149. ALDIZKARIA - 2025eko uztailaren 28a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

114C/2025 EBAZPENA, ekainaren 24koa, Ekonomia Sozialeko eta Laneko zuzendari nagusiak emana; horren bidez erabaki da Corellako Udaleko langile lan-kontratudunen Hitzarmen Kolektiboa erregistratu, gordailutu eta Nafarroako Aldizkari Ofizialean argitaratzea.

Ikusi da Corellako Udalak langile lan-kontratudunendako aurkeztutako hitzarmen kolektiboa (kode zenbakia: 31008852012009), erregistro honetan sartu baitzen 2025eko ekainaren 19an, 2025eko maiatzaren 22an enpresaren ordezkaritzak eta langileen legezko ordezkarien gehiengoak sinatu ondoren.

Bat etorriz Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, lan-akordio kolektiboak eta berdintasun-planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin,

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak baliatuz, eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuarekin lotuta, honako hau,

EBAZTEN DUT:

Lehenengoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Corellako Udalak langile lan-kontratudunentzat aurkeztutako hitzarmen kolektiboa (kode-zenbakia: 31008852012009).

Bigarrena.–Nafarroako Aldizkari Ofizialean argitaratzeko agintzea, orok jakin dezan.

Iruñean, 2025eko ekainaren 24an.–Ekonomia Sozialeko eta Laneko zuzendari nagusia, Iñaki Mendióroz Casallo.

CORELLAKO UDALEKO LANGILE LAN-KONTRATUDUNEN HITZARMEN KOLEKTIBOA (2025/01/01-2028/12/31)

HITZAURREA

Corellan, 2025eko maiatzaren 22ko 09:30ean, elkartu dira xede horretarako, honako hauek:

Alde batetik, Gorka García Izal jauna, Corellako Udaleko alkate-udalburua.

Eta bestetik, langileen ordezkariak: Yolanda Riccobene Liroz, Milagrosa Gil García eta Santiago Ruiz López (ELA sindikatua), Alberto Pezonaga Librada (CCOO sindikatua) eta Esther García Cantón (UGT sindikatua).

I. KAPITULUA.–XEDAPEN OROKORRAK

1. artikulua. Aplikazio eremua.

1. Hitzarmen kolektibo honek harreman juridiko eta lanekoaren bidez Corellako Udalean diharduten langileen lan baldintzak arautzen ditu.

2. Hala ere, ez die eragiten enplegu sozial babestuaren programan kontratatu diren langileei. Izan ere, langile horiei, enplegu sozial babestuari dagokion araudia aplikatuko zaie.

2. artikulua. Aldeak.

Hitzarmen hau honako hauek sinatu dute: alde batetik, Corellako Udalak, eta, bestetik, langileen ordezkariek: Yolanda Riccobene Liroz, Milagrosa Gil García eta Santiago Ruiz López (ELA sindikatua), Alberto Pezonaga Librada (CCOO sindikatua) eta Esther García Cantón (UGT sindikatua).

3. artikulua. Indarraldia.

Hitzarmen honek Nafarroako Aldizkari Ofizialean argitaratu eta biharamunean hartuko du indarra, eta ondorio ekonomikoak 2025eko urtarrilaren 1etik aurrera izanen ditu. Hitzarmen honen indarraldiak 2028ko abenduaren 31ra arte iraunen du.

4. artikulua. Hitzarmena salatzea eta indarraldia luzatzea.

1. Alderdietako edozeinek salatzen ahalko du hitzarmena, Langileen Estatutuaren 86. artikuluan ezarritakoaren arabera.

2. Alderdi sinatzaileetako zeinahik hitzarmena salatu eta hitzarturiko iraupena akitu ondoren, hitzarmenak indarrean jarraituko du, soldata igoeren aldi baterako akordioak izan ezik, harik eta hura ordezten eta indargabetzen duen beste hitzarmen bat sinatu arte.

3. Hitzarmen kolektiboa salatu zenetik urtebete igaro eta hitzarmen berririk adostu ez bada, Langileen Estatutuaren 83. artikuluan ezarritako estatuko edo autonomia-erkidegoko lanbide arteko akordioetan araututako bitartekaritza-prozeduren mende jarriko dira alderdiak, desadostasunak eraginkortasunez konpontzeko.

5. artikulua. Arau osagarriak.

Hitzarmen kolektibo honetan berariaz arautzen ez diren gaiak eta haien aldaketak Nafarroako Foru Komunitateko Administrazioaren zerbitzuko langile lan-kontratudunentzat sinatutako hitzarmen kolektiboek eta hitzarmenek arautuko dituzte, eta berehala aplikatuko zaizkie Corellako Udaleko langile lan-kontratudunei.

Hitzarmen hau indarrean den bitartean bi ordezkaritzek formazko zuzenketak, aurreikusi gabeko hobekuntzak eta, oro har, itundutako gaiei buruzko akordioak adosten badituzte, espresuki hitzartzen da akordio horiek hitzarmenaren eranskinetan sartzea, izapide ofiziala egin eta lan administrazioko agintaritzari jakinarazi ondoren.

6. artikulua. Hitzarmen kolektiboa interpretatzea.

Enpresako hitzarmen hau interpretatu edo betetzeak sortutako gatazka kolektiboak Nafarroako Lan Auzitegiaren bitartekaritzaren bidez ebatzi beharko dira.

II. KAPITULUA.–LANAREN ANTOLAKETA

7. artikulua. Lanaren antolaketa.

Lanaren antolaketa Corellako Udalaren eskumena eta ardura da, baina hitzarmen kolektibo honek eta indarrean dagoen legediak langileen ordezkariari esleitzen dizkion eskumenak kontuan hartuta.

