Iragarkia

120. ALDIZKARIA - 2025eko ekainaren 17a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

96C/2025 EBAZPENA, maiatzaren 15ekoa, Ekonomia Sozialeko eta Laneko zuzendari nagusiak emana; honen bidez erabaki da Transmol Logística SL enpresaren hitzarmen kolektiboa erregistratzea, gordailutzea eta Nafarroako Aldizkari Ofizialean argitaratzea.

Ikusi da Transmol Logística SL enpresak aurkeztutako hitzarmen kolektiboa (kode zenbakia: 31100231012015), erregistro honetan sartu baitzen 2025eko maiatzaren 10ean, 2025eko apirilaren 1ean enpresaren eta sindikatuen ordezkaritzek sinatu ondoren.

Bat etorrita Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta hitzarmen kolektiboak, lan akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin.

Erabilita Nafarroako Foru Komunitateko Administrazioari eta foru sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak, Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuarekin lotuta.

EBAZTEN DUT:

Lehenengoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Transmol Logística SL enpresak aurkeztutako hitzarmen kolektiboa (kode zenbakia: 31100231012015).

Bigarrena.–Nafarroako Aldizkari Ofizialean argitaratzeko agintzea, orok jakin dezan.

Iruñean, 2025eko maiatzaren 15ean.–Ekonomia Sozialeko eta Laneko zuzendari nagusia, Iñaki Mendióroz Casallo.

TRANSMOL LOGÍSTICA SLU ENPRESAREN ETA BERE IRUÑEKO LANTOKIKO LANGILEEN ETA LANGILE DESPLAZATUEN ARTEKO HITZARMEN KOLEKTIBOA (2025-2027)

Atariko artikulua.

Transmol Logística SLU enpresaren (IFK: 83607507) langileen eta Iruñeko (Nafarroa) lantokiko langileen ordezkariek sinatu dute lantokiko hitzarmen kolektibo hau. Iruñeko lantokia helbide honetan dago: Benjamin Tuterakoaren kalea, 38. zenbakiko behe solairua, 31008.

Honako hauek osatzen dute hitzarmen kolektibo honen Negoziazio Batzordea:

Langileen legezko ordezkaritza:

Jose Angel Aliaga Baguena jauna (UGT).

Jose Javier Martin Fernandez jauna (UGT).

Iker Díaz de Guereñu Martinez jauna (UGT).

Francisco Javier Lozano Izquierdo jauna (UGT).

Jose Manuel Inchauspe Pellón jauna (UGT).

Enpresaren legezko ordezkaritza:

Fernando Sarasola Jaudenes jauna (kontseilari delegatua).

Jose A. Martin Francisco jauna (Giza Baliabideen zuzendaria).

Andrés Martinez de Vera jauna (Logistikako zuzendaria).

Alderdi biek hitzarmen kolektibo hau negoziatzeko eta sinatzeko legitimazioa aitortzen diote elkarri.

I. KAPITULUA

1. artikulua. Lurralde eremua.

Hitzarmen honek Transmol Logística SLU enpresaren lantokiari atxikitako langile guztiei eragiten die, Nafarroan, zein desplazatuta ari direnei, Zuzendaritzako kideak kenduta.

2. artikulua. Eremu funtzionala.

Lan hitzarmen kolektibo honek Transmol Logística SLU enpresaren plantilla osatzen duten langileei eragiten die, gai arriskutsuen errepideko garraioaren enpresa jardueran aritzen baitira.

3. artikulua. Indarraldia eta iraupena.

Hitzarmen honen iraunaldia 2025eko urtarrilaren 1ean hasiko da, behin hitzarmena Nafarroako Aldizkari Ofizialean argitaratuta, eta 2027ko abenduaren 31n akituko.

Ondorio ekonomikoak 2025eko urtarrilaren 1etik aurrera aplikatuko dira.

4. artikulua. Luzapena eta salaketa.

Idatzita eginen da salaketa, hitzarmenaren indarraldia edo edozein luzapen bukatu baino hilabete lehenago, gutxienez ere.

Hitzarmen kolektiboa salatzen ez bada, besterik gabe luzatuko da urte naturaletan.

Hitzarmen kolektibo berriaren negoziazioak hitzarmen honen indarraldia igarota eginez gero, hitzarmenn berriak ordezkatu arte arte luzatutzat joko da hitzarmen hau.

I. KAPITULUA.–BALDINTZA OROKORRAK

5. artikulua. Osotasunari lotzea.

Hitzarmen honetan bildutako eskubide eta betebeharren multzoa batasun zatiezina da, eta, beraz, Lan Agintaritzak itun horietakoren bat onesten ez badu, osorik baliogabetuta geldituko da hitzarmen kolektiboa, eta berriz hasiko dira eztabaidak onetsi gabeko itun edo akordioei buruz.

6. artikulua. Beste hitzarmenak baztertzea.

Hitzarmen hau arau nagusia izanen da, eta Nafarroan zein desplazatuta ari diren langileen lan harremanak erregulatuko ditu Transmol Logística SLU enpresa barrenean.

Hitzarmen kolektiboaren indarraldian, ez da bestelako hitzarmenik aplikatuko Transmol Logística SLUren Nafarroako lantokian, zein den ere haien eremua, haien helburu izanagatik ere enpresaren instalazioetan egiten diren jarduera edo lanak edo enpresako langileek burutzen dituztenak.

Hitzarmenean zehazten ez den hartan, Nafarroako salgaien garraioaren sektoreko hitzarmen kolektiboari, salgaien errepide garraioko enpresentzako II. akordio orokorrari eta indarrean dauden gainerako lege xedapenei jarraituko zaie.

7. artikulua. Konpentsazioa, irenspena eta berme pertsonala.

1. Hitzarmen honetan ezartzen diren baldintza ekonomiko guztiak, soldata arlokoak izan edo ez, urte osoko konputuan konpentsatzen ahal dira lehendik jasotzen diren edozein eratako hobekuntzekin, bai legeak hala aginduta, bai laudoa, banakako kontratua, erabilera edo ohitura, enpresaren borondatezko kontzesioa edo beste edozein arrazoi dagoelako, eta kontuan hartu gabe haien arrazoia, izena, forma edo izaera, salbu eta berariaz ez-irensgarritzat kalifikatu badira.

2. Legezko aginduen, hitzarmen kolektiboen, banakako lan kontratuen eta beste edozein arrazoiren bitartez ezartzen ahal diren igoerek irensten ahalko dituzte baldintza horiek, urteko konputuan haien parera iristeraino; berariaz hitzarmen honen testuan irenstetik at dauden kontzeptuak dira salbuespen bakarrak.

Hitzarmen honen baldintza orokorrek irentsi eta konpentsatuko dituzte, urteko konputuan, gero legezko xedapenek, ordainsarien kontzeptu guztietan edo batzuetan aldaketa ekonomikoak ekarriz, ezartzen ahal dituztenak. Lerroalde horretan aipatzen diren balizko hobekuntza ekonomikoek eragin praktikoa izanen dute baldin eta, oro har, urteko konputuan aintzat hartuta, hitzarmen honetan ezarritako maila ekonomiko orokorrak gainditzen badituzte.

Hitzarmen honen xedapenek osorik indargabetu eta ordezten dituzte aurreko hitzarmeneko guztiak, baita langileen ordezkariekin eta Batzorde Paritarioarekin sinatutako akordioak eta enpresak aplikatutako hobekuntzak ere.

8. artikulua. Langileen betebeharrak.

Langilea behartua dago enpresaburuak bere zuzendaritza ahalmenen erabileran emandako aginduak eta jarraibideak betetzera eta bere lanbide gaitasunaren eta taldearen zeregin orokorraren barrenean agintzen zaizkion lanak interesez eta arduraz betetzera. Lan horien artean daude langilearen zeregin nagusia behar bezala betetzeko ezinbestekoak diren egiteko osagarriak.

8.1. Gidariaren betebeharrak.

Gidariak bere laneko eginkizunean dituen betebehar orokorrak, hau da, bere lan arrunta osatzen dutenak, galarazi gabe, erabileren, ohituren eta ematen duen zerbitzuaren izaeraren araberakoak dagozkio. Honako hauek dira gidariaren jardueraren betebehar berariazkoak:

a) Enpresako edozein ibilgailu gidatzea, haren beharren arabera, zein den ere banatu beharreko produktua; ibilgailuaren eta garraiatzen duen salgaiaren erantzule izanen da agindu zaion bidaia bukatu arte.

b) Enpresak ezarritako ibilbideetan garraioa egiteagatik gidariari ezartzen zaizkion isunak enpresaren kargu izanen dira, ibilbide horiek Trafikoko agintaritza eskudunaren ustez egokiak ez badira.

c) Gidariaren betebeharra izanen da lan zerbitzuak ematea, enpresaren beharren arabera, esleitu dioten jardueran edo trafikoburuak adierazten dion jardueran.

d) Gidatze lanaren osagarriak diren zereginak betetzea (zama-lanetako maukak akoplatzea, balbulak ireki eta ixtea, zisterna bete eta hustu dadin kontrolatzea...), enpresaren edo bezeroen araudi berariazkoari jarraituz, elementu horiek ibilgailuarenak berarenak izan edo bestelakoak izan, betiere bakarrik egiteko gauza bada.

e) Bezeroak begirunez tratatzea, haiekin eztabaidan sartu gabe, eta edozein gorabeheraren berri ematea bere nagusiei.

f) Egindako zerbitzuari eta kamioiaren, zisternaren eta bien elementu osagarrien egoerari buruzko partea egitea egunero, idatziz edo enpresak adierazten duen moduan, aldaketarik edo matxurarik izan bada; bestela, parte horren ordez, ibilbide orria beteko da, Oharrak eta gorabeherak izeneko atalean.

g) Ibilgailuen, zisternen eta elementuen (NBE) egoera, garbitasuna eta kontserbazioa ikuskatzea, enpresaren barneko prozeduren eta jarraibideen arabera, eta atzematen duen edozein akats jakinaraztea, horretarako ezarrita dagoen dokumentua baliatuz. Esleitu zaion ibilgailuak lana egiteko beharrezkoak diren dokumentazio eta hornigai guztiak dituela egiaztatzea, zerbitzu hasieran.

h) Sutea itzaltzeko aparatuen funtzionamendua ezagutzea eta eragiketa horiek behar direnean burutzea; gainera, haietan trebatzeko praktikak egitea lanaldiaren barrenean.

Aparatuen erabileran aldaketaren bat dagoenean, enpresak funtzionamendu berrirako prestakuntza emanen die langileei, eta nahitaez joan beharko dute prestakuntza ikastaroetara. Ahal dela, prestakuntza lanaldiaren barnean izanen da, eta ezin bada, lan denboratzat joko da ondorio guztietarako.

i) Zisterna betetzean eta hustean, zorrotz jarraituko zaio bezeroak emandako metodo operatiboari; gidari guztientzat ezaguna izanen da, prestakuntza ikastaroei eta enpresak gidariari idatzita emanen dion kopiari esker.

j) Une bakoitzean eta zirkulazioari eta garraiatzen diren produktuei buruz oro har ematen diren legezko arau indardunak betetzea.

k) Ibilbide orrien atal guztiak betetzea, haien mekanizazioaren kontrol administratiboa eraginkorra izan dadin.

l) Norberak erregaiz kargatzea esleitua duen ibilgailua, enpresak aukeratzen dituen gasolindegietan.

m) Zama-lanetan gertatzen diren gorabeherak jakinaraziko zaizkie enpresako segurtasun kontseilariari eta prebentzioko ordezkariei, baita segurtasunerako arriskutsuak direnak ere. Orobat, edozein istripuren, produktu isuriren edo jardueraren ohiko garapena galarazten duen beste edozein gorabeheraren berri ematea berehala ezbeharren arduradunari.

n) Istripu, gorabehera edo matxura gertatuz gero, langileak ADR jarraibide idatzietan eta enpresaren larrialdi planean ezarritako hurrenkeran jardun beharko du, eta berehala jakitun jarriko ditu trafikoburua eta mantentze lanetako arduraduna.

o) PGL jarduerako gidariak ezin dira basera itzuli zisternan gasa dutela eguneko zerbitzua bukatu baino lehen, eta zisternan gasa geldituz gero, horren berri eman beharko diote nahitaez trafikoburuari, jarraibideak eman diezazkien.

p) Trafikoburuak enpresaren beharrak ikusita banatuko ditu bidaiak, eta gidariak ez dio uko egiten ahalko zerbitzuari, non ez dagoen uko hori justifikatzen duen legezko arrazoiren bat.

q) Trafikoaren eta bide segurtasunaren araudia zorrotz betetzea, atsedenaldiei, gidatzeko denborari, gehieneko abiadurari eta abarrei dagokienez.

r) Enpresak lanerako emandako jarraibideak betetzea, bereziki, laneko arriskuei aurrea hartzeko araudia, NBEen erabilera, eta abar.

s) Zama-lanak eta garraioa egitean gertatzen den edozein gorabehera larriren berri ematea berehala trafikoko arduradunari.

Zer ezartzen den hitzarmen kolektibo honetan eta salgaien errepide garraioko II. akordio orokorrean –edo, kasua bada, horren ordezkoan–, horren arabera, falta arina, astuna edo oso astuna izaten ahal da betebehar horiek eta klausula honetan berariaz jaso gabe daudenak ez betetzearen ondorioa.

III. KAPITULUA.–LANAREN ANTOLAKETA

9. artikulua. Zuzendaritzaren ahalmenak:

a) Enpresako zuzendaritzaren ahalmenak: lana teknikoki eta praktikoki antolatzea haren zentro guztietan, indarra duen lan arloko antolamenduan ezarritako irizpideei eta arauei buruz.

b) Enpresak uneoro erabakiko du zer lanetan aritu behar duen langileak, gaituta eta trebatuta badago. Enpresak beti trebatzen ahalko ditu langileak egin ohi dituzten lanez bestelakoetan.

Bi alderdiek adierazten dute lanaren antolamenduak enpresan maila egokia lortzea duela helburu produktibitatean, errentagarritasunean, kalitatean eta zerbitzuetan, baliabide guztiak ezin hobeki erabilita.

IV. KAPITULUA.–LANBIDE SAILKAPENA

10. artikulua. Sailkapen orokorra.

Zerbitzuak Transmol Logística SLU enpresan ematen dituzten langileak lanbide talde hauetako batean sailkatuko dira:

I. taldea. Goi-mailako langileak eta teknikariak.

II. taldea. Administrazioko langileak.

III. taldea. Mugimenduko langileak eta laguntza zerbitzuetakoak.

11. artikulua. I. taldea. Goi-mailako langileak eta teknikariak.

Hau da, beren ekimenez eta Zuzendaritzak edo gainean dituzten nagusiek emandako arauen barrenean, eginkizun teknikoak edo/eta aginteari eta antolaketari dagozkienak egiten dituztenak.

Ondoren aipatzen diren lanbide kategoriek osatzen dute I. talde hori, eta haien eginkizunak eta zereginak ere adierazten dira aipamen gisa.

11.1. Arloko edo departamentuko zuzendaria: enpresaren zerbitzu zentraletan, berariazko arlo edo departamentuetako baten buru dagoen langilea da, haren egituran halakorik badago, enpresako Zuzendaritza Nagusiaren edo Kudeatzailetzaren menpe, zuzenean.

11.2. Atalburua: enpresa baten egiturako zerbitzu zentraletako jarduera taldeetako baten agintea ekimenez eta arduraz darabilena da, baita sukurtsal edo lantoki garrantzitsu baten administrazioaren buru dagoena ere, zuzendariaren edo ordezkariaren menpe, horrelakorik bada.

11.3. Goi-mailako tituluduna: doktore, lizentzia edo ingeniari tituluaren jabe izanik, hala eskaturik, enpresaren edozein dependentziatan edo zerbitzutan bere egitekoak betetzen dituen langilea da.

11.4. Erdi-mailako tituluduna: erdi-mailako titulu akademikoaren jabe izanik, hala eskaturik, enpresaren edozein dependentziatan edo zerbitzutan bere egitekoak betetzen dituen langilea da.

