Iragarkia

169. ALDIZKARIA - 2025eko abuztuaren 26a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

131C/2025 EBAZPENA, uztailaren 31koa, Ekonomia Sozialeko eta Laneko zuzendari nagusiak emana, zeinaren bidez erabakitzen baita erregistratu, gordailutu eta Nafarroako Aldizkari Ofizialean argitaratu dadila TRW automotive España SLU enpresaren hitzarmen kolektiboa.

Ikusirik TRW automotive España SLU enpresak aurkeztu duen hitzarmen kolektiboaren testua (kode zenbakia: 31003712011991), zeina erregistro honetan sartu baitzen 2025eko uztailaren 18an, eta izenpetu baitzuten enpresaren ordezkariek eta sindikatuen ordezkarien gehiengoak, 2025eko ekainaren 25ean.

Jarraikiz urriaren 23ko 2/2015 Legegintzako Errege Dekretuari, zehazki, 90. artikuluaren 2. eta 3. apartatuei (legegintzako errege dekretu horrek onetsi zuen Langileen Estatutuaren Legearen testu bategina) eta jarraikiz, orobat, maiatzaren 28ko 713/2010 Errege Dekretuari (errege dekretu horrek hizpide du erregistratzea eta gordailutzea hitzarmen kolektiboak, lan akordio kolektiboak eta berdintasun planak).

Eman zaizkidan eskudantziak erabiliz, zehazki, eman dizkidanak martxoaren 11ko 11/2019 Foru Legearen 32. artikuluak (foru lege horrek hizpide ditu Nafarroako Foru Komunitateko Administrazioa eta foru-sektore publiko instituzionala), azaroaren 15eko 251/2023 Foru Dekretuarekin loturik (foru dekretu horren bidez ezarri zen Eskubide Sozialetako, Ekonomia Sozialeko eta Enpleguko Departamentuaren egitura organikoa), honako hau,

EBAZTEN DUT:

Lehenbizikoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea TRW automotive España SLU enpresak aurkeztutako hitzarmen kolektiboa (kode zenbakia: 31003712011991).

Bigarrena.–Agintzea argitara dadila Nafarroako Aldizkari Ofizialean, orok jakin dezan.

Iruñean, 2025eko uztailaren 31n.–Ekonomia Sozialeko eta Laneko zuzendari nagusia, Iñaki Mendióroz Casallo.

AKORDIOA, ADOSTU DUTENA TRW AUTOMOTIVE ESPAÑA SLU ENPRESAKO ZUZENDARITZAK ETA ENPRESA BATZORDEAK, ONETS DADIN 2025., 2026., 2027. ETA 2028. URTEETARAKO ESTATUTU-HITZARMEN KOLEKTIBOA. AKTA

2025eko ekainaren 25ean bildu dira Iruñean, batetik, enpresa zuzendaritza ordezkatuz:

Iñigo Bereciartua, José Ignacio Martínez, Pablo Echeverría, Sara Ojer.

Eta bestetik, TRW Automotive España SLUren enpresa batzordea, langileak ordezkatuz:

Javier Lázaro, Gemma del Carmen, Juan María de la Funte, José Luis Zafra, Pedro Larrea, Ricardo Ocaña, Idoia Morentin, Ignacio Álvarez, Iñigo Pérez.

Mikel Azparren, CCOOko delegatu sindikala, Maximino García Delegado, UGTko delegatu sindikala, Roberto de Carlos, LABeko delegatu sindikala.

Bertaratuek elkarri aitortzen diote legezko gaitasun osoa kontratatzeko eta beharkizunak jartzeko, eta, batez ere, onesteko Enpresaren 2025., 2026., 2027. eta 2028. urteetarako Estatutu Hitzarmen Kolektiboaren negoziazioan erdietsitako akordioak.

Iruñean, 2025eko urtarrilaren 15ean.

TRW Automotive España SLUren zuzendaritza.

Iñigo Bereciartua, José Ignacio Martínez, Pablo Echeverría, Sara Ojer.

Enpresa batzordea:

Javier Lázaro, Gemma Del Cármen, Juan María de la Fuente, Enpresa Batzordea (jarraitzen du), José Luis Zafra, Pedro Larrea, Ricardo Ocaña, Idoia Morentin, Ignacio Álvarez, Íñigo Pérez.

Iruñean, 2025eko urtarrilaren 16an.

Ordezkari sindikalak:

Mikel Azparren, CCOOko delegatu sindikala, Maximino García Delegado, UGTko delegatu sindikala, Roberto de Carlos, LABeko delegatu sindikala.

HITZARMEN KOLEKTIBOA

Sinatu dute TRW Automotive España SLU enpresako zuzendaritzak eta enpresa batzordeak, langileen ordezkariek, elkarren arteko lan harremanak arautzeko, 2025., 2026., 2027. eta 2028. urteetarako.

I. KAPITULUA.–XEDAPEN OROKORRAK

1. artikulua. Eremu pertsonala, eremu funtzionala eta lurralde eremua.

Eremu pertsonala: hitzarmen kolektibo hau enpresako langile guztiei aplikatuko zaie, honako hauei izan ezik:

zuzendariak eta goi mailako buruak, ondorio guztietarako.

Eremu funtzionala: enpresa-jarduera bat dator EJSNaren 2932 epigrafearekin (ekonomia-jardueren sailkapen nazionala).

Lurralde eremua: Iruñeko lantokia.

2. artikulua. Denbora eremua.

Hitzarmen kolektibo honek bost urteko iraupena izanen du, 2025eko urtarrilaren 1etik 2028ko abenduaren 31ra arte, eta urtez urte luzatzen ahalko da isilbidez, baldin bi alderdietatik bakar batek ere ez badu salatzen iraungi baino bi hilabete lehenago, hitzarmena berrikusi edo bertan behera uztea proposatzeko.

Hitzarmenaren indarraldia bukatutakoan, gehienez ere 2 urtez mantenduko dira baldintzak, hitzarmen berriaren negoziazioa bukatu bitarte.

Enpresak hitzarmen kolektibo honek iraun bitartean beteko ditu bertan ezarritako lan-baldintzak, eta, hortaz, uko egiten dio Hitzarmenean itundutako lan-baldintzak ez aplikatzeari, salbu eta adostasun espresurik badago langileen legezko ordezkariekin.

II. KAPITULUA.–LANALDIA.

3. artikulua. Lanaldia.

Indarraldiko urte bakoitzean, lanaldia 1.728 ordukoa izanen da.

Hitzarmen honen indarraldian gobernuak onesten badu urteko lanaldi murritzago bat, berehalakoan aplikatzekoa izanen da, eta lehentasuna izanen du, hitzarmen honetan ezarritakoaren aldean.

Urteko lan-egutegian 2 egun ezarriko dira libreki aukeratzeko, hitzarmen honen indarraldiko urte bakoitzean, honako baldintza hauekin:

a) Buruari edo gainbegiraleari aurretik jakinaraztea, ahalik eta lasterren.

b) Buruaren edo gainbegiralearen adostasuna izatea.

c) Egun horiez benetan gozatzeko, ezin izanen dira izan eskaeren %25 baino gehiago egun eta atal berean, polibalentziak aintzat harturik, eta bermatu behar dira antolaketa eta ohiko ekoizpen-prozesua. Eskaerak onartzeko, eskaera zaharrenak lehenetsiko dira.

T. termikoen Atalari dagokionez, jokatuko da jarraikiz Lan Ordezkaritzaren 1977ko irailaren 14ko ebazpenari.

5. artikulua. Lan ordutegia.

Lantegietako langileak:

–Lanaldi arrunta.