Hitzarmenak arlo guztietako pertsonei eragiten badie ere, honako arlo eta zerbitzu hauetan dago egituratuta Corellako Udala:

–Administrazioa.

–Udaleko zerbitzu anitzak.

–Gizarte zerbitzuetakoak.

–Etxezaintzak.

–Teknikariak.

8. artikulua. Lanaldia eta lan ordutegia.

1. Lanaldia Nafarroako Gobernuak bere langileentzat zehazten duena izanen da.

Corellako Udalak bere zerbitzuko langileendako egutegi propioa onartuko du, eta ohiko lanaldia astelehenetik ostiralera izanen da.

Oro har, Nafarroako Administrazio Publikoen zerbitzuko Langileen Estatutuaren testu bategina eta hura erregelamendu bidez garatzen duten xedapenak edo hura ordezten duen arauan xedatutakoa beteko da.

2. Egutegiak egiteko, udaleko arlo guztiak hartuko dira kontuan, eta irizpide hauei jarraituko zaie, herritarrei zerbitzu egokia ematen zaiela bermatzeko:

a) Udaleko zerbitzu anitzak: Jarduera berean (lorezaintza, eraikuntza, mantentze lanak, etab.) aritzen diren langileen erdiak baino gehiagok ezin du aldi berean oporrik nahiz zubirik hartu.

b) Gizarte zerbitzuak:

–Familia langileak: Udan (ekainaren 15etik irailaren 30era), zerbitzuko arduradun eskudunak aldez aurretik balorazio hori egin ondoren, ezin da langile bat baino gehiago egon oporretan aldi berean, eta, neguan (urteko gainerako egunetan), gehienez bi langile egon daitezke oporretan aldi berean.

Zubietan langile batek bakarrik har ditzake oporrak.

–Gizarte langileak, hezitzaileak eta administrari laguntzaileak: Beti egon behar da B mailako arduradun bat, eta salbuespenezko egoeretan, B mailako bi teknikari.

–Herriko jaietan (irailaren 24tik 30era, bi egun horiek barne), gizarte zerbitzuak itxita egonen dira, eta ez da etxez etxeko arretarik emanen.

c) Etxezaintza: ikastetxeko zuzendariak adostu behar ditu ordutegiak etxezainarekin.

d) Teknikariak: udal arkitektoa, kiroletako koordinatzailea, landazaina, berdintasuneko teknikaria eta kulturako koordinatzailea. Beraien arloan langile bakarra dagoenez, dagokien zinegotziari aurkeztu beharko diete beraien egutegia.

3. Egutegiak Udalaren eta arlo bakoitzeko langileen artean adostuko dira, Udalaren organo eskudunak gai horretan dituen eskudantziak galarazi gabe.

4. Langileei dagozkien gehienekoak eta gutxienekoak (oporretan, zubietan, etab.) Udaleko langile guztientzat dira; hau da, barne hartzen dira, baita ere, funtzionarioak.

9. artikulua. Oporrak, lizentziak eta baimenak.

1. Kontuan hartuko da Nafarroako administrazio publikoetako funtzionarioen opor, lizentzia eta baimenen erregelamendua onesten duen otsailaren 9ko 11/2009 Foru Dekretuan une bakoitzean indarrean dagoen idazketa; Nafarroako administrazio publikoen zerbitzuko langileen estatutua aldatzen duen martxoaren 29ko 12/2023 Legean ezarritakoa; eta Langileen Estatutua aldatzen duen ekainaren 28ko 5/2023 Errege Lege Dekretuaren 127. artikuluan xedatutakoa.

2. Maiatzaren 14ko 39/2014 Foru Dekretuari dagokionez, Corellako Udalak aukeran aplikatzen ahalko du. Foru dekretu horretan jasotako neurriak aplikatzen diren kasuetan, bertan jasotako araubideari eta baldintzei lotuko zaie aplikazioa.

3. Langileak eta enpresa ados jartzen badira, oporrak beste egun batzuetan hartzen ahalko dira.

4. Udalean gutxienez bi urteko antzinatasuna duten aldi baterako langile lan-kontratudunek funtzionarioek dituzten eskubide berak izanen dituzte eszedentzia eta lanaldiaren murriztapenei dagokienez.

III. KAPITULUA.–ORDAINSARIAK

10. artikulua. Ordainsariak.

1. Ordainsariek egitura hau izanen dute:

a) Norberaren oinarrizko ordainsariak: mailaren oinarrizko soldata eta antzinatasun saria.

b) Ordainsari osagarriak.

a) Oinarrizko ordainsari pertsonalak:

Hasierako soldata Nafarroako Gobernuak Nafarroako toki entitateen zerbitzuko langileentzat ezartzen duena izanen da.

Antzinatasun saria lan kontratudun langileei ordainduko zaie. Antzinatasun saria hirurtekoen arabera ordainduko da, Nafarroako toki entitateen zerbitzuko langileentzat erregelamendu bidez ezartzen denaren arabera. Osagarri hori jasotzeko, kontuan hartuko da administrazio publikoek aitortutako antzinatasuna, eta, horretarako, beharrezkoa izanez gero, behar diren ziurtagiriak aurkeztu beharko dira.

b) Ordainsari osagarriak:

Nafarroako Administrazio Publikoetako Ordainsariei buruz unean-unean indarra duen Erregelamenduaren arabera, ondoko osagarriak ordaintzen ahalko dira:

1.–Dedikazio esklusiboko osagarria.

2.–Bateraezintasuneko osagarria.

3.–Lanpostuko osagarria.

4.–Arrisku bereziko osagarria.

5.–Lanaldiaren luzapeneko osagarria.

6.–C, D eta E mailakoen osagarria, plantilla organikoan adierazi bezala.

