Iragarkia
148. ALDIZKARIA - 2025eko uztailaren 24a
2. NAFARROAKO TOKI ADMINISTRAZIOA
2.1. OPOSIZIOAK ETA LEHIAKETAK. LAN PUBLIKOAREN ESKAINTZA
ANTSOAINGO, BERRIOBEITIKO, BERRIOZARKO, ITZAKO ETA TXULAPAINGO OINARRIZKO GIZARTE ZERBITZUEN MANKOMUNITATEA
Deialdia, oposizio-lehiaketa bidez betetzeko gizarte-langilearen lanpostu bat, funtzionarioen araubidekoa, Mankomunitatearen zerbitzura aritzeko
Mankomunitate honetako buruak, 2025eko uztailaren 1eko 71/25 Ebazpenaren bidez, deialdi baten oinarriak onetsi zituen, oposizio-lehiaketa bidez betetzeko gizarte-langilearen lanpostu bat, funtzionarioen araubidekoa, Mankomunitatearen zerbitzura aritzeko.
1.–Arau orokorrak.
1.1. Antsoaingo, Berriobeitiko, Berriozarko, Itzako eta Txulapaingo Oinarrizko Gizarte Zerbitzuen Mankomunitatearen zerbitzuko gizarte-langile izateko lanpostu bat, funtzionarioen araubidekoa eta B mailakoa, oposizio-lehiaketa bidez eta txanda irekian betetzea du xede deialdi honek, lanaldi osoan jarduteko Antsoaingo, Berriobeitiko, Berriozarko, Itzako eta Txulapaingo Oinarrizko Gizarte Zerbitzuen Mankomunitatean. Nafarroako Administrazio Publikoen zerbitzuko Langileen Estatutuaren testu Bateginean (abuztuaren 30eko 251/1993 Legegintzako Foru Dekretuak onetsia), hura garatu eta betetzeko erregelamenduan, gainerako aplikazio arauetan eta deialdiaren oinarrietan xedatutakoari jarraituz eramanen da aurrera, eta bat etorriz 2025erako onetsitako lan publikoaren eskaintzarekin. Lanpostuak 025 zenbakia du plantilla organikoan.
1.2. Gizarte-langilearen lanpostuaren berezko eginkizunak eta kategoria eta maila horretako bestelako eginkizunak izanen ditu lanpostuak, eta baita berariaz agintzen zaizkionak ere.
Eginkizunok gauzatzeko, ibilgailu partikularra eskuarki erabili beharra ekar lezake, Mankomunitatea osatzen duten entitateen lurralde esparruko herrietara joateko, zerbitzuari lotutako laguntza emateko.
1.3. Lanpostua B mailako lansariez hornituko da, uztailaren 4ko 158/1984 Foru Dekretuaren bidez onetsitako lansarien behin-behineko erregelamenduan eta gainerako xedapen osagarrietan erabakitakoaren arabera; bestetik, Mankomunitateak une bakoitzean ezarri eta plantilla organikoan jasotzen diren osagarriak.
1.4. Lanaldia zerbitzuaren beharretara egokituko da, eta administrazioko organo eskudunek noiznahi aldatzen ahalko dute.
1.5. Hautaprobak gainditu eta deialdi honen xedeko lanpostuan aritzeko izendatzen den izangaia, Antsoaingo, Berriobeitiko, Berriozarko, Itzako eta Txulapaingo Oinarrizko Gizarte Zerbitzuen Mankomunitatean sartu eta funtzionario bilakatzean, Gizarte Segurantzaren Araubide Orokorrean kidetuko da, alta emanen zaio eta aipatu araubidearen babespean geldituko da.
Deialdi honetako lanposturako izendatzen den izangaia, lehendik Nafarroako Administrazio Publikoetako funtzionarioa bada eta eskubide pasiboen eta osasun eta gizarte laguntzaren araubidean, hots, Nafarroako Administrazio Publikoen zerbitzuko Langileen Estatutuan eta gainerako xedapen osagarrietan aipatzen den hartan, kidetuta badago, bertan segitzea aukeratzen ahal du edo Gizarte Segurantzaren aipatu araubidean kidetzea.
1.6. Halaber, aldi baterako kontratatuak izateko zerrenda bat osatzea du xede deialdi honek hautatze prozesuan lanpostua eskuratzen ez duten izangaiekin, deialdiaren 9. oinarrian ezarritakoari jarraikiz.
2.–Baldintzak.
2.1. Oposizio-lehiaketa honetan onartuak izateko, izangaiek baldintza hauek bete beharko dituzte eskabideak aurkezteko epea bukatzen den egunean:
a) Espainiako nazionalitatea edo Europar Batasuneko edozein estatutakoa izatea. Orobat, espainiarren eta Europar Batasuneko beste estatuetako herritarren ezkontideek hartzen ahal dute parte, zuzenbidez bananduta ez badaude; halaber, haien ondorengoek eta ezkontidearenek, zuzenbidez bananduta ez badaude, 21 urtetik beherakoak badira edo, adin horretatik gorakoak izaki, haien kontura biziz gero. Orobat aplikatuko zaie, Europar Batasunak sinatu eta Espainiak berretsitako nazioarteko itunen arabera, langileen zirkulazio librea onartzen duten herrialdeetako biztanleei.
b) Hamasei urte beteak izatea eta ez gainditzea erretiroa nahitaez hartzeko gehieneko adina.
c) Gizarte-laneko diplomadunaren titulua izatea, edo baliokidetzat aitortutako beste bat, edo gizarte-laneko graduaren titulua, edo eskaerak aurkezteko epea bukatzen den egunean titulu hori eskuratzeko moduan egotea (hura eskuratzeko eskubideak ordaindu izanaren ziurtagiria aurkeztu beharko da).
Atzerrian lorturiko titulua izanez gero, aipatu epea betetzen den egunean, haren homologazioa frogatzen duen agiriaren jabe izatea.
Izangaiek alegatzen badute badituztela eskatutako kategorian aritzea ahalbidetzen dieten ikasketa baliokideak, aipatu beharko dute baliokidetasun hori onartzen duen lege edo erregelamenduzko xedapena, edo, bestela, aurkeztu beharko dute Hezkuntza Ministerioak emandako ziurtagiria.
d) Bete behar diren eginkizunetan aritzeko behar den gaitasun fisiko eta psikikoa izatea.
e) Ez egotea dagozkion eginkizun publikoak betetzeko desgaiturik edo bazterturik, eta administrazio publikoren bateko zerbitzutik bereizia ez izatea.
Espainiako nazionalitatea ez duten izangaiek aurkeztu beharko dute zinpeko deklarazio bat edo hitzemate bat, adierazteko ez dutela diziplina-zehapenik edo kondena penalik, galarazten dienik beren estatuko funtzio publikoan sartzea.
f) B motako gidabaimena indarrean izatea.
g) Epai irmo baten bidez kondenatua ez izatea sexu-askatasunaren eta sexu-ukigabetasunaren aurkako delitu batengatik, ez eta gizakien salerosketarengatik ere.
