Iragarkia

20. ALDIZKARIA - 2025eko urtarrilaren 30a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

160C/2024 EBAZPENA, urriaren 15ekoa, Ekonomia Sozialeko eta Laneko zuzendari nagusiak emana; honen bidez erabaki da Clen College SL enpresaren hitzarmen kolektiboa erregistratzea, gordailutzea eta Nafarroako Aldizkari Ofizialean argitaratzea.

Ikusi da Clen College SL enpresak aurkeztutako hitzarmen kolektiboa (kode zenbakia: 31004652011997), erregistro honetan sartu dena 2024ko uztailaren 16an, eta 2024ko uztailaren 3an sinatu zutena enpresaren eta sindikatuen ordezkariek.

Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, lan-akordio kolektiboak eta berdintasun-planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin bat etorriz.

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuak ematen dizkidan eskudantziak erabiliz,

EBAZTEN DUT:

Lehenengoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Clen College SL enpresak aurkeztutako hitzarmen kolektiboa (kode zenbakia: 31004652011997).

Bigarrena.–Nafarroako Aldizkari Ofizialean argitara dadila xedatzea, orok jakin dezaten.

Hirugarrena.–Ebazpen hau eskatzaileari jakinaraztea, eta ohartaraztea ebazpenak ez diola bukaera ematen administrazio bideari eta, honen aurka, gora jotzeko errekurtsoa aurkezten ahal diola Eskubide Sozialetako, Ekonomia Sozialeko eta Enpleguko kontseilariari, hilabeteko epean, ebazpena jakinarazi eta hurrengo egunetik aurrera.

Iruñean, 2024ko urriaren 15ean.–Ekonomia Sozialeko eta Laneko zuzendari nagusia, Iñaki Mendióroz Casallo.

CLEN COLLEGE SL ENPRESAREN IX. HITZARMEN KOLEKTIBOA

I. KAPITULUA.–EREMUAK

1. artikulua. Langile eremua, eremu funtzionala eta lurralde eremua.

Hitzarmen honek Nafarroako Foru Komunitatean dagoen "Clen College, Centros Lingüísticos" enpresan lan kontratuaren araubidean aritzen diren langile guztiak ukituko ditu, salbu eta zuzendariak eta arloko arduradunak, haiek berariaz aipatzen ez diren artikuluetan, bai eta artikuluotan aipatzen diren beste langile talde batzuk ere.

2. artikulua. Iraunaldia.

Hitzarmen honek 2020ko urtarrilaren 1etik 2024ko abenduaren 31 bitarte iraunen du. Nafarroako Aldizkari Ofizialean argitaratzearekin batera hartuko du indarra. Halaber, ondorio ekonomikoak izanen ditu eta arau gisa aplikatuko da 2022ko urtarrilaren 1etik aurrera, salbu eta beste data bat adierazten den artikuluen kasuan.

Hitzarmenaren bukaera iragarriko da, besterik gabe, indarraldiaren azken egunean. Alderdi sinatzaileek konpromisoa hartzen dute elkarrizketan hasteko, gehienez ere, hitzarmenaren edo luzapenaren mugaeguna baino hilabete bat lehenagotik.

Beste hitzarmen bat sinatu bitarte indarrean segituko dute testu honetako arauek.

II. KAPITULUA.–BATZORDE PARITARIOA

3. artikulua. Batzorde paritarioaren eraketa.

Batzorde paritarioa eratuko da hitzarmen honen interpretazio, bitartekotza, arbitraje eta segimendurako.

Honako hauek osatuko dute batzorde hori: enpresaren ordezkariek izendatutako hiru kide eta langileen ordezkariek izendatutako beste hiru kide, hitzarmen hau negoziatu duten erakunde sindikalen artetik. Alderdi bakoitzak bere aholkulariak ere izanen ditu Batzordean.

Batzorde Paritarioa 15 eguneko epean eratuko da gehienez, Hitzarmen hau sinatzen denetik kontatzen hasita. Batzordeak jardun eta ebazteko epea 7 egun baliodunekoa izanen da, edozein alderdik deialdia egiten duenetik aurrera. Deialdian zehaztu beharko da irekitako prozeduraren arrazoia.

Prozedura hasteko eskaera jasotakoan, batzordea hiru egun balioduneko epean bildu beharko da, eta egiten zaion kontsultaren edo eskaeraren gaineko iritzia bost eguneko epean eman beharko du.

Bi alderdietako gehiengoaren botoez hartutako erabaki edo ebazpenak lotesleak izanen dira alderdi horientzat.

Batzorde paritarioak esku hartu behar du derrigorrez, alderdiek administrazioko edo justiziako organo eskudunera jo aurretik (Nafarroako Gobernuaren Lan Zerbitzua, Nafarroako Lan Gatazkak Konpontzeko Auzitegia, lan arloko epaitegiak, justizia auzitegiak, etab.), bertan zein prozedura hartu den kontuan izanda.

4. artikulua. Batzorde Paritarioaren funtzionamendua.

Alderdi batek eskatzen duenean bilduko da Batzorde paritarioa. Nolanahi ere, Batzorde paritarioa sei hilean behin bilduko da (ekainean eta abenduan). Bilerako edukiak gutxienez hamabost egun lehenago jakinaraziko dira idatziz.

III. KAPITULUA.–LANAREN ANTOLAKETA

5. artikulua. Antolaketa eta diziplina. Enpresan, laneko diziplinaren eta antolamenduaren eskumen esklusiboa horren jabea den pertsona fisiko zein juridikoarena da. Indarreko lege eta barne xedapenak ezarritakoari lotuko zaizkio, betiere, aldez aurretik langileen legezko ordezkariei kontsulta eginez.

IV. KAPITULUA.–KONTRATAZIOA, URRUTIKO LANA, PROBALDIA

6. artikulua. Kontratazioa.

Enpresak –bere ahalmenaren, profilen eta beharren arabera– laneko lotura iraunkorrerako formulak ezarriko ditu, indarreko araudian jasotako kontratuzko modalitateren bat erabiliz (mugagabea, aldizkako finkoa, etab.).

Hitzarmen honen eraginpeko langileak unean-unean indarra duten legezko kontratazio modalitateetatik edozeinen bidez kontratatzen ahalko dira, barne hartuta lanaldi partzialeko aldizkako lan finkoa.

Legezko xedapen indardunen arabera formalizatuko da kontratazioa. Enpresak kontratatu baina, iraupenari dagokionez, inolako modalitaterik hitzartzen ez duten langileen kasuan, probaldia bukatutakoan finkotzat hartuko dira, aldi baterakoak zirela frogatzen ez bada behintzat.

Kontratu idatzirik ez duten langileak, haien harremana lanekoa ez dela frogatu ezean, lanaldia bukatutakoan finko bihurtuko dira, bai eta legezko luzapenak bukatu eta enpresarako lanean segitzen dutenak ere.

Lanaldi partzialeko kontratua duten langileek lehentasuna izanen dute lanaldia luzatzeko, baldin eta enpresak behar badu eta zuzendaritzaren ustez lanpostuaren baldintzak eta lanbide-gaikuntza betetzen baditu, betiere aurretiaz zuzendaritza akademikoari eta dagokion arloko arduradunari kontsulta eginik, eta kasu bakoitzean dauden datu objektiboen arabera.

7. artikulua. Urrutiko lana.

Langileek aukera izanen dute urrutiko lana egiteko, 10/2021 Legeak, uztailaren 9koak, Urrutiko Lanari buruzkoak ezarritako baldintzetan.

Urrutiko lana borondatezkoa izanen da langilearentzat eta enpresarentzat, eta aipatutako legean urrutiko lanari buruz aipatutako akordioa sinatu beharko da, zeina hasierako kontratuan sartzen ahalko baita, edo geroago egin.

Aurrez aurreko lan-modalitate batetik urrutitik lan egitera igarotzeko erabakia itzulgarria izanen da enpresarentzat eta langilearentzat.

Enpresak urrutiko lana ordaindu edo konpentsatu beharko du, eta langileak ez ditu bere gain hartu beharko bere lan-jarduerarekin lotutako ekipamendu-, tresna- eta baliabide-gastuak. "Urrutiko lana/Garraioa" kontzeptuaren bidez konpentsatuko da.

8. artikulua. Probaldia. Lan hitzarmen honen arabera, langile kontratudunek probaldi hau gainditu beharko dute:

–I. taldekoek, 3 hilabete.

–II. taldekoek, 2 hilabete.

Denbora hori antzinatasuna kalkulatzeko kontatuko da. Aurreko kontratuak direla-eta probaldia gainditu duten langileei ez zaie probaldia eskatuko.

V. KAPITULUA.–KATEGORIAK, LANBIDE-TALDEAK ETA FUNTZIONALAK

9. artikulua. Lanbide kategoria eta taldeak. Hitzarmen honen eraginpeko lantokietan aritzen diren langileak talde eta kategoria hauetako baten arabera kontratatuko dira enpresan. Kategoriak sailkapen konturako dira eta ez da beharrezkoa guzti-guztiak betetzea enpresak behar ez baditu.

I. Taldea.–Irakasleak.

1.1 1. mailako irakasle titular espezialista.

1.2 2. mailako irakasle titular jeneralista.

II. taldea.–Kudeatzaileak.

2.1 Administrazioko burua.

2.2 Merkataritzako arduraduna.

2.3 Giza Baliabideetako arduraduna.

2.4 1. mailako administrari ofizial espezialista.

2.5 2. mailako administrari ofizial jeneralista.

2.6. Administrari laguntzailea.

2.7. Merkataritza-agentea.

III. taldea.–Zerbitzuetako langileak.

3.1. Monitorea.

10. artikulua. Lanbide kategorien definizioa.

I. Taldea.–Irakasleak.

Agintzen zaizkion edukiak eman, hedatu eta garatzen ditu, eta zuzeneko arreta ematen die hezkuntza programetako parte-hartzaileei. Halaber, bere irakaslanaren berezko administrazio- eta kudeaketa-zereginez arduratuko da, barne hartuta enpresak antolatutako azterketen garapenarekin lotutako edozein eginkizun, bere titulazioak eta aplikatu beharreko protokoloak horretarako aukera ematen badute. Arloko arduradunaren menpe egonen da hierarkikoki.

1.1. 1. mailako irakasle titular espezialista. Unibertsitateko lizentzia, gradua edo diploma eta irakaskuntzaren askotariko arloetan hiru urtetik gorako esperientzia duen irakaslea da, eta edozein prestakuntza-jarduera aurrez aurre eta online emateko gaitasun frogatua du.