7.–Konpentsazio osagarria, Nafarroako Foru Komunitateko Administrazioaren zerbitzuko langile lan-kontratudunentzat itundutako baldintzetan.

8.–Txandako laneko osagarria.

Lanera huts ez egiteagatik, % 3ko osagarria gehituko zaio maila bakoitzeko oinarrizko soldatari. Osagarri hori hamabi hilerokoetan emanen da, baldin eta langileak hilabetean aldi baterako ezintasunagatik edo laneko istripuagatik bajarik izan ez badu.

2. Corellako Udalak konpromisoa hartzen du lanpostuen balorazio egokiak egiteko, dagozkion ordainsari osagarriak esleitze aldera. Prozesu hori familia langileen lanpostuekin hasiko du.

3. Ordainsariak lanaldi murriztuan.

Guztientzako lanaldia baino laburragoa duten langileei ordainsariak jaitsiko zaizkie ezarrita dagoen lanaldi orokorra murrizten den hein berean.

11. artikulua. Jaiegunak.

Ondorio ekonomikoetarako, jaiegunen erregulazioa Nafarroako Gobernuak ematen duen araudian edo hura ordezten duen arauan ezarritakoaren arabera eginen da, zaindariaren jaiei dagokienez, udalerriko berezitasunak kontuan hartuta.

12. artikulua. Gaueko lana.

Hitzarmen honen 8.2 artikuluan adierazitako arloetako langileen lanaldia 08:00etan hasiko da.

Kontziliazio arrazoiengatik edo langileek ordutegia hobetzeko egindako eskaerengatik, 08:00ak baino lehen lan egitea beharrezkoa ez bada, ez da aplikatuko Nafarroako Gobernuak ezarritako gaueko lanaren plusa (22:00etatik hurrengo eguneko 08:00etara).

Nafarroako Gobernuak ezarritako gaueko lanaren (22:00etatik hurrengo eguneko 08:00etara) plusa udalak gaueko ordutegian lan egitera behartzen duenean aplikatuko da.

13. artikulua. Familia laguntza.

Familia laguntza gisa, Nafarroako Gobernuak bere funtzionarioentzat ezartzen duena ordainduko da.

14. artikulua. Langileak hautatzeko epaimahaietan parte hartzeagatik ematen diren diru konpentsazio eta ordainak.

Corellako Udaleko langile lan-kontratudunek konpentsazioak eta ordainak jasoko dituzte langileak hautatzeko epaimahaietan parte hartzeagatik, Nafarroako Foru Komunitateko Administrazioaren zerbitzuko langile lan-kontratudunentzat sinatutako hitzarmen kolektiboan eta abenduaren 20ko 276/1989 Foru Dekretuan xedatutakoaren arabera.

15. artikulua Aparteko orduak.

Hitzarmenaren sinatzaileek konpromisoa hartu dute aparteko orduak behar-beharrezkoak direnetara mugatzeko.

1.–Aparteko orduei dagokienez, Nafarroako Foru Gobernuaren araudian xedatutakoa beteko da.

2.–Zerbitzuaren premiak direla eta aparteko orduak egin behar direnean, langileak diru konpentsazioa jasotzea edo atsedenaldia hartzea aukeratzen ahalko du.

3.–Langileak diru konpentsazioa aukeratzen badu, ordu arruntari dagokiona emanen zaio. Horretarako, langile bakoitzaren orduko prezioa hartuko da oinarritzat, familia laguntza kontzeptuan izan ezik. Edonola ere, orduko prezioa Nafarroako Gobernuaren tauletan kategoria bakoitzerako adierazitakoa izanen da, gutxienez.

4.–Langileak atsedenaldia hartzea erabakitzen badu.

a) Lanegun batean egindako aparteko orduen kasuan, lan egindako ordu bakoitzeko, ordu eta berrogeita bost minutu emanen dira.

b) Jaiegunetan edo gaueko ordutegian egindako aparteko orduen kasuan (gaueko ordutegia 22:00etatik 08:00etara bitartekoa da), ordu bakoitzeko 2 ordu emanen dira.

5.–Aparteko orduak sartzeagatik emandako konpentsazioa langilearen borondatearen araberakoa izanen da beti, betiere zerbitzuaren beharrak errespetatuz eta behar bezala justifikatuta; halaber, hautatutako aukeraren ondorioz, ez dute lanpostura huts egiten ahalko jarduera bera egiten duten langileen erdiak baino gehiagok (lorezaintza, eraikuntza, mantentze-lanak, etab.).

Aparteko orduen ordain gisa atsedenaldia hartzea aukeratzen duten langileek hurrengo urteko martxoaren 31ra arte hartzen ahalko dute.

6.– Langile batek zerbitzu berezietan (desfileak, kirol edo kultur ekitaldiak, batzarrak, udalbatzak, etab.) ordu bat baino gehiago ematen badu, aparteko ordu gisa ordainduko zaio.

Benetan lan egindako denbora 1 ordutik beherakoa bada, benetan lanean emandako denbora zenbatuko da, eta, edonola ere, ordu bat gutxienez, nahiz eta hori osorik bete ez.

Zerbitzu berezietan (desfileak, kirol edo kultur ekitaldiak, batzarrak, udalbatzak, etab.) bi ordu baino gutxiago emanez gero, langileak aukeratzen ahalko du benetan lan egindako aparteko orduen konpentsazioa dirutan eskuratzea edo, bestela, bi orduz lan egitea; lanak ordu eta erdi baino gehiago eta bi ordu baino gutxiago irauten badu, bi ordu gisa zenbatuko da.

7.– Herriko jaietan (arratsaldeko 15:30etik aurrera) eta Villar egunean (ostiraleko 15:30etik aurrera) lan egindako orduak jaieguneko aparteko ordutzat hartuko dira.

