2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
IRUÑA
9. araua, Haur Eskoletako hezkuntza- eta laguntza-zerbitzuarengatik ordaindu beharreko prezio publikoak erregulatzen dituena, aldatzea. Behin betiko onespena
Behin Udaleko Osoko Bilkurak, arauzko quoruma izanik, bi mila eta hogeita bosteko uztailaren 3an hasiera batez onetsirik, eta jendaurreko epea inolako erreklamaziorik gabe iragan eta gero, behin betiko onetsi da 9. araua –Haur Eskoletako hezkuntza- eta laguntza-zerbitzuarengatik ordaindu beharreko prezio publikoak erregulatzen dituena– honela aldatzea. Jarraian 9. arauaren testu osoa argitaratzen da, onetsitako aldaketa barne, orok jakin dezan eta gainerako ondorioak izan ditzan, Nafarroako Toki Ogasunei buruzko martxoaren 10eko 2/1995 Foru Legearen 13. artikuluaren 4. eta 5. apartatuetan eta Nafarroako Toki Administrazioari buruzko uztailaren 2ko 6/1990 Foru Legearen 262.2 eta 326. artikuluetan ezarritakoa betetze aldera.
Aldaketa honek Nafarroako Aldizkari Ofizialean argitaratu eta biharamunean hartuko du indarra.
Iruñean, 2025eko irailaren 3an. Alkate udalburua, Joseba Asiron Saez.
9. ARAUA
IRUÑEKO UDALAREN HAUR ESKOLETAKO JANTOKI-ZERBITZUARENGATIK ORDAINDU BEHARREKO PREZIO PUBLIKOAK ERREGULATZEN DITUEN ARAUA
Oinarria
1. artikulua. Ordainarazpen hau ezartzen da Nafarroako Toki Ogasunei buruzko 2/1995 Foru Legearen lehen tituluko III. kapituluko 2. ataleko 2. azpiatalean xedatutakoari jarraikiz eta haren 28. artikuluan jasotako baimenaren babesean.
Ordaintzeko betebeharra
2. artikulua. Udalaren Haur Eskoletako jantoki-zerbitzua erabiltzen duten ikasleen guraso-ardura, tutoretza edo legezko ordezkaritza dutenek zerbitzu horri dagokion prezio publikoa ordaindu beharko dute.
Kudeaketarako eta diru-bilketarako arauak
3. artikulua. Prezio publikoa hilabetez hilabete ordainduko da, betiere hilekoak osorik eta aurretiaz ordaindu behar direla. Salbuespenez, abuztuko kuota %25ekoa izanen da ikasle berriendako, eta %50ekoa gainerakoendako.
Tarifen aplikazioa
4. artikulua. Aplikatu beharreko tarifak Nafarroako Gobernuak urte eta ikasturte bakoitzean Gobernuaren titulartasuneko Haur Eskoletarako onetsitakoak izanen dira.
5. artikulua. Tarifak zehazteko oinarri diren familia diru-sarrerak familia-unitateko kide direnek lortutakoak oro dira. Familiaren diru-sarreratzat hartzen da familia-unitateak Pertsona Fisikoen Errentaren gaineko Zergaren azken aitorpenean duen oinarri likidagarria. Salbuespenez, diru-sarrerak asko murriztu dituzten familia-unitateendako, eta jotzen bada horrek eraginen duela aurtengo deklaraziorako oinarri likidagarri txikiagoa izatea, egoera ekonomiko berriari dagozkion diru-sarrerak baloratzen ahalko dira, baldin eta hori eskatzen bada eta diru-sarreren murrizketa horren zergatia egiaztatzen duten agiriak aurkezten badira.
Aipatu zerga horren aitorpena aurkeztea derrigorrezkoa ez bada, hori egiaztatzen duten agiri ofizialak aurkeztu beharko dira, bai eta errentak edo diru-sarrerak jasotzen direla justifikatzeko agiriak eta bestelako datu fiskalak ere. Azken beltzean, diru-sarreren zinpeko adierazpen bat aurkezteko aukera egonen da, familia-unitatearen egoera sozioekonomikoa egiaztatzen duen gizarte-txostenarekin batera.
6. artikulua. Hileko tarifak eranskinean ezarritakoak izanen dira, eta familiaren per capita errentaren arabera aplikatuko dira.
