Iragarkia

88. ALDIZKARIA - 2024ko apirilaren 30a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

65C/2024 EBAZPENA, martxoaren 22koa, Ekonomia Sozialeko eta Laneko zuzendari nagusiak emana, zeinaren bidez erabakitzen baita Leitzako Torraspapel SA enpresaren hitzarmen kolektiboa erregistratu, gordailutu eta Nafarroako Aldizkari Ofizialean argitaratzea.

Leitzako Torraspapel SA enpresak aurkeztutako hitzarmen kolektiboa aztertu da (kode zenbakia: 31101581012019), zeina erregistro honetan sartu baitzen 2024ko martxoaren 8an, enpresaren ordezkariek eta sindikatuen ordezkariek (LAB) 2024ko martxoaren 6an izenpetuta.

Bat etorriz Langileen Estatutuaren Legearen testu bategina onetsi zuen urriaren 23ko 2/2015 Legegintzako Errege-dekretuaren 90. artikuluaren 2. eta 3. apartatuetan eta Hitzarmen kolektiboak, laneko akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin,

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuak ematen dizkidan eskudantziak erabiliz,

EBAZTEN DUT:

Lehenbizikoa.–Nafarroako Hitzarmen Kolektiboen, Lan-Akordio Kolektiboen eta Berdintasun Planen Erregistroan inskribatzea Torraspapel SA enpresak aurkeztutako hitzarmen kolektiboa (kode zenbakia: 31101581012019).

Bigarrena.–Nafarroako Aldizkari Ofizialean argitara dadila xedatzea, orok jakin dezan.

Hirugarrena.–Ebazpen hau eskatzaileari jakinaraztea, eta ohartaraztea ebazpenak ez diola amaiera ematen administrazio bideari, eta, haren aurka, gora jotzeko errekurtsoa aurkezten ahal diola Eskubide Sozialetako, Ekonomia Sozialeko eta Enpleguko kontseilariari, hilabeteko epean, ebazpena jakinarazi eta hurrengo egunetik aurrera.

Iruñean, 2024ko martxoaren 22an.–Ekonomia Sozialeko eta Laneko zuzendari nagusia, Iñaki Mendióroz Casallo.

TORRASPAPEL SA ENPRESAREN LEITZAKO LANTEGIAREN HITZARMEN KOLEKTIBOA

2024-2026 urteak

AURRETIKOA

Sinatzaileak

Hitzarmen hau sinatu dute, batetik, Torraspapel SA enpresak eta, bestetik, Langile Abertzaleen Batzordeak (LAB) atal sindikalak, enpresan ordezkaritza baitu, eta Enpresa Batzordeak. Bi alderdiek hitzarmen hau negoziatzeko legitimazioa aitortzen diote elkarri, Langileen Estatutuaren 87. artikuluan ezarritakoaren arabera.

I. KAPITULUA.–XEDAPEN OROKORRAK

1. artikulua. Eremu funtzionala.

Enpresako hitzarmen kolektibo hau nahitaez bete beharko da Torraspapel SAren Leitzako (Nafarroa) lantegian. Orearen, Paperaren eta Kartoiaren Fabrikazioaren sektorekoa da.

2. artikulua. Pertsona eremua.

Enpresako hitzarmen kolektibo honek 1. artikuluan adierazitako lantegiko plantillako langileen baldintza sozioekonomikoak arautzen ditu.

Zuzendarien taldeari eta 3. mailako teknikarien taldeari ez zaizkie aplikatuko Mozkinetako parte-hartzea, Aparteko haborokinak eta Ordainsariak izeneko artikuluak.

3. artikulua. Denbora eremua.

Enpresako hitzarmen kolektibo honek hiru urteko indarraldia izanen du. 2024ko urtarrilaren 1ean hartuko du indarra ondorio guztietarako, eta 2026ko abenduaren 31n bukatuko da.

2026ko azaroaren 1etik aurrera salatutzat joko da, besterik gabe, eta egun horretatik aurrera hasten ahal dira ordezkatuko duen hitzarmen kolektiborako negoziazioak.

Hitzarmena luzatutzat joko da, ondorio guztietarako, iraungitze datatik hura ordeztuko duen hitzarmen berria indarrean jarri bitartean, ez bada beste akordio bat hitzartzen, berariaz ezartzen duena beste indarraldi bat edo indarraldiaren hasiera-data bat.

II. KAPITULUA.–LANAREN ANTOLAKETA

4. artikulua. Lanaren antolaketa.

Enpresako zuzendaritzari dagokio lana antolatzeko ahalmena. Hitzarmen honetako arauei jarraituz erabiliko du ahalmen hori, une bakoitzean indarra duten xedapen orokorrak errespetatuta.

III. KAPITULUA.–LAN ARAUBIDEA

5. artikulua. Lanaldia.

1. Enpresaren produkzioaldia langileen lanalditik aparte da.

2. Hitzarmen hau indarrean dagoen bitartean, honako hau izanen da langile bakoitzaren urteko gehieneko lanaldia, lanaldi zatituan zein jarraituan:

–2024. urtea: 1.688 ordu.

–2025. urtea: 1.688 ordu.

–2026. urtea: 1.688 ordu.

3. Enpresako zuzendaritzak artikulu honetan finkatutako lanaldia betetzeko moduan antolatuko du lana, une bakoitzean indarra duen araudia errespetatuta.

4. Enpresaren eta langilearen artean adostuta, lanaldia modu irregularrean banatu daiteke urtean. Dena dela, banaketa horrek legeek ezarritako gutxieneko atsedenaldiak (egunekoak eta astekoak) errespetatu beharko ditu, eta langileak gutxienez bost egun lehenago jakin beharko ditu lanaldi irregularreko laneguna eta lanorduak.

Enpresa eta langilea ados jartzen ez badira, enpresaren eta batzordearen artean negoziatuko da banaketa irregular hori egin behar ote den, akordio bat lortzeko asmoz.

6. artikulua. Non Stop lan araubidea (5 txanda).

a) Ordainsariak.

Araubide honetan aritzen diren langileek hitzarmen honetako soldata tauletan jasotako diru-kopuruak eta igoerak jasoko dituzte. 2. eranskina.

Ordaindutako lizentzia dela-eta larunbatean, igandean edo jaiegunean lanera joan ezean, ez da jaiegunaren zenbatekoa kenduko, baina ordezkoari ere ez zaio ordainduko.

Beren egutegia dela-eta Pazko Igandean lanera etortzen diren langileek soberakin bat hartzen ahalko dute larunbat, igande edo jaiegun batean, jaiegunari dagokion zenbatekoa kendu gabe. Era berean, larunbat, igande edo jaiegun bateko soberakina betetzen duten langileek kasuan kasuko jaieguneko zenbatekoa eskuratuko dute. Pazko Igandean lan egiteagatik sortutako atsedenaldia atsedenaldia sortu eta hurrengo urteko Pazko Igandearen aurreko egunera arte hartzen ahalko da.

5 txandako lan araubideari atxikita ez dauden langileek (Non Stop) 5 txandako lanpostu baten absentzia (Non Stop) betetzen badute larunbatean, igandean edo jaiegunean, orduak ordaintzeaz eta hitzarmen honetan araututakoaren arabera atsedenaldia sortzeaz gain, Non Stop primaren zenbatekoa jasoko dute.

Lan egindako igande edo jaiegun bat kendu eta ordaintzeko ondorioetarako, 2. eranskineko soldata tauletan indarraldiko urte bakoitzerako jasotzen den zenbatekoa izanen da erreferentzia.

Eskolako laguntzaren ondorioetako, langileak Non Stop dela-eta jasotakoa ez da kontuan hartuko baremoa zehazteko.

59. artikuluan itundutakoari dagokionez, gaixotasunak eragindako aldi baterako ezintasunaren kasuan, bajaren 1. egunetik aurrera sortuko da Non Stop sistemako hileko zenbatekoa, eta gaixorik dagoena ordezten duten langileek ez dute kontzeptu horrengatik inolako zenbatekorik jasoko.

b) Geldialdi-egunak.

Non Stop sistema ezarrita dagoen lanpostuetan, honako hauek geldialdi-egunak izanen dira: urtarrilaren 1a, maiatzaren 1a, abuztuaren 11, eta abenduaren 24a, 25a eta 31.

Geldialdi-egun horietan enpresak "gutxieneko zerbitzuetarako" talde bat mantenduko du, beharrezko gutxieneko langileek osatua, produkzioari berriro ekiteko ezinbestekoak diren makinek modu egokian funtzionatzen jarrai dezaten. Geldialdi-egun horietarako "gutxieneko zerbitzuetarako" langileek Non Stop sistemako eguneko plusa jasoko dute, gehi jaieguneko aparteko 8 orduren zenbatekoa.

Abenduaren 24ko eta 31ko gaueko txanda-aldaketetan lan egiten dutenek eta abenduaren 25eko eta urtarrilaren 1eko goizeko txanda-aldaketan lan egiten dutenek Non Stop araubideko eguneko plusa jasoko dute, gehi jaieguneko aparteko 12 orduren zenbatekoa.

Geldialdi-egun horietan aparteko orduak egiteagatik sor daitezkeen atsedenaldiak jaiegunean hartzen ahalko dira, non stop araubideko prima kendu gabe eta atsedenaldia sortu eta hurrengo urteko abenduaren 24, 25 eta 31ren aurreko egunera arte, hurrenez hurren.

Aurreko paragrafoetan zehaztutakoez beste geldialdi-egunetan, horren arrazoia ezin bazaio enpresari egotzi, betiere enpresa eta batzordea ados egonda, "gutxieneko zerbitzuetarako" beste talde bat eratuko da, makinen produkzioa geldialdia hasten den arte mantentzeko (hura hasten den momentuan), baita geldialdia bukatzen denetik aurrera (hura bukatzen den momentuan).

Eginkizun horiek direla-eta bigarren taldeko "gutxieneko zerbitzuetarako" langileek aurreratutako orduak edo lanaldia luzatzekoak eguneko, gaueko edo jaieguneko aparteko orduaren zenbatekoaren arabera ordainduko dira, kasuan-kasuan.

c) Non Stop sistema ezartzea eta kentzea.

Atal edo makina batean Non Stop araubidean lan egiten ez bada eta enpresak bertan sistema hori aplikatzeko asmoa baldin badu, gutxienez ere asmo hori bete baino 7 egun lehenago jakinaraziko zaie eragindako langileei eta beren legezko ordezkariei.

Jakinarazpen hori egiten den aldi berean, langileen legezko ordezkariei kontsulta egiteko gehienez ere 7 egun iraunen duen aldi bat hasiko da. Kontsulta aldi hori oporrei eta zikloen programazioari buruzkoa izan beharko da, eta gutxienez 3 zikloko aldia bermatuko da. Aldi hori 105 egun naturalekoa izanen da, non ez den bestelakorik hitzartzen enpresaren eta batzordearen artean.

Kontsulta aldia amaitu ondoren enpresak langileei aldaketari buruzko erabakia jakinaraziko die.

Langileen interesak (sisteman sartzea) eta enpresarenak (produkzio-jarduerari eustea) uztartzeko helburuz, sisteman sartzeko irizpide hauek ezarri dira:

–Kasuan kasuko makinako langileak.

–Antzinatasuna enpresan.

–Enpresako langile berekiak.

–Enpresatik kanpoko langileak.

Enpresako antzinatasun-data, Non Stop araubidea ezartzeko eta kentzeko prozeduretan ezarritako irizpideetarako kontuan hartu beharrekoa, langile bakoitzari Soldaten Ordainagirian agertzen zaiona izanen da.

Produkzio-jarduerak aurrera jarraitzen duela ziurtatzeko, aurreko irizpideen arabera lanpostua bermatuko zaio dagokionari; baina, prestakuntza-arrazoiak direla eta, 5 txandako lanpostura sartzea atzeratzen ahalko da, gehienez ere hilabetez.

Hutsik dauden lanpostuak Non Stop araubidean banan-banan sartzeko, irizpide berberak aplikatuko dira.

Zuzendaritzak lan sistema hori bertan behera utzi edo kenduko du berak erabakitako makina eta instalazioetatik, lan baldintzetako funtsezko aldaketak egiteko eskatzen diren legezko betebeharrak betetzen direnean. Enpresan eta makina bakoitzean antzinatasunik handiena daukaten langileek makina horietan jarraitzeko lehentasuna izanen dute.

Lan sistema horri uko egiteko aukera emanen zaio hala nahi duenari, baldin eta ordezkoa izanen duela bermatuta badago, bai behar adinako langileak badaudelako bai beharrezko kualifikazioa dutelako.

Non Stop araubidea ezartzearen edo kentzearen ondorioz sortzen diren atseden- edo lan-egunak hartzeko edo horietan lan egiteko epea urte naturala izanen da, urtearen amaieran ezein langilek izan ez dezan zorretan lanegunik edo atseden-egunik.

d) Oporrak.

Non Stop lan sistemari atxikitako langileen opor araubidea horretarako prestatutako egutegi batean programatuko da.

Zuzendaritzak langileei beren urteko oporraldia nahi duten bezain eroso hartzea utziko die, betiere lanpostu bereko bost langileko taldearen barrenean, baldin eta kasu horretan langileek hitza ematen badute instalazioak etengabe artatuko dituztela, oporrak hartuz gero aparteko orduak egin eta ordaindu behar ez badira eta enpresari kosturik eragiten ez bazaio. Kontramaisuari aldez aurretik behar den denboraz jakinarazi beharko zaio.

e) Absentziak betetzeko sistema.

Sistema eraginkorra izan dadin, langileek hitzematen dute lanera joan behar ez badute, aurreikusirik nahiz ustekabean, behar adina denbora lehenago jakinaraziko dutela; horrenbestez, txandako kontramaisuari prozedurarik azkarrenaren bitartez jakinaraziko diote.

Oro har, honako dei-ordena hau ezartzen da 5 txandako edo Non Stop araubideko lanpostuetan gerta daitezkeen absentziak betetzeko:

Lehendabizi, lehenengo bi atseden-egunetan bete beharreko lanpostuaren titularrari deituko zaio.

Bigarrenik, hurrengo atseden-egunetan bete beharreko lanpostuaren titularrari deituko zaio.

Hirugarrenik, lehenengo bi atseden-egunetan bete beharreko makinaren laguntzaileari edo langileari deituko zaio, baldin eta lanpostuan aritzeko prestakuntza badu.

Laugarrenik, hurrengo atseden-egunetan bete beharreko makinaren laguntzaileari edo langileari deituko zaio, baldin eta bete beharreko lanpostuan aritzeko prestakuntza badu.

Bosgarrenik, antzeko makina bateko langile bati deituko zaio, baldin eta bete beharreko lanpostuan aritzeko prestakuntza badu.

Seigarrenik, edozein langileri deituko zaio, baldin eta bete beharreko lanpostuan aritzeko prestakuntza badu.

Kontramaisuek izanen dute dagokien langileei deitzeko ardura, ordena horretan.

7. artikulua. Oporrak.

Hitzarmen kolektibo honen eraginpeko langile guztiek 30 egun naturaleko opor ordainduak izanen dituzte. Egun horietatik 26 gutxienez lanegunak izanen dira; ahal dela, udaldian hartuko dira, langileen artean txandaka, baldin eta enpresak bere produkzio-jarduerak eteten ez baditu.

Lanegunak dira Nafarroako Foru Komunitatearen urteko egutegi ofizialean hala agertzen direnak.

Urtean zehar lanean hasi edo lana uzten duen langileak eskubidea du oporren zati proportzionala izateko, lan egindako hilabeteen arabera. Hilabete osotzat joko da hilabetearen zatia.

Langilearen oporraldia aldi baterako ezintasun-egoeran dagoen aldietan hartzea egokitzen bada, oporraldia eten eginen da aldi baterako ezintasun-egoerak irauten duen bitartean. Etenaldiari dagozkion egunak kasuan kasuko urte naturalean ezin badira erabat edo zati batean hartu, langileak har ditzake aldi baterako ezintasuna amaitu ondoren, hemezortzi hilabete baino gehiago ez badira iragan haiek sortu zireneko urtea amaitzen denetik aurrera. Aldi baterako ezintasun-egoeran egoteagatik hartu ezin izan diren oporrak ezintasun-egoera amaitu ondoren hartuko dira.

8. artikulua. Lan egutegia.

Enpresaren zuzendaritzak, langileen ordezkariak aldez aurretik jakinaren gainean egonik, urteko orduen taula eta lan egutegia ezarriko ditu.

Enpresaren zuzendaritzak, Nafarroarako egutegi ofiziala argitaratzen denetik aurrera, eta nolanahi ere aurreko urte bakoitzeko azaroaren 30a baino lehen, langile guztientzako lan egutegia ezarriko du. Lan egutegi horretan gutxienez lanaldiko orduen taula agertuko beharko da.

Enpresaren zuzendaritzak laneko egutegiak eta ordutegiak ezarri ondoren urteko lanaldietan aldaketak gertatzen badira, 15 eguneko epean enpresaren zuzendaritzak egutegi eta ordutegi horietan beharrezko doikuntzak eginen ditu.

Enpresak eta batzordeak adostuko dute 3 txandako araubideko lan-astea hasiko den eguna eta ordua. Abenduaren 31n akordiorik lortu ez bada, 3 txandako araubideko lan-astea hasteko baldintzak, eguna eta ordua aurreko urtekoak izanen dira.

9. artikulua. Lizentzia ordainduak.

Langileak, lehenbailehen abisatuta eta behar bezala justifikatuta, lanera ez agertzeko edo alde egiteko aukera izanen du, ordainsaria izateko eskubidearekin, arrazoi hauengatik, adierazten den gehieneko denborarako eta irizpide hauen arabera:

10. artikulua. Jaiotza, adopzioa, zaintza eta harrera.

Erditzeagatik edo/eta adoptatzeagatik lan-kontratuaren etenaldiak irauten duen bitartean, enpresak langileari behar den ordainsari-osagarria ordainduko dio, jasotzen duen Gizarte Segurantzaren prestazioarekin batera, bere soldata errealaren %100 bermatzeko.

