1. NAFARROAKO FORU KOMUNITATEA
1.7. BESTELAKOAK
573/2024 EBAZPENA, martxoaren 6koa, Nafarroako Unibertsitate Publikoko errektoreak emana, zeinaren bidez argitaratzeko agintzen baitu 2024ko martxoaren 6an Gobernu-kontseiluak hartutako "Erabakia, zeinaren bidez onesten baita haztapen-parametroen balioak aldatzea, 2024-2025 ikasturtean Nafarroako Unibertsitate Publikoan emanen diren graduko ikasketa ofizialetan sartzeko nota kalkulatzeko".
Maiatzaren 12ko 110/2003 Foru Dekretuaren bidez onetsitako Unibertsitatearen Estatutuen 40. artikuluak emandako eskumenak baliatuz, agintzen dut argitara dadila 2024ko martxoaren 6ko Gobernu-kontseiluak hartutako Erabakia, zeinaren bidez onesten baita haztapen-parametroen balioak aldatzea, 2024-2025 ikasturtean Nafarroako Unibertsitate Publikoan emanen diren graduko ikasketa ofizialetan sartzeko nota kalkulatzeko.
"ERABAKIA, ZEINAREN BIDEZ ONESTEN BAITA HAZTAPEN-PARAMETROEN BALIOA ALDATZEA, 2024-2025 IKASTURTEAN NAFARROAKO UNIBERTSITATE PUBLIKOAN EMANEN DIREN GRADUKO IKASKETA OFIZIALETAN SARTZEKO NOTA KALKULATZEKO"
3/2020 Lege Organikoaren artikulu bakarraren 32. puntuak Hezkuntzari buruzko maiatzaren 3ko 2/2006 Lege Organikoaren 38. artikulua aldatzen du, eta horrek honako hau dio 1. apartatuan: unibertsitateko ikasketetan sartzeko, ezinbestekoa izanen da proba bat gainditzea, batxilergoan lortutako kalifikazioekin batera batxilergoan eskuratutako jakintzak eta heldutasun akademikoa, eta unibertsitate ikasketak arrakastaz egiteko gaitasuna objektibotasunez balioetsiko dituena. Halaber, 6. apartatuak honako hau ezartzen du: Gobernuak oinarrizko araudi bat osatuko du, ahalbidetzeko unibertsitateek ezartzea sarrera-proba gainditu duten ikasleak onartzeko prozedurak.
Graduko unibertsitate ikasketa ofizialetan onartzeko prozeduren oinarrizko araudia ezartzen duen ekainaren 6ko 412/2014 Errege Dekretuaren 7. artikuluko 4. apartatuak ezartzen du unibertsitate publikoek, gutxienez ikasturte bat lehenago, jendaurrean jarri beharko dituztela graduko unibertsitate ikasketa ofizialetan onartuak izateko prozedurak, baita horien edukia, funtzionamendu arauak eta prozedurak egiteko egunak. Horrez gain, publiko egin beharko dituzte balorazio-irizpideak, haztapenak eta baremoak, baita postuen esleipenean lehentasun-ordena ezartzeko aplikatuko dituzten arauak ere.
2023-2024 ikasturtean, batxilergoko bigarren ikasmaila ematen ari dira Batxilergoko Gutxieneko Irakaskuntzak eta Antolamendua ezartzen dituen apirilaren 5eko 243/2022 Errege Dekretuan ezarritakoari jarraikiz. Hori dela eta, unibertsitateko ikaskuntzetan sartzeko haztapen-parametroak berrikusi behar ziren, aintzat hartuz aipatu errege dekretuak ezartzen dituen irakasgaiak eta antolamendu orokorra.
Unibertsitatean sartzeko baldintzen eta graduko ikasketa ofizialetan onartua izateko prozeduren antolaketa berria onartzeke zegoela, Gobernu-kontseiluaren 2023ko ekinaren 27ko erabaki bidez ezarri ziren 2024-2025 ikasturtean ikasleak onartzeko erabili beharreko haztapen-parametroak, 2023-2024 ikasturtean batxilergoko bigarren maila eginen zutenek ezagut zitzaten.
Ondoren, Nafarroan arteen modalitatea irakasten duten batxilergoko ikastetxe batzuen zenbait ordezkarik gradu jakin batzuetarako parametroak aldatzeko eskaerak egin zituzten, eta, zehazki, eskatu zuten LOMLOEn batxilergoko bigarren mailan arteen modalitatea ikasten ari direnentzat LOMCE hezkuntza-sistemaren parametroak mantentzeko.
Horrez gain, urtarrilaren 26ko Estatuko Aldizkari Ofizialean argitaratu zen urtarrilaren 24ko PJC/39/2024 Agindua, zeinaren bidez zehazten baitira unibertsitatean sartzeko batxilergoaren ebaluazioaren ezaugarriak, diseinua eta edukia, baita 2023-2024 ikasturtean lortutako kalifikazioak berrikusteko eta ebazteko gehieneko epea ere. Aipatu aginduko 3.2 artikuluak ahalbidetzen du ikasleek Espainiako Historia eta Filosofiaren Historia ikasgaietako azterketak USEaren borondatezko fasean egitea, onarpen nota hobetze aldera.
Hori dela eta, berriz ere galdetu egin zaie Unibertsitateko zentroei eta Nafarroako Gobernuko Hezkuntza Departamentuari.
Horregatik guztiarengatik, eta Ikasleen, Enpleguaren eta Ekintzailetzaren errektoreordeak proposatuta, 2024ko martxoaren 6ko Gobernu-kontseiluaren ohiko bilkuran kideek adostu ondoren, hartu da,
ERABAKIA:
Lehena.–Onestea eranskinean jasotako haztapen-parametroak, batxilergoaren ebaluazioa unibertsitatean sartzeko azterketetan gainditutako irakasgaiei dagozkionak, Nafarroako Unibertsitate Publikoan emanen diren graduko irakaskuntza ofizialetan sartzeko nota kalkulatu ahal izateko.
Bigarrena.–Erabaki honen bidez onetsitako haztapen-parametroak aplikatuko dira 2024-2025 ikasturtean unibertsitatean sartzeko.
Hirugarrena.–Erabaki hau jakinaraztea Ikasleen, Enpleguaren eta Ekintzailetzaren errektoreordetzari, Ikaskuntzen Errektoreordetzari, Irakaskuntza Zerbitzuari eta Sarbidea, Bekak eta Tituluak Atalari.
Laugarrena.–Erabaki honek indarra hartuko du Nafarroako Aldizkari Ofizialean argitaratu eta biharamunean.
Bosgarrena.–Erabaki honen aurka administrazioarekiko auzi-errekurtsoak jartzen ahal dira, Nafarroako Aldizkari Ofizialean argitaratu eta biharamunetik hasita bi hilabeteko epean, Nafarroako Justizia Auzitegi Nagusiaren arlo bereko epaitegiari zuzenduak, Unibertsitate Sistemari buruzko martxoaren 22ko 2/2023 Lege Organikoaren 28.4 artikuluan eta Nafarroako Unibertsitate Publikoaren Estatutuen 144.1 artikuluan jasotakoarekin bat.
Iruñean, 2024ko martxoaren 6an.–Errektorea, Ramón Gonzalo García.
ERANSKINA.–Haztapen-parametroak (DOC).
Iragarkiaren kodea: F2403953
