Iragarkia

207. ALDIZKARIA - 2025eko urriaren 16a

2. NAFARROAKO TOKI ADMINISTRAZIOA

2.2. XEDAPEN ETA IRAGARKIAK, HERRIEN ARABERA ANTOLATUAK

OLTZA ZENDEA

Lankidetza-hitzarmena, Nafarroako Foru Komunitateko Administrazioko Lurralde Kohesiorako Departamentuaren eta Udalaren artean, NA-700 errepideko 5+500 kilometro-puntuko bidegurutzea egokitzeko proiektuari dagozkion obrak egiteko, Aratzuriko Kontzejuan

Iragarki honen bidez, aditzera ematen da Oltza Zendeako Udaleko Osoko Bilkurak eta Nafarroako Foru Komunitateko Administrazioko Lurralde Kohesiorako Departamentuak honako honi dagokionez hartu duten erabakia: lankidetza-hitzarmena, Nafarroako Foru Komunitateko Administrazioko Lurralde Kohesiorako Departamentuaren eta Oltza Zendeako Udalaren artean, NA-700 errepideko 5+500 kilometro-puntuko bidegurutzea egokitzeko proiektuari dagozkion obrak egiteko, Aratzuriko Kontzejuan (Nafarroa).

Oltza zendean, 2025eko irailaren 30ean.–Alkatea, José María Cuende Vallejo.

LANKIDETZA-HITZARMENA, NAFARROAKO FORU KOMUNITATEKO ADMINISTRAZIOKO LURRALDE KOHESIORAKO DEPARTAMENTUAREN ETA OLTZAKO ZENDEAKO UDALAREN ARTEAN, NA-700 ERREPIDEKO 5+500 KILOMETRO-PUNTUKO BIDEGURUTZEA EGOKITZEKO PROIEKTUARI DAGOZKION OBRAK EGITEKO, ARATZURIKO KONTZEJUAN (NAFARROA)

Iruñean, 2025eko otsailaren 28an.

BILDU DIRA

Batetik, Óscar Chivite Cornago, Nafarroako Gobernuko Lurralde Kohesiorako kontseilaria, aintzat harturik honako hauetan ezarritako eskumenak: Nafarroako Gobernuari eta Lehendakariari buruzko abenduaren 3ko 14/2004 Foru Legearen 41.1 a) artikuluan eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 90.2 b) artikuluan.

Eta bestetik, José María Cuende Vallejo, Oltza Zendeako Udaleko alkate udalburua, udal horren izenean eta hori ordezkatuz.

Noren izenean ari diren kontuan hartuz, bi alderdiek elkarri aitortzen diote hitzarmen hau gauzatzeko behar den gaitasuna, eta, beraz,

AZALTZEN DUTE

1. Bai Nafarroako Foru Komunitateko Administrazioak, bai Nafarroako Toki Administrazioa osatzen duten erakundeek, badute autonomia beren interesak kudeatzeko eta beren eskumenen esparruan titular gisa dituzten ahalmenak baliatzeko.

2. Lurralde Kohesiorako Departamentuari (aurrerantzean, Departamentua) dagokio, Zainketa Zerbitzuaren bidez, Nafarroako Foru Komunitateko Administrazioaren eskumeneko bide-sarea kontserbatzeko eginkizunak betetzea, eta obrak proiektatu, izapidetu eta zuzentzea bide-zoruak sendotzeko, puntu arriskutsuak kentzeko eta zeharbide, puntu berezi eta bidegurutzeetarako (249/2023 Foru Dekretua, azaroaren 15ekoa, Lurralde Kohesiorako Departamentuaren egitura organikoa ezartzen duena, eta 154/1999 Foru Dekretua, maiatzaren 10ekoa, Nafarroako Errepideen Sareko zeharbideak eta haiek berritzeko obrak egiteko prozedura arautzen dituena).

3. Oltza Zendeako Udalak (aurrerantzean, Toki Erakundea) aitortuta dauzka eta dagozkion organoen bidez gauzatzen ditu bere titulartasuneko bide-azpiegituren eta beste ekipamendu batzuen arloko eskumen propioak (Nafarroako Toki Administrazioari buruzko uztailaren 2ko 6/1990 Foru Legearen 29. artikulua eta Toki Araubidearen Oinarriak arautzen dituen apirilaren 2ko 7/1985 Legearen 25.2.d) artikulua).