Jaiotza, adopzio, adopzio-helburuko zaintza eta harreraren kasuetan, bete beharko da Langileen Estatutuan eta une bakoitzean indarrean dagoen gainerako legerian xedatutakoa.

11. artikulua. Eszedentziak.

A) Borondatezkoak.

Hitzarmen honen indarraldian, enpresaren zerbitzuan gutxienez urte bateko antzinatasuna duten plantillako langileei borondatezko eszedentzia hartzeko baimena emanen die enpresak, gutxienez lau hilabetez eta gehienez bost urtez.

Eskatzaileak hilabete lehenago eska dezake eszedentzia hori, arrazoirik eman gabe, eta enpresak nahitaez onartu beharko du. Langilearen aurreko eszedentziaren bukaeratik gutxienez lau urte iragan ez baldin badira, enpresaren esku egonen da eszedentzia ematea.

Eszedentzian dagoen bitartean, arau orokor gisa, lau hilabetetik gorako eszedentzia eskatu eta eman izan arren, langileak lau hilabeteren buruan eszedentziaren gainerako zatiari uko egiten ahalko dio; orduan, hilabete lehenago adierazi beharko du lanera itzultzeko asmoa duela.

Nolanahi ere, langileak baldintzak betetzen baditu, enpresak honako irizpide hauen arabera hartuko du berriz lanean:

1. Eszedentziaren lehen urtean itzultzen bada lanera, eszedentzia eskatzean betetzen zuen lanpostura itzuliko da.

2. Lanera lehenengo urtetik aurrera itzultzen bada, enpresak eszedentzia baino lehen betetzen zuen lanpostuan jarriko du berriz, lanpostu hori hutsik badago edo aldi baterako kontratazio bidez betetzen ari bada, edo, bestela, daukan lanbide-taldearen eta soldata-mailaren araberako lanpostu batean.

Itzultzeko eskaera eszedentzia bukatu baino hilabete lehenago egin behar da. Eszedentzian dagoen langileak aipatutako baldintzetan lanera itzultzeko eskatzen ez badu, borondatezko baja dela ulertuko da.

Arau orokorraren salbuespenak dira teknikari laguntzaileen, teknikarien eta zuzendarien taldeetako langileak, maila guztietakoak.

Lanbide-talde hauek ez dute beste eskubiderik enpresan hutsik dauden eta bere mailakoak edo antzekoak diren lanpostuetara itzuli ahal izateko lehentasuna baizik.

Bere lanpostua hutsik ez badago, langileak maila handiagoko edo txikiagoko lanpostu huts bat hartzen ahalko du; azken kasu horretan, beste langile batzuen igoera eskubidea errespetatu beharko du, eta hartu nahi duen lanpostuaren ezaugarriak bete beharko ditu.

Borondatezko eszedentzia ez da ezertarako zenbatuko.

Eszedentzia bukatutakoan, enpresaren esku egonen da luzatzea, langileak hala eskatuz gero.

B) Eszedentzia, seme-alabak edo 2. gradura arteko ahaideak zaintzeko.

Langileek eskubidea dute hiru urteko eszedentzia hartzeko, gehienez, seme edo alaba bakoitza zaintzeko, norberak izandakoa edo adoptatua izan, edo adoptatzeko zaintzan nahiz harrera iraunkorrean hartua. Hiru urte horiek haurra jaiotzen denetik edo, bestela, ebazpen judizialaren edo administratiboaren egunetik aurrera kontatuko dira.

Era berean, langileek gehienez ere bi urteko eszedentzia hartzeko eskubidea izanen dute, negoziazio kolektiboan iraupen luzeagoa ezarri ezean, ezkontidea edo izatezko bikotekidea zaintzeko, edo bigarren gradura arteko odol- edo ezkontza-ahaide bat zaintzeko, izatezko bikotekidearen odol-ahaidea barne, baldin eta adinagatik, istripuagatik, gaixotasunagatik edo desgaitasunagatik ezin bada bere kabuz moldatu eta ez badu ordaindutako jarduerarik egiten.

Atal honetan jasotzen den eszedentzia, zatika hartzen ahal dena, langileen banakako eskubidea da. Hala ere, enpresa bereko bi langilek edo gehiagok subjektu eragile beragatik baliatzen badute eskubide hori, enpresak mugatzen ahalko du eskubide hori aldi berean baliatzeko aukera, funtzionamenduari lotutako arrazoi funtsatu eta objektiboengatik, idatziz behar bezala arrazoituta. Halakoetan, enpresak ordezko plan bat eskaini beharko du bi langileak eskubide horretaz baliatzen direla bermatzeko eta kontziliazio-eskubideak baliatzea ahalbidetzeko. Beste subjektu eragile batek beste eszedentzialdi bat izateko eskubidea sortzen duenean, hura hastearekin bukatuko da ordura artekoa, halakorik izanez gero.

Langileak artikulu honetan ezarritakoaren arabera eszedentzian pasatzen duen denbora antzinatasunerako kontatuko zaio, eta bitartean eskubidea izanen du lanbide prestakuntzako ikastaroetara joateko, enpresak deituta, batez ere lanera itzuli behar duenean. Lehenbiziko urtean lanpostua gordetzeko eskubidea izanen du. Epea bukatuta, gordeko zaion lanpostua lanbide-talde berekoa edo kategoria baliokidekoa izanen da.

Aurrekoa hala izanik ere, langilea baldin bada familia ugari aitortu batekoa, lanpostua hamabost hilabetez gordeko zaio gehienez, kategoria orokorreko familia ugaria denean, eta hemezortzi hilabetez luzeenera jota, kategoria berezikoa denean. Baldin langileak eskubide hori baliatzen badu beste gurasoaren iraupen eta araubide berarekin, lanpostuaren erreserba hemezortzi hilabeteetara luzatuko da gehienez.

Eskubide hori erabiltzean, kontuan hartuko da emakumeen eta gizonen arteko erantzunkidetasuna sustatzea eta, halaber, genero rolak eta estereotipoak betikotzea saihestea.

11.bis artikulua. Kontratua etetea, alderdiek hala adostuz gero.

Enpresak, salbuespenez eta langileak eskatuta, kontratua eteteko akordioa formalizatuko du, bat etorriz Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 45. artikuluan ezarritakoarekin, alderdien arteko adostasunean oinarrituta, honako baldintza hauek betetzen direnean:

–Ezin izanen da langile bat baino gehiago egon aldi berean arlo bakoitzean kontratua eteteko modalitate horrekin. Arlo hauek hartuko dira kontuan:

• Metalizatuak.
• Kote.
• EC-TERM pintatzeko makinak.
• APA.
• EC akaberak.
• Mantentze-lanak.
• Sukaldea, kalitate-kontrola eta I+G.
• Gainerakoa (Zerb. Orok. atezaintza, bulegoak eta aurreko arloetan sartuta ez dauden guztiak).

–Langileak urtean behin baino ezin izanen du eskatu, iraupena edozein dela ere.

–Gutxienez 12 hilabete igaro beharko dira baimen bat amaitzen denetik hurrengoa hasi arte.

–Langileak soberako orduak eta oporrak hartuak izan beharko ditu. Baldintza hori bete gabe eskatzen badu, soberakinen eta oporren kargura emanen zaio, eta hemen araututako kontratuaren etetea eskatutzat joko zaio.

–Langileak gutxienez hilabete bat lehenago eskatu beharko du.

–Egun horiek etenik gabe hartu beharko dira.

–Hala eskatzen duen eta baliatzen duen langileak lanpostua gordeta izateko eskubideari eutsiko dio kontratuaren etenaldiak irauten duen bitartean.

–Aparteko haborokinak likidatzeari dagokionez, etete hori ez da enpresa uztetzat edo enpresan sartzetzat hartuko.

–Kontratua eteteko akordio horrek ezin izanen du iraun 30 egun natural baino gehiago.

–Enpresa akordioa formalizatzeko betebehar horretatik kanpo geratuko da eskaera errelebo-kontratua duen langile batek egiten duenean, errelebo-kontratua sinatuta duen erretiratu partziala erretiro osoko egoerara igarotzen ez den bitartean.

IV. KAPITULUA.–ARAUBIDE EKONOMIKOA

12. artikulua. Berme pertsonalak.

Langileak, bakarka zein taldeka, urteko zenbaketan eta orokorrean, hitzarmen honetan ezarritakoak baino baldintza ekonomiko eta bestelako baldintza hobeak izanez gero, errespetatu eginen zaizkio.

13. artikulua. Konpentsazioa eta irenspena.

Itundutako baldintza guztiek multzo organiko eta zatiezina osatzen dute; halaber, enpresak emandako hobekuntza baten edo dagoen lege baten bidez lehenagotik indarrean dauden baldintzekin konpentsatzen eta irensten ahal dira.

14. artikulua. Lanaldi jarraituaren konpentsazioa.

Langileen Estatutuaren 34.4 artikuluan ezarritakoa ezertan galarazi gabe, segidako 5 ordutik gorako aldian 1, 2, 3 edo 5 txandako araubidean lan egiten duten langileek 2. eranskineko soldata-tauletan adierazitako zenbatekoa jasoko dute kontzeptu horrengatik. Konpentsazio hori lan egindako egun bakoitzeko eginen da.

Aurreko paragrafoan adierazitako diru konpentsazioa ordainagiri ofizialean aparteko lauki batean agerraraziko da, "lanaldi jarraituaren konpentsazioa" izeneko kontzeptuan, laburduraz "LJK", eta ez da, inola ere, aparteko ordu gisa kontatuko.

Lanaldiaren ondorioetarako, atsedenaldi hori benetako lan denboratzat zenbatuko da.

Konpentsazio ekonomiko hori oporraldiko hilabetean ere sartuko da, "Lanaldi jarraituaren oporrengatiko konpentsazioa" (LJOK) kontzeptuan, 22 unitatetan. Unitate horietako 11 uztailean ordainduko dira, eta abuztuan beste 11k.

15. artikulua. Aparteko orduak.

Egungo langabezia-egoera kontuan hartuta eta horren ondorioak arintzeko, aparteko ordurik ez egitea izanen da lan-arau orokorra, salbu ezinbesteko arrazoiengatik edo egiturazkoak izateagatik ordu horiek egin behar direnean eta aldi baterako edo lanaldi partzialeko kontratazioen bidez ordezkapenik egin ezin denean.

–Ezinbesteko orduak: istripuak, suteak, uholdeak edo aparteko bestelako ezbeharrak konpontzeko edo saihesteko egiten dira.

–Beharrezko orduak edo egiturazkoak: lehengaiak edo produktu bukatuak galtzeko arriskua, txanda aldaketak edo langilearen bat-bateko gaixotasuna gertatzen direnean egiten dira, edo lizentzia ordaindu hauetan: ezkontidearen edo bikotekidearen erditzea, ezkontidearen edo bikotekidearen, seme-alaben, gurasoen, anai-arreben, biloben edo aitona-amonen gaixotasun larria eta lehen aipatutako ahaideen heriotza.

Beharrezko edo egiturazko aparteko ordutzat hartuko dira, halaber, enpresak derrigorrez eman behar dituen eta aurreko paragrafoan bildu gabeko lizentzia ordainduen ondorioz sortzen diren orduak.

Aparteko orduak honela ordainduko dira:

–Lehen ordutik 40.era, jaieguneko aparteko orduaren %33 gehi ordu bat ordainduko da atseden-ordu bakoitzeko.

–Lehenengo 40 orduek sortutako atseden-orduak ekainetik urrira bitarte baliatuko dira. Aldi horretan hartu ez diren orduak azarotik abendura bitarte ordainduko dira, jaieguneko aparteko orduaren %67 ordainduta (jaieguneko aparteko orduaren %100era arteko aldea).

–Larunbatetan, igandeetan edo jaiegunetan aparteko orduak egiteagatik sortutako atseden-orduak larunbatetan, igandeetan eta jaiegunetan hartzen ahalko dira, non stop prima kendu gabe.

–Azaroaren 1etik aurrera egindako aparteko orduak, urteko lehen 40 aparteko orduen barruan daudenak, jaiegunetako aparteko ordu gisa ordainduko dira, eta ez dute atsedenik sortuko.

40 aparteko ordu baino gehiago eginez gero, atseden-ordu kopuru berarekin konpentsatuko dira, eta gainera, 2. eranskineko soldata taulen arabera dagokion aparteko orduaren %75eko balioa ordainduko da.

Egindako aparteko orduen atsedena ordu horiek egin eta hurrengo lau hilabeteen barruan hartuko da, urte natural berean. Urte naturalaren mugatik kanpo geratzen dira azaroan eta abenduan aparteko orduak egiteagatik sortutako atseden-orduak, horiek egin eta hurrengo lau hilabeteen barruan hartu beharko baitira.

Enpresa eta langilea ados jarriko dira atseden-orduak zein egunetan hartuko diren zehazteko.

16. artikulua. Laneko jantziak.

Enpresak langileei lohihartzekoak, monoak, petoak, batak edo burutzen dituzten funtzioei egokitutako antzeko jantziak emanen dizkie, pareka beti, eta segurtasun-oinetakoak ere bai. Azidoekin eta bestelako material erregarriekin jarduten duten langileei beren zereginari egokitutako lan-jantziak emanen zaizkie, eta kanpoan edo toki hezeetan lan egiten dutenei, arropa iragazgaitzak eta hezetasunaren kontrako oinetako ahalik eta erosoenak.

Enpresak uniformea erabiltzera behartzen dituen langileei uniformea emanen zaie.

Jantzi horiek erabiltzeko epea urtebetekoa izanen da, eta hori zenbatzeko beti benetako lan denbora kontuan hartuko da eta inoiz ez denboraldi naturalak.

Mantentze-lanetako langileei eta azidoekin eta bestelako material erregarriekin lan egiten duten langileei gehienez urtean bitan berrituko zaizkie lan-jantziak. Beraz, langile horiei ematen eta berritzen zaizkien lan-jantziak urtean ez dira lau baino gehiago izanen.

Segurtasuneko jantziei dagokienez, arlo horretako adituek (enpresakoek, ugazaben mutualitatekoek edo erakunde eskudun ofizialekoek) azterlan egokiak egin ondoren zehaztuko da nahitaez erabili eta eman behar diren.

Hitzarmen hau sinatutakoan indarra hartuta, lan egitean betaurrekoak, ortopediako aparatuak eta entzuteko aparatuak hautsiz gero, enpresak haien konponketak ordainduko ditu, ondorio horietarako eginen den espedientean adieraziko diren beharrezko egiaztapenak egin ondoren. Espediente hori lan istripuen kasuetan egiten direnen antzekoa izanen da.

Lan jakin batzuk egiteko material berezia emanen zaio langileari, zuzendaritzak beharrezkotzat jotzen duen kasu guztietan, laneko segurtasun eta osasun batzordeari entzun ondoren.

17. artikulua. Ordainsarien sistema.

Jarraian adierazten diren kontzeptuek osatuko dute:

A) Soldata.

a. Hitzarmeneko soldata (hitzarmen kolektiboaren 18. artikulua).

b. Osagarriak.

i. Pertsonalak.

1. Antzinatasuna (hitzarmen kolektiboaren 19. artikulua).

2. Osagarri pertsonala (hitzarmen kolektiboaren 18. artikulua).

ii. Lanpostukoa.

1. Non Stop (hitzarmen kolektiboaren 6. artikulua).

2. Gaueko lanaren plusa (hitzarmen kolektiboaren 22. artikulua).

3. Lanaldi jarraituaren konpentsazioa (ogitartekoa) (hitzarmen kolektiboaren 14. artikulua).

4. 1, 2 edo 3 txanda/erreleboko plusa (hitzarmen kolektiboaren 23. artikulua).

5. Mantentze-lanetako deiaren plusa (hitzarmen kolektiboaren 24. artikulua).

6. Mantentze-lanetako prestasunaren plusa (hitzarmen kolektiboaren 24.bis artikulua).

iii. Lanaren kantitate edo kalitatekoa.

1. Aparteko orduak (hitzarmen kolektiboaren 15. artikulua).

iv. Hilabetez gorako mugaeguna dutenak.

1. Eguberrietako haborokina (hitzarmen kolektiboaren 20. artikulua).

2. Udako/ekaineko haborokina (hitzarmen kolektiboaren 20. artikulua).

3. Mozkinetako parte-hartzea (hitzarmen kolektiboaren 21. artikulua).

B) Soldatari ez dagozkion ordainak.

a. Distantzia edo garraioagatiko plusa (hitzarmen kolektiboaren 25. artikulua).

b. Seme-alaben ikasketetarako laguntza (eskola laguntza) (hitzarmen kolektiboaren 26. artikulua).

c. Langileen ikasketetarako laguntza (hitzarmen kolektiboaren 27. artikulua).

d. Desgaitasuna dutenentzako laguntza (hitzarmen kolektiboaren 28. artikulua).

e. Gizarte laguntzako beste prestazio batzuk (hitzarmen kolektiboaren 29. artikulua).

C) Ordainketa delegatuak.

a. Gizarte Segurantzaren beste prestazio batzuk.

2. eranskineko soldata tauletan ezarritako zenbatekoak handituko dira hitzarmen honek indarra duen bitartean, ondoko arauei jarraituz:

–2024ko igoera.

2023ko KPIa aplikatuko zaie lanbide-taldeen akordioko soldata taulei (2. eranskina), gehi 0,2 puntu.

–2025eko igoera.

2024ko KPIa aplikatuko zaie lanbide-taldeen akordioko soldata taulei (2. eranskina), gehi 0,25 puntu eta ondoko taula honen balioa.

2024an baja eragin duten istripuen kopurua zero bada (0), aurreko eragiketen emaitzari 0,15 puntu gehituko zaizkio.

KPIa negatiboa izanez gero, KPIa 0 gisa kontatuko da.

–2026ko igoera.

2025eko KPIa aplikatuko zaie lanbide-taldeen akordioko soldata taulei (2. eranskina), gehi 0,3 puntu eta ondoko taula honen balioa.

2025. urtean baja eragin duten istripuen kopurua zero bada (0), 0,15 puntu gehituko dira; baina 2024. eta 2025. urteetan baja eragin duten istripuen kopurua zero bada (0), 0,20 puntu gehituko dira.