1.2 2. mailako irakasle titular jeneralista. Irakaskuntzan hiru urte baino gutxiagoko esperientzia duen irakaslea.

Hiru kasu bereizi behar dira:

–Unibertsitateko lizentziadunak - gradudunak.

–Diplomadunak, ikaskuntzan esperientzia dutenak.

–Lizentziaduna edo diplomaduna ez izan arren, frogatutako esperientzia dutenak.

1. mailako irakasle titularraren kategoriara pasatzeko, irakasleak zerbitzuak eman beharko ditu hiru urtez jarraian, eta halaber, enpresak eskainitako prestakuntza jardueretara joan. Gainera, beharrezkoa izanen da prestatzaileak emandako aldeko txostena izatea eta zentroaren jardueran parte hartu izana.

II. taldea.–Kudeatzaileak.

2.1. Administrazio-burua: enpresaren zuzendaritza administratiboa eta/edo idazkaritza haren kargura daude. Erabiltzaileekin, bezeroekin eta langileekin zuzeneko harremana duen pertsona da, eta enpresak antolatutako azterketen garapenarekin lotutako funtzio oro ere bete behar du. Zuzendariaren menpe egonen da zuzenean.

2.2. Merkataritzako arduraduna: Merkataritza-burua da; salmenten politikak eta helburuak ezartzen ditu, enpresaren publizitateaz eta marketinaz arduratzen da, eta hirugarrenekin sinatu beharreko merkataritzako akordioetan enpresaren ordez aritzen da; halaber, enpresak antolatutako azterketen garapenarekin lotutako edozein eginkizun gauzatzen du. Zuzendariaren menpe egonen da zuzenean.

2.3. Giza baliabideen arduraduna: Giza Baliabideetako burua da eta langileen, lan-kudeaketaren eta langile-arduradunekiko harremanen politikak eta helburuak zabaltzen ditu, barne hartuta enpresak antolatutako azterketen garapenarekin lotutako edozein eginkizun. Zuzendariaren menpe egonen da zuzenean.

2.4 1. mailako administrari-ofizial espezialista: negozio arloetako bateko funtzio espezifikoetan hiru urte baino gehiagoko esperientzia du, eta arlo jakin batean espezializatu da, baita behar adinako esperientzia eta prestakuntza eskuratu ere. Horrez gain, enpresak antolatutako azterketen garapenarekin lotutako edozein eginkizun betetzen du. Administrazio-buruaren eta zuzendariaren menpe egonen da zuzenean.

2.5. 2. mailako administrari-ofizial jeneralista: bere nagusiaren gainbegiradapean, administrazioko funtzio burokratikoak soilik egiten ditu, esaterako, telefonoa hartzea, harrera ematea eta Administrazio Departamentuarekin, Bezeroaren Arretarekin eta Zuzendaritzarekin lotutako gainerako zerbitzuak ematea, baita enpresak antolatutako azterketen garapenarekin zerikusia duen edozein eginkizun ere.

2.6. Merkataritza-agentea: enpresak ematen dituen ikastaroak sustatu eta saltzen ditu, merkataritzako arduradunaren zuzendaritza eta gainbegiradapean, eta enpresak antolatutako azterketen garapenarekin lotutako edozein eginkizun betetzen du.

III. taldea.–Zerbitzuetako langileak.

3.1 Monitorea: Indarreko legeriak eskatutako titulazio akademikoa eta/edo jarduerari buruzko egiaztatutako esperientzia izanik, aisialdiko eta denbora libreko jardueren garapena dinamizatzen du, arloko arduradunak ezarritako hezkuntza-esparruaren barruan. Kategoria hau honako lanpostu hauetako langileei aplikatuko zaie: udalekuetako begiraleak eta aisialdi hezitzailearen eta animazio soziokulturalaren esparruan pareka daitezkeen beste batzuk.

11. artikulua. Kategoria funtzionalak. Aurrerantzean bestelako antolakuntza mota ezartzea deusetan galarazi gabe, hona hemen eginkizun-kategoriak:

–Zuzendari akademikoa.

–Hezkuntza Proiektuen arloko arduraduna.

–Kudeaketa Arloko arduraduna.

12. artikulua. Eginkizun-kategorien definizioa eta ezaugarriak. Enpresako zuzendaritzak berezko dituen eginkizunak nori esleitzen dizkion, hark beteko ditu. Kategoria hori eta ondoriozko tratamendua izanen ditu eginkizun hori betetzen duen bitartean. Beraz, ez da eskuratutako eskubiderik finkatuko.

–Zuzendari akademikoa: enpresaren hezkuntza-programa eta -proiektu guztien inguruko arduraduna eta erabakitzeko gaitasuna duena. Zuzendaritzaren iritziz titulazio eta esperientzia egokia izanik, pertsona hau izendatu dute enpresaren hezkuntza-jarduerak zuzendu, gidatu, diseinatu, orientatu eta gainbegiratzeko, arloko arduradunekin lankidetzan barneko eta kanpoko prestakuntza-plana diseinatu eta gauzatzeko, eta/edo agintzen zaizkion beste funtzio batzuk gauzatzeko, barne hartuta enpresak antolatutako azterketen garapenarekin lotutako edozein eginkizun. Eginkizunokin batera, irakasle lanetan arituko da, eta zuzendaritzak esleitutako beste edozein funtzio beteko du. Kategoria hori eta ondoriozko tratamendua izanen ditu eginkizun hori betetzen duen bitartean. Beraz, ez da eskuratutako eskubiderik finkatuko. Zuzendariaren menpe egonen da hierarkikoki.

–Programa eta proiektu pedagogikoen arduraduna: langile honek, eskola-ordu batzuk izateaz gain, behar diren ordezkapenak eginen ditu. Era berean, azterketak eta mailakatze probak prestatzen ditu, inbentarioko datu-basea mantentzen du, irakasleei laguntzen die, materiala eskatu eta banatzen du, ikastaroetako programak diseinatu eta idazten ditu eta, oro har, zuzendaritza akademikoari laguntzeko esleitzen zaizkion eginkizunak betetzen ditu.

Halaber, zuzendaritzaren irizpidearen arabera eska daitezkeen prestakuntza- edo esperientzia-baldintzak betez, bere arlo funtzionaleko proiektu, programa eta ziurtagiri ofizialak prestatu, gainbegiratu eta kudeatzen ditu, eta bere arlo funtzionalari atxikitako irakasle-taldea koordinatzen du. Era berean, kanpoko bezeroen eta bere taldearen premien jarraipena egiten du, bere eremu funtzionalaren helburuak betetzen direla bermatzeko. Besteak beste, eginkizun hauek ditu: zuzendaritzarekin, bere lantaldearekin, erabiltzaileen familiekin eta zerbitzuen erabiltzaileekin bilerak egitea eta horietan parte hartzea; erabili beharreko hezkuntza-materiala kudeatu eta hautatzea; txostenak prestatzea eta hezkuntza-proiektua behar bezala koordinatzen dela bermatzea, proiektu horretan eta/edo berori gauzatzen den eremu fisikoan etengabeko presentzia izanez. Halaber, bere jarduera-eremuko prestakuntza-plana diseinatu eta gauzatuko du, eta enpresak antolatutako azterketen garapenarekin lotutako edozein funtzio beteko du.

Kategoria hori eta ondoriozko tratamendua izanen ditu eginkizun hori betetzen duen bitartean. Beraz, ez da eskuratutako eskubiderik finkatuko. Zuzendari akademikoaren menpe egonen da hierarkikoki.

–Kudeaketa Arloko arduraduna: enpresako kudeaketa- eta/edo ekoizpen-arlo jakin baten arduraduna da, eta bere nagusiak eskuordetutako eginkizun eta zeregin zehatzak ditu, haren menpe egonik.

VI. KAPITULUA.–KARGU-UZTEAK

13. artikulua. Lanpostua uztea.

Langileak, enpresak aginduta, lana uzten badu, legeek xede horrekin kasu bakoitzerako ezarritakoa bete beharko du enpresak.

Langileak lana bere borondatez uzten badu, idatziz jakinarazi behar dio enpresari, gutxienez 15 egun lehenago. Hori bete ezean, enpresak likidaziotik kentzen ahalko dio egun bateko soldata abisua berandu ematen den egun bakoitzeko, 15 egunera bitarte.

VII. KAPITULUA.–LANALDIA, OPORRAK, BAIMENAK, MAILA-IGOERAK, ESZEDENTZIAK, ERRETIROAK, AMATASUNA

14. artikulua. Lanaldia.

Hitzarmen honen indarraldian, langileen urteko lanaldia, gehienez, hauxe izanen da:

–I. eta III. taldeak: 1.428 ordu (1.050 eskola-ordu eta eskola-orduak ez diren 378 ordu).

–II. taldea: 1.675 ordu.

Eguneroko 60 minututik beherako irakaskuntza-zerbitzuak lanordu baten gisa zenbatuko dira. Eguneroko 60 minututik gorako irakaskuntza-zerbitzuak haien iraupen zehatzaz zenbatuko dira. Lana hobeki antolatzeari begira, I. talderako 34 orduko asteko modulua ezarri da, eta II. talderako, berriz, astean 39 ordukoa.

Hitzarmen hau argitaratzen denetik aurrera, enpresak ulertuko du asteko batez beste 25 eskola-orduko urteko lanaldia duten langileei eskolarik gabeko 9 ordu dagozkiela (eskolak prestatzeko orduak, joan-etorriak, prestakuntza-orduak, etab.). Eskolako eta eskolarik gabeko ordu horien azpitik, proportzionalki handituko da.

Horregatik, lanaldi hori duten langilek lanaldi osoa dutela ulertuko da, asteko 34 orduko kontratua izanik. Langileok gaur egungo ordainsari osoa jasotzen jarraituko dute, hemen ezarritako igoeren ehunekoekin, eta 2023ko urtarrilaren 1etik aurrera izanen ditu ondorio ekonomikoak.

Dena dela, enpresak aukeratzen ahal du asteko beste banaketa bat egitea, jardueraren, beharren, kontratu motaren eta abarren arabera, baldin eta zuzendaritzak justifikatzen badu neurria salbuespenezkoa dela.

Zentroan egote hutseko orduak ez dira lanordutzat hartuko, salbu eta enpresak bilera orokorretarako deia egiten badu, non langileek nahitaez agertu behar duten.

Eginkizun-kategorien kontaketa: 200 ordu, talde horretarako ezarritako urteko kopuruaren gainean.

Lanaldi hori ez zaie aplikatuko Gaztelania Departamentuan aritzen diren langileei, haien lanaldia honelakoa izanen baita, hitzarmen honek indarra duen bitartean:

–I. eta III. taldeak: 1.446 ordu (1.085 eskola-ordu eta eskola-orduak ez diren 361 ordu).

