Iragarkia

202. ALDIZKARIA - 2025eko urriaren 9a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

4350E/2025 EBAZPENA, irailaren 17koa, Nafar Lansare-Nafarroako Enplegu Zerbitzuko zuzendari kudeatzaileak emana, "Nafarroako Foru Komunitatean enpleguaren eta ekintzailetzaren arloko proiektu berritzaile eta esperimentalak gauzatzeko dirulaguntzak" izeneko dirulaguntzen deialdia onesten duena. Dirulaguntzen Datu Base Nazionalaren identifikazioa: 857294.

Nafar Lansare-Nafarroako Enplegu Zerbitzua erakunde autonomoaren estatutuak onesten dituen otsailaren 7ko 13/2024 Foru Dekretuak, 2. artikuluan, Nafar Lansare-Nafarroako Enplegu Zerbitzuaren eskumen-eremua ezartzen du. Hain zuzen, adierazten du Nafar Lansare-Nafarroako Enplegu Zerbitzuari dagokiola Nafarroako Foru Komunitateko Administrazioari arlo hauetan esleitutako eskumenak erabiltzea: gizarte eragileekin adostutako enplegu politikak planifikatzea, ebaluatzea, gauzatzea eta kontrolatzea, enplegurako prestakuntzaren gainean ezartzen diren zerbitzu eta programak modu koordinatuan kudeatuz; lanbide orientazioa; enpresekin bitartekari eta aholkulari lanak egitea; lana aurkitzea; enplegua sustatzea; nork bere lana sortzeko eta ekintzailetzarako aholku ematea; lan sustapena; aukera berdintasuna eta laneratzea; eta enpleguaren egoeraren eta enplegu politiken azterketa Nafarroan.

Enpleguari buruzko otsailaren 28ko 3/2023 Legeak ematen die COEi Enplegu Sistema Nazionalaren euskarri espezializatuaren izaera, orientazio, ekintzailetza eta berrikuntzaren arloko dinamizazioa eta planifikazioa indartzeko.

Enplegu Sistema Nazionalean enplegua aktibatzeko programa komunak arautzen dituen irailaren 28ko 818/2021 Errege Dekretuak (otsailaren 28ko 3/2023 Legeak aldatua), 88. artikuluan, arautzen du Enplegurako Orientazio, Ekintzailetza eta Berrikuntza Zentroak (COE) abian jartzea, eta honako eginkizun hauek esleitzen dizkie:

a) Jardunbide egokitzat jotzen ahal diren lanerako eta ekintzailetzarako orientazioko, prospekzioko eta bitartekotzako programak ebaluatzea, bai berezko programei dagokienez —haien ezagutza gainerako enplegu-zerbitzu publikoei helarazteko—, bai kanpoko programei dagokienez —hala badagokio, zein bere lurraldean aplikatzeko—.

b) Ekintza berritzaileak diseinatzea, eta proiektu esperimentalak gauzatzea lan orientazioaren, prospekzioaren eta bitartekaritzaren arloan.

c) Enplegurako lanbide orientazioko eta autoenplegurako laguntzako eta enpresa prospekzioko eta lan bitartekaritzako eginkizunak betetzen dituzten enplegu zerbitzu publikoko langileei zuzendutako etengabeko prestakuntzako berariazko plan bat garatzea eta gauzatzea. Planean berariazko prestakuntza jaso beharko da emakumeen eta gizonen arteko tratu eta aukera berdintasunaren arloan eta desgaitasuna duten pertsonen eta bazterketa arriskuan dauden gainerako gizarte taldeen gizarte inklusioaren arloan.

d) Ekintzailetza ereduak diseinatzea eta proiektu pilotuak aplikatzea.

e) Langabezia prestazioaren kapitalizazioari (ordainketa bakarra) lotutako ekintzailetza proiektuak koordinatzen laguntzea.

f) Enplegu autonomoa sustatzeko eta kooperatiba eta lan sozietateak sortzen eta haietan enplegatzen laguntzeko eskumena duten erakundeek egiten dituzten jarduketa guztien jarraipena egitea ikuspegi integratzailearekin, jardun eremu beraren barruan.

g) Dagokion lurralde eremuan langile autonomoen eta gizarte ekonomiaren ordezkari diren elkarteekin hitz egitea. Horrek ez du galarazten, nolanahi ere, beste eragile ekonomiko eta sozial batzuekin hitz egitea enplegurako orientazioaren eta berrikuntzaren arloan.

Aipatutako eginkizunak betetzean, enplegu zerbitzu publikoek genero-ikuspegia integratuko dute modu eraginkorrean.

Eginkizun horiek gauzatzeko, urteko lan programa bat egin behar da.

Estatuko Enplegu Zerbitzu Publikoaren Zuzendaritza Nagusiaren 2022ko maiatzaren 12ko Ebazpenaren bidez, Nafarroako COE kalifikatzen da (Estatuko Aldizkari Ofiziala, 181. zk., 2022ko uztailaren 29koa).

2022., 2023. eta 2024. urteetan, NL-NEZen COEren urteko lan planak egin dira, Suspertze, Eraldatze eta Erresilientzia Planean jasotako «Konpetentzia Digitalen Plan Nazionala» «Lan-merkatu dinamiko, erresiliente eta inklusibo baterako Politika Publiko Berriak» inbertsio proiektuak gauzatzeko Suspertze eta Erresilientzia Mekanismoaren funtsek finantzaturik.

2022tik 2024ra bitarteko lan-planen kudeaketan lortutako esperientzian oinarriturik, deialdi hau egiten da, zeinaren xedea baita Nafarroako Foru Komunitatearen eremuan enpleguaren eta ekintzailetzaren arloko proiektu berritzaile eta esperimentalak gauzatzeko dirulaguntzak arautzea.

