1. NAFARROAKO FORU KOMUNITATEA
1.7. BESTELAKOAK
572/2024 Ebazpena, 2024ko martxoaren 6koa, Nafarroako Unibertsitate Publikoko errektoreak emana. Haren bidez agintzen da argitara dadila "Erabakia, Nafarroako Unibertsitate Publikoko ohorezko goraipamenak emateko araudiaren aldaketa onesten duena", Gobernu Kontseiluak 2024ko martxoaren 6an hartutako erabaki baten bidez onetsia.
2003ko maiatzaren 12ko 110/2003 Foru Dekreturen bidez onetsitako Unibertsitateko Estatutuetako 40. artikuluak ematen dizkidan eskumenak erabiliz, agintzen dut argitaratzeko Gobernu Kontseiluak 2024ko martxoaren 6an hartutako erabakia, Nafarroako Unibertsitate Publikoko ohorezko goraipamenak emateko araudiaren aldaketa onesten duena.
"GOBERNU KONTSEILUAREN ERABAKIA, NAFARROAKO UNIBERTSITATE PUBLIKOKO OHOREZKO GORAIPAMENAK EMATEKO ARAUDIA ALDATZEN DUENA
Campus Iberus partzuergoak –Nafarroako Unibertsitate Publikoak, Zaragozako Unibertsitateak, Lleidako Unibertsitateak eta Errioxako Unibertsitateak osatzen dute– partzuergoaren estatutuak aldatu zituen 2024ko martxoaren 1eko bileran, eta, hala, partzuergoa osatzen duten lau unibertsitateek haren Errektoreen Kontseiluari esleitu zioten "honoris causa" doktoreak proposatu eta izendatzeko eskumena. Ondorio horietarako, partzuergoko "honoris causa" doktoreen inbestidura-ekitaldirako zeremonia espezifiko bat egitea onetsi zen; halaber, aurreikusi zen goraipamen hori emateko egiaztapen diploma bat emanen dela, betiere baldintza izanik lau unibertsitateek eman behar diotela onespena inbestidura horri, nork bere araudia erabiliz. Onespen hori lortzeko, beharrezkoa da partzuergoko Errektoreen Kontseiluak norbait "honoris causa" doktore izendatzeko proposamena lau unibertsitateei eramatea.
2023ko uztailaren 4ko 576/2023 Errege Dekretuak aldatu egiten du, besteak beste, doktoretzako ikasketa ofizialak arautzen dituen 2011ko urtarrilaren 28ko 99/2011 Errege Dekretuaren hirugarren xedapen gehigarria, zeinak hau ezartzen baitu: "unibertsitateek, beren araudian ezarritakoaren arabera, eskumena izanen dute ‘honoris causa’ doktore izendatzeko merezimendu akademiko, zientifiko, kultural, sozial edo espezifikoki pertsonalak kontuan harturik sari hori merezi duten pertsonak".
Xedapen gehigarri horretan ezarritakoaren arabera, Nafarroako Unibertsitate Publikoan "honoris causa" doktoretzaren goraipamena emateko, Gobernu Kontseiluak ohorezko goraipamenak emateari buruz 2006ko uztailaren 4ko erabaki baten bidez onetsitako araudian xedatutakoa bete behar da (2006ko abuztuaren 28ko 103. zenbakidun NAOan argitaratua).
Araudi horrek 4. artikuluan ezartzen du zein den "honoris causa" doktoretzaren goraipamena eta Unibertsitatearen urrezko domina emateko proposamena egiteko prozedura, hau ezartzen baitu 1. apartatuan: "Errektoreak egiten ahalko ditu goraipamen horiek emateko proposamenak, berak hala erabakirik edo beste norbaitek arrazoiak emanda eskaturik". Haren 5. artikuluan –sariak emateko prozedura ezartzen du– Gobernu Kontseiluari esleitzen dio ohorezko goraipamen horiek emateko eskumena, eta, hirugarren kapituluan –goraipamenak emateko ekitaldiei buruzko artikulua, 6. eta 7. artikuluek osatua–, hau xedatzen du:
"Ohorezko graduko inbestidura eta Urrezko Dominaren emanaldia hots handiko ekitaldi akademiko batean eginen dira" (6. artikulua); "Nafarroako Unibertsitate Publikoko errektoreak, unibertsitateko komunitate osoaren izenean, Honoris causa doktorea inbestituko du, ospe handiz, kasu horietan erabili ohi den protokoloari jarraituz. Lehenbizi, goraipamena emateko erabakia irakurriko da. Gero aitabitxi edo amabitxi izendaturiko pertsonak Honoris causa doktorea laudatuko du. Geroago, izaera horren bereizgarriak ezarriko zaizkio. Azkenik, Honoris causa doktore berriak zin eginen du" (7.1 artikulua, "honoris causa" doktoretzaren goraipamenaren inbestidura-ekitaldia arautzen duena) ; eta "Inbestidura ekitaldia bukatzean, Honoris causa doktore berriak bere ikasgai magistrala emanen du" (7.2 artikulua).
