Iragarkia

83. ALDIZKARIA - 2024ko apirilaren 23a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

64C/2024 EBAZPENA, martxoaren 22koa, Ekonomia Sozialeko eta Laneko zuzendari nagusiak emana, zeinaren bidez erabakitzen baita Oberena erakundearen hitzarmen kolektiboa erregistratu, gordailutu eta Nafarroako Aldizkari Ofizialean argitaratzea.

Oberena erakundeak aurkeztutako hitzarmen kolektiboa aztertu da (kode zenbakia: 31100412012013), zeina erregistro honetan sartu baitzen 2024ko martxoaren 6an, enpresaren ordezkariek eta sindikatuen ordezkariek 2024ko otsailaren 22an izenpetuta.

Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, laneko akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin bat etorriz,

Nafarroako Foru Komunitateko Administrazioari eta foru sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuak ematen dizkidanak, honako hau

EBAZTEN DUT:

Lehenengoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Oberena erakundeak aurkeztutako hitzarmen kolektiboa (kode zenbakia: 31100412012013).

Bigarrena.–Nafarroako Aldizkari Ofizialean argitara dadila xedatzea, orok jakin dezaten.

Hirugarrena.–Ebazpen hau eskatzaileari jakinaraztea, eta ohartaraztea ebazpenak ez diola amaiera ematen administrazio bideari eta, honen aurka, gora jotzeko errekurtsoa aurkezten ahal diola Eskubide Sozialetako, Ekonomia Sozialeko eta Enpleguko kontseilariari, hilabeteko epean, ebazpena jakinarazi eta hurrengo egunetik aurrera.

Iruñean, 2024ko martxoaren 22an.–Ekonomia Sozialeko eta Laneko zuzendari nagusia, Iñaki Mendióroz Casallo.

OBERENA ERAKUNDEAREN HITZARMEN KOLEKTIBOA

I. KAPITULUA.–XEDAPEN OROKORRAK

1. artikulua. Aplikazio eremua.

Hitzarmen kolektibo hau Oberena erakundean besteren kontura lan egiten duten pertsona guztiei aplikatuko zaie, eta haien lan harremanak arautuko ditu. Oberena erakundea kirol, josteta eta gizarte entitatea da, eta bere jarduera kirol instalazioen berezko jarduera da.

Hitzarmenaren barne sartzen dira jardueretako langileak; hau da, kirol monitore eta teknikariak eta kanpalekuetako eta ludoteketako monitoreak, futboleko eta pilotako ataletakoak izan ezik. Lanpostu horien baldintza bereziak direla-eta, enpresaren eta langilearen arteko akordioen bidez arautuko dira. Hitzarmen hau ez zaie inola ere aplikatuko, eta, horren ordez, kasu bakoitzean prezio jakin bat ezarriko da lan ordu bakoitzeko. Prezio horrek ordainsariaren kontzeptu guztiak hartuko ditu, salbuespenik gabe, hala nola aparteko ordainsarien, oporren eta abarren hainbanaketa.

2. artikulua. Indarraldia.

Hitzarmen kolektibo hau indarrean egonen da 2023ko urtarrilaren 1etik 2025eko abenduaren 31ra arte.

Automatikoki salatuta gelditzen dela joko da indarraldia amaitzen denetik aurrera.

Beste hitzarmen bat negoziatzen ez den bitartean oraingo honek izanen du indarra.

3. artikulua. Hitzarmena ez aplikatzea eta kanpo gelditzea.

Enpresa ez da hitzarmenetik kanpo geldituko, eta hitzarmena aplikatzeari ere ez dio uko eginen, langileen ordezkariekin akordioa lortu gabe.

Bi alderdiek espresuki erabaki dute, desadostasunak konpontzeko, Nafarroako Lan Auzitegiko lanbide arteko akordioaren adiskidetze eta bitartekotza prozesuen menpe jarriko direla beti. Arbitraje prozedura aplikatzeko, bi alderdiek haren mende jartzearekin ados egon beharko dute.

4. artikulua. Legezkotasuna.

Hitzarmen honetan aurreikusirik ez dagoen guztian, Langileen Estatutuan eta aplikatzekoak diren gainerako legeetan ezarritakoari jarraituko zaio.