KPIa negatiboa izanez gero, KPIa 0 gisa kontatuko da.

18. artikulua. Hitzarmeneko soldata.

Hitzarmen hau sinatzen denetik aurrera, talde edo maila bakoitzarentzat kontzeptu hori hitzarmen honek indarraldiaren urte bakoitzean taulen arabera (2. eranskina) zehazten duena izanen da; horrek atzerako eragina izanen du, 2024ko urtarrilaren 1etik hain zuzen.

Soldataren igoerak aplikatzean ateratzen den kopurua eranskinetako tauletan agertutakoak baino handiagoa bada, beren soldaten hartze-agiriak taula horiei egokituko zaizkie, eta gehiegizko kopurua aparteko lauki batean zenbatuko da, "Osagarri Pertsonal" gisa.

"Osagarri Pertsonal" hori urtero igoko da Hitzarmeneko Soldatan urterako itundutako ehunekoaren arabera.

Hitzarmen honetan ezarritako lansariak gordinak direla ulertzen da. Gizarte Segurantzako kuoten eta mota guztietako zergen kontzeptuan langileek ordaindu behar dituzten kopuruak beren lansarietatik kenduko zaizkie, eta horren kontrako itun oro baliogabea izanen da.

19. artikulua. Antzinatasuna.

Langile finko guztiek izanen dituzte zerbitzuan emandako denboragatiko aldizkako igoerak. Honela kalkulatuko da: bi hirurteko eta hortik aurrerako bosturtekoak.

2. eranskineko soldata tauletan ezartzen da hirurteko edo bosturteko horien balioa.

1979ko urtarrilaren 1a baino lehen sartutako langileentzat aldizkako igoeren muga 2 hirurteko eta 5 bosturtekotakoa da (31 urte).

1979ko urtarrilaren 1etik aurrera sartutako langileentzat aldizkako igoeren muga 2 hirurteko eta 4 bosturtekotakoa da (26 urte).

Denbora horiek bete eta hurrengo hileko lehen egunetik hasiko dira sortzen aldizkako igoerak.

Talde edo maila aldaketa finkatuta dutenek taulan bere talde edo maila berriari dagokion antzinatasun plusa kobratuko dute.

Langile bat indarrean dagoen behin-behineko kontratua duenean, berea edo aldi baterako laneko enpresaren bidezkoa, eta enpresan kontratu finkoarekin hasten bada, antzinatasunerako behin-behineko kontratazioaren aldi hori hartuko da kontuan.

20. artikulua. Aparteko haborokinak.

Ekaineko eta Eguberrietako aparteko eskersarien zenbatekoa 2. eranskineko soldata tauletakoa da, eta hitzarmeneko soldataren, osagarri pertsonalaren eta antzinatasunaren 30 egun adinakoa da.

Haborokin horietatik lehena ekaineko nominarekin batera ordainduko da, eta bigarrena abenduaren 15etik 20ra bitartean.

Urtean enpresan sartu edo enpresatik alde egiten duten langileek laneko denboraren proportzioan kobratuko dituzte haborokin horiek; hilabete osotzat joko dira hilabetearen zatiak.

21. artikulua. Mozkinetako partea-hartzea.

Mozkinetako parte-hartzea 2. eranskineko soldata tauletan ezarrita dagoenaren arabera ordainduko da.

Urte bakoitzeko martxoaren 31 baino lehen ordainduko da.

Urtean enpresan sartu edo enpresatik alde egiten duten langileek, behin-behinekoek eta bitartekoek, lan egindako denboraren proportzioan kobratuko dute parte-hartze hori; hilabete osotzat joko dira hilabetearen zatiak.

22. artikulua. Gaueko lanaren plusa.

Zerbitzuak 22:00etatik 6:00etara bitartean egiten dituen langileak gaueko lanaren plusa kobratuko du. Plus horren zenbatekoa 2. eranskineko soldata tauletan adierazten da maila eta talde bakoitzerako.

Aipatutako plusa gauez lan egindako egun bakoitzeko kobratuko da eta tarte horretan lan egindako orduen proportzioan, eta, beraz, langilearen absentzietan ez da ordainduko, absentzia horiek lizentzia ordainduaren izaera badute ere, 67. eta 72. artikuluetan xedatutakoan izan ezik.

Produkzio-premiak direla-eta, langileak txanda aldatzen badu aldi labur baterako, eta ohiko txanda-egutegiaren arabera dagozkion gauak egiteari uzten badio, jatorrizko egutegiaren arabera dagozkion gauak jasoko ditu. (Gehienez 5 gau 3 txandako langileentzat eta gehienez 3 gau 5 txandako langileentzat). Muga hori gaindituz gero, langileak benetan lan egindako gauak jasoko ditu.

Aurrekoa gorabehera, 3 txandako araubidean dagoen langile bat enpresaren beharrengatik txanda bateko edo biko lanpostu bat behin-behinean betetzen hasten bada, 5 gau ordainduko zaizkio 30 egunean behin, aurreko paragrafoan araututako 5 gauak ordaintzen zaizkionetik zenbatzen hasita.

Konpentsazio ekonomiko hori oporraldiko hilabetean ere sartuko da, "Lanaldi jarraitua-oporrengatiko konpentsazioa" (LJOK) kontzeptuan, 6 unitatetan. Unitate horietako 3 uztailean ordainduko dira, eta abuztuan beste 3rak.

23. artikulua. Txanda 1eko, 2ko edo 3ko plusa.

Txanda 1eko, 2ko edo 3ko araubidean lan egiten duten langileek 2. eranskineko soldata tauletan adierazitako kopurua jasoko dute hilean.

24. artikulua. Mantentze-lanetako deien plusa.

Mantentze-lanetako langileek, beren txandatik kanpo deiak hartzen badituzte, 2. eranskineko soldata tauletan adierazitako kopuruak jasoko dituzte.

24.bis artikulua. Mantentze-lanetako prestasunaren plusa.

Mantentze-lanetako atalean lanaldi zatitua duten langileak arduratuko dira makinen edo instalazioen geldialdiez, haiek esku hartzea beharrezkoa denean.

Ardura hori dela eta, lantegian ohiko ordutegitik kanpo egotea ekartzen ahal baitu, 2. eranskineko soldata tauletan "Mantentze-lanetako prestasuna" izenpean jasotzen den zenbatekoa kobratuko dute hilean.

25. artikulua. Distantzia plusa.

Enpresaren garraio zerbitzuak ezin erabili dituzten langileek dagokien kilometro-ordaina jasoko dute, 2. eranskineko soldata tauletan jasotzen den zenbatekoarekin.

26. artikulua. Seme-alaben ikasketetarako laguntza.

Eskolara (derrigorrezko zikloak) joateko adineko seme-alabak dauzkaten langileei ikasketetarako laguntza gisa kopuru bat ordainduko zaie urtean.

Laguntza horren baremoak eta zenbatekoak 2. eranskineko soldata tauletan jasotzen dira.

Bi langilek edo gehiagok seme edo alaba beragatik laguntza hori jasotzeko eskubidea badute, langile horietako batek bakarrik jasoko du.

27. artikulua. Langileen ikasketetarako laguntza.

Laguntza emanen zaie ikastetxe ofizialetan lanpostuarekin lotura duten ikasketak egiten dituzten langileei, horretarako prestatutako ondoko araudiarekin bat.

–Langileen lanbide heziketarako ikasketen laguntzari buruzko jarraibideak.

1. Araudi honen helburua Leitzako lantokiko langileek eskatzen dituzten ikasketetarako laguntzak emateko jarraitu beharreko prozedura ezartzea da.

2. Ikasketetarako laguntza enpresak lanalditik kanpo ikasketak egiten dituzten langileei ordaintzen dien kopurua da.

Jarraibide hori betetzeaz hauek arduratuko dira:

a) Langileriaren zuzendaria; hark jasoko ditu ikasketetarako laguntzen eskaerak, eta eskaerek jarraibide honen eskakizunak bete ditzatela zainduko du.

b) Giza Harremanen Departamentua; hark emanen die ikasketetarako orientabidea eskatzen duen langile orori.

c) Lantokiko batzordea; hark Langileria Departamentuarekin batera aztertuko ditu eskaerak.

3. Ikasketetarako laguntzak eskatzaileak eskatutako beste edozein laguntza ofizial edo pribaturekin bateragarriak izanen dira, baina laguntza batzuen eta besteen artean ezin izanen da gainditu egindako ikasketen zenbatekoa. Ondorio horretarako, eskatzaileak beste bide batzuetatik jasotako laguntzen zenbatekoa aitortuko du.

4. Ikasketetarako laguntza emateko eskatzen ahalko dute lantoki honetako langile guztiek, baldin eta ikasketak lanalditik kanpo egiten badituzte.

5. Ikasketetarako pizgarria eta ikasketetan hobetzeko ahalegina benetakoak izan daitezen, ikasketetarako laguntzak ikasketak guztiz estaliko ditu, 240,40 eurora arte, baita kopuru horretatik gorakoaren %50 ere, gehienez ere 1.202,03 eurora arte urtean, ondoko zenbateko hauei dagokienez:

a) Matrikula gastuak edo inskribatzeko eskubidea.

b) Testuliburuak.

c) Hileko ordainketa, irakaskuntza ez-ofiziala bada; eta antzeko kopurua ikastegi ofizialetan egiten diren ikasketa guztietarako.

6. Eskatzaileak urte bakoitzeko urriaren 30a baino lehen beteko du ikasketetarako laguntza eskatzeko dagokion inprimakia, eta Langileriaren Zuzendaritzara bidaliko du. Eskaera jaso eta gero, zuzendaritzak, Enpresa Batzordearekin batera, laguntzen eskariak aztertuko ditu, horretarako frogagiri egokiak eta eskatzaileak aurkeztutako gastu-kopurua egiaztatuta, eta horren guztiaren arabera, laguntza ematea onartu, murriztu edo ukatuko du, eta interesdunari ahalik eta lasterren jakinaraziko dio.

Ikasketetarako laguntza ematea onartzen bada, zuzendaritzak honako hau eginen du:

–Adierazten den epean laguntza ordaintzeko beharrezko funtsak eskatuko dizkio Diruzaintzari.

–Kopia bidaliko dio Langileria Departamentuari.

–Jatorrizkoa interesdunaren espedientean artxibatuko du.

Laguntza ukatzen bada, interesdunari horren berri emanen zaio ahalik eta lasterren.

7. Ondoko hauetako bat gertatzen bada, onuradunak laguntza galduko du, guztiz edo zati batean, langileen ordezkariek eta zuzendaritzak batera emandako iritziaren arabera:

a) Ekaineko eta iraileko deialdien artean ikastaro ofiziala gainditzen ez badu.

b) Ikasketa ez-ofizialak direnean, ikastarora joan dela eta aprobetxamendu normala izan duela adierazteko, ikastegiko zuzendaritzak eman beharreko egiaztagirik ez badago.

c) Eskatzaileak behar bezala frogatutako ezinbesteko arrazoiengatik (gaixotasuna, istripua, familiako arrazoi larriak etab.) ikasketak eteten baditu, ordura arte ordaindutako zenbatekoak soilik ordainduko dira, jarraibide honen 5. puntuaren arabera.

d) Eskatzaileak bere ikasketak bertan behera uzten baditu edo ikasketetara joan izanaren egiaztagiririk aurkezten ez badu, jasotako zenbatekoak konturako aurrerakin gisa hartuko dira, eta enpresak bere esku dauka horren itzulketa.

e) Eskaeraren inprimakian adierazitako daturen bat faltsua bada.

8. Langileria Departamentuak laguntza ordaintzeko beharrezko funtsak eskatuko dizkio Diruzaintzari. Laguntza honela ordainduko da:

–%50, urriko lehen hamabostaldian.

–Gainerako %50, uztailean.

Artikulu honetan jasota ez dagoen orotan, unean indarra duen legerian xedatutakoak aginduko du.

28. artikulua. Desgaitasunak dituztenentzako laguntza.

Desgaitasuna duen pertsona bat bere legezko ardurapean duen langileari, lantoki honetakoari, enpresak ordainduko dio semeari edo alabari legokiokeen eskola laguntzaren bi halako, adin-mugarik gabe.

29. artikulua. Gabonsaria.

Eguberria baino egun batzuk lehenago, enpresak lantoki honetako langileei eguberrietako saski ohikoa emanen die opari.

Saski horren balioa eguneratzeko, erreferentzia-balio gisa 2. mailako talde operatiboen egun bateko enpresa hitzarmeneko soldata hartuko da.

30. artikulua. Soldaten ordainketa.

Soldatak hilabetea bukatutakoan ordainduko dira, bai beren hartzekoak hilero sortzen dituzten langileei, bai eguneko edo lanorduko sortzen dituztenei.

Ordainsariak enpresaren usadiozko edo ohizko datetan ordainduko dira.

Ordainbide guztietan, langileak soldaten ordainagiriaren kopia bat jasoko du, ordainsari kontzeptu desberdinak, Ogasun Publikoari ordaintzen diona eta Gizarte Segurantzarako kotizatzen duena jakin ditzan.

Behar bezala kreditaturiko banku-abonuak dagokion soldata-ordainagiriaren sinadura ordeztuko du.

31. artikulua. Dietak.

Zerbitzuaren beharrengatik langileren batek bere ohiko destinoa daukan herritik lekualdatu behar badu, enpresak bere eguneko hitzarmeneko soldataren %75 ordainduko dio otordu bat bizilekutik kanpo egiten duenean eta %200, berriz, bizilekutik kanpo jan eta lo egin behar duenean.

Enpresak ohikoak ez bezalako lanak agindu dizkiola-eta langilea ezin denean bere bizilekura bazkaltzera itzuli, bazkariagatiko dieta kobratzeko eskubidea izanen du, bere herrian bertan bada ere.

Joan-etorriko gastuak enpresaren kontura izanen dira.

Inguruabar bereziengatik joan-etorriak sortutako gastuek dieten zenbatekoa gainditzen badute, enpresak ordaindu beharko du gehiegizko kantitate hori, egindako gastuak justifikatu ondoren. Bidaietan emandako denborak ez du inolako gehigarririk sortuko iraupenak legezko lanaldia gainditzeagatik.

V. KAPITULUA.–LANGILEEN ARAUBIDEA

32. artikulua. Berdintasuna eta diskriminaziorik eza.

Enpresaren barrenean ezin izanen da langilerik diskriminatu ideologia, erlijioa, arraza, afiliazio politiko edo sindikala eta abarreko arrazoiak direla-eta.

Enpresako lanpostu guztietarako sarbide berdintasunaren printzipioa errespetatuko da, nola gizonezkoentzat hala emakumezkoentzat eta inolako diskriminaziorik gabe.

Lanposturen bat betetzeko deialdiren bat gertatzen denean, sexua alde batera utziko da erabat, eta eskatutako gaitasun profesionalari besterik ez zaio begiratuko.

Batzorde mistoak, indarra duen bitartean, Berdintasunari buruzko Legea aplikatzeko behar diren egokitze eta garatze neurriak aztertuko ditu, barnean dela 250 langiletik gorako enpresetarako berdintasun planei dagokiena.

33. artikulua. Laneko osasuna eta segurtasuna.

1. Enpresak eta langileek beren gain hartuko dituzte laneko segurtasunaren eta osasunaren arloan Hitzarmen Kolektibo honetako xedapen berariazkoek eta unean-unean indarrean dagoen legeriak zehazten dituzten elkarrekiko eskubideak eta erantzukizunak.

Horrenbestez, Enpresako Zuzendaritzak prebentzio-ekintzako planak ezartzeko konpromisoa hartu du, ahal duen neurrian eta aurrez adostutako epeetan. Plan horien helburu komun eta zehatzak honako hauek izanen dira: istripuak eta egiaztatutako arriskugarritasun-, toxikotasun- edo nekagarritasun-arriskuak pixkanaka murriztea edo ezabatzea, baita ingurumen-baldintzak eta lanpostuenak hobetzea ere, bereziki aintzat hartuz langileen legezko ordezkariek zuzenean edo segurtasun eta osasun delegatuen bitartez egiten dituzten proposamenak. Horretarako, posible eta beharrezko diren zuzenketa neurri teknikoak aplikatuko dira eta, bitartean, beharrezko eta egoki iritzitako babes pertsonalerako jantzi eta baliabideak langileen esku jarriko dira, eta erabili eginen dira.

Bestalde, langileek, banaka, laneko segurtasunaren eta osasunaren arloan jasotako jarraibideak bete beharko dituzte nahitaez, prestakuntza eta informazio teoriko eta praktiko nahikoa eta egokia jaso ondoren. Batez ere enpresan prebentzio zerbitzuaz arduratzen direnen aholkularitza jasoko dute, babes pertsonalerako baliabide eta jantzien nahitaezko erabilerari buruzko informazioari dagokionez.

2. Laneko arriskuei aurrea hartzeko gaietan eginkizun berariazkoak dituzten ordezkariak dira langileen prebentzioko delegatuak.

Langileen ordezkariek beren artean izendatuko dituzte prebentzioko delegatuak, Laneko Arriskuen Prebentzioari buruzko Legearen 34. artikuluak aipatzen dituen arauetan aurreikusitako ordezkaritza organoen eremuan, eskala honen arabera:

–251 eta 500 langile bitartean: prebentzioko 4 delegatu.

–501 eta 1000 langile bitartean: prebentzioko 5 delegatu.

Batzordean, alde batetik, prebentzioko delegatuak izanen dira eta, bestetik, enpresaburua eta/edo haren ordezkariak, prebentzioko delegatuak zenbat, horiek ere horrenbeste.

Aurreko paragrafoetan aipatutako osaeran sartzen ez diren sindikatuen ordezkariak eta enpresako prebentzioko teknikari arduradunak batzordearen bileretara joanen dira, eta hitz egiteko eskubidea izanen dute; ez, ordea, botoa ematekoa. Berebat batzordean egoten ahalko dira, arestian aipatu diren baldintzetan, segurtasun eta osasun batzordean eztabaidatzen diren gaietan adituak diren edo prestakuntza berezia izan duten enpresako langileak, baita enpresakoak ez diren prebentzioko teknikariak ere, baldin eta batzordeko ordezkarietako batek hala eskatzen badu.

