Iragarkia
128. ALDIZKARIA - 2025eko ekainaren 27a
1. NAFARROAKO FORU KOMUNITATEA
1.4. DIRU-LAGUNTZAK, LAGUNTZAK ETA BEKAK
250E/2025 EBAZPENA, ekainaren 5ekoa, Landa Garapeneko zuzendari nagusiak emana, zeinaren bidez onesten baitira laguntza honen deialdia eta haren oinarri arautzaileak: "Laguntzak merkataritzako ferietan parte hartzeko nekazaritzako elikagaiekin, arrantzaren eta akuikulturaren sektorea barne, "de minimis" araubidearen babesean. 2025eko deialdia". DDBN identifikazioa: 838026.
Nafarroan badira nekazaritzako elikagaien operadore asko Europak emandako aintzatespenen bat dutenak: hamar jatorri deitura babestu (Lodosako pikillo piperra, Erronkari gazta, Idiazabal gazta, Nafarroa ardoa, lur eremuko ardoen hiru jatorri deitura babestu, Nafarroako olioa, Errioxa ardoa eta Cava), zortzi adierazpen geografiko babestu (Nafarroako zainzuria, Tuterako orburua, Nafarroako aratxea, Nafarroako arkumea, Nafarroako patxarana, "3 Erribera" lurraldeko ardoa, Nafarroako txistorra eta Queilesko Erribera) eta urdaiazpiko serranoaren berezitasun tradizional bermatua, ekoizpen sistema ekologikoaz gain. Era berean, badira Nafarroako Foru Komunitatean berezko aitorpena duten nekazaritzako elikagaien operadoreak: Nafarroako Elikagai Artisauak, Nafarroako Ekoizpen Integratua eta Reyno Gourmet berme marka.
Nafarroan, nekazaritzako elikagaien ekoizpenaren sustapena Europar Batasuneko esparru juridikoan onartutako figuren babesa duten kalitatezko ekoizpenei bideratuta dago bereziki, eta zuzenean bultzatzen ditu ekoizpen sektore primarioa, nekazaritzako industriaren sektorea eta elikaduraren merkataritzaren azpisektorea, Nafarroako nekazaritzako elikagaien kate osoari behar duen sendotasuna emanez, horrela ziurtatzeko ekoizpen ahalmena mantendu eta garatzen dela, lanpostuak indartu eta sortzen direla eta Nafarroako Foru Komunitateko BPGa eratzen laguntzen duela.
Nafarroako nekazaritzako elikagaien sektorearen dinamismoa funtsezkoa izan da Nafarroako Espezializazio Adimentsuaren S3 Estrategian hori adierazteko orduan, Foru Komunitatearen hazkunderako funtsezko sektoreetako bat baita.
Nafarroako Gobernuak, Nekazaritza Politika Bateratuaren Plan Estrategikoaren (NPBPE) esparruan, laguntza lerroak ezarri ditu kalitatezko figurak kudeatzen dituzten entitateentzat, barne merkatuan egiten dituzten informazio eta sustapen ekintzetarako, zehazki 7132 esku hartzerako. Esku hartze honen helburua da kalitatezko produktuen informazioa eta sustapena bultzatzea, kontsumitzaileek EBko edo nazioko kalitate programen arabera egindako produktuen ezaugarri bereiziak ezagut ditzaten, informazio edo sustapen kanpainen bidez.
Merkataritzako ferietan parte hartzea kalitatezko produktuak sustatzeko eta zabaltzeko tresna nagusietako bat da; horregatik, urtero laguntzen deialdi bat egiten da merkataritzako feria garrantzitsuenetan parte hartzeko. Laguntzaren balorazioa oso positiboa izan da urte hauetan; hala ere, funts publikoen erabilera etengabe hobetzearen alde, beharrezkotzat jotzen da feria horietan parte hartzeko aukerak zabaltzea, operadoreak neurri handiagoan joan daitezen haietara beren beharren arabera. Merkatuen eta teknologiaren bilakaera kontuan hartuta, eta operadoreen esku uztearren beren sustapen hitzordurik onenak hautatzeko erabakia, komeni da laguntza deialdi honetan diruz lagundu daitezkeen ekintza hauek sartzea:
–INTIAk kudeatutako stand instituzionala duten aurrez aurreko merkataritzako ferietara joatea (bai parte-hartze kolektiboaren arloan, bai banakakoan).
–Enpresek beren interesetarako egokitzat jotzen duten aurrez aurreko beste edozein feria profesionaletara joatea.
–Foru Komunitatean egiten diren feria profesional birtualetan parte hartzea.
–Foru Komunitatean profesionalki antolatutako kontrako bidaietan parte hartzea.
Laguntza lerro hau Nafarroako Foru Komunitateko Administrazioaren Dirulaguntzen 2024-2026 aldirako Plan Estrategikoan jasota dago, 145. lerroan. Plan hori Nafarroako Gobernuak onetsi zuen 2024ko ekainaren 19an hartutako erabaki baten bidez.
