Iragarkia
2. ALDIZKARIA - 2025eko urtarrilaren 3a
1. NAFARROAKO FORU KOMUNITATEA
1.2. AGINTARIAK ETA LANGILEAK
1.2.2. Oposizioak eta lehiaketak. Lan publikoaren eskaintza
2786/2024 EBAZPENA, azaroaren 26koa, Nafarroako Unibertsitate Publikoko kudeatzaileak emana. Haren bidez, hautaproben bitartez izangaien bi zerrenda egiteko deialdiak onesten dira, Euskarako OLko teknikari lanpostuan aritzeko (itzultzaile eta interpretea, A mailakoa), bata aldi baterako kontratazioak egiteko, eta bestea prestakuntzarako, zerbitzu berezietako egoeran, betiere Nafarroako Unibertsitate Publikoan sortzen diren beharrak asetzearren.
2014ko azaroaren 25eko Gobernu Kontseiluaren Erabakiak, Nafarroako Unibertsitate Publikoko administrazioko eta zerbitzuetako langileen administrazio araubidearen araberako kontratazioa arautzen duenak, xedatzen du aldi baterako langileak deialdi bidez aukeratuko direla, eta deialdi horretan berdintasun-, merezimendu-, gaitasun- eta publizitate-printzipioak bermatuko direla.
2014ko azaroaren 25eko Gobernu Kontseiluaren Erabakiak, Nafarroako Unibertsitate Publikoko administrazioko eta zerbitzuetako funtzionarioen prestakuntza eta lanbide-hobekuntza arautzen dituenak, bestalde, xedatzen du ezen Nafarroako Unibertsitate Publikoak, aldi baterako kontratazioa egin baino lehen, bere funtzionarioei eskainiko dizkiela bete nahi dituen lanpostuak, horretarako hautaprobetarako deialdia eginez, zeinak aldi baterako kontratazioetarako izangaien zerrendak osatzeko hautaprobekin batera eginen baitira.
Nafarroako Unibertsitate Publikoaren langile beharrak kontuan harturik, eta sortzen direnak asetzeko, bidezkoa da hautaprobetarako deialdiak onestea, izangaien bi zerrenda egiteko, Euskarako OLko teknikari lanpostuan aritzeko (itzultzaile eta interpretea, A mailakoa), bata aldi baterako kontratazioak egiteko, eta bestea prestakuntzarako, zerbitzu berezien egoeran.
Txosten juridikoa eginik, Giza Baliabideen Zerbitzuko zuzendariaren oniritziarekin.
Nafarroako Unibertsitate Publikoko errektoreak errektoretza-taldearen egitura orokorra onetsi eta haren funtzioak zehazteko 2023ko ekainaren 20an eman zuen 1306/2023 Ebazpenaren bidez eskuordetu dizkidan eskumenak erabiliz,
EBAZTEN DUT:
Lehenbizikoa.–Izangaien bi zerrenda egiteko hautaprobetarako deialdiak eta haien oinarriak onestea, Euskarako OLko teknikari lanpostuan aritzeko (itzultzaile eta interpretea, A mailakoa), bata aldi baterako kontratazioak egiteko, eta bestea prestakuntzarako, zerbitzu berezien egoeran, betiere Nafarroako Unibertsitate Publikoan sortzen diren beharrak asetzearren.
Bigarrena.–Ebazpen hau Nafarroako Aldizkari Ofizialean eta Unibertsitatearen iragarki ohol elektroniko ofizialean argitara dadila agintzea.
Hirugarrena.–Ebazpen honek administrazio bidea agortzen du, Unibertsitate Sistemari buruzko 2023ko martxoaren 22ko 2/2023 Lege Organikoaren 38.4 artikuluak xedatzen duenaren arabera, eta zilegi da berraztertzeko errekurtsoa jartzea, errektoreari zuzendua, edo, bestela, zuzenean administrazioarekiko auzi-errekurtsoa Nafarroako Administrazioarekiko Auzien Epaitegietan, hilabeteko epean lehenbiziko kasuan, eta bi hilabeteko epean bigarrenean, biak ere ebazpena argitaratu eta biharamunetik kontatzen hasita.
Iruñean, 2024ko azaroaren 26an. Kudeatzailea, Joaquín Romero Roldán.
I.–ALDI BATERAKO KONTRATAZIORAKO IZANGAIEN ZERRENDA BAT EGITEKO DEIALDIA, EUSKARAKO OL-KO TEKNIKARI LANPOSTUAN ARITZEKO (ITZULTZAILE ETA INTERPRETEA)
Hauek dira deialdia arautuko duten
OINARRIAK
Lehenbizikoa.
