177. ALDIZKARIA - 2025eko irailaren 5a

1. NAFARROAKO FORU KOMUNITATEA

1.2. AGINTARIAK ETA LANGILEAK

1.2.1. Kargu-uzteak, izendapenak eta bestelako egoerak

141/2025 EBAZPENA, abuztuaren 11koa, Hezkuntza Departamentuko Irakasleak Hautatzeko eta Lanpostuak Betetzeko Zerbitzuko zuzendariak emana, zeinaren bidez betetzen baita Hezkuntza Departamentuko Langileen Araubide Juridikoaren Zerbitzuko zuzendariaren otsailaren 11ko 520/2025 Ebazpena.

Francisco Javier Azcona Martínez jaunak parte hartu zuen Hezkuntza Departamentuko Irakasleak Hautatzeko eta Lanpostuak Betetzeko Zerbitzuko zuzendariaren abenduaren 18ko 302/2020 Ebazpenaren bidez onetsitako sarbide libreko hautapen prozeduran, Lanbide Heziketako irakasle teknikoen kidegoko Zurgin-lanen eta Altzarien Fabrikazioa eta Instalazioa espezialitatean, txanda irekian eta gaztelaniaz.

Era berean, Francisco Javier Azcona Martínez jaunak administrazioarekiko auzi-errekurtsoa jarri zuen Hezkuntzako kontseilariaren abuztuaren 3ko 376E/2023 Foru Aginduaren aurka, zeinaren bidez ezesten baitira Lanbide Heziketako irakasle teknikoen kidegoko Zurgin-lanen eta Altzarien Fabrikazioa eta Instalazioa (gaztelaniaz) espezialitateko oposizioaldiko behin betiko puntuazioen aurka jarritako gora jotzeko errekurtsoak, bai eta Hezkuntza Departamentuko Irakasleak Hautatzeko eta Lanpostuak Betetzeko Zerbitzuko zuzendariaren abuztuaren 2ko 163/2022 Ebazpenaren aurka jarritakoa ere. Orobat eskatu zuen deuseza deklara zezatela Irakasleak Hautatzeko eta Lanpostuak Betetzeko Zerbitzuko zuzendariaren abenduaren 18ko 302/2020 Ebazpenaren bidez onetsitako hautapen prozesuko lehen proba gainditu zuten izangaien behin betiko zerrenda, eta jarduketak atzera eraman zitezela, lehen probara, hain zuzen, era horretan oposizioaldiko lehen proba gainditu duen izangai gisa aitor zezaten eta, horrenbestez, Lanbide Heziketako irakasle teknikoen kidegoko funtzionario gisa izendatzeko eskubidea aitor zekion.

Hezkuntza Departamentuko Langileen Araubide Juridikoaren Zerbitzuko zuzendariaren otsailaren 11ko 520/2025 Ebazpenaren bidez, Nafarroako Justizia Auzitegi Nagusiko Administrazioarekiko Auzien Salaren 2024ko irailaren 30eko 290/2024 Epaia betearazten da. Epai horren bidez, partez baiesten da Francisco Javier Azcona Martínez jaunak Nafarroako Gobernuaren aurka jarritako demanda, eta, horren arabera, Irakasleak Hautatzeko eta Lanpostuak Betetzeko Zerbitzuari eskatzen zaio deuseza deklara dezala interesdunari 1B ariketan ezarritako puntu bateko penalizazioa, akats ortografikoengatik ezarri zitzaiona, horrek hautapen prozesua garatzeari begira ekartzen dituen ondorio guztiekin, bere promozioko gainerako kideen baldintza berberetan egoteko.

Era berean, ezartzen da jarduketa horietatik eratorritako ondorioek eta efektuek ez dutela eraginik izanen Hezkuntza Departamentuko Irakasleak Hautatzeko eta Lanpostuak Betetzeko Zerbitzuko zuzendariaren abenduaren 18ko 302/2020 Ebazpenaren bidez onetsitako deialdiaren xede diren plazen esleipendun suertatu diren beste oposiziogileengan (ebazpen horren bidez, hautapen prozedura bat onetsi zen Lanbide Heziketako irakasle teknikoen kidegoan sartzeko, Nafarroako Foru Komunitateko Administrazioaren kudeaketa eremuko plazetan).

Penalizazioa baliogabetu ondoren, kontuan hartu behar da deialdiaren zortzigarren oinarrian ezarritakoa: "Oposizioaldiko eta lehiaketaldiko puntuazioen haztapena, oposizio-lehiaketaren puntuazio orokorra ezartzeko, honako hau izanen da: %60 oposizioaldirako eta %40 lehiaketaldirako". Beraz, bidezkoa da Francisco Javier Azcona Martínez jaunaren puntuazioa handitzea eta, oposizioaldia eta lehiaketaldia batu ondoren, guztira 5,4795 puntu lortu dituela xedatzea.