8.– Hiru hilabetean behin langile bakoitzak egindako orduen egoera orria bidaliko zaie langileen delegatuei. Egoera-orri horretan, egindako aparteko orduak eta bajen eta baimen ordainduen ondorioz gertaturiko gorabeherak azalduko dira.

Zerbitzuren batean metaturiko aparteko orduak gehiegi direla irizten bada, plantilla handitzeari buruzko azterketa eginen da.

16. artikulua. Kalte ordainak zerbitzu arrazoiak direla eta.

1. Lanagatik egindako dieta eta kilometraje gastuak ordainduko dira, Nafarroako Gobernuak kasu horietarako ezarritakoaren arabera. Horretarako aski izanen da otorduetako, autobideko eta aparkalekuetako tiketak edo/eta egindako kilometrajeari buruzko egiaztagiriak aurkeztea.

2. Lanerako ibilgailuak erabili ohi dituzten langileei, udalak ondorengo berritzeen kostuak ordainduko dizkie, gastuen fakturak aurkeztu eta gero.

Udaleko lanetarako ibilgailua erabili ohi duten langileek egunero erabili behar dute autoa, baina ez da kontuan hartuko etxetik lanerako bidea.

3. Lan arrazoiengatik egindako bidaia batean izandako istripuaren ondorioz langileari laneko baja ematen bazaio, istripu hori lan istriputzat hartuko da.

17. artikulua. Eskubide pasiboak.

Pentsioen aldaketei eta igoerei dagokienez, arlo horretako araudian ezartzen dena beteko da.

18. artikulua. Soldata aurrerakinak ematea.

1. Kasu berezietan, soldata ordaintzeko eguna iritsi baino lehen, soldata aurrerakinak ematen ahal dira, egindako lanari dagozkionak. Aurrerakin horiek ematea edo ukatzea Alkatetzaren esku dago.

2. Aparteko aurrerakinak eskatzen ahal dira, 3.000 euro bitartekoak, kasu hauetan:

a) Ezbeharrak etxebizitzan edo ibilgailuetan: sutea, lapurreta, istripua, uholdea, etab.

b) Une oso larriak familian.

c) Udalaren iritziz antzeko garrantzia duten beste kasu batzuk.

3. Eskabidearekin batera, zeina Alkatetzara zuzenduko baita, eskaera bermatzeko eta ebazteko behar diren egiaztagiri guztiak aurkeztuko dira.

4. Aurrerakinak 18 hileroko berdinetan eta ondoz ondokotan itzuliko dira, langileari egokien zaion epean. Nolanahi ere, ez dira 18 hileroko baino gehiago izaten ahalko.

Aparteko pagak dituzten hilabeteetan hileko soldata arrunt bati dagokiona halako bi deskontatuko da.

5. Aparteko aurrerakina hartzen duen langileak hura amortizatzeko hilabeteetan ez du 1. apartatuko aurrerakinik eskatzen ahalko, ez eta aparteko beste aurrerakinik ere, harik eta jaso duen lehenbizikoa itzuli arte.

6. Soldata aurrerakinak emateko, kontuan hartuko da langilearen kontratua, ezin baita 2 urte baino gutxiagokoa izan.

IV. KAPITULUA.–ENPLEGUA

19. artikulua. Egoera administratiboak.

Langile lan-kontratudun finkoei dagokienez, Nafarroako Administrazio Publikoen zerbitzuko Langileen Estatutuaren testu bateginaren VI. kapituluak gaur egun xedatzen duenari jarraituko zaio.

20. artikulua. Goragoko edo beheragoko kategoriako lanak eta mugigarritasun funtzionala.

1. Baldin eta behar-beharrezkoa ez bada, langile batek ez ditu egin beharko beheragoko lanbide talde bati dagozkion eginkizunak.

2. Langile bati goragoko kategoria bateko eginkizunak betetzea eskatuz gero, kategoria horretan emandako denboragatik eta lanaldiagatik dagokion ordainsaria emanen zaio.

Titulazioa ezinbesteko baldintza bada, ez dira goragoko kategoriako lan horiek esleitzen ahalko, titulazio hori izan ezean.

21. artikulua. Lanpostuen balorazioen emaitza aldi baterako aplikatzea.

Udaleko arlo eta unitateetako lanpostuen balorazioak egiten direnean, balorazio horien emaitza gehienez ere 6 hilabeteko epean aplikatuko da, balorazioa egiten denetik zenbatzen hasita.

V. KAPITULUA.–LANEKO OSASUNA ETA KALITATEA

22. artikulua Lanaldi murrizketa.

Menpekotasunarekin eta Berdintasunarekin zerikusia duen lanaldi murrizketari dagokion guztian, bi lege horietan ezarritakoa beteko da. 39/2006 Legea edo 3/2007 Lege Organikoa, hurrenez hurren, edo haren ordezkoa edo osagarria den ondorengo araudia.

Legezko zaintza dela-eta, langileren batek bere kargura baldin badu hamabi urtetik beherako haurren bat edo ordaindutako lanik egiten ez duen desgaitu fisikoa edo psikikoa, eskubidea izanen du lanaldia murrizteko, soldata ere hein berean murriztuta, haren iraupenaren zortziren bat gutxienez eta erdia gehienez ere.

Corellako Udaleko bi langile beren artean ezkonduta badaude edo izatezko bikote badira eta egoera eta kasu berean badaude, haietako batek bakarrik baliatzen ahalko du eskubide hori.

23. artikulua. Familia bizitza bateratzea.