Deialdi honen xedea kontrataziorako izangaien zerrenda bat egitea da, hautaproben bidez, Euskarako OLko teknikari lanpostuan aritzeko (itzultzaile eta interpretea, A mailakoa), Nafarroako Unibertsitate Publikoan sortzen diren beharrak asetzearren.
Aldi baterako kontrataziorako izangaien zerrenda hau subsidiarioa izanen da Nafarroako Unibertsitate Publikoko administrazioko eta zerbitzuetako funtzionarioen prestakuntza eta lanbide-hobekuntza arautzen dituen 2014ko azaroaren 25eko Gobernu Kontseiluaren erabakiak ezartzen duenaren babesean egiten den beste edozein funtzionario-zerrendaren aurrean.
Bigarrena.–Izangaiek bete beharreko baldintzak.
2.1. Deialdian onartuak izateko, izangaiek baldintza hauek bete beharko dituzte eskaerak aurkezteko epea bukatzen den egunean:
2.1.1. Izangai guztiek bete beharrekoak:
a) Espainiako herritarra izatea edo Europar Batasuneko estaturen batekoa izatea, edo, Europar Batasunak izenpetu eta Espainiar Estatuak berretsitako nazioarteko itunen arabera, langileen joan-etorri askea aplikatzekoa zaion estaturen batekoa.
Halaber, Espainiako, Europar Batasuneko estatuetako eta aipatu nazioarteko itunak aplikatzen diren eremuko estatuetako herritartasuna dutenen ezkontideek parte hartzeko aukera dute, betiere zuzenbidearen arabera bananduak ez badaude; herritartasuna duenaren ondorengoek eta haren ezkontidearen ondorengoek ere parte hartzeko aukera dute, zuzenbidearen arabera bananduak ez badaude, baldin eta 21 urtetik beherakoak badira edo, adin horretatik gorakoak izanda ere, gurasoen kontura bizi badira.
b) Hamasei urte beteta edukitzea, eta nahitaezko erretirorako gehieneko adina beteta ez edukitzea.
c) Lizentziako, ingeniaritzako, arkitekturako edo graduko titulua edukitzea, edo, bestela, titulua eskuratzeko eskubideak ordaindu izanaren gordekina, eskabideak aurkezteko epea bukatzen den egunean.
Atzerrian lortutako titulazioen kasuan, homologazioa egiaztatzen duen baliokidetasun-ziurtagiri edo kredentziala eduki beharko da. Baldintza hori ez zaie aplikatuko lanbide arautuen eremuan prestakuntza profesionalaren aitorpena Europar Batasuneko xedapenen babespean erdietsi duten izangaiei.
d) EGA titulua edo Hizkuntzetarako Europako Erreferentzia Esparru Bateratuko C1 mailaren titulazio ofizial baliokidea edukitzea.
e) Dagozkion eginkizunak betetzeko gaitasun fisiko eta psikikoak edukitzea.
f) Eginkizun publikoetarako desgaitua edo gabetua ez egotea eta Administrazio Publiko baten zerbitzutik bereizia ez izatea.
Espainiakoa ez beste nazionalitatea dutenek ere diziplina-zehapen edo zigor-kondenaren bidez beren estatuetako funtzio publikoetan aritzeko gabetuta ez egotearen zinpeko aitorpena aurkeztu beharko dute.
2.2. Oinarri honetan ezarritako baldintzak eskaerak aurkezteko epea bukatzen denean bete behar dira, eta hautaketa-prozedurak edo kontratazio epeak dirauen bitartean ere bete beharko dira.
Hirugarrena.–Hautaketa-prozesuaren garapena eta balorazioa.
Hautaketa-prozesua bi deialdietako arau komunek ezartzen dutenaren arabera eginen da.
Laugarrena.–Izangaiei aldi baterako kontrataziorako dei egitea.
Arau hauen arabera dei eginen zaie izangaiei, eta, behar denean, kontratatu: Nafarroako Administrazio Publikoen Zerbitzuko Langileen Estatutuaren Testu Bategineko 1993ko abuztuaren 30eko 251/1993 Legegintzako Foru Dekretuaren 88. artikuluak eta ondorengoak; 2014ko azaroaren 25ean Gobernu Kontseiluak hartu zuen erabakia, Nafarroako Unibertsitate Publikoko administrazioko eta zerbitzuetako langileen administrazio araubidearen araberako kontratazioa arautzen duena; eta deialdi honen oinarriak eta aplikatu beharreko gainerako araudiak.
