1. NAFARROAKO FORU KOMUNITATEA
1.1. XEDAPEN OROKORRAK
1.1.3. Foru Aginduak
43E/2024 FORU AGINDUA, martxoaren 21ekoa, Etxebizitzako, Gazteriako eta Migrazio Politiketako kontseilariak emana, departamentuaren egitura garatzen duena bulegoen mailan.
ATARIKOA
Nafarroako Foru Komunitateko lehendakariaren abuztuaren 17ko 10/2023 Foru Dekretuaren bidez, Nafarroako Foru Komunitateko Administrazioaren departamentuen egitura ezarri zen, eta abuztuaren 30eko 66/2023 Foru Dekretuaren bidez, berriz, Etxebizitzako, Gazteriako eta Migrazio Politiketako Departamentuaren oinarrizko egitura.
Era berean, azaroaren 15eko 241/2023 Foru Dekretuaren bidez, Etxebizitzako, Gazteriako eta Migrazio Politiketako Departamentuaren egitura organikoa ezarri zen, non atalen mailara arteko egitura arautu baitzen.
Foru dekretu horietan xedatutakoa ikusita, beharrezkoa da ataletik beherako unitateen eta bulegoen egitura egokitzea.
Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legeak 34.4 artikuluan ezartzen du ezen, bulegoak eta ataletik beherako unitateak sortu, aldatu eta kentzeko, unitate horiek zein departamentutan sartuko diren, hango titularraren foru agindua beharko dela.
Horrenbestez, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legeak ematen dizkidan ahalmenak erabiliz, agintzen dut:
I. KAPITULUA.–XEDEA ETA EGITURA OROKORRA
1. artikulua. Xedea.
Foru agindu honen xedea da Etxebizitzako, Gazteriako eta Migrazio Politiketako Departamentuaren egitura garatzea bulegoen mailan.
2. artikulua. Etxebizitza Zuzendaritza Nagusiaren egitura.
Etxebizitza Zuzendaritza Nagusiak bulego hauek ditu bere egituran:
–Administrazio Laguntzako Bulegoa, zuzendaritza nagusi horri atxikia.
–Etxebizitza Babestuaren Bulegoa, Eraikuntza Atalari atxikia.
–Birgaitze-espedienteak Tramitatzeko Bulegoa, Etxebizitzak Birgaitzeko Atalari atxikia.
–Etxebizitzak Finantzatzeko Bulegoa, Laguntzen eta Plangintzen Atalari atxikia.
–Errentamendu Babestuaren Bulegoa, Laguntzen eta Plangintzen Atalari atxikia.
3. artikulua. Migrazio Politiketako Zuzendaritza Nagusiaren egitura.
Migrazio Politiketako Zuzendaritza Nagusiaren egituran daude:
–Europako Proiektuen eta Lankidetzaren Bulegoa, zuzendaritza nagusi horri atxikia.
II. KAPITULUA.–ETXEBIZITZA ZUZENDARITZA NAGUSIA
4. artikulua. Administrazio Laguntzako Bulegoa.
Administrazio Laguntzako Bulegoa Etxebizitza Zuzendaritza Nagusiari atxikita dago, eta honako eginkizun hauek izanen ditu:
a) Etxebizitza Zuzendaritza Nagusiaren administrazio jarduera koordinatzea, bultzatzea eta kontrolatzea.
b) Informazioa eta komunikazioa koordinatzea Etxebizitzako, Gazteriako eta Migrazio Politiketako Departamentuaren gainerako unitate organikoekin.
c) Beste erakunde batzuekiko eta Etxebizitza Zuzendaritza Nagusia buru duten etxebizitzaren sektoreko eragileekiko harremanen datu-basea antolatzea, mantentzea eta haren inbentarioa egitea.
d) Etxebizitza Zuzendaritza Nagusiaren IKT arloko erreferentea izatea.
e) Justifikatu beharreko funts-aurrerakinen kontuen jarraipena egitea.
f) Aurrekontua aldatzeko espedienteen jarraipena egitea.
g) Beste edozein eginkizun, bere jarduketaren eremuan agintzen zaiona.
5. artikulua. Etxebizitza Babestuaren Bulegoa.
