1. NAFARROAKO FORU KOMUNITATEA
1.7. BESTELAKOAK
40/2025 EBAZPENA, abuztuaren 12koa, Enpresen Sustapenerako eta Azpiegituretako Zuzendaritza Nagusiak emana, zeinaren bidez ematen baitira aurretiazko administrazio-baimena eta eraikitzeko administrazio-baimena, honako honetarako: energia elektrikoa ekoizteko eguzki-instalazioa, Rada 3 izenekoa, 1 MW-ekoa, eta hari lotutako eraldaketa- eta ebakuazio-azpiegiturak, Murillo el Cuendeko udal-mugartean. Espedientearen kodea: 5174-CE.
1.–Eskatzea aurretiazko administrazio-baimena eta eraikitzeko administrazio-baimena.
Jarraikiz abenduaren 26ko 24/2013 Legeari (Sektore Elektrikoari buruzkoa), Energías Renovables Arnetum SLk eskatu zituen, 2023ko otsailaren 9an, aurretiazko administrazio-baimena eta eraikitzeko administrazio-baimena, honako honetarako: eguzki-instalazioa, Rada 3 izenekoa, 2 MW-ekoa, zoruan ezarria, eta hari lotutako eraldaketa- eta ebakuazio-azpiegiturak, Murillo el Cuendeko udal-mugartean.
2.–Informazio publikoaren eta kontsulten izapideak.
Eskaera jendaurrean jarri zen 30 egun balioduneko epean, iragarkia paratuta 2023eko 52. Nafarroako Aldizkari Ofizialean, martxoaren 14koan, eta dokumentazioa argitaratu zen Nafarroako Gobernu Irekiaren web-fitxan. Hori dena, aplikatuz abenduaren 1eko 1955/2000 Errege Dekretuaren 125. artikulua (errege dekretuak arautzen ditu energia elektrikoaren instalazioak baimentzeko prozedurak eta energia elektrikoaren garraio-, banaketa-, merkaturatze- eta horniketa- jarduerak). Halaber, informazioa Murillo El Cuendeko Udalari bidali zitzaion, epe horretan jendaurrean jar zezan.
2023ko apirilaren 27an, eta apirilaren 28an, hurrenez hurren, alegazio hauek jaso ziren: Landazuria - Erriberako Ekologistak Martxan elkartearena bat, eta Ongaiz - Zangozerriko Ekologistak Martxan elkartearena bestea. Biek ere eduki bera dute, I. eranskinean jaso bezala.
Aldi berean, aplikatuz abenduaren 1eko 1955/2000 Errege Dekretuaren 127. eta 131. artikuluei, kontsulta egin zitzaion Murillo el Cuendeko Udalari, eta haren txostena jaso zen, 2023ko martxoaren 8koa, eta hartan esaten da eguzki-instalazioa "bat datorrela" Udaleko hirigintza-plangintzarekin.
Aipatutako alegazioak eta txostenak sustatzaileari bidali zitzaizkion, jarraikiz abenduaren 1eko 1955/2000 Errege Dekretuaren 126., 127. eta 131. artikuluei.
3.–Lurzoru urbanizaezinean jarduerak eta erabilerak egiteko baimenik eza eta dokumentazio berria.
Lurralde eta Paisaia Zerbitzuko zuzendariak maiatzaren 21eko 206E/2023 Ebazpena eman zuen, eta, haren bidez, ez zen baimenik eman lurzoru urbanizaezinean jarduerak eta erabilerak egiteko proiekturako; izan ere, proposamen horrek eragin moderatua zuen ureztalurretan, eta haiekin bateraezina da; hala ezartzen zuen, 2023ko martxoaren 21eko txostenean, Ureztalurren eta Lurzati Berrantolamenduaren Atalak.
Aurrekoa ikusita, 2024ko apirilaren 17an, sustatzaileak proiektu berri bat aurkeztu zuen, Rada 3 eguzki-instalazioa gauzatzeko: 1 MW-ekoa izatera igaro da, eta jada ez ditu ureztalurrak ukitzen.