Deialdi honen lehen edizioa 2024an onetsi zen, eta 19 proiektu aurkeztu ziren. Azkenean, 3 proiektu onartu ziren. Aurkeztutako eta onartutako proposamenak interes handikoak direnez, eta orientazioaren, prospekzioaren eta lan bitartekaritzaren arloko ekintza berritzaileak eta proiektu esperimentalak diseinatzeak gure erakundeari ematen dion balioa ikusita, 2025erako proiektuen deialdi berri bat egitea erabaki da.

Horrenbestez, azaldutakoarekin bat eta otsailaren 7ko 13/2024 Foru Dekretuaren bidez onetsitako Nafar Lansare-Nafarroako Enplegu Zerbitzuaren Estatutuen 12. artikuluaren bidez emandako ahalmenak erabiliz,

EBAZTEN DUT:

1. Nafarroako Foru Komunitatean enpleguaren eta ekintzailetzaren arloko proiektu berritzaile eta esperimentalak gauzatzeko dirulaguntzak emateko deialdia onestea.

2. Dirulaguntza emateko oinarri arautzaileak onestea. Ebazpen honen eranskinean jaso dira.

3. 160.000 euroko urteko gastua baimentzea, 2025eko ekitaldiko gastuen aurrekontuko "Konferentzia Sektoriala. COE proiektu berritzaileetarako dirulaguntzak" izeneko 950003-96400-4819-241302 [PEP E-24/000673-01] partidaren kontura; betiere, aldaketak egiten ahal dira, jasotako eskaeren arabera.

4. Ebazpena eta eranskina Nafarroako Aldizkari Ofizialean argitaratzea, eta ohartaraztea deialdiak ez duela ondoriorik sortuko harik eta laburpena Nafarroako Aldizkari Ofizialean argitaratu arte.

5. Ebazpen hau Lan Aktibaziorako eta Lurralde Koordinaziorako Zerbitzuari jakinaraztea.

6. Ebazpen honek ez du administrazio bidea amaitzen, eta haren aurka gora jotzeko errekurtsoa jar daiteke, Eskubide Sozialetako, Ekonomia Sozialeko eta Enpleguko kontseilariari zuzendua, hilabeteko epean, argitaratu eta biharamunetik hasita. Administrazio publikoek administrazioarekiko auzi-errekurtsoa jartzen ahal dute jurisdikzio-ordena eskudunari zuzendua, ebazpen hau jakinarazi eta biharamunetik hasita bi hilabeteko epean, hori guztia Nafarroako Gobernuan aurretiazko errekerimendua egiten ahal dela ukatu gabe, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako modu eta epeetan.

Iruñean, 2025eko irailaren 17an.–Nafar Lansare-Nafarroako Enplegu Zerbitzuko zuzendari kudeatzailea, Mirian Martón Pérez.

ERANSKINA.–ENPLEGUAREN ETA EKINTZAILETZAREN ARLOKO PROIEKTU BERRITZAILE ETA ESPERIMENTALAK GAUZATZEKO DIRULAGUNTZEN DEIALDIAREN OINARRI ARAUTZAILEAK

1.–Xedea.

Oinarri hauen xedea da, Nafar Lansare–Nafarroako Enplegu Zerbitzuaren (NL-NEZ) Enplegurako Orientazio, Ekintzailetza, Laguntza eta Berrikuntza Zentroaren (COE) jardueren esparruan, Nafarroako Foru Komunitatearen eremuan enpleguaren eta ekintzailetzaren arloko proiektu berritzaile eta esperimentalak gauzatzeko dirulaguntzak emateko araubidea arautzea.

Deialdi honen xedea da esperimentatu eta ebaluatu ondotik enplegu-zerbitzuetara eskalatzen ahal diren enplegu eta ekintzailetzaren esparruko berrikuntza-proiektu pilotuak sustatzea, enplegu eta ekintzailetzaren arloko esku-hartzea eraldatzen lagundu dezaten.

2.–Dirulaguntzen onuradunak.

Deialdi honen onuradun izan eta laguntzak eskatzen ahal dituzte entitate hauek:

a) Toki entitateek, horien tokiko korporazioek barne, eskualdeko kontseiluek, eskualdez haragoko kontseiluek edo lurralde erakundeek, eta baita horien mende edo baitan egonik, enplegurako politika aktiboetan, tokiko garapenean eta okupazioaren sustapenean eskumenak dituzten horietako organismo autonomoek, betiere, beren titulartasuna aipatu tokiko entitateenak edo horietako korporazioenak baldin badira zeharo.

b) Berezko nortasun juridikoa duten irabazi-asmorik gabeko entitate publiko edo pribatuek.

c) Autonomoak, enpresak eta enpresa elkarteak.

3.–Entitate onuradunek bete beharrekoak.

Deialdi honetan aipatzen diren dirulaguntzen onuradun izateko, entitateek baldintza hauek bete beharko dituzte:

a) Jarduerak Nafarroako Foru Komunitatean gauzatzea.

b) Zerga arloko eta Gizarte Segurantzako betebeharrak egunean izatea, baita Nafarroako Foru Komunitateko Administrazioari edo haren erakunde autonomoei zorrak ordaintzeko betebeharrak ere.

c) Ez egotea dirulaguntzak eskuratzeko gaitasunaz gabeturik ebazpen irmoan ezarritako zehapenaren ondorioz, emakumeen eta gizonen arteko berdintasunaren arloko legeetan, Dirulaguntzei buruzko Foru Legean edo zergei buruzko lege orokorretan ezarritakoaren arabera.

d) Dirulaguntzen onuraduna izateko gainerako debeku-egoeretan ez egotea, zeinak jasotzen baitira Dirulaguntzei buruzko azaroaren 9ko 11/2005 Foru Legearen 13. artikuluko 2. eta 3. apartatuetan.

