Iragarkia

113. ALDIZKARIA - 2025eko ekainaren 6a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

137E/2025 EBAZPENA, maiatzaren 12koa, Telekomunikazioetako eta Digitalizazioko zuzendari nagusiak emana, zeinaren bidez onesten baita "Zaurgarritasun egoeran dauden herritarrei banda zabaleko zerbitzuak izateko laguntzak ematea (Conect@ bonua)" dirulaguntzaren deialdia. DDBN identifikazioa: 832936.

Eraldaketa digital inklusiboa da Telekomunikazioetako eta Digitalizazioko Zuzendaritza Nagusiaren ardatz estrategikoetako bat. Esparru horretan, beharrezkotzat jo da zaurgarritasun egoeran dauden pertsonei zuzendutako laguntza-lerro bat ezartzea, etxean banda zabaleko Interneteko zerbitzuetarako sarbidea errazteko.

Jarduketa honen helburua da Nafarroako Foru Komunitatean arrakala digitala murriztea, Interneterako konexioaren fakturen kosturako dirulaguntza partziala emanez. Operadorea eta teknologia aukeratzea interesdunen esku egonen da.

Horrenbestez, indarra duen legerian ezarritakoarekin bat, eta Unibertsitateko, Berrikuntzako eta Eraldaketa Digitaleko Departamentuaren egitura organikoa ezartzen duen azaroaren 15eko 252/2023 Foru Dekretuaren lehenengo xedapen gehigarriaren bidez eman dizkidaten eskudantziak erabiliz,

EBAZTEN DUT:

1. Onestea zaurgarritasun egoeran dauden herritarrei banda zabaleko zerbitzuak izateko dirulaguntzak emateko deialdia (Conect@ bonua).

2. Dirulaguntza emateko oinarri arautzaileak onestea. Ebazpen honen eranskinean bildu dira.

3. Deialdi honen konpromisoei aurre egiteko, jarraian adierazten diren aurrekontu-kredituak baimentzen dira; hala ere, aldaketak egiten ahalko dira, jasotzen diren eskaerak kontuan hartuta:

4. Ebazpen hau eta eranskina Nafarroako Aldizkari Ofizialean argitaratzea.

5. Ebazpen honek ez du administrazio bidea akitzen, eta haren aurka gora jotzeko errekurtsoa paratzen ahalko da, Unibertsitateko, Berrikuntzako eta Eraldaketa Digitaleko kontseilariari zuzendua, hilabeteko epean, argitaratu eta biharamunetik hasita. Administrazio publikoek administrazioarekiko auzi-errekurtsoa jartzen ahal dute jurisdikzio-ordena eskudunari zuzendua, ebazpen hau jakinarazi eta biharamunetik hasita bi hilabeteko epean, hori guztia Nafarroako Gobernuan aurretiazko errekerimendua egiten ahal dela ukatu gabe, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako modu eta epeetan.

Iruñean, 2024ko maiatzaren 12an.–Telekomunikazioetako eta Digitalizazioko zuzendari nagusia, José Antonio Vizcay Urrutia.

ERANSKINA.–OINARRI ARAUTZAILEAK

1. oinarria.–Xedea.

Oinarri hauen xedea da egoera zaurgarrian dauden pertsonei laguntzak ematea arautzea, etxean banda zabaleko Interneteko zerbitzuak izan ditzaten. Hilean diru-kopuru finko bat emanen zaie, Interneteko konexioaren fakturen zati bat ordaintzen laguntzeko, eta onuradunek aukeratzen ahalko dute bai enpresa hornitzailea bai teknologia (zuntz optikoa, 5G, etab.).

Laguntza horien helburu estrategiko nagusia da arrakala digitala murriztea eta inklusio digitala sustatzea, pertsona eta familia zaurgarriek banda zabaleko zerbitzuak dituztela bermatuz.

2. oinarria.–Onuradunek bete beharreko baldintzak.

Laguntza hauen onuradunek baldintza hauek bete beharko dituzte:

1. Gutxieneko errenta bermatuaren onuraduna izatea.

2. Diruz lagunduko den banda zabaleko lineak eskatzailearen izenean egon behar du eta Nafarroako Foru Komunitateko helbide batean kokatuta.

3. Nafarroan erroldatuta egotea.

4. Gizarte Segurantzarekiko ordainketak egunean izatea.

5. Zerga-betebeharrak egunean izatea.

3. oinarria.–Laguntzaren zenbatekoa.