Deia egiteko, kontuan hartuko da, halaber, Nafarroako Administrazio Publikoen Zerbitzuko Langileen Estatutuaren Testu Bategineko Zazpigarren Xedapen Gehigarriko 4. atalak ezartzen duena, zeinean arautzen baita desgaitasunen bat daukaten pertsonak Nafarroako Administrazio Publikoko lanpostuetan sartzeko prozedura. Horretarako, %33ko edo gehiagoko desgaitasun aitortua daukaten izangaiek desgaitasuna egiaztatu beharko dute, organo eskumendunak horretarako egindako dokumentuaren kopiaren bidez.
II.–IZANGAIEN ZERRENDA BAT EGITEKO DEIALDIA, EUSKARAKO OL-KO TEKNIKARI LANPOSTUAN ARITZEKO (ITZULTZAILE ETA INTERPRETEA) PRESTAKUNTZARAKO ZERBITZU BEREZIEN EGOERAN
Hauek dira deialdia arautuko duten
OINARRIAK
Lehenbizikoa.
Deialdi honen xedea izangaien zerrenda bat egitea da, hautaproben bidez, Euskarako OLko teknikari lanpostuan aritzeko (itzultzaile eta interpretea, A mailakoa), prestakuntzarako zerbitzu berezien egoeran, Nafarroako Unibertsitate Publikoan sortzen diren beharrak asetzearren.
Bigarrena.–Izangaiek bete beharreko baldintzak.
2.1. Deialdian onartuak izateko, izangaiek baldintza hauek bete beharko dituzte eskaerak aurkezteko epea bukatzen den egunean:
a) Nafarroako Unibertsitate Publikoko administrazioko eta zerbitzuetako funtzionarioa izatea, eta B, C edo D maila edo multzokoa izatea.
b) Nafarroako Unibertsitate Publikoan zerbitzu ematen hiru urteko antzinatasuna izatea gutxienez.
c) Eszedentzian ez egotea, non eta eszedentziak ez duen ezartzen lanpostua erreserbatzeko eskubidea; edo Gobernu Kontseiluaren 2014ko azaroaren 25eko erabakiaren xedapen iragankorrean adierazitako egoeran egotea –Nafarroako Unibertsitate Publikoko administrazioko eta zerbitzuetako funtzionarioen prestakuntza eta lanbide-hobekuntza arautzen dituen erabakia–.
d) Lizentziako, ingeniaritzako, arkitekturako edo graduko titulua edukitzea, edo, bestela, titulua eskuratzeko eskubideak ordaindu izanaren gordekina, eskabideak aurkezteko epea bukatzen den egunean.
Atzerrian lortutako titulazioen kasuan, homologazioa egiaztatzen duen baliokidetasun-ziurtagiri edo kredentziala eduki beharko da. Baldintza hori ez zaie aplikatuko lanbide arautuen eremuan prestakuntza profesionalaren aitorpena Europar Batasuneko xedapenen babespean erdietsi duten izangaiei.
e) EGA titulua edo Hizkuntzetarako Europako Erreferentzia Esparru Bateratuko C1 mailaren titulazio ofizial baliokidea edukitzea.
2.2. Eskaerak aurkezteko epea bukatzen den egunean bete behar dira oinarri hauetan ezarritako baldintzak, bai eta hautaketa-prozedurak edo prestakuntza-epeak dirauen bitartean ere.
2.3. Gorago aipatutako baldintzak betetzen dituzten funtzionarioek ezin dute aldi berean parte hartu aldi baterako kontrataziorako izangaien zerrenda osatzeko deialdian eta prestakuntzarako zerbitzu berezien egoeran aritzeko izangaien zerrenda osatzeko deialdian.
Hirugarrena.–Hautaketa-prozesuaren garapena eta balorazioa.
Hautaketa-prozesua bi deialdietako arau komunek ezartzen dutenaren arabera eginen da.
Laugarrena.–Prestakuntzako izangaiei dei egitea.
Izangaiei dei eginen zaie eta, beharrezkoa bada, prestakuntzarako zerbitzu berezien egoeran deklaratuko, honako hauetan ezarritakoaren arabera: 2014ko azaroaren 25ean Gobernu Kontseiluak hartutako erabakia, Nafarroako Unibertsitate Publikoko administrazioko eta zerbitzuetako langile funtzionarioen prestakuntza eta lanbide-hobekuntza arautzen dituena, deialdi honen oinarriak eta aplikatzekoak diren gainerako araudiak.
