Iragarkia

5. ALDIZKARIA - 2024ko urtarrilaren 8a

1. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Oposizioak eta lehiaketak. Lan publikoaren eskaintza

323/2023 EBAZPENA, abenduaren 13koa, Hezkuntza Departamentuko Irakasleak Hautatzeko eta Lanpostuak Betetzeko Zerbitzuko zuzendariak emana, zeinaren bidez deialdi bat argitaratzen baita ikastetxeetan berariazko proiektuak edo programak aztertu eta ezartzeko lanpostu batzuk zerbitzu-eginkizunetan betetzeko.

Apirilaren 30eko 37/2014 Foru Dekretuaren bidez, Nafarroako Foru Komunitateko Administrazioaren unibertsitateaz kanpoko irakasleen lanpostuak nola bete arautu zen. Aipatutako arauak ezartzen duenez, oro har, Hezkuntza Departamentuak deialdiak eginen ditu ikastetxeetan hastear diren edo hasi berriak diren berariazko programa edo proiektuak aztertu edo ezartzeko lanpostuak zerbitzu-eginkizunetan betetzeko. Proiektua edo programa zein gairi lotuta dagoen, haren gaineko eskumena duen organoak proposaturik eginen dira deialdiak, aipatu proiektu edo programen bidez Hezkuntza Departamentuak zer arlo estrategiko sustatu nahi duen zehaztu eta gero.

Horrenbestez, jaso ondoren 2024-2025 ikasturtean aztertu eta ezarri nahi diren programa eta proiektuetarako proposamenak, Hezkuntza Departamentuko zerbitzu eskudunek eginak, bidezkoa da deialdia onestea ikastetxeetan berariazko proiektuak edo programak aztertu eta ezartzeko lanpostu batzuk zerbitzu-eginkizunetan betetzeko.

Horiek horrela, Hezkuntza Departamentuko Langileriaren eta Azpiegituren zuzendari nagusiaren abuztuaren 31ko 1/2023 Ebazpenaren bidez eskuordetutako eskudantziak erabiliz,

EBAZTEN DUT

1. Onestea ikastetxeetan berariazko proiektuak edo programak aztertu eta ezartzeko lanpostu batzuk zerbitzu-eginkizunetan betetzeko deialdiaren oinarriak.

2. Ebazpen hau eta I. eranskina Nafarroako Aldizkari Ofizialean argitaratzea, eta gainerako eranskinak, II.etik LXVIII.era artekoak, Hezkuntza Departamentuko web-orrian (https://www.educacion.navarra.es/eu/web/dpto/inicio) argitara daitezen agintzea.

3. Ebazpen hau eta eranskinak igortzea, behar diren ondorioak izan ditzaten, Idazkaritza Tekniko Nagusira; Irakasleak Hautatzeko eta Lanpostuak Betetzeko Zerbitzuko Lanpostuak Betetzeko Atalera; Inklusio, Berdintasun eta Bizikidetza Zerbitzura; Antolamendu, Prestakuntza eta Kalitate Zerbitzura; Eleaniztasunaren eta Arte Ikasketen Zerbitzura; Lanbide Heziketaren Plangintza eta Integraziorako Zerbitzura; Lanbide Heziketaren Modernizaziorako eta Berrikuntzarako Zerbitzura eta Hezkuntzako Teknologien eta IKT Azpiegituren Zerbitzura.

DEIALDIAREN OINARRIAK

Lehenbizikoa.

Deialdia onesten da, ikastetxeetan berariazko proiektuak edo programak (I. eranskinean biltzen direnak) aztertu eta ezartzeko lanpostu batzuk zerbitzu-eginkizunetan betetzeko.

Bigarrena.–Izangaien betebehar orokorrak.

Deialdi honetan parte hartzen duten izangaiek baldintza orokor hauek bete beharko dituzte onartuak izateko:

–Nafarroako Gobernuaren Hezkuntza Departamentuaren menpeko irakaslea izatea, funtzionarioa edo lan-kontratudun finkoa, eta 2024ko irailaren 1ean jarduneko zerbitzu egoeran egotea.

Orobat, izangaiek ebazpenaren eranskinetan lanpostu bakoitzerako eskatzen diren berariazko baldintzak bete beharko dituzte.

