23. ALDIZKARIA - 2025eko otsailaren 4a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

202C/2024 EBAZPENA, abenduaren 20koa, Ekonomia Sozialeko eta Laneko zuzendari nagusiak emana, zeinaren bidez erabakitzen baita Nafarroako Centro Diagnóstico Granada SA (CEDISA) enpresaren hitzarmen kolektiboa erregistratzea, gordailutzea eta Nafarroako Aldizkari Ofizialean argitaratzea.

Ikusi da Nafarroako Centro Diagnóstico Granada SA (CEDISA) enpresak aurkeztutako hitzarmen kolektiboa (kode-zenbakia: 31102301012024), erregistro honetan sartu baitzen 2024ko azaroaren 6an, 2024ko urriaren 1ean enpresaren eta sindikatuen ordezkaritzek sinatu ondotik.

Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, laneko akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin bat etorriz.

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuak ematen dizkidanak, honako hau,

EBAZTEN DUT:

Lehenbizikoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Nafarroako Centro Diagnóstico Granada SA (CEDISA) enpresak aurkeztutako hitzarmen kolektiboa (kode-zenbakia: 31102301012024).

Bigarrena.–Nafarroako Aldizkari Ofizialean argitara dadila xedatzea, orok jakin dezaten.

Hirugarrena.–Ebazpen hau eskatzaileari jakinaraztea, eta ohartaraztea ebazpenak ez diola amaiera ematen administrazio-bideari, eta, honen aurka, gora jotzeko errekurtsoa aurkezten ahal diola Eskubide Sozialetako, Ekonomia Sozialeko eta Enpleguko kontseilariari, hilabeteko epean, ebazpena jakinarazi eta hurrengo egunetik aurrera.

Iruñean, 2024ko abenduaren 20an.–Ekonomia Sozialeko eta Laneko zuzendari nagusia, Iñaki Mendióroz Casallo.

CEDISA ENPRESAK NAFARROAN DITUEN LANTOKIETAKO HITZARMEN KOLEKTIBOA

I. KAPITULUA.–APLIKAZIO-EREMUA

1. artikulua. Eremu funtzionala, langile-eremua eta lurralde-eremua.

1.1. Eremu funtzionala.

Hitzarmen kolektibo honek arautzen ditu Centro de Diagnóstico Granada SA enpresaren (aurrerantzean, "Enpresa" edo "CEDISA") eta langileen arteko lan-baldintzak eta baldintza ekonomikoak; zerbitzu medikoak eta mota guztietako erradiologia-zerbitzuak eskaintzen dituzten eta haiei guztiei zuzenean edo zeharka lotutako jarduerak egiten dituzten langileei dagokie.

1.2. Lurralde-eremua.

Hitzarmen kolektibo hau Enpresak Nafarroako Foru Komunitatean dituen lantoki hauetan aplikatuko da.

(i) Cedisa Medicis, Amaiurko Gazteluaren kalea 41, 31003 Iruñea.

(ii) Olite 20 klinika, Erriberri kalea 20, behea, 31004 Iruñea.

(iii) San Juan de Dios ospitalea, Erradiologia Zerbitzua, Belosogoiti kalea 3, 31006 Iruñea.

(iv) Nafarroako erresonantzia magnetikoko unitate mugikorrak.

1.3. Langile-eremua.

Enpresari lan-harreman arrunt bidez lotutako langileei aplikatuko zaie. Hitzarmen honetatik at gelditu dira honako hauek:

a) Enpresak Nafarroan duen eremu-kudeatzailea.

b) Langileen Estatutuaren 2.1.a) artikuluan zehazten diren goi-zuzendaritzako langileak; haiekiko harremanak abuztuaren 1eko 1382/1985 Errege Dekretuari jarraikiz arautzen dira.

c) Enpresan zerbitzuren bat egiteko azpikontratatzen diren enpresekin lan-harremana duten langileak.

d) Zuzenbide zibilaren eta merkataritza-zuzenbidearen testuinguruan eta lanbide-jardun libreari eta independenteari dagozkion arrazoiak direla-eta Enpresarekin lanak, zerbitzuak, azterketak edo lankidetzak hitzartzen dituzten norbere konturako profesionalak.

e) Gizarte-laguntzaileak eta -boluntarioak.

f) Beren prestakuntza akademikoaren esparruan, enpresarekin prestakuntza-jarduerak egiten dituzten ikasleak, betiere enpresaren eta edozein hezkuntza-erakunderen artean hitzartutako lankidetza-hitzarmenak daudenean. Ez dira hitzarmen honen aplikazio-eremu pertsonaletik kanpo geldituko Langileen Estatutuaren 11. artikuluan araututako prestakuntza-hitzarmenak.

2. artikulua. Indarraldia.

Hitzarmen honek 2026ko abenduaren 31ra bitarte izanen du indarra, kontuan izan gabe zein egunetan argitaratzen den Nafarroako Aldizkari Ofizialean.

Indarraldia bukatzen denean, hitzarmen kolektibo hau besterik gabe luzatutzat joko da urtero, baldin eta hasierako edo luzapeneko mugaeguna baino hiru hilabete lehenago alderdietako batek salatzen ez badu.

3. artikulua. Hitzarmena salatzea eta indarraldia luzatzea.

Alderdi sinatzaileetako edozeinek Hitzarmena salatzen ahalko du idatzizko jakinarazpen bat helaraziz beste alderdiari, gutxienez hitzarmenaren indarraldia amaitu baino hiru hilabete lehenago, eta alderdiek hitzarmen kolektibo berria negoziatzeko mahaia eratzeko konpromisoa hartu beharko dute 15 eguneko epean, hitzarmen kolektiboa salatzen den egunetik zenbatzen hasita.

Hitzarmena salatu ondotik, indarrean jarraituko du aurreraeraginez, harik eta hitzarmen berria indarrean sartu arte, alde batera utzita aldi jakin bateko indarraldia duten klausulak.

Langileen ordezkariek eta enpresak hitzarmen kolektiboa moldatzen edo aldatzen ahalko dute, hitzarmen kolektiboan ezarritako baldintzak haren indarraldia amaitu baino lehen aldatu behar direnean.

II. KAPITULUA.–ERAGINKORTASUNA, SALAKETA

4. artikulua. Alderdi sinatzaileak eta eraginkortasuna.

Hitzarmen kolektibo hau sinatu dute Enpresaren ordezkariek eta lurralde-eremuan zehaztutako Enpresaren lantokietako langileen ordezkariek.

Indarrean sartzen denetik, hitzarmen honetan ezarritako alderdiak hemen zehaztutako baldintzen arabera bakarrik arautuko dira, indarreko legediarekin bat etorriz.

5. artikulua. Osotasunari lotzea.

Hitzartutako baldintzek Enpresan gutxieneko izaera duen osotasun organiko zatiezin bat osatzen dute, eta, haren aplikazio praktikoaren ondorioetarako, oro har eta batera hartuko dira kontuan; alderdiak osotasun horri lotuko zaizkie.

Baldin eta administrazio edo jurisdikzio eskudunak hitzarmen honetako edukiren bat baliogabetu edo ezeztatuko balu, horretarako legitimazioa duten alderdi negoziatzaileek ez badute kontrakorik adosten, negoziazio orokorra egin beharko da berriro; negoziazio hori hilabeteko gehieneko epean hasi beharko da, ebazpen edo epai irmoa ematen denetik zenbatzen hasita.

6. artikulua. Gailentasuna.

Hitzarmen kolektibo hau indarrean sartzeak berekin dakar, oro har, ordura arte indarrean ziren lan-baldintzak aldatzea, berariaz kontrakoa hitzartzen den kasuetan izan ezik. Berariaz kontrakoa adosten ez bada, hitzarmenean ezarritakoak baino onuragarriagoak diren egoerak errespetatu eginen dira oro har, eta ad personam mantenduko dira hertsiki.

Berariaz kontrakoa adosten ez bada, hitzarmen honetan ezarritako baldintzak nahitaezkoak eta gutxienekoak izanen dira, eta ezin izanen da indibidualki hitzartu hitzarmenean aurreikusitakoak baino txarragoa den baldintzarik.

7. artikulua. Konpentsazioa eta irenspena.