• Astelehenetik ostiralera, 6:45etik 14:45era.
• Larunbatetan, 7:00etatik 11:00etara.

–Goizeko txanda:

• Astelehenetik ostiralera, 6:00etatik 14:00etara.
• Larunbatetan 6:00etatik 10:00etara.

–Arratsaldeko txanda:

• Astelehenetik ostiralera, 14:00etatik 22:00etara.
• Larunbatetan, 10:00etatik 14:00etara.

–Gaueko txanda:

• Igandetik ostegunera, 22:00etatik 6:00etara.
• Larunbatetan ez da lanik egiten.

Gaueko txanda ez da nahitaezkoa 57 urteko adinetik aurrera (adin hori barne).

Bulegoetako langileak.

Astelehenetik ostiralera, 8:00etatik 16:00etara. Bestela, aukeratu daiteke honako ordutegi hau: astelehenetik ostegunera, 8:00etatik 16:30era, eta, ostiralean, 8:00etatik 14:00etara. Urte bakoitzaren hasieran egin behar da aukera, eta ekitaldi guztian eutsi beharko zaio.

Lanaldi malgua ezarriko da: hala, ezarritako ordua baino 1,5 ordu beranduago bitarte sartzen ahal dira lanera, eta, beraz, denbora-tarte hori beranduago atera.

Zuzendaritzak konpromisoa hartzen du telelana bultzatzeko administrari eta teknikarien artean, ahal denean, familia eta lana bateratu ahal izateko tresna gisa. Telelana egiteko eta haren baldintzak ezartzeko, beharko da nagusi arduraduna ados egotea, kontuan harturik departamentuaren eta enpresaren beharrak.

6. artikulua. Oporrak.

Oporrak 30 egun naturalekoak dira.

Urtarrilean, plantilla guztiak edukiko du urteko egutegi bat, eta bertan ezarriko da (salbu opor kolektiboen kasuan, zeinak bat etorriko baitira Iruñeko zaindariaren festekin, sanferminekin) nola banatu udako oporrak, bi bloketan: bat uztailean, eta, bestea, abuztuan.

Urte bakoitzeko otsailaren 15a baino lehen, enpresak aldatzen ahalko ditu oporrak hartzeko egunak: plantillaren %30ena, gehienez.

Aurreko data horren ondoren (otsailaren 15a) egutegian aldaketarik egiteko, beharko da langileak borondatez onartzea, eta, hala bada, 102,79 euroko ordainketa sortuko du benetan lan egindako egun bakoitzeko.

7. artikulua. Lizentzia ordainduak.

Lizentzia eta baimen ordaindu hauek ezarri dira:

–Ospitaleratze, jaiotza eta ezkontzagatiko lizentziak.

a) Langilearen ezkontza: 18 egun natural; lizentzia hori eta oporrak elkarren segidan hartzen ahal dira, batera egokitzen badira.

b) Emaztea erditzea: 4 egun natural; jaiotzatik aurrera 2 egun natural hartu behar dira, eta langileak aukeratuko du noiz hartu beste 2 egunak, jaiotzatik hasita 15 eguneko epearen barnean.

Harrera parekatzen da jaiotzagatiko lizentziarekin, baldin eta gutxienez 12 hilabete irauten duen harrera bada.

c) Langileen Estatutuaren 37.b artikuluak bost egun ezartzen ditu, istripu edo gaixotasun larria izanez gero, ospitaleratuz gero edo ebakuntza kirurgikorik izanez gero, ospitaleratzerik gabe baina etxean atseden hartu beharra izanez gero. Baimen hori ospitaleratzean zehar har daiteke. Orduka hartu nahi izanez gero, egunka hartu ordez, langileak eskatu egin beharko du, eta Zuzendaritzat berariaz onartu.

Lehen graduko ahaideak ospitaleraturik badaude 15 egun baino gehiagoz jarraian, langileak beste 2 eguneko lizentzia izanen du, ospitaleratzeak iraun bitarte hartzeko, kasuan kasuko buruarekin aurrez adostuta.

Ospitaleratze, jaiotza eta ezkontzagatiko lizentziak hartuko dira lehenbiziko lanegunetik aurrera.

ZIUko (zainketa intentsiboetako unitatea) ospitaleratzeen kasuan, lizentziak orduka hartzen ahalko dira, familiakoa ZIUn dagoen bitartean.

–Heriotzagatiko lizentziak.

a) Ezkontidearen edo seme-alaben heriotzagatik, 7 egun natural.

b) Gurasoen, aitaginarreba-amaginarreben, aitona-amonen, biloben eta anai-arreben heriotzagatik, 3 egun.

c) Koinatu-koinaten edo suhi-errainen heriotzagatik, 2 egun.

d) Osaba-izeba, iloba eta lehengusu propioen heriotza: egun natural bat. Baimen eguna laneguna ez bada ere, egun horretan erabili beharko da nahitaez. Heriotza lanegun batean gertatzen bada, aukera izanen da baimen eguna hartzeko egokiagoa den beste egun batean, baimenaren arrazoiarekin loturik, betiere arrazoizko epe baten barnean.

–Lagun egitea eta tratamendu onkologikoak:

a) Gurasoek eta seme-alabek eta ezkontideek edo izatezko bikoteek ebakuntza kirurgiko bat baldin badute, ospitaleratzea eskatzen ez duena, edo bisita egin behar badiote mediku publiko nahiz pribatu bati, horretarako behar-beharrezkoa den denbora sartzen da langile bakoitzari mediku pribatuarengana joateko ematen zaizkion 16 orduen barnean, Metaleko Hitzarmenaren arabera.

b) Langile eta urte bakoitzeko 16 ordu ematen dira, arreta emateko gurasoei eta seme-alabei eta ezkontide edo izatezko bikoteei, tratamendu onkologikoetan, baldin, hain gogorrak izateagatik, behar baldin bada hirugarren pertsona baten laguntza, eta hala justifikatzen baldin badu dagokion kanpoko medikuak.

–Beste lizentzia ordaindu batzuk.

a) Anai-arreben, biloben, gurasoen, lehengusu eta iloba propioen ezkontza: egun natural bat.

b) Ohiko bizilekua aldatzea: egun bat.

c) Nahitaezko eginkizun publiko bat betetzeko, behar-beharrezkoa den denbora.

d) Metatzen ahal dira haurrari esnea emateko baimen gisa ezarritako orduak, langilearen nahierara, betiere buruarekin aldez aurretik ados jarrita.

e) Seme-alabak zaintzeko lanaldi murriztua 14 urtera arte luzatzea. Azken bi urte horietan, enpresak aukera emanen du txanda hautatzeko, oraingo inguruabar berberetan, baldin eta horrek ez badu galarazten ekoizpenaren antolaketa egokia.

Ezkontidearentzat ezarrita dauden lizentzia guztietan, baliokidea izanen da langilearekin bikotekide egonkor gisa bizi den pertsona, baldin elkarrekin bizi badira gutxienez urtebete lehenagotik, eta hori hala dela frogatzen badute, bizilekua duen udalaren ziurtagiri baten bidez.

Artikulu honetan ezarrita dauden lizentzia horiei egun natural bat gehituko zaie, edo enpresari egokia iruditzen zaiona, baldin justifikatua badago, lizentzia eskatzeko inguruabarra urruti gertatzeagatik, edo komunikazio zaila duten tokietan.