Hirugarrena.–Parte hartzeko eskabidea.

1. Deialdi honetan parte hartu nahi dutenek Nafarroako Gobernuaren www.nafarroa.eus web-orrian eskuragarri dagoen eskaera-orria bete beharko dute, horretarako diseinatutako fitxan, eta, bete ondoren, Erregistro Orokor Elektronikoaren bidez aurkeztu beharko dute, Hezkuntza Departamentuko Irakasleak Hautatzeko eta Lanpostuak Betetzeko Zerbitzuari zuzenduta.

Parte hartzeko baldintza orokorrak betetzen direla ofizioz egiaztatuko du Hezkuntza Departamentuko Irakasleak Hautatzeko eta Lanpostuak Betetzeko Zerbitzuak, izangaien espediente pertsonalaren arabera. Era berean, Irakasleak Hautatzeko eta Lanpostuak Betetzeko Zerbitzuak ofizioz egiaztatuko du izangaiak dagozkien irakasleen kidegokoak, espezialitatekoak eta hizkuntzakoak edo lanpostu parekatukoak direla, eta, kasua bada, dagozkien profilak dituztela.

Laugarrena.–Eskabideak aurkezteko epea.

Eskabideak aurkezteko, hamar egun balioduneko epea izanen da, deialdi hau Nafarroako Aldizkari Ofizialean argitaratu eta biharamunetik hasita.

Bosgarrena.–Izangaien onarpena.

1. Eskaerak aurkezteko epea iraganik, Irakasleak Hautatzeko eta Lanpostuak Betetzeko Zerbitzuko zuzendariaren ebazpena Nafarroako Gobernuaren web-orrian argitaratuko da, izangai onartu eta baztertuen behin-behineko zerrendarekin. Baztertuen kasuan, ez onartzeko arrazoiak agertuko dira.

Aipatu ebazpena argitaratuta, interesdunei egin beharreko jakinarazpena egin zaiela ulertuko da, Administrazio Publikoen Administrazio Prozedura Erkideari buruzko urriaren 1eko 39/2015 Legearen 40. artikuluan eta hurrengoetan xedatutakoaren ondorioetarako.

Zerrenda horien kontra interesdunek erreklamazioak aurkezten edo parte hartzeko eskaeran egindako akatsak zuzentzen ahalko dituzte, Irakasleak Hautatzeko eta Lanpostuak Betetzeko Zerbitzuari zuzendutako eskaera telematiko baten bidez, hamar egun balioduneko epean, argitaratu eta biharamunetik hasita.

2. Epe hori iraganik, Irakasleak Hautatzeko eta Lanpostuak Betetzeko Zerbitzuko zuzendariaren ebazpena argitaratuko da, bitarteko berberak erabiliz, izangai onartu eta baztertuen behin betiko zerrendarekin. Baztertuen kasuan, ez onartzeko arrazoiak agertuko dira.

Aipatu ebazpena argitaratuta, interesdunei egin beharreko jakinarazpena egin zaiela ulertuko da, Administrazio Publikoen Administrazio Prozedura Erkideari buruzko urriaren 1eko 39/2015 Legearen 40. artikuluan eta hurrengoetan xedatutakoaren ondorioetarako.

Seigarrena.–Hautapen sistema.

1. Hautatua izan ahal izateko, izangaiak nahi duen lanpostuaren eginkizunei lotutako memoria edo proiektu bat aurkeztu eta defendatu beharko du, ebazpen honen eranskinetan agertzen diren zehaztapenekin bat.

Memoria edo proiektuaren aurkezpena eta defentsa baloratzeko, 0tik 10era bitarteko puntuazioa emanen zaio, eta gutxienez 5 puntu lortu ez dutenak baztertuko dira.

Lortzen den puntuazioa hautapen organoko kideek emandakoen batezbesteko aritmetikoa izanen da, milarenera biribilduta.

Izangai bakoitzak hautapen organoari azaldu beharko dio memoria edo proiektua, ahoz, 30 minutuz gehienez. Gero, hautapen organoak eginen dizkion galderak erantzun beharko ditu, ahoz, 15 minutuz gehienez.