2.2. Europar Batasunak izenpetu eta Espainiak berretsitako nazioarteko itunak direla medio, langileen zirkulazio librea aplikatzen den eremuko estatu batekoen kasuan, itunaren frogagiria aurkeztu beharko da.
2.3. Gainditu eta lanpostua eskuratzen duen izangaiak deialdi honen 7. oinarrian ezarritako epean eta moduan frogatu beharko ditu aipatu beharkizun guztiak (salbu eta 3. oinarrian ezarritakoa). Eskabideak aurkezteko epearen azken egunean bete beharko ditu eta haien jabe izanen da hautatze prozeduran, harik eta izendatu arte.
3.–Eskabideak.
3.1. Deialdian parte hartzeko eskabideak aurkezteko 20 egun naturaleko epea egonen da, deialdi hau Nafarroako Aldizkari Ofizialean argitaratzen den egunaren biharamunetik zenbatzen hasita, eta modu telematikoan aurkeztu behar dira, dagokion izapidea baliatuta Mankomunitatearen erregistro elektronikoan ( https://sedeelectronica.manserso.org/ ).
Eskabideak aurkezteko epea luzaezina da.
Administrazio Publikoen Administrazio Prozedura Erkideari buruzko urriaren 1eko 39/2015 Legearen 14.3 artikuluan xedatutakoaren arabera, "administrazioek ezartzen ahalko dute nahitaezkoa dela bitarteko elektronikoen bidez jartzea harremanetan, bai prozedura batzuetarako, bai eta, beren gaitasun ekonomiko edo teknikoagatik, dedikazio profesionalagatik edo egiaztaturiko bertze arrazoiren batengatik, behar diren bitarteko elektronikoez baliatzeko aukera duten pertsona fisikoen zenbait kolektiborentzat ere".
Halaber, 2025erako Nafarroako Aurrekontu Orokorrei buruzko abenduaren 26ko 19/2024 Foru Legearen 27. artikuluan (Nafarroako Administrazio Publikoek deitutako hautapen prozesuei buruzko xedapenak), hau ematen da aditzera: "Nafarroako administrazio publikoei ahalmena ematen zaie Administrazioan sartzeko edo bertako lanpostuak betetzeko hautapen-prozesuen deialdietako eskabideak eta gainerako dokumentazioa bitarteko elektronikoen bidez aurkez daitezela eskatzeko".
3.2. Eskabideak deialdi honetan (I. eranskina) argitaratutako eredu normalizatuaren arabera egin behar dira eta haietan izangaiek adierazi behar dute baldintza guzti-guztiak betetzen dituztela eskabideak aurkezteko epearen azken egunean.
Behar bezala betetako eskabideari dokumentazio hau gehituko zaio:
a) Nortasun agiri nazionalaren kopia, edo izangaiaren nazionalitatea eta nortasuna frogatzen dituen beste agiri baliokide batena.
b) Deialdiko 2. oinarrian eskatzen diren tituluetako baten kopia, edo titulua lortzeko eskubideak ordaindu dituela frogatzen duen gordekinarena, edo, bidezkoa denean, eskaerak aurkezteko epea bukatu aurretik titulua eskuratzeko moduan zegoela frogatzen duen ziurtagiria.
c) B motako gidabaimen indardunaren kopia.
d) Alegatutako merezimenduak frogatzen dituzten ziurtagiriak, lehiaketaldian baloratzeko, 6. oinarrian ezarritako baremoari jarraikiz.
Dokumentazio hori aurkezten ez bada eskabideetarako ezartzen diren epean eta moduan, ez dira baloratuko merezimenduak.
e) Espedientea formalizatzeko eta azterketa eskubideetarako 18,00 euro ordaindu izanaren ordainagiria (diru-sarrera egiteko kontua: ES44 2100 5184 5521 0046 126), izangaiaren izen-abizenak adierazita eta kontzeptuan "gizarte-langilea" idatzita.
f) Sexu Delituen Egileen Erregistro Nagusiak emandako ziurtagiri negatiboa, zeina arautu baitzen abenduaren 11ko 1110/2015 Errege Dekretuaren bidez, ziurtatzen duena ez dela kondenatua izan epai irmo baten bidez sexu-askatasunaren eta sexu-ukigabetasunaren aurkako delitu batengatik, ez eta gizakien salerosketarengatik ere.
g) Desgaitasun aitortua duten izangaiek, ariketak egin ahal izateko denbora edo baliabideetan egokitzapenik behar badute, zilegi izanen dute horiek eskabidean eskatzea eta, hartarako, aparteko orri batean adierazi beharko dute nolako desgaitasuna duten eta zer egokitzapen eskatzen duten. Horrekin batera, legeen arabera desgaitasuna dutela frogatzeko agiria ere aurkeztu beharko dute, organo eskudunak emana.
Aski izanen da dokumentazioaren kopia arruntak aurkeztea, baina aurkeztutako datuak edo agiriak ez-zuzenak edo faltsuak badira, behar diren erantzukizun penal, zibil edo administratiboak eskatuko dira.
3.3. Azterketa eskubideen tasa ordaintzen ez bada, izangaia baztertu eginen da.
Tasa ez da itzuliko, izangaiak bazterturik gelditzen badira haiei egotz dakizkiekeen arrazoiengatik.
3.4. Aipatutako agiri horiek aurkezten ez dituztenak ez dira onartuko deialdian, eta ordura arteko jarduketa guztiak baliorik gabe geldituko dira, deusetan galarazi gabe legokiekeen erantzukizuna parte hartzeko eskabidea faltsutzeagatik.
3.5. Gainerako betebeharren egiaztagiriak prozesua gainditzen duten izangaiek aurkeztu beharko dituzte, deialdi honen 7. oinarrian ezartzen den epean eta moduan.
4.–Onartuen eta baztertuen zerrenda.
4.1. Eskabideak aurkezteko epea burututakoan, Mankomunitateko buruak ebazpena emanen du onartu eta baztertuen behin-behineko zerrenda onesteko, eta Nafarroako Aldizkari Ofizialean eta Mankomunitatearen web-orrian argitaratzeko aginduko du. Izangai bazterturik ez bada, besterik gabe onetsiko da onartuen zerrenda behin betiko gisa.
4.2. Izangai baztertuek hamar egun balioduneko epea izanen dute, behin-behineko zerrenda Nafarroako Aldizkari Ofizialean argitaratzen denetik, erreklamazioak aurkezteko eta, akatsik egin badute, haiek zuzentzeko. Telematikoki aurkeztu beharko dira erreklamazioak.
4.3. Erreklamazioetarako epea bukatutakoan eta haiei erantzun ondoren, Mankomunitateko buruak ebazpena emanen du onartu eta baztertuen behin betiko zerrenda onesteko, eta Nafarroako Aldizkari Ofizialean eta Mankomunitatearen web-orrian argitaratzeko aginduko du, probak zein toki, egun eta ordutan hasiko diren adierazita.
