171. ALDIZKARIA - 2025eko abuztuaren 28a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

239E/2025 EBAZPENA, uztailaren 15ekoa, Energia, Enpresa I+G+b eta Ekintzailetzako zuzendari nagusiak emana, I+G+b arloa finantzatzen duten Europar Batasuneko programetarako proiektuak prestatu eta aurkezteko laguntzen 2025eko deialdia onesten duena. Dirulaguntzen Datu Base Nazionalaren identifikazioa: 846247.

Deialdi honetako laguntzen helburua da Nafarroako ETEek eta SINAIko (Nafarroako I+G+b Sistema) eragileek I+G+b finantzatzeko erabiltzen diren Europar Batasuneko programetan parte har dezaten bultzatzea.

Horretarako, diruz lagunduko da entitate horiek aholkularitza enpresak kontratatzea, I+G+b proiektuak prestatzeko eta programa horietan aurkezteko. Horrela, aurkezten diren proposamenen kopurua eta kalitatea handitu nahi da, bai eta dirulaguntza honen onuradunei baliabide ekonomiko gehiago eskuratuko dituztela ziurtatzea.

Adierazitakoarekin bat, eta erabiliz Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak,

EBAZTEN DUT:

1. 2025eko deialdia onestea, I+G+b arloa finantzatzen duten Europar Batasuneko programetarako proiektuak prestatu eta aurkezteko laguntzetarako.

2. Dirulaguntza emateko oinarri arautzaileak onestea. Ebazpen honen eranskinean jaso dira.

3. Deialdi honen konpromisoei aurre egiteko, jarraian adierazten den aurrekontuko kreditua baimentzen da:

AURREKONTUKO PARTIDA

EKITALDIA

ZENBATEKOA

820005-82600-4701-467300: Ezagutza arloko zerbitzu intentsiboetarako bonu teknologikoak

2025

60.000

Era berean, gehienez 200.000 euroko zenbateko osagarria ezartzen da. Zenbateko hori eraginkorra izan dadin, kreditu gehigarria baimendu beharko da Dirulaguntzei buruzko azaroaren 9ko 11/2005 Foru Legearen 31.3 a) artikuluan ezarritako inguruabarren bat gertatzeagatik. Gastu gehigarria baimentzeak eta argitaratzeak ez du berekin ekarriko eskaerak aurkezteko beste epe bat irekitzea, ezta dirulaguntzak ematearen gainean ebazteko eta hori jakinarazteko gehieneko epearen kontaketa berriz hastea ere.

Partida hauetatik etortzen ahalko da aurrekontu-zuzkidura: 820005-82600-7701-467311 "Berrikuntza-proiektuetarako dirulaguntzak" eta 820005 82600 4701 467302 "Oinarri teknologikoko enpresa berritzaileak ezartzeko dirulaguntzak".

4. Ebazpen hau eta eranskina Nafarroako Aldizkari Ofizialean argitaratzea.

5. Ebazpen honek ez du administrazio bidea amaitzen, eta zilegi da haren aurka gora jotzeko errekurtsoa jartzea, Industriako eta Enpresen Trantsizio Ekologiko eta Digitalerako kontseilariari zuzendua, argitaratu eta biharamunetik hilabeteko epean.

Iruñean, 2025eko uztailaren 15ean.–Energia, Enpresa I+G+b eta Ekintzailetzako zuzendari nagusia, Garbiñe Basterra Oloriz.

ERANSKINA.–OINARRI ARAUTZAILEAK

1. oinarria.–Xedea.

Laguntza hauen helburua da bultzatzea Nafarroako ETEek eta SINAIko (Nafarroako I+G+b Sistema) eragileek parte har dezaten I+G+b finantzatzeko erabiltzen diren Europar Batasuneko programa hauetan (aurrerakoan, Batasuneko programak), programa horien bidez finantzatzen baitira ikerketa zientifikoa, garapen teknologikoa eta berrikuntza:

A. Horizon Europe programa.

B. EURATOM ikerketa eta prestakuntza programa.

C. Konektatu Europa mekanismoa.

D. Europa Digitala.

E. Merkatu Bakarra.

F. Europako Programa Espaziala.

G. LIFE: Ingurumenerako eta Klima Ekintzarako programa.

H. Interreg Sudoe eta Eremu Atlantikoa.

I. Europa Sortzailea.

J. EU4Health.

K. Batasuneko Babes Zibileko Mekanismoa eta rescEU.

L. Europako lankideen I+G+b arloko norgehiagokako deialdiak (adibidez, European Partnerships, ur-jauzi erako dirulaguntza).