Prebentzioko delegatuek, langileen ordezkari direnez, Langileen Estatutuko 19. artikuluan ezarritako berme guztiak izanen dituzte.

Prebentzioko delegatuek beren eginkizunetan ematen dituzten orduak ordezkaritza eginkizunetan emandako ordutzat joko dira, hitzarmen honetako 67. artikuluan aurreikusi diren hileko ordu ordainduen kredituaren erabilerari dagokionez.

Nolanahi ere, ordu horiek benetako lan denboratzat joko dira, hau da, ez dira egotziko aipatutako ordu kreditura, segurtasun eta osasun batzordearen bileretan edo arriskuen prebentzio alorrean enpresaburuak deitutako beste edozeinetan emandakoak badira. Halaber, lanean sartutako ordutzat joko dira Laneko Arriskuen Prebentzioari buruzko Legearen 36.2 artikuluko a) eta c) letretan aurreikusitako bisitetarako erabiltzen direnak.

Era berean, benetako lan denboratzat hartuko da, hau da, ez dira egotziko aipatutako ordu kreditura, prebentzioko delegatuek lantokietara egiten dituzten bisitak lan-baldintzen egoera zaintzeko eta kontrolatzeko. Horretarako, lantokietako edozein eremutan sartzen ahalko dira, eta lanaldian zehar langileekin komunikatzen ahalko dira, produkzio-prozesuaren garapen normala eragotzi gabe, hilabete natural bakoitzean 8 orduko mugarekin.

Beren eginkizunetarako premiazkoak diren prebentzio alorreko baliabideak eta prestakuntza emanen dizkie prebentzioko delegatuei enpresaburuak.

Enpresaburuak prestakuntza bere baliabidez emanen du, edo alor horretan espezializatuta dauden erakunde edo entitateekin itunak eginda. Prestakuntza hori arriskuen bilakaerara egokituko da uneoro, eta sor daitezkeen arrisku berrietara, eta, beharko balitz, aldizka-aldizka errepikatuko da.

Enpresak, bestalde, beharturik daude langileek behar dituzten baimen ordainduak ematera, prebentzio alorrean erakunde edo instituzio ofizialek antolatzen dituzten laneko segurtasun eta osasun arloko prestakuntza ikastaroetara joan daitezen. Enpresaburuek, halaber, hitzarmen hau sinatu duten erakundeek antolatzen dituzten prestakuntza ikastaro eta jardunaldietara joateko baimenak emanen dituzte, horiek eskudun diren organismoek emandako ahalmenetan sartzen direnetakoak badira.

3. Segurtasun eta osasun batzordeak urte bakoitzerako ezartzen den egutegiaren arabera eginen ditu bilerak eta gutxienez hiru hilean behin bilera bat egitera behartzen duen araua beteko du; gainera, batzordeko buruak eskatzen duen bakoitzean edo batzordeko ordezkaritzetako batek deitzen duenean ere eginen dira.

Horren ondorioetarako, eta proposamenak egiteko nahiz erabaki espezifikoak hartzeko ahalmenak erabiltzeari dagokionez, ulertzen da bai enpresak izendatutako kideek bai langileek izendatutako ordezkariek boto kopuru bera dutela beti, ez gehiago ez gutxiago.

Segurtasun eta osasun batzordearen bilera bakoitzaren akta eginen da, eta horren kopia bana emanen zaie hitzarmen honetako 69. artikuluan aipatzen diren enpresako atal sindikaletako delegatuei.

4. Segurtasun eta osasun batzordeak ondorengo ahalmen eta erantzukizun berariazkoak izanen ditu, alde batera utzi gabe unean-unean indarrean dauden lege xedapenek ematen dizkiotenak.

a) Artikulu honen 1. atalean zehazturiko programen eta lantokian nahitaez bete behar diren laneko segurtasun eta osasun arauak prestatzen, abiarazten eta horien aplikazioa kontrolatzen parte hartzea.

b) Enpresari proposatzea egoki iritzitako lehentasunen ordena, aurreikusitako programak burutzeko beharrezko inbertsioak onartu aurretik.

c) Material, instalazio, makina eta produkzio prozesuaren bestelako alderdiei buruzko informazioa jasotzea, dauden arrisku erreal edo potentzialak ezagutzeko eta haiek desagerrarazteko edo murrizteko neurriak proposatzearren beharrezkoa den neurrian.

d) Ukitutako langileei osasun neurriei edo arrisku edo istripuen ikerkuntzari buruzko informazioa ematea, egokien iritzitako bideen bidez.

e) Enpresari babeserako eta zaintzarako neurri bereziak hartzeko eskatzea langileen osasunerako arrisku nabarmenak edo frogatuak ekartzen dituzten lanpostuetan.

f) Enpresako prebentzio zerbitzuarekin, agintariekin eta segurtasun teknikariarekin elkarlan estuan aritzea, laneko istripu eta gaixotasunen arrazoiak desagerraraztera bideratutako prebentzio neurriak ezartzen eta horien eraginkortasuna eta emaitzak kontrolatzen.

g) Prebentzio zerbitzuaren eta segurtasun teknikariaren aholkularitza eskura izatea, lanbide eremuan berezko edo espezifiko zaizkien alor guztietan.

Halaber, laneko segurtasun eta osasunean espezializaturiko erakunde ofizialek eta, hala badagokio, enpresarekin aldez aurretik harturiko akordioaz, beste erakunde espezializatu batzuek lanpostuetan agertzen diren agente kutsatzaileen metaketa erreala edo arrisku maila ikertzen parte har dezatela eta horri buruz aholkularitza eman dezatela eskatzea. Nolanahi ere, alderdi biek onartuko dituzte egindako neurketen emaitzak, eta egindako ikerlana biltzen duten txostenetan proposatzen diren agindu eta neurri zuzentzaileak aplikatuko dituzte; horien kopia bat segurtasun eta osasun batzordeari eskuratuko zaio.

34. artikulua. Medikuntza zerbitzua.

Laneko segurtasun eta osasun batzordeak laneko medikuntza, higiene eta segurtasun zerbitzuek enpresetako lanean egiten dituzten ekintzen berri izanen du, eta bere lankidetza osoa eskainiko du; halaber, langileen babes eta osasunarekin loturiko alderdi guztien berri izanen du.

Laneko Arriskuen Prebentzioari buruzko azaroaren 8ko 31/1995 Legearen 22.1 artikuluan ezarritakoa ukatu gabe, enpresak osasun azterketa eginen die urtero beharginei.

Azterketa horretan, gutxienez, gernuaren eta odolaren analisiak eginen dira, baita azterketa orokorra ere. Toxiko, neketsu edo arriskutsutzat jotzen diren lanpostuetan lan egiten duten langileen kasuetan, arriskuaren araberakoak izan beharko dira azterketa horiek, hala denboraldian nola analisien eta azterketen espezializazioan.

Osasun azterketak langile bakoitzaren ohiko lanaldiaren barrenean eginen dira.

Zerbitzu medikoek langileari berari entregatu beharko dizkiote azterketaren emaitzak.

35. artikulua. Gaitasun urrituko langileak.

Enpresak indarreko legedia bete beharko du minusbaliotasunen bat duten langileei dagokienez; horrek esan nahi du plantillaren %2 mota horretako langileek bete beharko dutela.

Edozein arrazoirengatik gaixotasun edo istripu baten ondorioz gaitasun fisikoa edo mentala urritua duten langileei, beren hondar-gaitasunarekin bateragarriak diren lanpostuak betetzeko aginduko zaie.

Hala ere, eta bestelako konponbideak ezinezkoak izanez gero, beren lanpostuari eusteko lehentasuna izanen dute edozein egoera txarren aurrean.

Enpresak ohiko lanbiderako ezintasun iraunkorra eta osoa adieraztearen ondorioz lan-kontratua iraungia daukaten 55etik beherako langileak kontratatuko ditu; gehienez ere 10 pertsona kontratatuko ditu, beren hondar-gaitasunaren arabera. Lanaldi erdiko kontratuak eginen dira eta lanpostu berriari proportzioan dagokion lansaria ordainduko zaie; enpresan duten antzinatasuna aitortuko zaie eta inola ere ez zaie deskontatuko jasotako kalte-ordainaren zenbatekoa.

36. artikulua. Kontratazioa.

Plantilla handitzeko erabakia enpresaren zuzendaritzaren ahalmena izanen da. Lanpostu berriak bete behar dituzten pertsonak zehaztea ere enpresaren zuzendaritzari dagokio, hitzarmen kolektibo honetan xedatutakoaren eta uneoro indarrean dagoen legediaren arabera.

Aurrekoa gorabehera, langileak hautatzeko, kontuan hartuko da hautagaiek enpresan aurretik lan egindako denbora.

Enpresak baldintza hauekin kontratatuko ditu langileak aldi baterako laneko enpresen bidez:

–Enpresako langileen hileko benetako absentismoa eta oporrak estaltzeko.

–Makinetan lan-araubidea aldatzeagatik beharrezkoa denean, 3 txandatik 5era pasatzean. Aldi baterako laneko enpresaren bidezko kontratazio hori ezin izanen da 6 hilabetetik gorakoa izan. Denbora hori igarotakoan, kontratu mugagabe bihurtuko da.

Enpresak tratu eta aukera berdintasuna errespetatuko du, eta neurriak hartuko ditu gizon eta emakumeen arteko laneko diskriminaziorik izan ez dadin, enpresako berdintasun plan indardunean ezarritakoa betez.

37. artikulua.

Enplegu arloan indarra duten xedapenen arabera onartuko dira langileak, behin-behineko edo bitarteko langile gisa zerbitzuak emanak dituztenei berdintasunean lehentasuna emanez. Izangaiek legeak eskatutako formalitateen mende egon beharko dute, baita lege horren aurka joan gabe enpresak finkatzen dituenen mende ere.

38. artikulua.

1. Langileak enpresan lanean hastean proba gisa ariko direla ulertuko da, idatziz horrela agertzen bada.

2. Probaldiaren gehieneko iraupena hau izanen da:

a) Talde operatiboak - 1. maila: 7 egun.

b) Talde operatiboak - 2. maila: 15 egun.

c) Talde operatiboak - 3. maila eta taldea.

–Teknikari laguntzaileak, maila guztietan: 2 hilabete.

d) Teknikarien eta zuzendarien taldeak maila guztietan: 6 hilabete.

3. Ezintasun iragankorrean egoteak probaldia etenen du.

4. Probaldian, langileak nahiz enpresak hura bere horretan utzi edo kontratua iraungitzen ahal dute aldez aurretik abisurik eman gabe, ezein alderdik kalte-ordainik jasotzeko eskubiderik izan gabe, baina bai langileak dagokion likidazioa. Probaldia gainditu ondoren, langilea plantillan sartuko da eta probaldiaren denbora antzinatasunaren ondorioetarako zenbatuko da.

5. Behin-behineko edo bitarteko langileek ez dute probaldirik beharko bere kontratuarengatik finko izatera igarotzen direnean.

39. artikulua.

Teknikarien eta zuzendarien taldeetako lanpostuak (maila guztietan) eta teknikari tituludunen lanpostuak (unibertsitateko titulu bat izatea eskatzen da lanpostu horietarako) izendapen librekoak izanen dira, ukatu gabe oposizio-lehiaketaren deialdia egiteko aukera haiek betetzeko.

Gainontzeko taldeetako lanpostuak enpresan sartzekoak izanen dira soilik baldin eta enpresan haiek betetzeko probak gainditu dituen langilerik ez badago.

40. artikulua. Mailaz igotzea.

Enpresa behartuta dago Enpresa Batzordeari sarrera eta igoera plazak hornitzeko oposizio-lehiaketa bidezko deialdien berri ematera, probak egin behar diren eguna baino lehen, behar bezain garaiz. Orobat, enpresaren iragarki-tauletan argitaratuko dituzte.

41. artikulua.

Enpresako langile guztiek lehentasunezko eskubidea izanen dute lantoki honetako edozein talde eta mailatan sortzen diren lanpostu hutsak betetzeko, baldintza berberetan.

42. artikulua.

Gai honi buruz indarra duten legezko xedapenetan ezartzen dira sarrera eta igoeretarako baldintzak, baita aurreko eta ondorengo artikuluetan ere. Igoeretarako, antzinatasuna lehentasunezko merezimendua izanen da, baldintza berberetan.

43. artikulua.

Oposizio-lehiaketa bidez eginen dira teknikari laguntzaileen taldeko lanpostu igoerak, maila guztietan, enpresako langileen artean.

Arau honetatik baztertuta gelditzen dira teknikari tituludunak.

44. artikulua.

Igoeretarako lehiaketak, gaitasun azterketak eta gaitasun probak epaituko dituen epaimahaietako burua enpresaren zuzendaria edo bere ordezkari bat izanen da, hitza eta botoa dituela. Bestetik, zuzendariak epaimahaiko bi kide izendatuko ditu eta Enpresa Batzordeak beste bi, hitza eta botoa dituztela jardun dezaten. Kide horien maila edo taldea bete behar diren lanpostuena bezalakoa edo handiagoa izanen da.

45. artikulua. Plantillak.

1. Urte bakoitzeko azken hiruhilekoan, enpresak langileen ordezkariei plantillak urtean izan duen bilakaera azalduko die. Halaber, egindako jarduera eta produkzioen berri emanen die, eta horiek urtean nola antolatu diren azalduko die, baita zer kontratazio modalitate erabili diren eta aparteko zenbat ordu sartu diren ere.

2. Hori oinarri hartuta, enpresak hurrengo urterako plantilla aurreikuspenak eta helburuak finkatuko ditu, betiere, produkzio eta salmenta-helburuekin lotuak. Halaber, finkatuko du urtean zehar izanen duen bilakaera, merkatu egoera, egin beharreko inbertsioak, berrikuntza teknologikoak, prestakuntza eta igoera planak, plantillak gaztetzeko balizko proiektuak etab. Aurreikuspen eta helburu horien berri emanen zaie langileen ordezkariei.

Plantillaren balantze eta aurreikuspenak nahiz horien eta enpresaren jardueren arteko harremana egiteko, langileak arlo eta sail organiko funtzionaletan eta lanbide-taldetan banakatuko dira, eta dagozkien kontratu motak ere adieraziko dira.

3. Hiru hilean behin langileen ordezkariei azaldutako aurreikuspenen bilakaeraren eta hurrengo hiruhilekorako proiektuen berri emanen zaie, erabili beharreko kontratu motak ere adierazita.

4. Igoera bidez langileak sustatzea galarazi gabe, enpresak hutsik gelditzen diren lanpostuak amortizatzen ahal ditu. Langileen ordezkariei horren guztiaren berri emanen zaie.

46. artikulua. Lekualdaketak.

Langileen lekualdaketak honela egiten ahalko dira:

a) Langile interesdunak eskatuta.

b) Enpresaren eta langilearen artean adostuta.

c) Teknika, antolaketa edo produkzio arloko arrazoiengatik.

47. artikulua.

Enpresak aldez aurretik onartuta, lekualdaketa langileak eskatuta egiten denean, langileak ez du aldaketak sortzen dituen gastuengatiko kalte-ordainik jasotzeko eskubiderik, eta lanpostu berriaren baldintzak bete beharko ditu; baldintza horiek idatziz eman beharko zaizkio aditzera.

48. artikulua.

Lekualdaketa enpresak eta langileak adostuta egiten bada, lekualdaketa horren baldintzei dagokienez, bi alderdiek hitzartutakoa beteko da; betiere, idatzita jasoko da.

49. artikulua.

Egiaztatutako arrazoi ekonomikoak, teknikoak, antolaketakoak edo produkziokoak direla eta, justifikatuta dagoenean eta aurreko artikuluan ezarritako adostasunera iristen ez denean, enpresak langilea lekualdatzen ahalko du, familiaren bizilekua (egoitza) aldatzera behartuta, baldintza hauetan:

–Lekuz aldatutako langileak, aldez aurretik justifikatuta, konpentsazio gisa gastu hauen zenbatekoa jasoko du:

• Langilearen joan-etorrien gastuak eta berarekin bizi diren ahaideenak edo ekonomikoki bere menpe daudenenak.
• Altzari eta tresnen garraioko gastuak.
• Bi hileko soldata erreala kalte-ordain gisa, esku-dirutan, familiaburu bada, eta 45 egunekoa, familiaburu ez bada.
• Seme-alaben eskola-gastuen diferentzia justifikatua, halakorik baldin badago, lekualdatzea gertatzen deneko ikasturtea bukatu arte.

–Gainera, lekuz aldatutako langileari bere beharrizanei egokitutako eta lekuz aldatu arte ordaintzen zuen errenta berdineko etxebizitza lortu beharko dio enpresak, eta hori ezinezkoa bada, lekuz aldatutako langileari errentaren diferentzia justifikatua ordainduko dio.

–Enpresak lekuz aldatzeko erabakia gutxienez bete baino 30 egun lehenago jakinarazi beharko die langileari eta bere legezko ordezkariei.

Lekuz aldatzeko erabakia jakinarazi ondoren, langileak kontratua desegitea erabakitzen badu, indarreko legedian xedatuta dagoena bete beharko da.

Langileak kontratua desegin ez arren, enpresaren erabakiarekin ados ez badago, jurisdikzio eskudunaren aurrean horren aurka egiten ahal du, indarreko legedian ezarrita dagoen epean. Dena dela, lekuz aldatzeko agindua bete eginen da.

Enpresaren ahalmen hori langile bakoitzarekin behin soilik erabiltzen ahal da, baldin eta kontratuan horri buruzko hitzarmena egiten ez bada.

Aldi baterako lekuz aldatzeari dagokionez, Langileen Estatutuaren 40. artikuluko 6. atalean eta horri buruzko gainerako indarreko xedapenetan ezarritakoa beteko da.

50. artikulua.

Langile gehiegi egoteagatik langileak lanbide-talde batetik bestera nahitaez lekuz aldatu behar badira, jatorrizko taldera itzuli beharko dira beren kategoriako lanpostu hutsak sortu bezain laster.