Eskaerak aurkezteko epea bukatzen den egunean bete beharko dira baldintza guztiak, eta, orobat, diruz laguntzen den jarduerak irauten duen bitartean.

4.–Proiektu diruz lagungarriak.

Ekintzailetzaren eta enpleguaren arloan ideia berriak, egiteko modu berriak edo metodologia berritzaileak dakartzaten proiektuak diseinatu, garatu eta gauzatzeko dirulaguntzak emanen dira, betiere NL-NEZen eskumen-esparruarekin eta haren Enplegurako Orientazio, Ekintzailetza, Laguntza eta Berrikuntza Zentroaren (COE) eginkizunekin bat badatoz.

Aurkeztutako proiektuak honelako ekimen berritzaileei buruzkoak izaten ahal dira:

–Enpleguaren edo ekintzailetzaren arloko metodologia eta tresna berrien diseinua, prototipoak edo transferentzia barne hartzen dutenak.

–Nafarroako enplegu edo ekintzailetza ekosistemako eragileen arteko koordinazioan, dinamizazioan eta lankidetzan laguntzen dutenak.

–Enpleguaren edo ekintzailetzaren arloko beste edozein ekimen berritzaile, COEren eskumenekoa, erakunde horren beste deialdi batzuek diruz lagundu ez dutena, hala nola:

• Enplegagarritasuna hobetzeko zeharkako konpetentzien diagnostikoa eta garapena (soft skills).
• Interes profesionalen identifikazioa.
• Ekintzailetzarako konpetentzien diagnostikoa eta garapena.
• Ekimen ekintzaileen bideragarritasunaren diagnostikoa.
• Ekimen ekintzaileen jarraipena eta tutoretza.
• Belaunaldien arteko erreleboa errazten duten tresnak edo metodologiak.
• Adimen artifizialak sortutako larrialdiaren ondorioz langabezia arriskuan dauden kolektibo profesionalei zuzendutako prebentzio jarduketak.
• Kolektibo jakin batzuekin esku hartzeko prozedurak hobetzea, hala nola kualifikazio handiko pertsonekin, birkokatze prozesuan dauden pertsonekin...
• Trantsizio berderako eta/edo digitalerako proiektuak.
• Enpleguan eta ekintzailetzan genero arrakala eta segmentazioa murrizten duten proiektuak.

Aurreko paragrafoan jasotako gaien zerrenda ez da zehatza, eta adibide gisa eskaintzen da.

Proiektuak dirulaguntza emateko ebazpenaren jakinarazpenaren dataren eta 2026ko urriaren 31ren artean gauzatu beharko dira.

5.–Proiektuak baloratzeko eta dirulaguntzak emateko irizpideak.

Proiektuak baloratzeko irizpideak honako hauek izanen dira, eta gehienez ere 100 puntu lortzen ahalko dira:

1. Proiektuaren helburuak. Aurre egin beharreko erronka eta proiektuaren helburu orokorra eta helburu espezifikoak identifikatzean, argitasuna, zehaztasuna eta egokitasuna baloratuko dira.

10 puntu gehienez.

2. Proiektua gauzatzeko aplikatuko den proposamen metodologikoa. Proposatutako metodologiaren zehaztasuna eta egokitasuna baloratuko dira.

5 puntu gehienez.

3. Ekintza-plana. Helburuak lortzeko proiektuan proposatutako jardueren egokitasuna eta koherentzia baloratuko dira.

20 puntu gehienez.

4. Erabili behar diren aurrekontua eta baliabideak. Baloratuko da aurrekontua egokia eta koherentea den jarduerak egiteko eta proiektuan aurreikusiriko emaitzak lortzeko.

Gehienez: 10 puntu.

5. Izaera berritzailea. Proposatutako proiektuaren sormena eta berrikuntza baloratuko dira, esate baterako, honako alderdi hauetan: ikuspegia, antolaketa, metodologia, produktua, teknologiak, onuradunek proiektuaren diseinuan eta gauzatzean parte hartzea, zer motatako kolektiboa izanen den proiektuaren hartzailea…

25 puntu gehienez.

6. Ebaluazio sistema. Proiektua ebaluatzeko proposamena baloratuko da. Aurreikusitako adierazleen identifikazioa eta kuantifikazioa jaso beharko ditu, baita horiek egiaztatzeko iturriak ere.

10 puntu gehienez.

7. Transferentzia. Proiektua transferitzeko proposamena baloratuko da.

10 puntu gehienez.

8. Genero ikuspegia integratzea proiektuan. Proiektuaren fase guztietan (sorrera, garapena, ebaluazioa eta transferentzia) genero-ikuspegia txertatu dela frogatzen duten elementu eta neurri zehatzak baloratuko dira.

10 puntu gehienez.

Proiektuak baloratu gabe geratuko dira eta baztertu eginen dira, baldin eta horien xedea ez badator bat Enplegurako Orientazio, Ekintzailetza, Laguntza eta Berrikuntza Zentrorako (COE) legez ezarritako eskumenen eremuarekin.

Dirulaguntzaren xedea proiektu berritzaile eta esperimentalak gauzatzea denez, diruz lagundu beharreko proiektuek gutxienez 15 puntu lortu beharko dituzte izaera berritzailearen atalean, eta, guztira, gutxienez 60 puntu osoko puntuazioan.