Horrela, programa horietatik laguntzarik lortzen ez badute, I+G+b proiektuaren proposamena egin eta aurkezteko kontratatu zuten aholkularitza enpresaren gastua diruz lagunduko zaie.

2. oinarria.–Entitate onuradunak.

1. Honako hauek dira laguntza hauek jaso ditzaketenak:

a) 2014ko ekainaren 17ko 651/2014 (EB) Erregelamenduaren I. eranskinean, enpresa txiki eta ertainaren definizioari egokitzen zaizkion enpresak. Kategorien araberako Salbuespenari buruzko Erregelamendu Orokor horren bidez (aurrerakoan KSEO) zenbait laguntza-kategoria barne merkatuarekin bateragarritzat jotzen dira, Tratatuaren 107. eta 108. artikuluak aplikatuz.

b) SINAIko (Nafarroako I+G+b Sistemako) exekuzio eragileak, halakotzat egiaztaturik daudenak Unibertsitateko, Berrikuntzako eta Eraldaketa Digitaleko kontseilariaren otsailaren 28ko 2E/2020 Foru Aginduak araututako erregistroan (hemendik aurrera, SINAIko eragileak).

2. Hauek dira onuradun izateko betebeharrak:

Nafarroan lantokia izatea eta lantoki horretan garatzea diruz lagundutako proiektua.

Aholkularitza enpresen kasuan, beren helburu sozialean jasota ez izatea I+G+b proiektuen proposamenak aurkezteko jarduerak egitea.

Dirulaguntzei buruzko azaroaren 9ko 11/2005 Foru Legearen 13,2. artikuluan onuradun izateko ezarritako debeku-kasuetan ez egotea.

Zerga-betebeharrak eta Gizarte Segurantzarekikoak egunean dituela egiaztatzeko, eskatzaileak baimena ematen dio departamentu honi egoera hori egiaztatzen duten datuak kontsultatzeko, hala dagokionean.

Inolako administrazio zehapen irmorik edo kondena epai irmorik betetzen ez egotea sexu edo genero diskriminaziotzat hartutako lan praktikak egiteagatik edo onartzeagatik, eta, kasua bada, ez egotea arrazoi horiek direla-eta ezarritako epai edo zehapen bat betetzeko zain.

Haren jarduera ekonomikoak ez dezala kalte nabarmenik eragin Europako Parlamentuaren eta Kontseiluaren 2020ko ekainaren 18ko 2020/852 (EB) Erregelamenduaren 17. artikuluan adierazitako ingurumen-helburuetan. Erregelamendu hori inbertsio jasangarriak errazteko esparrua ezartzeari buruzkoa da eta Taxonomiari buruzko 2019/2088 (EB) Erregelamendua aldatzen du.

Enpresa bada, Nafarroako Industria Erregistroan inskribaturik edo inskripzioa eskatuta egon beharko du, hala badagokio Ekonomia, Ogasun, Industria eta Enpleguko kontseilariak Nafarroako Industria Erregistroa sortzeko apirilaren 30ean emandako 152/2013 Foru Aginduaren 3. artikuluan xedatutakoaren arabera.

SINAIko eragilea bada eta jarduera ekonomikoak eta ez-ekonomikoak egiten baditu, bi jarduera mota horiek eta bakoitzaren kostuak eta finantzaketa argi bereizten dituen kontabilitatea izan beharko du.

Eskatutako baldintzak laguntza osorik ordaindu arte bete beharko dira, eta eskabidean jasotako erantzukizunpeko adierazpenaren bidez egiaztatuko da hala dela.

Ezin dira onuradun izan:

Bete gabe dagoen berreskuratze agindu baten mende daudenak, Europako Batzordeak laguntza legez kanpokotzat eta merkatu erkidearekin bateraezintzat jo ondoren; ez eta krisian dagoen enpresaren kalifikazioa dutenak ere, Kategorien araberako Salbuespenari buruzko Erregelamendu Orokorraren 2. artikuluko 18. atalean definitzen den gisan.