Langileek aukera izanen dute dagokien lanaldiaren ordutegia malgutzea eskatzeko, banakako eskaera eginez, betiere haien eginkizunak betetzea bideragarria denean. Honako arlo hauek hartuko dira kontuan:

1. Administrariak, oinarrizko gizarte zerbitzuetako administraria eta teknikariak, landazaina, arkitektoa eta kirol koordinatzailea:

Nahitaez 09:30etik 13:30era lan egin beharko da, eta gainerako orduak ordutegi horren aurretik zein ondoren egiten ahalko dira.

Langileak lanaldiaren zati bat arratsaldez egiteko eskatzen badu, kasuak banaka aztertuko dira. Langileak ez du ordu eta erdi baino gehiagoko aldirik egiten ahalko, baina bi egunetako aldiak metatzen ahalko dira; hau da, 3 ordu arratsalde bakoitzeko. Gainera, batzordeetara joateko ematen diren orduetatik ere kentzen ahalko zaizkio.

Langilearen ardurapean dauden menpeko pertsonak eta odol ahaidetasuneko lehen gradura artekoak gaixo badaude, etxetik aritzeko aukera izanen du langileak. Horretarako, medikuaren frogagiriak aurkeztu beharko ditu, eta gehienez 15 egunez egiten ahalko du lan etxetik. Udan eta Eguberrietan, kasu bakoitza aztertuko da.

Haurra eskolako egokitze-aldian dagoen bitartean, behar den denbora doiaz, familia bizitza bateratzeko baimena emanen da (behar bezala justifikatu behar da eskaera).

2. Zerbitzu anitzetako brigada:

Lana eta familia kontziliatzeko eskaera egiten duten langileentzat (behar bezala justifikatuta), lan ordutegitik kanpo sor litezkeen lanetarako orduen poltsa bat sortuko da, esaterako: ekitaldietan parte hartzea, tamaina handiko gauzak jasotzea, lan ordutegitik kanpoko lanak eta arratsaldeko lanak; hortik kenduko dira brigadari dagokion ordutegi orokorrean egiten ez diren orduak.

Brigadaren barruan lanpostu desberdin asko daudenez, kontziliazio bakoitzerako eta orduen poltsako lan bakoitzean aztertuko da, bai lana bai nork eginen duen.

3. Gizarte zerbitzuak:

Familia langileak:

Langileek banakako eskabide bidez eskatzen ahalko dute lan ordutegia malgutzeko. Banaka aztertuko dira, baina kontuan hartuko da beti dagozkien lanak egin ditzaketen.

4. Atezaintza.

Ikastetxeko zuzendariarekin koordinatu beharko dute.

Lana eta familia kontziliatzeko baimenak banan-banan aztertuko dira (behar bezala justifikatu behar dira eskaerak) arlo guztietan. Kontziliatzeko baimena konpentsatzeko lanalditik kanpo lan egiten diren orduak lanaldiko ordu normal gisa zenbatuko dira.

24. artikulua. Genero indarkeriaren biktimen babesa.

Genero indarkeriaren aurkako babes neurriei buruzko Lege Organikoa edo hura ordezten edo osatzen duen araudia beteko da.

25. artikulua. Erretiroa.

1. Corellako Udaleko langile lan-kontratudunei unean-unean erretiroaren arloan indarrean dagoen Gizarte Segurantzako araudia aplikatuko zaie.

2. Udaleko langile lan-kontratudunek erretiro partziala hartzeko aukera, unean-unean erretiroaren arloan indarrean dauden baldintza erregulatzaileak eta aplikagarriak betetzen badituzte, eta, aldi berean, txanda-kontratu bat egiten badute Langileen Estatutuan ezarritako baldintzetan, toki erakundeak banan-banan aztertu eta ebatziko du, eta, posible bada, langileak erretiro partziala hartzearen alde eginen du.

26. artikulua. Laneko arriskuen prebentzioa eta lan osasuna.

1. Laneko Arriskuen Prebentzioari buruzko azaroaren 8ko 31/1995 Legean ezarritakoaren edo ordezten duen legeriaren arabera, lan-kontratudun langileek laneko segurtasunari eta osasunari dagokienez babes eraginkorra izateko eskubidea dute. Eskubide horrek berekin dakar enpresak bere zerbitzuan ari diren langileak lan arriskuetatik babestu beharra.

2. Urtean osasun azterketa bat egiteko aukera izanen dute langile guztiek. Azterketa horietarako, Udalak talde mediko baten eta klinika edo mutualitate baten zerbitzuak kontratatuko ditu, eta horietarako gastuak udal funtsen kargura izanen dira.

3. Langileen lesioak prebenitzea oso garrantzitsua dela jakinda, udalean lan egiten duten eta betetzen duten lanpostuagatik –karga fisiko handiagatik, mugimendu errepikakorrak egiteagatik, eta abar– bizkarreko lesio zerbikalak edo muskuloeskeletikoak jasan ditzaketen lan-kontratudun langileei dagokienez, Corellako Udalak, langileek jaso beharreko tratamenduari buruzko txosten medikoa aurkeztu ondoren, fisioterapeuten eta masajisten zerbitzuaren kostua ordainduko die langile horiei –profesionalak eta zentroak udalak aukeratuko ditu–, gehienez 25 euro pertsonako eta hiruhileko bakoitzeko.

Zenbateko hori urtero eguneratuko da Nafarroako KPIaren arabera.

VI. KAPITULUA.–LANGILEEN ORDEZKARITZA

27. artikulua. Eskubide sindikalak.

Nafarroako Administrazio Publikoen zerbitzuko Langileen Estatutuaren testu bateginak ezarritakoaren arabera jokatuko da une oro.

Hitzarmen kolektibo honen aplikazio eremuko langileek eskubidea dute beren enplegu baldintzak zehazten parte hartzeko, legean finkatu bezala, beren ordezkaritza organoen bitartez.