–Berdintasunerako legearen ondoriozko lizentziak:

Zuzendaritzak onartzen du Berdintasunerako Legeko lizentzia guztiak agertzea Hitzarmenean, betiere jarraikiz izandako bileren aktetan azaldutako baldintzei:

Baimenak seme-alaben jaiotzagatik, eta odol edo ezkontza bidezko bigarren gradu arteko ahaideen heriotzagatik, istripuagatik edo eritasun larriagatik, ospitaleratzeagatik edo ospitaleratu beharra izan gabe etxean atseden hartzea eskatzen duen ebakuntza kirurgikoagatik. Horregatik langileak bidaiatu behar badu, jarraituko zaio Nafarroako Foru Komunitateko Industria Siderometalurgikoaren Hitzarmenari.

–Soldatarik gabeko baimenak:

onartuko dira soldatarik gabeko baimenak, urtebete bitartekoak, gehienez.

Osotara, urtebete hartzen ahalko da gehienez 4 urteko epean.

4 urteko aldi horretan bi eskaera egiten ahalko dira gehienez.

Baimena hasi baina 15 egun lehenago egin beharko da baimen eskaera.

Enpresak beretako gordeko du baimen hori emateko ahalmena, baldin eskatzen bada oporraldietatik hurbil dauden datetarako, edo abendurako, une oro bermatu beharko baititu hala bezeroen hornidura nola enpresaren beharrak.

Baimen hori hartzen duen langilea konpentsatu eginen du enpresak, beherago agertzen diren ehunekoen arabera, soilik baldin langileak frogatzen badu hitzarmen berezi bat sinatu duela Gizarte Segurantzarekin, eta pagatu duela, kotizazio-oinarria osatzeko enpresaren kargura. Konpentsazio-betebeharra gutxienez iritsiko da ondotik azaltzen diren ehunekoetara eta aldietara, eta, erreferentzia gisa, hartuko dira baimena hasi aurreko sei hilabeteetako kotizazio-oinarrien batezbestekoa:

• Baimeneko lehen hiru hilabeteak: oinarrien batezbestekoaren %100era gehienez.
• Laugarren hilabetetik seigarrenera: oinarrien batezbestekoaren %80ra gehienez.

Gainerako hilabeteetan, hamabigarren hilabetera arte, ez da izanen konpentsatzeko betebeharrik.

* Aurreko hilabeteak kotizazio-ondorioetarako metatuko dira, nahiz eta aldi batean baino gehiagotan hartu.

III. KAPITULUA.–BALDINTZA EKONOMIKOAK

8. artikulua. Ordainsariak.

2025. urteko ordainsariak 2024ko KPIarekin (kontsumoko prezioen indizea) handituko da, gehi %0,75, eta 1. eranskinean jaso dira.

Honela igoko dira 2026., 2027. eta 2028. urteetarako ordainsariak:

–2026: 2025ko KPIa + 0,50. Ordainketa bakarra, 200 eurokoa, ez-finkagarria.

–2027: 2026ko KPIa + 0,25.

–2028: 2027ko KPIa + 0,50.

Ordainketa egiten den unean jardunean den langileko egiten dira zenbateko ez-finkagarriak.

%2ko igoera-zoru bat ezartzen da, indarraldiko urte guztietan, baldin KPIa eta urte bakoitzeko diferentzialak ez badira ehuneko horretara iristen.

Oinarrizko soldatak 140ko produkzio-prima jasoko du, salbu kasu horietan non hitzarmen honek berariaz ezartzen duen gutxieneko prima jasoko dela; halakoetan, erreferentziazko oinarrizko soldataren zenbatekoa kalkulatzeko, kontuan hartuko da 100eko primari dagokion zenbatekoa, hitzarmen honetan adostutako zenbatekoen arabera eguneratua.

Hitzarmen hau sinatzean plantillan dauden egungo langileen gutxieneko soldata izanen da 3. mailako ofizial batentzat ezarritakoa (140eko errendimenduan). Nolanahi ere, horrek ez du ekarriko egungo balorazio mailetako lanbide kategoriak kentzea edo soldata mugimenduak egitea.

–Gaueko lanaren plusa:

Zuzendaritzak onartu du honako kopuru hau ordaintzea gaueko ordu bakoitzeko: 3,625 euro orduko.

9. artikulua. Soldatak ordaintzea.

Hilean ordainketa bakarra egitea adostu da. Hilabeteko azken egunean eginen da, edo aurrekoan, hura jaieguna baldin bada.

Abenduko aparteko paga abenduaren 20an ordainduko da, kategoria guztientzat.

10. artikulua. Mozkinen paga.

Aurreko urteko ekitaldi ekonomikoari dagozkion mozkinen paga urteko apirilaren 1a baino lehen likidatuko da. Sari hori izanen da kasuan kasuko ekitaldiko 31 soldata-eguni eta antzinatasunari dagokiena adinakoa. Paga hau jasoko da kasuan kasuko urtean lanean emandako denboraren arabera, barnean dela gaixotasunaren edo istripuaren ondoriozko bajan emandako denbora.

Baldin etorkizunean langileentzat ezarriko balitz, nahitaez, mozkinen haborokina jasotzeko sistemaren bat, oinarritzen dena enpresaren egiazko etekinetan parte hatzean, ez litzateke halakotzat hartuko, ondorio horretarako bakar-bakarrik, TRW Automotive España SLn ezarri zen mozkinen paga.

11. artikulua. Uztaileko, iraileko eta Eguberrietako aparteko haoborokinen gaineko arau komunak.

Aparteko haborokin horiek ordainduko dira kasuan kasuko urtean lan egindako denboraren arabera.

12. artikulua. Konputua, guztira.

Kalkulatzeko zein izanen diren Langileen Estatutuaren Testu Bateginaren 31. artikuluan edo bete beharreko beste arau edo hitzarmen batean ezartzen diren aparteko haborokinen eta mozkinen pagaren zenbatekoa, ulertuko da urtean sortutako aparteko lau haborokinak konputatu eta horiekin konpentsatu behar direla.

13. artikulua. Antzinatasuna.

Osagarri hau bosturtekoen arabera ezarri da.

2027. urtetik aitzina beste bosturteko bat aitortuko da, ordainsarien ondorioetarako, 2016an adostutako mugaren gainean.

Bosturteko bakoitzeko, langile guztiek baimen-egun bat hartzen ahalko dute; urtean 3, gehienez ere. Baldin 2027rako gobernuak ez badu erabaki urteko lanaldia 8 ordu edo gehiago murriztea, aurreko muga handitu eginen da 4 eguneraino; bestela, urteko 3 egun izanen da muga. Zortzi ordu arte, ulertuko da 8 ordukoa dela murrizketa.

Bosturtekoei dagozkien baimen-egunak hartzeko, ezartzen dira hautapen libreko egunetarako adierazitako baldintza berberak.

Zuzendaritzak onartzen du antzinatasunaren ondorioetarako zenbatzea TRWn kontratu bidez lan egindako denbora guztia, bazter utzita beken, ABLEen (aldi baterako laneko enpresa) eta azpikontraten bidez lan egindako denbora; betiere, ukitutakoek irizpide-aldaketa borondatez onartzen badute.

14. artikulua. Oporretako ordainsaria.

Oporrak ordaintzen direnean, gehituko zaie soldataren kontzeptu aldakorren batezbestekoa, baldin langileak jaso ohi baditu, salbu berariaz aurreikusi bada 12 hilabeteko sortzapena.

Ulertuko da ohikoa dela ordainketa hori jasotzea baldin gutxienez ere lan egin bada sei hilabetez, oporrak ordaindu aurre-aurreko hamaika hilabeteetatik. Gozatu daitezke, edo likidatu.

Kalkulatzeko zer batezbesteko pagatu behar den oporretako egun natural bakoitzeko (oporraldi beraren barnean), hartuko dira guztirako zenbateko gordinak, ordaindu direnak aipatutako hamaika hilabeteetan, ohikoak diren kontzeptuetan, eta gero emaitza zati 330 egun eginen da, edo, bestela, zati aurre-aurreko 11 hilabeteei dagokien egun naturalen batura (segun nomina hilabeteka edo egunka den).