Berritasunaren atalean gutxienez 15 puntu lortzen ez dituzten proiektuak ez dira baloratuko gainerako apartatuetan, eta baztertu eginen dira.

Baztertu eginen dira guztizko balorazioan gutxienez 60 puntu lortzen ez dituzten proiektuak.

6.–Gastu diruz lagungarriak.

Honako gastu hauek dira diruz lagungarriak:

a) Entitate eskatzailearen langileen kostuak. Langileen gastuen kontzeptuan honako zenbateko hauek ordainduko dira modulu gisa:

–Koordinatzaileak: 32 euro/ordu; gehienez, proiektuari esleitutako langileen orduen %10.

–Arlo teknikoko langileak: 27 euro/ordu.

–Laguntzaileak: 22 euro/ordu; gehienez, proiektuari esleitutako langileen orduen %20.

b) Kostu orokorrak: proiektuari egotzitako langileen kostu guztien %25 ordainduko da, gehienez ere. Gastu horiek behar bezala justifikatu beharko dira, eta kontzeptu hauei dagozkie:

–Proiektuak gauzatzeko sortzen diren materialak eta hornidurak.

–Proiektuaren xede diren jarduerak gauzatzearekin lotura zuzena duten langileen bidaiak eta dietak.

–Proiektuan jasotako jarduera puntualak egiteko aretoak alokatzea, onuradunei zuzenduak eta proiektua sustatzen duen entitatearen instalazioetan egin ezin direnak.

–Entitateaz kanpoko profesionalak proiektuan jasotzen den jarduera jakin bat egiteko kasu puntualetan kontratatzeari loturiko zerbitzu tekniko eta profesionalak.

–Proiektuen hartzaileen istripu-aseguruak.

Gastuek bat etorri beharko dute proiektua gauzatzeko datekin.

Dirulaguntzei buruzko azaroaren 9ko 11/2005 Foru Legearen 28.8 artikuluan xedatutakoaren arabera, zeharkako zergak ez dira gastu diruz lagungarritzat hartuko, baldin eta berreskuratu edo konpentsatu badaitezke, ezta errentaren gaineko zerga pertsonalak ere.

7.–Dirulaguntzaren zenbatekoa eta banaketa.

Dirulaguntzaren zenbatekoa gehienez ere 40.000 eurokoa izanen da proiektu bakoitzeko. Entitate bera ez da izaten ahalko bi proiektu baino gehiagoren onuradun, salbu eta aurrekontu aski bada eta ez badago onetsita beste entitateren baten proiekturik.

Proiektuak aurkeztu ondotik, unitate kudeatzaileak dirulaguntza lortutako puntuazio osoaren lehentasun-ordenari jarraikiz banatuko du proiektuen artean, 5. oinarrian ezarritako irizpideen arabera, harik eta dirulaguntzaren zenbatekoa agortu arte, betiere proposamenek 5. oinarri horretan ezarritako gutxieneko puntuazioa erdietsi badute.

Proiektuei esleitutako guztizko puntuazioan berdinketa gertatuz gero, 5. irizpidean ("Izaera berritzailea") puntuazio handiena lortu duten proiektuen alde ebatziko da. Berdinketak jarraitzen badu, 8. irizpidean ("Genero ikuspegia txertatzea") puntuazio handiena lortu duen proiektuaren alde. Berdinketak bere horretan badirau, honako irizpide hauetan puntuazio handiena lortu duten proiektuen alde eginen da, hurrenkera honetan: 3, 1, 6, 7, 4 eta 2.

Gerakinik balego, baina ez nahikoa puntuazioaren arabera dirulaguntza jaso beharko lukeen hurrengo proiektuak eskatutako dirulaguntzari erantzuteko, eskatzaileari eskatuko zaio proiektua berregin dezan, geratzen den zenbatekoari doitzeko. Eskatzaileak proiektua berregiten ahalko du, edo eskaera bertan behera utzi; bertan behera uzten badu, puntuazioan hurrengo den eskatzaileari, halakorik badago, gauza bera eskatuko zaio, baldin eta gainerako irizpideak betetzen baditu.

Nolanahi ere, proiektua berregitean dirulaguntzaren xedea, baldintzak eta helburuak errespetatu beharko dira, bai eta eskaeretarako ezarritako balorazio irizpideak ere.

8.–Eskaerak eta aurkezteko epea.

8.1. Eskaerak aurkezteko epea hilabetekoa izanen da, deialdi hau Nafarroako Aldizkari Ofizialean argitaratu eta biharamunetik hasita.

8.2. Eskaerak elektronikoki tramitatuko dira Nafarroako Atarian, "Tramiteak" atalean dagoen deialdiaren fitxan (aurrerantzean laguntzen fitxa), "Tramitatu" aukeratuz.

Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.8 eta 66.6 artikuluetan xedatutakoari jarraikiz, ez dira aurkeztutzat hartuko laguntzen fitxan dagoen eredura egokitzen ez diren eskaerak, ez eta telematikoki eta aipatutako fitxaren bitartez aurkezten ez direnak ere. Horrenbestez, ez-aurkeztutzat jotzen direnez, eskaera horiek ezin izanen dira zuzendu.

Dokumentazio hau aurkeztu beharko da eskaerarekin batera, laguntzen fitxan eskura dauden ereduen araberakoa, betiere:

a) Proiektuaren memoria.

b) Proiektuaren aurrekontua:

c) Erantzukizunpeko adierazpenen inprimakia.