Prozedura hasteko, izangaiak hautapen organoaren aurrean aurkeztuko dira eta memoriaren edo proiektuaren kopia bat emanen diote. Aurkezpen ekitaldira joaten ez diren edo memoriaren edo proiektuaren kopia ematen ez duten izangaiak hautapen prozeduratik baztertuko dira, eta ez da zilegi izanen beste pertsona batzuk haien ordez agertzea.

Aurkezpen eta defentsa ekitaldietara joateko deia Irakasleak Hautatzeko eta Lanpostuak Betetzeko Zerbitzuko zuzendariaren ebazpenaren bidez eginen zaie izangaiei, prozeduran onartzen diren izangaien behin betiko zerrenda onesteko ebazpen berean hain zuzen, zeina Nafarroako Gobernuaren webgunean argitaratuko baita gutxienez 48 ordu lehenago. Ebazpen horretan hautapen organoen aurreko jarduketa noiz, zer ordutan eta non hasiko den adieraziko da. Deialdi bakarra eginen da izangai guztientzat. Izangaiek bertan egon beharko dute hautapen organoak jarduketak hasteko ezarritako orduan. "Ez aurkeztutzat" joko dira hasierako deia egiten denean agertzen ez diren izangaiak.

Izangaiek jarduketa horretan parte hartzeko ordena Hezkuntza Baliabideen zuzendari nagusiak otsailaren 21ean emandako 66/2020 Ebazpenean ezarritakoaren arabera erabakiko da.

2. Izangaien balorazioa bukaturik, hautapen organo bakoitzak behin-behineko kalifikazioak eta esleitutako puntuazioak igorriko dizkio Irakasleak Hautatzeko eta Lanpostuak Betetzeko Zerbitzuari, eta horrek Nafarroako Gobernuaren webgunean (www.nafarroa.eus) argitaratuko ditu.

Puntuazioan berdinketarik baldin badago, hautapen organoak honako hau hartuko du kontuan berdinketa hori hausteko: izangaiek funtzionario gisa duten antzinatasuna deitutako lanpostu bakoitzean aritu ahal izateko baldintza gisa eskatutako irakasleen kidego(et)an edo lanpostu parekatuetan. Berdinketak badirau, kontuan hartuko da Hezkuntza Baliabideen zuzendari nagusiak otsailaren 21ean emandako 66/2020 Ebazpenean ezarritako zozketaren emaitza.

Kalifikazioen kontra izangaiek erreklamazioak aurkezten ahal dizkiote Irakasleak Hautatzeko eta Lanpostuak Betetzeko Zerbitzuari, argitara eman eta biharamunetik hasita bi egun balioduneko epean.

Erreklamazioak ebatzi ondoren, hautapen organoak Irakasleak Hautatzeko eta Lanpostuak Betetzeko Zerbitzura igorriko du prozeduraren espediente osoa, barnean sartuta behin betiko kalifikazioak, zeinak Nafarroako Gobernuaren webgunean argitaratuko baitira (www.nafarroa.eus).

3. Deialdi honen xedeko zerbitzu-eginkizunak Irakasleak Hautatzeko eta Lanpostuak Betetzeko Zerbitzuaren ebazpen baten bidez emanen dira, izangaiak hautatzen diren ordenaren arabera.

Zazpigarrena.–Hautapen organoa.

1. Hautapen organoak hiru kidek osatuko dituzte; horietako bi Hezkuntza Zuzendaritza Nagusiak edo Lanbide Heziketako, Digitalizazioko eta Hezkuntza Zerbitzuetako Zuzendaritza Nagusiak proposatuko ditu, eta bestea Langile Irakasleen Batzordeak.

Hautapen organoak Irakasleak Hautatzeko eta Lanpostuak Betetzeko Zerbitzuko zuzendariaren ebazpen bidez izendatuko dira. Horiek eratu ondoren, jakitera emanen dira, deialdiaren fitxan, proiektu edo programa bakoitzerako balorazio irizpideak.

2. Hautapen organoetako kideek parte hartzeari uko egin beharko diote, eta organo deitzaileari horren berri eman, baldin eta Sektore Publikoaren Araubide Juridikoari buruzko urriaren 1eko 40/2015 Legean abstentziorako aipatzen diren egoeretako batean badaude.