11.5. Trafikoburua, lehen mailakoa: enpresarenak diren edo hark kontratatuta dituen hogeita bost ibilgailu baino gehiagoko multzo baten zerbitzuak zuzentzea bere kargu duen langilea da; langileak eta materiala eta horren sarrerak eta irteerak banatzen ditu, eta trafikoen, ibilbideen eta kontsumoaren estatistikak prestatzen.

11.6. Trafikoburua, bigarren mailakoa: aurrekoaren eskudantzia eta erantzukizun berekin, enpresarenak diren edo kontratatuta dauden 10 eta 24 bitarteko ibilgailu multzoaren zerbitzuak zuzentzen dituen langilea da, kategoria handiagoko trafikobururik ez bada; bestela, lehen mailako trafikoburuaren menpe ariko da, zein den ere ibilgailu kopurua, harekin batera edo jardueraren atal baten buru.

11.7. Tailerreko burua: lanbide kategoria honetan, behar den gaitasun teknikoa izanik, tailer baten zuzendaritza beren kargu duten langileak sartzen dira; lanak agindu eta zaintzen dituzte bai enpresaren dependentzietan bai kanpoan, matxurak edo istripuak daudenean.

12. artikulua. II. taldea. Administrazioko langileak.

Enpresaren bulegoetan edo zerbitzuetan administrazioko, burokraziako edo/eta kontabilitateko eginkizunak, baliabide informatiko edo ofimatikoekin egiten diren lanak eta fakturaziokoak barne, betetzen dituzten langile guztiak dira lanbide talde honetakoak; orobat, beste lanbide talde batekoak ez diren mantentze, kontrol eta arreta orokorreko eginkizunak sartzen dira.

Ondoren aipatzen diren kategorietan sailkatzen da, eta horien eginkizun edo egitekoak ondoren ere adierazten dira aipamen gisa:

12.1. Lehen mailako ofiziala: bere erantzukizunpean ekimen beteko burokrazia lanak ezin hobeki betetzen dituen langilea da; besteak beste, merkataritzako kudeaketak (bai enpresan bai bezero eta erakundeekiko bisitetan), lan administratiboak eta 9 ibilgailu bitarteko trafikoa kudeatzekoak.

Egiteko nagusia lan administratiboak, informatika programaziokoak eta sistemen analistarenak dituztenak sartzen dira kategoria honetan.

12.2. Bigarren mailako ofiziala: bulegoko arduradunik izanez gero, haren menpe eta ezagutza teoriko eta praktiko egokia dutela, agintzen zaizkien lanak arduratsu eta behar bezala egiten dituztenak sartzen dira kategoria honetan; lan horietan merkataritzakoak (bai enpresan bai bezero eta erakundeekiko bisitetan) eta zeregin administratiboak sartzen dira.

Egiteko nagusia lan administratiboak eta sistemen operadorearenak dituztenak sartzen dira lanbide kategoria honetan.

12.3. Laguntzailea: goragokoen aginduak betez eta burokraziaren ezagutza izanik, zailtasun berezirik ez duten lanak egiten dituen langilea da.

12.4. Telefonista: enpresako telefonogunea edo beste edozein komunikazio sistema erabiltzeaz arduratzen den langilea da; gainera, egiteko administratiboak edo/eta kontrolekoak eta harrerakoak esleitzen ahal zaizkio.

13. artikulua. III. taldea. Mugimenduko langileak eta laguntza zerbitzuetakoak.

Enpresaren instalazioetan edo handik kanpo salgaiak mugitu, sailkatu eta herrestan eramaten dituzten langile guztiak dira talde honetakoak, baita ibilgailuen mantentze lanak eta jarduera nagusiaren jarduera osagarriak egiten dituztenak ere.

Berariaz ituntzen da gidarien mugigarritasuna 13.1, 13.2, 13.3, 13.4 eta 13.5 artikuluetan ezarritako kategorien artean, enpresaren beharren arabera. Jardueren edo kategorien arteko mugigarritasuna dagoenean, hitzarmen kolektibo honen 30., 31., 32., 33. eta 34. artikuluetan ezarritako zenbatekoak izanen dira ordainsari aldakorra. Lanbide kategorien eginkizunak ondoren adierazten dira aipamen gisa:

13.1. PGL gidaria: zein diren enpresaren beharrak, eta «C + E» motako gidabaimena izanik, enpresaren edozein ibilgailu, atoiarekin edo erdiatoiarekin, gidatzeko kontratatzen den langilea da, Repsol Butano SA gure bezeroarentzat PGLa kargatu, garraiatu eta deskargatzeko. Hauek dira haren eginkizun nagusiak:

–Ibilgailuak gidatzea.

–PGLa kargatu, garraiatu eta deskargatzea.

–Bezeroak bilatzea, lanaldia bukatu baino lehen ibilgailua osorik edo hein batean deskargatzeko.

–Ibilgailuaren mantentze lan bereziak egitea (kontagailuen kalibrazioa, mahukak, kargatze ahoak).

–Zisternaren desgasifikazio lanak betetzea.

–Lan administratiboak eta konponketak egitea.

–Urtaro aldaketako kanpaina gauzatzea.

–Deskargatutako produktua portzentajetan neurtzea, eta zaintzea.

13.2. Anezkako gidaria: zein diren enpresaren beharrak, eta «C + E» motako gidabaimena izanik, enpresaren edozein ibilgailu, atoiarekin edo erdiatoiarekin, gidatzeko kontratatzen den langilea da, kargatu eta garraiatzeko; funtsean, haren lana da ibilgailua gidatzea eta beste lankide bati ematea, hark bana dezan PGLa. Hala ere, ezohiko moduan, zerbitzuko beharren ondorioz, PGLa deskargatzen ahal du Repsol Butano SA gure bezeroarentzat. Hauek dira haren eginkizun nagusiak:

–Ibilgailuak gidatzea.

–PGLa kargatu, garraiatu eta deskargatzea.

–Lan administratiboak eta konponketak egitea.

–Deskargatutako produktua portzentajetan neurtzea, eta zaintzea.

13.3. Asfaltoak/betunak edo pareko produktuak garraiatzeko gidaria: zein diren enpresaren beharrak, eta «C + E» motako gidabaimena izanik, enpresaren edozein ibilgailu, atoiarekin edo erdiatoiarekin, gidatzeko kontratatzen den langilea da, karga, garraio eta deskarga lanetarako. Hauek dira haren eginkizun nagusiak:

–Ibilgailuak gidatzea.

–Asfaltoak/betunak edo pareko produktuak kargatu, garraiatu eta deskargatzea.

–Lan administratiboak eta konponketak egitea.

–Deskargatutako produktua portzentajetan neurtzea, eta zaintzea.

13.4. Botilategi gidaria: «C + E» motako gidabaimena izan arren, AIR Liquide SA bezeroaren botilak banatzeko baino kontratatzen ez den langilea da. Hauek dira haren eginkizun nagusiak:

–Ibilgailuak gidatzea.

–Kargatze, garraio eta deskargatze lanak egitea (zezen mekanikoa erabiltzea).

–Lan administratiboa eta konponketak egitea.

13.5. VRAC gidaria: zein diren enpresaren beharrak, eta «C + E» motako gidabaimena izanik, enpresaren edozein ibilgailu, atoiarekin edo erdiatoiarekin, gidatzeko kontratatzen den langilea da, Air Liquide SA gure bezeroarentzat aireko gasak zisterna bidez kargatu, garraiatu eta deskargatzeko. Hauek dira haren eginkizun nagusiak:

–Ibilgailuak gidatzea.

–Gasak kargatu, garraiatu eta deskargatzea.

–Ibilgailuaren mantentze lan bereziak egitea (kontagailuen kalibrazioa, mahukak, kargatze ahoak).

–Zisternaren desgasifikazio lanak.

–Lan administratiboak eta konponketak egitea.

–OPX kanpaina gauzatzea (Air Liquide SA gure bezeroak kontratatutako eragiketa bereziak).

–Deskargatutako produktua portzentajetan neurtzea, eta zaintzea.

13.6. Lanbideetako lehen mailako ofiziala: beren lanbidea erabat menperatuta eta edozein ibilgailu konpontzeko gai izanik, enpresaren instalazioetan edo kanpoan, arreta handiz eta errendimendu egokiaz gain, denbora eta material aldetik ahalik eta ekonomia handienaz matxurak konpontzen eta prebenitzen aritzen diren langileak sartzen dira kategoria honetan; egitekoen artean, enpresako ibilgailuak gidatzea dute, konponketa probak egiteko, IATa pasatzea, eta abar.

13.7. Lanbideetako bigarren mailako ofiziala: behar bezala frogatutako ikaskuntzaren bidez edo praktikan luze arituz lanbidearen ezagutza teorikoa eta praktikoa izanik, lan arruntak errendimendu egokiekin egiten dituzten langileak sartzen dira kategoria honetan; egitekoen artean, enpresako ibilgailuak gidatzea dute, konpontze probak egiteko, IATa pasatzea, eta abar.

13.8. Tailerreko hirugarren mailako ofiziala: peoi izanik eta haren eginkizun berak burutuz, ogibide baten ezagutza orokorra dutelako, haren lan oinarrizkoenak errendimendu egokiarekin egiten ahal dituzten langileak sartzen dira kategoria honetan; egitekoen artean, enpresako ibilgailuak gidatzea dute, ibilgailuak garbiketa gunera eramateko, IATa pasatzea, eta abar.

13.9. Peoia: bere zereginean batez ere ahalegin fisikoa eta arreta jarri behar duen langilea da, praktika handia edo aldez aurreko ezagutza ez badu ere. Kamioi garbitzaileak, koipeztatzaileak, bulkanizatzaileak eta enpresako instalazioen garbiketako langileak sartzen dira kategoria honetan.

V. KAPITULUA.–LANALDIA, OPORRALDIAK ETA ATSEDENALDI KOMUNAK

14. artikulua. Lanaldia.

Lanaldi arrunta, benetako lanekoa, astean berrogei ordukoa izanen da, atelehenetik igandera, eta urtean gehienez ere 1.744 ordukoa. Ordu horiek egutegian banatzen ahalko dira enpresaren beharren arabera. Ez dira benetako lan denboratzat kontatuko Langileen Estatutuaren 34. artikuluan aipatzen diren atsedenaldiak.

Mugimendu zerbitzuetan eta ibilgailuen sarrera eta irteerei zuzenean lotutako gainerako jardueretan, diren bezalakoak direlako egunean hamabi ordu baino gehiagoko denboran etenak eginez gertatzen baitira, lanaldien arteko atsedena bederatzi ordukoa izaten ahalko da, baldin eta langileak gutxienez ere bost orduko atsedenaldi jarraitua hartzen ahal badu egunean. Aurreikuspen hori enpresako langile guztiei aplikatuko zaie, bai mugimenduko langileei eta bai administrazioko edo lanbideetako langileei ere.

Alde batera utzita mugimenduko langileak, horien erregulazioa hurrengo artikuluan jasotzen baita, lanaldi arrunta ez da benetako laneko hamar ordutik gorakoa izanen egunean, ezinbesteko kasuetan izan ezik edo hondamendiak eta bestelako kalte berezi eta presakoak prebenitzeko edo konpontzeko. Nahitaez bete beharrekoak dira hitzarmen kolektibo honetan aurreikusten diren eguneko eta asteko atsedenaldiak.

Larunbat eta igandeetan lan egiteagatik itundutako konpentsazioa (hitzarmen kolektiboaren 29., 30., 31. eta 32. artikuluak) eta prestakuntza orduengatiko konpentsazioa (hitzarmen kolektiboaren 56. artikulua) honela emanen dira:

–Oporraldietatik eta urtaroko kanpainetatik kanpo hartu beharko dira, jarduera bakoitzerako ezarritakoaren arabera (hitzarmen kolektiboaren 18. artikulua). PGL jarduera duten langileek azaroaren 1etik Aste Santuaren hondarrera bitarteko alditik kanpo; eta gainerako langile guztiek ekainaren 15etik irailaren 15era bitarteko alditik kanpo. Langileak hilabete lehenago egin beharko du eskaera, eta enpresak astebete geroago berretsi beharko du.

–Konpentsazioa aplikatzeko lehentasuna emanen zaie langileen oporraldiei, larunbat, igande eta prestakuntza orduen aldean.

15. artikulua. Mugimenduko langileen lanaldia.

Astean berrogei orduko benetako lana izanen da gehieneko lanaldi arrunta, hau da, batez besteko hori duena urteko konputuan, modu irregularrean banatua, astelehenetik igandera arte. Zerbitzuaren benetako prestazioa dela ulertzen da; hortaz, ez dira konputuan sartuko lanaldian zehar egiten diren atsedenaldi eta etenaldiak, hala nola bazkaltzeko geldialdia, gidaldiko etenak edo lanaldi barneko atsedenaldia.

Benetako lanaldian sartuko dira gidaldiak eta gidariak zama-lanetan eta beste lan batzuetan ematen duen denbora. Nolanahi ere, ez dira benetako lanaldian sartuko zama-lanetako eragiketa bakoitzean itxaroten emandako lehenbiziko bi orduak, horiek presentziako edo prestasuneko orduak izanen baitira. Errepide garraioko enpresentzako II. akordio orokorrean xedatutakoaren arabera, 1561/1995 Errege Dekretuaren 10. artikuluaren 3. apartatuan eta 4. apartatuko c) letran xedatutakoaren ondorioetarako, beti ulertuko da langileak aldez aurretik badakiela gutxi gorabehera zenbat denboran itxaron beharko duen kargatzeko eta deskargatzeko, baldin eta garraio zerbitzuaren hartzaile den kargatzaile edo/eta kontsignatarioaren instalazioetan lehen ere beste zerbitzuren bat egin badu. 29., 30., 31. eta 32. artikuluetan ezarritako primen bidez dirutan konpentsatu gabeko aparteko orduak atsedenaldiarekin konpentsatzen ahalko dira, egiten direnetik lau hilabete iragan baino lehen, alderdien artean hala adostuta (Langileen Estatutuaren 34. artikulua eta 902/2007 Errege Dekretuaren 10.bis artikulua).

Arloaren gaineko xedapen orokorrak galarazi gabe, martxoaren 15eko 561/2006 (EB) Erregelamenduan eta lanaldi bereziei buruzko irailaren 21eko 1561/1995 Errege Dekretuan (azaroaren 14ko 1635/2011 Errege Dekretuak aldatua) xedatutakoari lotuko zaio sektoreko langile mugikorren lanaldia. Aipatu 1561/1995 Errege Dekretuaren testuak geroan aldaketarik izatera, bi alderdiek konpromisoa hartzen dute artikulu hau berriro negoziatzeko, horren beharrik bada; horretarako, ahalmena ematen zaio berariaz hitzarmen kolektibo honen Batzorde Paritarioari / Negoziazio Batzordeari, hitzarmen kolektibo honen lehen xedapen gehigarrian aurreikusitakoari jarraituz, behar izanez gero, artikulu hau berriz negoziatzeko, baita 1561/1995 Errege Dekretuaren aldaketak zuzenean ukitzen dituen guztiak ere; haren baitan erabakitzen dena hitzarmen kolektibo honen berrikuntza izanen da, eta lan arloko agintaritzari igorri beharko zaio, erregistratu, gordailutu eta «Nafarroako Aldizkari Ofizialean» argitara dadin. Bidezkoa den aldiro, Batzorde Paritarioa bilduko da Langileen Estatutuaren 85.3.e) artikuluan aurreikusitako eskakizunaren arabera.

1561/1995 Errege Dekretuaren 8.etik 12.era bitarteko artikuluetan xedatutakoaren arabera, mugimenduko langileen lanaldia kontatzeko, benetako lan denbora eta presentziako denbora bereiziko dira; horren araubidea aipatu artikuluetan aurreikusitakoa izanen da, berezitasun hauekin:

Benetako lan denbora arruntaren gehieneko iraupena, Langileen Estatutuaren 34. artikuluan aurreikusitakoa, eta eguneko eta asteko gutxieneko atsedenaldiak errespetatzea galarazi gabe, mugimenduko langileen benetako lan denbora ez da, batez beste, astean berrogeita zortzi ordutik gorakoa izanen, sei hilabetean kontatuta, eta ez da ezein astetan hirurogei ordutik gorakoa izanen. Orobat, jarduera honetan ezinbestean suertatzen diren ezaugarri objektiboak, teknikoak edo/eta lanaren antolaketakoak direla eta, hala nola, zerbitzuak urtaroei lotuak izatea, erabaki egin da bi hilabetekoa izatea 1561/1995 Errege Dekretuaren 8.3 artikuluan ezarritako erreferentziako denbora, astebeteko gehieneko presentzia denbora, 20 ordukoa, kontatzeko.

