Iragarkia

78. ALDIZKARIA - 2024ko apirilaren 18a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

28E/2024 FORU AGINDUA, apirilaren 5ekoa, Memoria eta Bizikidetzako, Kanpo Ekintzako eta Euskarako kontseilariak emana, "Euskara erabiltzeko eta sustatzeko 2024ko laguntzak toki entitateentzat" izeneko deialdia onesten duena. DDBN identifikazioa: 753041.

Euskarari buruzko abenduaren 15eko 18/1986 Foru Legearen helburuak garatzeko, eta Eskualdeetako eta Eremu Urriko Hizkuntzen Europako Gutuna berresteko tresnan hartutako konpromisoak betez, foru agindu honek udal eremuan euskara erabili eta sustatzeko programak egitea sustatzen du.

Deialdi honen xedea da oinarriak ezartzea, toki entitateek proposatutako jarduketa programei laguntzak emateko.

Programa horien berariazko helburua euskara sustatzea eta erabiltzea izanen da:

–Gizarte erabilera: euskararen erabilera areagotzea eta erraztea gizarte esparru guztietan.

–Hiztun berriak: euskal hiztunen kopurua handitzea, eta, horretarako, haurrak nahiz helduak euskalduntzeko prozesua Nafarroa osoan eta ahal diren baldintza onenetan bete dadin bermatzea.

–Zerbitzu publikoak: administrazio publikoei gaitzea zerbitzuak euskaraz emateko, eta zerbitzu publikoetan euskarazko eskaintza handitzea.

–Prestigioa eta erakargarritasuna: euskara gizartearen balio positiboekin lotzea.

I. eranskinean jasotako oinarriek arautuko dute aipatutako aldirako deialdia, eta kopurua gehienez ere 933.000 eurokoa izanen da. 2024ko gastu aurrekontuko "(E) Udal eremuan euskara garatzeko laguntzen programa" izeneko B30002 B3200 4609 334100 partidaren kargura ordainduko da.

Aldeko txostena dago, Euskarabidea-Euskararen Nafar Institutuko zuzendari kudeatzailearena, txosten juridikoa, eta Kontu-hartzailetza Delegatuko adostasuna.

Memoria eta Bizikidetzako, Kanpo Ekintzako eta Euskarako Departamentuaren egitura organikoa ezartzen duen azaroaren 15eko 239/2023 Foru Dekretuak ematen dizkidan eskudantziak erabiliz,

AGINTZEN DUT:

1. "Euskara erabiltzeko eta sustatzeko 2024ko laguntzak toki entitateentzat" izeneko deialdia onestea.

2. Deialdiaren oinarri arautzaileak onestea. Foru agindu honen I. eranskinean jaso dira.

3. Deialdi honen konpromisoei erantzuteko, jarraian adierazten den aurrekontuko kreditua baimentzen da:

4. Foru agindu hau eta eranskinak Nafarroako Aldizkari Ofizialean argitaratzea.

5. Foru agindu hau eta eranskinak igortzea Ekonomia eta Ogasun Departamentuak Memoria eta Bizikidetzako, Kanpo Ekintzako eta Euskarako Departamentuan duen Kontu-hartzailetza Delegatura, departamentu horretako Idazkaritza Tekniko Nagusira eta Kudeaketa Ekonomikoaren Ataleko Kudeaketa Zentrora, Euskarabideko Euskara Sustatzeko Atalera eta Gai Administratiboak, Langileria eta Azpiegiturak Kudeatzeko Atalera, eta Dirulaguntzen Datu Base Nazionalera, bidezko ondorioak izan ditzaten.

6. Deialdi honen eta oinarri arautzaileen kontra gora jotzeko errekurtsoa jartzen ahal da, Nafarroako Gobernuari zuzendua, hilabeteko epean, argitaratu eta biharamunetik hasita.

Iruñean, 2024ko apirilaren 5ean.–Memoria eta Bizikidetzako, Kanpo Ekintzako eta Euskarako kontseilaria, Ana Ollo Hualde.

I. ERANSKINA.–OINARRI ARAUTZAILEAK

1.–Deialdiaren xedea.

Deialdi honen xedea da oinarriak ezartzea 2023ko urriaren 1etik 2024ko irailaren 30era bitarte Nafarroako toki entitateek euskara sustatu eta erabiltzeko egiten dituzten programazioak finantzatzeko laguntzak emateko.

Deialdi hau Nafarroako Foru Komunitateko Administrazioaren 2023-2025 Dirulaguntzen Plan Estrategikoaren 448 ildoan jasota dago. Plan hori Nafarroako Gobernuaren 2023ko apirilaren 26ko Erabakiaren bidez onetsi zen. Bertan, deialdiaren helburu operatibo gisa ezartzen dira Nafarroako administrazio publikoen zerbitzuak euskaraz eskaintzea, herritarren hizkuntza eskubideak bermatuz.

2.–Modalitatea eta aurrekontua.