Ebazpen honetan araututako laguntzak "de minimis" araubidearen mende daude. Araubide hori ezarri zen Batzordeak 2023ko abenduaren 13an emandako 2023/2831 (EB) Erregelamenduan, Europar Batasunaren Funtzionamenduari buruzko Tratatuaren 107. eta 108. artikuluak "de minimis" laguntzei aplikatzeari buruzkoan. (2023ko L 2831 Europar Batasunaren Aldizkari Ofiziala, abenduaren 15ekoa).
Ikusita Nekazaritzako Ustiategien eta Elikagaien Sustapenerako Zerbitzuko zuzendariaren aldeko txostena eta aurtengo ekitaldirako aurrekontuan diru erabilgarria dagoela.
Kontuan hartuta ebazpen honi Nafarroako dirulaguntzei buruzko azaroaren 9ko 11/2005 Foru Legea aplikatuko zaiola.
Adierazitakoarekin bat, eta Landa Garapeneko eta Ingurumeneko Departamentuaren egitura organikoa ezartzen duen azaroaren 15eko 255/2023 Foru Dekretuak ematen dizkidan eskudantziak erabiliz,
EBAZTEN DUT:
1. Onestea nekazaritzako elikagaiekin, arrantzaren eta akuikulturaren sektorea barne, "de minimis" araubidearen babesean, merkataritzako ferietan parte hartzeko laguntzen deialdiaren oinarri arautzaileak 2025erako, ebazpen honen I. eranskinean adierazten denari jarraikiz.
2. Onestea nekazaritzako elikagaiekin, arrantzaren eta akuikulturaren sektorea barne, "de minimis" araubidearen babesean, merkataritzako ferietan parte hartzeko laguntzen deialdia 2025erako.
3. 575.000,00 euroko gastua baimentzea Nafarroako 2025eko Aurrekontu Orokorretako "Laguntzak, kalitatezko ekoizpenek lehiaketetan eta ferietan parte hartu dezaten" izeneko 720003-72200-4701-413104 partidaren kargura.
Partidan baimendutako kreditua gehienez 200.000 euro bitarte handitzen ahalko da, Landa Garapeneko Zuzendaritza Nagusiaren aurrekontu programako aurrekontu partidaren kargura, Dirulaguntzei buruzko azaroaren 9ko 11/2005 Foru Legearen 31.3 artikuluaren a) letran ezartzen diren baldintzekin bat etorriz, baldin eta kreditu egokia eta nahikoa badago.
4. Deialdi hau Dirulaguntzen Datu Base Nazionalean (DDBN) erregistratzea.
5. Ebazpen hau eta I. eranskina Nafarroako Aldizkari Ofizialean argitaratzea.
6. Ebazpen honek ez du administrazio bidea amaitzen eta haren aurka gora jotzeko errekurtsoa jar daiteke, Landa Garapeneko eta Ingurumeneko kontseilariari zuzendua, argitaratu eta biharamunetik hilabeteko epean.
Iruñean, 2025eko ekainaren 5ean.–Landa Garapeneko zuzendari nagusia, Rubén Goñi Urroz.
I. ERANSKINA.–NAFARROAKO NEKAZARITZAKO ELIKAGAIEN ENPRESEK, BAITA ARRANTZAREN ETA AKUIKULTURAREN SEKTOREAN ARITZEN DIRENEK ERE, "DE MINIMIS" ARAUBIDEAREN BABESEAN, MERKATARITZAKO FERIETAN PARTE HARTZEKO LAGUNTZAK EMATEKO OINARRI ARAUTZAILEAK, 2025ERAKO
Lehen oinarria.–Laguntzaren xedea, aplikazio eremua eta onura publikoa.
1. Oinarri arautzaile hauen xedea da nekazaritzako elikagaien eraldaketaren eta merkaturatzearen sektorean aritzen diren enpresei, arrantzaren eta akuikulturaren sektorea barne, merkataritzako ferietan parte hartzeagatik ematen ahal zaien laguntza finantzarioaren esparrua zehaztea. Merkataritzako feriatzat jotzen dira aurrez aurre egiten direnak, birtualki egiten direnak nahiz kontrako bidaiak.
2. Merkataritzako ferietan parte hartzea tresna nagusietako bat da kalitatezko ekoizpenak sustatzeko eta haien inguruko ezagutza hedatzeko, eta parte hartze horren eragina handiagoa da operadoreak erakustoki kolektiboetan elkartzen direnean, non norbanakoaren ekoizpenez gain kalitate bereiziaren figurak azpimarratzen baitira, edo operadoreak biltzen dituzten marka kolektiboak. Indartu egiten da, horrela, Nafarroak nekazaritzako elikagai kalitatedunen erreferentziazko lurralde gisa duen irudia.