Krisian dauden enpresak, Kategorien araberako Salbuespenari buruzko Erregelamendu Orokorraren 2. artikuluko 18. ataleko definizioaren arabera. Salbuespena dira 2019ko abenduaren 31n krisian ez zeudenak baina 2020ko urtarrilaren 1etik 2021eko abenduaren 31ra bitarteko aldian krisian dauden enpresak izatera pasatu direnak.

3. oinarria.–Gastu diruz lagungarriak.

1. I+G+b proiektuen proposamenak egin dituzten aholkularitza enpresen kontratazio-gastuak lagunduko dira diruz, baldin eta baldintza hauek betetzen badituzte:

a) Proposamen horiek Europar Batasuneko programa hauetan aurkeztu izana:

A. Horizon Europe programa.

B. EURATOM ikerketa eta prestakuntza programa.

C. Konektatu Europa mekanismoa.

D. Europa Digitala.

E. Merkatu Bakarra.

F. Europako Programa Espaziala.

G. LIFE: Ingurumenerako eta Klima Ekintzarako programa.

H. Interreg Sudoe eta Eremu Atlantikoa.

I. Europa Sortzailea.

J. EU4Health.

K. Batasuneko Babes Zibileko Mekanismoa eta rescEU.

L. Europako lankideen I+G+b arloko norgehiagokako deialdiak (adibidez, European Partnerships, ur-jauzi erako dirulaguntza).

Batasuneko programetan parte hartuz gero, haien oinarrietan argi eta garbi zehaztu beharko da I+G+b proiektuak egiteko finantzaketa dela.

b) Batasuneko programa batean aurkeztu ondoren hartan finantzaketarik lortu ez izana, baina 8. oinarrian ezarritako gutxieneko puntuazioa lortu izana.

c) Proposamenaren kalitatea baloratzeko ebaluazio-txostena izatea (ESR Evaluation Summary Report edo antzekoa), 2024ko urtarrilaren 1etik aurrera egina.

d) Batasuneko programara deialdi honetako laguntza eskatu aurretik aurkeztu izana.

e) Aholkularitza-enpresaren kontratazio-gastu guztiak ordaindu izana deialdi honetako laguntza-eskaera egin aurretik.

f) Proiektuen ebaluazioan fase bat baino gehiago duten Batasuneko programetan lehenengo fasea edo aurre-proposamenak gainditu izana.

2. Ez dira izanen diruz lagungarriak:

a) Aholkularitza enpresak laguntza-eskatzaileari egiten dizkion etengabeko edo aldizkako aholkularitza jarduerak.

b) Balio erantsiaren gaineko zerga, salbu eta kostu hori onuradunarentzat berreskuraezina denean; kasu horretan, onuradunak frogatu egin beharko du hala dela.

4. oinarria.–Aholkularitza enpresen betekizunak.

1. Aholkularitza enpresek eginen dituzte I+G+b proiektuen proposamenak, baldin eta beren helburu sozialean jarduera horiek egitea jasota badute.

Betekizun hauek ere bete beharko dituzte:

a) Laguntza eskatzen duenarekin lotutako edo elkartutako enpresa bat ez izatea, Kategorien araberako Salbuespenari buruzko Erregelamendu Orokorraren I. eranskinean kontzeptu horiei buruz egiten diren definizioen arabera.

b) Ez azpikontratatzea dirulaguntzaren xedeko lanen exekuzioa.

2. Laguntzak kudeatzen dituen organoak beharrezkotzat jotzen duen informazio gehigarria eskatzen ahalko du, aholkularitza enpresek emandako datuak eta haien kualifikazioa egiaztatzeko. Era berean, haien zerrenda bat argitaratzen ahalko du Nafarroako Gobernuak Interneten duen Atarian, www.navarra.eus helbidean, edo beste web interesgarri batzuetan.

5. oinarria.–Laguntzaren zenbatekoa.

1. Laguntzaren zenbatekoa gastu diruz lagungarriaren %80 izanen da (aholkularitza enpresaren kontratazioa), baina ezin izanen ditu gainditu honako gehieneko zenbateko hauek:

GEHIENEKO LAGUNTZA ETE-ENTZAT

Bazkide diren entitateen kop.