4.4. Onartuen zerrendan agertzea ez da aski ebazpen honen bitartez abiatzen den prozeduran eskatutako baldintzak betetzen direla onartzeko. Hautapen-prozesua gainditu ondoren, izangaiek aurkeztu beharreko dokumentazioa aztertzen denean, egiaztatzen baldin bada ez dutela baldintzaren bat betetzen, izangaiek galduko dituzte prozedura honetan parte hartzeagatik dituzten eskubide guztiak, galarazi gabe faltsukeria dela-eta dagozkien erantzukizun penal, zibil edo administratiboak.
4.5. Izangai onartu eta baztertuen zerrendak argitaratzearekin, egintzat joko da interesdunei egin beharreko jakinarazpena, urriaren 1eko 39/2015 Legearen 45.b) artikuluan ezarritako ondorioetarako (Administrazio Publikoen Administrazio Prozedura Erkideari buruzko Legea).
5.–Kalifikazio-epaimahaia.
5.1. Kalifikazio epaimahaia izendatuko da behin deialdi hau onetsi ondoren eta izangai onartuen eta baztertuen behin betiko zerrenda onetsi baino lehen. Kide kopurua bakoitia izanen da, hiru gutxienez, eta horien ordezkoen kopuru bera izendatu beharko da. Izendapen hori Mankomunitatearen web-orrian argitaratuko da.
5.2. Epaimahaia hautaprobak baino lehen eratu beharko da, buruak deialdia eginda eta, eratu eta jardun ahal izateko, kideen gehiengo absolutuak bederen agertu beharko du.
5.3. Epaimahaiak gehiengoz ebatziko ditu deialdiaren oinarriak interpretatzeko eta aplikatzeko moduari buruz sortzen diren gorabehera guztiak.
5.4. Epaimahaiak aholkulari adituen laguntza izan dezake, proba batzuetan nahiz guztietan. Aholkulari horiek beren espezialitate teknikoetan baizik ez dira ariko, eta haietan bakarrik emanen diote laguntza epaimahaiari.
5.5. Kalifikazio-epaimahaiko kideek parte hartzeari uko egin beharko diote, eta organo deitzaileari horren berri eman, baldin eta Sektore Publikoaren Araubide Juridikoari buruzko urriaren 1eko 40/2015 Legearen 23. artikuluan abstentziorako aipatzen diren egoeretako batean badaude.
5.6. Izangaiek mahaikideak errekusatzen ahalko dituzte Sektore Publikoaren Araubide Juridikoari buruzko urriaren 2ko 40/2015 Legearen 24. artikuluuan ezarritako moduan eta baldintzetan.
6.–Oposizio-lehiaketaren nondik norakoak.
6.1. Oposizio-lehiaketak aldi hauek izanen ditu:
a) Merezimenduen balorazioko fasean, hots, lehiaketaldian, izangaiek alegatu dituzten merezimenduen balorazioa eginen da, deialdiko baremoaren arabera.
b) Oposizioaldian, proba bat edo gehiago eginen dira, lanpostuaren eginkizunak zuzen eta egoki betetzeko beharrezkoak diren ezagutzei eta gaitasunei buruz.
Deialdi honen faseak hurrenkera honetan eginen dira: lehiaketaldia lehenik eta, hura bukatutakoan, oposizioaldia.
6.2. Lehiaketaldia:
6.2.1. Izangaiek aurkezturiko merezimenduak baloratuko ditu epaimahaiak, ondotik heldu den baremoaren arabera baloratu ere. Merezimendu guztiak agiri bidez frogatu behar dituzte izangaiek, oposizio-lehiaketan parte hartzeko eskabidea aurkeztean. Horrela egin ezean, ez dira kontuan hartuko.
6.2.2. Alegatu eta frogatzen diren merezimenduak honako baremo honen arabera kalifikatu eta puntuatuko dira:
a) Laneko esperientzia. (27,50 puntu arte, gehienez ere).
–Nafarroako edozein toki entitatetan, kontratu bidezko harremana dela medio, gizarte-langilearen lanpostuan aritzeagatik, urte bakoitzeko: 5 puntu; gehienez, 25 puntu.
–Nafarroako toki entitatea ez den administrazio publiko batean, kontratu bidezko harremana dela medio, gizarte-langilearen lanpostuan aritzeagatik, urte bakoitzeko: 2,50 puntu; gehienez, 12,50 puntu.
Zer administrazio publikotan aritu den, harexek emanen du ziurtagiria bertan egindako zerbitzuak frogatzeko. Honako alderdi hauek, gutxienez, agertu beharko dira: izangaiaren izen-deiturak, NAN/AIZ zenbakia, lanbide-kategoria (gizarte-langilea, alegia), maila, lanaldi mota eta zenbat denboraz aritu den.
Lan edo administrazio araubidean, langile finko edo behin-behineko gisa egindako zerbitzuak hartuko dira kontuan, baita bitarteko gisa edo lanpostuaren jabe izaki egindakoak ere. Baina atal batean baino gehiagotan sartutako zerbitzuak denbora berean eginak badira, puntuaziorik handiena dutenak bakarrik baloratuko dira.
Egiaztatutako esperientzia urte kopuru osokoa ez bada, proportzioan dagokiona aterako da. Lanaldi partzialean egindako zerbitzuak berdin baloratuko dira, lanaldia edozein izanik ere.
b) Prestakuntza osagarria.
1.–Euskara.
Bat etorriz 97/2024 Foru Dekretuan ezarritako portzentajearekin, euskararen balorazioa %7koa izanen da, merezimenduen baremoaren gainerakoari esleitutako puntuazioari dagokionez (foru dekretu horrek arautzen du nola baloratu merezimenduak Nafarroako administrazio publikoetan sartzeko eta bertako lanpostuak betetzeko).
a) Euskarazko A1 mailari dagokion ziurtagiria edo titulua izateagatik, ofizialki egiaztatutako erakundeek emandakoa, jarraikiz Europako Erreferentzia Esparruari: 0,42 puntu.
b) Euskarazko A2 mailari dagokion ziurtagiria edo titulua izateagatik, ofizialki egiaztatutako erakundeek emandakoa, jarraikiz Europako Erreferentzia Esparruari: 0,84 puntu.
c) Euskarazko B1 mailari dagokion ziurtagiria edo titulua izateagatik, ofizialki egiaztatutako erakundeek emandakoa, jarraikiz Europako Erreferentzia Esparruari: 1,26 puntu.
d) Europako Erreferentzia Esparruak finkatu euskarazko B2 mailari dagokion ziurtagiria edo titulua izateagatik, ofizialki egiaztatutako erakundeek emandakoa: 1,68 puntu.
e) Europako Erreferentzia Esparruak finkatu euskarazko C1 mailari dagokion ziurtagiria edo titulua izateagatik, ofizialki egiaztatutako erakundeek emandakoa: 2,10 puntu.
