23. ALDIZKARIA - 2025eko otsailaren 4a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

1C/2025 EBAZPENA, urtarrilaren 3koa, Ekonomia Sozialeko eta Laneko zuzendari nagusiak emana, Sartagudako Udalak aurkeztutako hitzarmen kolektiboa erregistratu, gordailutu eta Nafarroako Aldizkari Ofizialean argitaratzea erabakitzen duena.

Ikusi da Sartagudako Udalak aurkeztutako hitzarmen kolektiboa (kode zenbakia: 31102361012025), erregistro honetan sartu dena 2024ko urriaren 18an, eta 2024ko irailaren 4an sinatu zutena enpresaren ordezkariek eta gehiengo sindikalak (CCOO).

Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, laneko akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin bat etorriz,

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuak ematen dizkidanak, honako hau

EBAZTEN DUT:

Lehenbizikoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Sartagudako Udalak aurkeztutako hitzarmen kolektiboa (kode zenbakia: 31102361012025).

Bigarrena.–Nafarroako Aldizkari Ofizialean argitara dadila xedatzea, orok jakin dezaten.

Hirugarrena.–Ebazpen hau eskatzaileari jakinaraztea, eta ohartaraztea ebazpenak ez diola amaiera ematen administrazio bideari, eta, haren aurka, gora jotzeko errekurtsoa aurkezten ahal diola Eskubide Sozialetako, Ekonomia Sozialeko eta Enpleguko kontseilariari, hilabeteko epean, ebazpena jakinarazi eta hurrengo egunetik aurrera.

Iruñean, 2025eko urtarrilaren 3an.–Ekonomia Sozialeko eta Laneko zuzendari nagusia, Iñaki Mendióroz Casallo.

SARTAGUDAKO UDALAREN HITZARMEN KOLEKTIBOA, LANGILE LAN-KONTRATUDUN FINKOENTZAT ETA BEHIN-BEHINEKO LANGILEENTZAT, 2024. ETA 2025. URTEETARAKO

1. artikulua. Aplikazio eremua eta indarraldia.

1.1. Hitzarmen honek Sartagudako Udalaren zerbitzuan lanean ari diren langile lan-kontratudun finkoei eta behin-behineko langileei eraginen die.

1.2. Hitzarmen honek indarra izanen du 2024ko uztailaren 1etik 2025eko abenduaren 31ra arte.

Egun hori igarota, urtero luzatuko da, harik eta beste hitzarmen bat sinatu arte.

1.3. Beste hitzarmen bat negoziatzeko, hitzarmenaren edo urteko luzapenaren indarraldia bukatu baino 3 hilabete lehenago salatuko da gehienez ere. Dena dela, hitzarmena salatu ondoren ere aurreraeragina izaten segituko du, hau da, erabakitakoa aplikatuko da harik eta beste batek ordeztu arte, salbu eta lan egutegiari dagokionez, urtero berrikusi beharko baitute organo eskudunek, deusetan galarazi gabe itunean jasotako berariazko baldintzak.

1.4. Aurreko akordioak bermatzen eta errespetatzen dira, bai eta indarrean diren xedapenen arabera eskuratutako eskubideak ere.

1.5. Akordio honetan arautzen ez diren edo Nafarroako Gobernuak hobetu dituen aferei dagokienez, negoziazio alderdiek adostu dute Nafarroako Gobernuan bere funtzionario eta administrazio-kontratudunentzat ezarri denari lotzea.

2. artikulua. Ordainsariak.

2.1. Akordio honen indarraldiko urteetan, Udalak kontuan hartuko du enplegatuek azken urteotan ordainsarietan galerak eta beste murrizketa batzuk izan dituztela. Ahal den neurrian, sindikatuetako ordezkariekin negoziatuta, galera horiek berreskuratzera joko da, betiere indarreko lege esparrutik atera gabe eta aurrekontuen egoerak horretarako bidea ematen badu.

