93. ALDIZKARIA - 2024ko maiatzaren 7a

1. NAFARROAKO FORU KOMUNITATEA

1.7. BESTELAKOAK

954/2024 EBAZPENA, apirilaren 23koa, Nafarroako Unibertsitate Publikoko errektoreak emana. Haren bidez agintzen da argitara dadila "Erabakia, Nafarroako Unibertsitate Publikoan lotura iraunkorrik gabeko irakasleak kontratatzeko hautaketa-prozesuak arautzen dituena", Gobernu Kontseiluak 2024ko apirilaren 23an hartutako erabaki baten bidez onetsia.

Maiatzaren 12ko 110/2003 Foru Dekreturen bidez onetsitako Unibertsitateko Estatutuetako 40. artikuluak ematen dizkidan eskumenak erabiliz, agintzen dut argitaratzeko Gobernu Kontseiluak 2024ko apirilaren 23an hartutako erabakia, Nafarroako Unibertsitate Publikoan lotura iraunkorrik gabeko irakasleak kontratatzeko hautaketa-prozesuak arautzen dituena.

"ERABAKIA, NAFARROAKO UNIBERTSITATE PUBLIKOAN LOTURA IRAUNKORRIK GABEKO IRAKASLEAK KONTRATATZEKO HAUTAKETA-PROZESUEN ERREGELAMENDUA ONESTEN DUENA

Gobernu Kontseiluak, 2016ko irailaren 7an hartutako erabaki baten bidez, Nafarroako Unibertsitate Publikoan lotura iraunkorrik gabeko irakasleak kontratatzeko hautaketa-prozesuen erregelamendua onetsi zuen (Gobernu Kontseiluaren 2017ko martxoaren 27ko eta 2023ko apirilaren 25eko erabakien bidez aldatua).

2023ko apirilaren 12an sartu zen indarrean Unibertsitate Sistemaren Lege Organikoa (LOSU), lotura iraunkorrik gabeko irakasle batzuen funtsezko alderdiak aldatzen dituena. Horrenbestez, beharrezkoa da Nafarroako Unibertsitate Publikoaren barne araudia Espainiako araudira egokitzea.

Hori horrela, honako hau da Gobernu Kontseiluak, Irakasleen Gaietarako errektoreordeak proposatuta, 2024ko apirilaren 23an egindako bileran hartu duen,

ERABAKIA:

Lehenbizikoa.–Nafarroako Unibertsitate Publikoko lotura iraunkorrik gabeko irakasleak hautatzeko eta kontratatzeko prozesuak arautzen dituen Erregelamendua onestea, erabaki honen eranskinean jasotzen den bezala.

Bigarrena.–Erabaki hau aditzera ematea Irakasleen Gaietarako Errektoreordetzari, Giza Baliabideen Zerbitzuari eta Nafarroako Unibertsitate Publikoaren sailetako zuzendaritzei.

Hirugarrena.–Erregelamendu hau Nafarroako Aldizkari Ofizialean eta Nafarroako Unibertsitate Publikoaren iragarki ohol elektronikoan argitaratzea.

Laugarrena.–Nafarroako Aldizkari Ofizialean argitaratu eta biharamunean hartuko du indarra erregelamendu honek.

Bosgarrena.–Erabaki honen aurka zilegi da administrazioarekiko auzi-errekurtsoa aurkeztea ordena bereko epaitegietan, bi hilabeteko epean, Nafarroako Aldizkari Ofizialean argitaratu eta biharamunetik kontatzen hasita.

Iruñean, 2024ko apirilaren 23an.–Errektorea, Ramón Gonzalo García.

ERANSKINA.–ERREGELAMENDUA, NAFARROAKO UNIBERTSITATE PUBLIKOAN LOTURA IRAUNKORRIK GABEKO IRAKASLEAK KONTRATATZEKO HAUTAKETA-PROZESUAK ARAUTZEN DITUENA

I. TITULUA.–XEDAPEN OROKORRAK

1. artikulua. Xedea eta araubide juridikoa.

1.–Erregelamendu honen xedea hau da: Unibertsitate Sistemari buruzko martxoaren 22ko 2/2023 Lege Organikoaren 78., 79., 83. eta 84. artikuluetan araututako modalitateetako irakasleak hautatzeko eta kontratatzeko prozesua arautzea.

Era berean, osasun laguntzako irakasle elkartuen hautaketa eta kontratazioa arautzen dira –1986ko apirilaren 25eko Osasunari buruzko 14/1986ko Lege Orokorraren 105. artikuluan agertzen da figura hori–, barne hartuta Nafarroako Unibertsitate Publikoak eta Nafarroako Gobernuko Osasun Departamentuak unibertsitateko ikerkuntzan eta irakaskuntzan elkarlanean aritzeko duten hitzarmenaren aplikazio-eremua ere –hitzarmena 1986ko ekainaren 28ko 1558/1986 Errege Dekretuaren babesean sinatu zen, zeinak unibertsitateen eta osasunaren arloko erakundeen arteko hitzarmen-araubideetarako oinarri orokorrak ezartzen baititu–.

2.–Hautaketa-prozesu horiek egiteko arauen esparrua Unibertsitate Sistemari buruzko 2/2023 Lege Organikoa (LOSU, 2023ko martxoaren 22koa), Nafarroako Unibertsitate Publikoaren Estatutuak eta Nafarroako Foru Komunitateak gaiari buruz ezarritakoa izanen dira.

2. artikulua. Printzipioak.

Erregelamendu honetan araututako hautaketa-prozesuek berdintasun-, merezimendu-, gaitasun-, publizitate- eta lehia-printzipioak bermatuko dituzte, bai eta unibertsitatearen beraren aurrean errekurtsoa jartzeko aukera ere. Hautapen batzordeen osaerak ere objektibotasun-, inpartzialtasun-, neutraltasun-, gardentasun- eta kualifikazio-printzipioak bermatu behar ditu.

3. artikulua. Hautaketa-prozesuen kudeaketa.

Giza Baliabideen Zerbitzuak du erregelamendu honetan aurreikusitako hautaketa-prozedurak tramitatzeko eskumena, galarazi gabe arlo horretan beste organo batzuei berariaz esleitutako eskumenak. Halaber, Giza Baliabideen Zerbitzuak kudeatuko ditu deialdiak, kontratazioak eta kontratazio prozesuarekin lotutako beste edozein gorabehera.

4. artikulua. Lanpostuen atxikipena.

Arau honetan xedatuak dauden irakasle lanpostu bakoitza Nafarroako Unibertsitate Publikoaren jakintza-arloetako bati atxikiko zaio.

5. artikulua. Bateraezintasunak.

Kontratutako irakasleek 53/1984 Legean, Administrazio Publikoen Zerbitzuko Langileen Bateraezintasun Araubidean (1984ko abenduaren 26koa), eta hura garatzen duten xedapenetan ezarritakoa bete behar dute.

II. TITULUA.–LEHIAKETA-PROZEDURA ARRUNTA

I. KAPITULUA.–DEIALDIA

6. artikulua. Lanpostuen zehaztapena eta atxikipena.

Irakasle laguntzaile doktoreak, irakasle elkartuak eta osasun laguntzako irakasle elkartuak lehiaketa publikoaren bidez hautatuko dira, irakasleen gaietan eskumena duen organoak ebazpen baten bidez horretarako deialdia eginda, Unibertsitatearen irakaskuntzako eta ikerkuntzako beharrei erantzuteko eta dagokion sailari entzun eta gero; osasun laguntzako irakasle elkartuak hautatzeko, gorago adierazitakoaz gainera, Nafarroako Unibertsitate Publikoak eta Nafarroako Gobernuaren Osasun Departamentuak sinatutako hitzarmenaren babesean sortutako Batzorde Mistoari ere entzunen zaio –erregelamendu honen 1. artikuluan aipatzen da hitzarmen hori–.