Langileak ez du lanik egiten ahalko beste enpresaburu batzuentzat aldez aurretik asmo horren berri bere enpresari idatzita eman gabe, ez dadin hori gehiegizko lan orduekin edo presentzia orduekin nahasi, horren berririk izan gabe. Betiere, langileak beste enpresaburu batentzat lan egitea onartzen duenean, kontuan hartu beharko du ezin baztertu duela enpresarekin itundutako lana.

Produkzioaren errealitateari egokituz eta segurtasuna sustatzearren, honako hau ezartzen da:

Mugimenduko langileek eskubidea izanen dute hamabi asteko atsedenetatik gutxienez ere zazpi beren etxean pasatzeko.

Urte osoan etxean ematen diren asteko atsedenetatik erdiak, gutxienez ere, aurreko atalean aurreikusitakoaren arabera, murriztu gabeko atsedenak izanen dira.

Enpresaren antolaketa beharrek aukera ematen duten aldiro, langileak etxean pasatzen dituen asteko atseden ahalik eta gehienak asteburuan izan daitezela bilatuko da; horrela dela ulertuko da, atsedenaldia, osorik edo hein batean, larunbatean edo igandean denean.

Asteko atseden murriztuen errekuperazioa murriztu gabeko beste asteko atsedenean eta langilearen etxean izan dadila bilatuko da, kasuen ehuneko hogeita bostean gutxienez ere.

16. artikulua. Lan ordutegiak.

a) Gidarientzat: gure bezeroek behar dituzten zama-lanen orduek dute erabateko lehentasuna, eta gidariak, ahal den aldiro, saiatuko dira banaketa departamentuak ezarritako ordu programazioa betetzen.

b) Administrazioko langileentzat: Hauxe izanen da ohiko ordutegia:

–08:00etatik 17:00ak arte, astelehenetik ostiralera (bi orduko atsedenaldiarekin bazkaltzeko). Trafikoko langileen ordutegia bateragarria izanen da uneoro zerbitzuaren beharrekin, eta behartuta egonen da tarte horretako trafiko gorabeherak konpontzera.

c) Tailerreko langileentzat: Hauxe izanen da ohiko ordutegia:

–09:00etatik 17:00ak arte, astelehenetik ostiralera (ordubeteko atsedenaldiarekin bazkaltzeko). Dena dela, zerbitzuaren beharrekin bateragarria den ordutegia itundu beharko da.

17. artikulua. Aparteko orduak edo presentziakoak.

Mugimenduko langileentzat, aparteko orduak (ezinbestekoak izan ezik) eta presentziakoak ezin dira enpresako plantillako kide bakoitzarentzat legez ezarritakoak baino gehiago izan, eta, langileen ordezkarien eta enpresako zuzendaritzarekin aldez aurretik adostuta, Legeak horren gainean ezartzen dituen tarteetako atseden konpentsatzaileekin berdintzen ahalko ditu; horrelako itunik ez dagoenean, diruz konpentsatuko dira, hitzarmen honen 29., 30., 31., 32. eta 33. klausuletan eta I. eranskinean (soldata taulak) ezarritakoaren arabera.

Hilabeteko ohiko lanalditik gorako lanorduak aparteko ordutzat hartuko dira; hura hitzarmen kolektibo honetan finkatu da eta kasu bakoitzean ezarriko den moduan kontatuko da. Aparteko orduen gehieneko mugaren ondorioetarako, haiek egin eta ondoko lau hilabetean atseden denbora baliokideekin konpentsatzen direnak ez dira kontatuko; enpresak eta langile interesdunak adostuta programatuko dira atseden konpentsatzaile horiek: ahal dela, enpresaren jarduera txikieneko boladetan eta asteko atsedenaren ondotik hartuko dira.

Enpresari dagokio aparteko orduak eskaintzea, eta langileek, oro har edo kasu jakin bakoitzean, borondatez onartuko dituzte.

Enpresak egiten duen jardueraren zer-nolakoa ikusita, langileak, aurreko lerroaldean adierazitakoa gorabehera, behartuta daude beharrezkoak diren aparteko orduak egitera, ohiko lanaldia bukatu aurretik hasita dauden gidatze lanak, zama-lanak, banaketa eta bilketa, ibilgailuen prestakuntza eta dokumentazio lanak bukatzeko, legez ezarritako gehieneko mugarekin.

18. artikulua. Oporrak.

23 laneguneko oporrak izanen dira urtean. Laneguntzat joko dira astelehenetik ostiralera bitartekoak. Ez dira laneguntzat joko larunbat-igandeak eta aste barruko jaiegunak.

Oporrak ordaintzeko, kontuan hartuko dira oinarrizko soldata, plus pertsonala, ADR plusa, 10,00 euro gordin opor egun bakoitzeko eta jarduera plusaren, kilometraje plusaren eta langileak sorrarazitako deskarga plusaren azken 6 hilabeteetako batez bestekoa edo zati proportzionala (kontzeptu horiek aurreko sei hilabeteetan benetan lan egindako egunen kopuruaz zatituko dira, eta zatidura hartutako opor egunen kopuruaz biderkatuko da).

Oporraldian langile bati aldi baterako ezintasuna ematen badiote gaixotasunaren, lan istripuaren, lanbide gaixotasunaren, haurdunaldiaren, erditzearen edo edoskitze naturalaren zioz, edo lan kontratua eteten bazaio Langileen Estatutuaren 48. artikuluaren 4. eta 7. apartatuetan ezarritako arrazoiengatik, oporrak beste aldi batean edo etenaldia akitutakoan gozatzeko eskubidea izanen du langileak, nahiz eta urte naturala akitu (betiere ondoko 18 hilabetean, oporraldiaren urtea bukatu ondotik).

Ezintasunak Baloratzeko Taldeak langileari ezintasun iraunkorra ematen badio eta enpresak GSINen ebazpena dela medio kontratua deuseztatzen badu, langileak hartu gabe dituen opor egunak sartuko dira likidazioan.

Gidarientzat, urtero txandaka ezarriko dira oporrak. Orobat, txandaka ezarriko dira zerbitzu-eskualde geografiko bakoitzeko langileen artean Eguberrietako eta Aste Santuko guardiak, halako moduan non Eguberrietan guardiak egin dituen inork ez baititu Aste Santuan eginen. Langileak bi hilabete lehenagotik jakinen du noiz hartuko dituen oporrak. Betiere, enpresaren zerbitzuaren jarraitutasuna bermatuko da.

Langileek uneko urteko abenduaren 15a baino lehen eskatu beharko dituzte hurrengo urterako oporraldiak, eta enpresak urtarrilaren 15a baino lehen berretsi beharko ditu eskatutako aldiak. Oporraldiak gidariak zerbitzua ematen duen jarduera nagusiaren arabera emanen dira (PGL, VRAC, botilak, etab.). Oporraldiak esleitu ondoren, oporraldi horiek langileen artean trukatzen ahalko dira, betiere jarduera bakoitzean behar den langile kopuruari eusten bazaio.

Hauek dira 2025. urterako jarduera bakoitzeko irizpideak:

VRACera doazen PGL jarduerako gidarieei dagokienez, irizpide hau bete beharko da:

–Bizkaia: 6 pertsonako 4 talde, eta beti 17 lanean (gutxienez 11 uztailaren erdialdetik abuztuaren erdialdera).

–Gipuzkoa: 3 langile, eta 2 jardunean egonen dira beti.

–Zaragoza + Logroño: 7 langile, gutxienez 4 jardunean.

–Santander: 11 langile, gutxienez 6 langile jarduenean.

Gutxieneko langile batzuk izan behar dira trailerrean eta Frantzian.

VRAC gidariak: Taula bat egin behar da, Santander eta Bilbo bananduta (datorren urterako).

Botilategi gidariak: Une honetan malgutasuna dago, gidari bat gehiago baitago, baina enpresaren eskaera eta berrespen datak bete behar dira.

Jarduera bakoitzeko enpresaren batez besteko plantilla handitzen edo murrizten bada, bi ordezkaritzak bilduko dira oporraldietako gutxieneko langileen irizpideak jardueraren arabera egokitzeko.

PGL jardueran, ezin dira oporrak hartu azaroaren lehenetik Aste Santu hondarrera bitartean.

19. artikulua. Lan egutegia.

Langileen legezko ordezkariekin adostuta, abenduan finkatuko da hurrengo urteko lan egutegia. Bertan, ahal dela, gure bezeroek dituzten jaiegunak errespetatuko dira.

Era berean, PGLaren jarduerarako, opor egutegia horretarako zehaztutako taulei edo ohiko antolamenduari jarraituz eginen da (taulak, txandak, etab.).

20. artikulua. Lizentziak.

Indarreko xedapenetan ezarritako lizentzia eta baimen guztiei egun bat gehituko zaie, kasu hauetan izan ezik:

1. Langileek ezkontzeagatik duten lizentziak 16 egun natural iraunen du.

2. Ezkontidea hilez gero 7 egun emanen dira. Langilea ibilbidean bada, heriotzaren eguna ez da kontatuko. Guraso, seme edo alaba bat hiltzen bada, 4 egun, langilearen etxetik gehienez 150 km-ra gertatzen bada, eta 6 egun, 150 km-ra baino urrutiago gertatzen bada.

3. Ezkontidea, bigarren mailako odol-ahaidetasuneko senideak edo horien pareko ezkontza-ahaide bat larriki gaixo edo ospitalean badago, edo emaztea ume batez erditzen bada, Langileen Estatutuaren 37.3b artikuluan, edo aplikatzekoa den jurisprudentzian, xedatutakoa beteko da.

Kasu berean, baina ezkontidearen, gurasoen eta seme-alaben kasuan bakarrik, lizentzia beste lau egun luzatzen ahalko da, baina ordainsaririk gabe.

4. Guraso, seme, alaba, anaia edo arreba bat edo horien pareko ezkontza-ahaide bat ezkonduz gero, 2 egun langilearen etxetik gehienez 150 km-ra gertatzen bada, eta 3 egun 150 km-ra baino urrutiago gertatzen bada (ezkontza egunak baimenaren erdikoa izan behar du).

5. Elkarrekin bizitzen gutxienez ere bi urte egin dituztela frogatzen duten bikoteentzat, lizentzia ordaindu bat ezartzen da. Lizentzia horrek elkarri laguntza edo sostengua ematea izanen du xede. Beraz, ezin zabalduko da ezkontzaren ondoriozko beste eskubide batzuetara, hau da, ezkontza bidezko ahaideengana.

6. Norberak hartzeko egunak: norberak hartzeko bi egun izanen dira urtean, ordainduak; bat langileak aukeratuko du, eta bestea enpresak. Gutxienez 7 egun lehenago eskatu/esleitu beharko dira. Ez dira eskatzen ahalko elkarren segidan, ez oporren jarraian, ez jaiegun bezperetan, enpresarekin adostu ezean. Ez dute egun bera hartzen ahalko jarduera bakoitzeko langileen %10ek baino gehiagok. Eskaeren hurrenkera errespetatuko da egun horiek emateko. Urte naturala akiturikoan enpresak horrelako egunen bat esleitu gabe badu, diruz konpentsatuko du ondoko urteko urtarrileko nominan, larunbatetarako ezarritako zenbatekoa emanez.

Artikulu honetan aurreikusitako baimenei dagokienez, ezkontzaren izaera bera izanen du ofizialki erregistratutako izatezko bikoteak, sexu orientazioa, sexu identitatea eta genero adierazpena edozein direla ere.

21. artikulua. Kontratuaren etenaldia ituntzea.

Zerbitzuan gutxienez ere 6 hilabete daramatzan langileak, beharra justifikatuta, eta enpresak onartu ondoren, lan kontratuaren etenaldia eskatzen ahalko du, hilabetekoa gutxienez eta sei hilabetekoa gehienez. Etenaldi horiek ez dira behin baino gehiagotan eskatzen ahalko hiru urtean. Soldata gabeko lizentziak lan harremanaren etendura dakar irauten duen bitartean.

VI. KAPITULUA.–BALDINTZA EKONOMIKOAK

22. artikulua. Xedapen orokorra.

Oinarrizko soldatak eta haren osagarriek eratzen dituzte hitzarmen kolektibo honen aplikazio eremuko langileen ordainsariak, eta hitzarmen kolektibo honen 14. artikuluan aipatzen den lanaldi arruntari dagozkio.

Soldatak hilabetea bukatutakoan ordainduko dira, hurrengo hilabeteko lehenbiziko 5 lanegunetan.

23. artikulua. Aurrerakinak.

Langileek konturako aurrerakinak jasotzeko eskubidea izanen dute. Aurrerakinaren gehieneko zenbatekoa izanen da ordainsari taulen arabera langileak duen hileko oinarrizko soldataren %90. Aurrerakina bost egun balioduneko epean ordainduko da, eskatzen denetik hasita, eta nominatik deskontatuko da eskatzen den hilean bertan.

24. artikulua. Soldata egitura.

Hemen itundutako diruzko ordainsari guztiak gordinak dira. Dagozkien deskontu sozialak eta fiskalak aplikatuko zaizkie, araudiari jarraituz.

Hauxe da hitzarmen kolektibo honek indarra hartzen duenetik ordainketek izanen duten soldata egitura:

1. Oinarrizko soldata.

2. Osagarriak:

2.1. Pertsonalak:

Plus pertsonala.

2.2. Lanpostukoak:

Arriskuaren eta nekagarritasunaren plusa (ADR).

Orga gidariaren plusa (zezen mekanikoa).

2.3. Lanaren kantitatea edo kalitatea:

2.3.1. PGLa banatzeko jarduera (Repsol Butano SA bezeroa) eta anezka jarduera (Repsol Butano SA bezeroa), hitzarmen kolektibo honen 29. artikuluan garatua.

Jardueraren prima frankiziarekin (kg, hustuketak eta hustuketa bidaiak).

Guardia egiteko prestasuna astelehenetik igandera, jaiegunak kenduta.

Guardia egiteko prestasuna igande ez diren jaiegunetan:

Presako zerbitzua.

Larunbatak.

Igandeak eta jaiegunak.

Hustuketak eta hustuketa bidaia.

Mugikortasuna botilategi jarduerara.

Mugikortasuna VRAC eta antzeko jardueretara.

Mugikortasuna betunen jarduerara.

Mugikortasuna gai arinak garraiatzeko jarduerara.

2.3.2. Botilategi jarduera (Air Liquide SA bezeroa), hitzarmen kolektibo honen 31. artikuluan garatua.

Kilometraje plusa frankiziarekin.

Deskarga plusa frankiziarekin.

Larunbatak.

Igandeak eta jaiegunak.

Mugikortasuna PGL jarduerara.

Mugikortasuna VRAC eta antzeko jardueretara.

Mugikortasuna betunen jarduerara.

2.3.3. VRAC jarduera (Air Liquide SA bezeroa), hitzarmen kolektibo honen 32. artikuluan garatua.

Kilometraje plusa frankiziarekin.

Deskarga plusa frankiziarekin.

VRAC prima (oinarrizko soldatak irentsi du).

Larunbatak.

Igandeak eta jaiegunak.

Lan berezien plusa.

Mugikortasuna botilategi jarduerara.

Mugikortasuna PGL jarduerara.

Mugikortasuna betunen jarduerara.

Mugikortasuna gai arinak garraiatzeko jarduerara.

Goi-mailako langileak, administrariak eta tailerrekoak, hitzarmen kolektibo honen 33. artikuluan garatua.

Telefonoko guardia.

Prestasun plusa.

Larunbatak.

Igandeak eta jaiegunak.

2.4. Hilabetez gorako muga-eguna dutenak:

Udako eskersaria.

Eguberrietako eskersaria.

Mozkinetan parte izateko eskersaria.

25. artikulua. Oinarrizko soldata.

Lanbide kategorietako bakoitzean, hitzarmen kolektibo honetan finkatutako lanaldian jarduera arrunt bati dagokion ordainketari esaten zaio oinarrizko soldata, eta horrela zehazten da I. eranskinean.