Konpentsatu eta xurgatu eginen dira Enpresa aldez aurretik aplikatzen aritu den edozein motatako hobekuntzak, haien jatorria zeinahi dela ere: lege-aginduak, laudoa, bakarkako kontratua, ohitura, Enpresaren borondatezko emakida edo beste edozein. Ordainsariei dagokienez, hitzarmen honetan ezarritako igoerak konpentsatu eta xurgatu eginen dira, artikuluetan zehaztutako baldintzetan.

Era berean, legezko aginduen, hitzarmen kolektiboen, banakako lan-kontratuen edo bestelako edozein arrazoiren ondorioz ezartzen ahal diren igoerek hitzarmen kolektibo honetan aurreikusitako baldintza ekonomikoak irensten ahalko dituzte, iristen diren punturaino eta urteko konputuan.

8. artikulua. Batzorde paritarioa.

Hitzarmena aplikatzean sor daitezkeen zalantzen inguruko interpretazio-, bitartekotza- eta adiskidetze-organoa da Batzorde Paritarioa, eta artikulu honetan xedatutako eskumenak izanen ditu, legez dagozkionez gainera.

Batzorde Paritarioa eratuko da hitzarmen hau Nafarroako Aldizkari Ofizialean argitaratu eta 15 egunera.

Gehienez ere sei kidek osatuko dute Batzorde Paritarioa; alderdi negoziatzaileetako bakoitzak (Enpresa eta ordezkari sozialak) hautatuko ditu haietako hiru. Ahal dela, hitzarmeneko negoziazio-batzordea eratu duten pertsonak hautatuko dira eta, kasu guztietan, Enpresako langileen ordezkariak izan beharko dute.

Batzorde Paritarioko kideak izendatuko dira Hitzarmenaren indarraldirako eta haren luzapen posibleetarako, eta izendapenaren iraupena aldatu egin ahal izanen da, Enpresako langileen ordezkaritza-organoak erabat edo partzialki berritzen badira, hala erabakitzen badute.

Batzorde Paritarioa urtean behin elkartuko da ohiko bilkuran. Bi alderdietako edozeinek eskatuta eginen dira bilerak, biltzeko eskaera egiten denetik gehienez 15 egun naturalen buruan.

Artikulu honi jarraikiz sortzen den Batzorde Paritarioak eginkizun hauek izanen ditu:

a) Hitzarmeneko manu guztiak interpretatzea eta hura zaintzea.

b) Hitzarmen honen edukien interpretazioaren eta/edo aplikazioaren esparruan izan daitezkeen desadostasun eta erreklamazio indibidual eta kolektiboen berri izatea, beti, edozein jarduketa administratibo edo jurisdikzional egin aurretik; salbuetsita gelditzen dira kaleratzeak, zigorrak, lan-baldintzen eta oporren aldaketak eta hogeita hamar egunetik beherako iraungitze-epea duten bestelako alderdiak. Kasu guztietan, izapide hori egintzat joko da eta irekita geldituko da bide judiziala edo administratiboa Lan Arbitrajeko Auzitegiaren aurrean, eskaera edo erreklamazioa aurkeztu eta 30 eguneko epea igaro ondotik, betiere Batzordeak ez badu ebazpenik edo irizpenik eman. Arau bidez ebazpen-epe laburragoa ezartzen den kasuetarako legezko epeari jarraituko zaio.

c) Enpresan lanaren alorrean sor daitezkeen alderdien bitartekaritza eta/edo adiskidetzea, betiere alderdiek aldez aurretik akordio bat adosten badute eta berariaz eskatzen badute.

d) Batzorde Paritarioak bere funtzionamendua arautzen ahalko du barne-erregimeneko arautegi baten bidez, zeina hitzarmen kolektiboa argitaratu eta hiru hilabeteko gehieneko epean onetsi beharko baita. Testu honetan ezarrita ez dauden alderdietarako, honako hau ezartzen da:

1.–Batzorde Paritarioa, salbuespenez, bi alderdietako edozeinek eskatzen duenean bilduko da. Eskaera idatziz eginen da; zer gai landuko den eta zergatik egiten den adieraziko da, eta alderdietako bakoitzaren gehiengo bidez onetsiko dira erabakiak.

2.–Batzorde Paritarioari planteatzen zaizkion gaiak idatziz aurkeztuko dira, behar adinako informazioarekin, arazoa behar bezala ezagutuz aztertu ahal izan dezan.

3.–Batzorde Paritarioaren erabakien akta eginen da, idatziz jakinaraziko zaizkie esku hartu behar dutenei, langileen gainerako legezko ordezkariei, halakorik balego, eta Enpresari, erabakien berri izan dezaten. Kopia bidaliko zaio lan-agintaritzari, argitaratu dezaten.

9. artikulua. Lan Gatazken Akordio Estrajudizialari atxikitzea.

Hitzarmen hau sinatzen duten alderdiek hitzartu dute interpretazioan eta aplikazioan sortzen diren desadostasun eta gatazka guztiak, bai taldekoak bai banakakoak, Nafarroako Lan Gatazkak Konpontzeko Auzitegiaren esku jarriko direla, bitartekotza- eta adiskidetze-faseetan, eta alderdiek konpromisoa hartzen dute beren borondatez aipatutako auzitegiaren arbitraje-prozeduraren esanetara jartzeko ahaleginak egiteko.

Klausula hau, beraz, alderdiak Lan Gatazkak Konpontzeko Auzitegiari atxikitzearen adierazpena da, Langileen Estatutuaren 83. artikuluak arautzen duen eraginkortasun orokorreko izaera du, eta, horren ondorioz, itunak behartzen ditu beren desadostasunak epaiketara jo aitzin auzitegi horren bitartekotza- eta adiskidetze-prozeduretan azaltzera. Hori horrela, ez da nahitaezkoa atxikimendua berariazkoa eta banakakoa izatea, arbitrajera borondatez lotzeko ez bada.

III. KAPITULUA.–KONTRATAZIOA ETA LANPOSTUA UZTEA

10. artikulua. Kontratazioa.

Langileen Estatutuan aurreikusten diren eta egokitzat jotzen dituen kontratu-modalitateak egiten ahalko ditu Enpresak bere premien arabera, betiere legez ezarritako eskakizunak betez.

11. artikulua. Lanaldi partzialeko kontratuak.

Enpresak lanaldi partzialeko kontratuak egiten ahalko ditu, unean-unean indarrean den araudiaren arabera.

Lanaldi partzialeko kontratuen jardunaldi-banaketa irregularra lanaldi osoko kontratuen baldintza berdinetan eginen da, betiere lanaldiaren proportzionaltasuna errespetatuz.

Eguneko lanaldian bi eten ere egiten ahalko dira, Enpresak hala erabakitzen badu, zerbitzuak jardueraren eskakizun espezifikoetara egokitzeko. Zerbitzuak nagusiki bulegoan ematen dituzten langileen kasuan, eten bakar bat egiten ahalko da eguneko lanaldian.

Lanaldi partzialeko langileek lanaldi osokoen eskubide berberak dituzte. Kasu guztietan, lan egindako denborarekiko proportzioan berma daitezkeen eskubideak proportzionaltasun horren arabera emanen dira.

Enpresak berariazko konpromisoa hartzen du, lanaldi partzialeko langileez ari garela, etengabeko lanbide prestakuntzarako irispidea dutela, lanpostuan gora egiteko aukera dutela eta mugikortasun profesionala dutela zaintzeko.

–Ordu osagarriak: Urteko konputuan gutxienez asteko hamar orduko lanaldia duten lanaldi partzialeko kontratuetan soilik egin daiteke ordu osagarriei buruzko hitzarmen bat. Enpresak lan-kontratuan edo geroagoko hitzarmenean lanaldi partzialeko langilearekin itundu ditzakeen ordu osagarrien muga ezartzen da kontratatutako ordu arrunten %30ean; ehuneko hori %60 zabaldu daiteke, langilearekin hitzartu ondotik.

Lanaldi partzialeko langileak ordu osagarriak zer egun eta ordutan egin behar dituen jakin beharko du gutxienez hiru egun lehenago jakinarazita, alde batera utzita presazko eta aurreikusi ezineko egoerak; kasu horietan, aurreabisua murrizten ahalko da, egoeraren arabera.