15. artikulua. Lotura plusa.

Enpresak langileren bati deitu behar baldin badio igande edo jaiegunen batean, berehalako ezbeharrak prebenitzeko, edo istripuak, matxurak edo kalteak konpontzeko, langile horri "lotura plus" bat ordainduko zaio, 28,29 eurokoa.

16. artikulua. Gaueko deien osagarria.

22:00etatik 6:00ak bitarte egiten diren irteera eta dei berezi bakoitzeko, 14,23 euroko osagarria ezartzen da kategoria guztietako enplegatuentzat.

Beharginentzat plus hori 11,26 eurokoa izanen da kategoria guztietan.

Osagarri hau bateragarria da aparteko orduen diru-zenbatekoarekin.

17. artikulua. Lan falta edo lana gutxitzea.

Langileari leporatu ezin zaion arrazoi bat dela kausa, enpresan lan falta edo gutxitze bat baldin badago, langileek egiazko soldataren %100 kobratuko dute, eta produkzio-primaren %100, are lantegi osoa nahitaez geldiarazi behar baldin bada ere, Legean adierazitako ezinbesteko kasuetan izan ezik.

18. artikulua. Primen sistema.

Artikulu hau indargabeturik gelditu da. Soldata-tauletan, mantentzen dira 100eko errendimenduari dagozkion zenbatekoak, kalkulatzearren aldi baterako ezintasuneko osagarria; hain zuzen ere, hitzarmen honen 20. eta 21. artikuluetan jasotzen den osagarria.

Produkzio-eragiketen prima:

–Prima: 0,25 euro/deskontua: 0,14 euro.

19. artikulua. Mantentze-lanetako zerbitzuko langileak.

Zerbitzu horren ezaugarri bereziak ikusita, bertako langileek araubide izanen dituzte 1987ko ekainaren 19an sinatutako akordioak. Hona hemen akordio horrek dioena:

"Ikusita mantentze-lanetako zerbitzuko langileek egiten duten lanaren ezaugarri bereziak, beharrezkoa da jarduera hori arautzea, enpresaren zerbitzu-beharrak betetzeko.

Hori ikusita, Enpresa Batzordeak, atal horretako langileek eta enpresako zuzendaritzak honako akordio hauek hartu dituzte:

1) Osagarri bat ezartzen da, irteerengatik edo dei bereziengatik, erantzuteko 22:00etatik 6:00ak arte gertatzen diren ustekabeko matxura larriei. 35,84 euro gordinekoa izanen da, eta jasoko dute atal honetako lanbide kategoria guztietako langileek.

a) Kontzeptu horren barrenean lan egindako ordu bakoitzeko ordu bateko atsedenaldia emanen da, gehi 12,55 euro gordin lan ordu bakoitzeko. Atseden-ordu horiek pilatzen ahalko dira gero batera hartzeko, arduradunarekin adostu bezala.

b) Kontzeptu honen kontura hartu beharreko gutxieneko denbora bi ordukoa izanen da, aurreko paragrafoan ezarritako baldintzetan, nahiz eta egindako lanean bi ordu baino gutxiago eman.

2) Ustekabekoa eta oso presakoa den makinen matxura larri bat dela kausa, langileak bere lanaldia luzatu behar baldin badu, bi ordu gehienez, ordu horiek pilatzen ahalko dira, gero batera hartzeko, arduradunarekin adostu bezala. Lan egindako ordu bakoitzeko ordu bateko atsedenaldia emanen da, gehi 12,55 euro gordin ordu bakoitzeko.

3) 89,68 euro gordineko plusa ezarri da lan egun bakoitzeko, gehi atseden-egun bat, larunbatetan, igandeetan eta jaiegunetan lan egitea beharrezkoa den kasuetarako. Osagarri hori ezartzeko erabili da lan baldintzak aldatzeko Nafarroako Gobernuko Lan Departamentuak emandako baimena, betiere epaimahai eskudunek besterik erabakitzen ez duten bitartean.

Atseden-eguna urte natural horrexetan hartu beharko da, arduradunarekin adostu bezala.

4) 118,54 euro gordineko plusa ezartzen da, gehi atseden-egun bat, larunbatetan, igandeetan eta jaiegunetan lan egiten den egun bakoitzeko, baldin egun hori ez bada ohiko lan eguna, aurreko atalean ezarritakoaren arabera.

Atseden-eguna urte natural horrexetan hartu beharko da, arduradunarekin adostu bezala.

5) Mantentze-lanetako zerbitzuko langileek aitortzen dute beharrezkoa dela atal horretako langile batzuek opor-egunak hartzea gainerako langile guztientzat ezarritako egutegitik aparte, eta konpromisoa hartzen dute dagozkien eginkizunak betetzeko aldi horretan.

Oporraldi horretako lanak betetzeko, ondoko hauek hartu beharko dira kontuan:

a) Aldi horretako langile-beharrak bi hilabete lehenagotik jakinaraziko dira, eta langile boluntarioekin beteko dira, baldin behar guztiak betetzeko adina langile badaude. Bestela, langile egokiak hautatuko dira eta derrigorrez agertu beharko dute.

b) Atalaren antolaketa-egiturak horretarako aukera ematen duenean, ezarriko da ataleko langileentzako txandakako sistema bat, beti ez ditzaten langile berberek pairatu produkzioaren beharren ondorioak.

c) Oporraldi horretan lanera nahitaez joan behar duten langileek egun bat eta erdiko atsedenaldia izanen dute lan egindako egun bakoitzeko, edo atseden-egun bat gehi 102,79 euro gordin.

Atseden-egunak ekainean, abuztuan edo irailean hartu behar dira, nork bere arduradunarekin adostuta, non eta ez dagoen beste egun batzuetan hartzeko banakako akordiorik.

Nolanahi ere, konpentsazio-egunak hartzeari dagokionez, irizpide nagusia izanen da arduradunarekin adostea, zerbitzu beharren arabera hartzeko.

6) Atalaren lan-aurreikuspenei dagokienez, urteko lan-egutegia prestatuko da.

7) Enpresa arduratuko da zerbitzu honetako langileen laneko arropak garbitzeaz, ataleko arduradunak ikuskatu ondoren.

8) Soldataren zatitzat edo soldataren kontzeptutzat hartuko dira akordio honetan ezartzen diren diru-kopuru, plus edo osagarri guztiak. Hortaz, aplikatuko zaizkie hitzarmen kolektiboen negoziazioen ondorioz TRW Automotive España SLn urtean-urtean aplikatzen diren igoerak.

9) Akordio honetan ezartzen diren diru-kopuru, plus edo osagarri guztiak aplikatuko dira langilea Mantentze-lanetako Zerbitzuan ari den bitartean. Beraz, lantegiko beste atal bateko beste lanpostu batera lekualdatzen badute, ez du horrelakorik kobratzeko eskubiderik izanen.

10) Baldin akordio hau sinatu ondoren beste xedapen bat onartzen bada, maila desberdinekoa, hemen adostua aldatzen duena, aplikatuko da langileentzat onuragarriena dena.

11) Klausula hauek guztiek akordio bakar bat osatzen dute eta, beraz, ezinezkoa da batzuk onartzea eta beste batzuk ez; izan ere, batzuek besteak konpentsatzen dituzte."