Oinarrizko soldata beti izanen da hitzarmen honetan ezarritako legezko lanaldiari buruzkoa. Enpresak bere langileekin akordio partikular bat eginda lanaldi murriztuko lanaldia egiten bada, oinarrizko soldata proportzionalki zatitzen ahalko da, eta dagokiona ordainduko da.

26. artikulua. Plus pertsonala.

Gaur egun ad personam hobekuntza gisa plus pertsonala (soldataren ordainagiri indibidualean definitutakoa), garai bateko antzinatasun osagarriaren ordezkoa, jasotzen ari diren langileek plus hori jasotzen jarraitzeko eskubidea izanen dute; plus hori ez da ez konpentsatzen ez xurgatzen ahalko, eta hitzarmen honen 34. artikuluan itundutako soldata berrikuspen bera izanen du.

Hitzarmen honek indarra hartzen duen egunetik egiten diren kontratazio berriek ez dute plus pertsonalaren kontzeptua dela-eta soldata osagarririk sorraraziko.

27. artikulua. ADR plusa.

Lanaldi osoko zerbitzuak egiten dituzten gidariek, enpresan garatzen duten jardueraren ondorioz ADRn jasotako salgai arriskutsuak manipulatu edo garraiatu ohi dituztenek, 50,00 euro gordin sorraraziko dute hilabetean.

Aurreko lerroaldean adierazitako lanaldian baino ordu gutxiagotan zerbitzu horiek egiten dituzten gidariek aurreko kopuruei dagokiena jasoko dute, eginiko lanaldiaren araberako proportzioan.

28. artikulua. Orga gidariaren plusa (zezen mekanikoa) desagertu eginen da.

Orga gidariaren plusa desagertu eginen da, eta botilategi jarduerako gidarien oinarrizko soldatan sartuko da.

29. artikulua. Lanaren kantitateagatiko edo kalitateagatiko osagarria PGLaren banaketan eta anezkan. (Repsol Butano SA bezeroa).

Enpresaburuak zail duenez gidarien jarduera kontrolatzea, askotan ezinezkoa baita gidatzeaz bestelako zer jarduera egin dituzten zehaztea, eta sartuak izaten ahal dituzten presentziako orduak, apartekoak eta prestasunekoak konpentsatzearren, baita gau laneko plusa ere, hitzarmen kolektibo honen 25., 26. eta 27. artikuluetako ordainsari finkoez gain, hurrengo kontzeptuek osatuko dute ordainketa aldakorra:

29.1. Jardueraren prima:

Soldata kontzeptu aldakorra da, hurrengo formula aplikatzetik aterako dena:

Transmol Logistica, SLU enpresaren plantillako PGL jarduerako gidariek ontzi batetik bestera zerbitzatutako tona bakoitzetik, honako zenbateko hauen araberako kopuruak sortuko dira:

–Espainian banatutako tonak bider 3,4165 eginen dira.

–Frantzian banatutako tonak bider 12,82 eginen dira.

–Hustuketa orduak bider 4,7712 eginen dira.

–Hustuketa bidaiak bider 15,00 eginen dira. Hustuketa bidaiatzat hartzen dira gidariak lantegitik irten eta bidaia ixten den arte egiten dituen hustuketa guztiak.

Tonen/hustuketen zenbateko guztiak batuko dira, eta gai hauen baturarekin zatituko da: gidari guztien artean lan egindako lanaldi guztiak eta guardiako astean egindako atseden egunak, asteburuan disko-erabilgarritasuna izateko, xehetasun hauek kontuan harturik:

Kalkulua egiteko, hauek EZ dira lan egindako eguntzat hartuko:

Hasierako gaikuntza aldiari dagozkionak; aldi horretan sartuko dira segurtasunari eta laneko arriskuen prebentzioari buruzko prestakuntza, PGL instalazioetan deskargak eta hustuketak egiteko prestakuntza, eta gidari bat zerbitzu horretarako gaitutzat hartzea ahalbidetzen duen beste edozein prestakuntza ikastaro.

Birziklatzeko ez den beste edozein prestakuntza jarduera; halakotzat hartuko da soil-soilik astelehenetik ostiralera eta egun osoko jardunean egiten diren GPA eta ADR jardueren ikastaroak.

Birziklatzeko ez den beste edozein prestakuntza jarduera; halakotzat hartuko da soil-soilik astelehenetik ostiralera eta egun osoko jardunean egiten diren GPA eta ADR jardueren ikastaroak.

Emaitza hori biderkatu eginen da gidari bakoitzak lan egindako egun kopuruaren eta guardiarako diskoaren araberako librantza egunen eta aste barruko prestakuntza egunen baturarekin, eta lortutako zenbateko hori igo edo jaitsi eginen da, antzinatasun eskala honen arabera:

–Gaitzen denetik urtebeteko antzinatasuna arte: -%20,00.

–1-2 urteko antzinatasuna: -%10,00.

–2-5 urteko antzinatasuna: %3,00.

–5 urtetik gorako antzinatasuna: %5,00.

Antzinatasuna zenbatzeko, enpresako benetako antzinatasuna soilik hartuko da kontuan, hau da, egindako lan aldiak soilik hartuko dira aintzat.

Horren ondoren, guztizko emaitzatik frankiziaren zenbatekoa deskontatuko da. Zenbateko hori 9,2915 eurokoa izanen da benetan lan egindako egun bakoitzeko eta diskoaren araberako librantza egun bakoitzeko, eta gehienez ere urtean 230 egunera artekoa izanen da; hortik aurrera, ez da frankiziarik aplikatuko.

Frankizia kalkulatzeko, ez dira kontuan hartuko guardiako atsedenaldia egiteko eta GPA (Gaitasun Profesionalaren Agiria) eta ADR ikastaroak egiteko hartzen diren egunak.

Gidari bakoitzeko 230 lanaldira arte aplikatuko da frankizia.

Jardueraren plusa kalkulatzeko adibidea (PGLa banatzeko jardueraren soldata osagarria).

Jardueraren prima honela kalkulatuko da:

Zenbateko hauek batuko dira:

Sei gidari:

–Lehenengoak, 7 urteko antzinatasunarekin, 20 egun egin ditu lanean, eta asteguneko bi egun eman ditu lanaldi osoan GPAren prestakuntzan.

–Bigarrenak, 5 urteko antzinatasunarekin, 20 egun egin ditu lanean, eta egun bateko atsedena hartu du takografoan.

–Hirugarrenak, 3 urteko antzinatasunarekin, 20 egunez lan egin du.

–Laugarrenak, urte eta erdiko antzinatasunarekin, 21 egun egin ditu lanean.

–Bosgarrenak, lau hilabeteko antzinatasunarekin, 21 egun egin ditu lanean.

–Eta seigarrena prestakuntza aldian dago, beste gidari bati laguntzen; 20 egun egin ditu lanean.

Hilabete batean tona hauek hornitu dituzte: 200 Tn ontzi batetik bestera Espainian, 400 Tn ponpa, 300 Tn primario eta 17 Tn Frantzian; horrez gain, 3 hustuketa bidaia egin dituzte, eta, bidaia horietan, 12 orduko benetako hustuketa metatu da –bidaien iraupena kontuan hartu gabe–. Beraz, hau litzateke komisioaren kalkulua:

29.2. Guardia egiteko prestasuna:

29.2.1. Guardia egiteko prestasuna astelehenetik igandera, jaiegunak kenduta:

Soldata kontzeptu aldakorra, urgentzietan edo larrialdietan guardian egoteagatik sorrarazten dena. 13 euro gordin sorraraziko dira astelehenetik igandera (jaiegunak kenduta) guardian emandako lanegun bakoitzeko.

29.2.2. Jaiegunetako guardia, igandeetakoa izan ezik (lan egutegiaren arabera):

Soldata kontzeptu aldakorra, jaiegunetan (igandeetan izan ezik) urgentzia edo larrialdietarako guardian egoteagatik sorrarazten dena. 22,40 euro gordin sorraraziko dira guardian emandako jaiegun bakoitzeko, igandeak izan ezik, urteko lan egutegiaren arabera.

29.3. Presako zerbitzua.

Soldata kontzeptu aldakorra, gidariari ordaintzen zaiona premia edo larrialdi baterako ateratzen denean bere lanalditik kanpo, hau da, langilearen lanaldia akitu eta eguneko atsedenaldia hasi denean. Kontzeptu hori larrialdia astelehenetik ostiralera gertatu denean sorraraziko da. Presako zerbitzua larunbatetan, igandeetan edo jaiegunetan egiten bada, 29.4 eta 29.5 artikuluetan adierazitakoa sorraraziko da. Zerbitzu horren truke, gidariak 53,6817 euro gordin sorraraziko ditu, presako edo larrialdiko zerbitzua ematera ateratzeagatik. Ez da inola ere presako zerbitzu ordaingarritzat hartuko eguneroko ibilbidean bezero berri bat sartzea, ordu eta erditik beherako desbideratzea eragiten duena, eta betiere 8 orduko lanaldia gainditzen ez bada.

29.4. Larunbatak.

Zerbitzuak larunbatez ematen dituen gidariak 115,8060 euro gordin sorraraziko ditu lan egindako larunbat bakoitzeko. Enpresak eta langileak hala adostuta, lan egindako larunbata egun eta erdiko atsedenarekin konpentsatzen ahal da, 6 hilabeteko epealdiaren barruan. Kasu horretan, langileak ez luke deus sorraraziko.

29.5. Igandeak eta jaiegunak.

Zerbitzuak igandez edo jaiegunez ematen dituen gidariak 159,8122 euro gordin sorraraziko ditu lan egiten duen igande edo jaiegun bakoitzeko. Enpresak eta langileak hala adostuta, lan egindako igande edo jaieguna bi eguneko atsedenarekin konpentsatzen ahal da, 6 hilabeteko epealdiaren barruan. Kasu horretan, langileak ez luke deus sorraraziko.

29.6. Larunbata desplazatuta eta arduerarik gabe.

Gidari bat desplazatuta badago, eta atsedena asteburuan eta etxetik edo ohiko lantokitik kanpo egin behar badu, 80,00 euro gordin ordainduko zaizkio larunbata desplazatuta igarotzeagatik.

Asteburuan etxetik kanpo lan egiten ari bada edo lanerako prestasun egoeran badago, lan hitzarmen honetan jasotako larunbateko eta igandeko plusak kobratuko ditu.

29.7. Igandea desplazatuta eta jarduerarik gabe.

Gidari bat desplazatuta badago, eta atsedena asteburuan eta etxetik edo ohiko lantokitik kanpo egin behar badu, 100,00 euro gordin ordainduko zaizkio igandea desplazatuta igarotzeagatik.

Asteburuan etxetik kanpo lan egiten ari bada edo lanerako prestasun egoeran badago, lan hitzarmen honetan jasotako larunbateko eta igandeko plusak kobratuko ditu.

29.8. Beste jarduera batzuetako lanak:

PGL jarduera esleituta daukan gidari batek VRAC jarduerako lanak egiten dituenean, kontzeptu hauek sorraraziko ditu: (i) PGL gidaria izateagatik sorrarazi ohi dituen kontzeptu finkoak; (ii) unean uneko jarduerari dagozkion kontzeptu aldakorrak (30., 31. eta 32. artikuluak, kasuan kasukoa; kilometrajea, deskargak, larunbat eta igandeak, eta abar) eta 8,44 euro jarduera horietan lan egindako egun bakoitzeko.

PGL jarduera esleituta daukan gidari batek botilategi jarduerako lanak egiten dituenean, kontzeptu hauek sorraraziko ditu: (i) PGL gidaria izateagatik sorrarazi ohi dituen kontzeptu finkoak; (ii) unean uneko jarduerari dagozkion kontzeptu aldakorrak (30., 31. eta 32. artikuluak, kasuan kasukoa; kilometrajea, deskargak, larunbat eta igandeak, eta abar) eta 3,00 euro jarduera horietan lan egindako egun bakoitzeko.

PGL jarduerara esleitutako gidari batek betunen edo gai arinen jardueretarako lanak egiten dituenean, honako kontzeptu hauek sortuko ditu: (i) PGLaren gidari izateagatik sorrarazi ohi dituen kontzeptu finkoak; (ii) PGL jarduerari dagozkion kontzeptu aldakorrak, baina betunen jardueran lan egindako egunei aplikatuta, frankizia eta jarduera horietan lan egindako egun bakoitzeko 15,00 euroko zenbatekoa barne.

30. artikulua. Lanaren kantitateagatiko edo kalitateagatiko osagarria botilategi jardueran (Air Liquide SA bezeroa).

Enpresaburuak zail duenez gidarien jarduera kontrolatzea, askotan ezinezkoa baita gidatzeaz bestelako zer jarduera egin dituzten zehaztea, eta sartuak izaten ahal dituzten presentziako orduak, apartekoak eta prestasunekoak konpentsatzearren, baita gau laneko plusa ere, hitzarmen kolektibo honen 25., 26., 27. eta 28. artikuluetako ordainsari finkoez gain, hurrengo kontzeptuek osatuko dute ordainketa aldakorra:

30.1. Kilometraje plusa frankiziarekin.

Botilategi jardueraren gidariak 0,02145 euro gordin sorraraziko ditu egunean 215 km-ko frankizia gainditzen duen kilometro bakoitzeko, eta frankizia urtean 230 jardunalditan aplikatuko da gehienez.

30.2. Deskarga plusa frankiziarekin.

Botilategi jardueraren gidariak 0,2461 euro gordin sorraraziko ditu egunean 6.87 deskargako frankizia gainditzen duen deskarga bakoitzeko, eta urtean 230 jardunalditan aplikatuko da gehienez (ez da gauzatutako bezero bakoitzeko, bezeroak helbide desberdinekin sortutako tiket bakoitzeko baizik).

Adibide moduan, honela ezartzen da frankizia sistema:

Kilometraje plusa.

Lanaldiko 215 kilometroko frankizia gainditzen bada, 0,0245 ordainduko da kilometro bakoitzeko.

Adibidea: Gidari batek 20 txanda egiten ditu lan, eta 5546 kilometro.

Kilometraje plusa: (5546-20*215)*0,0245= 30,527 euro.

Deskarga plusa.

Lanaldiko 6,87 bezeroko frankizia gainditzen bada, 0,0245 ordainduko da bezero bakoitzeko.

Adibidea: Gidari batek 20 txanda egiten ditu lan, eta 155 bezero artatzen ditu.

Deskarga plusa: (155-20*6,87)*0,2461= 4,329 euro.

30.3. Larunbatak.

Zerbitzuak larunbatez ematen dituen gidariak 115,8060 euro gordin sorraraziko ditu lan egiten duen larunbat bakoitzeko. Enpresak eta langileak hala adostuta, lan egindako larunbata egun eta erdiko atsedenarekin konpentsatzen ahal da, 6 hilabeteko epealdiaren barruan. Kasu horretan, langileak ez luke deus sorraraziko.

30.4. Igandeak eta jaiegunak.

Zerbitzuak igandez edo jaiegunez ematen dituen gidariak 159,8122 euro gordin sorraraziko ditu lan egiten duen igande edo jaiegun bakoitzeko. Enpresak eta langileak hala adostuta, lan egindako igande edo jaieguna bi eguneko atsedenarekin konpentsatzen ahal da, 6 hilabeteko epealdiaren barruan. Kasu horretan, langileak ez luke deus sorraraziko.

30.5. Larunbata desplazatuta eta arduerarik gabe.

Gidari bat desplazatuta badago, eta atsedena asteburuan eta etxetik edo ohiko lantokitik kanpo egin behar badu, 80,00 euro gordin ordainduko zaizkio larunbata desplazatuta igarotzeagatik.

Asteburuan etxetik kanpo lan egiten ari bada edo lanerako prestasun egoeran badago, lan hitzarmen honetan jasotako larunbateko eta igandeko plusak kobratuko ditu.

30.6. Igandea desplazatuta eta jarduerarik gabe.

Gidari bat desplazatuta badago, eta atsedena asteburuan eta etxetik edo ohiko lantokitik kanpo egin behar badu, 100,00 euro gordin ordainduko zaizkio igandea desplazatuta igarotzeagatik.