2.2. Ordainsariei dagokienez, Nafarroako Aurrekontu Orokorrei buruzko foru legeetan Nafarroako administrazio publikoetako funtzionarioentzat zehazten den igoera aplikatuko da.

2.3. Txandaka aritzen diren langileek, hau da, lan ordutegian aldaketa izaten dutenek hiruhileko bakoitzeko lanegun guztien herenetik gora, beren mailari dagokion hasierako soldataren %6ko diru konpentsazioa jasoko dute.

2.4. Akordio honen ondoko foru arau baten bidez Nafarroako administrazio publiko guztietan ezartzen diren ordainsari osagarriak, itundutakoen parekoak edo txikiagoak badira, xurgatu eginen dira, eta handiagoak badira, aldea jasoko da.

2.5. Familia laguntza gisa, Nafarroako Gobernuak bere funtzionarioentzat eta langileentzat ezartzen duena ordainduko da.

2.6. Udalak lanpostuko osagarri bat emanen die langile guztiei.

2.7. Brigadako D mailako zerbitzu anitzetako enplegatuen lanpostuetan (1 eta 2) lanaldia luzatzeagatiko osagarria kentzen da, eta lanpostuko osagarrian xurgatuko da.

2.8. Lanpostuak aztertuko dira eta arriskuko eta toxikotasuneko osagarri bat emanen da, lanpostu bakoitzak duen esposizioaren arabera.

3. artikulua. Ordainsariak ezintasun iragankorrean.

3.1. Lanerako ezintasun iragankorretatik edozein, behin-behineko baliaezintasuna, aldi baterako ezintasuna edo amatasun baja gertatuz gero, soldataren %100 jasoko da, kontratuak irauten duen bitartean.

3.2. Lan istripua edo laneko gaixotasuna gertatuz gero, soldataren %100 jasoko da, langileari, lan eginez gero, bere lan egutegiaren arabera egokituko litzaizkiokeen kontzeptu guztiak barne.

4. artikulua. Aparteko orduak.

Aparteko orduak salbuespeneko kasuetan baizik ez dira eginen, eta, oro har, egin aurretik baimendu beharko dira, ezinbesteko kasuetan izan ezik. Horregatik, behar den zerbitzuak justifikatu beharko ditu. Dena dela, langile bakoitzari 50 ordu ordainduko zaizkio gehienez urtean, alkatetzaren berariazko baimena izan ezik. Aparteko orduen konpentsazioa Nafarroako Gobernuak ezartzen duen moduan eginen da.

Ordu horiek atsedenaldiarekin konpentsatzeari dagokionez, langileak nahi duenean hartuko du konpentsazioa, zerbitzu beharrengatik ezinezkoa denean izan ezik.

5. artikulua. Gidabaimena.

Lanpostuan sartzeko gidabaimena eskatu zaien lan kontratuko langile finkoei eta behin-behineko langileei udalak baimen hori berritzeko azterketa medikoaren eta tasen kostua itzuliko die.

6. artikulua. Laguntza juridikoa eta kalte-ordaina bandalismo ekintzetan.

Langile lan-kontratudun finko eta behin-behineko langile guztiei laguntza juridikorako eskubidea aitortzen zaie, dagozkien zerbitzuak emateagatik eratorritako auzien ondorioz behar dutenean, baldin eta beren eginkizunak oker betetzeagatik edo dituzten mugak gainditzeagatik izan ez bada. Behar denean, prokuradorearen gastuak ordainduko dira. Udaleko langileen kontra erasorik edo atentaturik gertatuz gero, udala akusazio partikular gisa aurkeztuko da epaitegietan.

Udalak ordainduko du langileak elkargoan kidetzeko zenbatekoa, langile horiek beren jardueran aritzeko elkargoan kidetuta egon behar dutenean nahitaez.

7. artikulua. Bizi asegurua eta lanerako ezintasun egoeretarako asegurua.