III.–BI DEIALDIEN ARAU KOMUNAK
2015eko urriaren 1eko 39/2015 Legearen 45.1.b) artikuluan ezarritakoaren arabera –Administrazio Publikoen Administrazio Prozedura Erkideari buruzkoa–, hautaketa-prozesu honek eragiten dituen argitalpenak, Nafarroako Aldizkari Ofizialari dagokiona izan ezik (bi deialdien arau komunen 1. oinarrian aipatutakoa), Nafarroako Unibertsitate Publikoaren iragarki ohol elektroniko ofizialean azalduko dira, deialdi honi dagokion atalean, eta ez dira baliozkoak izanen bestelako tokietan agertzen direnak.
Lehenbizikoa.–Eskabideak aurkezteko epea.
Bi deialdietan parte hartzeko eskabideak aurkezteko epea hamar egun baliodunekoa izanen da, deialdiak onesten dituen ebazpena Nafarroako Aldizkari Ofizialean argitaratzen den egunaren biharamunetik kontatzen hasita.
Bigarrena.–Eskaeren aurkezpen telematikoa eta agiriak.
2.1. Eskaeren aurkezpen telematikoa.
Hautaketa-prozesu honetan parte hartu nahi dutenek modu telematikoan aurkeztu beharko dute eskaera, Nafarroako Unibertsitate Publikoaren egoitza elektronikoaren bidez, helbide honetako "Hasi tramitea" botoian:
https://sedeelectronica.unavarra.es/sede/zerbitzu-katalogoa/guztiak/kontratazio-zerrendak-osatzeko-hautaprobak (aldi baterako kontrataziorako izangaiak).
https://sedeelectronica.unavarra.es/sede/zerbitzu-katalogoa/guztiak/pruebas-selectivas-formacion (prestakuntzarako izangaiak, zerbitzu berezien egoeran).
2.2. Erantsi beharreko agiriak.
"Erantsi fitxategiak" eremuan, dokumentu hauek erantsi beharko dira:
–Deialdien bigarren oinarrian aipatzen den titulazio akademikoaren baldintza betetzen dela egiaztatzen duten agiriak.
–Deialdien bigarren oinarrian aipatzen den euskara-maila egiaztatzen duten tituluak.
–%33ko edo hortik gorako desgaitasuna duten izangaiek, hautaprobak egiteko denbora edo bitartekoak egokitzeko eskatu nahi badute, helbide honetan eskuragarri dagoen eskabidea erantsi beharko dute:
https://sedeelectronica.unavarra.es/sede/zerbitzu-katalogoa/guztiak/kontratazio-zerrendak-osatzeko-hautaprobak
Horretarako, izangaiek beren kondizioa egiaztatu beharko dute, IMSERSOk edo autonomia-erkidegoko erakunde eskudunak emandako ziurtagiri baten bidez, edo Gizarte Segurantzako Institutu Nazionalaren ebazpen baten bidez, zeinak prestazioa jasotzeko eskubidea aitortzen baitu ezintasun iraunkor osoa, ezintasun iraunkor absolutua edo baliaezintasun handia izateagatik. Era berean, zilegi izanen dute eskatutako egokitzapena justifikatzeko komenigarritzat jotzen duten dokumentazioa ere aurkeztea.
Hirugarrena.–Izangaien onarpena.
3.1. Eskaerak aurkezteko epea bukatu eta gero, Nafarroako Unibertsitate Publikoko kudeatzaileak ebazpen bat emanen du izangai onartuen eta baztertuen behin-behineko zerrendak onesteko, azken horiek baztertzearen zergatiak azalduta, eta Nafarroako Unibertsitate Publikoaren iragarki ohol elektroniko ofizialean argitaratuko dira, deialdi honi dagokion atalean.
Bi deialdien arau komunetako bigarren oinarriak aipatzen dituen dokumentuak ez aurkezteagatik behin-behinean baztertzea galarazi gabe, eskaera epez kanpo aurkeztea edo lehiaketaren bidez lortu nahi den lanpostuan aritzeko bete behar diren baldintzak ez betetzea baztertzeko arrazoiak izanen dira, eta, gainera, horiek ezin izanen dira zuzendu.
3.2. Zerrendan azaldu ez diren izangaiek eta behin-behinean baztertutakoek zilegi dute erreklamazioa egitea eta, akatsen bat badago, akatsak zuzentzea, behin-behineko zerrenda argitaratu eta hurrengo hamar egun balioduneko epean.
