Iragarkia

85. ALDIZKARIA - 2024ko apirilaren 25a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

45E/2024 FORU AGINDUA, apirilaren 19koa, Memoria eta Bizikidetzako, Kanpo Ekintzako eta Euskarako kontseilariak emana, euskara ikasteko helduentzako banakako laguntzen deialdia onesten duena 2024 urtean eta 2025eko lehen seihilekoan. DDBN identifikazioa: 755968.

Euskarabideko zuzendari kudeatzaileak aurkeztutako txostena ikusirik, non adierazten baita beharrezkoa dela 2024 urtean eta 2025eko lehen seihilekoan euskara ikasteko helduentzako banakako laguntzak arautzeko deialdia onestea eta argitaratzea.

Euskarari buruzko abenduaren 15eko 18/1986 Foru Legeak aitortzen du euskara Nafarroako berezko hizkuntza dela eta, honen ondorioz, Nafarroako herritar guztiek euskaraz hitz egiteko eskubidea dutela.

Memoria eta Bizikidetzako, Kanpo Ekintzako eta Euskarako Departamentuaren egitura organikoa ezartzen duen azaroaren 15eko 239/2023 Foru Dekretuak ematen dizkidan eskudantziak erabiliz,

AGINTZEN DUT:

1. Euskara ikasteko helduentzako banakako laguntzen deialdia onestea, 2024 urtean eta 2025eko lehen seihilekoan.

2. Deialdiaren oinarri arautzaileak onestea, zeinak jaso baitira foru agindu honen I. eranskinean.

3. Deialdi honen konpromisoei aurre egiteko, jarraian adierazten diren aurrekontuko kredituak baimendu dira, 2025 urteko zenbatekoa dagokion kredituari baldintzatuz:

Salbuespenez, aurkezten diren eskaera kopurua kontuan izanik, 10.000 euroraino handitzen ahal izanen da deialdi honetara zuzendutako diru kopurua, 2024ko ekitaldiari dagokiona hain zuzen ere, foru agindu bitartez, deialdi berririk egin beharrik gabe, baldin eta Dirulaguntzei buruzko azaroaren 9ko 11/2005 Foru Legearen 31. artikuluan ezarritakoa betetzen bada.

4. Ebazpen hau eta eranskinak igortzea Ekonomia eta Ogasun Departamentuak Memoria eta Bizikidetzako, Kanpo Ekintzako eta Euskarakoan duen Kontu-hartzailetza Delegatura, aipatutako departamentuko Idazkaritza Tekniko Nagusira eta haren Kontabilitate Zentrora, Euskarabideko Euskara Sustatzeko Atalera eta Gai Administratiboak, Langileria eta Azpiegiturak Kudeatzeko Atalera, bai eta inskribatzea Nafarroako Gobernuko Dirulaguntzen Datu Basean ere, bidezko ondorioak izan ditzan.

5. Foru agindu hau eta eranskinak Nafarroako Aldizkari Ofizialean argitaratzea.

6. Deialdi honen eta bere oinarri arautzaileen kontra gora jotzeko helegitea jar daiteke, Nafarroako Gobernuari zuzendua, hilabeteko epean, argitaratu eta biharamunetik hasita.

Iruñean, 2024ko apirilaren 19an. Memoria eta Bizikidetzako, Kanpo Ekintzako eta Euskarako Departamentuko Kontseilaria, Ana Ollo Hualde.

I. ERANSKINA.–EUSKARA IKASTEKO HELDUENTZAKO BANAKAKO LAGUNTZEN DEIALDIAREN OINARRI ARAUTZAILEAK, 2024 URTEAN ETA 2025EKO LEHEN SEIHILEKOAN

Lehen oinarria.–Xedea eta aldia.

Deialdi honen xedea da euskara ikasteko banakako laguntzak arautzea Nafarroako Foru Komunitatean erroldatutako pertsona helduentzat.

Deialdi hau 2023-2025 epeko Dirulaguntzen Plan Estrategikoan jasotzen da 451 lerroan. Haren helburu estrategikoa da euskarazko hezkuntza eta ikaskuntza orokortzea hezkuntza-maila guztietan.