2.1. Deialdi honek modalitate hauek ditu:

a) A modalitatea: toki entitate eskatzailearen eskumen eremuan egindako programak. Modalitate honetarako aurrekontu zuzkidura 275.000 eurokoa da.

b) B modalitatea: zenbait toki entitatek batera egindako programak. Modalitate honetarako aurrekontu zuzkidura 440.000 eurokoa da eta honela banatuko da:

• 140.000 euro euskararen ahozko erabilera sustatzeko berariazko programei esleituko zaizkie, bi adin tarte hauetan: haurrak eta nerabeak (16 urtetik beherakoak) eta gazteak eta helduak (16 urtetik gorakoak).
• 300.000 euroak gainerako programen artean banatzeko.

c) C modalitatea: herritarrei ematen zaizkien zerbitzuak hobetzea. Modalitate honetarako aurrekontu zuzkidura 218.000 eurokoa da eta honela banatuko da:

C.a) 120.000 euro euskara zerbitzu tekniko berriak sortu eta finkatzeko.

C.b) 30.000 euro toki entitateetako langileek euskara ikas dezaten.

C.c) 25.000 euro hizkuntza paisaia modu integralean hobetzeko erabiliko dira.

C.d) 43.000 euro azterlan soziolinguistikoetarako eta hizkuntza plangintzako gogoeta eta partaidetza prozesuetarako. Horietatik 18.000 euro Nafarroako Foru Komunitateko udal euskara zerbitzu guztien plangintza estrategikora bideratuko dira.

2.2. Laguntzak "(E) Udal-eremuan euskara garatzeko laguntza-programa" izeneko B30002 B3200 4609 334100 partidaren kargura finantzatuko dira, eta 933.000 euroko gehieneko zuzkidura izanen du.

2.3. Deialdiaren B edo C modalitateetako programen zuzkidura ekonomikoa agortzen ez bada, A modalitateko zuzkidura ekonomikoari gehituko zaio, kultura eta gizarte arloko sustapen programetarako, deialdi honen 11. oinarrian ezarritako balorazio irizpideekin bat.

3.–Entitate onuradunak.

3.1. Toki entitateak izaten ahal dira oinarri hauetako dirulaguntzen onuradunak, halakotzat hartuta Nafarroako Toki Administrazioari buruzko uztailaren 2ko 6/1990 Foru Legearen 2. eta 3. artikuluetan deskribaturikoak.

3.2. Erakunde eskatzaileek Dirulaguntzei buruzko azaroaren 9ko 11/2005 Foru Legearen 13. artikuluak ezartzen dituen baldintza orokorrak bete beharko dituzte.

4.–Programazioa prestatzen eta koordinatzen duten langileek bete beharreko eskakizun teknikoak.

4.1. Euskal hiztunak biztanleriaren %10ekoa edo handiagoa duten eremu soziolinguistikoetako toki entitateetan –ikus deialdi honetako 5. puntua–, gutxienez titulazio hau duten teknikariek edo hautetsiek prestatu eta garatuko dute programazioa:

a) Unibertsitateko diploma edo gradua.

b) Euskarazko C1 titulua edo baliokidea.

4.2. Euskal hiztunak biztanleriaren %10etik beherakoa duten eremu soziolinguistikoetako toki entitateetan –ikus deialdi honetako 5. puntua–, hizkuntza normalizaziorako teknikariek eginen dute lan hori Euskara Zerbitzua dagoen kasuetan, edo, bestela, diploma edo gradu bat duten teknikariek edo hautetsiek.

4.3. Eskaintza honen C modalitatearen arabera kontratatzen diren pertsonak 4.1 puntuan ezarritako eskakizunak bete beharko dituzte.

5.–Irizpide soziolinguistikoak.

Deialdi honen ondorioetarako, eskualdekako 6 eremu soziolinguistiko hartuko dira kontuan, Nafarroako Toki Administrazioaren Erreformari buruzko otsailaren 4ko 4/2019 Foru Legean jasotakoen arabera, eta kontuan hartuta Nafarroako Estatistika Institutuak 2018an egindako Gizarte eta Bizi Baldintzen gaineko Inkestak eskaintzen dituen euskal hiztunen datu soziolinguistikoak.

6.–Diruz lagun daitezkeen gastuak eta jarduerak.

Deialdi honetan aurreikusitako ondorioetarako, diruz lagundu daitezkeen gastutzat hartuko dira, ezbairik gabe, diruz lagundutako jardueraren izaerari erantzuten diotenak eta 1. oinarrian ezarritako epearen barruan egiten direnak. Diruz lagundu daitezkeen gastuak eskuratzeko kostua ezin izanen da, inola ere, merkatuko balioa baino handiagoa izan.

Jarduerak onartzeko, deialdi honen 5. puntuan azaldutako 2018ko Gizarte eta Bizi Baldintzen gaineko Inkestaren datu soziolinguistikoak hartuko dira kontuan.

6.1. Programak multzotan banatuko dira, A, B eta C modalitateen arabera.

6.1.1. A modalitateko programak:

Euskara bizitza kulturalean eta sozialean sustatu eta erabiltzeko programak, toki entitateek banaka egindakoak; horien barnean honakoak:

a) Gizarte eta kultura arloko jardueren programa.

b) Errotulazio eta argitalpenen programa.

c) Tailerren edo prestakuntza ikastaroen programa.

a) Gizarte eta kultura arloko jardueren programa: zinema, antzerkia, literatura lehiaketak, ipuin kontalariak, hitzaldiak, ikastaroak edo tailerrak (gehienez 4 ordukoak), bertsolaritza emanaldiak, erakusketak, musika emanaldiak eta arlo horietako produktu digitalak.

