1. NAFARROAKO FORU KOMUNITATEA
1.7. BESTELAKOAK
129E/2024 EBAZPENA, otsailaren 26koa, Ingurumeneko zuzendari nagusiak emana, zeinaren bidez ingurumen txosten estrategikoa ematen baita Burlatako Udal Plan Orokorraren determinazio egituratzaileen aldaketa puntualari buruz, 1. poligonoko 1382. lurzatia-S-EQ3 ekipamenduaren inguruari eragiten diona (1. poligonoko 1595. lurzatia). Aldaketaren sustatzailea Centros de Formación Social SA da.
Aldaketa horri hasierako onespena eman zion Burlatako Udalak 2023ko irailaren 28an, eta iragarki baten bidez argitara eman zen 2023ko 217. Nafarroako Aldizkari Ofizialean, 217. zenbakian, urriaren 19koan.
Proposamenaren helburua da 1. poligonoko 1382. lurzatia "Irabia-Izaga ikastetxea" ekipamenduan sartzea, aparkaleku-erabilerarekin, eta, orobat, ahalbidetzea baratzezaintzarekin lotutako irakaskuntza-erabilerak ezar daitezela. Horretarako, aldaketak proposatzen du lurzoruaren sailkapena aldatzea, "arrisku naturalengatik babestu beharreko lurzoru urbanizaezina" eta "garapen eredua babesteko lurzoru urbanizaezina" izatetik hiri-lurzoru finkatugabea izatera igaroz.
Lurzatiak 1.941,212 m²-ko azalera du, eta La Morea nekazaritza-parajean kokatzen da. Lursail deprimitua da, inguruko lurrekin alderatuta. Bertan, ikastetxea eta Ezkaba kalea daude, zeinek Iruñeko hirigunearen ertza ixten baitute Txantrean. Eremua Argako alubioi-lautadan kokatuta dago, 419 metroko altitudean; ikastetxea eta Ezkaba kalea, berriz, betelaneko materialen gainean garatu dira, 423 metro inguruko kotan.
Proposamenak lurzatia ikastetxearen zerbitzura jartzen du, hiri-lurzoru finkatugabe gisa sailkatuta, eraikigarritasunik gabe, eta ez dakar hirigintza-zerbitzu berririk ezarri beharrik. Lurzatiko lurrak egungo hiri-ingurunearen kotaraino bete beharko dira.
Ingurumen agiri estrategikoak ezartzen du ez dela aurreikusten aldaketaren ondoriozko ingurumen aldaketa esanguratsurik, eta zenbait neurri zuzentzaile jasotzen ditu, aparkalekua gaitzeko fasean aplikatzekoak, aldaketa-proposamenean planteatutako ingurumen integrazioa hobetzen dutenak, hala nola: drainatzeko hiri-sistema jasangarri bat ezartzea, itzala emanen duten zuhaitz-eremuak finkatzea, bizikletentzako aparkalekuak ezartzea, ondoriozko ezpondak landareztatzea eta haien mantentze-lanak egitea eta betelanetako lurrak behar bezala kudeatzea.
Biodibertsitatearen eta Arrantza Kudeaketaren Zerbitzuak adierazi du ingurumen ebaluazio estrategiko sinplifikatuaren prozedura egoki egin dela.
Adierazitakoarekin bat, eta honako hauek ematen dizkidaten eskudantziak erabiliz: Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikulua, Nafarroako Foru Komunitateko Administrazioaren departamentuen egitura ezartzen duen Nafarroako Foru Komunitateko Lehendakariaren abuztuaren 17ko 10/2023 Foru Dekretua, eta Landa Garapeneko eta Ingurumeneko Departamentuaren oinarrizko egitura ezartzen duen abuztuaren 30eko 74/2023 Foru Dekretua,
EBAZTEN DUT:
1. Ingurumen txosten estrategikoa ematen da, aldekoa, Burlatako Udal Plan Orokorraren determinazio egituratzaileen aldaketa puntualari buruz, zeinak eragiten baitio 1. poligonoko 1382. lurzatia-S-EQ3 ekipamenduaren inguruari (1. poligonoko 1595. lurzatia, ingurumen ukipen nabarmenik eragiten ez duela iritzita. Aldaketaren sustatzailea Centros de Formación Social SA da.
2. Ingurumen agiri estrategikoan jasotako neurri zuzentzaileak "S-EQ3 zabaltzea" izeneko hirigintza-fitxan sartuko dira.
3. Ebazpen hau Nafarroako Aldizkari Ofizialean argitaratzea.
4. Ebazpen hau Hirigintza Atalari eta Burlatako Udalari jakinaraztea, behar diren ondorioak izan ditzan.
Iruñean, 2024ko otsailaren 26an.–Ingurumeneko zuzendari nagusia, Ana Bretaña de la Torre.
Iragarkiaren kodea: F2403599