Era berean, kontratazioko deialdi arrunten edukia prestatu aurretik, Enpresa Batzordeari eta Irakasle eta Ikertzaileen Batzordeari informazioa emanen zaio, eta haren iritzia entzunen da.

7. artikulua. Deialdien publizitatea.

1.–Lehiaketetarako deialdiak Nafarroako Unibertsitate Publikoaren iragarki ohol elektroniko ofizialean argitaratuko dira.

2.–Unibertsitate Sistemari buruzko 2023ko martxoaren 22ko 2/2023 Lege Organikoaren 86.1 artikuluaren arabera, deialdiak behar besteko aurrerapenaz jakinaraziko zaizkio Unibertsitateen Ministerioko irakasle eta ikertzaileentzako lehiaketen erregistro publikoari.

8. artikulua. Deialdien edukia.

Erregelamendu honek arautuko ditu deialdiak eta haien oinarriak eta, aurreikusi gabeko alderdietan, administrazio prozeduraren arloko araudi orokorrak.

Deialdietan, honako datu hauek jasoko dira gutxienez:

a) Zer zenbaki eta kategoria duten deialdiko lanpostuek, bai eta nolako arduraldia izanen duten ere.

b) Zein jakintza-arlori atxikitzen zaion lanpostu bakoitza.

c) Zer espezialitatekoak diren lanpostuak: jakintza-espezialitate bat izan behar dute esleitua lehiaketara deitutako lanpostuek, horretarako ezarritako zerrendako espezialitateetako bat alegia. Lanpostuen profila finkatzean, ezin izanen da espezialitatea baino gehiago zehaztu. Irakasle elkartuen kasuan, aldiz, jakintzagaiaren edo irakasgaiaren araberako profilak esleitzen ahalko zaizkie lanpostuei. Osasun laguntzako irakasle elkartuei dagokienez, gainera, Batzorde Mistoaren iritziaren arabera ezartzen ahalko dira lanpostuen profilak.

d) Kontratu mota.

e) Parte hartzeko eskabide eredua eta zer dokumentazio aurkeztu behar den.

f) Izangaiek zer baldintza eta eskakizun bete behar dituzten lanpostuan aritzeko.

g) Beharrezkoa baldin bada, lanpostuak zer hizkuntza-eskakizun duen.

h) Nork osatzen duen sarbide lehiaketa ebatziko duen batzordea.

i) Eskaerak aurkezteko forma eta epea.

j) Zer organori zuzendu behar zaizkion eskaerak.

k) Zein diren lehiaketaren epeak, zehaztapenak eta garapen faseak.

l) Zer balorazio irizpide erabiliko diren.

m) Zer errekurtso aurkezten ahal diren.

Ezin izanen da inolaz ere izangaien prestakuntzari buruzko orientabiderik eman, edo funtzio publikoan sartzeko berdintasun-, merezimendu- eta gaitasun-printzipioak urratzen dituen beste zeinahi orientabide, edota legeek aitortutako eskubideei mugak ezartzen dizkien edozein.

II. KAPITULUA.–IZANGAIEN BALDINTZAK, ESKAERAK ETA ONARPENA

9. artikulua. Baldintzak betetzea.

Kasuan kasuko oinarrietan ezarritako eskaerak aurkezteko epea bukatzen den egunean bete behar dira deialdi bakoitzean ezarritako baldintzak, bai eta kontratuak dirauen bitartean ere.

10. artikulua. Parte hartzeko baldintza orokorrak.

1.–Nafarroako Unibertsitate Publikoak deitutako lehiaketetan parte hartzeko onartuak izateko, izangaiek honako baldintza hauek bete behar dituzte:

a) 16 urte baino gehiago izatea, eta erretiro adina betea ez izatea.

b) Deialdiko xede diren lanpostuak betetzea galarazten duen gaixotasunik edo muga fisikorik edo psikikorik ez edukitzea.

c) Ez egotea baztertua edozein administrazio publikotako zerbitzutik diziplina-espediente bat dela kausa, ez egotea ezgaitua funtzio publikoak betetzeko, eta ez edukitzea irakaskuntzarekin bateraezina den kargu edo funtzioren bat. Espainiako nazionalitatea ez duten izangaien kasuan, baldintza hau betetzeko beharrezkoa izanen da norberaren Estatuan funtzio publikora sartzea galarazten duen diziplina-zehapen edo kondena penalik ez edukitzea.

d) Lehiaketaren xede den lanpostuan eskatzen diren hizkuntza-ezagutzak edukitzea.

e) Izangaiak Europar Batasunekoak ez badira, Espainian legez bizitzea. Espainian bizi ez diren atzerritarrek ere parte hartzeko aukera izanen dute, betiere parte hartzeko baldintzak betetzen badituzte. Kasu horretan, atzerritarrei buruzko legeek eskatzen dituzten baimenak lortu beharko dituzte kontratazioa egin ahal izateko.

11. artikulua. Parte hartzeko baldintza espezifikoak.

1. Nafarroako Unibertsitate Publikoak deitutako lehiaketetan parte hartzeko onartuak izateko, kategoria bakoitzaren baldintza espezifikoak bete behar dituzte izangaiek eta, batik bat, lehiaketa bakoitzean eskatzen den titulu akademikoa eduki behar dute. Europar Batasunetik kanpo lortu badituzte tituluak, homologazioaren egiaztagiria edo baliokidetasun adierazpena eduki behar dute. Halakorik izan ezean, izangaiak kontratua sinatzen den unean lortu beharko du.

2.–Lanpostu kategorien baldintza espezifikoak:

a) Irakasle laguntzaile doktoreen lanpostuak: Doktore titulua.

Unibertsitateei buruzko 6/2001 Lege Organikoan (LOU) edo aurreko sistema juridikoetan irakasle laguntzaile doktore izateko ezarritako kontratuaren gehieneko iraupen epea agortu duten lehiakideek ezin izanen dute beste kontratu bat formalizatu artikulu honetan araututako irakasle laguntzaile doktorearen figuran –figura hori Unibertsitate Sistemari buruzko 2023ko martxoaren 22ko 2/2023 Lege Organikoaren 78. artikuluan dago arautua–.

b) Irakasle elkartuen lanpostuak:

b.1) Irakasle elkartuaren kategoria bakoitzerako eskatzen den gutxieneko titulazio akademiko ofiziala:

1. motako irakasle elkartua: gradua, ingeniaritza teknikoa, diplomatura, arkitektura teknikoa edo hezkuntza alorrean eskuduna den ministerioak ezarri duenaren arabera, Goi Mailako Hezkuntzako Kualifikazioen Espainiako Esparruko (MECES) 2. mailari (graduari) dagozkion titulazioak. Eskatutako titulazioarekin bat etorriz, 1. motako irakasle elkartuek graduko ikasketetan soilik irakasten ahalko dute (MECES, 2. maila).

2. motako irakasle elkartua: masterra, goi mailako ingeniaritza, lizentziatura, goi mailako arkitektura edo hezkuntza alorrean eskuduna den ministerioak ezarri duenaren arabera, Goi Mailako Hezkuntzako Kualifikazioen Espainiako Esparruko (MECES) 3. mailari (graduari) dagozkion titulazioak. 2. motako irakasle elkartuek graduko eta masterreko ikasketetan irakasten ahalko dute (MECES, 2. eta 3. mailak).