–II. taldea: 1.715 ordu.

Langileen Estatutuaren 34.2 artikuluan xedatuaren ondorioetarako, enpresak zilegi izanen du urteko lanaldiaren %10 era irregularrean banatzea urtean zehar.

Dena dela, banaketa horrek legez ezarritako gutxieneko atsedenaldiak (egunekoak eta astekoak) errespetatu beharko ditu, eta langileak gutxienez bost egun lehenago jakin beharko ditu lanaldi irregularreko laneguna eta lanorduak.

Lanaldiaren gehieneko iraupenaren eta egindako lanaren artean dauden aldeak hamabi hilabeteko epean konpentsatuko dira, egiten direnetik hasita.

15. artikulua. Lanaldi irregularra udan.

Enpresak udan (uztaila eta abuztua) duen jarduera berezia kontuan hartuta, erabaki da ezarritako lanaldia baino handiagoa egiten duten langileei gehiegizko ordu horiek bi modutara pagatzen ahalko zaizkiela: atsedenaldi bidez, edo une bakoitzean ezartzen den zenbatekoa ordainduta.

Langileak atsedenaldiak hautatzen baditu, jarduera gutxiko aldietan hartu beharko ditu, eta lehentasunez egun osotan. Edonola ere, langileak eta enpresak adostu beharko dituzte konpentsatzeko beste aldi batzuk.

Langileak bere kontratukoa baino lanaldi txikiagoa egiten badu udan, egin gabeko orduak berreskuratu beharko ditu.

Egin gabeko orduak ez dira 20tik gorakoak izanen eta urte bakoitzeko irailaren 30a baino lehenago konpentsatuko dira, kontuan izanik irakaskuntzako 25 eskola-ordutik gorako lanaldia egiten ahal dela astean.

16. artikulua. Deuseztatzeak.

Edozein inguruabar dela-eta, eskola bat bertan behera geldituz gero, langileak lehenbailehen jakinaraziko dio enpresari. Zentroan zein kanpoan ematen diren eskolak 24 ordu baino gutxiagoko epearekin bertan behera uzten diren kasuetan, langileak ez du zentroan gelditu beharko.

Urritik maiatzera bitartean 24 ordu edo gehiago bertan behera gelditzen diren orduak berreskuratu beharko dira lehenik eta behin. Berreskuratu ezin badira, irakaslanen bidez konpentsatuko dira (ordezkapenak, trinkoak, programak diseinatu eta prestatzea, azterketak, etab.), edo zentroko beste edozein eginkizun administratiboren bidez, enpresak hori beharrezko irizten badu ordu poltsa hori konpentsatzeko.

Zuzeneko irakasteaz kanpoko irakaslanak egiteko tokia eta ordutegia, bai eta eginkizun administratiboena ere, alderdiak ados egonda zehaztuko dira, eta enpresak haiek bukatzeko ezartzen dituen epeak errespetatuko dira. Irakaslea eta ikasleak ados egonda berreskuratuko dira klase horiek. Ordezkapenak langilearen ordutegiaren barnean ezarriko dira, eta eskari handieneko orduetan izanen da (7:30-10:00 eta 13:00-22:00, biak batera).

Enpresak aldi hauek izanen ditu eskubide hori betetzeko:

1.–Urria-abendua: otsailaren bukaera baino lehen konpentsatuko dira.

2.–Urtarrila-martxoa: apirilaren bukaera baino lehen konpentsatuko dira.

3.–Apirila-maiatza: ekainaren bukaera baino lehen konpentsatuko dira.

Enpresak eskubide hori baliatzen ez badu goian aipatutako epean, eskubidea galduko du, horren arrazoia langileari egozten ahal zaion kasuetan izan ezik (justifikatu gabe ez bertaratzea, ordutegia, etab.).

Ordu poltsa: plantillako langile finkoei ekainetik irailera bitarte lanik egin gabe pilatutako eskola-orduak honela pagatuko zaizkie, betiere, 35 orduko gehieneko mugarekin: prestakuntza, oharrak, feedback-a, zentroko bilerak, bilerak gurasoekin, bezeroei arreta egitea, etab. edo enpresak lan poltsa hori orekatzeko beharrezko jotzen dituen eginkizunak.

Langile finkoek ezin diote uko egin epe horretan galdutako ikastorduak beste ikastordu batzuekin aldatzeari orduen metaketa arrazoituz, baldin eta enpresak zuzeneko irakaskuntzarako proposatutako aldiek bat egiten badute langilearen ordutegiarekin, zein eskari handieneko orduetan egonen baita (7:30-10:00 eta 13:00-22:00, biak batera, klase arruntetarako, eta 9:00-13:00 edo 16:00-20:00 trinkoetan).

17. artikulua. Atsedenaldiak. Joera orokorra izanen da irakasleen ordutegiak taldekatzea. Bermatuko da gutxienez etenik gabeko 12 orduko atsedenaldia egitea egunean, lanaldi baten bukaeraren eta hurrengoaren hasieraren artean.

18. artikulua. Lan-egutegia. Azaroan urteko egutegia negoziatuko da ordezkaritza sindikalarekin. Hartan, eskola egunak eta eskolarik gabekoak, jaiegunak, ikasturtearen bukaera eta oporrak banatzeko irizpideak zehaztuko dira. Behin egutegia negoziatuta, enpresaren iragarki oholean paratuko da ikusgai.

19. artikulua. Oporrak.

Hitzarmen kolektibo honen eraginpeko langile guztiek urtean hilabeteko oporraldi ordaindua izanen dute, edo lan egindako denborari dagokion zati proportzionala.

Oporrak enpresan jarduera gutxiagoko aldietan hartuko dira, udan lehentasunez, salbu eta Gaztelania Departamentuari atxikitako langileen kasuan. Horiei urteko beste egun batzuetan bermatuko zaie beren oporraldi etengabea.

Udan, gainera, produktibitate maila batzuei heldu behar zaie, aldi horretan irakasleek zerbitzuen %80 bermatzeko moduan gutxienez. Produktibitatearen ehuneko hori erdiesten ez bada, zozketaren bidez esleituko dira oporrak.

Urte osoan jarduten duten langileek 15 eguneko oporraldia noiz hartu hautatzen ahal du, betiere kontuan izanik artikulu honetan eta aurrekoan jasotako mugak. Gainerako 15 egunak enpresak hautatuko ditu.

I. taldeak (irakasleak), gainera, Aste Santuan eta Eguberrietan hartzen ahalko ditu enpresaren lan egutegian lanaldien luzapenagatik ezarritako egunak, Gaztelania Departamentuari atxikitako langileek izan ezik, beren egutegia izanen baitute.

Zehaztutako oporraldiak bat egiten duenean haurdunaldiaren, erditzearen edo edoskitze naturalaren ondoriozko aldi baterako ezintasunarekin, edo kontratu-etendura batekin, dela amatasunagatik dela aitatasunagatik, eskubidea izanen da oporrak beste garai batean hartzeko, nahiz eta dagokien urte naturala bukaturik egon.

20. artikulua. Baimenak. Langileak aukera izanen du lanera ez joateko, ordainsaria jasotzeko eskubidearekin, beti aldez aurretik jakinarazita eta justifikatuta, jarraian adieraziko diren arrazoiren batengatik eta gertaera eragilea izan eta berehala, eta egun guztiak lanegun gisa zenbatuko dira, berariaz naturalak direla adierazten direnak izan ezik. Gertaera eragilea izan den egunaren hurrengotik hasiko da zenbatzen, edo egun beretik, ez bada hasi zerbitzua ematen edo zerbitzua ematen egonik bere lanpostua utzi badu baimena erabiliz (zerbitzuak ematen igarotako denbora zenbatuko da):

1.–Hamabost egun natural ezkontzeagatik edo izatezko bikotea osatzeagatik.

2.–Bost lanegun, istripu nahiz gaixotasun larriagatik, ospitaleratzeagatik nahiz etxean atseden hartzea eskatzen duen ospitaleratzerik gabeko ebakuntza kirurgikoa jasan behar badu langilearen ezkontideak, izatezko bikotekideak edota odolkidetasuneko nahiz ezkontza ahaidetasuneko bigarren mailarainoko senide batek (izatezko bikotekidearen odolkidetasuneko senideak barne) edo langilearekin etxe berean bizi den eta zaintza behar duen beste edozein pertsonak (egun natural bat gehiago, mugakidea ez den probintzia edo uharte batera joan behar badu, eta 2 egun natural gehiago, atzerrira joan behar badu).

3.–Bi lanegun ezkontidearen, izatezko bikotekidearen edo bigarren gradura arteko odol edo ezkontza bidezko ahaideen heriotzagatik. Arrazoi horrengatik langileak bidaia egin behar badu, epea 2 lanegunez luzatuko da.

4.–Egun bat ohiko bizilekuz aldatzeagatik.

5.–Behar-beharrezkoa den denbora, publikoa eta pertsonala den eginbehar saihetsezin bat betetzeko, boto ematekoa barne.

Lege edo hitzarmenen bidez ezarritako arau batean denbora jakin bat finkatuta badago, absentziaren iraupenari eta konpentsazio ekonomikoari dagokienez arau hartan xedatutakoari jarraituko zaio.

Goian aipatu den eginbehar hori betetzeagatik hiru hilabeteko tartean lanorduetako ehuneko hogei baino gehiagoan ezin izan bada dagokion lana egin, enpresak langilea 46.1 artikuluan araututako eszedentzia egoerara pasatzen ahal du. Langileen Estatutua.

Langile batek, betebeharra betetzeagatik edo kargu batean aritzeagatik, kalte-ordaina kobratzen badu, diru kopuru hori deskontatuko zaio enpresak ordaindu ohi dion soldatatik.

6.–Eginkizun sindikaletan edo langileen ordezkaritza lanetan aritzeko, lege edo hitzarmen bidez ezarritakoaren arabera.

7.–Jaioaurreko azterketak egiteko eta erditzea prestatzeko tekniketan trebatzeko, adopzioaren, harreraren edo adoptatzeko egiten den zaintzaren kasuetan, informazio eta prestakuntza saioetara joateko eta egokitasun deklarazioaren aurreko txosten psikologiko eta sozialak egiteko behar den denbora, betiere lanorduetan egin behar badira.