–Prestasun plusa:

Kontuan hartzen da Mantentze-lanetako Zerbitzuko langileek egiten duten lanaren ezaugarri berariazkoak (mekanika eta elektrizitate-elektronika arloetako lanak), berekin baitakarte prestasuna ohiko lan ordutegitik kanpo, jaiegunetan eta oporretan lan egiteko, besteak beste honako lan hauetan aritzeko: matxurak, makinen aldaketak, prebentzio lanak, istripuak, gorabeherak etab. Beraz, erabaki da prestasun plus bat ezartzea, 1.593,16 euro gordinekoa urtean. 12 hilabetetan ordainduko da, bakoitzean 132,76 euro gordin. Plus hori ez da zenbatuko kalkulatu behar direnean aparteko pagak, oporrak edo beste kontzeptu batzuk.

Plus hori ordaintzeko, eta horren aldera eskatzen den prestasuna egoki bideratzeko, bi alderdien fede ona behar da. Hortaz, ahal den neurrian, lana banatu egin behar da, halako moduz non langileen prestasun behar hori ez den handitzen arrazoi justifikaturik gabe.

Plusak balioa izanen du hitzarmenak indarra duen bitartean, eta funtzionamenduarekin ados ez egonez gero, alderdietatik edozeinek uzten ahalko du indarrik gabe, osotara edo banaka.

Era berean, plusari aplikatuko zaizkio hitzarmen kolektiboen negoziazioen ondorioz TRW Automotive España SLn urtean-urtean aplikatzen diren igoerak.

Erabaki honek 1991ko uztailaren 1etik aurrera izanen du eragina, 1991ko uztailaren 22ko erabakiaren arabera.

IV. KAPITULUA.–GIZARTE SEGURANTZAKO ARAUBIDE OROKORRAREN BABESA BORONDATEZ HOBETZEA

20. artikulua. Enpresaren ekarpen osagarriak, laneko istripu edo eritasun kasuetan.

Beharginen eta enplegatuen kasuan, enpresak bajaren lehenbiziko egunetik beretik osatuko ditu Lan Istripuetarako Ugazaben Mutualitateak ematen dituen prestazioak, lansari osoaren %100 egin arte, produkzio-prima izan ezik. Hura 100 mailan ordainduko da, geroago zehaztuko denarekin bat. Diru-ekarpen hori 18 hilabetez eginen da gehienez.

Lantegia: produkzio-primaren gutxieneko maila –100– ordainduko da kontingentzia profesionalagatik aldi baterako ezintasun kasuetan, bajaren lehen egunetik eta horrek iraun bitarte, eta horrek norberaren batezbestekoari eraginen dio, baina ez lantegiarenari.

Produkzio-primarik ez duten lantegiko bi kategoriei aplikatuko zaie enplegatutako langileei aplikatzen zaien arau bera. Kanpoan gelditzen dira gaixotasun onkologikoak.

Bulegoko langileak: zenbateko bat deskontatuko zaie; deskontu hori kalkulatzeko, erreferentziatzat hartuko da lantegiko kategorian produkzio-prima duen soldata antzekoena, eta deskontua izanen da hartan duen eragina adinakoa. Kanpoan gelditzen dira gaixotasun onkologikoak.

21. artikulua. Enpresaren diru-ekarpen osagarriak, gaixotasun arrunta edo lanetik kanpoko istripua dagoenean.

Lanetik kanpoko gaixotasuna edo istripua, baja-agiria aurkeztuta (lantegiko eta bulegoetako langileak) (araubide hau aplikatzekoa da 2025eko ekitaldian, eta 2026. urtetik 2028. urtera bitartean, baldintzapean):

–2025eko ekitaldian eta 2025eko urtarrilaren 1etik 2025eko abenduaren 31ra bitarte hasitako prozesuetan, bajak osatu eginen dira, soldataren %100 arte. Osagarri hau kalkulatzeko, jarraituko zaio artikulu honi, zehazki, 1. eta 2. epigrafeei.

–Alderdi sinatzaileek helburu hau adosten dute: 2025erako, absentismoa %10 murriztea, 2024aren aldean. Zehazki, ehuneko hori aplikatuko litzateke gaixotasunek eta istripuek ekarritako eguneko bajen batezbestekoaren gainean (bai gaixotasun arruntak, bai profesionalak), 36 lagunekoa izanik, eta helburua da 2025ean egunean, batezbeste, 32 lagun egotea bajan aipatutako arrazoiengatik.

–Goian jasotako osagarriari eutsiko zaio 2026an ere, baldin aurreko puntuan azaldutako helburua betetzen bada. Hitzarmenaren indarraldiaren gainerako urteetan, osagarriari eutsiko zaio, baldin absentismoaren murrizketaren baldintza betetzen bada azken ekitaldi itxian, aurreko ekitaldiaren aldean.

–Baldin aurreko puntuko baldintza betetzen ez bada, berriz ere aplikatuko da 2025eko urtarrilaren 1aren aurreko araubidea.

–Zuzendaritzak abian jar ditzake zenbait neurri, helburu dutenak medikoki sendatzea bajan dauden edo baja har dezaketen langileak.

Lanetik kanpoko gaixotasuna edo istripua, baja-agiria aurkeztuta (lantegiko eta bulegoetako langileak) (2025eko urtarrilaren 1aren aurreko araubidea):

–Aldeek lortu beharreko helburu gisa jo dute %4,5eko absentismo-tasa plantan.

–Norberaren kontingentzia arruntagatik urtean hartzen den lehen baja %100 ordainduko da.

–Bigarren eta ondorengo bajei osagarri-murrizketa bat aplikatuko zaie, norberak hilero duen absentismoaren araberakoa, lehen baja barne hartuta:

• Norberaren hileko absentismoa %4,5 eta %6 bitartekoa baldin bada: ordainsariaren %90.
• Norberaren hileko absentismoa %6tik gorakoa bada: ordainsariaren %80.

Salbuespenezko kasuak: minbizia, iktusa, kardiopatia iskemikoa, 48 ordutik gorako ospitaleratzea eskatzen duten ebakuntza kirurgikoak eta haurdunaldiari lotutako prozesuak.

1) Beharginen kasuan, enpresak osatuko ditu Gizarte Segurantzak aldi baterako ezintasunagatik ematen dituen prestazio ekonomikoak, gehienez ere bi urte eta erdiz, artikulu honetan ezarritakoaren arabera. Produkzio-prima 100 mailara iritsita ordainduko da, aurrerago ezartzen denarekin bat.

Lantegia: produkzio-primaren gutxieneko maila –100– ordainduko da kontingentzia arruntagatik aldi baterako ezintasunaren kasuetan, bajaren lehen egunetik eta horrek iraun bitarte. Norberaren batezbestekoari eraginen dio horrek, baina ez lantegiarenari.

Produkzio-primarik ez duten lantegiko bi kategoriei aplikatuko zaie enplegatutako langileei aplikatzen zaien arau bera. Kanpoan gelditzen dira gaixotasun onkologikoak.

Hitzarmen honetan ezarri den osagarria jasotzeko eskubidea izateko, eritasuna frogatu beharko da, medikuaren baja-agiri ofizialaren bitartez.

2) Enplegatuek lana uzten badute ongiezagatik, edo Gizarte Segurantzako mediku espezialistengana joateko, enpresak ordainsaria osorik ordainduko die.

Bulegoko langileei, aldi baterako ezindurik egonez gero, zenbateko bat deskontatuko zaie; deskontu hori kalkulatzeko, erreferentziatzat hartuko da lantegiko kategorian produkzio-prima duen soldata antzekoena, eta deskontua izanen da hartan duen eragina adinakoa. Kanpoan gelditzen dira gaixotasun onkologikoak.

Behin-behineko baliaezintasunaren kasuetan, prestazio ofizialen gaineko ekarpen osagarria izanen da enplegatuak aldi baterako baja hartu zuenean jasotzen zuen lansari likidoaren %100 egin artekoa. Diru-ekarpen hori bi urte eta erdiz aplikatuko da, baliaezintasuna aitortzen den egunetik hasita.