Laguntzaren zenbatekoa 20 eurokoa izanen da, eta Interneteko konexioaren hileko faktura bakoitzeko emanen da, 2025eko urtarrilaren 1etik 2025eko azaroaren 30era bitartean jasotako zerbitzuengatik.

Laguntza honetarako, 100.000 euro bideratu dira guztira. Eskaerak iristen diren ordenaren arabera emanen dira laguntzak, eskuragai dauden funtsak agortu arte.

4. oinarria.–Gastu diruz lagungarriak.

Diruz laguntzen ahalko dira etxean banda zabaleko Interneteko zerbitzuak izateko telekomunikazioko enpresek eskatzaileari jasanarazitako fakturak.

Faktura diruz lagungarriek irizpide orokor hauek bete beharko dituzte:

–2025ean erabilitako zerbitzuak izatea, 2025eko urtarrilaren 1etik azaroaren 30era bitarteko aldiaren barruan.

–Banda zabaleko konexioa hilean 20 eurokoa edo gehiagokoa izatea.

–Ez da beharrezkoa fakturak ondoz ondokoak izatea.

5. oinarria.–Eskaera aurkezteko epeak eta modua.

Eskaerak deialdi hau Nafarroako Aldizkari Ofizialean argitaratu eta hurrengo egunetik aurrera aurkezten ahalko dira, eta irekita egonen dira funts erabilgarriak agortu arte. Eskaerak aurkezteko azken eguna 2025eko irailaren 30a izanen da.

Eskaerak, ahal dela, Nafarroako Gobernuaren Erregistro Elektronikoaren bidez aurkeztu beharko dira, helbide honetan: www.navarra.es, edo Administrazio Publikoen Administrazio Prozedura Erkidearen urriaren 1eko 39/2015 Legean ezarritako edozein tokitan.

Dirulaguntza eskatzeak berarekin dakar deialdi hau arautzen duten oinarriak onartzea.

6. oinarria.–Aurkeztu beharreko dokumentazioa.

Eskatzaileek honako hauek aurkeztu beharko dituzte:

–Nahitaez aurkeztu beharreko agiriak:

• Eskaera-orria, behar bezala betea.
• Gutxieneko errenta bermatuaren onuraduna dela ziurtatzen duen agiria.
• Banda zabalera konektatzeko kontratua (operadorea edozein dela ere).

–Bestelako agiriak:

• Dirulaguntza eskaera aurkeztearekin batera, eskatzaileak baimena ematen dio dirulaguntzak ematen dituen organoari zuzenean egiazta dezan Nafarroan erroldatuta dagoela eta zerga betebeharrak eta Gizarte Segurantzarekikoak egunean dituela, ziurtagiri telematikoen bidez. Beraz, kasu horretan, eskatzaileak ez du egiaztagiri hori aurkeztu beharko. Dena dela, eskatzaileak berariaz uko egiten ahal dio baimen hori emateari, eta, kasu horretan, errolda-ziurtagiria eta aipatutako betebeharretan egunean dagoela adierazten duten ziurtagiriak aurkeztu beharko ditu:
  • Ziurtagiri bat, Nafarroako Ogasunarekiko ordainketak egunean dituela dioena.
  • Ziurtagiri eguneratua, Gizarte Segurantzako betebeharrak egunean dituela dioena.

7. oinarria.–Instrukzioa eta tramitazioa.

Instrukzioa eta tramitazioa Telekomunikazioetako eta Digitalizazioko Zuzendaritza Nagusiaren Aurrerapen Digitalerako Zerbitzuari dagokio. Horrek ebaluatuko ditu eskaerak, oinarriotan ezarritako irizpideei jarraituz, eta organo eskudunari ebazpen proposamena igorriko dio, non adieraziko baita onuradunek conect@ bonua eskuratzeko betebehar guztiak betetzen dituztela.

Eskaerak banakako ebaluazioaren bidez izapidetuko dira, iritsi diren hurrenkeran eta aurrekontu erabilgarria agortu arte.

Aurkeztutako dokumentazioak ez baditu Administrazio Publikoen Administrazio Prozedura Erkideari buruzko urriaren 1eko 39/2015 Legearen 66. artikuluko betebeharrak betetzen, Aurrerapen Digitalerako Zerbitzuak interesdunari eskatuko dio 10 egun balioduneko epean zuzentzeko, eta ohartaraziko dio, hala egin ezean, eskaera bertan behera uzten duela ulertuko dela eta espedientea artxibatzeko ebazpena emanen dela, APAPELen 68. artikuluan ezarritakoaren arabera.