Ordu osagarriei buruzko hitzarmena bertan behera uzten ahalko du lanaldi partzialeko langileak, hamabost egun lehenago jakinarazten baldin badu, hitzarmen hori izenpetu zenetik urtebete igaro ostean, baldin eta ondorengo egoeretako bat gertatzen bada:

1. Langileen Estatutuaren 37.6 artikuluan zehaztutako familia-erantzukizunak artatzea.

2.a Prestakuntzak ezarritako beharrizanak, orduen bateraezintasuna egiaztatzen bada.

3.a Lanaldi partzialeko beste kontratu batekin bateraezina izatea.

Nolanahi ere, ordu arruntak eta ordu osagarriak gehituta, barne direla aldez aurretik hitzartuak eta borondatezkoak, ezin izanen da lanaldi partzialeko lanaren legezko muga gainditu.

Enpresaren eta langilearen artean edozein unetan hitzartu litezkeen borondatezko ordu osagarriak, betiere legez ezarritako eskakizunak betetzen direla, lanaldi partzialeko kontratuan aurreikusitako ordu arrunten %30 bitartekoak izan daitezke.

12. artikulua. Aldizkako langile finkoak.

Aldizkako lan-kontratu finkoak egiten ahalko dira Langileen Estatutuan aurreikusitako kasuetan, hartan ezarritako eskakizunak betetzen badira.

12.1. Formalizazioa.

Enpresan, aldizkako lan-kontratu finkoa idatziz formalizatuko da beti, eta bertan honako hauek aipatuko dira:

–Kontratua nolakoa den.

–Kontratuaren xede diren zerbitzuak eginen diren enpresaren jardueraren funtsezko elementuak.

–Jarduera edo jarduerak zer sasoitan eginen diren.

–Lanaldia eta lan-egutegia, Enpresak Nafarroan duen hitzarmen kolektiboan ezartzen denaren arabera.

–Laneratzeko deia egiteko modua eta hurrenkera, Enpresak Nafarroan duen hitzarmen kolektiboan ezarri bezala.

12.2. Deitzea.

Lantoki bakoitzeko aldizkako langile finkoei deituko zaie beharrezkoa denean aldizkako jarduera finkoa estaltzeko, lantokiko maila profesional eta lanpostu bakoitzeko antzinatasun-ordenari zehatz-mehatz jarraikiz.

Aldizkako langile finkoa lanean hasi baino hiru egun lehenago egin behar da deialdia.

Aldizkako langile finkoaren laneratzea proportzionala eta/edo pixkanakakoa izan daiteke, unean-unean lan-bolumenak sortzen dituen premien arabera.

Gainera, aldizkako langile finkoak ez dira ordezten ahalko, kontratazio-modalitatea zeinahi dela ere, salbu eta ordezkapeneko aldi baterako kontratuak egiten direnean.

Aldizkako langile finkoek dena delakoagatik ezin badute beren lanpostuan hasi dei egiten zaienean, horren berri eman beharko diote enpresako zuzendaritzari deia jaso eta 72 ordu igaro baino lehen. Urtebetean hiru aldiz deitu eta lanari uko eginez gero, aldizkako lan-kontratua galduko eta langileak bere borondatez baja hartu duela pentsatuko da.

Aurreko apartatuan ezarritakoarekin bat lanean hasteko deia jaso eta 72 orduko epean enpresan lanean hasten ez den aldizkako langile finkoak aldizkako langile finko izateari utziko dio, eta egoera hori enpresako borondatezko bajarekin parekatuko da.

Aldizkako langile finko guztiak lanean hartzeko nahikoa lan-jarduerarik ez izatearen ondorioz deirik ez jasotzea ez da kaleratzetzat joko. Egoera horrek berekin ekarriko du kontratuaren aldi baterako etetearen jarraipena, betiere deien hurrenkeran beherago dagoen aldizkako beste langile finkoren bat hasten ez bada lanean.

Kontratua eteteko kausa izanen dira Langileen Estatutuan legez aitortzen direnak.

12.3. Aldizkako langile finkoak lanpostua uztea.

Aldizkako langile finkoek, enpresaren jarduera-premiak murriztuz joan ahala, lanpostua utziko dute, 12.2 puntuan ezarritako ordenari jarraikiz. Lanpostu-uzte horren berri idatziz jakinaraziko zaio langileari.

Enpresako zuzendaritzak, zerbitzu-aldia bukatzen denean, egiazki lan egindako lanegunen ziurtagiria emanen dio aldizkako langile finko bakoitzari.

12.4. Antzinatasuna.

Aldizkako langile finkoen antzinatasuna zenbatzeko, kaleratzeaz bestelako ondorioetarako (kalkulatzeko formula propioa du, benetan lan egindako denboraren arabera), kontuan hartuko dira Enpresan zerbitzuak eskainitako aldiak eta jarduerarik gabeko etenaldiak, betiere etenaldi horietan aldizkako langile finkoak ez badu lanik egin (langile autonomo gisa edo beste modalitateren batean). Etenaldiei dagokien antzinatasuna eskatzeko, lan-bizitzaren ziurtagiri bat aurkeztu beharko dio Enpresari.

12.5. Aldizkako kontratu finkoa kontratu finko arrunt bihurtzea.

Aldizkako kontratu finkoak kontratu finko arrunt bihurtzeko, antzinatasunaren hurrenkera, egokitasuna eta enpresaren beharrak kontuan hartuko dira.

13. artikulua. Probaldia.

Probaldi bat hitzartzen ahalko da, zeinean Enpresak eta langileak probaldiaren helburu diren esperientziak eta/edo funtzioak egin beharko baitituzte.

Hau izanen da probaldiaren iraupena:

–3 hilabete, I. lanbide-taldeko langileentzat.

–2 hilabete, II. eta III. lanbide-taldeetako langileentzat, azken horretako IV. lanbide-mailako langileentzat izan ezik.

–15 egun, III. lanbide-taldeko IV. lanbide-mailako langileentzat.

Aldi baterako kontratuez ari garela, probaldia kontratuaren iraupenari doituko zaio, proportzionalki murriztuko baita.

Probaldian, langileak bere lanbide-taldeari eta -mailari eta lanpostuari dagozkion eskubide eta betebeharrak izanen ditu, lan-harremana suntsitzearen ondoriozkoak izan ezik (aldeetako edozeinen eskariz suntsiaraz daiteke lan-harremana).

Probaldia amaitzen bada atzera egiterik izan gabe, kontratuak ondorio guztiak sortuko ditu eta lanean aritutako aldia langilearen antzinatasunerako kontatuko da. Probaldiaren zenbaketa etengo du egoera hauek probaldian gertatzeak, eta haiek amaitzen direnean jarraituko du: aldi baterako ezintasuna, jaiotzagatiko eta/edo adopzioagatiko baimena, adoptatzeko helburuekiko zaintza, haurdunaldiko arriskua, bularreko haurra zaintzen den aldiko arriskua, baimenak metatuta bularreko haurra zaintzeko lan-etena eta genero-indarkeria.

14. artikulua. Lana borondatez uztea.

Enpresan zerbitzua eten nahi duten langileek hori jakinarazi behar diote hari, aurreabisurako epe hauek betez:

–45 egun, I. lanbide-taldeko langileentzat.

–Hilabete, gainerako langileentzat, III. lanbide-taldeko IV. lanbide-mailako langileentzat izan ezik, 15 eguneko epea izanen baitute.

Enpresari idatziz jakinarazi beharko zaio, bi aletan; ale bat langileari itzuliko zaio, hartu-agiri eta guzti.

Aurreabisua ez bada betetzen, bete ez diren aurreabisu-egunei dagokien soldata kenduko zaio ezohiko haborokinengatik edo beste edozein ordainsariren ondorioz langileari egokitu dakiokeen likidazioari, baldin eta haborokinen ondoriozko likidazioaren zenbatekoa ez bada nahikoa bete ez diren aurreabisu-egunen soldata estaltzeko.

15. artikulua. Lana uzteagatiko likidazioa.

Langileak lana uzten duenean, kontzeptu guztiengatik sortuak dituen hartzekoen likidazioa ordainduko da; hartzeko horiek mugaeguneratuak, likidoak eta galdagarriak izan daitezke eta jasotzeke izan behar ditu: soldatak, oporrak, aparteko ordainsarien zati proportzionala, etab.

Likidaziotik kenduko zaio lan-harremanaren testuinguruan Enpresari zor izan diezaiokeen edozein zenbateko likido, mugaeguneratu eta galdagarri, betiere behar bezala justifikatuta badago.