3. motako irakasle elkartua: Doktore titulua.

b.2) Lehiaketaren xede den lanpostuaren jarduerarekin lotutako jarduera profesional bat egitea unibertsitateko esparru akademikotik kanpo.

c) Osasun laguntzako irakasle elkartuen lanpostuak:

c.1) Irakasle elkartuaren kategoria bakoitzerako eskatzen den gutxieneko titulazio akademiko ofiziala:

Osasun laguntzako 1. motako irakasle elkartua: osasunaren adarreko titulazio unibertsitarioak, Hezkuntza alorrean eskuduna den ministerioak ezarri duenaren arabera Goi Mailako Hezkuntzako Kualifikazioen Espainiako Esparruko (MECES) 2. mailari (graduari) dagozkionak. Eskatutako titulazioarekin bat etorriz, 1. motako irakasle elkartuek graduko ikasketetan soilik irakasten ahalko dute (MECES, 2. maila).

Osasun laguntzako 2. motako irakasle elkartua: osasunaren adarreko titulazio unibertsitarioak, Hezkuntza alorrean eskuduna den ministerioak ezarri duenaren arabera Goi Mailako Hezkuntzako Kualifikazioen Espainiako Esparruko (MECES) 3. mailari (masterrari) dagozkionak. 2. motako irakasle elkartuek graduko eta masterreko ikasketetan irakasten ahalko dute (MECES, 2. eta 3. mailak).

Osasun laguntzako 3. motako irakasle elkartua: doktorea.

c.2) Osasunaren arloko jarduera batean lanean aritzea Nafarroako Unibertsitate Publikoak eta Nafarroako Gobernuaren Osasun Departamentuak sinatutako hitzarmenean ageri diren osasun zentro eta zerbitzuetako batean, hots, 2023ko uztailaren 27an sinatutako hitzarmenean edo erregelamendua aplikatzeko unean indarrean dagoen hitzarmenean.

12. artikulua. Parte hartzeko eskaerak.

1.–Lehiaketetan parte hartu nahi dutenek eskabidea bete eta NUPen egoitza elektronikoaren bidez aurkeztu behar dute, Nafarroako Unibertsitate Publikoko Giza Baliabideen Zerbitzuari zuzendua.

2.–Deialdiaren oinarrietan ezarritako moduan aurkeztuko dira eskaerak, administrazio prozedura erkideari dagozkion gaiei buruzko araudi orokorrak ezarritakoaren arabera. Hamar egun balioduneko epea egonen da eskaerak aurkezteko, deialdia argitaratu eta biharamunetik kontatzen hasita.

3.–Interesdunek eskabide bat aurkeztu beharko dute parte hartu nahi duten lanpostu bakoitzeko, eta, harekin batera, deialdian eskatzen diren baldintzak akreditatzen dituen dokumentazioa ere bai. Kategoria eta, hala badagokio, jakintza-arlo bera dituzten lanpostuetan, nahikoa izanen da dokumentazio bakarra aurkeztea.

4.–Hautapen Batzordeak prozesuaren edozein unetan eskatzen ahalko die izangaiei aurkeztutako dokumentuak benetakoak direla egiaztatzeko.

13. artikulua. Izangaiak onartzea.

1.–Eskaerak aurkezteko epea bukatuta, gehienez ere 10 eguneko epean, irakasleen gaietan eskumena duen organoak jendaurrean jarriko du, Unibertsitateko iragarki ohol elektroniko ofizialean, deitutako lanpostu bakoitzeko lehiaketan onartu eta baztertu diren izangaien behin-behineko zerrenda, baita baztertzeko arrazoiak ere, halakorik izan bada. Izangai bazterturik ez bada, zuzenean onetsiko da behin betiko zerrenda.

2.–Parte hartzeko baldintzak justifikatzen dituzten dokumentuak ez aurkezteagatik behin-behinean baztertzea galarazi gabe, ezin zuzendu daitezkeen baztertzeko arrazoiak izanen dira honako hauek: eskaera epez kanpo aurkeztea, lehiaketaren bidez lortu nahi den lanpostua betetzeko baldintzak ez betetzea eta irakaskuntza-proiektua edo ikerketa-proiektua ez aurkeztea deialdian adierazitako unean, hala eskatzen den lanpostuetan.

3.–Unibertsitateak merezimenduen egiaztagiriak telematikoki aurkezteko eskatuko die izangai guztiei, deialdian ezarritakoaren arabera.

Dokumentu horietako bat Curriculum Vitaea izanen da kasu guztietan, eredu normalizatuaren arabera egina. Curriculum vitaean adierazitako moduan ordenatu eta zenbakitu behar dira dokumentuak.

4.–Izangai baztertuek edo zerrendan azaldu ez direnek zilegi dute erreklamazioa egitea eta, akatsen bat badago, haiek zuzentzea behin-behineko zerrenda argitaratu eta hurrengo 5 egun balioduneko epean.

5.–Eskaerak osatzeko eta zuzentzeko epea bukaturik, Nafarroako Unibertsitate Publikoko iragarki ohol elektroniko ofizialean argitaratuko da lehiaketan onarturiko eta bazterturiko izangaien behin betiko zerrenda.

6.–Lehiaketako onartuen zerrendan egoteak ez du esan nahi, inolaz ere, Unibertsitateak aitortzen duenik izangaiek deialdiko oinarrietan eskatzen diren baldintza orokorrak edo espezifikoak betetzen dituztela. Kontratatzeko deitzen dituzten izangaien kasuan ziurtatu eta egiaztatu beharko dira horiek, egiaztagiri guztiak aurkeztu beharko baitituzte kontratua sinatzen dutenean.

7.–Epea bukaturik ez bada eskaerarik aurkeztu, izangai onarturik ez bada edo izangaiek lehiatzeari uko egiten badiote, irakasleen arloan eskumena duen organoak sailari jakinaraziko dio, eta arrazoi horregatik lanpostua hutsik gelditzen dela aldarrikatuko da.

III. KAPITULUA.–HAUTAPEN BATZORDEAK

14. artikulua. Hautapen batzordeen osaera eta izendapena.

1.–Hautapen batzordeek proposatuko dute zer irakasle kontratatu.

2.–Ezin zaio uko egin Hautapen Batzordeko kide izateari.

3.–Hautapen batzorde batek hautatuko ditu irakasle laguntzaile doktoreak. Batzorde hori hiru irakaslek eta haien ordezkoek osatuko dute. Zerbitzu aktiboan egon behar dute, eta lehiaketaren xede den lanpostuaren irakaskidego berekoak edo goragoko batekoak izan. Ahal dela, lanpostuaren jakintza-arlo berekoak izanen dira, edo antzeko beste arlo batzuetakoak, halakorik egonez gero, Nafarroako Unibertsitate Publikoan araututakoarekin bat etorriz. Hauek dira Hautapen Batzordeko hiru kideak:

a) Irakasleen gaietan eskumena duen errektoreordea edo hark eskuordetzen duen pertsona, zeina batzordeburua izanen baita.

b) Lotura iraunkorreko bi irakasle doktore, unibertsitate diferenteetakoak, eta haien ordezkoak, Gobernu Kontseiluak bi urte naturalerako izendatuak. Ezin dira izan Nafarroako Unibertsitate Publikoko irakasleak, eta zozketa publikoaren bidez aukeratuko dira ahal dela 15 laguneko zerrenda batetik, zeinak sailak proposatuko baititu, ahal dela G9 Taldeko unibertsitateekin lotura duten irakasleen artetik.