2.–Ingelesa eta/edo frantsesa.
a) Ingeleseko edo frantseseko A1 mailari dagokion ziurtagiria edo titulua izateagatik, ofizialki egiaztatutako erakundeek emandakoa, jarraikiz Europako Erreferentzia Esparruari: 0,25 puntu, hizkuntza bakoitzeko.
b) Ingeleseko edo frantseseko A2 mailari dagokion ziurtagiria edo titulua izateagatik, ofizialki egiaztatutako erakundeek emandakoa, jarraikiz Europako Erreferentzia Esparruari: 0,50 puntu, hizkuntza bakoitzeko.
c) Ingeleseko edo frantseseko B1 mailari dagokion ziurtagiria edo titulua izateagatik, ofizialki egiaztatutako erakundeek emandakoa, jarraikiz Europako Erreferentzia Esparruari: 0,75 puntu, hizkuntza bakoitzeko.
d) Ingeleseko edo frantseseko B2 mailari dagokion ziurtagiria edo titulua izateagatik, ofizialki egiaztatutako erakundeek emandakoa, jarraikiz Europako Erreferentzia Esparruari: 1,00 puntu, hizkuntza bakoitzeko.
e) Ingeleseko edo frantseseko C1 mailari dagokion ziurtagiria edo titulua izateagatik, ofizialki egiaztatutako erakundeek emandakoa, jarraikiz Europako Erreferentzia Esparruari: 1,25 puntu, hizkuntza bakoitzeko.
Titulu edo ziurtagiri bat baino gehiago aurkeztuz gero, epaimahaiak maila gorena duena baizik ez du baloratuko.
Ezar daitezen hizkuntzen jakite maila frogatzen duten titulu eta ziurtagirien arteko baliozkotzeak, aintzat hartuko da Nafarroako Administrazio Publikoaren Institutuko zuzendari kudeatzailearen 210/2010 Ebazpena.
Jatorrizko tituluaren edo haren kopia konpultsatuaren bidez frogatu beharko dira.
Izangaiek alegatutako merezimenduen gaineko azalpenak eta datu osagarriak eskatzen ahal ditu epaimahaiak, noiznahi.
Epaimahaiaren ustez izangai bakoitzak aurreko ataletako bakoitzean dituen merezimenduak baloratuko dira, eta ez dira inoiz kontuan hartuko alegatu gabeko merezimenduak edo agiri bidez frogatu ez direnak.
6.2.3. Lehiaketaldia burututakoan, epaimahaiak argitara emanen ditu Mankomunitatearen web-orrian izangaiek fase horretan lortutako behin-behineko puntuazioak.
Behin-behineko puntuazioak argitaratuta, izangaiek bost egun balioduneko epea izanen dute, horiek argitaratu eta biharamunetik zenbatzen hasita, alegazioak aurkezteko. Horretara, eskabide telematikoa erabili beharko dute.
6.2.4. Alegaziorik egon bada, horiek ebatzi ondoren, epaimahaiak Mankomunitatearen web-orrian argitaratutako du izangaiek lehiaketaldiko atal bakoitzean lortutako kalifikazioen behin betiko zerrenda. Oposizioaldia hasi baino berrogeita zortzi ordu lehenago, gutxienez, argitaratu behar du zerrenda.
6.3. Oposizioaldia:
Oposizioaldia 2025eko azarotik aurrera hasiko da.
6.3.1. Proba bakoitzerako deialdi bakarra eginen da. Izangaiek nortasun agiri nazionala, pasaportea edo gidabaimena aldean dutela agertu beharko dute eta, eskatzen bazaie, erakutsi egin beharko dute, bestela kanporatu eta baztertuko baitira, salbu eta zuzenbidean onarturiko beste moduren batean nor diren egiaztatzen badute egintza horretan berean. Probetan oharretatik kopiatzeak nahiz beste edozein iruzur egiteak berehalako kanporatzea ekarriko du, jarduketa penalak deusetan galarazi gabe, hala behar bada.
Prozesutik baztertuko dira, orobat, iragarritako egunetan, orduetan eta tokietan agertzen ez diren izangaiak eta aipatu diren agirien bidez identifikatzen ez direnak.
Hautaproba egiteko, desgaitasuna duten izangaiek hala eskatuz gero, denborak eta baliabideak ahal bezala moldatuko dira, haien eskabidean adierazi dutenaren arabera.
Gai guztiak eskatuko dira deialdi hau Nafarroako Aldizkari Ofizialean argitaratzen den egunean indarrean den araudiaren arabera.
Proba egiteko ez da inolako testurik edo dokumentaziorik erabiltzen ahalko, ezta gailu elektronikorik edo bertzelako materialik ere, boligrafo urdina edo beltza izan ezik.
6.3.2. Oposizioak hiru proba izanen ditu:
a) Lehenbiziko proba (teorikoa).
Idatziz erantzun beharrekoa, epaimahaiak hasi aurretik erabakiko duen denboran. Aukeran zenbait erantzun dituzten galderak izanen dira, test modukoak, II. eranskineko gai-zerrendari buruzkoak. Erantzunetatik bat bakarra izanen da zuzena. Proba hasi baino lehen, zehaztuko dira proba baloratzeko irizpidea eta erantzun okerren penalizazioa, zenbait erantzun-aukera dituzten galderetarako. Gehienez ere 60 puntu emanen dira. Bazterturik geldituko dira gutxienez 30 puntu lortzen ez dituzten izangaiak.
b) Bigarren proba (teoriko-praktikoa).
Idatziz erantzun beharrekoa, epaimahaiak hasi aurretik erabakiko duen denboran. Hainbat erantzunetako galderak izanen dira, teoriko-praktikoak, II. eranskineko gai-zerrendari buruzkoak. Haietatik bat bakarra izanen da zuzena. Proba hasi baino lehen, zehaztuko dira proba baloratzeko irizpidea eta erantzun okerren penalizazioa, zenbait erantzun-aukera dituzten galderetarako. Gehienez ere 20 puntu emanen dira. Bazterturik geldituko dira gutxienez 10 puntu lortzen ez dituzten izangaiak.
c) Hirugarren proba.
Proba ez baztertzailea; hartan, aurreko probak gainditu eta baztertuta gelditu ez diren izangaiek hainbat proba psikotekniko egin beharko dituzte, deialdiaren xedeko lanpostua eskuratu gogo dutenak haren eskakizun profesiografikora zenbateraino egokitzen zaizkion neurtzeko. Proba hauek Nafarroako Administrazio Publikoaren Institutuko Psikologia Zerbitzuak prestatuko ditu. Gehienez ere 12 puntu emanen dira.
Antolaketa-kontuak direla eta, probak egiteko deia egun eta ordu ezberdinetan egiten ahalko da, izangaien kopurua kontuan hartuta. Horretarako, beharrezko argibide guztiak argitaratuko Mankomunitatearen web-orrian, berrogeita zortzi ordu lehenago, gutxienez.