IV. KAPITULUA.–LANBIDE-SAILKAPENA

16. artikulua. Antolaketa-eskumena.

Enpresako zuzendaritzari bakarrik dagokio lanaren antolaketa teknikoa eta praktikoa egitea, Langileen Estatutuaren 20. artikuluan xedatutakoari jarraikiz, eta antolaketarako, arrazionalizaziorako eta modernizaziorako egokiak iruditzen zaizkion sistemak ezarri ahal izanen ditu, eta bidezkoa iruditzen zaion moduan egituratuko ditu enpresako atal edo departamentuak. Zuzendaritzaren eskumenak dira, besteak beste, lanpostuen balorazioa eta sailkapena, langileak haietara egokitzea beren gaitasunen eta ahalmenen arabera, diru-sarreren eta igoeren erregimena, ordainsari-mailak, sarreren eta irteeren kontrola eta jardunaldien eta ordutegien malgutasuna, hitzarmen kolektibo honetan eta Legean xedatutakoari jarraikiz, betiere.

17. artikulua. Lanbide-sailkapena. Irizpide orokorrak.

Langileak lanbide-taldetan sailkatzen dira, kontuan hartuta esperientzia, ezagutzak, lanpostuaren zailtasuna, erantzukizuna, agintea eta lanposturako beharrezko diren gainerako gaitasun profesionalak eta faktoreak.

Lanbide-taldeen barruan, lanbide-mailak daude funtzioak betetzeko, titulazio-mailen, konplexutasunaren, esperientziaren, beharrezko gaitasunen eta bestelako alderdi batzuen arabera, hitzarmen kolektibo honetan azaltzen denez.

18. artikulua. Lanbide-taldeak

Lanbide-talde hauek ezartzen dira:

1. I. taldea. Osasun-langile fakultatiboak.

Lanbide-talde honetan sartzen dira zuzenean osasun-laguntzari lotutako funtzioak egiten dituzten langile fakultatiboak, barne direla espezializazio-maila altuenak eta ezagutza teknikoak eskatzen dituztenak eta erantzukizun- eta autonomia-maila handienekoak.

Talde honetan sartzen dira lanbide-maila hauek:

I.–I. maila: Barrutiko fakultatibo espezialistak: Lanbide-maila honetan sartzen dira konplexutasun handieneko lan-prozesuak antolatzen eta kontrolatzen dituzten eta beren funtzioak autonomia-maila handiz egiten dituzten medikuntzako gradua duten langileak. Beste lanbide-maila batzuetako langileak zuzentzea ere badagokie beren lanaren barruan.

Medikuak sartzen dira maila honetan.

II.–II. maila: Lanbide-maila honetan sartzen dira analisi klinikoko laborategirako laginak jasotzen dituzten langileak, pazienteak aztertzen eta kontrolatzen dituztenak, azterketak inprimatzen eta artxibatzen dituztenak, saileko beste edozein langileri dagozkion osasun-funtzioak egiten dituztenak, Enpresak dituen ingurumen-konpromisoak betetzen direla zaintzen dutenak eta laneko segurtasuneko eta osasuneko kudeaketa-sistemako prozedurak eta jarraibideak betetzen dituztenak.

Erizainak sartzen dira maila honetan.

2. II. taldea. Osasun-langile ez-fakultatiboak.

Lanbide-talde honetan sartzen dira zuzenean osasun-laguntzari lotutako funtzioak egiten dituzten langile fakultatiboak, barne direla izaera osagarria baino ez dutenak, ezagutza teknikoak eskatzen dituztenak eta erantzukizun- eta autonomia-maila handienekoak, baita kualifikazio profesionala bakarrik eskatzen duten izaera osagarrikoak ere.

I.–I. maila: Lanbide-maila honetan sartzen dira pazienteak aztertzen eta kontrolatzen dituzten langileak, azterketak inprimatzen eta artxibatzen dituztenak, saileko beste edozein langileri dagozkion osasun-funtzioak egiten dituztenak, Enpresak dituen ingurumen-konpromisoak betetzen direla zaintzen dutenak eta laneko segurtasuneko eta osasuneko kudeaketa-sistemako prozedurak eta jarraibideak betetzen dituztenak. Lanbide-maila honetako langileek, halaber, egiaztatu beharko dituzte pazienteek kontsultetan emandako datuak, proba erradiodiagnostikoetarako egokiak diren ebaluatzeko, eta harremanetan jarri beharko dute probak egin aurretik prestakuntza espezifikoak egin behar dituzten pazienteekin.

Goi-mailako osasun-teknikariak sartzen dira maila honetan.

Enpresak beren funtzioetarako eskura jartzen dizkien bitartekoak hondatzen badira, betiere ez badute beste egitekorik, maila honetako langileek pazienteekin harremanetan jarri beharko dute haien hitzorduak berrantolatzeko.

II.–II. maila: Lanbide-maila honetan sartzen dira I. eta II. lanbide-taldeetako I. eta II. lanbide-mailetako langileei osasun-laguntza ematen dieten langileak.

Lanbide-maila honetan sartzen dira erizaintzako zainketa lagungarrietako teknikariak (lehen klinikako laguntzaile esaten zitzaienak) edo EZLTak.

3. III. taldea: Osasun-arlokoak ez diren langileak.

Lanbide-talde honetan sartzen dira zuzenean gaixoaren osasuna artatzeari lotzen ez zaizkien eta izaera tekniko eta administratibo nabarmeneko funtzioak dituzten langileak eta erakundearen jarduera bermatzeko lanpostuei dagozkien funtzioak (adibidez, garbitegia, garbiketa, mantentze-lanak, etab.) egiten dituztenak.

I.–I. maila: Lanbide-maila honetan sartzen dira lan-metodo zehatz batean oinarritutako eragiketek osatzen dituzten administrazio-lanak egiten dituzten langileak, erdi-mailako ikuskatzea dutenak (egiteko horiek ezagutza profesional espezifikoak eskatu ohi dituzte); beren mendeko langileen egitekoak gainbegira ditzakete.

Administrari-ofizialak sartzen dira maila honetan.

II.–II. maila: Lanbide-maila honetan sartzen dira jarraibide ez-espezifikoei jarraikiz modu autonomoan egiten diren administrazio-lanak egiten dituzten langileak. I. lanbide-mailako langileen aginduak betetzeak mugatzen du haien autonomia.

Administrazio-langileak sartzen dira maila honetan.

III.–III. maila: Lanbide-maila honetan sartzen dira jarraibide espezifikoak betez egiten diren administrazio-lanak egiten dituzten langileak. Administrazio-, eragiketa- eta kudeaketa-lan erraz egiten dituzte, ikuskaritzapean eta autonomiarik gabe.

Administrari laguntzaileak sartzen dira lanbide-maila honetan.

IV.–IV. maila: Lanbide-maila honetan sartzen dira lanpostuan aritzeko titulaziorik behar ez duten zerbitzu osagarrietako langileak.

Garbiketako, garbitegiko eta beste eremu batzuetako langileak sartzen dira maila honetan.

19. artikulua. Maila-igoera.

Enpresaren antolaketa-eskumenean sartzen da lanpostu hutsak amortizatzea, lanpostu berriak sortzea eta igoerak sustatzea.

III. lanbide-taldeko –laguntza-langileei dagokiena– I., II. eta III. mailetan gelditzen diren lanpostu hutsak, konfiantzazko edo zuzendaritzako egitekorik barne hartzen ez dutenak, dagoeneko lantaldean dauden langileei eskainiko dizkie Enpresak, kanpoko langileei eskaini aurretik.

Enpresak idatziz jaso beharko ditu lanposturako beharrezkotzat jotzen dituen gaitasunak eta gainerako irizpideak, eta plantillari aurkezten dion eskaintzan jaso beharko ditu; eskakizun horiek betetzen dituzten Enpresako langileak lanpostura aurkezten ahalko dira, eta lanpostua eskuratzeko lehentasuna izanen dute kanpoko langileen aldean. Halaber, Enpresako zenbait izangaik lanpostu bera eskatzen badute esleipen-lehentasuna zehazteko irizpideak ezarri beharko ditu Enpresak, eta berdintasun-planean jasotako lehentasunak aplikatu beharko ditu.