Aurkeztutako agirien arabera, eguzki-instalazioa jarriko da Murillo el Cuendeko 9. poligonoko 64., 65., 66., 70. eta 71. lurzatietan, eta proiektuak, bere osotasunean, honako elementu nagusi hauek ditu:
–3.098 modulu fotovoltaiko, DMEGC SOLAR, DM415M10-54HSW/HBW modelokoak, 415 Wp-koak, guztira 1.285,67 kWp-ko puntako potentziarekin. Altzairu galbanizatuzko egitura metalikoetan finkatuko dira, eta hegoalderantz begira egonen dira.
–9 inbertsore, INGECOM SUN 110TL M9, 110 kWn-ekoak, eta INGECOM SUN 10TL-eko inbertsore bat, 10 kWn-ekoa, guztira 1 MWn-eko potentzia izendatuarekin, zeina bat baitator potentzia instalatuarekin.
–2 transformazio zentro, eta horietako bakoitzak du 630 kVA-ko transformadore bat.
–13,2 kV-eko lurpeko linea, maniobra- eta ebakitze-zentroraino. Zentroa etxola prefabrikatu batean egonen da, eta gelaxka sistema bat izanen du (CNE-3L-F-SF6-24-13-TELE motako gelaxkak). Hala, lotuko dira, oraingo linearen bidez, batetik instalazioa eta bestetik banaketa sarearekin lotzeko proiektatu den konexio-puntua.
4.–Kontsulten izapidea berriz egitea.
Aplikatuz abenduaren 1eko 1955/2000 Errege Dekretuaren 127. eta 131. artikuluak, kontsulta egin zitzaien Murillo el Cuendeko Udalari, Ondare Historikoaren Zerbitzuari eta I-DE Redes Eléctricas Inteligentes SAUri, eta honako txosten hauek jarri dira:
–2024ko apirilaren 25eko txosten batean, Ondare Historikoaren Zerbitzuko Ondare Arkitektonikoaren Atalak azaltzen du "ez dagoela ukipenik" atal horren eskumeneko gaietan.
–2024ko maiatzaren 2ko txosten baten bidez, Murillo el Cuendeko Udalak dio eguzki-instalazioa "bat datorrela" Udaleko hirigintza-plangintzarekin.
–2024ko maiatzaren 20ko txosten baten bidez, I-DE Redes Eléctricas Inteligentes SAUk "baimena eman zuen" lanak egiteko, eta baldintza tekniko batzuk ezarri zituen.
Aipatutako txostenak sustatzaileari bidali zitzaizkion, eta ados agertu zen haiekin.
5. Ingurumen-ukipenen ebaluazioa, aldekoa, eta lurzoru urbanizaezineko jarduerak eta erabilerak egiteko baimena.
Honako ebazpen hauek daude espedientean:
–322E/2024 Ebazpena, urriaren 10ekoa, Biodibertsitatearen eta Arrantza Kudeaketaren Zerbitzuko zuzendariak emana, zeinaren bidez egiten baita proiektuaren aldeko ingurumen-ukipenen ebaluazioa. Bete beharko dira ingurumen ebazpenean bertan jasotako determinazioak.
–59E/2025 Ebazpena, otsailaren 24koa, Lurralde Antolamenduko zuzendari nagusiak emana, zeinaren bidez ematen baimena baita lurzoru urbanizaezinean jarduerak eta erabilerak egiteko, hirigintzako ebazpenean bertan zehazten diren determinazioak betetzeko baldintzarekin.
6.–Aurretiazko administrazio-baimena eta eraikitzeko administrazio baimena emateko proposamena.
Frogatu dira Energías Renovables Arnetum SLren gaitasun legala, teknikoa eta ekonomikoa, eta, hala, bete dira abenduaren 26ko 24/2013 Legea (Sektore Elektrikoari buruzko Legea) eta abenduaren 1eko 1955/2000 Errege Dekretua.
Era berean, Energías Renovables Arnetum SLk badu sarbiderako eta konexiorako baimena, zeina eman baitio banaketa sareko kudeatzaileak. Horretarako, proiektatutako konexio-puntua erabiliko da.