Aipatutako epean zerrendetan ez agertzearen aurka alegatu eta onartuen zerrendan egoteko eskubidea justifikatzen ez duten edo behin-behinean baztertuak gelditzea eragin zuten akatsak zuzentzen ez dituzten izangaiak behin betiko bazterturik geldituko dira.
3.3. Akatsak zuzentzeko eta erreklamazioak egiteko epea bukatu ondoren, eta azken horiek ebatzita, Nafarroako Unibertsitate Publikoko kudeatzaileak ebazpena emanen du onartutakoen eta baztertutakoen behin betiko zerrenda onesteko. Nafarroako Unibertsitate Publikoaren iragarki ohol elektroniko ofizialean argitaratuko da zerrenda hori, deialdi honi dagokion atalean. Ebazpen horretan jakinaraziko da noiz eta non eginen diren oinarri hauetan aipatzen diren hautaprobak.
3.4. Hautaprobetako onartuen behin betiko zerrendan egoteak ez du esan nahi, inola ere, Unibertsitateak aitortzen duenik izangaiek deialdiko oinarrietan eskatzen diren baldintzak betetzen dituztela. Aurkeztutako dokumentazioa edo Unibertsitatearen eskura dagoena aztertuta, ikusten bada izangairen batek ez duela betetzen baldintzaren bat, bertan behera geldituko dira deialdietan parte hartzeak dakartzan eskubide guztiak.
3.5. Izangai onartu eta baztertuen zerrendak argitaratzearekin, egin beharreko jakinarazpena egin dela ulertuko da, Administrazio Publikoen Administrazio Prozedura Erkideari buruzko 2015eko urriaren 1eko 39/2015 Legearen 45. artikuluak xedatzen duenarekin bat etorriz.
Laugarrena.–Probak.
4.1. Deialdiek araututako hautaketa-prozesua bi proba hauen bidez eginen da:
a) Lehenbiziko proba: idatzizko itzulpena.
Gaztelaniazko zenbait testu euskarara itzuli beharko dira, eta euskarazko testu bat gaztelaniara. Epaimahai kalifikatzaileak emanen ditu testu horiek.
Proba egiteko, izangaiek zilegi izanen dute paperezko hiztegi bat erabiltzea, norberak eramandakoa. Ezin izanen da beste testu edo dokumentaziorik kontsultatu, ez eta gailu elektronikorik edo bestelako materialik erabili.
Epaimahai kalifikatzaileak zehaztuko du probak zenbat denbora iraun behar duen gehienez, eta horren berri emanen du proba hasi baino lehen.
Lehenbiziko probaren gehieneko puntuazioa 25 puntu izanen da guztira, honela banaturik:
–Euskarara itzulitako testuei dagokien gehieneko puntuazioa 20 puntu da.
–Gaztelaniara itzulitako testuari dagokion gehieneko puntuazioa 5 puntu da.
Proba kalifikatu ondoren, izangaiek lortutako puntuazioa argitaratuko du epaimahai kalifikatzaileak, eta bost egun balioduneko epea irekiko du interesdunek eskubidez dagokiena alega dezaten.
Proba hori gainditzeko, izangaiek euskarara itzulitako testuei dagokien gehieneko puntuazioaren erdia lortu beharko dute gutxienez, eta gaztelaniara itzulitako testuari dagokion gehieneko puntuazioaren erdia gutxienez.
b) Bigarren proba: aldibereko interpretazioa.
Proba hori boluntarioa eta ez-baztertzailea izanen da. Euskarazko ahozko hitzaldi baten aldibereko interpretazioa egin beharko da, gaztelaniara.
Epaimahai kalifikatzaileak zehaztuko du probak zenbat denbora iraun behar duen gehienez, eta horren berri emanen du proba hasi baino lehen.
Bigarren probaren gehieneko puntuazioa 5 puntu izanen da.
Proba kalifikatu ondoren, izangaiek lortutako puntuazioa argitaratuko du epaimahai kalifikatzaileak, eta bost egun balioduneko epea irekiko du interesdunek eskubidez dagokiena alega dezaten.
4.2. Bazterturik geldituko dira lehenbiziko proban itzulpen-norabide bakoitzerako ezarritako gehieneko puntuazioen %50 gutxienez lortzen ez duten izangaiak, eta, beraz, lehenbiziko proba gainditu duten izangaiek baizik ezin izanen dute egin bigarren proba boluntarioa.