Musika emanaldietarako laguntzak ondoko baldintza hauen arabera arautuko dira:

–Euskal hiztunen %10 edo gehiago duten eskualdeetako herrietan, nagusiki ahozkoak diren euskarazko musika jarduerak lagunduko dira diruz, herriko jaietan egiten direnak izan ezik.

–Euskal hiztunen %10 baino gutxiago duten eskualdeetako herrietan, nagusiki ahozkoak diren euskarazko musika jarduerak lagunduko dira diruz, baita herriko jaietan egindakoak ere.

b) Errotulazio eta argitalpenen programa; honako jarduera hauek jasoko ditu: errotulazioa (kaleak, bideak, eraikinak, gelak eta antzekoak), argitalpen inprimatuak (kartelak, egutegiak eta agendak, liburuxkak eta antzekoak, buletinak edo udal web-orriak itzultzea), bai eta ikerketa eta dibulgazio lanak ere (formatu inprimatuan, multimedian edo ikus-entzunezkoan).

Laguntzak ondoko baldintza hauen arabera arautuko dira:

–%80 eta %100 arteko (biak barne) euskal hiztunak dituzten eskualdeetako herrietan, diruz lagunduko dira ikerlanak eta dibulgazio lanak formatu inprimatuan, multimedian edo ikus-entzunezkoan argitaratzea eta euskararen erabilera sustatzeko sentsibilizazio kartelak eta liburuxkak.

–%10 eta %79 arteko euskal hiztunak dituzten eskualdeetako udalerrietan, aurreko atalean aipatutako jarduerez gain, diruz lagunduko dira udal buletinetako itzulpenak eta kartel eta liburuxka elebidunen errotulazio eta argitalpen inprimatuak (euskararen egunak eta antzekoak).

–%10eko edo hortik beherako euskal hiztunak dituzten eskualdeetako herrietan, diruz lagunduko dira aurreko bi ataletan aipatutako jarduera guztiak, herriko jaiekin lotutakoak barne.

c) Tailerren eta prestakuntza ikastaroen programa edo entitateak antolatutako eta dagoeneko hasita dauden programen jarraipena egiteko jarduerak (saltokietarako bisitak, adibidez); 4 ordutik gorako iraupenekoak eta berariaz diseinatuta euskararen erabilera sustatzeko: ludotekak, udako kanpamentuak, eta antzekoak.

Ludoteken eta udalekuen balorazioan kontuan hartuko da antolatutako taldeetako bakoitza; Euskara zerbitzurik ez duten edo eskabidea horren bitartez aurkezten ez duten udalerriek kanpamentu edo ludotekarik antolatzen badute, proiektua aurkeztu behar dute laguntzaren eskabidearekin batera, balora dezaten. Hizkuntza dinamizatzeko lanak egiten dituztenek horretarako berariazko ikastaro bat egin dutela egiaztatu beharko dute.

6.1.2. B modalitateko programak.

Euskara bizitza kulturalean eta sozialean sustatu eta erabiltzeko programak, aurreko puntuan jasotakoak, hainbat toki entitateren artean egindakoak (gutxienez hiruren artean).

6.1.3. C modalitateko programa.

Herritarrei ematen zaizkien zerbitzuak hobetzeko programak.

a) Euskara zerbitzu teknikoak sortzea eta sendotzea. B mailako euskara teknikariak kontratatzearen ondoriozko gastuari dagokion zenbatekoa diruz lagunduko da, kontratazioaren egunetik aurrera.

b) Toki entitateetako langileek euskara ikastea. Laguntzak, toki entitateetako langileak ordezkatzeko euskara ikasten dutenean. Ikaskuntza hori Euskara Administrazio Publikoetan Garatzeko Zerbitzuak eskaintzen dituen ikastaro trinkoetan edo Euskarabideak aitortutako euskaltegietan eginen da, 2023ko urritik 2024ko irailera bitartean, biak barne. Diruz lagundu ahal izateko, Euskarabideak baliozkotu beharko ditu proposamenak.

Ikaskuntza programan hautatutako langileen absentzia estaltzeko kontratazioaren ondoriozko gastuari dagokion zenbatekoa kalkulatzeko, nomina eta entitateak Gizarte Segurantzari ordaindu beharreko kuota sartuko dira. Kontratua amaitzeagatik kontratatutako pertsonei legozkiekeen kalte ordainak ez dira diruz lagunduko.

c) Hizkuntza paisaia hobetzeko programa integralak. %10 edo hortik beherako euskal hiztunak dituzten eskualdeetako udalerrietan, berariaz lagunduko zaie udal eskumenekoak diren hiri seinaleztapen publikoko proiektu integralei (kaleko plakak, informazio eta turismo plakak, eta testua duten trafikoa arautzeko seinaleak). Proiektu horiek udalerri osoa hartu behar dute kontuan, eta plakek presentzia eta ikusgarritasun bera izan behar dute beti euskaraz eta gaztelaniaz. Dirulaguntza jaso ahal izateko, Euskarabideak hizkuntza baliozkotuta egon beharko dute. Seinale eta plaken testuen zerrenda Euskarabidera bidaliko da. Informazio seinaleak eta plakak badira, entitateak Euskarabidera zerrenda bidaliko du, itzulpen proposamen batekin batera. Udal kale izendegia bada, entitateak Euskarabidera bidaliko du izen ofizialen zerrenda, bi hizkuntzetan.

d) Azterlan soziolinguistikoak, fitxategiak eta hizkuntza plangintzako gogoeta eta partaidetza prozesuak egiteko laguntzak. Eskabidearekin batera, txosten labur bat aurkeztuko da, honako informazio honekin: helburuak, metodologia, kronograma, komunikazio estrategia, gastua eta kontratatutako enpresa.