Probaldi bat ezarriko da lanpostu hutsa betetzen duen langilearentzat; probaldi horren iraupena eskatutako titulazioaren arabera kanpoko langileentzat ezarriko litzatekeenaren berdina izanen da. Hautatutako barne-izangaiak ez badu probaldia gainditzen, lehen zuen lanpostura edo antzeko batera itzuliko da, eta kanpo-kontratazioan eskainiko da lanpostu hutsa.

Hautatze- eta lehentasun-eskubide bera izanen dute aldi baterako langileek, beste txanda edo zerbitzu batean interesa dakiekeen lanpostu hutsen bat gelditzen denean, hartarako gaitasuna badute eta ez badago sustapenik. Enpresak modu arrazoituan ebatziko du eskaera.

20. artikulua. Balioaniztasun funtzionala.

Lan-kontratuan balioaniztasun funtzionala ezartzen ahalko da; hau da, bi lanbide-talderi edo gehiagori dagozkion lanak egitea.

Balioaniztasun funtzionala hitzartzen bada, edota lanbide-talde bati baino gehiagori dagozkion eginkizunak betetzea, denbora luzeagoan egiten diren funtzioen arabera parekatuko dira.

V. KAPITULUA.–LANALDIA, OPORRAK, LIZENTZIAK ETA LAN-UTZIALDIAK

21. artikulua. Lanaldia.

21.1. Benetako lanaldia urtean 1.770 ordukoa izanen da.

Eguneko lanaldi arrunta batez beste benetako laneko 8 ordukoa izanen da eguneko, lanaldiaren banaketa irregularrean izan ezik; egoera horretan, eguneko gehieneko lanaldi arrunta benetako laneko 10 ordukoa izanen da, gehienez ere.

Lanaldia astelehenetik igandera bitarte banatuko da.

Enpresako zerbitzuen egiturak eta haren premiek eskatzen duten moduan banatuko da lanaldia. Enpresak lanaldiaren %15 bitarte (265,5 ordu) modu irregularrean banatzen ahalko du urtean zehar lan programatuei eta lan- eta/edo jarduera-puntak eta -pilaketak ekartzen dituzten bestelako egoerei erantzuteko.

Lana modu irregularrean banatzen denean, kasu guztietan, eskakizun hauek bete beharko dira:

–Enpresak lanaldi irregularra erabiltzeko premiaren berri jakinaraziko dio langileari mota horretako lanaldia egin behar denean, eta horretarako arrazoiak adieraziko ditu. Informazio hori ahalik eta aurrerapen handienarekin emanen da, eta, kasu guztietan, bost egun lehenago.

–Banaketa irregularrak eguneko eta asteko gutxieneko atseden-denborak errespetatu beharko ditu.

Ezusteko eta ohiz kanpoko absentziak estaltzeko egin beharreko orduak eta planifikatu gabeko gainerako orduak haien izaera dela-eta dagozkien aurreabisuei doituko zaizkie; lanaldiaren banaketa irregular bidez estaltzea erabakitzen bada, bost eguneko aurrerapenarekin egin beharko da aurreabisua.

21.2. Lanaldi arruntean diharduten eta lanaldi trinkoan 6 orduz edo gehiagoz aritzen diren langileek 25 minutuko atsedenaldia izanen dute, eta atsedenaldi hori benetako lan-denboratzat joko da. Lanaldiaren iraupena benetako laneko 6 ordutik beherakoa bada, ez da atsedenaldirik eginen.

21.3. Lanaldi osoko langileen asteko atsedena elkarren segidako 2 egunekoa izanen da.

22. artikulua. Lan egutegia.

Iruñeko lan-egutegiari jarraikiz eginen da lan-egutegia, eta dagozkion doikuntzak eginen dira, egutegia benetako laneko urteko lanaldira egokitzean egin beharreko atseden-egunak ezarriz.

23. artikulua. Aparteko orduak.

Aparteko orduak dira benetako laneko 1.770 orduak gainditzen dituztenak, eta borondatez eginen dira.

Ordu horiek ekonomikoki edo atsedenarekin konpentsatuko dira: lan egindako aparteko ordu bakoitzak 1,50eko balioa izanen du ordu arrunten aldean. Enpresaren eta langilearen artean adostuko da aparteko orduak atsedenaren bidez edo ekonomikoki konpentsatuko diren.

Aparteko orduak atsedenaren bidez konpentsatzea hitzartzen bada, guztia batera hartu beharko da.

Aparteko orduak atsedenaren bidez konpentsatzeko, 4 hilabeteko epea izanen da. Hala ere, urte-amaieran langileetako inork ezin izanen du 1.770 ordutik gorako benetako lana egin; azken hiruhilekoan egindako soberako orduak baino ezin izanen dira gelditu konpentsatzeko, zeinak hurrengo urteko urtarrilaren 31ren aurretik konpentsatzen ahalko baitira.

Aparteko orduen konpentsazio ekonomikoa orduak egiten diren hilabetearen hurrengo hilabeteko nominan ordainduko da.

24. artikulua. Gaueko lana.

Lanaren eta zerbitzuetako langileen txanden antolamendu praktikoa Enpresaren ahalmen praktikoa dela aitortzen da, eta gaueko lantzat jotzen da 22:00etatik hurrengo eguneko 06:00etara egindakoa.

Ordutegi horretan egindako lana honela konpentsatuko da ekonomikoki: ordu arruntaren balioaren 1,15 egindako gaueko ordu bakoitzeko.

25. artikulua. Oporrak.

25.1. Langile guztiek izanen dute ordaindutako 22 laneguneko oporraldirako eskubidea.

25.2. Langileek Enpresari adierazi beharko diote zer datatan eginen dituzten oporrak, eta oporren koadroa finkatu beharko da dagokion urteko oporraldiaren hasiera baino bi hilabete lehenago. Sail bakoitzean, langileek datak elkarrekin hitzartuz antolatuko dituzte oporrak; horretarako, txandatze-sistema orekatu bat erabiliko dute, bermatuko duena langileak eta lehentasun-postua urtero txandakatzen direla; hala, urte batzuen buruan, langile guztiak igaroko dira lehentasun-maila berdinetatik. Oporrak antolatzeko garaian, bermatu beharko da beti izatea lanean lanbide-maila bakoitzeko langile bat, gutxienez.

Ezohiko kasuetan eta familia-arrazoiak direla eta, ezarritako txandatze-sistema aldatzen ahalko da, betiere aldaketa horrek eragin diezaieken lankideen adostasunarekin.

25.3. Urtean zehar Enpresan sartu edo enpresa uzten duten langileek oporrak izanen dituzte, lan egindako denboraren proportzioan. Oporretako datak hautatzeko epea itxi ondotik laneratzen badira, urte horretarako, Enpresarekin adostuko du noiz hartu oporrak Enpresan sartzen den unean; opor horiek ezin izanen dira hartu laneratzen den urteko abenduaren 31 baino geroago.

25.4. Egutegiaren arabera finkatutako oporraldiak bat egiten badu langile baten haurdunaldiaren edo erditzearen ondoriozko edo bularra emateko aldi baterako ezintasuneko egoera batekin edo Langileen Estatutuaren 48. artikuluko 4., 5. eta 7. apartatuetan ezarritako lan-kontratua eteteko aldiarekin, langileak eskubidea izanen du opor-egunak aldi baterako ezintasuna edo dagokion baimena bukatutakoan edo kontratuaren etenaldia bukatutakoan hartzeko, urte naturala bukatu bada ere.

Aurreko paragrafoan adierazitako gertakariez besteko arrazoiak direla-eta, oporraldia heltzean langilea aldi baterako ezintasuneko egoeran badago, eta ezin baditu opor guztiak edo haien zati bat hartu, oporrei dagokien egutegiko urtean, ezintasun-egoera bukatzean hartzen ahalko dira, oporretarako eskubidea sortu den urtearen bukaeratik hemezortzi hilabete baino gehiago igaro ez badira.

25.5. Galdu eginen dira urte naturalean eta aurretiaz adierazitako aldiei dagozkien egunetan sortutako eta hartu gabeko oporrak, ezinbesteko egoeretan edo legez aitortutako egoeretan izan ezik.

26. artikulua. Lizentziak eta baimenak.

Langileek eskubidea izanen dute Langileen Estatuan ezarritako lizentziak, baimenak eta lan-eszedentziak hartzeko.

Baimen horietaz gainera, langileek emakumeen eta gizonen berdintasunerako planean ezarritako norberaren aukerako bi egun izanen dituzte; norberaren aukerako egun berreskuragarriak izanen dira kasu guztietan. Egun horiek gutxienez 5 egun baliodun lehenago eskatu beharko dira.