4.3. Zerrendetan sartzeko, izangaiek lehenbiziko probarako ezarritako gehieneko puntuazioaren %50 lortu beharko dute gutxienez.
4.4. Hautaprobetarako deialdia dei bakar baten bidez eginen da, eta epaimahai kalifikatzaileak adierazitako tokian eta egunean agertu beharko dute izangaiek, probak egiten hasteko ezarritako orduan. Izangaiek Nortasun Agiri Nazionala, AIZa, pasaportea edo gidabaimena eraman beharko dute. Nortasuna esandako dokumentuen bidez egiaztatzen ez dutenak edo probara agertzen ez direnak probatik kanpo geldituko dira.
4.5. Desgaitasun aitortua izanik eskabidean eskaera egin duten izangaientzat, ahal diren egokitzapenak eginen dira hautaprobak egiteko behar diren denbora eta baliabideetan.
Bosgarrena.–Epaimahaia.
5.1. Epaimahaia honako kide hauek osatuko dute:
–Epaimahaiburua: Aitor Blanco Leoz, Nafarroako Unibertsitate Publikoko Euskararako Atal Teknikoko burua.
Ordezko epaimahaiburua: José Antonio Marañón Oricáin, Nafarroako Unibertsitate Publikoko Giza Baliabideen Zerbitzuko zuzendaria.
–Epaimahaikidea: Imanol Núñez Aldaz, Nafarroako Unibertsitate Publikoko Hizkuntza Plangintzarako Arloko zuzendaria.
Ordezko epaimahaikidea: Blanca Susana Preboste Iraizoz, Nafarroako Unibertsitate Publikoko Hizkuntza Plangintzarako Ataleko burua.
–Epaimahaikidea: Irati Bereau Baleztena, Nafarroako Unibertsitate Publikoko Euskararako Atal Teknikoko teknikaria.
Ordezko epaimahaikidea: María Roncesvalles Ibarra Murillo, Nafarroako Unibertsitate Publikoko irakasle titularra.
–Epaimahaikidea: Nafarroako Unibertsitate Publikoko kide bat, Administrazioko eta Zerbitzuetako Langileen Batzordeak izendatua.
Ordezko epaimahaikidea: Nafarroako Unibertsitate Publikoko kide bat, Administrazioko eta Zerbitzuetako Langileen Batzordeak izendatua.
–Epaimahaikide idazkaria: Susana Molina Aldareguía, Nafarroako Unibertsitate Publikoko Hizkuntza Plangintzarako Ataleko teknikaria.
Ordezko epaimahaikide idazkaria: Iván Razquin Tarazona, Nafarroako Unibertsitate Publikoko Giza Baliabideen Zerbitzuko OLko teknikaria (Adar Juridikoa).
5.2. Administrazio prozedura erkidearen arauetan aipaturiko arrazoiren bat gertatzen denean, epaimahaiko kideek parte hartzeari uko egin beharko diote, eta horren berri eman deialdia egin duen organoari.
Izangaiek, halaber, zilegi dute epaimahaikideak errekusatzea, aipatu egoera horietako bat gertatzen denean.
Onartutako eta baztertutako izangaien behin betiko zerrenda onesten duen ebazpenean jasoko dira epaimahai kalifikatzailearen kideen izenak.
5.3. Epaimahaia hautaprobak hasi baino lehen eratu beharko da.
Epaimahai kalifikatzailearen eraketak eta jardunak balio izan dezaten, gutxienez kide guztien gehiengo osoa beharko da. Halaber, epaimahaiaren eraketak eta jardunak balio izateko, epaimahaiburuak eta epaimahaikide idazkariak edo haien ordezkoek egon behar dute bertan.
5.4. Hautaprobak aurrera egin ahala, epaimahaiak gehiengoz ebatziko ditu deialdi honen oinarriak interpretatzetik eta aplikatzetik sortzen diren zalantzak, baita deialdian kontuan hartzen ez diren arazoak konpontzeko behar diren neurriak hartu ere.
5.5. Epaimahai kalifikatzaileak aukera izanen du hautaprobarako aholkulari adituak sartzeko. Aholkulariek beren espezialitate teknikoetan baino ez dute lagunduko.
5.6. Jakinarazpenak egiteko eta bestelako gorabeheretarako, epaimahaiaren egoitza Nafarroako Unibertsitate Publikoko Administrazioko eta Kudeaketako eraikina izanen da.
Seigarrena.–Gainditu dutenen zerrenda.
