate-euskarri horiei dagozkien gastu guztiak ezetsiko dira.

e) Azoka batean ez bada aipatzen jarduketa horrek Nafarroako Gobernuaren laguntza duela, publizitateari buruzko betebeharra ez dela bete ulertuko da, eta ez da onartuko jarduketa horri dagokion gastu osoa ordurako egin bada, edo, bidezko bada, galdu eginen da azoka horretarako onartutako dirulaguntza osoa kobratzeko eskubidea.

Laguntza kobratzeko eskubide galdu dela deklaratzen denean, onuradunak esleitutako dirulaguntzaren aurrerakina jaso badu, ordaindutako aurrerakina itzultzea eskatuko zaio, berandutze interesekin batera.

15. oinarria. Dirulaguntzaren bateragarritasuna eta "de minimis" laguntzen izaera.

1. Dirulaguntza hauek bateraezinak dira Industriako eta Enpresen Trantsizio Ekologiko eta Digitalerako Departamentuak jarduketa beretarako eman ditzakeen beste batzuekin.

Bateragarriak dira, ordea, helburu berarekin Nafarroako Foru Komunitateko Administrazioko gainerako departamentuek, Espainiako zein atzerriko beste administrazio publiko batzuek edo beste edozein entitate publiko edo pribatuk edota partikularrek ematen dituzten laguntzekin.

Edonola ere, jarduketa bererako jasotzen diren dirulaguntzek ezin izanen dute inolaz ere gainditu gauzatutako jarduketaren kostua, dela dirulaguntza soilaz, dela beste laguntzei, diru-sarrerei edo diruz lagundutako jarduketaren berariazko baliabide propioei batuta, eta entitate onuradunak ezin izanen du inolako irabazirik eduki.

2. Deialdi honetako dirulaguntzak "de minimis" laguntzak dira, Europako Batzordearen 2013ko abenduaren 13ko 2023/2831 (EB) Erregelamenduan xedatutakoaren arabera. Erregelamendu hori Europar Batasunaren Funtzionamenduari buruzko Tratatuaren 107. eta 108. artikuluak "de minimis" laguntzei aplikatzeko moduari buruzkoa da.

Erregelamendu horrekin bat, enpresa bakar bati hiru urteko zerga-ekitaldiko edozein alditan emandako "de minimis" laguntza guztien batura ezin da 300.000 eurotik gorakoa izan. Aipatu erregelamenduaren 2.2 artikuluan ezarrita dago enpresa bakarraren definizioa.

Kontuan hartu beharreko hiru urteko aldia etengabe ebaluatu behar da, eta, "de minimis" laguntza bat ematen den bakoitzean, aurreko hiru urteetan emandako "de minimis" laguntzen zenbateko osoa hartuko da kontuan.

Ondorio horietarako, laguntzen eskatzaileek eskabidea aurkeztu aurreko hiru urteetan jasotako "de minimis" beste edozein laguntza aitortuko dute eskabidean, baldin eta aipatutako erregelamenduaren edo beste "de minimis" erregelamendu batzuen mende badaude.

16. oinarria. Emandako dirulaguntzen publizitatea.

Merkataritza Antolatu eta Sustatzeko Zerbitzuak jendaurrean jarriko ditu emandako dirulaguntzak Ogasuneko Ministerioaren Dirulaguntzen Datu Base Nazionalaren bitartez (http://www.pap.minhafp.gob.es/bdnstrans/GE/eu/index), honako hauek adierazita: deialdia, laguntza zein aurrekontu kredituri egotzi zaion, onuradunak eta emandako diru kopurua.

Deialdi honen emaitzak, halaber, laguntzen fitxan argitaratuko dira.

17. oinarria. Oinarri arautzaileen aurkako errekurtsoa.

Interesdunek gora jotzeko errekurtsoa jartzen ahal dute oinarri arautzaile hauen aurka, Industriako eta Enpresen Trantsizio Ekologiko eta Digitalerako kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunetik.

Iragarkiaren kodea: F2515394