Iragarkia

146. ALDIZKARIA - 2025eko uztailaren 22a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

110C/2025 EBAZPENA, ekainaren 12koa, Ekonomia Sozialeko eta Laneko zuzendari nagusiak emana, zeinaren bidez erabakitzen baita erregistratu eta gordailatu dadila eta Nafarroako Aldizkari Ofizialean argitaratu dadila Tele Taxi San Fermín Elkartea enpresaren hitzarmen kolektiboa.

Aztertu da Tele Taxi San Fermín Elkartea enpresaren hitzarmen kolektiboaren testua (kode zenbakia: 31008762012008), zeina erregistro honetan sartu baitzen 2025eko ekainaren 5ean, enpresaren eta sindikatuen (UGT) ordezkariek sinatua 2025eko apirilaren 24an.

Jarraikiz urriaren 23ko 2/2015 Legegintzako Errege Dekretuari, zehazki 90. artikuluaren 2. eta 3. apartatuei (legegintzako errege dekretu horren bidez onetsi zen Langileen Estatutuaren Legearen testu bategina) eta maiatzaren 28ko 713/2010 Errege Dekretuari (errege dekretu horrek hizpide du erregistratzea eta gordailutzea hitzarmen kolektiboak, lan akordio kolektiboak eta berdintasun planak),

Erabiliz eman zaizkidan eskudantziak, zehazki, martxoaren 11ko 11/2019 Foru Legearen 32. artikuluak ematen dizkidanak (foru lege horrek hizpide ditu Nafarroako Foru Komunitateko Administrazioa eta foru-sektore publiko instituzionala) eta azaroaren 15eko 251/2023 Foru Dekretuak ematen dizkidanak (foru dekretu horrek ezartzen du Eskubide Sozialetako, Ekonomia Sozialeko eta Enpleguko Departamentuaren egitura organikoa).

EBAZTEN DUT:

Lehenbizikoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Tele Taxi San Fermín Elkartea enpresak aurkeztutako hitzarmen kolektiboa (kode-zenbakia: 31008762012008).

Bigarrena.–Agintzea Nafarroako Aldizkari Ofizialean argitara dadila, orok jakin dezan.

Iruñean, 2025eko ekainaren 12an.–Ekonomia Sozialeko eta Laneko zuzendari nagusia, Iñaki Mendióroz Casallo.

TELE TAXI SAN FERMÍN ELKARTEAREN HITZARMEN KOLEKTIBOA

I. KAPITULUA.–XEDAPEN OROKORRAK

1. artikulua. Eremu funtzionala eta pertsona eremua.

Hitzarmen honetako xedapenek arautuko dituzte Tele Taxi San Fermín Ekartearen eta bertako langileen arteko lan harremanak, indarrean jartzen denetik hasita, eta irauten duen artean. Tele Taxi San Fermín Elkartearen xedea da antolatzea eta zuzentzea elkarteak une bakoitzean dituen flotak kudeatzeko sistema, hobeki gauzatzeko beren lan jarduera aipatutako zerbitzua jasotzen duten taxilariek eta, bereziki, bazkideek.

2. artikulua. Lurralde eremua.

Hitzarmen honen xedapenek Iruñeko (Nafarroa) lantegian izanen dute eragina.

3. artikulua. Denbora eremua.

Hitzarmen kolektibo honek 3 urteko indarraldia izanen du, 2025eko urtarrilaren 1etik 2027ko abenduaren 31 arte.

Langileen Estatutuaren 86.2 artikuluan ezarritakoaren ondorioetarako, ulertzen da hitzarmen hau salatuta gelditzen dela sinatzen den egunetik beretik.

Hitzarmena salatuta eta itundutako iraupena bukatuta, adostu da itundutako indarraldia aplikatuko dela aurreraeragin mugagabearen araubidean, egungo lege esparruaren arabera.

Alderdiek konpromisoa hartzen dute behar diren negoziazioak egiteko, hitzarmena berritzeko, iraungi baino hiru hilabete lehenago.

4. artikulua. Zuzenbide osagarria.

Hitzarmen honetan aurreikusi ez denerako, honako hauek aplikatuko dira: probintziarteko Hitzarmen Kolektibo Orokorra, Desgaitasuna duten Pertsonen Arretarako Zentroei eta Zerbitzuei buruzkoa; uztailaren 17ko 1368/1985 Errege Dekretua, arautzen duena enplegu zentro berezietan lan egiten eta desgaitasuna dutenen lan harreman berezia; eta gai honetan aplikagarriak diren gainerako lege xedapen orokorrak, erkidegokoak nahiz Estatukoak.

5. artikulua. Adostutako lan baldintzak ez aplikatzea. Hitzarmena ez betetzea.

Hitzarmen honek indarrean dirauen artean, gehi beste 12 hilabetez hitzarmena salatu eta haren iraupena amaitzen denetik, aplikatuko da Langileen Estatutuaren 82. artikulua, osorik. Ez aplikatzeko akordioa hartzeko, frogatu beharko da neurriak egokiak, arrazoizkoak eta proportzionalak direla alegatutako zergatiarentzat, eta konpromisoa hartu beharko da enpleguari eusteko eta laster lehengo egoerara itzultzeko. Kontsulta aldian adostasunik ez bada, edozein alderdik jar dezake desadostasuna hitzarmenaren batzorde paritarioaren menpe, eta horrek, gehienez ere, 10 eguneko epea izanen du erabakitzeko, desadostasuna planteatzen zaionetik. Batzorde horretan adostasunik lortzen ez bada, alderdiek jo dezakete Nafarroako Lan Gatazkak konpontzeko Auzitegira, bitartekotza eta adiskidetze faseetan.

II. KAPITULUA.–LANBIDE SAILKAPENA

6. artikulua. Talde eta kategoria profesionalak.

Hitzarmen kolektibo honetan ageri diren lanbide kategoriak adierazi baizik ez dira egiten hemen, eta ez dakarte, nahitaez, betebeharrik, aipatzen diren lanpostu eta kategoria guztiak beteak izateko, hala eskatzen ez badute enpresaren beharrek eta bolumenak.