8.–Jaiotzaren, adopzioaren eta harreran edo adopzioan hartzeko zaintzaren kasuan, Langileen Estatutuaren 45.1.d) artikuluarekin bat, langileek eskubidea izanen dute ordu batez lanetik kanpo egoteko, bularreko haurra zaintzearren, hark bederatzi hilabete bete arte. Ordu hori bi zatitan banatzen ahal da. Haur baten baino gehiagoren jaiotze, adopzio edo harreran edo adopzioan hartzeko zaintzaren kasuetan, lizentziaren iraupena modu proportzionalean handituko da.

Eskubide hori baliatzen duenak, hala nahi badu, eskubide hori lanaldiaren ordu erdiko murrizketarekin ordezkatzen ahal du, helburu berbererako, edo denbora hori lanaldi osotan pilatzen ahal du, negoziazio kolektiboan ezarritako baldintzetan edo enpresarekin adostuta (betiere negoziazio kolektiboan ezarritakoa errespetatuz).

Atal honetan jasotako lanaldi murrizketa langileen eskubide indibiduala da, eta eskubidea baliatzeko aukera ezin zaio besterendu beste guraso, adoptatzaile, zaintzaile edo harreragileari. Hala ere, enpresa bereko bi langilek subjektu eragile beragatik baliatzen badute eskubide hori, aldi berean baliatzeko aukera mugatzen ahalko da enpresaren funtzionamenduari lotutako arrazoi funtsatu eta objektiboengatik, idatziz behar bezala arrazoituta. Kasu horretan, enpresak ordezko plan bat eskaini beharko du bi langileak eskubide horretaz baliatzen direla bermatzeko eta kontziliazio-eskubideak baliatzea ahalbidetzeko.

Bi gurasoek, adoptatzaileek, zaintzaileek edo harreragileek iraupen eta erregimen berean baliatzen badute eskubide hori, denbora hori bularreko haurrak hamabi hilabete bete arte luzatzen ahal da, eta soldata proportzioan murriztuko da umeak bederatzi hilabete betetzen dituenetik aurrera.

9.–Langileek eskubidea izanen dute ordu batez lanpostutik kanpo egoteko seme edo alaba bat garaia baino lehen jaiotzen bada edo, arrazoia edozein dela ere, jaio ondoan ospitalean egon behar badu. Orobat, lanaldia gehienez bi ordu murrizten ahalko dute, soldata ere proportzio berean murriztuta. Baimen hau baliatzeko, artikulu honetako 11. atalean ezarritakoari jarraituko zaio.

10.–Legezko zaintza dela-eta, langileren batek bere kargura baldin badu hamabi urtetik beherako haurren bat edo ordaindutako lanik egiten ez duen eta desgaitasuna duen pertsona bat, eskubidea izanen du eguneko lanaldia murrizteko, soldata ere hein berean murriztuta, bere lanaldiaren iraupenaren zortziren bat gutxienez eta erdia gehienez.

Adinagatik edo istripu edo gaixotasun baten ondorioz bere kasa bizitzeko gauza ez den eta lan ordaindurik egiten ez duen senitartekoa –bigarren gradura arteko odol ahaidetasunezko edo ezkontza ahaidetasunezkoa–, eta berdin ezkontidea edo izatezko bikotekidea, zaindu behar duen langileak ere eskubide bera izanen du.

Gurasoak edo adoptatzeko edo harrera iraunkorra egiten duen zaintzaileak eskubidea izanen du lanaldia murrizteko, gutxienez erdira, soldata hein berean murriztuta, minbiziak (tumore gaiztoak, melanomak eta kartzinomak) edo beste gaixotasun larri batek jota bere ardurapean dagoen adingabe bat zaintzeko, gaixotasun horrek ospitaleratze luzea ekartzen badu eta, hortaz, adingabeak zaintza zuzena, jarraitua eta iraunkorra behar badu. Hori egiaztatzeko, osasun zerbitzu publikoaren edo kasuan kasuko autonomia erkidegoko osasun organo administratiboaren txostena beharko da. Lanaldia murrizteko eskubidea seme-alabak edo harrera iraunkorrean zein adopziorako zaintzapean hartutako pertsonak hogeita hiru urte bete arte baliatzen ahalko da, gehienez.

Ondorioz, harrera iraunkorrean zein adopziorako zaintzapean hartutako adingabeak edo seme-alabak hemezortzi urte betetze hutsak ez du ekarriko lanaldia murrizteko aukera bukatzea, baldin eta oraindik ere beharrezkoa bada zaintza zuzena, jarraitua eta iraunkorra egitea.

Hala ere, zaindu beharreko pertsonak 18 urte bete ondotik, lanaldia murrizteko eskubidea onartzen ahalko da, pertsona horrek 23 urte betetzen dituen arte, minbizia edo gaixotasun larria adin nagusira iritsi baino lehen diagnostikatu bada, betiere eskaera egiteko unean aurreko paragrafoetan ezarritako baldintzak egiaztatzen badira, adina izan ezik.

Era berean, murrizketa hori izateko eskubidea mantenduko da pertsonak 26 urte bete arte, baldin eta, 23 urte bete baino lehen, gainera, %65eko edo gehiagoko desgaitasuna frogatzen badu.

Ezkontza nulua, banantzea, dibortzioa edo izatezko bikotea deuseztatzen den kasuetan, edo genero indarkeriaren biktima izatea egiaztatzen denean, lanaldia murrizteko eskubidea zaindu beharreko pertsonarekin bizi den guraso, zaintzaile edo hartzailearen alde aitortuko da, betiere eskatzen diren gainerako baldintzak betetzen baditu.

Atal honetako hirugarren eta laugarren paragrafoetan aurreikusitako kasuetan dagoen gaixoa ezkontzen bada edo izatezko bikote bat osatzen badu, lanaldia murrizteko eskubidea izanen du haren ezkontideak edo izatezko bikotekideak, betiere eskubide hori izateko baldintzak frogatzen baditu.

Apartatu honetan araututako lanaldiaren murrizketak langileen banako eskubidea dira, gizonezkoak zein emakumezkoak izan. Hala ere, enpresa bereko bi langilek subjektu eragile beragatik baliatzen badute eskubide hori, aldi berean baliatzeko aukera mugatzen ahalko da, enpresaren funtzionamenduari lotutako arrazoi funtsatu eta objektiboengatik, idatziz behar bezala arrazoituta. Kasu horretan, enpresak ordezko plan bat eskaini beharko du bi langileak eskubide hori baliatzen dutela bermatzeko eta kontziliazio eskubideak baliatzea ahalbidetzeko.

Eskubide hori erabiltzean, kontuan hartuko da emakumeen eta gizonen arteko erantzunkidetasuna sustatzea eta, halaber, genero rolak eta estereotipoak betikotzea saihestea.

11.–Lanaldia murrizteko baimena baliatzeko ordutegia eta aldia zehaztea, 8., 9. eta 10. apartatuetan aurreikusi bezala, langileari dagokio, bere lanaldi arruntaren barruan. Hala ere, hitzarmen kolektiboetan irizpideak ezartzen ahalko dira 10. paragrafoan aipatzen den lanaldi murrizketaren ordutegia zehazteko, langilearen bizitza pertsonala, familiakoa eta lanekoa bateratzeko eskubideak eta enpresen ekoizpen eta antolaketa beharrak kontuan hartuta. Langileak, ezinbesterik gertatu ezean, enpresaburuari hamabost eguneko edo hitzarmen kolektiboan ezarritako aurrerapenez abisatu behar dio, eta bularreko haurra zaintzeko baimena edo lanaldi-murrizketa noiz hasiko eta bukatu den zehaztuko du.

12.–Genero indarkeriaren edo terrorismoaren biktimatzat aitortuta dauden langileek, egiaz babestuak izan daitezen eta gizarte laguntza integrala izan dezaten, eskubidea izanen dute lanaldia murrizteko (soldata hein berean murriztuko zaio), edo bere lan denbora berrantolatzeko, ordutegia egokituz, ordutegi malguaz baliatuz edo enpresak lan denbora antolatzeko dituen beste bide batzuk erabiliz. Eskubidea izanen dute, halaber, lana osorik edo zati batean urrutitik egiteko, edo modalitate hori uzteko, ezarritako berezko sistema hori bada, baldin eta bi kasuetan zerbitzu mota hori bateragarria bada langileak betetzen duen lanpostuarekin eta eginkizunekin.

Kasu jakin horietan eskubide horiek erabiltzen ahal dira lan hitzarmen kolektiboetan edo enpresaren eta langileen ordezkarien arteko akordioetan ezartzen diren moduan, edo enpresaren eta ukitutako langilearen artean ados jarrita. Horrelakorik izan ezean, eskubide horiek langileak berak zehaztuko ditu, aurreko atalean ezarritako arauak aplikatuz, desadostasunak ebazteari dagozkionak barne.

13.–Langileak eskubidea izanen du ezinbesteak eraginik lanera joan gabe gelditzeko, baldin eta ahaideekin edo bizikideekin zerikusia duten premiazko familia-arrazoiengatik sortzen bada halabehar hori edo berehala bertaratzea eskatzen duen gaixotasun edo istripuren bat gertatzen bada.

Apartatu honetan aurreikusitako arrazoiengatik hartzen dituzten absentzia-orduei dagokien soldata jasotzeko eskubidea izanen dute langileek (urtean lau egunen baliokideak), hitzarmen kolektiboan ezarritakoaren arabera edo, halakorik ezean, enpresaren eta langileen legezko ordezkarien arteko akordioaren arabera. Horretarako, langileek absentziaren arrazoia egiaztatu beharko dute.

14.–Lanegun bat odol- edo ezkontza-ahaidetasunezko lehen mailarainoko senide baten edo anai-arreba baten ezkontzagatik, eta 2 egun natural gehiago atzerrira joan behar izanez gero.

15.–Bi lanegun norberaren kontuetarako, urte naturalaren barruan. Enpresak nahitaez emanen ditu, baldin eta gutxienez 15 egun lehenago eskatzen badira, eta enpresan ez badago egoera berean dagoen beste langilerik.

Norberaren kontuetarako bi egunak ez dira jarraian hartzen ahalko, eta ez dira inoiz oporren aurretik edo ondotik hartzen ahalko, ez eta lanegunak ez diren egunen artean ere. Baldintza horiek betetzen ez badira, enpresak baimena ukatzen ahal du zerbitzuaren beharrak direla eta. Abisua emateko epea ez da kontuan hartuko behar bezala justifikatzen diren salbuespenetan.

16.–Hitzarmen honen eraginpeko langile guztiek urtean hamabost egun arteko baimena eskatzen ahalko dute soldata gabe, eta eman egin beharko zaie, gutxienez 20 egun lehenago eskatuz gero. Langileren batek baimena duen bitartean beste batek eskatzen badu, zuzendaritzak erabakiko du, enpresaren beharrak kontuan izanik.