4. Zeharbideak egokitzeko eta hobetzeko obren xedeko azpiegiturek titulartasun partekatuko espazio bat osatu ohi dute, bi administrazioren artekoa; izan ere, azpiegitura horiek aldi berean dira hiri-bideak, batetik, herriguneko kaleak diren aldetik, eta Nafarroako Errepide Sareko bide-zatiak, bestetik.

5. Bi alderdien interesekoa da obrak egin daitezen, "Aratzuriko Kontzejuan (Nafarroa) NA-700 errepideko 5+500 kilometro-puntuko bidegurutzea egokitzeko proiektuan" jasotako zeharbidea eraberritzeko.

6. Arestian adierazitako planteamenduaren jakitun, hitzarmeneko alderdiek ezinbestekotzat jotzen dute, bide-arloan dituzten eskumenak direla eta, beren jarduerak koordinatzea eta lankidetzan aritzea, finantzaketa partekatuz, hitzarmen honen xede diren jarduketak gauzatzeko. Hori guztia egiten da maiatzaren 10eko 154/1999 Foru Dekretuaren 9. artikuluan ezarritakoari jarraikiz (154/1999 Foru Dekretua, maiatzaren 10ekoa, Nafarroako Errepideen Sareko zeharbideak eta haiek berritzeko obrak egiteko prozedura arautzen dituena).

7. Toki Administrazioaren eta Despopulazioaren zuzendari nagusiak emaniko apirilaren 29ko 28E/2023 Ebazpenaren bidez, onetsi ziren aurrekontu baliabideen kargura behin-behinean sartutako inbertsioen zerrenda eta erreserbako inbertsioen zerrenda, 2023-2025 plangintza aldirako, Toki Programazioaren "Zeharbideen urbanizazioa" atalaren barruan. 1. eranskinean ("Aurrekontu baliabideen kargura behin-behinean sartutako inbertsioen zerrenda"), honako inbertsio hau dago jasorik: "Aratzuri. Zeharbidea eta NA-700 errepideko bidegurutzea egokitzea".

Horiek horrela, eta bat etorriz bakoitzak dituen eskumenekin, erabaki dute lankidetza-hitzarmen hau sinatzea, honako klausula hauen arabera:

KLAUSULAK

1.–Xedea.

Lankidetza-hitzarmen honen xedea da gauzatze eta finantzatze araubidea ezartzea, "Aratzuriko Kontzejuan (Nafarroa) NA-700 errepideko 5+500 kilometro-puntuko bidegurutzea egokitzeko proiektuan" jasotako zeharbidea eraberritzeko obretarako.

2.–Proiektua.

Toki Erakundeak aurkeztu du "Aratzuriko Kontzejuan (Nafarroa) NA-700 errepideko 5+500 kilometro-puntuko bidegurutzea egokitzeko proiektua", non jasotzen baita zeharbidearen eraberritzea, lizitazioaren oinarrizko aurrekontua 558.173,70 euro (BEZa kanpo) izanik; horri BEZa gehiturik, guztira, 675.390,17 euro dira.

Proiektua idatzi du Proyectos, Estudios y Servicios Técnicos de Navarra SAk (SERTECNA), eta horren ordainsariak 19.247,37 euro dira (BEZa kanpo), eta obra-zuzendaritzaren ordainsariak, 19.247,37 euro (BEZa kanpo). Bi erakundeek hartuko dituzte horiek beren gain, erakunde bakoitzak finantzatzen dituen obra-zatien proportzioan; hau da, Oltza Zendeako Udalak 21.224,64 euro (BEZa kanpo) hartuko ditu bere gain –horietatik, 10.612,32 euro (BEZa kanpo) proiektua idazteari dagozkio, eta 10.612,32 euro (BEZa kanpo) obra-zuzendaritzaren ordainsariei–, eta Lurralde Kohesiorako Departamentuak, berriz, 17.270,10 euro (BEZa kanpo) –horietatik, 8.635,05 euro (BEZa kanpo) proiektua idazteari dagozkio, eta 8.635,05 euro (BEZa kanpo) obra-zuzendaritzaren ordainsariei.