Lanbide talde bakar batean sailkatuta daude hitzarmen kolektibo honen eraginpeko enpresako langileak:

1. Agintariak, teknikariak eta laguntzako langileak. Langile horiek, titulua izanda ala izan gabe, egiten dituzte gaitasun edo jardunbide egokia eskatzen duten lanak, eta betetzen dituzte beren espezialitateko ohiko funtzioak, funtzio horiek izan funtzio nagusiak nahiz osagarriak. Lan horiek guztiak gauzatzen dituzte ekimenez, arduraz eta mailari dagokion errendimendu egokiz. Honako lau lan kategoria hauek finkatzen dira hitzarmen honen mende dauden langileentzat:

1. Administrari arduraduna:

elkartearen kontrol administratiboa gauzatuko du esparru guztietan.

2. Lehen mailako administrari laguntzailea.

Eginkizunak: taxi zerbitzuak esleitzea, flota kudeatzeko datu bidezko sistemaren bidez, eta ahoz, baldin ez badabil datu bidezko sistema. Taxilariak eta bezeroak artatzea. Ezagutza: jakitea nola erabili flota kudeatzeko datu bidezko sistema, eta ahoz aritzea baldin datu bidezko sistema ez badabil. Erabat ezagutzea Iruñeko eta Iruñerriko kale izendegia, bai eta Nafarroako gainerako tokiak ere. Arreta osoa ematea taxilariei eta bezeroei, flotak kudeatzeko sistemaren bidez. Arreta ematea elkarteko langileekin harremanetan jarri nahi dutenei.

3. Bigarren mailako administrari laguntzailea.

Eginkizunak: taxi zerbitzuak esleitzea, flota kudeatzeko datu bidezko sistemaren bidez, eta arreta ahoz ematea, baldin ez badabil datu bidezko sistema. Taxilariak eta bezeroak artatzea. Ezagutza: jakitea nola erabili flota kudeatzeko datu bidezko sistema, eta laguntza ahoz ematea 1. mailako teknikariari, baldin datu bidezko sistema ez badabil. Progresiboki, erabat ezagutzea Iruñeko eta Iruñerriko kale izendegia, bai eta Nafarroako gainerako tokiak ere. Progresiboki, arreta osoa ematea taxilariei eta bezeroei, flotak kudeatzeko sistemaren bidez. Arreta ematea elkarteko langileekin harremanetan jarri nahi dutenei.

4. Administraria:

Administrazio funtzioak beteko ditu, eta, era berean, jakin beharko du nola erabili flota kudeatzeko datu bidezko sistema, bai eta arreta ahoz ematen ere, datuek funtzionatzen ez dutenerako. Izan beharko du 2. mailako administrari laguntzaile bati dagokion gutxieneko jakintza. Flota kudeaketako operadorearen eginkizunei dagokienez: Ahozko arretarako, hautatutako pertsonak baldin badu 2. mailako administrari laguntzailearen maila, prestakuntza emanen zaio. Administrazio eginkizunei dagokienez: –Kudeaketaz arduratuko da: hasi esleitzen zendeetako zerbitzuak, eskoletako zerbitzuak, mutuetako zerbitzuak eta beste, eta buka zerbitzu horiei dagokien fakturazioa egiten, Elkarteko zerbitzu fakturagarriei dagokienez. –Posta elektronikoaz arduratu beharko du, eta Donejakue Bideko zerbitzuak banatu. –Eginen ditu sozietate mugatuaren kobratzeak eta fakturak. –Tele Taxiren kuotez arduratuko da, bai eta bazkideei ematen zaizkien gainerako zerbitzuez ere. –Lizentzien eskualdatzea kudeatuko du. –Bazkideak artatuko ditu.

5. Sostenguko administraria.

7. artikulua. Lanbide sustapenerako sistema.

1.–Sostenguko administrari gisa kontratatutako langilea egoera horretan egonen da gehienez 2 hilabetez, eta, gero, automatikoki igoko da bigarren mailako administrari laguntzailearen kategoriara, aurretik aldeko txostena ematen badu Langileen Batzordeak, egokitasunari buruz. Batzorde horren osaera hau izanen da: lehendakaria, lehendakariordea, Giza Baliabideetako Batzordeko kidea, arduraduna, 1. mailako administrari laguntzailea den langilea, eta enpresako langileen ordezkaria.

2.–Betiere, enpresako langileak 3 urteko antzinatasunera iristen direnean, kontratazioko lehenbiziko egunetik zenbatzen hasita, automatikoki eginen zaie jakintza azterketa, jakite aldera ba ote duten 1. mailako administrari laguntzailearen kategoriari dagokion maila, langileak nahi badu, eta behar-beharrezkoa izanen da azterketa gainditzea kategoria hori lortzeko.

8. artikulua. Lanaren antolaketa.

Enpresaren zuzendaritzari dagokio lanaren antolaketa teknikoa eta praktikoa eta prestakuntza antolatzea, arlo horretako legezko xedapenen arabera. Lanaren arrazionalizazio, mekanizazio eta zuzendaritza sistemek ezin izanen diote kalte egin langileen lanbide prestakuntzari; izan ere, langileek eskubidea eta betebeharra dute eguneko lanaren bidez prestakuntza hori osatu eta hobetzeko. Mekanizazioak, aurrerapen teknikoek edo antolakuntzakoek ezin izanen dute inolako murrizketarik eragin soldatapeko langileen egoera ekonomikoan; aitzitik, aurrerapen horien ondoriozko onurak ez dira erabili behar enpresaren soberakina handitzeko bakarrik, balio behar baitute langileen egoera hobetzeko ere.

III. KAPITULUA.–KONTRATAZIOA

9. artikulua. Kontratuak.