Artikulu honetan ezarritako baimenen ondorioetarako, erregistro ofizialean erregistratutako izatezko bikoteak eta adopziozko seme-alabak edo adopzioari begira hartutakoak ere aintzat hartuko dira.

Odol- eta ezkontza-ahaidetasunak barne hartzen ditu:

–Lehen mailakoak: ezkontidea, gurasoak, aita-amaginarrebak, seme-alabak, suhia eta erraina.

–Bigarren mailakoak: aitona-amonak, anai-arrebak, ezkonanai-arrebak eta bilobak.

21. artikulua. Maila-igoerak eta lanpostu hutsak. Enpresan behin baino gehiagotan aritu diren irakasleak ez dira kontratatzen ahalko aurretik zuten kategoriatik beheragoko batean eginkizun berberak betetzeko.

Kontratazio berri bat egin behar bada edo lanpostu huts bat sortzen bada, eta plantillako langile finkoek lanpostu horietara pasatzerik ez badute, lanaldi partzialeko kontratua duten langileek lehentasuna izanen dute.

Administrari-ofizialen lanpostu hutsik egonez gero, administrari laguntzaileak kategoria hartara igoko dira, betiere, Zuzendaritzaren iritziz eta langileen ordezkariak entzun ondotik, lanposturako baldintzak betetzen badituzte. Bost urteko antzinatasuna izan eta beren eginkizunak modu egokian betetzen dituzten administrari laguntzaileek eskubidea izanen dute, administrari-ofizialen lanpostu hutsik izan ezean, haien lansariak jasotzeko.

22. artikulua. Eszedentziak. Eszedentziak emateko lanaren inguruan indarra duen legedian, hots, Langileen Estatutuaren 46. artikuluan ezarritakoari jarraituko dio enpresak, ezarritako baldintzetan.

Era berean, langileak hauetarako eskubidea izanen du:

22.1. Borondatezko eszedentzia: enpresan gutxienez urtebeteko antzinatasuna duen langileak eskubidea du borondatezko eszedentzia hartzeko, lau hilabeterako gutxienez eta bost urterako gehienez. Aurretik eszedentzian egondako langileak eszedentzia berriz hartzeko, lau urte igaro beharko dira aurrekoa bukatu zenetik. Borondatezko eszedentziak ez du ematen lanpostua erreserbatzeko eskubiderik. Langileak lehentasunezko eskubidea izanen du kategoria bereko edo antzeko kategoriako lanpostu hutsera itzultzeko bere eszedentziaren aldia bukatzen denean eta lanera itzultzeko eskatzen duenean.

Egoera horretan emandako denbora ez da kontuan hartuko antzinatasunari eta gizarte kotizazioei dagokienez. Aparteko kasuetan izan ezik, eszedentziak eskatzeko eta, emandako eszedentzia aldiak bukatutakoan, lanera itzultzea aurretiaz eskatzeko epea 30 egunekoa da.

Eszedentziak irauten duen bitartean, borondatezko eszedentzian dagoen pertsonak ez du zerbitzu ematen ahalko, bere kontura edo besteren kontura, Nafarroako Foru Komunitatean dagoen hizkuntza-zentro edo akademia batean irakasle gisa edo irakasle ez den langile gisa, edo elkarrizketa-irakasle gisa.

22.2. Ahaideak zaintzeko eszedentzia: langileek eskubidea izanen dute hiru urteko eszedentzia hartzeko, gehienez, seme edo alaba bakoitza zaintzeko, norberak izandakoa edo adoptatu edo etxean hartzekoa. Hiru urte horiek haurra jaiotzen denetik edo, bestela, epaileen ebazpenaren egunetik aurrera kontatuko dira.

Eszedentziarako eskubidea izanen dute, halaber, adinagatik edo istripu edo gaixotasun baten ondorioz bere kasa bizitzeko gauza ez den eta lan ordaindurik egiten ez duen familiartekoren bat –odol-ahaidetasuneko edo ezkontza-ahaidetasuneko bigarren mailara artekoa– zaindu behar duten langileek. Gehienez ere bi urte.

Langileak eszedentzian igarotzen duen denbora antzinatasunerako kontatuko da, eta lehenengo urtean lanpostua gordetzeko eskubidea izanen du. Epe hori bukatuta, gordeko zaion lanpostua lanbide talde berekoa edo kategoria baliokidekoa izanen da.

Eszedentziak irauten duen bitartean, borondatezko eszedentzian dagoen pertsonak ez du zerbitzu ematen ahalko Nafarroako Foru Komunitatean dagoen hizkuntza-zentro edo akademia batean irakasle gisa edo irakasle ez den langile gisa, edo elkarrizketa-irakasle gisa.

Subjektu eragile bera zaintzeko eskubidea enpresa bateko bi langilek edo gehiagok izaten badute, enpresaburuak aldi berean erabili nahi den eskubidea mugatzen ahalko du, enpresaren funtzionamenduarekin lotutako bidezko arrazoirik baldin bada.

Aparteko kasuetan izan ezik, eszedentziak eskatzeko eta, emandako eszedentzia aldiak bukatutakoan, lanera itzultzea eskatzeko epea 30 egunekoa da.

23. artikulua. Erretiro partziala.

Enpresak erretiro partziala emanen die hala eskatzen duten langileei, baldin eta legez ezarritako baldintzak betetzen badituzte.

24. artikulua. Genero indarkeria.

Genero indarkeriaren edo terrorismoaren biktimatzat aitortuta dauden langileek, egiaz babestuak izan daitezen eta gizarte laguntza integrala izan dezaten, eskubidea izanen dute lanaldia murrizteko (soldata hein berean murriztuko zaio), edo bere lan denbora berrantolatzeko, ordutegia egokituz, ordutegi malguaz baliatuz edo enpresak lan denbora antolatzeko dituen beste bide batzuk erabiliz. Eskubidea izanen dute, halaber, lana osorik edo zati batean urrutitik egiteko, edo modalitate hori uzteko, ezarritako berezko sistema hori bada, baldin eta bi kasuetan zerbitzu mota hori bateragarria bada langileak betetzen duen lanpostuarekin eta eginkizunekin.

VIII. KAPITULUA.–PRESTAKUNTZA, EGUNERAKETA ETA HOBEKUNTZA

25. artikulua. Prestakuntza.

Enpresak urte bakoitzeko irailean aurkeztuko die langileen ordezkariei prestakuntza plana.

Planak helburu hauek izanen ditu:

–Langileen garapen pertsonala eta lanbide garapena sustatzea.

–Aldaketara eta berrikuntza teknologikoko eta jasangarritasuneko prozesuetara egokitzea.

–Kategorian eta lanpostuan eska daitezkeen lanbide ezagutzak eguneratzea.

–Espezializazioa eta balioaniztasuna maila guztietan.

–Laneko arriskuen prebentzioa.

–Bikaintasuna artatutako erabiltzaileen arretan.

–Prestakuntza bi bloketan banatzen da:

–Langileentzako etengabeko prestakuntzarako plana, zuzendaritza akademikoak, arloko arduradunek eta irakasle esperientziadunek emana. Barneko plan horrek arlo hauek jasoko ditu:

• Hasierako prestakuntza programa (indukzioa).
• Teknologia ikasgelako tresna gisa.
• Berariazko heziketa haur, gazte, heldu eta enpresentzat, eta azterketa ofizialak prestatzea.

–Garapeneko eta hobekuntzako plana.

• Garapeneko eta hobekuntzako prestakuntza: Celta, Delta, Ih Certificate, Coaching eta antzekoak.
• Azterketa ofizialen prestakuntza: gainbegiralea, aztertzailea, zaintzailea eta antzekoak.

Era berean, biltzarretan, FECEI eta IHWO erakundeen webinarretan eta antzekoetan parte hartzea sustatuko da.

Etengabeko prestakuntza plana 10 ordukoa izanen da ikasturte akademiko eta langile bakoitzeko, eta 2024/2025 ikasturterako benetako 10 lanordu gisa zenbatuko da, baldin eta prestakuntzako ordu horiek behar bezala egiaztatuta badaude. Bestalde, garapeneko eta hobekuntzako planaren denbora ziurtagiri eta/edo egiaztapen horrekin lotutako zerbitzuaren hileko ordainsarian konpentsatuko da.

Etengabeko prestakuntzako plan hori nahitaez bete beharko dute irakasleek, finkoak edo aldi baterakoak izan, salbu eta ikastetxeetan dedikazio esklusiboa dutenek. Edukien eta ikasleen arabera hobekien egokitzen den hizkuntzan eta formatuan eginen dira saioak.

26. artikulua. Irakasleen prestakuntza hizkuntzetan.

Hizkuntza baten ikastarorik egin nahi izanez gero, enpresako langileei %100eko beherapena eginen zaie matrikulan eta hileko ordainketetan ikasturte hasieran indarra duen preziotik. Irakaskuntzaz kanpoko langileek ere abantaila berberekin egiten ahal dituzte hizkuntza-ikastaroak.

Nolanahi ere, talde bakoitzeko langileen kopurua ez da izaten ahalko bi baino gehiagokoa, zentroan 5 ikasletik 10era bitarte dituzten talde arruntetan. Bestalde, talde horietan ikaspostuak egon beharko dira, eta azaroa baino lehenago ez da sartzen ahalko. Baldintza horiek udako hilabeteetarako izanen dira eraginkorrak, eta enpresak egiten dituen hizkuntzen azterketa ofizialen tasetarako izanen da %50.

IX. KAPITULUA.–ONURA SOZIALAK

27. artikulua. Ezkontidearentzako, izatezko bikotekidearentzako eta seme-alabentzako bekak.

Hitzarmen honen eraginpeko langileen ezkontide, izatezko bikotekide eta seme-alabek eskubidea izanen dute Azterketa Ofizialetarako prestatzeko enpresak egiten dituen ikastaro arrunt eta trinkoetan plaza bat doan izateko. Zentroan daudela, ikasle bekadunek gainerako ikasleen betebehar berberak izanen dituzte. Talde horietan ikaspostuak egon beharko dira eta ez dira azaroan baino lehenago sartzen ahalko ohiko ikastaroetan.

Era berean, Hitzarmen honen eraginpeko langileen ilobek %25eko deskontua izanen dute Azterketa Ofizialetarako prestatzeko enpresak egiten dituen taldeko ikastaro arrunt eta trinkoetako hileroko kuotan. Zentroan daudela, ikasle bekadunek gainerako ikasleen betebehar berberak izanen dituzte. Talde horietan ikaspostuak egon beharko dira eta ez dira azaroan baino lehenago sartzen ahalko.