Izangaiek, halaber, zilegi dute hautapen organoak errekusatzea, egoera horietako bat gertatzen denean.

Zortzigarrena.–Zerbitzu-eginkizunen araubidea.

1. Proiektu edo programa hauei dagozkien lanpostuak zerbitzu-eginkizunetan beteko dira, bi ikasturtez gehienez, haiek ezarriak dituzten ikastetxeetan, 2024ko irailaren 1etik hasita. Salbuespenez, eta beren eranskinean horrela ezarrita daukaten proiektu edo programetarako bakarrik, zerbitzu-eginkizunetarako hiru ikasturteko iraupena ezarriko da.

2. Zerbitzu-eginkizunak emateko ezinbestekoa izanen da esleitutako ikastetxean kasuan kasuko espezialitatean eta hizkuntzan, baita hala badagokio profilean ere, lanpostu hutsen bat izatea, ikasturte bakoitzerako hezkuntza plangintzaren arabera aurreikusitako beharrak zein diren zehaztu ondoren.

Zerbitzu-eginkizunak emanen dira, beraz, espezialitateko, lanpostuko, hizkuntzako eta, kasua bada, profileko beharretarako, baldin eta behar horiek kasuan kasuko proiektuko baldintzen artean badira.

Izangaiak kasuan kasuko proiektu edo programarako baldintza gisa sartu diren espezialitateetako edo lanpostu parekatuetako baten baino gehiagoren titularrak direnean, esleituko zaien lanpostu hutsa izanen da parte hartzeko eskaera egitean atxikita duten espezialitate edo lanpostu parekatu, hizkuntza, eta, kasua bada, hizkuntza-eskakizun berekoa. Lanpostu hutsik ez badago espezialitate edo lanpostu parekatu horretan, administrazioak zehaztuko du zer lanpostu huts esleituko zaien, ikastetxeak proposatuta.

3. Deialdi honen ondorioz ematen diren zerbitzu-eginkizunak arrazoi hauetako batengatik bukatuko dira:

a) Aldi jakin baterako eman zirelako eta aldi hori bukatu delako.

b) Ikastetxea kentzea edo aldatzea, baldin eta aldaketa horrek ezinezkoa egiten badu zerbitzu-eginkizun horietan jarraitzea.

c) Interesdunak berariaz uko egiteagatik.

d) Gerora sortutako arrazoiak, honako hauen ondorioz: lanpostua betetzeko gaitasun edo egokitzapen falta, langilearen errendimendu eskasak agerian uzten duelako ezin dituela emandako eginkizunak eraginkortasunez bete, edo edukia aldatzea.

Aipatu arrazoi horiengatik zerbitzu-eginkizunak bukatu aurretik, deialdia proposatu duen organoak txosten arrazoitu baten bidez eskatuko dio Langileen Araubide Juridikoaren Zerbitzuko zuzendariari hasiera eman diezaiola zerbitzu-eginkizunak bukatzeko prozedurari.

Prozedura Langileen Araubide Juridikoaren Zerbitzuko zuzendariaren ebazpen bidez hasiko da. Ebazpena ikastetxeko zuzendaritzak igorritako txostenarekin batera igorriko da deialdia proposatu duen organora, honek egoki iritzitako jarduerak egin ditzan, interesdunari eta Langile Irakasleen Batzordeari entzun ondoren.

Bidezko jarduketak egin ondotik, deialdia proposatu duen organoak betetako lanpostuari atxikitako langilearen gaitasuna eta egokitzapena baloratzeko txostena eginen du eta Langileen Araubide Juridikoaren Zerbitzura igorriko du.

Txosten hori negatiboa bada, zerbitzu-eginkizunei bukaera emanen zaie, Langileen Araubide Juridikoaren Zerbitzuaren ebazpen baten bidez.

e) Jarduneko zerbitzua ez den zeinahi beste egoera administratibotara pasatzea.

f) Administrazioan beste lanpostu baterako izendatua izatea.

g) Langileari beste zerbitzu-eginkizun bat ematea, dela Nafarroako Foru Komunitatearen Administrazioaren eta haren erakunde autonomoen barnean, dela beste edozein administrazio publikotan.

h) Zerbitzu-eginkizunak emateko arrazoia izan zen beharra desagertu izana, ikastetxean behin betiko destinoa duten irakasleek lanpostu hori bete dutelako.

i) Baldintzak gerora ez betetzea.