Laguntzak ondoko bi modalitateen arabera emanen dira:

–A modalitatea: laguntzak emanen dira 2024ko urtarrilaren 1etik abuztuaren 25era bitarte hasten diren ikastaroengatik eginiko ordainketetarako. Ikastaroak, edonola ere, amaituta egon beharko dira 2024ko irailaren 30ean.

–B modalitatea: laguntzak emanen dira 2024ko abuztuaren 26tik abenduaren 2ra bitarte hasten diren ikastaroengatik eginiko ordainketetarako. Ikastaroak, edonola ere, amaituta egon beharko dira 2025eko ekainaren 30ean.

Bigarren oinarria.–Diruz lagunduko diren ikastaroak.

2.1. Diruz lagunduko diren ikaskuntza edo alfabetatze ikastaroak honakoak izanen dira: ikastaro estentsiboak, trinkoak, barnetegiak, autoikaskuntzakoak eta berariazko ikastaroak.

Diruz lagunduko diren ikaskuntza modalitateak honakoak izanen dira:

a) Aurrez aurreko ikastaro estentsiboak, trinkoak eta barnetegiak: ikastaroak gutxienez 4 ordu izan behar ditu astero eta ikastaroak gutxienez 80 orduko iraupena izanen du.

b) Barnetegiak eta udako ikastaroak, gutxienez 40 orduko iraupena izan beharko du.

c) Baliabide telematikoen bidezko irakaskuntza: ikastaroak gutxienez 40 lanordu izan behar ditu.

d) Berariazko ikastaroak, eta eskaeraren aniztasunari egokituak; betiere, 40 eskola-ordu baino gehiagokoak behar dute.

2.2. Material didaktikoak eta garraioa ez dira diruz lagunduko.

Hirugarren oinarria.–Onuradunak.

3.1. Deialdi honetan ezarritako dirulaguntzak jasotzeko, Dirulaguntzei buruzko azaroaren 9ko 11/2005 Foru Legearen 13. artikuluan ezarritako betebehar orokorrez gainera, hurrengo betebehar hauek ere bete beharko dira:

–16 urte baino gehiago izatea. Adingabekoen kasuan, eskaera gurasoek eginen dute, edota adingabekoaren tutoretza duenak. Atzerritarren kasuan, aldiz, Atzerritarrak Identifikatzeko Agiriaren (AIA) jabe izan beharko dute.

–Nafarroan erroldatuta egotea deialdi hau argitaratzen den egunean.

–Nafarroako Ogasunarekiko ordainketak eta Gizarte Segurantzarekiko betebeharrak egunean izatea.

–Euskara ikastaroren batean izena emanda egon eta ordainketaren bat egin izana ikastaro horrengatik. Egindako ordainketa ezin da jaso beharreko zenbatekoa baino txikiagoa izan. Ikastaroa ematen duen entitateak euskararen irakaskuntza behar du bere helburu nagusien artean, eta horretarako baliabide propioak ere izan behar ditu, programazio propioa barne.

–Ikastaroaren matrikula ondoko modalitateren batean egitea:

• A modalitatea: 2024ko urtarrilaren 1etik abuztuaren 25era bitarte hasten den ikastaroren batean izena emanda egotea, eta ikastaroa 2024ko irailaren 30ean amaituta egotea.
• B modalitatea: 2024ko abuztuaren 26tik abenduaren 2ra bitarte hasten den ikastaroren batean izena emanda egotea, eta ikastaroa 2025eko ekainaren 30ean amaituta egotea.

–Laguntza jasoko dute gutxienez %80ko asistentzia ziurtatua duten eskatzaileek. Autoikaskuntzako ikastaroetan izena emandako pertsonek ere egiaztatu beharko dute eskola horiek hartu izana.

3.2. Honakoak dirulaguntza hauetatik kanpo geldituko dira:

–Titulartasun publikoko ikastegietako ikasleak (Zubiarte eta hizkuntza eskolak).