Kategoria profesional beraren barreneko lekualdatzeetan, lekuz aldatutako langileak hobekuntza edo onuraren bat izan behar badu, lehentasuna izanen dute kategoria horretan antzinatasunik handiena dutenek, betiere bete nahi den lanpostua betetzeko trebakuntza teknikoari dagokionez berdintasuna baldin badago, 41. artikuluan igoerei buruz xedatutakoa galarazi gabe.

51. artikulua.

Enpresak lantokia beste herri batera aldatu nahi badu, enplegu politikari buruz unean-unean indarrean dagoen legedian ezarritako prozedurari jarraitu beharko zaio.

52. artikulua.

Bere laneko nahitaezko lekualdatzea dela-eta ezkontideetako batek bere bizilekua aldatzen badu, besteak, bera ere enpresa bereko langilea bada, lehentasunezko eskubidea izanen du betetzen ari den lanpostuaren lanpostu berdina edo antzekoa betetzeko.

53. artikulua. Lanpostua uztea.

Langileak, edozein izanik ere haren kontratu mota, bertan behera uzten ahalko du lan harremana noiznahi, baldintza bakarra betez: enpresari jakinaraztea gutxienez 15 egun lehenago.

Langileak aurretik abisua emateko baldintza hori behar den epean betetzen ez badu, enpresak likidaziotik kentzen ahalko dio egun bateko soldataren zenbatekoa abisu hori atzeratzen den egun bakoitzeko.

Enpresak abisu hori behar den epean jasotzen badu, langileari likidazioa ordaindu beharko dio epea bukatutakoan. Enpresak betebehar hori betetzen ez badu, langileak eskubidea izanen du egun bateko soldata jasotzeko, likidazioaren ordainketan atzeratutako egun bakoitzeko.

54. artikulua.

Behin-behineko langileek lanpostua utziko dute hitzartutako epea amaitzean edo kasuan kasuko zeregin edo zerbitzu espezifikoa amaitzean, eta kalte-ordainetik eta likidaziotik eratorritako zenbatekoak jasoko dituzte, une bakoitzean indarrean dagoen legerian ezarritakoaren arabera. Betebehar bakarra, enpresarentzat nahitaezkoa, hamabost eguneko aurreabisuarekin lana utziko dela idatziz jakinaraztea izanen da. Betebehar hori betetzen ez bada, aurreabisuaren atzerapenaren egun kopuru baliokidearen kalte-ordaina soilik eman beharko du enpresak. Hala eta guztiz ere, kontratua bukatzean edo bere helburua betetzean behin-behineko langileak lana uzten ez badu eta bere zerbitzuak eskaintzen jarraitzen badu, langile finkotzat hartuko da ondorio guztietarako.

55. artikulua.

Bitarteko langileak lana utziko du langile horrek berak ordezten duen titularra itzuli eta zazpi egunera, salbu bere kontratu idatzian ordeztuarentzat egokitzapen-aldi bat ezartzen bada (gehienez hamabost egunekoa), dagokion likidazioa galarazi gabe.

Aurrekoa hala izanik ere, aldi baterako ezintasunaren ondoriozko ordezpenen kasuetan izan ezik, enpresak nahitaez bitarteko langilearen lan-uztea jakinarazi beharko du hamabost eguneko aurreabisuarekin; hala ere, aurreabisu hori egiten ez bada, idatziz egiten ez den kasuan izan ezik, aurreabisuaren atzerapenaren egun kopuruari dagokion kalte-ordaina soilik eman beharko du enpresak.

Kasu orotan, betebehar hauek bete ezean plantillako langile finkotzat hartuko da ondorio guztietarako.

56. artikulua. Trukeak.

Enpresa eta lanbide-talde berekoak izanik lanpostua herri desberdinetan duten langileek beren lanpostuen trukea ituntzen ahalko dute, enpresak kasuan-kasuan erabakitzen duenaren mende.

Horretarako, zerbitzuaren beharrizanak, destino berrirako bi trukatzaileen gaitasuna eta kontuan hartu beharreko gainerako inguruabarrak kontuan izanen dira. Trukea gauzatuz gero, sor daitezkeen soldata aldaketak onartuko dituzte langileek, eta uko eginen diote lekualdatzearen gastuen kalte-ordain orori.

57. artikulua. Maila goragoko edo beheragoko taldeen lanak.

1. Lanean aritzeko beharrezko titulazio akademiko edo profesionalen arabera eginen da mugigarritasun funtzionala enpresan, betiere langilearen duintasuna errespetatuz.

2. Norberaren lanbide-taldetik kanpoko lanak egiteko, maila goragokoak edo beheragokoak izan, mugikortasun funtzionala zilegi izanen da, soil-soilik, horretarako bidezko arrazoi teknikoak edo antolaketakoak daudenean, eta ezinbesteko denboraz betiere. Enpresak erabakia eta arrazoiak jakinaraziko dizkie langileen ordezkariei.

Lanbide-taldekoa baino goragoko eginkizunak manatzen zaizkionean urtebetean sei hilabete baino gehiago edo bi urtean zortzi hilabete baino gehiago, soldatan dagoen aldea erreklamatzeaz aparte, langileak igoera erreklamatzen ahalko du, salbu eta inor ordezkatzen ari denean oporrak, aldi baterako ezintasuna (eritasun arrunta eta istripua, lanekoa izan ala ez), haurraren jaiotza eta zaintza, edoskitzea eta lanpostura itzultzeko eskubidea duen eszedentzia direla eta.

3. Langileak eskubidea izanen du betetzen duen eginkizunari dagokion ordainsaria jasotzeko, non ez zaion eskatzen maila beheragoko lanak egitea; halakoetan jatorrizko ordainsaria mantenduko du. Mugigarritasun funtzionalaren ondorioz langilea ohiz kanpoko eginkizunetan ari denean, ezin izanen dira kaleratze objektiboaren arrazoi gisa erabili ustekabean agertutako desgaitasuna edo moldatzeko ezintasuna.

4. Hitzartutakoak ez diren eginkizunak aldatzeko, artikulu honetan aurreikusitako kasuez aparte, beharrezkoa izanen da alderdien akordioa, edo, bestela, lan-baldintzen funtsezko aldaketa egiteko aurreikusitako arauei men egitea, edo hitzarmen kolektibo honetan horretarako ezartzen direnei.

58. artikulua. Maila goragoko edo beheragoko lanak.

1. Maila goragokoak: behar izanez gero, hitzarmen honen eremuaren barreneko langileak maila goragoko lanpostu bat betetzera behartzen ahalko ditu enpresak, betiere langilearen lanbide-taldearen barruan. Egoera horretan dagoen artean izatez betetzen ari den funtzioari dagokion ordainketa jasoko du, eta langileak beren aurreko postura itzuliko dira aldaketa eragin zuen arrazoia desagertzen denean.

Aurreko atalean xedatua ez da aplikatuko titularrik gabeko lanpostu bat betetzen denean. Kasu horietan, maila finkatzeko eskubidea izanen dute, betetze hori bi hilabete jarraian egiten bada, edo lau hilabetetan aldizka urte naturalaren barruan.

2. Maila beheragokoak: enpresaren premiak direla-eta langile bat bere lanbide-taldearen barruan maila beheragoko lan bat egitera eramanez gero, bere mailari dagokion soldatari eutsiko dio, eta bere aurreko postura itzuliko da aldaketa eragin zuen arrazoia desagertzen denean.

Langileak bidezkotzat jotzen badu, Lan arloko Epaitegian kontratua desegitea planteatzen ahalko du bidegabeko kaleratzea izanen balitz bezala, bere lanbide prestakuntzaren kalte larria edo bere duintasunaren gutxiespen nabarmena gertatu dela irizten badio.

Aldaketa langilearen eskariz egin bada, egoera berriari dagozkion soldata eta maila esleituko zaizkio langileari.

Ez dira maila beheragoko edo goragoko lantzat hartuko makineria, tresnak eta lantokiak zaindu eta garbitzeko langileak burutzen dituen lanak, lan horiek bere eginkizunen barrenean daudela jotzen baita.

59. artikulua. Gaixotasun edo istripuagatiko bajak.

Gaixotasun arrunten edo istripuen kasuetan, lanekoak izan nahiz ez, enpresak Gizarte Segurantzaren prestazioak osatuko ditu langilearen jardun arrunteko soldata errealaren %100 arte. Onura hau lortzeko ezinbesteko baldintza izanen da ondorengo baldintzak betetzea:

1. Aurreko 12 hilabetean izandako gaixotasun arruntak edo istripuak direla eta, lanekoak izan zein ez, lantokiko langile guztien artean izandako absentismo indizearen araberahonako eskala hau ezartzen da hurrengo urteetarako:

–0,00tik %4,10erainoko absentismoa, soldataren %100.

–%4,11tik %5,10erainoko absentismoa, soldataren %95.

–%5,11tik %6,10erainoko absentismoa, soldataren %90.

–%6,11tik %7,10erainoko absentismoa, soldataren %85.

–%7,11tik %8,10erainoko absentismoa, soldataren %80.

Adierazle hori lortzeko, Gaixotasun Arruntagatik (GA) eta Istripuagatik (LI), lanekoa nahiz lanetik kanpokoa, eta Lanbideko Gaixotasunagatik (LG) galdutako orduak bider 100 eginen da, eta gero zati lanordu normal teorikoak.

2. Dagokion aginteari lehenbailehen jakinaraztea lanera joanen ez dela edo lanera itzuliko dela.

Enpresa batzordeari hilero emanen zaio absentismo indizearen berri; berak aztertu eginen du eta egokiak iruditzen zaizkion neurriak erabakiko ditu.

60. artikulua. Erretiroa.

Hitzarmen kolektibo honek indarra duen bitartean, enpresak erretiro partzialak eginen ditu horretarako legezko baldintzak betetzen dituzten langileekin, eta erreleboko kontratuak eginen dira aldi berean, une bakoitzean indarra duen legeriari jarraituz eta horrek bide ematen badu.

Kontratazioa azkenaldian zerbitzuak Leitzako lantokian eman dituzten langileen artean eginen da, dela behin-behineko kontratuen bidez, dela ABLEen bidez.

Etorkizunean kontratazio mugagabeak egin behar badira, lehentasuna izanen dute une horretan "erreleboko kontratuarekin" daudenek. Lehentasunerako irizpideak izanen dira erreleboko kontratuarekin lanpostu berean aritzea lehenik eta antzinatasuna bigarrenik.

Langileen Estatutuaren 12. artikuluan ezarritako erreleboko kontratua (erretiro partziala) edo borondatezko erabateko erretiroa aukeratzen ahal dute langileek.

61. artikulua. Euskara.

Ahal dela, iragarki-taulan zein atalak, departamentuak etab. identifikatzeko errotuluetan argitaratzen diren informazioak euskaraz eta gaztelaniaz idatziko dira, euskarari lehentasuna emanez.

Euskara ikasten edo alfabetatzen ari diren pertsonei enpresak eskolen zenbatekoa nahiz horretarako lana utzi behar duteneko denbora ordainduko die; denbora hori egunean ordubete izanen da, asteko hiru egunetan, arratsaldeko txandan lan egitea egokitzen zaienean.

Langileen belaunaldi berriak lan arloan euskara normalizatzeko aukera ematen duenez, hitzarmen hau sinatu duten aldeek Leitzako lantokian harremanetan euskara ikasi, normalizatu eta erabiltzeko alternatibak eskaintzeko konpromisoa hartu dute. Horretarako, urtero aurrekontuak esleituko dira prestakuntza planen barrenean.

62. artikulua. Aseguru kolektiboa.

Enpresak poliza bat kontratatuko du aseguru-etxe batekin, eta hartan, hitzarmen hau sinatzen denetik aurrerako ondorioak dituela, ondoko arriskuak eta erabateko kalte-ordainak estaliko dira:

–Gaixotasun arruntaren ondoriozko heriotza: 20.000,00 euro.

–Lanbidekoa ez den istripuaren ondoriozko heriotza: 40.000,00 euro.

–Lanbideko gaixotasunaren ondoriozko heriotza: 40.000,00 euro.

–Laneko istripuaren ondoriozko heriotza: 40.000,00 euro.

–Gaixotasun arruntaren ondoriozko erabateko ezintasun iraunkorra: 20.000,00 euro.

–Lanekoa ez den istripuaren ondoriozko erabateko ezintasun iraunkorra: 40.000,00 euro.

–Lanbideko gaixotasunaren ondoriozko erabateko ezintasun iraunkorra: 40.000,00 euro.

–Lanbideko istripuaren ondoriozko erabateko ezintasun iraunkorra: 40.000,00 euro.

Prima ordaintzeko, enpresak kopuru horren %55 jarriko du eta langileak %45.

63. artikulua. Sailkapen profesionaleko sistema. Lanbide-taldeak.

Hitzarmen kolektibo honen eraginpeko langileak lanbide-taldetan eta -mailetan sailkatuko dira.

Egiten den lanaren gaitasun profesionalak, tituluak eta eduki orokorrak lanbide-taldetan biltzen dira, eta bertan sartzen ahal dira langileari esleitutako askotariko lan, eginkizun, espezialitate profesional edo erantzukizunak.

Langilearen eta enpresaren akordioaren bidez, langileari lanbide-talde bat esleituko zaio eta kontratuaren xede den lanaren edukitzat joko da esleitutako lanbide-taldeari dagozkion eginkizun guztiak, edo haietako batzuk, betetzea. Balioaniztasun funtzionala hitzartzen bada, edo talde bati baino gehiagori dagozkion eginkizunak betetzea, denbora luzeagoan egiten diren funtzioen arabera parekatuko dira.

Produkzio taldeko 1. mailan dauden langileek produkzio taldeko 2. mailari dagokion ordainsaria jasoko dute enpresan sei hilabete jarraian bete eta hurrengo hilabetetik aurrera.

Mugikortasunak lantegi osoa hartzen du.

Horrela agertuko da soldaten ordainagirian (produkzio t. 2. maila).

Etorkizunean hirugarren soldata-maila bat definituko balitz produkzio talderako, paragrafo hauek automatikoki galduko dute indarraldia, eta kontratazio berrietarako aplikatzeari utziko diote.

Produkzio taldea

Gizarte Segurantzaren araubide orokorreko 8. kotizazio taldetik 11.era bitarteko kategoriak.

1. maila: honako lanpostu hauek dira, aipatze soilean:

–Makinetako edo instalazioetako laguntzaileak: gidariari lagundu behar diote lanpostuak berezko dituen operazio guztietan, makina nagusietan edo osagarrietan izan. Talde horren barruan daude, aipatze soilean:

• Sukaldeko laguntzailea.
• Ebakitzeko makinako laguntzailea.
• Paketatzeko makinako laguntzailea.
• Pintatzeko / estukatzeko makinako laguntzailea.
• Bobinatzeko makinako laguntzailea.

–Bidaltze / etiketatze langilea: besteak beste, ondoko eginkizunak dituztenak: bobinen stocka egiaztatzea; bukatutako eskariak prestatu, fakturatu eta etiketatzea, hala behar izatera; bobinak saneatzea, igortzeko datuak sartzea fabrikazio programan; inbentarioak egitea eta sistemako datuak egiaztatzea benetako egoerarekin; paketatzeko edo ontziratzeko makinetako laguntzaileen lanak; eta lanpostuko eskuliburuetan jasotzen den beste edozein, edo gain-gaineko nagusiak manatzen dion beste edozein, aurrekoekin ikusteko badu.

–Hautatze / iraultze / aukeratze langilea: besteak beste, ondoko eginkizunak dituztenak: resmako banketak lekuz aldatzea; orriak eskuz berrikustea eta banketak iraultzea; banketen tokia hornitzea eta paper akastuna kentzea; etiketak egitea; hezetasuna begiratzea; paketatzeko edo ebakitzeko makinetako laguntzaileen lanak; eta lanpostuko eskuliburuetan jasotzen den beste edozein, edo gain-gaineko nagusiak manatzen dion beste edozein, aurrekoekin ikusteko badu.

–Euskarri langilea: produkziorako euskarri den paperaren zama-lanak egiteaz eta mugitzeaz arduratzen da, lanpostuko eskuliburuko operazioen arabera, baita gain-gaineko nagusiak manatzen dion beste edozein egitekoz ere, aurrekoekin ikusteko badu.

–Mozte / fardelatze langilea: produkzio prozesuetan sortutako hondakinak eta postetak lekuz aldatzeaz, manipulatzeaz eta tratatzeaz arduratzen da, lanpostuko eskuliburuko operazioen arabera, eta gain-gaineko nagusiak manatzen dion beste edozein egitekoz ere, aurrekoekin ikusteko badu.

–Ontziratze langilea: ontziratzeko makinaren funtzionamendu egokiaz arduratzen da, lanpostuko eskuliburuko operazioen arabera, eta eskuz ontziratzeaz, resmilleria plastifikatzeaz edo gain-gaineko nagusiak manatzen dion beste edozein egitekoz ere, aurrekoekin ikusteko badu.

–Erretraktilatze langilea: erretraktilatzeko makinaren funtzionamendu egokiaz arduratzen da, lanpostuko eskuliburuko operazioen arabera, bai eta gain-gaineko nagusiak manatzen dion beste edozein egitekoz ere, aurrekoekin ikusteko badu.

–Zumitze langilea: zumitzeko makinaren funtzionamendu egokiaz arduratzen da, lanpostuko eskuliburuko operazioen arabera, bai eta gain-gaineko nagusiak manatzen dion beste edozein egitekoz ere, aurrekoekin ikusteko badu.

–Makina osagarrietako gidariak: atal horretako makinak elikatu, gidatu eta husten dituzte. Talde horren barruan daude, aipatze soilean, ondoko makina hauek:

• Fidacoa.
• Gofratzeko makina.
• Paketatzeko makina.
• Gillotina.

Makina osagarriak dira zuzen funtzionatzeko lanpostu bat lotuta dutenak, edo produkzio taldearen 1. mailako langileak dituztenak.

–Orga jasotzaileko gidaria: urkilako edo pintzetako eskorgak, transpaleta elektrikoak eta eskukoak edo garabi zubiak gidatzen ditu materiala biltegiratze, kargatze, deskargatze, pilatze eta garraiatze lanetan, lanpostuko eskuliburuko operazioen arabera, eta gain-gaineko nagusiak manatzen dion beste edozein lan egiten du, aurrekoekin ikusteko badu.