8.3. Eskaera aurkezteak berekin dakar deialdi hau arautzen duten oinarriak onartzea. Halaber, eskaera aurkeztean baimena ematen zaio Nafar Lansare-Nafarroako Enplegu Zerbitzuari eskaera ebazteko behar den informazioa kontsultatzeko eta administrazio publikoek egiten edo gordetzen duten dokumentazioa eskuratzeko. Horri berariaz aurka egin nahi izanez gero, dagokion dokumentazioa aurkeztu beharko da.

8.4. Ez dira berriz aurkeztu beharko entitate eskatzaileak edozein administraziori lehendik aurkeztu dizkion agiriak, ez eta administrazioak berak eginak direnak ere. Ondorio horietarako, interesdunak azaldu beharko du administrazioaren zein organoren aurrean eta noiz aurkeztu zituen aipatutako agiriak, eta NL-NEZek bide elektronikotik eskatuko ditu, salbu eta interesdunak berariaz egin badu horren aurka. Hala bada, berak aurkeztu beharko ditu agiriak, Administrazio Publikoen Administrazio Prozedura Erkideari buruzko urriaren 1eko 39/2015 Legearen 28.3 artikuluan aurreikusitakoarekin bat. Salbuespen gisa, aipatu organoak ezin baditu agiri horiek eskuratu, berriz aurkez ditzan eskatzen ahalko dio interesdunari.

9.–Instrukzioa eta tramitazioa.

9.1. Prozeduraren instrukzioa eta tramitazioa Nafar Lansare-Nafarroako Enplegu Zerbitzuko Lana Aktibatzeko eta Lurralde Koordinaziorako Zerbitzuari dagozkio.

9.2. NL-NEZeko Lan Aktibaziorako eta Lurralde Koordinaziorako Zerbitzuak ebaluatuko ditu aurkeztu diren proiektuak, deialdi honen 5. oinarrian zehaztu diren irizpideen arabera.

Egindako ebaluazioa ikusirik, organo kudeatzaileak NL-NEZeko zuzendari kudeatzaileari helaraziko dio ebazpen-proposamen bat. Horretan, zerrendatuko da zer entitate eskatzaileri eta zenbateko dirulaguntza ematea proposatzen den eta zer puntuazio esleitu zaien.

10.–Dirulaguntzak emateko prozedura.

Dirulaguntzak emateko prozedura norgehiagokako araubidearen bidez tramitatuko da, Dirulaguntzei buruzko Foru Legearen 17.1 artikuluan xedatutakoarekin bat. Prozedura hau honakoan datza: aurkezturiko eskaeren konparaketa egitea, proiektuak baloratzea haien arteko lehentasun hurrenkera ezartzeko, eta balorazio onena lortu dutenei dirulaguntzak esleitzea, deialdian ezarritako muga eta kreditu erabilgarria gainditu gabe.

11.–Dirulaguntza emateko ebazpena.

11.1. NL-NEZko zuzendari kudeatzaileak, instrukzio organoak egindako proposamena jasorik, ebatziko du dirulaguntza eman edo ukatzen den.

Ebazpena gehienez ere bi hilabetean eman eta jakinaraziko da, eskaera aurkezten denetik hasita. Epe hori berariazko ebazpenik jakinarazi gabe bukatzen bada, aurkeztutako eskaera ezetsi egin dela ulertuko da, deusetan galarazi gabe organo eskudunak ebazpena emateko duen betebeharra.

11.2. Ebazpena entitate eskatzaileari jakinaraziko zaio, dirulaguntza eman edo ukatzearen arrazoiak adierazita.

11.3. Eskaeraren gaineko presuntziozko edo berariazko ebazpenaren aurka gora jotzeko errekurtsoa aurkezten ahalko da Nafarroako Gobernuko Eskubide Sozialetako, Ekonomia Sozialeko eta Enpleguko kontseilariari zuzendua, jakinarazi eta biharamunetik hasita hilabeteko epean. Ebazpena berariazkoa ez bada, noiznahi aurkezten ahalko da errekurtsoa, ebazteko gehieneko epea bukatu eta biharamunetik hasita.

12.–Dirulaguntzaren ordainketa eta justifikazioa.

Dirulaguntza ordain dakion, entitate onuradunak justifikazio-agiri hauek aurkeztu beharko ditu 2026ko azaroaren 20a baino lehenago:

a) Dirulaguntza emateko orduan ezarritako baldintzak betetzen dituela frogatzeko jarduketa-memoria bat, laguntzen fitxan eskuragarri dagoen ereduaren araberakoa.

b) Justifikazio memoria ekonomikoa, laguntzen fitxan eskuragarri dauden ereduen araberakoa, egotzitako gastuak gauzatu izanari buruzko erantzukizunpeko adierazpena barne.

c) Proiektuan aurreikusitakoaren arabera entregatzeko diren agiriak.

Instrukzio organoak egiaztatu ondoren eskaeraren xedeko jarduketa egin dela eta enplegatzailea egunean dagoela bere zerga arloko eta Gizarte Segurantzaren arloko betebeharretan, dirulaguntza ordainduko da.

13.–Entitate onuradunaren betebeharrak.

13.1. Dirulaguntza hauen onuradun diren entitateek Dirulaguntzei buruzko azaroaren 9ko 11/2005 Foru Legearen 9. artikuluan ezarritako betebehar orokorrak bete beharko dituzte.