6.2. Programan sartutako jardueren deskribapenean, A edo B modalitatekoak diren argi bereiziko da, eta gutxienez ere atal hauek zehaztuko dira: helburua, modalitatea (kalkulu orrian dagokiona hautatuko da), programatutako jarduera, gauzatzeko tokia eta eguna, pertsona arduraduna (edo udal saila), ebaluazio adierazlea (zenbakiz neurtzeko modukoa) eta aurreikusitako gastu eta sarreren aurrekontua.

6.3. Honako hauek deialdi honetatik kanpo gelditzen dira:

a) Entitate eskatzailearen kultura jarduerak edo aisialdiko jarduerak, urte osoan zehar egiten direnak.

b) Toki entitateek Nafarroako Gobernuaren eskumen esklusibokoak diren arloetan egindako jarduerak, ekintzak edo kanpainak.

c) Ikastetxeetan curriculum ordutegian egindako jarduerak, azaroaren 15eko 593/2018 Ebazpena aplikatzearen ondorioz, zeinaren bidez arautzen baita eskolaldi jarraitua eta eskolaldi malgua ezartzea.

d) Toki entitateez kanpoko elkarteek edo erakundeek antolatutako jarduerak.

e) Entitate pribatuekiko hitzarmenak.

f) Ekitaldi gastronomikoak eta antzeko jarduerak.

g) Kirol jarduera erregularizatuak.

h) Toki entitateak pertsona edo erakundeei eskaintzen dizkien dirulaguntzak.

i) Komunikabideetako publizitatea.

j) Argitalpenen harpidetzak, salbu eta doan banatzeko erosten badira.

k) Argitalpenak banatzeko, liburuxkak postontzietan banatzeko edo kartelak jartzeko gastuak.

l) Antzeko ezaugarriak dituzten beste batzuk.

6.4. Plantillako langileek beren eginkizunak betetzeagatik jasotzen dituzten lansariei dagokiena ez da gastutzat hartuko, salbu eta C.a eta C.b modalitateetan.

6.5. Programetan genero berdintasuna sustatuko da edukien diseinu eta garapenean, hizkera ez-sexista erabiliko da eta emakumeen eta gizonen irudi ez-estereotipatua.

Toki entitateek antolatutako jardueretan gizonen eta emakumeen parte-hartzearen berri izateko, tailerretako parte-hartzeari buruzko datuak sexuaren arabera zehaztuko dira justifikatzeko fasean, berdintasun irizpideak betetzeko.

7.–Euskararen erabilera.

7.1. Deialdi honen barruan egiten diren jarduerak euskaraz eginen dira, eta, hizkuntzaren araudiari eta erabilera zuzenari dagokienez, Euskaltzaindiak ezarritakoa beteko dute.

7.2. Salbuespen gisa, gaztelaniaz egiten ahalko dira, erdaldunei zuzendutako jarduerak badira eta euskararekiko jarrera positiboak sustatzen badituzte.

8.–Eskaerak aurkezteko epea eta modua.

8.1. Eskaerak eta aurkeztu beharreko dokumentu guztiak, nahitaez, telematika bidez aurkeztuko dira, Nafarroako Gobernuak Interneten duen Atariaren tramiteen katalogoko fitxa erabiliz: https://www.navarra.es/eu/web/servicios-empleado/tramites/on/-/line/ayudas-a-entidades-locales-para-el-uso-y-promocion-del-euskera-en-el-ano-2024.

8.2. Eskaerak aurkezteko epea 30 egun naturalekoa izanen da, deialdi hau Nafarroako Aldizkari Ofizialean argitaratu eta biharamunetik hasita.

8.3. Dirulaguntzaren eskaera oso-osorik beteta ez badago, edo nahitaez aurkeztu beharreko dokumentazioa erantsi ezean, pertsona edo entitate eskatzaileari akatsa zuzentzeko eskatuko zaio. Horretarako, gehienez ere 10 egun naturaleko epea emanen zaio, zuzentzeko errekerimendua jakinarazi eta biharamunetik hasita. Hala egiten ez badu, eskaerari uko egin diola ulertuko da, eta espedientea artxibatu eginen da, egoera deklaratzen duen ebazpena eman ondoren.

8.4. Ezinbestekoa da gaitutako helbide elektroniko bakarra izatea; Ogasuneko eta Administrazio Publikoetako Ministerioaren https://dehu.redsara.es/ helbidean eskura daiteke. Horretarako, ziurtagiri digitala eduki behar da.

9.–Dokumentazioa.

Agiri hauek aurkeztuko dira:

9.1. Laguntza eskabidea.

9.2. Programazioa (II. eranskina), kalkulu orriaren formatuan jaitsiko den ereduaren arabera.

9.3. Toki entitateko idazkaritzak emandako ziurtagiria (III. eranskina), organo eskudunak (alkateak, gobernu batzordeak edo osoko bilkurak) programazioa onesteko hartutako erabakiari buruzkoa eta programazio hori 4. oinarrian jasotako zehaztapenen arabera koordinatuta dagoela adierazten duena.