VI. KAPITULUA.–ORDAINSARIAK

27. artikulua. Soldaten araubidea.

Hitzarmen kolektibo honetan ezarritako soldaten araubidea hitzarmenean bertan definitzen diren oinarrizko soldatak eta soldata-osagarriek osatzen dute.

Langileek nomina helbideratua duten banku-kontura transferentzia eginez ordainduko da soldata. Enpresak hilero prestatuko du nomina, non zehaztuko baititu ordainsariaren kontzeptuak, gastuak eta dagozkion atxikipen eta kenkariak.

28. artikulua. Soldata-igoerak.

Hitzarmen kolektibo honek indarra duen bitartean, soldatak honela igoko dira:

28.1. 2024. urterako soldata-igoerak:

2024ko urtarrilaren 1etik aurrera, soldaten taula berriak aplikatuko dira. Horrez gainera, osagarri pertsonala %3 igoko da.

Hitzarmen kolektiboa sinatu eta hurrengo hilabetean aplikatuko zaizkie igoera horiek hitzarmena sinatzen den datan plantilla osatzen duten langileei.

28.2. 2025erako eta 2026rako soldata-igoerak:

–2025eko urtarrilaren 1etik aurrerako ondorioekin, soldaten taulak eta kontzeptuak %2 igoko dira.

–2026ko urtarrilaren 1etik aurrerako ondorioekin, soldaten taulak eta kontzeptuak %2 igoko dira.

29. artikulua. Oinarrizko soldata.

Oinarrizko soldata da Enpresako langileei egindako zerbitzuengatik ordaintzen zaien prestazio arrunta, dauden lanbide-taldearen eta, dagokionean, talde bateko lanbide-kategoriaren arabera. Urteko oinarrizko soldataren eta hileko soldataren zenbatekoa, baita aparteko ordainsarien zati proportzionala ere, I. Eranskineko soldaten tauletan jasotzen dira.

Langileari dagozkion ordainsariak lan egindako denboraren proportzioan ordainduko zaizkio.

Oinarrizko soldata hileko hamabi kuotatan ordainduko da.

30. artikulua. Aparteko pagak.

Urte natural bakoitzeko bi aparteko ordainsari jasotzeko eskubidea izanen dute langileek; oinarrizko soldataren hilabeteko kuota batekoa izanen da haietako bakoitza.

Aparteko ordainsariak seihileko bakoitzean sortuko dira, eta sortzen diren urteko sei hilabeteetako hileko nominan hainbanatuta ordainduko dira.

31. artikulua. Joan-etorrietarako prestasunaren plusa.

Enpresak hileko 325,00 euroko zenbateko gordina ordainduko dio langileari kontzeptu honengatik, langileak hilabete horretan Enpresak eskatutako joan-etorriak egiteko izandako prestasuna konpentsatzeko; joan-etorri horiek probintziako eta beste probintzia batzuetako lantokietara eginen dira, lantokia dagoen udalerritik kanpo betiere, barne dela lantokia dagoen metropoli-barrutia. Langileak joan-etorri horiek egitea beharrezkoa ez den hilabeteetan, ez du plus hori jasoko.

32. artikulua. X izpien plusa.

Soldata-osagarri bat ezartzen da erradiazio ionizagarriarekiko esposizioa duten lantokietan lan egiten duten goi-mailako osasun-teknikarientzat.

Hileko oinarrizko soldataren ehuneko laukoa (%4) izanen da osagarria.

Osagarri hori jasotzeko eskubidea izateko, lantokian ohikotasunez eta modu jarraituan egin beharko da lan.

Osagarri hori jasoko da bakarrik langileak erradiazio ionizagarriarekiko esposiziodun gisa kalifikatutako lanpostu batean diharduenean benetan lanean, eta eskubidea ez da finkatuko osagarria jasotzen duen langilea erradiazio ionizagarriarekiko esposiziodun gisa kalifikatu gabeko lanpostu batera igortzen bada.

33. artikulua. Kilometrajea.

Enpresak une bakoitzean indarrean den lan- eta zerga-legedian zehaztutako zenbatekoak ordainduzko dizkio langileari egindako kilometro bakoitzeko eta/edo dietengatik. Hitzarmen kolektibo hau sinatzen den datatik aurrera, 0,26 euro/egindako km-an finkatzen da kilometrajeagatiko zenbatekoa.

Kanpoan gelditzen dira udalerri berean edo udalerri mugakideetan dauden lantokietarako aldaketak, zeinak une bakoitzean aplikatu beharreko hitzarmenaren arabera tratatuko baitira, ez direnez joan-etorritzat jotzen formalki.

34. artikulua. Aldi baterako ezintasuna.

34.1. Gaixotasun arrunta.–Gaixotasun arruntaren ondoriozko aldi baterako ezintasunaren kasuetan, kotizazio-oinarriaren %80 jasoko da lehen egunetik, egun hori barne; 60 egun izanen dira gehienez prozesu jarraituetan eta 30 egun prozesu etenetan.

Osagarri horrek, nolanahi ere, soldata errealaren %100eko muga izanen du.

34.2. Laneko istripuak eta lanbide-gaixotasunak.–Hitzarmen kolektibo honen eraginpeko langileek, laneko istripu edo lanbide-gaixotasunen baten ondorioz aldi baterako ezintasuna (ABE) izaten badute, kotizazio-oinarriaren %100 kobratzeko eskubidea izanen dute lehenbiziko egunetik hasita.

Adierazitako hobekuntzek ez dute inoiz ere ekarriko eragindako langileak altan egonez gero kobratzen duena baino gehiago kobratzea.

35. artikulua. Gizonen eta emakumeen arteko berdintasuna lanean.

Enpresak eta langileen ordezkaritzak eremu guztietan, lanekoan barne, emakumeen eta gizonen arteko aukera-berdintasuna bultzatzeko konpromisoa adierazten dute eta ez dute sexuan oinarritutako zuzeneko edo zeharkako diskriminaziorik onartzen; halaber, erakundean benetako berdintasuna lortzeko neurriak bultzatzearen eta sustatzearen alde egiten du, Gizonen eta Emakumeen Berdintasun Eragingarrirako martxoaren 22ko 3/2007 Lege Organikoan printzipio horri buruz xedatutako definizioari jarraikiz.

Testuinguru horretan, Enpresan indarrean den berdintasun-planaren eta haren jarraipenaren bidez, Enpresako lan-harremanen esparru osoan emakumeen eta gizonen berdintasuna modu eraginkorrean aplika dadin zainduko dute.

Halaber, adierazten dute berdintasunarekiko konpromisoa dutela zentzu zabalean eta ez dutela inolako kasutan onartzen diskriminaziorik langileen nazionalitatea, jaiotza, arraza-edo etnia-jatorria, sexua, erlijioa, uste eta iritziak, adina, desgaitasuna, sexu-orientazioa eta -identitatea, genero-adierazpena, gaixotasuna edo osasun-egoera, egoera serologikoa eta/edo patologiak eta nahasmenduak izateko aurretiko joera genetikoa, hizkuntza, egoera sozioekonomikoa eta beste edozein egoera pertsonal eta sozial direla eta.

VII. KAPITULUA.–DIZIPLINA-ARAUBIDEA

36. artikulua. Faltak.

Faltatzat jotzen da kapitulu honetan eta lanaren alorrean indarrean diren bestelako arau batzuetan xedatutakoari jarraikiz laneko betebeharren gaineko arau-haustea edo ez-betetzea den edozein ekintza (legezkoak edo kontratuzkoak), eta Enpresak zigortzen ahalko ditu, hurrengo artikuluetan xedatzen diren mailakatzearen eta prozeduren arabera.

Datozen epigrafeetan zehazten diren taldeetako falta-moten zerrenda ez da itxia, eta ez du esan nahi ez dagoenik bestelako faltarik; zerrendakoekin duten analogiaren arabera sailkatuko dira, eta faltatzat jotzen ahalko da Langileen Estatutuaren 54.2 artikuluan oro har falta gisa tipifikatuta dagoen edozein ekintza edo ez-egite dolozko eta axolagabe.

37. artikulua. Falten mailakatzea.

Langileen faltak honela daude sailkatuta: arinak, astunak eta oso astunak, haien garrantziaren eta ondorioen arabera.