–Biltegizaina / ordezko piezen biltegiko langilea: materialak eta salgaiak jasotzeko eta biltegi barrenean banatzeko ardura du, baita eskariak bideratzeko, lan-jardun bakoitzeko mugimenduak liburu eta fitxategietan erregistratzeko eta sarrera eta irteera parteak osatzeko ere. Halaber, gain-gaineko nagusiak manatzen dion beste edozein lan eginen du, aurrekoekin ikusteko badu.

–Atezaintza-Baskula - Zaintza: atezaintzaren arreta eta zaintzaz arduratzen da, baita baskulako operazioez ere. Jendeari enpresako eremu guztietara heltzeko informazioa emanen dio eta, beharrezkoa denean, telefonoaz ere arduratuko da. Orobat, gauez zein egunez, enpresa zaindu eta jagoteko lanak egiten ditu.

2. maila: honako lanpostu hauek dira, aipatze soilean:

–Aretoko maisua: aretoko langileriaren zaintzaz arduratzen dira eta bere gain dute bertako produkzioaren kontrola, igorpenez eta fakturazioez arduratuz. Lan horri atxikitako langileriaren gaineko manu zuzena dute.

–Makina nagusietako gidaria: atal horretako makinak edo instalazioak elikatu, gidatu eta husten dituzte. Talde horren barruan daude, aipatze soilean, ondoko makina edo instalazio hauek:

• Sukaldea.
• Bobinatzeko makina.
• Paketatzeko makina.
• Pintatzeko / estukatzeko makina.
• Kontrakolatzeko makina.
• Marruskatzeko makina.
• Plastifikatzeko makina.
• Ebakitzeko makina.

Makina nagusiak dira zuzen funtzionatzeko lanpostu bat baino gehiago lotuta dutenak, edo produkzio taldeko 1. mailako langileak ez dituztenak.

–Turismo-, kamioneta- eta furgoneta-gidaria: enpresako turismoak, kamionetak eta furgonetak gidatzea eta behar dituzten azterketa mekanikoak egitea dira langile honen eginkizunak. Haietan zama-lanetan parte hartzen du eta, aurrekoekin ikustekoa izanda, manuak esleitzen dizkion egiteko guztiak burutzen ditu. Legez galdatzen den gidabaimena izan beharko du.

–Kamioi-gidaria: enpresako kamioiak gidatzea eta horiei bidezko azterketa mekanikoak egitea dira langile honen eginkizunak. Haietan zama-lanetan parte hartzen du eta, aurrekoekin ikustekoa izanda, manuak esleitzen dizkion egiteko guztiak burutzen ditu. Legez galdatzen den gidabaimena izan beharko du.

–Garabi- / pala- / traktore-gidaria: faktoriaren eremuan traktoreak, pala kargatzaileak, garabiak edo antzekoak gidatzea da bere eginkizuna, bidezko azterketa mekanikoak egiten ditu eta bere lan-txandan gertatutakoa erregistratzen du. Dagokion motako gidabaimena eduki beharko du.

Laborategi, Administrazio eta Mantentze-lanetako taldeak

Gizarte Segurantzaren araubide orokorreko 5. kotizazio taldetik 11.era bitarteko kategoriak.

1. maila: honako lanpostu hauek dira, aipatze soilean:

–Garbitzailea: enpresan esleituta dituen gelak garbitzeaz eta txukuntzeaz arduratzen da, bai eta gain-gaineko nagusiak manatzen dion beste edozein egitekoz ere, aurrekoekin ikusteko badu.

–Lorezaina: lorategiak eta apaindura eremuak diseinatu, kontserbatu eta mantentzeko lanak egiten ditu, modalitate guztietan.

–Administrari laguntzailea: zer lan arlotan dagoen, horren inguruko administrazio lan oinarrizkoak egiten ditu, oro har lan horri lotuta funtsean mekanikoak direnak. Talde horren barruan daude, aipatze soilean:

• Langileria/giza baliabideetako administrari laguntzailea.
• Administrazioko administrari laguntzailea.
• Hornikuntzako administrari laguntzailea.
• Kalitateko administrari laguntzailea.
• Planifikazioko administrari laguntzailea.
• Informatikako administrari laguntzailea.
• Mantentze-lanetako administrari laguntzailea.

–Kalitateko laguntzailea/prozesuetako analista laguntzailea/laborategiko laguntzailea: fabrikazio prozesuan dagoen edo fabrikaturik dagoen produktuaren kontrolerako zeregin osagarriak burutzen ditu. Halaber, pastaren eta paperaren analisiak egiten ditu, baita paper industriarekin ikusteko duten gainerako produktuenak ere.

2. maila: honako lanpostu hauek dira, aipatze soilean:

–Kogenerazio / energia plantako gidaria: faktoriako kogenerazio/energia plantak zuzen funtzionatzeko beharrezko lanak zaindu eta egiten dituzte, erabilera eta funtzionamendu eskuliburuei jarraituz eta horren arduradunak emandako jarraibideekin bat. Instalazio horietan aritzeko bidezko egiaztagiri administratiboa eduki beharko dute.

–Lurrun-galdarako gidaria: faktoriako lurrun-galdarak zuzen funtzionatzeko beharrezko lanak zaindu eta egiten dituzte, erabilera eta funtzionamendu eskuliburuei jarraituz eta horren arduradunak emandako jarraibideekin bat. Instalazio horietan aritzeko bidezko egiaztagiri administratiboa eduki beharko dute.

–Ura tratatzeko instalazioko langilea: ura tratatzeko plantak ongi funtzionatzeko lanak egiten ditu, erregistroak ikuskatuz, dauden hodiak begiratuz, beharrak prebenituz, ura tratatzeko lineak, instalazio osagarriak eta erreaktiboak dosifikatzekoak eta biltegiratzekoak eta abar behar bezala funtzionatzeko mantenduz; halaber, gain-gaineko nagusiak esleitzen dion beste edozein egiteko burutuko du, aurrekoarekin ikusteko badu.

–Lanbide osagarrietako 2. mailako ofiziala: lanbide horretan aritzeko gaitasuna ematen duen lanbide heziketa edukita, mantentze-lanetako atalean egiten ditu zerbitzuak eta bere lanbideari edo erantzukizunari dagozkion gai guztiak aurrera eramateko kapaza da.

–Lubrikatzaile / koipeztatzailea: beharra duten fabrikako instalazio guztiak koipeztatu eta lubrikatzea da bere eginkizuna, olio edo koipe maila kontrolatuz eta instalazioa behar bezalako lubrikazio egoeran izan dadin zainduz; horretarako aldizka azterketak eginen ditu. Halaber, gain-gaineko nagusiak esleitzen dion beste edozein lan eginen du, aurrekoekin ikusteko badu.

–Administraria: zer lan arlotan dagoen, horren bigarren mailako lanak egiten ditu, ekimen eta erantzukizun mugatuak dituelarik; dena dela, administrazio-teknikaren gaineko ezagutza orokorrak behar dira halako lanak egiteko. Talde horren barruan daude, aipatze soilean:

• Langileria/giza baliabideetako administraria.
• Administrazioko administraria.
• Hornikuntzako administraria.
• Kalitateko administraria.
• Planifikazioko administraria.
• Informatikako administraria.
• Mantentze-lanetako administraria.

–Kalitate kontrolatzailea / prozesuetako analista / behargina: bere ekimen eta erantzukizunez, fabrikazio prozesuan dagoen produktuak aurretik finkatutako berariazko ezaugarriak betetzen dituen egiaztatzen du, sortzen diren akatsak atzematen ditu eta haien berri ematen du zuzen ditzaten. Orobat, pastaren, paperaren, lehengaien eta fabrikatutako produktuen analisiak egiten ditu. Behar adina ezagutu behar ditu kimika analitikoa, kualitatiboa eta kuantitatiboa, edozein analisi arazorik gabe jarraitu ahal izateko moduan.

3. maila: honako lanpostu hauek dira, aipatze soilean:

–Lanbide osagarrietako 2. mailako ofiziala: lanbide horretan aritzeko gaitasuna ematen duen lanbide heziketa edukita, mantentze-lanetako atalean egiten ditu zerbitzuak, ekimenez eta erantzukizun mugatuz.

–Informatikari / programatzailea: multiprogramazioan lan egiteko gai diren sistema eragileaz hornituta dauden ordenagailuak erabili eta kontrolatzen ditu. Eragiketa arazoak atzematen eta ebazten jakin behar du, horiek eragiketako edo makinako errore gisa definituz. Adierazten zaion programazio-lengoaian programak idazten ditu eta saio-probak moldatzen, programak prest jartzen ditu, horien espediente teknikoak osatzen ditu eta esku-liburua dokumentatzen du.

–Administrari-ofiziala: zer lan arlotan dagoen, horren eginkizun jakin bat dauka bere kargura, eta horretan ekimenez jarduten du eta erantzukizuna du. Bere aginduetara langileak izan ditzake edo ez. Talde horren barruan daude, aipatze soilean:

• Langileria/giza baliabideetako administrari-ofiziala.
• Administrazioko administrari-ofiziala.
• Hornikuntzako administrari-ofiziala.
• Kalitateko administrari-ofiziala.
• Planifikazioko administrari-ofiziala.
• Informatikako administrari-ofiziala.
• Mantentze-lanetako administrari-ofiziala.

–Delineatzailea: teknikaria da, eta proiektuak garatzen ditu, plano orokorrak altxatzen ditu eta, naturaletik zein aztertutako eskema edo aurreproiektuetatik abiatuta, makinen krokis orokorrak zehazten ditu. Halaber, kontsulta eta obretarako materialak eskatu eta piezen, mekanismoen edo egitura mekanikoen erresistentzia kalkulatzen du, aldez aurretik ezaguturik jasaten dituzten lan-baldintzak eta indarrak. Eginkizun horiek betetzeko beharrezko titulazioa eduki behar du eta gaitasuna izanen du muntaketak zuzentzeko eta aztertu, muntatu eta birplanteatu beharreko obren plano topografikoak altxatzeko.

Teknikari laguntzaileen taldea

Gizarte Segurantzaren araubide orokorreko 4. kotizazio taldetik 7.era bitarteko kategoriak.

1. maila: honako lanpostu hauek dira, aipatze soilean:

–Kontramaisua: atalburuaren agindupean, beren jarduteko eremuan zuzendaritza operatiboa bere gain hartzen duten agintari tekniko tituludunak dira. Langileak ikuskatzen dituzte eta lanak esleitzen dizkiete produkzio prozesuan. Besteak beste, ondoko eginkizunak ditu kontramaisuak: produkzio prozesuak antolatzea, bere jarduteko eremuko alderdiak koordinatzea, taldearen lana ikuskatzea planifikatuari jarraikiz garatu dadin, laneko segurtasunari buruzko araudia betetzen dela begiratzea, informazioa bideratzea eta lan giro egokia zuzendu, motibatu eta sortzea.

–Lanbide osagarrietako ikuskatzailea / mantentze-lanetako taldeburua: mantentze-lanetako ataleko tailerreko buruen agindupean, bere jarduteko eremuaren zuzendaritza operatiboa bere gain hartzen dute, bere menpeko langileei lanak emanez eta haiek ikuskatuz; beharrezko gaitasuna eta prestakuntza dauzkate lan horiek burutzeko.

2. maila: honako lanpostu hauek dira, aipatze soilean:

–Ataleko burua: teknikaria da, eta bere jarduteko eremuaren barruan, ardura du lana orientatu, zuzendu, koordinatu eta banatzeaz bere menpeko langileen artean. Talde horren barruan daude, aipatze soilean:

• Langileria/giza baliabideetako administrazioburua.
• Administrazioko administrazioburua.
• Hornikuntzako administrazioburua.
• Kalitateko administrazioburua.
• Planifikazioko administrazioburua.
• Informatikako administrazioburua.
• Mantentze-lanetako administrazioburua.
• Sukaldeko teknikaria.

–Antolaketako burua: teknikaria da, eta ekimen eta erantzukizunez metodo eta denbora hobekuntzei buruzko azterlan mota oro burutzen du, denboren eta mugimenduen azterlanak planifikatu eta zaindu eta, kasu guztietan, kontrolatzen ditu.

Teknikarien taldea

Honen barnean sartzen dira Gizarte Segurantzaren araubide orokorreko 1. kotizazio taldetik 3.era bitarteko kategoriak.

1. maila: honako lanpostu hauek dira, aipatze soilean:

–EUD / OLT: titulazio ofiziala edukita, erizaintzako unibertsitateko diplomadunaren eginkizunak betetzen ditu (osasun teknikari laguntzailea).

–Gizarte laguntzailea: titulazio ofiziala edukita, gizarte laguntzailearen eginkizunak betetzen ditu.

–Laneko arriskuen prebentzioko teknikaria: beharrezko titulazio ofiziala edukita, laneko arriskuak prebenitzeko arloan indarra duen legediak esleitzen dizkion eginkizunak betetzen ditu, baita enpresako zuzendaritzak esleitzen dizkionak ere, arlo horretakoak badira.

–Fabrikazio Ataleko burua: fabrikazioko lan eremuaren barruan, teknikaria da, eta ardura du lana orientatu, zuzendu, koordinatu eta banatzeko bere menpeko langileen artean.

–Kalitate kontroleko burua: teknikaria da, eta bere ekimen eta erantzukizunez atal hau zuzentzen du eta fabrikazio prozesuan dagoen edo bukatuta dagoen produktua bezeroak eskatutako edo zuzendaritzak ezarritako zehaztapenetara egokitzen den ziurtatu eta egiaztatzen du.

–Bulego Teknikoko burua: teknikaria da, eta proiektuak aztertzera eta obra eta muntaia mota oro burutzeko zerbitzuen jarduera zuzentzen du, bai eta enpresaren instalazioen hobekuntza eta/edo erreforma ere.

–Teknikari erdi mailako tituluduna / unibertsitateko graduduna: goi mailako eskola tekniko batek, erdi mailako unibertsitate eskola batek edo horren pareko batek emandako titulua edukita, enpresaren barrenean erantzukizun zuzenez bere lanbideari dagozkion eginkizunak betetzen ditu.

–Fabrikazioko burua: teknikaria da, eta fabrikazioko zuzendariak ikuskatuta, ekimenez eta erantzukizunez banaketaren erantzulea da, bai eta produktu linea baten edo gehiagoren fabrikazioan, akaberan eta converting-ean parte hartzen duten makina guztien lanak zuzen egitearen arduraduna ere.

–Mantentze-lanetako burua: teknikaria da, eta mantentze-lanetako/lanbide osagarriko atalaren barruan, mantentze-lanetako tailer bateko burua da eta ekimenez eta erantzukizunez banaketaren erantzulea da, bai eta hari dagozkion lanak zuzen egitearen arduraduna ere.

–Laborategiko burua: teknikaria da, eta enpresak fabrikatutako produktuen ezaugarriak eta kalitateak hobetzeko azterlanak zuzentzen ditu ekimenez eta erantzukizunez eta fabrikazio prozedurak egiaztatu eta hobetzen ditu. Halaber, industria honetan parte hartzen duten produktu mota guztiak aztertu eta egiaztatzeaz arduratzen da.

–Informatikako burua: teknikaria da, eta ardura du ordenagailuak instalatu eta ustiatzeko jardueren zuzendaritza eta plangintza. Gainera, aplikazioen analisietarako eta programazioetarako lantaldeen erantzukizuna du. Halaber, lantalde horiek garatzen ahal dituzten kudeaketa-aplikazio arrunten analisiaren eta programazioaren inguruko arazoak ebatzi behar ditu.

–Administrazioko burua: teknikaria da, eta zenbait atal edo departamenturen kudeaketa administratiboaren erantzukizuna du, eta zerbitzuek eskatzen duten administrazioko langileak bere aginduetara ditu.

2. maila: honako lanpostu hauek dira, aipatze soilean:

–Enpresako medikua: titulazio ofiziala edukita, medikuaren lanbideari dagozkion eginkizunak betetzen ditu enpresan.

–Teknikari goi mailako tituluduna / unibertsitateko gradua + doktoretza aurreko masterra / unibertsitateko gradua + doktoretza duena: goi mailako eskola tekniko batek, unibertsitateko fakultate batek edo horren pareko batek emandako titulua edukita, enpresaren barrenean erantzukizun zuzenez bere lanbideari dagozkion eginkizunak betetzen ditu.

3. maila: honako lanpostu hauek dira, aipatze soilean:

–Buru teknikoak: teknikariak dira, eta zuzendarien agindupean egonik zuzendaritza eginkizunaren goiko mailan laguntzen dute. Talde horren barruan daude, aipatze soilean:

• Zuzendari teknikoa.
• Zuzendaritzak ezarritako beste edozein.

–Zuzendariak: teknikariak dira, eta zuzendaritza nagusiaren edo fabrikako zuzendaritzaren agindupean, esleitutako kudeaketa unitatearen edo zerbitzuaren barrenean, enpresaren politika nagusia garatzen eta aplikatzen dute. Talde horren barruan daude, aipatze soilean:

• Produkzio zuzendaria.
• Finantza zuzendaria.
• Administrazio zuzendaria.
• Zuzendari komertziala.
• Langileriako / giza baliabideetako zuzendaria.
• Zuzendaritza Nagusiak ezarritako beste edozein.

Zuzendarien taldea

Honen barnean sartzen dira Gizarte Segurantzaren araubide orokorreko 1. kotizazio taldetik 2.era bitarteko kategoriak.

1. maila: honako lanpostu hauek dira, aipatze soilean:

–Fabrikako zuzendaria.

–Zuzendari nagusiak.

64. artikulua. Lanbide Heziketa.

Hitzarmen hau sinatu duten alderdiak bat datoz enpresako langileen lanbide maila igotzeak duen garrantziarekin, eta prestakuntza iraunkorraren beharra aitortzen dute, enplegua mantentzeko eta enpresaren lehiakortasuna hobetzeko modurik egokiena den aldetik.

Horretarako, enpresak urtero prestakuntza-plana eginen du, eta Enpresa Batzordeari plan horren berri emanen dio, horrek egokitzat jotzen dituen iradokizunak egin ditzan.