22. artikulua. Diru-ekarpen osagarria, dagokion ezintasunerako proposamenak iraun bitartean.

Enplegaturen bat "aldi baterako ezintasun" egoeratik zuzenean igarotzen denean "dagokion ezintasun iraunkorrerako proposamena" izatera, hots, "behin-behineko baliaezintasuna" izeneko egoera agortu gabe, enpresak langilearen hileko soldata garbiaren %100era iritsi arte osatuko ditu Gizarte Segurantzaren prestazio ofizialak, gehienez ere sei hilabetez.

23. artikulua. Aseguru kolektiboa.

Langileek eskubidea dute enpresak aseguru-etxe batekin sinatua duen taldekako bizi aseguruaz baliatzeko.

Horrez gain, enpresak sinatua du istripuetarako (lanekoak) aseguru bat, honako arrisku hauek estaltzeko:

–Istripuak eragindako heriotzaren kasuan: 27.000 euro.

–Istripuaren ondoriozko erabateko ezintasunagatik: 35.000 euro.

Estaldura horiek balioko dute hitzarmen kolektibo hau indarrean sartu ondoko istripuetarako.

Bizi-poliza 2000 euro handituko da, hitzarmen honen indarraldiko urte bakoitzeko.

V. KAPITULUA.–MALGUTASUNA

24. artikulua. Atsedenaldiak.

Txanda bakoitzeko atsedenaldia 50 minutukoa izanen da.

Plantako produkzio Zuzendaritzak txandak ezar ditzake atsedenaldietarako, jardunean eta martxan egon daitezen lerroak eta makinak, txandako 8 orduetan, betiere atseden minutuetarako tarte batzuen barnean.

25. artikulua. Malgutasuna.

Artikulu hau aplikatuko zaie beharginei eta teknikari eta administrariei.

26.1. Prestasun plusa - Malgutasun konpromisoa duten langileak.

102,79 euro gordinen sortzapena, guztira, lan malgua egiten den egun bakoitzeko, baldin eta langileak aldez aurretik konpromisoa hartzen badu langile "malgu" bihurtzeko gutxienez 2 hilabetean, nahitaezko egutegi malguarekin. Egutegi horretan, lehen aipatutako 2 hilabeteko epean gehienez 5 asteburutan lan eginen du, salbu langileak borondatez horri uko egiten badio.

Konpromisoa hartzen duen langileari emanen zaio egutegi hori, egutegi berria indarrean jarri baino 15 egun lehenago.

26.2. Nahitaezko malgutasuna.

Lanorduen nahitaezko poltsa bat sortuko da, urteko 40 ordukoa, positiboa edo negatiboa, asteburuetako eta jaiegunetako lanetarako, eta astebete lehenago eman beharko da horietarako abisua.

Malgutasunez lan egindako benetako egun bakoitzeko 85,67 euro gordin sortuko da.

Aipatutako plus horiek soilik sortuko dira 8 orduko lanaldi osoetan benetan lan egiteagatik. Aipatutako 8 orduak osorik egiten ez badira, plus horiek murriztu eginen dira, araberan.

Nahitaezko malgutasunerako poltsa erabiltzea jasota dago Hitzarmen Kolektiboaren Batzorde Paritarioaren 2025eko otsailaren 11ko aktan.

27. artikulua. Langile "malgu" finko berriak.

27.1. 2 egunetarako langile "malgu" finko berrien malgutasun plusa.

2 eguneko kontratua duten langile finko berriek 52,20 euroko jasoko dituzte igandean lan egiten duten bakoitzeko edo Nafarroako Aldizkari Ofizialean ezarritako jaiegun batean lan egiten duten bakoitzeko, hileko lanaldia edozein dela ere.

Malgutasun plus hori sortuko da benetan lan egindako lehen egunetik aitzina.

27.2. Langile "malgu" finko berrien malgutasuna.

Laugarren txanda egiten duten langileek bi asteburu libre izanen dituzte hilabetero.

VI. KAPITULUA.–APARTEKO ORDUAK

28. artikulua. Aparteko orduak.

Aparteko orduak ekiditeko asmoz, enpresako zuzendaritzak konpromisoa hartzen du aldi baterako langileak kontratatzeko, beharrezkoa den kasuetan, uko egin gabe legeek baimendutako aparteko orduak ere baliatzeari. Egiturazko aparteko orduak arautu eta horien jarraipena egiteko, men eginen zaio Zuzendaritzak eta Enpresa Batzordeak 1989ko maiatzean lortutako akordioari.

Bi alderdiek garbi azaltzen dute behar-beharrezkoa dela bezeroei azkar eta egoki erantzutea, enpresa eta enplegua sendotuko badira. Kontuan harturik egoera hori eta lehenbailehen erantzun beharreko beste egoera batzuk, beharrezkoa da batzuetan aparteko orduak erabiltzea.

Bi alderdiek borondatea azaltzen dute aparteko orduen kopurua gutxitzeko.

VII. KAPITULUA.–MAILAZ IGOTZEA, LANGILEEN SAILKAPENA ETA PRESTAKUNTZA

29. artikulua. Mailaz igotzeko araubidea.

Lantegietan eta bulegoetan hutsik dauden postuei dagokienez, Zuzendaritzak lehiaketa publiko baterako deia eginen du, Iruñeko fabrikako ZF fabrikako langileentzat. Salbuespen bakarra izanen dira bigarren eta hirugarren mailetako zuzendaritzako langileak, ZF estandarraren arabera. Hutsik gelditzen badira, Zuzendaritzak kanpoko baliabideen bidez egin dezake hautaketa.

Zuzendaritzak publiko eginen du lehiaketaren deialdia, beharra agertu eta gehienez 30 egun naturaleko epean.

–Deialdian, honako hauek adieraziko dira gutxienez:

1) Lanpostuaren deskribapena, adierazita zein den bete beharreko postuaren kategoria.

2) Lanpostu kopurua.

3) Aurkezteko bete beharreko baldintzak.

4) Lanposturako beste baldintza batzuk.

5) Proben deskribapena. Bertan agertuko dira proba teorikorako gaiak eta ariketa praktikoaren deskribapena.

6) Proben datak.

7) Gehienez, mailaz igo daitezkeen pertsona kopurua lanpostu kopuruaren adina izanen da.

–Hautapen-prozesuak 4 zati izanen ditu, ordena honetan:

a) Azterketa teorikoa. Bertan, bete beharreko lanpostuaren arabera, proba psikoteknikoak izan daitezke, ebalua daitezen langilearen profila, trebetasunak eta adimen-gaitasunak.

b) Fabrikako ariketa praktikoa.

c) Elkarrizketa.

d) Probaldia.

–Baztertzailea.

Lehiaketako emaitzak argitaratu eginen dira.

Lehiaketa irabazten duen langilea postu berrira sartuko da, eta 4 hilabeteko probaldia izanen da.

Probaldian, langileak postu berriko ordainsaria jasoko du.

Lanpostuak prestakuntza gehigarririk behar balu, Zuzendaritzak emanen du prestakuntza hori, Prestakuntza Planaren arabera.

Irekitako prozesu bakoitzean, agertuko da zer arloren ardura den probak egitea.

Probaldia arrakastaz gaindituz gero, postu berriko baldintzak finkatu eginen dira.

Enpresa Batzordeko lehendakariak eta idazkariak jasoko dute irekitako prozesuen bilakaerari buruzko informazioa.

30. artikulua. Langileen sailkapena.