Idazkari nagusiak, Campus Iberus partzuergoko Errektoreen Kontseiluaren 2024ko martxoaren 1eko bileran hartutako erabakiarekin bat etorriz, kontuan harturik ezen araudi horren 4.1 artikuluak aukera ematen duela Campus Iberus partzuergoak "Honoris causa" doktoretzaren goraipamena eman dadila proposatzeko –proposamena "arrazoiak emanda eskaturik" egin daitekeela xedatzen baitu–, 6. eta 7. artikuluak aldatzea proposatu du, partzuergo-erabaki horren eraginpean dauden Unibertsitatearen Araudiaren aginduak baitira.
Azaldutakoagatik, idazkari nagusiaren proposamena ikusirik, honako hau da Gobernu Kontseiluak 2024ko martxoaren 6an hartu duen,
ERABAKIA:
Lehenbizikoa.–Onestea Nafarroako Unibertsitate Publikoak ohorezko goraipamenak emateko duen araudiaren 6. artikuluaren aldaketa –araudi hori Gobernu Kontseiluaren 2006ko uztailaren 4ko erabaki baten bidez onartu zen–. Aldaketa paragrafo bat gehitzea da, honela:
Partzuergoak erabakiko du nola eginen den Iberus Campus partzuergoaren "honoris causa" doktoreak inbestitzeko ekitaldi akademikoa.
Bigarrena.–Onestea ohorezko goraipamenak emateko araudiaren 7. artikuluaren aldaketa, Gobernu Kontseiluaren 2006ko uztailaren 4ko erabaki baten bidez onetsia (2006ko abuztuaren 28ko 103 zenbakidun NAOan argitaratua). Aldaketa 3. apartatua gehitzea da, honela:
3.–Aurreko bi apartatuetan xedatutakoa ez zaie aplikatuko Campus Iberusek "honoris causa" doktore izendatzeko egindako proposamenei. Nafarroako Unibertsitate Publikoko Gobernu Kontseiluak goraipamen hori ematea onetsi ondoren, erabaki hau Partzuergoko Errektoreen Kontseiluari helaraziko zaio.
Campus Iberuseko "honoris causa" doktoretzaren goraipamena eta dagozkion inbestidura- eta zeremonia-ekitaldiak partzuergo honen araudian ezarritakoaren arabera eginen dira.
Hirugarrena.–Erabaki hau jakinaraztea Zaragozako Unibertsitateari, Lleidako Unibertsitateari, Errioxako Unibertsitateari eta Campus Iberus partzuergoko Errektoreen Kontseiluko lehendakariari.
Laugarrena.–Erabaki hau Nafarroako Aldizkari Ofizialean eta Nafarroako Unibertsitate Publikoaren iragarki ohol elektronikoan argitaratzea.
Bosgarrena.–Nafarroako Aldizkari Ofizialean argitaratu eta biharamunean hartuko du indarra erabaki honek.
Seigarrena.–Unibertsitate Sistemari buruzko 2023ko martxoaren 22ko 2/2023 Lege Organikoaren 38.4 artikuluan eta Nafarroako Unibertsitate Publikoaren Estatutuen 144.1 artikuluan ezarritakoari jarraikiz, erabaki honek administrazio bidea agortzen du, eta erabaki honen aurka interesdunek zilegi dute Nafarroako Aldizkari Ofizialean argitaratu eta hurrengo egunetik aurrera administrazioarekiko auzi-errekurtsoa jartzea Nafarroako Justizia Auzitegi Nagusiko administrazioarekiko auzien epaitegietan, bi hilabeteko epean.
Iruñean, 2024ko martxoaren 6an.–Errektorea, Ramón Gonzalo García.
Iragarkiaren kodea: F2403952