28. artikulua. Erantzukizun zibileko eta istripuetarako asegurua.

1. Enpresak erantzukizun zibileko aseguru bat kontratatu beharko du langile guztientzat, 42.070,85 euroko estaldura izanen duena langile bakoitzeko. Kontratatutako aseguruak erantzukizun zibil profesionala estali beharko du, murriztapenik izan gabe lanaldiaren arabera.

2. Era berean, enpresak kasuan kasuko istripu poliza izenpetuko du bere langileentzat, 42.070,85 euroko estaldura izanen duena langile bakoitzeko, langileak bere laneko bizitzan pairatzen duen edozein lanbide istriputarako, "in itinere" istripua barne.

Istripu aseguru horren polizak honako hauek estaliko ditu langile bakoitzerako:

–Kapital aseguratua istripuaren ondoriozko heriotza kasuan: 42.070,85 euro.

–Kapital aseguratua istripuaren ondoriozko baliaezintasun kasuan: 42.070,85 euro.

Ohiko lanbiderako ezintasun iraunkor partzialeko kasuetan, gorputz-atalak galduz gero edo erabat ezinduak geldituz gero, zenbateko hori kasuan kasuko portzentajearen arabera murriztuko da.

Miokardio infartua eta haren ondorioak bermaturik gelditzen dira, baldin eta lan edo epai arloko agintaritzak laneko istripu gisa aitortzen baditu irmoki.

29. artikulua. Aldi baterako ezintasuna.

1. Aldi baterako ezintasuna izanez gero, eta haren arrazoia gaixotasun arrunta edo lanetik kanpoko istripua bada, enpresak Gizarte Segurantzaren prestazioa osatuko du langilea egoera horretan dagoen bitartean, baldin eta enpresako plantillakoa izaten jarraitzen badu, baldintza hauetan:

–1. egunetik 21.era: soldataren %75.

–22. egunetik aurrera: soldataren %85.

2. Laneko istripuen ondoriozko aldi baterako ezintasuna izanez gero, barne hartuta "in itinere" motakoak eta laneko gaixotasuneko kasuak, enpresak Gizarte Segurantzaren prestazioa osatuko du soldataren %100 arte langilea egoera horretan dagoen bitartean, baldin eta enpresako plantillakoa izaten jarraitzen badu, lehen egunetik hasita.

3. Langilea ez da behartuko egun bateko baja eskatzera proba bat egin behar duenean edo larrialdietan ordu batzuk egon behar duenean.

4. Langileak baja medikoa hartzen duen egun berean jakinarazi beharko dio enpresari, eta, ahal badu, lehenago. Horretarako, mezu elektroniko bat bidali beharko du Giza Baliabideen Zuzendaritzara eta Zuzendaritza Akademikora, zerbitzua behar bezala eman eta antolatzen dela bermatzeko.

30. artikulua. Beste hobekuntza batzuk.

Nafarroako Medikuen Elkargoko langileek zenbait saltokitan dituzten hobariak eta deskontuak izanen dituzte langileek. Horretarako, dagokien egiaztagiria emanen zaie langileei.

Hitzarmenaren indarraldian, halaber, zenbait hobekuntza eginen dira alderdi batzuetan.

X. KAPITULUA.–ORDAINSARIAK

31. artikulua. Soldata kontzeptuak.

Enpresak egindako lanaren arabera dagokien hileko soldata ordainduko die langileei, sortzapenaren ondotik hilabetearen lehendabiziko bost egunen barruan.

Hitzarmen honen eraginpeko langileen soldata kontzeptu hauek osatuko dute: oinarrizko soldata, antzinatasuna eta, hala badagokio, dagozkion osagarriak.

Soldata eta aurreko osagarriak izateaz gain, Clen Collegeko irakasleek soldata aldakorra kobratuko dute.

Pizgarrien bidezko aipatuta ordainsaria kasu honetan aplikatuko da, ez beste inoiz: irakasleak egindako zuzeneko kudeaketaren ondorioz lortutako bezeroak daudenean, eta III. eranskineko taulan ezarritako baldintzei jarraituz aplikatuko da. Bezeroak berretsi beharko du hori, erregistroko fitxa baten bidez.

32. artikulua. Ordainsariak.

Lanbide-talde eta kategoria bakoitzerako ordainsariak I. eranskineko soldata-tauletan jasotzen dira. Jarraian adieraziko diren igoerak ordaintzeko datan enpresan alta emanik dauden langileek igoera horiek jasotzeko eskubidea izanen dute. Taulako soldata kategoria bakoitzaren urteko eta asteko gehieneko lanaldiaren arabera ezartzen da.

2022rako, enpresak 125 euroko ordainketa finkagarri bakar bat eginen die 2022an batez beste 20 ordu edo gehiagoko asteko lanaldia duten langileei, eta kopuru horren zati proportzionala ordainduko zaie 20 ordutik beherako asteko lanaldia dutenei, 2022an zerbitzuak ematen igarotako denborarekiko proportzioan.

2023ko urtarrilaren 1etik aurrerako ondorioekin, enpresak %3,5eko soldata igoera finkagarria aplikatuko die langile guztiei, aurreko urteko ordainsari finkatuaren gainean.

2024ko urtarrilaren 1etik aurrerako ondorioekin, enpresak %3,75eko soldata igoera finkagarria aplikatuko die langile guztiei, 2023ko ordainsarien gainean.

33. artikulua. Praktiketako langileen soldatak:

–Lehenengo urtea: hitzarmeneko soldataren %100, kategoriaren arabera.

–Bigarren urtea: hitzarmeneko soldataren %100, kategoriaren arabera.

34 artikulua. Antzinatasuna.

Lanaldi osoaren ulerkera berriaren ondorioz (eta ondorio juridikoen data berarekin), gaur egun 25 irakastordu egiten dituzten langileei (eta, proportzionalki, lanaldi txikiagoa dutenei) hirurtekoaren eta/edo bosturtekoaren zenbatekoa lanaldiaren ehuneko berriaren arabera kalkulatuko zaie, eta 2023ko urtarrilaren 1etik aurrerako ondorio ekonomikoekin ordainduko da.

Era berean, enpresak antzinatasuneko bi bosturteko gehiago onartu eta ordainduko ditu, eta ondorio ekonomikoak 2023ko urtarrilaren 1etik aurrera izanen ditu, gaur egungo hitzarmenean jasotako bost hirurtekoen gehieneko muga gainditu ondotik. Bosturteko bakoitzaren zenbatekoa bost urte horietako hirurtekoaren baliokidea izanen da, proportzionalki.

35. artikulua. Aparteko pagak.

Langile guztiek aparteko 2 paga izanen dituzte, edo urtebetetik beherako kontratuetan, denborari dagokion partea. Ekaineko eta abenduko nominekin batera kobratuko dira, eta haien zenbatekoa oinarrizko soldata eta antzinatasuna direla-eta hilero kobratzen denaren berdina izanen dira.

Aparteko pagak hamabi hileko kuota arruntetan hainbanatuta ordainduko dira, langileak hamalau pagatan ordaintzea eskatu ezean.

36 artikulua. Trebakuntza plusa.

IHn edo antzekoetan (CELTA, IHC, Trinity TESOL, etab.) prestakuntza egiaztatzen duten irakasleek hilero trebakuntza plus bat jasoko dute, I. eranskinean jasotako zenbatekoekin.

37 artikulua. Aparteko orduak eta ordezkapenak.

Aparteko orduak dirutan edo balio bereko atsedenaldiekin ordaintzen ahalko dira. Bigarren hori, enpresaren jarduera gutxiko aldietan izan behar da, enpresak eta langileak adostuta.

Ordu osagarriak kalkulatzeko, kontuan hartuko da kategoria bakoitzeko jasotzen den soldata.

Ordu osagarriak langile finkoek eginen dituzte soilik eta beren kontratuan urteko itundutako ordu guztiak egin ondotik baizik ez zaizkie pagatuko. Behin-behineko langileen kasuan, enpresaren eta langileen legezko ordezkarien artean erabakitako sistemaren arabera kalkulatuko dira.

Ordezkapenak honela ordainduko dira: ordezkapen ordu bakoitzeko, kategoria bakoitzeko 1,5 orduri dagokiona ordainduko da, salbu eta ordezkapenak azterketa egin behar duten taldeekin edo larunbatetan direnean; izan ere, kasu horietan, lan egindako ordu bakoitzeko 2 orduri dagokiona ordainduko da.

Ordainketa horretatik kanpo geldituko dira 15. artikuluan aipatutako orduak konpentsatzeko egiten diren ordezkapenak.

38. artikulua. Larunbatetako lana.

Honela ordainduko dira larunbatetan lan egindako eskola-orduak: kategoria bakoitzeko orduaren prezioa bider 1,5.

39. artikulua. Azterketak prestatzeko ikastaro trinkoetako taldeentzako eskolak.

Edozein hizkuntza modalitateko azterketak, eta zehatzago, FCE, CAE, PCE, TOEFL zein Hizkuntza Eskola Ofizialekoak prestatzeko taldeei eskolak ematea larunbatetako lanaren moduan ordainduko da (kategoria bakoitzeko orduaren prezioa bider 1,5 eginez).

Taldeko ikasle gehienek erabakitzen badute ez aurkeztea azterketara, irakasleak horren berri eman beharko dio zuzendaritzari. Kasu horretan, gainerako taldeetarako oro har ezarritakoa ordainduko zaio.

Azterketarako taldetzat hartzeko, gutxienez bi lagun egonen dira taldean. Beraz, banakako tutoretzak ez dira halakotzat hartuko.

Gainera, ulertzen da azterketetarako prestakuntzak aparteko ahalegina dakarrela irakasleentzat, ariketak zuzendu eta proba idatzirako prestatu behar dituztelako ikasleak. Hortaz, ez da azterketak prestatzeko taldetzat hartuko ahozko probak prestatzeko baino ez direnak.

Aurreko irizpideekin bat, zentroko zuzendaritza pedagogikoak erabakiko du taldeak baldintzak betetzen ote dituen edo irakasleak benetan azterketetarako prestatzen dituen, halako ordutzat hartzeko.

40 artikulua. Garraio narriaduraren plusa.

Enpresak 2024/2025 ikasturtea hasten denetik aurrera emanen du lanaldiaren barruan egindako joan-etorrien ondoriozko gastuaren ordain ekonomikoa, baldin eta hitzarmen hau argitaratuta badago, egoera hauetan:

Langile batek 07:00etatik 15:00etara eta 15:00etatik 20:00etara Iruñea barruan lanaren ondorioz egin behar dituen joan-etorriak zenbatuko dira, baldin eta bezeroaren bizilekua enpresaren egoitza sozialetik oinez 15 minutu baino gehiagoko distantzian badago.