Bazkidea

Koordinatzailea

≥ 5

6.000 euro

15.000 euro

< 5

4.000 euro

8.000 euro

GEHIENEKO LAGUNTZA SINAIko ERAGILEENTZAT

Bazkide diren entitateen kop.

Bazkidea

Koordinatzailea

≥ 5

3.000 euro

7.500 euro

< 5

2.000 euro

4.000 euro

2. Entitate batek deialdi honen babesean eskaera bakar baterako lortzen ahalko du laguntza, salbu eta, eskaera guztiei erantzun ondoren, aurrekontu-kreditua egoteagatik entitate horren hurrengo eskaerak diruz laguntzen ahal badira, 8. oinarriaren arabera ezarritako lehentasun-ordenari jarraituz.

6. oinarria.–Eskaerak aurkezteko epea eta modua.

1. Eskaerak aurkezteko epea deialdi hau Nafarroako Aldizkari Ofizialean argitaratu eta biharamunean hasi, eta 2025eko urriaren 31n bukatuko da, egun hori barne.

2. Eskaerak telematikaz aurkeztuko dira nahitaez, Nafarroako Gobernuak Interneten duen Atariaren (www.nafarroa.eus) tramiteen katalogoko fitxa erabiliz (hemendik aurrera, laguntzen fitxa).

7. oinarria.–Eskaerarekin batera aurkeztu beharreko dokumentazioa.

1. Laguntza-eskaerarekin batera, honako dokumentazio hau aurkeztu beharko da, laguntzen fitxan eskuragarri dauden ereduetara egokituta (artxibo digital bereizi gisa aurkeztu beharko dira, beren izenarekin behar bezala identifikatuta):

a) 2.3 oinarrian adierazitako betekizunei buruzko erantzukizunpeko adierazpena.

b) Europako deialdira aurkeztutako proposamena, aurkeztu izanaren frogagiriarekin, proiektuaren aurrekontua barne.

c) Aurkeztutako proposamenari buruz Batasuneko erakunde eskudunak emandako balorazio-txostenaren kopia (Evaluation Summary Report edo antzekoa), haren bidez egiaztatu ahal izateko zein den proiektuaren balorazio kuantitatiboa eta/edo kualitatiboa, deialdian ezarritako onarpen atalaseei dagokienez.

d) Eskatzailearen eta aholkularitza enpresaren artean egindako kontratua, hitzartutako baldintzak adierazten dituena, ekonomikoak zein teknikoak. Kontratu horrek proposamena Batasuneko programan aurkeztu aurreko data izanen du. Data hori egiaztatzen ahalko da eskatzaileak eskaintzan egindako sinadura elektronikoaren bidez, edo, eskuragarri ez badago, hala egiaztatzen duten beste fitxategi batzuk aurkeztuz (mezu elektronikoak, bileren aktak, etab.), jatorrizko formatuetan. Batasuneko programak fase bat baino gehiago baditu, kontratuak argi eta garbi adierazi behar du fase horietako bakoitza prestatzeko kostua.

e) Aholkularitza enpresak egindako fakturak eta ordainagiriak (bankuko ziurtagiriak edo laburpenak, behar bezala identifikatuak, edo ordainketaren trazabilitatea egiaztatzeko moduko beste edozein merkataritza-dokumentu). Batasuneko erakunde eskudunak aurkeztu den proposamenari buruz egindako balorazio-txostenaren data baino lehen igorri behar da faktura, edo, ondoren bada, hurrengo bi hilabetean. Era berean, faktura egin eta hurrengo bi hilabetean ordaindu beharko da, eta beti laguntza honen eskaera aurkeztu baino lehen.

f) Eskatzailea ETE bat bada, tamaina egiaztatu beharko du, eta, horretarako, honako hauek aurkezten ahalko ditu:

–Urteko kontuak, itxita, sinatuta eta Merkataritza Erregistroan edo Kooperatiben Erregistroan gordailututa, eta, horiekin batera, itxitako azken hiru ekitaldiei buruzko memoriak eta Erregistroak egindako txostenak (digitalki autentifikatuta edo zigilatuta, eta ikuskatuta, nahitaezkoa denean), bai eskatzailearenak, bai haren enpresa elkartu eta lotutakoenak. Erregistro horretan kontuak aurkeztera behartuta ez dauden ETEek eta langile autonomoek PFEZaren aitorpena aurkeztuko dute.

