1. NAFARROAKO FORU KOMUNITATEA
1.3. LURRALDEAREN ANTOLAMENDUA ETA HIRIGINTZA
65E/2023 FORU AGINDUA, abenduaren 28koa, Lurralde Kohesiorako kontseilariak emana, behin betiko onesten duena Untzueko Udal Plan Orokorraren egiturazko aldaketa bat, haren hirigintza araudiaren 69 B artikuluak arautzen dituen lurzoru urbanizaezineko erabilera eta jardueren araubidea aldatzeari buruzkoa, Red Eléctrica de España SAk sustatuta.
Untzueko Udalak idazpuruan azaltzen den espedientea aurkeztu du Lurralde Kohesiorako Departamentuan, behin betiko onets dadin.
Espedientearen xedea da, erabilera eta jarduera baimengarrien araubidea aldatzea lurzoru urbanizaezinaren "ingurumen aldetik balioa duen lurzorua: lehorreko alorren eta sastrakadien mosaikoa" azpikategoriarako, zeina hirigintza araudiaren 69. artikuluko B) azpikategorian arautua baitago. Zehazki, aipatu esparrurako eraikuntza jarduera baimengarri gisa sartu nahi da esklusibotasunez ezartzea penintsulako garraio sareko aireko azpiegitura elektrikoak, interes orokorreko deklarazioa eta foru intereseko deklarazioa dutenak, Nafarroako Gobernuak emanda.
Ingurumeneko zuzendari nagusiaren apirilaren 28ko 391E/2023 Ebazpenaren bidez, ingurumen txosten estrategikoa egin zen Untzueko Udal Plan Orokorrean, ingurumen aldetik balioa duen lurzoru urbanizaezinari buruzko 69. artikuluan, egiturazko aldaketa bat egiteari buruz, ingurumen ukipenik eragiten ez duela iritzita. Aldaketaren sustatzailea Red Eléctrica Española SA da.
Ebazpen hori 2023ko 114. Nafarroako Aldizkari Ofizialean argitaratu zen, ekainaren 1ekoan.
Ikusirik aurkeztutako dokumentazioa, bai eta Lurralde eta Paisaia Zerbitzuaren txostena ere, bidezkoa da espedientea behin betiko onestea.
Azaldutakoarekin bat, eta Lurralde Kohesiorako Departamentuaren egitura organikoa ezartzen duen azaroaren 15eko 249/2023 Foru Dekretuan xedatutakoari jarraikiz,
AGINTZEN DUT:
1. Behin betiko onestea Untzueko Udal Plan Orokorraren egiturazko aldaketa bat, haren hirigintza araudiaren 69 B artikuluak arautzen dituen lurzoru urbanizaezineko erabilera eta jardueren araubidea aldatzeari buruzkoa, Red Eléctrica de España SAk sustatuta.
2. Foru agindu hau espedientearen sustatzaileari jakinaraztea eta Ingurumen Eraginaren Atalera igortzea, behar diren ondorioak izan ditzan.
3. Foru agindu hau Untzueko Udalera igortzea, jakinaren gainean egon dadin eta behar diren ondorioak izan ditzan, eta, zehazki, dagokion hirigintza araudia argitara dezan Nafarroako Aldizkari Ofizialean eta, hala, onetsitako hirigintza tresnak indarra har dezan.
4. Adieraztea foru agindu honek ez duela administrazio bidea amaitzen. Administrazio publikoak ez diren interesdunek gora jotzeko errekurtsoa jartzen ahalko dute, Nafarroako Gobernuari zuzendua, legezkotasunaren kontrolerako onespen egintza honen aurka, hilabeteko epean, foru agindu hau jakinarazi edo, hala badagokio, Nafarroako Aldizkari Ofizialean argitaratu eta biharamunetik hasita.
Onetsitako hirigintzako araudiaren aurka administrazioarekiko auzi-errekurtsoa jar daiteke, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, dagokion udalak eskaturik, edukia Nafarroako Aldizkari Ofizialean argitaratzen denetik aurrera.
Administrazio publikoek administrazioarekiko auzi-errekurtsoa jar dezakete, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
5. Foru agindu hau Nafarroako Aldizkari Ofizialean argitaratzea, behar diren ondorioak izan ditzan.
Iruñean, 2023ko abenduaren 31n.–Lurralde Kohesiorako kontseilaria, Óscar Chivite Cornago.
Iragarkiaren kodea: F2400107