Etxebizitza Babestuaren Bulegoa Eraikuntza Atalari atxikita dago, eta eginkizun hauek izanen ditu:
a) Txostenak egitea etxebizitza babestuen kalifikazio espedienteei buruz, izan salerosketa-araubidekoak, esleipen bidezkoak, errentamendukoak edo norberak erabiltzekoak.
b) Errentamendu-araubideko etxebizitza babestuen sustatzaileei dirulaguntzak emateko proposamena egitea.
c) Norberak erabiltzeko etxebizitza babestuen sustatzaileei dirulaguntzak emateko proposamena egitea.
d) Eraikuntzaren arloko araudi konparatua aztertzea.
e) Etxebizitzen zentsuari buruzko informazioa kargatzen eta inplementatzen kolaboratzea.
f) Laguntza teknikoa ematea etxebizitza babestuaren arloan legezkotasuna babesteko espedienteetan.
g) Nafarroako Foru Komunitateko Administrazioko beste erakunde batzuei, erakunde publikoei eta toki entitateei aholku ematea etxebizitza babestuen sustapenarekin loturiko gaietan.
h) Beste edozein eginkizun, bere jarduketaren eremuan agintzen zaiona.
6. artikulua. Birgaitze-espedienteak Tramitatzeko Bulegoa.
Birgaitze-espedienteak Tramitatzeko Bulegoa Etxebizitzak Birgaitzeko Atalari atxikita dago, eta eginkizun hauek izanen ditu:
a) Etxebizitzak eta eraikinak birgaitzearen arloko espedienteak jasotzeko, tramitatzeko eta kudeatzeko lanak koordinatzea eta horien gaineko komunikazioak igortzea.
b) Etxebizitzen birgaitze babestuko espedienteei eta horiekin parekatu daitezkeenei aplikatzen ahal zaizkien dirulaguntzak tramitatzea.
c) Birgaitze babestuaren arloan ahoz zein idatziz egiten diren kontsulten arreta antolatzea.
d) Lehentasunez birgaitu beharreko areen aitorpenak tramitatzea.
e) Birgaitze bulegoei aholkularitza eta laguntza teknikoa ematea.
f) Estatuko edo Europako funtsekin finantzatutako birgaitze babestuko espedienteen datuak kudeatzea, araztea eta kargatzea.
g) Nafarroako Foru Komunitatean birgaitze babestuaren arloan dauden behar teknikoak eta aurrekontu-beharrak planifikatzea.
h) Beste edozein eginkizun, bere jarduketaren eremuan agintzen zaiona.
7. artikulua. Etxebizitzak Finantzatzeko Bulegoa.
Etxebizitzak Finantzatzeko Bulegoa Laguntzen eta Plangintzen Atalari atxikita dago, eta eginkizun hauek izanen ditu:
a) Etxebizitza babestuak eskuratzeko kontratuak sinatzeko baimena ematea.
b) Etxebizitza babestuak eskuratzeko kontratuei administrazio-oniritzia ematea.
c) Etxebizitza babestuen, erabilitako etxebizitzen edo horiekin parekagarriak direnen espedienteei aplikatzen ahal zaizkien dirulaguntza pertsonalak emateko eta ordaintzeko proposamena egitea.
d) Errentamendu-araubideko etxebizitza babestuen sustatzaileei ematen zaizkien dirulaguntzen ordainketa tramitatzea.
e) Etxebizitzaren arloan babestu daitezkeen jarduketei aplikatzen ahal zaizkien mailegu lagunduak emateko espedienteak tramitatzea, bai eta maileguak aitortzea eta adostea ere, eta haien jarraipena eta estatistikak egitea, finantza entitateekin formalizatu ondoren.
f) Etxebizitzen eskualdaketei eta fidantzamenduen likidazioei buruzko espediente ekonomiko eta administratiboak tramitatzea.
g) Nafarroako Gobernuaren jabetzapekoak diren etxebizitzak administratzea eta kontrolatzea, Etxebizitza Zuzendaritza Nagusiari atxiki bazaizkio bere eskumeneko helburuetarako.
h) Beste edozein eginkizun, bere jarduketaren eremuan agintzen zaiona.
8. artikulua. Errentamendu Babestuaren Bulegoa.
Errentamendu Babestuaren Bulegoa Laguntzen eta Plangintzen Atalari atxikita dago, eta eginkizun hauek izanen ditu:
a) Errentamendu babestuarengatik ematen diren dirulaguntzak ordaintzeko espedienteen txostena eta proposamena egitea.
b) Etxebizitza babestuen errentarientzako dirulaguntzak tramitatzea, baita maizterrentzako laguntzak dituzten etxebizitzen errentarientzat daudenak ere.
c) Errentamendu babestuko kontratuei oniritzia ematea.
d) Errentamendu babestuari datxezkion eskubide eta betebeharrei buruzko informazioa ematea herritarrei.
e) Etxebizitza babestuak errentan ematen dituzten enpresei aholkularitza eta laguntza administratiboa ematea.
f) Etxebizitzarako eskubide subjektiboaren espedienteak kudeatzea.
g) Herritarren partaidetza bideratzeko prozesuak gauzatzea, errentamendu babestuaren arloko politika publikoak diseinatu eta burutzean.
h) Beste edozein eginkizun, bere jarduketaren eremuan agintzen zaiona.
