Iragarkia

224. ALDIZKARIA - 2025eko azaroaren 10a

1. NAFARROAKO FORU KOMUNITATEA

1.7. BESTELAKOAK

89/2025 EBAZPENA, urriaren 29koa, Enpresen Sustapenerako eta Azpiegituretako Zuzendaritza Nagusiak emana, zeinaren bidez aurretiazko administrazio baimena eta eraikitzeko administrazio baimena ematen baitzaizkio 14,26 MW-ko potentzia instalatuko "Montes de Cierzo I BESS berrindartzea" biltegiratze instalazioari, Tuterako udal mugartean, eta haren onura publikoa zehazki deklaratzen baita. Espedientearen kodea: 1053-5-2-CE.

1.–Aurrekariak.

"Montes de Cierzo I BESS berrindartzea" biltegiratze instalazioa "Montes de Cierzo I berrindartzea" parke eolikoarekin hibridatuko da (espediente-kodea: 1053-5-CE). Parke eolikoak baimen hauek ditu:

–193/2023 Ebazpena, abenduaren 21ekoa, Energiako, Enpresen I+G+b-ko eta Ekintzailetzako zuzendari nagusiak emana, zeinaren bidez aurretiazko administrazio baimena ematen baitzaio Eólica Montes de Cierzo SLUri "Montes de Cierzo I berrindartzea" parke eolikoa izeneko energia elektrikoa ekoizteko instalaziorako (31,4 MW) eta haren transformazio eta ebakuazio azpiegituretarako, Tuterako udal mugartean.

–35/2024 Ebazpena, apirilaren 8koa, Energia, Enpresa I+G+b eta Ekintzailetzako zuzendari nagusiak emana, zeinaren bidez eraikitzeko administrazio-baimena eman eta onura publikoa zehazki deklaratzen baita "Montes del Cierzo I berrindartzea" haize-parkea izeneko energia elektrikoa ekoizteko instalaziorako, Tuterako udal mugartean.

2.–Aurretiazko administrazio baimena eta eraikitzeko administrazio baimena emateko eta zehazki onura publikokotzat deklaratzeko eskaera.

2024ko urriaren 29an, 14,26 MW-ko potentzia instalatuko "Montes de Cierzo I BESS berrindartzea" biltegiratze instalazioari aurretiazko administrazio baimena eta eraikitzeko administrazio baimena emateko eta hura zehazki onura publikokotzat deklaratzeko eskatu zuen Eólica Montes de Cierzo SLUk Industria Antolamenduaren, Azpiegitura Energetikoen eta Meatzeen Zerbitzuaren aurrean.

Aurkeztutako dokumentazio teknikoaren arabera, biltegiratze instalazioak ezaugarri nagusi hauek izanen ditu:

–20 oineko 11 edukiontzi; bakoitzak 288 kWh-ko 9 rack bateria ditu; bateriok LFP teknologiako litio-ioizkoak dira, Narada fabrikatzailearenak (76.8NESP250 modeloa); hala, edukiontzi bakoitzak 2,592 MWh ditu, eta guztira 28,512 MWh energia biltegiratzen ahal da.

–Ingeteam markako 3 potentzia estazio, Ingeteam FSK modelokoak, C seriekoak; bakoitzak Ingeteam markako 2 PCS ditu, Ingecon Sun Storage 3660TL-C578 modelokoak. Estazio transformatzailea; 6.500 kVA-ko pontentzia eta DNdn1y1 konfigurazioa dituen transformadorea eta erdi tentsioko gelaxkak ditu. Estazio horrek igoko du PCSen irteera tentsioa 20 kV-ra, instalazioko erdi tentsioko sareraino.

–20 kV-ko lurpeko linea, biltegiratze instalazioa ebakitze zentro batekin lotuko duena, ondoren Valdecuco 20/66 kV azpiestazio jasotzailera (lehendik dago) iristeko.

Gainera, proiektuan 3 biltegiratze unitate definitzen dira; lehenengo biak 4 edukiontziz eta 2 PCS dituen potentzia skid batez daude osatuak, eta hirugarrena 3 edukiontziz eta 2 PCS dituen potentzia skid batez.

3.–Jendaurreko informazioa eta kontsulten izapidea.