Bi alderdiek ongi egina eta teknikoki egokia deritzote proiektuari, eta erabakitzen dute Toki Erakundeak onets dezan, hitzarmen hau sinatutakoan.

3.–Obren kontratazioa.

Toki Erakundeak, dagozkion izapideak egin ondoren, eskuratuko ditu zeharbidearen eremuan obrak egiteko beharrezkoak diren ondasunak eta eskubideak, hala behar izanez gero.

Behin beharrezko ondasun eta eskubideak eskuragarri daudenean, eta proiektuaren bideragarritasuna erabat bideraturik dagoenean, Toki Erakundeak, 2 hilabeteko epean, obrak kontratatuko ditu, obra horiek gauzatzeko beharrezkoak izan daitezkeen baimen eta lizentzia guztiak eskuratu ondoren.

4–Zuzendaritza teknikoa.

Obren zuzendaritza teknikoa Toki Erakundearen gain egonen da, Departamentuko Zainketa Zerbitzuak gainbegiraturik. Toki Erakundeak kontratatuko ditu zuzendaritza teknikoa eta segurtasun- eta osasun-koordinatzailearen eginkizunak obrak egiten diren bitartean, eta seigarren klausulan azaldutakoaren arabera finantzatuko ditu.

Betiere, Departamentuak, zerbitzu horren bitartez, eskubidea izanen du ikuskatzeko bai finantzagai diren obra-zatiak, bai galtzadari eragiten dioten gainerakoak. Ikuskapen horren ondorioz akats teknikoren bat atzematen bada, obra-zuzendaritzari jakinaraziko zaio, zuzen dezan.

Era berean, Toki Erakundeak obra-ziurtagiriak egin eta onetsiko ditu, eta osorik ordainduko dizkio kontratistari. Departamentuaren aurrean izapidetuko du, gero, hari dagokion obra-zatia finantzatzeko eskaera.

Halaber, Toki Erakundea hartuko da obren sustatzailetzat, urriaren 24ko 1627/1997 Errege Dekretuaren ondorioetarako (Eraikuntza-obretako gutxieneko segurtasun- eta osasun-xedapenak ezartzen dituen Errege Dekretua).

5.–Gauzatzeko epea.

Obrak gauzatzeko guztizko epea izanen da Toki Erakundeak obrak kontratatzeko espedientean ezartzen duena.

Nolanahi ere, inbertsioa behin-behinean sarturik dagoenez zeharbideen urbanizazioari buruzko Tokiko Inbertsioen Planaren Tokiko Programazioaren atalean, Toki Inbertsioen Plana arautzen duen martxoaren 22ko 8/2022 Foru Legean zehazturiko epeak bete beharko ditu Oltza Zendeako Udalak, inbertsioa ordaindu eta justifikatzeko.

6.–Obrak finantzatzea, kontratatzea eta gauzatzea.

Departamentuak hitzarmen honetan egin beharreko finantzaketa-ekarpena ezartzen da bat etorriz Herri Lan, Garraio eta Komunikazio kontseilariak maiatzaren 20an emaniko 2015/1999 Foru Aginduan ezarritakoarekin (foru agindu horren bidez zehaztu ziren eraikuntzako kontzeptuak eta, orobat, Nafarroako Errepideen Sareko tokian tokiko zeharbideak egokitu eta hobetzeko obretan Departamentuak finantza ditzakeen ehunekoak).

Departamentuaren kargurako guztizko zenbatekoak ezin izanen du 323.900,71 eurotik gorakoa izan, salbuetsirik 7. klausulan xedatutakoa, honako kontzeptu eta zenbateko hauek kontuan harturik:

Obra: 303.003,89 euro (BEZa barne).

Proiektua idaztea: 10.448,41 euro (BEZa barne).

Obra-zuzendaritza: 10.448,41 euro (BEZa barne).

Udalaren kargurako guztizko zenbatekoa 398.068,09 euro izanen da, honako kontzeptu eta zenbateko hauek kontuan harturik:

Obra: 372.386,28 euro (BEZa barne).

Proiektua idaztea: 12.840,91 euro (BEZa barne).

Obra-zuzendaritza: 12.840,91 euro (BEZa barne).