Horregatik, beharrezkotzat jotzen da, ikuspegi publikotik, Nafarroako Gobernuaren babesa adieraztea nekazaritzako elikagaien ekoizpenari merkataritzako ferietan stand kolektiboetan edo kokaleku kolektiboetan parte hartzeko laguntzen bidez, zeinetan Nafarroako Foru Komunitatearen irudiaren eta/edo haren Reyno Gourmet erreferentzia markaren babesean aurkeztuko baitute beren burua ekoizleek.
Stand kolektibo instituzionalak izanik, deialdi honetan sartzen diren feriak hauek dira:
–Barcelona Wine Week.
–Gourmet Azoka.
–ANUGA (bi urtez behin).
–Fruit Attraction.
–Forum Gastronomic Barcelona.
Halaber, sektore profesionalari zuzendutako nekazaritzako elikagaien beste edozein feria/erakusketatan parte hartzen ahalko da, fisikoa nahiz birtuala izan, gutxienez 5 enpresak parte hartzen badute.
Era berean, Foru Komunitatean egindako kontrako bidaietan parte hartzea ere diruz laguntzen ahal izanen da, baldin eta elkarren artean loturarik ez duten 3 enpresak parte hartzen badute gutxienez.
3. Ebazpen honetan araututako laguntzak "de minimis" araubidearen mende daude. Araubide hori ezarri zen Batzordeak 2023ko abenduaren 13an emandako 2023/2831 (EB) Erregelamenduan, Europar Batasunaren Funtzionamenduari buruzko Tratatuaren 107. eta 108. artikuluak "de minimis" laguntzei aplikatzeari buruzkoan. (2023ko L 2831 Europar Batasunaren Aldizkari Ofiziala, abenduaren 15ekoa).
4. Diruz lagundu daitezkeen ekintzak egiteko aldia 2024ko azaroaren 7tik 2025eko azaroaren 6ra bitartekoa izanen da.
Bigarren oinarria.–Onuradunak eta bete beharreko baldintzak.
1. Onuradunak:
1.1. Laguntza honen onuradun izanen dira Nafarroako nekazaritzako produktuen eraldaketaren eta merkaturatzearen sektorean aritzen diren enpresak, arrantzaren eta akuikulturaren sektorean aritzen direnak barne, Batzordearen 2023ko abenduaren 13ko 2023/2831 (EB) Erregelamenduaren 1.1 artikuluko salbuespenekin (erregelamendu hori Europar Batasunaren Funtzionamenduari buruzko Tratatuaren 107. eta 108. artikuluak "de minimis" laguntzei aplikatzeari buruzkoa da), baldin eta aurreko oinarrian barne hartutako merkataritzako ferietan parte hartzen badute, eta lehen oinarriaren 4. puntuan zehaztutako aldi hautagarriaren barnean egiten badira.
1.2. Ez dira laguntza honen onuradun izaten ahalko:
a) Arrantzako eta akuikulturako produktuak eraldatzen eta merkaturatzen diharduten enpresak, laguntzaren zenbatekoa eskuratutako edo merkaturatutako produktuen prezioaren edo kopuruaren arabera zehazten denean;
b) Nekazaritzako produktuak eraldatzen eta merkaturatzen diharduten enpresak, honako kasu hauetakoren batean:
- i) Kontuan harturik enpresa interesdunek horrelako zenbat produktu erosten dizkieten lehen sektoreko ekoizleei edo zer preziotan, edo horrelako zenbat produktu merkaturatzen dituzten, horren arabera ezartzen denean laguntzaren zenbatekoa.
- ii) Laguntza, osorik edo zati batean, lehen mailako ekoizleengan duen eraginaren mende dagoenean;
2. Onuradunen betebeharrak:
a) Eraldaketa prozesuak egitea Nafarroan kokatutako instalazioetan; ez dira onartuko maquila ekoizpen sistemaren arabera soilik aritzen diren enpresak, ez eta hirugarrenen produktuak ontziratu eta etiketatzen dituztenak ere.
b) Kontratu bat formalizatzea merkataritzako ekintzan parte hartzea kudeatzen duen entitate batekin, bai eta aurrekontu bat izatea ere, eskatutako ekintza bakoitzean parte hartzeak izanen dituen kostuen aurreikuspenarekin.
c) Zerga betebeharrak eta Gizarte Segurantzarekikoak egunean izatea.
d) Dirulaguntzei buruzko 11/2005 Foru Legearen 13. artikuluan ezarritako baldintzak betetzea.
e) Batzordeak 2023ko abenduaren 13an emandako 2023/2831 (EB) Erregelamenduan zehaztutako mugen barruan egotea (Europar Batasunaren Funtzionamenduari buruzko Tratatuaren 107. eta 108. artikuluak "de minimis" laguntzei aplikatzeari buruzkoa). Laugarren oinarriaren 3. puntuan daude zehaztuta.
f) Ezin izanen dute laguntzarik eskuratu sexuan edo generoan oinarritutako diskriminaziotzat hartutako lan praktikak egiteagatik edo onartzeagatik, administrazio ebazpen irmo edo kondena epai irmo baten bidez, zehapena edo zigorra jaso duten entitate eskatzaileek.