–Edo, aipatutako dokumentazioaren ordez, Nafarroako Merkataritza Ganberaren ziurtagiri bat, ETEa dela egiaztatzen duena.

Dokumentazioa aurkeztu ezean, ulertuko da enpresa ez dela ETE bat, eta, beraz, ezin izanen du laguntzarik jaso.

Hala ere, enpresak 2025ean aurkeztu badu dokumentazio hori departamentu honetan, ez da beharrezkoa izanen berriro aurkeztea. Kasu horretan, laguntzen deialdia edo dokumentazioa aurkeztu zuen administrazio-unitatea zein den adierazi beharko du.

g) Dirulaguntzen onuradunek gardentasunaren gainean duten betebeharraren adierazpena, laguntzen fitxan dagoen ereduari jarraituz. Adierazpen hori beti aurkeztu behar da, gardentasun betebeharra izan (Gardentasunari, Informazio Publikoa Eskuratzeari eta Gobernu Onari buruzko maiatzaren 17ko 5/2018 Foru Legearen 3.c) artikuluko baldintzak betetzeagatik) edo ez izan (kasu horretan, inguruabar hori jasoko da adierazpenean).

2. Aurkeztutako dokumentazioak betebehar horiek betetzen ez baditu, laguntzak kudeatzen dituen organoak eskatzaileari errekerimendua eginen dio 10 egun balioduneko epean zuzentzeko, eta ohartaraziko dio, hala egin ezean, eskaera bertan behera utzi duela ulertuko dela eta espedientea artxibatzeko ebazpena emanen dela.

8. oinarria.–Dirulaguntza emateko prozedura eta irizpideak.

1. Laguntza hauek norgehiagokako prozeduraren bidez emanen dira. Hartara, aurkeztutako eskaerak alderatuko dira, haien artean lehentasuna ezartzeko, oinarri honetan ezarritako balorazio irizpideekin bat.

Laguntzen zenbatekoa kalkulatzeko, balorazio handiena eskuratzen duten eskaerei 5. oinarrian ezarritako laguntza intentsitatea aplikatuko zaie, deialdi honetarako aurrekontuan erabilgarri dagoen kreditua (60.000 euro) agortu arte.

Aurrekontuan behar adina diru ez egoteagatik kontuan hartzen ez diren eskaerak ezetsitzat joko dira.

Honako hauek izanen dira eskaerak baloratzeko irizpideak, dirulaguntza jasotzeko gehieneko eta gutxieneko puntuazioekin:

KATEGORIA

GEHIENEKO PUNTUAZIOA

GUTXIENEKO PUNTUAZIOA

I. Entitate mota

6

2

II. Proposatutako zereginen berrikuntza-maila

3

2

III. Proposamenaren kalitatea

6

Ikusi III.1 edo III.2 irizpidea

GUZTIRA

15

I. Entitate mota:

MOTA

PUNTUAZIOA

Mikroenpresa edo enpresa txikia

6

Enpresa ertaina

4

SINAIko eragilea

2

II. Proposatutako zereginen berrikuntza-maila:

ZEREGINAK

PUNTUAZIOA

Proiektuak "Ikerketa industrialeko" eta/edo "Garapen esperimentaleko" lanak egiten ditu

2

Proiektuak "Berrikuntza" lanak egiten ditu

3

Proiektuak ez du zereginik egiten aurreko kategorietako batean ere

0

II. irizpide honetan, ezinbestekoa da gutxienez 2 puntu lortzea.

III. Proposamenaren kalitatea ebaluatzea:

III.1. Balorazio kuantitatiboa egiten duten ebaluazio-txostenetan, formula hau aplikatuko da puntuazioa lortzeko:

Azalpena:

X = balorazio-txostenean lortutako nota.

Y = Batasuneko programan proiektuak onartzeko eskatutako atalasea.