1.–Falta arintzat hartzen dira honako hauek:

1. Lanera joatean puntualtasunik ez izatea, bidezko arrazoirik izan gabe, hilabetean hiru aldiz hamabost minutu bitarte.

2. Langileak modu puntualean eta aldebakarrez laneko txandak aldatzea, Enpresaren baimenik izan gabe aldez aurretik.

3. Puntualki lanetik alde egitea funtsezko arrazoirik gabe, denbora gutxirako bada ere.

4. Eginkizunak puntualki berandu betetzea, eta behar bezala ez erabiltzea Enpresaren lokalak, baliabideak, materialak eta dokumentuak.

5. Bidezko arrazoiak daudenean lanera ez agertzean Enpresari ez jakinaraztea horren berri epe egokian, hori egitea ezinezkoa izan dela frogatu ezean.

6. Enpresak IKTei dagokienez dituen arauak puntualki ez betetzea.

7. Kontratuko bestelako edozein ez-betetze arin.

2.–Falta astuntzat hartzen dira honako hauek:

1. Lanera joatean puntualtasunik ez izatea, bidezko arrazoirik izan gabe, hilabetean 5 aldiz hamasei eta hogeita hamar minutu bitarte.

2. Langileak aldebakarrez laneko txandak aldatzea behin baino gehiagotan, Enpresaren baimenik izan gabe aldez aurretik.

3. Egun batean lanera huts egitea behar den baimenik edo justifikatutako arrazoirik izan gabe.

4. Lanetik alde egitea arrazoi justifikaturik gabe, behin baino gehiagotan, denbora gutxirako bada ere. Horren ondorioz Enpresari kalte larria egin bazaio edo pertsonen osotasuna arriskuan jarri bada edo gainerako kideak asaldatu badira, falta oso astuntzat hartzen ahalko da.

5. Eginkizunak berandu eta behar ez bezala betetzea, eta behar ez bezala erabiltzea Enpresaren lokalak, baliabideak, materialak eta dokumentuak, behin baino gehiagotan, Enpresari inolako arriskurik edo kalterik eragin gabe.

6. Enpresako zuzendaritzaren edota zuzendaritzan nahiz antolaketan eskumenak dituztenen jarraibideak ez betetzea ohiko eginkizunetan. Desobedientzia errepikatua bada, edo laneko diziplina nabarmen haustea badakar, edo enpresarentzat edo pertsonentzat kalterik sortzen badu, oso astuntzat har daiteke.

7. Enpresaren gauzak edo janzkiak norberarentzat erabiltzea edo enpresaren instalazioetatik edo esparrutik ateratzea baimen egokirik gabe.

8. Behar den baimena izan gabe, norberarentzako lanak egitea lanaldiaren barrenean.

9. Hiru falta arin egitea 90 egun naturaleko epean, baita mota desberdinetakoak izanda ere, tartean zehapena edo idatzizko oharpena izan denean.

10. Jendeari, pazienteei edo gainerako langileei behar den adeitasunez eta arduraz arreta ez ematea.

11. Enpresako gainerako langileen prestakuntzan parte hartzeari uko egitea. Ezezko horren ondorioz Enpresari kalte larria eragiteko arriskua badago edo pertsonen osotasuna arriskuan jarri bada edo gainerako kideak asaldatu badira, falta oso astuntzat har daiteke, kasuan-kasuan.

12. Enpresak IKTei dagokienez dituen arauak behin eta berriz ez betetzea.

13. Kontratuko bestelako edozein ez-betetze astun.

3.–Falta oso astunak izanen dira honako hauek:

1. Lanera berandu iristea, hilean bost aldiz hogeita hamar minutu baino gehiago.

2. Langileak aldebakarrez laneko txandak aldatzea behin baino gehiagotan, Enpresaren baimenik izan gabe aldez aurretik, horren ondorioz Enpresari kalte-galerak eragiten bazaizkio.

3. Hiru egunetan lanera huts egitea behar den baimenik edo justifikatutako arrazoirik izan gabe hogeita hamar egun naturalen barruan, edo 6 egunetan hamabi hilabeteren barruan.

4. Lanetik alde egitea arrazoi justifikaturik gabe, behin baino gehiagotan, denbora gutxirako bada ere, Enpresari kalte larria egin bazaio edo pertsonen osotasuna arriskuan jarri bada edo gainerako kideak asaldatu badira.

5. Eginkizunak berandu eta behar ez bezala betetzea, eta behar ez bezala erabiltzea Enpresaren lokalak, baliabideak, materialak eta dokumentuak, behin baino gehiagotan, Enpresari edozein motatako arriskua edo kalteak eragin bazaizkio, barne dela izen onaren kaltea, edo puntualki arriskua edo kaltea eragin bazaio pazientearen osasunari.

6. Enpresako zuzendaritzari edo beren eginkizunak betez zuzentzeko eta antolatzeko eskumena dutenei edozein lan-arlotan men ez egitea, behin eta berriz gertatu bada edo horrek laneko diziplina agerian urratzen badu eta horren ondorioz enpresari edo pertsonei kalterik eragiten bazaie.

7. Iruzurra, leialtasunik eza edo konfiantza-abusua, dela agindutako kudeaketetan, dela lanorduetan lankideekin edo beste edozein pertsonarekin diren harremanetan; enpresaren berariazko baimenik gabe merkataritzazko edo industria-arloko negoziazioak egitea bere kontura edo beste norbaitentzat, eta enpresari bidegabeko lehia egitea enpresa-jardueran.

8. Langile baten lekua hartzea sarrera-, presentzia- eta irteera-erregistroak aldatuz lanpostuan.

9. Enpresari, beste lankideei edo beste edozein pertsonari ebastea, lapurtzea edo bidegabeko erabilera egitea, lantokian denean edo beste edozein lekutan, lanaldiak irauten duen bitartean.

10. Lantokiko erabiltzaileen edo langileen objektuez, dokumentuez edo materialez jabetzea edo diruzko nahiz gauzazko irabaziak lortzea lantokiko erabiltzaileengandik.

11. Enpresaren material, lanabes, tresna, makina, aparatu, instalazio, eraikin, altzari eta dokumentuak desagerrarazi, hondatu, suntsitu edo haustea, nahita edo zabarkeriaz.

12. Enpresako gainerako langileen prestakuntzan parte hartzeari uko egitea, Enpresari kalte larria eragiteko arriskua badago edo pertsonen osotasuna arriskuan jarri bada edo gainerako kideak asaldatu badira.

13. Nagusi batek langilearen legez onartutako eskubide bat urratzen duen egintza arbitrario bat egitea, horrek mendekoari kalte larria ekartzen dionean. Agintekeria.

14. Hitzezko edota egitezko tratu txarrak ematea, edo errespetu- eta begirune falta larria adieraztea lantegiko buruei edo haien ahaideei, baita lankideei, menpekoei eta zentroetako erabiltzaileei edo ematen diren zerbitzuetako erabiltzaileei ere. Enpresako edozein pertsonaren aurkako sexu-erasoak, hitzezko jokabide edo jokabide fisiko iraingarriak; aparteko larritasuna izanen dute aginte edo hierarkia posizioaz baliatuz gauzatzen direnek, kontratu ez-mugagabea dutenen aurka egiten direnek eta haiek salatu dituzten pertsonen kontra hartutako mendekuek.

15. Sexu-izaerako irainen bidez –hitzezkoak edo fisikoak– errespetua modu larrian urratzen duten jarrerak izatea, lanaren esparruan, lantegiko buruekin, lankideekin, menpekoei eta zentroetako erabiltzaileekin edo ematen diren zerbitzuetako erabiltzaileekin. Portaera hori hierarkia egoeraz baliatuz gauzatzen bada, inguruabar astungarria izanen da.

16. Lantegiko buruak, lankideak, menpekoak eta zentroetako erabiltzaileak edo ematen diren zerbitzuetako erabiltzaileak diskriminatzea sexuan oinarrituta.

17. Langile batek edo gehiagok lantokian moralki pertsona bat jazartzea lantegian, indarkeria psikologikoko egoera gisa, modu konstantean eta sistematikoan denbora luzez, pertsona horri kalte egiteko eta laneko giroa okertzeko asmoz.

18. Norberaren garbitasun eta txukuntasun falta ohikoa eta jarraitua, jardueran nahiz enpresaren irudian eragina izan dezakeenean.