4.–Hautapen batzordeek hautatuko dituzte irakasle elkartuak, baita osasun laguntzako irakasle elkartuak ere. Batzorde hori Unibertsitatearekin lotura iraunkorra duten eta zerbitzu aktiboan dauden bost irakasle doktorek osatuko dute; zehazki, hauek:

a) Irakasleen gaietan eskumena duen errektoreordea edo hark eskuordetzen duen pertsona, zeina batzordeburua izanen baita.

b) Lanpostuari dagokion saileko zuzendaria edo hark eskuordetzen duen eta lotura iraunkorra duen irakasle doktorea. Saileko Kontseiluak bi ordezko izendatuko ditu.

c) Lotura iraunkorra duen irakasle doktore bat, lanpostuaren jakintza-arlokoa edo beste antzeko arlo batekoa, Saileko Kontseiluak izendatua, zeina idazkaria izanen baita. Saileko Kontseiluak bi ordezko izendatuko ditu.

d) Unibertsitatearekin lotura iraunkorra duten bi irakasle doktore, Gobernu Kontseiluak bi urte naturalerako izendatuak. Halaber, Gobernu Kontseiluak bi ordezko izendatuko ditu batzordekide bakoitzarentzat.

6.–Nafarroako Unibertsitate Publikoko kide anitzeko organoei buruzko araudiak arautuko du Hautapen Batzordea, eta, subsidiarioki, administrazio publikoetako kide anitzeko organoen funtzionamendua arautzen duen oinarrizko legeriak.

15. artikulua. Bermeak.

1.–Sarbide-lehiaketetan beti bermatuko dira izangaien aukera-berdintasuna, merezimendu eta gaitasun printzipioekiko errespetua, gizon eta emakumeen arteko tratu eta aukera berdintasunaren printzipioa eta diskriminaziorik eza zeinahi arrazoi sozial dela medio.

Era berean, desgaitasuna duten pertsonen aukera-berdintasuna bermatuko da, eta sarbide-lehiaketetan jarraitu beharreko prozeduran neurri egokiak hartuko dira haien beharretara egokitzeko.

2.–Sarbide-lehiaketak ebatziko dituzten batzordeetako kideen izendapenean gardentasuna eta objektibotasuna bermatzeko, Nafarroako Unibertsitate Publikoak jendaurrean jarriko du haien osaera.

3.–Hautatutako batzordekideek interes-gatazkaren bat edukiz gero, hura deklaratu, eta batzordeko kide izateari uko egin beharko diote. Interes-gatazkak batzordekidearen uko egitea ekarriko du izangairen bati buruzko inguruabar hauetakoren bat gertatzen bada:

–Azken sei urteetan batzordekidea eta izangaia argitalpenen edo patenteren bateko egilekideak izan badira.

–Batzordekideak eta izangaiak kontratu bidezko harremana izan badute edo ikerketa-proiektu edo -kontratu bateko ikerketa-talde berean aritu badira.

–Batzordekidea izangaiaren doktoretza-tesiaren zuzendaria izan bada, betiere doktoretza-tesi hori azken sei urteetan defendatu bada.

4.–Nolanahi ere, batzordekideek kide izateari uko egin beharko diote 2015eko urriaren 1eko 40/2015 Legearen 23. artikuluak ezartzen duen arrazoiren bat gertatzen denean.

Abstentzioren bat, errekusazioren bat edo batzorde titularreko kideen jarduna eragozten duen beste edozein arrazoi badago, ordezkoek ordezkatuko dituzte titularrak.

Halaber, ordezko kideen artean norbaitek abstentziorako edo errekusaziorako arrazoiren bat baldin badu, ordezkoen artean maila eta antzinatasun handienekoak ordezkatuko du. Aukera horiek agortu eta gero, ezinezkoa bada batzordea eratzea hurrengo artikuluan ezarritakoaren arabera, batzorde berri bat izendatuko da.

IV. KAPITULUA.–LEHIAKETEN PROZEDURA

16. artikulua. Hautapen Batzordearen eraketa.

1.–Hautapen Batzordea jardunean hasi baino lehen eratuko da formalki. Zilegi da telematikoki eratzea. Eraketa-ekitaldian, batzordekide guztiak egon behar dira.

2.–Eraketa-ekitaldian, Kontratazio Batzordeak lehiatzaileak baloratzeko kontuan hartuko dituen irizpideak ezarriko ditu. Irizpideak erregelamendu honen I. eranskinean jasotako kontratazio baremoen araberakoak izanen dira.

Irizpide horiek eta eraketa-akta Nafarroako Unibertsitate Publikoaren iragarki ohol elektroniko ofizialean argitaratuko dira eskaerak aurkezteko epea bukatu baino lehen.

3.–Eraketa-ekitaldian parte hartzen ez duten kide titularrak kargutik kendu eta berehala ordeztuko dira.

4.–Batzordeko kideek eskubidea izanen dute zerbitzu honengatik laguntzak jasotzeko.

5.–Idazkariari dagokio batzordearen jarduera administratiboak egitea, Unibertsitateko administrazioko eta zerbitzuetako langileek lagunduta.

17. artikulua. Balorazioa eta hautaketa egiteko prozedura.

1.–Onartuen eta baztertuen behin betiko zerrendak argitaratu ondoren, Giza Baliabideen Zerbitzuak Hautapen Batzordeari bidaliko dio dokumentazio guztia. Hautapen Batzordeak izangaien balorazioa eginen du eraketa-ekitaldian onartutako balorazio irizpideen arabera.

2.–Telematikoki eginen da balorazio prozesua.

Izangai bakoitzaren balorazio indibidualizatua jasoko da erabakietan, arrazoitua eta zenbakizko puntuazioarekin.

3.–Kontratazio Batzordeak bere kideen botoen gehiengoz hartuko du erabakia.

18. artikulua. Emaitzak argitaratzea.

1.–Balorazio prozesua bukatuta, Hautapen Batzordeak Nafarroako Unibertsitate Publikoaren iragarki ohol elektroniko ofizialean argitaratuko du izangai guztiek baremoaren apartatu bakoitzean lortutako puntuazioa, baita azken puntuazioa ere. Argitalpen hori izanen da interesdunentzako jakinarazpena ondorio guztietarako.

2.–Lortutako puntuazioen argitalpenaren aurka zilegi da alegazioak aurkeztea, Hautapen Batzordeari berari zuzenduak, bost egun balioduneko epean, hura Nafarroako Unibertsitate Publikoren webgunean argitaratu eta biharamunetik kontatzen hasita. Alegazio idazkian, haien oinarri diren arrazoiak eman behar dira aditzera. Ez da onartuko merezimenduak berriz ere baloratzeko besterik eskatzen ez duen alegazio generikorik. Idazki hori aurkeztea beharrezko baldintza da kontratazio proposamenen aurkako erreklamazioa aurkezteko, 20. artikuluan adierazten denez.

19. artikulua. Kontratazio proposamena eta izangaien zerrenda.

1.–Alegazioak ebatzi ondoren, edo epea igaro eta alegaziorik aurkeztu ez bada, Hautapen Batzordeak izangaien aldeko kontratazio proposamena argitaratuko du Nafarroako Unibertsitate Publikoaren iragarki ohol elektroniko ofizialean –gehienez, deialdian eskaintzen diren lanpostuak adina izangairen aldekoa–, eta irakasleen arloko eskumena duen organoari helaraziko dio.

2.–Era berean, Hautapen Batzordeak eskatutako gutxieneko puntuazioa berdindu edo gainditu duten izangaien zerrenda ordenatua argitaratuko du.

Proposatutako pertsonak uko eginez gero, Unibertsitateak hautaketa-prozesua gainditu duten izangaien zerrenda hori erabiltzen ahalko du gainditu duten hurrengo izangaiak kontratatzeko.