Hitzarmen honek indarra izan bitartean, lanpostuen egungo sailkapenak indarrean jarraituko du.

5., 6. eta 7. mailetan dauden langileek 2. mailako ofizialaren lanbide kategoria izanen dute, edo horren baliokidea.

8. eta 9. mailetan dauden langileek 1. mailako ofizialaren lanbide kategoria izanen dute, edo horren baliokidea.

10. eta 11. mailetan dauden langileek 3. mailako buruen lanbide kategoria izanen dute.

12. eta 13. mailetan daudenek 2. mailako buruen lanbide kategoria izanen dute, edo horren baliokidea.

14. mailan daudenek 1. mailako buruen lanbide kategoria izanen dute, edo horren baliokidea.

Mailak ezarriko dira jarraikiz Baloraziorako Esku-liburuan adierazitakoari, soil-soilik, beste inolako prozedurarik erabili gabe.

Gizarte Segurantzako kotizazioaren ondorioetarako, 10. eta 11. mailak parekatuko dira delineatzaile proiektugilearen lanbide kategoriarekin.

31. artikulua. Ikasketarako bekak, ingeniaritza graduko titulua arte.

Enpresak ikasketa bekak emanen dizkie enpresako langile guztiei, ingeniaritza graduko titulua lor dezaten.

Beka 2.072,89 eurokoa izanen da urtean. Hiru zatitan ordainduko da, hiruhileko akademiko bakoitzaren hasieran.

Beka ikasketak bukatu arte luzatuko da, betiere ikasleak ikasmaila bakoitza oso-osorik gainditzen badu.

Bekadunak bekaren aprobetxamendua frogatu beharko du, eskola liburua edo beste frogagiri bat erakutsiz, eta, halaber, jokabide egokia izan duela, ikastetxeko idazkaritzaren ziurtagiriaren bidez.

–Honelako kasuetan, bekaren onurak berehalakoan etenen dira:

1) Aprobetxamenduaren frogagiriak faltsutzea.

2) Ikasturtea oso-osorik ez gainditzea.

3) Ikastetxeak edo eskolak zehapena jartzea.

–Horrelakoetan, bekaduna enpresako plantillatik aterako da, baina eskubide hauek gordeko ditu:

a) Udako hilabeteetan TRW Automotive España SLUn lan egiteko eskubidea.

b) Ikasketak uzten baditu bekadunari leporatu ezin zaizkion arrazoiengatik, berehala lanean onartzeko eskubidea.

VIII. KAPITULUA.–INSTITUZIO SOZIALAK

32. artikulua. Laguntza, %33ko edo gehiagoko desgaitasuna duten seme-alabengatik.

Enpresak 250 euro gordineko laguntza emanen dio hilero langileari, %33ko edo gehiagoko desgaitasuna ofizialki aitortua duen seme edo alaba bakoitzeko.

33. artikulua. Seme-alaben jaiotzagatiko diru-ekarpena.

Seme edo alaba bakoitza izateagatik 22,18 euroko dirulaguntza ezartzen da.

34. artikulua. Interesik gabeko mailegua.

Enpresak diru puska bat gordeko du langileei maileguak emateko, interesik gabe; hain zuzen ere, zentsuan dagoen langile kopurua bider 4,11 euro egitetik ateratzen dena.

Mailegua gehienez 194,73 eurokoa izanen da, eta itzuli beharko da, beranduenez, mailegua eman eta ondoko hamabi hilabeteetan.

35. artikulua. Etxebizitza erosteko kreditua.

Enpresak 40 banku-abal eginen ditu gehienez, bakoitza 411,09 euro artekoa, langileek etxebizitza eros dezaten.

36. artikulua. Izatezko bikoteak-bikote egonkorrak.

Bi alderdiek adostu dute ondorio guztietarako parekatzea bikote ezkonduak eta izatezko bikoteak.

IX. KAPITULUA.–BERME SINDIKALAK

37. artikulua. Berme sindikalak.

Enpresa Batzordeko kideek eta delegatu sindikalek lan sindikaletarako erabiltzen dituzten orduak hilabetero konputatuko dira, sindikatu bakoitzeko kide eta ordezkari guztiek hartutakoak batuta.

X. KAPITULUA.–LANERAKO EKIPAMENDUAK

38. artikulua. Laneko jantziak.

–Lantegiko langileak.

Enpresak bi galtza eta bi kamiseta emanen dizkie lantegiko langileei. Egoera berezietan (Zuzendaritzak erabakiko du zein diren) emanen dira kamiseta eta galtza gehiago.

Enpresak honako jantzi hauek emanen dizkie langileei:

–Lantegiko buruak.

• 2 galtza.
• 2 polo korporatibo.

–Lantegiko langileekin edo kanpokoekin harremanetan dauden teknikariak.

• Bata zuria edo urdina, departamentuaren arabera, horren beharra baldin badute.

–Biltegiko administrariak.

• 2 bata urdin.

–Laborategia.

• Bata antiazidoak, horien beharra dutenean.

–Osasun zerbitzua.

• Bata zuria, horren beharra dutenean.

Betiere, jantzi berriak erabilien truke emanen dira.

XI. KAPITULUA.–LAN OSASUNA ETA MUTUALITATEAK

39. artikulua. Lan Osasuna.

Erabaki da ezintasun iraunkor osoa aintzatetsia dutenei eskaintzea lan egitea, Gizarte Segurantzaren sistema publikoko pentsioa osatzeko beharrezkoak diren orduetan. Horiei soldata gordinaren %100 bermatuko zaie, eta haien lanaldia proportzioan murriztuko da.

Erabaki da hilean behin egitea Segurtasun eta Osasuneko Batzordearen bilerak.

Erabaki da osasun arazoak dituzten langile guztiak birkokatzea haien gaitasunen araberako lanpostuetan, Osasun Zerbitzuaren irizpidearekin bat.

Erabaki da prebentzioko ordezkariei birkokatzeen berri ematea, betiere birkokatzeak egin aurretik.

Langilea ez badago ados birkokatzearekin, batzorde bat eratzea adostu da, eta batzorde horren funtzionamendua izanen da jarraian adierazten diren arauen araberakoa:

Birkokatze batzordearen funtzionamendurako arauak:

1.–Parekidea izan beharko du (Osasun Zerbitzua eta prebentzioko ordezkariak).

2.–Batzordearen bilera Osasun Zerbitzuari eskatu beharko zaio, idatziz.

3.–Behin errekurtsoa jakinarazita, 3 eguneko epea izanen da batzordearen bilera egiteko.

4.–Azken irizpideak medikoa izan beharko du. Desadostasunik bada edozein alderen partetik, kontsulta eginen zaio Nafarroako Lan Osasunaren Institutuko Lan Osasuneko Osasun Zerbitzuari, eta hark erabakitzen duenari eginen zaio men.

5.–Prebentzioko ordezkariak isiltasun profesionala gorde beharko dute prozesu osoan zehar, eta lege-neurriak hartzen ahalko dira hori bete ezean.

6.–Erabaki da birkokatze eskaera egin eta hura gauzatu bitarteko epea gehienez 2 aste izatea, eta ezin izanen da epe hori gainditu ezein inguruabar dela medio.

40. artikulua. Mutualitateak.

Adostu da Zuzendaritzak eta Prebentzioko Ordezkariek erabaki dezatela zer mutualitate aukeratu.

41. artikulua. Norbera babesteko ekipamenduak.

Segurtasun-betaurrekoak nahitaez erabili behar dira une oro lantegian.

Segurtasun-betaurreko progresiboetarako 100 euro bitarteko laguntza emanen da, foku biko eta progresiboen prezioen arteko diferentziarako. Eskaera bat egiten ahalko da gehienez ere Hitzarmenaren indarraldian.