19. Lanaldian usu mozkorturik izatea eta droga-mendekotasun agerikoa agertzea, betiere eragin negatiboa badu langilearen lanpostuko eginkizunetan eta langileak uko egiten badio Enpresako nahiz Enpresaz kanpoko zerbitzu medikoek ezarritako errehabilitazio-programetan parte hartzeari, programa amaitu baino lehen bertan behera uzten badu edo ez-errehabilitatutzat, ezin errehabilitatuzkotzat edo antzekotzat kalifikatzen bada.

20. Jendearenganako begirune edo adeitasun falta nabarmena.

21. Ohiko lan errendimendua nahita eta luzaroan gutxitzea, legeek onartutako eskubide bat erabiltzearen ondorioz ez bada.

22. Lanuzte-egoeretan eta salbuespenezko egoeretan ezarritako gutxieneko zerbitzuak aintzat ez hartzea eta ez betetzea.

23. Lehenbiziko falta astuna egin edo haren zehapenaren ondoko 180 egun naturaletan beste falta astun bat egitea, beste mota batekoa izanik ere.

24. Jendeari arreta adeitasunez eta maratz ez ematea, behin eta berriz.

25. Enpresak IKTei dagokienez dituen arauak ez betetzea, Enpresa arriskuan jartzen bada edo edozein motatako kalteak eragiten badizkio.

26. Kontratuko bestelako edozein ez-betetze oso astun.

38. artikulua. Zehapenak.

Zehapenak arinak, astunak edo oso astunak izaten ahal dira. Jarraian azaltzen dira aurreko artikuluan zerrendatutako faltengatik langileei ezartzen ahal zaizkien zehapen handienak:

–Falta arinak: hitzez nahiz idatziz kargu hartzea, eta enplegu eta soldata gabe uztea hiru egunez gehienez.

–Falta astunengatik, hiru egunetik hogeita hamar egunera bitarteko enpleguaren eta soldataren etenaldia.

–Falta oso astunengatik, hogeita hamaika egunetik laurogeita hamar egunera bitarteko enplegu-soldaten etenalditik hasi eta lan-kontratua bertan behera uztera iritsi arte, falta goren gradukoa dela kalifikatzen den kasuetan.

Horrez gainera, Enpresak eskumena izanen du justifikatu gabeko puntualtasun faltengatik, lan-uzteengatik eta absentziengatik lan egin ez den denborei dagokien soldata ez ordaintzeko.

39. artikulua. Izapideak.

Hitzezko kargu-hartzeetan izan ezik, zehapenak idatziz jakinaraziko zaizkio interesdunari, haien berri izan dezan eta dagozkion ondorioetarako; zehapenaren eraginkortasun-unea argi adierazi beharko da, denboran luzatzen badira.

Falta astunen eta oso astunen ondoriozko zehapenak idatziz jakinaraziko zaizkio Enpresa Batzordeari edo langileen ordezkariei, halakorik balego.

Enpresa Batzordeko kideak edo langileen ordezkariak badira, bai kargu sindikaletan jardunean daudenak bai arauzko bermealdian daudenak, zehapenak jartzeko ezinbestekoa da kontraesanezko espedientea izapidetzea, zehapenaren larritasuna edozein delarik ere, Enpresa Batzordeari edo langileen ordezkariei entzunda.

Kontraesanezko espedientea ireki dela jakinarazten denetik, izapidetzen den artean eta ukituari Enpresaren ebazpena jakinarazi eta hurrengo egunera arte, dagokion faltaren preskripzio-aldia etentzat joko da.

Espedientea izapidetzen den artean, kautelazko neurriak hartzen ahalko dira; adibidez, lanpostuan aritzeko betebeharra etetea eta antzeko ezaugarriak dituen beste lanpostu batera aldatzea.

40. artikulua. Preskripzioa.

Falta arinek hamar egunen buruan preskribatuko dute, astunek hogei egunen buruan, eta oso astunek hirurogeiren buruan, enpresak faltaren berri izaten duen egunetik hasita, eta, kasu guztietan, falta izan eta sei hilabeteren buruan.

Faltak indargabetu eginen dira epeak betetzean, eta ezin izanen dira erabili lan-harremanean.

Lehen xedapen iragankorra.–Osagarri pertsonal ez-xurgagarria.

Hitzarmen kolektibo hau indarrean sartzearen emaitza gisa, ordainsari-erregimena arrazionalizatu da. 2024ko oinarrizko soldataren eta aparteko ordainsarien taula berriak aplikatzeko, osagarri pertsonala eta teknikari-plusa xurgatu eginen dira, tauletako zenbatekora iristeko beharrezko den zenbatekoan. Osagarri pertsonaletik eta teknikari-plusetik sobratzen den zenbatekoa osagarri pertsonal berri batera igaroko da, zeina ez baita xurgagarria izanen.

Bigarren xedapen iragankorra.–Lanaldiaren banaketari dagozkion kondizioak mantentzea.

Hitzarmen kolektibo hau sinatzen den egunean astelehenetik ostiralerako lanaldia hitzartua duten langileei lanaldi hori errespetatu eta mantenduko zaie.

Hirugarren xedapen iragankorra.–Prestasuneko plusari dagozkion kondizioak mantentzea.

Indarrean sartzeko datan prestasun-/mugikortasun-plusa –gaur egun prestasuneko plus esaten zaio– entregatua, sinatua eta emana duten langileei ad personam mantenduko zaie.

Plus hori jasotzen duten langileek joan-etorriak egiteko betebeharra izanen dute, prestasuneko plusaren azalpenean xedatzen denez.

Laugarren xedapen iragankorra.–II. lanbide-taldeko langileek lan administratiboak egiteari uztea.

II. lanbide-taldeko langileek lan administratiboak egiteari utziko diote hitzarmen kolektibo hau sinatu eta bi hilabetera.

Bosgarren xedapen iragankorra.–Soldata-egitura berria eta soldata-igoerak aplikatzea.

2024rako hitzartutako soldata-egitura berria eta soldata-igoerak aplikatuko dira hitzarmen kolektibo hau sinatu eta bi hilabetera.

I. ERANSKINA.–SOLDATA TAULAK

2024. URTEA

TALDEA

MAILA

OINARRIZKO SOLDATA + HILEKO AOZP (*)

OINARRIZKO SOLDATA + URTEKO AOZP

(12 PAGA)

I

I

2.166,67 euro

26.000,00 euro

II

1.916,67 euro

23.000,00 euro

II

I

1.833,33 euro

22.000,00 euro

II

1.583,33 euro

19.000,00 euro

III

I

1.750,00 euro

21.000,00 euro

II

1.541,67 euro

18.500,00 euro

III

1.475,00 euro

17.700,00 euro

IV.

1.425,00 euro

17.100,00 euro

(*) AOZP urteko aparteko bi ordainsarien zati proportzionala da.

2025. URTEA

TALDEA

MAILA

OINARRIZKO SOLDATA + HILEKO AOZP (*)

OINARRIZKO SOLDATA + URTEKO AOZP

(12 PAGA)

I

I

2.210,00 euro

26.520,00 euro

II

1.955,00 euro

23.460,00 euro

II

I

1.870,00 euro

22.440,00 euro

II

1.615,00 euro

19.380,00 euro

III

I

1.785,00 euro

21.420,00 euro

II

1.572,50 euro

18.870,00 euro

III

1.504,50 euro

18.054,00 euro

IV.

1.453,50 euro

17.442,00 euro

(*) AOZPk erreferentzia egiten dio bi aparteko ordainsarien zati proportzionalari

2026. URTEA

TALDEA

MAILA

OINARRIZKO SOLDATA + HILEKO AOZP (*)

OINARRIZKO SOLDATA + URTEKO AOZP

(12 PAGA)

I

I

2.254,20 euro

27.050,40 euro

II

1.994,10 euro

23.929,20 euro

II

I

1.907,40 euro

22.888,80 euro

II

1.647,30 euro

19.767,60 euro

III

I

1.820,70 euro

21.848,40 euro

II

1.603,95 euro

19.247,40 euro

III

1.534,59 euro

18.415,08 euro

IV.

1.482,57 euro

17.790,84 euro

(*) AOZPk erreferentzia egiten dio bi aparteko ordainsarien zati proportzionalari

Iragarkiaren kodea: F2418781