II. KAPITULUA.–EGITURA PROFESIONALA

5. artikulua. Langileen sailkapena.

Enpresako langileen sailkapen profesionala betetzen duten eginkizunaren araberakoa izanen da, eta kontuan hartuko dira haien titulazioa, gaitasun profesionalak, metatutako esperientzia, autonomia maila, ekimena eta lanean duten erantzukizuna.

Hitzarmen honetan ageri diren lanbide sailkapenak adierazi baizik ez dira egin, eta horrek ez du esan nahi aipatutako lanpostu guztiak beteta izan behar direnik, Oberena erakundearen beharrak eta bolumena kontuan hartuta beharrezkoa ez bada. Adierazi baizik ez dira egiten, halaber, lanbide talde bakoitzari esleitutako zereginak, Oberena erakundeko langile guztiak beharturik baitaude agintzen zaizkien lan eta egiteko guztiak betetzera, bakoitzaren lanbide eskumenari dagozkion eginbehar orokorren barruan.

6. artikulua. Lanbide taldeak.

I. taldea.

Talde honetako langileek zuzeneko erantzukizuna dute enpresaren arlo funtzional baten edo gehiagoren kudeaketan, eta zailtasun edo kualifikazio handieneko lan teknikoak egiten dituzte. Erabakiak hartzen dituzte edo haiek prestatzen parte hartzen dute, bai eta enpresaren garapenerako helburu zehatzak definitzen ere, eta gainerako langileak zuzendu eta koordinatzen dituzte. Autonomia, ekimen eta erantzukizun osoz burutzen dituzte beren eginkizunak.

Unibertsitate titulua edo enpresak onartutako pareko ezagupenak dituzte, eta esperientzia zabala beren sektore profesionalean.

Orientazio gisa, honako kategoria hauek hartzen ditu barnean:

– Zuzendaria.

– Kudeatzailea.

II. taldea.

Autonomia, ekimen eta erantzukizun handia duten langileak dira, eta lan tekniko konplexuak edo eduki intelektual edo giza harreman handikoak egiten dituzte, enpresaren arlo funtzional baten edo batzuen kudeaketaren erantzukizun osoa dakartenak. Lankide talde batek arlo funtzional berean egindako eginkizunak integratu, koordinatu eta gainbegiratzeko zuzeneko ardura dute.

Unibertsitate titulua edo enpresak onartutako pareko ezagupenak dituzte, eta esperientzia zabala beren sektore profesionalean.

Orientazio gisa, honako kategoria hauek hartzen ditu barnean:

– Departamentu zuzendaria.

– Mantentze lanetako burua.

– Administrazioko burua.

III. taldea.

Agintzeko erantzukizunarekin edo gabe, erdi-mailako eduki intelektuala eta zailtasun tekniko ertaina duten zereginak burutzen dituzte, prozesuan autonomia izanik. Lankide talde batek egindako eginkizunak koordinatu eta gainbegiratzeko ardura izaten ahal dute.

Goi mailako Lanbide Heziketako titulua edo enpresak onartutako pareko ezagutzak izan behar dituzte, eta, osagarri gisa, esperientzia egiaztatua lanpostuan.

Orientazio gisa, honako kategoria hauek hartzen ditu barnean:

– Mantentze lanetako 1. mailako ofiziala.

– Administrazioko 1. mailako ofiziala.

IV. taldea.

Langile hauek autonomiaz gauzatu beharreko lanak egiten dituzte, ekimena eta arrazoiketa eskatzen dutenak, bai eta ezagutza profesionalak edo gaitasun praktikoak ere; horiek gauzatzeaz arduratzen dira, eta beren lanaren erantzule dira. Ez dute langilerik beren ardurapean.

Erdi mailako Lanbide Heziketako titulua edo enpresak onartutako pareko ezagupenak izan behar dituzte.

Orientazio gisa, honako kategoria hauek hartzen ditu barnean:

• 1. maila:
  • Mantentze lanetako 2. mailako ofizialak.
  • Administrazioko 2. mailako ofizialak.
  • Soroslea.
• 2. maila:
  • Mantentze lanetako 3. mailako ofizialak.
  • Administrari laguntzailea.