13.2. Zehazki, beranduenez ere proiektua hasten den egunean, honako hauek bidali beharko dituzte NL-NEZera:

a) Proiektua hasiko delako jakinarazpena. Ezarritako epean ez jakinarazteak penalizazio bat ekarriko du berekin: emandako zenbatekoa murriztea, hasiera jakinarazi behar zen egunetik jakinarazi gabe iragan diren egunen zati proportzionalaren baliokidea.

b) Proiektuari atxikitako lantaldearen aurkezpena, parte-hartzaile bakoitzaren titulazio akademikoa eta lan esperientzia adierazita.

c) Proiektua hastean, proiektuan zehar egin beharreko jarduera osoaren plangintza eta egutegi zehatza aurkeztea.

13.3. Aldez aurreko betebehar horiez gain, entitate onuradunek honako betebehar hauek izanen dituzte:

a) Dirulaguntzaren xedeko jarduera deialdian eta entitateak aurkeztutako memorian ezarritako moduan eta epean egitea.

b) Dirulaguntza emateko unean kontuan hartutako inguruabar eta baldintzetan edozein aldaketa gertatuz gero, NL-NEZi horren berri ematea, baita entitate onuradunak bere gain hartutako konpromiso eta betebeharretan gertatutako aldaketen berri ere.

c) Egindako zerbitzuak Nafar Lansare-Nafarroako Enplegu Zerbitzuak dituen aplikazioetan (SilcoiWeb, Orientasare edo adierazten den beste edozein aplikaziotan) erregistratzea, gehienez 5 eguneko epean, ezintasun kasu justifikatuetan izan ezik.

d) Nafar Lansare-Nafarroako Enplegu Zerbitzuak edo beste kontrol erakunde batzuek egin beharreko egiaztapen, jarraipen eta kontrol lanak onartzea.

e) Aurreikusitako adierazleak betetzen direla NL-NEZi behar bezala justifikatzea.

f) Proiektuari egotzitako pertsonen dedikazioaren ordutegi kontroleko orri bat betetzea, langileak eta proiektuaren arduradunak sinatuta.

g) Gordetzea jasotako diruaren erabilerari buruzko frogagiriak, agiri elektronikoak barne, egiaztatze eta kontrolaren xede izan daitezkeen artean.

h) Diruz lagundutako jarduerak izaera publikoa duela agerraraztea. Diruz laguntzen diren programen hedapen eta garapenarekin zerikusia duten jarduketa guztietan, gutxienez, Nafarroako Gobernuaren ikurra sartu beharko da, eta Nafar Lansare-Nafarroako Enplegu Zerbitzuarekin lankidetza aipatu. Horiek guztiak lehentasunezko tokian jarriko dira, eta ez dira inola ere entitate onuradunaren ikurra baino txikiagoak izanen. Betiere proportzioak eta jatorrizko gama kromatikoa errespetatuko dira.

Entitateak deialdi honen berri emateko eta zabalkunderako baliatzen dituen dokumentazio, publizitate, irudi edo material guztietan, hizkuntzaren erabilera ez-sexista erabili beharko da, emakumeak diskriminatzen dituen edozein eredu edo estereotipo sexista baztertu, eta berdintasun balioetan, presentzia orekatuan eta rolen eta genero identitateen aniztasunean oinarritutako irudia sustatu.

i) Nafar Lansare-Nafarroako Enplegu Zerbitzuari jakinaraztea laguntzen jarraipena egiteko behar duen informazio guztia.

j) Erantzukizun zibileko eta/edo istripuetarako aseguru-poliza bat izatea, proiektuan jasotako jarduerak estaliko dituena.

14.–Gardentasun betebeharrak.

Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen 3.c) artikuluan aipatutako entitateak behartuak daude gardentasun betebeharra betetzera baldin eta, urtebetean, 20.000 eurotik gorako laguntzak edo dirulaguntzak jasotzen badituzte Nafarroako Aurrekontu Orokorren kargura, edo jasotako laguntzak edo dirulaguntzak beren urteko diru sarrera guztien %20 edo gehiago badira, betiere 5.000tik gorako kopurua bada.

Aipatu diren inguruabarrak gertatzeagatik gardentasun betebeharra duten entitate onuradunek jarraian adierazten den informazioa eman beharko dute hilabeteko epean, dirulaguntza emateko ebazpena jakinarazten denetik zenbatzen hasita:

a) Entitatearen gobernu, administrazio eta zuzendaritza organoen osaera.

b) Organo horiek osatzen dituzten kargudunen zerrenda.

c) Entitateak aurreko urtean kargudun bakoitzari ordaindutako ordainsari gordinak eta gainerako diru konpentsazioak, kontzeptuz kontzeptu. Sortu berriak diren entitateen kasuan, informazioa izanen da haien aurrekontuetan edo plan ekonomiko-finantzarioan jasotakoa.

d) Entitatearen gobernu, administrazio eta zuzendaritza eginkizunetan ematen den dedikazioaren araubidea.

e) Entitate onuradunaren azken urteko kontuen kopia.

Informazio hori entitate onuradunaren legezko ordezkariak sinatuta aurkeztuko da, Nafarroako Gobernuaren Erregistro Orokor Elektronikoaren bide telematikoak erabiliz, eta dirulaguntza kudeatzen duen administrazio unitateari bidaliko zaio.

Entitateak ez badu gardentasun betebeharra bete behar aurreikusitako inguruabarrak gertatzen ez direlako, horren gaineko adierazpena aurkeztu beharko du.

Entitateak dirulaguntza bat baino gehiago jasotzen badu ekitaldi berean, ez du informazioa errepikatu beharko dirulaguntza bakoitzerako, salbu eta hasieran eman zituen datuak aldatu badira. Horretarako, entitateak adierazi beharko du Foru Komunitateko Administrazioaren zein organoren aurrean aurkeztu zuen, eta noiz.