Izenpetzen den lan kontratua mugagabea izan daiteke, edo iraupen jakin baterako. Lan kontratu mugatuak egin daitezke kasu hauetan:

a) Hala eskatzen duenean merkatuaren egoerak, lanaren pilaketak edo eskabideen kopuru handiak, nahiz eta enpresaren ohiko jarduera izan, eta, betiere, aplikatzekoa den lege-araudiarekin bat.

b) Lanpostua gordetzeko eskubidea duten langileak ordeztu behar direnean. Betiere, lan kontratuan adierazi behar dira ordezkoaren izena eta ordeztearen arrazoia.

Gainerako kontratazio modalitateak indarreko legediaren mende gelditzen dira.

10. artikulua. Probaldia.

Arduradunen probaldia bi hilabetekoa izanen da, eta gainerako langileena, hilabete batekoa.

11. artikulua. Aurreabisua.

Langileek, baldin beren borondatez enpresan lan egiteari utzi nahi badiote edo kontratua berritu nahi ez badute (salbu probaldian daudenek), kontratua azkendu baino 15 egun natural lehenago eman beharko diote horren berri enpresari. Ez badute horren berri ematen, lanean huts egiten duten egun bakoitza deskontatu eta/edo ordaindu egin beharko da, dagokionaren arabera, langileek sortzen duten eta/edo langileei ordaintzen zaien zati proportzionalen likidaziotik.

IV. KAPITULUA.–ORDAINSARIAK

12. artikulua. Ordainsariak.

1. Hitzarmen honen mende dauden langileen ordainsariek honako hauek hartzen dituzte barnean: oinarrizko soldata eta ezarritako osagarriak eta plusak, jasotzen direnak hurrengo artikuluetan eta dagozkien eranskinetan.

2. Hilabete bakoitzeko lehenbiziko egun baliodunean eginen dira ordainketak.

3. Sortu eta hurrengo hilabetean ordainduko dira plusak.

13. artikulua. Egitura.

Ordainsari kontzeptu hauek osatzen dute langile bakoitzaren soldata:

a) Oinarrizko soldata:

ezarriko da kontuan hartuta kategoria profesionala, eta jarraikiz hitzarmen honen I. eranskinean ezarritako balioak, 2025erako, 2026rako eta 2027rako. Bertan jasota daude jada adostutako gehikuntzak.

b) Antzinatasuna:

kontzeptu honi dagokionez, gehienez ere bi bosturteko ezarri dira. Bosturteko bakoitzaren zenbatekoa izanen da kategoria profesional bakoitzari dagokion oinarrizko soldataren %9, eta kalkulu hori egin da adostutako gehikuntzekin, hots, hitzarmen honetan 2025erako, 2026rako eta 2027rako adostutakoekin.

c) Gaueko lanaren plusa:

Ordainduko zaie 23:00etatik 07:00etara bitarte lan egiten duten langileei. Ordainduko da hitzarmen honen I. eranskinean 2024rako finkatutako balioaren arabera. 2025ean, 2026an eta 2027an, izanen dute oinarrizko soldatari egiten zaion igoera bera. Asteburuetako gaueko lanaren plusa 56,95 eurorekin ordainduko da, gehi oinarrizko soldatan 2025erako, 2016rako eta 2027rako aplikatzen diren igoerak. Kontzeptu hau ezin da metatu ohiko gaueko lanaren plusarekin, ezta jaiegunetako lanaren plusarekin ere.

d) Jaiegunak:

ordainduko zaie jaiegun nazionaletan eta tokiko jaiegun ofizialetan, larunbatetan, igandeetan eta sanferminetan lan egiten duten langileei, honela:

–Larunbatak: ostiraleko gaueko txanda eta larunbateko goizeko, arratsaldeko eta gaueko txandak.

–Igandeak: igandeko goizeko eta arratsaldeko txandak.

–Jaiegun ofizialak: bezperako gaueko txanda eta jaieguneko goizeko eta arratsaldeko txandak.

–Sanferminak: uztailaren 5eko 23:00etatik uztailaren 14ko 23:00etara.

Plus hau igoko da gaueko lanaren plusaren neurri berean.

Ordainduko da hitzarmen honen I. eranskinean 2024rako finkatutako balioaren arabera. 2025ean, 2026an eta 2027an, izanen dute oinarrizko soldatari egiten zaion igoera bera.

e) Txandakako lana:

ordainduko zaie hilabete berean txanda batean baino gehiagotan zerbitzuak ematen dituzten langileei edota gaueko txandan jarduten direnei. Ordainduko da hitzarmen honen I. eranskinean 2024rako ezarritako balioekin; eta, 2025an, 2026an eta 2027an, izanen da oinarrizko soldatari aplikatzen zaion igoera bera.

f) Eguberriak:

Abenduaren 24an (Eguberri gaua), abenduaren 31n (Urtezahar gaua) eta urtarrilaren 5ean (Errege gaua) egiten diren gaueko txandak ordainduko dira 140 eurorekin gehi 2025erako hitzarmen honetan adostutako igoerarekin (2024ko KPIa + %1,5). Abenduaren 25ean (Eguberri eguna), urtarrilaren 1ean (Urteberri eguna) eta urtarrilaren 6an (Errege eguna) egiten diren goizeko eta arratsaldeko txandak ordainduko dira 80 eurorekin gehi 2025erako hitzarmen honetan adostutako igoerarekin (2024ko KPIa + %1,5).

Aurreko kontzeptuetan ere aplikatuko da oinarrizko soldatarako 2026rako eta 2027rako aurreikusitako soldata-igoera.

g) Langile sartu berriei prestakuntza ematearen plusa:

enpresa-zuzendaritzak langile batzuei agintzen badie prestakuntza ematea kontratatu berri diren langileei, plus bat jasoko dute, izen hau duena: "langile sartu berriei prestakuntza ematearen plusa". Ordainketa bakarra izanen da: 200 euro. Hasierako prestakuntza ematearen ardura duenak jasoko du. Lan-ordutegiaren barnean emanen dute hasierako prestakuntza hori.

14. artikulua. Soldaten berrikuspena.