V. taldea.

Mendekotasun handia eta jarraibide espezifikoak dituzten lanak egiten dituzte, eta prestakuntza eskasa dute.

Lan sinple eta errepikakorrak egiten dituzte, jarraibide argi nahiz errepikakorren arabera egiten direnak.

Derrigorrezko Bigarren Hezkuntzako ikasketak edo lanean arituta lortutako ezagutzak dituzte.

Jarduera motak: oinarrizko eragiketak makina sinpleekin, eskuzko jarduera errazak, instalazioak garbitu, ireki eta ixtea, aldagelak, atezaintza eta zaintza.

Orientazio gisa, honako kategoria hauek hartzen ditu barnean:

• 1. maila:
  • Atezaina
• 2. maila:
  • Mantentze-lanetako peoia
  • Garbiketako langileak
  • Zaintzaileak

III. KAPITULUA.–KONTRATUAK, PROBALDIA ETA LANA UZTEA

7. artikulua. Kontratuak.

Kontratu guztiak idatziz formalizatuko dira, eta Langileen Estatutuan eta hura garatzeko arauetan aurreikusitako edozein modalitateren babesean itunduko dira.

8. artikulua. Probaldia.

Langileak enpresan lanean hastean, probaldian daudela ulertuko da, jarraian lanbide talde bakoitzarentzat ezarritako epeetan:

– 1. eta 2. taldeak: 3 hilabete.

– 3., 4. eta 5. taldeak: 2 hilabete.

9. artikulua. Lana borondatez uztea.

Bere borondatez enpresa utzi nahi duen langileak honako aurrerapen honekin eman beharko du horren berri:

– 1. eta 2. taldeak: 2 hilabete.

– 3., 4. eta 5. taldeak: 15 egun.

Aurreabisu horren epea ez betetzeak kenketa bat eraginen du azken likidazioan eta kitapenean, eta haren balioa aurreabisua egin behar zuenetik egin duenera bitarteko egunei dagokien lansaria adinakoa izanen da.

IV. KAPITULUA.–LANALDIA, OPORRAK, LANEKO EGUTEGIA ETA LIZENTZIAK

10. artikulua. Lanaldia.

Urteko lanaldia 1.704 ordukoa izanen da.

Enpresaren jarduerari lotutako prestakuntza orduak laneko benetako ordu gisa hartuko dira.

Langileak atsedenerako bi egun jarraian izanen ditu astean. Egunok larunbata eta igandea izanen dira, eta proportzioa, berriz, lan egindako asteburu bakoitzeko atsedenerako beste bat.

Atsedenen erregulazio horretatik salbuetsita geratzen dira egungo "asteburuetako atezain" eta "asteburuetako zaintzaile" deritzen lanpostuak, eta horien lanaldia orain arte egin denaren arabera arautuko da.

Zuzendaritzak jotzen badu asteburuetan esklusiboki zerbitzuak emateko beharrezkoa dela beste kontratazio bat egitea, aurrez aipatutakoez bestelakoa, sindikatuen ordezkariei jakinarazi beharko zaie kontratazioa gauzatu aurretik, eta behar bezala justifikatu beharko ditu hitzarmenean atsedenetarako ezarritako erregulazioa salbuestea eskatzen duten kausak.

Langileen Estatutuaren 34.2 artikuluan ezarritakoaren ondorioetarako, erabaki da lanaldiaren %100 modu erregularrean banatuko dela. Hortaz, ez da posible modu irregularrean banatzea, hitzarmen honetan berariaz xedatutakoa alde batera utzita.

Aurreko horretatik salbuetsita daude oporraldiak, laneko istripuak, baimenak eta orokorrean iraupen gutxiko ustekabeko egoerak direla-eta berehalako ordezkapena egin behar denean kontratatutako langileak.

Lanaldi partzialeko kontratuetan 2025ean kontsolidatuko da 2024an lan egindako orduen batez bestekoa, kanpo utzita edozein motako lan istripu baten ondorioz, amatasunagatik, aitatasunagatik, haurdunaldiko arriskuagatik edota edoskitzaroko arriskuagatik ordezkapena egiteko lan egindakoak.