Asteburuan etxetik kanpo lan egiten ari bada edo lanerako prestasun egoeran badago, lan hitzarmen honetan jasotako larunbateko eta igandeko plusak kobratuko ditu.

30.7. Beste jarduera batzuetako lanak:

Botilategi jarduera esleituta daukan gidari batek PGL jarduerako lanak egiten dituenean, kontzeptu hauek sorraraziko ditu: (i) botilategi jarduerako gidaria izateagatik sorrarazi ohi dituen kontzeptu finkoak; (ii) unean uneko jarduerari dagozkion kontzeptu aldakorrak (30., 31. eta 32. artikuluak, kasuan kasukoa; kilometrajea, deskargak, larunbat eta igandeak, eta abar) eta 3 euro gordin jarduera horietan lan egindako egun bakoitzeko.

Botilategi jarduera esleituta daukan gidari batek gai arinen eta betunen jardueretako lanak egiten dituenean, kontzeptu hauek sorraraziko ditu: (i) botilategi jarduerako gidaria izateagatik sorrarazi ohi dituen kontzeptu finkoak; (ii) unean uneko jarduerari dagozkion kontzeptu aldakorrak (30., 31. eta 32. artikuluak, kasuan kasukoa; kilometrajea, deskargak, larunbat eta igandeak, eta abar) eta 3,00 euro jarduera horietan lan egindako egun bakoitzeko.

Botilategi jarduera esleituta daukan gidari batek VRAC jarduerako lanak egiten dituenean, kontzeptu hauek sorraraziko ditu: (i) botilategi jarduerako gidaria izateagatik sorrarazi ohi dituen kontzeptu finkoak; (ii) unean uneko jarduerari dagozkion kontzeptu aldakorrak (30., 31. eta 32. artikuluak, kasuan kasukoa; kilometrajea, deskargak, larunbat eta igandeak, eta abar) eta 3 euro gordin jarduera horietan lan egindako egun bakoitzeko.

31. artikulua. Lanaren kantitateagatiko edo kalitateagatiko osagarria VRAC jardueran (Air Liquide SA bezeroa).

Enpresaburuak zail duenez gidarien jarduera kontrolatzea, askotan ezinezkoa baita gidatzeaz bestelako zer jarduera egin dituzten zehaztea, eta sartuak izaten ahal dituzten presentziako orduak, apartekoak eta prestasunekoak konpentsatzearren, baita gau laneko plusa ere, hitzarmen kolektibo honen 25., 26. eta 27. artikuluetako ordainsari finkoez gain, hurrengo kontzeptuek osatuko dute ordainketa aldakorra:

31.1. Kilometraje plusa frankiziarekin.

VRAC jardueraren gidariak, lanaldiko frankizia gainditzen badu, 0,0260 euro gordin sortuko ditu kilometro bakoitzeko, urtean 230 egunetan gehienez ere.

31.2. Deskarga plusa frankiziarekin.

VRAC jardueraren gidariak, lanaldiko frankizia gainditzen badu, 2,59 euro gordin sortuko ditu deskarga bakoitzeko, urtean 230 egunetan gehienez ere.

Adibide gisa, hona hemen frankiziaren funtzionamendu sistema, kilometrotan eta deskargetan:

Ibilgailu artikulatua.

Kilometraje plusa.

Lanaldiko 258 kilometroko frankizia gainditzen bada, 0,0260 ordainduko da kilometro bakoitzeko.

Adibidea: Gidari batek 20 txanda egiten ditu lan, eta 5546 kilometro.

Kilometraje plusa: (5546-20*258)*0,0260 = 10,036 euro.

Deskarga plusa.

Lanaldiko bezero bateko frankizia gainditzen dutenei 2,599 ordainduko zaie bezeroko.

Adibidea: Gidari batek 20 txanda egiten ditu lan, eta 25 bezero artatzen ditu.

Deskarga plusa: (25-20*1)*2,599 = 12,995 euro.

Gidari bakoitzeko 230 lanaldira arte aplikatuko da frankizia.

Ibilgailu zurruna.

Kilometraje plusa.

Lanaldiko 157 kilometroko frankizia gainditzen bada, 0,0260 ordainduko da kilometro bakoitzeko.

Adibidea: Gidari batek 20 txanda egiten ditu lan, eta 3546 kilometro.

Kilometraje plusa: (3450-20*157)*0,0260 = 8,6 euro.

Deskarga plusa.

Lanaldiko 2 bezeroko frankizia gainditzen dutenei 2,599 ordainduko zaie bezeroko.

Adibidea: Gidari batek 20 txanda egiten ditu lan, eta 60 bezero artatzen ditu.

Deskarga plusa: (60-20*2)*2,599= 51,98 euro.

Gidari bakoitzeko 230 lanaldira arte aplikatuko da frankizia.

Botilategi jarduerako gidariak 2,5990 euro gordin sorraraziko ditu frankizia gainditzen duen deskarga bakoitzeko (gauzatutako bezeroko).

31.3. Larunbatak.

Zerbitzuak larunbatez ematen dituen gidariak 115,8060 euro gordin sorraraziko ditu lan egiten duen larunbat bakoitzeko. Enpresak eta langileak hala adostuta, lan egindako larunbata egun eta erdiko atsedenarekin konpentsatzen ahal da, 6 hilabeteko epealdiaren barruan. Kasu horretan, langileak ez luke deus sorraraziko.

31.4. Igandeak eta jaiegunak.

Zerbitzuak igandez edo jaiegunez ematen dituen gidariak 159,8122 euro gordin sorraraziko ditu lan egiten duen igande edo jaiegun bakoitzeko. Enpresak eta langileak hala adostuta, lan egindako igande edo jaieguna bi eguneko atsedenarekin konpentsatzen ahal da, 6 hilabeteko epealdiaren barruan. Kasu horretan, langileak ez luke deus sorraraziko.

31.5. VRAC prima.

VRAC prima oinarrizko soldatak irentsiko du VRAC gidarientzat, eta ez dute deus sorraraziko kontzeptu horretan.

31.6. Beste jarduera batzuetako lanak:

VRAC jarduera esleituta daukan gidari batek PGL jarduerako lanak egiten dituenean, kontzeptu hauek sorraraziko ditu: (i) VRAC gidaria izateagatik sorrarazi ohi dituen kontzeptu finkoak; (ii) unean uneko jarduerari dagozkion kontzeptu aldakorrak (30., 31. eta 32. artikuluak, kasuan kasukoa; kilometrajea, deskargak, larunbat eta igandeak, eta abar) eta 8,1988 euro gordin jarduera horietan lan egindako egun bakoitzeko.

VRAC jarduera esleituta daukan gidari batek botilategi jarduerako lanak egiten dituenean, kontzeptu hauek sorraraziko ditu: (i) VRAC gidaria izateagatik sorrarazi ohi dituen kontzeptu finkoak; (ii) unean uneko jarduerari dagozkion kontzeptu aldakorrak (30., 31. eta 32. artikuluak, kasuan kasukoa; kilometrajea, deskargak, larunbat eta igandeak, eta abar) eta 3 euro gordin jarduera horietan lan egindako egun bakoitzeko.

VRAC jarduera esleituta daukan gidari batek gai arinen eta betunen jardueretako lanak egiten dituenean, kontzeptu hauek sorraraziko ditu: (i) PGL gidaria izateagatik sorrarazi ohi dituen kontzeptu finkoak; (ii) unean uneko jarduerari dagozkion kontzeptu aldakorrak (30., 31. eta 32. artikuluak, kasuan kasukoa; kilometrajea, deskargak, larunbat eta igandeak, eta abar) eta 15,00 euro gordin jarduera horietan lan egindako egun bakoitzeko.

VRAC jarduerara esleitutako gidari batek gai arinen jarduerako lanak egiten dituenean, honako kontzeptu hauek sortuko ditu: (i) PGL gidaria izateagatik sorrarazi ohi dituen kontzeptu finkoak; (ii) PGL jarduerari dagozkion kontzeptu aldakorrak, baina betunen jardueran lan egindako egunei aplikatuta, frankizia eta jarduera horietan lan egindako egun bakoitzeko 15,00 euroko zenbatekoa barne.

31.8. Eragiketa berezien plusa.

VRAC gidariak lan bereziak egiten baditu, 20,8451 euro gordin sorraraziko ditu. Lan berezitzat joko dira gure bezero Air Liquide SAk esleitutako zerbitzu berriak, ohiko horniduretatik eta ohiko eremu geografikotik kanpokoak badira eta langileak hotelean lo egin behar badu.

31.9. Larunbata desplazatuta eta arduerarik gabe.

Gidari bat desplazatuta badago, eta atsedena asteburuan eta etxetik edo ohiko lantokitik kanpo egin behar badu, 80,00 euro gordin ordainduko zaizkio larunbata desplazatuta igarotzeagatik.

Asteburuan etxetik kanpo lan egiten ari bada edo lanerako prestasun egoeran badago, lan hitzarmen honetan jasotako larunbateko eta igandeko plusak kobratuko ditu.

31.10. Igandea desplazatuta eta jarduerarik gabe.

Gidari bat desplazatuta badago, eta atsedena asteburuan eta etxetik edo ohiko lantokitik kanpo egin behar badu, 100,00 euro gordin ordainduko zaizkio igandea desplazatuta igarotzeagatik.

Asteburuan etxetik kanpo lan egiten ari bada edo lanerako prestasun egoeran badago, lan hitzarmen honetan jasotako larunbateko eta igandeko plusak kobratuko ditu.

32. artikulua. Lanaren kantitateagatiko edo kalitateagatiko osagarria, goi-mailako langileentzat, administrarientzat eta tailerreko langileentzat.

32.1. Telefonoko guardia (larrialdiak):

Soldata kontzeptu aldakorra, asteburuan urgentzietan edo larrialdietan telefonoko guardian egoteagatik sorrarazten dena. 73,0129 euro gordin sorraraziko dira astean guardia bakoitzeko.

Txandako lauki bat ezarriko da hilabeterako, zerbitzua esleituta duten langileentzat.

32.2. Prestasun plusa.

Besteak beste, trafikoko gorabeherak konpontzea beren eginkizunetako bat duten trafikoko eta langileriaren buruek eta, orobat, zerbitzuak banatu eta esleitzeko eginkizunak betetzen dituztenek eta, beraz, astelehenetik ostiralera bitarteko bulego ordutegitik kanpo, gorabeherak telefonoz konpondu behar dituztenek 165,5026 euro gordin sorraraziko dituzte hilabetean. Halaber, eginkizun horiek betetzen dituzten langileek urtean norberaren aukerako egun bat izanen dute, enpresako zuzendaritzarekin adostua, betiere.

32.3. Larunbat, igande eta jaiegunak.

Zerbitzuak larunbat, igande edo jaiegunez ematen dituzten goi-mailako langileek, administrariek eta tailerreko langileek 152,0962 euro gordin sorraraziko dituzte lan egiten duten larunbat, igande edo jaiegun bakoitzeko. Enpresak eta langileak hala adostuta, lan egindako larunbata egun eta erdiko atsedenarekin eta lan egindako igande edo jaieguna bi eguneko atsedenarekin konpentsatzen ahal da, 6 hilabeteko epealdiaren barruan. Kasu horretan, langileak ez luke deus sorraraziko.

33. artikulua. Hilabetez gorako mugaeguna duten osagarriak. Aparteko haborokinak.

Enpresaren zerbitzuko langileek aparteko hiru eskersari jasoko dituzte: udakoa, Eguberrietakoa eta mozkinetakoa. Aurreko 25. artikuluan erabakitako oinarrizko soldataren zenbatekoa izanen dute.

Uztailean ordainduko da udako paga; abenduan, Eguberrietakoa, eta hurrengo urteko martxoan, mozkinetakoa.

Hurrengo irizpidearen arabera sorraraziko dira aparteko pagak:

Udako paga: urtarrilaren 1etik ekainaren 30era.

Eguberrietako paga: uztailaren 1etik abenduaren 31ra.

Mozkinetako paga: urtarrilaren 1etik abenduaren 31ra sorraraziko da, eta hurrengo urteko martxoan ordainduko da.

Langileak eskatuta, aparteko pagak hilabeteka banatzen ahalko dira.

34. artikulua. Soldaten berrikuspena.

Hauxe izanen da soldata igoeraren portzentajea:

2025. urtea: I. eranskinean zehaztutakoaren arabera.

2026. urtean: Kontzeptu guztiak berrikusiko dira 2025eko batez besteko KPIaren arabera + %1,50. Gutxienez %2ko berrikuspena bermatzen da.

2027. urtean: Kontzeptu guztiak berrikusiko dira 2026ko batez besteko KPIaren arabera + %1,00. Gutxienez %2ko berrikuspena bermatzen da.

VII. KAPITULUA.–KALTE-ORDAINAK ETA ORDEJARRIAK

35. artikulua. Dietak.

A: Dietak: dieta soldataz kanpoko kontzeptu bat da, kalte-ordain gisakoa edo konpentsatzekoa, irregularra. Haren helburua da langilearen joan-etorrien ondoriozko mantenu eta ostatu gastuak ordaindu edo konpentsatzea.

Zerbitzua dela-eta bere helbideko herritik kanpo eta zerbitzua eman ohi duen tokitik kanpo bazkaldu, afaldu edo gaua eman eta gosaltzera behartuta dauden mugimenduko langileek izanen dute dieta jasotzeko eskubidea. Enpresa ostatu gaua ordaindu beharretik salbu egonen da langileei ostatua ematen badie, baita gosaldu, bazkaldu edo/eta afaltzeagatik ordaindu beharreko dietatik, baldin eta etxetik kanpo dabilen langilearen mantenuak harentzat gasturik ez badu, enpresa haren kargu delako.

Zerbitzuaren beharrengatik ohiko bizilekutik edo lantokitik kanpora joan behar duen gidariak dieta hauek sorraraziko ditu:

a) Mantenua:

–Gaurik eman badu: 62,5521 euro, edo, nazioarteko joan-etorria izan bada, 80,1833 euro.

–Gaurik eman ez badu: 20,00 euro, edo, nazioarteko joan-etorria izan bada, 43,1313 euro.

b) Kamioiaren kabinan gaua igarotzea: 21,4704 euro.

Goi-mailako teknikarientzat eta administrarientzat, bidaiak direla-eta lan egiten duten edo bizi diren herritik kanpo gosaldu, bazkaldu, afaldu edo lo egitera behartuta badaude, 14,3360 euro sorraraziko dituzte bazkariagatik edo afariagatik, eta 53,7601 euro, lo egiteagatik eta gosaltzeagatik. Langileak ez du deus sorraraziko, enpresak gastuak dirutan konpentsatzen baditu, ordainagiria aurkeztuta.

36. artikulua. Enpresarekiko loturaren paga.

50 urtetik gorako langile batek borondatezko baja hartzen duenean enpresan (kasu horretan bakarrik), paga bat jasotzeko eskubidea izanen du enpresan etengabe zerbitzuak ematen aritutako ordu kopuruaren arabera; zenbateko gordin hauek jasoko ditu konpentsazio ekonomiko gisa:

–Enpresan 10 urtez aritua zerbitzua ematen: 1.824,81 euro.

–Enpresan 15 urtez aritua zerbitzua ematen: 2.225,25 euro.

–Enpresan 20 urtez aritua zerbitzua ematen: 3.285,80 euro.

–Enpresan 25 urtez aritua zerbitzua ematen: 4.014,65 euro.

–Enpresan 30 urtez aritua zerbitzua ematen: 4.744,59 euro.

–Enpresan 35 urtez aritua zerbitzua ematen: 5.474,52 euro.

Kopuru horiek ordainketa bakar batean ordainduko dira, langileak enpresan borondatezko baja hartzen duen egunean.

Kontzeptu horiek ez dira berrikusiko hitzarmen kolektibo honen 35. artikuluan hitzarmenaren indarraldiko urte bakoitzerako itundutako igoeraren arabera, eta izoztuta geldituko dira.

VIII. KAPITULUA.–LAN HARREMANAK HASTEA ETA BUKATZEA

37. artikulua. Probaldiak.