Aurreko paragrafoan aipatutako egoeran dauden enpresak laguntza horien onuradunak izaten ahal dira berriz, baldin eta ezarritako zehapena edo zigorra beteta badute eta berdintasun plan bat prestatu badute ezarritako baldintzetan, halakorik exijitzen ahal bazaie.
Hirugarren oinarria.–Gastu diruz lagungarriak.
1. Diruz laguntzen ahal izanen dira onuradunek ekitaldiaren antolakuntzarekin edo, hala badagokio, INTIA SArekin kontratatzen dituzten eta aldi hautagarriaren barruan egiten diren merkataritzako ferietan parte hartzearekin zuzenean lotuta dauden gastuak, aurrez aurreko feriak izanik stand instituzional batek kudeatutako esparruan joaten badira.
"Merkataritzako ferietan parte hartzearekin zuzenean lotuta dauden gastuak" dira:
a) Aurrez aurreko ferien kasuan: standak kontratatzeko gastu guztiak, lurzorua, muntaketa, zerbitzuak, jarduerak, eremu komunak eta kudeaketa gastuak barne.
b) Feria birtualen eta kontrako bidaien kasuan, ekitaldiaren antolakuntzarekin kontratatzeak dakartzan gastuak.
2. Ez dira diruz lagungarriak izanen operadoreak merkataritzako aurrez aurreko feria batera, feria birtual batera edo kontrako bidaia batera joateko egindako gainerako gastuak, hala nola bidaiari, aparkalekuari, otorduei, hotelei eta bezeroentzako gonbidapen edo sarrerei dagozkienak.
3. Diruz lagundu daitekeen gehieneko gastuaren zenbateko hauek ezartzen dira, merkataritzako feriaren motaren arabera:
–Aurrez aurreko feriak: 650 euro/m².
–Feria birtualak: 1.500 euro feria bakoitzeko.
–Kontrako bidaiak: 6.000 euro bidaia bakoitzeko.
Laugarren oinarria.–Laguntzaren zenbatekoa.
1. Onuradun bakoitzari aplikatuko zaion laguntza %65ekoa izanen da merkataritzako ferian parte hartzean egindako gastuengatik aurkeztutako fakturen zenbatekoaren gainean, ardoa egiten duten bodegentzat izan ezik, azken zenbatekoa %70ekoa izanen baita haientzat.
2. Gehienez ere 20.000 euroko muga ezartzen da onuraduneko eta deialdiko.
3. Nekazaritzako produktuen enpresa bakar bati, arrantzaren eta akuikulturaren sektorean aritzen direnak barne, emandako "de minimis" laguntza gehienez ere 300.000 eurokoa izanen da hiru urteko edozein alditan. Hala bada, indarrean dagoen deialdian ordaindu beharreko laguntzak muga hori izanen du.
Bosgarren oinarria.–Dirulaguntza emateko modua.
1. Ebazpen honek arautzen dituen laguntzak norgehiagokako prozeduraren bidez emanen dira, lehentasun irizpide hauen arabera:
a) Inskribatuta daudenak Nafarroako nekazaritzako elikagaien kalitatezko figuretan, ekoizpen ekologikoko sisteman, Nafarroako ekoizpen integratuaren sisteman, Nafarroako Nekazaritzako Elikagaien Artisautzan edo Nafarroako berme marketan, eta merkataritzako ferietara joaten direnak, non standak identifikatuta egonen baitira modu kolektiboan eta argi eta garbi Nafarroako Foru Komunitatearen irudiaren barruan.
b) Inskribatuta ez daudenak Nafarroako nekazaritzako elikagaien kalitatezko figuretan, ekoizpen ekologikoko sisteman, Nafarroako ekoizpen integratuaren sisteman, Nafarroako Nekazaritzako Elikagaien Artisautzan edo Nafarroako berme marketan, eta merkataritzako ferietara joaten direnak, non standak identifikatuta egonen baitira modu kolektiboan eta argi eta garbi Nafarroako Foru Komunitatearen irudiaren barruan.
c) Nafarroako nekazaritzako elikagaien kalitatezko figuretan, ekoizpen ekologikoko sisteman, Nafarroako ekoizpen integratuaren sisteman, Nafarroako Nekazaritzako Elikagaien Artisautzan edo Nafarroako berme marketan inskribatutako eskatzaileen banakako parte-hartzeak.
d) Bigarren oinarrian ezarritako baldintzak betetzen dituzten gainerako enpresa eskatzaileak.
2. Enpresa bakoitzari dagokion laguntzaren zenbatekoa laugarren oinarriaren arabera kalkulatu ondoren, eskaerak 1. puntuan deskribatutako taldeen arabera ordenatuko dira. Lehendabizi, lehentasunezko lehen taldeko eskaeren artean banatuko da aurrekontua, eta gero hurrengo taldekoen artean.