Horregatik guztiagatik, aurkeztutako dokumentazioa aztertuta, eta kontuan hartuta abenduaren 26ko 24/2013 Legea (Sektore Elektrikoari buruzko Legea), Azpiegitura Energetikoen Atalak (Industria Antolamenduaren, Azpiegitura Energetikoen eta Meatzeen Zerbitzukoa) ondorioztatzen du behar bezala gauzatu dela prozedura, eta proposatzen du Energías Renovables Arnetum SLri ematea aurretiazko administrazio-baimena eta eraikitzeko administrazio-baimena, honetarako: energia elektrikoa ekoizteko eguzki-instalazioa, Rada 3 izenekoa.
Adierazitakoarekin bat, eta erabiliz martxoaren 11ko 11/2019 Foru Legearen 32. artikuluak ematen dizkidan eskudantziak (foru lege horrek hizpide ditu Nafarroako Foru Komunitateko Administrazioa eta foru-sektore publiko instituzionala),
EBAZTEN DUT:
1. Aurretiazko administrazio-baimena eta eraikitzeko administrazio-baimena ematea Energías Renovables Arnetum SLri, jar ditzan "Rada 3 eguzki-instalazioa" izeneko energia elektrikoa ekoizteko instalazioa (1 MW-ko potentzia instalatua) eta haren transformazio eta ebakuazio azpiegiturak, Murillo el Cuendeko udal-mugartean. Horretarako, onesten da 2024ko apirilaren 17an aurkeztutako exekuzio-proiektua, eta hogeita hamasei hilabeteko epea ematen da obrak gauzatzeko.
2. Baimen hau emanda ere, instalazioaren eskatzaileak lortu beharko ditu egoki diren kontzesio, lizentzia eta baimen guztiak, beharrezkoak direnak instalazioa gauzatzeko, publikoak nahiz pribatuak izan, jarraikiz aplikatzekoak diren gainerako xedapenei.
3. Aurkeztutako proiektuaren arabera gauzatu beharko dira instalazioak, eta bat etorri beharko dute honako hauetan xedatuarekin: maiatzaren 9ko 337/2014 Errege Dekretua, onesten dituena goi tentsioko instalazio elektrikoen baldintza teknikoei eta segurtasun bermeei buruzko erregelamendua, eta haren Jarraibide Tekniko Osagarriak, JTO-RAT 01etik 23ra (jarraibide tekniko osagarriak - "Ram Air Turbine"); otsailaren 15eko 223/2008 Errege Dekretua, onesten dituena goi tentsioko linea elektrikoen baldintza teknikoei eta segurtasun bermeei buruzko erregelamendua, eta haren Jarraibide Tekniko Osagarriak, JTO-GTL 01etik 09ra (jarraibide tekniko osagarriak - goi tentsioko linea); eta abuztuaren 2ko 842/2002 Errege Dekretua, onesten duena behe tentsioko erregelamendu elektroteknikoa.
4. Behin proiektua gauzaturik, eskatzaileak zerbitzuan jartzearen akta eskatu beharko du. Eskaera horri obra-bukaerako ziurtagiria erantsi beharko zaio, teknikari fakultatibo eskudunak izenpetua, bai eta aplikatzekoa den araudiko gainerako dokumentazioa ere.
5. Ebazpen hau igortzea Industria Antolamenduaren, Azpiegitura Energetikoen eta Meatzeen Zerbitzura; Biodibertsitatearen eta Arrantza Kudeaketaren Zerbitzura; Lurralde eta Paisaia Zerbitzura; eta Ondare Historikoaren Zerbitzuko Ondare Arkitektonikoaren Atalera eta Erregistroaren, Ondasun Higigarrien eta Arkeologiaren Atalera, behar diren ondorioak izan ditzan.