6.3.3. Gutun-azal itxien sistema erabiliko da. Lehen eta bigarren ariketak zuzendu eta gero, epaimahaiak kalifikazioen zerrenda eta plikak jendaurrean irekitzeko eguna eta ordua emanen ditu argitara Mankomunitatearen web-orrian.
6.3.4. Proba bakoitzaren kalifikazioa bukatu ondoren, epaimahaiak Mankomunitearen web-orrian argitaratuko ditu izangaiek lortutako puntuazioak, eta bost egun balioduneko epea ezarriko du, behin-behineko kalifikazioak argitaratzen direnetik zenbatzen hasita, interesdunek eskubidekotzat jotzen duten guztia alega dezaten modu telematikoan.
7.–Probak gainditu dituzten izangaien zerrenda, izendapen proposamena eta agirien aurkezpena.
7.1. Probak amaituta, epaimahaiak Mankomunitatearen web-orrian argitaratuko du hautaprobak gainditu dituzten izangaien zerrenda, puntuazio handienetik txikienera ordenatuta. Horretarako, izangai bakoitzak lehiaketaldian eta oposizioaldian eskuratuta dituen puntuazioak batuko ditu.
Bi izangairen edo gehiagoren artean berdinketa emanez gero, bigarren proban puntuazio handiena dutenen alde erabakiko da, eta berdinketak jarraitzen badu, lehen probako puntuazioetara joko da, gero hirugarren probara eta merezimenduetara (6. oinarria), ordena horretan. Berdinketak badirau, zozketa publikoa eginen da.
7.2. Behin Mankomunitatearen web-orrian argitaratuta hautaprobak gainditu dituzten izangaien zerrenda, puntuazio handienetik txikienera ordenatuta (izangai bakoitzak lehiaketaldian eta oposizioaldian eskuratuta dituen puntuazioak batuta), epaimahaiak Mankomunitateko buruari igorriko dio deialdiko lanpostuen kopuruaren barnean sartzen diren eta probak puntuazio altuenekin gainditu dituzten izangaiak izendatzeko proposamena, espediente osoarekin batera. Proposamen hori Mankomunitatearen web-orrian eta Nafarroako Aldizkari Ofizialean argitaratuko da.
7.3. Izangaiak 10 egun balioduneko epea izanen du, izendapen proposamena Nafarroako Aldizkari Ofizialean argitaratzen denetik aitzina, deialdian eskatutako baldintzak eta beharkizunak betetzen dituela egiaztatzen duten agiriak Mankomunitatearen Erregistro Orokorrean aurkezteko, hau da:
a) Nortasun-agiri nazionalaren kopia, edo izangaiaren nazionalitatea eta identitatea frogatzen dituen bertze agiri baliokideren batena.
b) 2. oinarrian eskatzen den tituluaren kopia autentikoa, edo hura lortzeko eskubideak ordaindu izanaren gordekinarena edo, hala bada, eskabideak aurkezteko epean titulua eskuratzeko moduan egonen dela frogatzen duen ziurtagiria.
c) B motako gidabaimena indardunaren kopia autentikoa.
d) Osasun ziurtagiri ofiziala, izangaiak karguan aritzea eragotziko liokeen eritasun edo akats fisikorik ez duela frogatzeko. Aipatu txostena Mankomunitateak zehazten duen osasun zentroak emanen du.
Desgaitasunen bat alegatu duten izangaiek, gainera, aurkeztu beharko dute desgaitasuna deialdiko lanpostuarekin bateragarria dela dioen frogagiria, balorazio eta orientazio talde eskudunek emana.
e) Zinpeko aitorpena, eginkizun publikoetan aritzeko desgaitua edo gabetua ez dagoela eta inongo administrazio publikoren zerbitzutik baztertua izan ez dela dioena.
Izangaiek Espainiako nazionalitatea ez badute, zinpeko deklarazio bat aurkeztu beharko dute, adierazteko ez dutela diziplina-zehapenik edo zigor penalik, eragozten dienik sartzea beren estatuko Funtzio Publikoan.
f) Zina edo hitzematea, adierazten duena Nafarroako Foru Araubidea errespetatuko duela, Konstituzioari eta legeei men eginen diela, eta karguari dagozkion eginkizunak zuzen beteko dituela.
7.4. Aipatu epearen barrenean, eta aski arrazoituriko ezinbesteko kasuak izan ezik, arestiko agiriak aurkezten ez dituena edo deialdian ezarritako baldintzak betetzen ez dituena ezin izanen da izendatu, eta, beraz, egintza guztiak deuseztaturik geldituko dira; betiere, deialdian parte hartzeko eskabidean faltsukeria egiteagatik legokiokeen erantzun beharra galarazi gabe.
7.5. Aurreko apartatuan jasotako kasuan, 7.1 apartatuan aipatzen den gainditutakoen zerrendan ondo-ondotik heldu den izangaiarekin beteko da baja, aurreko apartatuetan adierazitako moduan.
8.–Izendapena eta jabetza hartzea.
8.1. Hautapen prozesua bukatu eta aurreko oinarrian aipatu dokumentuak aurkeztuta direla, Mankomunitateko buruak ebazpen bidez izendatuko du Mankomunitatearen zerbitzuko gizarte-langile, funtzionario araubidean bete dezan 025 zenbakia duen lanpostua. Ebazpena Nafarroako Aldizkari Ofizialean argitaratuko da.
8.2. Izendapena Nafarroako Aldizkari Ofizialean argitaratuko da, kontuan izanik argitalpen horrek jakinarazpenaren ondorio berberak izanen dituela, hala ezartzen baitu 45. artikuluan urriaren 1eko 39/2015 Legeak (Administrazio Publikoen Administrazio Prozedura Erkideari buruzko Legea).
8.3. Izendatzen den izangaiak izendapenaren ebazpenean zehazten den egunean jabetu beharko du lanpostuaz. Epea bukatuta, behar bezala justifikatutako ezinbesteko kasuak salbu, jabetza hartzen ez badu, funtzionario araubidean Mankomunitatearen zerbitzuko gizarte-langile izateko eskubideak galduko ditu. Kasu horretan, aurreko oinarrian ezarritakoari jarraituko zaio.
8.4. Izangai bat funtzionario bihurtu eta lanpostuan batere aritu gabe zuzenean eta berak eskatuta borondatezko eszedentzia ematen bazaio jabetza hartzearen egunetik bertatik, data horretan beste Administrazio Publiko batean ari delako, kasuko lanpostu hutsa ere deialdiaren 7.4 apartatuak agintzen duen moduan beteko da.
8.5. Izangaietatik inork ez badu gainditzen oposizio-lehiaketa, organo eskudunak ebazpen bat emanen du adierazteko oposizio-lehiaketa bete gabe gelditu dela. Ebazpena Nafarroako Aldizkari Ofizialean argitaratuko da.
9.–Aldi baterako kontratuetarako izangaien zerrenda.