Aurrekontua talde bateko eskaera guztiak finantzatzeko aski ez bada, jaso beharreko zenbatekoak hainbanatuko dira, dagokien laguntzaren zenbatekoaren proportzioan. Hainbanaketa horretatik ateratzen den laguntza hasiera batean zegokiekeen laguntzaren %30era iristen ez bada, ez da laguntzarik emanen.
Seigarren oinarria.–Eskaerak aurkeztea.
1. Laguntzaren eskaerak aurkezteko epea hamabost egunekoa izanen da, deialdia Nafarroako Aldizkari Ofizialean argitaratu eta biharamunetik hasita.
2. Eskaerak Nekazaritzako Elikagaien Kalitatearen eta Sustapenaren Atalera zuzenduko dira, eta bakar-bakarrik telematika bidez aurkeztuko dira, Nafarroako Gobernuaren Interneteko Atarian dagoen Erregistro Orokor Elektronikoaren bidez.
3. Laguntzaren eskaera bakarra aurkeztuko da kasu guztietan, nahiz eta laguntza merkataritzako feria baterako baino gehiagotarako eskatu.
4. Stand instituzionalaren barruan parte hartzen bada, eskatzaileak bere eskaeran adierazten ahalko du dirulaguntza zuzenean ordaindu dakion feria antolatzen duen entitateari.
5. Eskaera berariaz prestatutako ereduan aurkeztuko da (eredua Nafarroako Gobernuaren Interneteko Atariko Izapideen Katalogoan eskuratzen ahal da, www.nafarroa.eus helbidean), honako agiri hauekin batera:
a) Parte hartze gastu guztien aurreikuspena jasotzen duen laburpen taula, eskatutako merkataritzako feria bakoitzerako.
b) Laburpen taulan jasotako gastuen aurrekontua/proformako faktura, eskatutako merkataritzako feria bakoitzerako.
c) Entitate antolatzailearekin formalizatutako kontratuaren kopia. Onuradunak, 4. puntuarekin bat, aukeratzen badu dirulaguntza zuzenean aipatutako entitateari ordaintzea, aukera hori berariaz adierazi beharko da kontratuan.
d) Zerga arloko eta Gizarte Segurantzarekiko betebeharrak egiaztatzeko baimena, hitzez hitz honako hau dioena: "Nik, xxx, nire izenean/xxx ordezkatuz, baimena ematen diot Landa Garapeneko eta Ingurumeneko Departamentuari, nekazaritzako elikagaiekin, arrantzaren eta akuikulturaren sektorea barne, "de minimis" araubidearen babesean, merkataritzako ferietan parte hartzeko 2025erako laguntzak tramitatzeko prozeduran, nik/ordezkatzen dudan entitateak zergen ordainketak eta Gizarte Segurantzarekikoak eguneratuak ditudala/dituela egiaztatzeko" (eskabidearen ereduan sartuta dago).
Aurreko paragrafoan ezarritakoarekin ados ez badago, pertsonak edo entitateak berak aurkeztu beharko ditu zerga arloko eta Gizarte Segurantzarekiko betebeharrak betetzeari buruzko datuak.
e) Adierazpen idatzia edo bitarteko elektronikoen bidez egina, hiru urteko edozein alditan jasotako gainerako "de minimis" laguntza guztiei buruzkoa, betiere laguntza horiek loturik badaude Batzordearen 2023ko abenduaren 13ko 2023/2381 (EB) Erregelamenduari, Europar Batasunaren Funtzionamenduari buruzko Tratatuaren 107. eta 108. artikuluak "de minimis" laguntzei aplikatzeari buruzkoa, (2023ko L 2831 Europar Batasunaren Aldizkari Ofiziala, abenduaren 15ekoa), edo "de minimis" araubideko beste erregelamendu batzuei.
f) Eskatzailearen erantzukizunpeko adierazpena, helburu horretarako 2025ean eskatutako eta jasotako laguntzei buruzkoa.
g) Erantzukizunpeko adierazpena, Dirulaguntzei buruzko 11/2005 Foru Legearen 13. artikuluan ezarritako baldintzak betetzeari buruzkoa.
h) Eskaera egiten duen entitatearen IFZren kopia.
i) Eskaera egiten duen enpresaren osasun erregistroaren kopia.
Zazpigarren oinarria.–Ebaluazio organoa.
Nekazaritzako Elikagaien Kalitatearen eta Sustapenaren Atalak ebaluatuko ditu eskaerak.
Zortzigarren oinarria.–Deialdiaren antolamendua, instrukzioa eta ebazpena.
1. Eskaera harturik, seigarren oinarrian aipatzen den dokumentazio guztia aurkeztu den egiaztatuko da. Agiri guztiak ez badaude, gehienez hamar egunean osatu ditzala eskatuko zaio eskatzaileari, eta adieraziko zaio, hala egin ezean, eskaerari uko egiten diola ondorioztatuko dela eta espedientea artxibatzeko ebazpena emanen dela. Ebazpen hori jakinarazi eginen zaio.