6. Ebazpen hau Nafarroako Aldizkari Ofizialean argitaratzea, orok jakin dezan.
7. Ebazpen hau jakinaraztea Energías Renovables Arnetum SLri, I-DE Redes Eléctricas Inteligentes SAUri, Landazuria - Erriberako Ekologistak Martxan elkarteari, eta Ongaiz - Zangozerriko Ekologistak Martxan elkarteari, eta ohartaraztea ebazpenak ez duela administrazio bidea amaitzen, eta honen aurka jartzen ahal dela gora jotzeko errekurtsoa, zuzendu behar zaiona Industriako eta Enpresen Trantsizio Ekologiko eta Digitalerako kontseilariari, jakinarazi eta biharamunetik hilabeteko epean. Hartan espediente kodea adierazi beharko da.
8. Ebazpen hau Murillo el Cuendeko Udalari jakinaraztea, eta ohartaraztea honen kontra jartzen ahal dela administrazioarekiko auzi-errekurtsoa, eskumena duen jurisdikzio-ordenari zuzendua, honako hau jakinarazi eta biharamunetik hasita bi hilabeteko epean, alde batera utzi gabe Nafarroako Gobernuan aldez aurreko errekerimendua egin ahal izatea, uztailaren 13ko 29/1998 Legearen 44. artikuluan ezarritako moduan eta epean (lege horrek arautzen du administrazioarekiko auzien jurisdikzioa).
Iruñean, 2025eko abuztuaren 12an.–Enpresen Sustapenerako eta Azpiegituretako zuzendari nagusia, Iñigo Arruti Torre.
ERANSKINA.–JASOTAKO ALEGAZIOAK
Ondotik laburtzen eta aztertzen dira informazio publikoaren izapidean jarritako alegazioak, Landazuria - Erriberako Ekologistak Martxan elkartearena bat, eta Ongaiz - Zangozerriko Ekologistak Martxan elkartearena bestea, biak ere eduki berekoak:
–Alde batetik, biltzen dituzte Nafarroako energia-egoerari buruzko azterketa orokorra, honelako proiektuen inpaktuaren azalpena eta proposatutako aukerak edo konponbideak: energia gutxiago kontsumitzea, energia efizientzia, autokontsumoa, erregai fosilen ordez erabiltzea energia berriztagarriak, eta aldatzea Ingurumen Erantzukizunari buruzko Legea.
–Gainera, alegazioaren puntu batean aztertzen da zer ingurumen-balio duen Rada 3 eguzki-instalazioaren eta haren ebakuazio azpiegituren inguruneak, baita instalazioak eta azpiegiturek zer ingurumen-inpaktu duten ere, eta ondorio gisa adierazten da hura kaltegarria litzatekeela Nafarroako ingurumen eta gizarte balioentzat. Horregatik eskatzen du hura bertan behera uzteko, eta, hedaduraz, geldiarazteko bidean diren mota horretako proiektu guztiak ere, eta abian jartzeko prozesu egoki bat, hausnartzeko eta planifikatzeko Nafarroan behar dugun eredu energetikoa.
–Azkenik, eskatzen du proiektuan interesdun gisa onartzeko eta hari buruz emanen den ebazpenaren berri emateko.
Erantzuna:
Proiektua Nafarroako energia egoerarako egokia izateari dagokionez, esan beharra dago proiektuan betetzen direla abenduaren 26ko 24/2013 Legeak ezartzen dituen baldintzak eta helburuak (Sektore Elektrikoari buruzko Legea), eta bat datorrela Estatuko sektore elektrikoaren planarekin eta 2030erako Nafarroako Energia Planarekin, zeinak, betiere, izaera orientagarria baitu.
Proiektuaren ingurumen ebaluazioa egiteko eskumena duen organoak ebaluatu ditu gainerako auziak, ingurumenaren arlokoak.
Azkenik, interes kolektibo legitimoen titular izanen dira interes ekonomiko eta sozialen ordezkari diren elkarte eta erakundeak, legeak onartzen dituen baldintzetan, eta, horrenbestez, ebazpen hau bi elkarteei jakinaraziko zaie. Hori dena, jarraikiz urriaren 1eko 39/2015 Legearen 4. artikuluari (lege horrek hizpide du Administrazio Publikoen Administrazio Prozedura Erkidea).
Iragarkiaren kodea: F2510967
