1. NAFARROAKO FORU KOMUNITATEA
1.7. BESTELAKOAK
264E/2025 EBAZPENA, uztailaren 10ekoa, Ekonomia Zirkularraren eta Berrikuntzaren Zerbitzuko zuzendariak emana, zeinaren bidez onartzen baita Arbizuko udal mugartean hondakindegia, hondakin ez-arriskutsuen transferentziagunea eta konposta egiteko zentroa biltzen dituen instalazio baten ingurumen baimen integratuan ezarritako funtzionamendu baldintzen aldaketa. Instalazioaren titularra Sakanako Mankomunitatea da.
Instalazio horrek badu ingurumen baimen integratua, Ingurumenaren eta Uraren zuzendari nagusiaren apirilaren 30eko 888/2008 Ebazpenaren bidez emana, gero Ingurumenaren eta Uraren zuzendari nagusiaren apirilaren 24ko 304E/2015 Ebazpenaren bidez eguneratua, Ekonomia Zirkularraren eta Klima Aldaketaren Zerbitzuko zuzendariaren apirilaren 7ko 81E/2017 Ebazpenaren bidez eta Ekonomia Zirkularraren eta Klima Aldaketaren Zerbitzuko zuzendariaren irailaren 14ko 219E/2020 Ebazpenaren bidez aldatua, eta Ekonomia Zirkularraren eta Klima Aldaketaren Zerbitzuko zuzendariaren azaroaren 7ko 416E/2023 Ebazpenaren bidez berrikusia, eta, gero, Ekonomia Zirkularraren eta Klima Aldaketaren Zerbitzuko zuzendariaren azaroaren 21eko 436E/2023 Ebazpenaren bidez aldatua.
2025eko apirilaren 2an, titularrak bere ingurumen integratuan jasotako baldintzak aldatzeko eskatu zuen, handitu ahal izateko Arbizu eta Lakuntzako hondakin uren araztegira ebakuatzen den lixibiatuaren bolumena, egunean 170 m³-raino handituz.
Titularrak argudiatu duenez, ingurumen baimen integratuan eskatzen zaio hondakinak III. eremuko isuri-ontzian uztea, geruzatan zabalduta, eta egunean gehienez ere 100 m³ isurtzen ahal duela kolektorera, hala baimenduta baitu Ekonomia Zirkularraren eta Klima Aldaketaren Zerbitzuko zuzendariaren abenduaren 26ko 351E/2019 Ebazpenaren arabera. Titularraren arabera, hori ez da nahikoa III. eremuko ontziaren hondoan dauden lixibiatu eta euri-ur guztiak husteko, eta baldintza hori betetzea ezinbestekoa da aipatutako isuri-ontzian HDPEko xafla babesteko geo-mintzen instalazioa osatzeko eta hura ustiatzen jarraitzeko.
2025eko maiatzaren 7an, Ekonomia Zirkularraren eta Berrikuntzaren Zerbitzuak txosten bat eskatu zion NILSAri, jakiteko ea lixibiatu-isurketa Arbizu eta Lakuntzako udal araztegiaren funtzionamendu egokiarekin bateragarria ote zen.
2025eko maiatzaren 19an, NILSAk txosten bat aurkeztu zuen, eta, bertan, adierazi zuen araztegiak bere gain har dezakeela zabortegiko lixibiatuaren isurketa handitzea eguneko 100 m³-tik eguneko 170 m³-ra, betiere ebazpen honen eranskinean ezarritako neurri teknikoak betez gero.
Zerbitzu honek uste du eskatutako aldaketa onargarria dela, eskatzen dena bat datorrelako instalazioak ingurumen aldetik eduki beharreko funtzionamendu egokiarekin. Horregatik, bidezkoa da ingurumen baimen integratua aldatzea.
Kasu honetan, Ingurumenean Eragina duten Jarduerak arautzen dituen abenduaren 16ko 17/2020 Foru Legea garatzeko Erregelamenduaren 35. artikuluan ezarritako inguruabarrak gertatzen direla ulertzen da, eta, ondorioz, bidezkoa da ingurumen baimen integratuan ezarritako baldintzak ofizioz aldatzea, artikulu horretan ezarritako administrazio prozedurarekin bat etorriz, eta ez da egokitzat jotzen aldaketa-espediente hau jendaurrean jartzea.
Ebazpen proposamena hamabost egunez egon da instalazioaren titularrari entzunaldia emateko izapidean, eta hark ez du proposamenaren aurkako alegaziorik aurkeztu.
Adierazitakoarekin bat, eta Landa Garapeneko eta Ingurumeneko Departamentuaren egitura organikoa ezartzen duen azaroaren 15eko 255/2023 Foru Dekretuak ematen dizkidan eskudantziak erabiliz,
EBAZTEN DUT:
Lehendabizikoa.–Onartzea Arbizuko udal mugartean hondakindegia, hondakin ez-arriskutsuen transferentziagunea eta konposta egiteko zentroa biltzen dituen instalazio baten ingurumen baimen integratuan ezarritako funtzionamendu baldintzen aldaketa. Horrenbestez, instalazioak eta hango jarduerak instalazioari ingurumen baimen integratua emateko, eguneratzeko eta aldatzeko lehendik tramitatutako espedienteetan ezarritako baldintzak bete beharko dituzte, eta, horiez gainera, ebazpen honen eranskinean adierazitako baldintzak eta neurriak. Instalazioaren titularra Sakanako Mankomunitatea da.
Bigarrena.–Ebazpen honetan jasotako baldintzak betetzen ez badira, Kutsaduraren Prebentzio eta Kontrol Integratuaren Legearen testu bateginaren IV. tituluan jasotako ingurumen diziplinako neurriak hartuko dira (testu bategin hori abenduaren 16ko 1/2016 Legegintzako Errege Dekretuaren bidez onetsi zen), eta, subsidiarioki, Ingurumenean Eragina duten Jarduerak arautzen dituen abenduaren 16ko 17/2020 Foru Legearen III. tituluan ezarritako zehapen araubidean jasotakoak, ezertan galarazi gabe legeria sektorialean ezarritakoa, aurrerantzean ere aplikatu beharko baita.
Hirugarrena.–Ebazpen hau Nafarroako Aldizkari Ofizialean argitaratzea.
Laugarrena.–Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jartzen ahalko dute haren aurka, Landa Garapeneko eta Ingurumeneko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jar dezakete, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Ebazpen hau jakinarazi eta biharamunetik aurrera kontatuko dira epeak.
Bosgarrena.–Ebazpen hau Sakanako Mankomunitateari, Arbizuko Udalari eta NILSAri igortzea, behar diren ondorioak izan ditzan.
Iruñean, 2025eko uztailaren 10ean.–Ekonomia Zirkularraren eta Berrikuntzaren Zerbitzuko zuzendaria, Raúl Salanueva Murguialday.
Oharra: Ebazpen honetan aipatzen diren eranskinak interesdunen eskura egonen dira, Ingurumen Zuzendaritza Nagusiaren bulegoetan (González Tablas kalea 9, behea, Iruña; Ekonomia Zirkularraren eta Berrikuntzaren Zerbitzua) eta Nafarroako Gobernuaren webgune honetan: https://extra.navarra.es/InformacionPublicaPRTR/CentroPublicaciones.html#/CentroPublicaciones.
Iragarkiaren kodea: F2509669