2. Agiri guztiak bildu ondoren, eskatutako baldintza guztiak betetzen dituztela egiaztatuko da. Horretarako, bidezko diren kontrolak egiten ahalko dira.
3. Eskaerak ebaluatu ondoren, Nekazaritzako Ustiategien eta Elikagaien Sustapenerako Zerbitzuak dirulaguntza emateko ebazpena proposatuko du.
4. Araubide honen araberako laguntzak emateak ezin izanen du 300.000 euroko muga gainditu hiru urteko epean, Europar Batasunaren Funtzionamenduari buruzko Tratatuaren 107. eta 108. artikuluak "de minimis" laguntzei aplikatzeari buruzko 2023ko abenduaren 13ko 2023/2831 (EB) Erregelamenduan ezarritakoaren arabera.
5. Landa Garapeneko Zuzendaritza Nagusiak ebazpen arrazoitua emanen du laguntzak emateari buruz, eta espresuki adieraziko du zer eskaera ezetsi diren.
6. Prozeduraren gainean ebazteko, hiru hilabeteko epea izanen da, eskaerak aurkezteko epea bukatzen denetik hasita. Epea berariazko ebazpenik eman gabe bukatzen bada, eskaera ezetsitzat jotzen ahalko da, isiltasun administratiboaren ondorioz.
Bederatzigarren oinarria.–Onuradunaren betebeharrak.
1. Ekintzak ebazpen honetan xedatzen denarekin bat gauzatzea, eta bertan eta laguntza emateko ebazpenean aurreikusten diren konpromisoak betetzea.
2. Hartutako funtsak dirulaguntzak emateko oinarri izan zen helbururako eta ezarritako moduan eta epeetan erabili direla frogatzea Landa Garapeneko eta Ingurumeneko Departamentuan, baita zer gastu egin diren ere hartutako funtsak aplikatuz.
3. Laguntza egoki eman dela egiaztatzeko behar diren kontrolak onartzea.
4. Jakinaraztea Landa Garapeneko eta Ingurumeneko Departamentuari eskatu dituela eta, hala badagokio, jaso dituela helburu berbererako beste dirulaguntza publiko batzuk eta "de minimis" araubidearen mendeko beste edozein laguntza, hiru urteko edozein alditan.
5. Jasotako funtsen aplikazioari buruzko frogagiriak gordetzea hamar urtean, laguntza ematen den egunetik aurrera.
6. Dirulaguntza emateari buruzko ebazpena jakinarazten denetik hilabeteko epean, dirulaguntzen entitate onuradunen gardentasun betebeharrari buruzko adierazpena aurkeztea, laguntzaren fitxan eskuragarri dagoen ereduarekin bat datorrena, hori guztia Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legea betez. Izan litezkeen zehapenak galarazi gabe, informazioa emateko betebeharra urratuz gero, ez zaio emandako dirulaguntza ordainduko, eta, zerbait aurreratu bazaio, itzuli egin beharko du.
7. Enpresa deslokalizaziorik ez egitea, Enpresen sustraitzearen aldeko eta enpresen deslokalizazioaren aurkako neurriei buruzko abenduaren 16ko 18/2020 Foru Legearen 4. artikuluan ezarritakoari jarraikiz.
8. Behar bezala zabaltzea finantzabide publikoa dutela diruz lagundutako programek, jarduerek, inbertsioek edo edozein motatako jarduketek. Horretarako, Nafarroako Gobernuaren ikurra jarri beharko dute informazio eta hedapen materialetan (kartelak, eskuorriak eta abar) edo web orrietan. Nafarroako Gobernuaren ikurra bat etorriko da 2030 Agendako logoa txertatua duen sinbolo ofizialarekin, helbide honetan jasota dagoenari jarraikiz: https://www.navarra.es/eu/nafarroako-gobernua/sinbolo-ofiziala.
Hamargarren oinarria.–Onuradunaren gardentasun betebeharrak.
Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen 3. artikuluan aipatutako entitateak behartuta daude gardentasun betebeharra betetzera baldin eta, urtebetean, 20.000 eurotik gorako laguntzak edo dirulaguntzak jasotzen badituzte Nafarroako Aurrekontu Orokorren kargura, edo jasotako laguntzak edo dirulaguntzak urteko beren sarrera guztien %20 edo gehiago badira eta, gutxienez, 5.000 euro. Horretarako, honako esteka honetan dagoen eredua bete beharko dute, gardentasun betebeharrari buruzko adierazpena, alegia:
Aurreko atalean ezarritako muga kuantitatiboak gainditzen diren jakiteko, batu egingo dira Nafarroako Foru Komunitateko Administrazioak edo haren erakunde publikoek urte naturalean emandako dirulaguntza guztien kopuruak. Urte batean baino gehiagotan ordaintzen diren dirulaguntzen kasuan, aurrekontuko ekitaldi bakoitzean emandako kopurua hartuko da kontuan ondorio horietarako, ez denen batura. Negozio zifra honako hauetako txikiena izanen da:
a) Aurreko urteko negozio zifra.
b) Hala badagokio, dirulaguntza ematen den ekitaldian entitatearen organo eskudunak onetsitako negozio zifra.