Abenduaren 1eko 1955/2000 Errege Dekretuaren 125. eta 144. artikuluetan xedatutakoa betetzeko, 30 eguneko aldian jendaurrean jarri ziren Eólica Montes de Cierzo SLUren eskaera eta zegokion dokumentazioa (agiri teknikoa eta ukitutako ondasun eta eskubideen zerrenda). Hemen argitaratu zen jendaurreko izapidearen iragarkia: 2024ko azaroaren 19ko Nafarroako Aldizkari Ofizialean (234. zk.) eta 2024ko azaroaren 20ko Diario de Noticias egunkarian; eta dokumentazioa Nafarroako Gobernuaren Gobernu Irekia webgunean argitaratu zen. Dokumentazioa Tuterako Udalari ere bidali zitzaion, epe berean jar zezan jendaurrean.

Halaber, abenduaren 1eko 1955/2000 Errege Dekretuaren 127., 131. eta 146. artikuluak aplikatuz, kontsulta egin zitzaion Tuterako Udalari.

Ez zen ez alegaziorik ez txostenik jaso toki erakundearen aldetik.

4.–Dokumentazio berria. Jendaurreko informazioaren eta kontsulten bigarren izapidea.

2025eko apirilaren 30eko izapidean ezarritako baldintzatzaile jakin batzuk betetzeko, Eólica Montes de Cierzo SLUk dokumentazio tekniko berria aurkeztu zuen, eta proiektuaren kokapen berriari aurretiazko administrazio baimena eta eraikitzeko administrazio baimena emateko eskatu zuen, bai eta hura zehazki onura publikokotzat deklaratzeko ere.

Abenduaren 1eko 1955/2000 Errege Dekretuaren 125. eta 144. artikuluetan xedatutakoa betetze aldera, proiektua berriz ere jendaurrean jarri zen 30 egun baliodunez. Iragarkia 2025eko ekainaren 3ko Nafarroako Aldizkari Ofizialean (110. zk.) eta 2025eko ekainaren 4ko Diario de Noticias egunkarian argitaratu zen, eta dokumentazioa, berriz, Gobernu Irekia webgunean. Dokumentazioa Tuterako Udalari ere bidali zitzaion, epe berean jar zezan jendaurrean.

Halaber, abenduaren 1eko 1955/2000 Errege Dekretuaren 127., 131. eta 146. artikuluak aplikatuz, kontsulta egin zitzaion Tuterako Udalari.

Ez zen ez alegaziorik ez txostenik jaso Tuterako Udalaren aldetik.

5.–Ingurumen inpaktuaren ebaluazio sinplifikatua eta lurzoru urbanizaezinetan jarduerak egiteko baimena.

Ingurumen zuzendari nagusiaren uztailaren 13ko 657E/2025 Ebazpenaren bidez, ingurumen inpaktuaren aldeko txostena egin zen Eólica Montes de Cierzo SL enpresak sustatutako proiekturako, hain zuzen, energia elektrikoa bateriekin biltegiratzeko instalaziorako (ebakuazio azpiegitura barne), Tuterako udal mugartean. Hala, baldintza jakin batzuk bete behar ditu.

Lurralde Antolamenduko zuzendari nagusiaren urriaren 16ko 526E/2025 Ebazpenaren bidez, lurzoru urbanizaezineko jarduerak eta erabilerak baimendu ziren "Montes de Cierzo I berrindartzea" parke eolikoari lotutako energia elektrikoa biltegiratzeko sistemaren instalaziorako, Tuterako udal mugartean, eta hirigintza ebazpenean bertan jasotako determinazioak bete beharko direla adierazi zen.

6.–Aurretiazko administrazio baimena eta eraikitzeko administrazio baimena emateko eta zehazki onura publikokotzat deklaratzeko proposamena.

Espedientean jasota dago parke eolikoarekin hibridatzen den biltegiratze instalaziorako garraio sarearen kudeatzaileak Eólica Montes de Cierzo SLUri emandako sarbide eta konexio baimena.

Espedientearen azterketa teknikoa egin ondoren, Industria Antolamenduaren, Azpiegitura Energetikoen eta Meatzeen Zerbitzuko Azpiegitura Energetikoen Atalak ondorioztatzen du prozedura behar bezala gauzatu dela, eta proposatzen du Eólica Montes de Cierzo SLUk "Montes de Cierzo I BESS berrindartzea" biltegiratze instalaziorako eskatutakoa ematea, hau da, aurretiazko administrazio baimena eta eraikitzeko administrazio baimena ematea eta onura publikoa duela zehazki deklaratzea.

Adierazitakoarekin eta espedientean jasotako agiriekin bat, eta Nafarroako Foru Komunitateko administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz,

EBAZTEN DUT:

1. Aurretiazko administrazio baimena eta eraikitzeko administrazio baimena ematea Eólica Montes de Cierzo SLUri 14,26 MW-ko potentzia instalatuko "Montes de Cierzo I BESS berrindartzea" biltegiratze instalaziorako, Tuterako udal mugartean. Hogeita hamasei hilabeteko epea ematen da hura gauzatzeko.