9.1. Nafarroako Administrazio Publikoetan sartzeko Erregelamendua onesten duen ekainaren 5eko 113/1985 Foru Dekretuaren 42.2 artikuluan ezarritakoari jarraituz, honako zerrenda hauek eginen dira eta Mankomunitatea haietaz baliatuko da aldi baterako langileak kontratatzeko ordezkapenetan edo zerbitzuaren beharrak daudenean:
a) Hautapen prozesua gaindituta ere lanposturik lortu ez duten izangaien zerrenda: deialdi honetako hautaproba guztiak gainditu, baina azken puntuazioaren arabera lanposturik eskuratzen ez duten izangaiek osatua.
b) Aurreko apartatuan sartu ez baina deialdiko lehen proba gainditu duten izangaien zerrenda. Zerrenda honek a) apartatukoaren ordez eta haren mende funtzionatuko du.
Berdinketarik dagoenean nor nagusitzen den erabakitzeko, deialdi honetan ezarritako irizpideak hartuko dira kontuan, eta jarraitzen badu, zozketa bidez.
Mankomunitateko buruak ebazpen bat emanen du aldi baterako kontratazioetarako zerrendak onesteko; zerrendok Mankomunitatearen web-orrian argitaratuko dira.
Kontrataziorako deitzen diren izangaiek frogatu beharko dute, kontratua sinatzeko unean, betetzen dituztela deialdian eskatzen diren baldintzak. Horretarako, dagozkion ziurtagiriak aurkeztu beharko dituzte.
Mankomunitateak ezarriak ditu ordezkapenetarako zerrendak kudeatzeko irizpideak. Interesdunek irizpideok kontsultatzen ahalko dituzte, eta eguneratzen ahalko dira Mankomunitateko buruak emandako ebazpen bidez.
Zerrenda horiek 2027ko abenduaren 31 arte izanen dute indarra, eta Mankomunitateko buruak ebazpen bidez luzatzen ahalko du indarraldia.
Zerrenda horiek indarrean jarriz gero, lehendik aplikatzen diren guztiak balio gabe geldituko dira.
10.–Jarduketen publikotasuna.
Deusetan galarazi gabe Nafarroako Aldizkari Ofizialaren bidez ofizialki argitaratu beharreko izapideak, Mankomunitatearen web-orrian (www.manserso.org/empleo-publico) argitaratuko dira proben deialdiei eta kalifikazioei buruz epaimahaiak ematen dituen ebazpenen informazioa eta haren jarduketaren gaineko informazioa, oinarri hauetan web-orrian argitaratzekoak direla ezarritako erreferentzia guztiak, baita interesdunentzat jakingarri den guztia ere.
11.–Datuen babesa.
Tratamenduaren arduraduna: Antsoaingo, Berriobeitiko, Berriozarko, Itzako eta Txulapaingo Oinarrizko Gizarte Zerbitzuen Mankomunitatea.
Datuak babesteko ordezkaria: dpd@manserso.org.
Helburua: Langileak hautatzea eta deialdiko lanpostua betetzea.
Oinarri juridikoa: Datuak Babesteko Erregelamandu Orokorraren 6.1.c) artikulua (tratamendua beharrezkoa da, tratamenduaren arduradunari aplikagarria zaion lege-betebeharra betetzeko). 251/1993 Legegintzako Foru Dekretua, abuztuaren 30ekoa, Nafarroako Administrazio Publikoen zerbitzuko Langileen Estatutuaren testu bategina onesten duena.
Datuak gordeko diren denbora: datuak aipatu helburua betetzeko behar den denboran edukiko dira, eta Mankomunitateak haien tratamenduaren ondoriozko erantzukizuna izan dezakeen bitartean gordeko dira. Orobat, Artxiboei eta Dokumentuei buruzko apirilaren 4ko 12/2007 Foru Legean ezarritako kontserbazio arauak bete beharko dira.
Datu-hartzaileak: datuak epaileei nahiz auzitegiei lagatzen ahalko zaizkie, indarreko legeria betez, eta deialdian adierazi bezala emanen dira argitara.
Eskubideak: Interesdunak beren eskubideak baliatzen ahal dituzte Mankomunitatearen egoitzan eta datuak babesteko ordezkariari idatziz (dpd@manserso.org).
Halaber, interesdunek erreklamazioa aurkezten ahal dute Datuak Babesteko Espainiako Bulegoan, eskaera idazki bat bidaliz haren helbidera (Jorge Juan kalea 6, 28001 Madril), edo egoitza elektroniko honetara: www.agpd.es.
12.–Errekurtsoak.
Deialdi honen, deialdiaren oinarrien eta aplikatzeko egintzen aurka, honako errekurtso hauetako bat aurkezten ahalko da, hautara:
a) Berraztertzeko errekurtsoa, egintza gauzatu duen organoari zuzendua, hilabeteko epean, ebazpen hau jakinarazi edo argitaratu eta biharamunetik aitzina.
b) Administrazioarekiko auzi-errekurtsoa, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, errekurtsoaren xedeko egintza edo erabakia jakinarazi edo argitaratu eta biharamunetik hasita.
c) Gora jotzeko errekurtsoa, Nafarroako Administrazio Auzitegiari zuzendua, hilabeteko epean, errekurtsoaren xedeko egintza edo erabakia argitaratu edo jakinarazten denetik hasita.
Kalifikazio-epaimahaiaren egintzen aurka gora jotzeko errekurtsoa aurkez daiteke, deialdia egin duen organoari zuzendua, hilabeteko epean, errekurritutako egintza edo erabakia jakinarazten edo argitaratzen denetik hasita.
Berriozarren, 2025eko uztailaren 1ean.–Mankomunitateko burua, Elena Ugarte Páez.
I. ERANSKINA.–HAUTAPEN PROZESUAN ONARTUA IZATEKO ESKABIDEA
DEIALDIAREN DATUAK:
Lanpostua | GIZARTE-LANGILEA | |||
Honako zenbakia daraman Nafarroako Aldizkari Ofizialean argitaratu zen | egun honetan | |||
DATU PERTSONALAK:
Izen-abizenak | |||||||||||||
NANa/AIZa | Nazionalitatea | Jaioteguna | |||||||||||
Helbidea (kalea, zk., atea, etab.) | |||||||||||||
Herria | Probintzia | Posta kodea | |||||||||||
Telefono mugikorra | |||||||||||||
Helbide elektronikoa: | |||||||||||||
AZALTZEN DUT:
–Oposizio-lehiaketarako deialdian onartua izatea eskatzen dudala, zeinaren bidez Antsoaingo, Berriobeitiko, Berriozarko, Itzako eta Txulapaingo Oinarrizko Gizarte Zerbitzuen Mankomunitatearen zerbitzuko gizarte-langilearen lanpostu bat bete nahi baita funtzionarioen araubidean. –Ez dudala eritasunik edo akats fisikorik nahiz psikikorik, eragozten didanik karguan aritzea. –Ez dudala indarra duten xedapenetan ezarritako ezintasunik. –Ez naizela diziplina espediente bidez inongo administrazio publikoren zerbitzutik bereizia izan eta ez nagoela desgaitua eginkizun publikoak betetzeko. –Baldintza guzti-guztiak betetzen ditudala eskabideak aurkezteko epea bukatzen den egunean. |
Aurkezten duen dokumentazioa. (X bat idatzi, hala behar denean).