III. KAPITULUA.–MIGRAZIO POLITIKETAKO ZUZENDARITZA NAGUSIA
9. artikulua. Europako Proiektuen eta Lankidetzaren Bulegoa.
Europako Proiektuen eta Lankidetzaren Bulegoa Migrazio Politiketako Zuzendaritza Nagusiari atxikita dago, eta eginkizun hauek izanen ditu:
a) Migrazio Politiketako Zuzendaritza Nagusiarekin lotutako politika eta programa komunitarioen jarraipena egitea.
b) Honako arlo hauetan Nafarroako Gobernua partaide duten Europako egiturekin harremanak izatea eta egitura horien jarraipena egitea: migrazioak, asiloa edo aterpea, kulturen arteko elkarbizitza eta arrazakeriaren kontrako borroka.
c) Harremanak izatea Nafarroako Gobernuaren Europar Batasuneko Bulego Iraunkorrarekin eta Nafarroako Gobernuko Europako Ekintzaren, Eskualdeen arteko Lankidetzaren eta Kanpoko Herritarren Zerbitzuarekin.
d) Identifikatzea, batetik, lehentasunezko ildoak Migrazio Politiketako Zuzendaritza Nagusiaren intereseko gaietan, eta bestetik, proiektuetarako aukerak.
e) Proposamenak definitu eta prestatzea eta proiektuak dinamizatzea Migrazio Politiketako Zuzendaritza Nagusiaren arlo estrategikoetan baliabideak eskuratzeko.
f) Migrazio Politiketako Zuzendaritza Nagusiak sustatutako proiektuak finantzatzeko baliabide publikoak kudeatzea.
g) Migrazio Politiketako Zuzendaritza Nagusia partaide duten Europako proiektuen jarraipena eta kontrola egitea.
h) Migrazio Politiketako Zuzendaritza Nagusiaren intereseko eta jardun eremuko arloetan Espainian eta nazioartean dauden sareetan parte hartzea eta haien jarraipena egitea.
Lehen xedapen gehigarria.–Bulegoak kentzea.
Bulego hauek kentzen dira:
–Eraikuntza arloko Espedienteak Tramitatzeko Bulegoa.
–Hiriak Birgaitu, Berritu eta Berroneratzeko Bulegoa.
Bigarren xedapen gehigarria.–Bulegoak sortzea.
Bulego hauek sortzen dira:
–Administrazio Laguntzako Bulegoa.
–Etxebizitza Babestuaren Bulegoa.
–Birgaitze-espedienteak Tramitatzeko Bulegoa.
Hirugarren xedapen gehigarria.–Izendapenak.
Etxebizitzako, Gazteriako eta Migrazio Politiketako Departamentuaren egitura organikoan izanik foru agindu honetan ezartzen den bulegoen egituran izen bera mantentzen duten bulegoetako buruen izendapenak berresten edo finkatzen dira, egin ziren baldintza berberetan, bai eta Eraikuntza arloko Espedienteak Tramitatzeko Bulegoko buruaren izendapena ere, zeina aurrerantzean Birgaitze-espedienteak Tramitatzeko Bulegoko burua izanen baita.
Xedapen indargabetzaile bakarra.–Arauak indargabetzea.
Indargabetu egiten dira foru agindu honetan xedatutakoari aurka egiten dioten maila bereko edo apalagoko xedapen guztiak, eta zehazki:
–Lurralde Antolamenduko, Etxebizitzako, Paisaiako eta Proiektu Estrategikoetako kontseilariaren ekainaren 29ko 16/2020 Foru Aginduaren 3. artikulua eta III. kapitulua (foru agindu horren bidez, departamentu horren egitura organikoa garatu zen bulegoen mailan), bai eta arau horretako beste edozein xedapen, foru agindu honetan xedatutakoari aurka egiten badiote.
–Migrazio Politiketako eta Justiziako kontseilariaren martxoaren 6ko 5/2020 Foru Aginduaren 2. artikulua eta II. kapitulua (foru agindu horren bidez, Migrazio Politiketako eta Justiziako Departamentuaren egitura organikoa garatu zen, bulegoen mailan), bai eta arau horretako beste edozein xedapen, foru agindu honetan xedatutakoari aurka egiten badiote.
Azken xedapen bakarra.–Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
Iruñean, 2024ko martxoaren 21ean.–Etxebizitzako, Gazteriako eta Migrazio Politiketako kontseilaria, Begoña Alfaro García.
Iragarkiaren kodea: F2404820