XII. KAPITULUA.–IKASKETA

42. artikulua. Ikasketa.

Beharraren arabera, abiapuntua izanen da 2003ko ekainaren 16ko Ikasketa Akordiotik.

XIII. KAPITULUA.–ESZEDENTZIAK

43. artikulua. Eszedentziak.

Hitzarmenaren aplikazio-eremuaren barnean dauden kontratu mugagabeko langileek eszedentziak eskatzen ahalko dituzte, gutxienez urtebetekoak eta gehienez 3 urtekoak. Eszedentzia bukatzean langileak berriz onartuko dira lanpostuan, lehen zituzten baldintza berberekin.

Eskatu da eta onartu da eszedentziaren araubidea hitzarmen honetan ageri bezala aplikatzea teknikari eta administrari guztiei ere, alde batera utzita zuzendariak, managerrak eta goi mailako buruak.

XIV. KAPITULUA.–BERDINTASUN PLANA

44. artikulua. Berdintasun plana.

Plana 31104002112024 zenbakiarekin dago erregistraturik, eta hori da enpresan indarrean dena.

BESTE XEDAPEN BATZUK

45. artikulua. Arau osagarriak.

Enpresaren Hitzarmen Kolektibo honetan arautua ez dagoen orotan, aplikatuko da Nafarroako Foru Komunitateko Industria Siderometalurgikorako indarra duen Hitzarmen Kolektiboa, eta horretan arautua ez dagoen kasuetan, Langileen Estatutua eta lan arloan aplikatzekoak diren gainerako arau orokorrak.

46. artikulua. Batzorde misto parekidea.

Ukatu gabe Lan arloko Agintaritzari aitortzen zaizkion ahalmenak, Batzorde Misto parekide bat eratu da Hitzarmena interpretatzeko, honela osatua: hitzarmena sinatzen dutenen arteko sindikatuen 3 ordezkari eta enpresaren 3 ordezkari.

Aldeek Metalaren Hitzarmenera joko dute, espresuki Batzorde parekideari dagokionez arautu gabe dagoen guztirako.

Batzordeak ahalmena du hitzarmen honen interpretazio-arazoak ebazteko, eta horretaz gain, konponbide kolektiboak emateko, baldin, hitzarmen honen indarraldian, gorabeherak gertatzen badira, arrazoi objektiboengatik, ekoizpenean, horniduran, edo gertatzen badira ezinbesteko kasuak edo bestelakoak.

47. artikulua. Lan-egutegia (1994-04-15etik aurrera kontratatutako langileak).

1994ko apirilaren 15etik aurrera (egun hori barne) besteak beste asteburuetan eta jaiegunetan lan egiteko kontratatutako langileentzat, enpresak lan egutegi berariazko bat prestatuko du urtero. Hala, enpresako lan egutegi orokorrarekin eta 1994ko apirilaren 15etik aurrera kontratatutako langileen lan egutegi berariazko horrekin, emaitza izanen da enpresa urtean 360 egun egonen dela irekita eta ekoizten.

Asteburuetako eta jaiegunetako lanaldia eta ordutegia. (1994ko apirilaren 15etik aurrera kontratatutako langileak):

–Goizeko lanaldia, txandaka (6:00etatik 14:00etara).

–Arratsaldeko lanaldia, txandaka (14:00etatik 22:00etara).

–Gaueko lanaldia, txandaka (22:00etatik 6:00etara).

Larunbat, igande eta jaiegunetako lanaldia eta ordutegia osatu daitezke beste astegun batzuetako lanarekin, kontratuan ezarritako asteko lan ordu kopurua egin arte.

47. artikulua. Azken oharra.

Hitzarmen hau sinatu aurretik langileren batek edo langile-talderen batek baldin baditu hemengoak baino baldintza hobeak, lehengokoak errespetatuko zaizkio.

I. ERANSKINA

Kategoria: espezialista 241.

–Oinarrizko soldata: 27.715.18.

–Aparteko pagak:

• Martxoa: 2.131.47.
• Uztaila: 2.131.47.
• Iraila: 2.131.47.
• Abendua: 2.131.47.

Urteko finkoa guztira: 36.241.06.

Kategoria: 3. mailako ofiziala 231.

–Oinarrizko soldata: 27.927.51.

–Aparteko pagak:

• Martxoa: 2.144.96.
• Uztaila: 2.144.96.
• Iraila: 2.144.96.
• Abendua: 2.144.96.

Urteko finkoa guztira: 36.507.35.

Kategoria: 2. ofiziala 221.

–Oinarrizko soldata: 28.785.99.

–Aparteko pagak:

• Martxoa: 2.196.96.
• Uztaila: 2.196.96.
• Iraila: 2.196.96.
• Abendua: 2.196.96.

Urteko finkoa guztira: 37.573.83.

Kategoria: 1. mailako ofiziala 214.

–Oinarrizko soldata: 29.817.27.

–Aparteko pagak:

• Martxoa: 2.271.11.
• Uztaila: 2.271.11.
• Iraila: 2.271.11.
• Abendua: 2.271.11.

Urteko finkoa guztira: 38.901.71.

Kategoria: 1 C mailako ofiziala 213.

–Oinarrizko soldata: 30.693.89.

–Aparteko pagak:

• Martxoa: 2.324.08.
• Uztaila: 2.324.08.
• Iraila: 2.324.08.
• Abendua: 2.324.08.

Urteko finkoa guztira: 39.990.21.

Kategoria: 1 B mailako ofiziala 212.

–Oinarrizko soldata: 31.095.89.

–Aparteko pagak:

• Martxoa: 2.349.11.
• Uztaila: 2.349.11.
• Iraila: 2.349.11.
• Abendua: 2.349.11.

Urteko finkoa guztira: 40.492.33.

Kategoria: 1 A mailako ofiziala 211.

–Oinarrizko soldata: 27.988.63.

–Aparteko pagak:

• Martxoa: 2.370.62.
• Uztaila: 2.370.62.
• Iraila: 2.370.62.
• Abendua: 2.370.62.
• Aginte plusa 3.329,92.

Urteko finkoa guztira: 40.801.03.

Kategoria: gainbegiralea 210.

–Oinarrizko soldata: 30.925.83.

–Aparteko pagak.

• Martxoa: 2.619.40.
• Uztaila: 2.619.40.
• Iraila: 2.619.40.
• Abendua: 2.619.40.

–Aginte plusa: 1.387.93.

Urteko finkoa guztira: 42.791.36.

Antzinatasuna

Gaueko lanaren plusa: 3.625.

36. artikulua. Ezintasuna duten seme-alabak: 270.99.

17. artikulua. Lotura plusa: 28.29.

18. artikulua. Gaueko deien osagarria:

• 14,23 enplegatuak.
• 11,26 lantegiko langileak.

22. artikulua. Mantentze-lanetako langileak:

• 35,84 gaueko deia.
• 12,55 euro, jaieguna ez den ordu bakoitzeko.
• 14,82 euro, jaieguneko orduko.
• 118,54 jaieguneko plusa.
• 89,68 jaieguneko plusa, N.Gren baimenarekin.
• 102,79 oporretako plusa.

Prestasun plusa: 1593,16 euro urteko.

Plusa, t. termikoak: 112,27 euro/eguna.

Jaieguneko plusa:

• 56,58 euro/eguna.
• 42,43 euro/eguna.

Prestasun plusa:

• 102,79 euro/eguna.
• 85,67 euro eguneko ("malguak" ez diren langileak, "malgu" bihurtzeko konpromisorik gabe).

ENPLEGATUEN SOLDATAK 2025ERAKO

Iragarkiaren kodea: F2510486