NANaren edo AIZaren edo nazionalitatea eta nortasuna ziurtatzen duen beste agiri baten kopia. | |
Deialdiaren 2. oinarrian eskatzen den tituluaren kopia. | |
B motako ibilgailuen gidabaimen indardunaren kopia. | |
18,00 euroko tasa ordaindu izanaren frogagiria. Espedientea formalizatzeko eta azterketa eskubideetarako da diru kopuru hori. | |
Ziurtagiri negatiboa, frogatzeko ez dela kondenatua izan epai irmo baten bidez sexu-askatasunaren eta sexu-ukigabetasunaren aurkako delitu batengatik, ez eta gizakien salerosketarengatik ere. | |
Lehiaketarako alegatutako merezimenduak frogatzeko agiriak. |
Desgaitasunaren egiaztapena (x batez adierazi, hala behar denean).
Desgaitasuna dudala eta eskabidearekin batera frogatzen dudala. | |
Desgaitasuna dudala eta, horrenbestez, azaltzen dudan egokitzapena eskatzen dudala, adierazitako arrazoiengatik (beste orri batean, desgaitasunaren arrazoiak eta eskatutako egokitzapenak azalduko dira). |
Eskabide honi erantsitako orri kopurua: .......................................... |
ESKATZEN DUT:
Eskabide hau onartzea eta, beraz, onartua izatea Antsoaingo, Berriobeitiko, Berriozarko, Itzako eta Txulapaingo Oinarrizko Gizarte Zerbitzuen Mankomunitatearen zerbitzuko gizarte-langile izateko lanpostu bat, funtzionarioen araubidekoa, oposizio-lehiaketa bidez betetzeko deialdian. |
Tokia eta data | Sinadura |
DATUEN BABESA: datuak babesteko araudia betez, aditzera ematen zaizu Antsoaingo, Berriobeitiko, Berriozarko, Itzako eta Txulapaingo Oinarrizko Gizarte Zerbitzuen Mankomunitatea dela datu pertsonalen tratamenduaren arduraduna. Langileak hautatzeko xedez erabiliko dira datu horiek, legezko eginbehar bat betez. Datuak argitaratuko dira deialdian xedaturikoarekin bat. Datuen babesaren arloan dituzun eskubideak baliatzen ahalko dituzu Mankomunitatearen egoitzan eta datuak babesteko ordezkariari idatziz (dpd@manserso.org). Argibide gehiagorako, jo Mankomunitatearen pribatutasun-politikara (www.manserso.org).
ANTSOAINGO, BERRIOBEITIKO, BERRIOZARKO, ITZAKO ETA TXULAPAINGO OINARRIZKO GIZARTE ZERBITZUEN MANKOMUNITATEKO BURUA
II. ERANSKINA.–GAI-ZERRENDA
1.–Mankomunitatearen estatutuak (2008ko 8. Nafarroako Aldizkari Ofiziala, urtarrilaren 18koa). Mankomunitate honen etxeko laguntza zerbitzuaren prezio publikoak ezartzen dituen araudia (2015eko 125. Nafarroako Aldizkari Ofiziala, ekainaren 30ekoa) eta oinarriak, dirulaguntza zuzenak emateko 2025ean larrialdi sozialean dauden pertsonei eta/edo familiei banakako ebaluazio araubidean. (2025eko 15. Nafarroako Aldizkari Ofiziala, urtarrilaren 23koa).
2.–Espainiako 1978ko Konstituzioa. Atariko titulua. I. titulua: oinarrizko eskubideak eta betebeharrak.
3.–13/1982 Lege Organikoa, Nafarroako Foru Eraentza Berrezarri eta Hobetzekoa: Atariko titulua: xedapen orokorrak. II. titulua. Nafarroaren ahalmen eta eskumenak.
4.–39/2015 Legea, urriaren 1ekoa, hizpide duena administrazio publikoen administrazio prozedura erkidea.
5.–40/2015 Legea, urriaren 1ekoa, Sektore Publikoaren Araubide Juridikoari buruzkoa. Atariko titulua: xedapen orokorrak, jarduteko printzipioak eta sektore publikoaren funtzionamendua. III. titulua. Administrazioarteko harremanak. I. kapitulua: administrazioen arteko harremanen printzipio orokorrak. II. kapitulua: laguntza eman beharra. IV. kapitulua: administrazioen arteko harreman elektronikoak.
6.–6/1990 Foru Legea, uztailaren 2koa, Nafarroako Toki Administrazioari buruzkoa: I., III., VI., VII., VIII. eta IX. tituluak.
7–251/1993 Legegintzako Foru Dekretua, abuztuaren 30ekoa, Nafarroako Administrazio Publikoen zerbitzuko Langileen Estatutuaren testu bategina onesten duena.
8.–113/1985 Foru Dekretua, ekainaren 5ekoa, Nafarroako Administrazio Publikoetan sartzeko Erregelamendua onesten duena.
9.–3/2018 Lege Organikoa, abenduaren 5ekoa, Datu Pertsonalak Babestekoa eta Eskubide Digitalak Bermatzekoa.
10.–5/2018 Foru Legea, maiatzaren 17koa, Gardentasunari, Informazio Publikoa Eskuratzeari eta Gobernu Onari buruzkoa.
11.–11/2005 Foru Legea, azaroaren 9koa, Dirulaguntzei buruzkoa.
12.–2/2018 Foru Legea, apirilaren 13koa, Kontratu Publikoei buruzkoa. Atariko titulua eta I. titulua (xedapen orokorrak). II. kapitulua: kontratistak. III. kapitulua: kontratuen tipologia eta araubide juridikoa. IV. kapitulua: kontratu publikoen kontratu kudeaketarako printzipioak eta arauak. V. kapitulua: publizitate arauak eta adjudikazio prozedurak. II. titulua: Administrazio Publikoek egiten dituzten kontratuen arau berariazkoak.
13.–Gizarte Zerbitzuei buruzko abenduaren 14ko 15/2006 Foru Legea. 48/2020 Foru Dekretua, uztailaren 15ekoa, zeinaren bidez arautzen baitira oinarrizko gizarte-zerbitzuen oinarrizko programak eta finantzaketa sistema.
14.–Ekainaren 17ko 69/2008 Foru Dekretua, Gizarte Zerbitzu Orokorren Zorroa onesten duena.