Hitzarmen kolektibo honetan 2024erako ezarritako soldata taulak urtero handituko dira 2025eko urtarrilaren 1etik aurrera, hurrengo portzentajeen arabera:

–2025: Nafarroan 2024ko abenduaren 31n dagoen KPIa (%2,8) + %1,5.

–2026: Nafarroan 2025eko abenduaren 31n dagoen KPIa + %1,00, %4,00ko mugarekin.

Baldin, Iruñerriko Taxi Zerbitzu Bateratuaren Lurralde Eremuan, 2026rako zerbitzu-tarifek %4koa baino igoera handiagoa badute, enpresak aplikatuko du honako soldata-igoera hau, 2026ko urtarrilaren 1ekin aurrerako ondorio ekonomikoekin, eta soilik 2026ko ekitaldirako: %4aren eta tarifetan onesten den %4tik gorako ehunekoaren arteko diferentzia.

-2027: Nafarroan 2026ko abenduaren 31n dagoen KPIa + %1,00, %4,00ko mugarekin.

Baldin, Iruñerriko Taxi Zerbitzu Bateratuaren Lurralde Eremuan, 2027rako zerbitzu-tarifek %4koa baino igoera handiagoa badute, enpresak aplikatuko du honako soldata-igoera hau, 2027ko urtarrilaren 1ekin aurrerako ondorio ekonomikoekin, eta soilik 2026ko ekitaldirako: %4aren eta tarifetan onesten den %4tik gorako ehunekoaren arteko diferentzia.

Nafarroako aurreko urteko KPIa negatiboa bada, horrek ez du eragin negatiborik izanen langileen soldata igoeran.

V. KAPITULUA.–LANALDIA

16. artikulua. Lanaldia.

Hitzarmen honen aplikazio-eremuko langileek honako lanaldi hau izanen dute urtean:

–1.646 ordu 2025erako, eta lan-egutegian ezarriko dira.

–1.642 ordu 2026rako, eta lan-egutegian ezarriko dira.

–1.638 ordu 2027rako, eta lan-egutegian ezarriko dira.

Bi alderdiek adostu dute ez dela aplikatuko lanaldiaren banaketa irregularra %10eko ehunekoan, jarraikiz Langileen Estatutuaren 34.2 artikuluari. Aurrekoa gorabehera, malgutasun neurri gisa, ezarritako egutegia oinarri hartuta, enpresak aukera du (baldin gertatzen badira antolamenduarekin, produkzioarekin eta teknikarekin lotutako arrazoiak, eta, betiere, boluntariorik ez bada) langileei beren egutegian ezarritako laneguna aldatzeko, gehienez 4 lanaldi urtean, langileari abisua emanda 5 egun lehenago.

17. artikulua. Egutegia.

Egutegia urtero eginen da.

Jarduneko plantillak izanen dituzte hurrengo hiru hilabeteetarako ordutegien eta txanden koadranteak (abenduan emanen zaizkie urtarrilekoak, otsailekoak eta martxokoak, oporren berri izan eta gero). Urtarrilean apirilekoa emanen zaie, eta horrela hurrengoetan.

Enpresan egin nahi den berrantolaketa bukatutakoan, ahaleginak eginen dira urteko koadrante bat egiteko, ekitatiboa izanen dena txandetan eta jaiegunetan.

Koadranteak egitean, kontuan hartuko dira 2018ko maiatzaren 31n alderdiek sinatutako aurreakordioan jasotako baldintzak.

Langileen artean txanda aldaketak egiteko, aldez aurretik jakinarazi behar zaizkio langileen arduradunari edo Zuzendaritza Batzordeari. Aldaketak egin daitezke kategoria bereko edo desberdineko langileen artean, baldin badute lehen mailako administrariaren kategoria edo bigarren mailako administrariaren kategoria. Betiere, aldaketek inola ere ez dute ekarri behar gainerako langileen lanaldiak eta ordutegiak aldatzea.

18. artikulua. Ordutegia.

Galarazi gabe langile bakoitzarekin banaka adostutako baldintza onuragarriagoak, ordutegia asteko hiru txandatan banatuko da, astelehenetik igandera, jarraian adierazten den moduan:

Goizeko txanda: 7:00etatik 15:00etara;

Arratsaldez: 15:00etatik 23:00etara;

Gauez: 23:00etatik 07:00etara.

Galarazi gabe hitzarmen honen 8. artikuluan xedatutakoa, txandak antolatzean, kontuan hartuko dira 2018ko maiatzaren 31n alderdiek sinatutako aurreakordioan jasotako baldintzak.

19. artikulua. Atsedenaldiak.

Adostu da eutsiko zaiola gaur egun langileek duten atsedenaldien edo etenaldien erregimen malguari, betiere, arrazoizkoak izan behar dute.

Enpresak langileei malgutasuna onartzen die atsedenaldiez gozatzeko, eta, trukean, langileek onartzen dute malgutasun hori dela kontraprestazio zuzen eta baliokide bat, erantzuten diona pantailen aurrean aritzeagatik aldarrikatu duten atsedenaldiari. Horrenbestez, enpresak onartutako malgutasunak xurgatu eta konpentsatuko du langileek erreklamatu duten atsedenaldia, pantailen aurrean aritzeagatik.

Edonola ere, atsedenaldiaren iraupena ez da izaten ahal lanaldian 15 minututik gorakoa, metatuta, txandako eta langileko.

Atsedenaldi hori, ezarritako gehieneko denborarekin, hartuko da benetako lan-denboratzat, ondorio guztietarako.

20. artikulua. Oporrak.

1. Hitzarmen honen eraginpeko langileek 37 egun naturaleko oporrak izanen dituzte.

2. Opor egunak honela banatuko dira:

a) 21 egun natural jarraitu udan, ekainaren 6tik irailaren 18ra bitarte. Egun horiek txandaka esleituko dira urtero, langile guztien artean. Ekainaren 6an hasiko da banaketa, eta, urtez urte, udako tarte desberdinetan hartuko dituzte oporrak.

b) Neguko oporrak 16 egun izanen dira, eta jarraian edo 8 eguneko bi alditan gozatuko dira.