2. Baimen hauek emanda ere, instalazioaren eskatzaileak lortu beharko ditu instalazioa gauzatzeko beharrezkoak diren kontzesio, lizentzia eta baimen guztiak, publikoak nahiz pribatuak, bat etorrita aplikatzekoak diren beste xedapen batzuekin.

3. Instalazioak aurkeztutako proiektuari jarraikiz gauzatu beharko dira, eta bat etorri beharko dute honako hauetan xedatutakoarekin: Goi tentsioko instalazio elektrikoen baldintza teknikoei eta segurtasun bermeei buruzko erregelamendua onesten duen maiatzaren 9ko 337/2014 Errege Dekretua eta haren jarraibide tekniko osagarriak JTO-GTE 01etik 23ra; Goi tentsioko linea elektrikoen baldintza teknikoei eta segurtasun bermeei buruzko erregelamendua onesten duen otsailaren 15eko 223/2008 Errege Dekretua eta haren jarraibide tekniko osagarriak JTO-GTL 01etik 09ra; eta Behe tentsioko erregelamendu elektroteknikoa onesten duen abuztuaren 2ko 842/2002 Errege Dekretua.

4. Behin proiektua gauzaturik, eskatzaileak zerbitzuan jartzearen akta eskatu beharko du. Eskaera horri obra bukaerako ziurtagiria erantsi beharko zaio, teknikari fakultatibo eskudunak izenpetua, bai eta aplikatzekoa den araudian ezarritako gainerako dokumentazioa ere.

5. Instalazio horren onura publikoa zehazki deklaratzea, bat etorrita Sektore Elektrikoari buruzko abenduaren 26ko 24/2013 Legearen 54., 55. eta 56. artikuluetan eta abenduaren 1eko 1955/2000 Errege Dekretuaren 148. eta 149. artikuluetan ezarritakoarekin; hori horrela, enpresa eskatzailea onuraduna izanen da desjabetze espedientean. Ebazpen honen eranskinean ageri da ukitutako ondasun eta eskubideen zerrenda.

6. Ebazpen hau igortzea Industria Antolamenduaren, Azpiegitura Energetikoen eta Meatzeen Zerbitzuari, Ingurumen Ebaluazioaren Atalari, Paisaiaren eta Landa Lurzoruaren Atalari, Herri-lurren Atalari, Erregistroaren, Ondasun Higigarrien eta Arkeologiaren Atalari eta Larrialdietako, Prebentzioko eta Babes Zibileko Zerbitzuari, behar diren ondorioak izan ditzan.

7. Ebazpen hau Nafarroako Aldizkari Ofizialean argitaratzea, orok jakin dezan.

8. Ebazpen hau jakinaraztea Eólica Montes de Cierzo SLUri, I-DE Redes Eléctricas Inteligentes SAUri, Sistema de Red Eléctrica de España SAUko Operazioetako eta Sistemaren Garapeneko zuzendaritzei eta, orobat, ukitutako ondasun eta eskubideen titularrei, eta ohartaraztea ezen ebazpen honek ez duela administrazio bidea akitzen eta honen aurka gora jotzeko errekurtsoa paratzen ahal dela, Industriako eta Enpresen Trantsizio Ekologiko eta Digitalerako kontseilariari zuzendua, hilabeteko epean, ebazpen hau jakinarazi eta biharamunetik hasita, espediente kodea adierazita.

9. Ebazpen hau Tuterako Udalari jakinaraztea, eta aditzera ematea honen kontra administrazioarekiko auzi-errekurtsoa jartzen ahal dela, eskumena duen ordena jurisdikzionalari zuzendua, honako hau jakinarazi eta biharamunetik hasita bi hilabeteko epean, alde batera utzi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2025eko urriaren 29an.–Enpresen Sustapenerako eta Azpiegituretako zuzendari nagusia, Iñigo Arruti Torre.

ERANSKINA.–ENERGIA ELEKTRIKOA BATERIEKIN BILTEGIRATZEKO "MONTES DE CIERZO I BESS BERRINDARTZEA" INSTALAZIOAK UKITUTAKO ONDASUN ETA ESKUBIDEEN ZERRENDA, HAREN ONURA PUBLIKOA ZEHAZKI DEKLARATZEKO

Iragarkiaren kodea: F2514191