Behar bezala justifikatutako aparteko kasuetan izan ezik, zerbitzu-eginkizunak aurreikusitako epea baino lehen bukatzen badira b eta c letretan ezarritako arrazoiren bat suertatzeagatik, ikasturtearekin batera bukatu beharko da zerbitzualdia.

4. Zerbitzu-eginkizunak hasi baino lehen aurreko atalean adierazitako arrazoi bat (a eta d letretakoak izan ezik) gertatzen denean, ez da zerbitzu-eginkizunik emanen.

5. Zerbitzu-eginkizun hauek ez dira bateragarriak maiatzaren 14ko 39/2014 Foru Dekretuan ezarritako baimenekin (haren bidez, Nafarroako Administrazio Publikoetan enplegua banatzeko neurriak ezarri ziren).

Horrenbestez, funtzionarioak horrelako baimenen bat esleiturik badu baina oraindik hasi ez baldin bada, baimenari uko egin beharko dio, baldin eta deialdi honetan ezarritako zerbitzu-eginkizunak onartzea nahi badu. Orobat, funtzionarioari zerbitzu-eginkizunak onartu bazaizkio edo jadanik zerbitzu-eginkizunetan ari bada eta aipatutako baimenen bat eskatzen badu, baimena ukatuko zaio.

6. Deialdi honen bidez bete gabeko lanpostuak, izangai bakar bat ere aukeratu ez delako, behin bakarrik bete daitezke zerbitzu-eginkizunen araubidean, eskumena duen organoak egindako proposamen arrazoituaren ondoren, baldin eta interesdunak deialdiaren baldintzak betetzen baditu eta iraupena ikasturte batekoa baldin bada.

Bederatzigarrena.–Errekurtsoak.

Hautapen organoen egintza eta ebazpenen kontra gora jotzeko errekurtsoa jartzen ahalko da, Hezkuntza Departamentuko Irakasleak Hautatzeko eta Lanpostuak Betetzeko Zerbitzuko zuzendariari zuzendua, hilabeteko epean, errekurtsoaren xede den egintza argitaratu edo jakinarazi eta biharamunetik hasita.

Ebazpen honen eta berau aplikatzeko egintzen kontra gora jotzeko errekurtsoa jar daiteke, Barneko, Funtzio Publikoko eta Justiziako Departamentuko kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunetik aurrera.

Hori guztia bat etorriz Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legean xedatutakoarekin eta Administrazio Publikoen Administrazio Prozedura Erkideari buruzko urriaren 1eko 39/2015 Legearen 121. eta 122. artikuluei jarraikiz.

Iruñean, 2023ko abenduaren 13an.–Irakasleak Hautatzeko eta Lanpostuak Betetzeko Zerbitzuko zuzendaria, Ricardo Iribas Latour.

I. ERANSKINA.–A) INKLUSIO, BERDINTASUN ETA BIZIKIDETZA ZERBITZUAK PROPOSATUTAKO PROGRAMAK

B) LANBIDE HEZIKETAREN MODERNIZAZIORAKO ETA BERRIKUNTZARAKO ZERBITZUAK PROPOSATUTAKO PROGRAMAK

C) ANTOLAMENDU, PRESTAKUNTZA ETA KALITATE ZERBITZUAK PROPOSATUTAKO PROGRAMAK

D) LANBIDE HEZIKETAREN PLANGINTZA ETA INTEGRAZIORAKO ZERBITZUAK PROPOSATUTAKO PROGRAMAK

E) ELEANIZTASUNAREN ETA ARTE IKASKETEN ZERBITZUAK PROPOSATUTAKO PROGRAMAK

F) HEZKUNTZAKO TEKNOLOGIEN ETA IKT AZPIEGITUREN ZERBITZUAK PROPOSATUTAKO PROGRAMAK

Iragarkiaren kodea: F2317450