3. Ez dira oporrak hartzen ahal honako tarte hauetan: abenduaren 24tik urtarrilaren 6ra, biak barne, eta sanferminetan (uztailaren 6tik 14ra, biak barne).

4. Oporraldi batean, edozein inguruabar dela eta, aldi baterako ezintasuna gertatuz gero, eta horren ondorioz langileak ezin baditu oporrak hartu dagozkion urte naturalean, osorik edo partez, ezintasuna bukatu ondoren hartzen ahalko ditu, betiere oporrak sortu ziren urtea bukatu zenetik ez badira igaro 18 hilabete baino gehiago.

5. Oporretan dagoela, langilea ospitaleratu egiten badute –enpresari jakinarazi beharko zaio hurrengo 24 orduetan–, ez dira opor eguntzat zenbatuko ospitaleratuta ematen dituen egunak.

Egoera horretan, zerbitzuak ahalbidetzen duenean hartuko dira hartu gabeko opor egunak, enpresak eta langileak aurrez adostuta.

6. Denbora tarte bererako 2 eskaera baino gehiago egiten badira, zozketa bidez erabakiko da horien artetik zer bi eskaerak hartzen ahalko dituzten oporrak. Zozketan aukeratzen ez direnek libre dauden hamabostaldietan hartu beharko dituzte oporrak.

21. artikulua. Ordezkapenak.

Edozein arrazoi dela medio, langileren bat ez bada lanera bertaratzen, oro har, ohiko langileek eginen dute haren lana. Ordezpena konpentsatzeko, lanaldian egun bat gutxiago izanen du langileak, eta oinarrizko soldatan ehuneko 20 gehiago, lan egindako ordu bakoitzeko. Gaueko txandan, gutxienez 24 ordu lehenago jakinarazi beharko da aldaketa.

VI. KAPITULUA.–BAIMENAK ETA ESZEDENTZIAK

22. artikulua. Baimen ordainduak.

Honako egoera hauetan, langileak baimena izanen du denbora batez lanera ez agertzeko, galdu gabe ordaindua izateko eskubidea, baldin aldez aurretik abisatu eta justifikatzen badu:

1) Hamabost egun natural, ezkontzeagatik edo izatezko bikotea erregistratzeagatik.

2) Egun bat, seme-alaben, anai-arreben edo gurasoen ezkontzagatik.

3) Ezkontideak, izatezko bikotekideak edo odol edo ezkontza bidezko bigarren gradura arteko ahaideek (izatezko bikotekidearen odol bidezko ahaideak barne) edo langilearekin etxe berean bizi den eta haren zaintza behar duen beste edozein pertsonak istripu edo eritasun larria baldin badute, ospitaleratu behar badituzte edo ospitaleratzerik ez baina etxean atseden hartzea eskatzen duen ebakuntza kirurgikoa baldin badute: bost egun.

4) Hiru egun, kasu hauetan: haurraren jaiotza edo ezkontidearen heriotza, edo izatezko bikotekidearen heriotza edo odol edo ezkontza bidezko bigarren gradura arteko ahaideen heriotza. Arrazoi horregatik langileak bidaia egin behar badu probintziatik kanpo, epea bost egunekoa izanen da.

5) Ohiko bizilekua aldatzeagatik, egun bat.

6) Nahitaezko eginbehar publiko eta pertsonal bat betetzeagatik, behar-beharrezkoa den denbora. Baldin legez edo hitzarmen bidez ezarritako arau batean finkatua badago denbora jakin bat, jarraituko zaio arau horretan absentziaren iraupenaz eta konpentsazio ekonomikoaz xedatuta dagoenari.

7) Eginkizun sindikaletan edo langileen ordezkaritza lanetan aritzeko: lege edo hitzarmen bidez ezarritakoa.

8) Behar-beharrezkoa den denbora, betiere lanorduetan egin behar badira, jaio aurreko azterketak egiteko eta erditzea prestatzeko tekniketan trebatzeko, eta, adopzioaren, harreraren edo adoptatzeko egiten den zaintzaren kasuetan, informazio eta prestakuntza saioetara joateko eta egokitasun deklarazioaren aurreko txosten psikologiko eta sozialak egiteko.

9) Lau egun, gehienez, ezinezkoa baldin bada lantokira iristea, edo ezinezkoa bada hara ailegatzeko behar diren zirkulazio-bideetatik pasatzea, agintaritza eskudunek joan-etorrietarako ezarritako gomendioengatik, mugengatik edo debekuengatik, edo arrisku larriko eta berehalako egoera bat gertatzen bada, barnean direla hondamendi edo fenomeno meteorologiko kaltegarri baten ondoriozkoak. Lau egunak igaro ondoren, baimena luzatuko da hura ekarri zuten inguruabarrak desagertu arte, ezertan galarazi gabe enpresak lan kontratua eteteko edo lanaldia murrizteko aukera, ezinbesteko kasuetan, 47.6 artikuluan aurreikusitako baldintzetan.

Lanaren izaera bateragarria baldin bada urrutiko lanarekin, eta komunikazio-sareen egoerak horretarako bidea ematen badu, enpresak martxan jartzen ahalko du, eta begiratuko du betetzen direla uztailaren 9ko 10/2021 Legean jasotako gainerako betebehar formal eta materialak (Urrutiko Lanari buruzko Legea), eta, bereziki, honako hau: bitarteko, ekipamendu eta tresna egokien hornidura.

10) Behar den denbora, organoak edo ehunak emateko prestaketa lanak egiteko, betiere horiek lanaldiaren barnean egin behar badira.

11) Jaiotzaren, adopzioaren, adoptatzeko zaintzaren edo harreraren kasuan, 45.1.d) artikuluarekin bat, langileek eskubidea izanen dute ordu batez lanetik kanpo egoteko, bularreko haurra zaintzearren, horrek bederatzi hilabete bete arte. Ordu hori bi zatitan banatzen ahal da. Ume bat baino gehiago jaiotzen edo adoptatzen bada, edo ume bat baino gehiago adoptatzeko zaintza edo harrera kasuetan, baimenaren denbora modu proportzionalean handituko da.