Betebehar hori bete ezean, emandako dirulaguntza ez da ordainduko, ezta aurrerakinak ere, eta, kasua bada, kobratutako zenbatekoak itzuli egin beharko dira, Dirulaguntzei buruzko azaroaren 9ko 11/2005 Foru Legearen 35.1.c) artikuluan ezarritakoari jarraikiz.

Aurrekoa galarazi gabe, onuradun guztiak behartuak daude unitate kudeatzaileari behar den informazio guztia ematera, aurretiazko errekerimendua eginda eta hamar eguneko epean, hark bete ahal ditzan Gardentasunari, Informazio Publikoa Eskuratzeari eta Gobernu Onari buruzko maiatzaren 17ko 5/2018 Foru Legearen II. tituluan ezarritako gardentasun betebeharrak.

Errekerimenduan emandako epea bukatzen bada eskatutakoa bete gabe, hertsapen-isunak ezartzea erabakitzen ahalko da, 500 eurotik 5.000 eurora bitartekoak, interesdunari ohartarazpena egin ondoren eta entzunaldia emanda. Isuna hamabost egunetik behin errepikatuko da, errekerimendua bete arte. Isunaren zenbateko osoa ez da izanen dirulaguntzaren zenbatekoaren ehuneko bost baino handiagoa. Zenbatekoa zehazteko, ez-betetzearen astuntasuna eta proportzionaltasunaren printzipioa hartuko dira kontuan.

15.–Dirulaguntzen bateragarritasuna.

Deialdi honen xedeko dirulaguntzak ez dira bateragarriak helburu berarekin jarduera berak garatzeko ematen diren beste dirulaguntza batzuekin, administrazio honek edo eskualdeko, tokiko, Espainiako edo Europako beste administrazio publiko batzuek edo entitate publiko zein pribatuek eman.

16.–"De minimis" laguntza.

Deialdi honetako dirulaguntzak "de minimis" laguntzak dira, Europako Batzordeak 2023ko abenduaren 13an emandako 2023/2831 Erregelamenduan xedatutakoaren arabera. Erregelamendu horren xedea da Europar Batasunaren Funtzionamenduari buruzko Tratatuaren 107. eta 108. artikuluak "de minimis" laguntzei aplikatzeko modua xedatzea (2023ko abenduaren 15eko EBAO).

Erregelamendu horrekin bat, enpresa bakar bati hiru urteko zerga-ekitaldiko edozein alditan emandako "de minimis" laguntza guztien batura ezin da 300.000 eurotik gorakoa izan. Aipatu erregelamenduaren 2.2 artikuluan ezarrita dago enpresa bakarraren definizioa.

Horretarako, entitate interesdunek kasuan kasuko urteko ekitaldian eta aurreko bi urteetako ekitaldietan hartutako bestelako "de minimis" laguntzak aitortu beharko dituzte eskaeran.

17.–Azpikontratazioa.

Entitate onuradunek ezin izanen dute hirugarrenekin azpikontratatu, 6.b oinarrian zerrendatutako kostu orokorren kategoriatik eratorritakoak izan ezik, eta oinarri horretan ezarritako mugekin.

18.–Onetsitako proiektuen aldaketak.

18.1. Proiektuak edo dirulaguntzak ematerakoan kontuan hartutako baldintzak aldatu aurretik, horren berri eman beharko zaio Nafar Lansare-Nafarroako Enplegu Zerbitzuari, haietarako baimena eman dezan.

18.2. Aldaketa egiteko eskaeretan behar bezain ongi azaldu beharko da aldaketarako arrazoia, edo zer arazo sortu den proiektua hasieran pentsatu bezala ez egiteko. Horrelako eskaerak proposatu nahi den aldaketa hasi baino gutxienez 5 egun natural lehenago aurkeztu beharko dira.

18.3. Aldaketa horiek funtsezkotzat jotzen badira, NL-NEZek ebazpen bat emanen du onartutako dirulaguntzaren zenbatekoa gutxitu edo bertan behera uzten ahalko duena, kasua bada, egindako aldaketen garrantziaren proportzioan betiere.

19.–Jarraipena eta ebaluazioa.

19.1. Nafar Lansare-Nafarroako Enplegu Zerbitzuak beharrezko zeregin guztiak eginen ditu programak ebaluatu eta haiei jarraipena egiteko. Entitate onuradunek beharrezkoak diren datu, agiri eta informazio guztiak emanen dituzte egindako jarduketa ebaluatzeko, justifikatzeko, kontrolatzeko eta haren jarraipena egiteko.

19.2. NL-NEZek laguntzaren xedeko jarduketak ikuskatzen ahalko ditu, dirulaguntzak ematean aintzat hartutako eta ezarritako baldintza eta zehaztapenekin bat ote datozen egiaztatzeko. Horretarako, beharrezkoak diren bisitak eginen ditu, baita dirulaguntza jaso duten jarduerak egiten diren tokietara ere, beharrezkoa bada, horien betetze maila ebaluatze aldera.

19.3. Jarraipen Batzorde bat osatuko da, organo kudeatzaileko eta entitate onuraduneko profesionalek osatua, zehazten den aldizkakotasunez elkartuko dena.

Une oro, bi aldeak ados jarri ondoren, batzorde horren konposizioa areagotzen ahalko da, eta lanbide-profil jakinak izatea eskatzen ahalko da, jorratzeko gaien arabera.

Hauek izanen dira batzorde horri esleitutako zeregin nagusiak:

–Helburuak eta jarduerak berrikustea.

–Egokiak diren aurreikuspenak egitea.