Gainera, kasua bada, sortu edo finkatu beharreko euskara zerbitzu teknikoetako langileen kontratazioak bilduko ditu.

9.4. Udal mankomunatuentzako ziurtagiria eta txostena (IV. eranskina eta V. eranskina).

Euskara zerbitzuak emateko mankomunatuta dauden udalek norberaren toki eremurako programazio espezifikoa aurkezten badute, mankomunitateko Euskara Zerbitzuko teknikarien aldeko txostena eta mankomunitateko idazkaritzak emandako ziurtagiria ere aurkeztu beharko dituzte. Ziurtagiri horretan, programazio hori osagarria dela eta mankomunitatearen helburuak betetzen laguntzen duela egiaztatuko da, deialdian eskatutako baldintzetan.

10.–Prozeduraren instrukzioa.

10.1. Prozeduraren instrukzioa Euskararen Sustapenaren eta Plangintzaren Zerbitzuari dagokio, zeina Dirulaguntzei buruzko azaroaren 9ko 11/2005 Foru Legearen artikuluetan ezarritakoarekin bat arituko baita.

10.2. Euskararen Sustapenaren eta Plangintzaren Zerbitzuari jakinarazi beharko zaio diruz lagundutako programaren garapenean gertatutako edozein gorabehera, eta edozein aldaketa egiteko zerbitzu horren adostasuna beharko da aldez aurretik.

11.–Balorazio irizpideak.

Programak baloratzeko, esparru hauek hartuko dira kontuan:

11.1. A modalitateko programak. Atal honetako gehieneko puntuazioa 100 puntukoa izanen da.

Nafarroako Ekialdeko Pirinioetako ibarretako gaur egungo egoera sozioekonomikoa aztertzeko Parlamentuak 2018an eratu zuen ponentziaren txostenean dauden toki entitateei (Erronkari, Zaraitzu, Aezkoa, Erroibar, Artzibar, Nabaskoze, Orotz-Betelu, Orreaga, Luzaide eta Auritz) atal honetan puntu bakoitzeko 1.2 puntuko balioa emanen zaie; izan ere, ponentzia hartan dei egiten zitzaion Nafarroako Gobernuari bere politikak garatzean kontuan har zezan Pirinioak bizi duen egoera kritikoa, zehazki euskarazko kultura eta gizarte jarduerekin lotutako ekimenetan.

11.1.a) Gizarte eta kultura arloko jardueren programa. Gehieneko puntuazioa 20 puntukoa izanen da eta irizpide hauek hartuko dira kontuan jarduera bakoitza baloratzeko:

–500 euro arteko gastua, puntu bat.

–501etik 1.000 euro arteko gastua, 2 puntu.

–1.001etik 2.000 euro arteko gastua, 3 puntu.

–2.001etik 3.000 euro arteko gastua, 4 puntu.

–3.001 eurotik gorako gastua, 5 puntu.

11.1.b) Euskarazko argitalpenen eta errotulazio programa. Gehieneko puntuazioa 5 puntukoa izanen da eta irizpide hauek hartuko dira kontuan jarduerak baloratzeko:

–500 euro arteko gastua, puntu bat.

–501etik 1.000 euro arteko gastua, 2 puntu.

–1.001etik 2.000 euro arteko gastua, 3 puntu.

–2.001etik 3.000 euro arteko gastua, 4 puntu.

–3.001 eurotik gorako gastua, 5 puntu.

11.1.c) Euskaraz emandako tailerren edo prestakuntza ikastaroen programa. Gehieneko puntuazioa 75 puntukoa izanen da eta irizpide hauek hartuko dira kontuan jarduera bakoitza baloratzeko:

–4 eta 20 ordu arteko iraupena, 5 puntu.

–21 eta 60 ordu arteko iraupena, 10 puntu.

–61 ordu edo gehiago, 15 puntu.

11.2. B modalitateko programak.

Gehieneko puntuazioa 100 puntukoa izanen da eta irizpide hauek hartuko dira kontuan jarduerak baloratzeko:

a) Parte hartu duten toki entitateen kopurua, 10 puntu gehienez.

–3 toki entitatetik 15era bitarte, 5 puntu.

–16 toki entitate baino gehiago, 10 puntu.

b) 40 puntu emanen zaizkio onartutako aurrekontu altuena duen programari, eta gainerakoei onartutako aurrekontuarekin proportzioan esleituko zaizkie puntuak.

c) Programen kalitatea, 10 puntu gehienez.

–Programen diseinua: euskarri grafikoak, multimedia euskarriak, edukiak eta programatutako jarduerak; gehienez ere 5 puntu.

–Programen zabalkundea, ale kopurua, argitaratutako eskuorriak eta aldizkariak, web-orriak izandako bisita kopurua; gehienez ere 5 puntu.

d) 40 puntu emanen zaizkie euskararen ahozko erabilera aktibatzeko helburua duten eta Nafarroako Foru Erkidego osoan ezarrita dauden programei.

11.3. C modalitateko programa.

C.a) modalitatea. Euskara zerbitzu tekniko berriak sortzeko eta finkatzeko programa. Sortu edo finkatu beharreko euskara zerbitzuetako teknikarien gastu onartua hartuko da kontuan.