Eskubide hori erabiltzen duenak ordezkatzen ahal du lanaldiaren ordubeteko murrizketarekin, hala nahi badu, helburu berbererako.

12) Langileek eskubidea izanen dute ordu batez lanpostutik kanpo egoteko, baldin seme edo alaba bat behar baino lehen jaiotzen bada edo, arrazoia edozein dela ere, jaio ondoan ospitalean egon behar badu. Era berean, eskubidea izanen dute lanaldia murrizteko, bi ordu gehienez, dagokion soldata murrizketarekin, araberan, Langileen Estatutuan ezarri bezala.

13) Haurdun dauden langileek eskubidea izanen dute lanetik alde egiteko, galdu gabe dagokien ordainsaria jasotzeko eskubidea, egiteko jaio aurreko azterketak eta erditzearen prestaketa teknikak. Horretarako, aldez aurretik enpresari abisatu beharko diote, eta justifikatu beharko dute horiek guztiak lanaldiaren barrenean egin beharra.

14) Bederatzi hilabetetik beherako semeari edo alabari esnea emateko, emakumezko langileek eskubidea dute lanetik ordubetez lekutzeko. Denbora hori bi zatitan bana dezakete. Emakumezko langileak eskubide hori ordezka dezake ohiko lanaldiaren ordu erdiko murrizketarekin, hala nahi badu, helburu berbererako.

Ez badu hartzen haurrari esnea emateko lanetik lekutzeko denbora, denbora hori metatzen ahal du, zortzi orduko lanaldiko egun bakoitzean ordu erdi bat kontatuta, eta gero dena batera hartu amatasun atsedenaldia bukatutakoan.

15) Familia medikuaren kontsultara joateko, edo Gizarte Segurantzako espezialista baten nahiz mediku partikular baten kontsultara joateko, frogagiria aurkeztuta, beharrezkoa den denboraz.

16) 1368/1985 EDan araututako lan harreman berezia duten langileak, aurrez jakinarazi eta justifikatuta, lanetik ateratzen ahalko dira, joateko errehabilitazio mediko-funtzionalerako tratamenduetara, ordainketa jasotzeko eskubidearekin, urtean 20 egunez gehienez.

17) Ordaindutako 5 ordu urtean, bigarren mailara arteko ahaideak medikuarengana laguntzeko.

23. artikulua. Ordaindu gabeko baimenak.

1. Langile guztiek, urtero, eskatzen ahalko dute hiru hilabeteko ordaindu gabeko baimena, eta onartu beharko zaie, baldin behar den denboraz abisatzen badute.

2. 1368/1985 EDn araututako lan harreman berezia duten langileak, aurrez jakinarazi eta arrazoituta, lanetik ateratzen ahalko dira, joateko errehabilitazio mediko-funtzionalerako tratamenduetara, ordainsaririk jasotzeko eskubiderik gabe, baldin agortu badituzte aurreko artikuluan aurreikusitako urteko 20 egunak.

Norbere eginbeharretarako, ezartzen da 3 eguneko ordainsaririk gabeko baimena. Ezin dira egunak metatu, eta gutxienez 7 egun lehenago eskatu beharko dira. Opor egunekin ere ezin dira metatu.

24. artikulua. Eszedentziak.

1. Langileen Estatutuan aurreikusitako kasuez gainera, eszedentzia emanen da, orobat, eginkizun sindikalak betetzeko, probintzia mailako esparruan edo goragoko esparruan, betiere baldin ordezkaritza duen zentral sindikal batekoa bada langilea.

2. Enpresak eszedentzia emanen du, baldin langileak hala eskatzen badu, ikasketak handitzeko, enpresaren jarduerarekin loturik, eginkizun sindikalekin loturik, etab.

3. Emakume langileek, amatasun baja bukatutakoan edo oporrak hartu ondotik, eta aurrez hala eskatzen badute, hartzen ahalko dute hiru urtera arteko eszedentzia, lanpostua gordeta eta antzinatasuna zenbatuz, seme edo alaba bakoitza zaintzeko, haur horiek naturalak nahiz adoptatuak izan. Hala ere, baldin enpresa bereko bi langilek edo gehiagok badute eskubide hori, arrazoi berberarengatik, enpresak mugatu dezake eskubide hori aldi berean erabiltzea, baldin bidezko arrazoirik bada enpresaren funtzionamenduarekin lotuta.

4. Desgaitasuna izanik enplegu arruntean hasten den langile orok (besteren kontura edo norberaren kontura), enplegu-zentro berezi batetik kanpo hasi ere, borondatezko eszedentzia hartzen ahalko du urtebetez, lanpostua gordeta, enpresa arruntarekiko lan harremana azkentzen den unean edo langile autonomoen araubidean baja egiten duenean.

25. artikulua. Ahaideak zaintzeko eszedentzia.

1. Langileak eskubidea izanen du eszedentzia hartzeko, ahaide bat zaintzeko, baldin larriki gaixorik badago bigarren mailako odol bidezko edo ezkontza bidezko edo izatezko bikotekidearen bidezko ahaide bat; betiere, medikuak hala frogatu badu. Arrazoi horrek eragindako eszedentziak bi urte iraun dezake gehienez, eta hura hartzen duen langileak ez du eskubiderik izanen inolako ordainsaririk jasotzeko.

2. Idatziz eskatu behar da beti, eszedentzia hasi baino hogeita hamar egun lehenago gutxienez, salbu premia larriko kasu frogatuetan. Enpresak idatzizko erantzuna eman beharko dio bost eguneko epean.

3. Eszedentzia aldian, bitarteko langile batek betetzen ahalko du hutsik gelditu den postua, eta horrek bere egitekoak utziko ditu, eta enpresarekiko lan harremana azkendu, postuaren titularra itzultzen den unean.

26. artikulua. Borondatezko eszedentzia.