Baldin eta lan egutegia osatzean urteko lanaldiak 1.704 orduko iraupena gainditzen badu, doitzeko behar diren egunak egonen dira eskuragarri, eta langileak erabakiko du horiek noiz erabili, gutxienez ere bost eguneko aurrerapenarekin jakinarazita.

Ordutegia lanaldi jarraitukoa denean, langileak hogei minutuko atsedenaldirako eskubidea izanen du, eta denbora hori egiazko lan denboratzat hartuko da.

Benetan lan egindako lanorduak honela kontatuko dira: langileak, lanaldiaren hasieran nahiz bukaeran, bai eta hura zatitzen ahal den aldietan ere, lanpostuan egon behar du, bere lanari lotuta.

2026. urterako, urteko lanaldia zortzi orduz laburtuko da.

11. artikulua. Lan egutegia.

Oberenak konpromisoa hartzen du urteko lan egutegia egiteko; langileek eskura izanen dute urte bakoitzeko urtarrilaren 31 baino lehen.

12. artikulua. Oporrak.

Hitzarmen honen eraginpeko langileek 29 laneguneko oporrak izanen dituzte: 17 egun udan eta 12 egun neguan.

Lan eta zerbitzuak hobeki antolatzeko, irizpide hauek ezarri dira:

–Udako denboraldia ekainaren 1etik irailaren 30era bitartekoa izanen da.

–Neguan, ez dira oporretan egonen batera plantillako bi langile edo gehiago, eta udan, berriz, hiru langile edo gehiago.

–Oporretarako eskaerak ordezkapenak antolatzeko adina denborarekin eginen dira, eta, udakoen kasuan, martxoaren 15a baino lehenago.

–Bi langilek edo gehiagok eskatuz gero oporretarako egun berberak, antzinatasunaren araberako errotazio txandak aplikatuko dira, orain arte bezala. Urtero adieraziko da zein den lehentasun ordena oporrak eskatzeko.

13. artikulua. Aparteko eta jaiegunetako orduak.

Hitzarmen kolektibo honetan ezarritako lanaldi arrunta gainditzen duten orduak apartekoak izanen dira.

Alderdi sinatzaileek konpromisoa hartzen dute aparteko ordu horiek behar-beharrezkoa den kopurura murrizteko.

Aparteko orduak borondatezkoak izanen dira, salbu eta haiek ez egiteak enpresari kalte larriak eragiten dizkionean eta produkzioa nahiz zerbitzua etetea eragiten duenean.

Zerbitzua dela-eta lan egutegian lanekoa ez den egun gisa ageri diren egunetan lan egin behar duten langileek bi konpentsazio hauetako bat jasoko dute:

–Ekonomikoa: aparteko ordu gisa.

–Atsedenaldia: bi egun.

Langileak konpentsazio ekonomikoa jasotzea aukeratzen ahalko du. Atsedena aukeratuz gero, enpresak ezarriko du zein egunetan hartu atseden hori, eta, irizpide orokor gisa, astelehenetan hartuko da.

Asteko arauzko atsedena lan egutegian jaiegun gisa jasota dagoen egunetako batean tokatuz gero, langileak eskubidea izanen du beste egun bat hartzeko eta, ahal dela, adierazia duenaren hurrengoa.

Uztailaren 7a jaieguna izanen da lan ondorioetarako, egun seinalatua baita.

14. artikulua. Lizentzia ordainduak.

Hitzarmen honen eraginpeko langileek honako lizentzia ordaindu hauek izanen dituzte:

–Hamazazpi egun natural ezkontzeagatik edo izatezko bikotea osatzeagatik.

–Lau egun natural ezkontidea, izatezko bikotea, seme-alabak, gurasoak eta anai-arrebak zentzeagatik.

–Bi egun odolkidetasuneko nahiz ezkontza ahaidetasuneko bigarren gradurainoko ahaideen heriotzagatik. Arrazoi horrengatik langileak bidaia egin behar badu, epea bi egunez luzatuko da.

–Bost egun, istripu nahiz gaixotasun larriagatik, ospitaleratzeagatik nahiz etxean atseden hartzea eskatzen duen ospitaleratzerik gabeko ebakuntza kirurgikoa jasan behar badu langilearen ezkontideak, izatezko bikotekideak edota odolkidetasuneko nahiz ezkontza ahaidetasuneko bigarren mailarainoko senide batek (izatezko bikotekidearen odolkidetasuneko senideak barne) edo langilearekin etxe berean bizi den eta zaintza behar duen beste edozein pertsonak.