Onartzen diren langileak proba gisa onartzen direla ulertuko da. Probaldi hori aldakorra izanen da, zein diren bete beharreko lanpostuak, baina inoiz ez da hurrengo eskalan finkatutakoa baino luzeagoa izanen:

1. Mugimenduko langileak: bi hilabete.

2. Teknikari titulugabeak: bi hilabete.

3. Teknikari tituludunak: sei hilabete.

Probaldiak irauten duen bitartean, langileak bere lanbide kategoriari eta betetzen duen lanpostuari dagozkion eskubideak eta betebeharrak izanen ditu, plantillako langile gisa, salbu eta lan harremana etetearen ondoriozkoak. Etetea bi alderdietako edozeinek eskatuta egiten ahalko da, aldez aurretik jakinarazi beharrik izan gabe. Halaber, inork ez du eskubiderik izanen kalte-ordainik jasotzeko, eta idatziz jakinarazi beharko da lana uzten dela.

Probaldia akitzen bada eta atzera egiterik egon ez bada, kontratuak ondorio guztiak izanen ditu. Langilearen antzinatasuna zenbatzeko orduan probaldi hori ere aintzat hartuko da.

Ez da beste probaldirik egiten ahalko langileak lehendik eginkizun berberak bete dituenean enpresan, edozein kontratu mota izanda.

38. artikulua. Aurreabisua.

Enpresak zer jarduera egiten duen ikusita, enpresan zerbitzuak egiteari borondatez uzten dioten langileek idatzita jakinarazi beharko dute enpresa utzi baino hamabost egun lehenago, gutxienez ere, urtebetetik gorako kontratuentzat, eta zazpi egun lehenago, iraupen laburragoko kontratuentzat, non ez diren iraupen jakin bateko kontratuak, zeinetan lana uzteko eguna eta kontratua bukatzeko aurreikusten den data egun bera diren. Aurreabisurako epe hori betetzen ez bada, enpresak eskubidea izanen du abisurik eman gabe iragan egunen soldataren adinako kalte-ordaina kentzeko langilearen likidaziotik.

Enpresak kito gisa langileari ordaindu behar dizkion kontzeptuetatik kentzen ahalko da zehapen hori; aipatu kontzeptuek langilearen esku egon beharko dute enpresa uzten duen egunean.

39. artikulua. Lan kontratuak.

a) Iraupen mugatuko kontratua, produkzioaren inguruabarrengatik.

Langileen Estatutuaren 15.2 artikuluan xedatzen denari jarraituko zaio.

b) Neguko eta urtaro aldaketaren kanpainetako aldizkako kontratu finkoak.

Jarduera bakoitzeko zerbitzuaren beharren arabera eta antzinatasun ordenaren arabera, zaharrenetik berrienera, eginen zaie dei aldizkako kontratu finkoa duten langileei.

40. artikulua. Erreserba eskubidea.

Langileren bat atxilotuz gero, enpresak lanpostua gordeko dio harik eta epai irmoa eman arte. Kontratua etenda geldituko da epe horretan, Langileen Estatutuaren 45.1.g) artikuluaren babesean; hortaz, ezer jasotzeko eskubiderik gabe. Itzultzen denean izanen du berriz eskubidea, Langileen Estatutuan ezarritakoaren arabera. 41. artikulua. Esnea emateko baimena.

Langileen Estatutuaren 37.4 artikuluak langileei ematen dien eskubidea, esnea ematekoa, hartu beharrean, eskatzaileak hala nahita, hamabi laneguneko lizentzia ordaindua hartzen ahalko du, eta hori amatasuneko bajaren ondotik hartu beharko da, etenik gabe.

41. artikulua. Eszedentziak.

Eskatzen diren eszedentziak indarra duen legerian aurreikusitakoaren arabera emanen dira.

IX. KAPITULUA.–LAGUNTZA SOZIALAK, KALTE-ORDAINAK ETA PRESTAKUNTZARAKO LAGUNTZAK

42. artikulua. Gidabaimena kentzea.

Dela epai judizial irmoa, dela etendura gabeko administrazio ebazpena, agintari eskudunak emana, lan kontratua etenda eta eszedentzia egoeran geldituko da gidabaimena kendu zaien, baimen horren puntu guztiak galtzen dituzten edo ADR baimena kentzen zaien gidarientzat, harik eta gidariak gidabaimena edo puntuak edo ADRa berreskuratzen dituen arte. Betiere, salgai arriskutsuen ibilgailu bat gidatzera itzultzen ahal baldin bada. Lan kontratuaren etenaldi bukaeran, gidariak bere lanpostua berriz hartzeko eskubidea izanen du, indarra duten laneko baldintzen barrenean.

Lan kontratuaren etenaldian gidariak hilabetean 1.500,00 euro gordineko diru konpentsazioa hartzeko eskubidea izanen du enpresak helburu horretarako kontratatutako aseguru konpainia batetik, eta urtebetez gehienez ere, baldin eta gidabaimena trafiko segurtasunaren kontrako delitu batengatik kendu ez bazaio. Adibidea (ibilgailua ausartegi gidatzea edo edari alkoholdunak, drogak edo estupefazienteak hartuta). Gidabaimena urtebeterako baino gehiagorako kentzen bada, gidabaimena edo puntuak edo ADRa berreskuratu arte egonen da langilea enplegu eta soldata gabe, betiere salgai arriskutsuen ibilgailu bat gidatzen ahal duen arte, inolako diru konpentsaziorik gabe.

Gidariak ikastaroak egiteko eskubidea izanen du puntu guztiak, haien zati bat edo epai bidez urtebeterako, gehienez ere, kendutako gidabaimena berreskuratzeko, eta aseguru konpainiak ordainduko du.

Puntuak partzialki berreskuratzeko ikastaroa: 4 puntu berreskuratzeko ikastaroa egin beharko du gidari profesionala izateagatik.

Puntuak guztiz berreskuratzeko ikastaroa: 12 puntuak galduz gero, ikastaroa egin beharko du; horrez gain, Trafikon azterketa egin eta gainditu beharko du.

Aipatu diren primen zenbatekoek aldatu gabe jarraituko dute hitzarmen kolektibo honen eta bere luzapenen indarraldi osoan; artikulu honi ez zaio hitzarmen kolektibo honen 34. artikulua aplikatuko.

43. artikulua. Istripu asegurua.

Enpresak istripu aseguru kolektiboaren poliza bat kontratatuko du langileentzat. Hauek izanen dira baldintzak:

Istripuaren ondoriozko ezintasun iraunkor osoa: Lan kontratua azkendu gabe, 25.000,00 euroko kapital aseguratua, eta kontratua azkenduz gero, 40.000,00 euro.

Edozein lan ordaindutarako ezintasun iraunkor absolutua eta baliaezintasun handia, istripu baten ondoriozkoa: 55.000,00 euroko kapital aseguratua.

Lan istripuaren ondoriozko heriotza: 40.000,00 euroko kapital aseguratua langile bakoitzeko.

Polizek eragina eta ondorioak izanen dituzte langileek jardunean daudenean izaten dituzten lan istripuetan, hitzarmen hau argitaratzen den egunetik bi hilabete iragandakoan.

Izandako istripuak bide ematen badio prozesu judizial bati eta horren arabera enpresa behartua bada langileari edo bere eskubidedunei kalte-ordain bat ordaintzera, horrela hitzarturiko aseguruaren ondoriozko dirua epaian finkatutako kopuruaren konturakoa izanen da.

Polizek aipatu diren kapitalak aldatu gabe jarraituko dute hitzarmen kolektibo honen eta bere luzapenen indarraldi osoan, eta artikulu honi ez zaio hitzarmen kolektibo honen 34. artikulua aplikatuko.

44. artikulua. Trafiko zehapenen ordainketa.

Trafikoari, Zirkulazioari eta Bide segurtasunari buruzko araudiaren kontrako arau-hausteak ibilgailu gidarien erantzukizunak dira eta, horrenbestez, arau-haustea egiten duenak ordaindu beharko ditu ezartzen zaizkion isunak.

Betiere, ibilgailuaren titularrak izanen du erantzukizuna ibilgailuaren dokumentazioari buruzko arau-hausteetan, haien kontserbazio egoerari buruzkoetan eta aldian aldiko azterketei buruzko arauak ez betetzearen ondoriozkoetan.

45. artikulua. Aldi baterako ezintasuna.

45.1. Kontingentzia arruntak.

Istripu edo gaixotasun arruntagatik aldi baterako baja hartua duten langileek lansariaren %100 jasoko dute, lehenbiziko egunetik hasita, egoerak diraueino. Kasu horretan oinarrizko soldatak eta plus pertsonal finkoak (kontsolidatua duenarentzat, hala jasota bada soldataren hilabeteko ordainagirian) bakarrik osatuko dute lansaria.

Aurreko lerroaldeetan adostutako prestazio osagarriei dagokienez, enpresaren kargurako estalduraren portzentajea, haren indarraldiko egun kopurua eta gaur egun indarra duen Gizarte Segurantzaren araudiaren ondoriozkoak ez dira inoiz igoko, hitzarmen hau sinatu ondoren haietan edozein aldaketa izan ondoren.

Geroagoko legegintzako aldaketen kasuan hala gertatuz gero, enpresak bere kargura osatuko du estalduraren portzentaje berean oinarrituta eta aldatutako araudian zeuden egun kopuru bera mantenduz.

45.2. Kontingentzia profesionalak.

Lan istripu edo gaixotasun profesionalagatik aldi baterako bajan dauden langileei, 31. baja-egunetik aurrera, aurreko hileko lanbideko kontingentzia arruntei dagokien kotizazio oinarriaren %10ekin osatuko zaie, medikuaren baja bukatu arte.

46. artikulua. Heriotza edo ezintasuna herritik kanpo.

Langileren bat bere ohiko bizilekutik kanpo hilez gero edo ezinduta gelditzen bada hartara itzultzeko, enpresak aginduta kanpoan dagoelako, hark ordainduko ditu hildako edo ezindutako langilea eta ahaide edo laguntzaile bat itzultzeko gastuak.

47. artikulua. Erretiroa.

Enpresak erretiroa emanen du nahitaez, eskatutako modalitatea edozein izanik ere –hau da, orokorra edo partziala (txanda-kontratuarekin)–, betiere arlo horretan indarrean dagoen araudi erregulatzaileko baldintzak betetzen baditu. Egungo legediaren arabera, txanda-kontratuarekin erretiro partziala hartzen bada, enpresak erretiroa eman beharko du, %25eko (lana) eta %75eko (gizarte-segurantza) portzentajearekin. Hori horrela izanen da, arlo horretan arau aldaketarik egiten ez den bitartean. Enpresak erabakiko du noiz hasiko den lan aldia, eta aldi hori etenik gabe eginen da beti, bi aldeak ados jarri ezean.

X. KAPITULUA.–EKINTZA SINDIKALA

48. artikulua. Berme eta eskubide sindikalak.

Transmol Logística SLU enpresako langileen legezko ordezkariek indarra duen legeriak ematen dizkien bermeak, abantailak eta eskubideak izanen dituzte.

Idatzita eskatzen duen langileari sindikatu kuota kenduko zaio nominatik, eta hark aukeratzen duen sindikatuari emanen zaio.

XI. KAPITULUA.–LAN OSASUNA

49. artikulua.

Alderdi sinatzaileentzat funtsezkoa da langileen segurtasuna eta osasuna babestea lanaren ondoriozko arriskuen aurrean; horretarako, laneko prebentzio politika eraginkorrak ezarriko dira, bi alderdien arteko beharrezko kontsentsuaren fruitu. Eskubide kolektiboak lehenetsiko dira banakoen eskubideen aldean.

Beraz, Laneko Arriskuen Prebentzioari buruzko azaroaren 8ko 31/1995 Legean, urtarrilaren 17ko 39/1997 Errege Dekretuaren bidez onetsitako prebentzio zerbitzuen erregelamenduan eta horiek osatzen dituzten garapeneko gainerako xedapenetan ezarritakoaren argitan, baita horien ordez aldarrikatzen ahal direnetan ere, lan baldintzen hobekuntza bultzatzeak du lehentasuna, baita langileen prestakuntza eta informazio mailen etengabeko hobekuntzan ahalegintzen jarraitzeak ere, langileen segurtasunaren eta osasunaren babes maila handitzen laguntzen ahal dituztelako.

Hori helburu, laneko Segurtasun eta Osasun Batzordea eratuko da, aipatu legerian jasotako eginkizun eta eskudantziak izanen dituena, enpresan burutzen diren jarduerak direla-eta segurtasunari eta osasunari buruz pizten ahal diren arazoak konpontzeko.

Ondorio horiekin, aipatu prebentzio arloko kudeaketak honako inguruabar hauek jaso beharko ditu, baina ez zehazki:

a) Osasuna zaintzea: Laneko Arriskuen Prebentzioari buruzko Legearen 22. artikuluan ezarritakoaren arabera, enpresak osasun egoeraren aldian aldiko zainketa bermatuko die langileei, lanak atxikita dituen arriskuen arabera.

Urtean osasun azterketa bat eginen zaie langile guztiei, enpresak kostua ordainduta. Zerbitzuak ahalik eta kalte txikiena izateko enpresak erabakitzen duen laneko ordutegian eginen da osasun azterketa.

Gidari lanak egiten dituzten langileentzat, urteko osasun azterketa nahitaezkoa izanen da, 31/1995 Legearen 22. artikuluari jarraituz. Lanean dituzten eginkizunei dagozkienak eta, gainera, estupefazienteak edo gai psikotropikoak (drogak) kontsumitzen ote dituzten atzematekoak izanen dira gidariek pasa beharko dituzten probak. Azterketa medikoaren emaitzei buruz bi txosten eginen dira. (i) Osasun azterketaren ondoriozko txostena, zeina intimitate pertsonalerako konstituzio eskubidearen barrenean sartzen baita; hortaz, isilpekoa eta pertsonala izanen da, eta azterketa izan duen langileari eman beharko zaio. Hala ere, osasun azterketa egin duen entitateak langilearen "gai" edo "ezgai" kalifikazioa jakinarazi beharko dio enpresari. Eta (ii) osasun azterketatik bereiz, drogen eta alkoholaren probak egiten dituen laborategiak txostena emanen du, langileak proba horietan emaitza positiboa edo negatiboa izan duen adierazteko.

Orobat, sartu berria den langileak nahitaez egin beharko du osasun azterketa, aldez aurretik; hartan, langilearen eginkizunen araberako azterketa arrunteko probez gain, drogadikzio eta alkoholemia probak eginen zaizkio, nahitaez.

Osasun proben arabera langilea aldi baterako gai ez bada lanpostuan aritzeko, berriz eginen dira probak 30 egun iragan ondoren, ez lehenago. Epe horretan, langileak medikuaren baja eskatuko du, eta ematen ez badiote, hartu gabe dituen oporrak emanen zaizkio, eta oporrik ez badu, kontratua eten eginen da, non ez den alderdien arteko akordiorik, SPAk gai kalifikazioa eman arte.

Gidari lanak egiten ez dituzten langileentzat, osasun azterketak borondatezkoak izanen dira; alabaina, beste azterketa batzuk egiten ahalko dira, nahitaez, langileen ordezkariek txostena egin ondoren, berariazko legezko xedapenak daudenean, edo horiek beharrezkoak direnean lan baldintzek langileen osasunean duten eragina ebaluatzeko, edo egiaztatzeko langilearen osasun egoera arriskutsua izaten ahal den berarentzat, gainerako langileentzat edo beste pertsona batzuentzat. Osasunaren Prebentzio eta Zainketa zerbitzuko protokolo medikoen araberako tarteekin eginen dira osasun azterketak, zer lanpostu den kontuan hartuta.