C.b) modalitatea. Toki entitateetako langileek euskara ikasteko programa. Eskatzaileak lortutako puntuazioaren arabera hautatuko dira; hala ere, Balorazio Batzorde Teknikoak plazen banaketa haztatu ahal izanen du toki entitate eskatzaileen artean, plazen banaketa ekitatiboagoa izan dadin entitateen artean. Horretarako, gehieneko puntuazioa 25 puntu izanen da, eta lanpostuaren ezaugarriak kontuan hartuko dira irizpide hauen arabera:

–Herritarrei arreta zuzena ematea (ahoz edo bitarteko elektronikoz): txikia, puntu 1; aski, 2 puntu, eta handia, 3 puntu.

–Haur eta gazteei arreta zuzena ematea (ahoz edo bitarteko elektronikoz): txikia, puntu 1; aski, 2 puntu, eta handia, 3 puntu.

–Dokumentuak euskaraz sortu eta kudeatzea: gutxi, puntu 1; aski, 2 puntu, eta asko, 3 puntu.

–Kultura koordinazioaren, kirol koordinazioaren, gizarte lanaren edo antzeko lanpostu teknikoa: ez; 0 puntu; eta bai, 3 puntu.

–Euskarazko eskakizuna plantilla organikoan: ez, 0 puntu; eta bai, 6 puntu.

–Egin beharreko ikastaro trinkoen eskaera: ikastaro bat, 3 puntu; eta bi ikastaro jarraian, oinarrietan ezarritako edozein mailatan, 7 puntu.

C.c) modalitatea. Hizkuntza paisaia hobetzeko programa integrala, euskal hiztunak %10 edo txikiagoa duten eskualdeetan egina. Programaren zenbatekoa agortu arte emanen da dirulaguntza, eta programa honetarako onartutako aurrekontuarekiko proportzionala izanen da.

C.d.) modalitatea. Azterlan soziolinguistikoen programa eta hizkuntza plangintzako gogoeta eta partaidetza prozesuak. Honako irizpide hauek hartuko dira kontuan:

–Metodologia aztergaira egokitzea: 5 puntu gehienez.

–Azterlanak euskararen sustapenean eta erabileran duen erabilgarritasuna: 5 puntu gehienez.

–Nafarroako Komunitate Autonomoko udaletako euskara zerbitzu guztien plangintza estrategikorako ekarpena: 10 puntu, gehienez.

Azterlan soziolinguistikoa edo hizkuntza plangintzako prozesua bat etorriko da Nafarroako Gobernuaren plan estrategikoaren helburuekin. Horretarako, Euskarabidea-Euskararen Nafar Institutuko ordezkari batek batzorde teknikoan parte hartuko du.

12.–Laguntzak emateko prozedura eta laguntzen zenbatekoa.

Laguntza emateko araubidea norgehiagoka araubidea izanen da, hainbanaketarekin.

Laguntzaren zenbatekoa ez da onartutako aurrekontuaren %85 baino handiagoa izanen ezein modalitatetan, B eta C.d modalitateetan baloraziorik onena jasotzen duen programak izan ezik, betiere programaren defizit onartua gainditu gabe.

a) Jasotako eskabideak kontuan hartuta, Balorazio Batzorde Teknikoak zenbatekoak esleituko ditu modalitate bakoitzaren barruan, puntu sistema baten bidez.

b) Modalitate bakoitzaren barruan dagoen kopuruaren arabera lortutako puntu guztiak batu ondoren, puntu bakoitzaren balioa eurotan lortzen da.

c) B eta C modalitateetako azpimodalitate batzuetan soberakinik geratzen bada, modalitate bereko gainerako programen artean banatuko da.

d) Banaketa horren ondoren, B eta C modalitateetan geratzen diren soberakinak proportzionalki banatuko dira A modalitateko eskaeren artean.

13.–Baloraziorako Batzorde Teknikoa.

13.1. Baloraziorako batzorde tekniko bat eratuko da deialdi honen baldintzak betetzen dituzten eskaerak aztertu eta baloratzeko.

13.2. Batzorde horren kide izanen dira:

a) Batzordeko burua: Hizkuntza Baliabideen Zerbitzuko zuzendaria, edo berak eskuordetzen duena.

b) Kideak:

–Euskararen Sustapenaren eta Plangintzaren Zerbitzuko Euskara Sustatzeko Ataleko burua, edo berak eskuordetzen duena.

–Egiaztapenen eta Prestakuntzaren Ataleko burua, edo hark eskuordetzen duena.

–Toki Administrazioko Zuzendaritza Nagusia ordezkatzen duen pertsona bat.

c) Euskararen Sustapenaren eta Plangintzaren Zerbitzuko teknikari bat, idazkari lanetan ariko dena, botoa eta hizpidea duela.

13.3. Baloraziorako Batzorde Teknikoak esleituak ditu eskaeren gaineko txostena eta balorazioa egiteko eginkizunak, betiere deialdi honetan ezarritako balorazio irizpideekin bat. Euskararen Sustapenaren eta Plangintzaren Zerbitzuak eskaturik, kanpoko adituengana jotzen ahalko da, aurkeztutako eskaerak hobeki baloratzearren.

14.–Ebazpen proposamena.

Baloraziorako Batzorde Teknikoak eskaerak baloratuko ditu, eta Euskararen Sustapenaren eta Plangintzaren Zerbitzuari igorriko dizkio bere jarduketak jasotzen dituzten aktak; zerbitzu horrek ebazpen proposamena aurkeztuko dio Euskarabideko zuzendari kudeatzaileari, eta hark ebatziko du.