Aipatu diren inguruabarrak gertatzeagatik gardentasun betebeharrak dituzten entitate onuradunek jarraian adierazten den informazioa eman beharko dute hilabeteko epean, dirulaguntza emateko ebazpena jakinarazten denetik kontatzen hasita:
–Entitatearen gobernu, administrazio eta zuzendaritza organoen osaera.
–Organo horiek osatzen dituzten kargudunen zerrenda.
–Entitateak aurreko urtean kargudun bakoitzari ordaindutako ordainsari gordinak eta gainerako diru konpentsazioak. Sortu berriak diren entitateen kasuan, informazioa izanen da haien aurrekontuetan edo plan ekonomiko finantzarioan jasotakoa.
–Entitatearen gobernu, administrazio eta zuzendaritza eginkizunetan gertatzen den dedikazioaren araubidea.
–Entitate onuradunaren urteko azken kontuen kopia bat.
Informazio hori entitate onuradunaren legezko ordezkariak sinatuta eta telematikoki aurkeztuko da, Nafarroako Gobernuaren Erregistro Orokor Elektronikoaren bidez, eta laguntza kudeatzen duen administrazio unitateari bidaliko zaio, honako eredu hauen arabera (gardentasun betebeharrari buruzko adierazpenaren ereduaren I. eta II. eranskinak):
Entitateak ez badu gardentasun betebeharrik, aurreikusitako egoerak gertatzen ez direlako, horren gaineko adierazpena aurkeztu beharko du hala ere.
Entitateak dirulaguntza bat baino gehiago jasotzen badu ekitaldi berean, ez du informazioa errepikatu beharko dirulaguntza bakoitzerako, salbu eta hasieran eman zituen datuak aldatu badira. Horretarako, entitateak identifikatu beharko du Foru Komunitateko Administrazioaren zein organoren aurrean aurkeztu zuen informazioa, eta noiz.
Betebehar hori bete ezean, ez da ordainduko onetsitako dirulaguntza.
Aurrekoa galarazi gabe, onuradun guztiak behartuta daude Administrazioari behar den informazio guztia ematera, aurretiazko errekerimendua eginda eta hamar eguneko epean, frogatzeko betetzen dituztela Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen II. tituluan jasotako gardentasun betebeharrak.
Errekerimenduan emandako epea bukatzen bada eskatutakoa bete gabe, hertsapen isunak ezartzea erabakitzen ahalko da, 500 eurotik 5.000 eurora bitartekoak, interesdunari ohartarazpena egin ondoren eta entzunaldia emanda. Isuna hamabost egunetik behin errepikatuko da, errekerimendua bete arte. Isunaren zenbateko osoa ez da izanen dirulaguntzaren zenbatekoaren ehuneko bost baino handiagoa. Zenbatekoa zehazteko, ez-betetzearen larritasuna eta proportzionaltasunaren printzipioa hartuko dira kontuan.
Hamaikagarren oinarria.–Laguntza ordaintzea.
1. Entitate onuradunak, laguntza ematen den egunetik azaroaren 7ra bitarte, laguntza kobratzeko eskaera bakarra aurkeztuko du, agiri hauekin batera:
a) Egindako gastuen laburpen taula.
b) Ekintzetan parte hartzeari dagozkion fakturak.
c) Laguntzaren xedeko jarduketak ordaindu izanaren egiaztagiriak. Onuradunak aukeratu badu laguntza zuzenean ordaintzea entitate antolatzaileari, onuradunak bere kargura egindako gastuen ordainketa frogatu beharko du.
d) Adierazpen bat, laguntzaren xedeko ekintzak osorik edo partez finantzatzeko edozein administraziori zein erakunde publiko edo pribaturi jada eskatutako edo harengandik jasotako edozein laguntzari buruzkoa. Eskatzailearen erantzukizunpeko adierazpen eguneratua, hiru urteko aldi batean jasotako "de minimis" laguntza guztiei buruzkoa, hau da, erregelamendu honi nahiz beste "de minimis" erregelamendu batzuei lotuak aintzat hartuta.
2. Dirulaguntzaren ordainketa eginen da kobratzeko eskaera aurkeztu eta gero, eta ordainketa bakarrean; aurretik, organo kudeatzaileak egiaztatu beharko du laguntzaren onuradunak dirulaguntza emateko arrazoi izandako xedeak eta gardentasun betebeharra betetzen dituela.
3. Nekazaritzako Ustiategien eta Elikagaien Sustapenerako Zerbitzuak agiri guztiak ikuskatuko ditu, eta egiaztatuko du aurkezturiko gastuak hautagarriak direla, frogagiriak baliozkoak eta gainerako agiriak aski.