Eman beharreko zerbitzuei dagokienez, portaera psikiko edo/eta farmakologiko arraroak, intentsitate eta ohikotasun berezikoak, ikusten direnean, interesdunak edo langileen ordezkariek eskatuta, enpresak bere ekimenez jarriko ditu beharrezko baliabideak, hark osasun azterketa berezia eta berariazkoa izan dezan, arrazoiak eta ondorioak diagnostikatzen eta tratamendu egokia jartzen laguntzeko; langilea behartua egonen da mediku taldearekin batera aritzera beharrezkoak diren azterketa, analisi eta tratamendu guztietan.

b) Drogen eta alkoholemiaren ausazko kontrola gidarientzat: langileen segurtasuna bermatu nahian, bai eta hirugarren pertsonena ere (errepideetako beste erabiltzaileak, bezeroak eta abar), enpresak alkoholaren, substantzia psikotropiko eta estupefazienteen eta edozein drogaren kontsumoa detektatzeko probak egiten ahalko dizkie bere gidariei. Substantzia horiek detektatzeko probak irizpide hauen arabera eginen dira:

• a) Nahitaez eginen dira proba horiek, osasun azterketa egiten den unean.
• b) Enpresak kontrolak egiten ahalko ditu urte osoan zehar, eta ausazkoak izanen dira.
• c) Urtean hiru aldiz eginen dira, gehienez ere.
• d) Langileari gutxienez egun natural bat lehenago jakinaraziko zaio proba egin behar duela, eta langileen ordezkariari ere aurretiaz jakinaraziko zaio.
• e) Enpresak alkoholemiaren eta drogen kontrola berehala egiten ahalko dio gidariari, substantzia horiek hartu izanaren sintomak ageri baditu. Horrelakoetan, langilearekin egon beharko du Enpresa Batzordeko kideren batek.
• f) Kontrolak noiznahi egiten ahalko dira urtean zehar.

Gidariak alkoholemiaren eta drogen kontrolak egin nahi ez baditu, edo probetan emaitza positiboa izaten badu, arau-hauste oso astuna egotzi eta dagokion diziplinako zehapena ezartzen ahalko zaio.

c) Amatasunaren babesa: Laneko eta Familiako Eginkizunak Batera Eramateari buruzko 39/1999 Legean ezarritakoari jarraituz, enpresak behar diren neurriak hartuko ditu, haurdun edo erditu berri diren langileen segurtasunak eta osasunak ez dezaten arriskurik edo kalterik izan haurdunaldian eta esnea emateko garaian.

Emakume langilearen laneko baldintzak eta denbora egokituta hartuko dira neurri horiek.

d) Prebentzioko ordezkarien prestakuntza: enpresak behar adinako prestakuntza ikastaroa eman beharko die prebentzioko ordezkariei, arlo horretako eginkizunak gara ditzaten.

e) Enpresen jardueren koordinazioa: Laneko Arriskuen Prebentzioari buruzko Legearen 24. artikuluan, prebentzio arloko enpresa jardueren koordinazioaren gainean ezarritakoari jarraituz, enpresak bere zerbitzuak ematen dituen besteen lantokietako titularrei informazio eta jarraibide egokiak eskatu beharko dizkie, lantokian dauden arriskuei eta babes eta prebentzio neurriei buruz, baita aplikatu beharreko larrialdi neurriei buruz ere, langileei haien berri emateko.

50. artikulua. Laneko arropa eta norbera babesteko ekipamenduak.

Enpresak laneko arropa eta norbera babesteko ekipamenduak emanen dizkie langileei, Laneko Arriskuen Prebentzioko Departamentuak ezarritako beharren arabera.

XII. KAPITULUA.–MUGIKORTASUN GEOGRAFIKOA

51. artikulua. Lekualdatzeak eta joan-etorriak.

Lekualdatzeak. Baliabideak egokiago antolatuz bere egoera hobetzearren, enpresak bere langileak lekuz aldatzea erabakitzen ahalko du, eta bizilekuz aldatzera behartu, legez eskatzen diren baldintza eta beharkizunekin. Behar horiek, lehenik, egokitasun baldintzak bete eta lekuz aldatzea beren borondatez onartzen dutenekin beteko dira; horrelakorik ez bada, mugigarritasunak ukituta azkenak izateko lehentasuna izanen dute enpresa barreneko langileen ordezkariek; gero, haurdun dauden langileek edo urtebetetik beherako haurrak dituztenek eta familia kargak dituztenek.

Aurreko lerroaldean jasotako kasuetan, interesdunaren eta harekin bizi diren pertsonen bidaia gastuak ordaindu beharko ditu enpresak, eta altzariak eta gauzak eraman edo, hark aukeratuta, garraio horrek eragiten dizkion gastuak ordaindu; gainera, beste edozein gastu konpentsatzeko, dagokion oinarrizko soldataren hilabeteko baten zenbatekoa ordaindu beharko du, gutxienez ere.

Lekualdaketa langileak eskatuta egiten bada, ez du konpentsaziorako eskubiderik izanen, eta alderdiek adostuta bada, haiek erabakitzen duten konpentsazioa izanen du.

Desplazamenduak. Zerbitzuaren beharren ondorioz, langilearen bizileku aldaketa aldi baterako bada, desplazamendu esaten zaio.

Bai desplazamenduak, bai bizi den herritik eta zerbitzua eman ohi duen tokitik kanpora joateak eskubidea emanen diote langileari bidaiaren zenbatekoa ordaintzeko, enpresaren ibilgailuan mugitzen ez bada; orobat, desplazamenduak eragiten dizkion gastuak konpentsatzeko, dieta kobratzeko, aplikatzen den hitzarmen kolektiboaren arabera kasu bakoitzean dagokion kopuruan.

XIII. KAPITULUA.–PRESTAKUNTZA

52. artikulua. Etengabeko prestakuntza: helburuak.

Hitzarmen kolektibo hau sinatzen duten alderdiek elementu estrategikotzat dute langileen etengabeko prestakuntza, aukera ematen baitu enpresaren lehiakortasun handia bateragarri egiteko langilearen beraren prestakuntzarekin eta lanbide garapenarekin, enplegurako lanbide prestakuntzak berea duen etengabeko ikaskuntzaren prozesuan; horregatik, indarra duen legezko araudia ahalik eta gehien aprobetxatu eta garatzeko nahia adierazten dute.

53. artikulua. Prestakuntza ikastaroak.

Langileen prestakuntza eta hobekuntzarako doaneko ikastaroak antolatzen ahalko dituzte enpresek, uztailaren 3ko 694/2017 Errege Dekretuan, irailaren 9ko 30/2015 Legea (lan eremuan enplegurako lanbide heziketa arautzen duena) garatzekoan edo hura ordeztu edo garatzen ahal duen arauan aurreikusitako prozeduraren arabera, helburua gaikuntza eta lanbide sustapena izanik.

Aukera eta tratu berdintasunaren printzipioa bermatuko zaie prestakuntza eskuratzeko, hura zailen duten langileei. Hori horrela, zenbait kolektibotako (besteak beste, gazteak, etorkinak, desgaitasunak dituztenak, aldi baterako kontratua duten langileak, genero indarkeriaren biktimak) langileen prestakuntza bultzatzeko ekintza positiboak sartzen ahalko dira prestakuntza ekintzetan.

54. artikulua. Prestakuntzarako banakako baimenak.

Hitzarmen kolektibo honen eraginpeko langileek banakako prestakuntza baimenak eskatzen ahalko dituzte uztailaren 3ko 694/2017 Errege Dekretuan, irailaren 9ko 30/2015 Legea (lan eremuan enplegurako lanbide heziketa arautzen duena) garatzekoan aurreikusitako moduan, beren gaitasun pertsonala eta lanbidekoa hobetu gogo duten langileei titulazio ofizial batek aitortzen dien prestakuntza erraztearren, zerbitzuak ematen dituzten enpresentzat kosturik eragin gabe.

55. artikulua. Gidarien birziklatze prestakuntza.

Enpresak emanen ditu Gaitasun Profesionalaren Agiria (GPA) eta salgai arriskutsuen txartela (ADR) berritzera bideratutako prestakuntza ikastaroak, bereak diren baliabideak erabiliz edo beste zerbitzu batzuekin hitzartuta.

Prestakuntza tipologia honen kostua bakarrik izanen da enpresen kontura. Prestakuntza hori enpresak ordainduko du soilik prestakuntza zentroa eta ikastaroa egiteko unea trafikoburuak baimendu baditu. Langileek xede horretan erabiltzen duten denbora Langileen Estatutuaren 23.3 artikuluan ezarritako baimen ordainduari egotziko zaio, otsailaren 10eko 3/2012 Errege Lege-dekretuak ezarritako testuarekin.

Salgai arriskutsuak garraiatzen dituzten ibilgailuak gidatzeko gaitzen duen baimena berritzeko azterketa gainditzen ez duten langileei sei hilabetez, gehienez ere, eten eginen zaie lan kontratua, eta epe horretan lortu beharko dute aipatu baimena.

Lehen azterketa tasa ordainduko da ADRa berritzean, eta GPA txartela egiteko tasa 5 urteko antzinatasunetik aurrera, 2025eko urtarrilaren 1az geroztik.

Prestakuntza ikastaroko orduak ordaintzea.

Denbora joan ahala areagotu egin dira enpresaren prestakuntza beharrak. Horregatik, prestakuntza denbora lan denbora izan dadin, enpresak konpromisoa hartzen du prestakuntza honela gauzatzeko:

1. Ahal den guztietan, prestakuntza lanaldiaren barnean izanen da. Lanalditik kanpokoa izanez gero, gidariak aukeran izanen du prestakuntzan emandako orduak atsedenarekin konpentsatzea edo dirutan kobratzea:

–Atseden egunen bidezko konpentsazioa: trafikoburuek konpentsaziozko atseden egunak esleituko dituzte lan gutxien dagoen uneetan. Gehienez ere lau hilabeteko epea izanen da egun horiek hartzeko, ez bada gidariarekin epe horren luzapena ituntzen.

–Prestakuntza orduak kobratzea: lan bolumena edo gidariarekiko ituna tarteko, prestakuntza denbora atsedenarekin konpentsatzen ez denean, 14,3147 euro gordin ordainduko dira prestakuntza ordu bakoitzeko. Zenbateko horrekin konpentsatuko dira prestakuntza orduak, kontuan hartu gabe asteko zein egunetan egin diren. Lan orduekin konbinatuta prestakuntza orduak egiten direnean, 8 ordutik aurrerakoak ordainduko dira, lanegunetan. Larunbat eta igandeetan ordu guztiak ordainduko dira. Prestakuntza orduak 8ren multiploetan soilik konpentsatzen ahalko dira; aste barruko prestakuntza orduak 1:1 izanen dira, larunbatekoak 1:1,5 eta igande eta jaiegunetakoak 1:2. Ez dira denboran konpentsatzen ahalko, alderdiek bestelakorik adostu ezean; gehienez ere 2 egun arte.

2. PGL langileek egun osoko prestakuntza hartzen dutenean, prestakuntza egun hori hitzarmen kolektiboaren 29.1 artikuluko jarduera primaren poltsan sartuko da banaketarako.

3. Ordaindu beharreko prestakuntza orok egiaztagiria beharko du, dela takografoaren diskoa eta prestakuntza zentroaren ziurtagiria, ordutegiak azaltzen dituena, dela enpresa barneko prestatzaileak emandako egiaztagiria, enpresak ematen badu prestakuntza.

3. Prestakuntza egunetako mantenu gastuen konpentsazioa:

–Ohiko garraio zerbitzuak egin eta prestakuntza orduekin konbinatzen diren egunetan, hitzarmeneko dieta ordainduko da.

–Prestakuntza egun osokoa bada, bazkaltzeko atsedenaldiarekin, bazkariaren faktura gastuen likidazioan ordainduko da, egun hori laneguna, asteburua edo jaieguna den kontuan hartu gabe.

–Prestakuntza goizez edo arratsaldez bakarrik ematen den egunetan ez da dietarako eskubiderik izanen.

–Ez dira konpentsatuko txartelak lortzeko tasei lotutako gastuak.

–Ez da konpentsatuko prestakuntza zentroetara egindako joan-etorrietan egindako kilometrajea.

56. artikulua. Takografo txartelak berritzea.

Takografo digitalaren txartela berritzeko tasak 5 urteko antzinatasunetik aurrera ordainduko dira, 2025/01/01etik zenbatzen hasita, eta 20,00 euro gordin, txartela lortzeko kudeaketa gastuengatik.

XIV. KAPITULUA.–DIZIPLINA ARAUBIDEA

57. artikulua. Kaleratzea eta falta astunen eta oso astunen zehapenak eta diziplina araubidea.

Salgaien errepide garraioko enpresetarako II. akordio orokorreko VIII. kapituluan jasotzen diren diziplina araubideko xedapenak aplikatuko zaizkie ukitutako langileei, edo haren ordezkoan jasotzen direnak. Dena dela, salgaien errepide garraioko enpresetarako II. akordio orokorreko zehapenez gain, eta beste batzuk murrizteko asmorik gabe, honako ez-betetze hauek ezartzen dira:

–Falta astunak:

1. Depositua gehiegi betetzea, %85etik gora, gidariari egozten ahal zaionean.

2. Deposituko sarrera eta irteerako portzentaje errealak txartelean behar bezala ez jasotzea (Kargatu aurretik eta ondoren).

3. Zerbitzuan gertatzen diren gorabehera larrien berri ez ematea zuzeneko nagusiari (Gehiegi betetzea, ihesak, akatsak deskargetan, istripuak, etab.).

4. Enpresak esleitutako zerbitzu bat egiteari uko egitea, hori justifikatzen duen legezko arrazoirik egon gabe.

5. Ezarritako abiadura mugak gainditzea.

6. Takografoaren arau-hausteak, haren kudeaketa sistemaren txostenetan edo disko analogikoetan ateratzen direnak. Honako hauek izanen dira faltak:

–Gidatzean eguneko atseden denbora ez betetzea.

–Jardunaldi arteko atseden denbora ez betetzea.

–Asteko atseden denbora ez betetzea.

–Eguneko gidatze orduak gainditzea.

Falta oso astun hauek ezartzen dira, beste batzuk murrizteko asmorik gabe:

1. Horretara behartuta dauden gidariek takografo analogikoaren erregistro orriak edo diagrama diskoak behar bezala ez betetzea, edo takografo digitalean eskatzen diren sarrerak behar bezala ez egitea. Takografo txartela ibilgailuaren barruan uztea, ibilgailuan lo egiten ez duenean.

2. Gidariek ez izatea takografoko erregistro orriak edo diagrama diskoak, edo haiek hondatuta izatea.

3. Horiek betetzera behartuta dauden gidariek takografo analogikoaren erregistro orriak edo diagrama diskoak ez aurkeztea enpresari hitzarmen honetan ezarritako epeetan, edo gidariak uko egitea enpresak takografo digitaleko txarteletik datuak deskarga ditzan (arauzko 28 disko baino gehiago dituztenek hilaren 1etik 10era arte aurkeztu beharko dituzte diskoak).

4. Baimen idatzirik gabe, kanpoko pertsonak enpresaren ibilgailuetan eramatea.

5. Ordu gehiegi gidatzea edo atseden txikiegiak hartzea, baita takografoa manipulatu, faltsutu edo behar ez bezala erabiltzea ere.

6. Laneko jazarpena, sexu jazarpena eta sexu orientazio, sexu identitate, genero adierazpen edo sexu ezaugarriengatiko jazarpena egitea.

Kitapenak diren ordainagiri guztiak langileen legezko ordezkarien aurrean sinatuko dira, interesdunaren berariazko ukoa izan ezik. Langileen ordezkarien informaziorako eskubideei buruz urtarrilaren 7ko 2/1991 Legean xedatutakoa beteko da arlo honetan.

Salgaien errepide garraioko enpresetarako II. akordio orokorrean jasotako zehapenak ezartzen ahalko dira diziplinako faltak egiteagatik.

XV. KAPITULUA.–LAN BIZITZA ETA FAMILIA BATERAGARRI EGITEA

58. artikulua. Lana eta familia bizitza bateragarri egitea.

Enpresaren antolaketa beharrak errespetatuta, langileen laneko eta familiako eginkizunak ahalik eta hobekien batera eraman ahal izateko lan baldintzak ezarri ahal izatea da enpresaren nahia. Horretarako, enpresek arlo honetako eskubide guztiak erabiltzen utziko diete hala eskatzen duten langileei, indarra duen legerian ezarritako moduan.

Eskatzaileak hala nahita, Langileen Estatutuaren 37.4 artikuluan esnea emateko aurreikusitako baimenaren ordez, gutxienez hamabi laneguneko lizentzia ordaindua hartzen ahalko da, amatasuneko bajaren ondotik hartu beharko dena, etenik gabe. Lizentzia ordainduaren iraupena proportzioan handituko da erditze anizkoitzaren kasuetan: bi egun haur bakoitzeko, bigarrenetik hasita.

Aitak zein amak hartzen ahalko dituzte bi aukerak, biak lanean ari badira.