Proposamen horretan adierazita egonen da zein eskatzaile proposatzen diren laguntzak emateko eta laguntzen zenbatekoa, balorazioa ezarritako irizpideen arabera zehaztuta; horrekin batera, onartutako programa eta jarduerak azalduko dira, bai eta ezetsitako eskaerak ere, arrazoia barne.

15.–Ebazpena.

Euskarabideko zuzendari kudeatzaileak ebazpen bat emanen du laguntzak emateko, eskaerak aurkezteko epea bukatu eta biharamunetik hasita hiru hilabeteko epean. Bertan, eskabide bakoitzari dagokion onartutako aurrekontua, lortutako puntuazioa eta emandako dirulaguntza osoa adieraziko dira, eta, ukatuz gero, zergatik ukatu den adieraziko da. Epe horretan berariazko ebazpenik ematen ez bada, eskabideak ezetsi egin direla ulertuko da.

16.–Argitalpena.

Euskarabideak Nafarroako Gobernuko atarian eta bere web orrian (http://euskarabidea.eus) argitaratuko du deialdi honen ebazpena, eta bertan azalduko dira laguntza hauen onuradun diren toki entitateen zerrenda, bakoitzari ordaindu beharreko dirua eta baztertu diren entitateen zerrenda, halakorik bada, baztertzeko arrazoiak barne.

17.–Dirulaguntzaren bateragarritasuna.

Dirulaguntza hauek bateragarriak dira xede bererako jaso daitezkeen beste dirulaguntza, laguntza, sarrera edo baliabide batzuekin. Halere, dirulaguntzen zenbatekoa ezin da inola ere izan, bakarrik edo beste dirulaguntza, laguntza, sarrera edo baliabideekin baturik, diruz lagundutako jardueraren kostua baino handiagoa.

18.–Dirulaguntzaren justifikazioa eta epeak.

18.1. Dirulaguntza eman ondoren, dirulaguntzaren onuradunak beharturik daude jasotako funtsak emateko ezarritako helbururako erabiltzeko, eskabidean aurkeztutako proiektuaren arabera. Euskarabideak egiaztatzen ahalko du diruz lagundutako proiektuak gauzatu diren.

18.2. 2023ko urriaren 1etik 2024ko irailaren 30era bitarteko jarduerak eta gastuak onartuko dira.

18.3. Euskarabideari egiaztagiriak aurkezteko epea 2024ko urriaren 18an amaituko da, eta ordura arte ordaindutako fakturak onartuko dira.

Fakturak eta gastuen egiaztagiriak 2023ko urriaren 1etik 2024ko irailaren 30era bitartean jaulki beharko dira, eta 2024ko urriaren 18ra arte ordaindu ahal izango dira.

Dokumentazioa laguntzak emateko ebazpenarekin bat eta proiektuan adierazitako moduan aurkeztuko da.

19.–Dirulaguntza justifikatzeko dokumentazioa.

19.1. Kalkulu orria, toki entitate bakoitzera igorriko dena bete dezan, eskatutako datuak biltzeko (VII. eranskina).

A eta B modalitateetako programetarako, gastuei, sarrerei eta balorazioari buruzko datuak, eremu hauekin: jarduera, aurrekontua, faktura edo antzekoa jaulki zen data, hartzekodunaren identifikazioa eta faktura zenbakia, ordaindutako zenbatekoa, ordainketa data, beste instituzio publiko batzuen dirulaguntza, beste sarrera batzuk, sarrera data, ebaluazioa eta tailerretan parte hartu duten pertsonen kopurua, sexuaren arabera zehaztuta, eta sortutako materiala.

C.a eta C.b modalitateetako programetarako, kalkulu orrian zehaztuko dira nominaren kontzeptuan eta Gizarte Segurantzaren kontzeptuan egindako ordainketak.

C.b atalean, ikaskuntza talde espezifikoen kasuan: gastuen datuak, jarduera, fakturaren edo antzekoaren jaulkipen data, hartzekodunaren identifikazioa eta faktura zenbakia, ordaindutako zenbatekoa eta ordainketa data.

C.c eta C.d modalitateetako programetarako, gastuen datuak, jarduera, faktura edo antzekoaren jaulkipen data, hartzekodunaren identifikazioa eta faktura zenbakia, ordaindutako zenbatekoa eta ordainketa data.

19.2. Idazkaritzaren ziurtagiria, dirulaguntzaren helburua bete dela egiaztatzen duena, eta kalkulu orrian emandako datuak (VI. eranskina).

19.3. Baliabide eta material guztien lagin bana, paperean edo euskarri digitalean, eta, argitaratutako liburuen kasuan, bina ale.

20.–Dirulaguntza ordaintzea.

20.1. Organo kudeatzaileak 19. oinarrian eskatzen den dokumentazioa aztertu ondoren ordainduko da laguntzen zenbatekoa. Balorazio irizpideekin bat modu egokian gauzatutako programei osorik ordainduko zaie laguntzak ematean ezarritako zenbatekoa.