–Nafarroako Foru Komunitateko Administrazioko langileak, euskara ikastaroak egiteko berariazko laguntzak baitituzte.

Laugarren oinarria.–Aurrekontu erabilgarria eta dirulaguntzen moduluak.

4.1. Deialdi honetara bideratutako zenbatekoa 359.900 eurokoa izanen da gehienez, aurreikusitako gehikuntzak alde batera utzi gabe, bi modalitateen artean banatuta:

–A modalitatean: 44.900 euro 2024ko Gastuen Aurrekontuko "Helduek euskara ikasteko laguntzak" izeneko B30002-B3200-4809-334102 partidaren kargura izanen dira.

–B modalitatean: 315.000 euro 2025eko Gastuen Aurrekontuetan gaitu litekeen 2024ko ekitaldiko B30002-B3200-4809-334102, "Helduei euskaraz ikasteko laguntzak", partida baliokidearen kargura, betiere kreditu egokia eta nahikoa baldin badago.

4.2. Dirulaguntzen zenbatekoa modulu hauetan banatzen da ikastaro motaren eta ordu kopuruaren arabera:

–Ikastaro estentsiboak, trinkoak eta barnetegiak:

• 40 ordutik 79 ordura bitarte, 100 eurora arte.
• 80 ordutik 200 ordura bitarte, 200 eurora arte.
• 201 ordutik 270 ordura bitarte, 300 eurora arte.
• 271 ordutik 400 ordura bitarte, 400 eurora arte.

–Autoikaskuntzako ikastaroak:

• 40 ordutik 99 ordura bitarte, 100 eurora arte.
• 100 ordutik 189 ordura bitarte, 200 eurora arte.
• 190 ortutik 250 ordura bitarte, 300 eurora arte.

–Ikastaro berariazkoak:

• 40 ordutik 100 ordura bitarte, 200 eurora arte.
• 101 ordutik 200 ordura bitarte, 300 eurora arte.
• 201 ordutik 400 ordura bitarte, 400 eurora arte.

Deialdi honetan eskatzaileek ikasturtean ikastaro baterako baino gehiagorako eskatzen ahal dute laguntza. Kasu horietan, laguntzak batu eginen dira.

4.3. Modalitatearen arabera, behar den epean eta moduan aurkeztutako eskabideen artean banatuko da aurrekontuan aurreikusitako laguntzen zenbatekoa; betiere, deialdiko baldintzak betetzen badira. Modalitatea bakoitzean eskatutako dirulaguntzek onetsitako diru kopurua baino gehiago egiten badute, dirua eskatzaileen artean hainbanatuko da.

4.4. Eskatzaile bakoitzak jasotzen duen diru kopurua ezin izanen da izan dirulaguntza jasotzeko aurkeztu dituen gastuak baino handiagoa.

Bosgarren oinarria.–Eskabideak eta eskatutako agiriak aurkeztea.

5.1. Eskaera, lehentasunez, web bidezko datu-orri bat betez eginen da. Orri hori eskuragarri egonen da Nafarroako Gobernuaren web atari instituzionaleko tramiteen katalogoko kasuko tramitean: https://www.navarra.es/eu/tramiteak/on/-/line/euskara-ikasteko-laguntzak-helduentzat-2024an-eta-2025eko-lehen-seihilekoan.

5.2. Aurreko puntuan zehaztutako inprimaki telematikoa erabili ezean, eskaera egiteko aurkeztu beharko dira eskabidea eta beste laguntza batzuei buruzko erantzukizunpeko adierazpena, II. eranskinaren araberakoa, kasuan kasuko dokumentazioarekin batera, Administrazio Publikoen Administrazio Prozedura Erkideari buruzko urriaren 1eko 39/2015 Legean aurreikusitako baliabideetako edozein erabiliz.

Eskabidea eta dokumentazioa posta bulego batean aurkeztuz gero, gutun-azal ireki batean sartuko dira, postako langileek, ziurtatu aurretik, data eta zigilua jar diezazkioten.