Irakasle elkartu eta osasun laguntzako irakasle elkartu izateko lanpostuetarako, zerrenda ordenatu horretan ageri diren izangaiak, ez badira kontrataziorako proposatuak izan, izangaien lan zerrenda batera pasatuko dira. Horren bidez, sail bereko kategoria bereko lanpostuetarako kontratatzen ahalko dituzte, soilik 25 artikuluan jasotzen diren kasuetan. Izangaien zerrenda horren indarraldia, oro har, hiru urtekoa izanen da.

3.–Hautapen Batzordeak lanpostua hutsik uztea proposatzen ahalko du, onartutako izangaietako batek ere ez badu lortu eskatutako gutxieneko puntuazioa.

4.–Berdinketarik badago gizon baten eta emakume baten artean, irakasleen gaietan eskumena duen errektoreordeak dagokion arloko edo espezialitateko irakaskidegoan edo lanpostuan ordezkari gutxien dituen sexuko pertsona proposatuko du kontrataziorako. Horretarako, azken behin betiko IAParen 3. fasetik aterako dira datuak.

V. KAPITULUA.–KONTRATAZIO PROPOSAMENAREN AURKAKO ERREKLAMAZIOAK

20. artikulua. Hautapen Batzordearen kontratazio proposamenaren aurkako erreklamazioak.

Interesdunek zilegi dute erreklamazioa aurkeztea Hautapen Batzordearen kontratazio proposamenaren aurka Nafarroako Unibertsitate Publikoko errektorearen aurrean, hamar egun balioduneko epean proposamena argitaratu eta biharamunetik kontatzen hasita.

Erreklamazio idazkian, haien oinarri diren arrazoiak eman behar dira aditzera. Ez da onartuko Hautapen Batzordean alegaziorik aurkeztu ez duten interesdunen erreklamaziorik, ezta merezimenduen balorazioa berriz egiteko bakarrik eskatzen duten erreklamazio generikorik ere.

Erreklamazioa aurkeztu eta errektorearen ebazpen baten bidez tramitera onartu ondoren, dei guztiak eten eginen dira hautaketa-prozesuaren behin betiko ebazpena eman arte.

Giza Baliabideen Zerbitzuak egoitza elektroniko ofizialean argitaratuko du tramitera onartutako erreklamazioen zerrenda, eta interesdunei bost egun balioduneko epea emanen die alegazioak aurkez ditzaten. Epe horretan bertan, erreklamazioa Hautapen Batzordeari bidaliko zaio, hari buruzko informazioa eman dezan hamar eguneko epean. Dena dela, Erreklamazio Batzordeak, gerora, beharrezkotzat jotzen dituen txostenak edo aginduzkoak eska liezazkioke.

21. artikulua. Erreklamazio Batzordea.

Irakaskidegoetako bost irakaslek osatutako erreklamazio batzorde batek baloratuko ditu kontratazio proposamenaren aurkako erreklamazioak. Gobernu Kontseiluak aukeratuko ditu, jakintza-arlo batekoak baino gehiagotakoak izan behar dute, eta esperientzia zabala eduki behar dute irakaskuntzan eta ikerketan. Hautapen Batzordeko burua eta idazkaria ere espresuki izendatuko ditu. Erreklamazio Batzordearen agintaldia lau urtekoa izanen da, eta bi urtetik behin berrituko da batzordea partzialki. Erreklamazio Batzordeko kideen ordezkoak ere izendatuko ditu Gobernu Kontseiluak.

22. artikulua. Erreklamazio Batzordeak berrikuspena egitea.

1.–Erreklamazio Batzordeak hertsiki prozedurazkoak diren alderdiak baloratuko ditu lehiaketan, eta egiaztatuko du Kontratazio Batzordeak benetan errespetatzen dituela izangaien aukera-berdintasuna eta merezimendu eta gaitasun printzipioak.

2.–Erreklamazio Batzordeak ezin izanen du inola ere ordezkatu Kontratazio Batzordeak izangaien egokitasunari buruz egindako balorazio sakona.

3.–Erreklamazio Batzordeak, aurkeztutako erreklamazioa ikusirik, zilegi izanen du, betiere Zuzenbidearekin bat etorriz, erabaki hauetakoren bat hartzea:

3.1.–Eskumenik ez badu, aurkeztutako erreklamazioa ez onartzea.

3.2.–Baldin eta uste badu prozedura-akatsen bat izan dela eta horrek babesik gabe utzi duela erreklamazioa jarri duen alderdia, agintzea hautaketa-prozedura formazko akatsa egin den unera atzera eramatea.

3.3.–Baldin eta uste badu baremoko puntuazioen baturan kalkulu akats ageriko eta nabarmenen bat egin dela, atzemandako akatsa zuzentzea Kontratazio Batzordearen proposamenean. Horrek ondorioak izanen ditu Kontratazio Batzordearen proposamenean, aldatu eginen baitu izangaien ordena.

3.4.–Erreklamazio Batzordeak, hala nahi izanez gero, zilegi izanen du lehiaketaren Kontratazio Batzordeari eskatzea aurkeztutako erreklamazioari loturiko txosten osagarri bat. Zentzu horretan, Erreklamazio Batzordeak zilegi izanen du Kontratazio Batzordeari eskatzea justifika ditzala eman dituen puntuazioak, berrikus ditzala puntuazioak, edo bi gauzak, erreklamazioaren arabera. Txostenaren eskaeran zehazten ahalko da zer alderdiri buruzko informazioa eskatzen den.

3.5.–Erreklamazio Batzordeak uste badu eskaeraren batek aurrera egin dezakeela, aukera izanen du, erreklamazioa partzialki edo osoki baiesteko eta jarduketetan atzera egin eta alegatutako akatsa gertatu zen unera eraman dadin adostu eta merezimenduen balorazioa berriz egin dadila agintzeko, bai eta, beharrezkoa bada, aurkaratu ez diren edo ustez deialdiaren oinarriak errespetatzen dituzten merezimenduen balorazioak gorde daitezela xedatzeko ere.

3.6.–Erreklamazio Batzordeak uste badu ez dagoela nahikoa arrazoirik berdintasunari, merezimenduei edo gaitasunei dagokien printzipioren bat urratzeko, zuzenean berretsiko du Kontratazio Batzordearen proposamena.

4.–Erreklamazio Batzordeak telematikoki jarduten ahalko du, bere kideen botoen gehiengoz hartuko ditu erabakiak, eta, bozketan berdinketarik badago, erabakigarria izanen da batzordeburuaren botoa. Batzordeak, bere erabakia hartzeko, aukera izanen du beharrezkotzat jotzen dituen txostenak eskatzeko, baita Unibertsitateko Zerbitzu Juridikoaren txosten juridikoa ere.

5.–Erreklamazio Batzordeak gehienez ere hilabeteko epea izanen du erabakia hartzeko, erreklamazioa aurkezten den egunetik zenbatzen hasita.

6.–Erreklamazio Batzordeak erreklamazioari buruz hartzen duen erabakia loteslea izanen da errektorearentzat. Errektoreak ebazpen bat emanen du aurkeztutako erreklamazioa ebazteko. Ebazpen horrek administrazio bidea agortuko du, eta haren aurka zilegi da administrazioarekiko auzi-errekurtsoa aurkeztea bi hilabeteko epean Nafarroako Administrazioarekiko Auzien Epaitegian.

VI. KAPITULUA.–HAUTAKETA-PROZESUA AMAITZEA

23. artikulua. Behin betiko kontratazio proposamena.

Errektoreak behin betiko kontratazio proposamena egiteko ematen duen ebazpenak hautaketa-prozesua amaituko du, eta Nafarroako Unibertsitate Publikoko iragarki ohol elektroniko ofizialean argitaratuko da. Argitalpen hori izanen da interesdunentzako jakinarazpena ondorio guztietarako.