28. artikulua. Ordu sindikalak.

Akordio honen aplikazio eremuko ordezkari sindikalek hogei orduko kreditua dute hilabetean. Ordu kreditu hori hiru hilean behin kontatuko da.

Langile lan-kontratudunen ordezkariek, nahi izanez gero, zilegi dute ordu sindikalak elkarri lagatzea, kandidatura bereko ordezkari sindikalen artean.

29. artikulua. Batzorde paritarioa.

Akordio honen garapenaren eta betetzearen segimendua egiteko, jarraipen batzorde paritario bat eratuko da, Udalaren eta langileen ordezkariek osatua.

Hitzarmen honetako batzorde paritarioak hitzarmenaren aplikazioa interpretatzeko eta zaintzeko eginkizuna izanen du, bere edukiaren gainean sortzen ahal diren desadostasunetan, bai eta Langileen Estatutuaren 85.3 c) artikuluan jasotako auzietan ere.

Bi alderdiek espresuki adostu dutenez, zalantzarik edo desadostasunik sortuz gero, txostena eskatuko zaio batzorde paritarioari, jurisdikzio eskudunari edozein erreklamazio egin aurretik.

Batzordea lau kidek osatuko dute, horietako bi enpresako ordezkariek hautatuak eta beste biak hitzarmena sinatzen duten langileen ordezkariek hautatuak. Batzuek eta besteek aholkularien laguntza izan dezakete, hizpidea dutela baina botorik gabe.

Batzorde horrek aldeetako edozeinek eskatuta eginen du bilera, desadostasunak izaten direnean (banakakoak edo taldekakoak) hitzarmen honen nahiz Langileen Estatutuaren 85.3 c) artikuluan araututako gainerako gaien interpretazioaren edo betetzearen gainean. Gutxienez astebete lehenago emanen da abisua, eta arazoak konpontzeko gehienez ere bi aste izanen du.

Aztertzen diren gaiak bi alderdiek onetsi beharko dituzte, eta, ados jarriz gero, hitzarmenaren testuan sartuko dira.

30. artikulua. Laguntza juridikoa.

Udalak laguntza juridikoa emanen die zeinahi eratako prozesu judizialetan dauden langileei, gertaerak Udalak agindutako eginkizunetan aritzeagatik gertatu badira.

31. artikulua. Eskuratutako eskubideak.

Eskuratutako eskubideak bermatuko dira, lege xedapenen arabera, baita edozein arau hitzartu edo nahitaez bete beharrekoen ondoriozkoak ere, ebazpen judizialaren bidez aitortzen direnak barne.

32. artikulua. Bizi aseguru kolektiboaren eta banakako istripu aseguruaren poliza.

Udalak konpromisoa hartzen du, ahal duen heinean, egungo aseguruaren estaldurak hobetzeko, Nafarroako urteko KPIaren igoeraren balioa bermatuz, gutxienez; aldaketa guztiak jakinaraziko dizkie sindikatuetako delegatuei.

VII. KAPITULUA.–BESTE HAINBAT XEDAPEN

33. artikulua. Lanbide prestakuntza.

Prestakuntza, aldi berean, behar bat eta betebehar profesional bat dela aintzat hartuz, baita funtsezko faktore bat ere langileen motibazioa handitzeko, mailaz igotzeko eta mugigarritasuna bultzatzeko, Udalak konpromisoa hartzen du prestakuntza eskaintza handitzeko, eta horretarako sindikatuen laguntza izanen du.

Langile publikoei prestakuntzarako erraztasunak eman nahian, baldin eta zerbitzuaren kudeaketak eta lanaren antolaketak horretarako bide ematen badute, Udalak konpromisoa hartzen du neurri hauek hartzeko:

a) Langileei erraztasunak ematea, lan orduetan Nafarroako Administrazio Publikoaren Institutuak, Familia, Gazteria, Kirol eta Gizarte Gaietako Departamentuak, Osasun Departamentuak, Kultura eta Turismo Departamentuak, Hezkuntza Departamentuak, Animsak, Nafarroako Udal eta Kontzejuen Federazioak, Espainiako Udal eta Probintzien Federazioak eta antzeko organoek antolaturiko prestakuntza ikastaroetara joateko, haien edukia lan-kontratuko langilearen lanpostuari edo lanbide karrerari lotua bada.

b) Urtean gehienez ere berrogei orduko baimen ordainduak ematea lanbide prestakuntza eta hobekuntzako ikastaroetara joateko, haien edukia zuzenean lanpostuari edo enplegatuaren lanbide karrerari lotua bada.

c) Kasu guztietan, ikastarora joan dela eta/edo aprobetxatu duela frogatzen duen agiria aurkezteko eskatuko zaio langileari.

d) Lan-kontratudun langileak lanpostua betetzeko behar diren prestakuntza ikastaroetara joatea idatziz eskatu beharko du, eta nagusiaren eta Alkatetzaren oniritzia izan beharko du.

e) Lanpostua betetzeko behar diren prestakuntza ikastaroak udalak eskaintzen ez baditu, langileari dagokion ikastarora joateko baimena eman ondoren, ikastaroaren kostuaren % 100 itzuliko zaio.

34. artikulua. Laneko arropa.

1. Udalak garbitasuneko eta higieneko neurri egokiak hartuko ditu horrelakoak behar dituzten laneko lokaletan edo aldageletan, hala nola komunak, dutxak, ur beroa, aldageletako armairuak, xaboia, etab.

2. Langile guztiek eskubidea dute beren lanerako behar dituzten jantziak izateko (eskularruak, buzoak, uniformeak, botak, uretako arropa, oinetakoak, etab.). Jantzien kalitatea egokia izanen da egin beharreko lanerako.