6.1. Hautaketa-prozesua bukatzen denean, Giza Baliabideen Zerbitzuak zerrenda hauek argitaratuko ditu, bereizirik:
a) Aldi baterako kontratazioaren deialdian hautaproba gainditu duten izangaien zerrenda, lortutako puntuazio osoaren arabera ordenatua.
Puntuazioetan berdinketarik egonez gero, lehenbiziko proban puntuaziorik handiena lortzen dutenen alde ebatziko dira. Berdinketak jarraitzen badu, lehenbiziko proban gaztelaniatik euskarara egindako itzulpenetan puntuaziorik handiena lortzen dutenen alde ebatziko dira. Irizpide horiek aplikaturik ere berdinketak jarraitzen badu, hura ebazteko, zozketa eginen da, bat bakarra, berdindurik dauden izangaien artean. Zozketan ateratzen den pertsonaren deituretatik eta izenetik hasi, eta deituren hurrenkera alfabetikoari jarraikiz ebatziko dira berdinketa guztiak. Zozketaren emaitza Nafarroako Unibertsitate Publikoaren iragarki ohol elektroniko ofizialean argitaratuko da, deialdi honi dagokion atalean.
b) Prestakuntzarako zerbitzu berezien egoeran egoteko deialdian hautaproba gainditu duten izangaien zerrenda, lortutako puntuazio osoaren arabera ordenatua.
Puntuazioetan berdinketarik egonez gero, lehenbiziko proban puntuaziorik handiena lortzen dutenen alde ebatziko dira. Berdinketak jarraitzen badu, lehenbiziko proban gaztelaniatik euskarara egindako itzulpenetan puntuaziorik handiena lortzen dutenen alde ebatziko dira. Oraindik ere berdinketak jarraitzen badu, deialdiak ezartzen duen eskabideak aurkezteko epea amaitzen denean antzinatasun handiena duen izangaiaren alde ebatziko da.
6.2. Epaimahaiak Nafarroako Unibertsitate Publikoko kudeatzaileari igorriko dizkio arau honek aipatzen dituen zerrendak, onets ditzan, hautaketa-prozesuaren espediente osoarekin batera.
Zazpigarrena.–Izangaien zerrendak.
7.1. Behin betiko zerrendak.
Hautaketa-prozesuaren espediente osoa jaso ondoren, Nafarroako Unibertsitate Publikoko kudeatzailearen ebazpen baten bidez onetsiko dira bai aldi baterako kontrataziorako izangaien zerrendak, bai prestakuntzarako zerbitzu berezien egoeran egonen diren izangaienak, hautaprobak gainditu dituzten izangaien izenekin, eta deialdi honi dagokion atalean argitaratuko dira.
7.2. Deia.
Aurreko apartatuan aipatzen diren zerrendetan dauden izangaien deia 2014ko azaroaren 25eko Gobernu Kontseiluko erabakiek ezarritakoarekin bat etorriz eginen da –Nafarroako Unibertsitate Publikoko administrazioko eta zerbitzuetako langileen administrazio araubidearen araberako kontratazioa eta administrazioko eta zerbitzuetako funtzionarioen prestakuntza eta lanbide-hobekuntza arautzen duten erabakiak–. Kasu guztietan, lehentasuna izanen dute prestakuntzarako zerbitzu berezien egoeran egonen diren izangaiek aldi baterako kontrataziorako izangaien aldean.
Deialdietan adierazitako baldintzak betetzen ez dituztenak bazterturik geldituko dira hautaketa-prozesutik, Nafarroako Unibertsitate Publikoko kudeatzailearen ebazpen baten bidez, eta bertan behera geldituko zaizkie dagokien deialdian parte hartzetik erator litezkeen eskubide guztiak.
Zortzigarrena.–Prestakuntzarako zerbitzu berezien egoeran aritzeko gehieneko denbora.
8.1. Lanpostu batean prestakuntzan aritzea onartzen dutenak arrazoi horrengatik zerbitzu berezien egoeran daudela deklaratuko da, Nafarroako Unibertsitate Publikoko kudeatzailearen ebazpen baten bidez, gehienez ere urtebeterako, hasiera batean, eta epe hori urtebeteko aldietan luzatzen ahalko da, gehienez ere sei urte bete arte.
8.2. Prestakuntzan sei urteko gehieneko epe hori bete eta gero, langile funtzionarioek automatikoki hasi beharko dute berriz ere zerbitzu aktiboan zerbitzu berezietan deklaratu zituztenean betetzen ari ziren lanpostuan, eta ezin izanen dituzte berriz ere zerbitzu berezietan deklaratu arrazoi beragatik. Izendapen libre bat edo bitarteko izendapen bat izan zuen lanpostu batetik badatoz, amaitutzat joko da egoera.