4. Nolanahi ere, zerbitzu honek frogagiri osagarriak eskatzen ahalko ditu, egoki baderitzo, aurkeztutako dokumentazioa zehazteko, argitzeko edo osatzeko, eta Administrazioaren datu baseak kontsultatzen ahalko ditu, Nafarroako Ogasun Publikoarekiko eta Gizarte Segurantzarekiko betebeharrak eguneratuta dituela egiaztatzeko.
5. Nekazaritzako Ustiategien eta Elikagaien Sustapenerako Zerbitzuak behar diren kontrolak eginen ditu gastuak onargarriak direla egiaztatzeko.
Hamabigarren oinarria.–Garapena eta jarraipena.
Laguntzaren kontrolaren eta jarraipenaren ondorioetarako, Nekazaritzako Ustiategien eta Elikagaien Sustapenerako Zerbitzuak bidezkotzat jotzen duen informazio osagarria eskatzen ahalko die onuradunei, laguntzaren xedeko jarduerei eta ekintzei dagokienez, entitateak eskatutako baldintzak ezarritako epeetan betetzen dituela egiaztatzeko eta dagozkien egiaztapenak egiteko.
Hamahirugarren oinarria.–Dirulaguntzaren bateragarritasuna.
Ematen diren "de minimis" laguntzak ez dira inolako estatu laguntzarekin metatzen ahal, gastu diruz lagungarri berberei dagokienez, ez eta arriskuaren finantzaketa neurri berberaren estatu laguntzekin ere, baldin eta metaketa horrek gainditzen baldin badu kategorien arabera salbuesteko erregelamendu baten bidez edo Batzordeak hartutako erabaki baten bidez kasu zehatz bakoitzerako finkatzen den laguntzen gehieneko zenbatekoa edo laguntzen intentsitatea. Badira "de minimis" batzuk kostu diruz lagungarri zehatz batzuetarako ematen ez direnak eta ezin egotz dakizkiekeenak kostu diruz lagungarri zehatz batzuei. Dirulaguntza horiek metatzen ahalko dira Batzordeak hartutako erabaki bat edo Batzordearen kategorien araberako salbuespenezko erregelamendu bat betez Estatuak emandako dirulaguntzekin.
Hamalaugarren oinarria.–Itzulketak, arau hausteak eta zehapenak.
1. Laguntzen onuradunek dirulaguntza emateko baldintza eta konpromisoak betetzen ez badituzte, dirulaguntza oso-osorik itzuli beharko dute, bai eta dagozkien berandutze interesak ere, Dirulaguntzei buruzko azaroaren 9ko 11/2005 Foru Legearen 35. eta 37. artikuluetan xedatutakoarekin bat.
2. Aplikatu beharreko arau hausteen eta zehapenen araubidea azaroaren 9ko 11/2005 Foru Legean xedatutakoa izanen da.
Hamabosgarren oinarria.–Argitalpena eta informazioa.
1. Ebazpen honetako laguntzen onuradunen zerrenda Nafarroako Gobernuaren Interneteko Atarian argitaratuko da, tramiteen katalogoan, laguntza honi dagokion fitxan.
2. Nolanahi ere, laguntzen publikotasunerako, dirulaguntza emateko ebazpenei buruzko informazioa bidaliko da Dirulaguntzen Datu Base Nazionalera, Nafarroako Gobernuaren Dirulaguntzen Datu Basearen bitartez, azaroaren 17ko 38/2003 Legeak 20. artikuluan ezartzen duenari jarraikiz.
3. Organo kudeatzaileak erregelamendu hau aplikatzeari buruzko informazio guztia erregistratu eta bilduko du, Batzordearen 2023ko abenduaren 13ko 2023/2831 (EB) Erregelamenduaren 6. artikuluan ezarritako moduan eta epean.
Laguntza eman eta hogei egun balioduneko epean, "de minimis" laguntzei buruzko informazioa gordeko da estatu kideko edozein agintaritzak emandako "de minimis" laguntzen erregistro nagusian.
Estatu kideek neurri egokiak hartuko dituzte erregistro nagusian jasotako datuak zehatzak direla bermatzeko, eta "de minimis" laguntzei buruzko informazioaren erregistroak gordeko dituzte hamar urtez, laguntza ematen den egunetik aurrera.
4. Azkenik, Batzordeak, idatziz, beharrezkotzat jotzen duen informazio guztia eskatuko du zehaztu ahal izateko, batetik, erregelamendu honetan ezarritako baldintzak bete diren edo ez eta, bereziki, zein den erregelamendu honetan eta beste "de minimis" erregelamendu batzuetan ezarritakoa betez edozein enpresak jaso duen "de minimis" laguntzaren guztizko zenbatekoa. Kasuan kasuko estatu kideak eman egin beharko dio informazio hori Batzordeari, hogei egun balioduneko epean, edo, eskaeran hala ezarrita dagoenean, hori baino handiagoa den epean.
Iragarkiaren kodea: F2508284
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50