15.–15/2016 Foru Legea, azaroaren 11koa, Gizarteratzeko eta errenta bermaturako eskubideak arautzen dituena. 26/2018 Foru Dekretua, apirilaren 25ekoa, gizarteratzerako eta errenta bermaturako eskubideak garatzeari buruzkoa:
16.–19/2021 Legea, abenduaren 20koa, bizitzeko gutxieneko diru-sarrera ezartzen duena, eta 789/2022 Errege Dekretua, irailaren 27koa, bizitzeko gutxieneko diru-sarrera eta norberaren konturako lan-errenten edo jarduera ekonomikoaren ondoriozko diru-sarrerak bateragarri egitea arautzen duena, prestazioaren onuradunen gizarteratzeko eta laneratzeko benetako aukerak hobetze aldera.
17.–Urriaren 30eko 8/2015 Legegintzako Errege Dekretua, onesten duena Gizarte Segurantzari buruzko Lege Orokorraren testu bategina (VI. titulua: prestazio ez-kontributiboak).
18.–4/2000 Lege Organikoa, urtarrilaren 1ekoa, atzerritarrek Espainian dituzten eskubide eta askatasunei eta haien gizarteratzeari buruzkoa: atariko titulua. I. titulua: atzerritarren eskubide eta askatasunak. II. titulua: atzerritarren araubide juridikoa. I., II. eta III. kapituluak.
19.–39/2006 Legea, abenduaren 14koa, autonomia pertsonala sustatzeari eta mendetasun-egoeran dauden pertsonak zaintzeari buruzkoa.
20.–31/2022 Foru Legea, azaroaren 28koa, Nafarroan desgaitasuna dutenei arreta emateari eta beren eskubideak bermatzeari buruzkoa.
21.–1/2011 Foru Legea, otsailaren 15ekoa, Mendetasun-egoera aitortzeko prozedura ezartzen duena eta Nafarroan mendetasun-egoera baloratzeko ekipoak eta organoa osatuko dituzten langileen antolamendua, eginkizunak eta araubidea ezartzen dituena.
22.–62/2013 Foru Agindua, urtarrilaren 18koa, mendekotasuna dutenentzako laguntzaren arloko hainbat prestazio eta zerbitzuren arteko bateragarritasun araubidea ezartzen duena eta mendekotasuna duten pertsonak etxean gelditu eta haien zaintzaileei sostengua emateko laguntza ekonomikoak arautzen dituena.
23.–476/2018 Foru Agindua, abenduaren 19koa, mendekotasuna duten pertsonak etxean gelditzeko dirulaguntzak arautuko dituena, zerbitzu bat kontratatzeko: zaintzaile profesional bat eta/edo zerbitzu enpresa bat.
24.–1/2013 Legegintzako Errege Dekretua, azaroaren 29koa, Ezgaitasuna duten pertsonen eskubideei eta haien gizarteratzeari buruzko Lege Orokorraren testu bategina onesten duena. Atariko titulua. I. titulua: eskubideak eta betebeharrak. II. titulua: aukera berdintasuna eta bereizkeriarik eza.
25.–197/2018 Foru Agindua, ekainaren 15ekoa. Honen bidez arautzen da zer prozedura eta familiako egoera baloratzeko zer baremo aplikatuko diren adineko pertsonak, desgaitasun bat dutenak, gaixotasun mental bat dutenak edo gizartean bazterturik edo horrela gertatzeko arriskuan daudenak artatzeko egoitza plazetara sartzeko.
26.–224/2019 Foru Agindua, maiatzaren 31koa, mendekotasun eta/edo desgaitasun egoera bat aitortua duten pertsonen laguntza pertsonalerako prestazio ekonomikoa arautzen duena.
27.–92/2020 Foru Dekretua, abenduaren 2koa, arautzen dituena, batetik, Nafarroako Foru Komunitateko gizarte zerbitzuen sistemaren barruan, egoitza zerbitzuen, eguneko zerbitzuen eta zerbitzu anbulatorioen funtzionamendua adinekoen, desgaitasuna dutenen, nahasmendu mentala dutenen, adigabeentzako arretaren eta gizarte inklusioaren arloetan, eta, bestetik, baimenen, aurretiazko komunikazioen eta homologazioen araubidea.
28.–210/2009 Foru Agindua, ekainaren 1ekoa, Kirol eta Gizarte Gaietako kontseilariak emana, zerbitzuari lotutako prestazio ekonomikoak arautzen dituena.
29.–130/1999 Foru Dekretua, apirilaren 26koa, Laguntza ekonomikoak arautzen dituena, gizartetik baztertuta daudenak gizartean eta lanean txertatzeko programetarako.
30.–12/2022 Foru Legea, maiatzaren 11koa, Haur eta nerabeei arreta eta babesa eman eta haien familiak, eskubideak eta berdintasuna sustatzekoa.
31.–1/1996 Lege Organikoa, urtarrilaren 15ekoa, Adingabeen Babes Juridikoari buruzkoa.
32.–5/2000 Lege Organikoa, urtarrilaren 12koa, Adingabeen Erantzukizun Penala arautzen duena.
33.–220/2022 Errege Dekretua, martxoaren 29koa, zeinaren bidez onesten baita nazioarteko babesaren arloko harrera sistema arautzeko erregelamendua.
34.–Nafarroako Foru Komunitatean haurren babesaren esparruko prozeduraren II. eskuliburua. 1., 2. eta 3. liburukiak.
35.–114/2015 Foru Legea, apirilaren 10ekoa, Emakumeen Kontrako Indarkeriari Aurre Egitekoa.
36.–Emakumeen eta Gizonen arteko Berdintasunari buruzko apirilaren 4ko 17/2019 Foru Legea.
37.–Abenduaren 28ko 1/2004 Lege Organikoa, genero indarkeriaren kontrako babes integralerako neurriei buruzkoa.
38.–28/2018 Foru Legea, abenduaren 26koa, Nafarroan Etxebizitzarako Eskubide Subjektiboa arautzen duena.
39.–Gizarte lanaren kode deontologikoa. Gizarte Laneko Diplomadunen Kontseilu Ofiziala.
40.–Pertsona Migratzaileei Harrera Egiteko Nafarroako Plana (2021-2026).
41.–Nafarroako Kultura arteko Bizikidetzaren Estrategia (2021-2026).
42.–Arrazakeriaren eta Xenofobiaren Aurkako Borrokarako Nafarroako Plana (2021-2026).
43.–Lagun-egitea esku-hartze metodo gisa inklusio prozesuetan. Hausnarketa berriak. Iruña, Pobreziaren eta gizarte-bazterketaren kontrako Nafarroako sarea (2016).
44.–Encuentros respetuosos y esperanzadores. Un manual para facilitadores de diálogos anticipatorios. Tom Erik Arnkil. Nafarroako Gobernua. Eskubide Sozialetako Departamentua.
45.–Guía de facilitación dialógica por Dialogues & Design Ltd. Nafarroako Gobernua.
Oharra.–Zein egunetan argitaratzen den deialdia Nafarroako Aldizkari Ofizialean, egun horretako legeriaren arabera eskatuko dira gai guztiak.
Iragarkiaren kodea: L2509305
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