8.3. Prestakuntza-zerrenda batean baino gehiagotan daudenak gehienez ere sei urtez egonen dira guztira prestakuntzarako zerbitzu berezien egoeran.
8.4. Prestakuntzarako zerbitzu berezien egoera sei urtetik beherako epe baterako bada (hasierako deklarazioa eta bere luzapen guztiak barne), izangaiak zerrendan dagokion lekua izanen du berriz ere epe hori bukatzean.
Bederatzigarrena.–Datu pertsonalen tratamendua.
Nafarroako Unibertsitate Publikoak langileen kudeaketaren arloan antolatutako prozesuetan parte hartzeak interesdunen datuak tratatzea ekarriko du berekin. Datu horien tratamenduaren arduraduna Nafarroako Unibertsitate Publikoa da.
Datuen tratamendua aplikatzekoa zaion araudiari jarraikiz eginen da, hots, Datuak Babesteko 2016/679 EB Erregelamendu Orokorrari eta Datu Pertsonalak Babesteko 2018ko abenduaren 5eko 3/2018 Lege Organikoari jarraikiz. Tratamenduaren deskribapena Tratamendu Jardueren Erregistroan dago kontsultatzeko, hemen: https://www.unavarra.es/portal-transparencia/.
Datuen tratamenduaren eraginpeko interesdunak hautaketa-prozesuetako izangaiak eta NUPeko langileak izanen dira. Datu pertsonal hauek tratatuko dira: izena, deiturak, NANa, datu akademikoak eta profesionalak eta, beharrezkoa denean, bankuko datuak eta Gizarte Segurantzakoak, edo ondoren deskribatzen den xedea betetzeko beharrezkoak direnak.
Datuen tratamendua justifikatzen duen xedea honako hauek tramitatzea da: hautaketa-prozedurak, mugikortasunekoak, egoera administratiboak, ziurtagiriak edo Giza Baliabideen arloan NUPen eskumenekoak diren beste batzuk.
Xede horrek interes publikoa edo botere publikoa legitimatzen du, Datuak Babesteko Erregelamendu Orokorraren 6.1.e) artikuluak ezartzen duen bezala. Hauek dira oinarri juridikoak, langileei buruzko beste arau batzuen artean: Enplegatu Publikoaren Oinarrizko Estatutuaren Legearen Testu Bategina onesten duen 5/2015 Legegintzako Errege Dekretua, 2015eko urriaren 30ekoa, eta Nafarroako Administrazio Publikoen zerbitzura dauden Langileen Estatutuaren Testu Bategina onesten duen 251/1993 Legegintzako Foru Dekretua, 1993ko abuztuaren 30ekoa.
Datuak tratatzeko jarduerei dagokienez, interesdunek eskubidea dute datuak eskuratzeko, zuzentzeko, ezabatzeko, mugatzeko, haiei kontra egiteko eta transferitzeko. Horretarako, mezu bat bidali behar dute delegado.protecciondatos@unavarra.es helbidera, Datu Pertsonalak Babesteko Lege Organikoaren 11. artikulutik 18. artikulura bitartekoei jarraikiz. Desadostasunen bat izanez gero, Datuak Babesteko Espainiar Agentziara jo dezaketehttps://www.aepd.es/ domeinuaren bidez.
Hamargarrena.–Errekurtsoak.
Deialdi honen aurka, haren oinarrien aurka eta beroriek aplikatzeko ekintzen aurka, epaimahaiak egindakoak ez direnean, zilegi da ondoko errekurtsoetako bat jartzea, arau indardunekin bat etorriz:
a) Aukerako berraztertze-errekurtsoa errektoreari zuzendua, hilabeteko epean, aurkaratutako egintza jakinarazi edo iragarri eta biharamunetik aurrera.
b) Administrazioarekiko auzi-errekurtsoa Nafarroako Administrazioarekiko Auzietako Epaitegietan, bi hilabeteko epean, aurkaratutako egintza jakinarazi edo iragarri eta biharamunetik aurrera.
Epaimahai kalifikatzaileak ematen dituen egintza eta ebazpenen kontra zilegi da gora jotzeko errekurtsoa jartzea, errektoreari zuzendua, hilabeteko epean, errekurtsoaren xede den egintza argitaratu edo jakinarazi eta biharamunetik aurrera.
Iragarkiaren kodea: F2418697
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