Aurrekoa gorabehera, Lurralde Kohesiorako Departamentuak jarri beharreko zenbatekoa aldatuko da beheratze-ehunekoaren arabera, halakorik badago Toki Erakundeak obrak lizitatzeko antolaturiko prozeduran. Horri dagokionez, Toki Entitateak aurkeztu beharko du behar den ziurtagiria, adierazirik nor diren adjudikaziodunak eta zer beheratze-ehuneko onartu den.

Departamentuaren ekarpenak egutegi honen arabera eginen dira:

2025. urtea: 323.900,71 euro (BEZa barne).

Toki Erakundeak finantzatu beharko ditu lankidetza-hitzarmenaren xedeko jarduketak sortzen dituen gainerako gastu guztiak.

Toki Erakundeak Departamentuari aurkeztu beharko dizkio obra-ziurtagiriak, partzialak zein bukaerakoak, aipaturiko foru aginduaren eranskinean ageri den ereduaren arabera, bai eta fakturak ere, zehazki, obren, proiektua idaztearen eta obra-zuzendaritzaren fakturak.

Toki Erakundeak egokitzat jotzen duen egunean eta egutegian kontratatu eta gauzatzen ahalko ditu obrak, baina Departamentuari ezin izanen dio eskatu aurreko egutegian ezarritakoa baino urteko ekarpen ekonomiko handiagorik.

Hona hemen banakatze ekonomikoaren koadroa:

7.–Aldaketak.

Departamentuak espresuki baimendu beharko du proiektuaren aldaketa oro, berak finantzatzen dituen elementuei eragiten badie. Horri dagokionez, ez da aldaketatzat hartuko proiektuan aurreikusitako obra-unitateen kopurua aldatzea, betiere Departamentuaren ekarpenaren %10 gainditzen ez bada.

8.–Erantzukizuna.

Obrak gauzatzen ari diren bitartean, Toki Erakundea izanen da erantzule pertsonei, jabetzei edo zerbitzu publiko zein pribatuei eragiten zaizkien kalte eta galerengatik, edozein kontzepturengatik, zuzenean edo zeharka.

9.–Jarraipen Batzordea.

Jarraipen batzorde bat eratuko da hitzarmenaren eta harturiko konpromisoen exekuzioaren jarraipena egiteko. Esku hartzen duen administrazioek ordezkari bana izanen dute batzordean.

Alderdiek hartan ebatziko dituzte, ados jarrita, hitzarmenaren klausulak interpretatzeari eta betetzeari buruzko auziak.

10.–Ez-betetzeak.

Ez badira betetzen betebeharrak eta harturiko konpromisoak, ez-betetzea ebatziko da jarraikiz urriaren 1eko 40/2015 Foru Legearen 51.2.c) artikuluan xedatutakoari (Sektore Publikoaren Araubide Juridikoari buruzko Legea).

11.–Azkentzea eta indarraldia.

Hitzarmen honek urtebeteko indarraldia izanen du, eta urtebetez luzatzen ahalko da, bi alderdiek hala adosten badute.

Hitzarmena azkenduko da bertan jasotako jarduketak eta konpromisoak betetzen direnean, edo gertatzen denean urriaren 1eko 40/2015 Legearen 51.2 artikuluan ezarritako suntsiarazpen-kausaren bat (Sektore Publikoaren Araubide Juridikoari buruzko Legea).

12.–Izaera.

Hitzarmen honek administrazio-izaera du, eta egonen da indarreko xedapen orokorren mende; gainera, alderdiak espresuki gelditzen dira administrazioarekiko auzien jurisdikzioko auzitegien mende.

Eta hitzarturikoa behar bezala jasorik geldi dadin, eta adostasunaren frogagarri, bi alderdiek lankidetza-hitzarmen hau sinatu dute, bi aletan, ondorio bakar baterako, idazpuruan ageri den toki eta orduan.

Nafarroako Foru Komunitateko Administrazioaren aldetik.

Oscar Chivite Cornago, Lurralde Kohesiorako kontseilaria.

Oltza Zendeako Udalaren aldetik.

José María Cuende Vallejo, Oltza Zendeako Udaleko alkate udalburua.

Iragarkiaren kodea: L2512890