Laguntza hauek eskuratu ahal izateko eskabideak Euskarabidea-Euskararen Nafar Institutua erakunde autonomoko Euskararen Sustapenaren eta Plangintzaren Zerbitzuari zuzenduko zaizkio beti.

5.3. Hona hemen aurkeztu beharreko agiriak:

–Webguneko inprimakia, edo, bestela, eskabidea eta helburu bererako egindako beste laguntza eskaera batzuei buruzko erantzukizunpeko adierazpena (II. eranskina).

–Matrikula agiria: agiriak, gutxienez, ikastaroaren datu hauek adieraziko ditu: izena noiz eman zen, ordaindutako kopurua, ikastaroaren ordu kopurua, eta ikastaroaren hasiera eta bukaera datak.

–Dirulaguntzaren xedeko ikastaroari dagokion ordainketa egin izanaren frogagiria.

–Ikastaroko bertaratze ziurtagiria, zentroak edo euskaltegiak emana. Ziurtagiria ikastaroa bukatu ondoren aurkeztuko da, modalitate bakoitzaren arabera, epemuga hauetan:

• A modalitatean: 2024ko urriaren 15a.
• B modalitatean: 2025eko uztailaren 15a.

Ziurtagiri hori erantsi beharko da soilik baldin eta eskabidean Euskarabideari informazio hori eskuratzeko baimenik ez bazaio eman.

–Erroldatze-ziurtagiria. Ziurtagiri hori erantsi beharko da soilik baldin eta eskabidean Euskarabideari informazio hori eskuratzeko baimenik ez bazaio eman.

–Foru Ogasunarekiko eta Gizarte Segurantzako Diruzaintzarekiko betebeharrak eguneratuak dituela ziurtatzen duten agiriak. Ziurtagiri horiek soilik erantsi beharko dira baldin eta eskabidean Euskarabideari informazio hori egiaztatzeko baimenik ez bazaio eman.

–Ikastaro baterako baino gehiagorako laguntza eskatuz gero, aski da eskaera bakar batean dokumentazio guztia batera bidaltzea, modalitateei kasu eginda.

5.4. Eskaerak aurkezteko epeak, modalitatearen arabera, honakoak dira:

–A modalitatea: 2024ko maiatzaren 15ean hasiko da, eta abuztuaren 31n bukatuko.

–B modalitatea: 2024ko urriaren 1ean hasiko da, eta azaroaren 30ean bukatuko.

5.5. Modalitate bakoitzeko eskaerak aztertuta, dagozkien behin-behineko zerrendak argitaratuko dira, onartutako eta baztertutako eskaera guztiekin.

5.6. Eskaerak aurreko oinarrietan aipatzen diren baldintzak betetzen ez baditu, interesdunari eskatuko zaio hamar egun balioduneko epean akatsak zuzentzeko edo agindutako agiriak aurkezteko. Halaber, adieraziko zaio hori egin ezean eskaerari uko egin diola ulertuko dela, eta esleipeneko ebazpenean inguruabar hori adieraziko da.

Seigarren oinarria.–Dirulaguntzen ebazpena eta ordainketa.

6.1. Prozeduraren instrukzioa Euskararen Sustapenaren eta Plangintzaren Zerbitzuak eramanen du. Hark modalitate bakoitzerako ebazpen proposamena eginen du Baloraziorako Batzorde Teknikoaren ebaluazioa aztertu ondotik.

6.2. Baloraziorako Batzorde Teknikoa arduratuko da eskabideen ebaluazioaz; haien kide izanen dira Euskarabidea-Euskararen Nafar Institutuko Euskararen Sustapenaren eta Plangintzaren Zerbitzuaren titularra, batzordeburu izanen dena, Euskara Sustatzeko Ataleko burua eta laguntzen deialdiaren ardura duen teknikaria, idazkari izanen dena. Batzordearen irizpena loteslea izanen da.