Aplikatu beharreko tarifa zehazteko, honako hau joko da urteko per capita errentatzat: familia-unitateak Pertsona Fisikoen Errentaren gaineko Zergaren azken aitorpenean jasotako oinarri likidagarria edo, bestela, familiak ikasturtea hasten den datan dituen diru-sarrerak, betiere behar bezala egiaztatuak, familia-unitateak dituen kide-kopuruaz zatitu eta eragiketa horretatik ateratako zenbatekoa.
Aitaren zein amaren errenta-aitorpenak hartuko dira aintzat, betiere tartean ez bada banantzeari edo dibortzioari buruzko epairik, edo ezkontzaz kanpoko seme-alabarik dela medio hartutako neurri legalik. Kasu horietan, haurraren zaintza eta babesa zer gurasok eduki eta horren aitorpena hartuko da kontuan, eta horren oinarri likidagarriari epaian xedatutako urteko kopurua gehituko zaio.
Arrisku psikosozialeko faktoreen eraginpean dauden edo pobrezia larrian dauden haurrak izanez gero, ez da preziorik eskatuko. Inguruabar horiek familia-unitatearen egoeran esku hartzen ari diren zerbitzuen sareko lanaren testuinguruan zehaztuko dira; horretarako, proposamen bat egin eta Iruñeko Udaleko Haur Eskolen Erakunde Autonomora bidaliko da, eta modu justifikatuan onetsi edo ukatuko da, erakunde horretako lehendakariak emandako ebazpenaren bidez, emandako txostenen arabera.
Pertsona Fisikoen Errentaren gaineko Zergaren azken aitorpena aurkezten ez dutenei edo familiako diru-sarrerak egiaztatzen ez dituztenei hileko gehieneko kuota aplikatuko zaie.
7. artikulua. Aplikatutako tarifak ezin dira ikasturtean zehar berraztertu edo aldatu.
8. artikulua. Bi anai-arrebak edo gehiagok jantokia erabiltzen badute, familia-unitatearen diru-sarreren araberako lehen tarifa bat ezarriko da, eta hurrengo tarifak gutxieneko tarifatzat ezarritakoak izanen dira.
9. artikulua. Matrikulatutako ikasle guztiek dagokien tarifa ordaindu beharko dute, justifikatutako arrazoiengatik ikastetxera joan ez arren. Matrikula formalizatzeak berekin dakar, borondatezko baja egiten den kasuetan izan ezik, ikastetxera joan eta ikasturteko hamaika hilekoak ordaintzeko konpromisoa. Matrikula behin ikasturtea hasita formalizatzen bada, tarifak ikaslea ikastetxera joaten noiz hasi eta hortik aurrera ordainduko dira. Hileko kuota matrikula formalizatu den hilabetetik aurrera ordainduko da. Nolanahi ere, matrikula 15etik aurrera egiten bada (egun hori barne), lehen kuota dagokion hileroko kuotaren %50 izanen da.
Borondatezko baja ematen bada, baja zein hiletan eman eta hilabete horri dagokion tarifa osorik ordaintzeko galdatuko da. Kasuan kasuko haur-eskolan baja emateko eskaerak idatziz aurkeztu beharko dira, ikastetxeko zuzendaritzak horretarako emandako inprimakian.
Justifikatutako arrazoi bat dela medio, haur-eskola batean matrikulatutako haurra ezin bada eskolara joan, ikaspostua gordetzeko eskubidea izanen du, behar-beharrezkoa den denboran, betiere ez joatearen arrazoia agiri bidez justifikatu eta dagokion prezioa ordaintzen bada. Iruñeko Udaleko Haur Eskolen Erakunde Autonomoaren Gerentzia da organo eskuduna bai alegatutako zergatia justifikatuta dagoen ala ez erabakitzeko, bai ikaspostua zenbat denbora gorde behar den ezartzeko; Gerentziak hartuko du erabakia eta familiari behar bezala jakinaraziko dio. Haurra eskolara joatea eragozten duen zergatia desagertu eta eskolara joaten ez bada, baja emanen zaio, hileko kuoten sortzapena amaituko da eta ikaspostua itxarote-zerrendaren arabera eskainiko da.
10. artikulua. Familiek ordaindu gabeko kuotak premiamenduzko prozeduraren bidez galdatuko dira.
TARIFA.–ERANSKINA
Jantoki-zerbitzuagatik haur-eskoletako erabiltzaile bakoitzari aplikatu beharreko hileko tarifa Nafarroako Gobernuak kasuan kasuko ikasturtean 0-3 urte bitarteko Haur Hezkuntzako bere ikastetxeetarako ezarritakoa izanen da.
Iragarkiaren kodea: L2511621