X

III.1 irizpide honetan, ezinbestekoa da gutxienez 0.7 lortzea Y balioan

––––

Y

III.2. Modu kualitatiboan baloratzen diren ebaluazio-txostenetan, ebaluazioa modu kuantitatiboan egiteko behar den informazioa ez dutenetan edo aurkeztutako proposamenari buruz Batasuneko erakunde eskudunak "bikaintasun-zigilu" bat eman duenean, haren ebaluazioa honako irizpide hauetan oinarrituta eginen da:

III.2.1. Proposamen onartua:

IRIZPIDEA

PUNTUAZIOA

Proposamen onartua, baina finantzatua eta/edo "bikaintasun-zigilua" ez dena

3

Proposamen ez-onartua

0

III.2.2. Ebaluazio-txostenaren iruzkinak (3 puntu). Puntuazioa emanen zaie Batasuneko programa ebaluatzen duen erakundeak ebaluazio-txostenean egiten dituen iruzkinei. Iruzkin positiboak eta negatiboak baloratuko dira, ebaluatutako gainerako proposamenekin alderatuta, deialdiaren baldintzetara egokitua, etab.

III.2 irizpide honetan ezinbestekoa da gutxienez 2 puntu lortzea.

2. Lortutako puntuazioan berdinketa gertatzen bada, honela ebatziko da:

1. I. irizpidean (entitate mota) lortutako puntuazioa.

2. III. irizpidean (proposamenaren kalitatea) lortutako puntuazioa.

3. Berdinketak irauten badu, lehenik aurkeztutako eskaera lehenetsiko da.

9. oinarria.–Dirulaguntza ematea eta ordaintzea.

1. Laguntzak kudeatzen dituen organoak, hots, S4 Proiektu Estrategikoen eta Ekintzailetzaren Zerbitzuak, oinarri arautzaile hauetan ezarritako irizpideei jarraituz ebaluatuko ditu eskaerak, eta organo eskudunari laguntza emateko eta ordaintzeko ebazpen proposamena igorriko dio, non adieraziko baita onuradunek dirulaguntza lortzeko betebehar guztiak betetzen dituztela.

2. Trantsizio Energetikorako, Proiektu Estrategikoen eta S4ren zuzendari nagusia izanen da organo eskuduna dirulaguntza ematea eta ordainketa ebazteko.

Ebazpena arrazoitua izanen da, eta bertan jasoko dira, gutxienez ere, dirulaguntza jasoko duten eskatzaileen zerrenda eta, hala badagokio, ezetsi diren eskaerak, eta, horien artean, aurrekontu-baliabideen mugagatik ezetsitakoak.

3. Ebazpena gehienez bi hilabeteko epean eman eta jakinaraziko da eskatzaileen gaitutako helbide elektroniko bakarrean, eskaerak aurkezteko epea bukatzen denetik hasita.

Ezarritako gehieneko epea bukatzen bada berariazko ebazpenik eman eta jakinarazi gabe, eskaerak administrazio isiltasunez ezetsitzat jotzen ahalko dira. Hala ere, organo eskuduna behartua dago dirulaguntzak onartu edo ukatzeko berariazko ebazpena ematera eta jakinaraztera, oinarri hauetan xedatutakoari jarraikiz.

10. oinarria.–Onuradunen betebeharrak eta horiek ez betetzearen ondorioak.

1. Dirulaguntza jasotzen duten onuradunek honako betebehar hauek izanen dituzte:

a) Oinarri arautzaile hauetan ezarritako moduan egin eta justifikatu beharko dituzte dirulaguntzaren xedeko jarduerak.

b) Proiektuaren proposamena prestatu eta aurkeztu izanaren aipamen publikoa egiten bada, jaso beharko da Nafarroako Gobernuak finantzatu duela.

c) Proiektuaren emaitzak zabaltzeko materialetan ez da emakumea diskriminatzen duen irudirik azalduko, eta emakumeen eta gizonen arteko berdintasuna eta rol aniztasuna sustatuko dira. Halaber, prestatzen den dokumentazioan ez da erabiliko hizkuntza sexistarik.

d) Enpresa-deslokalizaziorik ez egiteko konpromisoa hartzea, Enpresen sustraitzearen aldeko eta enpresa-deslokalizazioaren aurkako neurriei buruzko abenduaren 16ko 18/2020 Foru Legearen 4. artikuluan ezartzen dena kontuan hartuta.

e) Dirulaguntzei buruzko Foru Legearen 9. artikuluan ezarritako betebehar orokorrak.