6.3. Deialdi honen xede diren modalitate bakoitzeko dirulaguntzak Euskarabidea-Euskararen Nafar Institutua erakunde autonomoko zuzendari kudeatzaileak ebatziko ditu. Onartutako eskaerak kontuan harturik, onuradun bakoitzari dagokion laguntzaren zenbatekoa kalkulatuko da, deialdi honen laugarren oinarriari jarraikiz. Zenbateko horri doikuntzak egin dakizkioke azkenean, egiazko datuen arabera eta deialdi honen laugarren oinarrian ezarritakoaren arabera. Ebazpena Nafarroako Gobernuaren eta Euskarabidearen webguneetan argitaratuko da, hurrengo zazpi egun naturalean.

–Modalitate bakoitzean eskatutako dirulaguntzek onetsitako diru kopurua baino gehiago egiten badute, dirua eskatzaileen artean hainbanatuko da.

6.4. Laguntza deialdi honetako modalitate bakoitzeko eskabideak ebatzi ondoren, 3. oinarriko baldintzak betetzen dituzten eskabideei dagozkien zenbatekoak ordainduko dira.

–Eskatzaile bakoitzak jasotzen duen diru kopurua ezin izanen da izan dirulaguntza jasotzeko aurkeztu dituen gastuak baino handiagoa.

–Ikastaro baterako baino gehiagorako emandako laguntzak ordainketa bakar batean batu eginen dira.

Zazpigarren oinarria.–Onuradunen betebeharrak, jarraipena eta dirulaguntzen gaineko kontrola.

Laguntza hauen onuradunek honako baldintza hauek bete beharko dituzte beti:

7.1. Administrazioak eskatzen ahal dizkien agiriak aurkeztu beharko dituzte, haien egiazkotasuna frogatzeko, eta, betiere, entitate emaileak egiten dituen egiaztatze jarduketak onartu beharko dituzte.

7.2. Onuradunek Dirulaguntzei buruzko azaroaren 9ko 11/2005 Foru Legearen 9. artikuluan ezarritako baldintza orokorrak bete beharko dituzte.

7.3. Edozein administraziok edo erakunde publikok zein pribatuk helburu bererako emandako beste laguntza batzuen berri emanen diote Euskarabideari.

7.4. Edozein inguruabar objektibo zein subjektiboren aldaketaren berri emanen diote Euskarabideari, hura dirulaguntza emateko orduan kontuan hartu bada.

Zortzigarren oinarria.–Ez betetzeak, itzulketak eta arau-hausteak.

8.1. Hartutako zenbatekoa itzuli beharko da, osorik edo partez, dirulaguntza emateko ezarritako baldintzak betetzen ez badira, Dirulaguntzei buruzko Foru Legearen 35. artikuluan aipatzen diren zergatikoak gertatzen badira edo deialdi honetan berariaz aipatzen diren betebeharrak betetzen ez badira. Legez ezarritako kasuetan, gainera, bidezkoa izanen da dirulaguntza ordaindu zenetik itzuli beharraren gaineko ebazpena ematen den arte sortutako berandutze-interesak ordaintzeko eskatzea.

Onuradunek kasu hauetan itzuli beharko dute dirulaguntza:

a) Dirulaguntza lortu bada horretarako eskatzen diren baldintzak faltsutuz edo hori eragotziko zuketen baldintzak ezkutatuz.

b) Nafarroako Foru Komunitateko Administrazioaren, beste administrazio publikoen edo erakunde publiko nahiz pribatuen edo partikularren, Espainiakoen nahiz atzerrikoen, beste dirulaguntza edo laguntza batzuk jaso izanaren berri ez ematea eskaera formalizatzean, edo, kasua bada, geroago. Beste dirulaguntza horien berri ez dela eman atzematen bada, eta dagokion zehapen espedientea deusetan galarazi gabe, jasotako laguntza osorik edo zati batean itzuli beharko da.

8.2. Arau-hauste eta zehapenetarako, Dirulaguntzei buruzko azaroaren 9ko 11/2005 Foru Legearen IV. tituluan xedaturikoa aplikatuko da. Zehapen prozedura Nafarroako Foru Komunitateko Administrazioari buruzko abenduaren 3ko 15/2005 Foru Legearen V. tituluan ezarritakoa izanen da.