Ebazpen horrek administrazio bidea agortzen du, eta bere aurka zilegi da administrazioarekiko auzi errekurtsoa jartzea Nafarroako Administrazioarekiko Auzien Epaitegian.

Osasun laguntzako irakasle elkartuen lanpostuen inguruko emaitzen berri emanen dio Nafarroako Unibertsitate Publikoak Batzorde Mistoari, Osasuneko Departamentuari edo haren organismo autonomoei.

VII. KAPITULUA.–KONTRATUEN FORMALIZAZIOA ETA SINADURA

24. artikulua. Dokumentazioa.

1.–Behin betiko kontratazio proposamena argitaratu eta hurrengo egunetik bost egun balioduneko epean, lanpostua esleitzeko proposatu diren pertsonek, behar den kontratua formalizatzeko, deialdiaren oinarrietan eskatzen diren baldintza orokorrak edo espezifikoak egiaztatzen dituzten jatorrizko agiriez edo kopia erkatuez gain, jarraian zehazten diren agiriak aurkeztu beharko dituzte Giza Baliabideen Zerbitzuan:

a) Gizarte Segurantzako Erregimen Orokorreko afiliazio-txartelaren fotokopia, bidezko denean.

b) Bankuko datuak nomina sartzeko.

c) Bateraezintasunik ez izatearen aitorpena.

2.–Ezinbesteko arrazoirik egon ezean dokumentazioa ezarritako epean aurkezten ez dutenek edo, dokumentazioa azterturik, lanpostua betetzeko eskatzen den baldintzaren bat betetzen ez dutenek kontratatuak izateko eskubidea galduko dute.

3.–Kontratatutakoek betebeharra dute kontratazio modalitateak eskatzen dituen baldintzak betetzearen inguruan aldaketarik gertatuz gero horren berri emateko. Irakasle elkartuek, hain zuzen, Nafarroako Unibertsitate Publikotik kanpo lan egiteari utzi diotela jakinarazi behar dute. Osasun laguntzako irakasle elkartuek modalitate horretan kontratatutakoek, horrez gain, jakitera eman behar dute ez direla betetzen ari beren osasun laguntzako lana, osasun arloko erakundeak irakaskuntza eta ikerkuntza unibertsitarioan elkarlanean ari daitezen Nafarroako Unibertsitate Publikoak eta Nafarroako Gobernuaren Osasun Departamentuak sinatutako hitzarmenarekin bat etorriz –2023ko uztailaren 27ko hitzarmena–, edo bestela aplikazio unean indarrean den hitzarmenarekin.

25. artikulua. Kontratuaren formalizazioa.

1.–Erregelamendu honen ondoriozko lan kontratuak eta haien deialdiak arau hauetan ezarritakoaren mende egonen dira: Unibertsitate Sistemari buruzko 2/2023 Lege Organikoaren 77. artikulua eta hurrengoak, eta Nafarroako Foru Komunitateak bere eskumenekin bat etorriz ematen dituen xedapenak; modu osagarrian, Langileen Estatutua eta aplikatzekoa den hitzarmen kolektiboa.

Osasun laguntzako lanpostuen kasuan, kontuan hartuko da, baita ere, zer dioten Osasunari buruzko Lege Orokorraren 105. artikuluak eta Nafarroako Unibertsitate Publikoak eta Nafarroako Gobernuaren Osasun Departamentuak sinatutako hitzarmen indardunak.

2.–Kontratuak idatziz eginen dira, dagozkien ereduetan. Kontratua sinatzearen ardura norberarena eta besterenezina da, eta Nafarroako Unibertsitate Publikoko Giza Baliabideen Zerbitzuan eginen da.

3.–Eginkizunak betetzen hasi baino lehen sinatuko da kontratua, gehienez ere 10 egun naturaleko epean lanpostuaren ebazpena argitaratu eta biharamunetik kontatzen hasita.

4.–Kontratatuak dagokion saileko zuzendariaren aurrean aurkeztu beharko du, eta kontratuan adierazitako egunean hasi beharko du lanean. Ez bada lanean hasten kontratuan adierazitako egunean eta ez badago Nafarroako Unibertsitate Publikoaren iritziz hori justifikatzen duen arrazoirik, kontratua ondoriorik gabe geldituko da, eta jarduera guztiak baliogabetuko dira.

5.–Kontratatuak lanpostuari uko egiten diola ulertuko da aurreko paragrafoetan adierazitako epeetan ez badu kontratua sinatzen edo ez bada lanean hasten. Ezinbesteko kasuak salbuespen izanen dira. Bi kasuetan, hurrengo pertsonari deituko zaio, Hautapen Batzordeak lanpostu horretarako proposatutako ordezkoen zerrendaren hurrenkeran. Pertsona horrek epe bera izango du kontratua formalizatzeko.

III. TITULUA.–IRAKASLE ELKARTUAK PRESAZ KONTRATATZEKO PROZEDURA

26. artikulua. Presazko kontratazioak.

1.–Irakasle elkartuak eta osasun laguntzako irakasle elkartuak kontratatzeko presazko prozedura –titulu honetan arautzen dena– ustekabeko arrazoiak daudenean bakarrik erabiltzen ahalko da.

2.–Honako hauek dira kontratazioa presazko prozeduraren bidez tramitatzeko ustekabeko arrazoiak:

a) Norbaitek bere lanpostuari ikasturtearen barrenean uko egin izana.

b) Lehiaketako lanpostuak hutsik geratu izana edo kontrataturako izangaiek haiei uko egin izana.

c) Kontratazioa berehala egitea justifikatzen duten irakaskuntza-premiak sortu izana.

3.–Dagokion Saileko Kontseiluak eskatuko du kontratazioak presazko prozedura erabiliz egitea. Irakasle gaietan eskumena duen organoak hartuko ditu kasu bakoitzean presazko kontratazioei buruzko erabakiak.

4.–Presazko prozeduraren bidezko kontratazioak arau hauek bete beharko ditu:

a) 18.2 artikuluan aipatzen den izangai zerrendaren bat izanez gero, puntuazio handieneko izangaia kontratatuko da. Izangaien zerrenda bat baino gehiago egonez gero, espezialitate printzipioaren arabera lanpostura hobekien egokitzen den zerrendak izanen du lehentasuna, eta lanpostu hori atxikita dagoen sailaren txostenak arrazoitu beharko du hori. Subsidiarioki, zerrenda berrienak izanen du lehentasuna zerrenda zaharraren aldean. Kasu guztietan, zerrendetan agertzen diren izangaien puntuazioaren ordena errespetatuko da.

b) Kontratazio zerrendetatik kanpo uzten ahalko dira izangaiak baldin eta aurretik kontratatuak izan eta Sailak haiei buruzko txosten negatiboa emana badute.

c) Aurreko deialdietako izangaien zerrendarik ez badago, Nafarroako Unibertsitate Publikoak aukera izanen du irakasle elkartuak edo osasun laguntzako irakasle elkartuak kontratatzeko presazko lehiaketa baten deialdia egiteko. Presazko lehiaketa prozedura arrunterako ezarritakoaren arabera tramitatuko da, hurrengo artikuluan aurreikusitako epeen kasuan izan ezik.

d) Presazko prozeduraren bidez irakasle elkartuei eta osasun laguntzako irakasle elkartuei egindako lan kontratuei Nafarroako Unibertsitate Publikoko gainerako irakasle elkartuen arauak aplikatuko zaizkie.

27. artikulua. Presazko prozeduraren epeak.

Presazko lehiaketetan, epe hauek ezarriko dira:

–5 egun baliodun eskabideak aurkezteko.

–3 egun baliodun behin-behineko zerrendari erreklamazioak aurkezteko izangairen bat baztertu bada edo ez bada zerrendan sartu.