Eskala honen arabera konpentsatuko dira:

Iruñean dauden Clen College akademien arteko joan-etorriak ez dira zenbatuko osagarri honen ondorioetarako.

41 artikulua. Kilometrajea.

Agiri honen 41. artikuluan ezarritako garraio narriaduraren plusaz gain, langileak Iruñetik kanpoko beste leku batzuetara joan behar izanez gero, enpresak dagokion kilometrajea ordainduko dio, II. eranskineko taulak abiapuntutzat hartuta.

Kilometrajea bere ibilgailua erabiltzen duen irakasleari ordainduko zaio, I. eranskinean bildutako zenbatekoekin.

42. artikulua. Txostenak.

Ikaslearen errendimenduari eta bilakaerari buruz egiten duen txosten bakoitzeko, I. eranskinean biltzen den konpentsazio bat jasoko du irakasleak.

43. artikulua. Kategoria funtzionalen ordainsariak.

Kategoria funtzionalak betetzen dituzten langileek, oinarrizko soldataz gain, eta eginkizun hori izan bitartean, I. eranskinean bildutako zenbatekoak jasoko dituzte.

IX. KAPITULUA.–DIZIPLINA ARAUBIDEA

44. artikulua. Faltak.

Enpresaren antolaketa eta lan diziplina enpresa zuzendaritzari dagozkio soilik. Eskumena izanen du bere langileak zehatzeko, indarreko legeei eta ondotik ezarritako hutsegiteen eta zehapenen mailakatzearen arabera.

Langileak eginiko faltak arinak, astunak edo oso astunak izanen dira, haien garrantzia, ondorioa eta asmoa ikusita.

A.–Falta arinak:

a) Bidezko arrazoirik gabe hilabetean bitan edo hirutan berandu iristea.

b) Lanera ez agertzeko arrazoia aurretik edo, bestela, hutsegitea gertatu ondotiko 24 orduan ez jakinaraztea, ezinbestekoetan salbu, hartarako ezintasuna frogatu ezean.

c) Zerbitzua bertan behera uztea bidezko arrazoirik izan gabe, denbora laburrerako izan arren. Horren ondorioz enpresari edo lankideei nolabaiteko kaltea sortzen bazaie edo istripuren bat eragiten bada, falta hau astuntzat edo oso astuntzat hartzen ahal da, kasua nolakoa den.

d) Arreta gabezia txikiak materiala zaintzean.

e) Enpresari bizileku- edo helbide-aldaketen berri ez ematea.

f) Lankideekin eztabaida izatea lanaldi barrenean.

B.–Falta astunak:

a) Bi hilabeteko aldian 4-10 aldiz berandu iristea, bidezko arrazoirik gabe.

b) Hilabetearen barruan bi aldiz ez fitxatzea enpresak une bakoitzean ezarritako ordutegi-erregistroko sisteman sartu edo irtetean.

c) Norberaren garbitasun eta txukuntasunik eza, eskolak ematean, bezeroei harrera egitean, etab.

d) Eskola orduetan edo kanpo, ikasleak edo bezeroak gaizki edo errespeturik gabe tratatzea.

e) Eskolak ematera, tutoretzetara eta abarretara zuzen jantzita ez joatea, bezeroaren espezialitateak hala eskatzen badu.

f) Eskola bat bertan behera utzi dela ez jakinaraztea, edo 5 ordu lehenago gutxienez ez jakinaraztea, salbu eta goizeko lehen orduan egiten direnean (07:00etatik 08:00etara zehazki).

g) Enpresak irakasleentzat ematen dituen nahitaezko prestakuntzako ikastaroetara ez joatea, baldin eta ikastaro horiek asteko lanaldi barnekoak badira, edo informazio bileretara ez joatea, derrigorrezkoak eta enpresak ordainduak baitira.

h) Eskola, tutoretza eta abar aurretik prestatuta ez edukitzea. Arloko arduradunak, Zuzendaritza Akademikoak eta/edo enpresaren Zuzendaritzak egiaztatuta baloratuko da prestatu den ala ez.

i) Falta astuntzat jotzen dira ikasleek langile baten aurka adierazitako kexak, baldin eta enpresako zuzendaritzak berak edota arloko eta/edo zuzendaritza akademikoko arduradunak berresten badituzte. Azkenok gai horri buruzko txostena aurkeztu beharko diote enpresako zuzendaritzari, 48 orduko epean.

j) Bidezko arrazoirik gabe, hogeita hamar eguneko aldian eskola batetik hirura bitarte ez egitea. Absentzia bakar bat nahikoa da lankide bati erreleboa hartu behar dionean edo enpresari kalte nabaria egiten zaionean.

k) Zabarkeriaz edo utzikeriaz aritzea lanean, zerbitzuaren kaltetan, bai eta lanorduetan jostetan aritzea ere.

l) Laneko edozein gaitan nagusien esanak ez betetzea, barne hartuta berandutzea eta oztopoak edo eragozpenak jartzea ebaluazioak egiteari, enpresak emandako material didaktikoa edo plataforma digitalak eta lana arrazionalizatzeko metodo berriak erabiltzeari, eta laneko parteak betetzeari uko egitea, faltsutzea edo hilaren 26a baino geroago aurkeztea, asistentzia kontrolik ez egitea, ez eta eskolan emandako materialari buruzkorik ere, etab. Diziplina hautsi dela nabarmen ikusten denean edota jokabide horrek enpresari kaltea sortzen dionean, hutsegite hori oso larritzat jotzen ahal da.

m) Falta arinak behin baino gehiagotan egitea, nahiz eta mota desberdinetakoak izan, hiru hilabeteko epean.

C.–Falta oso astunak:

a) Bidezko arrazoirik gabe hiru hilabeteko aldian hamar aldiz baino gehiagotan berandu iristea edo hogei aldiz baino gehiagotan sei hilabeteko epean.

b) Hilabetearen barruan hiru aldiz edo gehiagotan ez fitxatzea enpresak une bakoitzean ezarritako ordutegi-erregistroko sisteman sartu edo ateratzean, eta ordutegi-erregistroan norbait ordeztea eta sarrera- eta/edo irteera-ordu okerrak markatzea.

c) Bidezko arrazoirik gabe, hogeita hamar eguneko aldian bost eskola baino gehiago ez egitea.

d) Laneko iruzurra, leialtasun eza eta konfiantza abusua.

e) Eritasuna edo istripua simulatzea. Falta egin dela ulertuko da langilea, arrazoi horiengatik bajan egonik, bere gain edo besteren kontura edozein lanetan dabilenean. Atal honetan sartzen dira istripu- edo eritasun-baja luzatzeko egindako trikimailu oro.

f) Eskola bertan behera utzi dela behin baino gehiagotan ez jakinaraztea, hau da, bitan edo gehiagotan hilabete batean, edo lautan edo gehiagotan hiruhileko batean.

g) Lanorduetan horditurik eta drogak hartu ondotiko egoeran egotea.

h) Enpresari bidegabeko lehia egitea zenbait ekintzaren bidez. Lehia desleiala gertatzen da langileak lan egiten duen enpresari lehia egiten dionean, aldi berean beste enpresa batean edo bere kontura lan eginez, lehenengo enpresaren oinarrizko jarduera berean, enpresaren berariazko baimenik gabe. Lehia desleiala dagoela ulertuko da baldin eta langileak enpresan eskuratutako ezagutzak erabiltzen baditu, aztertzaile ofizial gisa aritzen bada Clen College ez den beste erakunde batean, enpresan lortutako informazioa baliatzen badu edo bezeroak desbideratzen baditu, besteak beste. Horrek barne hartzen du enpresaren materiala erabiliz lanak egitea eta/edo eskola partikularrak ematea, bai eta enpresako materiala norberaren kontuetarako erabiltzea ere. Langilea ez da enpresarekin lehiatzen ahalko harekin laneko harremana duen bitartean, barne hartuta oporraldiak eta eszedentziak.

i) Enpresako materialak eta tresnak lapurtzea edo zentrotik kanpo norberarentzat erabiltzea, enpresaren baimenik gabe.

j) Hitzezko eta egitezko tratu txarrak ematea, edo agintekeriaz edo errespetu falta larriz aritzea nagusiei edo haien ahaideei, bai eta lankide, menpeko, ikasle, bezero eta abarrei ere.

k) Erantzukizun berezia izanik, lanpostua uztea abisurik eman gabe.

l) Lan errendimendua arrazoirik gabe gutxitzea.

m) Lankideekin liskarrak edo iskanbilak sortzea.

n) Seihileko berean falta astun gehiago egitea, nahiz desberdinak izan, eta horiengatik zehapenak jaso izana.

45. artikulua. Zehapenen araubidea.

Falta astun eta oso astunengatik zehapena jartzeko, idatziz jakinaraziko zaio langileari, zehapena jartzeko arrazoiak eta data adierazita. Hutsegite astun edo oso astunengatik ezarritako zehapenak langileen legezko ordezkariei jakinaraziko zaizkie, haien berri izan dezaten.

Era berean, bost eguneko epea egonen da eraginpeko langileak egoki iruditzen zaizkion alegazioak idatziz aurkez ditzan enpresaren kontra.

Hauek dira faltengatik jartzen ahal diren gehieneko zehapenak:

–Falta arinengatik: hitzezko edo idatzizko kargu-hartzea.

–Falta astunengatik: lana eta soldata kentzea 2 eta 20 egun bitartean. Beste lanpostu batera aldatzea, zentro berean.

–Falta oso astunengatik: 20 egunetik 60ra bitartean enpleguz eta soldataz gabetzea. Diziplinazko kaleratzea.

46. artikulua. Falten preskripzioa.

Faltek epe hauen arabera preskribituko dute:

–Falta arinak, hamar egun.

–Falta astunak, hogei egun.

–Falta oso astunak, hirurogei egun eta, betiere, egin eta sei hilabetera.

Preskripzio epea enpresak zehatzeko ekintzaren berri duenean hasiko da.

XII. KAPITULUA.–ESKUBIDE SINDIKALAK, OSOTASUNA, IRENSPENA, ESKURATUTAKO ESKUBIDEAK ETA LEGE OSAGARRIAK

47. artikulua. Eskubide sindikalak.

Alderdiek hitzartzen dute langileen ordezkarien orduen kreditua hartzearekin honela handituko zaiela lan kontratua: 2 ordu Enpresa Batzordearen presidenteari eta Enpresa Batzordeko gainerako kideei. Ordu horiek eskolarik gabeak izanen dira, eta lan ordutegitik kanpokoak. Haietan langileen ordezkari lanetan arituko dira.