Udalak kontratu hauek sinatuko ditu:

–Istripu kolektiboetarako aseguru poliza bat langike lan-kontratudun finkoentzat eta behin-behineko langileentzat, ondoko berme hauek dituena:

  • Laneko istripuaren ondoriozko heriotza: berrogeita hamazazpi mila euro (57.000 euro).
  • Ohiko lanbiderako ezintasun iraunkor osoa, lan istripuaren ondorioz: laurogeita hamar mila euro (90.000 euro).
  • Lanbide guztietarako ezintasun iraunkor absolutua, lan istripuaren ondorioz: ehun mila euro (100.000 euro).
  • Baliaezintasun handia, lan istripuaren ondorioz: ehun mila euro (100.000 euro).

–Bizi aseguru poliza bat, hogeita hamar mila (30.000) euroko estaldurarekin heriotzagatik eta ezintasun absolutuagatik.

Polizaren zenbatekoak urtero eguneratuko dira KPIaren arabera.

Sartagudako Udalak interesdunari edo haren jaraunsleei aseguru honen berri eman beharko die, eta behar diren izapideak egiteaz ere arduratuko da.

Kontratistari eskatuko zaio aseguru horren ordainketa gehienez hilabeteko epean egitea, heriotza edo baliaezintasuna deklaratzen denetik.

8. artikulua. Lanaldia.

Urteko lanaldia Nafarroako Gobernuak bere enplegatu publikoentzat (funtzionarioak, administrazio-kontratudunak, lan-kontratudun finkoak eta behin-behinekoak) zehazten duen bera izanen da.

Astelehenetik ostiralera bitarteko eguneroko lanaldia, oro har, 7 ordu eta 20 minutukoa izanen da, 07:00etatik 14:20ra arte.

–Malgutasuna lana eta familiako bizitza uztartzeko arrazoiengatik.

Sartagudako Udaleko lan kontratuko langile lan-kontratudun finkoek eta behin-behinekoek eskubidea dute lanaldia edo lan ordutegia egokitzeko, bizitza pertsonala eta familiarra eta laneko bizitza bateragarri egin ahal izateko. Hori helburu, langile publikoei laneko eta familiako eginkizunak bateratzen laguntzeko, eta zerbitzu publikoa egokiro ematea galarazi gabe, lan ordutegia malgutzeko neurri hauek ezarriko dira zerbitzuetan, adierazitako eginkizunen baterakuntza hori helburu, betiere aginduzko orduak egin beharko direla:

Laneko ordutegiaren zati finkoa, langile guztiak lanpostuan nahitaez egotea eskatzen duena, 09:00etatik 14:15era bitartekoa izanen da, astelehenetik ostiralera. Eguneko lanaldia osatu arte geratzen den denbora 7:00etatik 9:00etara eta 14:15etik 17:00etara eginen da, enplegatuak aukeratzen duenean eta malgutasunez.

Ordutegia malgutzeko neurri zehatz gisa honako hau ezartzen da: beren ardurapean adineko pertsonak, hamabi urtetik beherako seme-alabak (edo adin hori betetzen duten Lehen Hezkuntzako ikasturtea bukatu arte), desgaitasuna duten pertsonak edo eritasun larria duten bigarren gradurainoko ahaideak (odol nahiz ezkontza bidezkoak) dituzten enplegatuek lanpostura sartzeko ordutegia ordu erdi bat atzeratzeko eskatzen ahalko dute, hau da, 09:30era arte.

Organo eskudunek aintzat hartuko dituzte ordutegiak aldatzeko eskari guztiak, baldin eta zerbitzuen funtzionamendu egokia bermatuta badago eta enplegatuak behar bezala egiaztatzen badu neurri horrek bere familiako bizitza eta bizitza pertsonala bateratzea errazten duela zalantzarik gabe.