28. artikulua. Presazko prozeduraren deialdia egiteko arauak.

1.–Giza Baliabideen Zerbitzuak lan kontratua eskainiko die zerrendetan daudenei, puntuazioaren araberako ordena zorrotzean, telefonoz edo posta elektronikoz edo unean-unean erabilgarri dauden bitarteko teknologikoak erabiliz, eta haiekin harremanetan jartzen saiatu dela jasoko du espedientean.

Deialdia jasotzen duenak 24 ordu izanen ditu, jakinarazpena egiten zaionetik, kontratatua izan nahi duen edo uko eginen dion jakitera emateko, baliabide telematikoen bidez. Epe horretan erantzuten ez badu, kontratazio eskaintzari uko egin diola ulertuko da, eta lan zerrendako hurrengo izangaiari deituko zaio.

2.–Izangai bat aurkitu ezin denean edo kontratuaren eskaintzari uko egiten badio, zerrendako hurrengo izangaiari edo izangaiei dei eginen zaie, aurreko apartatuan adierazitako moduan, baten batek eskaintza onartu arte.

IV. TITULUA.–IRAKASLE BISITARIAK ETA IRAKASLE NABARMENAK

I. KAPITULUA.–IRAKASLE BISITARIAK

29. artikulua. Irakasle bisitariak.

1.–Nafarroako Unibertsitate Publikoak zilegi du, aurrekontu aurreikuspenen barrenean, irakasle bisitariak kontratatzea. Modalitate horretan, beste unibertsitate edo ikerketa-zentro batzuetako irakasle eta ikertzaileak sartzen dira, Espainiakoak zein atzerrikoak, ikastegi unibertsitarioen jardunari ekarpen esanguratsua egiten ahal diotenak.

2.–Kontratuaren helburua irakasle eta/edo ikertzaile lanak egitea izanen da, eta, hala badagokio, jakintza eta berrikuntza transferitzeko eta trukatzeko lanak egitea kontratatu den irakaslea nabarmendu den espezialitatean.

3.–Irakasle bisitarien kontratuak gutxienez sei hilabete eta gehienez bi urte iraunen du. Ezin izanen da ez luzatu ez berritu, eta lanaldi partzialekoa edo osokoa izanen da, bi aldeek zer adosten duten.

30. artikulua. Irakasle bisitariak kontratatzeko proposamenak.

1.–Irakasle bisitari bat kontratatzeko interesa duen sailak irakasleen gaietan eskumena duen organoari bidaliko dio kontrataziorako proposamena.

2.–Proposamen bakoitzak honako dokumentu hauek eduki behar ditu:

a) Saileko Kontseiluak hartutako erabakiaren ziurtagiria, idazkariak emana.

b) Sailean dauden premien memoria, Sailak egina.

c) Curriculum vitaea, proposatutako irakasleak aurkeztutako irakaskuntza- eta ikerketa-proiektuarekin batera.

d) Proposamenaren memoria ekonomikoa, irakasleen gaietan eskumena duen errektoreordeak egina.

31. artikulua. Prozedura.

1.–Gobernu Kontseiluko Batzorde Akademikoak dokumentuak aztertuko ditu, eta egindako proposamenaren aldeko edo kontrako txostena emanen du. Irakasleen gaietan eskumena duen errektoreordeak errektoreari bidaliko dio Batzorde Akademikoaren txostena.

2.–Errektoreak, Batzorde Akademikoaren txostena ikusita, irakasle bisitariaren kontratazioa egin ala ez erabakiko du.

32. artikulua. Eskubide eta betebeharrak.

Irakasle bisitarien eskubideak eta betebeharrak irakasle kontratatuentzat oro har ezarritakora egokituko dira, hargatik kasuan kasuko kontratuetan aurreikusitako klausulak eragotzi gabe.

Irakasle bisitariei gainerako irakasleen araubideaz bestelako betebehar batzuk ezartzen ahalko dizkiete sailek irakaskuntzari, iraupenari eta ikerketari dagokionez.

II. KAPITULUA.–IRAKASLE NABARMENAK

33. artikulua. Irakasle nabarmenak.

1.–Nafarroako Unibertsitate Publikoak zilegi du, ezartzen duen hautaketa-prozesuarekin bat etorriz, irakasle nabarmenak kontratatzea. Modalitate horretan, karrera akademikoa edo ikerketakoa atzerrian egiten ari diren irakasle eta ikertzaileak sartzen dira, zeinen bikaintasuna eta ekarpen zientifiko, teknologiko, humanistiko edo artistikoa garrantzitsua baita eta nazioartean aitortua.

2.–Kontratuaren helburua irakasle edo ikertzaile lanak eta jakintza eta berrikuntza transferitzeko eta trukatzeko lanak egitea izanen da, bai eta ikerketa-talde nahiz -zentroen eta programa zientifiko eta teknologiko berezien zuzendari izatea ere. Ikasturte bakoitzean, gehienez 180 ikastorduko irakasle lana egiten ahalko dute irakasle nabarmenek, Nafarroako Unibertsitate Publikoko ikertzaileek irakasle lanean laguntzeko arauekin bat etorriz.

34. artikulua. Kontratuaren iraupena eta baldintzak.

Kontratuaren iraupena eta baldintzak aldeek adostu beharko dituzte Zientziari, Teknologiari eta Berrikuntzari buruzko 2011ko ekainaren 1eko 14/2011 Legean edo hura ordezten duen arauan ikertzaile osptesuaren modalitaterako xedatutakoari jarraikiz.

XEDAPEN GEHIGARRIAK

Lehenbizikoa.–Sailek beren gain hartuko dituzte beren irakaskuntza-planetik eratorritako irakaskuntza-beharrak, edozein direla ere abian diren edo hasteko dauden kontratazio prozedurak.

Bigarrena.–Erregelamendu honetan irakasle laguntzaile doktoreak kontratatzeko ezarritako prozedura bete beharko da hautaketa-prozesua bukatu arte lanpostu hutsak betetzeko irakasleak hautatzeko kasuetan, LOSUren 80.2 artikuluarekin bat etorriz.

Halako kasuetan, bete nahi den lanpostu hutsarentzat baldintza gisa eskatutako titulazio eta akreditazio bera eduki beharko dute. Baremoa deialdian aditzera emandakoa izanen da.

XEDAPEN IRAGANKORRAK

Lehenbizikoa.–2023ko uztailaren 18ko 678/2023 Errege Dekretuak aipatzen dituen jakintza-espezialitateen zerrenda indarrean sartu arte, jakintza-espezialitateei buruzko erreferentziak 2007ko urriaren 5eko 1312/2007 Errege Dekretuaren I. eranskinean zerrendatutako jakintza-arloei buruzkoak direla ulertuko da. Era berean, jakintza-espezialitateen zerrenda indarrean sartu arte, sarbide-lehiaketetako lanpostuen deskribapena aipatutako Errege Dekretua indarrean sartzen den egunean indarrean dagoen araudiaren arabera zehazten ahalko da.

Bigarrena.–Jakintza-esparruak arautzen dituen erregelamendua onetsi arte, lanpostuak Nafarroako Unibertsitate Publikoko sail eta jakintza-arloetara atxikiko dira.

Hirugarrena.–Araudi hau indarrean sartzen denean indarrean diren irakasle elkartuen zerrendak indarraldiari eutsiko diote eratu zireneko datarekin, eta erregelamendu honetan xedatutakoaren arabera arautuko dira.

XEDAPEN INDARGABETZAILEA

Indarrik gabe gelditzen da Nafarroako Unibertsitate Publikoan lotura iraunkorrik gabeko irakasleak kontratatzeko hautaketa-prozesuen erregelamendua.