Kontratua zabaltzeaz gain, behar den adina denbora izanen dute ordezkarien prestakuntza ikastaroetara joateko; negoziazio kolektiboari eutsiko diote; edo, beren kargua dela-eta, Lan Ikuskatzailetzak, Nafarroako Lan Auzitegiak edo Lan Arloko Epaitegiak egiten dituzten zitazioetara joanen dira. Orobat, sortzen ahal diren aparteko aferetarako erabiltzen ahal da sindikatuen kreditua.

Kontratua 1. paragrafoan aipatu bezala zabaltzen bada, gehitutako orduen ordainketa eskola orduetarako berbera izanen da.

48. artikulua. Osotasuna eta irenspena.

Hitzarmen honetako baldintzek multzo zatiezina osatzen dute. Itundutako hobekuntza ekonomikoak irentsiak izanen dira, hitzarmen honek indarra hartzean borondatez enpresek pagatzen zituztenen bidez.

49. artikulua. Baldintzarik hoberenak.

Gainerako egoerak, bere osotasunean, kontuan hartuta, beti izanen dira langileek disfrutatzen dituzten onenak.

Hitzarmen honek indarra hartzean, langile batzuek opor gehiago, lanaldi laburragoa eta soldata handiagoa zituzten. Ad personam eskubidetzat hartuko da.

50. artikulua. Lege subsidiarioak.

Enpresaren hitzarmen kolektibo honetan xedatutakoa ez den orotan, Irakaskuntza Ez-arautuaren Sektorearen Estatuko Hitzarmen Kolektiboan eta Langileen Estatutuaren testu bateginean eta indarra duten lan xedapen orokorretan ezarritakoari jarraituko zaio.

AZKEN XEDAPENAK

Lehenengoa.–Hitzarmenean ezarritakoa ez aplikatzeko klausula. Arrazoi ekonomikoak, teknikoak, antolaketakoak edo produkziokoak tartean direla, enpresak eta hitzarmen kolektiboa negoziatzeko legitimazioa duten langileen ordezkariek, Langileen Estatutuaren 87.1 artikuluan aurreikusitakoari jarraikiz, hala adosten badute, bidezkoa izanen da, Langileen Estatutuaren 41.4 artikuluan ezarritako moduan kontsulta aldi bat ireki ondotik, aplikagarria den hitzarmen kolektibo honetan gai hauen gainean aurreikusitako lan baldintzak enpresan ez aplikatzea:

a) Lanaldia.

b) Ordutegia eta lan denboraren banaketa.

c) Txandakako lan araubidea.

d) Ordainketa-sistema eta soldataren zenbatekoa.

e) Lan sistema eta errendimendua.

f) Langileen Estatutuaren 39. artikuluan mugigarritasun funtzionalerako aurreikusten diren mugak gainditzen dituzten eginkizunak.

g) Gizarte Segurantzaren babes-ekintzan borondatez egindako hobekuntzak.

Ulertuko da arrazoi ekonomikoak daudela enpresaren emaitzetatik egoera ekonomiko negatiboa ondorioztatzen denean, hala nola galerak daudenean edo aurreikusten direnean, edo modu iraunkorrean behera egiten duenean diru-sarrera arrunten edo salmenten mailak. Edonola ere, beherakada hori iraunkorra dela ulertuko da ondoz ondoko bi hiruhilekotan, diru-sarrera arrunten edo salmenten maila, hiruhileko bakoitzean, aurreko urteko hiruhileko berean izandakoa baino baxuagoa bada.

Ulertuko da arrazoi teknikoak daudela ekoizpen baliabide edo tresnetan, besteak beste, aldaketak daudenean; antolaketako arrazoiak, berriz, langileen lan sistemetan eta metodoetan edo produkzioa antolatzeko moduan, besteak beste, aldaketak daudenean; eta ekoizpen arrazoiak, azkenik, enpresak merkaturatu nahi dituen produktu edo zerbitzuen eskarian, besteak beste, aldaketak daudenean.

Kontsulta prozeduran enpresako zuzendaritzaren aurrean solaskide lana betetzea Langileen Estatutuaren 41.4 artikuluan aipatzen diren subjektuei dagokie, testu horretan berean aipatzen diren ordenan eta baldintzekin.

Kontsultaldia akordioa lortuta bukatzen bada, ulertuko da hitzarmena ez aplikatzeko bigarren lerroaldean adierazi diren arrazoiak daudela, eta akordio hori lan-arloko jurisdikzioan baizik ez da aurkaratzen ahalko, iruzur, dolo, hertsapen edo eskubide-abusu kasuetan. Akordioak zehatz-mehatz jaso beharko ditu enpresan aplikatuko diren lan baldintza berriak eta horien iraupena. Akordioa ez da luzatzen ahalko enpresa horretan hitzarmen berri bat aplikatzen den unetik aurrera. Hitzarmeneko baldintzak ez aplikatzeko akordioak ez du berekin ekarriko genero arrazoiengatiko bazterketa desagerrarazteko betebeharrak ez betetzea, hitzarmenean ezarritakoak, edo, halakorik bada, enpresan aplikatzekoa den berdintasun planean aurreikusitakoak. Akordio hori hitzarmen kolektiboaren Batzorde Paritarioari jakinarazi beharko zaio.

Kontsultaldian desadostasunik sortzen bada, aldeetako edozeinek hitzarmenaren batzordera jotzen ahalko du, auzia ebatz dezan; batzordeak gehienez ere zazpi egun izanen ditu erabakia hartzeko, desadostasuna jakinarazi zaionetik kontatzen hasita. Batzordeari esku hartzeko eskaera egin ez diotenean, edota batzordeak ez badu akordiorik lortu, aldeek Estatuko edo autonomia-erkidegoko lanbide-arteko akordioetan ezarritako prozeduretara jo beharko dute –83. artikuluan daude ezarrita–, paragrafo honetan aipatutako akordioak negoziatzean sortutako desadostasunak eraginkortasunez konpontzeko. Hortaz, desadostasunak arbitraje loteslera meneratu beharko dituzte aldez aurretik; arbitraje-laudoak kontsultaldian lortutako akordioen eraginkortasun berbera izanen du, eta Langileen Estatutuaren 91. artikuluan jasota datorren prozeduraren arabera eta bertan zehaztutako zergatiengatik soilik errekurritzen ahalko da.

Kontsultaldia akordiorik gabe bukatzen denean eta aurreko paragrafoko prozedurak ezin badira aplikatu, edo azken hauek desadostasuna konpondu ez badute, alderdietako edozeinek Nafarroako Lan Gatazkak konpontzeko Auzitegira jotzen ahalko du haren arbitrajea egiteko. Erabaki horrek kontsultaldian lortzen diren akordioen eraginkortasun bera izanen du, eta haren kontrako errekurtsoa jartzeko, Langileen Estatutuaren 91. artikuluan ezarritako prozedurari jarraikiz eta arrazoien arabera jokatu beharko da.

Aurreko lerroaldeetan aipatzen diren prozeduren emaitza baldin bada lan baldintzak ez aplikatzea, lan arloko agintaritzari horren berri eman beharko zaio, gordailua egin dezan, besterik ez.

Bigarrena.–Nafarroako Lan Gatazkak Konpontzeko Auzitegiaren menpe jartzea.

1. Alderdiek erabaki dutenez, hitzarmen kolektibo honen interpretazioan eta aplikazioan sortzen diren gatazka kolektiboak ez ezik, baita horren aplikazio eremuko langileak eta enpresaburuak ukitzen dituzten beste guztiak ere, Nafarroako Lan Gatazkak Konpontzeko Auzitegiak konponduko ditu, adiskidetze- eta bitartekotza-faseetan.

Era berean, adierazten dute ahaleginak eginen dituztela eraginpeko alderdiak auzitegi horren arbitraje prozeduraren esanetara jar daitezen.

Artikulu honek, beraz, alderdiak gatazkak konpontzeko arbitraje organo horri berariaz atxikitzeko balio du, eraginkortasun osoa duela, eta ondorioz, itunak enpresariak, sindikatuen ordezkariak eta langileak behartzen ditu beren desadostasunak arestian aipatutako organoaren bitartekotza eta adiskidetze prozeduretan azaltzera epaiketara jo aitzin. Hortaz, ez da nahitaezkoa alderdien desadostasun edo gatazka bakoitzerako atxikimendu berariazkoa eta banakakoa egitea, arbitrajera lotzeko ez bada, zeina bultzatzeko eta sustatzeko konpromisoa hartu baitute lan hitzarmen honen sinatzaileek.

2. Era berean, hitzarmen kolektibo honen sinatzaileek konpromisoa hartzen dute, hitzarmenaren aplikazio eremuko langileen eta enpresaren artean sor daitezkeen gatazka indibidualak Nafarroako Lan Gatazkak Konpontzeko Auzitegiaren aurrean adiskidetze, bitartekotza eta arbitraje prozeduren menpe beren borondatez eta espresuki jar daitezen bultzatzeko, Nafarroako Foru Komunitateko lan-gatazkak auzibidetik kanpo ebazteko Lanbide arteko Akordioaren 2. xedapen gehigarrian adierazten diren gaietan.

I. ERANSKINA.–CLEN COLLEGEREN SOLDATA TAULAK 2023 ETA 2024 URTEETARAKO

2023

2024

II. ERANSKINA.–KILOMETRAJE TAULA

Kilometrajearen taula honek enpresaren egoitza abiapuntutzat hartuko du (Nafarroa Behera 47), Iruñetik lantokietaraino edo ondotik adierazitako herrietaraino.

Ondotik zerbitzuak taulakoa ez den beste herri edo lantoki batean egin behar badira, Batzorde paritarioak ezarriko du dagokion kilometrajea. Taula hori 2024tik aurrera izanen da aplikagarri.

III. ERANSKINA.–ORDAINSARI ALDAKORREN TAULA

ALDERDIAK ZEHAZTEA

Hitzarmen kolektibo hau Clen College enpresak izendatutako ordezkariek eta ELA eta UGT sindikatuek osatzen dute, alderdi sozial gisa.

–Enpresako ordezkariak:

• Eduardo Uterga jauna.
• Alfonso Larráyoz Echarte jauna.

Langileen legezko ordezkaritza:

–Langileen delegatuak:

• Celia Galdeano andrea (ELA).
• Begoña Corral andrea (ELA).
• Olive Cenoz andrea (UGT).

Iruñean, 2024ko uztailaren 3an.

Iragarkiaren kodea: F2414993