Borondatezko eszedentziak arautzen dira une bakoitzean aplikagarri den lan arloko araudiaren arabera.

27. artikulua. Lan kontratua etetea: amatasuna, aitatasuna, haurdunaldiko arriskua, edoskitze naturaleko arriskua, adopzioa edo harrera.

1. Une bakoitzean aplikatzekoa den lan arloko legediaren mende gelditzen dira honako hauekin lotutakoak: amatasuna, aitatasuna, haurdunaldiko arriskua, bederatzi hilabetetik beherako haur baten edoskitze naturaleko arriskua, adopzioa edo harrera.

2. Lehen esandakoa galarazi gabe, langileak bere ordainsariaren %100 jasoko du, aparteko pagak barne, baldin lan kontratua eteten bada honako hauekin lotutako gaiengatik: amatasuna, aitatasuna, haurdunaldiko arriskua, bederatzi hilabetetik beherako haur baten edoskitze naturaleko arriskua, adopzioa edo harrera.

3. Artikulu honetan ezarritako arrazoiak direla eta, lan kontratuaren eteteak oporraldiarekin bat egiten badu erabat edo partzialki, lan kontratuaren etenaldiaren jarraian hartuko dira oporrak, edo enpresak eta langileak adostutakoan.

28. artikulua. Lizentzia ordaindugabeak.

Baimentzen dira bi hilabetera arteko ordaindu gabeko lizentziak, urte natural bakoitzeko, baldin langileak haurra atzerrian adoptatu behar badu, parte hartu behar badu ugalketa lagunduko tekniketan, denbora luzez ospitaleratzen badute langilearen ezkontidea edo lehen mailara arteko ahaide bat, edo medikutara laguntzeko gaixotasun kronikoa edo desgaitasun larriak dituzten ahaideei (lehen mailakoei), aldez aurretik behar bezala arrazoituta.

VII.–KAPITULUA.–HOBEKUNTZA SOZIALAK

29. artikulua. Aldi baterako ezintasuna.

1. Langilea ezintasun egoeran badago laneko istripuengatik edo laneko gaixotasunengatik, egoera horrek sortutako subsidioa osatu eginen du enpresak, harik eta iritsi arte langileak baja hartu baino lehen zuen hileko soldataren%100era, bajak irauten duen denbora osoan, salbu aurreko hileko ordainsariak baldin badauzka ohiz kanpoko sortzapenak; kasu horretan, ez dira kontuan hartuko osagarria kalkulatzeko.

2. Gertakari arrunten ondoriozko aldi baterako ezintasunaren kasuan, hitzarmen hau sinatzen den unetik hasita, enpresak osatu eginen du Gizarte Segurantzaren prestazioa, hileko ohiko soldataren %100eraino, aparteko haborokinak barne, urtean gehienez 50 baja-egunez, jarraikakoak izan nahiz etenekin izan.

30. artikulua. Istripu asegurua.

Enpresak istripu asegurua itundu beharko du langileentzat. Hauek izanen dira aseguratutako gertaerak eta zenbatekoak:

–Laneko kontingentzien ondoriozko istripuak eragindako heriotza: 30.600 euro.

–Laneko kontingentziak eragindako lanerako ezintasun iraunkorra (behin betikoa), osoa, absolutua edo baliaezintasun handia: 30.600 euro.

–Laneko kontingentziak eragindako lanerako ezintasun iraunkorra (behin betikoa), partziala: 15.600 euro.

31. artikulua. Jantziak.

Lanerako behar dituzten jantziak eman beharko dizkie enpresak langileei.

32. artikulua. Erasoen protokoloa eta berdintasun plana.

Alderdiek konpromisoa hartzen dute erasoen protokolo bat eta berdintasun plan bat lantzeko, hitzarmen kolektibo honen iraunaldian zehar, eta hitzarmenaren eranskin gisa jasotzeko.

33. artikulua. Arrisku psikosozialak.

Zuzendaritzak eta langileen legezko ordezkaritzak jarraipen batzorde bat eratuko dute,

sortzen diren arazoei aurre egiteko.

VIII. KAPITULUA.–FALTAK ETA ZEHAPENAK

34. artikulua. Falta arinak.

Honako hauek dira falta arinak:

a) Hogeita hamar egunean lanera berandu iristea 3 aldiz.

b) Lanera bertaratu ez eta hurrengo 24 orduetan ez jakinaraztea hutsegitearen arrazoiak.

c) Lanetik alde egitea bidezko arrazoirik gabe, nahiz eta denbora gutxirako izan, baldin eta ez bada hartzen falta astuntzat edo oso astuntzat, enpresarentzako, erabiltzaileentzako edo lankideentzako kalteak direla-eta.

d) Zabarkeriaz jokatzea arauei edo jasotako aginduei dagokienez.

35. artikulua. Falta astunak.

Honako hauek dira falta astunak:

a) Hogeita hamar egunean lanera berandu iristea 3 aldiz baino gehiagotan eta 10 baino gutxiagotan.

b) Hogeita hamar egunean, lanera ez joatea behin baino gehiagotan, bidezko arrazoirik izan gabe.

c) Zerbitzuari dagokionez, agindutako lanetan behar den arreta ez jartzea eta goragokoen jarraibideei jaramonik ez egitea, enpresaren edo lankideen kalterako.

d) Ez betetzea enpresak ezarritako segurtasun eta babes neurriak. Baldin ez-betetze horrek istripu arriskua ekartzen badie berari edo lankideei, edo instalazioak matxuratzeko arriskuan ekartzen badu, falta oso astuntzat jotzen ahalko da.

e) Desgaitasuna dutenak errespeturik gabe tratatzea, eta haietako bakoitzaren duintasuna aintzat hartu gabe, betiere ez falta bada oso astuntzat hartzen, oso larria izateagatik.

f) Hirurogei egunean falta arin bera behin baino gehiagotan egitea.

36. artikulua. Falta oso astunak.