–Egun bat ebakuntza kirurgikoa behar duen ingresu anbulatorioagatik.

–Egun natural bat guraso, seme-alaba, anai-arreba, aita-amaginarreba edo koinatu-koinata baten ezkontzagatik.

–Egun natural bat seme-alaba baten bataio edo jaunartzeagatik.

–Egun bat ohiko bizilekua aldatzeagatik.

–Egun bat norberaren aferetarako.

–Nahitaezko eginkizun publiko bat betetzeko, behar-beharrezkoa den denbora. Arestian aipatu den eginbehar hori betetzeagatik lanorduen ehuneko hogei baino gehiago ezin izan bada bete, hiru hilabeteko tartean, enpresak eszedentzia egoerara pasatzen ahalko du langilea, Langileen Estatutuaren 46.1 artikuluan araututa dagoen bezala.

Izatezko bikote aitortuei ere aplikatuko zaizkie aipatutako lizentzia ordainduak.

Baimen horiei egun bat gehituko zaie Iruñetik 100 kilometro baino gehiagora gertatu badira, eta beste egun bat 300 kilometro baino gehiagora gertatu badira.

V. KAPITULUA.–BALDINTZA EKONOMIKOAK

15. artikulua. Ordainsariak.

Ordainsarien honako igoera hau adosten da, kanpo utzita antzinatasunagatiko osagarria, zeinak ez baitu igoerarik izanen.

–2023. urtea: % 5.

–2024. urtea: Nafarroako 2023ko KPI.

–2025. urtea: Nafarroako 2024ko KPI.

Jardueretako langileek eta ludotekako nahiz aisialdiko monitoreek jasotzen dituzten ordainsarietan ez da ezein igoerarik izanen 2023. urtean. 2024, urterako orduko gutxieneko prezioa 15,43 eurokoa izanen da kirol teknikarientzako eta 12,09 eurokoa ludotekako eta aisialdiko monitoreentzako.

Ezartzen diren urteko zenbatekoetan, sartuta egonen dira arauzko soldatak eta borondatezkoak, mozkinetako partaidetza eta ezartzen ahal den beste edozein ordainsari, xurgatzen eta konpentsatzen ahalko dena.

Soldataren urteko zenbatekoa hamabi hileko kuota arruntetan eta hiru apartekotan banatuko da; aparteko horietako bi ekainaren 30ean eta abenduaren 15ean ordainduko dira, eta hirugarrena, bi zati berdinetan, martxoko eta urriko hileko soldatekin batera.

16. artikulua. Antzinatasun osagarria.

2022-01-01etik aitzina, lehengo antzinatasun plusa ordeztuko da, eta hau ezarriko da:

– 2019-08-09 baino lehenagoko antzinatasuna duten langileek antzinatasunagatiko osagarria jasoko dute, orain arte bezala; hots, kopuru finko bat jasoko dute hirurteko bakoitzeko, hirurtekoen mugarik gabe.

–2019-08-09az geroztik enpresan sartutako langileek zenbateko finko bat jasoko dute hirurteko bakoitzeko, antzinatasun gisa, eta bost hirurteko gehienez.

Hirurteko bakoitzaren zenbatekoa urteko 790,50 eurokoa izanen da.

Behin-behineko langile bat langile finko bihurtzen delarik, antzinatasunaren ondorioetarako onartu eginen zaio ordura arte modu jarraituan lanean emandako denbora.

17. artikulua. Aparteko pagak.

Enpresako langileek aparteko bi eskersari jasoko dituzte. Sei hilean behin sortuko dira, eta ekainaren 30ean eta abenduaren 15ean ordainduko. Bi eskersarien zenbatekoa hil bateko oinarrizko soldata gehi antzinatasuna adinakoa izanen da. Eskersari bakoitza hainbanatzen ahalko da aurreko seihileko naturalean egindako zerbitzu denboraren arabera. Ordainketa hilabeteka hainbanatzen ahalko da, alderdiak ados jarriz gero.