2. Oinarri arautzaile hauetan edo Dirulaguntzei buruzko Foru Legean ezarritako betebehar guztiak betetzen ez badira, dirulaguntza itzuli egin beharko da, foru lege horren 35. artikuluan xedatutakoarekin bat.

Halaber, aurreko betebeharretako bat hein batean betetzen ez bada, ordaindu beharreko dirulaguntzaren zenbatekoa berriro ere zehazten ahalko da, proportzionaltasun printzipioari jarraikiz.

11. oinarria.–Bitarteko elektronikoen bidezko harremanak.

Laguntzen eskaera eta erantsi beharreko dokumentazio guztia telematika bidez aurkeztuko dira Nafarroako Foru Komunitateko Administrazioaren erregistro orokor elektronikoan, laguntzen fitxaren bidez, Nafarroako Gobernuaren Interneteko Atariko (www.nafarroa.eus) tramiteen katalogoaren barnean.

Administrazio egintzen jakinarazpena eta laguntza hauek emateko prozeduraren barruan egiten diren jarduketa guztien komunikazioak eskatzaileen gaitutako helbide elektroniko bakarraren (GHEb) bidez eginen dira. Jakinarazpen edo komunikazio horren bidalketaren berri emanen da eskatzaileak jarritako helbide elektronikoaren bitartez.

12. oinarria.–Dirulaguntzaren bateraezintasuna.

Deialdi honetako dirulaguntzak bateraezinak dira Nafarroako Foru Komunitateko Administrazioak, beste administrazio publiko batzuek, beste erakunde publiko nahiz pribatu batzuek edo partikularrek, Espainiakoek nahiz atzerrikoek, gastu beretarako emandako beste dirulaguntza batzuekin.

13. oinarria.–"De minimis" laguntza.

1. Deialdi honetako dirulaguntzak "de minimis" laguntzak dira, Europako Batzordeak 2023ko abenduaren 13an emandako 2023/2831 Erregelamenduan xedatutakoaren arabera. Erregelamendu horren xedea da Europar Batasunaren Funtzionamenduari buruzko Tratatuaren 107. eta 108. artikuluak "de minimis" laguntzei aplikatzeko modua xedatzea (2023ko abenduaren 15eko L EBAO).

2. Erregelamendu horrekin bat, enpresa bakar bati hiru urteko zerga-ekitaldiko edozein alditan emandako "de minimis" laguntza guztien batura ezin da 300.000 eurotik gorakoa izan. Aipatu erregelamenduaren 2.2 artikuluan ezarrita dago enpresa bakarraren definizioa.

Interesdunek eskaera aurkeztu aurreko hiru urteetan jasotako bestelako "de minimis" laguntzak aitortu beharko dituzte eskabidean.

14. oinarria.–Emandako dirulaguntzen publizitatea.

S4 Proiektu Estrategikoen eta Ekintzailetzaren Zerbitzuak jendaurrean jarriko ditu emandako dirulaguntzak Ogasuneko Ministerioaren Dirulaguntzen Datu Base Nazionalaren bitartez (http://www.pap.minhafp.gob.es/bdnstrans/GE/eu/index), honako hauek adierazita: deialdia, laguntza zein aurrekontu kredituri egotzi zaion, onuradunak eta emandako diru kopurua.

Deialdi honen emaitzak Nafarroako Gobernuak Interneten duen Atariko tramiteen katalogoaren laguntzen fitxan ere argitaratuko dira (www.nafarroa.eus).

15. oinarria.–Datu pertsonalen babesa.

Datuak babesteko indarrean dagoen araudiaren arabera, Industriako eta Enpresen Trantsizio Ekologiko eta Digitalerako Departamentuak tratatuko ditu datu pertsonalak, deialdi honetako laguntzak kudeatzeko. Era berean, jakinarazten da datuak babesteko eskubideak departamentu horretan balia daitezkeela, laguntzen fitxan adierazitako moduan.

16. oinarria.–Oinarri arautzaileen aurkako errekurtsoa.

Interesdunek gora jotzeko errekurtsoa jartzen ahal dute oinarri arautzaile hauen aurka, Industriako eta Enpresen Trantsizio Ekologiko eta Digitalerako kontseilariari zuzendua, hilabeteko epean, argitaratu eta biharamunetik.

Iragarkiaren kodea: F2509728