Azaldutakoa oinarri hartuta, Francisco Javier Azcona Martínez jauna praktiketako funtzionario izendatu behar da, 2025eko irailaren 1etik aurrerako ondorioekin, eta Hezkuntza Departamentuko Irakasleak Hautatzeko eta Lanpostuak Betetzeko Zerbitzuko zuzendariaren abuztuaren 24ko 194/2022 Ebazpenean sartu behar da (ebazpen horren bidez, praktiketako funtzionarioak izendatu ziren, eta praktikaldia egiteko destinoak esleitu zitzaizkien). Hortaz, Nafarroako Justizia Auzitegi Nagusiko Administrazioarekiko Auzien Salaren 2024ko irailaren 30eko 290/2024 Epaiaren arabera, destinoa esleitu behar zaio, txanda irekitik.

Horiek horrela, Hezkuntza Departamentuko Langileriaren eta Azpiegituren zuzendari nagusiaren abuztuaren 31ko 1/2023 Ebazpenaren bidez eskuordetutako eskudantziak erabiliz,

EBAZTEN DUT:

1. Betetzea Hezkuntza Departamentuko Langileen Araubide Juridikoaren Zerbitzuko zuzendariaren otsailaren 11ko 520/2025 Ebazpena, Nafarroako Justizia Auzitegi Nagusiaren Administrazioarekiko Auzien Salaren irailaren 30eko 290/2024 Epaia betearazteko eman zena, zeinaren bidez partez baiesten baita Francisco Javier Azcona Martínez jaunak Hezkuntzako kontseilariaren abuztuaren 3ko 376E/2023 Ebazpenaren aurka jarritako demanda.

2. Francisco Javier Azcona Martínez jaunari Lanbide Heziketako irakasle teknikoen kidegoko Zurgin-lanen eta Altzarien Fabrikazioa eta Instalazioa (gaztelaniaz) espezialitatean emandako puntuazioa igotzea 5,4795 puntura arte.

3. Francisco Javier Azcona Martínez jauna sartzea Lanbide Heziketako irakasle teknikoen kidegoan sartzeko hautapen prozedurak gainditu dituzten izangaien zerrenda bakarretan, kidegoaren, espezialitatearen eta hizkuntzaren araberakoetan, hain zuzen, Lanbide Heziketako irakasle teknikoen kidegoko Zurgin-lanen eta Altzarien Fabrikazioa eta Instalazioa (gaztelaniaz) espezialitatean, 5,4795 punturekin. Hautapen prozedura horiek Hezkuntza Departamentuko Irakasleak Hautatzeko eta Lanpostuak Betetzeko Zerbitzuko zuzendariaren abuztuaren 2ko 163/2022 Ebazpenaren bidez onetsi ziren.

4. Francisco Javier Azcona Martínez jauna sartzea Hezkuntza Departamentuko Irakasleak Hautatzeko eta Lanpostuak Betetzeko Zerbitzuko zuzendariaren abuztuaren 24ko 194/2022 Ebazpenaren bidez praktiketako funtzionario izendatu diren izangaien zerrendan.

Praktiketako funtzionario izendatzeak 2025eko irailaren 1etik aurrerako ondorioak izanen ditu.

5. Francisco Javier Azcona Martínez jaunari dei egitea ager dadin irakasle funtzionarioen behin-behineko destinoak, praktikaldian eta zerbitzu eginkizunetan, telematikoki esleitzeko prozeduran, bat etorriz Hezkuntza Departamentuko Irakasleak Hautatzeko eta Lanpostuak Betetzeko Zerbitzuko zuzendariaren abenduaren 23ko 264/2024 Ebazpenarekin.

Adierazi behar da praktikaldia egiteko esleitzen zaion destinoa behin-behinekoa dela.

6. Praktikaldia gaindituta, karrerako funtzionario izateko izendapenak 2023ko irailaren 1etik aurrera izanen ditu ondorioak.

7. Ebazpen hau argitara ematea Nafarroako Aldizkari Ofizialean eta deialdiaren fitxan, Hezkuntza Departamentuaren web-orrian (www.educacion.navarra.es/eu/).

8. Ebazpen hau igortzea Hezkuntza Departamentuko Idazkaritza Tekniko Nagusiari, Irakasleak Hautatzeko eta Lanpostuak Betetzeko Zerbitzuari, Aldi Baterako Langileak Kudeatzeko Zerbitzuari, Langileen Araubide Juridikoaren Zerbitzuari eta praktikaldiko Kalifikazio Batzordeari.

9. Ebazpen hau interesdunari jakinaraztea, behar diren ondorioak izan ditzan, eta adieraztea ebazpenak ez duela administrazio bidea amaitzen eta haren aurka gora jotzeko errekurtsoa jartzen ahalko dela, Barneko, Funtzio Publikoko eta Justiziako kontseilariari zuzendua, baina bakar-bakarrik Hezkuntza Departamentuko Langileen Araubide Juridikoaren Zerbitzuko zuzendariaren otsailaren 11ko 520/2025 Ebazpena betetzeari buruzko alderdiei dagokienez, hilabeteko epean, ebazpen hau jakinarazi eta biharamunetik hasita.

Iruñean, 2025eko abuztuaren 11n.–Irakasleak Hautatzeko eta Lanpostuak Betetzeko Zerbitzuko zuzendaria, Ricardo Iribas Latour.

Iragarkiaren kodea: F2510874