1. NAFARROAKO FORU KOMUNITATEA
1.7. BESTELAKOAK
548E/2024 EBAZPENA, abenduaren 14koa, Ekonomia Zirkularraren eta Berrikuntzaren Zerbitzuko zuzendariak emana, zeinaren bidez partez onartzen baita eskatutako aldaketa Faltzesko udal mugartean kontserbak egiteko dagoen instalazio baten ingurumen baimen integratuan ezarritako funtzionamendu baldintzetan. Horren ondorioz, instalazioak eta hango jarduerak ebazpen honen eranskinean ezarritako baldintzak bete beharko dituzte. Instalazioaren titularra Unión de Fabricantes de Conservas SA da.
Instalazio horrek ingurumen baimen integratua du, Ingurumen, Lurraldearen Antolamendu eta Etxebizitzako kontseilariaren 2006ko azaroaren 27ko 439 Foru Aginduaren bidez emana, gero Ingurumenaren eta Uraren zuzendari nagusiaren otsailaren 5eko 45E/2014 Ebazpenaren bidez eguneratu zena.
2024ko urriaren 28an, Ekonomia Zirkularraren eta Berrikuntzaren Zerbitzu honek jakin zuen instalazioan sortutako hondakin batzuei EHZ kodeak oker esleitu zitzaizkiela. Ondorioz, instalazioaren ingurumen baimen integratuko baldintzak ofizioz berrikusteari ekin zaio, zehazki, ingurumen baimen integratuaren III. eranskinean, sortutako hondakinen zerrendan, ageri diren zenbait hondakin aldatzeari, jarduerarekin bat ez datozela iritzita.
Ekonomia Zirkularraren eta Berrikuntzaren Zerbitzuak hondakin zerrenda hori berrikusi du, eta honako hauek dira ondorioak:
–020204 EHZ kodea duen hondakinari 020305 EHZ kodea esleitzen zaio, "Efluenteen in situ tratamenduaren lohiak" izenekoa, industriako hondakin-uren tratamendu-prozesuari lotua.
–Tomatearen lehen garbiketan sortutako lohien (lokatzak) adierazitako hondakinerako, 020301 EHZ kodea jartzen da, "Garbitzean, zuritzean, zentrifugatzean eta bereiztean sortutako lohiak" izenekoa.
–Egurrezko paleten eta plastikoen hondakinei esleitutako 200138 eta 200139 kodeen ordez, 150103 eta 150102 kodeak jartzen dira, hurrenez hurren, egokiagoak direlako. 20. kapituluko kodeak etxeko hondakinenak dira soilik, eta dagokion toki erakundearen bidez kudeatu behar dira; beraz, ez dira zerrenda honetan agertu behar.
Egindako aldaketek ez dute eragozten instalazioaren funtzionamendu egokia ingurumenari dagokionez, eta bat datoz ingurumen baimen integratuan ezarritako gehieneko isurketa-balioekin eta gainerako eskakizunekin, bai eta teknika erabilgarri onenen aplikazioarekin ere.
Kasu honetan, Ingurumenean Eragina duten Jarduerak arautzen dituen abenduaren 16ko 17/2020 Foru Legea garatzeko Erregelamenduaren 35. artikuluan ezarritako inguruabarrak gertatzen direla uste da, eta, ondorioz, bidezkoa da ingurumen baimen integratuan ezarritako baldintzak ofizioz aldatzea, artikulu horretan ezarritako administrazio prozedurarekin bat etorriz, eta ez da egokitzat jotzen aldaketa-espediente hau jendaurrean jartzea.
Ebazpen proposamena hamabost egunez egon da instalazioaren titularrari entzunaldia emateko tramitean, eta hark ez du proposamenaren aurkako alegaziorik aurkeztu.
Adierazitakoarekin bat, eta Landa Garapeneko eta Ingurumeneko Departamentuaren egitura organikoa ezartzen duen azaroaren 15eko 255/2023 Foru Dekretuak ematen dizkidan eskudantziak erabiliz,
EBAZTEN DUT:
Lehendabizikoa.–Partez onartzea eskatutako aldaketa Faltzesko udal mugartean kontserbak egiteko dagoen instalazio baten ingurumen baimen integratuan ezarritako funtzionamendu baldintzetan. Horren ondorioz, instalazioak eta hango jarduerak ebazpen honen eranskinean ezarritako baldintzak bete beharko dituzte. Instalazioaren titularra Unión de Fabricantes de Conservas SA da.
Bigarrena.–Ebazpen honetan jasotako baldintzak betetzen ez badira, Kutsaduraren Prebentzio eta Kontrol Integratuaren Legearen testu bateginaren IV. tituluan jasotako ingurumen diziplinako neurriak hartuko dira (testu bategin hori abenduaren 16ko 1/2016 Legegintzako Errege Dekretuaren bidez onetsi zen), eta, subsidiarioki, Ingurumenean Eragina duten Jarduerak arautzen dituen abenduaren 16ko 17/2020 Foru Legearen III. tituluan ezarritako zehapen araubidean jasotakoak, ezertan galarazi gabe legeria sektorialean ezarritakoa, aurrerantzean ere aplikatu beharko baita.
Hirugarrena.–Ebazpen hau Nafarroako Aldizkari Ofizialean argitaratzea.
Laugarrena.–Ebazpen honek ez du administrazio bidea amaitzen, eta interesdunek, administrazio publikoek izan ezik, gora jotzeko errekurtsoa jartzen ahalko dute haren kontra, Landa Garapeneko eta Ingurumeneko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jar dezakete, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Ebazpen hau jakinarazi eta biharamunetik aurrera kontatuko dira epeak.
Bosgarrena.–Ebazpen hau igortzea Unión de Fabricantes de Conservas SAri, behar diren ondorioak izan ditzan.
Iruñean, 2024ko abenduaren 14an.–Ekonomia Zirkularraren eta Berrikuntzaren Zerbitzuko zuzendaria, Raúl Salanueva Murguialday.
Oharra: ebazpen honetan aipatzen diren eranskinak interesdunen eskura egonen dira Ingurumen Zuzendaritza Nagusiaren bulegoetan (González Tablas kalea 9, behea, Iruña; Ekonomia Zirkularraren eta Berrikuntzaren Zerbitzua) eta Nafarroako Gobernuaren webgune honetan: https://extra.navarra.es/InformacionPublicaPRTR/CentroPublicaciones.html#/CentroPublicaciones.
Iragarkiaren kodea: F2418306