Laneratzea kontrolatzeko, presentzien kontrolerako sistema automatiko bat erabiliko da, eta enplegatu guztiek lantokira sartzean eta bertatik ateratzean fitxatu beharko dute nahitaez. Lanaldi bakoitzaren hasieran eta bukaeran fitxatu beharko da, baita lanaldiaren barruan lanetik ateratzen den eta sartzen den bakoitzean ere.

Unitate guztietan herritarrei arreta emateko zerbitzua bermatu beharko da, ezarrita dagoen ordutegiaren barnean, baita gainerako zerbitzuen funtzionamendu egokia ere. Horretarako, departamentu edo erakunde autonomo bakoitzak ahalmena izanen du orokorrean ezarrita dagoen ordutegi malgua aplikatzeko mugak jartzeko unitate edo lanpostu jakin batzuetarako, behar bezala arrazoiturik.

Ematen dituzten zerbitzuen ezaugarriengatik unitate batean edo enplegatu talderen batean bidezkoa ez bada, ordutegi malgua ez da aplikatuko. Hori ezarriko da, arrazoiturik, kasuan kasuko departamentuan edo erakunde autonomoan ordutegi malgua baimentzen duen ebazpenean.

9. artikulua. Lan egutegia eta ordutegi eta txanden aldaketak.

Gaur egun ezarrita dauden ordutegi eta txandetan edozein aldaketa egiteko, baita atsedenaldietan, oporretan eta onartutako egutegietan ere, ordezkariekin negoziatuko da aurretik.

10. artikulua. Jaiegunetako lanaldiak.

Jaiegunetan lan eginez gero, Nafarroako Gobernuak bere enplegatu publikoekin (funtzionarioak, administrazio-kontratudunak, lan-kontratudun finkoak eta behin-behinekoak) hitzartu duen konpentsazio bera emanen da; hartarako, bereiziko dira, batetik, jaieguneko ordua, urteko benetako lanaldian sartua, eta bestetik, jaiegunean egindako aparteko ordua, benetako lanaldian sartu gabea.

Jaieguntzat hartuko dira Nafarroako Gobernuak halakotzat finkatzen dituenak. Herriko zaindarien festetan, festen egun guztiak hartuko dira jaieguntzat.

Gazteen jaiak, melokotoiaren azoka, Ama Birjinaren jaia eta San Anton jaia jaiegun ordu gisa ordainduko dira.

11. artikulua. Oporrak, lizentziak eta baimenak.

Sartagudako Udaleko langile guztiei aplikatuko zaie 71/2017 Foru Dekretua, abuztuaren 23koa, Nafarroako Administrazio Publikoetako funtzionarioen opor, lizentzia eta baimenen Erregelamendua aldatzen duena (Erregelamendua otsailaren 9ko 11/2009 Foru Dekretuaren bidez onetsi zen), hala nola haren ondorengo aldaketak ere.

12. artikulua. Lanaldia laburtzea.

Nafarroako administrazio publikoetako langile funtzionarioen lanaldiaren murrizketa arautzen duen apirilaren 4ko 27/2011 Foru Dekretuan ezarritakoa aplikatuko da.

13. artikulua. Osasun azterketa.

Urtero, osasun azterketa eginen zaie nahi duten langile lan-kontratudun finko eta behin-behineko langile guztiei; urteko lehen seihilekoan egin behar dira.

14. artikulua. Prestakuntza plana.

Etengabeko prestakuntzarako eskubidea onarturik, Udalak prestakuntza ikastaroetara joatea erraztuko die bere langileei. Hori helburu, langile lan-kontratudun finko eta/edo behin-behineko langile guztiek eskubidea izanen dute lanbide prestakuntza eta hobekuntzarako ikastaroetara joateko, haien edukia zuzenean lanpostuari edo enplegatuaren lanbide karrerari lotua bada.