Lanpostuari egokitutako prestakuntza-jardueretara joatea nahitaezkoa izanen da. Laneko orduetatik kanpo ematen badira, hartan sartutako denbora aparteko orduaren %50 ordainduko da.

65. artikulua. Faltak eta zehapenak.

65.1 artikulua. Falten sailkapena.

Langileak eginiko faltak honela sailkatuko dira, kontuan hartuz faltaren tamaina edo garrantzia: arinak, astunak edo oso astunak.

65.2 artikulua. Falta arinak.

Falta arin gisa ondoko hauek hartzen dira:

1. Edozein lanetan ari dela, langileari egozten ahal zaizkion arduragabetasun edo axolagabekeriaren ondoriozko akats zein atzerapenak, baldin eta agindu zaion zerbitzuan nahasmendu larririk eragiten ez badu.

2. Aldi baterako ezintasunagatik lanera ez dela joan ez jakinaraztea.

3. Materiala zaintzean horren hondatze arina sor dezaketen arduragabetasun txikiak.

4. Esleitu zaizkion makina edo tresnen garbitasunik eza, baldin eta enpresak horretarako beharrezko baliabideak eman badizkio.

5. Jendeari behar bezalako arreta ez ematea, arreta hori laneko betebeharrei badagokie.

6. Lanekoak ez diren gaiei buruz jardunean zehar eztabaidatzea, agindu zaion zerbitzuan gorabeherak sortzen badituzte. Aipatutako eztabaidek iskanbila nabarmena sortzen badute, falta astuntzat har daitezke.

7. Irteera-ordua baino lehen arropa aldatzea, enpresak berariaz horrelakorik baimendu ez badu.

8. Lanorduetan lanarekin zerikusirik ez duten telefono-deiak egitea, baldin eta enpresak baimentzen ez baditu.

9. Ez dagokion txanda eta orduan lantokian sartzea, horretarako baimenik gabe.

10. Lanean jarraitzeko akats materialen edo material beharren berri goiko hurrengo arduradunari ez ematea, betiere asaldaketa larririk sorrarazten ez badu.

11. Laneko sarrera-irteeren berri jasotzeko arduradunen aurrean ez agertzea edo kontrol-erlojuan ez fitxatzea.

12. Familian izandako aldaketak, nahitaezko gizarte aseguruetan ondorioak izan ditzaketenak, behar den garaian ez jakinaraztea aurreikuspeneko eta familia laguntzako erakundeei.

13. Arropa edo gauzak aldageletatik kanpo uztea.

14. Lanalditik kanpo esku-erremintak norberaren erabilerarako baimenik gabe erabiltzea.

15. Makineria edo erremintak baimenik gabe erabiltzea.

16. Lanaldian zehar lanekoak ez diren jostaketetan edo irakurketetan aritzea. Horietatik kalte larria eratortzen bada, falta astuntzat hartuko da.

17. Baimenik gabe enpresako ibilgailuetara igotzea.

65.3 artikulua. Falta astunak.

Falta astun gisa ondoko hauek hartzen dira:

1. Hiru hilabeteko epean hutsegite arinean berrerortzea edo hura errepikatzea.

2. Lanera joanen ez dela behar bezalako aurrerapenaz ez adieraztea.

3. Egun batean lanera ez joatea bidezko arrazoirik gabe.

4. Nahitaezko gizarte aseguruetan, aurreikuspeneko erakundeetan edo Familia Laguntzan nahiz soldatan edo soldata osagarrian ondorioak izan ditzaketen datuak enpresari maltzurkeriaz ezkutatzea.

5. Lanean utzikeriaz edo gogorik gabe aritzea, jokabide horrekin lanaren martxa onari edo produktuaren kalitateari kalte larria egiten bazaio.

6. Agindutako eginkizunak edo zerbitzuak garaiz ez betetzea, enpresari kalte larria eragiten zaionean.

7. Bere kargura dauden makina, material eta obretan ikusiriko kalte edo akatsak berehala jakitera ez ematea, enpresarentzat kalte larria sortzen denean.

8. Goiko hurrengo arduradunari obraren amaieraren edo lanean jarraitzeko material beharraren berri ez ematea, horregatik kalte larriak sortzen badira.

9. Liskar edo jokoetan parte hartzea.

10. Material, pieza, makina, erreminta, tresna eta altzariak baliogabetu, hondatu edo galtzea, langileari egozten ahal zaion jokamolde zuhurtziagabeagatik.

11. Iragarki-tauletan jarritako jakinarazpenak hondatzea edo baliogabetzea.

12. Ataletatik, bulegotik edo lan eremutik ateratzea behar bezalako baimenik gabe. Horren ondorioz enpresari kalte larria sortzen bazaio edo lankide batek istripuren bat izaten badu, oso astuntzat har daiteke.

13. Enpresaren egoitzako altzarietan edo hormetan idatzi edo kartelak ezartzea. Kartel horiek enpresarentzat edo bertako edozein langilerentzat iraingarriak badira, falta oso astuntzat joko da.

14. Baimen bat lortzeko iruzurra edo itxurak egitea.

15. Enpresak berariaz baimendu gabeko pertsonak bertako ibilgailuetan igotzea.

16. Lanean mozkortzea edo drogak hartzea.

17. Lanean zuhurtziarik gabe jokatzea. Jokabide hori falta oso astuntzat joko da, baldin eta langilea bera eta lankideak arriskuan edo instalazioak hondatzeko zorian jartzen badira.

–Ondoko kasuetan zuhurtziagabekeria dagoela susmatzen da:

a) Istripuak sortzeko arriskua izanik motore edo makinak abiarazten badira.

b) Estutu, lotu edo eutsi gabeko arropa kateatu dezaketen makina edo transmisioen ondoan erabiltzen bada. Enpresak eman beharko dio langileari egin behar duen lanerako arropa egokia.

c) Goi-tentsioa dagoen instalazioetan lanak egitea, lineak moztuta daudela egiaztatu gabe.

d) Zintzilik dauden kargen azpitik pasatzea edo horien azpian jartzea, beharrik gabe.

e) Norberaren ekimenez eta baimenik gabe babeserako gailuak eta tresnak aldatu edo kentzea.

18. Debekatutako tokietan baimenik gabe sartzea.

19. Beste sexuko langileentzako komunetan sartzea, horretarako baimenik izan gabe.

20. Menpeko langileei laneko segurtasun- eta higiene-arauak hausten uztea.

21. Debekatuta dagoen tokietan erretzea.

22. Lanalditik kanpo enpresaren makinak edo materiala norbere gauzetarako baimenik gabe erabiltzea.

23. Enpresako zerbitzu medikoek aldizkako osasun-azterketa egin diezaioten ukatzea.

24. Behar fisiologikoak komunetik kanpo egitea.

25. Jarraian eta ohitura gisa, norberaren garbitasun eta txukuntasunik ez izatea, lankideengan arrazoizko arrenkura sorrarazten duenean.

26. Paperak, trapuak, azalak, zaborrak etab. biltzeko ontzietatik kanpora botatzea.

27. Agintaritzaren baimenik gabe telefono mugikor pertsonalak eta gailu elektroniko pertsonalak erabiltzea.

28. Enpresak emandako/baimendutako norbera babesteko ekipamenduak (NBE) ez erabiltzea.

29. Enpresak ohiko lanean eskura jarritako komunikazio-sistemak (ordenagailuak, telefono mugikorrak, Internet eta beste batzuk) modu desegokian erabiltzea, argitaratutako eta enpresako langileei jakinarazitako politiketan eta arauetan ezarritakoaren arabera.

Erabilera desegokitzat hartuko da enpresan argitaratutako edo indarrean dauden komunikazio-sistemei buruzko arauak edo politikak ez betetzea, baldin eta horrek sistemetan eta enpresako lanaren garapen egokian eragina badu.

65.4 artikulua. Falta oso astunak.

Falta oso astuntzat joko dira honako hauek:

1. Sei hilabeteko epean hutsegite larrian berrerortzea eta/edo hura errepikatzea.

2. Bi hilabeteko epean bi egunetan lanera ez joatea, bidezko arrazoirik gabe.

3. Iruzurra, leialtasun eza edo konfiantza-abusua agindutako kudeaketetan, eta ebastea edo lapurtzea.

4. Enpresaren lehengai, produktu erabilgarri, erreminta, makina, gailu, instalazio, eraikin, altzari, tresna eta dokumentuak suntsitu edo hondatzea.

5. Eritasun edo istripuen itxurak egitea.

6. Baimenik gabe enpresaren ibilgailuak gidatzea.

7. Baimenik gabe norberarentzako lanak egitea lanaldian zehar.

8. Goragokoek indarreko lege eta hitzarmenen arabera emandako aginduak ez betetzea, eta gainerakoak horretara bultzatzea.

9. Lan-kontrolerako dokumentuetako datuak faltsutzea.

10. Lan-istripuaren itxurak egiteko norbere buruari borondatezko lesioak egitea edo lan-istripua izan denaren itxura egitea lanetik kanpo izandako lesioak lanekoak direla sinestarazteko.

11. Lanean sarritan mozkortzea edo drogak hartzea.

12. Enpresaren isilpeko gutunen sekretua haustea.

13. Enpresari lehia egitea edo negozio berberetan edo antzekoetan zerbitzuak ematea, enpresaren baimenik gabe.

14. Hitzezko eta egitezko tratu txarrak ematea edo errespetu falta larria buruei, lankideei eta menpekoei, baita haien ahaideei ere.

15. Agintekeria. Goragoko batek egitate arbitrario bat beheragoko baten kaltetan eta legezko agindu bat hautsiz egiten badu, aipatutako egintza agintekeriatzat eta falta oso astuntzat hartuko da; ondorioz, bidezko espedientea irekiko da.

Kasu horietan, langile interesdunak Enpresa Batzordeari edo langileen delegatuei egitatea jakinaraziko die hiru eguneko epean eta horiek enpresaren zuzendaritzari igorriko diote berria. Enpresak bidezko espedienteari ekingo dio Enpresa Batzordearen edo langileen delegatuen jakinarazpena hartu eta 10 eguneko epean, gehienez ere.

Enpresaren zuzendaritzak ez badu esandako espedientea aipatutako epearen barrenean hasten, kaltetuak, 15 eguneko epean, idatziz emanen dio horren berri Probintziako Lan Ordezkaritzari, langileen delegatuen edo Enpresa Batzordearen bitartez. Ordezkaritzak bidezkotzat jotzen badu, gaiaren aurrekariak eskatuko dizkio enpresari eta bidezko aholkuak eman ondoren, gertakaria frogatzen bada, behar bezalako erabakiak hartuko ditu.

16. Zigor Kodean definitutako delituetan parte-hartze zuzena edo zeharkakoa izatea, betiere epai judizial irmoa baldin badago.

17. Ondasunak desagertzen direnean enpresaren edo langileen ondareari eraginez. Enpresak langileen armairuak edo gauza pertsonalak erregistratzea agintzen ahalko du, eta langileen ordezkari bat egon beharko da erregistro hori egiteko, betiere horietako bat enpresan badago. Esandako kontrolari uko egitea falta oso astuntzat hartuko da.

18. Lanaldian zehar lo egitea, hala lanpostuetan, nola bertatik kanpo, baimenik dagoen kasuetan izan ezik.

19. Laneko errendimendua edo jarduera nahita gutxitzea, modu jarraituan.

20. Liskarrak eta borrokak sorraraztea.

21. Falta astunak egitea, asmo txar nabaria dagoenean.

22. Beste langile baten presentzia lanean simulatzea, haren ordez sinatuz edo fitxatuz. Sinadura edo fitxa zer langileri dagokion, horrek ere falta bera eginen du, horren jakinaren gainean dagoenetik aurrera azalpenik ematen ez badu.

65.5 artikulua. Puntualtasun falta.

Lanpostura sartzean 10 minuturainoko atzerapena idatzizko kargu-hartzearekin zehatuko da, baldin eta falta hau lehen aldiz egin eta handik aurrera hilabete natural batean 3 aldiz errepikatzen bada.

Epe berean hortik aurrera egindako falta bakoitzeko egun bateko enplegu eta soldata gabe utziko da, 7.era arte, hori barne. Hortik aurrera egindako horrelako falta bakoitza, epe beraren barrenean, falta arintzat hartuko da.

Atzerapena 10 minututik gorakoa bada eta 30 minututik beherakoa, eta epe berean 3 aldiz errepikatzen bada, bi egunetan enplegu eta soldatarik gabe utziko da.

Mota bereko eta epe beraren barruan, horretatik aurrera egindako falta bakoitza falta astuntzat hartuko da.

Atzerapena 30 minututik gorakoa bada, eta epe berean birritan errepikatzen bada, egun batean enplegu eta soldatarik gabe utziko da.

Epe beraren barrenean mota honetako hirugarren falta egiten bada, lau egunetan enplegua eta soldata gabe utziko da eta laugarren faltatik aurrera, oso astuntzat hartuko da eta hala zehatuko.

Puntualtasun faltek ez dute eraginik beste falta baten berrerortze edo errepikapenen araubidean.

Kontzeptu honengatiko falta astunak, gehienez ere, 15 eguneko enplegu eta soldata etendurarekin soilik zehatzen ahal dira.

Mota honetako lehen falta oso astuna zehatu aurretik, behar den negoziazioa eginen da langileen ordezkariekin, zehapenei buruzko artikuluan falta oso astunetarako aurreikusitako zehapenen gainean. Beste falta oso astun bat eginez gero, ez da aldez aurretik negoziatu beharko.

65.6 artikulua. Zehapenak.

Lanera ez joateagatik enpresak ez du langilea kaleratuko, baldin eta horietarako arrazoia osasun zerbitzu ofizialek behar bezala justifikatutako baja bada, edo lanera ez joateko arrazoiak naturalak izan badira (elurra, uholdeak eta ezinbesteko beste arrazoi batzuk).

Lan arloko jurisdikzioak diziplinako kaleratze bat bidegabekotzat kalifikatzen badu, enpresak eta batzordeak erabakia berrikusiko dute eta ukitutako pertsona lehengo egoeraren araberako lanpostu batera itzultzea aztertuko dute.

Falta nolakoa izan den, zehapen hauek ezarriko dira:

–Falta arinengatik:

• Hitzezko kargu-hartzea.
• Idatzizko kargu hartzea.
• Egun bateko enplegu eta soldata etenaldia, langileari idatziz jakinarazita.

–Falta astunengatik:

• Gehienez 15 eguneko enplegu eta soldata etenaldia.
• Aldi baterako desgaitzea goragoko talde batera igarotzeko (gehienez ere hiru urte).

–Falta oso astunengatik:

• 16 egunetik sei hilabetera bitarteko enplegu eta soldata etenaldia.
• Goragoko kategoria batera pasatzeko gaitasuna kentzea aldi baterako, sei urterako gehienez.
• Kaleratzea.

Falta astun eta oso astunengatiko zehapenak idatziz jakinaraziko zaizkio langileari. Era berean, jakinarazpenei buruz hitzarmen honen 70. artikuluan xedatutakoa bete beharko da.

Ezar daitezkeen zehapenek ez dute galarazten erruduntasun-testigantza auzitegietara eramatea, egindako falta delitu edo falta izan daitekeenean, ezta gobernu-agintaritzari horren berri ematea ere.

65.7 artikulua. Preskripzioa.

Falten preskripzioari dagokionez, indarreko legezko xedapenetan ezarritakoari jarraituko zaio.

66. artikulua. Kontratazioa eta enplegua.

66.1 artikulua. Txandakako prestakuntza-kontratua.

Txandakako prestakuntza-kontratuaren xedea izanen da bateragarri egitea ordaindutako lan-jarduera eta Lanbide Heziketaren, unibertsitate-ikasketen edo Enplegu Sistema Nazionaleko Prestakuntza Espezialitateen Katalogoaren eremuko prestakuntza-prozesuak, eta urriaren 23ko 2/2025 Legegintzako Errege Dekretuak onetsitako Langileen Estatutuaren Legearen testu bateginaren 11. artikuluaren 2. apartatuan ezarritako arauen arabera eginen dira.

Kontratu-mota horrekin kontratatutako langilearen ordainsaria benetako lan-denboraren proportzioan finkatuko da, bat etorriz lanpostu bera edo baliokidea betetzen duen langile batentzat hitzarmen kolektiboan ezarritakoarekin.

Hitzarmen honetan arautu gabeko gai guztietan, indarrean dagoen legediak ezarritakoa beteko da.

66.2 artikulua. Lanbide-praktikak lortzeko prestakuntza-kontratua.

Lanbide-praktikak lortzeko prestakuntza-kontratuaren xedea izanen da lan-jarduera bat egitea kasuan kasuko ikasketa-mailetara egokitutako lanbide-praktika lortzeko, urriaren 23ko 2/2025 Legegintzako Errege Dekretuak onetsitako Langileen Estatutuaren Legearen testu bateginaren 11. artikuluko 3. apartatuan ezarritako baldintzetan.

Hitzarmen honetan arautu gabeko gai guztietan, indarrean dagoen legediak ezarritakoa beteko da.

66.3 artikulua. Iraupen mugatuko kontratua, produkzioaren inguruabarrengatik.

Hitzarmen hau sinatzen duten alderdiek erabakitzen dute urriaren 23ko 2/2015 Legegintzako Errege Dekretuak onetsitako Langileen Estatutuaren Legearen testu bateginaren 15.1 artikuluan aurreikusitako lan-kontratua behar bezala arautzea, enpresaren baldintza berezietara egokituz.

Ildo horretan, alderdiek ezartzen dute gehienez hamabi hilabete iraun dezaketela produkzioaren inguruabarrengatik iraupen mugatua duten kontratuek.

Hitzarmen honetan arautu gabeko gai guztietan, indarrean dagoen legediak ezarritakoa beteko da.

66.4 artikulua. Aldi baterako laneko enpresak.