–Proiektuan egindako lana NL-NEZekin koordinatzea.

–Programa gauzatzean sortzen ahal diren zailtasunak ebaztea.

Saio horietan, entitate onuradunak garatutako ekintzen jarraipena egiteko txostenak eta eskatzen ahal zaion beste edozein dokumentazio helaraziko du. Horretarako, hori egiteko maiztasuna eta modua entitatearekin adostuko da.

20.–Dirulaguntzen publizitatea.

Dirulaguntzei buruzko azaroaren 9ko 11/2005 Foru Legearen 15. artikuluan xedatutakoarekin bat, Lan Aktibaziorako eta Lurralde Koordinaziorako Zerbitzuak jendaurrean jarriko ditu emandako dirulaguntzak Nafarroako Atarian (www.nafarroa.eus), eta bertan adieraziko dira deialdia, aurrekontuko zein programari eta kredituri egotzi zaizkien, onuraduna, emandako zenbatekoa eta dirulaguntzaren xedea. Estatuko Administrazioko Kontu-hartzailetza Nagusiak ere argitaratuko ditu datu horiek bere web-orrian, Dirulaguntzei buruzko azaroaren 17ko 38/2003 Lege Orokorraren 20.8 artikuluan xedatutakoarekin bat.

21.–Datuen babesa.

Deialdi honek ezartzen duena betetzeko beharrezkoak diren datu pertsonalen tratamendua honako arau hauen arabera eginen da: 2016/679 (EB) Erregelamendua, apirilaren 27koa, Europako Parlamentuarena eta Kontseiluarena, datu pertsonalen tratamenduari dagokionez pertsona fisikoak babesteari eta datu horien zirkulazio askeari buruzkoa, eta 95/46/EE Zuzentaraua indargabetzen duena; 3/2018 Lege Organikoa, abenduaren 5ekoa, Datu Pertsonalak Babestekoa eta Eskubide Digitalak Bermatzekoa; eta gainerako garapen arauak, hari aurka egiten ez dioten heinean.

Entitate onuradunen ardura izanen da programetan parte hartzen duten pertsonei aipatu Erregelamenduaren (EB) 13. artikuluan adierazitako informazioa ematea.

Halaber, organo kudeatzaileak programetako parte-hartzaileen lan bizitzak kontsulta ditzan, entitate onuradunek dagozkien baimenak eskatu behar dizkiete horiei.

22.–Betebeharrak ez betetzea eta dirulaguntzak itzultzea.

22.1. Hartutako zenbatekoa itzuli egin beharko da, osorik edo partez, baldin eta programa gauzatzen ez bada, dirulaguntza emateko ezarritako baldintzak betetzen ez badira, Dirulaguntzei buruzko Foru Legearen 35. artikuluan aipatzen diren zergatikoak gertatzen badira edo oinarri hauetan berariaz aipatzen diren betebeharrak betetzen ez badira. Legez ezarritako kasuetan, gainera, bidezkoa izanen da dirulaguntza ordaindu zenetik itzuli beharraren gaineko ebazpena ematen den arte sortutako berandutze-interesak ordaintzeko eskatzea.

22.2. Ezarritako epean justifikatzen ez bada, onartutako dirulaguntza kobratzeko eskubidea galduko da eta aurreratutako zenbatekoak itzuli beharko dira, berandutze-interesak barne.

22.3. Dirulaguntza erabiltzen baldin bada eman zen helburuetarako ez beste batzuetarako, eta aldaketa horren berri NL-NEZi ematen ez bazaio, dirulaguntza osoa itzuli beharko da, berandutze-interesak barne, ezar daitekeen zehapena galarazi gabe.

Entitate onuradunak dirulaguntzak emateko aintzat hartutako baldintzen edo proiektuen aldaketaren berri eman eta NL-NEZk onartu badu, dirua itzultzea beharrezkoa bada, ez da berandutze-interesik eskatuko.

22.4. Entitate onuraduna ezarritako baldintza guztiak arras betetzetik aski hurbil gelditu bada eta egiaztatzen badu konpromisoak betetzera bideratu duela bere jarduna, baldintzak ez betetzearen bolumenaren eta mailaren araberakoa izanen da partez emandako dirulaguntzaren kenkaria, proportzionaltasun irizpideari jarraikiz. Deialdi honen ondorioetarako, "esanguratsutzat" joko da onetsitako proiektuaren %75 beteta izatea.

Entitateak ez baditu betetzen proiektuan aurreikusitako adierazleak, emandako zenbatekoaren ehuneko jakin bat itzultzea ekartzen ahal du ez betetzeak:

–%5, adierazlean islatutako zenbatekoa ez betetzea %25erainokoa bada.

–%10, ez betetzea %26ren eta %50en artekoa bada.

–%15, ez betetzea %51ren eta %75 artekoa bada. Eta %20, ez betetzea %75etik gorakoa bada.

22.5. Entitate onuradunak organo kudeatzaileari eskatzen ahalko dio dirulaguntzaren zati bat bere borondatez itzultzeko. Entitateak bere borondatez itzultzen badu dirua eta, Dirulaguntzei buruzko azaroaren 9ko 11/2005 Foru Legearen 35. artikuluan xedatutakoa aplikatuz, bidezkoa bada berandutze-interesak aplikatzea, horiek kalkulatuko dira dirua itzultzen duen arte.

23.–Zehapen araubidea.

Arau-hauste eta zehapenen araubideari dagokionez, Dirulaguntzei buruzko azaroaren 9ko 11/2005 Foru Legearen IV. tituluan xedaturikoa aplikatuko da.

Iragarkiaren kodea: F2512353