Langileak (aitak zein amak) aurreko lerroaldean deskribatutako lizentzia ordaindua aukeratuz gero, amatasuneko atsedena bukatu baino 15 egun lehenago, gutxienez ere, jakinarazi beharko dio enpresari.

59. artikulua. Aukera berdintasuna.

Enpresak tratu eta aukera berdintasuna errespetatu behar ditu lan eremuan, eta, helburu horrekin, debekatu egiten da arraza, sexua, sexu orientazioa eta identitatea, LGTBI kolektiboko kidetza, genero adierazpena edo sexu ezaugarriak, erlijioa, etnia, aukera politikoa edo sindikala, edo adina direla-eta edozein lan arlotan diskriminazioa eragiten duen neurri oro. Halaber, debekatu egiten da lanpostu bera betetzen duten pertsonek ordainsari desberdinak jasotzea paragrafo honetan adierazitako zirkunstantziengatik.

Horrez gain, enpresak honako hauek bermatuko ditu:

1. Hautaketa prozesuetan eta enplegua lortzeko eta lanbide sustapeneko kasuetan, pertsonaren lanposturako prestakuntza eta egokitasuna izatea kontuan hartu beharreko lehentasun bakarra, haren sexu orientazioa eta identitatea edo genero adierazpena edozein direla ere.

2. Hitzarmen kolektibo honen eraginpeko plantillaren prestakuntza planetan LGTBI pertsonek lan eremuan dituzten eskubideei buruzko modulu espezifikoak sartzea, urriaren 8ko 1026/2024 Errege Dekretuan, enpresetan LGTBI pertsonen berdintasunerako eta diskriminaziorik ezerako neurrien multzo planifikatua garatzekoan, I. eranskinaren laugarren puntuan jasotako edukiarekin, tratu eta aukera berdintasunean eta diskriminaziorik ezan bereziki eraginez.

Berdintasun planek enpresa osoa hartuko dute, deusetan galarazi gabe zenbait zentrotan egokiak diren ekintza bereziak ezartzea.

60. artikulua. Genero indarkeria.

Behar den konfidentzialtasuna errespetatuta, enpresak guztiz lagunduko die genero indarkeriaren biktima diren langileei Genero Indarkeriaren aurkako Osoko Babes Neurriei buruzko abenduaren 28ko 1/2004 Lege Organikoan aurreikusitako eskubide eta bermeak izan ditzaten.

61. artikulua. Sexu jazarpena eta sexuagatiko jazarpena.

Enpresak sexu jazarpena eta sexuagatiko jazarpena galarazten dituzten lan baldintzak sustatuko ditu, eta berariazko prozedurak ezarriko ditu haiek prebenitzeko, eta haiek jasan dituztenen salaketak edo erreklamazioak bideratzeko.

Xede horrekin, langileen ordezkariekin negoziatu beharko diren neurriak ezartzen ahalko dira, hala nola jardunbide egokien kodeak egin eta zabaltzea, informazio kanpainak gauzatzea edo prestakuntza ekintzak gauzatzea.

Langileen ordezkariei dagokie lanean sexu jazarpenari eta sexuarengatiko jazarpenari aurrea hartzen laguntzea, langileak horretaz jabearaziz, eta enpresa zuzendaritzari informazioa emanez, baldin jazarpen hori ekartzen ahal duten portaerak edo jokabideak ezagutzen badituzte.

XVI. KAPITULUA.–XEDAPEN GEHIGARRIAK

Lehendabizikoa.–Batzorde Paritarioa.

Hitzarmen kolektibo hau aplikatzerakoan interpretazioari buruz sortzen ahal diren arazoak edo gatazkak ebazteko, batzorde paritario bat sortzea adostu dute bi alderdiek. Alderdietako edozeinek egiten ahalko du bilerarako deia, eta hurrengo hamabost eguneko epean bildu beharko da batzordea. Batzorde Paritarioak bina kide izanen ditu hitzarmena sinatu duten alderdien aldetik, hau da, enpresaren aldetik eta langileen aldetik. Beharrezkoak diren bilerak egin ondotik, Batzordeak erabaki bat hartuko du lehenbiziko bilera egin eta gehienez hamabost eguneko epean. Alderdien arteko akordiorik ez badago, bitartekaritzara joko da, hasiera batean, eta hala ere adostasunik lortzen ez bada, Nafarroako Lan Auzitegiaren arbitrajearen mende uzten ahal da, alderdi bakoitzak onartu ondoren, eta horren ebazpena nahitaez bete beharrekoa izanen da.

Besteak beste, Batzorde Paritarioa prestakuntza kudeatzeaz arduratuko da eta prestakuntza hori eginen duen zentroa aukeratzeaz. Prestakuntza emailea aukeratzeko, irizpide ekonomikoak eta antolaketakoak erabiliko dira.

Bigarrena.–Bezeroarentzako arreta eta zerbitzuaren kalitatea.

Bi alderdiek aitortzen dute enpresak eskaerei puntualki arreta emateko duen betebeharra; izan ere, gasolindegi, zentro ofizial, ospitale, eskola, urbanizazio, enpresa eta abarrekoak hornitzeko banatzaile ofiziala da, Repsolena PGLaren hornidurarako eta Air Liquide SArena aireko gasen banaketarako. Gure bezeroarekin ditugun kontratuko baldintzak ez betetzearen ondorioa kaltegarria denez gero, enplegatu guztiek hartzen dute konpromisoa ustekabeko urgentzietan eta lana metatzen denean arduraz eta arretaz hornitzen ahalegintzeko, kasu hauetan: a) Baldintza klimatologiko txarren ondoriozko eskaera pilaketa; b) Gasolindegien eskaera, zubi edo/eta oporretako sarrera eta irteeretan; c) Beste lankideen bajak, haiek ordeztu arte; d) Ezinbestekoak, eta e) Beste edozein inguruabar, puntualki erantzun behar dena Repsolen beharra dela eta.

Hirugarrena.

Enpresaren jarduera nagusia Repsol Butano SAri eta Air Liquide SAri zerbitzuak ematea da, kontratuak lehiaketa bidez esleiturik. Kontuan hartuta Repsol Butano SAren eta Air Liquide SAren gaur egungo jokabidea, prezioak eta kostuak murriztekoa, eta enpresa hornitzaile guztiei aplikatzen dieten prezio politika oldarkorra, Transmol Logística SLUn gaur egungo esleipen maila mantentzeko, beharrezkoa izanen da langileen kostuak deskribatu den egoera berri horretara moldatzea. Beraz, bi alderdiek adosten dute Repsol Butano SArekiko eta Air Liquide SArekiko kontratuen esleipena lortzeko langileen kostuak doitu behar badira, gaur egungo hitzarmena ez aplikatzea itunduko dela arrazoi ekonomikoak, antolaketakoak, teknikoak eta produkziokoak gertatzen direnean, Langileen Estatutuaren 82. artikuluan ezarritakoaren arabera. Klausula hori aplikatzeko, hurrengo prozedura abiatuko da, lan baldintzak ez aplikatzeko sortzen ahal diren desadostasunak eraginkortasunez konpontzeko.

Hitzarmen kolektiboa negoziatzeko legitimatuta dauden langileen ordezkarien eta enpresaren artean adostuta uzten ahal da aplikatu gabe hitzarmen kolektibo hau, Langileen Estatutuaren 87.1 artikuluan aurreikusitakoaren arabera, arau horren beraren 82.3 artikuluan ezartzen den moduan, arrazoi ekonomikoak, teknikoak, antolaketakoak edo produkziokoak daudenean eta kontsultaldi bat egin ondoren Langileen Estatutuaren 41.4 artikuluan adierazitako moduan.

Hitzarmena ez aplikatzeko lortzen ahal den akordioa ez da luzatzen ahalko enpresarekin egindako beste hitzarmen bat aplikatzen denetik aurrera.

Kontsultaldian adostasunik lortu ezean, alderdiek Estatuko edo autonomia erkidegoko lanbide arteko akordioetan ezarritako prozeduretara jo beharko dute (Langileen Estatutuaren 83. artikuluan aurreikusiak) aipatutako akordioen negoziazioan sortzen diren auziak eraginkortasunez konpontzeko, eta horren barrenean sartzen da sortzen diren auziak, lehenbizi, arbitraje lotzaile baten menpe jartzeko konpromisoa. Kasu horretan, arbitraje laudoak kontsultaldian hartutako akordioen eraginkortasun berbera izanen du, eta haren aurka jotzeko Langileen Estatutuaren 91. artikuluan ezarritako arrazoiak eta prozedura baliatu beharko dira.

Aurreko paragrafoetan aipatzen diren prozeduren emaitza baldin bada lan baldintzak ez aplikatzea, lan arloko agintaritzari horren berri eman beharko zaio, gordailua egin dezan, besterik ez.

Laugarrena.

Enpresaren eta langileen arteko komunikazio sistema une bakoitzean enpresak eskura jartzen duena izanen da. Egungo sistema posta elektroniko korporatiboa da, eta langile guztiek izanen dituzte sistema hori erabili ahal izateko aplikazio informatikoak. Sistema horren bidez bidaliko dira, besteak beste, nominak, medikuaren baja-agiriak, eta baimenen eskaerak eta frogagiriak.

Bosgarrena.

Bi alderdiek adostu dute mugimenduko langileen lanaldiaren erregistroa takografoaren diskoa izanen dela, hitzarmen kolektibo honen 14. eta 15. artikuluetan ezarritako irizpideekin.

Langile ez mugikorrentzat, lan orduak erregistratzeko sistema Visualtime softwarea izanen da, jada enpresan ezarrita dagoena. Langileak egunero sarrera eta irteera erregistratu beharko ditu, bai eta atsedenaldi eta etenaldiak ere (besteak beste, bazkaltzeko denbora eta atseden denborak).

I. ERANSKINA.–TRANSMOL LOGÍSTICA SLUREN SOLDATA TAULAK 2025. URTEKO SOLDATA TAULA

BALDINTZA EKONOMIKO ALDAKORRAK 2025. URTERAKO

Lanpostukoak:

Arriskuaren eta nekagarritasunaren plusa (ADR): 50,00 euro gordin hilean.

Orga gidariaren plusa (zezen mekanikoa): 0,00 euro gordin hilean.

Prestakuntza ordua: 14,3147 euro gordin prestakuntza orduko.

Egun sindikala: 48,00 euro gordin egun sindikaleko.

Lanaren kantitatea edo kalitatea:

1. PGLa banatzeko eta anezkako jarduera (bezeroa: Repsol Butano SA).

Jardueraren prima.

PGL tona Espainian: 3,416 euro gordin/tona.

Tonak / lan egindako lanaldia: 2,72 tona lan egindako lanaldi bakoitzeko.

PGL tona Frantzian: 12,82 euro gordin/tona.

Guardia egiteko prestasuna astelehenetik igandera, jaiegunak kenduta: 13 euro gordin guardia eguneko.

Guardia egiteko prestasuna igande ez diren jaiegunetan: 22,40 euro guardia eguneko.

Presako zerbitzua: 53,6817 euro gordin.

Larunbatak: 115,816 euro gordin lan egindako larunbat bakoitzeko.

Igandeak eta jaiegunak: 159,8122 euro gordin lan egindako igande jaiegun bakoitzeko.

Larunbata desplazatuta eta arduerarik gabe: 80,00 euro gordin jarduerarik gabeko larunbat bakoitzeko.

Igandea desplazatuta eta arduerarik gabe: 100,00 euro gordin jarduerarik gabeko igande bakoitzeko.

Hustuketak: 4,7712 orduko.

Hustuketa bidaia: 15,00 euro gordin hustuketa bidaia bakoitzeko.

Mugikortasuna botilategi jardueran: 0,00 euro lan egindako egun bakoitzeko.

Mugikortasuna VRAC/betunen edo antzekoen jarduera: 8,4448 euro gordin lan egindako egun bakoitzeko.

Mugikortasuna betunen jardueran: 15,0000 euro gordin lan egindako egun bakoitzeko.

2. Botilategi jarduera (bezeroa: Air Liquide SA).

Kilometraje plusa: 0,0245 euro gordin egindako kilometro bakoitzeko.

Kilometroko frankizia: 215,00 (eguneko kilometro kopurua).

Deskarga plusa: 0,2461 euro gordin egindako deskarga bakoitzeko.

Deskarga frankizia: 6,87 (eguneko deskarga kopurua).

Larunbatak: 115,8060 euro gordin lan egindako larunbat bakoitzeko.

Igandeak eta jaiegunak: 159,8122 euro gordin lan egindako igande jaiegun bakoitzeko.

Larunbat desplazatua, jarduerarik gabe: 80,00 euro gordin jarduerarik gabeko larunbat bakoitzeko.

Igande desplazatua, jarduerarik gabe: 100,00 euro gordin jarduerarik gabeko igande bakoitzeko.

Mugikortasuna PGL jardueran: 3,00 euro gordin PGL jardueran lan egindako egun bakoitzeko.

Mugikortasuna VRAC/betunen edo antzeko jardueretan: 3,00 euro gordin VRAC/betun edo antzeko jardueretan lan egindako egun bakoitzeko.

Mugikortasuna betunen jardueran: 15,00 euro gordin betunen jardueran lan egindako egun bakoitzeko.

3. VRAC jarduera (bezeroa: Air Liquide SA).

Kilometraje plusa: 0,02390 euro gordin egindako kilometro bakoitzeko.

Ibilgailu artikulatuen eguneko kilometro frankizia: 258 (egunean egindako kilometro kopurua).

Ibilgailu zurrunen eguneko kilometro frankizia: 157 (egunean egindako kilometro kopurua).

Deskarga plusa: 2,5990 euro gordin egindako deskarga bakoitzeko.

Ibilgailu artikulatuen eguneko deskarga frankizia: 1,0000 (egunean egindako deskarga kopurua).

Eguneko deskarga frankizia: 2,0000 (egunean egindako deskarga kopurua).

VRAC prima (oinarrizko soldataren barruan xurgatua): 0,00 euro (oinarrizko soldataren barruan xurgatua).

Larunbatak: 115,8060 euro gordin lan egindako larunbat bakoitzeko.

Igandeak eta jaiegunak: 159,8122 euro gordin lan egindako igande jaiegun bakoitzeko.

Larunbata desplazatuta eta arduerarik gabe: 80,00 euro gordin jarduerarik gabeko larunbat bakoitzeko.

Igandea desplazatuta eta arduerarik gabe: 100,00 euro gordin jarduerarik gabeko igande bakoitzeko.

Air Liquidek eskatutako lan berezien plusa: 20,8451 euro gordin lan bereziko egun bakoitzeko.

Mugikortasuna PGL jardueran: 8,1988 euro gordin PGL jardueran lan egindako egun bakoitzeko.

Mugikortasuna betunen edo antzekoen jardueran: 15,0000 euro gordin betunen edo antzekoen jardueran lan egindako egun bakoitzeko.

Mugikortasuna botilategi jardueran: 0,00 euro gordin betunen edo antzekoen jardueran lan egindako egun bakoitzeko.

4. Goi-mailako langileak, administrariak eta tailerrekoak.

Telefonoko guardia: 73,0129 euro gordin guardia asteko.

Presatasun plusa: 165,5026 euro gordin hilean.

Larunbatak: 152,0962 euro gordin lan egindako larunbat bakoitzeko.

Igandeak eta jaiegunak: 152,0962 euro gordin lan egindako igande edo jaiegun bakoitzeko.

Dieten zenbatekoaren berrikuspena 2025. urterako.

Mugimenduko eta laguntza zerbitzuetako langileentzat:

–Gaurik eman badu: 62,55 euro, edo, gaua nazioartekoa bada, 80,18 euro.

–Gaurik eman ez badu: 20,00 euro, edo, nazioarteko joan-etorria izan bada, 43,13 euro.

b) Kamioiaren kabinan gaua igarotzea: 21,47 euro.

Goi-mailako langile, teknikari eta administrazioko langileentzat:

a) Bazkari edo afariagatik: 14,3360 euro.

b) Gaua emateagatik eta gosariagatik: 53,7601 euro.

Langileak ez du deus sorraraziko, enpresak gastuak dirutan konpentsatzen baditu, ordainagiria aurkeztuta.

Iragarkiaren kodea: F2507203