Enpresak, aldi baterako laneko enpresen zerbitzuak kontratatzen dituenean, lagatako langile orori bermatuko die hitzarmen kolektibo honek ukitzen dituen langileen laneko eskubide berberak izanen dituztela eta beren lanbide kategoriarako edo beteko duten lanposturako ezarritako lansariaren %100 jasoko dutela. Betebehar hori berariaz azaldu beharko da langileak lagatzeko kontratuan, aldi baterako laneko enpresaren eta enpresa erabiltzailearen artean itundu den horretan.

Indarrean dagoen araudian xedatutakoa galarazi gabe, enpresa erabiltzaileak bertako langileen legezko ordezkariei emanen die jakitera langileak lagatzeko kontratu guztien eta horien arrazoiaren berri. Berebat, aurreko paragrafoan ezarritako betekizunari buruz aldi baterako laneko enpresak bereganatu duen konpromisoaren egiaztagiria emanen die enpresa erabiltzaileak bertako langileen ordezkariei.

Era berean, aldi baterako laneko enpresen bidez kontrataturiko langileei legez dagokien ordezkaritza galarazi gabe, enpresa erabiltzaileko langileen legezko ordezkariek aldi baterako laneko enpresak kontratatu dituen langileen ordezkaritza hartzen ahalko dute beren gain, enpresa erabiltzaileari dagokionez, hitzarmen kolektibo honetan ezarritako eskubide eta betebeharrak betearazteko.

VI. KAPITULUA.–JARDUERA SINDIKALA ENPRESAN.

67. artikulua. Enpresa batzordea.

Enpresa batzordea langileen ordezkaritza organoa da, eta legeak eta hitzarmen kolektibo honek zehazten dituzten osaera eta bermeak edukiko ditu.

Enpresa batzordeko kideentzat ezarritako ordu ordainduak ordezkari bati edo gehiagori gehitzen ahalko zaizkie, baita atal sindikaletako delegatuari ere, hileko gehieneko kopurua gainditu gabe.

Uko egiteek eta ondoriozko metaketek gutxienez hilabeteko iraupena izanen dute, baina gutxienez 15 egunetako aurrerapenarekin ohartarazi beharko da.

68. artikulua. Enpresa batzordearen eginkizunak.

Enpresa batzordearen eginkizunak hauek izanen dira:

a) Horretarako hautatuak izanik, ordezkaritzan jardutea enpresaburuaren aurrean, ordezkatzen dituzten langileen lan-baldintzei buruz sortzen diren arazo guztietan esku hartuz.

b) Laneko arauak beteko direla segurtatzea eta, orobat, laneko segurtasun eta osasunari buruzkoak eta gizarte segurantzakoak, enpresarentzat eta langileentzat indarrean daudenak. Aldi berean, gerta daitezkeen arau-hausteen berri emanen die enpresari eta langileei, eta arauak betetzeko behar diren erreklamazioak eginen ditu.

c) Txostena egitea lanbide sailkapenerako administrazio espedienteetan eta legeak xedatuta beharrezko direnetan ere.

d) Hiru hilean behin jakinarazpena jasotzea, laneko segurtasun eta osasunaren egoera zertan den eta horiek hobetzeko zein neurri hartu diren.

e) Enplegu-erregulazioko espedienteen kasuetan ondoren aipatzen diren dokumentuak eman behar dizkie enpresaren zuzendaritzak, langileen legezko ordezkariei eta Lan Agintaritzari zuzendutako jakinarazpen idatziarekin batera, kontsultaldia hasten den data adierazita. Hona hemen dokumentuok:

1. Espedientea eragiten duten arrazoi ekonomiko edo teknologikoak azaltzen dituen txostena.

2. Azken hiru urteetako balantzea.

3. Azken hiru urteetako galeren eta irabazien kontuak.

4. Sozietateen gaineko zergaren ondorioetarako aitorpena, kasuan kasu, azken hiru urteei buruz.

5. Espedientearen eraginpeko lantokiko edo lantokietako langile guztien zerrenda, bertan haien izen-deiturak, jaiotze data eta tokia, espezialitatea eta lanbide-taldea, enpresan noiz sartu ziren, langileen legezko ordezkari ote diren adierazita.

6. Espedienteak plantilla guztia ukitzen ez badu, enpresako gainerako langileen zerrenda banandua, bertan datu berberak adierazita.

f) Enpresak hartu nahi dituen neurrien gaineko txosten idatzia egitea, neurriak hartu aurretik, honako puntu hauei buruz:

–Enpresaren lekualdatze erabatekoak eta partzialak.

–Lan sistema berriak ezartzea edo daudenak berrikustea.

–Prima edo pizgarrien sistema ezartzea.

–Lanbide sailkapeneko aldaketak.

g) Hobekuntza teknikoen eta produkzioaren hobekuntzen arloan egokiak iruditzen zaizkion neurriak proposatzea zuzendaritzari.

Enpresaren zuzendaritzarekin lankidetzan aritzea, enpresaren produktibitatea mantentzen eta handitzen laguntzeko neurriak bete ahal izateko, informazio egokiaren bidez.

h) TC1a eta TC2a aztertzea.

69. artikulua. Informazioa enpresa batzordeei.

Enpresaren eta sektore ekonomikoaren egoera eta bilakaera orokorrari buruzko hiruhileko informazioa emanen dio enpresak Enpresa Batzordeari.

70. artikulua. Diziplina neurriak.

Enpresa batzordeari aldez aurretik informazioa emanen zaio, falta astunengatik eta oso astunengatik edo falta arinetan berrerortzeagatik zehapenak ezarri aurretik.

Enpresaren zuzendaritzaren edo ordezkari jartzen duen pertsonaren iritziz zehapenaren berehalako aplikazioa beharrezkoa ez den kasuetan, hori ez da ezarriko Enpresa Batzordearen arduradunari jakinarazi eta berrogeita zortzi ordu igaro arte.

Enpresak langileen espediente pertsonaletan falten aurrekariak deuseztatuko ditu ondorengo betebeharrak betetzen badira:

1. Falta arinetarako 6 hilabeteko epea igarotzea, falta astunetarako 12 hilabetekoa eta falta oso astunetarako 24 hilabetekoa.

Epe horiek zehapena ezartzen denetik zenbatuko dira.

2. Aurreko paragrafoan faltetarako beren larritasunaren arabera adierazitako denboraldietan zehatzeko modukoa izan daitekeen faltarik ez egin izana.

71. artikulua. Enpresako atal sindikala.

Legez aitortutako sindikatu batean kidetuta dauden enpresako langileek enpresako atal sindikal bat eratzen ahalko dute, indarreko legediaren arabera.

72. artikulua. Atal sindikalen bermeak.

Enpresako atal sindikalek berme hauek izanen dituzte:

a) Izaera sindikaleko edo lan arloko argitalpen eta oharrak banatzea enpresako lokaletan, euren kideen kotizazioak biltzea eta beren afiliazio sindikaleko lanetan oztoporik ez izatea, hori guztia lanorduetatik kanpo eta berme horiek betetzeak lana edo produkzio prozesuaren bilakaera orokorra eten gabe.

b) Enpresa batzordeko postuak betetzeko hauteskundeetarako hautagaiak proposatzea.

c) Delegatu sindikal bat hautatzea bere kideak enpresaren zuzendaritzaren aurrean ordezkatzen dituen atal sindikal bakoitzeko.

Delegatu sindikalak enpresako jarduneko langilea izan beharko du, eta ordezkatzen duen sindikatuaren estatutuen arabera izendatu beharko da. Ahal dela, Enpresa Batzordeko kidea izanen da.

d) Aurreko artikuluan ezarritako afiliazio betebeharrak betetzen dituen enpresako atal sindikal bakoitzeko delegatuak, enplegu-erregulazioko espedienteen kontsultaldian enpresak batzordearen esku jartzen duen informazio eta dokumentazio bera edukiko du, eta enpresaren zuzendaritzak eta Enpresa Batzordeak berariazko arrazoi horrekin egiten dituzten bileretan agertu eta parte hartzen ahalko du.

e) Enpresak hartu nahi dituen neurrien gaineko txosten idatzia egitea, neurriak hartu aurretik, honako puntu hauei buruz:

–Enpresaren lekualdatze erabatekoak edo partzialak.

–Lan sistema berriak edo pizgarriak sartzea.

–Laneko segurtasun eta osasunari dagozkion erabakiak.

–Lanbide sailkapeneko aldaketak.

f) Aldez aurretik zuzendaritzari jakinarazi ondoren, enpresak bere lokaletan enpresako atal sindikal bateko kideen bilerak egiten utziko du, lanorduetatik kanpo.

g) 71. artikuluan adierazitako betebeharrak betetzen dituzten atal sindikalek eskatzen ahalko dute enpresarekin egiten diren bileretara beren sindikatuko arduradunak bertaratzeko, beren kideei eragiten dieten eta artikulu honen e) eta f) ataletan aipaturiko arazoak aztertzen direnean.

73. artikulua. Enpresako delegatu sindikalak.

Enpresetan eratu eta enpresaren zuzendaritzan kreditaturiko %10 baino afiliazio handiagoa duten atal sindikaletako delegatuek 30 ordu izanen dituzte hilabetean beren eginkizunak betetzeko.

74. artikulua. Berme komunak.

(Enpresa batzordeak eta atal sindikalak).

Enpresa batzordeetako kideek eta delegatu sindikalek honako berme komun hauek izanen dituzte:

a) Iragarki-taula bat erabiltzea sindikatu eta lan arloko oharrak argitaratzeko.

b) Bileretarako lokalak eskuratzea.

c) Beren afiliazio edo ekintza sindikalarengatik ez kaleratzea edo beste edozein modutan kalterik ez izatea, betiere indarrean dagoen legedia betetzen badute.

d) Enpresa batzordeen eta atal sindikalen bileretarako deiak gutxienez 48 ordu lehenago egin behar dira, enpresaren barrenean egin beharreko bileretarako, behar bezala arrazoitutako salbuespenetan izan ezik; horrelakoetan aurreabisuak egiteko epea laburragoa izan daiteke.

e) Diziplinazko neurriei dagokienez, atal sindikaletako delegatuek Enpresa Batzordeko kideek dituzten eskubide berak edukiko dituzte, baldin beren atal sindikaleko kide bati eragiten badiote.

75. artikulua. Batzarrak.

Soldata errealaz ordaindutako 10 ordu edukiko dira urtean batzarrak egiteko.

Enpresa batzordeak deituko ditu batzarrak edo enpresako atal sindikaleko delegatuaren ekimenez eginen dira, ondorengo paragrafoan ezarritako baldintzetan eta aurreko paragrafoan ezarritako muga arte.

Enpresa batzordea ordaindutako batzarrak deitzera behartua dago ezarritako mugaren barrenean, enpresako atal sindikal bateko delegatuak hala eskatzen dionean, betiere atal horrek gutxienez enpresako plantilla osoaren herena adinako kide kopurua biltzen badu; halaber, enpresako langileen plantilla osoaren herenak batzarra egitea eskatzen ahalko du.

Batzarra egiteko deialdia gutxienez 48 ordu lehenago jakinaraziko zaio enpresaren zuzendaritzari, eta jakinarazpen horretan batzarraren ordua eta data finkatuko dira.

76. artikulua. Sindikatu arloko eszedentziak.

Enpresan egon beharreko gutxieneko denboralditik salbuesten dira gutxienez probintziako kargu sindikal bat betetzearren eszedentzia eskatzen duten langileak. Eszedentzia horiek nahitaezkoak izanen dira eta, hortaz, agintaldi sindikalak irauten duen denboraz zenbatuko da antzinatasuna, eta arlo horretan aplikatzen diren xedapen orokorren bidez erregulatuko dira.

77. artikulua. Enpresako atal sindikalei informazioa ematea.

71. artikuluan ezarritako afiliazio betebeharrak betetzen dituzten enpresako atal sindikaletako delegatuei, enpresaren eta sektore ekonomikoaren egoerari eta bilakaera orokorrari buruzko informazioa emanen die enpresak hiru hilean behin.

78. artikulua.

Hitzarmen hau sinatzen duten alderdiek konpromisoa hartzen dute, indarraldiak irauten duen bitartean, presionatzeko neurri kolektiborik ez hasteko, deitzeko edo hartzeko, hitzarmen hau, partez edo osorik, aldez aurretik aldatu, erreformatu edo berrikusteko asmoz.

Artikulu hau ez da aplikagarria izanen hitzarmen kolektibo honen indarraldia salatu eta bukatu ondoren.

79. artikulua. Batzorde paritarioa.

Hitzarmen honen interpretaziorako batzorde paritarioa sortzea erabakitzen da; langileen lau ordezkarik eta enpresako beste lauk osatuko dute.

Batzorde horrek aholkularien noizbehinkako edo etengabeko zerbitzuak erabiltzen ahalko ditu, bere eskumeneko gai guztietan. Batzordea osatzen duten alderdiek izendatuko dituzte aholkulariak, eta ez dira bertan ordezkatuta dauden alderdietako bakoitzak dituen kide kopuruaren heren bat baino gehiago izanen.

Batzorde paritario horren eskumena izanen da legean ezarritako gaietan eta esleitzen zaion beste batzuetan esku izatea eta, bereziki, honako hauetan:

1. Hitzarmen kolektiboa interpretatzea.

2. Itundutakoa betetzen den zaintzea.

3. Elkarren arteko adostasunez alderdiek ematen dizkioten gaiak.

Alderdi bakoitzak aurreko paragrafoan adierazitako gaiei buruz sortzen diren galderak eginen dizkie bere ordezkariei. Beste alderdiari galdera horien berri emanen zaio, eta alderdiak ados jarri beharko dira 15 eguneko gehieneko epean, azken jakinarazpenetik aurrera zenbatuta, batzorde paritarioaren bilera egiteko eguna eta ordua finkatzeko. 15 eguneko gehieneko epean, batzordeak akta eginen du hartu dituen erabakiekin eta hitzartu diren salbuespenekin, alderdiek ituntzen dituzten salbuespenak izan ezik. Erabakiak gehiengoz hartu beharko dira eta interesdunei jakinaraziko zaizkie, bileraren aktaren bidez.

Epe horiek bukatu eta batzorde horretan sor daitezkeen desadostasunei buruzko akordiorik ez badago, gatazkak konpontzeko sistema ez-judizialak aplikatuko dira. Sistema horiek Estatuko edo autonomia erkidegoko lanbidearteko akordioen bidez ezarritakoak dira, Langileen Estatutuaren 83. artikuluen aurreikusitako moduan.

XEDAPEN GEHIGARRIA

Hitzarmen hau sinatzean enpresako langileak direnentzat, 2012ko abenduaren 31ra bitarteko ordainsari sistema 2013ko urtarrilaren 1etik aurrera indarra duten lanbide-taldeen erregulazio berrira egokitzearen ondorioz soldatan sortzen diren alde positiboak "osagarri pertsonala" izeneko kontzeptuan sartuko dira; hartara, urteko ordainsari gordina berdina izanen da lanbide-taldeen akordioa biltzen duen hitzarmen honek indarra hartu aurretik eta indarra hartu ondoren. Hitzarmen honetako soldata kontzeptuei aplikatzen ahal zaien soldata igoera ere kontzeptu pertsonal horri aplikatuko zaio.

Hitzarmen hau sinatu ondoren enpresan sartzen diren langileen ordainsariak izanen dira, soil-soilik, bertan arautzen direnak; horrenbestez, ez zaie hitzarmen honen aurrekoa den akordio bat ere aplikatuko, banakakoa edo kolektiboa izan.

AZKEN XEDAPENA

Enpresako hitzarmen kolektibo honetako aurreko artikuluetan berariaz bildu ez den orotan, Langileen Estatutuan, Sindikatu Askatasunaren Lege Organikoan eta aplika daitezkeen gainerako lege eta xedapenetan ezarritakoa bete beharko da.

LEITZAKO 2021-2023KO HITZARMEN KOLEKTIBOAREN ERANSKINAK

1. ERANSKINA.–HITZARMEN HONETAN HITZARTUTAKO LAN BALDINTZAK EZ APLIKATZEA

Hitzarmen honek indarra duen bitartean, enpresak aplika ez ditzan bertan hitzartutako lan baldintzak, betiere arrazoi ekonomiko, tekniko, antolamenduzko edo produkziokoak egonda, baldintza hauek bete behar dira:

1. Kontsultarako aldi bat zabaltzea, 15 egunekoa gehienez, langileen legezko ordezkariekin; bertan enpresaren erabakia zerk ekarri duen aztertuko da, bai eta haren ondorioak saihesteko edo apaltzeko aukerarik dagoen eta zer neurri hartu behar den ere ukitutako langileen gaineko ondorioak arintzeko.

2. Kontsultarako aldian, alderdiek fede onez negoziatu beharko dute, akordioa lortzeko asmoz. Akordio horretarako, beharrezkoa izanen da batzordeko kideen gehiengoaren adostasuna.

3. Kontsultarako aldia akordioa lortuta bukatzen bada, ulertuko da hitzarmena ez aplikatzeko artikulu honen lehen paragrafoan adierazi diren arrazoiak daudela, eta akordio hori jurisdikzio eskudunean baizik ezin izanen da aurkaratu, iruzur, dolo, hertsapen edo eskubide-abusu kasuetan. Akordio horren berri eman beharko zaio hitzarmen kolektiboaren batzorde paritarioari.

4. Leitzako Torraspapel, S.A. enpresaren hitzarmen kolektiboan aurreikusitako lan baldintzak ez aplikatzeko, Langileen Estatutuaren 82.3 artikuluan ezarritako gaietan eragina badu, Langileen Estatutuaren 41.1 artikuluan aurreikusitako moduaren araberako kontsultarako aldia akordiorik lortu gabe bukatuta, hitzarmen honen interpretazioko batzorde paritarioak aztertuko ditu desadostasunak hitzarmenaren 79. artikuluan ezarritako prozedurari jarraituz. Salbuespena da arlo horretan sor daitezkeen desadostasunak Nafarroako Gobernuko Lan Departamentuaren adiskidetze eta bitartekotza prozesuaren menpe jarriko direla, nahitaezko arbitrajea baztertuta, edonola ere.

2. ERANSKINA.–2024KO SOLDATA TAULAK

2024. URTEKO SOLDATA GORDIN TEORIKOAREN TAULA

Iragarkiaren kodea: F2404886