Bederatzigarren oinarria.–Laguntzen bateragarritasuna.

9.1. Deialdi honetako dirulaguntzak bateragarriak dira beste administrazio publiko, erakunde publiko edo pribatu edo partikular batzuek, Estatukoek edo nazioartekoek, emandakoekin. Hala ere, ez dira bateragarriak Nafarroako Foru Komunitateko Administrazioak helburu bererako ematen dituenekin.

9.2. Dirulaguntzen zenbatekoa ezin da inola ere izan, bakarrik edo deialdiko epeari egozten ahal zaizkion beste dirulaguntza, laguntza, diru-sarrera edo baliabideekin baturik, diruz lagundutako ikastaroarengatik ordaindutako kopurua baino handiagoa.

9.3. Euskarabideak behar diren egiaztapenak eginen ditu laguntzen bateragarritasunari dagokionez.

Hamargarren oinarria.–Datuen tratamendua.

Eskatzaileen datuen tratamenduak beteko du Datu Pertsonalak Babesteko eta Eskubide Digitalak Bermatzeko abenduaren 5eko 3/2018 Lege Organikoan xedatutakoa.

Hamaikagarren oinarria.–Laguntzen publizitatea.

Euskarabideak Nafarroako Gobernuan duen webgunean jarriko ditu laguntzak ematen dituzten ebazpenak; bertan eskatzaileen zerrenda eta emandako zenbatekoak agertuko dira.

Hamabigarren oinarria.–Aplikatzekoa den legeria.

Deialdi hau oinarri hauetan xedatutakoaren arabera arautuko da, bai eta Dirulaguntzei buruzko azaroaren 9ko 11/2005 Foru Legean ezarritakoaren arabera ere. Halaber, maiatzaren 19ko 161/1988 Foru Dekretuaren bidez onetsitako erregelamenduan xedatutakoa aplikatuko da. Erregelamendu horren bidez arautzen da laguntzak ematea helduentzako euskararen irakaskuntza sustatzen duten entitate pribatuei.

Hamahirugarren oinarria.–Administrazio errekurtsoak.

13.1. Deialdi honen eta haren oinarri arautzaileen kontra gora jotzeko errekurtsoa jar daiteke, Nafarroako Gobernuari zuzendua, hilabeteko epean, foru agindu hau Nafarroako Aldizkari Ofizialean argitaratu eta biharamunetik hasita.

13.2. Era berean, Euskarabidea-Euskararen Nafar Institutuko zuzendari kudeatzailearen ebazpenen kontra, gora jotzeko errekurtsoa jar daiteke, Herritarrekiko Harremanetako kontseilariari zuzendua, jakinarazi eta biharamunetik hasita hilabeteko epean.

ANEXO II.–SOLICITUD

Helduek euskara ikasteko dirulaguntzak: eskabidea (*)

Ayudas a personas adultas para el aprendizaje de euskera: solicitud (*)

Eskatzaileak adierazten du: / La persona solicitante declara:

þ 1. Jakitun dela Euskarabideak beste administrazio batzuei jakinaraziko diela dirulaguntza hau jaso duela. / Que tiene conocimiento de que Euskarabidea informará a otras administraciones de que le ha sido abonada esta ayuda.

¨ 2. Ez diela euskara ikastaro honetarako inolako dirulaguntzarik eskatu beste administrazio publiko batzuei, erakunde publiko edo pribatuei, edo partikularrei, Espainiakoak izan edo nazioartekoak, eta, jaso ere, ez duela halakoengandik dirulaguntzarik jaso. / Que no ha obtenido ni solicitado ningún tipo de subvención de otras administraciones públicas, entes públicos o privados o de particulares, nacionales o internacionales, para este mismo curso de euskera.