Udalaren logotipoak izanen dituzte, eta lan orduetan bakarrik janzten ahalko dira.

3. Udako jantziak urtero maiatzaren 1a baino lehen emanen zaizkie, eta negukoak urriaren 15a baino lehen. Jantziak urtean behin bakarrik ematen badira, urte bakoitzeko urtarrilaren 31 baino lehen emanen dira urte osokoak.

4. Urteko jantzien kostua langileko ezartzen ahalko da, eta langileek, kostu horren barruan, zehazten ahalko dute jantzi mota bakoitzetik zenbat eskuratu euren beharren arabera; kontrola zerbitzuaren arduradunak izanen du.

Jantzien prezioa erabaki arte, 6. puntuan ezarritakoa beteko da.

5. Jantzien muga egun hauek ezarriko dira, ondoren zehazten diren taldeentzat:

–Udaleko zerbitzu anitzak:

  • Haizetik babesteko jaka bat edo neguko jaka bat.
  • Kamiseta termiko bat eta galtza termiko pare bat.
  • Bi buzo edo galtza pare bat eta jertse bat urtean.
  • Bi alkandora pare.
  • Bi oinetako pare urtean (negukoak eta udakoak).
  • Zira bat bi urtetik behin.
  • Uretako bota pare bat bi urtetik behin.
  • Neguko buruko jantzi bat (txanoa) eta udako buruko jantzi bat (bisera).

–Familia-langileak.

Corellako Udalaren Etxeko Laguntza Zerbitzuko familia langileei, urtero, lanerako jantzi eta oinetako hauek emanen zaizkie:

  • Neguko eta udako zapatak.
  • Mantala.
  • Neguko uniformea.
  • Udako uniformea.

Gainera, negurako anorak iragazgaitz bat bi urtetik behin.

–Landazaintza:

  • Negukoa:
    • Bi galtza pare.
    • Bi atorra.
    • Jertse bat.
    • Bota pare bat.
    • Anorak bat (bi urtetik behin).
  • Udakoa:
    • Bi galtza pare.
    • Bi atorra.
    • Bota pare bat.

6. Halaber, zerbitzuan hondatutako jantziak ordeztu eginen dira, lehen aipatu diren epeak kontuan hartu gabe.

7. Datuak bistaratzeko pantailekin lan egiten duten langileei beren lanpostu eta ikusmen beharren araberako betaurrekoak emanen dizkie Udalak.

a) Hiru urtez behin betaurrekoak berritzeko aukera izanen dute (lehen ikusmen aldaketa handirik ez badute), Corellako optika dendetan erosiak.

b) Langile bakoitzari bere graduazioagatik dagozkion kristalak eta armazoia optika bakoitzeko oinarrizkoak izanen dira. (Urtero zehaztuko da Corellako optika dendekin).

c) Langileak bestelako kalitate nahiz prezioko kristal edo armazoi modeloak erosten ahalko ditu, oinarrizkoekiko diferentzia berak ordainduta.

XEDAPEN GEHIGARRIA

Hitzarmen kolektibo honetan jaso ez den aurreikuspen edo xedapen oro foru legeek edo legegintzako foru dekretuek arautuko dute, bai eta Nafarroako Gobernuak bere zerbitzuko langileentzat une bakoitzean onesten dituen erregelamenduzko arauek ere.

XEDAPEN INDARGABETZAILEA

Hitzarmen honek, indarra hartzen duenetik, bertan jasotako gaiak beste modu batean arautu dituzten aurreko xedapenak ordezten ditu, zehazki Corellako Udalaren langile lan-kontratudunentzako hitzarmen kolektiboa (2021eko otsailaren 9ko Nafarroako Aldizkari Ofiziala, 30. zk.).

AZKEN XEDAPENA

Corellako Udalak kasu bakoitzean behar diren administrazio egintzak edo xedapenak emanen ditu, hitzarmen kolektibo honen atalak behar den moduan onetsi eta indarrean sar daitezen.

Arestiko hori gorabehera, Udalbatzak, bidezkoa bada, hitzarmen kolektibo hau onetsi ondoren, oso-osorik argitaratuko da Nafarroako Aldizkari Ofizialean, orok jakin dezan.

Langileen ordezkariak: Yolanda Riccobene Liroz, Milagrosa Gil García eta Santiago Ruiz López (ELA sindikatua), Alberto Pezonaga Librada (CCOO sindikatua) eta Esther García Cantón (UGT sindikatua). Corellako Udaleko alkatea, Gorka García Izal.

ERANSKINAK

I. ERANSKINA.–LAN KONTRATUDUN LANGILE FINKOAK ETA ALDI BATERAKOAK, HURRENGO ERANSKINETAN ZEHAZTEN EZ DIRENAK

Ordainsariak

1. Ordainsariak (lan kontratudun langile finkoen osagarriak barne) Nafarroako Gobernuak bere funtzionarioentzat onetsitakoak izanen dira.

2. Laneko arriskuen prebentzioaren arloan: euren lanpostua dela eta zerbikaletako lesioak edota bizkarreko muskulu-eskeletokoak izan ditzaketen lan-kontratudun langileei urtero Udalak antolatutako ikastaro batera (gimnasia, pilates, yoga eta abar) doan joateko aukera emanen du Udalak.

3. Oporrak urte naturalaren barruan hartu beharko dira, hurrengo urteko urtarrilaren 10a baino lehen.

II. ERANSKINA.–UDALEKO ZERBITZU ANITZETAKO LANGILEAK

Bizi kalitatea

1. Udaleko zerbitzu anitzen garbiketa Udalaren ardura izanen da.

2. Honako ordutegi hau izanen dute: neguan, 07:30etik 15:30era, eta, udan (ekainaren 1etik abuztuaren 31ra), 07:00etatik 14:00etara.