Aurrerapen Digitalerako Zerbitzuak helaraziko dio ebazpen proposamena ebazteko eskumena duen organoari.

Conect@ bonuaren dirulaguntzak ebazteko organo eskuduna Telekomunikazioetako eta Digitalizazioko zuzendari nagusia izanen da.

Ebazpena arrazoitua izanen da, eta eskatzaileei eman eta jakinarazteko gehieneko epea sei hilabetekoa izanen da, eskaera aurkezten den egunetik hasita. Epe horretan eskatzaileari berariazko ebazpena jakinarazi ezean, eskaera ezetsitzat joko da.

Berariazko edo presuntziozko ezespenarekin, interesdunek zilegi izanen dute gora jotzeko errekurtsoa jartzea, Unibertsitateko, Berrikuntzako eta Eraldaketa Digitaleko kontseilariari zuzendua, Administrazio Prozedura Erkideari buruzko legediari jarraikiz, hilabeteko epean, jakinarazpena egin eta hurrengo egunetik zenbatzen hasita.

8. oinarria.–Diruz lagundutako jarduketa justifikatzea.

Onuradunek dirulaguntza emateko ebazpena jakinarazten denetik azaroaren 30era arte justifikatu beharko dute jarduketa, eta justifikazio fakturak bidalketa bakarrean aurkeztuko dituzte.

Fakturak telematikoki aurkeztu beharko dira, Nafarroako Gobernuaren atariko (www.navarra.es) izapideen katalogoko fitxa egokiaren bidez (aurrerantzean, laguntzaren fitxa) edo Administrazio Publikoen Administrazio Prozedura Erkidearen urriaren 1eko 39/2015 Legean ezarritako edozein tokitan.

Justifikazioa bidalketa bakarrean egin beharko da, funtsen esleipena errazteko eta ordainketen izapidetzea arintzeko.

Ez da onartuko ezarritako epetik kanpo bidalitako fakturarik, ez eta bigarren edo ondorengo bidalketetan bidalitako fakturarik ere.

Laguntza justifikatzeko dokumentazioa apartatu honetan ezarritako epealdian aurkeztu ezean, laguntza kobratzeko eskubidea galduko da.

Egindako jarduketak justifikatzeko dokumentazioa aurkeztu eta aztertu ondoren, Aurrerapen Digitalerako Zerbitzuak Telekomunikazioetako eta Digitalizazioko Zuzendaritza Nagusiari helaraziko dio ordaintzeko ebazpen proposamena.

Dirulaguntza ordaintzeko ebazpena hilabeteko epean emanen da, justifikazioko frogagiriak aurkezten direnetik hasita.

9. oinarria.–Laguntzaren ordainketa.

Fakturak berrikusi ondoren, laguntza urteko ordainketa bakarrean ordainduko da, eta gehienez 220 euro emanen dira onuradun bakoitzeko.

10. oinarria.–Onuradunen betebeharrak.

Deialdi honetan araututako laguntzak eskatu eta jasotzen dituzten pertsonek Dirulaguntzei buruzko azaroaren 9ko 11/2005 Foru Legean ezarritako betebehar guztiak bete beharko dituzte. Gainera, laguntza ematen duen organoari jakinarazi beharko dizkiote laguntza jasotzea eragin duten/zuten baldintzen aldaketa oro, horiek gertatu eta 15 eguneko epean.

11. oinarria.–Ukatzeko arrazoiak.

Laguntza honako arrazoi hauengatik ukatzen ahalko da:

1. Ezarritako baldintzak ez betetzea.

2. Eskaerak edo justifikatzeko fakturak epez kanpo aurkeztea.

3. Funts erabilgarriak agortzea.

12. oinarria.–Aplikatu beharreko araudia.

Oinarri arautzaile hauetan ezarrita ez dagoen guztian, Dirulaguntzei buruzko azaroaren 9ko 11/2005 Foru Legearen xedapenak aplikatuko dira.

13. oinarria.–Oinarri arautzaileen aurka bidezko diren administrazio errekurtsoak.

Oinarri hauen eta garatzeko egintzen aurka gora jotzeko errekurtsoa aurkezten ahal da, Unibertsitateko, Berrikuntzako eta Eraldaketa Digitaleko kontseilariari zuzendua, hilabeteko epean, argitaratu edo jakinarazi eta biharamunetik aurrera, bat etorriz Administrazio Publikoen Administrazio Prozedura Erkidearen urriaren 1eko 39/2015 Legearekin eta martxoaren 11ko 11/2019 Foru Legearekin.

Iragarkiaren kodea: F2507259