Aurrekoen zenbateko bereko hirugarren paga bat ere jasoko dute; erdia martxoaren 31n ordainduko da, eta beste erdia, urriaren 31n. Aurreko urtean lan egindako denboraren arabera kobratuko da.

Lanaldi partzialean ari diren langileei eskersarien zati bat ordainduko zaie, beren egiazko lanaldiarekiko proportzioan.

18. artikulua. Igandeko edo jaieguneko lanagatiko ordainsaria.

Lanaldi arrunta igandeetan edo jaiegunetan egiten duten langileek 42,38 euroko plusa jasoko dute 2023an, eta 43,61 eurokoa 2024an.

19. artikulua. Gaueko lanaren plusa.

22:00etatik 06:00etara bitarte egiten dena da gaueko lana.

Gauez lan egiten duten langileek 2023an 2,94 euroko plusa jasoko dute lanean emandako gaueko ordu bakoitzeko, eta 2024an, berriz, 3,03 eurokoa.

20. artikulua. Soroslea.

IV. taldeko 1. mailatik beherako lanbide kategoria duten langileek, noizbait sorosle lanetan ari badira, eguneroko plus bat jasoko dute, beren ordainsarien eta IV. taldeko 1. mailari dagozkionen arteko diferentzia bestekoa. Eginkizun horiek betetzen dituzten egunetan bakarrik jasoko dute diru kopuru hori. Eginkizun horiek lanaldiaren zati batean egiten badira, egindako orduen proportzioan kobratuko dira. Ondorio horietarako, ez da kontuan hartuko soroslea ordezteko 20 minutuko aldia, eguneko atsedenaldiari dagokiona.

21. artikulua. Peoiaren autonomia plusa.

Peoiaren lanbide kategoria duten langileek, lanean ari badira instalazioan maila altuagoko mantentze lanetako langilerik lanean egon gabe, eguneko 21 euroko plusa jasoko dute 2023. urtean zehar, eta 21,61 euroko plusa, berriz, 2024. urtean. Plus hori jasotzeko, gutxienez lanaldiaren %50ean gertatu beharko da egoera hori.

VI. KAPITULUA.–HOBEKUNTZA SOZIALAK

22. artikulua. Istripuak eta eritasuna.

Istripua edo eritasuna dela-eta bajan dauden langileei soldata % 100era arte osatzeko falta zaien zenbatekoa ordainduko zaie, antzinatasuna barne.

23. artikulua. Bizi aseguru kolektiboa.

Enpresak konpromisoa hartzen du bizi aseguru kolektibo bat hitzartzeko bere langileentzat, prestazio hauekin:

661.113,31 euro, istripu batek –lanekoa zein bestelakoa– edo laneko gaixotasun batek eragindako ezintasun iraunkor oso absolutuagatik.

330.555,50 euro istripuaren ondoriozko heriotzagatik, istripua lanekoa zein bestelakoa izan.

24. artikulua. Laneko arropa eta materiala.

Enpresak urtero emanen dizkie langileei, urtarrilean, ondoko jantzi hauek:

–Neguko bota pare bat (bi urtean behin).

–Beroki bat (bi urtean behin).

–Galtza urdin bi.

–Jaka bat.

–Zapatila pare bat.

–Galtza zuri bi.

–Bi polo.

–Kirol-jertse edo jertse bat.

–Txankleta pare bat (sorosleentzat).

–Bainujantzi bat (sorosleentzat).

Langileak beharturik daude haien jantziak garbi eta erabilera egoera onean izatera; etengabe erabiliko dituzte lan jantziak, bete beharreko zereginaren arabera egoki direnak.

25. artikulua. Osasun azterketa.

Langileei onartzen zaie urtean osasun azterketa bat izateko eskubidea, urte bakoitzeko lehen hiruhilekoan.

26. artikulua. Aurrerakinak.

Langile finkoek eskubidea izanen dute hilabeteko soldata adinako aurrerakina jasotzeko, hileko hamabi kuota jarraitu eta berdinetan itzuli beharrekoa; aurrerakin bat osorik ordaindu arte ez dute beste bat jasotzen ahalko.

27. artikulua. Bilera sindikaletarako eskubidea.

Langileek bermatuta izanen dute hilean ordubete izatea bilerak egiteko; betiere, dagokion baimena eskatzen bada 48 ordu lehenago gutxienez. Bilerak Oberenaren instalazioetan egin beharko dira.