Ikastaroetara joateko, aurretiaz baimena eduki beharko da, urte berean emanen dena, eta bertaratze agirien bidez kontrolatuko da joan ote den. Zerbitzuaren arduradunak erabakiko du zein prestakuntza ikastaro egin behar diren.

Ordezkaritza sindikalarekin batera, sustatuko da langileak Nafarroako Udal eta Kontzejuen Federazioaren prestakuntza planean sartutako prestakuntza ekintzetara joatea. Berrikuspena urtero eginen da.

15. artikulua. Erretiroa, errelebo kontratuarekin.

Erretiro partziala bultzatzeko neurri hauek ezarriko dira:

1. Urtero, plantilla organikoa onesten denean, zehaztuko da zein langilek har dezaketen erretiro partziala.

2. Udalak konpromisoa hartuko du erretiro partzialeko eskaerak onartzeko, baldin eta eskatzaileek, plantilla organikoko kide izanik, erretiroa hartzeko legezko baldintzak betetzen badituzte.

16. artikulua. Genero indarkeriaren biktimak babestea.

Genero Indarkeriaren kontrako Babes Integrala emateko Neurriei buruzko Lege Organikoa edo hura ordezten edo osatzen duen ondorengo araudia beteko da.

17. artikulua. Berdintasun plana.

Sartagudako Udalak 2022-2025 urteetarako Berdintasun Planean ezarritakoa beteko du, eta 2025-2028 aldirako Berdintasun Plan berria negoziatzen hasiko da.

18. artikulua. Lanpostuen azterketa.

Udalak konpromisoa hartzen du hitzarmenaren indarraldiko lehen urtean lanpostuen azterketa bat egiteko, eta konpromisoa hartzen du generoagatiko edozein diskriminazio edo desberdintasun ezabatzeko.

19. artikulua. Langileen aferak.

Udalak langileriaren aferen berri emanen die langile lan-kontratudunen ordezkariei.

20. artikulua. Batzorde paritarioa.

Hitzarmen honetatik eta Langileen Estatutuaren 85.3 artikuluan jasotakotik erator daitezkeen interpretazioko eta aplikazioko desadostasunak ebazteko, batzorde paritario bat sortuko da, ordezkaritza sindikalak eta udalbatzaren ordezkaritzak osatua. Batzorde horrek hitzarmen honen edukia zaindu, kontrolatu eta interpretatuko du, betiere hitzarmena sinatu badute.

Planteatzen diren auziak bi alderdiak adostuta ebatziko dira. Bestela, lan erakundeetara eramaten ahalko dira, nahitaezko arbitrajea bazterturik.

Batzorde paritarioa hilean behin bilduko da eta lantzeko gairik baldin badago, edo aldeetako batek eskatuta. Bilera horien aktak eginen dira.

21. artikulua. Diziplina araubidea.

Nafarroako funtzio publikoan aplikatzen den berbera izanen da.

22. artikulua. Langile lan-kontratudunen ordainsariak.

Ordainsariak 2024ko abuztuaren 1etik aurrera aplikatuko dira.

–Administrari-ofiziala (1) (C maila); lanpostuaren osagarria (%25); lanaldia luzatzeagatiko osagarria (%5); mailako osagarria (%12).

–Administrari-ofiziala (2) (C maila); mailako osagarria (%12); lanpostuko osagarria (%5).

–Administrari-ofiziala (3) (C maila); mailako osagarria (%12); lanpostuko osagarria (%5).

–Zerbitzu anitzetako enplegatua (1) (D maila); mailako osagarria (%12); lanpostuko osagarria (%15).

–Zerbitzu anitzetako enplegatua (2) (D maila); mailako osagarria (%12); lanpostuko osagarria (%15).

–Garbitzailea (1) (E maila); mailako osagarria (%15); lanpostuko osagarria (%5).

–Garbitzailea (2) (E maila); mailako osagarria (%15); lanpostuko osagarria (%5).

Iragarkiaren kodea: F2500327