Halaber, indarrik gabe gelditzen dira erabaki honetan ezarritakoari aurka egiten dioten maila bereko edo txikiagoko xedapen guztiak.

AZKEN XEDAPENA

Bakarra.–Erregelamendu honek Nafarroako Aldizkari Ofizialean argitara eman eta biharamunean hartuko du indarra.

I. ERANSKINA.–IRAKASLEAK KONTRATATZEKO BAREMOAK, KATEGORIAREN ARABERA

Izangaiek curriculum vitaea baremoaren apartatu bakoitzaren arabera ordenatua aurkeztu behar dute. Merezimenduen egiaztagiriek curriculum vitaearen arabera ordenatuak egon behar dute.

1.–Irakasle elkartu izateko lanpostuak.

Irizpide orokor gisa, honako elementu hauek baloratuko dira, kontuan izanik zenbateko lotura dagoen jardueraren eta lanpostuaren profilaren artean. Apartatu bakoitzerako, 0 eta 1 bitarteko ponderazio faktore bat ezartzen ahalko da. Zorrotz justifikatua egon behar da ponderazio faktorea, eta koherentea izan behar da erabiltzen den bakoitzean.

a) Jarduera profesionala (60 puntu gehienez). Jarduera profesionaltzat hartuko da orain ordainpeko lan akreditaturen batean aritzea lanpostuaren profilarekin lotura duen edozein jarduera profesionaletan.

b) Espediente akademikoa (10 puntu gehienez). Lanposturako eskatzen den titulazioari buruzkoa izan behar da espedientea, salbuespen honekin: doktore titulua eskatzen bada lanposturako, doktoratu aurreko ikasketen espedientea baloratuko da.

Lehenik eta behin, espediente akademikoko batez besteko nota aritmetikoa kalkulatuko da, irakasgai bakoitzaren kreditu kopuruaren arabera ponderatuta. Horretarako, "Gainditua" kalifikazioari 1 puntu emanen zaio; "Oso ongi" kalifikazioari: 2 puntu; "Bikain" kalifikazioari: 3 puntu; eta "Ohorezko matrikula" kalifikazioari: 4 puntu. Ez dira kontuan hartuko "Ez aurkeztua" eta "Ez gainditua" kalifikazioak.

Gero, batez besteko nota aritmetikoa bider 2,5 eginen da, eta hala lortuko da apartatu honen puntuazioa.

c) Doktoretza (5 puntu gehienez).

d) Unibertsitateko irakaskuntza-jarduerak (20 puntu gehienez).

e) Beste merezimendu batzuk (5 puntu gehienez). Apartatu honetan, Batzordearen irizpidearen arabera, hauek baloratuko dira: hizkuntzak, jasotako espezializazio ikastaroak, atzerriko egonaldiak, unibertsitateko beste titulazio batzuk, bekak, sariak eta izangaiak lan egindako jarduera profesionalekin lotura duten bestelako merezimenduak.

Kontratazio proposamena egin ahal izateko, azken puntuazioa 40 puntukoa edo handiagoa behar da izan.

2.–Irakasle laguntzaile doktoreen lanpostuak.

Irizpide orokor gisa, honako elementu hauek baloratuko dira, kontuan izanik zenbateko lotura dagoen jardueraren eta lanpostuaren profilaren artean. Apartatu bakoitzerako, 0 eta 1 bitarteko ponderazio faktore bat ezartzen ahalko da. Zorrotz justifikatua egon behar da ponderazio faktorea, eta koherentea izan behar da erabiltzen den bakoitzean.

a) Ikerketa-jarduerak, jakintza transferitzekoak, proiektu eta argitalpen zientifikoak (25 puntu gehienez).

b) Ikerketa-egonaldiak prestigio nabarmeneko unibertsitate edo ikerketa-zentroetan (lehiatzailearen lantokia edo prestakuntza-tokia ez den beste batean (5 puntu gehienez).

c) Doktoretzako kontratu eta beka finantzatuak, lehiaketa bidezkoak (gehienez 8 puntu).

d) Espediente akademikoa (10 puntu gehienez). Lehenik eta behin, espediente akademikoko batez besteko nota aritmetikoa kalkulatuko da, irakasgai bakoitzaren kreditu kopuruaren arabera ponderatuta. Horretarako, "Gainditua" kalifikazioari 1 puntu emanen zaio; "Oso ongi" kalifikazioari 2 puntu; "Bikain" kalifikazioari 3 puntu; eta "Ohorezko matrikula" kalifikazioari 4 puntu. Ez dira kontuan hartuko "Ez aurkeztua" eta "Ez gainditua" kalifikazioak.

Gero, batez besteko nota aritmetikoa bider 2,5 eginen da, eta hala lortuko da apartatu honen puntuazioa.

e) Cum laude doktoretza, nazioarteko aipamenarekin (5 puntu gehienez).

f) Unibertsitateko irakasle jarduerak, dagokion kontratuarekin behar bezala justifikatuak (15 puntu gehienez).

g) Lanpostuaren profilari lotutako irakasgai baten irakaskuntza-proiektua (gehienez 10 puntu).

h) Ikerketa-proiektua (10 puntu gehienez).

i) Beste merezimendu batzuk (5 puntu gehienez). Apartatu honetan, Batzordearen irizpidearen arabera, hauek baloratuko dira: unibertsitatetik kanpo egindako jarduera profesionala, hizkuntzak, jasotako espezializazio ikastaroak, unibertsitateko beste titulazio batzuk, bekak, sariak eta lehiakideak bere jarduera profesionalari buruz aurkezten duen beste edozein merezimendu.

j) Lehentasunezko merezimendua (2/2023 Lege Organikoaren hirugarren xedapen iragankorra): ANECAk emandako irakasle laguntzaile doktorearen akreditazioa dutenei puntuazio gehigarria emanen zaie: baremoko a), b) c), e), f) eta i) apartatuetan lortutako guztizko puntuazioaren baturaren %20.

Kontratazio proposamena egin ahal izateko, azken puntuazioa 35 puntukoa edo handiagoa behar da izan.

3.–Osasun laguntzako irakasle elkartuen lanpostuak.

Irizpide orokor gisa, honako elementu hauek baloratuko dira, kontuan izanik zenbateko lotura dagoen jardueraren eta lanpostuaren profilaren artean. Apartatu bakoitzerako, 0 eta 1 bitarteko ponderazio faktore bat ezartzen ahalko da. Zorrotz justifikatua egon behar da ponderazio faktorea, eta koherentea izan behar da erabiltzen den bakoitzean.

a) Osasunaren arloko jarduera (45 puntu gehienez). Lanpostuaren espezialitatean edo haren profilarekin lotutako osasunaren arloko jarduera batean ordainpeko lanean aritzea ulertuko da jarduera profesional gisa.

b) Doktoretza (10 puntu gehienez).

d) Irakasle jarduera unibertsitarioak (20 puntu gehienez).

d) Irakasle jarduera ez-unibertsitarioak osasunaren arloan (10 puntu gehienez).

e) Ikerketa-lanak eta -jarduerak (10 puntu gehienez).

f) Beste merezimendu batzuk (5 puntu gehienez). Apartatu honetan, Batzordearen irizpidearen arabera, hauek baloratuko dira: hizkuntzak, jasotako espezializazio ikastaroak, atzerriko egonaldiak, unibertsitateko beste titulazio batzuk, lan batzorde eta taldeetako kide izatea, bekak, sariak eta izangaiak lan egindako jarduera profesionalekin lotura duten bestelako merezimenduak.

Kontratazio proposamena egin ahal izateko, azken puntuazioa 40 puntukoa edo handiagoa behar da izan.

Iragarkiaren kodea: F2406728