20.2. Balorazio irizpideekin bat egin ez diren programen zenbatekoa proportzioan gutxituko da.

20.3. Deialdi honen indarraldian, proiektu bererako beste dirulaguntza bat ematen bazaio, toki entitateak deialdiaren organo kudeatzaileari jakinarazi beharko dio. Horren harian, dirulaguntza gutxitu eginen da baldin eta haren zenbatekoa, bakarrik edo beste administrazio edo erakunde publiko edo pribatu batzuek emandakoekin batera, diruz lagundutako jardueraren kostu osoa baino handiagoa bada.

21.–Oinarriak ez betetzea, itzulketak eta arau-hausteak.

21.1. Entitate onuradunak ez badu modu egokian justifikatzen programak egin izana, ez-betetze arintzat joko dira irregulartasun formalei dagozkienak; halakoetan, dirua partez itzuli beharra etorriko da, edo ordainketa partzialik ez egitea, ez-betetzearen muntaren arabera. Ez-betetze astuntzat joko dira, berriz, funtsezko kontuei dagozkienak; halakoetan, arau orokor gisa, dirua osorik itzuli beharko da, edo ez da deus ere ordainduko. Kasu batean nahiz bestean berandutze-interesak eskatzen ahalko dira, azaroaren 9ko 11/2005 Foru Legean ezarritako kasuetan. Balorazio Batzordeak mailakatzea egiteko komenigarriak iruditzen zaizkion irizpideak ezartzen ahalko ditu.

21.2. Aurrekoa gorabehera, eskubidea azkendu eginen da eta jasotako zenbateko guztiak itzuli beharko dira, baldin eta, toki entitatearen erabakiz eta bidezko arrazoirik gabe, sortutako euskara zerbitzu teknikoak sortu zenetik gutxienez hiru urtez irauten ez badu.

Ildo horretan, entitate onuradunek dirulaguntza emateko kontuan izandako baldintzen aldaketa guztien berri eman beharko diote Euskarabidea-Euskararen Nafar Institutuari.

21.3. Arau-hauste eta zehapenei dagokienez, Dirulaguntzei buruzko azaroaren 9ko 11/2005 Foru Legearen IV. tituluan xedatutakoa aplikatuko da.

22.–Beste betebehar batzuk.

22.1. Entitate onuradunek Nafarroako Gobernuak, laguntzen fiskalizazio eta xedearen kontrol eginkizunak betetzeko, eskatzen dien informazio guztia eman beharra dute.

22.2. Programa egiteko hornitzaileen kontratazioa 12.000 eurotik goikoa bada, toki entitateak frogatu beharko du kontratazio hori efizientzia eta ekonomia irizpideei jarraituz egin dela, salbu eta, gastuaren ezaugarrien berezitasuna dela-eta, merkatuan hornidura edo zerbitzu hori emateko behar adina entitate ez badago, edo gastua egin bada dirulaguntza eskatu baino lehen.

23.–Emandako laguntzen publizitatea.

Idatzizko eta ahozko publizitate eta zabalkundeetan, bai eta diruz lagundutako proiektuari buruzko agiri guztietan ere, onuradunak Nafarroako Gobernuaren parte-hartzearen eta Euskarabidea-Euskararen Nafar Institutuaren dirulaguntzaren berri emanen du. Dirulaguntzaren ebazpena jakinarazten denetik aurrera egiten diren publizitate eta zabalkunde jardueretan soilik eskatzen ahalko da betebehar hori. Aipamen hori eginen da bat etorriz Nafarroako Gobernuaren sinbolo ofiziala arautzen duen otsailaren 12ko 8/2020 Foru Dekretuaren jarraibideekin (https://www.navarra.es/eu/nafarroako-gobernua/sinbolo-ofiziala), kasu bakoitzean aurreikusitako elementuen arabera, eta jarduera hedatzen den denbora guztian mantenduko da.

Euskarabideak, entitate titularrari jakinarazi eta harekin ados jarri ondoren, euskararen sustapenerako interes handiena duten jardueren zabalkundea egiten ahalko du.

24.–Aplikatzekoa den legeria eta errekurtsoak.

24.1. Oinarri hauetan aurreikusirik ez dagoen guztia Dirulaguntzei buruzko azaroaren 9ko 11/2005 Foru Legean xedatutakoak arautuko du, horren bidez ezarri baitzen Nafarroako Aurrekontu Orokorren kargura ematen diren dirulaguntzen araubide juridiko orokorra, eta, bestetik, maiatzaren 23ko 25/2012 Foru Dekretuak, udal eremuan euskara erabiltzeko eta sustatzeko laguntzak arautzen dituenak.

24.2. Deialdi honen eta haren oinarrien kontra administrazio publikoek zilegi dute administrazioarekiko auzi-errekurtsoa jartzea, Nafarroako Justizia Auzitegi Nagusiko Administrazioarekiko Auzien Salari zuzendua, argitaratu eta bi hilabeteko epean. Horrek ez du galarazten aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

AURKEZTU BEHARREKO DOKUMENTAZIOA

II. eranskina.–Jardueren programa xehatua.

III. eranskina.–Toki entitateko idazkaritzak emandako ziurtagiria, 9.3 puntuak adierazten duen bezala.

IV. eranskina.–Idazkaritzaren ziurtagiria, udal mankomunatuentzat.

V. eranskina.–Euskara Zerbitzuaren txostena, udal mankomunatuentzat.

VI. eranskina.–Idazkaritzaren ziurtagiria, justifikaziorako.

VII. eranskina.–Gastuen justifikazio xehatua, kalkulu orrian.

Iragarkiaren kodea: F2405679