3. Salbu eta Udalak ezartzen ahal dituen zerbitzu beharrak.

4. Done Mikelen jaietan, langileek bi egun libre izanen dituzte. Gehienez ere bi langilek har dezakete egun bera.

5. Prebentzio neurriei buruzko ebaluazioa: balorazioa, informazioa eta prestakuntza, lehenengo aldiz egiten diren eta langileentzat arriskutsuak diren jardueretarako.

6. Lan egutegiaren urteko plangintza, lanalditik kanpo egin beharreko ekintzak aurreikusita.

Ordainsariak

1. Ordainsariak (lan kontratudun langileen osagarriak barne) Nafarroako Gobernuak bere funtzionarioentzat onetsitakoak izanen dira.

2. Oporrak urte naturalaren barruan hartu beharko dira, hurrengo urteko urtarrilaren 10a baino lehen.

Jaiegunetako lanaldiak

1. Jaieguneko lanalditzat hartuko da igandean egiten dena, baita Nafarroako Gobernuak adierazitako jaiegunetan egiten dena ere.

2. Honako hauek ere jaieguntzat joko dira:

–Urtarrilaren 5a: 14:00etatik aurrera.

–Villarko Andre Mariaren larunbata.

–Abenduaren 24a eta 31: 14:00etatik aurrera.

–Irailaren 23ko 06:00etatik urriaren 1eko 06:00etara.

III. ERANSKINA.–LANDAZAINTZA

1. Esku hartze azkarreko jarduketak:

Esku hartze azkarreko ohiz kanpoko jarduketak egin behar badira, eta horietan, azkar jardun behar delako, ezin bada fitxaketa arrunta egin (suteak, uholdeak, delitu goria, etab.), udaltzainburuari, Udaltzaingoaren patruilari edo alkateari jakinaraziko zaio, jarduketa hasi eta akitu dela jasota gera dadin. Denbora hori lan ordutegitzat hartuko da, lan istripurik gertatzen bada, aseguruak estaliko duela bermatzeko. Era berean, Udaleko, Udaltzaingoko edo beste segurtasun indar eta kidego batzuetako langileek egindako ohiz kanpoko errekerimenduek eranskin honetan adierazitako izaera bera izanen dute.

2. Eginkizunak:

Lanpostuaren balorazioaren azterketan jasotakoez gain eta antzeko bestelako eginkizunekin batera, honako eginkizun espezifiko hauek bete beharko ditu: udal mugarteko landa eremua zaindu, kontrolatu eta ikuskatzea, araudia eta ordenantzak betetzeari eta baimenen doikuntzari (lurzoru urbanizaezina) dagokionez, Udaltzaingoaren Burutzaren ardurapean eta lanposturako deialdiaren oinarriekin bat etorriz.

3. Landazaintzako D mailako langileen osagarriak plantilla organikoan onartutakoak izanen dira.

IV. ERANSKINA.–UDAL HILERRIKO ARDURADUNA ETA EHORZLEA

Udaleko zerbitzu anitzetako langileei dagozkien eginkizunak bete beharko ditu, eta, bereziki, ehorzleari eta udal hilerriko arduradunari dagozkionak:

Edonola ere, ehorzle lanek lehentasuna izanen dute agintzen zaizkion beste lanen aurrean.

Zerbitzu anitzetako arduradunaren mende egonen da.

Honako eginkizun hauek dagozkio ehorzleari:

–Ehorzketak: hilobiak prestatzea, irekitzea eta ixtea, nitxoetan, kolunbarioetan, panteoietan eta lurrean.

–Gorpuzkiak eramatea: hilobiak irekitzea eta ixtea eta gorpuzkiak eramatea.

–Hilerriaren garbiketa orokorra eta mantentze lanak egitea.

–Jarduketen aurretik interesdunei harrera egitea eta administrazio baimenak udaletxera eramatea (ehorzteko lizentzia, gorpuzkiak eramateko baimena, etab.).

–Hilerria ireki eta ixtea Udalak ezarritako orduetan.

–Oro har, hilerria egoera ezin hobean egoteko egin behar diren lan guztiak, bai eta Udaleko brigadako arduradunak agintzen dizkionak ere.

Ordutegia:

Ohiko ordutegia udaleko zerbitzu anitzetarako ezarritakoa izanen da, ehorzleak ematen duen zerbitzuaren beharretara egokituta (jaiegunetan lan egitea barne). Ohiko ordutegian eta ordutegi horretatik kanpo egindako orduen kopurua udaleko zerbitzu anitzetako gainerako langileen kopuru bera izanen da.

Berehalako arreta behar duten zerbitzuen kasuan, langileak nahitaez eman beharko du zerbitzua, bere lan ordutegitik kanpo badago ere, dagozkion ordu konpentsazioei kalterik egin gabe.

Lanpostuaren soldatak osagarri hauek izanen ditu:

–Lanpostuko osagarria: % 40,91.

–Mailako osagarria: % 15.

–Lanaldiaren luzapeneko osagarria: % 10.

–Arrisku bereziko osagarria: % 10.

Udal hilerria ohiko lanalditik kanpo ireki edo itxi behar bada, hilerriko arduradunak eta bere ordezkoak ados jarri beharko dute.

Ohiko lanalditik kanpoko lan horretarako, aparteko ordu erdi bat zenbatuko da astelehenetik ostiralera ematen den irekiera zerbitzu bakoitzeko; 45 minutu larunbatean ematen den irekiera eta itxiera zerbitzu bakoitzeko, eta ordubete igandeetan ematen den zerbitzu bakoitzeko.

Iragarkiaren kodea: F2509062