Honako hauek hartzen dira falta oso astuntzat:

a) Urtebetean lanera berandu iristea 20 alditan baino gehiagotan.

b) Hilabete batean, hirutan lanera ez joatea, bidezko arrazoirik gabe.

c) Desgaitasuna dutenak errespeturik gabe tratatzea, eta haietako bakoitzaren duintasuna aintzat hartu gabe.

d) Ez betetzea enpresak ezarritako segurtasun eta babes neurriak.

e) Eritasun edo istripuaren itxurak egitea.

f) Hitzezko eta egitezko tratu txarrak ematea nagusiei eta lankideei.

g) Lanetik alde egitea edo zabarkeria larriz aritzea, baldin kalte larria egiten bazaie enpresari nahiz lankideei.

h) Agindutako kudeaketetan iruzurra egitea, leialtasunik eza izatea edo konfiantza-abusua egitea, eta enpresari nahiz hirugarrenei ebastea, lapurtzea edo jokabide horren konplize aritzea, enpresaren eraikinetan zerbitzua ematean.

i) Agintekeria.

j) Hiruhileko batean falta astunak behin baino gehiagotan egitea.

37. artikulua. Zehapenak.

Enpresak ahalmena du zehapenak jartzeko. Zehapenak idatziz komunikatuko zaizkio langileari; adieraziko dira gertakariak, faltaren gradua eta ezarritako zehapena.

Falta astunak eta oso astunak ordezkari sindikalari komunikatuko zaizkio, ordezkari sindikalik baldin badago.

Kontuan hartuta egindako falten larritasuna eta inguruabarrak, enpresek zehapen hauek jartzen ahal dituzte, gehienez:

a) Falta arinak:

–Hitzezko kargu-hartzea. Behin eta berriz gertatzen baldin bada, kargu-hartze idatzia.

b) Falta astunak:

–Idatziz kargu hartzea, eta langileen ordezkariei komunikatzea.

–Enplegu-soldaten etenaldia, 15 egunez gehienez, baldin falta behin baino gehiagotan egiten bada.

c) Falta oso astunak:

–Kaleratzeko ohartarazpena.

–Enplegu eta soldata gabe uztea, 60 egunez gehienez.

–Kaleratzea.

38. artikulua. Preskripzioa.

Langileek egindako falta arinek hamar egunen buruan preskribatuko dute; astunek, hamabost egunen buruan; eta oso astunek, berrogeita hamar egunen buruan; betiere, enpresak faltaren berri izan duen egunetik aurrera, eta, betiere, falta egin eta sei hilabetera.

IX. KAPITULUA.–BATZORDE PARITARIOA

38. artikulua. Batzorde paritarioa.

Batzorde paritario bat sortu da, eginkizun hauek izanen dituena:

a) Bitartekari, arbitraje eta adiskidetze-lana egitea, bere esku jartzen diren gatazka indibidual eta kolektiboetan.

b) Itundutakoa interpretatu eta aplikatzea.

c) Akordio guztien jarraipen lanak egitea.

d) Legez ezarritako gaiez arduratzea.

e) Desadostasunak konpontzeko prozesuetan parte hartzea, hitzarmen kolektiboa aplikatzen ez den prozeduretan, kontsultak egiteko aldian, jarraikiz Langileen Estatutuen 85. artikuluari.

Oinarrizko hitzarmen honen partetzat hartuko dira batzorde paritarioak interes orokorreko arloetan hartzen dituen akordioak, eta horiek ere betebeharrekoak izanen dira. Lan arloko agintaritzari igorriko zaizkio akordio horiek, erregistra ditzan.

Langileen ordezkariak eta elkarteko zuzendaritza batzordearen ordezkari batek osatuko dute batzordea.

Funtzionamendua. Langileen ordezkaria batzordeko idazkari izanen da, eta honako lan hauez arduratuko da: aztergaiak jasotzeaz, deialdiak egiteaz, eguneko gai zerrendaren berri emateaz eta batzordeak hartzen dituen erabakien ziurtagiriak egiteaz eta argitaratzeaz. Desadostasun bat aztertzeko eskaera aurkezten denean, batzordekideei deialdia eta zitazioa eginen zaie. Batzorde paritarioak hamar (10) egun naturaleko epean ebatziko ditu aztergai jartzen diren gaiak. Batzordean desadostasunik sortzen bada, adiskidetze eta bitartekaritza prozedura eskatuko zaio Nafarroako Lan Auzitegiari. Halakoetan, ebazteko epea eten eginen da bitartekaritza eskatzen denetik, eta adiskidetze ekitaldia egin eta hurrengo egun baliodunean berriz hasiko da ebazteko epea. Adierazitako epean behar den txostena edo ebazpena ematen ez bada, ulertuko da bete dela auzia lehenbizi batzorde paritarioaren aztergai jartzeko betebeharra. Nolanahi ere, batzorde paritarioak bilera arrunta eginen du urtean behin, eta bilduko da, orobat, batzordekide gehienek edo ordezkaritzaren batek eskaera justifikatua egiten duten guztietan.

Erabakiak hartzea. Batzorde paritarioak auziak ebatziko ditu bere bi kideek aho batez hartutako erabakien bidez. Aktan jasoko dira batzorde paritarioan dauden iritziak. Hartzen diren erabakiak interesdunei igorriko zaizkie, haien berri izan dezaten. Hala langileen ordezkariek nola enpresaren ordezkariek aukera izanen dute aholkulariak izendatzeko, bilera guztietara edo batzuetara joateko, eta hizpidea izanen dute beren eskumeneko arlo guztietan, baina botorik ez.

Batzorde paritarioaren mende jarri beharra: Aldeek batzorde paritarioaren mende jarri behar dituzte sortzen diren interes orokorreko gai guztiak, edozein ekintza judizial edo administratibotara jo aurretik, nahiz horrek ez duen galarazten gero eskubide kolektiboak erabili ahal izatea. Betiere, negoziatu beharko da fede onaren printzipioari jarraikiz.

2025ERAKO SOLDATA TAULAK

Iragarkiaren kodea: F2508558