¨ 3. Euskara ikastaro honetarako dirulaguntzak hauek eskatu dizkiela beste administrazio publiko batzuei, erakunde publiko edo pribatuei, edo partikularrei, Espainiakoak izan edo nazioartekoak, edo horiengandik dirulaguntza hauek jaso dituela. / Que ha solicitado u obtenido las siguientes subvenciones de otras administraciones públicas, entes públicos o privados o de particulares, nacionales o internacionales, para este mismo curso de euskera:

Eskatzaileak Euskarabideari honetarako baimena ematen dio: / La persona solicitante autoriza a Euskarabidea a lo siguiente:

¨ 4. Egiaztatu dezan eskatzailea Nafarroako udalerri batean erroldatuta dagoela, egunean dituela Foru Ogasunarekiko eta Gizarte Segurantzako Diruzaintzarekiko betebeharrak eta ikastaroaren bertaratzekoa. / A comprobar los datos relativos a su empadronamiento en una localidad navarra, hallarse al corriente de sus obligaciones con la Hacienda Foral y con la Tesorería de la Seguridad Social y el de asistencia al curso.

¨ 5. Ez diot Euskarabideari aurrekoak egiaztatzeko baimenik ematen. / No autorizo a Euskarabidea realizar las citadas comprobaciones.

Kasu horretan, eskatzaileek, eskabide honekin batera, aurkeztu beharko dituzte: erroldatze-ziurtagiria, Foru Ogasunarekiko eta Gizarte Segurantzako Diruzaintzarekiko betebeharrak egunean dituela frogatzen duen ziurtagiria; eta A modalitatean 2024ko urriaren 15erako, ala B modalitatean 2025eko uztailaren 15erako, euskaltegiak emandako ikastaroaren bertaratze-ziurtagiria. / En ese caso, las personas solicitantes deberán presentar, junto con esta solicitud, los correspondientes certificados de empadronamiento, de hallarse al corriente de sus obligaciones con la Hacienda Foral y con la Tesorería de la Seguridad Social; y en la modalidad A para el 15 de octubre de 2024, o en la modalidad B para el 15 de julio de 2025, el certificado de asistencia al curso expedido por el centro.

Aurkeztu beharreko dokumentuak: / Documentación a presentar:

¨ 6. Matrikularen egiaztagiria eta ordainketaren egiaztagiria / Justificantes de matrícula y de pago.

¨ 7. Beste batzuk (Euskarabideari ez bazaio egiaztatzeko baimenik eman (ikusi goiko 5. puntua) / Otros (en el caso de no haber dado autorización a Euskarabidea (ver información del punto 5).

................................................(e)an, 2024ko ............................................aren ..........(e)an

En ................................................ a .......... de ............................................ de 2024

Sinadura (eskatzailea, adinez nagusia) / Firmado (la persona solicitante, mayor de edad)

DATUEN BABESA. Datu Pertsonalak Babesteko eta Eskubide Digitalak Bermatzeko abenduaren 5eko 3/2018 Lege Organikoan ezarritakoaren arabera, jakinarazten da datu pertsonalen tratamendu automatizatua eginen dela, eta dagokion fitxategian sartuko direla, eskatutako laguntza izapidetzeko. Halaber, jakinarazten da Euskarabidea-Euskararen Nafar Institutura (Paulino Caballero kalea, 13-31002 Iruña) idazki bat bidaliz eskura ditzakezula datuetan sartzeko, datuak zuzentzeko, datuak ezerezteko eta datuen aurka egiteko eskubideak.

PROTECCIÓN DE DATOS. De acuerdo con lo establecido en la Ley Orgánica 3/2018, de 5 de diciembre, de Protección de datos personales y garantía de los derechos digitales, se informa que los datos personales serán objeto de un tratamiento automatizado e incorporados al correspondiente fichero con la finalidad de tramitación la ayuda solicitada. Asimismo, se informa de que pueden ejercitar los derechos de acceso, rectificación, cancelación y oposición respecto de los datos facilitados mediante escrito dirigido a Euskarabidea-Instituto Navarro del Euskera (calle Paulino Caballero, 13 - 31002 Pamplona-Iruña).

Iragarkiaren kodea: F2406450