28. artikulua. Aldi baterako laneko enpresak.

Enpresak, beharrezkotzat jotzen badu, zuzeneko kontratazioak egiten ahalko ditu aldi baterako enpresekin, kontratatuari Oberenako langileek jasotzen duten soldata berdina bermatuta, kategoria eta kontratazioaren xedea kontuan hartuta.

VII. KAPITULUA.–BESTE ERREGULAZIO BATZUK

29. artikulua. Enpresan mailaz igotzea eta langileak ordezkatzea.

Edozein arrazoi dela-eta, enpresan lanpostu huts bat baldin badago, jarduneko langileek lehentasuna izanen dute lanpostu hori betetzeko, horretarako behar diren baldintzak betetzen badituzte.

Horrez gain, Oberenako beheragoko maila batean dauden langile guztiei aukera emanen zaie goragoko kategoriara igotzeko, horretarako gaitasuna dutela frogatzen duten unetik hasita, postu hutsen bat egonez gero.

Enpresak ABE, baimen, opor edo eszedentzia egoeran dauden langileak ordezkatzea erabakitzen badu, edo ordu gehigarriak egitea behar badu (langile bakoitzaren egutegiaren arabera egiten diren egiturazko orduetatik gorako orduak), lanaldi partzialeko edo aldizkako kontratu finkoak dituzten jarduneko langileek lehentasuna izanen dute lanpostu horiek betetzeko, baldin eta beharrezko lanbide trebakuntza badute eta antolakuntzari dagokionez posible bada (ordutegien bateragarritasuna, atseden denboren errespetua).

30. artikulua. Batzorde paritarioa.

Hitzarmenaren Batzorde Paritarioa osatzen da, honako kide hauekin: langileen hiru ordezkari eta Zuzendaritza Batzordearen hiru ordezkari.

–Eginkizunak:

• Batzordea interpretazio, arbitraje eta adiskidetze organoa izanen da, aurkezten zaizkion gai indibidualetan eta kolektiboetan, baina inola ere sartu gabe esparru jurisdikzionalean, ez eta gainerako organo eskudunen esparruetan ere.
• Hitzarmenaren aplikazio eta interpretazioaren inguruan sortzen diren gaiez arduratzea eta horiek ebaztea.

Osaera: Zuzendaritza Batzordea ordezkatzen duten hiru kide eta langileen ordezkari diren beste hiru kide.

Deialdia: hitzarmen honen sinatzaileetako edozeinek egin dezake deialdia, gai zerrenda jasoko duen idatzizko jakinarazpen baten bidez. Deialdiko egunetik hasita hamabost eguneko gehieneko epean bilduko da batzordea.

Batzordearen osaketa baliozkoa dela ulertuko da batzordekideen lau seiren bertan badaude.

Erabakiak: Batzordeak erabakiak hartzeko, kideen lau seirenen botoak beharko dira erabaki horren alde.

Deialdia egin eta hogei eguneko epean gehienez ere batzordeak ez badu ebazpenik eman edo adostasunik lortu, batzorde paritarioaren esku-hartzea amaitu dela ulertuko da, eta interesdunak egokitzat jotzen dituen jarduketak egiten ahalko ditu.

Helbidea: Jakinarazpen eta deialdietarako, batzorde paritarioak enpresaren lokaletan izanen du helbidea, Iruñean (Sebastián Albero kalea, 1).

31. artikulua. Osotasunarekiko lotura.

Hitzarmen honen baldintzek multzo zatiezina osatzen dute, eta ezin da zatirik edo kontzepturik bereizi multzo horretatik; eta, aplikazio praktikoari dagokionez, orokorrean hartuko dira kontuan.

Enpresaren izenean:

Izpta. Juan Eseverri Abentin.

Izpta. Joaquin Echenique Huarte.

Langileen izenean:

Izpta. Fernando Percaz Nadal

Izpta. Isaac Ciaurriz Urdaniz.

Izpta. Ricardo Ortega Zunzarren.

2023-2024KO SOLDATA TAULAK

2023. urtean: % 5

2024. urtean: % 2,90

Iragarkiaren kodea: F2404879